الحلة بصل ... والمرة كرعين !!!!! أمثال عجيبة !!!!

تحية وتقدير للأخ عادل عوض الذي يدير مقهى للإنترنت في أكسفورد بالمملكة
المتحدة وقد اتصل مؤخرا مؤكدا أنه يتابع عن كثب كل ما يجري في سودانيز أون لاين
معتبرا هذا المنبر الوطن الثاني لهم في غربتهم التي لا ترحم .


لا أدري ما هو سر تعلق أمة الأمجاد بثقافة المطبخ حتى أصبحت كل الأمثال المعروفة ذات
صلة وثيقة بهذا المطبخ فمثلا عندما يكون الشخص قليل حياء ولا يستحي يقولون عليه مكحل
عينه بالشطة ,,, أو عينه زي البصلة في الروب أماالشخص صاحب المناخير الكبيرة يقولون
عليه نخرته زي كوز الكنافة وقد قال أحد شعراء حلمنتيش لحبيبته تبقي تاكا وأبقي كسلا
تبقى حلة وأبقي بصلة وقال آخر لحبيبته التي شرته شرة الله يلاقينا قدام مدخل داخلية
الطالبات بجامعة الخرطوم وقد سمى ذلك المكان في زماننا بحبل الغسيل من كترة المشرورين عليه:

يالغسلتنا وشريتنا
لما نشفنا ليه ماكويتنا
يالفي كانون هواك حميتنا
لامن زيتنا فاح شميتنا.

أتذكر في منتصف الثمانينات كنت أجلس مع صديقتي وزوجها في بهو إحدى الفنادق وكانت أمامنا تربيزة زجاجية جميلة فالتفت زوج صديقتي نحوها قائلا بالله شوفو رجلين التربيزة ديل سمحات كيفن ؟؟ ضحكت صديقتي ذات الروح الرياضية التي يحسدها عليها زين الدين زيدان اللاعب الفرنسي الذي نطح اللاعب الايطالي عندما استفزه ليلقي به أرضا وقالت لزوجها إنت عندك عقدة سيقان ولا شنو ؟؟ طبعا بحسها الانثوي عرفت أنه معقد من سيقانها التي تشبه سيقان الباعوضة ولكن عقلها يوزن بلد ,, متعلمة , مثقفة ,, واعية ,, مرحة ولكن كل ذلك لم يشفع لها ولم يغفر لهاعند زوجها كون سيقانها أشبه بسيقان المعزة فرد قائلا إنت ما سمعت بالمثل البقول الحلة بصل والمرة كرعين ؟؟ ضحكت صديقتي من سذاجة زوجها الطبيب من أعماقها ولم تعلق كي لا يتمادى في سطحيته فقد تزوجته بعد قصة حب عاصفة ولا تود أن تخسره بسبب سيقانها النحيفة علما أن صديقتي لو كانت تعرف أن بنات اليوم استطعن التغلب على كل العيوب حتى السيقان يتم حقنها بإبر الأنسولين كما يتم التغلب على النحافة الزايدة بأقراص خاصة بالحساسيةأطلق عليها (تشاهد غدا) لسرعة مفعولهاوهي تأتي من فرنسا عبر تشاد لكان لصديقتي ردا آخر غير ذلك التعليق الموجز ,, بالنسبة لي كان الأمر مهينا جدا كيف توضع المرأة ذات العقل والروح مع الحلة أم بصل على بوتجاز واحد ؟؟ لم أعلق على هذا الموضوع حفاظا على مشاعر صاحبتي لأنها زي ما بقولو كانت مكسرة في راجلهاولا تنظر إليه سوى بعين الرضا وهي عن كل عيب كليلة .
كانت تلك هي المرة الأولى التي أسمع فيها مثل الحلة بصل ولكن صدقوني فقد سمعته بعد ذلك عشرات المرات لأكتشف أن الرجل الشرقي على وجه العموم والسوداني على وجه الخصوص يهمه المظهر وليس الجوهر ولغاية اليوم دة ما سمعت واحد قال عايز واحدة مثقفة أو راسها مليان. كله واحد عايز عروس تكون شروطه.. جميلة ,, بيضاء ,,, ذات شعر اسود فاحم وطويل حتى ولو كانت جاهلة المهم جميلة تسر الناظرين ويتباهى بها أمام أصدقائه ويستعرض بها في الشارع العام والمناسبات حيث يتساءل السطحيون أمثاله دي مرة منو بالله ؟؟ والله دي مرة عبدالله ,, وعبدالله الشين التعيس المفلس دة جاب اللقطة دي من وين ؟؟ وإنت مالك ؟ حاسدو ولا بغران وبعدين يااخي اللي بسأل ما بتوه !! يعني إنت هسة لو فتشت زي الناس ما كان لقيت ليك واحدة أحلى من بت عمك الوشها زي وش السخلة دي (هاها ها ها ) يضحكون من أعماقهم ومعهم زوج بت العم الداقسة و القاعدة في البيت براها طول اليوم زي الشيطان تغسل وتكنس وتلبس وتضبخ وتأكل أفواه وأرانب ولا تعلم أنها مادة للونسة والسخرية بحضور إبن الستين في سبعين المدعو زوجها.
لم اسمع طوال حياتي بإمرأة متعلمة وحاصلة على شهادات يكون شرطهاالأساسي للزواج شاب وسيم أو غني , طويل أو صاحب إبتسامة ساحرة ... ولم أسمع أبدا إلا ما ندر أن تتزوج متعلمة مثقفة برجل جاهل ولكنه صاحب جاه ومال وسلطان لأن هذه المتعلمة المثقفة تريد زوجا يخاطب عقلها وروحها وليس جسدها من مفهوم الحلة بصل ,, وفي الوقت ذاته ياما شاهدت رجالا من حملة الشهادات العليا متزوجين بديكورات جميلات لكن سماحة جمل الطين الواحدة منهن لو اتكلمت في مكان عام في حضور زوجها يتمنى أن تبتلعه الأرض في تلك اللحظة ومع ذلك نجده سرعان ما يغفر لها غلطها من منطلق ذنب الجميل مغفور وتستمر الحياة رغم عدم وجود لغة مشتركة وأرضية للحوار المهم مرة جميلة وذات سيقان أشبه بسيقان الفيل لكي لا تكون ضمن من يتحسسن سيقانهن عندما يسمعن مثل الحلة بصل .
يا سادة يا كرام بصل ايه وطماطم أيه ؟؟ كيف يكون شعوركم لو قلنا السلطة جرجير والراجل
يورو ؟؟ هل سيكون رد فعلكم بحجم رد فعل النساء اللواتي يطنشن حينما يسمعن بأن الحلة
بصل ؟ هناك فئة ضالة من الفتيات تأثرن بالحلة بصل ولجأن إلى عدة حلول آنية ودائمة
لحل المشكلة وإن دل هذا على شيء إنما يدل على عدم ثقتهن بأنفسهن وبأن جمال الروح
أبقى وأشمل بينما جمال الجسد إلى زوال ,, أرجو من الإخوة الذين ما زالو يصرون على أن
الحلة بصل والمرة ... أن يرتقوا بفكرهم البصلي هذا وأن ينظروا إلى الوجه الآخر للمرأة
الأنثى الرقيقة.. الأم الحنون ,,, الزوجة المخلصة ,,, الأخت الشفوق ,,, و الإبنة البارة .

أتمنى من جميع المتدخلين أن يخرجوا من المطبخ وأن يغسلوأيديهم من البصل قبل التداخل وفتكم بعافية.

* سوف تشاهدوني غدا لأنني ذاهبة إلى مهمة خاصة مع حبي ومعزتي .

تحياتى..
موضوع جميل وريتى الرجال فيه...البصلة المكشنة بلا زيت

Quote: الحلة بصل ... والمرة كرعين !!!!! أمثال عجيبة !!!!

العزيزة عواطف..
وجه الشبه في كل (اعني في الاثنين)، الاستهلاك..!!!
مؤسف ان يكون الامر كذلك.. ولكنه الواقع.. الذي لا يضع الرجل ايضا في خانة الاستهلاك؟؟؟ مجرد سؤال..

ودي

حليمة

:

Quote: الحلة بصل ... والمرة كرعين !!!!! أمثال عجيبة !!!!

أساساً هي كده
الحلة بصل... و المرة كرعين... و الراجل جزمة

وهي أنه الراجل جزمة وبيعرفوا بجزمته

اول من قال هذاالمثل رجـل..

دنيييييي

Quote: اول من قال هذاالمثل رجـل.. دنيييييي

وليه ما يكن رجل ذواق!
تحيات
جنى

عيني في عينك كده ياجني...


يااااه نظراتك جميله

تسلم ها العيون لآية!
تحياتى
جنى

موني !!!

كديستك دي ممكن تنافس في مسابقة جمال القطط لأنها عسسسسسسسسل !!

جني العزيز !!!

وإنت الصادق ,,, قد يكون ذواق خانو التعبير ,,, مش كدة ؟ شكرا على العبور .

Quote: اول من قال هذاالمثل رجـل.. دنيييييي

وليه ما يكن رجل ذواق!
تحيا%

Quote: بنات اليوم استطعن التغلب على كل العيوب حتى السيقان يتم حقنها بإبر الأنسولين كما يتم التغلب على النحافة الزايدة بأقراص خاصة بالحساسيةأطلق عليها (تشاهد غدا) لسرعة مفعولهاوهي تأتي من فرنسا عبر تشاد

يا عواطف
بالوصفات دي يوم بتكتولي ليك بت ناس

القرادابي العزيز !!!

معزتي ,,,

أعمل شنو ياود الناس البنات جن وقالن هو !!!

موني !!!

معزتي يا ست الحبايب ,,,

قلت فصدقت وهذا عهدي بك ,,, شكرا حبيبتي .

عبدالباقي الحبيب !!!

مرورك يسعدني ,,

عارف عندي واحدة صاحبتي دايما بتقول الرجل الأنيق من حذائه وحلفت ما تعرس إلا تلقى أبو حذاء أنيق
ونضيف 24 ساعة وطبعا دي في السودان ما بتتلقي بسهولة عشان الكتاحة والبصات والركشات عموما قعدت
كدة لمن القطر قرب يفوتها وبعدين لقته وعرسته وعايشة في تبات ونبات وخلفت صبيان وبنات .

حليمة العظيمة !!!

مودتي ,,,

أشكرك على التورية الجميلة ,,, عودي إلينا رأيك يهمنا كثيرا ,, الله يسعدك .

أدروب يا ودالشرق الجميل !!!

معزتي ,,,

أوجزت فأبدعت ,,, حفظك الله .

والفول زيت

عباس سيد الناس !!!

ليه ما يكون الفول شمار عشان الشمار الأيام دي سوقو حار ؟؟؟

Quote: كانت تلك هي المرة الأولى التي أسمع فيها مثل الحلة بصل ولكن صدقوني فقد سمعته بعد ذلك عشرات المرات لأكتشف أن الرجل الشرقي على وجه العموم والسوداني على وجه الخصوص يهمه المظهر وليس الجوهر ولغاية اليوم دة ما سمعت واحد قال عايز واحدة مثقفة أو راسها مليان. كله واحد عايز عروس تكون شروطه.. جميلة ,, بيضاء ,,, ذات شعر اسود فاحم وطويل حتى ولو كانت جاهلة المهم جميلة تسر الناظرين ويتباهى بها أمام أصدقائه ويستعرض بها في الشارع العام والمناسبات

Quote: ولم أسمع أبدا إلا ما ندر أن تتزوج متعلمة مثقفة برجل جاهل ولكنه صاحب جاه ومال وسلطان لأن هذه المتعلمة المثقفة تريد زوجا يخاطب عقلها وروحها وليس جسدها من مفهوم الحلة بصل

الاستاذة عواطف ادريس
سلام, بحكم اني شرق اوسطي سوداني ذكر ماح انفي شئ لكن في الاقتباسين اعلاهم ما شايفه انو الحكم جائر حبتين اكيد في نسبـــه 0.0001% النظرة مختلفه عندهم

ودي

Quote: الحلة بصل ... والمرة كرعين !!!!! أمثال عجيبة !!!!

والعربية بودى!

