Post: #1
Title: برق الصعيد
Author: سمية الحسن طلحة
Date: 11-29-2006, 02:25 AM
Parent: #0
برق الصعيد
لاح لى من صعيد برقاً كتم تعّّالو
ذكرتى بسمة الزول الجميلة خصالو
حرّق للقليب زاد فى التولع نارو
سهر للعيون الدمعهن سحالو
(التعال بتشديد العين هو جمع تعل بكسر التاء وسكون العين)
والعرب عندما يدعون على أحد يقولون له(التعل اليشقك)
فهل ياترى هناك فرق بين التعليين ؟؟...دعونا نرى آرائكم.
ونواصل.
|
Post: #2
Title: Re: برق الصعيد
Author: بدرالدين شنا
Date: 11-29-2006, 02:32 AM
Parent: #1
من بت طلحة لاح لي بوستاً جميلة حروفو
ذكَّرني بسمة الزهر الوريفة قطوفو
تحياتي ومودتي
|
Post: #3
Title: Re: برق الصعيد
Author: على محمد على بشير
Date: 11-29-2006, 02:49 AM
Parent: #2
Quote: لاح لى من صعيد برقاً كتم تعّّالو
ذكرتى بسمة الزول الجميلة خصالو
حرّق للقليب زاد فى التولع نارو
سهر للعيون الدمعهن سحالو
|
الله يابت طلحه
فقد ذكرتينا بالذى مضى
المايقوما وعلى الشيخ وصديق جحا ومحمد بابكر العبيد المحامى
فقد كان على الشيخ من ابو دليق ومن رواة الشعر وقصص الشعراء
وكان الله يطراهو بالخير لديه طريقه عجيبه ومحببه فى القاء الشعر
فقد كان يروى لك قصة القصيده ( بعد ان يضيف شوية توم وشمار من عنده ) 
ويتمهل وهو يرمى لك بالشطر الاول من البيت الشعرى ويتمطق وكأنه يتزوق طعم كل
حرف فى الشطر الاول من البيت قبل ان يرميه على آذان سامعيه ومستمعيه وقد كنا
نحفظ الكثير والمثير والعجيب من شعر الدوبيت والملاحم البطوليه وقصص الحب العزرى
من فم هذا الرجل ( على الشيخ ) والذى كان لا يقول ولا يروى الا الدرر
وشخصيا كانت تستهوينى قصص الهمباته واشعارهم وكنت كثيرا ما اطلب واستزيد
مما قاله الضرير وود ضحويه الخ ..
ورغم ان الجلسه كانت تضم الوان الطيف القبلى الا ان حب الدوبيت والشعر كان يجمعنا
نحن الشايقيه بالبطاحين .. وغير الشعر والدوبيت كانت تجمعنا الجيره والمحبه والافراح
والاتراح وملاعب الصبا ومرتع الطفوله .
وقد تزكرت كل هذا الان وبعد ان قرأت الابيات اعلاه .. وجرت الذكريات امام ناظرى
وكأنى اجلس تلك الجلسات الفريده وكأنى لم اتى الى الغربه ابدأ .
فلله درك اختى سميه
|
Post: #7
Title: Re: برق الصعيد
Author: سمية الحسن طلحة
Date: 11-29-2006, 11:51 AM
Parent: #3
الأخ/ على محمد على بشير
هل تصدق أن أعز أصدقائى هنا فى السلطنة من الشايقيه...
فهناك الكثير من القيم المشتركه التى تجمعنا معكم ياأحن الناس.
هيجت فينا الشجن بحديث الذكريات هذا....ولك مربوع من طه الضرير:_
مافيتاالبمقوهو وبمرق تلوه
ومافيناالبوصف للضيوف الخلوه
نحناالفوق قفاالشيحان نطبق السروه
والبنقصدو شن هد فى البحر ما بروى
لك التحيه والود... ونطمع فى إطلالتك دوما
|
Post: #6
Title: Re: برق الصعيد
Author: سمية الحسن طلحة
Date: 11-29-2006, 11:32 AM
Parent: #2
البدر الطلع والناس مناها تشوفو
مرّ على هنا واتحفنى بى معروفو
لك مودتى يابدر الجمال....شعرك جمييل
|
Post: #4
Title: Re: برق الصعيد
Author: JAD
Date: 11-29-2006, 03:40 AM
Parent: #1
الأستاذة سمية ..
تحية طيبة،
واسمحي لي أن أرحب بك هنا فقد أودعت ترحيبي في بوست الأخ شيقوق ولكني لم أره ..
مرحباً بك ألف أيها الأخت الفاضلة ..
في منطقتنا نسمي البروق بالقبلي ، العبادي ، البطحاني ، وهذه صادقة الوعد ونادراً ما تخيب الظن ..
أما برق الصعيد فهو كما ذكرت يتميز بسناه الجميل وبريقه الأخاذ .. ولكن للأسف لا يأتينا منه في الغالب إلا الزيفة "القرة" الشديدة ..
ولي طلب عندك" إن كنت تحفظين شيئاً من الأشعار التي قيلت في الشيخ محمود ود زايد أرجو شاكراً أن تتحفينا بها ..
التحية لك مجدداً ..
أخوك
جاد
|
Post: #5
Title: Re: برق الصعيد
Author: مجاهد عبد الرحمن
Date: 11-29-2006, 05:16 AM
Parent: #4
أخدر ليه ضل فوقو المحاسن شَرّن
وابلج فاطرو زي برق السواري الكرّن
يتقسم مقاطع في المشي ويتحرن
زي فرخ القطا الأماتو ركن وفرن
( رحم الله عكير الدامر )
شكراً يا سمية على إيقاظ برق الصعيد في البورد عله يأتينا ببعض العبق من النال والباشندي
لك التحية
ولي عودة على الشعفوفة والتعل البشق التيه وأحياناً الناس .
|
Post: #9
Title: Re: برق الصعيد
Author: سمية الحسن طلحة
Date: 11-29-2006, 12:35 PM
Parent: #5
أخى/مجاهد
كدى خلينا شويه مع النال والدعاش قبال ماتجبنا شعفوفتك وتعلك..
وهذه اللوحةالتى تفوح أرجامن ود الشلهمة:
أتحليتى بى طيبا وطاك عريس
مرقن فوقك المتحزمات بى الديس
فكن فيك بخور وأتمطرن بى السيس
خلن عاشقن يابسا لهاتو بسيس
ولك التحيه
|
Post: #10
Title: Re: برق الصعيد
Author: الطيب شيقوق
Date: 11-29-2006, 01:10 PM
Parent: #5
| Quote: فهل ياترى هناك فرق بين التعليين ؟؟ |
يا سلام يا بت طلحة هيجتي ذكريات خلدت في ذاكرتي :
التعل يا بت طلحة هو السحابة الزرقاء المتراكمة في اتجاه واحد وعندما تخر شخيتير (راجعي مسدار الحاردلو لمعنى شختير ) اهلنا بيقولوا هلا هلا التعل ده نزل في الحته الفلانية وهم يدركون تماما اين هطلت تلك السحابة .
التعل تاني يا بت طلحة هو تعل النحل المليان عسل . زمان كنا نمشى حظيرة الدندر ومن بعيد الواحد يشوف تعل النحل . نمشى نجيب الدخان ليهو عشان النحل يطير من التعل ونجى نشيل العسل .
شكرا لهذا البوست الرائع
|
Post: #11
Title: Re: برق الصعيد
Author: سمية الحسن طلحة
Date: 11-30-2006, 04:19 AM
Parent: #10
أخى/الطيب شيقوق
لله درك وانت تصول وتجول فى كل المحاصات
وأنت لها...
قطعا الكلام عن البروق والمطر والتعول يثير أشجان الغرباء مثلنا.
...........................................................................................
بــرّاق الجنــوب بالليـل هـواهـو الطالق
إستـنـشـق دُعاشـو أصبَـح معلـّق وعالق
أنس الليل مع أب خُـلقاً نزيـه مو شالق
بقى هاجسلي والروح للمروق بـتـّالق
...........................................................................................
الليله الصعيد سحـبـو المهضلم زرقـن
يهرف لى الصباح برّاقو شرقاً وغربا ً
ستـــّا ت الصبـــــا المــن الكعــب بنـدرقــن
شايلات جاز وكبريت لى قلوبنا يحرقن
ولكم مودتى
ونواصل........
|
Post: #8
Title: Re: برق الصعيد
Author: سمية الحسن طلحة
Date: 11-29-2006, 12:14 PM
Parent: #4
الأخ/جاد
إسم على مسمى...فقد جدت علينا بتكرار ترحيبك ،وقدلاحظت ذلك فلك الشكر أجزله
كلامك عن البروق والقرة والزيفة خلانا نكتكت...وأضيف لبروقك البرق المكادى.
,أما طلبك ساجيبك عنه فلدى الكثير.
