Post: #1
Title: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر )
Author: سمية الحسن طلحة
Date: 02-11-2007, 09:46 AM
قبل البدء فى الموضوع أود أن أعتذر للأخ شنتير عن التأخير والله يعلم انه ليس عدم
إكتراث لكم أولامبالاة بكم ولكن (مانى لاقية إيدى ساااكت)
كما أرجو من الأخ أحمد يوسف أن يقوم بما يراه مناسباً تجاه بوسته لأنى
(مانى فايقة) أروغ ليهو فى ياتو صفحة أرجو أن تجدوا لى العذر لوكان ود الفراش ماهو فايق لأعز الناس عندو وقال ليهم :ـ 5شهور تمام والهلّ سايق
روحى مشحتفة وأنا مانى فايق
لهيج المشرق العند الشوايق
ردودة روحى أنا وكت أبقى ضايق
(لمن يهمه الأمر:ـ المشرق: أحلى بلح عند أهلنا الشايقية)
|
Post: #2
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-11-2007, 09:52 AM
Parent: #1
إذا أردت أن تظفر بمحاورة أستاذنا شنتيـــر
فالقي بطـُعـم كبير .... واقدح في شكسبير بغير علم كثير .
أرجو من الأستاذ / شنتيــر أن يتكرم بتصحيح الأخطاء التي ترد في بعض المواضيع المطروحة على المنبر وإبداء ملاحظاته هنا في هذه الدار .
|
Post: #3
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-11-2007, 09:59 AM
Parent: #2
كيفنك آ بت الحسن. أنا متابع كلامك السمح من بعيد لبعيد .. وما شاء الله عليك. أنا متونس بيكم.
الخلاني أكتب ليك هنا يا قريبتي هو تصحيح معلومة وردت في بوست أولاد البنا. الحاصل إنه لمّن شكسبير اتوفى، السودان ذاتو ما كان موجود. دحين أمسحي القصة بتاعة إدريس البنا دي قبل ما يجي زول يمسك فيها.
شكسبير مولود عام 1564 ميلادية ومتوفي سنة 1616. عليك الله الزمن داك في حاجة اسمها سودان دحين؟
أخوك شنتير ود الحسن
|
Post: #4
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-11-2007, 10:02 AM
Parent: #3
بالنسبة لي حينما سمعت د . إدريس البناء يتحدث الى برنامج قناديل قبل عامين تقريباً عن الشاعر أحمد محمد صالح وذكر هو ومن معه في تلك الحلقة مايلي :
1 ـ أن الشاعر أحمد محمد صالح مولود عام 1896أو 1894 م وتوفى 1973 م
وإنه إقتبس من إبن الرومي في داليته :
غادة بها من الغصن قد #### ومن الظبي مقلتين وجيد
2 ـ أن الفارابي هو أبوالموسيقى
3 ـ النسيب ليس غزل محض وإنما هو مرتبط بجودة مزيج المديح
واستدلوا بإمريء القيس في الجاهلية والبحتري وأبىتمام في القرن الثامن وأن الغرب نقل من الشرق العربي وأفسد ولم ينقل من اليونان أو الإغريق وكل ذلك نقل من بغداد
4 ـ شكسبير نقل من أبوصلاح ( ياجوهر صدر المحافل )
5 ـ دانتي أخذ من إبن طفيل .
هذا مادونته من تلك الحلقة وليتني قمت بتسجيلها حتى أستحضر لكم المقطع الذي قام بترجمته د. إدريس البناء من تلك الأغنية .
هذا مالزم توضيحه .
|
Post: #5
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-11-2007, 10:05 AM
Parent: #4
وبالنسبة للفقرة رقم 3 : فقد إستمعت إلى علماء بدرجة الاستاذية ( إختصاص في البرمجة الآلية / وعلم الحيوان ) ذكروا من ضمن مواضيع شائكة الآتى:ـ
1ـ أن الجاحظ فاق دارون فى نظريات علم الحيوان
2ـ أن الحرير كان فى بورصة بغداد قبل الصين
3ـ وان مدة 600عام من إحتلال عثمانى للبلاد العربية لاتضاهى بـ1600سنة عاشتها أوربا فى ظلام دامس
4ـ ان العرب لديهم قابلية جينية للتطوير واستدلوا بحملة الشهادات فى بلدان الغرب
وأن الغرب أدرك ذلك مما حدث من فاعلية فى العصر العباسى ولذلك فتت تلك الآلية حينما شعر ببوادر حراك فكرى وعلمى (1963 ـ1980) على أسس عقيدية.
|
Post: #7
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: abuguta
Date: 02-11-2007, 10:13 AM
Parent: #3
سمية :-
والله انت قوية
كيف بالله عليك قدرتى تسطادى ..شنير شيخ عروب البورد
اسدالعتامير اللابد فى جحورو
ما بنجح امر غير انك تشورو
زول حق صيحيح لا كضب لا زورو
شيخا فى بنية الناس تجى تزورو..
اكتل دى ياجاد....
شنتير بالله عليك الله خلى دروب الترك دى وتعال مارق
لخيمتك ولع فيها التقابة..اضرب زمبارتك ونم نمتك
البطانة هبت عليها سحائب..صيدها بقى ناجع .ويت ام ساق شبعت.
بت طلحة فى البورد برقا شلع
وفى الدوبيت سوت البدع..
وخلت الزقلل خشع..
|
Post: #6
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: شكرى سليمان ماطوس
Date: 02-11-2007, 10:05 AM
Parent: #1
سلام يــا
المـلــــكة ،،،،
لو أمكن نطّلع على قصة الرقم الكبير إدريس البنا،،،
ش
|
Post: #8
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-11-2007, 10:19 AM
Parent: #6
وعليكم السلام
يــــــــــا مــــــــــلك الحقيبة
شكري سليمان ماطوس
القصة إنو أنا أوردت مداخلة فى البوست الذى تحدث فيه الأخ أحمد يوسف أبوحريرة عن أسرة البنا
تقول: أن إدريس البنا قال: أن شكسبير أخذ من أغنية ياجوهر صدر المحافل.
