دق الباب وجانا جريت ليه حفيانة !!!!

الأخوة الأعزاء صبحكم الله بالخير إذا كانت الدنيا صباح ومساكم الله بالخير إذا كانت مساء وكل في فلك


يسبحون .


طبعا أكيد زهجتوا من المواضيع الجافة في المنبر , إغتيال , إعدام , إغتصاب , جهاز مغتربين , دولار


دينار , الجنيه الجديد إلخ عشان كدا لازم تكون في مساحة للضحك وطبعا أنا ذاتي زهجانة الأيامات دي


الأولاد بمتحنوا في الحقيقية نحنا البنمتحن هم آخر همهم وبعدا دا كله بنجحوا ولا واحد فيهم سقط ولا


عاد ياربي دا من شنو ؟ ولا إحنا الإتخميمنا غايتو قرينا جنس قراية لمن أولاد الجامعة حردو لينا


المكتبة ومشوا قعدوا في سينما البلو نايل وأولاد شندي والباوقة وأم الطيور والمتمة والمحمية عشان


جعليين زعلهم كان حار شديد مشوا قعدوا مع الشماشة في ميدان أبوجنزير ونحنا ما اشتغلنا ليك بيهم


شغلة قرينا ونجحنا ولما طلعت النتيجة في البورد مساكين الربت ربت والرست رست معليش ياجماعة أنا


طلعت برة من الموضوع الأساسي سامحوني ما كانش (أصدي ) الموضوع يا جماعة الخير لما الواحد يزهج


من القراية الجادة بيقوم يشوف صحف التابلويد أو المجلات الهايفة البتجيب أخبار النجوم فلانة


عرسوها وفلانة طلقوها وفلتكانة عملت عملية تجميل وفلان مسكوا بوليس الآداب مع بنت ليل مع إنه


القضايا الأخلاقية بقت في وضح النهار ومش محتاجة لليل بالله صححوا لبوليس الآداب معلوماته القديمة


دي المهم ولما الواحد يزهج من الغنا الجاد حق ناس ام كلثوم ليديز فيرست ومحمد وردي وعثمان حسين


وكابلي ومحمد الأمين وعبدالحليم حافظ بيقوم يدق الباب لبنات الجيران وبطلب منهم شرايط غنا البنات


خصوصا الطالعات في الكفر زي ناس قسمة وعلوية كوبر وستونة ونصرة الله يطراها بالخير شكلها كدا اعتزلت


الغنا الهابط المهم كلما أفتح شريط ألقى أغنية حنانة نسى أهلو ما نسانا وكل ما أمشي حفلة تبدأ


بنفس الأغنية وبحماس شديد لدرجة إني إعتقدت إنه ناس بسط الأمن الشامل بوزعوها مع مواعيد نهاية


الحفلة ولا ياربي هي في المقرر بتاع المنهج المدرسي والله عايزة إجابة .. ثانية غنا البنات رغم


إنو بيعبر عن الوضع الإجتماعي سواء كان منتحر أو مزدهر إلا انني لم أسمع بأي بلد آخر عنده غنابنات


غير السودان يا سلام على بناتنا المتخصصات في الغنااللي ماسبقهم زول عليه .., ثالثا لما كنا


في الثانوي العام طبعا دي بتشعرني بأني مازلت صغيرة متشبسة بالشباب كنا نلقي شعر جميل في


الجمعية الأدبية ولما تقوم واحدة تتفذلك وتكون عايزة تحرج قارئة الأبيات تسألها من هو شاعر


هذه القصيدة فترد المسكينة ليس لها شاعر وتعتبر الإجابة صحيحة ديل المدرسات ولا بلاش !!! المهم


غنا البنات بالرغم من إنو ليس له شاعر ولا ملحن لكن ينتشر كالنار في الهشيم وفي جميع الولايات


عشان كدا أنا قلت أعمل دراسة فيه وندمت إني عملت لدكتور صلاح الدين المليك رحمه الله دراسة عن غنا


الحقيبة لما كنت في الجامعة طبعا كانت شلاقة مني عموما أنا عايزة أعمل تشريح معليش يادكاترة تعدي


على المهنة لغنا البنات الحلوات فأرجو المساعدة ولنبدأ بحنانة...,


حنانة نسى أهلو مت نسانا.....


كيفن يابتي تثقي ليك في زول بنسى أهله ومنو القال ليك بكرة ما بنساك كدي فكري كويس في الكلام دا .


دق الباب وجانا جريت ليه حفيانة ....


ليه ؟؟؟ مافي شباشب في البيت ولا شنو ؟؟ وتعالي يا أختي تجري ليه ليه؟؟ خفة وطيارة ولا شنو؟؟ أتقلي


يا بتي التقل صنعة .. البتجري ليه حفيانة دا صدقيني ما حيعرسك ..


دق الباب بشدة جريت ليه مستعدة ...


مستعدة كيف يعني ؟ شايلة بوكيه الورد ولا الساطور ؟


أنا قايلة حمادة لقيتو سيد العدة ...


يعني مافي فرق بين طرقات حمادة وسيد العدة سجم خشمك خمي وصري . وبعدين البجيكم بدون مواعيد دا


واحد همجي وسبهللي يستاهل تفتكريه سيد العدة .


دق الباب بيي طوبة .. فتحت ليه حبوبة ...


شوفي عاد أنحدثك البدق الباب بي طوبة دي أكيد شماشي ولا حرامي وبعدين حبوبة تفتح الباب ليه ما في


صغار في البيت ؟ والله قلة أدب وعدم تربية .


دا كله من جدو جدو ربنا يهدو...


لكم الله أيها الأجداد والحبوبات أنا بقترح عليكم تمشوا برنامج أسماء في حياتنا عشان تقصروا عمركم.


دا كله من بابا بابا علا البوابة ...


عشان لقاكي خفيفة ولفيفة وقليلة أدب .


تاكل في صحانتنا الخاينة خانتنا ...


يا اختي أنتو فاتحين مطعم ولا شنو؟


دا كله من وائل وائل قفل الموبايل لا مس كول ولا رسايل...


يغور في ستين داهية عايزة بيه شنو دا إذا كان من هسة بقفل منك الموبايل لما يعرسك حيعمل شنو؟


أشكركم على الصبر ولو عندكم أي أغنية عايزة تحليل أكتبوها وليكم علي .

عواطف

الله يديك العافيه

دعوة مع صلاة الصبح

لقد جعلتي يومي

الأخ الحبيب سيف مساعد


تحياتي


يا وأدمي صاحي بدري كدي مالك ؟؟ الفرق بينا وبينكم تلاتة ساعات ربنا يعينكم على البرد ودرجةالحرارة


التحت الصفر .

الاخت عواطف

الفجر طلع الوقت عندنا صلاة الصبح

عواطف...

صباح سكر....

والله متة من الضحك، والله مرة في بتنا،تصوري، وبنات اختي الصغار، شايلات جركانة وهاك يا غنا (حنانة نسى أهلو ما نسانا)، ولا أدري إلا الأن لم اخترن هذه الأغنية، لكلماتها، أم لحنها، ام بساطتها، ولم اسئلهن، لأنهن كن غارقات في التطريب، وظللت اضحك من جوة قلبي...

لأغاني البنات (ولا أدري لم سميت اغاني بنات، قد يكون المؤلف والملحن والموزع رجل)، له نكهة خاصة، فهي (رغبات مندفعة بلا حساب، ساذجة، وبسيطة)، وتعبر بحق عن (خواطر الكثير من الرجال والنساء)، تلك الخواطر التي تمور بالاعماق، او الصراع الداخلي بين (النفس السفلى، والنفس العليا)، ...

والله مرة كنت قاعد مع خالتنا ست النفور، وجيران اخي في امتداد ناصر كان عندهم عرس، والفنانة ملمة بكل اغاني البنات، وكنت سعيدا بتعلقات الخالة على الغنا

ابشر وان شاء راجل مرة
وحنانه، وهي تعلق، وممغوصة، وزعلانة للحصل ده.......

ولكن تظل الحياة هكذا، براح طويل، يتجلي فيه الشر والخير، الحكمة والسذاجة، و... و..و...

والله شكرا ليك ياعواطف، اخرجتينا فعلا من نكد العوالم والشاشات المليئة بالدم والصراخ والتهور

أخي الغالي عبدالغني


تحيتي ومودتي وشكري على مداخلتك الظريفة جدا وفعلا غنا البنات يحتاج لبحث ودراسة أما حكاية


بالضرا بالضرا إنشاء الله رجل مرة دي تؤكد على أن العنوسة وصلت قمتها فارتفع أسهم رجال النسوان


في بورصة الزواج رغم أن سوق الأسهم وصل الحضيض .. معزتي .

سلامات يا أستاذة عواطف،،

بوست جميل ومفيد..

سيد الكارو تعال تعال
سيد الكارو بسروالك تعال

سيد الكارو تعال تعال
أخوي بلابسك تعال

لمزيد من التحليل ..

شكرا

ياسر

عواطف والله انا ما كنت عايزة اداخل لحدي ما لقيت الكارو، كاحد وسائل المواصلات، دخلت البوست، قررت ادخل باقي وسائل المواصلات بما فيها تلك التي لا تحتاج الى جربوكس وبنزين وبالتالي المنطقة الصناعية، بس بعد ما امر على الماركات اليابانية..
بعدين ، بيني وبينك، بقيت افوت شوية، فاذا لقيت اني شاركت بالمادة دي والتي اعددتها سابقا.. ارجو اخطاري حتى اعمل ليها updating
اها هاكي مشاركتي دي..

وسائل النقلx غناء البنات
(updated)

تعنت النساء قديماً فقلن:
انا يا حناني .. وانا يا بلالي
قول للمسافر ليك عودة تاني
انا ما كلمتو وانا ما المتو
ده وليد السادة .. وده درب عجلتو..

ككل الاشياء ليس هناك تاريخ بعينه أو شاعرة لهذه الاغنية.. ولحسها النسوي: تعم الفائدة كل النساء في بلادي فيطلق عليها أغانى البنات. لست هنا بصدد الكلام عن الشعر أو بحوره أو غيره لكنني يصدد تناول الظاهرة الاجتماعية والاقتصادية الكامنة وراءه.. وذلك وصولاً لفهم المجتمع السوداني..

واضح انه في ذلك الرمان الغابر، كان السودان يعيش انقي الاجواء وان بيئته كانت تضاهي بيئة اليابان من حيث قلة استعمال المحروقات والضوضاء . كما ان الدراجة ارتبطت بفئة ترفل في النعيم ، وان رؤية اثر أي دراجة علي الارض في المنطقة الفلانية ، تنبئك بأنها دراجة فلان بن فلان الفلاني. للدراجة اثر وربما سجل مثلها مثل البصمة او ال دي ان ايه، أو ان شاعرتنا من النساء المشهود لهن بالبراعة في اقتفاء الأثر(الدرب).

غير ان الوجه الآخر لوليد السادة ، لا يبدو وجهاً طيباً حسب الاغنية ، حيث يحتاج ذلك السيد الذي لم تسمه الاغنية، إلي قواعد وبروتوكولات لمخاطبته، وذلك لرقته وربما هشاشة بنيته والدليل من الاغنية عبارة : (انا ما كلمتو وانا ما ألمتو.) . يعني سي السيد حنكوش من زمان!!! وان ظاهرة " الحنكشة في الـ( main road ) في جامعة الخرطوم، ليست البداية وانما هي امتداد لارث ثقافي في الزمن الغابر .

مثل هذا السيد ينطبق عليه مقطع الشعر الذي يقول:

يا ستار علي زولن خليقتو دقاقة
يحفي من التري ويورد من الرقراقة

والَترى في العامية السودانية هو الارض المبتلة، بينما الرقراقة هي الضوء الخفيف الذي يتسرب عبر النافذة او الراكوبة او سقف المنزل الذي يوجد ضعف في بعض اجزائه.

اما المرأة التي يكثر اهلها او زوجها من الاهتمام بها ، يقال انهم او انه يعملون لها في "يا زبيدة ما تموعي" والزبيدة تصغير لكلمة زبدة. و تموع بمعني تذوب. أي انهم شديدو الحرص عليها، الامر الذي قد تكون له انعكاسات سلبية. كما انها شديدة الهشاشة.

أغنية اخري، لا تستسمح العربة التي يقودها ، احد عامة الناس، ولا ملامح الخيلاء او المجد الوقتي الذي تضفيه عليه قيادة السيارة شبه الفارهة:

سائق الهنتر وعامل فيها عنتر
بس لكن ما عنتر ، دي حركات في دفتر.
كدا كدا يا الترلة القاطرا قُنُدراني

بمعني ان العربة ليست قدر المقام ، كما انه يبدو انه يخطط لكي ينضم الي تلك الفئة، مظهراً وليس محتوي، ولكن هيهات. " بعيد يا سما الما بتنطلع بسلم." كما يقول المثل العامي.

الغريب ان البنات تغنين لمعظم وسائل المواصلات الحديثة و لكنهن لم يتنازلن للغناء لوسائل النقل الجماعي ورديفتها الوسائل التقليدية. ليس هناك ذكر للحمار او الجمل او الحصان او الثور ...الخ.