لك مربوع من طه ودالشلهمه فوق البطانة وبروقا:_
براقك مفرقة السحاب لمّاها
حزم المزرة فى لسان الصبيب خماها
مطرك ماهو رشريش الأرض عماها
يابسات الحفاير زردا وتماها
ولك مودتى.
|
Post: #12
Title: Re: برق الصعيد
Author: الطيب شيقوق
Date: 11-30-2006, 04:44 AM
Parent: #8
Quote: أخدر ليه ضل فوقو المحاسن شَرّن
وابلج فاطرو زي برق السواري الكرّن
يتقسم مقاطع في المشي ويتحرن
زي فرخ القطا الأماتو ركن وفرن |
كنت يا بت طلحة زمان محامي في الدندر وكان طوالى بنادي الغنايين ساعة الفطور في مكتبي عشان اسمع منهم الدوبيت قبل احزم ملفاتي وامشى لجلسات المحكمة . كانت معاى محامية افتتن بها اهل المدينة . شافوها الشعراء في المكتب وقلت ليهم الاستاذة دى ادوها حقها عليكم الرسول .
محمد الفاتح ابو عاقلة كان معانا جاى في زيارة للدندر قال خلونى اقول ليكم :
يا لخلوخة القيف البغمر هيفك
ما اتكرمشتى جسمك في شتاكي وصيفك
انا مرضان بهضرب من ملاقات طيفك
امسى الليلة يضرب في المكاتل سيفك
نواصل
|
Post: #13
Title: Re: برق الصعيد
Author: doma
Date: 11-30-2006, 04:51 AM
Parent: #8
يا زوله وحاه ربي حديثك طاعم بالحيل اها هادي قعده
|
Post: #23
Title: Re: برق الصعيد
Author: سمية الحسن طلحة
Date: 12-01-2006, 07:15 AM
Parent: #13
ألأخ/Doma
حبابك عشرة بلاكشرة...إنما حلاوة الحديث وطعمه من زوق مستمعيه ومتذوقيه.
ولو ماشالك الكتف يشيلك الراس
ونحنا الجار والعشير من الكتف لى راسنا
وفى المال والعروض تخشى الملوك من باسنا
وجودك بيننا يسعدنا
ولك التحية والود.
|
Post: #14
Title: Re: برق الصعيد
Author: soma
Date: 11-30-2006, 04:53 AM
Parent: #8
اهلى البطاحين جونى بالبروق الجاهرة
من تال الصعيد اب رعودا كافرة
والغيم البهز فوق للضهارى الدافرة
والمطر البنز فى التقاوى الوافرة
يفرهد بطونها متل الغزال النافرة
بت طلحة صباحك لمة قبيلة
فى ضل نيمة و العز بالاهل
اسماء الجنيد / مسقط
|
Post: #24
Title: Re: برق الصعيد
Author: سمية الحسن طلحة
Date: 12-01-2006, 07:26 AM
Parent: #14
أختى الحبيبه/سومة
مرحب بيك ياالسمحةنوارة فريقنا
طلتك حلوة وحديثك حلو...لاتحرمينا منك.
بالحيل باأم عوارض عندى شخصك بيّن
تارنستان مشيك.. فاتر وحيل وهوين
بتذكر محاسنك وقلبى يبقى حنييين
عينى سارفة ذى مزن السماالمتحين
وكل الأشواااق.
|
Post: #15
Title: Re: برق الصعيد
Author: أبو الحسين
Date: 11-30-2006, 04:55 AM
Parent: #1
Quote: يا لخلوخة القيف البغمر هيفك
ما اتكرمشتى جسمك في شتاكي وصيفك
انا مرضان بهضرب من ملاقات طيفك
امسى الليلة يضرب في المكاتل سيفك
|
هيييييعع...
سلام أهلي العَرب أهل الكرم والجود...
سلام أهل الفضائل الجَمَّة مالها حدود...
أهل الفزعة في وَكْت الدَبَار مسدود...
أهل الحارة في الويل الضَرَب بارود...
كميات مودتي...
وتسجيل حضور ومتابعة... وتسلمي ست الدار بتنا سمية الحسن...
أبو الحســـــــــــــين...
|
Post: #16
Title: Re: برق الصعيد
Author: الطيب شيقوق
Date: 11-30-2006, 05:33 AM
Parent: #15
Quote: اهلى البطاحين جونى بالبروق الجاهرة
من تال الصعيد اب رعودا كافرة
والغيم البهز فوق للضهارى الدافرة
والمطر البنز فى التقاوى الوافرة
يفرهد بطونها متل الغزال النافرة |
سوما بت الجنيد كيف حالك
عليك الله يا بت القبائل تبقى معانا بجاى بنحس في مساهماتك حنان الاهل وجود الاهل .
نامل ان يكون لهذا البوست لونية خاصة وطعم خاص لا يحسة ولا يتذوقه الا من توطنت في وجدانه ثقافة اهل البطانة واهل البادية وبالتاكيد هم متابعون بشقف لمثل هذه الكتابات .
اطيب المنى
|
Post: #17
Title: Re: برق الصعيد
Author: ebrahim_ali
Date: 11-30-2006, 06:25 AM
Parent: #16
دَنَّـــــاىْ القَفـــــــــــــَارات*ْ البِعرْف العوم
نَقضـــــتَ عليقْتُو بَاكرْْ بيهو قَصْدي شَيوم*
كــــــان سَهَّل علينـــــــا الواحد القيُّـــــــوم
بَشوف بُوْ الكـافي قاعِد ومِنْ وسِطْ مقسوم
القفارات : السهول ، الشيوم : الرحلة إلى ديار المحبوبة
لَيْ تعبنــــاً مطِّـــولْ مِنُّو خِلاي حَابْســــــــُو
جِبتــــــــُو الليلة وتْبوبَحْ ضَرَبْ فوقْ يَابْسـُو
ابو خَداً بيلْمـــــــَع بالــــغضب مــــُو عَابْسُو
مِتْـــــــوطي الحِشـــــــَمْ تُوبْ المَحامِدْ لابْسُو
مَرَقْ مخَلـــوفْتُوْ وقَيت*ْ فُوقُوْ لَشَّق*ْ طَافـــُوْ*
شَدَّيتــــُو ومغَيت ســــــــير القُشاطْ في هَافُو
عَشِيّــــــة رُقَادِي عِند الكامـــــــلات اوصَافُو
افْدَعْ جِيد واهْيـــــــف وعَاليــــــــــَات ارْدَافُو
مرحباً بالشاعرة الفذة المقتدرة بت شيوخ البطانة أهلنا البطاحين مرحباً بيكي وبأشعارك المميزة
ومرحب أخرى بالشاعرة سوما بعد طول غياب
|
Post: #18
Title: Re: برق الصعيد
Author: الطيب شيقوق
Date: 11-30-2006, 01:47 PM
Parent: #17
Quote: الشم خوخت وبردت ليالي الحره
والبراق برق من منا جاب القره
شوف عيني الصقير بجناحو كفت الفره
حالتا ام خدود الليلة مرقت بره |
الحاردلو
نواصل في هذا الموضوع الشيّق ولدينا الكثير عن البرق القبلي والحماري وابو حرقوص وبرق المغربية بصواقعه الحارة وبرق المطر الضحوى عندما يكون السماء منيّل من قدام وكمان البرق ابو فاتحة . هلا هلا يا بت طلحة هيجتي ذكرياتنا .
|
Post: #29
Title: Re: برق الصعيد
Author: سمية الحسن طلحة
Date: 12-01-2006, 08:10 AM
Parent: #17
أخوى /ابراهيم ودعلى
يازول هوووى عووووك...إت شديت وشويمت ساااكت عقبت البراق ده كلو
دحين أنقلب صاد...أدنا خبر ...ولا طارى البراق ده خلاك تطرى الأهل
وتقافينا.
الليله البـريـق حـمـل المُزن في القبلة
وانا فاقد غميدي وليهو مافـيـش سبـلـة
بـتـذكـر ربــوعــاً فـي فنـاهـن عـبـلـة
متجـرِّد من المُـلك العـظـيــم زي جبلة
لك التحية وأنت تمتعنا بهذه اللوحة الرائعة التى تعجز أمهر الفنانين .
نطمع فى تواصلك معنادوما.
|
Post: #27
Title: Re: برق الصعيد
Author: سمية الحسن طلحة
Date: 12-01-2006, 07:45 AM
Parent: #15
أبوالحسين حبابك...اب عقبا زين حبابك آلاف
حبابك ياالكريم أصلك عزيز تيرابك
حبابك والصنودتعملك حساب وتهابك
الراى والفهم دارسنو فى محرابك
يااب عرضا موفر ومو مقصر دابك.
