سامحووووووني ما كانش أصدي !!!!

الإخوة والأخوات صبحكم الله بالخير إذا كانت الدنيا عندكم صباحا ومساكم الله بالخير إذا كانت مساء وبعد:

يا شباب والله الليلة أنا مستهدفاكم عديل كدة والعايزين تعملوه أعملوه ,, عايزين تكسرو البورد كسروه
عايزين تشتكوني لمحكمة العدل الدولية ما مشكلة الموت مع الجماعة عرس في ناس كتار بعرفهم حألاقيهم
هناك والعايز كمان يقابلني في شارع زايد الثاني مافي مشكلة شايفين الشفتنة دي كيف ؟؟ المهم برضه
برجع وبقول اللي ما داخل في الموضوع دة يجر الشخيت ويقيف بعيد بس خلوني مع الشباب الرافعين ضغطي وجايبين لي السكري والعصبي ,, عايزة الليلة أكون معاهم FACE TO FACE لأني عندي معاهم مشكلة كبيرة
جدا وعايزة أسالهم السؤال دة : يا شباب بالذمة لمن تطلعوا الشارع ما بتشوفو بقية العالم لابسة كيف وإنتو لا بسين كيف ؟ ولا فاكرين نفسكم قمة في الأناقة ؟؟ والله ما تتصورو ضغطي برتفع كيف لمن أشوف واحد لابس بنطلون مع شبشب ولا بنطلون مع مركوب ولا مؤاخذة ولا بنطلون والقميص كم طويل وبي برة ومكفكف اليدين ياخي بدل ما تكفكف ألبس نص كم وبعدين حكاية تناسق الألوان دي حدث ولا حرج نحن على رأس القائمة والبتلقاه لابس بدلة بتكون غير شكل ماعارفة جابها من وين أما بعض الجزم ولا مؤاخذة تلاقيها من يوم مااشتروها ما نضفوها ولا ورنشوها, بتصدقوا إنه في واحد صومالي كان معاي في الشغل ضحك ضحكة
كبيرة وقال لي ليش هذا سوداني كله ما يلبس زين ؟ بنطلون مع شبشب قميص من برة !! قلت ليه مين قال كدة ؟ فشرت عينك والله شبابنا في قمة الأناقة ,, طبعا كلامه صاح لكن ما عايزة أديه فرصة فينا عشان كله يوم يجي ناطي لي ويسألني سؤال عن سلوكياتنا الغريبة العجيبة , مثلا : لمن تشوف واحد يتكلم من
الهاتف العمومي يتكلم بأعلى صوت لامن ناس الحتة كلهم يعرفو إنه رسل لأولاده مليون ولخالته ست النفر مية ألف ولحاجة نفيسة بت عوضين خمسين ألف وبعدين هو جاي شهر خمسة عشان يشتري قطعة أرض ويحضر عرس حمد ود فاطنة وطهور أولاد عاشة بت النعمة ولمن يمشي السوق عشان يشتري الهدايا حجة وغلبة مع ناس المحلات التوب أبو مية عايزو بخمسين والقميص أبو عشرة عايزو بخمسة ولمن يركب البص يتكلم في المبايل بأعلى صوت كأنه ماخد البص ولا التاكسي طلب وبعد نهاية الدوام يمشي ينوم ويصحى عشان يأذي خلق الله جلابية بدون عمة ولا طاقية زي بياع الترمس حايم من محل لي محل حتى السينما يدخلها بنفس المنظر وهاك يا ضحك بطول حسو وتعليق على الفيلم كأنه قاعد براه في الصالة وكمان ياكل في الفيشار ويشرب في الببسي بصوت عالي ولمن ينادوه في المدرسة عشان ولده عمل مشكلة مع تلميذ تاني شوف الحماقة بتاعة السودانيين يوقف المدرسة على فت رجل ولمن يطلع مع زوجته مشوار يكون ماشي هناك على بعد عشرين متر والمسكينة ماشة وراه رغم إنها غاية في الروعة والجمال لكن دي قسمتها تسوي شنو ؟؟ ولمن يجي شهر خمسة ويكون عايز يسافر يكون معاه خمسين طن زيادة ويدق الجرس والجرسة ويجري من هنا لهناك يفتش زول يوزن معاه ولو ما لقى يعمل غلبة مع ناس الكاونتر عايز يمشو ليه خمسة وعشرين طن بدون فلوس ولمن يركب الطيارة يجنن المضيفة ويتعامل معاها كأنها شغالة,,, أمشي جيبي موية ,, جيبي عصير ,,, جيبي بندول ,, جيبي بطانية ,, ودي الولد دة الحمام ,, وطبعا دة كله بدون لو سمحتي ولا شكرا ولمن يصل مطار الخرطوم برضه غلبة مع ناس الجمارك ولمن يطلع ويلاقي الأهل برة سلام بالأحضان وهاك يا كواريك وضحك وسؤال عن ناس فلان وعلان وبعد دة كله عايز يعمل ليهم استايل ومغترب شايل الولاعة ولابس النضارة والشنطة الساموسونايت الماخمج والناس تعاين ليه باعجاب شديد وماعارفين إنه هناك كان لابس بنطلون مع مركوب وقميص بي برة ,, ياجماعة لمتين نحنا نكون دون الناس في السلوك والإتكيت والحضارة ؟؟ بس شاطرين نشنف في الناس ونقول نحنا السودانيين أحسن ناس في الدنيا على الأقل عندنا أخلاق وما حرامية ولا نصابين و هذا لا يكفي الناس بقت تفضل الإنسان الأنيق المرتب اللي بعرف كيف يتكلم حتى ولو كان نصاب وحرامي المهم وجه مشرق ومشرف للشركة ومش مبهدل وحالتو حالة عشان كدة لازم نتغير ونتعلم من غيرنا بدل العنجهية ورفع النخرة الفي الفاضي يا جماعة الناس طارت وراحت ونحنا قاعدين في محلنا نغني نحنا السي ونحنا الكي ونحن الكلفة مرفوعة ونحنا حلفت مدفوعة وسامحوني ما كانش أصدي فهناك من لا ينطبق عليهم هذا الكلام وفتكم بعافية ..

عواطف

كلامك صح ومية في المية

حدثني صديق لي يعيش في بلد اورو بي انه رأى سيدة اجنبية اخرجت مبلغا من جيبها لتعطيه لسوداني

كان يبادر بسؤالها عن اتجاه محطة القطار في ذلك البلد ليس إلا.

افتكرته متشردَ ومحتاج لمساعدة من شدة عدم اهتمامه بهندامه

أخي العزيز حيدر !!!

ليك وحشة إنشاءالله إنت طيب ,,

صدقا لكلامك كان في واحد إماراتي بوزع صدقة في رمضان قامو إتلموا حوالينه الناس منهم هنود وباكستانيين وفي واحد سوداني واقف جنب عمود النور قام مشى مد ليه 100 درهم أخوك طوالي شالها
وختاها في جيبو !!!!

عواطف ... صباحك خير ... كلام مهم ..
صارت البهدلة او اللبس البهدلة والصوت العالي والوقوف في صفوف في اروقة عنابر المستشفيات وهات يا ونسة وضحك وقرقرة او الوقوف امام ابواب الشقق والبيوت وهات يا ونسة ( ما كنتو تتموها جوة) لازمة لبعض سوداني الشتات ... ان لبست لبسا معقولا وخفضت صوتك وعملت كما يجب ان تعمل وتلبس وتنتظم ياتي من يسالك " انت من وين ؟ " (سؤال يغيظني جدا ) استاء واسال "خمن؟ " فتاتي اسماء من القارتيين الا السودان وعند ما يعرفون يكون ردهم " Really" ..

احدي بناتي لم تعش في السودان ولكن زحمة ما تسمعه وتعيشه عن السودان من خلالي جعلها شديدة الحساسية تراقب تصرفات طلاب معها في غربة اخري ويوما وجدت بعض منهم بالسفنجة والقميص اياه ياتي الي جامعتهم - وهي جامعة ذات شراكات عالمية كثيرة وبالتالي طلاب من كل العالم - فما كان منها الا ان صاحت فيهم ووقفت عند المدخل بشقاوة تمنعهم الدخول " انتو سودانيين ولازم تحترمو البلد الجايين منو ؟ " حتي ردتهم الي بيوتهم ليلبسو ما يناسب ويعودو .... اكبرت فيها ذلك حيث لم تفعل وتقول " وانا مالي" وهي مولودة في غربة وتعيش فيها ....

كان الجلباب والعمة وهو هندام سوداني راق يميزنا اما اليوم فللاسف صار تمييزنا اما ببنطال قصير (عرفنا الجلباية تكون قصيرة بشان ما تلم الوسخ طيب المنطلون ليه؟ )وقميص طويل وذقن غير مهذبة وشبط و اما بجلباب وسفنجة وبس ....

سوء الحكم والحاكية ليس هو السوء الذي ياتي من الحكام فقط ولكن كذلك من تصرفات البشر الذين يفقدون تحكم في سلوكهم ولبسهم وماكلهم ...الانضباط في اللبس والفعل والقول لازمنا السودانيين عقودا طويلة فعرفنا به الا مؤخرا حين كثرت الوان الطواقي ومصادرها والوان الجلاليب ومصادرها .والمناطليين التي تقصر ..

وما يزيدنا غيظا ان كثير ممن اغتنو في العقديين الماضيين وهم في زيارات لبلادغير بلدهم واستضافة في فنادق لا يؤمها الا القليل من المقتدريين حتي من اهل البلاد الغنية تراهم في ذات اللبس المبهدل والصوت العالي والوقوف امام غرف الاوتيل في ونسة ...

ساءني مرة وانا في حفل خاص بدولة بعيدة ان اتي سوداني بجلبابه وعمته ( كان مهندما والحق يقال) لكن وحيث ان المجموعات وزعت وفق ارقام وكراسي فكل شئ كان منظما فما كان منه الا ان جر كرسيه "كررررر" واتي الي صديق يعرفه وجلس محشورا بين كرسيين وهات يا ونسة ووزير من تلك الدولة يتحدث والجميع فس سكون ....شعرت بغبن وانهزام حيث كنت انا الذي سهلت له الحضور من خلال صديق وانا لا اعرفه ولكنه اصر بحكم علاقة له باهل الدولة المضيفة كما ذكر ...

ارجو الاهتمام بانفسنا في ملبسنا وماكلنا وقولنا كما كنا دائما فالذي يحدث في بلادنا مهما طال هو مؤقت ولا يصح الا الصحيح وعدل في السماء يحمي بلادنا واهلنا وسياتي شبابنا و غيرنا من صلبنا اقوي منا يعيد لبلادنا وهجها وبريقها وما ما ذكرته اعلاه وما اتت به اختي عواطف الا من سبيل التنبيه حماية لبلدنا واهلنا

لكم مودتي
ابوبكر

أخي الحبيب أبوبكر !!!

مودتي ,,,

شكرا على المداخلة الصادقة التي تؤكد إنتمائك لبلدك وحرصك على مصلحته وشكرا لأبنتك الشجاعة التي
اتخذت موقفا شجاعاونبيلا في الوقت نفسه,, ودمتم .

هههههههههههههههههههههههههههههههههههههههه


ههههههههههههههههههههههههههههههههههههههههههه



نحن السودانيين

حالة عجيبة.

ذكورا و إناثا.

العزيز هاني !!!

مرورك أسعدني وفعلا نحن رجالا ونساء كان الله في عون من يشاهدوننا في مكان عام ,, مرة من المرات في سودانيتين ماشات جوة المستشفى كلو واحدة لابسة توب قاطعاه من راسها وشبشب دكتور شول أبو 10 درهم
وشايلات وليداتن في صفحتن وهاك يا نضم واحد لبناني عاين ليهن وقال والله الله يكون في عون السودانيين
حريمهم شو بشعات !!! طبعا هسة حينط ليك زول ويقول ليك حريمنا مافي أحسن منهن لكن ولا يهمك كن معنا
فلا يصح غير الصحيح ,,, شكري هاني ,,

تحياتى استاذة عواطف
نعم التقيد بالمظهر العام امر مهم جدا
وعلينا كلنا واجب الحفاظ على الملابس الوطنية
يعنى لو لبسنا جلابية فلتكن مكتملة جلابية طاقية عمة شال مركوب او جزمة
قبل كده سودانى رجعو من مطار الخرطوم وكان متجه لدولة خليجية وكان مرتدى جلابية
حتى بدون طاقية ويا ريت لو كان مسرح شعرو.............
البوست ده صدق مهم شديد ويا ريت ياريت نهتم بمظهرنا اى نعم نحن مهتمين باخلاقنا
وبيكون جميل لو جمعنا الاخلاق مع قصة الهندام دى
خوالص معزتى

وليد 500 العزيز
مليون سلام وشكر لمرورك الزاهي ,, صح لسانك فلم تقل سوى الحقيقة ليتنا تعلمنا من غيرنا بدلا من
الفلسفة الزايدة .

الأستاذة المحترامة
عواطف

نعم كلام عين العقل وحاصل والنوعية دى بكميات كبيرة جدآ
مبشتن ومعولق والوأحد لمن يشفو تقرب تلبد منو.
أفتكر أنها حاجة مؤرثة فى الأسرة زيها والامرض بمعني
لو رب الأسـرة كان أنسان نظيف وما بحب الخمج وكذلك باقى
أفراد الأسرة ويسود بينهم الأحترام والتعامل الطيب ما أفتكر كان
بتعامل بالطريقة دى والاناقة كذلك ولكن هى فى النهاية بترجع
للذوق الشخصى ولكن الأجيال ا لجديدة دى بتعرف تلبس أنا هنا بتكلم
عن الشاب................................
فى حاجة تانية النسوان الواحدة تشوفها وهى مارقة بتكون باقة نار هاك
ياالحنة والتوب الماخمج والشعر كيف المهم أهتمام شديد جدآ
فى البيت ريحة التوم والبصل طاقة والفستان مشروط با الجنبه والشعر
كل وأحدة فى أتجاه المهم حالة صعبة خالص والنهير للشفع بصوت عالى وشين ولمن تكون خارج
البيت ياحمادة عيب كده بصوت رقيق وحنيييين ...