|
Post: #9
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-11-2007, 10:25 AM
Parent: #8
حسب علمى الضئيل أن حقيبة الفن فى السودان بدأت فى أوائل الخمسينات،وقلت فى نفسى ربما أكون فهمت الكلام معكوساً ربما يكون أبوصلاح أخذ من شكسبير أو أنهم يتحدثون عن (شيخ زبير) وليس شكسبير كما قال القذافى،وقد ناقشت هذا الأمر مع أحد الأخوة الصحفيين فى تلك الفترة (قبل أكثر من عامين) فى أحد الندوات الإسبوعية التى كان يقيمها أدباء وشعراء وفنانون وتشكيليون وصحفيون فى إحدى قاعات النادى السودانى بمسقط، وأذكر ليلتها اننا كنا فى حضرة التشكيلى العالمى / سيف آل لعوتة ، وقال لى الأخ الصحفى مازحاً:ـ( د. إدريس دا خرّف ولاشنو؟)
وقد تعمدت نشر هذا الكلام حتى أجد منكم من سمع أوسجل هذه الحلقة فيقر أو ينفى
كلامى ،فقد وجدت من كنا نتوسل إليه أنا والأخ قيسان ليخت أضانو معانا فى برق الصعيد ...فياله من مكسب .شــــــــــــــــنتييييييير بى لحمو وشحمو>>>
|
Post: #10
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-11-2007, 10:54 AM
Parent: #9
Quote: لأنى
(مانى فايقة) أروغ ليهو فى ياتو صفحة |
سمية اختى عليك الله رفقا بالنوبيين (اروغ) ( ياتو) بتلوعهم منا
|
Post: #11
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: Ahmed Yousif Abu Harira
Date: 02-11-2007, 12:30 PM
Parent: #10
سمية كيفنك ،،،
تعرفي في ثلاثة اشخاص في المنبر ده انا بفتش عليهم بالفتاشة ..احدهم الأديب محسن خالد ولميت فيه امس بالصدفة ...والأخ/ قيسان ولا (غسان) والأخ/شنتير ده...طبعا نحن (جداد) يعني NEW علي المنبر والناس ديل سابقننا بي كتير وباين عليهم طلتهم بقت ماها كتيرة بي هنا... على العموم إنشاء الله شركك ده يشيل في اي واحد منهم علشان نعرفهم أولا ، ونستمتع بي حديثهم ثانيا...ونستفيد من علمهم ورأيهم ثالثا...
انا وحاتك إ(ن)تي براي ماني فاضي.. اليومين ديل زي ناس الكديب ماني لاقي إيدي تب وفرصتي لدخول المنبر ده في حدود المتاوقة وأكسع راجع علي الكم المصوبر من السُخرة النحن فيها دي... لكن المواضيع دي كلها محفوظة وبنيجيها كان الله رفع الاصابع علي الكيبورد الملعون ده...
تحياتي وأبقو طيبين
|
Post: #12
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: abubakr
Date: 02-11-2007, 08:34 PM
Parent: #1
اها دييل قرايبنا :
ويليام شكسبير-انجليزي- 1564-1616
اليغري دانتي - ايطالي - 1265-1321
|
Post: #13
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-11-2007, 09:34 PM
Parent: #12
Quote: ويليام شكسبير-انجليزي- 1564-1616
اليغري دانتي - ايطالي - 1265-1321 |
يعلم الله انك عميق ومتواضع يا باش الله يديك العافية
|
Post: #14
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: خالد المحرب
Date: 02-12-2007, 11:11 AM
Parent: #13
بت الحسن سلام عليك والله بوستك
قشط راسى دحين المعذره عندى ابل
رايحه ماشى اروغلهن ودعتك الله
|
Post: #15
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: عفاف أبو حريرة
Date: 02-12-2007, 03:24 PM
Parent: #14
يا بت الاكان الحاره جات بحيرو الجبل في الثبات
انتي يابت الشيخ الحسن وهاله النور اكان اخطيتي
في معلومه شوفي خطاك جاب منو جاب ضرس كبير
وفهم عالي وشرح خلف الكواليس في زمن الضرب تحت الحزام
شنتير ده شكله زي ليلة القدر وانتي اهل العباده
ومحبه الحبيب صلي الله عليه وسلم
نحن متابعين في ادب وصمت
وياشنتير بت طلحه اهل لي الاكرام ياكريم
امتعونا امتعك الله باالعافيه في الدنيا
وصحبة الرسول ص في الاخره
ام احمد
|
Post: #16
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: Ahmed al Qurashi
Date: 02-12-2007, 06:43 PM
Parent: #15
الأخت الأديبة الأستاذة / سمية الحسن طلحة
دائما في بوستاتك نلتزم الصمت ونجلس في أدب للاستمتاع بما تكتبين أما عن تاريخ أغنية الحقيبة فالبعض يقول إنها أغنية مابين الحربين الأولى والثانية ولكن بدايتها الحقيقية كانت في زواج بشير الشيخ سنة 1923 عندما اضرب الطنابرة عن الغناء احتجاجا على الحاج محمد احمد سرور الذي كان يصر على الغناء والطنبرة في نفس الوقت فمنعه شيخ الطنابرة عبدالغفار وعندما رفض امتنع عبدالغفار و طنابرته عن الغناء وكان ذلك أول إضراب في السودان لفنانين بل أول إضراب لفئة منظمة في السودان حسب علمي ( أيضا كان هنالك إضراب للفنانين سنة 1953 حيث رفضوا الغناء في الإذاعة ما لم تحقق مطالبهم ولقد اضرب كل الفنانين عدا ابوداود الذي رفض الإضراب بحجة أن الفنان لا يتوقف عن الغناء ...وكان هذا الإضراب فرصة جيدة لظهور بعض الفنانين الجدد أمثال محجوب عثمان وصلاح محمد عيسى ورمضان حسن وغيرهم )...ذكر ديمترى البازار في برنامج تلفزيوني كان يقدمه الفنان عبيد الطيب إن بداية الحقيبة كان سنة 1923 ولكنني أميل إلى إن البداية كانت زواج بشير الشيخ سنة 1919 والذي أرخه العبادى بهذه الأبيات ...