تشرف وتنور
|
Post: #19
Title: Re: برق الصعيد
Author: أحمد الشايقي
Date: 11-30-2006, 03:53 PM
Parent: #1
بت الشيوخ
سمية الحسن طلحة
تحيات غامرة وأنت تأتينا بشيخ العرب شيقوق يؤل أحاديثم ما غرب منها وما بعد
وتأتينا بالحديث المرقرق الحواشي من عكير الدامر وغيره من فحول البطانة
سأعود ساعـت شعر وفي الخاطر الكثير
لك ما طاب
أحمـد الشايقي
|
Post: #20
Title: Re: برق الصعيد
Author: الطيب شيقوق
Date: 11-30-2006, 04:11 PM
Parent: #19
عزيزي احمد انا اعلم في الخاطر الكثير فهلا جدت لنا ولو بنذر يسير منه؟
لك مودتى
اخوك
شيقوق
|
Post: #21
Title: Re: برق الصعيد
Author: abubakr
Date: 11-30-2006, 05:14 PM
Parent: #1
الطيب شيقوق
| Quote: نواصل في هذا الموضوع الشيّق ولدينا الكثير عن البرق القبلي والحماري وابو حرقوص وبرق المغربية بصواقعه الحارة وبرق المطر الضحوى عندما يكون السماء منيّل من قدام وكمان البرق ابو فاتحة |
ات تواصل وين وين ؟؟ ات وين رحلة عمرك ؟ وين مشوار سنينك؟؟ سويت فيهن شنو وقاعد زيارات في البوستات ؟ ات شغال في شركة الكهربا ؟ بجمع فواتير ؟ بكان مافي ضو ولمبة ملبقة القاك متحكر ؟ ارجع الي نهرك الجاف وقرودك في الغابة ؟
|
Post: #22
Title: Re: مجادعة مع عكير الدامـر
Author: أحمد الشايقي
Date: 12-01-2006, 06:47 AM
Parent: #1
Quote:
أخدر ليه ضل فوقو المحاسن شَرّن
وابلج فاطرو زي برق السواري الكرّن
يتقسم مقاطع في المشي ويتحرن
زي فرخ القطا الأماتو ركن وفرن |
حاضـر , أخي شيقوق
كدي شــوف دي,
أخـدر ليهـو ربّـات المحاسـن قـرّن
حازمـو الدّيس ومفتول من نصيصـو مقرّن
يتضلّع يخـازز يـوم قـدل واتقـرّن
طـالق فوقي نيران الخشـوش الـ ورّن
ود الشايقي
|
Post: #25
Title: Re: مجادعة مع عكير الدامـر
Author: الطيب شيقوق
Date: 12-01-2006, 07:30 AM
Parent: #22
Quote: يتقسم مقاطع في المشي ويتحرن
زي فرخ القطا الأماتو ركن وفرن |
أخـدر ليهـو ربّـات المحاسـن قـرّن
حازمـو الدّيس ومفتول من نصيصـو مقرّن
يتضلّع يخـازز يـوم قـدل واتقـرّن
طـالق فوقي نيران الخشـوش الـ ورّن
كتر لينا من العينة دى يا ود الشايقي الجميل
|
Post: #26
Title: Re: مجادعة مع عكير الدامـر
Author: الطيب شيقوق
Date: 12-01-2006, 07:41 AM
Parent: #25
| Quote: ات تواصل وين وين ؟؟ ات وين رحلة عمرك ؟ وين مشوار سنينك؟؟ سويت فيهن شنو وقاعد زيارات في البوستات ؟ ات شغال في شركة الكهربا ؟ بجمع فواتير ؟ بكان مافي ضو ولمبة ملبقة القاك متحكر ؟ ارجع الي نهرك الجاف وقرودك في الغابة ؟ |
يا ابا بكر وين وين وين ذكرتنى عمنا ابراهيم شيقوق - يطول عمره - فقد التركيز وبقى يتكلم ساى . عندنا عمتنا فاطمة بت شيقوق حنيييييييينة كلما تتذكر اخوانها الماتو وهم ( الطيب - وعبد الغنى - والرضى - عثمان) تبكى براها وهم ماتوا قبل عشرين سنة .
اها يا ابا بكر عمنا البيتكلم ساى ده جننها عديل بقى كل يوم يجيها بعد تعمليهو القهوة ويشرب يجى مودعها بيقول ليها ( فاطنة يا اختى الدنيا دى ما فيها خير وين طيبك ووين عبد الغنيك ووين رضيك ووين عثمان ) تبكى المسكينة وتجرى يمين وشمال لحدى نجى نسكتها.
|
Post: #28
Title: Re: مجادعة مع عكير الدامـر
Author: abuguta
Date: 12-01-2006, 08:06 AM
Parent: #25
برق الفارة شلع من جنائن الدوحة
من البطانة جاتنى.. نمة قلوب منشرحة
البورد تنسم بالقوافى الجميلة الصرحة
طاب بيييك المقام.... بابت الحسن طلحة
|
Post: #31
Title: Re: مجادعة مع عكير الدامـر
Author: abuguta
Date: 12-01-2006, 08:24 AM
Parent: #28
برق الفال لمع..والقمرى سوى القوق
ذكرنى شرق رفاعة, تنبول ويوم السوق
انا من عرب ابقوتة..ياالطيب شيقوق
عاشق خريف البطانة..وحنين النوووق
|
Post: #32
Title: Re: مجادعة مع عكير الدامـر
Author: سمية الحسن طلحة
Date: 12-01-2006, 08:39 AM
Parent: #22
الأخ/الكريم/ ودالشايقى
طعمت الدار بى حديثك...ياأخوى سلامتك تبرا من النيران.
انا عندى اخير لنا براقنا ده كان يجيب لنا مطرا يطفى( نيران الخشوش الورن) دى.
وهاك دى من عكير الدامر:ـ
عهدنا بيك كنداب حربةمابتشلخ
وعفدة عين جبل ملويةمابتتفلخ
كان ايدينا فيك من المسك تتملخ
السما ينتكى وجلد النمل يتسلخ
لكم التحيةونرجو كرمكم كما عهدناكم.
|
Post: #30
Title: Re: برق الصعيد
Author: abubakr
Date: 12-01-2006, 08:14 AM
Parent: #1
| Quote: كتر لينا من العينة دى يا ود الشايقي الجميل |
يالطيب ..يكتر ليك من شنو ؟ ما قلنا ليك رطانة ودايريون نعرف الدوبيت شنو ؟؟؟ بعدين ات مالك والشايقية ات ما قت عرريب وبدوي ؟؟
|
Post: #33
Title: Re: برق الصعيد
Author: معتصم الطاهر
Date: 12-01-2006, 09:06 AM
Parent: #1
لاح لى من بعيد سحاباً فَضَح برّاقو
طَرّانِى ضحكة الزول الصعيبة فراقو
حرّق القليب وشتت بقية اوراقو
هيج النفوس الكانو تابو وراقو
|
Post: #34
Title: Re: برق الصعيد
Author: الطيب شيقوق
Date: 12-01-2006, 10:21 AM
Parent: #33
ابو بكر اخوي حبابك بالأصول ياأفندى
وارث للعلم ماك الجديد جربندى
نسام أم خدود لافح بدور جرقندى
الفاروق فزع (مدودر) جناين شندى
|
Post: #35
Title: Re: برق الصعيد
Author: abubakr
Date: 12-01-2006, 11:44 AM
Parent: #1
Quote:
نسام أم خدود لافح بدور جرقندى
|
يا صاحبة الدار ويا جماعةالخير ... اشرحولي الذي تحته خظ ..
|
Post: #36
Title: Re: برق الصعيد
Author: الطيب شيقوق
Date: 12-01-2006, 01:44 PM
Parent: #35
| Quote: يا صاحبة الدار ويا جماعةالخير ... اشرحولي الذي تحته خظ .. |
واحد يشرح للزول ده مافي . انت مالك ومال البرق انتو سباليك في بيوتكم مافي . والله بيوتكم بتاعة حلفا دى لو عندنا هنا في الصعيد مطرة ضحوية واحدة تلحقكم تسونامي .
|
Post: #37
Title: Re: برق الصعيد
Author: abubakr
Date: 12-01-2006, 03:18 PM
Parent: #36
| Quote: انت مالك ومال البرق انتو سباليك في بيوتكم مافي |
هوي ات الابالة و اللقيعة ما عرفتههن وانا"من الناطقيين بغير العربية " وعارفهن ؟؟
بعدين ان ود سكة حديد من تسني الي كوستي وتندلتي والحمرة وجبل دود وسنار والجيلي والنمر والابيض وكسلا وووووووووووووووووووومحطات كثيرة وبراق عمرك ما شفتو..؟؟
دحين لو الجماعة دييل سمعو كلامك ياها جاهم تسونامي برابرة؟؟؟
|
Post: #38
Title: Re: برق الصعيد
Author: الطيب شيقوق
Date: 12-01-2006, 03:54 PM
Parent: #37
| Quote: بعدين ان ود سكة حديد من تسني الي كوستي وتندلتي والحمرة وجبل دود وسنار والجيلي والنمر والابيض وكسلا وووووووووووووووووووومحطات كثيرة وبراق عمرك ما شفتو.. |
؟؟
شتان ما بيني وبينك انت ود سكة حديد من تسني لحلفاء ووقت تكون مسافر تذكرتك نوووووووم وانا عمري كلوووو مسطح فوق في القطر ومرات اقع من فوق بين ال Vacums. اي هم للسودان انتم تدركون واى معاناة للغلابة انتم تعلمون امشى كده يا ود المصارين البيوض .
|
Post: #39
Title: Re: برق الصعيد
Author: abubakr
Date: 12-01-2006, 05:14 PM
Parent: #38
| Quote: شتان ما بيني وبينك انت ود سكة حديد من تسني لحلفاء ووقت تكون مسافر تذكرتك نوووووووم وانا عمري كلوووو مسطح فوق في القطر ومرات اقع من فوق بين ال Vacums. اي هم للسودان انتم تدركون واى معاناة للغلابة انتم تعلمون امشى كده يا ود المصارين البيوض . |
قطر الاكسبريس بيكون فيه عربية نوم واحده يعني اقل من عشرة قمرات فلو كلو واحد ابوه شغال في السكة حديد يركب درجة نوم بعدين السكة حديد كلها حتكون نايمة والقطارات واقفة فحتسافر انت مسطح كيف ؟؟؟
|
Post: #40
Title: Re: برق الصعيد
Author: الطيب شيقوق
Date: 12-01-2006, 05:20 PM
Parent: #39
بعدين السكة حديد كلها حتكون نايمة والقطارات واقفة فحتسافر انت مسطح كيف ؟؟؟
نعست انت ولا شنو يا بابا ؟
|
Post: #49
Title: Re: برق الصعيد
Author: سمية الحسن طلحة
Date: 12-03-2006, 09:28 AM
Parent: #35
أشرح مايلى خليها غنوة الطيب الهينة دى يمكنك الإستعانة بصديقك ( الطيب )
جاك الليل دحين فـج وانقـفـط ياالرّاو
هسالك جرّو اردح وفــــارق الهـرّاو
أنس الليــل مـع المــاربـربــت جـرّاو
وطــّاك حـيّــة الشــــق والحجر مراو
|
Post: #41
Title: Re: برق الصعيد
Author: JAD
Date: 12-02-2006, 09:24 AM
Parent: #1
الأخت الرائعة سمية الحسن طلحة ..