تحياتى

أخي الحبيب أحمد !!!

معزتي مع جزيل الشكر على عبورك الأنيق وكمان ما تنسى في نسوان مبهدلات برة وجوة يعني لمن تكون ماشة
السوق تلبس ليها قميص بيت ولا نوم تحت العباية ولا التوب وجارة ليها قطر بتاع شفع يبكو ويتنخجو
كلو لعبة شافوها عايزين يشتروها والأم تصرخ وتكورك فيهم في وسط السوق وتخلي المايشتري يتفرج .

طيب يا عواطف والنسوان البلبسوا أخضر وأحمر

وشنطة كحلية وشبشب لون زينب ديل ما شايفاهن؟؟؟؟؟

مبسوط منك جدا يا عواطف

ده بوست( في السلك ) لكن القصة دي محتاجة و قت طوييييييييييل ! .. ما أحبطك,



تخريمة:

وين بوستات النسا و الولادة ?..

أخي الغالي المعز !!!

شكرك على عبورك البهيج أما حكاية النساء والولادة دي في بوست الراجل كتفي بالعيال وأضبحي ليه
الكديسة يوم الدخلة !!!

الاخت الاستاذة?(ع أ أ ) تلقي الواحده ماشه عباره عن بترينه ولا محل للذهب تحمل طن كامل وتجيد كل فنون الكشكشه واحيانا تكون الكشكشه مع الكلام .مع انو حلق وسلسل صغير كفاية.بقي الموضوع دا عقلية ولاشنو. وشكرا للموضوع المهم وح اجيب ليك حاجات كتيره ما عاجباني .مودتي

ست عواطف ياجمة حشا المغبون
والله اصبت كبد الحقيقة
مظهر الانسان مهم جدا لانو بكون الانطباع الاول
وامكن السودانين عشان جواهم جميل ما بهتموا بيه
ذكرتني مرة قاعدين في الجامعة نحنا ثلاثة سودانيات معانا صحبتنافلسطينية
وكان عندنا زميلنا يمني وجيه جدا خطب صحبتنا يمنية جميلة جدا
قلت ليهم والله الطيبين للطيبات والسمح بجيب السمح
قامت الفلسطينية قالت والله الزول ده ماوجيه شديد
قلت ليها ياختي انت عشان اولادكم الحلب ديل سمحين فمقياسك عالي
لكن نحنا اولادنا عجيبين
وقمت وريتها صور اصحابنا السودانين في الموبايل قلت ليها اها شوفي ياكافي البلاء
شناة وبهدلة
تقولي لي الولد ما وجيه
والله الزولة ضحكت لمن اتشرقت

إبنتي الحبيبة نهال !!!

حبي وتقديري لأهتمامك بالشأن اإجتماعي فلم تقولي سوى الحقيقة وربنا يعينكم بس نتمنى أن تلعبو
دورا كبيرا في هذا الجانب ,, شكري ومعزتي ,,, كوني معنا دائما .

الخت عواطف مساء الخيز وللة دى حدس فى جنيف اخ عندو بوتك وثياب سودانية وبتعزفى جنيف والمتامرات واحد جايى من السودان لى موتمر رسمى منظمتة الصحةالعالميةماء اقدر اصف ليك كان لابس كيف وللة الاخ صاحب الدكان حلف علية طلاق ما يمشى الموتمر بشكلو دة وذهب معاة ال احدمتاجر الملابس

ما تصدق ما محمد دة كلو بالسلفيات والبهدلة وأحيانا بكون فالصو لزوم شوفوني ياناس السودان وموتو بي غيظكم جهل فاضح !!!!

البت يا يمه زي الغزال نحافه وظرافه وخفة دم تجنن الشربات .بس تعرس تلقيها بقت عباره عن كتلة لحم تفتش في العيون الزمان ديك فتيش عشان ما تلقاها,مع انو زيادة الوزن علي حساب صحتها.ودي برضو عقليه تدخل في اطار البوبار النسوي حتي اذا كانت البت متعلمه .والله تتأسف علي زمانها الكانت فيهو استايل ومودرن وكده...شخصيا انا بربط الرومانسية مع النحافة!!!

أخي الحبيب محمد !!!

صدقت في كل ما تقول وبعدين لامن تبقى زي السكس ويل بدل ما تعدل حالها تعمل شمطة مع راجلها في
كلو صغيرة وكبيرة ليه بتكلم فلانة وليه عاينت لي علانة وليه علقت على بوست فلتكانة مع إنه فلتكانة وعلانة ديل بكون راجل فلانة آخر همهن .,,, شكرا محمد ربنا يسعدك .

افرزى يا عواطف
اسحن ليك!!

عدوووووولي !!!

بركة الجيت ,,,

والله الكيمان مفروزة من زمان عشان كدة قلنا اللي ما ليه علاقة بالموضوع يجر الشخيت ويقيف بعيد ,,

الاستاذه/ عواطف 00

تحايا طيبة 00

الحاصل انو ده الوضع او الشكل بتاعنا ونحن داخل السودان000طبعا تعتبر دي كلها حاجات عادية وما فيها حاجة00
بمعني اننا شلنا حاجاتنا من السودان كلها معانا لخارج السودان ( السمحة والكعبة) سوى كانت متعلقة بالعادات والبس او غيرو
والمشكلة التانية نحن ما بنحب التغيير بشكل عام 000وما بنحب نقلد الناس الآخرين حتى ولو كانو هم الصاح 00
نحن كده00 ما عارفين انو الحاجات دي ممكن تكون مواضيع للسخرية والضحك000المهم نعمل البريحنا بس0000
ولكن برضو في بينا قلة ما ( نظلما) كان عندها الاستعداد للتغيير ومواكبة الاوضاع الجديدة00
فالمطلوب مننا الانتباه شوية لحالنا والتنازل عن التعال بتاعنا ده شوية00ونعاين حولنا شوية ونتعلم الكويس شنو 00ووين !!
والله يصلح الحال00
***
وياريت يا استاذه/ عواطف ، لو سمعنا رأيك في بوست السودانيين في عيون الخليجيين00( لعلاقته الوثيقة بموضوع البوست ده)

أخي العزيز أبو عبيدة !!!

مودتي ,,,,

شكرا على مرورك الجميل وقد قلت الحق وياريت نتعلم من غيرنا الإيجابيات ونترك السلبيات وأوعد بالمرور على البوست المذكور مع تقديري لمداخلتك الطيبة ,,

أستاذة عواطف ..

تحياتي

والله كلامك القلتيهو فوق ده كلو صاح ..
غايتو الشناة لمن يكون معاها بهدلة ، بتبقى كارثة..
مرة وأنا راجع الدوحة من السودان ، في شاب وجيه وقيافة رائد في شرطة المطار ..
واقف في البوابة ، وبيطلع في الناس ويوقفهم جنبو ، طلّع زي سبعة كده ..
وقال ليهم ترجعوا تغيروا هدومكم دي ، وتلبسوا عمم في روسينكم ..
الجماعة شبكوه ، والله يا جنابو جايين من بعيد ، والله اقامتي باقي ليها يوم وتخلص ..
قال ليهم السماء ده قريب ..
دخلنا ، وبعد أقل من ساعة الناس المعولقين دخلوا علينا نضيفين وملمعين ..
يا كافي البلاء ناس ما تتنضف الا بالبوليس .. حاجة عجيبة ..

البت يا يمه زي الغزال نحافه وظرافه وخفة دم تجنن الشربات .بس تعرس تلقيها بقت عباره عن كتلة لحم تفتش في العيون الزمان ديك فتيش عشان ما تلقاها,مع انو زيادة الوزن علي حساب صحتها.ودي برضو عقليه تدخل في اطار البوبار النسوي حتي اذا كانت البت متعلمه .والله تتأسف علي زمانها الكانت فيهو استايل ومودرن وكده...شخصيا انا بربط الرومانسية مع النحافة!!!

خـلاص سـميه قالت مخاصماك ياعبدالرحمن
كـده كويس?

عـواطــف الرائعــــة كيفــنك


تعــرفي يا عواطف ده موضــوع يؤثـر على الكل يعـني هذه الشخصية غير المهندمة

تؤثـر على من حولها بشكـل مؤلم وتحكمنا قواعد وعرف الحريـة الشخصية وحكاية انت

مالك والأهــم من كــدة الشــماعة المكســورة المايـلة الأســمها ما الظـروف كــده

ودي امكانياتي ويا أخــوان عمره الفلس ما كان ليه يــد في عدم تناسق ألوان الملابس

أو تركك للقميص من بره أو ترك التفة منكوشة أو لبس الجلابية بدون عمة والأهم من ده

النظــــــــــــــــــــــــافـة ** النظـــــــــــــــــــافة ** النظــــــــــــــافـة

وأكــره أن أقـول و خصوصـا في بلد أجنبي لأن ليس للنظافة وطن معـين فهي من الايمـــان .

والنقطــة التي أريـد التركــيز عليهـا مما جــاء في مقــالك الشـيق الواقـعي الهادف

هــي مســـألة التحــدث بصــوت عــالي ومزعــج في الأماكن العامــة هذه بجـد من العادات

التي يجـب علينــا كســودانيين الانتبــاه اليهـــا ومنذ حوالي ثــلاثة أيــام رزقـت بنت

أخــتي بمولــودة وهـي مازالت بالمســتشـفى وبالأمس جـاءت الممرضــة بعـد أن زاد الضجيج

حــول ســرير بنتنا من قبـل زوارها من بنو جلدتنا وســألت مازحــة

do you have a party وطــبعا على الرغم من انها تقولها كدعابة ولكنهـا تحسسـنا

بطــريقة غير مباشــرة انه من الممكن ان يقــول كـل شــخص مبروك ويطبع قبلة ويغادر

دون ان يتأذى منه الآخــرون ودون حدوث كـل هذا الضجـيج .



لن يغضب منـك أحد يا ست الكل لأنـك من جـواك نـاصعـة ودايـرة تشــوفي أهــــلــك

أحســــن نــأس ولســـان حــالك يقـــول دي ديــرتي وديــل أهـــلي .




التحــــية اليك يـاعواطــف مقرونة بالأمنيات الطيبة بالتوفيق





صــــلاح واســبه

أخي الغالي صلاح !!!

أشكرك يا بعد عمري على مرورك الأنيق وأنت تدري أن مداخلاتك تسعدني جدا لم تتضمنه من منطق رصين
وتحليل دقيق لواقع مؤلم تصور واحدة متزوجة وحلوة جدا وشعرها بسم الله ما شاء الله لكن لو شفتها
في البيت زي المجنونة الشعر منكوش والجلابية مشروطة والرجلين حلتهم حالة وفي من الأيام قالو
ليها التوم حيتزوج الشهر الجاي قالت والله لو عزموني بتحنن !!! وبقت نكتة كل ما تقول لواحدة
أو واحد حاجة يقول ليك كان عزموني بتحنن !!! شكرا صلاح أبقى معنا دائما رأيك يثري البوست .

أخي الحبيب صلاح عبدالله !!!

معزتي ,, مع جزيل شكري على طلتك الأنيقة فلم تقل سوى الحق وأتمنى أن تسهم مشاركتك في تغيير بعض
الواقع وليس كله فأمامنا سنوات وسنوات لنلحق بالركب ,,, شكرا صلاح ربنا يسعدك .

Quote: مرة وأنا راجع الدوحة من السودان ، في شاب وجيه وقيافة رائد في شرطة المطار ..

يا قريبي ... ما في شوية من صنف الرائد دة في كل المرافق ؟؟

قبل شهور كنت اراقب نقل تلفزيون عن مؤتمر للاستثمار في السودان ؟؟؟
المؤتمر لتشجييع الاستثمار في السودان ..
اتي الرئيس متاخراولم يعتذر احد للضيوف
كان المستثمرون او من يمثلوهم اخر قيافة سواء في البستهم الوطنية - فلقد كان للمستثمريين الخليجيين- او في لباس غربي...
كان من يمثلو السودان من وزراء وووووو في مظهر يطفش الاستثمار...

بوست موفق وموضوع يجب مناقشته بموضوعية وسيجذب كل انيق و نظيف ومهندم ليدلي بدلوه عن نقيضه ممن حواليه .لسؤ الحظ صحافتنا غير مهتمه بمثل هذه الاشياء ,وحتي بعض الصحفيين (حدث ولاحرج)اما الساسة (فلا تعليق)لقد كان المحجوب وزروق مثال نادر للهندمه والاناقة .(صورة وصوت)اتمني ان تهتم صحافتنا بالتوعية فالشعب السوداني رغم سماحته به عيوب كثيرة . وتاني راجع ليك مودتي

أخي الحبيب محمد !!!

شكرك على كلماتك العطرة ,, أشعر بحزنك العميق على بهدلتنا وجهلنا الفاضح بالهندام وطريقة الكلام
تصدق يا حمادة رجعنا آلاف السنين مقارنة بناس الستينات شوفهم في التلفيزيون أسود وأبيض كانو كيف
ونحن دلوقت كيف أنا عندي شريط زيارة أم كلثوم للسودان لقيته في مكتبة بلندن بالصدفة الناس كانو قمة في الإبداع والأناقة والجمال آآآآآآآآآآآآخ على يومنا اللي مش فايت ونهارنا الزي بعضه .

سلام الاستاذه/عواطف والمتداخلين

الموضوع جميل وكبير وفيه نقد للذات والجميع لايقبل هذا النقد .لمناقشة الامر والبحث عن الحلول
للمستقبل القريب والبعيدلابد الى الرجوع الى البيت والمدرسة والحى والمدينة واخير الوطن.

نبدا مكن الاخر الوطن...التربية الوطنية ضعيفة ومحتاجة لمتخصصين لدراسة الامر وترتيبه وتاهيله ابتداء من الروضة kg الى الجامعات .
المدينة ومنظرها ومرافقها تجربك على التوافق مها.
الحى ومن فيه.... القدوة والمحاكة من الكبار اساس البنية.
المدرسة مروطة بالمعلم وخبرته والدور الاساسى فى يده.
البيت ثم البيت (المتخصصين يتداخلون)هنا اضرب مثال
(ماشى وين ماشى ناس عمى .طيب التوجيه المطلوب غير ملابس البيت والحى والبس ملابس الخروج من نطاق لبس البيت والحى.وده توجيه منزلى مطلوب.)