باستثناء القصيدة التي صاغتها شغبة المرغومابية في رثاء موسي ود جلي ، فارس بني جرار، حينما احضر حصانه الى القرية دونه.

يوم جانا الحصان مجلوب
وفوق ضهرو السرج مقلوب
ابكنو يا بنات حيي ووب.
حليل موسي الوسدوهو الطوب

ولا تنسي البنات وهن يتغنين للعربات ، من المرور بمحطات الوقود:

شل شل كب لي جالون
شل شل حسب القانون
الوابور جاز خلي يشتغل
الشغل بالجاز
خلي اللي يشتغل
في تَسَنَي خلي اللي يشتغل
حاول يلعب بَي

ثم تصل البنات الي ابدأء المعرفة ببعض امور الصيانة وتحديد مناطق العطل وربما اصلاح العطب في الكوبليه التالي:

وفي سنار
خلي اللي يشتغل
انحلج مسمار
خلي اللي يشتغل
انحلج مسمار
خلي اللي يشتغل
بطل العمال

ثم تأتي الفتيات، الي ذكر الماركات والتي تتصدرها الماركات اليابانية التي خاصة شركة التويوتا. فيستعمل الكلاكسون او (البوري) بالعامية السودانية، اداة للتنبيه وذلك كمدخل للاغنية

تايوتا تيت

مع الالتزام بتكرار هذا المقطع الكلكسوني:

تيت تيت تيت.

هذه الاغنية من اكثر الاغاني المستهلكة في رقصة العروس. ولها عند شل وتوتال وموبيل ، محطات الوقود المتعارف عليها في السودان، شأن كبير. والحمد لله ان العروس التي تقلد كل الحركات اثناء رقصها من قيادة السيارة الي الوقوف عند المحطات المذكورة انفاً ، لا تقوم باصدار صوت البوري من حلقها، وإلأ لصادر للحدث حديث آخر. اما محطات توتال وشل فان الذها ب اليها يكون علي طول:

لي موبيل نمشي طويل
ولي توتال عزة وراحة بال

ثم جاء عصر البيجو الفرنسية، فالحقت باغنية المهيرة، التي هي الاخرى لا تخرج عن تمجيد وسائل النقل البري..

المهيرة البيت فرشو
وديل نسابتك بالبيجو جو
النار يا عروسنا
العريسك غلبو الثبات

اما اغنية المهيرة ، وهي تصغير للمهرة وذلك للتمليح ، فقد توارت كثيراً وصارت في معظم الاحيان تتخذ مدخلاً لاغاني اخري. كيف لا والزمن ليس زمن جياد او خيل. ففي الوقت الذي كانت فيه جداتي يتغنين بالمهيرة، وتضيف قريحتهن اليها ابيات اخرى، تتماشي وطبيعة المنطقة.

المهيرة مهيرة السبق
يا الطيبك فاح بالحلة وعبق
يا ام كفيلاً صال وجال
يا ضميرا ً لف االسجار
الموت في شانك حلال

علي الرغم من عدم خلو الابيات من الوصف الحسي، الا ان ذلك كان شأن ذلك الزمان . ثم ان شاعرة الاغنية إمرأة تصف إمرأة جمال امراة اخري تعيش نفس الواقع الاجتماعي و ليس لها المام بالمفاهيم الحديثة من محاربة اضطهاد المرأة والعمل علي تقويتها، وذلك بتسليحها بالعلم والعمل والارتقاء بفهمها لوضعها الاجتماعي والدور الذي تلعبه والمنوط بها ادائه في المجتمع، والعمل علي محاربة اضطهاد المرأة مع المناداة بكامل الحقوق والحريات والأجر المتساوي للعمل المتساوي ، تلك المطالب التي ينسب الي تيار الفيمينيزم الريادة في رفعها.

ثم جاء عهد الميني بص او الحافلات، والتي اطلق عليها (العظمة)، لتشكل بذلك بداية النقل شبه الجماعي:

سايق العظمة سافر خلاني وين
يا ماشي لي باريس جيب لي معاك عريس
شرطا يكون لبيس
ومن هيئة التدريس

بينما في عهد البصات، ظهرت نغمة التشفي، حيث ان العريس الذي ان الحال ضاق به، قد ذهب بعروسه الى شهر العسل في المواصلات المعتادة ، مما جعلها تنقلب عليه ..تتمنى ان يعتقها الله منه، (بكير) عشان تشوف نصيبها مع واحد تاني، مستصحبة معها اخطاء التجربة الاولي:

باظ (بص) اللمين قلبو.. اي انقلب به
انا مالي بيه
انشا الله يجيب خبرو
انا مالي بيه
الباط اب كراسي
انا مالي بيه
سواقو شماسي
انا مالي بيه

هل يعقل ان توصف المرأة بتلك الصورة الكاريكاتورية، كما فعلت رابطة حلمنتيش، وذلك حينما رأي احد افرادها وكان طالباً في جامعة الخرطوم، احدي الفتيات وقد غلب عليها النعاس في المكتبة (main library):

يا سمحة لو تعبت عيونك امشي البركس واجيب معاي المرتبة
وجوزين حمام ومخدة من ريش النعام.

وفاتني ان اذكر انه ابتدر قصيدته تلك:

نعستي يا السمحة ام جضوم
يتجازي عاد دكتور فلان
تتهد كلية العلوم
دبابة تنزل فيها رف rough
وما تخلي عاد في الكيميا رف
وتلف هناك علي قسم النبات اهل التفف
في أي لاب اهديك من الاشواق قفف
وارسل اسمك للجرايد والصحف
دكتورة من غير امتحان !
لولا الطرافة التي تضمنتها الابيات لما اوردناها. فالمقام ليس مقامها...

السؤال الذي نود طرحه ، هو : لماذا الاهمال المتعمد لوسائل النقل الاخري؟ تشير اصابع الاتهام الي ان المدينة التي صارت هي الاخري ريفاً ، هي مصدر هذه الانماط الغنائية، فما كان من الريف الا ان زحف اليها وعمل على ترييفها، ليخلص حقه بذلك قديم وجديد..

ودمتم...

فتكم بعافية
برجع تاني كان اتذكرت

حليـمة

الحبيبة حليمة


تحياتي وكما عهدتك دائما سباقة لنشر المعرفة بطرق علمية وحرفية عالية ممهورة بالبعد الأكاديمي


والإجتماعي لذا أشعر أنك تحملين هموم المجتمع على أكتافك وقد راودني ذلك الشعور عندما قرأت بوستك


لوطنة العالم الذي أشبعته بحثا وتحليلا مما جعلني أفكر ألف مرة وأتساءل ماذا سأضيف لهذه الموسوعة


وهذا العلم الغزير رغم عدم تفهم البعض للهدف من طرح هذا الموضوع الهام فإلى المزيد من الطرح


ولن ينفعنا دفن الرؤوس في الرمال وفيما يتعلق بأغاني البنات فيبدو إنه وسائل المواصلات وجدت


نصيب الأسد فمثلا هناك من تقول يا سايق العربية .. العربية ..


عربيتك الأوبيل بتغير وضع الليل والليل كلامه كتير


عربيتك المرسيدس بمشي معاك محل ما بتمش


عربيتك الحمرا بتضوي في القمرا


وكمان نسيت ليك بيت مهم في أغنية حنانة


قالو أمه شمشارة أريدها وأحب شمارة


خلي بالك أمه يا تكون صحفية ولا مذيعة والله كان كدي الرماد كالنا أرجو التواصل يا عزيزتي فمنك


نستفيد ولك محبتي يا أستاذتنا الكبيرة مقاما وليس سنا .

الأخ العزيز ياسر


تحياتي وشكرا على المداخلة


طبعا صاحبتنا بتاعة الكارو دي شيطانة جدا لأنها عرفت إنو الكارو بقت أفضل من التاكسي ومت الأمجاد


وسيلة لنقل الناس والبضائع تو إن ون فعايزة شنو أكتر من كدا ؟

الاستاذه عواطف
شكرا على هذا البوست الجميل الطيف وطلعنا بيهو شويه من الغم واللت والعجن السودانى
واستمعنا بالتحليل وانا تحت تحت من المعجبين جدا بما يسمى اغانى البنات ولما اكون براى بسمعها وبجبجب وصاحبنا الباشمهندس ميرغنى من اولاد شمبات عندوا واحده جميله جدا اظنها حسبوا فى الدكان ومرتوا فى الدخان فيها كلام بتاع فوق 18 سنه كده لقى بت اختو عمرها سنتين حافظاها كلها وغنت ليهو ياريت تشوفيها لينا معاك واظن هنا ما حا يجونا ناس النظام العام انا غايتوا عندى حصانه تاكلوا ناركم انتى وضيوفك
وياريت الاخوان الرائعين انزولوا لينا كم واحده هنا نجبب بيهم باقى طولنا

لكى من التقدير الكثير

أخي العزيز جلال ناصر

تحياتي الصادقة وشكرا على مرورك اللطيف ايها المتججب الأممي أما أغنية حسبو في الدكان ومرتو في


الدخان دي لذيذة جدا يعني حسبو دا حيكون كل ناس الحلة حاسدنو عشان ما عايش أزمة عاطفية زي الباقين


طيب أسمع في واحدة بايرة بتقول


مليت مليت ياأب شرة مليت من قعاد البيت يا أب شرة

أوروروك أوروروك يا أب شرة إنشاء الله بالعروق يا أب شرة

اختى الحبيبه

كيفيك حبيبى



بالرغم من انه فى بعض اغانى من اغانى البنات جميله ومعبرة قدر ماتجى تلقى ليك

مصايب ماتقدرى تعرفى ليها اول ولا اخر


مثلا بركة الجيت بركة الجيت سمح انت وبسكويت


سمح انت وعربينك سمح انت وطاقيتك


والاعجب من ده كله الرد أأأأأأأأأأأى الاأأأأأأأأأأأأأأأأأى دى شنو مامعروفه

تسلمى حبيبه شديد

مجودة الحبيبة


حبي ومودتي


والله ضحكتيني شديد الغريبة الأغنية دي مقررة في كل الأعراس يعني أي عريس عسل وبسكويت حتى لوكان العسل


بعمل ليه حساسية وبعدين البسمع الأغنية دي بقول يادوبنا شفنا البسكويت وسمعنا بي العسل عشان كدا


بنغني ليه وآآآآآآآآآآآآآآآي دي عجيبة جدا يعني بقولوها بحماس وكأنهن في ساحة معركة ولا مظاهرة ضد


ثورة الإنقاذ اللي ما أنقذتنا من أي حاجة لغاية الآن وطبعا يا بعد عمري زي مابقولو ناس الخليج


البلاوي كتيرة جدا يعني مثلا واحدة تقول ما قصدي الخيانة دايرة يقيل معانا طبعا طالما في ريحة خيانة


معناهاالزول دا بحب واحدة تانية وهي بتخطط تلهفو منها .. شكرا ماجدة مرورك أسعدني .

عواطف
عفوا قريت عنوان البوست كمين مرة
ماقايل جواهو جنس النضم دا
وقلت الزوله دي جنت!!
ولما مالقيت موضوع خشيت قلت أشوف شنو نفر الجري دا!!
وقد يأتيك بالأخبار من لم تزود
قرأت هذا البوست من غير العادة من طقطق للسلام عليكم
رائع رائع
وفعلا موضوع بحث أكثر من رائع
زمان لمن كنا صغار نلبد مع النسوان عشان نحضر قطع الرحط
وممنوع منعا باتاإصطحاب الرجال .. طبعا ماعدا العريس
.... سوحي أليل اللا بالجنبة موحي
واللول لول يالعروس
واحمد العريس عاجبني ليه سيرتو بالخميس
وديل أماتو جنو الحننو,,,
جنو يباركلو الحننو
وربطو لي الحريرة الحننو
وسولي الضريرة وجرتقو

والقطر الشالك أنتا يتكسر حته حتا
والبلال دا ورد البحر ياعديلة
و قطع جرايد النخل الليلة جينا

والليله دي الرايقه
جات تعوم بي سديرا دي الرايقة
والعريس غشي... دي الرايقة
فتحي وشوفي ... عليك الله
لم تكن هناك أوكسترا مصاحبة
ولاقيديو كليب
الغريبة غنا البنات أكثر حظوة في الإنتشار خارج الوطن
ويلاقيك كم واحد ويقول ليك أنا حافظ غنا سوداني
وويردد: كدا كدا ياالترلة سايقا قندراني
لكي ان تكوني دائما بخير
نورالهادي

أخي الحبيب نور الهادي


تحياتي مع جزيل الشكر على مرورك الجميل طبعا زمان غنا البنات كان بريء ومافيه أي مصلحة شخصية لكن


تعال شوف غنا اليوم


سجل لي الريدة سجل لي


لغاية هنا كويسين


سجل لي شركاتك


سجل لي عرباتك


ما إنت العسل ذاتك


يعني بعد ما يسجل ليها ديل كلهم يعمل شنو بعد كدا يمشي الخور طوالي لأنها بتكون عندها واحد إحتياطي


لكن مفلس . شكرا نور مودتي .