جزأهم الله خير
كل الحساب حسبولنا
جابو لنا الكراسي
وفى الوساع نصبولنا
من جهة التكرم
كادوا أن يحبولنا
ما خلو لنا شئ
إلا الطنابرة ابولنا
وأول أغنية في الحقيبة هي أغنية ببكى وبنوح وبصيح للعبادى وشكرا لك ولبوستاتك الرائعة
|
Post: #17
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: Shinteer
Date: 02-13-2007, 02:18 AM
Parent: #16
يا بت ناس طلحة والرباعة الكرام .. شن حالكُن يا رايقين؟
عدم المعروض جفا. مستمتع بمجادعاتكم وربقيكم من الخارج، ودخول الحلبة يفسد متعة المتابعة وأكل الباردة. ثم خامساً: انتي يا بت الحسن كيف حفظتي كلام أهلنا (أهلك) الخشن ده؟ ده كلام ناس شيقوق ذاتهم، وكل أفندية القويسي، يتعتعوا فيه.
يا عيال شلاّعة بقيتوا لينا زي عِريج التي لم تجد في طابور العِيَن فرقة تخت فيها سُقاها غير آخر الصف .. ويا عريج سبب واحد يخليك تجي في آخر العِيَن مافي. هسع انتو ظهرتو بعد عرضتنا اتفرقت، وبقت مهمتنا تِصِدِّف المقروع وبس .. وخلّينا السَّدَر لاسيادو.
==
الرواغة: هذه المفردة بدأت تفقد شعبيتها تحت هجمة "التفتيش والتِفِتِّش" مع إنها كلمة خفيفة وحروفها لا تلفظها الأُذن. وهي كلمة فصيحة كمان، مع بعض اللحن الطفيف.
===
وإلى لقاء
|
Post: #18
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: b_bakkar
Date: 02-13-2007, 03:51 AM
Parent: #17
ياناس "الضهرة" والبطانة،
ها ناس سلام عليكن،
أنا زولا من "العاديك"
وزي الشام فيكن ريحة أهل كدي، أنا قايل..
كدي خلونا نتعارف شوية يا شنتير
مرة كان أخونا حيدر بدوي جاب سيرتك في كلام عابر بيناتنا
بديك عنوان بريد إلكتروني باكر إن شاء الله
لأنو عنواني الحالي "مسوكر"، ما بستقبل إلا من الناس العندي عناوينهم
بت الحسن ود طلحة سلام عليك
عندي أخو من الأخوان أبوه بطحاني وأمه من رفاعة، من العوضية، الجعليين. مرة سأله راجل كبير من أهله البطاحين من إسمه. قال ليهو: إسمي عادل. الراجل قال: يا ولدي عادل دا إسم رجال؟؟ أبوك دا ما لقى ليك أصلو إسم إسميك بيهو غير عادل!!
فنحن جيل قديم، اسمانا كلها أحمد و محمد وعلي وعبد الله وعوض الكريم وطلحة والزبير،والصديق والبشير،وبابكر ، وفاطنة وعشة وآمنة وبتول وريا والتاية وستنا وزينب وبقيع، ونخل،وكلتوم.. إلخ
ويبدو أنك جيل جديد ورانا، بدأ عندنا نحن بأسم أختى بدرية المولودة عام 1968، وكمان جات فاطنة أختي الوراي وسمت بتها شذي!!
لي باكر كان ربنا أحيانا
[B/]
|
Post: #19
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: Ahmed Yousif Abu Harira
Date: 02-13-2007, 07:28 AM
Parent: #18
.
.
شنتير إزيك
وكيف حالك...
وإن شاء الله تكون جيت راجع من شنجكو-تاكادانوبابا-واسيدا أم إسما يكسر القلم دي !!
وما تقول (لي) لا يوم الليلة أكلتك المفضلة هي (الكورتيه)...
ده طبعا إن بقت أياها (الكورتية) الأنا بعرفها وليس هنالك خطا إملائي كأن تكون مثلا اكلة (كورية -من كوريا) والتصق حرف التاء بها سهوا!!!
طبعا الراجح إنك قاصد الكورتية بموجب مكان الميلاد (عليو النعام) !!
وزي ما ذكرت نحن فعلا جينا مستاخرين شوية ، لكن دايرين نرجعكم لدوركم (الفاعل) الأولي ودور (الصدف) ده يا الليلة ما بقيتولو...
ونتعشم في ردكم ردا جميلا إلى المنبر للأسباب المذكورة آنفا..
ودمت
احمد يوسف
|
Post: #20
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: Shinteer
Date: 02-13-2007, 08:52 AM
Parent: #19
إياها الكورتية ذاتها يا أحمد، كورتية عليو النعام وأبو زمَيِّم. شفت الترف ده كيف؟ والتحلية لِـبـا بينو وبين السمغ مافي فرق غير الطعم، وختامه باجقلي تقييييل نهارك كلّو تبزّغ في تِفْـلو من خشمك وما تلحقلو حد. حاجة زي الكضب.
وأرقد عافية .. ولازم تشبُل أكان نومك تقيل.
|
Post: #21
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: خالد المحرب
Date: 02-13-2007, 12:14 PM
Parent: #20
| Quote: ولازم تشبُلولازم تشبُل أكان نومك تقيل. أكان نومك تقيل. |
هواء نقى 10السلام عليكم شنتبر
لبن الضان فيه سعرات حراريه عاليه جدا
ولكن شتان بين سعرات الببسى ولبن الضان
دايما الراعى نومو تقيل لهذا السبب
عندما اذهب الى البطانه دايما اقعد اعمل
مقارنه بين الحياه فى المدينه والباديه
اشياء كثيره احسدهم عليها وهم لايعرفوا
اهميتها
0%
نوم فى اول الليل وده بيت القصيد
عدم تناول الاكل والشرب المحفوظ
ومافيه من سموم وكيماويات
وطبعا الواحد الى يوم موته بكون ماشى على كرعيه
وده الفرق 0 ناس الرفاهيه بتكون حى نعم ولكن مريض
نصف العمر بكون راح هدر
هذا مالفت انتباهى الى هذه المداخله وسرحت فى الموضوع فعذرا بت طلحه
وشكرا شنتير كان نومك تقيل اشبل الكبش فى كراعك وارقد
|
Post: #22
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-13-2007, 03:45 PM
Parent: #21
| Quote: انا وحاتك إ(ن)تي براي ماني فاضي.. اليومين ديل زي ناس الكديب ماني لاقي إيدي تب وفرصتي لدخول المنبر ده في حدود المتاوقة وأكسع راجع علي الكم المصوبر من السُخرة النحن فيها دي... لكن المواضيع دي كلها محفوظة وبنيجيها كان الله رفع الاصابع علي الكيبورد الملعون ده... |
الاخ احمد ابو حريرة
الباشمهندس ابو بكر
الاخت سمية
ام احمد
ود المحرب
شنتير
ابو قوته
وكل الاخوة المتداخلين في هذا الموضوع مرحب بيك آلاف - لقيت البوست ده هسع - بس قبل ابدا يا اخونا ركزوا لي الجنى شنتير ده اهله من وين . الزول ده زول بطانه لكن زى ما قال ابو بكر الاسم مو اسم بطانة .