التحية والتقدير .. وفي انتظارك
اقترح أيها الأحباب ذكر قائل المسدار حتى يسهل التوثيق وتحفظ الحقوق ..
قال الأخ أبو قوتة:
Quote: برق الفارة شلع من جنائن الدوحة
من البطانة جاتنى.. نمة قلوب منشرحة
البورد تنسم بالقوافى الجميلة الصرحة
طاب بيييك المقام.... بابت الحسن طلحة |
قلت ليهو قول:
برق الفارة شلع من ثنيات صلالة الفخمة
ومن وعر البطانة نمت صدور منشرحة
البورد ابتسم وهلل جاد بالقوافى السمحة
وبيك طاب المقام يا الرايقة بت ود طلحة
يا أبو قوتة إنت شقق وأنت بكتل ليك ..
ودي لكم جميعاً ..
جاد
|
Post: #42
Title: Re: برق الصعيد
Author: أحمد الشايقي
Date: 12-02-2006, 09:48 AM
Parent: #41
الاخت الكريمة سمية الحسن طلحة
شكرا على الدعوات الصالحات وهذه مجادعـة مع
ودشوراني وموضوعها برق الصعيد لأني من جهة الصعيد والباجـة من جبال اب رادعة وغرب,
لك التحيـة,
شلع برق الصـعيد قال للمِزن هـاك- ســو
وقطع الضهـري في ام لمّاع حسيسـة (عـو)
قــدل الضّحـوي بي ريـقـانو كاتــم الجّـو
ورتـع أب شايـة خوجـل في التّبـر والقــو
ود الشايقي
|
Post: #43
Title: Re: برق الصعيد
Author: Yahia Abd El Kareem
Date: 12-02-2006, 11:51 AM
Parent: #42
يابت الحسن ...نحنا راجينك فى" مسادير الى ما شاء الله " وانتى عمرت التاية فى دار البطانة
على كل نحنا مع نسام البادية اينما هب ....
حدثت مجادعة حرة بين فحلين من شعراء البادية هاكم طرفا منها :
قال محمد ود احمودة شاعر الفادنية :
رويان موية زين ماكل درة ومتعافى
بليدن غادى كان ماتكون وشيكاشافى
بت اللى نعيلات النطح متلافى
يبرد فى البطين لى لى سعدو دافى
رد عليه الشيخ الحاردلو قئلا :
اجمع فى الرزق شان لى رضاهن افافى
كترت ومسخ واتعاجزت عرافى
قدر ما ادى مظنونى مانى مكافى
غير متاسف الياخدنو كله عوافى
|
Post: #44
Title: Re: برق الصعيد
Author: سمية الحسن طلحة
Date: 12-03-2006, 01:21 AM
Parent: #43
الأخ / يحي عبدالكريم .
مايفقدوك في شينة انشاء الله تسأل منك العافية
اتا ماناسية المسادير . اياها بدايتي الختيت فيها تايتي والله
أنا براي متقريفة ليها وماببقى براها ومابفارقها تب خليني
أشوف آخر البرق دا يمكن البطانة تمطر .
برقِك قلـَّع السارية أم صبيبا ســاح
وتعّـالك كتـَم من الهـواء اللفـاح
رعـدك رَزّ في المطرة التقيلة وقاح
وهجـك لاقى شمس الغيبة باكر زاح
|
Post: #45
Title: Re: برق الصعيد
Author: abuguta
Date: 12-03-2006, 01:25 AM
Parent: #43
| Quote: يا أبو قوتة إنت شقق وأنا بكتل ليك |
والله ياجاد شقق دى بقت ما مستخدمة حتى فى مودرة الحطب اى شىء بقى يجى مشقق..حتى بكتل دى غنايها مات لكن الليلة ذكرتنى سوق النسوان فى ابقوتة ..طلح و شاف , تباريق ,نطع سمن فى الجوالين والقزاز..قروش مكرفسة فى المحفظة.. وجنبو سوق الحمام والجداد..ولما تكون فى مطرة اى دلالية بتكون فارشة فى مكان تانى...حليييلك يازمن..اما الشقيق فى الحش..دا شيتنا تانى نحن عرب جزيرة ساى شغلنا كلو سرراب..وكسير دراب..
لكن كدى اكتل دى
برق الصعيد جاب لى هبايب من جاى
ذكرنى البريدو وقعدة.. الدوباى
قارقت اللغيبش الفى الدواب جراى
وبقيت زول مدن... لا نمة لا شاشاى
ويينك يابت طلحة ملكة الدوبيت....
الطيب شيقوق ذاتو مو عاوز يرد علينا ساكى ليه رطانى ..لما وقع دامتو
لكن ابو بكر دا عندو حاجات كتيرة مخزنة...يذكرنى بكتابات الوحش عثمان محمد صالح
الاديب الحلفاوى البلغارى من ناس الزمن الجميل...يكتب الادب مثل همهمات عمال الدريسة
لكن انا بقيف عند هولاء..القادمين الجدد..كل واحد مدرسة بذاتو
الطيب شيقوق, ابو بكر سيد احمد .فاروق..ود جبرا...بنت الحسن طلحة..مولانا عادل
ديل جونا جامعيييييين ...بمعنى جاهزين خلاص...
ولقدام
|
Post: #46
Title: Re: برق الصعيد
Author: سمية الحسن طلحة
Date: 12-03-2006, 04:42 AM
Parent: #45
ألأخ الكريم/اب قوتة
مااااتلومنى كان كاتمة الكلام أزمنت
بنقد فى القوافى السمحة ماأتجابنت
والله أنا طارى ابقوتة ده بالحيل بتور على الحسس المدفون(المحرات بتور المدفونة)
وزميلاتنا فى رفاعة الثانوية من أبقوتة...والله أيام يازمان
الليلة نضميك ده متل برق الصعيدطلق على دعاشو
حسيت منو رحل العنقريب بفراشو
دحين آخوى إتو شققو واكتلو ونحنا علينا الكديب...والتقا بنلمها سوا
والله أمس كنا بنشرح لى أولادنا فى نفس العبارات دى.
ودمتم معينا من المعرفة لاينضب
بت طلحة
|
Post: #47
Title: Re: برق الصعيد
Author: الطيب شيقوق
Date: 12-03-2006, 07:22 AM
Parent: #46
| Quote: دحين آخوى إتو شققو واكتلو ونحنا علينا الكديب... |
بت طلحة خوفتيني عديييييييييل الكلام ده لقيتيهو وين ؟
زمان انا كنت بشقق وابوى طوالي ناهرني من الشقيقة الكبيرة وكنت بقصدها عشان ما يحلقونى في الكتل وكنت ظلات في القش كمان .
|
Post: #48
Title: Re: برق الصعيد
Author: Yahia Abd El Kareem
Date: 12-03-2006, 08:06 AM
Parent: #47
فوق ياودشيقوق...اظنك نشلت الموية من البير ايام الافراح والبوش...وكمان دخلت بى غنمك
الدهسير وجمعت الربل من الخلا وطاردت القطا من حصا المقابر...وذاك تاريخ ابيض واصيل ...
نعود ان شاء الله مع نسام بت الحسن الى ان تمطر البادية وتملا الميعة والهواد...
|
Post: #50
Title: Re: برق الصعيد
Author: الطيب شيقوق
Date: 12-03-2006, 11:36 AM
Parent: #48
| Quote: فوق ياودشيقوق...اظنك نشلت الموية من البير ايام الافراح والبوش |
يا ريت يا بت طلحة انا نشلتها من الجمامة ( الجمام ما عندكم انتو وهي لما النهر مويتو تنشف في الصيف ممكن تحفر اى حفرة بيدك ساى تجيب موية واصل الكلمة من جم يجم على وزن فلّ يفل ولا ايش رايك انتى شاطرة في اللغة العربية )
سمية زمان انا في الثانوي بدرسونا معلقة زهير ابن ابي سلمى وكنت ما بتنكر لبيئتنا اصلا . اها اليوم داك الاستاذ بيشرح في بيت في المعلقة بيقول :
رعوا ظمأهم حتى اذا تم اوردوا ..... الخ
الاستاذ يشرح سااااااااى لاولاد البندر عن غب الابل ووردة الابل طوالى نططت عيني للاستاذ ورفعت يدى فوق استاذ استاذ استاذ قال لى شنو يا العريس كنت معرس قلت ليهو ما تتعب الشاعر بيقصد الضمي والضمي عندنا يوم وردة الابل بعد تغيب ثلاث ايام . اولاد البندر قالوا لى ما فاهمين قلت ليهم اتسود خطوتكم واشوقكم للرحيل وخلفة المحوية ( الزبير بعرف الخلفة وحلاتها مع الخبة في جمل بشاري دوماتو خارة ) وتنم معاها نمة حلوة وسوطك مدلدلة سااااااااااى في بطن الجمل .