تحياتي أختي عواطف

في منتصف ثمانينات القرن الماضي ، كنا زملاء من مهن مختلفة ، نسكن عزابة في مدينة السجانة . كان صديقنا وزميلنا ( س ) أكثرنا ميلاً للمواضيع والونسة الجادة ، كان عشقه مناقشة الأمور السياسية ( كمعظم السودانيين ) ، يتفرد بأنه لا يناقش سواها بل يرى في ذلك انصرافية . لعل لطبيعة عمله في وكالة السودان للأنباء ( سونا ) أثر كبير على ذلك .
اشترى صديقنا ( س ) عربة ، فرحنا بها كثيراُ ، وأصبحنا نأخذ وردياتنا في الإهتمام بها .
لاحظنا بعد فترة أن صديقنا ( س ) يأخذ العربة في الخامسة مساء ويقف بها في زاوية الميدان شرق سينما النيلين . راودتنا الأفكار غير البريئة عن خيانة يقوم بها بمفرده .
تقصينا أثره يوماً، رأيناه يميل ذات اليمين وذات الشمال طرباً ، ازدحمت في رؤوسنا أفكارنا غير البريئة ، لعلها رسالة عاطفية مقروءة أو على شريط كاسيت . أتيناه على أطراف أصابعنا . ففوجئنا بما ألجمنا ، صديقنا عاشق المواضيع الجادة يستمع لشريط كاسيت من نجمة ذلك الزمان حنان بلوبلو

حمادة دا ألمني
وسافر ما كلمني حمادة دا

لم نتمالك أنفسنا من الضحك الهستيري لما ظننا أنه تناقض في سلوكه
ارتبك كثيراُ وحاول التبرير ولم نعطه الفرصة
فختم الحديث بقوله

أى زول جادي في داخلو في حنان بلوبلو

وأخيراً عواطف
إذا سمحتي لي أن أتشالق

المسافة الكبيرة التي تتركينها بين السطرين تقلل من استمتاعي بكتابتك الراقية

نزار قباني >> الحافية..


الحافية..


صامتةٌ أنتِ..

فهل تدرينَ بأن يديك الصامتتين..

كتابا شعر؟

حافيةٌ أنتِ..

فهل تدرينَ بأن امرأةً حافية القدمينِ

تغير إيقاع التاريخِ،

وتقلبُ خارطةَ الدنيا،

وتطيلُ العمر؟

dear awatif

even ustaz nazzar wrote about
al hafia
lol
my deep respect and deep loe
mustafa

حافيةٌ أنتِ..

فهل تدرينَ بأن امرأةً حافية القدمينِ

تغير إيقاع التاريخِ،

وتقلبُ خارطةَ الدنيا،

وتطيلُ العمر؟

الأخت عواطف ادريس اسماعيل

بوسـت مافى شك لطيف
زكرتونى أيام جميله

أها أنا ما كايس شرح

أنا عندى غنوة سـمعتها زماااااااان

كايس كلماتا وكان ما عرفتيها أسـعلى لى حليمة
نضميها زى الجايا من النواحى بتاعتنا

الغنية فيها حته بتقول

يا خليل يا خليل حليلك وين
ما بنوم الليل ليل على طويل
ولبسوه البمبى وقعدوه جمبى

ونهاية كل فاصل

الليل الليل ليل على طويل أنا

الدعوة عامة

تحياتى

رأفت ميلاد

أخي الحبيب رأفت

كله سنة وإنت طيب وعيد ميلاد سعيد وعمر مديد إنشاء الله شكرا على بوستك اللطيف فعلا خليل يا خليل دي

كانت زمان من أكثر الأغاني المنتشرة حتى بقولو فيها

اللبسوه لبني خليلك وين

السفروه مدني خليلك وين

لكن بعد ظهور الأسماء الجديدة زي ناس رأفت ووائل وأسامة وحمادة السكر الزيادة ناس خليل بقوا من

الأمس ولا أسماء في حياتنا ماعارفة طيب أسمع دي

قالو أمه مجنونة أريدها وأريد جنونة

الختفت حبيبي بخلصو من عيونه

الأخ العزيز د. مصطفى

طول العمر ليك إنشاء الله وزي ما قلت أتاري حافية القدمين دي سبقت عصرها وطلعنا نحنا الماناقشين

شكرا مرة أخرى.

أخي الحبيب د. مصطفى

تحياتي وخالص مودتي مع شكري على بوستك الظريف تصدق بعد ماقريت قصيدة نزارلقيت نفسي ظلمت البت

الجرت لحبيبهاحفيانة طبعا هي أكيد بتكون بتقرا ليه عشان كدا جرت حافية القدمين معليش ما تزعل

ليك علي من الليلة بجري حفيانة كلما دق بابنا زول وعشان خاطر نزار بجي لغاية الشغل حفيانة وأقول

للناس نزار كتب القصيدة دي فيني .. والله يادكتور ما لقيت وقت عشان أساهم في بوست نزار لكن ليك

علي في الأيام الجاية إنشاء الله مع الشكر الجزيل.

التوقيع : حافية القدمين

الأخ العزيز عاطف

تحياتي مع شكري الجزيل على مداخلتك الظريفة جدا طبعا صاحبك كلامه صاح مية بالمية تصدق أنا عندي

زميل من كلية الزراعة يوم حفلة زواجي أصر يجي يغني مع بقية الشلة وهو بصراحة صوته جميل لكن مهرج

مسك الميكرفون وقال بمناسبة إنحطاط عصر الأغنية السودانية أقدم لكم هذه الأغنية دي الناس كلهم

إتهجموا وإترجمو قام عزف في العود بتاعو وقال

أريتني يا عشة أبقى طيرة وفي بيتكم اتعشى

أريتني يا فطومة أبقى سافو ,اغسل هدومة

إلخ الأغنية اللطيفة وخلى ليك الناس تموت من الضحك وأنا لو ما كنت العروس وخفت الناس تقول علي

شليقة أو خفيفة ولفيفة كنت وقعت على قفاي من الضحك لكن اتمالكت نفسي وضحكت تاني يوم في الطيارة

كنت ماشة طرد يكفيك الله شر الطرود المضيفة جات جارية قالت العروس يمكن ما نصيحة غشوا بيها واحد

مسكين قالت لي مالك يا بت الحلال إنشاء الله مافي عوجة قلت ليها أبدا والله اتذكرت لي غنية غنوها

في حفلتي طوالي قامت إتأكدت من جني حولتني لي كرسي تاني افتكرتني حأقوم أتهجم على الزول القاعد

جنبي وكانت كله ساعة تجي تشوفني بعمل في شنو وأنا فعلا مثلت مجنونة مرات أغني غنا بنات ومرات

غنا أولاد ومرات أطلع المكنير أضرب أصابعي وأفتح شنطة المكياج سبب بلا سبب ومرات أصفر وأضحك

المهم أجدت الدور كويس ولعبت ليك بأعصابها عشان تاني ما تتحشر .. شكرا عزيزي ملاحظتك مكان اعتبار

http://www.ohiolink.edu/etd/send-pdf.cgi?acc_num=ohiou1053018989

to hala guta

تحياتي مع الشكر الجزيل على المرور

لكن شكيتك يا بت أمي أتاري في ناس سبقونا لامن عملو دكتوراة في غنا البنات الماخمج ؟؟؟ شكرا

عزيزتي مودتي .

العزيزة عواطف ... لك الود
بوست جميل وخفيف علي ( ألبنا)...
انا اعتقد ان هناك خلط دائم بين اغاني البنات وبين الاغاني الهابطة ...
مصطلح اغاني البنات هو مصطلح قصد به الاغاني التي تنشأها البنات من حيث الشعر واللحن
وهذا الانتاج لابد ان يجيء معبرا عن من اطلقه .... انا اعرف ان غناء البنات هو مثل الاغاني التي تغني في بيوت الافراح ( مع العروسة ) ساعة (التعليمة) وهو انتاج حقيقي يعبر عن موقف وحدث وحالة .... من المعروف ان اي بنت في مرحلة الشباب تتطلع الي العريس والمرحلة القادمة.... من أمثلة أغاني البنات ( المهيرة عقد الجلاد ) ... ( حبيبي تعال تعال نتلم ) ... الخ من الاشياء التي تعبر عن تطلعات بنات الوسط .
اما الاغاني الهابطة فتلك حكاية أخري .... وقد تنشأ من قبل بنات أو أولاد .. ولكن أظن انها أرتبطت باغاني البنات نسبة للتشابه في أشياء مشتركة هي البساطة واللحن الخفيف والكلام المباشر ...... برجعك ليك ...
تحياتي

العزيزة عواطف

أسعد الله صباحك بكل خير غير الغنا الهابط

يا أختي هي ( الكنداكة) عصية على التشريح ولا عاوزة مشرط ليزر؟

بعدين تحضرني أغنية بنات زمان ومافي داعي أذكر التاريخ حتى نقع ف ي دائرة الشباب الذي ولى.. عموماً شريحها لينا لكن مقارنة بالبنسمعو هسه داك لا يمكن يوصف هكذا ولكن كان في حكم تلك المرحلة


حسب الخرطة المرسومة ليّ
أمشي دوغري ولف صينية
ثمّ هاك قلبي لي قميصك
أعملو زراير!!

شفتي ( ثمّ) منجعصه في وسط الكلمات كيف؟!!

تحياتي

أخي الحبيب أبوبكر

تحياتي ومودتي

أولا شكرا على المداخلة الجميلة أما الكنداكة دي أظنهاملكة من الملكات عشان كدا بغنو ليها خصوصا

في بيوت الظار وبعدين اللي عايزة تعمل قلبها زراير دي ما من بنات اليوم ديل من جيل التضحيات

والحب العذري لكن تعال شوف جيل البطولات ...

أمي قالت لي دققي وختي لمن أبوكي يجي

قلت ليها لا أبويا مابرجاجيبوا لي فقرا

بي لبن بقرة يا لبن أبو لي بي يالبن أبولي بي

أمي قالت لي أخدي ود العم قلت ليهالا

لا لا ما دايرة

أريته بالعمعم العيشته كلها ذم أبو لي بي

أمي قالت لي اخدي ود الخال قلت ليها

لا لالا ما دايرة أريته بالخلخال

الديمة مكشوف حال أبو لي بي

شكرا أبوبكر مودتي

أخي العزيز سوركتي

تحية والله ليك وحشة ... شكرا على المداخلة العلمية الطيبة طبعا غنا البنات يمر بعدة مراحل تعكس

الوضع الاجتماعي والاقتصادي يعني مثلا هذه الأغنية تعبر عن أهمية الفلوس بالنسبة للبنت

وليد دارفور بمشي معاك الليلة

محل ما تدور بمشي معاك الليلة

دي لما ظهرت طبقة غنية من أبناء دارفور قبل الأزمة لكن ماعارفة بعد الأزمة الحصل شنو ؟؟ شكرا

عبدالرحمن في انتظارك

تحية للأخت عواطف

موضوع كبير

حضرت أسبوع ثقافي موضوعة أغاني البنات أقمه معهد الدراسات الإضافية بجامعة الخرطوم في أول الثمانينات، ولأنه كان جميل حرصنا على حضور المحاضرات التي حضرها جمع مشارك وجماعة عجزان جميلين أطربو الحضور بحديثهم لا أذكر أسماءهم ولكن يبدو لي محمد عبد الله الريح أحدهم والأستاذة أمال عباس وحضر فيها الفنان ترباس والفنانة قسمة ومجموعة من الأخوات المبدعات ولفيف من المهتمين بفن الحقب والعهود السابقة والمعاصرة وتم التركيز على المؤثرات وخاصة في عهد ظهور المزارع حول الخرطوم في مايو وظهور النزوح واتصال المدن بالريف وتغير أحوال الريف من حال حسن إلى فقر وظهور الحقب المرتبطة بالغنى والفقر واختلاف الترات

من منكم حضر هذه الأغنية

نانا يا نانا نانا الفنانا

أخي الحبيب المسافر

تحياتي وشكري على مداخلتك الطيبة وبما إنك مسافر على طول فالبنات أبدعوا في حكاية السفر دي

زي ألمني وسافر ما كلمني حمادة دا وقطر الخميس القام حبيبي ياحليله خلى نهاري ظلام الليلة ياحليلو

والقطر الشالك إنت يتكسر حتة حتة إلى آخره من غنا السفر والفراق .دمت

عواطف.. حبابك يا صديقة
و حباب الأصدقاء و الصديقات هنا..

اول بالتبادي..عندي سؤال حايس لي من زمان.. مفهوم غنا البنات.. هل يشمل غنا الحكامات ولا لأ؟..

طبعا كتير مننا بيكون سمعوا اغنيات بيرددوها فنانين معروفين..و هي في الأساس لشاعرات..و تعرف بغنى الحماسة .. مثلا بعض من اغنيات الكابلي (ما هو الفافنوس..و يا علي.. الخ)..و ناس عقد الجلاد (خصوصا الجزئية التي عالجها الشاعر الكبير القدال.. بطنك كرشت..الخ)..( و الغربة انشاء الله تعقري..)..اها ده ليه ما قاعدين يقولوا عليهو غنا بنات؟

طبعا اكتر حته بتفك دبرستي..و أنا من المدمنين على سماع اغنية (حنانا)..الجزئية البتقول (ما قاصدين خيانة..بس دايرة يقيل معانا)..يقيل معانا وين و كيف دي خليها في سرك..!
من منتصف الثمانيات..و لغاية هسع.. الأغنية دي بقت عندها أكثر من عشرة صور..
more than ten versions
كل واحدة تضيف فيها شوية..و التانية تنقص شوية..