العربية السيارة ولذا جرى التنويه!
والبيت تشطيب!
والصدير رمان!
والرقبة قزاز!
والضمير خاتم!
البلاوى دى بجيبوها ناس الحقيبة!
لكن برضهم عندهم ادب احسن من ناس الفيديوكليب!
مافى ضرب تحت الحزام لمن يوصلوا هناك بضربوا الكواريك
وليلى هوووى وليلى هوووى هوووووى!
والباقى لخيال المستمع والقارئ!
ما تودوناش فى داهية!
جنى

جني يا رايع !!!

وعلى وزن ذلك يمكن نقول :

الشقة صالون !
والبيت حوش !
والفيلا حديقة!
والركشة مسجل!
والسلطة طماطم!!

شكرا جني كن معنا الله يحفظك .

OUDENOORD العزيز !!!

حقك علي وكلامك صحيح 200% لكن تصدق معظم الصادفتهم دي مواصفاتهم لشريكة الحياة ,, شكرا على
عبورك السلس وروحك العالية ,,, إبقى معنا...

اها يا عواطف ..جينا ...
انا بحب المطبخ وزعلان علي جدي وعمي وخالي وكتير من اهلي الكانو طباخين ( شيف الايام دي بعدما عرفو الكانو بيعايرونا بالطباخة انها شغلانة ابهة)..وانا بعد سنتين من التخرج كمهندس كان اقصي طموحاتي ان افتح مطعم انا اكون الشيف ولذا صقلت الموهبة المو وعندما اغتربت (دة كان زمان اوي) كانت المطاعم العامة شوية في المكان الانا فيه فتعلمت كل الصحون من الكوسا الي البشملي والديزيت بانواعو والبسبوسة والباسطة ولما هلت سامية انا كنت ولا الشيف رمزي وساهمت مساهمة فعالة في الشئوون المطبخية لمدة قاربت العقديين ثم قررت هي ان انزل المعاش ولا اتدخل ..وقد كنت زعلانا وما زلت وانا اشاهد برامج الشيف رمزي والفلبيني الامريكي و قريبنا اسامة ( ما بقي قريبنا واللا ما عاجبكم )وراشيل كمان بقت صاحبتي وبتابع برامجها .. وفي يوم قبل كام سنة وعند اللفة البتودي الميديا سيتي وقفت الحركة وجات عربية امريكية طويلة مقعمز داخلا واحد لابس ابيض في ابيض ... وهات "هاي رمزي " " يقبرني شو حلو وظريف " " وايد مزيون " " حبيبي بتلفلنك " وهو يوزع البسمات والاشارات للجميع وانا فيهم .. كان الشف رمزي .. فلعنت اليوم الذي دخلت فيهو مدرسة وصلتني الي الاسمنت والطابوق والرملة وبلاوي المهندسيين والعمال والاثار "الجانبية " -ما تسالوني عنها بس تجو الصايت في الصيف -...
واليوم وانا زعلان لانكن افتكرتن انو "البصل" و "الحلة " شتيمة وهما من اهم الاشياء لحياة الانسان العندو نظر وما بياكلش وينكر.. اها تخيلو الدنيا من غير بصل وحلة يا اولاد الايه ؟... ما بيوت العزابة كانت بتصنف في زمانا (هي لسه في واللا قفلوها الكيزان مع السينمات) وفقا لاحسن حلة ؟؟؟ اها نسيتو واللا شنو .....؟
وانني من مكاني هذا وموقفي تجاه المطبخ الذي لا يتزحزح استنكر ربط الشنا بالبصل والحلة ورجليين تربيزة السفرة ....اشمعنا ما تربطوها بالكرش وسفة الصعوت والعيون المجعمصات وريحة الجزمة البتودر الضب ؟
قالت بصل وحلة .. دة كلام

الشيف أبوبكر !!!

مودتي ,,,

نحن لا نحكم على شيء غايب إذا أردت أن تثبت أنك أشطر من الشيف رمزي أعمل الحلة وتعال لينا في أبوظبي بس بشرط تكون سامية في إجازة ,, شكرا على دعمك الجميل يا جميل لكل البوستات .

الأستاذة الكريمة عواطف تحياتي وتقديري لكم

اتشرف كثيراً بمطالعة مقالتكم المفيدة والممتعة .

ولكم جزيل الشكر والتقدير على تواجدكم بيننا، والشكر كذلك للمهندس بكري ابوبكر الذي شرفنا بمنحنا عضوية في هذا المنتدى الذي يكتب به أمثالكم من الفضلاء .

الاخت الجميله عواطف

شكرك كثيراعلي هذا الموضوع الجيد

الي يدعو الي الجوهر



حكايه حدثت لي كنت بجامعه الخرطوم, اشرب القهوه عند احد الخالات قبل دخولي الي اجتماع مهم بقاعه الشارقه

فجاء جاءت مجموعه من الطلابات, جلسنا بجانبي و قالت احدهن متابعه لموضوع سابق "(و الله انا بعجبني الراجل الصوته رخيم

موش ذي الحمار ورياضي مايكون عندو كرشه و لا صلعه)

عندها حزنت لانها لم تقل شي عن الشخصيه التي تود الارتباط بها

و هذا الاستلاب اتي من طريقه الرجل لا ختيار لزوجته عن طريق روايتها في احد فديوهات الاعراس او المقابله صدفه

و يتم الاختيار من اجل الشكل الظاهري

ودمتي

المناضلة بنت السيد !!!

معزتي يا ست الستات ,,

أنا من زمان معجبة بآرائك وكان نفسي أجر رجلك لبوستاتي عشان إنسانة في فهمك وثقافتك رأيها مهم
جدا والحمد لله نجحت في ذلك أما حكاية إختيار الطرف الآخر بالمظهر الخارجي فقط فما زالت سارية المفعول يعني لغاية هسة البريد بينقل صور بنات وشباب عشان الواحد يختار وإذا عجبته واحدة برسل ليها صورتو وبعدين تبدأ الحكايات والروايات والمقالب لما يطلع أن ليس لصاحب الصورة أي علاقة بالموضوع .. شوفي الناس زمان كانو راقين كيف ؟؟ رغم العلاقة الحميمة ترفض إعطائه صورتها:

توعدنا وتبخل بالصورة !!!

معزتي يا راقية لا تذهبي بعيدا نحن بحاجة لوجودك بيننا .

ALAZHARY2 العزيز !!!

أولا نتشرف بتواجدك بيننا لأنك بالتأكيد سوف تشكل نقلة نوعية جديدة ,, ثانيا أشكرك على عبورك الرقيق
ثالثا كن معنا فنحن بحاجة لرأيك ,,

الاخت عواطف

موضوع مهم بالجد

عندى تعليق بسيط

Quote: سيقانها التي تشبه سيقان الباعوضة ولكن عقلها يوزن بلد

تخيلى هنا التعويض غير ممكن
بمعنى ان احدهم لا يمكن ان يحل محل التانى
عليه وبنفس المنطق
من لديها كرعين رهيبات ( ما عارف اقول زى شنو ) ومخها زى الباعوضه بتكون برضو واحده مميزه
و
تحياتى

Quote: تخيلى هنا التعويض غير ممكن بمعنى ان احدهم لا يمكن ان يحل محل التانى عليه وبنفس المنطق من لديها كرعين رهيبات ( ما عارف اقول زى شنو ) ومخها زى الباعوضه بتكون برضو واحده مميزه و تحياتى

السؤال

ايهما تفضل!!
جنى

ومن باب العدل برضه ..ووقوفا مع صاحبتي مي بت الاسيد يا توفي 'TOFE'..
بعد البوست ده أفتحي واحد اسمه..

الراجل عيبه جيبه!

وأنا من أسه حاجزه المثل البيقول..

ياواخد القرد لماله..يروح المال ويفضل القرد علي حاله!

سبتك بعافية

" target="_blank">

dear awatif

the woman Nada is singing for
has got very beautiful
sexy
legs

lol

mustafa

LOOOOOOOOOOOOOOOOOOOOOOOOL !!!!

دكتور مصطفى !!!

ياذوق ,,, أشكرك على لفتتك الجميلة ,,, هذا هو عهدنا بك ياملك ,,

‏(و الاسمنت مويه)(الكوره اقوان)(ودي من عندي الكوره زيدان والتعليق عصام) تحياتي عواطف وبرجع ليك

محمدمختار !!!

مداخلتك نار !!!

ما تتأخر عشان ما نسرح و كمان نحتار ,,

معزتي ..

العزيزة موني !!!
مودتي ,,,
أمرك يا غالية وفعلا زي ما قلت ياواخد القرد لمالو راح المال وظل القرد على حالو ,,,

العزيز يوسف الولي !!!

معزتي ,,,

شكرا على مرورك الجميل ,,, سعدت بمداخلتك الموضوعية وبعد كدة الأمر يرجع ليك أيهما تفضل .

الأخت عواطف تحايا نواضر
بوست جميل واسلوبك ممتع
يشد الواحد عشان يقرأ

Quote: البلاوى دى بجيبوها ناس الحقيبة!

الأخ جني انا شايف انه البلاوي
دي بجيبوها ناس الجيش وفي الثمانينات
كنت اعمل بمطار بورتسودان وذهبنا على ما اذكر
رئاسة البحريه وربما الدفاع الجوي وعلى البوابه
توجد قائمه طويله وبخط كبير عن تحوي اكثر من 15
جمله من هذه الشاكله وحاولنا ننسخها لكن عند
الخروج نسينا الأمر وهي قائمه ظريفه جدا ياريت
واحد من ناس بورتسودان ينزلها لينا
ولكم مودتي
عزالدين

عزالدين الواعي الرزين !!!
معزتي ,,
مرورك أسعدني وفعلا زي ما قلت غنا الحقيبة كله حسي وقد يناسب زمنهم لأن التعليم لم يلعب دورا في
ذلك الوقت ومع ذلك فهو غناء جميل وبه الكثير من المعاني الإيجابية ,,, شكر عزو أبقى معنا .

Quote: ياواخد القرد لماله..يروح المال ويفضل القرد علي حاله!

بعدين تلفي بالقرد "قرداتية يعني" وتجيبي المال ....شفتي كيف ....

بالمناسبة الجمال المادي دة بتقاس كيف ( بعيدا عن حكايات ملوك و ملكات الجمال ومسابقاتم)...؟؟

دى شنو اللييييييييييييييييييييييييييييلة

دي طبخة جاهزة !!!

في ناس يبقيسوه من هنا ..



لكن أنا مامنهم!

أسألني تاني انا من ياتهم علشان أوريك..

أصلي الأيامات دي شغاله 'بالكلمه ورد غطاها'

سلامات يا عطوف

شنو مولعة النيران و جارية؟؟؟

الشكل هو أول ما يجذب الجنسين لبعضهما فى الوهلة الأولى،، إذا كان رجلاً أم إمرأة.. و دة طبيعى طبعاً. ليس المطلوب داك يا الجمال الفتاك يعنى ، لكن أهو البيريح نظرك و بالك .. دة بصورة عامة

و نجى لقصة الحلة بصل و المرة "كرعين" و الراجل جزمة دى

أنا غايتو المثل دة ما أخدتو بتعصب كلو كلو، لأنو حاجة بتعبر عن "فهم" كل زول لما يريده، و غالباً بيتردد من غير "فهم" برضو ، ولا أرى فيهو أى وجه "مقارنة" بيننا "بين ساقينا" أقصد و بين الحلة أم بصلتن كتيييييييييييييييييييرة .. و جد جد ما شايفة إنو بيقلل من فهمنا و من تقييمنا لأنفسنا و لا حتى تقييم الآخرين لنا .. يعنى ما تعملوا لينا من الحبة قبة سااااكت ، و القال ليك منو البنات المتعلمات و الفاهمات ما بتكون الواحدة أمنية حياتها إنها ترتبط ب"فارس أحلام" وسيم و شيك و أنيق؟؟ غايتو أنا كل صاحباتى فى الكلية " و لسنا جاهلات و لا ساذجات" كنا نتمنى الإرتباط بالشاب الحليوة "إلى حد ما" و الظريف، و الفكر دة ما إلا يكون الزول "شين" حتى يكون مثقف، و فاهم و مقدر ،، و الأمثلة قدامنا فى الحياة لا ليها أول و لا آخر..

