Post: #1
Title: رجال من ورق ... ونساء في وزن الذبابة ..
Author: عواطف ادريس اسماعيل
Date: 02-19-2007, 05:54 PM
Parent: #0
من كان منكم بلا خطيئة فليرمها بحجر ... حكمة أضعها دوما نصب عيني لكي لا أضخم أخطاء الآخرين خصوصا
الشباب والشابات لأن العود قد يستقيم عندما يكون أخضرا وغضا أما أخطاء الشياب فلا مجال لغفرانها
فقد قال الشاعر :
سفه الشيخ لا حلم بعده ... ولكن الفتى بعد السفاهة يحلم .
أولا قبل أن أطلق رشاشي طبعا أختكم أوخالتكم متأثرة بمعرض الدفاع الدولي والله جنس أسلحة يا لطيف
كيمائية وجرثومية وصواريخ عابرة للقارات وطيارات بدون طيار لمن قلت لروحي أنا الشلاقة لي شنو
كله سنة أغطي الحدث دة وأخلق موضوع نسائي من مافي بيني وبينكم النسوان حشرن روحن في كله شيء شايلات
الكلاشنكوف وواقفات ولسان حالن بيقول النساء قادمات وبدل حرب النجوم حتقوم حرب الحريم ويا ويلكم
وسواد ليلكم المنتصرات ما حيخلوكم تقعدو والمنهزمات ماراح يعترفن بالهزيمة شفتو ليكم يوم واحدة
ست أدلت بأي اعترافات ... معليش ياجماعة طلعت برة الموضوع أنتو عارفين سلفاإنه أنا أيه؟ إنصرافية
من الدرجة الأولى فسامحوني ما كانش أصدي .
نرجع لموضوعنا الأساسي في ناس بعتقدو إني بجامل الستات على حساب الرجالة أو بمعنى آخر شاطرة في
شرشحتهم وغاضة الطرف عن بنات جنسي لكن والله إنتو ظلمتوني أنا روحي ما برحمها وعشان هيك بقول ليكم
البنات الأيام دي عندهم موضة العريس الإحتياط ومش واحد بس في إتنين كمان قاعدين في الدكة منتظرين
دورهم وما عارفين الحاصل عشان كدة الشعار المرفوع هذه الأيام ( واحد للسف وواحد للف وواحد في
الرف) وأتمنى ما يكون أي واحد فيكم لا للسف ولا للف ولا في الرف وبيني وبينكم الرف أخير من اللف
والسف بتطلع من الرف بأقل الأضرار تانيا في بنات بحبو عشرة أولاد مرة واحدة عشان لو زاغ واحد يكونو
في تسعة في الكيو أو الطابور وكل ما يزوغ واحد يحل محله التاني أصلو مافي مشاعر ولا حب الحكاية
بقت مصلحة ويا حليل أيام زمان الواحدة تحب ليها زول واحد تكنكش فيه لمن تموت وتدسه من الهوا
الطاير ولمن تطلع معاه تطلع بالدس ولو شافها زول بتعرفو بتنتحر أما بنات اليوم الواحدة عينها
مكحلة بالشطة ولو حبت زول تنشره في نشرة ستة وتكلم أهلها وأمها وأبوها وناس الحتة كلهم بكونو
عارفين ولمن تجي طالعة معاه تعمل ضجة إعلامية يا ناس شوفوني عندي موعد غرامي لا حكى لا بقى وفي أقل
مشكلة تخليه زي العجب والرد جاهز غور في ستين داهية مليون واحد عايزني وبعد داك من دا لي دا وفي
الآخر تطلع بقد القفة وتعنس وتتمنى ضل الراجل بدل ضل الحيطة بيني وبينكم الرجال ذاتم بحبو جنس
البنات ديل والرزينات الراسيات بقولو عليهم دمهم تقيل وما ستايل ...