ناس الكديب يا ابو بكر المذكورون اعلاه ديل ناس الحشة التانية مش حشة المر في الزراعة . والكتيب حشو حلو بالحيل خاصة اكان السماء مغطياهو تخاية ( التخاية هى السحابة التي لا تمطر )
شاعرنا قال
فرع المحلب الشاتلو ود المحرب جنب القيف ( القيف شاطي البحر)
سيدو مكتدبو وساقيهو صيف وخريف
بيسالك الله يا الدكتور بتطعنو كيف
انا ياني ساكن في البوست ده كتر خيرك ود المحرب
|
Post: #23
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: Ahmed Yousif Abu Harira
Date: 02-13-2007, 05:21 PM
Parent: #22
الطيب كيفنك ،،،
| Quote: بس قبل ابدا يا اخونا ركزوا لي الجنى شنتير ده اهله من وين.؟ |
شنتير دا يا شيخ الطيب من (عليو النعام) وتقع (سافل القرضة وصعيد للعين ) هذا على حسب زعمي (وتهجمي) ويمكن الإستعانة بشنتير زاتو للاستدلال عليها.. وإن تعذر فما علينا إلا بـ (غوغل إيرث) ينكتها ليك حتى إن كانت في واق الواق...
لكن يبدو لي أنها في قلب البطانة.. لأنو أنا بعرف وقد سمعت بـ (عليوات) كثر منهن (عليو الحاج) وعليه إذا كانت قريبة من (عليو الحاج) فهي ليست ببعيدة عن جبل اللبيتور!!!
| Quote: الزول ده زول بطانه لكن زى ما قال ابو بكر الاسم مو اسم بطانة . |
بالعكس أسم شنتير دا لا يوجد ولا ينبغي له ان يوجد إلا في البطانة..إنت قايل أنا بفتش له من غبا ؟؟؟
وقد سمعت بأن مؤلف/أحد أبطال المناحة الشهيرة بـ (قصة أُمْحُمَدْ زين) أسمه ود شنتير والمناحة طويلة وشهيرة ولازم شنتير يعمل لنا عليها شوية ضوء ومنها:
عمي أديتو ......قطاعه
لاها جساره ولا ها بتاعة
الساق مني ...أم صقاعه
عسلية الأهلو ....رفاعه
عمي قطاعتي ......تلاقي
في حمد .....وفي الرضي
في ركبو البي ...تويلي
الساق مني القاد..حرتي
يا ناس الركب...الفازعين
تعالوا شوفو ...محمد زين
يبقى أم خد .....درت وين
سافل القرضه وصعيد للعين
لكن أنت يا الطيب ما علقت علي (الكورتية) أكلة ود شنتير المفضلة ، ولباهو القال زي السمغ ، وشاهيهو الباجقلي (القال) النهار كلو تبزغ في تفلوا دا ليه؟؟؟
أكان ما عرفت الكورتيه واللبا المسمغ دا إيانا المارقنك زول (مشاريح) ساكت من الليلة دي !! وأبوبكر سيد أحمد سيشهد على ذلك..
ودوموا بخير
شنكل (علي قول ناذر الخليفة)
---------------------------
شوفوا لنا سمية دي وين ؟؟
|
Post: #24
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: Shinteer
Date: 02-13-2007, 07:58 PM
Parent: #23
| Quote: وقد سمعت بأن مؤلف/أحد أبطال المناحة الشهيرة بـ (قصة أُمْحُمَدْ زين) أسمه ود شنتير والمناحة طويلة وشهيرة ولازم شنتير يعمل لنا عليها شوية ضوء |
عافي عليك يا أحمد أبو حريرة. قصة أمحمد زين ود عمر ليست مناحة. هي من صميم شعره هو، عليه الرحمة. وهو فعلاً ليه علاقة بالشناتير لأنه أمه شنتراوية (من إندينا) أما أبوه فمن أهلك اللحويين. الله يرحمه تاني. وطبعاً عارف نهاية حياته حيث قتله رواعية الضان، يا خالد ود المحرب، ورموا جِتتو في عضلة بين حجار القليعة البويضاء .. يا ود شيقوق يا إنت. القليعة البويضاء دي ناس ود أب جن وأهلك الحَمَدَة بعرفوها زي جوع إبلهم.
حكايتك حكاية يا ود شيقوق الداير تمرقني من وادي أب قَنافِد حوفا. ها زول أنقرع.
|
Post: #25
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-13-2007, 08:10 PM
Parent: #23
| Quote: لكن أنت يا الطيب ما علقت علي (الكورتية) أكلة ود شنتير المفضلة ، ولباهو القال زي السمغ ، وشاهيهو الباجقلي (القال) النهار كلو تبزغ في تفلوا دا ليه؟؟؟ |
افو افو افو يا ود (ابو حريرة) الكورتية انا ما بعرفها والله اكان عملتها قولدية انا بعرفها الاولى اكلة بتاعة عصيدة فطيرة والتانية وزنة ايام زمان واللباء ده ذاتو البجننى وبخليني اجنن امي بعد البقرة تلد جديدة والله اكل فيهو نامن ادشى .