تقول
ود الحوري من كان سمينا ملجة
يبس دورو بالبركة ورقاد الدلجة
رقاد المراتب والبرش الضفيرتو العلجة
منو ابعدنا للكباشي بلد ام فلجة .
نواصل
|
Post: #51
Title: Re: برق الصعيد
Author: سمية الحسن طلحة
Date: 12-04-2006, 12:12 PM
Parent: #50
ا لجمام من جم اوجاد بالشى...نقول مثلا فضائل جمة اى كثيرة
أما عن الشرب:ـ
اليوت : هو الشرب اليومى
الغب : هو الشرب يوم بعد يوم
وقالت البنت ترثى والدها:ـ
ديمة سواتك فوت
يامقنع البنوت
نارك ما بتموت
ووجعك مابغب يوت
اما الضمى فهو على نحو ماذكرت
ونواصل
|
Post: #52
Title: Re: برق الصعيد
Author: سمية الحسن طلحة
Date: 12-04-2006, 12:23 PM
Parent: #51
اما عن سير الجمال فهو انواع: يكربت ويربع والخبيب والشبيب كما ذكر الشيخ عبد العزيز
فى هذا المربوع،وخرير الدومات
أخد العاصي دودبي المشيـهــو شبيـب
النال حازمو والشق تحتو فـيـهـو دبيب
تذكــار البقـول لى أمّــو جـانـا حبيب
خـلا حــروت قـماقـمـك إنتـرنو كبيب
ونواصل
|
Post: #53
Title: Re: برق الصعيد
Author: abubakr
Date: 12-04-2006, 12:28 PM
Parent: #1
Quote: أشرح مايلى خليها غنوة الطيب الهينة دى يمكنك الإستعانة بصديقك ( الطيب )
جاك الليل دحين فـج وانقـفـط ياالرّاو
هسالك جرّو اردح وفــــارق الهـرّاو
أنس الليــل مـع المــاربـربــت جـرّاو
وطــّاك حـيّــة الشــــق والحجر مراو |
يالطيب .. هدنة ؟ زي اتفاقية البقط ...تحل لي العجمي اللي فوق دة وانا اسامحك عن رحلتك ومشوار سنينك ونهرك العبرتو وهو جاف ...؟؟ انا غايتو عرفت "الليل" و"الشق" و"الحجر " .. نحن الرطانة ما ادونا ادفانسد كولوكيوال ارابيك زي دة ؟؟؟
وتقولو برابرة برطنو .. في ذمتكم البنية دية كلاما دة الفرق بينو و بين " اقدن مل فقن مل " شنو ؟؟؟
|
Post: #54
Title: Re: برق الصعيد
Author: الطيب شيقوق
Date: 12-04-2006, 03:56 PM
Parent: #53
| Quote: في ذمتكم البنية دية كلاما دة الفرق بينو و بين " اقدن مل فقن مل " شنو ؟؟؟ |
انا قلت ليك يا رطاني يا اعجمى لا تسالوا عن اشياء ان تبدو لكم ....
انت بس الله ابتلانا بيك الله يصرفك مننا ويخلينا نتضرع برانا في بطانة ابو على وحسان دى .
|
Post: #55
Title: Re: برق الصعيد
Author: معتصم الطاهر
Date: 12-04-2006, 05:30 PM
Parent: #1
عفوا للدخول بين الغنوة ونمّتها
كنت أظنه بوست للجميع ...
|
Post: #56
Title: Re: برق الصعيد
Author: سمية الحسن طلحة
Date: 12-05-2006, 01:57 AM
Parent: #55
لاح لى من بعيد سحاباً فَضَح برّاقو
طَرّانِى ضحكة الزول الصعيبة فراقو
حرّق القليب وشتت بقية اوراقو
هيج النفوس الكانو تابو وراقو
{ عفوا للدخول بين الغنوة ونمّتها
كنت أظنه بوست للجميع ...
..........................................................................................
أخى الكريم/معتصم الطاهر
والله العظيم ثلاث والله على ما أقول شهيد انا الآن فتحت البوست ده مخصوص للرد
عليك وعلى مجادعتك دى ...ولكن للأسف الشديد (سبق السيف العذل)
وعتابك ده يدل على كرم أصلك ونبل أخلاقك،أهلك العرب قالوا( الما دارك ما لامك)
ونحنا دايرنك ومابنبقى براك...فلك العتبى حتى ترضى
وياجماعة الخير أفزعونا ياناس الشايقى و منصور واب قوته وكلكم..كل واحد يجيب نمة فوق المعتصم ده حتى يرضى عننا ويجى ودشيقوق يحلف طلاق بالتلاتة معتصم يرجع.
|
Post: #58
Title: Re: برق الصعيد
Author: سمية الحسن طلحة
Date: 12-05-2006, 02:59 AM
Parent: #56
والله ياالمعتصم غيبت لينا البرج فى راسنا
يا من لك أصـل عريق ضارب
كم ان لى حـس دقيق صـائب
وكم ان لى لفظ فصيح معرب
انماأضحى الكلام من أمامى يهرب
ويضـيع منى فى فـضـاء غـيـهـب
فهلا تقبل إعتذارنا وتعود حاملا نمك ...الا يصعب عليك فراقنا؟؟؟
نأمل ونتعشم بل ونطمع فى كرمك... فإنه والله ليعز علينا فقدك.
|
Post: #63
Title: Re: برق الصعيد
Author: معتصم الطاهر
Date: 12-05-2006, 03:41 PM
Parent: #56
Quote: سمية الحسن طلحة:
ونحنا دايرنك ومابنبقى براك |
زولك و برضو ما ببقى بلاك
لأنَّك فرضو و بالقليلة ملاك
الهجر أرضو بالدمِع بلاّك
كالكشَف عرضو بالجمُر ملاّك
|
Post: #64
Title: Re: برق الصعيد
Author: سمية الحسن طلحة
Date: 12-05-2006, 05:54 PM
Parent: #63
جبرت الخواطر لبيت ندا الناداك
رضيت الجميع انشاء الله ما نختاك
مابترضى الهجر كشف العروض حاشاك
خلينا ان نجر النـمـة سـوى مـعاك
|
Post: #65
Title: Re: برق الصعيد
Author: سمية الحسن طلحة
Date: 12-05-2006, 05:57 PM
Parent: #63
جبرت الخواطر لبيت ندا الناداك
رضيت الجميع انشاء الله ما نختاك
مابترضى الهجر كشف العروض حاشاك
خلينا ان نجر النـمـة سـوى مـعاك
شكرا لك أخ معتصم والعود أحمد
|
Post: #57
Title: Re: برق الصعيد
Author: abubakr
Date: 12-05-2006, 02:19 AM
Parent: #1
| Quote: انت بس الله ابتلانا بيك الله يصرفك مننا ويخلينا نتضرع برانا في بطانة ابو على وحسان دى . |
قالو رطانة عنصريين ...اها منو العنصري ؟.. اربعين سنة في خشم القربة السماها مقدود مع ناس البطانة ما علمونا ولا "نمة" والحوالينا منهم علمناهم يلعلعو برطانتنا ( لغات اجنبية)... بالمناسبة "نمة" يعني شنو ... ؟؟
يعني زي " نمتي الضواية" ...؟
|
Post: #59
Title: Re: برق الصعيد
Author: الطيب شيقوق
Date: 12-05-2006, 05:11 AM
Parent: #57
يا زول البوست ده ما تجيهو غير شايل دكشنريك في جيبك
اخلي بت طلحة تشرح ليك النمة بس افهم انو احلى انواع النمات هى تلك التي يعمد المنم ( بضم الميم وكسر النون ) على وضع مصبع السبابة في اذنه اليمين واتلولح معاها ونفسو قائم ومدنقر ( مدنكر تعنى مسهي لتحت او بمعنا اخر بعاين ل########## من شدة طربه بالنمة )
وفي رواية اخرى احلى النمات عند الملمات الا ان هذه الرواية لم تجد قبولا عند جمهور خيمة الحاردلوا ود امنة وود شعيت وود الشوبلي ومحمد بابكر الدرويش وهولاء يرجحون ان اطيب النمات هى عندما يكلف صبية البادية للذهاب بجمالهم البشارية لمعرفة المحلات المخرفة او خريفها دندنة ( الدندنة الخريف البتكون بهائمه دفرة وعقلة) والدفرة والعقلة هي شبع البهائم في فد محل ( فد تعنى محل واحدة ) دون الحاجة الى قطع المسافات بحثا عن التبر والحنتوت ( وديل من افضل انواع النباتات للرزق ( الرزق هنا تعنى الانعام يا رطاني )
اها لما الصبية يجوا راجعين لاهلهم يخبروهم بمحل الخريف الدندنة ده بيكونوا مبسوطين بجوا راجعين اما خبة معاها نمة قد تكون النمة في حبيبة او في الخريف ذاتو او تكون الرجعة كربته والكربته دى بتقطع الشراشيف .