حتى السايق العظمة.. دخلها التعديل.. خصوصا أيام الإستديوهات.. فتم تعديلها..و كتابة اسم شاعر قدامها (اسمو محمد ابراهيم)..و خلينا من قوة العين ..و الحقوق و الملكية .. ده موضوع تاني..

مرة سألتني صديقة من زامبيا..و عاملة فيها بتاعة جندر..و قالت لي دايرة تسمع غنا فنانات سودانية.. طبعا بحسن نية جبت ليها الفلاتية..و منى الخير..و أمبلينا السنوسي..و اشيل و اشرح..طبعا التصغير طلع عيني في الشرح (خصوصا غنية امبلينا السنوسي.. يا قسيم الريد فوقك النبي).. أها الزولة قامت نقشت الحاصل..و قالت دايرة تسمع اخر صيحة..طبعا دخلنا في حيص بيص.. لمن سمعت أب شرا..انشاء الله راجل مرا..و بعد تعب اقنعتها انو في السودان عندنا تعددية زواج..و القصة عادية.. غايتو ختتها في حنانها (لأن ثقافة الجندر عندها حساسية تجاه التعددية الزوجية)..

قامت الزولة سمعت ليك باقي الغنا..ووقفت في حتة عجيبة..يعني عادي الغناية تقول ليك( جنا الرطانة.. المحسي.. الشايقي.. الجعلي..وليد دارفور.. التعايشي.. الخ)..و استغربت لمن عرفت دي اسماء قبايل..و قالت لي.. يبدو لي عندكم مشكلة قبايل..!..قلت ليها انتي ما عارفة حاجة ساكت..!
الحتة التانية.. توقفت تلك الصديقة.. في حكاية تمجيد المهن(التدريس.. الطب.. الجيش..الإغتراب –مش في مهنة سودانية اسمها مغترب؟- و اللجوء السياسي –ايوه في مهنة اسمها لاجئ سياسي)..

بالنسبة لي الغنا مؤشر اجتماعي..لكن المجنني و مطلع زيتي.. ليه حرية التعبير في غنا البنات ..متقدمة أكتر من حرية التعبير في السياسة؟.. يعني في الغنا الناس بتقول الدايرة تقولو و تمشي..لكن في الحتات التانية.. أيتها افصاح.. يجيب ليك كثافة الحكومة زي ما الحاصل شئ..

نشوفكم

كبر

العزيز كبر

تحية طيبة

شكرا على مداخلت الظريفة جدا والله صاحبتك الزامبية دي فعلا دخلتك في حيص بيص يعني ما لقت غير غنا

البنات عشان يترجموه ليها نحنا ذاتنا في حاجات ماعارفين شنو المقصود منهالا عارفينها عربي ولا

انجليزي وطبعا غنا الحكامات غير لا علاقة له بغنا البنات لأنه يحتوي على حكم أو فراسة والله البنات

ديل جننونا عديل ما عارفاهم بيألفو الغنا دا متين وبوزعوه كيف طبعا بعد شوية حتنط لينا واحدة

وتطالب بحقوق الملكية الفكرية زي بتاع أغنية عوض دكام ولا راجل المرة أما أغنية حنانة دي فقد

حصلت على الجائزة الذهبية للإنتشار السريع لكن أنا المحيرني تاكل في صحانتنا الخاينة خانتنا

يعني الخاينة دي ماعندهم بوتجاز ولا تلاجة ولا بتستعبط ؟؟ مودتي

العزيزة عواطف ...
دخلت بس عشان اقول ليك شكرا على الابتسامة الزرعتيها من الصباح في وشي المكشر ليهو يومين بسبب مشاكل الشغل ونقة المدير...وجرعة المنغصات اليومية المعتادة في الغربة الشينة ...
موضوعك ظريف ولطيف وحفيف ... المداخلات ممتعة ...
وفعلا كلنا من وقت للتاني بنحتاج نطلع من جو المواضيع البتعمل طمام بطن ووجع راس وتعب روح ... لشئ ينعشنا ويدينا احساس ولو كاذب بانو الدنيا لسة حلوة ...
تحياتي وعميق مودتي ...

تخريمة صغيرة ..
من صوتك في التلفون عرفتك زولة مرحة ولسة جواك طفولة ما قدر الزمن يسرقها منك ..
كوني كما انت ..حاربي الحزن بالفرح وانشري البسمة في شفاه ادمنت العبوس ...

العزيزة سناء

تحياتي يا حبيبة قبل ما أقول شي عايزة أقول ليك موضوعك بتاع إمراة تحكم السودان كأول رئيسة

عجبني جدا وقريته أكثر من مرة وقد زاد إعجابي بخيالك الفضفاض ولغتك الرشيقة الأنيقة ومعالجتك

الرائعة للموضوع لدرجة إني إتخيلت كل الناس وكأنهم حقيقة وعايزة أدخل عليك لكن أحتاج لوقت

وحالة خاصة لأن الموضوع غير عادي فأعذريني عموما حبيبتي أشكرك على الإطراء والثناء وزي ما قلت

بنحتاج في بعض الوقت للضحك إنت بتقولي المدير مكشر تعالي شوفي مديرنا رغم إنه طيب لكن عمره ما ضحك

ولمايبتسم بنصورو بالموبايل ونقول حدث في مثل هذاليوم وكمان أزيدك من الشعر بيت شو ما سويتي

ما بعجبه لكن مع ذلك بنحبه لأنه عمره ما أذى حدأصله صنع في لبنان عشان هيك طيب الألب مودتي.

عواطف ...دة كلام ... جيران وماني عارف انك ملكة كاريكاتير رسم بالكلمات ....يعني لو ما البوست دة وقع في عيني ( الله يرحمك يابوث ديوللذين يعرفون قصة المناضل بوث ديو مع الذي يقع في العيون- دة للديناصورات زي وزي الفارووق ) اكيد كنت البربري الما عرف ....بعدين غنا البنات دة بيني وبينك البرابرة ما بيعرفو تب ..اها غنانا كلو واحد في الحنة والدخلة والصبحية (دة كان زمن الديناصورات زي) دحين فيها كوشة وبشان كدة قررت البرابرة ان ليلة الحنة التي تسبق ليلة العرس هي حفلة العرس البربري حيث الجميع في زيهم النوبي الرسمي وما في كوشة ولا زولا يغني وهو قاعد ...
الواحدة تجري حفيانة اصلو ليه ..!! لانوبعدين لو جرحت رجلينها او داست ليها خمج وو تسوي شنو ..دة لو قلنا عندها شبشب ..ما نص السودان واكتر حفيانيين ... انا بالمناسبة اول ما اصل البيت تاني بيني وبين الجزم والشباشب خصام ..يعني حفيان ...ما تقولي موكيت لا ني ما بخت موكيت ولا برش في بيتي ...والوضع دة ليس مرتبط بالمهجر ولكن اي بيت في اية مكان ...الواحد بطلع حفيان ويرجع حفيان لزوم الكبسة شنو ...
انتو بالمناسبة غني حمادة بت دة بيقع في ياتو خانة في الشطرنج الدائر في الخرتوم "الملك واللا الملكة" ؟ عجايب ....

عواطف الف تحية ...كنداكة مكافحة الله يخليلك جنياتك ..

أخي الغالي أبوبكر

تحياتي

شكرا على المداخلة الظريفة أما بخصوص بنات البرابرة والله بصراحة إنتو مضيقنها عليهن خالص يعني

أول حاجة ليه ملبسنهن أسود من راسهم لي رجليهم؟ عارف اللون الأسود خلاهن يحترمن نفسهن ويغنن غنا

جاد كدي جربو لبسوهم ألوان الطيف وشوفوا حتلقوهم بأسرع فرصة قالو

فوق الحلة ديك أما مابجي

الشمار كتير أنا مابجي

بعدين أنت ماشي حفيان قبل الأغنية ولا بعدها إذا بعدها يعني مواكب للحدث وإذا قبلها يعني سابق

عصرك بكتير عموما لما أزوركم لازم تجيني جاري حفيان عشان أتاكد إنه الأغنية حققت هدفها أما حمادة

بت دا هو راجل لكن مصنف مع البنات عشان كدا يحق له ما لايحق لغيره كحل وأحمر شفاه وأغاني هابطة

لك مودتي .

ومالك يا عواطف نسيتي

دوِّر بينا البلد داك
أحرق الجزولين يا البابور جاز!!

بفكرك بس!!

والله يا أبوبكر ما نسيتها لكن خفت يقوم واحد من المنبر ينط لي ويقول لي ياتو بلد بعدين ما أقدر

أجاوبو تانيا أصبحنا دولة نفطية عين الحسود فيها عود والجازولين على أفا من يشيل يعني بقى ما

مهم كان حرقوه ولا خلوه .

مودتي

تحياتي أخت عواطف ..
وألف مرحب بيك في المنبر ..
معليش جات متأخرة شوية ..

حقيقة لا زال هناك جدل حول أغنية البنات وكيف يتم تصنيفها ..
وكيف تصنف أغنيات رقيص العروس إذا كانت خاصة بهذه المناسبة ..
وهل ما غنته الفلاتية وفاطمة الحاج وغيرهن من الفنانات يصب في هذه الناحية ..
وكثيراً منا لا يزال يردد في الجو طيارات وفي البر دبابات ( الليمون سقايته علي ) ..
وبعيداً عن هذا المنظور نجد كثير ما تتغنى به البنات معالجة لواقع موجود ولكن يختلف من طريقة لأخرى ..
سمعت أغنية ( أبشرا إن شاء الله راجل مره ) فهل هي دعوة للزواج حتى ولو من متزوج في وجود حالات العنوسة المزعجة وكذا الحال في أغنية ( راجل المره حلو حلا ) مع إختلاف الحالة والطريقة التي تؤدى بها ..
هناك فرق بين من يمتهن الفن كرسالة ومن يغنين في مناسبات الأعراس وهنا يكون التأليف لحظي في بعض الأحيان لذلك جاءت التسمية والله أعلم ..

نتمنى أن تناقش هذه المسألة في إطارها الصحيح ..

كامل محبتي ..

أخي العزيز معتصم

شكرا على ت رحيبك ومداخلتك الطيبة طبعا غنا البنات هو نتيجة حتمية لواقع معاش وهو من الظواهر

الجديرة بالمتابعة والدرسة اما غنا منى الحاج وعائشة الفلاتية فلا أعتقد أنه يندرج تحت هذا المسمى

لأسباب معروفة .. مودتي

يا عواطف ..بناتنا سبقن عصرهن ما شايفا الخيم السودة مالية الدنيا كيف ..حقت البرابرة مزركشة وخفيفة والطرحة ملونة ... بناتنا اليوم بيلبسن الجرجار بس لما يسمعن الطار اما دون ذاك فكونتننتال (زي الفطور بتاع الاوتيلات)...
اما الجري حفيان فانا سابق عصري كمان .. ات بس تعالي زورينا واكن شفتي نعال في البيت بعدين اشتكينا للقوات الاممية ....

اما حكاية حمادة بت فيحلوها ناس البساتيين والزراعيين البعملو هايبرد شجرة من الليمون السنط ....

دة كلام حمادة وبت !!

أخي الحبيب أبوبكر


غيرو الطار لدلوكة وشوفو حتسمعوا جنس غنا ماأنزل الله به من سلطان وحمادة بت دا من الظواهر اللي

جات في عصر البترول والتيك أوي والنت كافيه الله يعينا على الجايينا وزي ما بقولو أخوانا المصريين

يا آعدين يكفيكو شر الجايين . تحياتي

عزيزت عواطف

Quote: غيرو الطار لدلوكة

الطار واهو متوفر وبنعرفلو اما الدلوكة فلازم من خبراء ليعلمونا الدق او ايجار دقاقات (مش كدة !!) ...بعديين بناتنا زي ماقت صارن مع استنق وبيونسي ..

عجبني ما ذكره السر قدور عن تعامل اللجنة الكلفة بمراجعة والموافقه علي الاغاني في زمان قديم وكانت من شعراء وادباء كبار مع اغاني البنات والهابطة فاوعزو للشعراء بكتابة اغاني بكلمات راقية واستعمال نفس الحان اغاني البنات واتي بامثلة كتيرة وبالتالي تمكنت اللجنة من محاربة الكملمات الهابطة وابقت علي اللحن فتداول الناس الجديد من الكلمات ...

أخي العزيزأبوبكر

الدلوكة دي شعرا ما عندكم ليه رقبة عايزة ليها بنات فانعات وعينهن بيضا حسب علمي الحلفاويات خجولات

ما زي السودانيات طبعاإنتو بتقولو علينا سودانيين عندي صاحبتي حلفاوية قالت أهلهازعلو شديد

عشان أخوها خطب سودانية قلت ليهاغايتو تعالو يوم العرس حنخلي بناتنا السودانيات الغنايات

يغنوا ليكم غنا الهجاء وما يخلوا ليكم صفحة تنوموا عليها أل سودانية آل !!!!