اما شاهيك الباجلي ده هو الشاى السبارس (اى شاى الحليب بدون سكر ) تلقى الرعيان شايلين الشاى في جرباتهم بدون سكر وده هو السبب البخلي زوجاتهم يطلقنهم طواااااااااااالى وبوريك يا ضو القبيلة برااااااااااااااااااك .
|
Post: #26
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: b_bakkar
Date: 02-13-2007, 08:16 PM
Parent: #23
إلى بت الشيخ طلحة وإلى شنتير وبقية عرب البطانة
هذا ما أثارته مجادعاتكم
نوستالجيا إلى أرض البطانة
الضحوي المزرقن في نواحي القبلة
جاني دعاشه رد الروح وأنعش وبلَّ
أحيا اشجاني خلى عيوني تفرغ وتملأ
طراني الديار البي البرش والشملة
حليل أهلي اللكانوا معايَ مفرد وجملة
جدي الفارس المهيوب بشوش الطلة
خيلاني الفضُلهم فياض إزيل العلة
تب ما شالوا قشة على طفل أو طفلة
أعمامي البسوموا حياتن إن جات كتلة
والقوز المخدر قشه ما بين الودي والنزلة
والبهم البتاقز من صخور لي رملة
والأرض التقول توب العروس أم حِفلة
وا آسفاي على سفير النجيع والهقلة
داير الليم ولو في تربة الأرض المقامها معلا
أبحث من زمن عن عرب البطانة في الإنترنت، لعلي وجدت بعضهم الآن
شنتير،
هذا هو عنوان بريدي الإلكتروني [email protected]
أريد أن أتخابر معاك، ضروري، أرجو أن تبعث لي عنوانك
مع شكري وتقديري
|
Post: #27
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: Ahmed Yousif Abu Harira
Date: 02-13-2007, 09:00 PM
Parent: #26
b_bakkar
كيفنك،،
مرحبا بك وحباب بحر العاديك...
ولفظة (العاديك) دي بتذكرني قصة:
قالوا يا سيدي في سيدة شكرية وداها ولدها الحج وبعد ان فرغوا من الشعائر المهمة قالها: تعالي يا يمة النسقيك من موية زمزم... ومعروف انو الشكرية واهل منطقتهم بقولوا للنيل الأزرق (العاديك)..ومعروف كذلك أن موية زمزم فيها شوية ملوحة.
وبإختصار لم يرق طعم ماء زمزم للحاجة... وولدها كان عايز يعرف ردة فعلها على شرب ماء زمزم لما يعلم من فوائدها وعظمتها وأنها لما شربت له وعندو خلفية كاملة عن قصتها وخلفيتها التاريخية الشي الذي لا يتوفر لوالدته...
أها هنا سألها سؤال مباشر وقال لها:رأيك شنو يا يمة في موية زمزم...؟؟؟
فردت عليه وبكل جرأة : بري يا يابا موية العاديك أخير!!!
مرة أخرى مرحبا بك يأ ....b_bakkar ونرجو أن تستمتع معنا وتمنعنا بي ونستك..
|
Post: #28
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-13-2007, 09:23 PM
Parent: #27
الاخ
b_bakkar
جانا دعاشك ورد الروح وانعش وبلة - حبابك عشرة في راكوبة اهلك طالما انت
زولا بعرف الضحوي
زولا بعرف السماء من صباحو منيل
زولا بيعرف القبلي ابو فاتحة اللي سماهو متقل
زولا بيعرف النترة والطرفة والجبهة والخيرسان والصرف وعريج
زولا بيعرف النال والانيس والرزة
زولا بيعرف الباعوضة والسريتة
زولا بيعرف البيّيض وام ماملايحة
زولا بيعرف الهدرة والدومات والدلاعة
زولا بيعرف الطباعة والمحارة والشخلوب
مرحب بيك
اخوك ود شيقوق
|
Post: #29
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-13-2007, 09:38 PM
Parent: #26
ســــــــــــــلام عليكم ياوجوه الخير
كدى انمسك ليكم الدرب من قعرو نبدأ من الآخر
من الزول الغنومابى دا
مرة نزلوا عندنا ضيوف وطبعا العرب أهم سؤال عندهم :ـ نفرك شنو؟
فلما تسآءلوا فيمابينهم نطت واحدة لتخبر عن أصلهابأبيات جميلة أذكر منها:ـ
ضنب الدابى جر
غنومابى حـــر
وسؤالك عن حداثة إسمى كدى انزيدك من الشعر بيت
والدتى الله يديها العافية إسمها هالة وخالاتى أروى والشيماوحبوباتى نتيلة ولبابة وسفانة
وفاختة وحمنة والأسامى دى أنالمن قريت كتاب( بيت سيدات النبوة) حتى عرفتها
ــــــــــــــــــــــــــــــــــــــــــــــــــــــــــــــــــــــــــــــــــــــــــــــ
حليل أهلي اللكانوا معايَ مفرد وجملة
جدي الفارس المهيوب بشوش الطلة
خيلاني الفضُلهم فياض إزيل العلة
تب ما شالوا قشة على طفل أو طفلة
أعمامي البسوموا حياتن إن جات كتلة
والقوز المخدر قشه ما بين الودي والنزلة
والبهم البتاقز من صخور لي رملة
والأرض التقول توب العروس أم حِفلة
وا آسفاي على سفير النجيع والهقلة
داير الليم ولو في تربة الأرض المقامها معلا
انشاءالله تنلم عليهم بالعافية والسلامة.
|
Post: #30
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-13-2007, 10:05 PM
Parent: #29
العزيز/ شنتير
الرواغة دى جبناها ليك ات نعمننا بنروغ لك من زمنا كان فيهو برق الصعيد شالع
وات ظنيتك حبستك الدهاريب ما جيتنا مارق بى هينة
وهى فعلا فصحى تدل على سرعة الحركة فى البحث
(يعطيك من طرف اللسان حلاوة ويروغ منك كما يروغ الثعلب)
والعرب لمن يكون عندهم بهايما رايحات مابقعدوا يجو طايرين يقولوا لك والله
مودرين ماشين نروغ كدى على السيالات ديل
طبت وطاب لك المقام بيننا وفعلا من يضحك أخيرا يضحك كثيرا نحنا جينا فى الآخر
لكن قدرنا نكسبكم
|
Post: #31
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-13-2007, 10:20 PM
Parent: #30
Quote: شنتير بالله عليك الله خلى دروب الترك دى وتعال مارق
لخيمتك ولع فيها التقابة..اضرب زمبارتك ونم نمتك
البطانة هبت عليها سحائب..صيدها بقى ناجع .ويت ام ساق شبعت.
بت طلحة فى البورد برقا شلع
وفى الدوبيت سوت البدع..