نواصل
|
Post: #60
Title: Re: برق الصعيد
Author: abubakr
Date: 12-05-2006, 05:34 AM
Parent: #59
| Quote: تكون الرجعة كربته والكربته دى بتقطع الشراشيف . |
انا استاهل .. شن جابني هنا ..؟؟ اخير لي الملايالم المعاي هنا اهو " ويلم " يعني "موي" اما"كربته والكربته" دي ما ليها قاموس ولا في الامزون ... تتقسحو في جني الرطان ساي .. اها باباي من مضاربكم نمو ( بكسر النون مش كدة يالطيب) برايكم ...
|
Post: #66
Title: Re: برق الصعيد
Author: سمية الحسن طلحة
Date: 12-05-2006, 06:04 PM
Parent: #60
{اها باباي من مضاربكم نمو)
ياابوبكر نحنا ماصدقنا معتصم رجع تودعنا انت... (تعال صاد)
دى زى حكابة ملكين فوق ككر ده غاب وده حضر (دى دايرة شرح؟)
|
Post: #61
Title: Re: برق الصعيد
Author: Elmosley
Date: 12-05-2006, 11:37 AM
Parent: #1
مبروك يالاهل.. الليله جات بت طلحه
سكر في السلام ماها البخيله المِلحه
رضاية النفوس البيك... بقت مُنصلحه
بي شاف الكلام.. فاحت هديك من طلحه
|
Post: #67
Title: Re: برق الصعيد
Author: سمية الحسن طلحة
Date: 12-05-2006, 06:17 PM
Parent: #61
ترحـب ديارنا الوسـيعة وبـرحة
بـمـلك الفنون والسجايا السمحة
خـريف الأرض فى السنين الكلـحة
لـوجودك معانامـا بتسعنا الفرحة
مرحبا بالموصلى
حللت أهلا ونزلت سهلا
|
Post: #62
Title: Re: برق الصعيد
Author: nourelhadi awad
Date: 12-05-2006, 11:50 AM
Parent: #1
بت البلد
سلام عليكم
من يشبهنا
لا افتري لكنها الحقيقة والتي فقط نعرفها نحن
اختي سمية
متى يعرف الاخر
من يوثق هذا التراث البحر
اني استمع واقرأ... لكم الود
نورالهادي
|
Post: #68
Title: Re: برق الصعيد
Author: سمية الحسن طلحة
Date: 12-05-2006, 06:34 PM
Parent: #62
وعليكم السلام أخ/ نور الهادى
لاأحد يشبهكم ولسان حالكم يقول:ـ
انا البركب على الدقـن سناب
انا الملهوف غريب باقيلو كاب
انا الخلقونى لى يوم الخـراب
انا اب فزعا قريب متل السحاب
فلنتعاون لتوثيق هذا التراث
|
Post: #69
Title: Re: برق الصعيد
Author: سمية الحسن طلحة
Date: 12-05-2006, 06:45 PM
Parent: #68
ياجماعة الخير بتعرفوا التخا والدهاريب؟
لعل هذا المربوع الذى يخاطب البطانة يسهل عليكم الأمر:ـ
نسيتى زمانك والمحلة الجنينا طرابا
نسيتى ترزم السارية ام تخا ودهرابة
نسيتى معاقل النوق الرتوع وشرابا
نسيتى أخوان عنيبة..مدرقة مى حرابة
ونواصل تحت الدهاريب والبروق.
|
Post: #70
Title: Re: برق الصعيد
Author: الطيب شيقوق
Date: 12-09-2006, 01:57 PM
Parent: #69
Quote: نسيتى زمانك والمحلة الجنينا طرابا
نسيتى ترزم السارية ام تخا ودهرابة
نسيتى معاقل النوق الرتوع وشرابا
نسيتى أخوان عنيبة..مدرقة مى حرابة
ونواصل تحت الدهاريب والبروق. |
المحلة هى المحل التي لا ينبت فيها نبات واسعد المزارعين من يجد بلاده امحلت لا ينبت عليها الا الذرة او السمسم .
ترزم السارية هو كرير المطرة الليلية -
كان لاحد المزارعين ثلاثة اولاد وعندما حل زمن الخريف ارسل اى منهم لجهة ليزرع فيها بعيد عن منطقتهم . وبعد نهاية الخريف حضر ثلاثتهم بعد ان لموا مسورهم ( المسور هو الانتاج يا ابا بكر) الاب سال الاول اها يا ولدى قبل توريني انتاجك انت محل مشيت مطركم شنو؟ قالو يابا مطرنا ظهري او ضهري الاب قال ليهو انتو صفقتوا ( يعنى انتاجكم شوية) سأل التاني اها يا ولدى انتو شن مطركم ؟
قالو يابا نحن مطرنا ضحوي ابوه قال ليهو ووب ووووب انتو بورتوا( البور هو غلبة الغش للعيش او السمسم) سال الولد التالت قالو اها ياولدى انتو شن مطركم الولد شنق الطاقية فوووووووق قالو يابا نحن مطرنا ليلي يعنى ( السارية ام تخا ودهرابة البتعنيها بت طلحة في قصيدتها دى) ابوه قال ليهو انتو يا ولدى قطع شك عيشتوا ( يعنى انتجتوا خيرا وفير)
سنواصل حول اسباب تفسير الوالد لهذه الحالات .
|
Post: #71
Title: Re: برق الصعيد
Author: abubakr
Date: 12-09-2006, 03:30 PM
Parent: #1
| Quote: ترزم السارية هو كرير المطرة الليلية - |
دي لغة شنو المابتتقري الا بترجمة مرافقة لكل كلمة وسطر فيها بلغة اخري ...؟
الطيب ات وملكة الدوبيت بتحتاجو تدخلو كورسات لغة عربية خصوصي وانا حاكون المدرس ..لازم اعلمكم لغة علي اصولها مافيها تورية ولا الحاجات الكتيرة البتلخبت المعني ... انتو ما درسوكم "طلع .. نزل .. شرب .. اكل .. " بس .. حاجات بسيطة وكفاية ..اصلو انتو لا صنعتو ولا حتصنعو موبايل بكميرا ولا حتي من غير كاميرا اهو لغة لزوم الحكي فبالله لازم تحضروا الكورس وهو مجاني والفطور علي فاست فوود ....
قال كرير المطر ؟؟ شو هذا ؟؟
|
Post: #72
Title: Re: برق الصعيد
Author: الطيب شيقوق
Date: 12-09-2006, 04:15 PM
Parent: #71
| Quote: قال كرير المطر ؟؟ شو هذا ؟؟ |
ابو بكر عليك الله تختاني ( تختاني معناها keep away from me pls )
|
Post: #73
Title: Re: برق الصعيد
Author: سمية الحسن طلحة
Date: 12-12-2006, 03:50 AM
Parent: #72
شيخ العرب/ ودشيقوق
لا فض فوك....فقد وفـيت وكفيت...تحية خاصة موصولة لك من الشيخ عبد الرحمن الشيخ على
ود الشيخ القرشى ود الزين...وهو يقول لك كلامك صحيح علمياً وأدبياً...فالزروع التى تروى
ليلاً تنمو بصورة أفضل من غيرها...واصل فنحن فى إنتظار المزيد.
ولك الشكر الجزيل
|
Post: #74
Title: Re: برق الصعيد
Author: سمية الحسن طلحة
Date: 12-12-2006, 03:57 AM
Parent: #73
(ترّزم السارية ام تخا ودهرابة)
أستاذ/ أبوبكر... هذا عربى فصيح%
الرزمى: هو صوت حنين النياق ( الناقة: تجمع نوق أو نياق)
ما سمعت الفنان نجم الدين الفاضل يتغنى بكلامنا ده فى(ليالى الأنس)
يحن قلبى الكان بولاد
كحنين الوالدة على الأولاد
حنين النوق بٌكّـر تيــلاد
لى النفسو مسك وعرقو جلاد
فالشاعر شبه صوت الرعد بالرزمى....أما الساريه فهى المطرة الليلية
وهى من السرى أى السير ليلاّ(ما سمعتو بالإسراء والمعراج)؟
أما التخا: فهو السحب الخفيفة
والدهرابة : جمعها دهاريب وهى عندما يشتد الظلام أويكون هناك تخا
يحجب الرؤية والدنيا ليل مع شدة لمع البروق وكشة كتاحة وأحياناّ زيفة
والناس يقولوا ليك ماش وين يازول تحت الدهاريب دى .
نسعد بتواصلكم معنا.
|
Post: #76
Title: Re: برق الصعيد
Author: سمية الحسن طلحة
Date: 12-12-2006, 04:02 AM
Parent: #74
الفنجري فوق البطانة
برقِك قلـَّع السارية أم صبيبا ســاح
وتعّـالك كتـَـم من الهـواء اللفــّــاح
رعـدك رَزّ في المطرة التقيلة وقاح
وهجـك لاقى شمس الغيبة باكر زاح
ولكم مودتى
|
Post: #75
Title: Re: برق الصعيد
Author: الطيب شيقوق
Date: 12-12-2006, 04:02 AM
Parent: #73
Quote: ...فالزروع التى تروى
ليلاً تنمو بصورة أفضل من غيرها...واصل فنحن فى إنتظار المزيد. |
بت الصالحين قولى لود القرشي كتر خيرك واحكى ليهو ها السالفة
في واحد هندى هنا في عمان شغال ري في نباتات الزينة بعدين جات مطرة تقيييييييييلة وهو شغال برضو برش في خضاره والمطرة صاااااااابة . انا بحب استطلاع منى سالته قلت ليهو صديق هذا مطر مال ربنا ايش فيك تعمل كده ؟
قال هذا دوام كفيل قول لازم شغل كل ساعات دوام .
|
Post: #77
Title: Re: برق الصعيد
Author: الطيب شيقوق
Date: 12-12-2006, 04:13 AM
Parent: #75
Quote: برقِك قلـَّع السارية أم صبيبا ســاح
وتعّـالك كتـَـم من الهـواء اللفــّــاح
رعـدك رَزّ في المطرة التقيلة وقاح
وهجـك لاقى شمس الغيبة باكر زاح |
لله درك يا بت طلحة والله هيجتي ذكرياتنا وخليني اشرح الكلام ده لناس ابي بكر العجم ديل .