الاخت الحبيبه عواطف


ما شاء الله علي البوست

وعلي الكلام الرائع الذي ينسي الزول كل هموم الدنيا

ويا سلام علي حسن الاستقبال منك

وشكرا ليك يا ذوق

أخي الحبيب عباس ياالفي القهوة ما جلاس ياالفي الجامعة ماخد الكاس لك مني ألف شكر على كلماتك

الرقيقة رقة شعورك وليك علي حأقطع ليك أغنية ما سمع بيها زول بس أللفضى ليك شوية المدير ذانقني

في موضوع التقول ما شايف زول غيري . لك مودتي

بت عباس

أختي في الوطن الظريفة عواطف...

الحقيقةيعني غناء البنات مسألة محيرة فعلا.. بعيدا عن بعدها الإجتماعي فهي فعلا أغاني وعلى تفاهة محتواتهاإلا أنها تظل مؤشرا لما وارءها.. وهذا أيضا بعد إجتماعي.. ولكن الظاهرة أن هذه الأغاني يتداولها الرجال في جلساتهم الخاصة.. وينتشون للكثير منها.. هذا مبحث آخر.. أنا شخصيا لا أجد تفسيرا لذلك.. عدا الخنج في أداء الكلمات مهما كانت تافهة والذي ربما يداعب ويدغدغ كثيرا من الغرائز النائمة و أو المحرومة.. والله أعلم..

وبمناسبة الأغنية التي ذكرتيها.. أحاول جاهدا أن أفهم بعض أبياتها التافهة ولكن استوقفتني عبارة (تكل العربة برة) وطبعا تكل تستخدم للعجلة (الدراجة الهوائية) لأنها لا تمشي على اربع..لكن ألا يشكل ذلك إيغالا في السوقية.. إذن هل هذه الأغاني تخاطب شرائح معينة في المجتمع.. مجرد تساؤل.

أرجو ألا أكون قد أخرجت بوستك من سياقه الظريف الخفيف.. ويسعدني معرفتك على هذه المساحة الحرة.
وكل سنة وأنت طيبة

ود أمي الظريف كمال كرار

تحياتي وشكري الجزيل لمداخلتك الطيبة وزي ما قلت الغنا الهابط مؤشر أكيد لمجتمع هابط وأناس يعانون

من هبوط في الدورة الدموية بسبب إفرازات كثيرة هم جزء منهابعدين ما تتحير كتير تكل العربة برة دي

المقصود بيها الركشة عشان نحنابدل ما نتطور نرجع لزمن الركشات يعني بعد شوية تسمع بركشة فورويل

ولا ركشة ماشة بالطاقة الشمسية . مودتي

العزيزة عواطف
صباح الخير و شكرا على هذه المساحة المتعمقة ...

مجتمعنا السوداني من أغرب المجتمعات الذكورية على الإطلاق! المرأة فيه ظل خافت يبحث عن جسد يعكسه (الرجل)!

ظاهريا، أغاني البنات جلها تدور عن الحب والزواج، ولكنها لا تطرح علاجا لـ"حالة" ما بعينها، بل هي نوع من التشخيص للحالة العامة و للأسف تسوّق سلبيات كثيرة في سياق حس الفكاهةالطاغي عليها...

والحب في الأصل مدخل للزواج ولكنهما في نهاية الأمر عالمان منفصلان في مجتمعنا المغرق في المظاهر و الشكليات...
في المجتمع السوداني لا الحب حب ولا الزواج زواج!
كلاهما خديج!

سأعود،

كل الود

عزوز الظريفة

تحاتي يا غالية وشكرا لمداخلتك االجادة صدقت يا حبيبة فغنا البنات يعكس بصورة صارخة شعور المرأة

في بعض الأحيان بالدونية وأن الرجل هو سر وجودها وبدونه لن تكون لذلك تسعى للزواج منه بكل السبل

حتى ولو تجري لإستقاله حافية القدمين أضافة لذلك فق إنحسرت قدسية الأم كثيرا ( قالو أمه مجنونة

أريدهاواريد جنونها) والله أروع ما ذكرت في مداخلتك ( في المجتمع السوداني الحب ليس حب و الزواج

زواج كلاهما خديج

العزيزه عواطف
اولا انا اسمى جلال
جينا تانى لان البوست لذيذ

اكثر مالفت نظرى فى غنا البنات معظمه يدور حول فكره البحث عن رجل امكن ده الخلى الرجال اتعززوا شويه فشوفى المواصفات فى زوج المستقبل بدات
بالماشى لى باريس جييب لى معاك عريس
شرطا يكون لبيس من هيئه التدريس

وجاءت نزلت شويه

مغص يامغص يالعذابه
ونحنا ما دايرين الا مغتربين ومن سنه سبعين
وبعد ظهور سوق ليبيا وثراء اولاد الغرب جاءت
وليد دارفور بمشى معاك الليله محل ماتدور بمشى معاك الليله

وتانى لما التجاره فتحت على الغرب

يامغترب ياتاجر غرب
وبعدين زهجن من المغتربين وخاصه يتاعين ليبيا واليمن غنن

لبيا واليمن ضياع زمن

وبعد بدا التدهور الحقيقى فى المواصفات

يابتاع الكارو تعال
بوشك الصاروا تعال

ومعاها وقاحه كمان

تعال بلياسك ابوى بلابسك

شفتى وصلن وين

واظنو بتاع الكاروا زاتو اتعزز قامن غنن

وبدان بالدعاء والتوسل بالشيوخ
بالضراء بالضراء ياب شراء انشاء الله راجل مره

واظنو دعوتن ما استجيبت قبلن على رجال النسوان وديل انا عارفهم ما صدقوا

راجل المراءه حلو حلاه

لكن حيرتنى الغنت

انشاء الله راجل اختى
دى حالته متاخره وبالغت عديل


وامكن نجى تانى

أخي العزيز جلال

تحياتي

في الحقيقة أنا استدركت وصححت الإسم أرجو المعذرة وشكرا على ثنائك على البوست لكن صدقني إنت حافظ

غنا كتير وجميل أنا قربت أخلي ليك البوست من كتر ما عجبتني مداخلتك الظريفة خصوصا أغنية سيد

الكارو بعدين يا جلال المدرسين ديل خلاص زمنهم فات وغنايهم مات يعني المدرس مش لو مشى باريس لو مشى

جزر الواغ واغ ما في زول بجيب خبره مع إنه أهم زول في الدنيا دي بعدين ياأخوي تعال النقول ليك

المغتربين بقوا إشاعة كبيرة أسألني منهم البنوك قربت توديهم محكمة العدل الدولية أما حكاية إنشاء

راجل أختي دي عاد بت التابة واليابة شككككككككككككككرا جلال .

حسن يا حسنا آوب انا سجل الريدة

العالي مسكنا آوب انا سجل الريدة

ودا القائد رسنا آوب انا سجل الريدة

سجل عرباتك (آه) سجل شركاتك (آه)

وما أنت العسل ذاتك آوب انا سجل الريدة ...


ارح ارح ارح

Quote: لقد جعلتي يومي

يعني دي مقابل You made my day
يا سيف...

Quote: سجل عرباتك (آه) سجل شركاتك (آه) وما أنت العسل ذاتك آوب انا سجل الريدة ...

يالله (شيك) الريدة يلقوهو وين؟

حليمة العظيمة

شكرك على العبور

والله لو لقيتي الشيك دا كلميناعشان الشركات والعربات دي ما مضمونة لكن خايفة الشيك يكون طاير.

نعومة اللذيذة

مودتي

والله يا بت حيمورة أغنية حسن يا حسنا دي عجيبة جدا وبعدين شنو حكاية وووووووووب اللي في غنا البنات

دي إنشاء الله مافي عوجة ؟؟ والله يابت أمي أنا شحصيا لو لقيت لي زول بسجل لي شركاتو وعرباتو بغتي

ليه للسنة الجاية بس هو كيف يسجل . شكرا إنعام

شكرا يا عواطف لليوست الظريف


يابتاع الكارو تعال
بوشك الصاروا تعال



غايتو ان بحب الاغنية دي


لانها بتذكرني بالحمارة




منعم

Quote: Quote: لقد جعلتي يومي يعني دي مقابل You made my day يا سيف...

يا خليل يا خليل
خليلك وين
ما بنوم الليل
الليل الليل ليل على طويل أنا

اللبسوه البمبى خليلك وين
وقعدوه جمبى خليلك وين

الليل الليل
ليل على طويل أنا

اللبسوه لبني خليلك وين
السفروه مدني خليلك وين

الليل الليل ليل على طويل أنا

أرجو الإضافة ...

العزيز رأفت

تحياتي

أكيد عندك موضوع مع أغنية خليل يا خليل دي طيب نضيف ليك

ياخليل يا خليل خليلك وين

اللبسوه الحجبات خليلك وين

السكنو شمبات خليلك وين

اللبسوه الأصفر خليلك وين

الدخلوه المعسكر خليلك وين

الأخ الحبيب منعم

مودتي

يا والله ذوقك يجنن إنت لو شفت سيد الكارو خاتي ليك المسجل والحمار متكيف من الغنا ساعات يكشف

وساعات يجبجب والفنانة تقول يا غربتي ( يا أخته يالشفة أنا ماشة المستشفى يوم لاقيت حمادة

الألم العلي خفايا أختو ياغادة أنا ماشة العيادة يوم لاقيت حمادة غلبتني الشهادة ) شكرا منعم

على العبور .

Quote: يا خليل يا خليل

يارافت يا حتات .. ممكن تقول لينا "ايه خليل" ؟ " لانو الامر يهمني حيث ان جدي الاكبر هو "خليل" وربما ينالنا من الرضي جانب ....وممكن الواحد يمشي لناس البنك الفاتح حساب عندهم - لانها الجهة الوحيدة التي تصر علي انو ماي لاست نيم هو خليل - واطلب سلفية من غير ضمان لانو جدي مشهور وبيغنو ليهو ....

الاخت عواطف
عامك ملئ بالافراح وراحة البال
بوست شيق خفيف الظل

علاقة النسيبة واهل الزوج مع زوجة او خطيبة الابن علاقة شد وجذب
واغاني البنات تعكس ذلك

عاشرت ناس امو ...دا العفوهم بيهمو
جافاني دا الغالي ..واوحي لي ما بيهمو
بلاقي وين انا..دا الاتعدم ظهورو

قال امو كلامة بريدة بريد كلامة
قالوا امو مجنونة بريدة بريد جنونة

اهلك شعروا بي يا الهجروك علي
وفتحوا علي قضية
قضية ما همية كفاية حبك لي

تموت امو كان حية يا الهجروك علي
تنقص اختو الفتية
ابو تطسو عربية
خالتو تطير حدية
تسلم انت لي

العجوز القاعدة برا
قاعدة لي انا للمضرة
يا نكير اديها طلة

يا الماشي السعودية جيب لي معاك خلاطة
اخلط امك بجزماتة
جيب لي معاك سحانة
اخلط امك بفستانة

تحياتي

الحبيبة تسنيم

حبي وشكري يا غالية على المداخلة الظريفة دي والأغاني المعبرة عن الواقع المعاش غايتو النسيبة

مشكلتها مشكلة وكمان ديل ما خلو حتى الخالات والعمات

إتلمن الهايفات الخالة والعمات

يكبكبن دمعات وأنا زولي ما بنفات

شكرا تسنيم يا رايعة ..

أستاذه عواطف تحياتي
والله بوست لذيذ وظريف

هيي هيي بره بره وين جوه

جب جرب سحبوا مني

قلبا قلبا قلبا

بايرين بايرين يا أب شري بايرين من سنة سبعين يا أب شري

بختي وان شاء الله راجل اختي كر كر نبرأ ونستبرأ

أحب السعودية اللامه العواطليه وأحب الشمالية اللامه العربجية

عربيتك المرسيدس كسرت علي الترس

جياشه والجيش نقلوا فتاشه ووب علي أنا

طلعنافوق في الجبل وسكرنا آخر سكر

ود الغرب البسر القلب

قالوا الصيد مرق وفي حلة حمد وقرض الناس قرض

الليمونة الجوه قلبي مشتوله

لو عايز تغيظوا تعال نضرب البوري

قبيل لاقيتو راكب بسكليتو

سنه يا ولد انت حبشي والله ود بلد

الجوافه خضراء وقيافه وأحب جكس الصحافه

والقطر الشالك انت يتكسر حته حته

والقطر الشال معاويه يتكسر زاويه زاويه

يلا عليك الله يا أستاذه كان ما شرحتيهم حته حته

Quote: سجل لي الريدة سجل لي لغاية هنا كويسين سجل لي شركاتك سجل لي عرباتك

تعرفي يا عواطف المكنة في الغنوة ده كلها شنو ؟؟؟

إياها دي...

Quote: ما إنت العسل ذاتك

طبعا صاحبنا بعد ما يسجل يعوضو الله تاني في الكشكرة دي

عواطف .. الرائعة
كل سنة و انتي طيبة

كتر خيرك على البوست الحلو ده ..