و صاحبتك " تراكى براكى شايلة حالها و قلتى سيقانها زى الباعوضة" تراها "بلعت" الكلام و سكتت لأنو عارفاهو لا يتعدى اللحظة و الموقف الذى قيل فيهو، لأنو راجلها بيحبها بالرغم من "السكاكات" حقتها ،، ههههههههههه،، و الله بس بهزر معاكى ما تقومى تسلى لى لسانك، لكن الحياة و السودانية تحديداً مليئة بالأمثلة العجيبة و الغريبة بس بنتقبلها لأنها قيلت فى زمن غير زمننا و الآن الموازين إنقلبت و صارت المرأة نداً للرجل تقريباً فى كل شئ و ما "بتبلع" الكلام البتقال عنها ساااكت كدة من غير رد و "بستفة"

الله معاكم و مع الحلة الحتأكلوها لينا "سليقة بس "بعد دة

Quote: سلامات يا عطوف شنو مولعة النيران و جارية؟؟؟

نوووووووووووووسة ؟؟؟؟

أمانة ما اتلومتي يا بت القبايل !!! معقول أجري ؟؟ أنا أمك يا مجاهد !! السيف ما بجري منه خلي
إختلاف راي ووجهة نظر ,,, يا بت أنا مش كاتبة تحت عندي مهمة أرجعي تاني للبوست .
نجى لقصة الحلة بصل و المرة "كرعين" و الراجل جزمة دى

Quote: أنا غايتو المثل دة ما أخدتو بتعصب كلو كلو، لأنو حاجة بتعبر عن "فهم" كل زول لما يريده، و غالباً بيتردد من غير "فهم" برضو ، ولا أرى فيهو أى وجه "مقارنة" بيننا "بين ساقينا" أقصد و بين الحلة أم بصلتن كتيييييييييييييييييييرة .. و جد جد ما شايفة إنو بيقلل من فهمنا و من تقييمنا لأنفسنا و لا حتى تقييم الآخرين لنا .. يعنى ما تعملوا لينا من الحبة قبة سااااكت ، و القال ليك منو البنات المتعلمات و الفاهمات ما بتكون الواحدة أمنية حياتها إنها ترتبط ب"فارس أحلام" وسيم و شيك و أنيق؟؟ غايتو أنا كل صاحباتى فى الكلية " و لسنا جاهلات و لا ساذجات" كنا نتمنى الإرتباط بالشاب الحليوة "إلى حد ما" و الظريف، و الفكر دة ما إلا يكون الزول "شين" حتى يكون مثقف، و فاهم و مقدر ،، و الأمثلة قدامنا فى الحياة لا ليها أول و لا آخر..

نووووووووووسة !!!

والله إذا إنت ما بتزعلي بطريقتك كلو واحد حر في زعلو على وزن كل واحد حر في موزو وبعدين إذا إنت وصاحباتك كنتو عايزين الشاب الحليوة رغم إنكن لا جاهلات لا ساذجات أنا وصاحباتي كنا عايزين الراجل
المالو هدومو ومخه يوزن بلد ياربي كنا داقسات ولا شنو ؟؟ غايتو يا نسوان الزمن دة تخوفو لو الواحد
وقف مع الرجال تسووه خراب بيوت وكان وقف معاكن تقولن مافي أحسن من الرجال ليهم حق يقولو المرة كان فاس ما بتكسر الراس .

Quote: و صاحبتك " تراكى براكى شايلة حالها و قلتى سيقانها زى الباعوضة" تراها "بلعت" الكلام و سكتت لأنو عارفاهو لا يتعدى اللحظة و الموقف الذى قيل فيهو، لأنو راجلها بيحبها بالرغم من "السكاكات" حقتها ،، ههههههههههه،، و الله بس بهزر معاكى ما تقومى تسلى لى لسانك، لكن الحياة و السودانية تحديداً مليئة بالأمثلة العجيبة و الغريبة بس بنتقبلها لأنها قيلت فى زمن غير زمننا و الآن الموازين إنقلبت و صارت المرأة نداً للرجل تقريباً فى كل شئ و ما "بتبلع" الكلام البتقال عنها ساااكت كدة من غير رد و "بستفة" الله معاكم و مع الحلة الحتأكلوها لينا "سليقة بس "بعد دة

القال ليك منو أنا شايلة حال صاحبتي ؟؟ بتصدقي إنو أنا لما كتبت الموضوع دة كنت معاها في بيتها
وقلت ليها رايك شنو أكتب الموضوع الفلاني وذكرتها بالموقف ضحكت وقالت لي عليك الله أكتبيه لأنه الراجل دة معرساه لي عشرين سنة وشابكني سكاكاتك سكاكاتك ولمن كتبيت سيقانها النحيفة مسحتها وكتبت
زي سيقان الباعوضة والمعزة شايفة روحها رياضية كيف ؟؟ هي كانت فاكرة الرجال حيقيفو معاها لكن
خذلوها وكل واحد فيهم مصر على السيقان الجميلة دي مصيبة شنو يا نوسة ؟؟؟

كمين مفخخ!
جنى

مونييييييييي !!!

القرد عندك !!!

الكلمة ورد غطاها ؟؟؟

خيرا فعلت !!!

أبوبكر !!!

صباح النور عليك يازهور ,,,

الجمال المادي بتقاس بالمتر ,,, وبتشاف شوف العين !!! أما جمال الروح فبتحسه ولا تلمسه !!!

Quote: الجمال المادي بتقاس بالمتر ,,, وبتشاف شوف العين !!! أما جمال الروح فبتحسه ولا تلمسه !!!

عواطف
ال measuring tape والمتر للبنايات عند البنايين زي وقياس الوسط والاكمام عند الترزية اما الروحيةفتلقطهاالقلوب وبتقيسها العقول ....

_____________
حاشية :
"راي قانوني" شنو من الحتات ود شيقوق ...؟؟ هو مالو والقانون ...؟ بس يعني بشان لابس بدلة وكرفته يعني ؟؟؟

Quote: دى شنو اللييييييييييييييييييييييييييييلة

وات مالك ؟؟؟ الكلام عن السودانيات وانهن كلهن حلوات والاولاد الشيك... يعني ما جابو سيرتك ولا كرفتتك وبدلتك ؟ خليك بعييييييد

الأخت عواطف والجميع،، سـلام،، وشكرا لكم وشكـرا الأخت نوسة:

Quote: القال ليك منو البنات المتعلمات و الفاهمات ما بتكون الواحدة أمنية حياتها إنها ترتبط ب"فارس أحلام" وسيم و شيك و أنيق؟؟ غايتو أنا كل صاحباتى فى الكلية " و لسنا جاهلات و لا ساذجات" كنا نتمنى الإرتباط بالشاب الحليوة "إلى حد ما" و الظريف، و الفكر دة ما إلا يكون الزول "شين" حتى يكون مثقف، و فاهم و مقدر ،، و الأمثلة قدامنا فى الحياة لا ليها أول و لا آخر.. و صاحبتك " تراكى براكى شايلة حالها و قلتى سيقانها زى الباعوضة" تراها "بلعت" الكلام و سكتت لأنو عارفاهو لا يتعدى اللحظة و الموقف الذى قيل فيهو، لأنو راجلها بيحبها بالرغم من "السكاكات" حقتها ،، ههههههههههه،، و الله بس بهزر معاكى ما تقومى تسلى لى لسانك، لكن الحياة و السودانية تحديداً مليئة بالأمثلة العجيبة و الغريبة بس بنتقبلها لأنها قيلت فى زمن غير زمننا و الآن الموازين إنقلبت و صارت المرأة نداً للرجل تقريباً فى كل شئ و ما "بتبلع" الكلام البتقال عنها ساااكت كدة من غير رد و "بستفة"

ربما كان أول بوست لكي لفتني لمقدرتك على الكتابة الطريفة -الأخت عواطف- كان يتحدث عن (حنكوشات) أوربا وأمريكا البحلمن بعرسان مثل براد بت ( دا ما عندو علاقة بحمادة بت)! أو ديفيد بيكام،، ودا في المقام الأول عشان الوسامة والشياكة مش عشان المال ولا الشهرة ولا المخ،، مع أنهم ما شا الله عليهم يتمتعون بكل تلك المميزات،،(المفروض طبعا استخدم صيغة المثنى، لكن معليش أنا من الناطقين بغيرها) وحتى صاحبتك التي يوزن مخلها دولة زي ما قلتي لم تختار المثقف الذي يناسبها، وإنما تزوجت ذلك السطحي العندو عقدة كرعين، برضو زي ما قلتي ، وكمان بعد حب عاصف،، بعدين زي ما قالت نوسة الآن أصبح حلم أغلب البنات، متعلمات تعليم عالي أو أقل بحلمن بالشاب الغني والوسيم، ولو كان مثقف تكون (صحّت التجارة)،، والغنا لي راجل المرة أكيد ما عشان علمو وثقافتو،، وأظنك برضو سمعتي بأغاني مثل:
أمـّو حنكوشة (وبتعمل كدة) بي رموشا،، وأنا حبيت وليدا عشان خاطر قروشا..
وقالوا أمو نضامة،، بريدا وأريد كلاما، وأنا حبيت وليدا عشان خاطر الوسامة الخ الخ،،
وزي ما قال جني، وكمان في الرواية العندي إنو المثل دا أصلا ببدأ ب (الشاب جزمة والفول زيت الخ الخ)..
عموما ثقافة حب المرأة أو زواجها لجمال جسمها دي موروث إنساني متجذر في رأي وليس فقط موروث شرقي أو عربي أو سوداني ولم تبدأ في تأريخنا فقط مع الحقيبة، لكن من زمن: تمشي الهويني.. ولغاية زمنّا دا أو زمن ناس الحقيبة كما أشار الشباب ناس: مشيهو المهر الوحيل...يمشي خطوة: اتنين مستحيل الخ الخ...وفعلاً ثقافتنا الشعبية مليئة بالأمثال الغريبة المتداولة والمستخدمة بلا سوء نية!،، واصلي..

DEAR ISA

MY REGARDS

تحليلك موضوع ومنطقي جدا أقف معك في كل كلمة ذكرتها وليس لدي ما أقوله سوى ربنا يحفظك وأبقى معنا
فلرأيك مكانة كبيرة عندنا ,, شكرا على مرورك السخي .

منى خوجلى,
خلى شغل المديدة حرقتنى دا ,وبطلى سغالة ياخى......
عواطف دى طارت وين.....خلتنا للشماتة حاربهم الله

Quote: منى خوجلى, خلى شغل المديدة حرقتنى دا ,وبطلى سغالة ياخى...... عواطف دى طارت وين.....خلتنا للشماتة حاربهم الله

هي..عرفتني كيف ياحسن 'سغيله'?

والله يامنى سغيل القرد الوجيه دا

الأخ الحبيب حسن !!!

أنا جيت وما عاش من يشمت فيك وراك رجالة ,,, بس إنت نوم قفا !!

ألأخت عواطف



سلام ووين الناس؟

بصراحه نوسه موضوعية فى ردها.

سلام العزيزة عواطف
الأعزاء المتداخلون

المرة كرعين...

يا جماعة الأستاذة عواطف حكت العبارة شديد لما جابت الدم..
المرأة أو المرة لو كانت متعلمة أو جاهلة هي مرتبطة بكلمة الجمال..
في رجال كثيرين بينظروا فوق.. أقصد ما بركزوا في الكرعين.. ماأصلو حب
الناس مذاهب..
وبعدين الناس دي كلها متزوجة ومقتنعة.. حرام الكلام والتعليقات الظريفة..
ولا حرام الواحد يعبر عن حرمانه بعد أن إرتبط وإقتنع بى بنت عمه...
ثم تانيا.. المرة دي لازم يكون فيها ما يجذب ويقرب أولا.. لا النقة والمناقرة
بتاعة الشهادات.. ولا جدلية المنابر والفورمس..
الفول زيت..
الجلابية سكروته..
العمة توتال..
السيجارة بينسون..
المعجون سيجنال..


مع تحياتي
عبدالعزيز

عزو !!!