كمان في نوع آخر الله يعزكم ديل بس همهن اللعب بمشاعر الأولاد والضحك عليهم وهاك يا مسجات شعر وغزل
و (send for all) والمسكين يصدق يفتكر روحو أنه الوحيد في عصرو وإنه الحبيب المنتظر في نوع تاني
الله يكرمكم دا ما عنده كلام نظري كله تطبيقي وما سمع ببيت الشعر اللي بيقول لا يسلم الشرف الرفيع
من الأذى حتى يراق على جوانبه الدم ... ديل ما عندهن قشة مرة ما شافن واحد عربيته آخر موديل إلا
أشرن وركبن وما لقن ليهن عربية مدورة وصاحبها مشى يجيب عصير ولا ساندوتش إلا نطن وحرسنو جوة العربية
لمن يتخلع ويقول العربية دي مسكونة ولا شنو تقوم قليلة الحياء تأكد ليه إنها إنسانة بلحمها ودمها
* طيب يا بت الحلال مش كان تستأذني قبلي ما تركبي ؟
_ إنت من زمن الحاجات الأوت أوف ديت دي ياخي خليك راجل ستايل ومواكب الحوادث !( نصف متعلمة )
* يا بت الناس أنا لا مواكب الحوادث ولا الشرق الأوسط إنت بالظبط عايزة شنو؟
- إنت غبي ولا بتتغابى واحدة حلوة زي كدا بتكون عايزة شنو؟
* ( بلغت الروح الحلقوم ) عايزة توصيلة؟ ما عندي مانع بس حلي عن سماي ؟
- أصلي الليلة ما بحل وبمشي معاك محل ما ماشي أها حتسوي شنو؟
* دي مصيبة شنو دي ؟ حتنزلي ولا أجيب البوليس ؟
_ إنت من زمن البوليس جيبه كان جايبه هو ذاتو حيفتح فيك بلاغ ويقول عليك ما راجل !( وقاحة وصفاقة)
واحدة ست كبيرة في العمر وعندها مزاج في الأولاد الصغار كل ما شافت واحد جاتها حالة وشغلت جميع
رادارتها واستخدمت جميع أدوات أنوثتها التي ذهبت مع الريح لجذب الشاب المسكين الحاير الطاير
الما لاقي شغل ليقول لنفسه آخر المطاف وبعد أن فشل في كبح جماحها جرادة في كف ولا ألف طاير .
واحدة أخرى مطلقة من حقها أن تتزوج ولكن ما عايزة واحد في عمرها لازم يكون اصغر منها بعشرة سنين
لشيء في نفس يعقوب ولسوء حظها كل اللي يجيها بكون طمعان في فلوسها وهي كله شيء ولا فلوسها ديل
زي ما بقولو المصريين عض ألبي ولا تعض رغيفي كله شهرين تلاتة أسألها أها العرس متين تقول لي مش
طلع نصاب وحرامي وإبن ستين في سبعين ؟؟؟
خلصنا ياجماعة الخير من ليدز فيرست نجي للرجال اللي في قمة المسئولية وما مالين هدومهم .. ..
ديل يا جماعة شاطرين جدا في شغلهم وليهم وضع أكاديمي ومهني وإجتماعي لكن ما محترمين نفسهم بستغلو
الوضع دا مع النسوان والبنات العايزات شغل خصوصا اللي عندهم مسئولية كبيرة تصورور الرجال ديل من
شدة ما عينهم طايرة مرات الواحد يكون قاعد جوة المكتب وتلاقي عينه حايمة في الكوريدور وما بخجلو
من نفسهم رغم إنهم تجاوزو الخمسين وطبعا حركاتهم دي ما بعملوها الإ مع السودانيات عشان ما ببلغوا
الشرطة أما الجنسيات الأخرى فمجرد معاكسات شفهية أيه الفستان الحلو دة وتنورتك بتجنن ووشك ولا
القمر وحركات من دي كله نظري ولمن السكرتيرة تقول ليه في واحد سوداني عايزك يقول ليها شوفيه
عايز شنو لو قال ليك شغل وديه الخور ولمن تجي واحدة يسألها حلوة ولا بشعة لو كانت السكرتيرة
لبنانية ووحلوة ولا وحشة لو كانت السكرتيرة مصرية وحلوة ولا خسفة لو كانت السكرتيرة إماراتية ,,,
المهم لما يقولو ليه حلوة أو زينة على طول يرش شوية بارفان ويجي يستقبلها من الباب ويطلب من التي
بوي كل أنواع المشروبات وتبدى المعاكسات والوعود وطلب المواعيد خارج مكان العمل لو استجابت
جاءتها الوظيفة على طبق من دهب ولو رفضت تعالو شوفو اللولوة والكذب لمن يجي يوم يقول للسكرتيرة
ما تديني ليها دي واحدة مزعجة وأنا ما فاضي ليها ..