برقك قلع السارية ام صبيبا ساح
يا الله - ربما يكون ده البرق القبلي او البرق ابي فاتحة البخم ليك السماء من قدام كلوووو يجي مقلع ليك السحابة التي عندما تنزل صبيبها يسوح ويملاء المرانع ( المرانع هي الاراضى المنخفضة او الميع )
وتعالك كتم من الهواء اللفاح
التعال هى السحابة المزرقنة وداكنة قريبة من ا########## تقول تشرب منها من قربها للارض . وعادة النوع ده من السحب عندما يقرب للصبان هواها بيكتم ويزند دليل على وشوك الصبيب.
وهجك لاقى شمس الغيبة باكر زاح يعنى صبيب من الصباح للمغربية
|
Post: #78
Title: Re: برق الصعيد
Author: gessan
Date: 12-12-2006, 06:10 AM
Parent: #1
الطيب كيف حالك ..
| Quote: ...وود شعيت وود الشوبلي... |
ود شعيت الزول الغناي "الممسوخ"؟؟
الزول الفي حكاوي غناهو "حضور درامي"؟؟
لدي موضوع يخص حكاوي وغناوي ود شعيت دا سوف ارفده في البورد دا متى ما توفر لي الزمن لتجهيزه ..مصحوب بتسجيل صوتي لأحد مجالس حكاويه العامرة..والتسجيل الصوتي ضروري واكثر حسماً
لموضوع الكتابة بلغة اهل البطانة.."التنوين دا مهما تسوي فيهو ما بديك النطق الدايرو"..
حتى ان بعض الذين كتبوا في التراث الشعبي والدوبيت بالذات حاولوا إشتقاق بعض علامات التنوين الخاصة لتوصيل النطق بشكل اكثر وضوحاً .."لاكين باقي لي السمع بقطع الشك تب" ..كما انه اكثر جمالاً..
عموما
جابنا البراق ..والتِعِل ..وريحة الدعاش ..
وسيرة "أم هبج ..الهواها شفخانة المِتالم"..علي قول ود شعيت..
و دي دخلة من باب التحية ..
لكل المتداخلين في هذا البوست ..
والبوستات المشابهة ..
------------
أمُحُمّد ود الفكي حمد "علي لسان ود شعيت" قاليها:
سَماحِك غير حِبُوب بَرتا وقفِيس حُجّاج
سماح اليَبسَت دوف الطِريفي الساج
شِعاع ظُرر الغشيم الفي الظلام وجّاج
سماح الفرُوا..براق السِـرا الفجّاج
--------
واقعدوا عافية
|
Post: #79
Title: Re: برق الصعيد
Author: الطيب شيقوق
Date: 12-12-2006, 06:17 AM
Parent: #78
| Quote: لي السمع بقطع الشك تب" ..كما انه اكثر جمالاً.. |
اخي غسان عليك الرسول تكون معانا ياكا زولنا عدييييييييل وكلامك كلام زولا مننا تعال لينا بود شعيت وود امنه وود الشوبلي وخلينا ندوبي ونغنى في بطانتنا جوة المنبر ده والزارعنا غير الله اللجي يقلعنا.
حبابك
حبابك
|
Post: #80
Title: Re: برق الصعيد
Author: سمية الحسن طلحة
Date: 12-12-2006, 09:58 AM
Parent: #79
Quote: أمُحُمّد ود الفكي حمد "علي لسان ود شعيت" قاليها:
سَماحِك غير حِبُوب بَرتا وقفِيس حُجّاج
سماح اليَبسَت دوف الطِريفي الساج
شِعاع ظُرر الغشيم الفي الظلام وجّاج
سماح الفرُوا..براق السِـرا الفجّاج
--------
|
الأخ/غسان مرحب بيك فى دار البطانة
الطيب ود شيقوق حلب شدوقو فى العرب وقال ياناس الدار جاكم زول
وجينا نرحب بيك وبى خيرك الجايبو معاك وطبع الكريم مابدخل وإيدو فاضية
إنشاء الله تكون جايب لنا جبنة وزنين أم فحماّ يتواجج متل مغس الأقربون.
وأحمد ودعوض الكريم قال المابجيب غنوة فوق ( وزنين ) دى مايشيل فنجان.
قالولو غنى إت آشيخ العرب.. قالهم لا السابقك على الباب قوللو ياأرباب
وهو يقصد ود شورانى....ودشورانى قال الغنا فوق (وزنين) دى؟ قالولو آآى..قال:ـ
سمحة وضوكا لبن صـهباء ودخلها مبسط
شرفتا ريل وكفيتا خيل وطولا موسـط
من عينة إرم الفيها التواريخ نصـت
حـسيت قلبى فارفنى وكبدتى أنقـصت
وأهل برق الصعيد فى انتظار مساهماتك
سمية الحسن طلحة
|
Post: #81
Title: Re: برق الصعيد
Author: abubakr
Date: 12-12-2006, 02:14 PM
Parent: #1
والله ياسمية بحاول وبصدق ان افهم ولكن يادوبك شوية يعني الكلمات العربي - وفقا للمنهاج العربي لغير الناطقيين بها من الرطانة- اما الباقي ورغم انه ظاهر عليهو كلاما زين الا نو ما كان في المنهاج بتاعنا ... يعني الواحد في عمري دة امشي اقعد مع احفادي -عندما البنات يقررن الزواج ويتزوجن ويقررن الولادة ويولدن وانا اكون موجود- بعد تعديل المنهاج ....
انتو بتقولو الكلام السمح دة كيف ؟
|
Post: #82
Title: Re: برق الصعيد
Author: الطيب شيقوق
Date: 12-13-2006, 03:58 AM
Parent: #81
| Quote: انتو بتقولو الكلام السمح دة كيف ؟ |
انت عليك تسمع وتطرب وبس يا باش ما تجننا معاك .
انت ابو بكر عولك معاك في دبي؟
|
Post: #83
Title: Re: برق الصعيد
Author: gessan
Date: 12-13-2006, 05:19 AM
Parent: #1
| Quote: إنشاء الله تكون جايب لنا جبنة وزنين |
سلام عليك ..سمية ..
نعم ..
المقطع الذي اقصده يتحدث عن مجلس جبنة وزنين.
ود شعيت زولاً "بُدعي" بالحيل ..بالإضافة لي كلامو السمح ونُطقو الواضح ..
فهو يقيم حوارا بالدوبيت يستنطق فيه بيئته من حوله "التَرس" و"الجمل" و"ريرة"البلد..
كما انه يقيم قصصاً وهمية "في بعض الاحيان" عن من هي أكثرهن جمالاً في مجالس الأنس والشراب..
ومن هي التي يحق لها ان "ترفع البيرك" على بيتها متزعمة مجالس الانس جمالاً وحضور..
وإن الله هّوّن بنسمع نموذج من حكاوي ودشعيت هِنا قريب..
تحايا
*************
الاعزاء بكري ..والطيب ..
البطانة وحلفا ..
مشروع القِربة اقيم لتوطين اهالي حلفا ..وكذلك لتوطين وتطوير الرُحّل في البطانة..
خشم القربة كان نقطة تحويل إنسان البطانة من رعوي متجول ..الى زراعي منتظم ..بدل ما يزرع بالمواسم وحسب المطر ..وطالق سعيتو ساكت وباريها سادرة ومتدلية..
وهنا "ساعيد" حكاية عن الصادق اب آمنة ..احد اشعر مغنيّ البطانة "طالما المقام مقام غناء وبراق"..انه إمتلك حواشة في مشروع حلفا لاحقاً..
وورد قوله في الحنين الى فترة النشوق والدمر ..وهواه للبطانة وتجواله مترحلا فيها..ساخراً من الحياة المنتظمة:
إتخلفن لها البطحاني والعبادي
ونفضنو المتِل جبب ام صريمة يدادي
نحنا ترانا للشابورة ديمة نحادي
عنز الشاي مراقبة من غرامة القاضي
ويعني انه رأى براقين البطحاني والعبادي يتخالفن في شلعتن ..والبراقين ديل جابن سحاباً اسود ..متل لبس نساء الرشايدة ..والذي يشبه صريمة الجمل ..
والصريمة هي الحبل او الرسن الذي يلف وجه الجمل ..لذلك سموا الرشايدية "ام صريمة" ..
يقول البراقين ديل نفضن سحاب اسود ماطر ومتحرك ..اما هو فحالته صعبة حارس حواشتو مراقبا لها ..
وحتى عنزه المخصصة للبيت للشاي ايضا مضروب عليها حصار ..فإن طلقها فإن ذلك يرميه في محاكمة وغرامة ..