معزتي ,,,

أنا حاسة إنك طالع برة الشبكة كدي راجع مداخلتك دي ورينا منو القال الناس متزوجة وما مقتنعة نحن
بنتكلم عن الناس الغير متزوجين فطالما إنتو متزوجين ومقتنعين يبقى الكلام ما ليكم أما حكاية ود
العم المن حقوا يعبر عن حرمانه دة مالو ما مقتنع ولا شنو والتعبير ذاتو ما خشم بيوت ولكل مقال
مقام يعني كيف أنا مثل أخلي الناس تضحك وتتندر بزوجي وأجي داخلة البيت عادي وعاملة بحترمو وبقدرو
أما الشهادات والتعليم ديل يا بعد عمري أصبحو شي أساسي وقد قال حافظ إبراهيم
الأم مدرسة إذا أعددتها **** أعددت شعبا طيب الإعراق
يعني أعددتها ما بقصد بيها تعلمها كيف تكنس وكيف تطبخ لا يا عزيزي ,, تسلحها بالعلم والمعرفة عشان تعرف كيف تواجه الحياة . مع تحياتي

العزيزة أستاذة عواطف
سلام

إنت مطلعاني برة الشبكة ليش؟؟؟ أنا ناس بيتنا كلهم معتبرني ما زلت بكرا..
وطبعا أنا مشاركهم الرأي 100%...
يعني الزواج بالأجنبية هذه مجرد مقدمة للزواج الأساسي..
وبعدين يا عزيزتي أنا مع تعليم المرأة.. لكن الشهادات ما هي واجب أو شئ
ضروري للإختيار إذا فقدت الجوانب المهمة علشان نقول هذه إمرأة...
(إذا نظر إليها سرته) دي معناها شنو يا عواطف!!!

لك التحايا

عبدالعزيز

عزو !!!

معزتي ,,,

خلاص عايزنك تطلع من الfoundation دة بسرعة وتدخل لينا الكلية ونشوف العروس التي تسر النظر!!!

منبرنا الجميل فات حدود وادينا
مستنين يراعك يا العواطف الزينة
تــــــــــــــــــــــــــــــــــ
عواطف كيفنك
البيتين أعلاه كومك من قصيدة طويلة عريضة هى باكورة إنتاج شيقوق
كتبها بأحد بوستاتى ما مخلى فيها زول قلت أقسم لكل زول كومو .
تحياتى يازينة

سمسمة !!!

شرفت وآنست أيتها الكاتبة الجميلة ,,,

شكرا على كلمات ابن المبدع إبن شيقوق وشكرا ليك أيتها الحبيبة على مرورك الزاهي .. تحياتي ياست

البنات .

Quote: بصراحه نوسه موضوعية فى ردها.

اسماعيل عباس !!!

بصراحةأحترم وجهة نظرك التي تتفق مع رد نوسة الموضوعي !!!

Quote: أصلي الأيامات دي شغاله 'بالكلمه ورد غطاها'

يعني الكلمة "حلة" وانتي شايلة غطاها ؟؟؟

Quote: حيث يتساءل السطحيون أمثاله دي مرة منو بالله ؟؟ والله دي مرة عبدالله ,, وعبدالله الشين التعيس المفلس دة جاب اللقطة دي من وين ؟؟

أستاذة عواطف...
تقصدى شنو بالله؟؟؟

عبوددددددددددي !!!

سلامات !!!

بركة الجيت !!! والله ما بقصد حاجة !!! كلنا عبيد الله وبعدين لو قلت زوجة أحمد حيجيني واحد إسمه أحمد
ويشب لي في حلقي ولو قلت علي كمان نفس الشي عموما مرورك اسعدني .

الحبيبة عطوفة...
أشواقي الدفيقة.
أتمنى أن تقري مداخلتي دي ..و إنتي راجعة سالمة غانمة و متوفقة في مهمتك الخاصة.


بالنسبة لحكاية (( المرا كرعين )) فأنا أؤيد المثل دا 100% ..قولو لي ليه؟؟؟

في بداية الخليقة...زمن آدم و حواء.. و أجدادنا القدماء..
كان الرجل هو ال breadwinner أو جالب الطعام...
و المرأة هي ال caregiver أو الحاضنة و الصدر الحنون...
و كان إنجذابهما ل بعضهما البعض ل حفظ النوع. لذلك كان يختار الذكر (( الودود ..الولود )) و كانت الأنثى تختار (( القوي..الأمين )).
مرٌت عصور و حِقب مختلفة..
صارت الناس شعوباً و قبائل...
إختلفت الأولويات....
تباينت المعتقدات...
إختلفت الضرورات و الأساسيات..
لكن ...
هل تصدقو إنو في بحث حديث نُشر على صفحات ال TIME ...
أكتشف العلماء أن الرجل - ما زال - ينجذب للمرأة ذات الحوض الواسع و الأرجل الممتلئة لأنها الأمثل ل حفظ نوعه..كماأن الأنثى لا زالت تنجذب للرجل القوي لأنه الأمثل ل حمايتها و حفظ نوعها...!!!

بالنسبة للحلة...أنا بصراحة ما بحب البصل...
لذلك أُفضل أن أسوي ..المَكشٌن بلا بصل!!!

ممكونة الحنونة !!!

محبتي وتقديري ,,,

وبعد ,,,

تصوري إني بسعد بمداخلتك جدا وإن إختلفت معي في الراي لأني حتما بخرج بمعلومة مفيدة تبرر فعل ما
أو مقولة ما وقد صدقت فيما ذهبت إليه ولكن بعض الرجال لا يقصدون الجمال الخاص بحفظ النوع كما ذكرت أو الجمال الذي يسر النظر متربطا بجمال الروح والفكر هناك من يبحث عن الجمال المطلق وفي بعض الأحيان الخاوي من أي مضمون ,, عموما سلمت يا ست الحبايب ,,
غايتو أنا لما أزورك عايزة المكشن بالبصل لأني بحب البصل جدا غايتو جهزي ليك شوالين بصل وأرجيني .

أنا جييييييييييييييت وبعتذر عن التأخير بشدة لظروف خارجة عن الإرادة .

عواطف سلامات

هم بيقولوا ( الفول شمار والكوارع نار والحلة بصل والمرة كرعين والضابط جزمة ) ، طبعا أنا أكتر حاجة مكيفاني الأخيرة .. وكان عندي صاحبي لما كنا طلبة في أوائل السبعينات كان لما يحب يشكر ليهو واحدة يقول ليك يا أخي دي ساقينا زي طفايات قاعة الصداقة .. وعندنا زميلتنا كانت لما تحب تشنف ليها واحدة تقول ليك ساقها يحش الرجلة ... أما الفهم والقراية والمواظبة دي أصلها ما قاعدة تدخل في الوصف ..

اليوم من أول الصباح واحد مرسل لي نكتة تقول :

- الزوجة: ليه تقول لأصحابك إنك عرستني عشان بعرف أطبخ بس؟ رد الزوج: ماهو يا حبيبتي لازم أقول ليهم سبب وجيه؟

حصل فتحنا نقاش زي دا ونحن طلبة عن أيهما تفضل المثقفة الواعية المتعلمة حاضرة البديهة وطبعا دي بتدخل فيها خفة الدم وروح النكتة أم الزوجة الحلوة وجاهلة ، رد علي أحد الأخوة قال لي يعني تقصد أعرس لي واحدة شينة بس تكون مؤهلاتها انها متعلمة يعني أكون سايقها وماشي في الشارع لما الناس يعاينوا ليهاأقول ليهم يا اخوانا زوجتي خريجة ودمها خفيف ، والله مستوى نقاش كان بتاع طلبة جامعيين وفيهم خريجين كمان .

فتك بعافية وآسف أني أطلت عليك وعلى ضيوفك .

أبو قصي

أبوقصي !!!

شرفت ونورت ,,, مرورك يشرح القلب ويسعد الخاطر ,,, وإحنا عندنا واحد حلفاوي لذيذ يقول ليك أصلي
ما بعرس واحدة رجلينها زي ال CNN لاحظ شوف السي أن أن ملولة كيف في الكتابة .. أما الزوج اللي قال
لزوجته لازم أقول سبب وجيه دة خفة دمه متناهية جدا !! وفيم يتعلق بأصحابك العايزين نانسي عجرم ديل بعد يوم أو يومين الجمال ببقى عادي وتروح السكرة وتجي الفكرة .

عواطف
انتي باين عليكي ما سمعتي الفنان احمد المصطقى
بيغني ............

شكت ألألم من لمسات حجولا
( كناية عن امتلاء الساقين مما ادي الى احتكاك الحجول ببعضها)

_________________________________
انا جني و جن المراة ام عرقوبّّّ

حمودي !!!

تحية ,,,

عارف إنك بتتفق مع أمي جدا بتقول المرة أم عرقوب بتنشف البيت من الأخضر واليابس عشان كدة كانوا
لما يمشو يخطبو واحدة أول حاجة بيعملوها بعاينو لرجلينها لو لقوهم عراقيب ما بتكلمو بيخلوها
زيارة عادية وكأن شيئا لم يكن لكن لغاية هسة ما عرفت العلاقة بين العرقوب ونشفان البيت شنو ؟؟

هذا مقال قديم يشير الي ابحاث عدة في شان العلاقة بين الرجل والمراة واطفالهم واثر ان يقوم الرجل ببعض مهام "بيتية" في تحسن العلاقة ...:

Quote: Housework gives men sex appeal: study By Sarah Womack London August 28, 2003 Children benefit from seeing their fathers help around the house and women find men more attractive if they pick up a duster, researchers have found. A study says children who do their share of cleaning with their fathers are likely to be better adjusted and more socially aware because they learn "democratic values" at an early age. Researchers at the University of California studied the results of a national survey of 3563 children and their parents. Unsurprisingly, men did less housework than women, but the study found they were taking on tasks such as shopping and picking up children from school as well as some cooking and cleaning. Men also spent more time around their children than in previous generations - about three hours on a Saturday or Sunday. University of California sociologist Scott Coltrane, who led the research, said: "When men perform domestic service for others, it teaches children co-operation and democratic family values." Dr John Gottman, of the University of Washington in Seattle, said if men shared the tasks, women felt less stressed about balancing the demands of work and home. They also saw their partner's assistance as a sign of love and therefore felt more sexually attracted to them. In Britain, however, therapists claim to have identified a new condition, named Atlas Syndrome - after the Greek god who supported the sky on his shoulders - which afflicts men who hold down demanding jobs while trying to be perfect parents. The term was coined by Dr Tim Cantopher, a medical director at Priory Clinic, the hospital favoured by celebrities needing treatment for addictions. He said it struck men who were trying to "work the unworkable", adding: "It's a modern condition caused by social and political changes affecting the role of men." Jack O'Sullivan, co-founder of Fathers Direct and editor of Dad magazine, said this generation of fathers was living out a huge social change. "They're working just as hard but at the same time they're committed to doing a great deal more at home so they are inevitably stressed out." - Telegraph

عواطف!!!!!!!!

يا مرة .. وليّة .. يا حرمة ..
مواضيعك خطيرة ..

لكن يا عواطف اختي ..
يعني اي مرة مثقفة وراسها مليان .. شينة!!

وللا اي مرة سمحة وبيضاء وشعرها طوال و(كرعيها مكان بضم الميم) راسها فاضي!!

Quote: عليه نخرته زي كوز الكنافة

وللا زي الفلفل الأخضر .. دي انا عارفة كويس لأنو نخرتي من النوع ده.

السماحة مهمة يا عواطف.

Quote: طبعا بحسها الانثوي عرفت أنه معقد من سيقانها التي تشبه سيقان الباعوضة ولكن عقلها يوزن بلد ,, متعلمة , مثقفة ,, واعية ,, مرحة

يا طوفة يا اخيتي .. قصة الثقافة واخواته ديل دايرات شرح لكن الكرعين والسماحة بالشوف ساكت ما دايرات تعب .. زمان عندنا جماعة اهلنا قام اخوهم عرس ليهو واحدة (مي سمحة) اها اختو قالت عليك الله (...) ما ببالغ دي شنو العرسها لينا دي فقالوا ليها مالها ياخي والله طيبة وظريفة قالت ليهم يعني نحن نقعد نشرح للناس انها طيبة وظريفة!!!!

السماحة مهمة يا عواطف.

يا عواطف الجمال جاذب وهو مدخل للأشياء الأخرى يعني الواحد يلقى ليهو حاجة تشرح القلب كدي وتسر النظر وبعد داك اليفتش في (في الثخافة والراس المليان)..
وطبعا اهم شي الاصطباح .. يعني لمن اصحى الصباح وافتّح عيوني واعاين ليها اقوم طوالي اناقشها في مواضيع عشان اتذكر راسها المليان !!

السماحة مهمة يا عواطف.