سوداني يمتلك شركة خاصة تعمل عنده واحدة أثيوبية سكرتيرة كانت غاية في الجمال وذات طول فارع ولما
جات سكنت معانا في البناية خلقت بلبلة في الحتة سقط على إثرها آخر الرجال المحترمين المشكلة إنه
المدير دة آخر كبكبة في الأثيوبية يناديها سبب بلا سبب ويغازلها على عينك ياتاجر وغاشيها قال ليها
إنه مامتزوج ولسوء حظه يوم إتصلت زوجته المحذرها ما تتصل في المكتب عشان تقول ليه الولد جرح
أصبعه بالباب ولما سألتها السكرتيرة إنتي منو ؟ قالت ليها أنا المدام راحت السكرتيرة محولة ليه
المكالمة وقالت ليه المدام على التليفون يا سعادة المدير طبعا أسقط في يده ولو قلت ليكم حاجة ما
بتصدقو إنه المدير المقصود كان يسكن في البناية المقابلة لينا و زوجته بتزورني يوميا لأنها ما
شغالة وعندها فراغ عريض فبقيت بين نارين نار الأثيوبية اللي طلعت لي الرجال السودانيين ناس فشنك
وكضابين ونار صاحبتي اللي بتقول لي أبو مروان مافي زيه طبعا أنا بتكلم بالصراحة دي لأنه أبو مروان
وأم مروان ليهم زمن من ما رجعوا السودان وزي ما بقولو سترة وصلحة وفتكم بعافية ...
|
Post: #2
Title: Re: رجال من ورق ... ونساء في وزن الذبابة ..
Author: هاشم أحمد خلف الله
Date: 02-19-2007, 06:11 PM
Parent: #1
الأخت عواطف مساء الخير
بعد إدمان الحب صرت مدمن كتابات عواطف إدريس
إلي الأمام يا متميزة وكفاية لحدي كده 0
والله ما عندي تعقيب لمجموعة الحكايات البتخصل دي , لي عودة مرة اخري 0
|
Post: #5
Title: Re: رجال من ورق ... ونساء في وزن الذبابة ..
Author: عواطف ادريس اسماعيل
Date: 02-20-2007, 05:46 AM
Parent: #2
أخي العزيز هاشم
مودتي
مرورك الجميل يسعدني وثناؤك المعطر يلهب قلمي ويحرض بنات أفكاري للمزيد ... أشكرك كثيرا ,,, كن
معنا دوما عشان ينور بيتنا وشارع بيتنا ...
|
Post: #3
Title: Re: رجال من ورق ... ونساء في وزن الذبابة ..
Author: celecon
Date: 02-19-2007, 06:27 PM
Parent: #1
عواطف ادريس ...
مشكوره على الحاجات والححكاوى الجميلة...
لكن والله ماليك حق لما قلتى ..
| Quote: سوداني يمتلك شركة خاصة تعمل عنده واحدة أثيوبية سكرتيرة كانت غاية في الجمال |
اصلا الحكاية ما بتحتاج اى تفسير .. كان فى واحد صاحبنا زمان سأل ليه واحدة اثيوبية تعمل فى مقهى انتو بتسوا شنو للسودانيين لما يشوفوكم الواحد كل الاجهزة عندو بتتعطل وبيمشى وراكم .... !!!
ليك مره تانية ألف تحية على سرد وقائع بطريقة حلوه مشوقة ...