و انا مرة في واحد من اعمدتي بصحيفة السوداني قدمت نماذج من غناء البنات استشهادا مني بيه

على انه من الممكن اعتباره مقياس من المقاييس الدالة على الحراك اللي حاصل

في مجتمعنا السوداني .. و لتعم الفائدة انا باستأذنك في اني اطرح الموضوع

من تاني عبر بوستك الرائع ده .. و العمود كان بعنوان سلام من بروفيسور/ المزروعي (للافرابي) عوض دكام!).


مع شوقنا الكتيييييييييييير .. ليك

رندا عطية


سلام من بروفيسور/ المزروعي (للافرابي) عوض دكام!

بروفيسور علي المزروعي ذاك المفكر الافريقي العربي الغني عن التعريف والذي زاد الخرطوم القا بمشاركته لمنتدى الجامعات الافريقية ومحاضراته القيمة التي قدمها في العديد من مراكز البحوث في بداية هذا العام 2006م, الذي لفت انتباهنا اليها بنظريته التي يقول فيها ان افريقيا و العالم العربي يقتربان بل هما في مرحلة من التمازج التي ستؤدي على المدى البعيد للانصهار مطلقا على نظريته هذه مصطلح (الافرابيا) .
هذه النظرية التي توجد العديد من الشواهد الدالة على تغلغلها داخل النسيج الحي لمجتمعنا السوداني, فاغاني البنات او اغاني المجتمع هي عادة ما تعكس الحراك الطبقي و الاجتماعي للمجتمع, كيف لا وقد كان العريس المثالي في نظره هو ذاك (الاستاذ) اللبيس بباريس, ثم اصبح هو (المغترب) الذي سلم الرايه بطيب خاطر لابنه المدلل (حماده ده), و الذي سرعان ما اصبح هو و (ود الغرب) المغترب في مرتبة واحده ليتساوى لاول مرة اولاد البحر مع اولاد الغرب! ثم اصبح ذاك الذي يرتدي (جلابية بيضاء و مكوية), و بما ان الجلابية تعتبر من اكثر لبساتنا القومية انتشارا في السودان فيبدو انها كانت تدشين لمرحلة (الكتوف إتلاحقت).
ثم اخيرا اتت اغنية كلام في (كلام يا عوض دكام) والتي حينما استمعت اليها وجدتها عبارة عن عرضحال من المجتمع مقدم لطبيبنا الراحل عطر السيرة (عوض دكام), و عوض دكام سادتي هو يمثل تلك الشريحة السودانية ذات النسبة العالية من الدماء الافريقية الممزوجة بحضارتها و وجدانها الاسلامي و العربي, و هي شريحة(ود الحلة) الذي كنت تجده في الماضي القريب في الصفوف الخلفية فهو في مجال الموسيقى محتكرا للدامبا و في كرة القدم هو في خط الدفاع او في حراسة المرمى.
لهذا كان المرحوم عوض دكام هو المدشن الاجتماعي لنظرية (الافرابيا) التي بشر بها المزروعي حقا و صدقا, و من غير العمدة يشكى اليه حال البلد ممثلا في (سنتر) الخرطوم, ليتضح لنا ان الحراك الاجتماعي و الطبقي في السودان يسير بوتيرة اسرع من الحراك السياسي, هذا الحراك الذي حينما استشعرته شركات الاتصالات قامت بتسويقه عبر صورها الدعائية تلك والتي وضعت فيها صور البنات (الافرابيات) الابنوسيات اللون و الممشطات و من ذوات الشعر الخشن في اعلى الاماكن في (سنتر) خرطوم عوض دكام جنبا الى جنب مع ذوات الضفائر الطائشة ما بين مجلس عشيرة و بين اهل الشيء الذي جعلني اتساءل عن مستقبل شركات كريمات تفتيح لون البشرة في سوقنا النسائية السودانية! و بما ان الحديث ذو شجون فانني اوجه السؤال لكل شركات الاتصالاتلماذا لا اجد اي اثر لتاجوج او ادروب في صوركم الدعائية بسنتر الخرطوم؟).
واخيرا الا ترون معي ان من واجبنا جميعا الترحم على روح مدشن (الافرابيا الاجتماعية) بالسودان المرحوم عوض دكام.
وان نطالب كل من صحيفتي (الانتباهة) و ) (Khartoum Monitorبان يذكرا قرائهما الكرام بضرورة الترحم على روح (رائد) الافرابيا بالسودان المرحوم السفير الكويتي (عبد الله جوبا) ان لم يكن رحمة بالوطن فعلى الاقل خوفا من ان يدينهما التاريخ بانهما من تسببا في قتل الوطن عمدا حينما حرموه من ان يتنفس عبر (افرابيا) المزروعي بحجة قتلهم الرحيم الانفصالي له!.

رنداالحبيبة

الشوق مطر كيفك ياغالية وكيف السوداني على حسك وجميع الزميلات والزملاء

مداخلتك قيمة ومفيدة جدا ولا يسعني إلا أن أشكرك يااستاذة يا فنانة طبعا أغنية عوض دكام دي من

الأغاني الأكثر رواجا

شوفو الخريجين يا عوض دكام

كلهم عاطلين يا عوض دكام

شوفو الخريجات يا عوض دكام

كلهن بايرات يا عوض دكام

طبعا لازم يكونن بايرات إذا الخريجين كلهم عاطلين ولا نحنا ما ناقشين ؟؟ مودتي

أخي العزيزأبوحريرة

شكرا على مرورك الجميل طبعا بعد ما يسجل الشركات والعربات عينك ما تشوف إلا النور حتلقى صاحبك ماشي

في الإتجاه المعاكس ويقول لله يا محسنين ... الله يجازي الكان السبب .

الاخ الحبيب معاوية

يا رايع والله إنت قربت تعمل دكتوراة في غنا البنات وبعدين هيي هييي يا الجوة نادو لي ناس برة

دي أغنية ظار مرة حضرت صبحية في نادي سيدات ابوظبي ولمن قسمة قالت هييه يالجوة نادو لي ناس برة

كل النسوان العاملات عندهم ظار طارن ووقعن جوة الساحة الفلبينيات البعملن السيرفس قامن جاريات

والفنانة ما اشتغلت بيهن شغلة قعدت تنادي في ناس برة عشان تشكي ليهم من ناس جوة شكرا معاوية

كللك ذوق ....

شكرا رندة للربط الانيق بين فكرة او واقع في الوجدان غائب عنا و رؤيتنا لبعض ظواهر او افرازات ذلك الواقع .. وشكر لللاشارة الي الافرابيا وعلي المزروعي ويجب التنويه هنا ان رائدا سودانيا للافرا بيا سبق علي المزروعي وهو كاتبنا الرقيق الدبلوماسي الراحل جمال محمد احمد صاحب وجدان افريقيا ...وجمال ينتمي الي احد فروع الافرابيا كما صنفها المزروعي فيما بعد وللنفع العام اقتبس ادناه مقالا للمزروعي نشر في موقع مقالات افريقية في ابريل من العام الماضي وفيه شرح للتسمية وتصنيفاتها واحتمالات نجاحها ..الخ :-

Quote: Afrabia: Is it a mere intellectual fascination or can it be realised? By: Ali A. Mazrui There are different levels of Pan-Africanism, varying in degrees of sustainability. Sub-Saharan Pan-Africanism is a quest for the unification of Black people in Africa below the Sahara. Then there are two possible versions of Continental Pan-Africanism. The Sub-Continental version would seek the union of Black States while excluding Arab Africa. This idea has been floated from time to time, but it does not seem to have much political support. More triumphant has been Trans-Saharan Pan-Africanism which formed the Afro-Arab basis of the Organisation of African Unity (OAU,) and its successor, the African Union (AU). Another version of sub-Saharan Pan-Africanism is sub-regional rather than sub-continental. The sub-regional variety has produced organisations like the Economic Community of West African States (Ecowas) which in recent years has been more activist as a peacekeeping force than as a vanguard for economic change. The Southern African Development Community (SADC) has also received a new lease on life since South Africa became a full member in the post-apartheid era. In December 1999 Uganda, Kenya and Tanzania finally succeeded in reviving the East African Community since its collapse 22 years earlier. But by far the most ambitious idea floating around in the new era of intellectual speculation is whether the whole of Africa and the whole of the Arab world are two regions in the process of merging into one. Out of this speculative discourse has emerged the concept of Afrabia. Two tendencies have stimulated the new thinking about African-Arab relations. One tendency is basically negative but potentially unifying: The war on terrorism. The new international terrorism may have its roots in injustices perpetrated against such Arab people as Palestinians and Iraqis, but the primary theatre of contestation is blurring the distinction between the Middle East and the African continent. In order to kill twelve Americans in Nairobi in August 1998, over 200 Kenyans died in a terrorist act at the United States Embassy in Nairobi. Four years later, a suicide bomber in Mombasa, attacked the Israeli-owned and Israeli-patronised Paradise Hotel. There too, three times as many Kenyans as Israelis died. Independently of the war on terror, Islam as a cultural and political force has also been deepening relationships between Africa and the Middle East. Intellectual revival is not only in the Western idiom. It is also in the idiom of African cultures and African Islam. Hot political debates about the Shariah (Islamic Law) in Nigeria constitute part of the trend of cultural integration between Africa and the Middle East. The new legitimation of Muammar Gaddafi as a viable African leader has contributed to the birth of no less a new institution than the AU. It is sometimes startling how much more Pan-Africanist than Pan-Arabist Gaddafi has become in recent years. At least for the time being, Gaddafi is out-Africanising the legacy of Egypt’s Gamal Abdel Nasser. The fourth force that may be merging Africa with the Middle East is political economy. Africa’s oil producers need a joint partnership with the bigger oil producers of the Middle East. In the area of aid and trade between Africa and the Middle East, the volumes may have gone down since the 1980s. But most indications seem to promise a future expansion of economic relations between Africa and the Middle East. In the Gulf countries of the United Arab Emirates and the Sultanate of Oman the concept of Afrabia has begun to be examined on higher and higher echelons. It was initially Trans-Saharan Pan-Africanism which gave birth to the idea of Afrabia. The first post-colonial waves of Pan-Africanists like Kwame Nkrumah, Gamal Abdel Nasser and Sekou Toure believed that the Sahara was a bridge rather than a divide. The concept of Afrabia now connotes more than interaction between Africanity and Arab identity; it is seen as a process of fusion between the two. While the principle of Afrabia recognises that Africa and the Arab world are overlapping categories, it goes on to prophesy that these two are in the historic process of becoming one. But who are the Afrabians? There are in reality at least four categories. Cultural Afrabians are those whose culture and way of life have been deeply Arabised but have fallen short of their being linguistically Arabs. Most Somali, Hausa, and some Waswahili are cultural Afrabians in that sense. Their mother-tongue is not Arabic, but much of the rest of their culture bears the stamp of Arab and Islamic impact. Ideological Afrabians are those who intellectually believe in solidarity between Arabs and Africans, or at least between Arab Africa and black Africa. Historically, such ideological Afrabian leaders have included Kwame Nkrumah, the founder president of Ghana; Gamal Abdel Nasser, arguably the greatest Egyptian of the 20th Century; and Sekou Toure, the founding father of post-colonial Guinea (Conakry.) Such leaders refused to recognise the Sahara Desert as a divide, and insisted on visualising it as a historic bridge. Geographical Afrabians are those Arabs and Berbers whose countries are concurrently members of both the African Union and the Arab League. Some of the countries are overwhelmingly Arab, such as Egypt and Tunisia, while others are only marginally Arab, such as Mauritania, Somalia and the Comoro Islands. As for genealogical Afrabians, these are those who are biologically descended from both Arabs and Black Africans. In North Africa these include Anwar Sadat, the former President of Egypt who concluded a peace treaty with Israel and was assassinated for it in 1982. Anwar Sadat’s mother was Black. He was politically criticised for many things, but almost never for being racially mixed. Genealogical Afrabians in sub-Saharan Africa include Salim Ahmed Salim, the longest serving Secretary-General of the OAU, and the Mazrui clan scattered across Coastal Kenya and Tanzania. It should be noted that Northern Sudanese qualify as Afrabians by both geographical and genealogical criteria. These four sub-categories of Afrabians provide some of the evidence that Africa and the Arab world are two geographical regions that are in the slow historic process of merging.

خالد ود سليمان الملغب بأبوحراحر من فنانى التراث الشعبى الذين يعوم وزين الحفل ويقلع على أنغامه وتخوجل بعد أن تبرج منتشية من خطفة الشبال صقور عين السوق وعلى أنغام

بابور العمده الحمانى الغمده

له راتب معلوم ومشهود شبال يظل عطر قرقده عالقا بعمامته حتى يحول عليها الحول فإذا بها تتجاوزه ذات مرة عنوة فكسر الأغنيه

النيسانه الفات القبانه

فكانت عفو الإفصاح عن الضرر الذى ألم به


عواطف تعرفين كيف تنقشين على قلوب الحجاره بمهارة سغراط



منصور

أخي الحبيب منصور

مرورك أسعدني

أشكرك على المداخلة الجميلة وأذكرك بالغنية دي

مشيت للعمدة وقال لي ما بمضى

حلاة الزول الحماني الغمدة

مشيت للقاضي وقال لي مافاضي

حلاة الزول نومو بالعراقي

الليلة الليلة أزاي اللية حرق بينران المكاين ديلة

شكرا منصور .