Quote: المهم جميلة تسر الناظرين ويتباهى بها أمام أصدقائه

والله يا عواطف قبل كده في واحد بنعرفه عرس ليهو واحدة (طيارة عديل) لمن ما مصدّق. تعرفي لمن ودوهو الفندق وهم طالعين على بوابة الفندق خلاها تمشي قدامو واتاخر شوية لأصحابو وقال ليهم دينااااااااااااك بالله شوفوا الكرعين ديل .. وفرك ايدينو كمن ينتظر وليمة دسمة.

لكن يا عواطف بالجد السماحة مهمة.

Quote: حبي ومعزتي

معزتك دي اوعة تكون الكرعينة زي كرعين صاحبتك.(وش مقهقه)

والله يا عواطف السماحة مهمة.

Quote: وات مالك ؟؟؟ الكلام عن السودانيات وانهن كلهن حلوات والاولاد الشيك... يعني ما جابو سيرتك ولا كرفتتك وبدلتك ؟ خليك بعييييييد

انت ذاتك خليك بعيد . هسع عواطف دى بتشبهكم والله تقول جابوها من باديتنا وزرعوها ليكم هنا.

انتو لا بتعرفوا توبا السمح ده ولا اى حاجة . اها كية ليك المرة توووووووووووووووب يا بكوري الحلووووووووووو انت .

والمشية تفدعة
والنظرة بتحدرة للزيك كده
والراجل لغة عربية فصييييييييييحة

بعود ليكم بعدين

إبن شيقوق !!!

يالكلك ذوق ,,

تعال راجع بسراع عشان عايزين راي قانوني !!!

عواطف إزيك

الليلة مالك متجندرة علينا ما كنا حلوين

Quote: أن الرجل الشرقي على وجه العموم والسوداني على وجه الخصوص يهمه المظهر وليس الجوهر ولغاية اليوم دة ما سمعت واحد قال عايز واحدة مثقفة أو راسها مليان.

ووخالطة الكيمان
أولآ (بالرجل الشرقى) بتعمل لى حساسية

تانيآ موضوعنا ده برا ودا برا وبراك قلتى الكلام على جنب

الغزل فى النسوان ما عندو علاقة بالزواج .
يعنى أنا هسسة كان أدونى نانسى عجرم (حفظها الله)

وبعدين قصة بت عمو الشينة دى نقطة مهممة جدآ .
ممكن بت الناس تكون سمحة شديد
لكن الرجال بى طبعهم مافى زول بقول لى أخوه مرتك سمحة
ولا حتى بينو وبين نفسو إلا ما يسمح به فرق السن
ليه ما تسألينى . إتربينا كدة . والعكس لا يتعدى المداعبة

والعرسو بسماحة جمل الطين مسطحين

الباقى بعد الرد

تحياتى

ودميلاد !!!

مشتاقين !!! وكنت وين !!!
شفت الزرزة دي كيف ؟؟؟
كنا حلوين لكن دوام الحال من المحال ,, غايتو يارأفت في ناس في المنبردة ما تعرفهم عايزين شنو
بالظبط ,, تكون مع الرجال يرموك بالبيض والطماطم ,, تكون مع النسوان يقولو ليك الرجال مالهم حلوين وظريفين وماعارفين نعمل معاهم شنو؟

الجمري !!!
كيفك ياالحبيب ؟؟
شكرا على مرورك الاستثنائي ,, أنا يا ود أمي ما قلت الواحدة لازم تكون شينة تقطع الخميرة من العجين
لكن بقصد إنه الجمال وحده ليس شيئا أساسيا فهناك أشياء أهم من الجمال وهي التي تعطي الحياة الزوجية الديمومة والسعادة وبعدين يا أمير إصرارك على إن السماحةمهمة دى خلاني أعرف ليه إنت كنت بتجي السودان وبترجع من غير عرس لمدة خمسين سنة وما خليت ناس الشاي بدون بسكويت والببسي بدون كبايات والشاي بدون صينية ,,, عموما أنا سعيدة بمداخلتك وروحك المرحة ,,

العزيزة عواطف
تحية طيبة
شكراً على موضوع البوست الشيق

Quote: سماحة جمل الطين الواحدة منهن لو اتكلمت في مكان عام في حضور زوجها يتمنى أن تبتلعه الأرض في تلك اللحظة

دي زي قريبتي المتفلسفة وراسها فاضي ،مرة مشت لدكان الأقمشة ورفعت قطعة القماش وقالت لسيد الدكان بالله القطعة دي طولها يكون كم جرام

عبوووووووووووودي !!

شكرا على مرورك الحلو ,,,

في واحدة حلوة وراسها فاضي قالت لزوجها قدام الناس إنت علي دينار دة دنقلاوي ؟؟؟ طبعا صاحبنا

دخل في النار ومرق ولامن الناس مرقوا قال ليها في داعي للكلام .

واحدة تانية قالت لصاحبتها ( الرسول ياأختي إنتي أنور السادات دة ماياهو حافظ الأسد )

برضو واحدة في السوق قالت للبياع عايزة سايز ميدين !!!

الأستاذة / عواطف

لك التحية

Quote: التي يحسدها عليها زين الدين زيدان اللاعب الفرنسي الذي نطح اللاعب الايطالي عندما استفزه ليلقي به أرضا

تشبيه بليغ وجميل يا رائعة وعجبني جداً بل وأدهشني لأن التشبيه دائماً يأتي من شخص متابع للمجال الذي يأتي منه بالتشبيه فمثلاً تجدي الميكانيكية في وطني كل تشبيهاتهم تكون من الحديد وفي الحديد والبنايين وهلمجرا.

الحلة بصل والمرة كرعين
أرجو أن تعذريني في أن أقول لك وبصراحة أني أؤمن بهذا المثل لأن المرأة لأنني اعتقد أن المرأة إذا كانت ذات كرعين كساريتي بلنط يرن خشاش حليهما رنينا فستكون عز الطلب حيث أنها ستسر زوجها كلما نظر إليها وهذا هو المطلوب بل هذه هي الغريزة وأرجو ألا يحاول البعد عنها أو جهلها وطمثها.

كل رجل لديه شيء معين في المرأة يحب أن يكون في زوجته فمنهم من يجب أن يكون شكل الأنف كذا ومنهم من يحب جمال الفم ومنهم من يحب الكرعين ومن يحب أشياء أخرى لاداعي لذكرها ولكن أكيد فهمتي قصدي يا أستاذة.

ولي عودة إنشاء الله

أبوفتحية

Quote: تعال راجع بسراع عشان عايزين راي قانوني !!!

طيب اشاورك يا العواطف انت دحين الراجل بيمسكوهو من وين ؟

اها وكان رطاني ؟

" target="_blank">

zanooba
with basal (onions

and lemon
too
and some shat ta

i hope you like the stocky legs too

i do

lol

mustafa

هييييييي وتاني هيييييي

اوعك يا عواطف تقابلي الرجال
عشان انا ما أنفصم فيك هسة
انا شايفك طوالي خاشة فينا تووش
هسة قومتي علي ظيراني
الله يستر عليك من الجماعة
كدي تعالي لي خليني أبخرك
حبيب نورة في بيت ظار ناس مستورة ( أعـادة )
سامحوها يا أهل السماح
جاهلة وغبيانة!!

حبيب نورة !!!!

مودتي ,,,

ماشة إجتماع وبجيك راجعة عشان أوريك المكشن بلا بصل !!!

البوست مات يادكتور مصطفي..
والناس الفيه مشت الجنه

Muna Khugali
البوست مات يادكتور مصطفي..
والناس الفيه مشت الجنه
in heaven
sister muna
what do you say
about al hoor al een

do they have
insects legs
or sexy legs

god only knows
i have not been in heaven yet

mustafa

lol

دكتور مصطفى !!!

معزتي بلا حدود ,,,

طبعا خليتك في الآخر عشان ختامه مسك ولا شمار ما عارفة !!!
شكرا يا صاحب القلب الكبير على البوست الجميل ,,,

ود شيقوق !!!

سعادة المستشار !!!

كلك نظر !!!

سلامات يا شباب

عواطف !!!!

Quote: اسماعيل عباس !!! بصراحةأحترم وجهة نظرك التي تتفق مع رد نوسة الموضوعي !!!

مالك يعنى رديتى على الناس ديل كللللللللهم و أنا "سفهتينى" ؟؟ ما عجبك كلامى و لا شنو ؟؟

لولا إختلاف الآراء ل"بارت" السلع ، موش يا عسل ؟؟؟؟

أحححححححى أنا من "الرجال" سبب مشاكلنا فى الدنيا دى كلللللها!!!!
تخريمة كبييييرة:

ما كلهم طبعاً

ننوسة !!!

حبي ,,,

راجعة ليك ,,, تصوري إنت أول واحدة رديت عليها وبدل ما أعمل أضف رد عملت أمسحه بالغلط وطارت كل
الكتابة ومن الساعة ديك وأنا زعلانة .

أبو فتحية !!!

لك مني كل الود ,,,

مع جزيل الشكر على مداخلتك الرايعة وزي ما قلت للناس فيما يعشقون مذاهب مرة أخرى لك الشكر وننتظر عودتك ,,

الأخت العزيزة عواطف

تحياتي

في إعتقادي أن ( الحلة ) في أيامنا هذه لا تحتاج إلى البصل كمادة لتكون ( طاعمة ) لأن فنون المطبخ صارت تأخذ مناحٍ أخرى لتجذب الذواقة .. بالتالي فإن الجزء الأول من المثل أصبح شبه ( إكسبايرد ) ..



نأتي للشق الثاني .. و بكل صراحة
حيث أن الذي أطلق المثل كانت نظرته ( سفلية ) بحتة .. بمعنى أنه ينظر إلى ( كرعين ) المرأة ثم تتسلق مخيلته جسد المرأة إلى أماكن أخرى قياساً بهذه الكرعين. و هذه نظرية ذكورية معروفة و متداولة بين السودانيين و شعوب أخرى.

طبعاً أنا معك أن المثل غريب و مريب .. و لكن كما قلت من قبل .. أن بعض الرجال ما أن يرى المرأة حتى يحملها بخياله إلى ( الفراش رأساً ) .. فإن كانت بلا ( كرعين ) أو مؤهلات تلهب الحواس و تشبع نهم النفوس الأمارة بالمتعة .. فهي عجفاء لا تصلح لأن يعاشرها ..
حقيقة بعض الرجال هذا هو مقياسه .. يضع متعته الجسدية فوق كل إعتبار حتى و إن كانت صاحبة ( الكرعين ) لا تحمل من مواصفات الزوجة أي درجة ..
و القلة القليلة يستمتع بما تحمله في رأسها من زخم نافع أو بما يحويه قلبها من مشاعر نبيلة ..

ذات مرة .. في القاهرة أتتْني مصرية من المعارف و تربطني بأسرتها علاقة صداقة متينة .. جاءت و الدموع في عينيها تشكو خطيبها الذي كان لي فيه رأي .. لأنه كان لا يستحقها بمعنى الكلمة ..
بعد نقاش مستفيض .. قلت لها : ما الذي أعجبك فيه المرة الأولى التي شاهدتيه فيه ؟
قالت مبتسمة من بين دموعها : قَزْمِتو( تقصد جزمتو )
فإنطلقنا نضحك .. فاللئيمة تقصد أنه متأنق حتى الثمالة في ملبسه حتى حذائه ..
يعني وافقتني في رايي بأن نافوخه يشكو من الإتساخ بعكس ( جزمتو ) ..
و لكنها تحبه ( ملعون أبو الحب ... شو بيذل ) ...

هناك ( أمثلة ) كثيرة تصب في نفس سياق ( البصل و الكرعين ) .. و هناك نظريات متداولة بين الرجال في نفس المعنى ..
و آخر دعوانا أن ( اللهم لا تكرْعِن حبنا و لا تبصِّل حِللْنا) ..

دمت يا أخت عواطف

أبو جهينة !!!

ليك وحشة ,,,

وينك يا ريال ؟؟ عسى ما شر؟؟

شكرا على عبورك العطر ومنك دوما نستفيد يانبع العلم والأدب ,, ربنا يسعدك و يجعل حلتك دايما طاعمة من غير بصل و حبك يمشي على قدم وساق مثل ساق الفيل .. أما حكاية قزمتو دي أها طلع مخه زي الجزمة
شكرا مرة أخرى أبو جهينة مرورك يسعدنا .

Quote: اها وكان رطاني ؟

الرطان ما عندهم مشاكل العراريب ..انا هنا بتفرج ...لا عندي مشكلة مع الحلة ولا البصل ( في الطبيخ) ولا مشكلة كوارع ...