وخلت الزقلل خشع..
|
اب قوتة ياكمد الوجع
ضو العتم ليلو وهجع
وين دكين سريع الفزع
يكتل شقيقك الأنزرع
|
Post: #32
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-13-2007, 10:33 PM
Parent: #31
Quote: اها دييل قرايبنا :
ويليام شكسبير-انجليزي- 1564-1616
اليغري دانتي - ايطالي - 1265-1321
|
اكان كدى الغلات فوق شنو
قرايب قرايبنا اياهم قرايبنا
يعنى ناس شكسبير ودانتى طلعوا زيتنا فى بيتنا.
|
Post: #33
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-13-2007, 10:43 PM
Parent: #32
Quote: بت الحسن سلام عليك والله بوستك
قشط راسى دحين المعذره عندى ابل
رايحه ماشى اروغلهن ودعتك الله |
ود المحرب انشاء الله جمع بى إبلك
بشوفك جيت صاد
دحين فى نعمة اكتر من ألبل!؟
بدور أشوفك الإجازة الجاية لابس العشارى وشاد فوق البشارى
|
Post: #34
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: b_bakkar
Date: 02-13-2007, 10:48 PM
Parent: #33
الضحوي المزرقن في نواحي القبلة
|
Post: #35
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: b_bakkar
Date: 02-13-2007, 10:58 PM
Parent: #34
الأخوان،
خليكن شوية مع الضحوي المزرقن دا
باقي أنا مشغول هسع شغلة بطالة
وأترك باقي الونسة والردود إلى لقاء قريب
|
Post: #36
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-13-2007, 11:00 PM
Parent: #34
| Quote: الضحوي المزرقن في نواحي القبلة |
هلا هلا انا شايف بريقا يرفرف من الصباح في محل الشخيتير دااااااااااااااك
ناس السدرة ( بفتح السين يا ابا بكر والسدرة هي الذهاب للزراعة) خلوا السدرة ولزموا بيوتهم عايزين يشوفوا آخر الضحوية المهضلم سحابها من قدام .
|
Post: #37
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-13-2007, 11:03 PM
Parent: #33
| Quote: شنتير ده شكله زي ليلة القدر وانتي اهل العباده |
بسم الله ماشاء الله لاقوة إلا بالله
ياجماعة ماكتلتونا بالحلاة دى ماكفاية علينا صورة خالد
وانتى مالك تتشكى وماك شديدة بووشك؟ ياجبل العاديك ياالطوال إيديك
أقيف طولك وسوى الهولك لى عفاف ووليداتا وأبو وليداتا
تعرفى ياعفاف انتى كشييفة أنا لمن لقيت رسالة شنتير قلت جاتنى ليلةالقدر لحد عندى
حويناك الله ورسول الله وأهل الله والسبق أولياء الله .
انا عارفة انتى مالك ومال الصوفية دا منى انا براى ليك.
دمت بعافية
|
Post: #38
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-13-2007, 11:20 PM
Parent: #37
Quote: جزأهم الله خير
كل الحساب حسبولنا
جابو لنا الكراسي
وفى الوساع نصبولنا
من جهة التكرم
كادوا أن يحبولنا
ما خلو لنا شئ
إلا الطنابرة ابولنا |
الأديب الأريب /احمد القرشى
هنا بين ظهرانينا!!! لوكنت اعلم أن هذه الريح تحملك الينا
لفتحت أبواب هذه الدار منذ أمد
جزاك الله عنا خيرا على هذه المعلومات القيمة
وجودكم أعطى البوست قيمة لاتقدر بثمن ونطمع فى المزيد
نأمل بل ونرجو التواصل
|
Post: #39
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-13-2007, 11:37 PM
Parent: #38
Quote: عمي قطاعتي ......تلاقي
في حمد .....وفي الرضي
في ركبو البي ...تويلي
الساق مني القاد..حرتي
|
أحمد ما تسعل منك الشينة انشاء الله
والله شتلة وشاتول وبشتون سااااكت
عمى قطاعتى تلاقى
فى بكرو وفى تنى
فى امحمد وفى على
الساق منى البى تلى
عمى أديتو قطاعة
لاها جسارة لاها بتاعة
الساق منى أم صقاعة
تولية الأهلو رفاعة
فرع القرض الكابى
تحتو بكر الدابى
انا جنيت يا أصحابى
من أب سنا قصابى
|
Post: #40
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-13-2007, 11:44 PM
Parent: #39
| Quote: اما شاهيك الباجلي ده هو الشاى السبارس (اى شاى الحليب بدون سكر |
ياشيقوق أنا غايتو الشاى الباجقلى عندى
المسهمج يعنى طعام خفيف ولاهو طاعم ولاهو مسيخ
خلى شنتير يحكم بيناتنا
|
Post: #41
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-14-2007, 00:14 AM
Parent: #40
| Quote: الضحوي المزرقن في نواحي القبلة |
ياشيخ الغنوماب مالك علينا آزول
الفنجرى قالها:
سماك زرقتو زى الطاجن الممسوح
واتكل سحابك زى سطور اللوح
اتحليتى بى طيبا روايحو تفوح
فيك ريحة دعاشاتا ترد الروح
|
Post: #42
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: خالد المحرب
Date: 02-14-2007, 00:24 AM
Parent: #40
الاخت سميه انا داير الشنتير ادينا اخروا
ونعرف الشنتير 0
عشان دايرين نحس بى وضعنا نحن ناس بندى الجلسه حقها
بى مزاجنالى الزول البفهمنا ويعرف نحن منن عليك الله ياسميه
نحن منن لو ما انت انا ما بقولا
دحين ياشنتير عليك ان تركب البعير وتشق ام هبج وتمر بى العلوى
14 وكسمور والقليعه البويضا وابصوفه ادابلك ومسعود والنديوات
وارجع صعيد لامن تصل جبل اللبيتور0
ابقى نازل نوخ عندنا
|
Post: #43
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: b_bakkar
Date: 02-14-2007, 04:40 AM
Parent: #42
الطيب شيقوق،
أحمد يوسف أبوحريرة
ربنا قال "وإذا حييتم بتحية فحيوا بأحسن منها أو ردوها"
أنا حالف إذا بقيت حي أعمل ليكم عزومة في قلب البطانة نتلاقى فيها كلنا بي وليداتنا "خريف كامب"
ومعاكم طبعا كل من تثبت له علاقة بالبطانة أو يحبها ويحب أهلها لله في الله
سمية بت الحسن
أولا، إذا كنتي إنت بطحانية، وهذا ما أكاد أجزم به من إسمك وأسماء أمهاتك، فإني قد أكون سرك. حبوبتي أم جدي لأمي، ستنا بت محمد علي "بت قش البنات" بطحانية صر..