طيب يا عواطف

سمعتي بالأغنية دي:

الله لي كوريا وأنا من شباب كوريا
يا الراكبين عجلاتكم .. ميعاد الدرس فاتكم
يا شتلي الشتلتو .. حبيبي راكب عجلتو

الاخت عواطف
اغاني البنات داخلة في اي شي ذي ما قال الاستاذ الطيب احمد الطيب اذا سقطت حبة خردل
وجدتها في غنا البنات

من الاستعمار المهيرة مهيرة القصيص انتي ملكة والحرس انجليز

رصاصة القرشي تقع فيني
بقميص القرشي يكفنوني
وجنب القرشي يدفنوني

يا عسكري ما تزدري الشعب قال عاوز ازهري
وعلم السودان رفعوا ازهري وينو
وين يا ناس وينو العريس ود ناس وينو

يا تيلة الانصاص في الرقبة خايلة خلاص
قال لي وزيركم مين خالد حسن عباس

الصادق مسك الحكومة
و دي حكومة مضمونة

اتحجب والبس طويل عشان اعرس عمر البشير

الي ان وصلت الي

بري بري حبيبي لا جنجويد لا عسكري
دا زول فاهم ورضي

تحياتي

العزيزة تسنيم

مرورك يشرفني وإغنياتك تحمل مضمونا سياسيا مما يؤكد أن البنات ضالعات في السياسة طيب هاك الغنية

دي

جالس في النجيلة

بالردا والفنيلة

أنا حبيت أشاغلو

عمل الكورة حيلة .مودتي .

الأخ العزيز أبوبكر يوسف

تحية طيبة

والله أغنية الله ليك كوريا دي قديمة جدا من زمن الناس بتمشي المدرسة بالعجلة لكن ما قالو كوريا ياتا

الشمالية ولا الجنوبية عشان التحديد بخلي أمريكا تلعب دور مهم أشكرك عزيزي على مرورك الجميل .

عزيزتي عواطف البوست تحفة ...

زوجت شقيقي سورية بتعجبها جدا أغاني البنات وخاصة دي وبتغنيها بطريقة حلوة جدا :

حبيبي تعال تعال نتلم
ما دام الريد اختلط بالدم
ما دام الريد اختلط بالدم
انا ذنبي ايه شيلوني الهام
يا حبيبي

الحبيبة إنعام

والله دا إنت التحفة عموما أنا ما عارفة ليه بحبكم ياآل حيمورة والله لله كدا بس حتى اٍسألي إشراقة

بعدين يا إنعام يعني قدرتو بقدرة قادر تسودنو السورية وبدل ما تغني لهالة نصري تقوم تغني لقسمة

منكم لله والله خوفتوني جد لكن يبدو أنو السورية دي ذوقها رفيع بدل ما تغني ليكم شوفو الخريجات كلهم

بايرات إختارت أغنية حلوة شكرا إنعام على مرورك .

يوم الجمعه دا يوم راحتي
أغسل وأكوي وأملا الزير
مرتي مرتي ما عندها ذوق

وقالت لي توب الحد
ومن غلطتي أنا جبت زراق
وطبلتني في الصندوق
وعلقه شديده بالبرطوش
مرتي مرتي ما عندها ذوق

والله متذكر الأغنية دي وأنا عندي 5 سنوات وكنت بسمعها من عمتي وصاحباتها




أغاني للتوب السوداني

الحبيب معاوية

تحياتي والله إنت متذكر أغاني حلوة شديد والله عماتك ديل شلكهم لذيذات وظريفات شديد بعدين أغنيتهم

دي ذكرتني أغنية بنات في مصر بتقول

جوزي وأنا حرة فيه

جوزي أغسله وأكويه

شايفة البنات المصريات ديل النسوان ولا بلا ش أغسله وأكويه مش أجري ليه حفيانة؟

جيت الساعة ستا
وشال من نومى حتا
اريتا تتا اريتا تتا
اكتب لى روشتا
بالوجع الناقشو إتا


غنا البنات دا للطرب فقط! مافى زول يحلل (ولا البنات زاتم) لأنو انا ممكن اخلّى البورد دا كلّو كلّو لو قعدتو تحللوا المساحة الضيقة الوحيدة البنعيش فيها كبنى آدمين!

هو حلو كدة، وخلّوا حلو كدة

لسنا الشعب الوحيد، والغنا الهابط ليس وقفاً على البنات

الأخ العزيز وسام

كيفك ياعزيزي ياااخي لا تزعل ولا تخلي لينا البورد والمساحة الضيقة والوحيدةالبتعيش فيهاكبني آدم

أنا بعتبرها من اليوم منطقة محظورة ممنوع الإقتراب والتصوير أها لسة زعلان ؟؟ حقك علينا وأهديك

الأغنية دي

ياوسام ياود الهنا
عروسه جات بي جنبنا
ياوسام ياود السرور
عروسه ما شبه الخور
ياوسام ياأخو البنات
عروسه دمها زي الشربات
ياوسام ياود المنا
زعلك كتير بيهمنا
يا وسام أوعك تسيب البورد
عشان ما ينسحب مني الباسورد

مع تحياتي

عواطف..
صباح الخير عليك..
ما تنسي تمري على العلاقة بين النسابة، وذلك في احدث المستجدات الاجتماعية..

اللول لولك يا البِخَيتة
العريس امو ميتة
او
جاب الخلاتة (الخلاطة)
نخلت امو بنعلاتا
ودي صارت في فترة من الفترات، من الاغاني التي تستقبل بها السيرة..
على فكرة الاغنية الاولي دي قديمة شديد.. حينما حكيتها لامي قالت وينك دي اغنية قديمة نحن ذاتنا رقصونا بيها..
هذا الجانب بتاع النسابة ، يصب بقوة في خانة التغييرات الاجتماعية ويعزز منها تداعي الاسرة الممتدة وقيام (دولة) الاسرة وحيدة الخلية او الاسرة الصغيرة.. واربطي هذا مع واقع الخطط الاسكانية من حيث ان توزيع الاراضي السكانية ، حيث صارت مساحة البيت كلو لا تتجاوز ال300 متر او الـ250 مترا مربعا..
اذكر انني كنت قد اعددت مقالة قديمة في سوداناو عن العلاقة بين النسابة..
لم تعد بحوزتي الان للاسف.

ودمتى
حليمة

معليش يا عواطف
انا النزلت المداخلة باسم "وسام" عن طريق الخطأ

وانشالله نشوف جديدو

وعندك واحد حبيبى تعال من اثيوبيا:

حليمة ما قلنا ما دايرين تحليل ياخ!

وهاك دى من هاجر كباشى:

جياشة ... جياشة ..ووب على انا
جياشة .. والجيش نقلوا فتاشة ووب على انا

جيشنا جيش القوة
دخل الجبال جوة
وحارب (الشهيد) يوسف كوة!

أخوي العزيز تبارك

أوعك تزعل من ردي على حليمة كله شي ولا زعلك تقوم تماضر كمان تزعل مننا لكن طبعا واحدة إعلامية

بوزن حليمة لازم أرد عليها ولا شنو رأيك ؟

أخي العزيز تبارك

شكرا على المرور والمداخلة الحلوة مع أطيب الأمنيات بحياة موفقة وشكرا كمان على الأغاني

الحبيبة حليمة

أشكرك على العبور مرورك يسعدني فعلا غنا البنات له علاقة مباشرة بالواقع الاجتماعي والخطة الإسكانية

والحالة الإقتصادية وقد أدى غياب الأسرة الممتدة وظهور النووية بدلا عنها إلى غياب الكثير من القيم

دة كلو من جدو جدو ربنا يهدو

أما علاقة النسابة التي كانت في يوم ما مقدسة فقد تحولت إلى عداء سافر

ما همانا مادام عريسنا معانا

قالو أمه مجنونة أريدها وأحب جنونة

جينا جينا وكيا للمابينا

أختي حليمة لك مني أطيب الأمنيات بدوام الصحة والعافية مع تحياتي .

والله يا معاوية حكاية توب الزراق دي جميلة بس ما قلت لينا بلتو من ( النيلة ) عشان ببهت واللآ لبستو بي نيلتو.. هو هسه توب الزراق ده موجود يا معاوية واللا غنقرض مع العولمة؟ بعدين برضو البنات غنو للتوب البنغالي ، والحمدلله عشنا لحدي ما عاشرنا البنغالى وإحتكينا بيهم ومنهم عرفنا توب البغالي لا يعدو أن يكون عندهم أكثر من ( القرباب) عندنا!! أوعى تقول لي ما عارف القرباب .. لو ما عرفتو أظن عواطف حتفتح الدكشنري بتاعا وتشرح ليك ولينا من خفايا (القرباب) والمحفظة المتدلية منو!!

العزيز أبوبكر

صباحك نور

والله التياب دي غنو ليها كتير جدا مثلا

ياتوبي الشبيكة الناس تهموني بيكا

ياتوبي الحراير يالفي الحفلة داير

حبيت أب قجيجة إنشاء الله أب صلعة طاير

أما القرقاب دي لو معاوية ما عرفها تبقى مصيبة يا ود يوسف تحياتي .

الحبيبة عواطف

كنت متابعة عزيزتي بوست جميل ولطيف

احب اغاني البنات كثيرا ويطربني واجد فيه

الكثير من المطالب المهضومة للمراءة ...

وهي نتاج تعبير عن اضهاد ممارس عليها وغير طبيعي

ولا يتناسب مع تكوينها ،،

لذلك يخرج كرد فعل متواكب مع الزمان والمكان والبئية

وما يفرزه المجتمع من ممارسات تحسها وتتناقم معها ،،،

مثلا دق الباب وجانا جريت ليهو حفيانة ،،،

من زاوية اخرى غير ( حافية القدمين لنزار قباني

مع أن نزار قباني ده اكثر واحد فاهم المراءة

وتكوينها إذا جيناها من ناحية العادات السودانية

وتقييد الفتاة وممارسة الضغوط عليها وانه ما بتشوف

حبيبها فطبيعي تجري حفيانه من شدة شوقها ليهو ،،،

وطبعاً دي امانيها كل ما تذكرة في الاغاني أماني

لم تستطع تحقيقها في الواقع ،،،

مثلا

راجل المراءة ده حلو حلا

دي آخر صيحه في أغاني البنات

لانها بتنظر لها من ابعاد كثيرة الشباب يعيشون في

بطالة وعدم وظائف من وين حا يزوجوا كم هايل من البطالة

لكن راجل المراءة عندة المقدرة للزواج وانتشالها من

الظروف الاقتصادية الهي من أجلها عاوزه تزوج واذا انتظرت

العذاب حا تصل مرحلة من العمر اصلا هي ما حا تقدر تنتظر

لكن اذا كانت مرتاحة من جميع النواحي البخليها تستعجل شنو؟

مثلا :

خلاني يايمة خلاني البريده

رسل لي رسائل وقال أنا في الجزائر

يوم عشرة يناير يجينا حمادة زائر

حمادة يا يمه زولي البريدة

تخيلوا حمادة طفش واغترب حتى حبيبته ما كلمه

الا رسال ليها رسالة من بلد المهجر ،،،

بناتنا ديل ليهم حق والله لا ؟؟

مثلا:

امي قالت لي اخدي ود العم

قتليها لا عيشته كلها هم

امي قالت لي اخدي ود الخال

قلت ليها لا فقدت راحة البال

ابو لي بيه ابولي بيه ياناس

أمي قالت دققي وختي لمن ابوكي يجي

قلت ليها لها زوجوني لو بي لبن بقرة

ابو لي بيه ياناس ابو لي بيه ( تكرر)

ذي دي حرموها محبوبها وعاوزنها تزوج

ابن عمها أو خالها يعني قريبها

وهي بترى زواجه من قريبها يسبب لها

هموم وعدم راحة بال بسبب اي حاجة مشاكل

عائلية مثلا

وباستنجادها بالناس امها حنت عليها

قالت ليها دققي الشمار ده وخلي لمن يجي ابوكي

يجي من وين ما عارفة المهم تهدية امومه

البنت مصرة على حبيبها ووضحت لامها انه

مسالة زواج وتكاليف هي ما عاوزاها بأي

حاجة المهم هي عاوزة زولها دة ,,,

اتعاطف كثيرا مع اغاني البنات لانه الحقيقة

التي يجب أن توخذ منها العبر ومعالجة الامور

والنظر اليها من زواية اخرى ،،،

دمت عواطف وواصلي يا حبيبه لي عودة ،،،

الحبيبة د. خالدة

أشكرك يابعد عمري على المرور الأنيق وعلى ثنائك على البوست وزي ما تفضلت فغنا البنات مليء بالعبر

وهو أيضا مؤشر واقعي للحالة الإجتماعية كما يعبر عن منعطف خطير وأزمة حقيقية تمر بها الفتاة

السودانية التي كانت تتزوج في سن العشرين كأسوأ الفروض واليوم هناك فتيات في سن الخمسين وما زلن

يحلمن بفارس يخطفهن على حصان أبيض لذلك أصبح راجل المرة مسألة عادية والزواج بي لبن بقرة فقط أفضل

من عدمه .. شكرا خالدة

عندي كلام كتير عن أغاني البنات و كتبت كذا بوست بخصوص الموضوع دا..
لكن خايفة أكتر كلامي يقوم (( تبارك )) يزهج..!!