حالياً منطقة "الرتّاجة" مثلا والتي تقع في مشروع حلفا الجديدة هي واحدة من مراكز عرب البطانة بعد إستقرارهم على ما أعتقد ..
بالطبع حلفا لاحقاً اصبحت سودان مصغر ..بعد قيام المشروع وما جلبه من حياة مدنية ..حيث تجد كل قبائل السودان فيها تقريباً..
يعني يا الطيب ناس بكري ديل بي فضلهم..جابولكم المدنية في داركم ..وإستقريتو بعد ما كنتوا حايمين بالصي ..
والله شنو؟؟
تحايا للجميع ..
|
Post: #84
Title: Re: برق الصعيد
Author: الطيب شيقوق
Date: 12-13-2006, 07:12 AM
Parent: #83
| Quote: والصريمة هي الحبل او الرسن الذي يلف وجه الجمل |
لله درك يا غسان بس حبه توضيح شويه لو امكن :
الصريمة تختلف عن الرسن . الرسن يدرع في قدوم الجمل ويلف عنقرته من خلف ( انا يا غسان اخوى رساااااااان كمان) اما الصريمة فتشبيهها بحال نساء الرواشد فيها كثير من الروعة والابداع اللغوي إذ ان الصريمة عبارة عن حديدة تدرع للجمل الكافر او الماصع في نخرته او انفه لمزيد من التحكم في توجيهه لان الرسن لوحده غير كافئ لضبط الجمل وهو في هذه الحالة من الهيجان والمصعة .
اما علامات هيجان الجمل او مصوعه فهى خرير الدومات بالمادة السوداء ورش البول بزيله من خلف لحدى تتسخ فخذاه الخلفيتان بذلك البول .
نواصل لنسمع مزيد من ابداعك يا جميل
شيقوق
|
Post: #85
Title: Re: برق الصعيد
Author: gessan
Date: 12-13-2006, 09:07 AM
Parent: #1
| Quote: إذ ان الصريمة عبارة عن حديدة تدرع للجمل الكافر او الماصع في نخرته او انفه لمزيد من التحكم في توجيهه لان الرسن لوحده غير كافئ لضبط الجمل وهو في هذه الحالة من الهيجان والمصعة . |
هلا هلا آ الطيب آخوي ..
يا زول انا كلامك دا ما بتفق معاك فيهو ..اها رايك شنو؟؟
شوف الحديدة القاصدة إنتا دي نحنا بنسميها "الزُمام"..يا بتكون حديدة ..يا بتكون جلد "قِـد" او خيتاً قوي..وعادة ما تكون ثابتة في النخرة او انف البعير..
يعني ما عليك الا تدرع فيها حبلك والله رسنك ..وهي بالضبط متل الزمام عند النساء ..
اما الصريمة البعرفا غايتو ..يقولك :والله الليلة سويت لي صريمة للجمل دا..يعني جهّز الرسن بوضعيات لفاته المعروفة فما عليك الا تلبسه للجمل ..
وقاعدين نقول تصرِّم الجمل ..يعني تلف الرسن او الحبل إن لم يكن جاهزاً او تلبسو ليهو بشكله المعروف دا ..والرسن عندو كم طريقة بتتحكم فيها هداوة الجمل زي ما قلتا إنتا ..
وبرضو الحمار عندنا بصرِموهو ..وخاصة الدحش عندما يقرّب لي وكت الطاعة ..يعني تخلي فيهو الحبل جاهز ..
وإن كان هناك "اللِجام" بالنسبة للحمار كما للخيل وهو حديد بلبسو ليهو في خشمو ..برضو لمزيد من التحكم فيه..
انا كان عندي وكت كان رسمتها ليك هسع الحاجات دي ..
نرجع للجمل ..
بجانب الصريمة هناك أيضاً "الحَسَكة"..وهي زي ما تقول كدي شبكة مجلدة ومجهزة ..وعادة ما تكون من الجلد يتم تلبيسا للجمل "وهي بالضبط اشبه بصريمة الخيل الجاهزة كما في سباق الخيل"..
والحسكة للجمل بستخدموها خاصة في حالة الشَدة "للقندفة" عند الذين يقصدون جمال المنظر ..
حيث يتم تزيينها بالكِنتِل وتكمل جمال منظر السرج او "المخلوفة" ..وعليهو "الطافات" الملونات ..وتبراهو خيوت المحقبة ..يا سلاااام ..
بعدين الحسكة وإنتا راكب في الجمل بجيك منها حبلين ايمن وايسر وجه الجمل ..لاكين في حالة الرسن العادي و في حالة الصريمة بجيك حبل واحد من راس الجمل ..
وهنالك ايضا "الشكيمة"..وهي عبارة عن شبكة منسوجة بلبسوها للجمل من قدام تغتي خشمو دا ..عندما يكون في مرحلة "التنشـيل " اي يمنعوه من الاكل والشرب ..
وتلاحظها في الجمال المعدة للسباق ..
وبيني وبينك انا شايف "الشكيمة" هي الاقرب لوصف نساء الرشايدة من الصريمة..
كثيراً ما اسمع في حكاويهم: "والله يا جماعة فلان دا عندو شافع ..بس شيطانا مصرّم.."..
الطيب ياخي ..
خالص التحايا ..
|
Post: #87
Title: Re: برق الصعيد
Author: nazar hussien
Date: 12-13-2006, 09:32 AM
Parent: #85
Quote: سمحة... وضوكا... لبن صـهباء ودخلها مبسط
شرفتا ريل... وكفيتا خيل.... وطولا موسـط
من عينة إرم الفيها التواريخ نصـت
حـسيت قلبى فارفنى وكبدتى أنقـصت |
هلا هلا....والله البوست دا كان فاقد شيخ العرب ودشنتير....
امانة ما فات بي جنس حدوثات....
جيتكم طربان سااااااااااااااااااكت....
والصريمة والرسن يا قيسان جيهتهن تب...
|
Post: #90
Title: Re: برق الصعيد
Author: سمية الحسن طلحة
Date: 12-20-2006, 09:39 AM
Parent: #87
مرحب الأخ نذار ربنا يديم البسط
والجابك يجيب شيخ العرب ود شنتير
لكم التحية.
|
Post: #86
Title: Re: برق الصعيد
Author: gessan
Date: 12-13-2006, 09:31 AM
Parent: #1
الاعزاء هنا ..
سلام تاني ..
|
Post: #88
Title: Re: برق الصعيد
Author: الطيب شيقوق
Date: 12-13-2006, 11:24 AM
Parent: #86
نواصل
|
Post: #89
Title: Re: برق الصعيد
Author: nourelhadi awad
Date: 12-13-2006, 11:40 AM
Parent: #1
يابت عز الرجال
القامو الليل وقط مانامو
مو مطر التريه
مطر العينةالبرز سونامو
ركازة الصعيف
بحر السخاالطمر الكرد هدامو
والله أكان ماأخاف الكضب برق الصعيد هدا عندنا قي الدوحة
مودتي
نورالهادي
|
Post: #91
Title: Re: برق الصعيد
Author: سمية الحسن طلحة
Date: 12-20-2006, 09:48 AM
Parent: #89
| Quote: والله أكان ماأخاف الكضب برق الصعيد هدا عندنا قي الدوحة |
ياود عز الرجال
ضو المكبسة ضلامو
كباس الدهم البتواردو عشامو
نورك باقى هادى للورا وقدامو
خاتم للنفايل وقايدن بزمامو
أخى نور الهادى والله برق الصعيد سوى البدع
عّم الخليج كلو...انهالت علينا الإستغاثات من كل حدب وصوب
(ناس ودطلحة عوووك أرحمونا كفانا) ميى زيفة وميى قرّة.
ودمتم
|
Post: #92
Title: Re: برق الصعيد
Author: الطيب شيقوق
Date: 12-20-2006, 10:02 AM
Parent: #91
Quote: نورك باقى هادى للورا وقدامو
خاتم للنفايل وقايدن بزمامو |
لله درك يا بت طلحة لعمري ما شهدت ابداع بلاغي بهذه الصورة
|
Post: #93
Title: Re: برق الصعيد
Author: سمية الحسن طلحة
Date: 12-20-2006, 10:08 AM
Parent: #91
الأخ الكريم / غـسـان لك الشكر أجزله فقد ملكتنا مادة قيمة جدا، شريط ود عباس الذى فقدته فى إحدى محطات تجوالى فى مدن الغربة الماشايفيين ليها نهاية دىوكذلك فتحت الباب على مصراعيه فى هذا الجانب الذى يطول شرحه (الرسن ، الهسال ، القلادة...) مفردات لمسمى واحد ،(عرقوبو وحنوه دور قادف النواتة
بشّـت دومتو خربتّو القلادة شتاتا ) اما الصريمة فهى غير الشكيمة التى تزود بحديد مدبب الروؤس أو بشوك السدر ، وغير اللجام الذى هو من الحديد وعادة يكون للخيل...وقد تحدث الشيخ عبد العزيز وود الشلهمة فى هذه المعانى منها:ـ
دوماتـــك خبـوبن فوق قلايــدك مارق
هاك طيّة هسـالك ياالعـفيف لا تدارق
أنس الليل مـع أب خُـلقاً نـزيـه مو شالق
بقى هاجسلي والرّوح للمروق بـتـّـالق
ونواصل....
|
|