أنا بحب الغنوماب وعندنا معاهم سرارة، لكني ما غنومابي، (شكري؟ نعم): عفصي (بفتح العين والألف) جدنا الكبير كان إسمه عفيص (بضم العين وسكون الياء) .. ومن جدود بعض بطون الشكرية: رتيم ومهيد وعيش وحسان وعدلان والنور وأب سن الكبير طبعا، وغيرهم.. بس لو ما المناسبة دي، أنا عادة ما برتاح لي الكلام عن القبائل في هذا المنبر المأفون، وهذا الزمن المأفون
كانت حبوبتي أم أبوي (مسلمية حلاوية) تسميني على شعيت شيخ الغنوماب، كان رجل قليل وقصير وعنده شنب ضخم،وقلبه حار جدا، "شعت" يعني. بقولوا عنه على سبيل المبالغة لمن إركب جمله بيغتس في المخلوفة أو الحوية.. بس أناماني قصير وقليل زي شيخ شعيت، لكن كان قلبي حار، خجول وهادئ، لكن البيختا علي الله قال بي قولو. هذا هو سر الإسم، الذي اخترته لعنواني البريدي الخاص بمخاطبة ناس البطانة.
يا ريت لو ناس البطانة يقدروا يعملوا ليهم في المستقبل منبر خاص جدا للونسة الخاصة عن البطانة، وديانها وإيديها ومراعيها، وقبائلها، وتمازج القبائل فيها(أنا شكري، لكن عندي حبوبة مسلميةحلاوية، وحبوبة بطحانية، وأخرى جعلية، وهن بدورهن ربما يربطنني بجميع قبائل السودان، كمان برضو عندنا حبوبة من العنج "الفونج"
ولأهل البطانة هموم كثيرة بالطبع ليس أقلها المحافظة على تراثها الشعري والقصصي الثر والابعاد الإنسانية العميقة والرائعة في حياة سكانها البدو. لقد أصبحت البطانة الآن مهددة في وجودها نفسه. وللحديث عن هذا مجالات أخرى. جئتكم لأروح عن النفس قليلا، وأعود إلى تلك المجالات.
البدوي إذا لاقى البدوي تحت ضل شجرة أتغدوا تحتها وقيلوا، لمن يوادعو بعض إكون كل واحد عرف أصل التاني وفصله، أولاده وأخوانه وأعمامه وأخواله، وحسبه ونسبه وأهله وقبيلته وغنمه وإبله وبقره. تلك هي البراءة الأولى. وليست وقاحة كما نشعر بها اليوم في ظل الحضارة.
[B/]
|
Post: #44
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-14-2007, 06:27 AM
Parent: #43
| Quote: يا ريت لو ناس البطانة يقدروا يعملوا ليهم في المستقبل منبر خاص جدا للونسة الخاصة عن البطانة، وديانها وإيديها ومراعيها، وقبائلها، وتمازج القبائل فيها(أنا شكري، لكن عندي حبوبة مسلميةحلاوية، وحبوبة بطحانية، وأخرى جعلية، وهن بدورهن ربما يربطنني بجميع قبائل السودان، كمان برضو عندنا حبوبة من العنج "الفونج" |
لاخ ود عفيص او شعيت كما يحلوا لحبوبتي و حبوبتك الحلاوية تسميتك
والله انا التعل النزلتو ده قّوّم شعري واحدة واحدة وعلى الطلاق ما بهظر ياهو احساسي وانا بكتب ليك الان . كنت يا ود عفيص اخوى انا مشهور جدا بنقل الاخبار عن المطر . كنت صغير وفالح عندما تصب مطرة ليليّة بقوم صلاة الصبح بركب الدابة وبتلهم الخلاء عشان اجيب للناس خبر الضل نزل وين وتقل وين ورفع وين وميّّع وين . وعراف والله من تدنقرتي في ا واشوف نقطة المطرة بعرف ماشة قدامي في تقلة ولا خفة . ومرات معاى بندقيتي الخرطوش للوزين ام عاج وام جليلي Chilili
احلى جلسة في الدنيا هي جلسة الضحوة في اليوم البتكون فيهو ليلية زى ضلك ده خمجت البلد خمج . الناس بيعجزوا عن السدرة ( ابو بكر اخوى السدرة تاااانى بفتح السين وتسكين الدال وفتح الراء مش سدرة المنتهى) وفي الصباح يصبحوا فرحانييييييييين ومبسوطين ويجلسوا كويمات كويمات راجيين تفاصيل الضل ونحن عادة بنجلس في اليوم ده جنب الجزارة العندو خضار بفرشه . زمان جدى شيقوق وقت الخريف يدندن يمر على الحلة كلها عشان يمنع النسوان الدخان بخاف بور البلدات ؟؟؟؟
كتر خيرك على دعوتك لينا للبطانة وياريت اكان فعلا تحققت هذه الامنية والحلم
والله ات يا زول قريبي طاااااااااااب طالما قرنت في الحلاويين والفونج اهلك ناس المك حسن عدلان .
هسع يا اخوانا ابو بكر معانا هنا ولا بطل مننا
لكم معزتي
|
Post: #45
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: Ahmed Yousif Abu Harira
Date: 02-14-2007, 07:17 AM
Parent: #44
تحية وبعد ،،
| Quote: انا مشهور جدا بنقل الاخبار عن المطر . كنت صغير وفالح عندما تصب مطرة ليليّة بقوم صلاة الصبح بركب الدابة وبتلهم الخلاء عشان اجيب للناس خبر الضل نزل وين وتقل وين ورفع وين وميّّع وين . وعراف والله من تدنقرتي في ا واشوف نقطة المطرة بعرف ماشة قدامي في تقلة ولا خفة |
والله عِلِمْ ...ودشيقوق قصاص أتر المطر
لاقاهم قليب ........سعلوه من الوادي
قال ليهم زكرة الموية..في سليم بادي
شايف الحديث تحول إلى المطر -اخبارو وصورو الشعرية والفوتوغرافية ...
ودا كلام مجيش ومهيج للخواطر عشان كدي نطالبكم بالإسهاب والإطناب في الموضوع.
---------------------
فسر يا شيقوق:
الشاعر قال: لاقاهم قليب ........