دمتى يا رائعة ..
|
Post: #6
Title: Re: رجال من ورق ... ونساء في وزن الذبابة ..
Author: عواطف ادريس اسماعيل
Date: 02-20-2007, 05:56 AM
Parent: #3
سيليكون الغالي
سعيدة بمرورك ... ليك وحشة .. وينك ؟؟
ثناؤك شهادة أعتز بها لأنه تدل على أن هناك أناس يهتمون بقضايانا الاجتماعية شكرا يا الحبيب على
هذا الإهتمام .., أما موضوع الأثيوبيات دة خليه بدون تعليق أحسن.. قبلي كدا معانا زميلة صحفية
سودانية إسمها نجاة هي بصراحة شاطرة وجريئة فتحت ملف علاقة السودانيين بالأثيوبيات كان موضوع
خطير جدا استدرجت ليها كم أثيوبية وأخدت منهن معلومات عن علاقتهن بالسودانيين وكيف قدرن يعدموهم
المليم وكيف بنن في بلدن فلل على حسابهم وهم قاعدين عشرين سنة ما قادرين يشمو السودان وتعال
شوف اللي حصل لنجاة تهديدات من كل حدب وصوب إزعاج في جميع هواتفها ورسالة احتجاج صارخة جدا
من الخارجية الأثيوبية للسفارة السودانية التي استدعت زميلتنا نجاة وقد كانت تعمل معنا في نفس
المؤسسة لكن بجريدة الإتحاد والله المسكينة اتبهدلت بهدلة السواد والرماد لأنها قالت الحقيقة وطبعا
في الزمن دة يا سيليكون ما يقول الحقيقة إلا مجنون ... ودمت .
|
Post: #4
Title: Re: رجال من ورق ... ونساء في وزن الذبابة ..
Author: abubakr
Date: 02-19-2007, 06:56 PM
Parent: #1
تعرفي يا عواطف لحد فترة قريبة وبعد ما عرفتكم وعرفت كنداكات اخريات كنت بفتكر البشوفو في المسلسلات العربية عموما خيال كتاب.. انا زي زي كل الرجال يعني ما منزه ولكن لسبب او اخر اهلي مسكوني طريق واحد اهو ماشي عليهو خمس عقود واكتر ..البنات زي بناتي و اخواتي والمتزوجات منهن زي زوجتي واخواتي ..وكلما كان الشيطان يلعب براسي افكر في اخواتي ولما كبرت وتزوجت افكر في زوجتي ولما ولدت افكر في بناتي ..ودة علاج ناجع جربتو و مفعولو اكيد .. الواحد بخلفية مجتمع ذكوري دايما الشيطان بيوسوس ليهو كتير ويقول ليهو " النسوان " دييل بس عشانك انت يالفحل وياواد يافتك كلهن منتظرات بس نظرة من عويناتك ولفته منك ياواد يا تقيل وووو وهنا الواحد يتذكر اخواتي وبناتو وزوجتو وصديقاتو فيزعل الشيطان ويطفش ولكن ليعود و تستمر المناورات و الدافوري وحيث انني اكره الهزيمة اواصل اغيظو فيطفش وهكذا .. اها ياخوانا العبو دافوري مع الشيطان ..بسيطة .. مش ؟؟
|
Post: #7
Title: Re: رجال من ورق ... ونساء في وزن الذبابة ..
Author: عواطف ادريس اسماعيل
Date: 02-20-2007, 06:21 AM
Parent: #4
يا سلام عليك يا أبوبكر يا رائع .