أمثال شعبية
العيش قضارف
المزّة نواشف
والجرئة عواطف

أمثال شعبية:

الجامعة آداب ,,

الجنون فنون ,,

العاصمة باريس ,,

السفر طيران الإمارات ,,

Quote: أنا يا ود أمي ما قلت الواحدة لازم تكون شينة تقطع الخميرة من العجين

يا عواطف واحدة قلتي سيقانه زي سيقان المعزة ومرة زي الباعوضة وتقولي لي ما تقطع الخميرة من العجين والله دي تخلي العجين في حلة براهو والخميرة تنط في حلة تانية.

Quote: بقصد إنه الجمال وحده ليس شيئا أساسيا فهناك أشياء أهم من الجمال

ايوة ما قلنا حاجة يا تيفا لكن الجمال هو البوابة الرئيسية لاي حاجة تانية يعني ما ممكن نمر الا عن طريقو والا كمان ننط بالشباك والشبك يخربشنا والترباس يشرط القميص وتنسرح لينا سريحة من خشب الشباك المقشر وينزلط كوعناويمكن بي جوة نقع في كباية مكسورة ويبقى فيها جرح في الكراع .. والعجب كان فيها سكري ..
ما قلت ليك السماحة مهمة..

Quote: وبعدين يا أمير إصرارك على إن السماحةمهمة دى خلاني أعرف ليه إنت كنت بتجي السودان وبترجع من غير عرس لمدة خمسين سنة

لكن ما قصرتي صغرتيني جنس صغر.. والله كنت بحصحص جنس حصحصة ..
مرة اقول ياخ عاين دي (كرعينا) زي حديدة الصيوان ومرة اقول شوف ضفايره زي نهاية قضيب القطر ومرة عاين اصابعينا زي سبيطة الموز .

Quote: عموما أنا سعيدة بمداخلتك وروحك المرحة ,,

شكراً يا تيفا (روحي مرحة) ونخرتي قدر كوز الطليس .. عليك الله يطيروني وين!!

Quote: دي طبخة جاهزة !!!

بدون بصــــــل!

الأميرة عواطف

موضوع سلس ووجبة دسمه وهاك يابطاطس في الدمعه غاطس

ولو عرفت قمية الجرجير كان زرعتو تحت.......وهلمه جره

وياحليل الناس ومن ذي دايل أنا وآه آسفاي!!

والرسول الكريم صلي الله علية وسلم يقول(( أظفر بذات الدين تربة يداك.))

والنساء شقائق الرجال هن من يجملن الحياة أو العكس تمامأ وربنا يديكم

العافية بحلل بدون بصـــل.

وما أكرمن الا كريم وما أهانن الا لئم.

ونحن كلنا من أرحـــامهن خرجنا وليس من أرجلهن !1

مجودي !!!

بركة الجيت ,,,

وين كاين زمنك دة كله والله رايك سمح وسليم مية في المية أدي الرجالة يابلاش عشان كدة خليك على طول

هنا عشان في ناس كدة عايزة بستفة بطريقة دبلوماسية زي حقتك ,, عموما شكرا على ردك الرصين سواء

كان بي بصل ولا بدون بصل لأنه كان مطبوخ على نار هادئة وبدون إنفعال ,,, معزتي .

عواطف ... سلامات

البوست ظريف جدا وشيق

أما مسألة البصل والكرعين ف ( الأعوج رأي ... والعديل رأي ) وانا رأيي انو الاثنين مهمين ( البصل والكرعين ) .....


أها رايك شنو في المقولة دي ( جني وجن الجدادة الكوكاية .. والمرة الصلاية )؟؟؟؟


لك مودتي

محارب !!!

سلامات ,,,

والله إنت فعلا زول حربي وكلامك واضح وصريح لكن بيني وبينك لو لقيت المرة الفاهمة والعاقلة ورزينة لكن رجلينا سكاكات حتختار شنو ؟؟
غايتو صحكتني براي في المكتب بقيت زي المجنونة أضحك لامن أقع على قفاي بحكاية الجدادة الكاكية
والمرة الصلاية ,, تصدق عندي صاحبتي يمنية ولدها معرس بت أختها وكانت جنها صلاة وصيام قام مشى عرس واحدة من الهشك بشك والمرة ما عرفت تعمل شنو وخالتها بتحبها شديد عشان هي مهذبة جدا المهم قالت
ليها حأعمل خطة أطلعو من البيت كانو ساكنين معاها وأخليه يأجر ويعرف إن الله حق لأنه حيأجر بيتين
للجديدة والقديمةوفعلا نجحت الخطة صاحبنا فلس قام طلق الجديدة عشان دي بت خالتو وعندها خمسة أولاد
لما رجع ليها قامت خالتها قالت ليها شوفي يا أميرة أهو أنا رجعتو ليكي لكن لو عديتيها لي كلها
صلاة وصيام وطار منك تاني ما تجي تكلميني هههههه .

العزيزة عواطف .....

لي صديق معاق، وهو مشلول الساقين .... يستعين بعصايتين (تلك التي يضعها المعاقون تحت إبطهم) ويمشوا بها. رغم ذلك، فهو خفيف خفة لا يملكها معظم الأسوياء الذين لا يعانون علة في صحتهم. المهم، هذا الصديق فكه جداً، ودائما يردد (الفريق نُص .... الحلة بصل .... المرا كرعين .... والمعوّق عصايات) ثم يمشي مسرعاً تارك السامعين بين مندهش ومقهقه.


ممكن أضيف حاجة؟
المنبر عواطف

البيت مرة وبس .

هشومي !!!

معزتي ,,,

كلامك صاح لكن ياود أمي النسوان ما خشم بيوت !!!

ود أبو الريش !!!

سلامات ,,,

شكرا على طلتك الأنيقة والله عاد صديقك المعاق دة لقطة وروحو رياضية جدا ياريت لو الناس كلهم زيه

عموما مرورك ظريف جدا بس ما تنقطع يا ودأمي .

تحياتى يا عواطف

وكل المنى الطيب والتقدير الوفير


الموضوع شيق وجميل وممتع ومفيد فعلا

وأحييك على الكتابة السمحة

غاليتى عطفطف

خلاص كان صاحبتك راضية أوكى، ما بنلومها ،، " هى أصلها خالقة روحها؟؟؟"

أسى أنا ما عارفاكى "داقسة" و لا لأ ، إلا أشوف "نصك الحلو" حتى أحكم

و القصة فعلاً نسبية زى الجمال ، فما نحن نراهو جميلاً ، يراهو غيرنا "ربربة و لظلظة" أقصد الساقين الملانات يعنى، نظرة الشرق و نظرة الغرب شتان بينهما.

ما قلت ليك النسوان بقن شديدات و ما دايرات زول يدافع عنهن، و نحن ياخى فى النهاية شقائق الرجال، بسيقان من غير سيقان " ماكو فكة"، و لا ما كدة؟؟؟؟

Quote: وكل واحد فيهم مصر على السيقان الجميلة دي مصيبة شنو يا نوسة ؟؟؟

((مصائب قوم عند قوم شنو؟؟؟؟))

حبى لكى

ننووووووسة !!!

يابت ياحلوة ,,, أيه المداخلة الجميلة دي ,,, والله شكلي كدة ما دقست رغم إنه الخنفسانة عند أمها
مرجانة وفعلا إنت أخت الرجال وفوائد قوم عند قوم مصائب ,,, من غير سيقان دي ذكرتني بيت الشعر
حق الفيتوري :
في حضرة من أهوى ,,
عبثت بي الأشواق ,,
حدقت بلا وجه,,
ورقصت بلا ساق ,,
مملوكك لكني ,,
سلطان العشاق ,,

أبوذر !!!

معزتي ,,,

مرورك النبيل يسعد القلب ,,, لك مني ألف شكر ومرحب بيك معانا دائما لا عدمناك ,,,

سلامات تانى يا عطوفة

بال"كرعين" دى الليلة ذكرتينى أمى و أبوى رحمة الله عليهم، أمى مرة "متغايظة" من أبوى و هو كان راقد و لابس عراقى ، قال ليها حاجة "غاظتها" أظنها "رباطاب بعيد عنك" ، قالت ليهو بالله أمشى كدة "كرعينك الضعاف ديل" ،، ههههههههههههه، قال ليها " زمااااان وكت عرستينى ما كنتى شايفاهن""!!!!!!!!!!!!! شفتى الروح الرياضية دى كيف ؟؟؟؟؟

الخلاصة يعنى الراجل زى ما عندو نفيسة "تصغير نفس" كمان نحن بالأكثر ....

تحياتى لى "جعرانتك" هى قصدى "مرجانتك" يا عسولة .....

العزيزة نووووووووسة !!!

تحياتي يا عسل ,,, والله أبوك الله يرحمه ويوسد روحو الجنة كان عسل زيك أنا تاريني بقول البت اللهلوبة
العسل دي طالعة لمنو؟؟ طيب ما تقولي كدة من زمان بس أمك الله يرحمها كان تقول ليه مراية الحب عمياهههه شكرا مرة أخرى لكن جعرانتي أريتها جعرانة السرور أحلى من براد بيت بكتير شنو رايك في هاالحكي؟؟

ولد الرباطاب لأبيه :يا با بت عمى ما بدورا
الأب: مالا مؤدبة وفالحة
الأبن: كرعينة رقاق وملولوات!
الأب: انت داير تعرسها ولا داير تسطربها!
شوفت المنطق يانوسة وعواطف!
سؤال برئ!
انتوا النشا والمديدة ديل ما عندهن اختساس فى الكرعين!
يعنى زى ما قالوا الصدر فى البوسطة والدش فى المحطة الوسطى!

جنى

جني اللذيذ !!!

مودتي ,,

والله ضحكتني من أعماقي ,, تسلم يا الحبيب أنا فعلا إكتشفت إنك جني بحق وحقيقي وطبعا الجنون فنون
وإنت زول فنان بعدين المديدة والنشا ديل بقوا أوت أوف ديت في حاجات حديثة ,, شكرا على العبور ,,,

الأستاذة عواطف
سلام
اتشرف كثيراً بمطالعة مقالتكم المفيدة والممتعة .

Quote: أساساً هي كده الحلة بصل... و المرة كرعين... و الراجل جزمة

نضيف:
الرجل جزمة / الرجال جزم لكن النساء ما بيقدرن يمشن حفايا والعكس

Quote: عبوددددددددددي !!! سلامات !!! بركة الجيت !!! والله ما بقصد حاجة !!!

اللذيذة ماما عواطف..سلامات
كنت فاكرك قاصدانى : عبدالله..وشين وتعيس كمان ؟؟
رجيتك زول شكل ساكت..لاكن عبوددددددى دى بردت قلبى!!
وهسه خلاس بقيت صاحبك.
أنا ضد ناس حزب البصل ده تماما.."والمرة حنيّة" !!!

عبوووووووووودي !!!

سلامات ,,,

والله إنت حاشاك الشنا والتعاسة تبرى وتستبرى يا ودأمي ,,,

وبعدين فعلا المرة حنية وبس ,,

معزتي ,,,

ياسيكو !!!

طلتك البهية أسعدتني ,,,

شكرا لمرورك الجميل وحكاية الرجال جزم لكن ما بنقدر نمشي حفايا دي عبارة عن مخرج فقط ولكن
تستطيع المرأة أن تعيش دون الرجل والعكس صحيح ,,,

معزتي ,,

Quote: كلك نظر !!!

يا لماحة رسالتك وصلك واحسب ان رسالتي لم تصلك ما لم تكونى متابعة نكات محمد موسى وبالتحديد الطفل الذى يتحدث لامه عن الطفل المولود بدون اضنين .

إبن شيقوق !!!

معزتي ,,,

شكرا على المتابعة فأنت دوما تقف معنا أخو البنات ومقنع الكاشفات .

Quote: تستطيع المرأة أن تعيش دون الرجل والعكس صحيح ,,,

عواطف هوووووووي والله كضب لا بتقدرن تعيشن بلانا ولا بنقدر نعيش بلاكن


(انتن رحمة لنا) و (نحن شنو كدة ما عارف لكن).

وبرضو السماحة مهمة يا ام مجاهد.