فى انتظار المتداخلين المتخصصين.......

أخي العزيز حيدر !!!

محبتي ,,,

مرورك الرائع يسعد القلب وعليه فلنأكل ما يعجبنا ولنلبس ما يعجب الناس وليس العكس ونحن ياعزيزي

ما زلنابعيدين كل البعد عن ثقافة اللبس والألوان والكلام ,,, شكرا يا بعد عمري على مساهمتك

الجميلة .

وحدث ولا حرج وانت تسمع الموبايل يرن داخل استديو البث المباشر من المذيع نفسه او من الضيف ,وكذلك داخل اماكن العبادة والمستشفيات ,والاصوات العالية داخل المركبات العامة ,وتخيل انسان في سنما او مسرح او ندوة بيتكلم بالموبايل.والامثلة كثيرة

ست عواطف

الشكر ليك انتي

وكل عيد أم وانتي طيبة

وفي بوست هنيت فيه كل الامهات تعالي لينا بهناك

تقبلي تحياتي

حبيبة القسا !!!

أشكرك على تهنئة الرقيقة رقة أحساسيك سوف أعود للتهنئة بدخولك المنبر والله لم أقرأها سوى الآن
فسامحيني يا إبنتي الحبيبة ,,, مرورك يسعدني .

حمووووووووودي !!!

معزتي ,,,

المذيعين والمذيعات ديل عايزين بوست خاص ,,, مش حدث ولا حرج ,, ديل لاشافو محطات فضائية تانية
ولا عارفين حاجة عن الإعلام المرئي ,,, شكرا جبت لي العصبي .

عواطف ازيك

والله الموضوع ده فاقع مرارتي عدييل وخاصة في مقابلات التوظيف ... الواحد تلقاه مقدم لوظيفة وطلب منو الحضور للمقابلة الشخصية وتلقاه جاي لابس لبس عجيب وغريب وكأنو بيقول ما تشغلوني عدييل كده ...

وتلقاه راجل متعلم ومؤهل للوظيفة أكاديميا وغيره من الجنسيات الاخرى اقل تأهيلا منو بكتير ولكن لابس كويس وشكلو كويس وبيتكلم كويس والنتيجة معروفة..

في فترة من الفترات كنا محتاجين عدد كبير من الموظفين وعملنا اعلان في الصحف وكدة ، طبعا جونا كمية من الناس وشغالين مقابلات وكده ، يوم كان في ثلاثة سودانيين من ضمن المرشحين للتوظيف وكانو قاعدين الثلاثة في كنبة واحدة في انتظار دورهم في المقابلة وللأسف كانو من النوعية الذكرتيها فوق ديل

البنطلون لون .... القميص لون وشبط واسع من قدام لغاية ما الاصابع طالعة بره الشبط المهم بهدلة شديدة ، المدير العام البيعمل المقابلات لبناني الجنسية طلع من مكتبو وعاين كده من بعيد للجماعة ديل وناداني قال لي الجماعة ديل بدهم يشتغلوا معانا ؟ قلت ليه ايوه قال لي (( والله في محطة بنزين ما اشغلهم ، روح مشيهم ))

وطبعا ده واحد فقط من نتائج البهدلة وعدم الاهتمام بالمظهر وغيره كتير

سنعود،،،


محبتي

أخي الحبيب محارب !!!

مرورك يسعد الخاطر ,,, والله حاجة تكسف ,,, تصور كان برضه في إعلان في الصحف بنك فتح جديد عايز
موظفين وموظفات من جميع الجنسيات واحدة سودانية بعرفها اتصلت فيهم قالو ليها تعالي لمن مشت
قعدت إنتظرت دورها في المقابلة وكان قدامها في كم لبنانية كدة ولامن ندهو عليها ودخلت على المدير قبل ما تقول حاجة قال ليها آسف ما عندنا وظائف قالت ليه قبل شوية أتصلت وقلت لي تعالي !! قال ليها
قبل شوية دي شي والحاصل شي تاني ,, طلعت زعلانة تسب وتلعن لاقاها البواب باكستاني قال ليها ليش
ماما في زعلان إنت الحين يشوف حرمة لبناني كيف يلبس وكيف يسوي عشان يجي يشتغل !!! حرمة سوداني ما يقدر يسوي كلش هذا !!! تصور !!!

الأخت العزيزة جداً جدًا جدا عطوفة

ماعارف أبداء معاك من وين بالظبط لكن في كلام فوق يعني قبل كلامي ده إتقال وهو

Quote: وتلقاه راجل متعلم ومؤهل للوظيفة أكاديميا وغيره من الجنسيات الاخرى اقل تأهيلا منو بكتير ولكن لابس كويس وشكلو كويس وبيتكلم كويس والنتيجة معروفة..

وأشكر الأخ محارب وفر علي كتابة الموضوع أعلاه لكن والله يا أخوان هي ظاهرة كارثية عديل كده

وانا في إعتقادي الشخصي المسألة أساساً تبداء من البيت , يعني تعليم الأطفال كيفية الإهتمام

بمظهرهم العام , طبعاً تبداء بالنظافة أولا والنظافة معروفة من الإيمان ثم الترتيب , يعني

لو كل طفل صحي من نومه وقام بترتيب سريره وطبق بطانيته أعتقد دي بداية جيدة ومن ثم كيف

يغير ملابسه الداخلية بشكل يومي ويعرف وين يضعها وكيف يرتب كتبه وكراسته اليومية .

عواطف انا لو سرحت في الموضوع ده ما أظن في واحد تاني غيري حايكتب حاجة وعشان كده

بترك مساحة حرة لبعض الإخوة والأخوات المتداخلات .

مشكور مرة أخري ياعواطف لكن بقول برضوا الضرب في الميت حرام , لاني أعرف بعض البيوت

ماعندها اي إستعداد لتنظيف نفسها فما بالك بأبناءها .

تخريمة

النظافة لا تحتاج مننا لمجهود كبير والله النظافة كنز للصحة وللعافية وبهجة تسر الناظرين .

أخي الحبيب هاشم !!!

طولت الغيبة !!! عساك طيب وكمان ست الحبايب الراقية جدا والحلوة ,, طيبة وما عندها عوجة ,, أنا
متأكدة إنو معاك ما بتجيها أي عوجة يا أخو البنات ومقنع الكاشفات ,, والله كلامك عن الهندام والنظافة
سمح بلحيل ونتمنى أن يجد الأذن الصاغية ,, شكرا هشومي مرورك الأنيق له سحر خاص ,,, تحياتي للعيال .

الأخت عواطف إدريس ، تحياتى .....

أنا من المتابعين لكتاباتك القيمه دوما وهذه أول مره أتداخل فيها معك ، بالنسبه لموضوع بهدلة السودانى فهذا شىء أتفق معك فيه تماما ، فنحن هنا فى العربيه السعوديه نشوف هوائل أكثر منكم وأزيدك بنشوف سودانى لابس ليه عراقى وسروال لا يصلحوا للبس إلا فى داخل الشقه وللنوم ، ولكنه يخرج بيهم للشارع وتلاقيه فى البقاله وفى أماكن كثيره أمامك وبهذا المنظر، العراقى خفيف جدا جدا وبدون فانله داخليه ، تصورى هذا !!!!!! فكم يكون منظره مخجلا لكثيرين منا ، والواحد لو سألوهو يرد ويقول شنو ؟؟؟؟ كمان تعالى شوفينا فى الحفلات العامه وغيره ، بوبار ما بعده ببوبار ، والمصيبه الكبيره كان الماكروفون مر لواحد سودانى ، تشوفى العجب قمة اللعثمه ، وكان إتكلم كلامه خارم بارم ،قبل إسبوعين كنا فى إحتفال خاص بشركه كبيره جدا جدا ، هنا فى جده ، والبرنامج من ضمن فقراته واحد سودانى بيقدم كلمه إرتجاليه عن الشركه وعن إحساسه بيها ، والقصه حفظناها ليهو تماما ، وجاءت المصيبه بصعود هذا السودانى للمسرح ، اللبس لا بأس به ، ولكن الكلام فى وادى والإحتفال فى وادى ثانى ، حتى مفردات اللغه غير واضحه ، إنقلبت لعاميه سودانيه مكسره وركيكه فى آن واحد ، خلانا فى نص هدومنا والله ، والمصيبه أنه متعلم تعليم عالى وفى منصب كبير فى هذه الشركه ..........

أخي العزيز بشير !!!

معزتي ,,,

سررت جدا بعبورك الرائع وقد صدقت في كل ما قلت فنحن يا بعد عمري لا كلام ولا هندام أما المناظر الحكيت عنها فعلا مقرفة جدا وفي ناس عاملين بالمثل البقول بلدا ما بلدك أمشي فيه عريان !!!
شكرا بشير مرورك يشرح الخاطر . أبقى معنا وجودك يسعدنا ..

عواطف الجميلة

ده كلو كوم

لكن زي البطفو السيجارة في كباية الشاي ديل

احيييييييييييييييييييييييييييييي منهم

حمووووووووووودي !!!

مالك قلبت لي المواجع ولا البرمي ليك السفة في الحمام آآآآآآآآآآآآآخ منكم جايين من وين ؟؟؟

ده الكلام الجد يا عواطف ..

ودى المواضيع التى يجب أن تثار فى هذا المقام
والله تطرقتى لأهم عيوب الرجل السودانى ...
عشان كدى جاييك صادى لكلام ربما يكون أوجع وأصعب للبعض
فى سلوكياتنا ....... لك التحيه مربعة ....

محمد مختار جعفر

عزيزي الأخ محمد !!!

محبتي ,,,

شكرا على عبورك الزاهي الذي اسعدني كثيرا ,, الموضوع دة موضوع مؤلم جدا وليس له حلول آنية عشان
بقى مرض مزمن ومع ذلك نسنعى بكل جهدنا لفتح أبواب النقاش حول سلوكياتنا المابتشبه سلوكيات الناس
شكرا على المداخلة وفي انتظار عودتك ,,

جايين من صقط لقط

صقط لقط دي قربية يمكن من جزر الواغ واغ !!!

سامحووووووني ما كانش أصدي !!!!
أقراكي حتى حين لاتكتبين
وقلتها في سري:
(حين قرأت عنوان البوست)
أتركوها فإنها مأمورة بالجمال

وقد صدقني الحدس
.........
قال لي مدير المدرسة أعمل لي غلاف
وأردف مداعبامن خلف جديته التي أعرفها
بس ماتروح تحط ألوان سودانية!!

لعلي وآخرون معنيون بترقية الزوق الجمالي
فقط لو!!!!!!!!!!!!!!
وهذا موضوع آخر يحتاجه بحث مضن
...............
قال البتاني سائق التاكسي: _ وهو يسير خلف سيارة إشتكى دهرها_وهو يسوق ببطء واضح_
ليش الزول هادي ماف مظبوط ؟
قلت ليش رفيق؟ وإِش لون عرفت إنو سوداني!!
قال البتاني سائق التاكسي:
لازم كل سيارة كشرة في نفر سوداني
وظنا منه أنني قد أستهجن كلامه
بس سوداني كلو في زين.. وراح يمجد في أخلاق وسلوك السودانيين...
الحين أن يشوف في نفر مسري يقيف جنبك سيم سيم أنا مايقيف يشيل
أنا يقيف مال إنت مسر ي خرتي وواجد جنجال
سوداني واجد في زين
مودتي عواطف
نورالهادي

التحية لكي ياسفيرة الكلمه الحلوه ،،، عطوفه

الموضوع غــــــــاية في الأهمية والنصيحة نحن ما بنقبله لية؟؟؟؟

والله السودانيين ديل ما في أطيب منهم ولا أطعم منهم ولا أمن منهم!

بس حتت البهدله دي بقت لصيقه بنا حتي في شاشاتنا التلفزيزنية وبقولوا

عندنا فضائية؟دي محطه براها .

وتاني نجي نشوف الأماكن العامه وما زكر عن الصوت العالي وغسيل الحالة

الأسرية عبر الأسير برسل نشرة أجتماعية كامله ووو

ونجي الي المستشفيات والأسواق وهاك يامناظر تحتاج الي نظارة رمادية

والرجال وأشباه الرجال وبرضو نسوانه شركاء في هذة المحنه ونحنا بنقول

المراة مرآة الرجل ودي ختتتتتتتتتتتي تحتا ألف شخيط وتعالي شوفي الطفوله

تلاقي الشافع من قام من نومه ما في أي أهتمام حتي لحظة خروجه بهدله شديده

ومع أنو عنوان السيده أولاده وزوجها بدأ من اللبس وبعدها التصرفات والأوتوكيت

علي حسب ما تحتاجه المنطقه ونوع المشوار ونحن الدوله ذاته مسؤله عن هذة

البهدله ومن يمثلوها والسفارة ياناس أولآ هندام وثقافة وسماحه وووو وأي فرد منا

في المهجر بيمثل بلدوا ونحن نملك الكثيرين الذين لهم هذة المواصفات بس الجماعه

قاصدين يجننونا بهذة المناظرة التي تذهب بأنظارنا الي شواهد عده ونرجوا أن نجد

مثل هذا البوست مفتوح في كل سفاراتنا وأن نجعل لها موظفين يحملون دبلومات في الهندمه

وندفع بهم في مرافقنا حتي لا يلجوها المبهدلين وتعريفهم بأهمية اللبس ومايترتب عليه من

فنون كمالية مع الهندمه ، وياجماعه المظهر شيْ مهم جدا جدا جدا وعيونا شبعت طشاش في

كل المرافق أحبابي أهل بلدي ترفقوا بنا وما كان السودان هاكذا أبدأ والخرطوم في يوم

من الأيام كانت أجمل عاصم من النظافة والجمال ،،وأذكر مره في مناسبة قال لي أحد

السعوديين هنا أنو ما في أنضف من السودانيين ديل ديل يأخي حتي الصابونه المفترض

وسيلة نظافة هم بنظفوها ويمدوها ليك بعد غسلها وما شفت شعب ذي ده علي الأطلاق شوفوا

الشهاده دي وأعملوا بها يابنوا شعبي العزيز وأعكسوا لنا الوجه المشرق دائمأ أينما

كنتم ونحن أمه حضارية يجب أن نتمييز وأن ننقل هذة الحضارة الي كل الأمم وعنوانها

المظهر العام وأن نعمق مفهوم المظهر العام كمان كان هنالك بوليس لأمن المرافقه العامه

ننشي مراقبيين للذوق العام .