والله الواحد عاجز عن شكرك لأنك ورغم ظروفك وشغلك اللي ماليه أول ولا آخر وإجتماعاتك اللي ما ليها
حد يلقاك في مقدمة المتداخلين ودة سبب حب الجندريات ليك ... عشان بتشجعهن وتنصحهن لوجه الله
نصيحة نابعة من قلب صافي قلب الرضيع ... شكرا يا أخو البنات يا مقنع الكاشفات على مداخلتك
الرائعة وطبعا الرجال والنسوان والبنات المقصودين ديل ليسوا بالضرورة أن يكونو كلهم في الإمارات
ففي السودان العجب العجاب بس ربنا يستر على البنات ويحفظن ويهديهن ويجعل لوليداتنا في كل خطوة
سلامة طبعا الوضع السياسي والاقتصادي يلعب دور كبير في حالة الوضع الإجتماعي وفي بنات طموحاتن أكبر
من إمكانياتن لكن في الوقت نفسه عايزات كله حاجة وبأي صورة .
|
Post: #10
Title: Re: رجال من ورق ... ونساء في وزن الذبابة ..
Author: حواء سليمان ابراهيم
Date: 02-20-2007, 12:22 PM
Parent: #7
حبيبتى/عواطف
والله ابدعت وما خليتى حاجة ناقصة
عشان الواحد يذيد عليها وانا صدقينى
متابعه معاك ومعجبة بما تكتبيى ، الله يحفظك .
|
Post: #13
Title: Re: رجال من ورق ... ونساء في وزن الذبابة ..
Author: عواطف ادريس اسماعيل
Date: 02-20-2007, 12:57 PM
Parent: #10
الحبيبة حواء
حروف اسمك ...
جمال الفال...
وراحة البال ...
وهجعة زول....
بعد ترحال ....
كلما أشوف أسمك في البورد ينشرح خاطري وينسر بالي سلمت يا ست الحبايب .
|
Post: #8
Title: Re: رجال من ورق ... ونساء في وزن الذبابة ..
Author: Adel Sameer Tawfiq
Date: 02-20-2007, 10:08 AM
Parent: #1
عواطف ست الناس..
كدة تمام..خالصين..
و يحى العدل !!
|
Post: #16
Title: Re: رجال من ورق ... ونساء في وزن الذبابة ..
Author: عواطف ادريس اسماعيل
Date: 02-20-2007, 01:00 PM
Parent: #8
عدولي الحبيب
مودتي
العدل في الأرض حديقة إنتم زهورها ورياحينها ... سلمت يا الغالي ...
|
Post: #9
Title: Re: رجال من ورق ... ونساء في وزن الذبابة ..
Author: abubakr
Date: 02-20-2007, 12:06 PM
Parent: #1
Quote: عواطف ست الناس..
كدة تمام..خالصين..
و يحى العدل !! |
عدولي خبيبي.. لا استئناف ولا تمييز ... اها خالصين ...
ات بتروح فين ؟
|
Post: #17
Title: Re: رجال من ورق ... ونساء في وزن الذبابة ..
Author: عواطف ادريس اسماعيل
Date: 02-20-2007, 01:04 PM
Parent: #9
أبوبكر العزيز
مودتي
لسة في حاجات كتير ... خلع ... مسيار ... زواج الويك اند ... الزواج العرفي ... الزواج الالكتروني
إلخ يعني ما حتخلصو طول ما سعادة المستشار قاعد على الكرسي الوثير لنشر العدالة .
|
Post: #11
Title: Re: رجال من ورق ... ونساء في وزن الذبابة ..
Author: امير عوض الجمري
Date: 02-20-2007, 12:34 PM
Parent: #1
شنو يا عواطف الحكاية
رجال في وزن الريشة
ورجال من ورق
وبعد شوية رجال اكياس بلاستيك
يعني لو جاء الهواء الشديد ابو
كتاحة داك .. بعد ما يروق ويقيف
البلد جت تبقى نسوان ..
وبعدين شنو تغشينا بي نساء ذباب دي.
اول حاجة في ضبان لايوووق زي النوع الأخضر داك
تهشي يطير ويرك جنبك وترشي بالبف باف يرفع ليك
جناحو التاني على وزن الأباط ..