السلااااام وعليكم/كن

طبعا الكلام دا عندوعلاقه بي بنيه الوعي

والمقسمه لي اتنين

بنيه الوعي التناسلي

وبنيه الوعي الخلاق

نحن بننتمي لي واحده منهم

لكن الموضوع طويل والدنيا عندنا صباح

ح ارجع ليهو بالليل

المهم داير اقول حاجه تانيه

المثل دا انتو فاهمنو غلط

لانوالرجال المهذبين ما كان بلاقو النساء المهذبات

ولمن الواحد يقابل واحده كان بسلم بي ادب شديد ويدنقر راسو في الواطه

لانو عيب يجحم فيها ودي كانت العاده زمان طبعا قبل الفديو كلبات

اها ماكن الراجل عندو طريق يشوف حاجه وهي مدنقر من شده الادب ياحبه عيني

غير الكرعين وبالتالي ينبني حكمو بناء علي هذا الجزء من العالم

شفتو كيف انتو ظالمات الرجال يا نساء يا ظلمه

ملحوظه مافي اي زول يرد علي

اها اقول ليكم حاجهولا تزعلو

الحله يصله

والمرا لاب توب

اها

الله لا جاب زعلكن يا بنات امي

او اقوليكم

همهمهمهمهمهم دي طبعا للتفكير

ايوه لقيتا الحله بصله والمرا

ماجستير

اها يقصر الملح

سلام

عليك الله الدنيادي زاتا

شن طعما بلاكن

اها السب فوق الرجال المعولقين المطرطشين ابان صلع

كدي تاني اسمع لي واحد قال المره بتاعات

اشششششششش والله كلام

شفتو يا عواطف ومني ونوسه

شفتو سكتهم ليكم كيف هييع

لحدي الان تلاته دقايق مافي اي راجل جا خاشي هنا قال بغم

انا بمشي كان جا واحد من المطرطشين ديل بس كوركو لي

اهو ده واحد ياطارق الامين
الدكـتور عبـداللطـيف البـونى يتوعــد بدخــول الغـابـة !!!]

الخيل عركسن ما قال عدادن كم ؟؟

Quote: عليك الله الدنيادي زاتا شن طعما بلاكن اها السب فوق الرجال المعولقين المطرطشين ابان صلع كدي تاني اسمع لي واحد قال المره بتاعات اشششششششش والله كلام

رجل والرجال قلييييييييييييل !!!!

Quote: عليك الله الدنيادي زاتا شن طعما بلاكن اها السب فوق الرجال المعولقين المطرطشين ابان صلع كدي تاني اسمع لي واحد قال المره بتاعات اشششششششش والله كلام

رجل والرجال قلييييييييييييل !!!!

ود الأمين !!!

الحلة بصل والمرة دكتوراة !! ماجستير الشوية دي ؟؟ والسلطة الفول زيت والراجل عمارة عديل كدة !!

وأخيرا ظهر المحللون السياسون !!!

طارق العزيز ,, المفروض يستضيفوك في قناة الجزيرة ,, والله كلام 100% تئبر ألبي بس يا حياتي شو
عم تئصد بإنه الرجال كانو خجولين يعني شباب هالإيام عينهم مكحلة بالشطة ؟ ولا الصبايا ما عادو
يخبو شي ؟؟

الجميلة عواطف
تحياتي
مقولة قديمة المرة ام خشمن خفيف وساقا رهيفاان طربك الزيف
عن خشم بابا لا تقيف
دمتي

ودبدرالدين !!!

الراقي الحنين ,,,

حتى أنت يابروتس إذا فلتسقط ياقيصر ,,,

يا عواطف...


ايام ما كان الواحد فينا ببحث عن عروس...لاحظي حكاية ببحث دي...فتيش عديل كدي

كل مرة يرجع ويقول لقيتها حبوبتو او امو او خالتو تطلع فيها شيْ...يا ولدي
دي نضامة نضم...بتملاك فقر...ويخليها...(شفتي ضعف الشخصية دا كيف)

والله يا ولدي دي كرعيها مساويك...والله دي اهلها كعبين...والله ديل ناس جعيصين
وما بتكفو...والله ديل مطاليق...وحاجات زي دي كتيييرة....

يعني ابواتنا ما كانو بتدخلو في الامور دي...

يبقي عليك بحبوبتي السرة ومن لف لفها...مع العلم هي زاتا كرعيها مساويك

بس بررتها ب: مساويك زمان هن زي مساويك هسع البلاستيك ديل...الواحدة من الهينة كع
تنكسر

Quote: الخيل عركسن ما قال عدادن كم ؟؟

عواطف اختى بقيتي تجى سايرين وعاصرة ابنص في كلامي سااااااااااااااااى .

يطول عمرك برضو

سلام الاخت عواطف مافي عن ناس الفاست فود اماعني فالقراصه تركين تسلمي

الفاتح العزيز !!!

معزتي ,,,

سعيدة جدا بعبورك السريع وعازماك الليلة قراصة بي تركين عارف ناس الفاست فوود ديل لو قلت ليهم
قراصة بي تركين بفتكروها كلمة أجنبية بمشوا يدورو عليها في الدكشنري !!! شكرا على المرور .

العزيز نزار !!!

شكري وتقديري على عبورك اللطيف وفعلا زي ما قلت النسوان هن الشنافات وقنافات لا بعجبن العجب ولا
الصيام في رجب لكن إنشاء بعد تفتيشك الشديد دة ورحلة البحث المضنيةلقيت واحدة رجلينهالا مساويك هة ولا زمان مع تحياتي لحبوبتك السرة اللذيذة .

(( لكن بيني وبينك لو لقيت المرة الفاهمة والعاقلة ورزينة لكن رجلينا سكاكات حتختار شنو ؟؟ ))



عواطف ... مساء الخيرات ،،،


والله بيني وبينك كده ... الرأس الفاضي ممكن يتملي شوية شوية لامن تفهم .... لكن السكاكات ديل أقع بيهن وين ؟؟؟

وبمناسبة السكاكات ديل ... جدنا الله يرحمو كان طويل جدا ... وسكاكاتو طوااااال ، ونومو تقييييييييل ، يوم هو راقد نايم الجماعة ختو الغدا ورسلو واحد يمشي يصحيهو للغدا .... أها عشان يصحيهو بقي يضربو في رجلينو وجدنا ناااايم وكل ما يضربو في رجلينو يحرك رجلينو ومواصل نومو...

الجماعة المنتظرين في صينية الغدا زهجو وكوركو في الراجل ياخي ما قلنا ليك صحيهو انت بتعمل في شنو ؟؟

قال ليهم والله الجزء البي هنا ده صحى ... باقي الجزء البهناك !!!!!!


أكيد شكري

عواطف اختى جيت اطل بوستيك ده ساى وارجع / تاني اكان اتكلمت لساني ينقطع عشان تخلي في كوتشماراتك الكتار ديل حاجة لابي بكر الرطاني .

معقولة بس !!!

فايت وين مخلينا ؟؟؟

محار اللذيذ !!!

محبتي ,,

والله عاد كان كدي يا ودأمي أمات سكاكات تعبن معاكم حكايتكم شنو ؟ يعني قدر ما نقول نلقى واحد يكون
غير شكل تقوموا تتفقوا كلكم علينا؟؟ أها نحنا من الليلة السلطة جرجير والراجل يورووالوسطاء يمتنعون واحد ماعنده رصيد في البنك لا يقل عن 2000 ألف يورو ما عندنا بيه شغلة ونشوف يا نحنا يا إنتو!!! وجدك دة إنشاء الله يكون صحى واتغدا وحبوبتك كيف ؟؟ سكاكات برضه ؟؟

الاخت عواطف
سلامات

كثير من الشعراء قد شغفوا وهاموا بالقدم المتبر!!

"القديم مليان لا نعالا الرسول صلوا على جمالا"

"المبروم ضميرو وعقبان متبر ساقو * دابو الليله ابتلوا بالنويح عشاقو"

"ساقك من ركبتك صب عديلن شمعة"

وبينى وبينك المره ام سويقات مى مذكورة.

تحياتى

ودا النعيم !!!

الزول العظيم ,,,
قلت كدي ؟ عاد شن نقول بعد دة ؟ وزي ما قال وداليمني متبر ساقهالي عند الأصابع ,, غايتو حكم القوي
على الضعيف الله يكون في العون يعني الواحد فيكم لامن يكون عايز يخطب يقول لأهل العروس أهم شي أشوف
سيقانها قبل وشها وشهاداتها ولا شنو ؟؟ شكرا على عبورك الزاهي .

أستاذتنا عطوفه بت أدريس

نحنا ما بنمرق من عدة المطبخ دي للصالون أو حتي الحوش!!

وكل زول ما غطأ ماعونه الليغطي والماعندو ماعون يشوف مواعين الجيران

أو ماعونا بقول عليهو الزماله سوي الدراسية أو العملية وكمان في قدر

ظروفك ود حسب المقاس وبرضو الكرعين بتحفي وراها ما قلنا هن رحمة ولا ماكده

سوي بسكاكات أو حتي بدون هو الناس ديل عالم الرجال بيبقوا بدون شقايقن النساء

محال وقال الرسول الكريم (ص): تنكح المرأة لأربع: لمالها ولحسبها ولجمالها ولدينها.

فأظفر بذات الدين تربت يـداك.،، رواه البخاري.

والسكاكات دي بتخش ضمن الجمال وهنا الجمال معنوي وحسي وأن الرجال يفضلون المعنوي أكثر

وناس الحسي ديل نترك لهم السكاكات وبرضو في مال وفي نسب وديل من الأهم بأن تكون في

المرأة ومع كل هذة المعطيات تبقي المرأة مرآة الرجل التي ينظر بها ويطل علي الدنيا من

خلال المعاشرة والبنين والبنات والنتاج الحقيقي هم الأسرة وتربيتهم تدلل علي جمال

المرأة والرجل ومن منا لاينظر للمرآته بعين كلها جمال وبرضو نقول حب الناس مذاهب وحتي

المذاهب أربع والمرأة تنكح لأربعه ودي حكمه !

مجوووووووووودي !!!

ياسلام عليك يارايع والله قطعت قول كل خطيب ربنا يسعدك ويديك العافية وما تنسى في ناس عايزين وش
وبس !! عندي صاحبتي جميلة جدا لكن سكاكات من الدرجة الأولى لما أقول ليها لمي سكاكاتك ديل تقول
لي الكلام الوش !! وفعلا أول ما تمرق أي مشوار بعدها يجو عشرة عرسان لامن افترت وبقت تعزل وتتخطب وتفرتق ودي الشغلة أنا خايفة القطر يفوتها وما تلقى اللي يعاين لوشها والسكاكات يبقن سي ان ان !

Quote: فايت وين مخلينا ؟؟؟

لبلاد ما طل فيها خيال .

أستاذتنا عطوفه تحية يارائعه

صحبتك دي لو أتقدم ليها سواق بيقول مرآيات الجنب

مابتجيب الحقيقة دائما وأهم شي مراية النص ومقصود

بيها الشي الفي الداخل الروح وجمال النفس ودي بيتبعه

نفس المرأة حتي في الطبيخ بيقولوا الطبيخ نفس والحله

ماها وش وبس ولو دايره قلب الراجل تدخلي ليهو من بطنوا

يعني بعد الوش وشهر العسل بتجي حاجات تانية ست البيت

ودي مهارات لا بد من المره تعرفه مع البدر والميكاب ولوازم

التحسينات وبرضو حب الناس مذاهب ومن المذاهب الونسه ودي دايره

شوية ثقافة مع الهندام والله شنو ونعود للمذاهب ونشوف !!

مجووووووووووووودي !!!

معزتي ,,,

ومنكم نستفيد ,, والله المفروض تعمل بوست كبير وعريض بهذه النصائح الجميلة عموما شكرا على عبورك
الراقي وبعدين يا جماعة لو اتأخرت في الرد ما تزعلو الأيام دي عندنا مؤتمرات ما ليها أول ولا آخر ,,,

إن تكن أنت بعيد عن يدي ,,,

فخيالي يدرك الناي القصيا,,,

إن تكن أنت بعيد في الثرى ,,,

فخيال الشعر يرتاد الثريا ,,,

ياتوفي (حلاوة)

المره روح المره احساس المره شعور المره ادب المره ذوق المره حياة المره حشمه


يعني البصل بطعم الحله لكن المره اصلا طاعمه بانوثتها وبرقتها وبامومتها (قال ثم من قال امك (3)

بعدين جينا نحنا , يعني نحنا جينا في الاخر لذلك ربنا سبحانه وتعالي كرم الام وجعلها في القمة

الكرعين ليس دلاله علي جمال المره (ممكن الكرعين تكون نحيفه والارداف تكون .......