أنا غايتو عاجباني الأغنية المضادة ل (( راجل المرا..حلو حلا ))
و بتقول..

كان حصلت شراكة...خليتك للمعاكا..!!!

ست عواطف


البيت مقابل البيت

قال لي تعالي ابيت

لو ما ابوي واقف

والله كنت جريت جري


والعندي انا ما بدي

وبحر ابوروف انا بعدي

شنو ليك

أخي العزيز خليل

مودتي

والله ضحكتني من الصباح حتى الناس المعاي في المكتب قالو المرة دي مالها جنت ولا شنو؟ أسمع دي

بلالي يابلالي بلالي أنايا بلالي

بلالي لاقيته جنب القيف

بلالي أشرت ليه يقيف

بلالي الزول دا شكله ظريف

بلالي حمادة دمه خفيف أنا يابلالي

الحبيبة ممكونة

تحياتي

تبارك دا زول ودود مافي منو خوف قولي العايزاه بعدين حكاية لو حصلت شراكة خليتك للمعاكا دي

بتذكرني الأفلام المصرية أنا زي الفريك ما احبش شريك وبعدين تخليه ليها ليه؟ شخصية إنهزامية

لازم تناضل من أجل بقائها وتهزم الجديدة .

from ustaz nazzar to all
>> نزار قباني >> فم


فم



في وجهها يدور .. كالبرعم

بمثله الأحلام لم تحلم

كلوحة ناجحة .. لونها

أثار حتى حائط المرسم

كفكرة .. جناحها أحمر

كجملة قيلت ولم تفهم

كنجمة قد ضعيت دربها

في خصلات الأسود المعتم

زجاجة للطيب مختومة

ليت أواني الطيب لم تختم

من أين يا ربي عصرت الجنى؟

وكيف فكرت بهذا الفم

وكيف بالغت بتدويره؟

وكيف وزعت نقاط الدم؟

وكيف بالتوليب سورته

بالورد، بالعناب، بالعندم؟

وكيف ركزت إلى جنبه

غمارة .. تهزأ بالأنجم..

كم سنة .. ضيعت في نحته ؟

قل لي .. ألم تتعب .. ألم تسأم؟

منضمة الشفاه .. لا تفصحي

أريدُ أن أبقى بوهمِ الفمٍ

ياسلام يا دكتور مصطفى على القصيدة الرايعة دي يعني البنات لو قدرو لحنوها كان إنتشرت سريع جدا

والله الشعر عند نزار ولا بلاش .. شكرا مرة أخرى أخي العزيز على هذه النفحات الطيبة وأهديك الأغنية دي

سيد يا حفيظ وينو الليلة

دكتورنا العريس وينو الليلة

ديل أخواته جن وينو الليلة

وقفن زغرتن وينو الليلة

وقفن زغرتن وينو الليلة

والسلاح رطن وينو الليلة . ودمت .

حبيبه ازيك


عارفه انا لى زمن طويل جدا ماحضرت عرس سودانى اقصد فى كل التفاصيل البتتعمل فيه

المهم انو عندى صديقه مشت السودان حضرت زواج اختها وجابت معاها الشريط بتاع الزواج

الناس قاعدين كويسين وناس شكلها عاقل واعمار مختلفه والله ياعطوفه الحال اتغير

فى لحظه والقى المكان بس اتحول لساحة حرب عديل الناس دى الا بس تفرزى ذى مابيقولو الليدس

من الجلتمان بس من ملابسم حاجه عجيبه جدا عارفه انا قمت ركزت فى الكلام الخلى الخلق دى تحول المكان لساحه

حرب عديل والله العظيم ماقدرت افرز غير كلمه تباتشب ياتبا تشب وبعدين معاها نفس الكلمه مرددة ذى عشرين مرة

والجماعه نازلين دفسى ورفسى

مجودة الحبيبة

أسعد الله أوقاتك بكب خير

والله مرورك دمه خفيف جدا عارفة الناس دي بتجبجب وترفس ليه؟ من الحالة الهم فيها يعني دا نوع من

التنفيس والرفض في آن واحد الله يكون في عونهم

جيت مارة بي بيته

قالو الناس غشيتو

الحب أنا مابديتو

من تبيت لقتو

جبا جب جباجب .

تحياتي

سلامات يا ذوق

اغرب اغنية سمعتها في عرس كم شهر فاتو وبفكر في الفكرة البايخة

((((تقول )))))
انت موزاية وانا موازاية ناكل سواء والقشر يكسر امك الرغاية

انت سمكاية وانا سمكاية ناكل سواء والشوك لامك الغنماية
وتستمر في كل انواع الاطعمة وامو المسكينة تتبهدل ذيادة

اغرب فكرة واسواء مقالة اعوذ بالله

فيها اساءة وقلة ادب فظيعة

الغريبة النسوان اخر انتشاء ورقيص

دا هبل ولا عبط؟؟

تسلمي يا ذوق

وبوست نسمة عابرة للقارات

حبيبتي العزيزة جداسودانية ألفين

تسلمي يالغالية على بوستك الجميل وطبعا النوع دا من الغنا يعبر عن الوضع الإجتماعي المتردي ويعكس

شعور البنات ناحية الحموات كان الله في عونن .

قالو أمو شمشارة

أريده وأريد شمارة

تحيتي ومودتي ما تنقطعي يا بت امي .

عواطف ..
كيفنك .. و فاقدنك

حبيت انبهك لانو لو دق ليها بابها من هنا لتاني يوم هي لا تجري ليه (حفيانة) و لا لابسة (نعلاتا)

حتى لو كان ال بيدق في الباب ده:
اب جلابية بيضا مكوية

شخصياً لانو البرد الهاجم علينا في الخرطوم الايام دي خلاها قاعدة (مكنكشة) في اوضتها..

مع اشتياقي

رندا عطية

رندا الحبيبة

تحياتي

والله يا رندا قالو البرد من شدة ما عندكم كتير يعني مش لو دق الباب لو عمل مسج ما ترد عليه .. يعني

ما حتقدر تطلع يدها من البطانية عشان ترد مع أمنياتي لكي بكنكشة سعيدة يا كنكوشة ...

رندا الحبيبة

تحياتي

والله يا رندا قالو البرد من شدة ما عندكم كتير يعني مش لو دق الباب لو عمل مسج ما ترد عليه .. يعني

ما حتقدر تطلع يدها من البطانية عشان ترد معم أمنياتي لكي بكنكشة سعيدة يا كنكوشة ...

تمام يا قونة

العزيز حبيب نورة

تحياتي

الصفقة مالة تعبانة ؟؟؟؟

عذرا الحبيبة عواطف

كنت متابعة عزيزتي بوستك جميل ولطيف ومعبر عن حال بناتنافي السودان

وحبيت اضيف الي بوستك في موضوع العلاقة بالنسابة واحترام النسيبةاهلنا ناس بربر واحترامهم للنسيبة عندهم اغنية جميلة عجبتني جدا لم يرد ذكرها بتقول في مقاطعها

تعيش امه كان حية
وتمشي السعودية
وتجيب الشيلة لي
وتعيش وتربي لي
وتسعد اخته الفتية
والي اخر الاغنية

واخري حول احترام النسيبة واحدة ساكنة في مكان بعيد من نسابتها قامت حضرت لها نسيبتها للزيارة قالت لها صاحبتها نصيبتك جات فردت عليها

دي المرك الساند البيت
دي الصندلية الخاتية الزيت
ودي ام احمد رئيس القيط

وسمعت نسيبتها الكلام السابق فاهدتها وسجلت لها فدادين بأسمهاعلي احترامها لها
فهناك امثلة جميلة لم يرد ذكرها في البورت لذلك تطرقت لها

ولكي حبي وتقديري
انتصار محمد الشيخ

الحبيبة إنتصار

مودتي

اشكرك يا غالية على بوستك الأنيق جدا وياسلام على ناس بربر الراقين والمحترمين اللي بحترمو النسابة

مش زي ناس الحلة ديك العندهم الشمار الكتير الغنو ليهم :

تلاتة قدور صندلية

تلاتة قدور ريحة نية

ونسيبتو قالت شوية

وحرمان ما يدخلن عليا

عزيزتي إنتصار مرة أخرى أشكرك وآسفة لـخير الرد . ودمت .

والله ياخت عواطف فعلا كنا محتاجين لي بوست زي دا ولما اجيكي صادي فتك بي عافيه

العزيزة فدوى

اسعدت صباحا سيدتي

مرورك الرفيع أسعدني أشكرك ياغالية .

عواطف ادريس عرفتك من خلال اشراقة واحببتك بحج حبك للحيموراب ويزيد ...

على فكرة سودنتنا للسورية تفوق خيالك الواسع ... ساحكي لك ...

واقول ليك سر انا بحب اغاني البنات جدا جدا وبطرب لها بشكل خرافي وبقيت كمان احفظ اسماء الغنايات واعرفهم ...
وعندنا اغنية نحن الحيموراب حافظنها وكل زول عليه يقول مقطع وقاعدة تطلع بشكل جميل:

بجيك ليها تاني . وانا قاعدة هنا عضو رسمي مابفوت طيب !

الحبيبة إنعام

تحياتي وشكرا على مرورك الأنيق وعلى فكرة غنا البنات يشعر الإنسان براحة نفسية لأنه مرآة الواقع

طبعا الإنسان لما يشوف نفسه في المرآة بيعرف وين عيوبه كذلك غنا البنات مودتي .

جب جـب جــب جـــب جــــب جـــــب
حنـــــــــــــــــــــــانــــه

الأخ العزيز معاوية

مودتي

تسلم ياذوق .

الغالية / عواطف
والله لقد طرقت باب من زمان نفسي اتكلم عنو واتفشي

طبعا دق الباب وجانا وانا جريت لي حفيانة
انا بقول دق الباب وجاكم وانا جريت لي بوراكم
والهابط كثير لا حصر له

فاتمني ان يسمع الشباب الهابط اغنية للاستاذ/ محمد الامين شفاه الله

ويدرسها كلمة كلمة سيجد نفسه في محاضرة

اقابلك وكلي حنية، قبل ما اشوفك كنت فاكر الريد مستحيل،
وراء البسمات كتمت دموع، كنت تتعلم تجامل لو فؤادك مرة جرب
الحسرة علينا وعلي شبابنا وبناتنا الضايعات اللهم ارحم عوض دكام
وقنبلة تفجر سنتر الخرطوم لكي لايكون هنالك سهر بالكوم

الأخ العزيز مهلب

مودتي مع جزيل الشكر على بوستك الجميل وبعدي حكاية دقا الباب وجاكم جريت لي بي وراكم دي رايعة

ومحمد الأمين الله يكون في عونه .

ماشاء الله
بي نورك وبي جمهورك
عارفة هسة عملتي لي مشكلة
الشافعة دي حلفت كان أقفل الصفحة دي
عشان الغنية طبعاً
كمان معاوية دة شكيتوا لي اب أيداً قوية
مالو علي هسة
عموماً النقدة يا عواطف
والماعندو حبيب يجي قريب

عواطف اسمعي دي


الموية جات تجري

بلتني في صدري

يا ابو صلعة غطسني

يا ابو خنفس امرقني براحة

امية اتجدعي لي امية

يوم الخميس الفات

الشكلة دبابات

نميري والسادات حريقة.


واحدة تانية

يا خليل جيد لي المولي ازيدك لي وتسكن المنشية

تترقي زي كمال وتبقي مستشار

المهيرة شمعة بتموع

ويا خليلنا قش الدموع لي عرسونا

عريسك غلبو الثبات

المهيرة مهيرة السرور

انتي ملكة وحواليك حور


الفريع المال وانتني

ربي اعلم جننتنا

عايز اسافر انا يا علي

للخليل السكن ابوظبي



تعال بالعندك تعال

ابوي بسندك تعال

ياخليل يا لذيذ

المهيرة دي أغنية من أغاني الإرشيف ومازالت تحتل الصدارة مافي عروس ما رقصت بيها والمشكلة إنه

كل العرسان غلبهم الثبات لكن أغنية تعال بالعندك تعال أبوي بسندك دي بتوري إنه الحالة بقت صعبة

شديد غايتو بكرة في ناس كتار حيرسلو ليك ماسنجر يطلبو منك عنوان الأبو البسند دا!!!

المستشار العزيز خليل

تحياتي

والله أغنياتك لذيذة ومواكبة الأحداث عشان كدا حنقوم بنشرها في مجلة الحوادث اللبنانية مع الترجمة

الفورية عشان بقية العرب ما يكونو مسطحين ... شكرا يارايع .

يا حبيب نورة

كيفنك ؟ والله أنا نفسي أعرف نورة دي منو عشان جاية في البورد جديد وما ناقشة وهاك الغنية دي رشوة


أريتك يا حوة

لو تعرفي الريد

البحرق جوة .