دمتي أستاذة عواااااااااطف علي هذة النقله المهمه في الزوق العام،،


أبوقــ مجدي عبدالرحيم ــى

أبو قصي يا سمح الزي !!! إنت لا أي أي ولا زي زي !!!

شكرا على مداخلتك التي نزلت بردا وسلاما على البوست فقد أثلجت صدري بكلامك الموضوعي الرصين
ونأمل أن تتواصل معنا فأيد على إيد تجدع بعيد ,,, شكرا مجدي أبقى معنا !!!

أخي الودود نور الهادي !!!

شكري لكلماتك الرائعة فات الحد ,,, لك مني كل إعزاز وتقدير ,,, صدقت في كل ما قلته فعلا لما تشوف سيارة كجيانة وتعبانة لازم يكون صومالي ولا سوداني ,, مرة قررت أمش بتاكسي عشان أزمة الباركنج فقلت
لبتاع التاكسي عايزة أمشي البناية بتاعة محل أبو الوليد بتعرف المحل ؟ قال لي هذا دكان محل ملابس
واجد رخيص وكشرة ,, هذا محل مال سوداني ,, مصري ,, بتاني ,, قلت ليه ليش؟؟ قال إنت أبدا يشوف
لبناني يشتري من هذا مكان ؟؟ لبناني يشتري ملابس غالي لكن واجد زين ,,, يا أمة ضحكت من جهلها الأمم .

عواطف ....

شوفي يا زولة .... أنا بجُر الشخيت ..... لكن ما بقيف بعيد .. عشان كلامك في السلك

بس عايز أعلّق على دي:

Quote: وشبشب دكتور شول أبو 10 درهم

الهندام والقيافة يجب أن لا يكونوا دعوة للبوبار والبذخ غير المبرر. يعني شفت كتير بيكونوا قمة في الأناقة والهندام وتناسق الألوان، رغم إنو ملابسهم بسيطة. يعني نظافة .. تناسق ألوان وهندام يمكن - دون النظر إلى القيمة المادية للملابس - أن يفوا بالغرض. بالمقابل هناك من يلبس بالشئ الفلاني، إلا أن القميص يكون من بلد، البنطلون من بلد الكرافتة من بلد والجزمة ولا مؤاخذة من بلد. ويمكن أن يكون القميص مربع زي كراس الحساب، والكرفتة كمان زي كراس الهندسة ... ومعاهم جزمة رياضية. يعني ديل لو بقوا من (كريستيان ديور) ما ممكن يكون ليهم علاقة بالأناقة.

مرّة تانية يا زولة ............... أنا جارّي الشخيت

ست عواطف
شكرا لترحيبك الجميل
لكن البوست القصدته
إليك ياناصية معاني الامومة
بمناسبة عيد الام

حاضر يا بعد عمري ,,, طلباتك أوامر !!!

أخي الحبيب أبو الريش !!!

معزتي !!!

لك كل الود ,, في الحقيقة أنا لمن قلت دكتور شول أبو 10 درهم لا أعني القيمة المادية ولكن عشان
هذا النوع الرخيص وغير الطبي هو للحمام فقط ولا يصلح للخروج وقد قصدت التمييز بين الطبي بتاع
الخروج والعادي بتاع الحمام وقد لزم التوضيح يا بعد عمري ,, أما بقية مداخلتك فأنا معك مليون
في المية ,, شكرا عزيزي كن معنا ,,,

الأخت الأستاذة عواطف
تحية وتقدير وسلام،،،

ما عارف أقول ليك شنو عن المواضيع البتكتبيها؟
في مرات كتيرة بتوفري علي ما كنت سأكتب عنه ومنها هذا
الموضوع الذي أحصى خيباتنا وعاداتنا الضارة في بلد الاغتراب.
قبل أسبوع مشيت بلدية دبي لأمر هام.. الجميع منتظرون
في بهو القاعة الأنيقة المكيفة والعمل يسير بهدوء وسهولة
والجميع يؤدي وينهي إجراءاته في هدوء كامل، فجأة أسمع
صوتاً يشبه صوت الموتور وهو يتكلم بأعلى صوته الأمرالذي
لفت انتباه جميع من في القاعة وأخذوا يحنظرون نحوه وهو
لا يكترث وأخذ يرقي ويزبد..
حقيقة منظر مؤسف ..
وقبل فترة كنت أسير مع زوجتي في سوق الغوير بالشارقة
وكنت أتكلم معها في موضوع شلهتة السودانيين، وقبل أن
أكمل حديثي معها طل علينا شاب سوداني يتضرع في نص السوق
وهو يرتدي عراقي خفيف وسروال وسفنجة (أي والله) طبعاً
ما قدرت أكمل كلامي لأن المخرج كان ذكي وعرض لي نموذج حي..
البعض منا ينسى أنه سفير لبلده وأهله، كل فعل أو عمل سالب
لا ينسحب عليه هو وحده بل يحسب على بلده وبني وطنه.
هناك عدم اكتراث ظاهر بالزي والمظهر العام، وحكاية الكلام
بصوت عالي أصبحت ماركة مسجلة لنا ومعها لبس الجلاليب الخفيفة
بدون عراقي أو عمة أو حتى طاقية بدرهمين، مع المراكيب الغبشاء
وقديمة أو اللبس بدون تناغم أو تناسق في الألوان.
إذا كان هذه من العادات المنتشرة في السودان فكان يجب علينا
أن نتأثر بغيرنا من الشعوب الأخرى ولا حرج في ذلك.
قبل فترة في نشرة الأخبار الرئيسية بتلفزيون السودان تمت
استضافة مسؤول سوداني كان يرتدي قميص أخضر وبنطلون بلو
وكرافتة برتقالية (هذه ليست كاميرا خفية) لكنها حقيقة
علقت عليها في الحين..
أما مسألة العفش الزائد وطابور المودعين والمستقبلين في المطار
فهذا موضوع يحتاج إلى عشرين بوست منفصل.
ربنا يصلح الحال والمظهر العام..
ومشكورة على الطرح الهادف..

أخي الحبيب نصرالدين !!!

سعدت بمرورك الجميل في الحقيقة كفيت ووفيت ,, ليس لدي ما أقوله سوى الله يسعدك ,,,

عواطف نقر ونعترف ان بيننا مثل ماذكرتى لكن ارجوا ان تعرجى على بنوتنا برضو
الواحده لونها فحمى فاتح وروج احمر..الواحد طوالى يتذكر دعاية الارز
ابو بنتين..توب مربوط وكروش ومخدات مجدعات باهمال..كعب عالى والمشى بالركب.
دهب مكوم بكميات تجارية يبدأ بسلسل حلبى بدون رقبة،طشت يلمع بفواريص يتدلى من العنق وماخد نتوء
ومنعرجات كثيرة حتى تخال ان التى امامك لبخة منجورة باهمال.
امثلة كثيرة..ليتك تعرجى قليلا على مثل هذا،،،

أخي الصدوق صديق ,,,

معزتي ,,,

والله من كتر ما سرحت مع السيناريو افتكرتك أسامة أنور عكاشة صدقت في كل كلمة قلتها وهولاء لهن
يوم ,,, شكرا على مرورك الزاهي ,,, يديك العافية ,,

Quote: الهاتف العمومي يتكلم بأعلى صوت لامن ناس الحتة كلهم يعرفو إنه رسل لأولاده مليون ولخالته ست النفر مية ألف ولحاجة نفيسة بت عوضين خمسين ألف

الحبيبة عواطف
وطبعاً العينة دي أول ما تشوف ليها توب سوداني يرفع صوتو بالكلام على أساس (أنا ود بلدك) و كدة
!!!!!!!!!!!!!!!!!!!
وقطعاً البشتنة المترتبة على ال(تزيي)-حلوة التزيي دي-بجلابية بدون طاقية و عمة أو شبشب مع بنطال (بتجيب الضغط)!!
طبعاً الشبشب دة أسوأ موضة ظهرت في تاريخ الهندمة الرجالية!!
ولسة في بقية حكي!

لنوية الأنيقة !!!

كيفك يا ست الحبايب ,,,

فعلا لامن يشوف توب بتجيه الحالة وتشيلو الهاشمية ويرفع الفوليوم حبتين لزوم إستعراض العضلات
شكرا عزيزتي على طلتك البهية ,,,

اتفق معك تماما في كل ما ورد
والتهنئة على شجاعتك في أن تكوني مرآة صادقة
أنا شاهد علي كل ما ورد أعلاه وأبصم بالعشرةو(أنا ليس منهم) في ماذكر
وأزيد علي ما ورد أن البعض يصر على التحدث باللغة الإنجليزية وبصوت عالي أيضا ودونما داعي لذلك ، وبلغة ركيكة تدعو للضحك ...

شكرا لك يا مرآة Mirror

كيمو !!!

سلامات !!!

شكرا على شهادتك الرائعة وبصمتك الجميلة ,,, الكلام بالإنجليزي المكسر دة كوم والصوت البشبه صوت
الحمير دة شي تاني,,,, سؤال لا اجد له إجابة ليه نحنا أصواتنا رجال ونساء عالية وبشعة ؟؟؟
شكرا كمال ربنا يحفظك,,,

أختنا عواطف..

مسجلة غياب نسبي لكن رائعة كما عودتينا..

أولا بالتبادي فشر واحد يقدر يتكلم معاك ويقول حاجة نحن تحت الخدمة وأخوك رغم تقادم

السنون لا زال ينعم بعضلات تبز عضلات أحسن بودي قارد.. ومن الناحية دي ما تشيلي هم..

الموضوع.. والله يا عواطف يحيّر ... نحن ونحن.. ونحن.. وكلو في الهواء...

المهم في المنطقة التي أنا فيها كان هناك أختصاصي كبير في علم من علوم الطب.. وهو علم على رأسه

نار.. تتابعه أعين المختصين وغيرهم بعين الإعجاب والرضا.. إينما حل...

كثيرا ما يعقد الندوات والمحاضرات العامة تحت رعاية من الشرق والغرب.. ويقول حديثا.. يسر كل

الناس من المختصين ومن العامة المتطلعين مثلي.. ولكن يا حسرة

يعتلي المنبر .. والقميص.. نص كم والزرارة القبل الأخيرة مفتوحة.. والجزمة ولا مؤاخذة (مركوب).. بس

مركوب نمر.. والحق يقال الرجل نظيف ومهندم (مجازا).. ومسكت على قول الخليجيين.. ولكن ما عارف

نظريتو في اللبس الكاشوال شنو.. رغم إنو قضى سنين عددا في أوروبا...

مش التربية؟؟؟؟!!!

الناس عندنا آخر ما يعلموا أبناؤهم هو فن الهندام وحسن المظهر.. لأنو فاقد الشيء لا يعطيه...

أذكر أحد أقربائي كان يسافر لمصر.. وعند سفره يلبس جلبابا غير مرتب وربما غير نظيف.. وكان دائما

ما يصطدم بأولاده في الحتة دي .. وكان دفعهيا أولادي دي جلابية السفر) وينسى أنو مسافر بالطيارة..

وكان أبناؤه ينكسفون من هيئته.. ولكن ماذا كان عليهم أن يفعلوا .. فمن شب على شيء شاب عليه,,,

إذن التربية...

وجه آخر للعملة.. عندما يكون هناك يوم للأباء أفضل أن أذهب بالجلابية والعمة والمركوب والشال.. ما عدا العكاز الذي عندي منه موقف for obvious reasons .. لكن إبني يعترض.. ويقول لازم ألبس الفل سوت

وإلا أنا أمشي بالعربية وهو يمشي بباص المدرسة.. على شرط أن لا يجلس معي في الحفل... فماذا أنا فاعل

وأنا برتاح مع الجلابية.. لكم ما حصل لبستها مع سفنجة أو حاسر الراس.. وجلاليبي الله يخلي أم العيال

كرت.. وأول ما تعتدي العمر الأفتراضي تقوم أم العيال بالتصرف فيها من حيث لا أدري..

عموما الناس ديل عايزين تربية من أول جديد

سلامات يا عواطف ،،

حتى في السودان بقى الهندام واحدة من أولويات الاختيار للوظيفة، بالطبع ليس غالياً ولكن نظيفاً ومرتباً ومتناسقاً... وفي بلاد الغربة هنالك الكثيرين فقدوا الوظائف ليس للمؤهل ولكن للأسباب الذكرتيها بالله زول يقرأ احسن الجامعات وأصعب الكليات ويتميز ويسقط في حاجة صغييييييييييييرة (أشياؤنا الصغيرة هي أشياؤنا الكبيرة)... وتشكري على الموضوع المتجدد

نووووووووووون ثري ؟؟؟

لاحول ولاقوة إلا بالله !!! وين كنتي ؟؟ بركة الجيتي !!!

شكرا على عبورك الأنيق وإنت الصادقة ,, ربنا يسعدك ,,,

ود كرار !!!