توفي :-

شفتي الغزاله مش جميله ولحمها حلو بس كرعينا نحاف تساعدها علي الهروله حين مهجمتها

وايضا النعامه والوزين , يتمتعان بطول الرقاب ونحافه الارجل , النعامه قداله ذي المره لمن تمشي

والوزين رقاص ذي رقيص المره لمن ترقص رقبه وتعوم في الرقيص والرجال يتسابقو عشان ياخذو منها

شبال

برضو تقولو لي المره كرعين , ياود الجمري ياود امي ورفيق دربي دحين الشينات ديل مايعرسوهم ولا

شنو ليك .

البصله ممكن تحرق والكرعين ممكن تكون مشققه ووسخانه بس جمال الروح هو الاصل

فتكم بعافيه

سلامات و مشتاقين يا عطفطف

و تسلمى يا لذيذة

دة شنو الكاتباهو دة؟؟

Quote: لا يقل عن 2000 ألف يورو

حاولت أقراهو بس عينى زغللت !!الفين ألف و لا 200 ألف و لا قصدك 2 مليون يا زهرة؟؟؟

ما كانن سكاكات ديل و لا قصدى طفايات القاعة البيدفعوا فيهن قدر دة !!

بركة الما عندك بنات كنتى يختى فلستى بالوليدات

أها وصلتوا وين ؟؟ شايفة أغلب الشباب مصرين على "السكاكاتية يمتنعن" .. و لا شنو يا شباب،
خلونا نقول الحلة بصل و المرة "فهم" موش أحسن ؟؟

نوووووووووووسة !!!

محبتي الأزلية ,,,

شكرا على مرورك الأنيق ,, يا أختي مصرين على الحلة أم بصل وتوابعها أها نعمل ليهم شنو غير الشروط
التعجيزية دي ؟؟ وفعلا المرة فهم !!!

ود يعقوب يا لكلك مفهومية وذوق !!!

معزتي ,,,

شكرا على مرورك الجميل ,, وقوفك الرائع مع المرأة يؤكد إنك أخو أخوات ,,, ولا تغرك المظاهر
فالجمال جمال الروح وليس جمال الجسد ,, جمال الخلق والأدب ,, كن معنا ,, رأيك يهمنا .

والله يا عواطف (كده حاف من دون ألقاب عشان نبقى أصدقاء) منذ الغيبة الطوعية للعزيز بدر الدين شنا لم استمتع ببوست ساخر ولذيذ مثل هذا البوست.

تعرفوا أنا حا أرجع من الأول بس ما تقولوا " قام تاني جاب سيرة البحر"!!!

يعني هسه صاحبتك دي حسب وصفك ليها (عقلها يوزن بلد ,, متعلمة , مثقفة ,, واعية ,, مرحة وروحها رياضية زي زيدان وللا ماتيرازي ما عارف!!!) بي ده كلو غلبها تختار ليها واحد ينسجم مع الصفات دي كلها وما عرفت تختار إلا الزول البيحرجها في شهر العسل وقدام صاحبته كمان!! - بالطريقة دي نحن برضو بنكون معذورين لو وقعنا لينا في واحدة من نوعية صاحبنا ده ويجوز لينا على الإقل أن نقول "البركة في الكرعين دي"

أنا شايف أثنين من أعز أصدقائي اختلفوا في البوست ده (أمير الجمري وبدر الدين يعقوب) ولكن تجديني يا عواطف أقف في صف أمير الجمري (ود جيرانا) وبقول "الثقافة برضو مهمة" وللا إنت ما قلت كده يا أمير!!هههههههههها

الصديق العزيز صديق !!!

معزتي ,,,

وأهلا بك صديقا عزيزا وأخا كريما وتسبقنا الأشواق قبل العين ,,,

أشكرك على مرورك الجميل وعلى ثنائك على البوست ولكن بخصوص صاحبتي زي ما بقولو مراية الحب عمياء

ومن الحب ما قتل وبعدين حكاية البركة في الكرعين دي ضحكتني شديد الله يجازي محنك وربنا ما يوقعك

في أم سكاكات !!

عطوفه صباااااااااحاتك ورورد نديااااااااانه روح ذي روحك الرياضية الحلوه

وجدت مداخلات أحسبها غاية في الروعه من أبناء منطقي الأمتدادية السمحه سماحة

قامات مثل أمير الجمري ،، وصديق حمتو،،وبدرالدين يعقوب،،،وهم بانسبه لنا مدارس

تعلمنا منهم الكثير والمفيد وكل منهم له مذهبه في المرأة ومن مجمل أراءهم نعمل

حله بصله من كل روضة عينه ومن كل عينة زهرة ونجده زوجاتنا آدام الله عليهم نعمة الصحة

والعافية وهن يعطرون لنا الحياة ويذهبن عنا عنأء الغربة ويشاركننه كل ملماتنا الجميلة

منها والحزينه لهم الحب والود وعظيم التقدير ولكي عطوفه وأنت تجودين بهذة المواضيع

الجميله جمال الكلم والنغم وخيارات المواضيع السلسه والهادفه مودتـــــــــــــــى

أبوقـــ مجدى عبدالرحيم ـــــــــى،،،

مجوووووووووووودي !!!

معزتي يا أخي العزيز مع شكري الجزيل لمداخلتك الطيبة طيبة روحك ونتمنى أن ياخد الأخوان من كل حلة بصلة ومن كل روضة زهرة عشان تكتمل الصورة ,,, تحياتي لنصفكم الآخر وهن أكيد سيدات جميلات ولطيفات وإلا لما حازوا على إعجابكم ,,, شكرا مجدي إبقى معنا .

Quote: Re: الحلة بصل ... والمرة كرعين !!!!! أمثال عجيبة !!!!

غايتو أنا ما معاكم في حكاية (الحلة بصل) دي

لكن يا عواطف يا اختي (المرة كرعيييييين)

Quote: كانت تلك هي المرة الأولى التي أسمع فيها مثل الحلة بصل ولكن صدقوني فقد سمعته بعد ذلك عشرات المرات لأكتشف أن الرجل الشرقي على وجه العموم والسوداني على وجه الخصوص يهمه المظهر وليس الجوهر ولغاية اليوم دة ما سمعت واحد قال عايز واحدة مثقفة أو راسها مليان.

يعني يا عواطف ماااا تخومينا قي الكلام ...(الراس المليان و الثقافة) ديل مكتوبات على الجبين عشان

يكونوا أساس اختيار؟؟؟

نحنا أول حاجة نشوف الظاهر لينا و بعداك الله كريم


كمال


تخريمة: وييييين الغيبة الطويلة دي؟؟؟؟؟

يا كمال عبدو سلام

Quote: نحنا أول حاجة نشوف الظاهر لينا و بعداك الله كريم

أسى أمانة فى زمتك فى زمنا العلينا دة بقت فى بت بتمرق "كرعينها"؟؟

بس الأولاد بيتخيلوا سااااكت من "برطة" الوش إنو ما "خفى أعظم" و لا غلطانة؟؟؟

العزيزة نوسة

Quote: أسى أمانة فى زمتك فى زمنا العلينا دة بقت فى بت بتمرق "كرعينها"؟؟

والله صدقتى...لكن في الحريف البتحين الفرص ...و كمان في دلايل على...

يااااا نوسة ما تخلينا نقع في الغلط و يوقعوا علينا الحد البوردابي


الشغله كلها تساهيل ولا كيف؟؟؟؟؟

Quote: بس الأولاد بيتخيلوا سااااكت من "برطة" الوش إنو ما "خفى أعظم" و لا غلطانة؟؟؟

و برضو دي ليك حق فيها ....و هو جنس خيال ... ولا أفلام ستيفن اسبلبيرغ

دمتى


كمال


تخريمة تانية: يا عواطف "المؤتمر البيئة" دا ما خلص؟؟؟؟؟؟؟؟

كيمو العزيز !!!

مودتي ,,,

شكرا على عبورك اللطيف ,, وبعدين يا بعد عمري الراس المليان بتعرفوا من أول جلسة لكن أنا خايفاك
تنخدع وتضيع في الرجلين وما تعرف تعمل شنو لمن تلقى الراس فاضي ,, طبعا أنا عارفاك عندك صوت وصورة
عشان كدا داخل بطولك وعرضك ,, عموما أشكرك على سؤالك عني فقد كنت في عدة مؤتمرات وهذا هو السبب .

عطوفي نهارك سعيد


عزيزي مجودي كما تسميك اختنا عواطف وبحق وحقيقة انت فعلا مجدنا وفخرنا وعز امتدادنا الحبيب

لك تقديري واحترامي وانت تدافع عن امهاتنا واخواتنا .

توفي :-

اصدقائي وتوم روحي وابناء منطقتي الاساتذة الاجلاء امير الجمري وصديق حمدتو ... هما اعلم وعلي

يقين انني احب الجمال واعشق كل شي جميل ..

الجمال كلي ليس كرعين فحسب , وهنالك امثال كثيرة , امير وصديق هما شاهد عيان علي ذلك .. دعوني

اخواني ان اذكر لكم نموذج واحد انو الجمال ماجمال كرعين ( واحده صاحبتنا وانتم تعرفونها

اخواني , فيها اجمل وجه رايته في حياتي وطويلة ولونها ابيض وروحها حلوه ودمها خفيف بس

سكاكاتها تعبانه يعني دي في نظر أمير وصديق بتكون ماحلوه (انشاء الله تكونو ياحلوين عرفتوها

........................... (جيمي )

اه دحين حاتقولو شنو _ اخير تسكتو ساكت لانو ماحايكون عندهم راي تاني وخلوا استاذتنا عواطف

تتكلم عن جمال المره المخفي .

وتاني ياصديق اخير ليك ماتجيب سيرة البحر لانو الجمال الاصلي جمال الروح وانا ايضا اقول

الثقافة مهمه بس ماثقافة الكرعين والحله ام بصل

فتكم بعافية

بيبي !!!

وإنت كما ندلعك شوية عشان ما تزعل وتقول ديل أحسن منك في شنو !!

شكرا على كلامك الرصين وخفة دمك المتناهية وأؤيد قولك المرة فهم وعاطفة ورقة وقلب طيب قبل أن
تكون جميلة شكل ومنظر ,,,

بدءً لكِ التحية ..
وبالفعل هذه الحقيقة المرَّة التي تُقرُّها
دواخلُنا .. كثيراً ..
فتقييمنا دائماً أو تقييم بعضٍ منَّا يكونُُ
بالشكل لا الدواخل ..
ولكن أذكرُ أنََّّ جدتي كانت
تقول لي بلسانها : يا ولدي عرِّس ليك مَرَة
إنْ عِِـلْتَ تقيلك وكان هكعتََ تشيلك ..

ومع أني لم أفهم المعنى بالضبط للمثل
لكن أعتقد أنَّها تقصد .. عرِّس المرة التي
تنسترُ معك في مُقبلِ الأيام .. فإن جارَ بكَ
الزمن وكبرتْ سنَّك ورجعتَ لمرحلة الطفولة
(خرَّفتَ ) فهي لا تزال تسترك وتأخذ بيدَّك ..

وأُلاحظ أنَّ الزيجة التي تكونُ على النسقِ الأوَّل
( المرأة .. الشكل دون الفهم والراي )
لا تستمرُ كثيراً .. وإنِ استمرَّتْ فتكونُ مشوبةً
بمخاطر اللا إستقرار ..


أخت / عواطف لك التحيةّ مجدداً
ولك كلَّ عبق ..



أخوك / محمَّدزين ...

الاخت عواطف
الله يديك العافيه


في احدى البوستات وجدت هذا المثل

المراة بلا دخان شاي بلا هبهان

ود هباني العزيز !!!

مشكور يا بعد عمري على مرورك المعطر والحمد لله الما قالو المرة بلا سيقان شاي بدون هبهان.!!!

أخي العزيز محمد زين !!!

نعزتي ,,,

مرورك الرشيق أسعدني كما أسعد الكثيرات من بنات جنسي لما يحتويه من حكم و أمثال تسعد الخاطر
فعلا ومثلما ذكرت المرء يحتاج جمال الروح في خواتيم أيامه وليس جمال الشكل ,, شكرا محمد كن
معنا ربنا يسعدك .