اختي كانت بتقرأ في مدرسة في الرياض وكانت معاها بت عمنا
اخت عمر القردابي .. يوم جايبم اخوي من المدرسة مرّوا على
بتاع بطيخ في لفة المطار ونزل اخوي يشتري في البطيخ وهن يتشالقن
ويتلاقفن ويكوركن لي اخوي اوعة يغشك بحكم انو كان جاي في اجازة من
الرياض وقالن لي بتاع البطيخ هوي اوعة تديهو بطيخة بيضاء .. بتاع
البطيخ قال ليهو ياخي خلي كلام نسوان و الله نسوان ديل دبان (ضبان) ساكت
طبعاً اخوي عجبتو الفكرة جداً لانهن اتمغسن وبقن ينبذن في الراجل : بالله
عليك الله شوف ده .. قال ضبان هو عاين ليهو عامل عراقيه الوسخان ده وعاين
ليهو مكتّح كيف .. وشبشبو مقطوع وكل فرده من بلد.. وعثمان اخوي يضحك ملء شدقيه ..
وهن يزيدن في المغسة.
رحم الله عثمان الجمري فقد كان رجل مرح حبوب يحب الضحك والوناس ويحب الجميع ويبتسم في وجه الكل
|
Post: #14
Title: Re: رجال من ورق ... ونساء في وزن الذبابة ..
Author: انور تاج السر
Date: 02-20-2007, 12:59 PM
Parent: #11
الاخت الغالية الرائعة عواطف،
سعدت ايما سعادة بالتحدث اليك هذا الصباح عبر الهاتف.
كنت اتسامر امس مع صديق، فقال لي ان ما يحدث الان من انهيار اجتماعي (مثال له موضوع هذا البوست) هو عبارة عن New International Order Syndromes .
اعتقد ان طغيان المادية Materialism علي حياة الناس افقدهم الاحساس بالجمال و التجرد ففقدوا الذوق و مراعاة حقوق الاخرين و مشاعرهم.
اكتر حاجة بتمرضني انو واحدة كويسة تقع في واحد رديْ و العكس صحيح.
خالص مودتي
|
Post: #15
Title: Re: رجال من ورق ... ونساء في وزن الذبابة ..
Author: حبيب نورة
Date: 02-20-2007, 01:00 PM
Parent: #14
كلام جميل يا توفي
مررت من هنا علي مهل
|
Post: #20
Title: Re: رجال من ورق ... ونساء في وزن الذبابة ..
Author: عواطف ادريس اسماعيل
Date: 02-20-2007, 01:19 PM
Parent: #15
حبيب نورة وحبيب الكل
كلامك إنت الأجمل ...
إمشي على مهل and mind your steps pls سلمت ...
|
Post: #19
Title: Re: رجال من ورق ... ونساء في وزن الذبابة ..
Author: عواطف ادريس اسماعيل
Date: 02-20-2007, 01:17 PM
Parent: #14
العزيز أنور
نورت البوست
والله كلامك صاح 200 في 100 وأنا برضه بموت من الزعل لمن ألقى واحدة بت ناس تقع في واح إبن
60 ْْْفي 70 والعكس والأيام دي كل الزيجات كدة ما عارفة الحاصل شنو في الدنيا .. يا ربي دي علامات
الساعة ولا شنو ... أنور أنا برضه سعيدة بسماع صوتك خصوصا ونحن في بلد واحد ... مودتي .
|
Post: #18
Title: Re: رجال من ورق ... ونساء في وزن الذبابة ..
Author: عواطف ادريس اسماعيل
Date: 02-20-2007, 01:10 PM
Parent: #11
الجمري العزيز
تحياتي
وألف رحمة ونور على أخوك العزيز .
عارف يا أمير بمناسبة رجال من ورق دي زميلنا الجنرال أحمد طه طبعا راجل نكتة لمن يكون رايق ولمن
يزعل الله لا يوريك أوعك تجي جنبو لكن بعد ثانيتين بكون نسة الموضوع المهم أحمد دة كان في مجموعة
رجال من ورق مسميهم ( الكلينكس ) لمن قلت والله إسم بجنن قال لي كمان كما عجبك في واحدين ورق تواليت
طبعا هو ما بحب الحال المايل عشان كدة بصنف الناس حسب المواقف ...
|
|