شكرا يا سيد الرجالة على كلامك الطيب والله إنت أدها وأدود ,, وطالما أنت وبقية أخوان البنات العلمو
الجبل الثبات موجودين في المنبر ما بتجينا عوجة ,,, كيمو والله إنت صادق في كل ما ذكرت يعني نحنا
لا متعلمنا لا جاهلنا فاهم في اللبس والأتكيت ,, الله يكون في عونا ,,,,

يامافي ناااااس ذي الأنناس
وفي ناس في الوساااخه تنداس
والله قصص كتيره وعديده بس الشي
البيستوقفك الوساخه الباينه بالذات
في اللبس الأبيض الواحد كمان يذهب بيها
المسجد حاجه تقرف جدا طبعأ دي عينه
مامفروض تخرج من السودان نهايأ وفي رحله
من رحلات السودانية بينما أنا أستقبل أم
قصي في مطار الملك خالد بجده وأذا بسوداني
يخرج أول القادمين وبهكذا منظر لا جلابية نظيفه
ولا فل سوت ولا يحذنون شبشب غاني من الوساخه وجلابيه
لا توصف بنية من الوساخه ومن يده كيس تخيلي المنظر
وعندما حكيت لأم قصي أوردت لي عينات كانت علي متن
السودانية في فن التصرفات دايره كليبات مصورة
وتعلق علي جدران القصر الجمهوري لكي يروهم ياااااااهو
ده السودان وأصعب ما يؤلم حقيقة أطفالنا المبهدلين
ولاذنب لهم غير أنهم أبناء لأثنين غير مباليين ماحولهم
وينسون أنهم في بلاد فيها ما فيها من جميل الثياب وفي
متناول اليدين ومثل هولاء يجب أن يؤنبوا من السودانيين
الذين معهم وعندي بنت أخت غاية في النظافة وذهبت مع والدتها
وعندما دخلت منزل هذة السيدة مع والدتها وجدت المنزل وسخان
وما كان منها إلا وامسكت بالملايات ووضعتهم في الغسالة ونظفت
لها الشقه وأحرجت أختي وبالدعابه قالت لها يمكن ياامي ماعندها
وقت للنظافه أساعدها فيها شي دي! وهي الآن بقت ماتمشي لزول مابتعرفوا
من ذاك الموقف والتصحيح لأوضاع المقلوبه لازم لها جرأه متناهية
حتي لوكانت محرجه،
وبعدين نحن الشتاره حاجه والنظافة حاجه تانية ممكن الشتاره تتعالج
بالنظر لمن حولنا في هندامهم وأختيارهم للألوان ونحن السودانيين
معروفه الألوان التي تناسب بشرتنا سوي الغانية أو الفاتحه منها
يأخـــــي كل ما يعجبك واللبــس ما يعجـــب الآخرين ده فن الهندمه
مبني علي هذا المثل وفية حكمه لنا ومن يريد أن يكون مهندم عليه العمل
به والتجربه خير برهان ،،، ياجماعه السودانيين ديل فنانين حتي في كرتنا
بنشبه البرازيلين وفي غنانه متفردين وفي كلمتنا معروفين بـــس حبة
أهتمام بالهندام وهو العنوان ومقياس الأنســـــــان

بجي راجع الكلام ده مهم خلاص ودعوه للكل ست بيت تراجع أبنائها وزوجها
في اللبس ويتبادلوا الرأي وذي ماقلنا البيعجب الناس هو الأساس


أبوقــ مجدي عبدالرحيم صـى

العزيز أبوقصي !!!

مودتي ,,,

أشكرك على التواصل معنا في هذا الموضوع الهام وطرح بعض النماذج التي تجرح شعورنا كسودانيين أولا
وأخيرا وفعلا حاجة تكسف ,,

بس عارفة يا عواطف...

مع إنو أنا أبصم علي كلامك بالعشرة والعشرين.. لكن عندنا منافس

في الصوت العالي.. وشر الغسيل عبر الأثير.. شايفة العنوان ده كيف..

ألا وهم أولاد بمبه.. وهاك النموذج ده:


آلو...

أزيك يا ماما

.....................................

كويس الحمد لله

....................................

الحمد لله بس إنت عاملة أزاي

.................................

ياه .. طب كويس...

..............................

لسه ياماما.. بنزل في الصيف

.................................

مش زي كل مرة ياماما

....................................

بصي ياماما .. في موضوع مهم أحب أاولهالك في التلفون

...................................................

تسلمي ياماما...

الواد بيليه لازم يطلع من الشقة

بس إسمعيني ياماما الأول... باول لك الواد ده لازم يطلع من الشقة

................................................

من غير ليه... ياماما ... ده واد إبن ستين هرمة

...............................

ما أعرف .. هو كده وخلاص...

ياماما نفذي الباول ليك عليه وبس...

.................................................

ياماما أنا أدرى بمصلحتي

.......................................

بس عشان خاطري يا ماما.. بس..

.........................................

وأمال فين فريال؟

................................................

إيه .. إيه .. ياماما.. راحت فين؟

............................................

هي مش لسه من جمعة كانت هناك؟

..............................................

أخوها مين بس ياماما؟ أيه الأرف (القرف) ده؟

..............................................

الوليه دي عمال رايحه جاية.. هي شغلانة ولا ايه؟ طب والله العظيم

.........................................

بتولي (بتقولي) أيه.. ياماما اسمعيني .. .. كده ما ينفعش خالص!

..........................................

طب إزاي ودي تجي؟!!!

.............................................

لا لأ ,, ياماما خلاص.. أصلن أنا نازل في الصيف...

......................................
أسمعني لما أجي حأعرف أربيها...

وطاخ...

ما أعرفش حصل أيه.. لأنو الراجل وقع من طولو...

واللهم طولك يا روح

كيمو !!!

صباحك فل ,,,

والله صدقت كان في واحدة جارتنا مصرية ساكنة في الشقة القدامنا بنسمع صوتها خصوصا لمن تكلم أهلها

في مصر كأنها قاعدة معانا في شقتنا مع إنه بابين شقتنا مقفولين لكن هاك يا صراخ :

ماما متنسيس والنبي تبعتيلي الفطير المشلتت والديك الرومي مع حمادة !!

لزوجها :: إنت متأخر كدة ليه وحيات أمك لو رجعت الساعة دي تاني مش هافتحلك الباب !! رجالة تئرف !!

لإبنها : يا أبن (... ) مش ألتلك ألف مرة تذاكر أبل ماتنام ؟؟؟ وهكذا دواليك ,, بس إحنا مالنا؟؟

خلينا في حالنا نشوف روحنا الأول بعدين الجيران .

هسه طبعا الجماعة الطيبين المليانين وطنية سودانية يقولو عواطف دي بالتأكيد حاتتصدر قائمة

المستهدفين و حا يبيحوا دمك....

انت ما عارفة أنو نحنا شعب يهتم بالجوهر و ليس بالمظهر...دا كلام شنو دا يا عواطف ...


مرة قريت تعبير عجبنى جدا يعبر عن حال السودانيين :

(شعب يرتع في أسابيل السبهللية بشكل فوضوي كارثي)

احنا شعب مش واخد "قلم في نفسه" احنا واخدين شلوت في وشنا و في نفسنا

ناس وهم

كيمو !!!

صباح الورد,,,

برضه في واحد فلسطيني قال السودانيين ديل أكل ومرعى وقلة صنعة !!!! عاجبك كدة ؟؟

يا عواطف نسيتى موضوع التفف (جمع تفة) بكسر التاء.

كل واحد شايل ليهو كوم شعر لامن أطرافه محمرة ..ما عارف الميزة شنو؟؟؟

ولا عامل ليهو (قجة) بضم القاف...الود خلاااااص مكمل الأناقة

و النوعين ديل مرتبطين ارتباط وثيق بجيل و فئة عمريةو كمان بمناطق جغرافية معينة


(هسه عشان "مناطق جغرافية" دي حا يطلعوا لي حماة الوطن و محاربي التهميش و رافضي الجهوية ...و

هاك يا دروس و محاضرات و جهاد اسفيري ما يديك الدرب)

فعلاً كلام الحبيب أبو الريش صحيح
ما لازم الأناقة يكون معاها بذخ و بوبار
أمي حكت لينا زمان ايام الخرطوم الثانوية كان عندهم مدرسة إنجليزية إسمها مسز آن كانت غاية في الأناقة و البساطة
كل الطالبات بقو يقلدوها في لبس الجيبات اللونها فاتح و البلوزات غوامق رغم إنو ما كان معهودة الحاجة دي حيث السائد كان لبس البلوزات فواتح و الجيبات غوامق.
كانت ترتدي خامات بسيطة لكن أنيقة
محبتي

تعرفي يا عواطـــف شــفتك قلتـي بي غيظـة البرمو السـفة في الحمام


يــلا أنـا أديــك مثــال لي واحــد بســف صــعوت عشـان ذاتو البسـفو يخلو السـف !!


مــرة مشــيت زرت واحــد وكــان وقتهـا يادوب جايي من الســودان واقســم بالله

يا عواطـف الراجل ده على درجة عالية وراقية جدا من التعليم (المابزيد بلم داك)


كنــا جالسين في الصالون (living room ) وطلع الحقة (ضم الحاء) وبطريقة مقززة دردم ليك

السـفة وختاها وبـدأ في الونسـة وكــل شــوية يجـر سـبت الزبالة وبدون مؤاخذة يبصق

دي كانت براها كافية لأنه الواحد يقوم يقطع وشه منه وينهي الزيارة لكن الخـلاني

أتنفض وأقــوم و أحجــم ليك البني آدم وأكـره البســفو كلهم الزول ده يــاجماعة

مشــى بعــد ما اتكيــف من ســفته تفــاها في حوض المطبببببببببخ آي واللللللله المطبخ

ومن اليــوم داك بقيت قدر ما يقولوا لي فلان انتهى من الماجستير أو الدكتوراه بقبل

أشــوفوه بسـف ولا لا حتين بعداك أقــول ليه والله مبروك وعجبنا ليه والحاجات دي .

لأنه يا جماعة دي مآســاة أن نكــون كلنا متســاويين في التصرفات دي حيث تنعدم المبررات.



لكم الود






صــلاح واســبه

ست عواطف
النسوان العندكم كويس بلبسوا دكتور شول والله هنا في مناظر بتلبس شباشب حمام ولا مؤاخذة
وبالذات قبال كم سنة وراء لما كان في سودانين كتار شغالين مع الحكومة اليمنية في التدريس وكانت ظروف اغلبهم سيئة وزايدنها بشتنة
والله الناس ديل ايام الاجازات كانوا بجوا من القرى يملوا السوق بمناظر مريعة اللهم لا اعتراض بس علي حكمك والواحدة تلقيها لابسة شبب بيت ومعاه توب مكرفس وسايقه جيش شفع منكشين وتقول مرمدين بالتراب والابداع انها لابسة نقاب مع التوب وقميص نوم بتحت وطبعا بنطلون وشراب مع قميص النوم
يعني فضايح بشكل غريب
وايام التسفير بتاعهم احسن ما تمشي المطار والله في زول كان شاحن سلم
وبجيك اكمل باقي المحن

إبنتي الحبيبة نهال !!!

حبي وودي بلا حدود ,,,

سمعتي بالمحن الفي الصحن ماشات وبردحن ؟؟ بس ديل نحنا بذاتنا وصفاتنا !!! تقولي شنو وتقولي منو؟؟؟

العزيز صلاح !!!

مرورك يسعد الخاطر ,,,

بتصدق في دكتور صيدلي زوجته كانت في السودان بجوا أصحابه بلعبوا معاه كوتشينة ,, قام واحد محاسب رمى السفة بتاعته في حوض المطبخ قام الدكتور الصباح نادى السباك قلع ليه الحوض ورماه في الزبالة
وأأأأأأأأأأأه يا بلد !!!

لنوية الحبيبة !!!

مرورك الأنيق أسعدني يا سيدة الأناقة ,,, شكرا بعد قلبي على هاالطلة ,,,

تحياتي عواطف ..
مواضيعك دائماً شيقة وهادفة ..
حقيقي مسألة اللبس والذوق مهمة جداً وتعكس روح الإنسان ..
وليتنا نتفهم ما تطرقتي له بعين النقد البناء ووضعه في عين الإعتبار ..
الأمثلة كثيرة ومسألة التندر من الأجناس الأخرى التي نحتك بها لا حصر لها ..
قد نمر مره أخرى ونسرد بعضها ..

لك كل التقدير ..

الأخت عواطف بت إدريس ...

تحيه ... وجيتك صادى لما طرحتيه ،
.... مسألة فى غاية الأهمية .. والشيىء المؤسف بحق
أن تجد بعضا من أساتذة الجامعات وأطباء من سوداننا الحبيب
رأيتهم بعينى لايحسنون هندامهم وليس لديهم الذوق فى الملبس ،
بل أن ربطة العنق تخاصم أعناقهم تماما ولاتعرف طريقها لدى رقابهم
ناهيك عن كم القميص الطويل الملفوف ، شيىء مخجل بحق والغريبه الآن
هناك ظاهرة أصبحت عادية وسط طلاب الجامعات وهى إرسال القميص خارج
البنطلون ، .. قسما بالله عند مراحلنا الثانوية ناهيك عن الجامعة ،
والكل يعرف ذلك إن كان من تلك الحقب ، تطرد وتعاقب إن رأوك بذلك
وياويلك إن رآك صول المدرسة مبهدل ، ... تلك تربية كانت ، وهذه تربية
نعايشها اليوم .. لا تقولوا الظروف الإقتصادية و..و.. الخ ...
النظام والنظافة والترتيب والنهج السليم الراقى لا يحتاج الى صرف مادى
رأيت فى المدارس الخاصة كيف يعلم الطالب إرتداء ربطة العنق والمظهر الأنيق
ومن شب على شيىء شاب عليه .. لذلك ذكر أحد الإخوة فى مداخلة ما أن :
( الراجل جزمة والمرأة كرعين ) ولكنى ضحكت عندما عرفت مقصده بأن الرجل الذى
يعتنى بتنظيف حزائه دوما فهو بلا شك يكون أنيقا ومكتملا فى هندامه ، وهى حقيقة ،
.. المهم أن الرجل السودانى حتى على مستوى الوزراء وقد رأيناهم كثيرا لا يعبهون
ب ال ( FULL SUIT) .. وهناك من كان لمظهره غير الأنيق السبب المباشر فى عدم توظيفه
برغم إجتيازه للإمتحان النظرى والعملى ونحن فى الخليج سمعنا وعايشنا الكثير فى ذلك .
ختاما أرجو أن نبدل من حالنا وسلوكياتنا فى هذا الجانب الهام يارجال وكفاية بهدلة
تؤخذ على البعض ولا زلنا لم نتخلص من مقولة الكسل و( السودانيين كسالى ) وإن لم يكن
كذلك إلا وإننا نؤكد لهم ما يدعون ، بتصرفاتنا غير السوية وغير الحضارية وختاما
المعذره وتحياتى للكل ...

محمد مختار جعفر

Quote: ولمن يطلع مع زوجته مشوار يكون ماشي هناك على بعد عشرين متر والمسكينة ماشة وراه رغم إنها غاية في الروعة والجمال لكن دي قسمتها تسوي شنو ؟؟

سبحان الله اى جزئية من هذا البوست هى الواقع المرير لاهلنا في بلادالاغتراب .

طيب يا عواطف والنسوان البلبسوا أخضر وأحمر

وشنطة كحلية وشبشب لون زينب ديل ما شايفاهن؟؟؟؟؟

روءة !!!

وينك يا أبو ناصر ؟؟ طولت الغيبة!! حمدلله على السلامة ,,

أمبارح في حفلة عيد الأم في واحدة لونها كحلي معليش ما مشكلة نحنا سودانيين لكن لابسة أحمر أنجليزي من راسها لي كرعيها وجنس ترتر وزركشة والله بس ناقصها تور اسباني يجي ينطحها فتقع أرضا والحكمة فاكرة روحها ست الأناقة حلفت ما تقعد في الأرض لمن الحفلة أنتهت و أأأأأأأأأاخ من زي ديل كان معانا
جمعية سيدات مصر وعينك ما تشوف إلا النور ,,

أبن شيقوق !!!

يالكلك ذوق ,,,

ولو شفته بشخط فيها كيف في السوق قدام الناس ,, ياولية إنت ما عندك مخ ولا شنو ؟؟ ألف مرة قلت
ليك إشتري لي ناس بيتكم وبس !!! أنا لو كنت في محلها كان من السوق وعلى المطار ,, عجبي !!

أخي الحبيب حمادة !!!

معزتي ,,,

أمبارح كنا في حفلة عيد الأم للنساء فقط فجأة دخل واحد وزنه 100 طن ,, جلابية طالعة من خشم البقرة
وشبشب يا لطيف والراس بدون طاقية وهاك يا بشير في الفنان النسوان قعدن يضحكن ,, وبعدين معاهم ؟؟؟

أخي الحبيب معتصم !!!

شكرا على مرورك الزاهي وأتمنى أن تسفيد من تعليقات الآخرين علينا ,, يا عمي دة حنا بقينا مضحكة !!
وخليك كمان من ضرب الأمثال بينا في الكسل وعدم المسئولية واللامبالاة ,, تسلم وربنا يحفظك,,,

بعد ان تناولتي الشكل الخارجي والمظهر يلا خشي جوه الدواخل وفرتقي لينا الشخصية السودانية (سلبيات وايجابيات) وانا من المتعهدين بحماية البوست من ال.......! اذا حاولوا باساليبهم المعروفة .اتضامن واوقع مع الشفافية والمكاشفة والبوست بتاعك دا علي سبيل المثال .وفي انتظار القادم الذي يضغط علي الجرح ,تحياتي

عواطف الاسوأ من هذا كلو كمان في واحدين في بلاد الغربة تجديهم جهلة عادة يلتقون مع بعض العلماء في بعض المناسبات بدل يخلونا نسمع افكار العلماء ونستفيد يقوم الواحد يخت كراع في كراع ويمسك المجلس ويقول كلام فارغ .

بالمناسبة الظواهر دى في السودان نادرة

إبن شيقوق !!!

تحياتي ,,,

واحدة سودانية قامت تتشوبر في يوم بتاع وعظ وإرشاد قالت لرجل الدين هل النقاب فرض على كل السيدات
راح باصص ليها بصة ذات مغزى وقال ليها لا طبعا بس على الجميلات جدا خوفا من الفتنة !! مافضل إلا يقول ليها إنت يا المبشتنة يالمعولقة أمشي عريانة مافي حد حيسألك ,,,

حمااااااااااادة !!!

السكر الزيادة !!!

معزتي ,,,

استعدو للبوست الجاي عايزة أبستف بعض النسوان شوية ,,, على وعلى أعدائي ,,,

أختي عواطف..

صباحك بألف خير..

في موضوع لمستيهو.. مجرد لمس..

عايز بلغة الإجتماعات elaboration ألا وهو موضوع الكوتشينة

ده عالم ثاني.. وبصراحة لما لأثر الكوتشينة على الحياة الأسرية

ارجو أن تمتد بك مساحات الروائع وتتحفينا برأيك فيها...

وهي موضوع شائك.. وياما أثرت على بيوت...

مستننك ..

كيمو !!!

مودتي ,,,

كلامك صاح مية في المية في نسوان أتطلقو من رجالن بسبب الكوتشينة ,,,غالي والطلي رخيص ,, لكن في موضوع ساخن حأخليه في الأول بعدين الكوتشينة ,, شكرا ,,

إزيك يا عواطف

ده كله هين وممكن يتبلع

الحمد لله إنك ما شفتى جماعتنا هنا

تلقى الواحد حايم فى الشارع ولا بس شنو

عراقى وسخان، أى والله وسخان

وشبشب ما تقدرى تفرزى رجليهو من الواطا من الشبشب

لحدى الجمعة الأول أمس دى أنا شفت كم "نموذج"

والله يا عواطف لو الزول قاعد جوه البيت وبخمج فى طين ما يقدر يلبسه

خليها ساى بس

أنا جاتنى قرحة والله

بتكلم جد

العزيز أبوذر!!!

معزتي ,,,

ما عارفة حكايات العراريق دي شنو ياربي بكونو مصيفين ولا شنو ؟؟ لكن المشكلة صيف شتا لابسينهم
والواحد تلقاه لابس سفنجة وشاعر بنشوة شديدة يا ربي دة من شنو !!! شكرا ,, ربنا يسعدك .

طيب يا عواطف

طالما نحن في موضوع اللبس والهندام..

يعني مسألة ألوان الجلابية الرجالية.. في إعتقادي فاتت حدها..

وبقت في ألوان جلاليب أغمق من خلفية البورد ده.. يعني مستردا.. أغمق من صفار البيض

وألوان وألوان.. وطواقي من بنجلاديش وجبال الهملايا.. وشالات مطرزة أكثر من تطريز ثياب (عبدالصمد)

ويعني أنا لست ضد التجديد.. ولكن ضد التقاليع.. وشتان من بين الأمرين..

يعني الجلابية البيضاء أو السمنية أو الملونة تلوين خفيف.. لكن بالألوان الشايفها دي..

يعني الواحد يتلخبط.. بين الطوارق والسودانيين.. وبعدين زمان العمة كان فيها زيك بسيط من فل..

تعمله الزوجة كعربون محبة ملازم للزوج... ولكن الآن.. كاد أن ترصع العمة بالترتر.. والسكسك..

لغاية ما اصبح ما في فرق بين العمة وبين برقع الراقصات في العهد العباسي...

أنا في رأي ده برضو وجه من المشكلة غير وجه البهدلة والبشتنة.. وهو المبالغة في ألوان الجلابية

وتزيين العمة..

ولا أنا ببالغ؟؟؟؟

كيمو!!!

ديل مستأنسين بأغنية أبوعركي البخيت حمرة وصفة ,,, رزقة وخضرة ,,, وزحمة ألوان !! والله نحنا مافي
لينا شبيه ولا مثيل ,, أما زركشة العمم والطواقي دي فمتابعين آخر صيحات الموضة لأنهم بصمموا عن
فيرساتشي وإيف سانت لوران !!!

مواصلة لادمان الرجال السودانيين للبشتنة و البهدلة

طبعا يا عواطف في حاجة تانية انت ما حا تعرفي ليها.....

شقق و أماكن سكن "العزابة"

دي عاوزة ليها واحد لديه الشجاعة و الأمانة من اياهم يكون شفاه الله عشان يوصف ليك ما يمكن وصفه ب

A Claimed Disaster Area

و ما بتتصوري دفاعهم و منطقهم في "البقاء و المحافظة" على البشتنة و البهدلة و عدم النظام و فوق

دا كلو (وساخة) ....


بس نحنا فالحين في التبجح الفاضي الما استفدنا منه أي شئ ...بلد المليون ميل مربع ..أكبر دولة في

أفريقيا...أول دولة استقلت في أفريقيا..نحنا قتلنا اللورد فلان و اللورد علان ...نحنا الساس و نحنا

الراس...نحناالوحيدين العملنا انتفاضتين في في أقل من ربع قرن...نحناالوحيدين العندنا أكتر من 200

عرق و جنس و مليون لغة و لهجة.......


و بعدين عملنا شنو؟؟؟؟؟؟؟

نحنا الوحيدين الماخدين مقلب في نفسنا....شعب وهم

Quote: طيب يا عواطف والنسوان البلبسوا أخضر وأحمر وشنطة كحلية وشبشب لون زينب ديل ما شايفاهن؟؟؟؟؟

بتفتش في البلاوي مالك انت - هسع العواطف دى جابت سيرة نسوان .

وهسع هي ذاتها اكان لبست توب زراق بغيّرها ؟؟؟؟؟

Quote: يا جماعة الناس طارت وراحت

ونحن حنظل مبشتنين ومبهدلين إلا ان تقوم الساعه ... كلامك دا ذكرني واحد سوداني قابلته في أجمل الاسواق بالخبر وهي يعمل سائق خاص وكان زعلان شديد ويتنفس بي ضلعوا صاحبك ما صدق أنا ومعي صديق جينا مارين بي عليهو طوالي قام سلم علينا وقال لينا عليكم الله شفتوا السوداني الجوه دا قلنا ليهو لا والله ما شفناهو قال تخيلوا انو لابس جلابية بدون فنيله داخلية ولا طاقية ولابس معاها سفنجه وكمان جاري مرتوا معاهو عليكم الله شوفوا الفضائح دي ...

أنا كمثلي من السودانيين علاقتي مع الالوان علاقه سطحية جدا لذلك لا أخجل من أن أختار قميص او بنطلون على أن أستشير البائع وان كان لبنانيا ولي صديق لبناني عادة اشتري منو أن يجد القطعه المناسبة مع هذا اللون ... كان ما بعمل كدا كان جريت ليك الشخيت

معجب جدا بي كتاباتك ...

الأخ بابكر !!!ّ

معزتي ,,,

مسرورة بمرورك الأنيق وزي ما قلت الأمثال كثيرة ومسيخة والبشتنة ما ليها لغاية فاروق حامد أبوناصر سماهم البشتون أما حكاية جر الشفع مع البشتنة دي لزوم الموسيقى التصويرية شكرا عزيزي ابقى معنا .

يقول الفنان محمد وردي توب الزراق فيها تقول حرير ,,, لكن توب الزراق ما بكون نظيف ومرتب ولا شنو
يا إبن شيقوق ؟؟؟

كمال عبدو !!!

مالك جايب لي سيرة العزابة ورافع ضغطي ؟؟؟ والله مداخلتك دي جابت لي العصبي ,, عليك الله اسحب
المداخلة دي وأكتب لي قصيدة من نزار قباني عشان أرجع لطبيعتي ,, شو هالجكي يا كمال تئبر ألبي !

صباح الخير عواطف..


كله كوم..

والسّفه فى المحلات العامة كوم..

الحبيبة نور !!!

نورت البوست ,,,

السفة دي لامن يكون الواحد ما متعلم يمكن تعذريه ,, لكن حملة الشهادات العليا ديل تعملي ليهم شنو؟
وبعدين عمرك يا بعد عمري شفتي أي جنسية تانية غيرنا بتسف رغم المخاطر التي يسببها ما يسمى بالصعوط ؟؟ نور الحكاية بتوجع القلب من جوة لكن منو الجايب خبر ؟؟؟

الاخت عواطف

تحية طيبة وبعد

سأجمع نفسى فى الخطاب مع بنى جلدتى حتى لا اصاب بلعنة اللامنتمى


الشكل الخارجى فى الهدوم قد يكون نسبى تتفاوت فيه درجة رغبتنا فى الجمال وفى الظهور بمايرضينا امام الآخر ويرضى زوقنا

المشكلة تكمن فى تلك الأشياء الدقيقة التى لانشعر بها ولكن يشعر بها الآخر مثل الآتى :

الرائحةو خصوصا" فى الصيف

الحظ دائما تفكك مفعول العطر الرخيص من شدة الحر ، لست أغالى او أتعالى ولكن معظمنا لايعبئون كثيرا" لاختيار عطر فاخر ولايهتمون لذلك ولايلفت انتباهنا سوى العطر الرخيص وليس هناك فى قاموسنا مزيلا" للعرق الا من رحم ربى

الكرفتة الغير اجبارية

الكرفتة لاتوجد فى قاموسنا اليومى تخنقنا وترهقنا خصوصا" اصحاب الرقاب السمينة ولانلبسها لا فى اجتماعات هامة او ان تكون اجبارية ولاندقق بشراءها من ماركات عالمية بس كرفتة والسلام عشان كدى فى كرفتات تحتار فيها لمن تشوف سودانى لابسة تقول ده قاطعة من طرف ملايا ، بعدين المؤلم جدا" لبس الكرفت مع القميس الغبر سادة او مع الشبط او الشبشب او اللبس الكاجوال


الشراب (بضم الشين وفتح الراء ) :

لانحرص على انتقاء لونه ولا على سؤال انفسنا عن آخر مرة لبسناه وأحيانا نستخرجه من الحذاء ونلبسه مرة اخرى دون ادنا اعتبار ولايهم لونه ورائحته واحيانا لانلبسه اطلاقا


الملابس الداخلية :

لانحرص على ماركتها ونسبة القطن فيها كما لانحرص على حساب الساعات منذ استخدامها


رائحة الفم (الصعوط) (السجائر )

معظمنا يسف ويدخن ويجى يجادل فى اجتماع مغلق او يقرب من مديره او موظفه لشرح نقطة على الورق
وكثير من الأجناس يستغربون هذه الرائحة الخليط مابين العرق والتبناك والسجائر


الاستحمام :

وده طبعا سنة اولى درس لانو زمان قالو لينا فى المدرسة ونحنا بنلولح شنطة الدمورية (النظافة من الأيمان )




بابكر زيكو

المشكلة انو انا بكتب عاينتا لى نفسى لقيت روحى لابس بنطلون جينز وقميص كاجوال بس حنا فى القصيم بدو .

أخي الحبيب زيكو !!!

مودتي ,,,

جميل أن تجمع نفسك مع بني جلدتك ولكن غيرك يا الحبيب ما بشوف عوجة رقبته و بفتكر نفسه صاحب الذزق
والفهم والأتكيت ,, والله أنا لما أشوف سودانيين في مرفق عام أشعر بالخجل من البشتنة والبهدلة والصوت العالي في الونسة ولا التلفون وتعال شوفهم في الحدايق يوم الخميس ولا الجمعة نسوان ورجال وعيال حاجة تكسف ,, شفع يطيرو من مكان لمكان يقلقو راحة الآخرين ,, نسوان يتكلمن بصوت عال جدا بعيد عن الأنوثة والرقة وونسة فارغة ما ليها ريحة ولا طعم ( العدة , الدهب , الملايات ) أما الرجال يلعبوا في الكوتشينة وهاك يا حلايف على الحرام وعلي الطلاق والله الكلمتين ديل ما سمعتهن إللا عند السودانيين وآآآآآآآآآخ يابلد ,, شكرا على المرور .

سلامات عطوف حبيبى
وانشالله ذنقه الشغل خفت
عارفه طريقه لبس الانسان بتحدد ليكى شخصيته وباقى تصرفاته وبتصدقى حتى اختيار الالوان برضو بيكون عنده علاقه بسلوكه
الموضوع فيه جوانب كتيره الناس فعلا محتاجه تتكلم فيها
انابجى تانى

مجودة الحنينة !!!

صدقتي يا بت أمي بس تعالي راجعة سريع الحالة صعبة والعيشة مرة !!!

عواطف يا جميلة

سلامة اعصابك من البوظان

هاك دي مني

انت عارفة

جوة في جواي ساكنة

وفي دماي

وجوف قليبي وما ك ساكنة

تزلزليني

تارجحيني

تخلي ليلي

ظلمة داكنة

--

مشتاق وحاتك

ابقي طلي

بهرجي الساحات

وخلي

لون ربيع الكون

يحلى

للنداوات

والحكايات التملي

بين غناوينا وهيامنا

بس تهلي

يا بدر خجل بدور

ياقمر كم تم دور.
-

واحشاني

العيون

الفيها كون

الأخ العزيز د. محمد !!!

مودتي ,,,

غايتو قصيدتك الحلوة دي شوية خلت المنبر يبقى ستايل لو ما كدي كان قلت ليكم مستشفى التيجاني
الماحي موجود ولا باعوه ؟؟ شكرا على الكلمات الرقيقة ,,,

عواطف ..انت دايماً عسل وبوستاتك عسل وكلامك عسل


والله ضحكت من جوه قلبي....الظاهر فاض بك وانت بتشوفي الحاجات دي.....كل ما أقرا شي اتذكر انوا مر علي...صدقت يا عواطف


احنا شعب مخه نضيف لكن للأسف ما بيعرف يوجهه صاح.........والمظهر ده مهم مهم مهم جداً...بس كمان في مشكلة الجلابية السودانية دي

واسعة شديد وبتسمن الزول.......عادات وتراث.....اها دي يحلوها كيف ....

اما الراجل البيكورك في المضيفة دي خليها ساكت.......مرات بعمل روحي ما سامعها.......وللأسف خطوط الطيران أخذت فكرة سيئة عن

السودانين ده غير الشّف البيجاروا في الطيارة ويدفقوا الأكل



ومودتي

Quote: يقول الفنان محمد وردي توب الزراق فيها تقول حرير ,,, لكن توب الزراق ما بكون نظيف ومرتب ولا شنو يا إبن شيقوق ؟؟؟

آآآآآآآآآه من وردي يا العواطف مالك عايز تحركي المحبوس في الخلايا وكان وكان وكان يا اختي

كان طيفا وخيالا ورؤى
ثم ودعنا الأماني وأفقنا

بالذي اودع في عينيك
إالهاما وسحرا
والذي انزل فيك الحسنى
اشراقا وطهرا
لا تدعني للأسى
يدفعنى مدا وجزرا
أثقلت كفي الضراعات
وما تقبل عذرا

يا حبيبا بت أشكو حرقة الوجد اليه
وتوسلت ..
نذرت العمر قربانا لديه
ماله لو عاد
فالقلب رهين بيديه
وعيوني ظامئات للهوى من مقلتيه

يالقلبي ..
عاد من بعد النوى يطوي شراعا
آه بالهوى
يبعث في الروح حنينا واندفاعا
مرحبا يا شوق اغمرني شجونا والتياعا
فوداعا للذي شيدته بين ضلوعي فتداعى


مودتي

أبن شيقوق يا تمر السوق !!!

والله يا سعادة المستشار أتاريك فنان جدا يا بخت الببترافع عنهم ذكرتني مولانا الشاعر المستشار الكبير الطيب العباسي لقد كان رقيقا كالنسيم خارج ساحات القضاء صلبا كالصخر في المحكمة
سلمت ياأبن البادية ,,,

حبيبة القسا!!!

مرورك الرقيق يسعد القلب ,,, تسلمي ياسلمى من كل بلا ,,,

ويا بعد عمري هي الحاجات البتكسف شوية ؟؟ اتخيلي واحد يمشي يشتري من محل مكتوب عليه أسعار محدودة
أو فيسكدبرايسس وتعال شوفي المجادلة والكواريك قدر ما يحاول البائع المسكين يفهمو ما عايز يفهم
وكان شفتي النسوان في بيت البكا آخر ضحك وقرقرة دون أي احترام لمشاعر أهل الميت والونسة والأكل
ما يحلو إلا هناك أها ديل يفهموهن كيف ؟؟؟

حكاية النسوان الفي بيت البكا.....ديل برضه نقول ليهم.....

سامحووووووني ما كانش أصدي !!!!

ديل فيلم براهم....الذهب يكشكش...والتياب الآخر موضة.....والحنن....وهئ هئ هئ هئ ضحكات عالية....

(( طيب يا جماعة اتذكروا الرحوم ))



الله يرحمه....عرف البيه والعليه.....كعب البيضحكن ديل

سلوم !!!

هو الضحك هي هي هي بس ولا غزة الصباع في راس ناس البكا والمسيقى بتاعة البكا المن غير دموع
ههههههههههههههههههي الليلة ياتوب غتايا ههههههههههههههههههي الليلة يا ضلي وضراياوههههههههههههي
الماكلمتني ؟؟؟ هههههههههههههي الما ودعتني ؟؟؟ اتقول مسافر وراجع ههههههههههي الماوصيتني إلخ
سلوم أبقي معنا ,,

صباح الخيرات.. أختي عواطف...


لا .. لآ..لآ... مسألة بيوت البكاء دي شيء ثاني..

طبعا أنا ما بشوف الحاصل.. لكن (الما مات ما شقّ الترب) زي ما بيقولوا..

حدثتني أم العيال حديث الأسى عما يحدث في بيوت البكاء.. بعد ما المرحوم يتلحس بدقائق معدودة..

أنا فعلا ما مصدق.. يعني نحن From an extreme end to another extreme end

زمان نعيب على حبوباتنا دق القرع وعلى أجدادنا دق النحاس والتحزم (بكسر التاء والحاء والزين وسكون الميم).. وهسع يأخذنا العجب عن قصص شر(بعنى عرض) العدة وفنون الأبجورات في بيوت البكاء.. ده غير الحنة وتوابعها...والثياب وطريقة لبسها.. والفاتحة واليد معنكشة بكل ما هو مفرح.. وجميل

إن شاء الله يكون ده الموضوع القادم يا عواطف.. لأنه مأساة.. حتى الواحد فكر يكتب وصية ويقول: لا للعزاء.. الله يدينا ويديكم طولة العمر.. يا عواطف,,

مستننك!!

Quote: والله يا سعادة المستشار أتاريك فنان جدا يا بخت الببترافع عنهم ذكرتني مولانا الشاعر المستشار الكبير الطيب العباسي لقد كان رقيقا كالنسيم خارج ساحات القضاء صلبا كالصخر في المحكمة

يا سلالالام يا عواطف فلله در هذا القانوني الاديب . تمنيت لو كنت استحضر تلكم القضية التي كتب في حيثياتها قصيدة عن متقاضية بعثرت ، بحسنها الساحر ، اوراق قضيته وصار يشدو بحسنها في حيثيات القضية .

واحسب انه القاضى الذى كتب حيثيات قضية ( نجمة الشهيرة) في الابيض والتي تمثل انموذجا رائعا لقضائنا المتميز وقضاتنا الجهابذة .
واعتقد بعدها آثر قاضينا الاديب أن تناى خطاه عن بلد في حماه الحب مضطهد واختار الاقامة لديكم في ابو ظبي .

لك معزتي

القصيدة معاي بس اديني فرصة أخلص من المؤتمرات الكتيرة ومسيخة دي وأشوفها ليك وين ؟؟ مودتي ,,

كيمو !!!

مواضيع بيت البكا فعلا بتبكي ,, مافيش احترام لمشاعر المحزونين المكلومين ,,, الدهب وتياب الشيفون
والحنة المرسومة كيف والدخان والعطور وكأنه المرحوم عرس ومامات,,, ربنا يعينا الجهل مصيبة ,,

صدقت استاذة عواطف
المشكلة بتكون مضخمة عندما نكون في الغربة
وشرط العين بكون على مستوى

انا مثلا كانت عندي مشكلة انو في استاذ سوداني في مدرستي
وهو استاذ متمكن من مادة الرياضيات
بس .. طريقة اختيارو لي لبسو غريبة
بتصدقو انو يوم جا المدرسة لابس بنطلون وقميص وفوف القميص بدلة
والمفاجأة الكبرى

عمة

والله ياجماعة ده الحصل

وبالجد الشكل الخارجي بضيع الشخص وممكن يديك انطباع خاطئ

شكرا لاختيار الموضوع استاذه عواطف

Quote: القصيدة معاي بس اديني فرصة أخلص من المؤتمرات الكتيرة ومسيخة دي وأشوفها ليك وين ؟؟ مودتي

شكرا - انا اتصلت بالاستاذ عادل سمير بالبحرين واكد لى حيازته لقرصين مدمجين فيهما جميع السوابق القضائية السودانية بما فيها قضية نجمة ووعد بارسالهما لي - انا في انتظاره .

معزتي

أمولة !!!

كيفك ,,, مرورك الحلو يشرح القلب رغم إن الموضوع محزن جدا وبعدين حكاية المدرسين ديل حكاية تانية
طبعة اللهجة استغراق في السودانية لمن يحيرو الطلبة عشان كدة بقو ما بتعاقدوا مع مدرسين من السودان بجو و بجيبو معاهم كل السلبيات وبجو مرة واحد قال لي طالب نزل كراعك من الكرسي قال ليه شو يعني كراعك يا أستاذ ؟؟؟

عواطف

سلامات

بمناسبة بيت البكاء والحنة وباقي البوبار

قريب ده عرف انو في حنة للبكاء تختلف عن حنة الاعراس وخلافه !!!!! صحي ولا دي مكنة ساكت؟


اكيد محبتي

ألفين سلام يا عواطف ..

جريت الشخيت لكن ما قدرتا أقيف بعيد .. ضحكتا كمية من الضحك كمن لم يضحك من قبل "للحقيقة لم أضحك منذ مدّة" .. و حزنت قليلا لأنه لم أرى فى المناظر المعروضة ما يحزن .. مناظر حياتية عادية صوّرتها لنا التربية الخاطئة كذلك .. أننا قوم نتواضع فى انتظار أن يرفعنا الله .. لا نحبّ التكلّف و الجنصصة أو نفّكها فى نفسنا فى الفاضى .. ببساطة نحن قوم نعرف قدر نفسنا و لا داعى أن يعرفنا الآخرون .. و الجوّاب عندنا لا يجب أن يعرف من عنوانه

لو رواودنى حلم لحلمت أن أكون رئيسا للجمهورية .. لا لأقيم ديمقرواطية أو أقيم قيامة .. بل لأصدر فرمانا بالغاء سيئى الذكر .. الجلابية و التوب .. معليش شايفك قاشرة بتوب .. أىّ قومية هذه التى تبنى على الزّى!! .. ديل أكتر حاجة ما عملية .. شنو يعنى كلّ مرّة أرفع كمّ الجلابية حفاظا عليها من الأكل اللّوايييييييق!! .. أو كل ما أطبع حرف فى الكيبورد أجدع التوب!! .. هذى اللواييق سألغيها أيضا و لكن فى الفرمان الثانى .. لأعتقادى أنها من الأسباب التى تجعل منّا شعبا لايوق

يا عواطف .. نحن قوم متميّزون و ما أنزل مثلنا من "أقوام" .. أقوام تعنى جمع قوم أتيت بها من عندى لأثبت أننى الآخر متميّز أيضا .. أوّل ما علمونا من مبادئ هى "خالف تذكر" .. فكيف لك أن تأمرينا أن نقشر كما يقشر خلق الله فيضيع تميّزنا كشمار فى مرقة؟ ..

نبعث أحدنا لينال تعليما عاليا فى أدقّ التخصصات الهندسية .. الى عالما قتلته التكنلوجيا .. يرى شوارعا أوسع من الخيال .. و جسور طائرة و راكّة ..يعود ليشيّد فى بلدنا طريق لو سار فيه ثعبان لسار بزقزقان .. نقطع من قوت أطفالنا لقناة فضائية .. لتجيئنا بأزياء ما أنزل الله بها من سلطان .. يتففن المذيعون بجمع كلّ ألوان الطيف فى زىّ واحد .. و تجيئنا فرقا موسيقية كأنها تؤدى عروضا لمسرحية من القرن الكم عشر .. امّا التصوير فلا تتحدث بل أحرج .. يتعدّسون .. الكلمة مصدرها عدسات .. بتصوير مخدّات و بطاطين .. هى الأخرى كألوان الطيف .. تناثرت بغير تناسق .. و هذا إمعان فى الشفتنة التصويرية .. و حين يفلت شافع من بين هرشات أبويه .. أوّل مرّة أعرف أن للشافع أبوين .. شايفة كيف نحنا مجتمع أبوى خالص .. و يروح يتراقض أمام الفنّان فى براءة تترصدها كل الكاميرات لو كان وراها مصوّر عالم أوّلى .. ترى كاميرا مصوّرنا الحريف تنحرف ببلاهة عن تصوير هذا المنظر النادر لتنقل صورة واحدة تقطر لحما و شحما و بلاهة بدليل الألوان التى جلبطت بها وجهها .. و يتطاقش رمشيها كماكوك غزل فى مصنع الصداقة للمنسوجان القطنية .. بالمنابة هذا المصنع يبعد عن منزلنا بأربعمائة متر أو أقل .. و عاملة فيها ما شايفة الكاميرا

سأجرّ شخيطى يا عواطف بطول خط الأستواء .. لأنك تجنيتى علينا .. أو تجننتى فينا .. كلها حروف جرّ .. لماذا تجرّينا لهذا الواقع المؤلم!!

أقول لك كما قال الأخ مجدى

Quote: التحية لكي ياسفيرة الكلمه الحلوه ،،، عطوفه

بل أنت سفيرة الكلمة الحلومرّة .. و أنحنا ناس جسما مرّ حتّى لم يتحمل لبس "الجلابية بيضاء مكوية"

أخي العزيز الحلاوي ,,,,

صادق محبتي ,,,

قرأت مداخلتك كمن يقرأ قصيدة صادقة الكلمة والشعور ,, كل حرف في مداخلتك يشير إلى مقدرتك على امتلاك ناصية الكتابة وفن التصوير والرسم بالكلمات ,, لذلك جريت الشخيت ولم تقف بعيدا عموما نحن نريدا دوما قريبا بشخيت وبدون شخيت ,, ولكن أتمنى أن لايراودك حلم أن تكون رئيسا للجمهورية لأن كل رؤسائاالسابقين واللاحقين راودهم نفس الحلم ولكن بعد أن تحول الحلم إلى حقيقة كل ما وعدونا به أصبح أضغاث أحلام فرأينا الوجه الآخر للحلم ,, وبخصوص الجلابية فنحن شعب نحب الفضاءات الواسعة التي لا تلزمنا التقيد بأي سلوك لذلك اخترنا الجلابية كزي وطني أما حكاية ثوبي فهو لزوم التصوير ومحاولة يائسة للشعور بالإنتماء لأنني لا ألبسه في الأيام العادية لأنه يعوق الحركة ويسلط علي الأضواء ومع ذلك برضه أصر على قشرتك مثل بقية خلق الله حتى ولو تكون شمار في فول وليس مرقة أما فيما يتعلق بمصورينا ومذيعينا فوالله لا أجد لهم وصفا ولا شبيها المذيع يلبس ما يعجبه ويأكل ما يعجب الناس ويحاور شخصا لا يعرف عنه شيئا فيصبح كالفنان المؤدي والمصور يلاحق اللقطات السخيفة ليثبت أن قناص أوباباراتزي ,,, شكرا علاوي على مرورك السهل الممتنع يا سفير المداخلات الجميلة ,,,

أخي الحبيب محارب !!!

مودتي ,,,

فعلا الكلام صحيح مية في المية وليس مكنة وكمان في تياب يشفون للبكا وأخرى للعرس ,,, معزتي ,,

الاخت الحبيبة عواطف....

لي يومين عايزة ارد عليك في البوست الخرافي دا..لكن جيتك الليلة بالرواقة..

انا عندي مشكلة واحدة لو حليتيها لي بديك جائزة الانجاز من الدرجة الاولي..

شفتي المغتربين بتاعين السعودية ديل من الشتاء يدخل بيتعولقوا بالجلاليب ويلبسوا

فوقها الجاكتات والبدل واي حاجة مبشتنة يلقوها في وشهم..والواحد كان سألته يتعلل

بالبرد...

...وانا لما اشوف لي زول لابس جلابية وبفوقها جاكت بتجيني زغللة في عيوني

وزجر في معدتي..

ياخي البدلة الكاملة في البطحاء بميتين ريال (زي حقت تمبس الكان لابسها في عرس ود الشيخ )

يعني ما حاجة غالية ولا بعيدة المنال ...لكن نحنا شعب فقري وبيحب البشتنة...

عندك فرصة طريقة تحلي لي المشكلة دي قبل الشتاء الجايي ولا اشوف دينا المنفصمة تحلها

لي؟؟؟؟

مع كل حبي واحترامي واستمخاخي لكتاباتك..

رشوية الحبيبة !!!

فاقدنك ,,, بركة الجيتي ,, عاد يا بت أمي الجلابية والجاكيت ديل زي البنطلون مع العمة مالهمش حل
أبدا والبلبسهم من النوع الصعب إقناعه لأنه عندو قناعاتو الخاصة والديما بتكون بالمقلوب عشان
كدة أنا بنسحب من المسايقة بتاعتك دي وبحول السؤال لغيري يمكن يقدر يحل الفزورة دي وحتى الشتاء
القادم ضعي أعصابك في تلاجة عسى ربنا يفرجها أما حكاية زغللة العيون دي ما مشكلة حنعمل كشف ونجيب
ليك نظارة دائمة عشان ما شايفة حل للحالة الكرونك دي ,,, تسلمي يا الحبيبة .

العزيزة عواطف
تحياتى

والله كلامك فى الصميم وياريت يجيب تمنو . زمان الخرطوم كانت أجمل بلاد الدنيا والقشرة كانت بالقميص النايلون والشبط الوسيم والقميص حاشنو والخمسة جنيه فى الجيب الفوق فشخرة . والحفلات فى أبولو والأولمبى والمواصلات أبو رجيلة ترقش والطراحات بيجو وفلفو . لحدى ما فتح الخليج وجونا ناسك ديل راجعين بالبكاسى وساطوا الخرطوم .

حكمتم فى الغربة (بلدآ ما بلدك أمشى فيها عريان) والمصيبة لما رجعوا قلعوا ملط وقلعونا معاهم .

ما تعتقدى الجلافة جاتنا معاهم من العرب ؟

خاصة اللهجة صارت (هادى) و (طال عمرك ) و (تفحيط) و (كشخة)

على وزن (ما كانش أصدي ) بالمصرى برضو (سعد زغلول آل مفيش فايدة ).

بالمناسبة البوست الراجل كتفي بالعيال وأضبحي ليه الكديسة يوم الدخلة !!! إتكتب ولا ح . إذا إتكتب إتلومتى وبكرى إتلوم ما ختاه فوق .

ختى لينا لنك كان موجود و المرة جاية أبقى أدينا مس كول

معزتى

ود ميلاد ,, سليل الأمجاد !!!

معزتي ,,,

وينك يا ريال دي على وزن هادي وطال عمرك وتفحيط وكشخة وصيح الويل وبعدين سامحوني ما كانش أصدي

دي إسم فيلم مصري استعرته للإعتذار لأني ما لقيت حاجة رقيقة يمكن أن تكون مقبولة غير هذه العبارة

والله ياريري طبعا دة إسم الدلع بتاعك الليلة ذكرتني الخرطوم أيام زمان زمن الكشخة والنضافة

والتكاسي الملمعة دة احنا فين والزمن دة فين ؟؟ موضوع الراجل كتفي بالعيال دة لسة جاي في الطريق

لمن نخلص مواضيع البشتنة دي يا ودأمي إنت عايز مس كول ولا نص كول ؟؟ في واحد هنا في الإمارات بقول

ليك ما عندك أي مشكلة بس أعمل لي نص كول !! تسلم يا الحبيب وربن يسعدك ,,

سلام ياعواطف وشكرا على الموضوع الساخن والمؤلم دا
لو شفتي عندنا هنا في السعودية وفي المدينة حيث الحج والعمرة تبكي بس
مؤلمين السودانيين سفنجات وعراريق ووسخ وكرفسة ونسوات تياب بولستر والوان ومناظر صعبة تخجلي عديل ماعارفه فكرة انو لازم اثناء اداء المناسك دي لازم نتبهدل ونلبس سفنجه
جات للسودانيين من وين
بعدين لمن تعايني للأجناس التانيه تخجلي الاسويين وحتى غيرنا من الافارقه زي المغاربه او حتى المصريين في شوية مظهر جيد او معقول ولو شفتي الرقاد في ساعات الحرم كانك في حوش بيتك والونسه بالصوت العالي .
ودا ماأظن ليه علاقه بالفقر او المناطق الريفيه الممكن بعضهم جايين منها لكن نفس الناس ديل بعرفو في السودان لمن يكونو مارقيت يلبسو بشكل جيد منو داخل السودان بسافر من مدينه لمدينه بسفنجه ؟ ليه ننعمل كدا بره!!!!!!
كل الكلام القلتيه في الصميم وعندنا هنا مضاعف واخ من المطارات والمناظر الفيها والاكياس الشايلينها والاطفال الجارنهم كل واحد جاري شنطه وكيسين .
عندي صديقة جات السعودية جديده عملو ليها حفلة تاني يوم سألتها كيف الحفلة قالت ليها عرفت الدهب عيار كم وقنعت من الاطفال

أريج الحاج

معليش انا بكتب بي باسورد زوجي في الحقيقة طولت ونسيت باسوردي

Quote: معليش انا بكتب بي باسورد زوجي في الحقيقة طولت ونسيت باسوردي

عواطف عبارة الاستاذة اريج دى بتحمل انبل المعاني وحياتك ما تتخطيهو علقي لينا عليهو .

معزتي

إبن شيقوق !!!

ألم أقل إنت كلك ذوق ؟؟؟

في الحقيقة أريج يبدو عليها إنسانة رقيقة وأسم على مسمى وقد ضربت مثالا نادرا في الصدق والنبل
كما عكست نوعية العلاقة التي تربطها بزوجها حيث أكدت بذلك على أنها علاقة صحية مؤسسة ومبنية على التفاهم والحب واللغة المشتركة,, ربنا يحفظهم ويسعدهم ,, ويحفظك مع السمحة أم ولدك ,,,

أرييييييج !!!

شكرا على مرورك البهيج ,, والله البشتنة دي يا بت أمي بقت بالنسبة لينا زي المضاف والمضاف إليه
خصوصا برة السودان عشان كلهم مقتنعين بالمثل البقول البعرفونا ما يحضرونا أما حكاية النسوان
وونسة الحفلات البايخة والشفع الماعندهم أدب دليل خليها ساكت المشكلة إنو كلو واحدة معجبة بي وليداتها وبتفتكر إنو الخمج حقهم دة بعجب الناس التانين مرة قالو عوض دكام جاء أبو ظبي فسألوه
أها لقيت الناس هناك كيف ؟؟ قال ليهم النسوان سمان والرجال كضابين والشفع قليلين أدب!! معزتي .

عطوفي :-

اسمعي هوي يابت الناس انا لا بجر خط ولا بقيف بخش طوالي علي بيتكم العامر ده

صدقيني ماعارف ابدء من رقم كم في البهدله بس الشي البغيظني وبفقع مرارتي لمن اشوف لي واحد

كرشه كبيره ولابس جلابيه من غير فنله داخليه ومن غير طاقيه ومعاهم سفنجة وحايم بيها عديل كده

في الشارع وخلق الله كلهم شايفنه , طوالي بجر شعيراتي لي قدام (اكلمك باعطوفي بس ماتكلمي زول انو

انا شعري سبيبي ) وبعمل فيها بنغالي وبقول ليه صديق ليش كل سوداني بطن كبير كده ولحم بره عشان

صاحبنا يخجل من منظره كده , وهو حدث ولا حرج .

وكمان ياعطوفي لو شفتي نسوانا في السوق من بعيد تعرفي الواحده منهم انها سودانية , شايله كمية

بتاعه عفش وراها( يعني ..... كبير ) ولازه كرشتها لي قدام وريحتها تقول ياغربتي من حفرة الدخان

للسوق طوالي وصاحبنا ماشي معها , جلابيه مكرفسه بدون فنله داخليه وبدون طاقيه وشايل شاف في يده

وجاري التاني وعيونه محمره لانو بكون جاء من الشغل للبيت وصحبتنا طوالي قالت ليه ارح للسوق لانها

نايمه طول النهار لا شغل ولا مشغله....... بتعذب من كثرة المناظر دي وربنا يكون في عونا

فتك بعافيه عطوفي لكن بحاول اجيك راجع عشان تفقعو مرارتي .

بيبي !!!

سلامات ,,,

والله أنا زاتي مرارتي اتفقعت بكلامك دة ,,, عشان المنظر دة مكرر كتير جدا وفي كل دول الخليج والله مرة
ركبو معانا مسافرين من الدوحة لو شفتهم تقول جروهم من السوق العربي ولا ميدان أبوجنزير ودخلوهم الطيارة حاجة تكسف أما حكاية الراجل الماشي ورا المرة وشيايل الشاف دي فيها الكثير من الإيحاءات
مع إنها بتقلل من احترام الطرفين وبعدين كلامك صاح في نسوان كتار بكونو نايمين طول النهار ولما
يجي الراجل المسكين طوالي بعد الغدا تعمل ليها برنامج سوق وما ليها دعوة بي تعبه لكن بيني وبينك هم يستاهلو عشان بقو زي الحملان لا يشخطو لا ينترو أما حكاية بشتنة النسوان دي خليها ساكت غايتو أنا
مرات بتمنى يكون شعري سبيبي زيك ولابسة ساري بدل التوب لكن ما باليد حيلة شعري قرقدي وشكلي سودانية مية في المية لا نخرة عديلة زي السيف ولا عيون زرق أها أغالطم كيف ؟ ولا أعمل نفسي مجنونة؟؟
شكرا هلى مداخلتك الظريفة ومن زي ديلة وا أسفاي !!!