ما هو (القَليبْ) ؟؟؟
شنكل مستلف تاني من ناذر الخليفة:
يا شيقوق أبوبكر سيد احمد دا إنتو زعلتوه بي شنو؟؟؟
|
Post: #46
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: خالد المحرب
Date: 02-14-2007, 10:53 AM
Parent: #45
Quote: سمية بت الحسن
أولا، إذا كنتي إنت بطحانية، وهذا ما أكاد أجزم به من إسمك وأسماء أمهاتك، فإني قد أكون سرك. حبوبتي أم جدي لأمي، ستنا بت محمد علي "بت قش البنات" بطحانية صر..
|
اخونا b.babkr سلام عليك
دى دايره تساؤل مفروض تكون عرفت الحاصل
|
Post: #47
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: خالد المحرب
Date: 02-14-2007, 11:02 AM
Parent: #46
Quote: الشاعر قال: لاقاهم قليب ........
ما هو (القَليبْ) ؟؟؟
|
السوال موجه الى شيقوق البجيب اخبار المطر
اها شيقوق اجابه فى سؤال
ماهو القليب
|
Post: #48
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-14-2007, 01:51 PM
Parent: #47
Quote: الاخت سميه انا داير الشنتير ادينا اخروا
ونعرف الشنتير 0
عشان دايرين نحس بى وضعنا نحن ناس بندى الجلسه حقها
بى مزاجنالى الزول البفهمنا ويعرف نحن منن عليك الله ياسميه
نحن منن لو ما انت انا ما بقولا |
والله ياودالمحرب
غايتو نحنا خشمنا دا كان قفة كانت أتشرطت من كترة ما أتكلمنا
مما دخلنا المنبر دا ماسكتنا والناس ديل لى هسع ماعرفونا نحنا منن
الشناتير والعفصة وصنقر وود جودات الحلال دى كلها قدام ودساقرتة
فى صلب الجبل جبل اللبيتور الكنتو قانصين فيهو اجازتكم الفاتت
معقول الناس ديل من هناك ومابعرفونا؟ غايتو يدونا المعلومات بالقطارة
ونحنا صابرين...
بمناسبة نحنا صابرين كان فى واحد من أهلنا العرب ديل مشغول بى بقراتو ساعة العلوق
جاهو واحد قال ليهو ياعمى فلان داك قالو أتوفى الفاتحة وسواها طويلة وكتر الكلام
وانشاء الله يلزمكم الصبر وداك وداك ...عمك بالو فىعليقة بقراتو واتضايق بالحيل
اتلفت عليهو قال ليهو والله نحنا صابرييين آ ولدى الله يلزمك ات الصبر
ـــــــــــــــــــــــــــــــــــــــــــــــــــــــــــــــــــــــــــــــــــــ
نستلف تخريمة ناذر دى
ياود المحرب ود شيقوق دا ما صاحبك غششو معنى القليب بالمسنجر باقى بشوفو لبد
|
Post: #49
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-14-2007, 02:17 PM
Parent: #48
حباب خالى
انا حبوبتى ام امى زينب بت حمد النيل ود امحمد اللمين
شكرية عفصية فارسابية ( فارساب و اتيماب ) وحبوبتا عركية
وحبوبتى من جهة أبواتى جعلية ( عالياب ) واكان ما اخاف الكضب حبوبتا رباطابية
لكننا بطاحين صاحباب جدنا
الشيخ عبد الباقى ابشام جبل الحديد( راجل ود ساقرتة الخاتى غلتة بضم الغين)
|
Post: #50
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-14-2007, 02:38 PM
Parent: #49
Quote: يا شيقوق أبوبكر سيد احمد دا إنتو زعلتوه بي شنو؟؟؟
|
يا أحمد ات الليلة أبوبكر دا مايكون عندك فيهو أمل
الناس مشغولين بالفالنتين وناس ود شيقوق شغالين لينا
بالمطر والطين ( الفالنطين)
الليلة أبوبكر مع ناس البندر والورود الحمرا
بمناسبة ناس البندر:ـ
زولا لينا عندو بقرة عاجباهو بالحيل بعدين البقرة أن نفخت منها وليها
وأتحدرت تب للموت وهو حابسا الليل كلو
مع الصباح جا فوفو واحد من أولادنا ماش على الجامعة لابس بنطلونو
وقف يقنع فى سيد البقرة: ياعم البقرة دى تعبانة ياعم أحسن تحللا
تستفيد منها وياعم ياعم وعمك يقبل منو جاى وجاى موو داير يسمعع
انو بقرتو ما بتقوم ،وكت غلب معاهو حيلة قبل عليهو وقال ليهو:
انا بقرتى دى ذااتا مابتريد الزول اللابس البنطلون دحين أبعد من
وشها وامش على قرايتك كان عندك فهم
|
Post: #51
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-14-2007, 03:27 PM
Parent: #50
الأخوين شنتير و بـ بكار
اهلنا الكبار حدثونا بقصة تروى عن أبكر ودشنتير جد الشناتير
قالوا كان بريد إبلو بالحيل ولم يتزوج خوفا من ان يشغله الزواج عن الأبل .
جو حرامية سرقوا الأبل .... راغ ليهن رواغة شديدة لغاية مامرق في امبابة حدود مصر
لقاهن مكمنات هناك والحرامية مجموعة وهو وحده .
الحرامية قالوا ليهو عارفنك فارس لكن مهما تكتل مننا كان فضلوا فينا إثنين بكتلوك
واهلنا العرب قالوا الكثرة غلبت الشداعة . الزول فكر يرجع ويتزوج عشان يجيب اولاد
يحافظوا بعده على باقي الأبل وقد كان رجع وتزوج وانجب الشناتير.
دحين وضحوا لينا انتو قرايب ولا دا اسم على اسم ولا الحاصل شنو يا أولاد شكير ؟
|
Post: #55
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: Shinteer
Date: 02-14-2007, 04:28 PM
Parent: #51
| Quote: اهلنا الكبار حدثونا بقصة تروى عن أبكر ودشنتير جد الشناتير |
الأخت سمية، شكراً على النبش.
أبـكُـر عمي ود خال أبوي لزم، وقد توفى إلى رحمة مولاه قبل خمس سنوات أو يزيد قليلاً، عن عمر يزيد عن المئة عام. والقصة صحيحة .. وطلبت منه يحكيها لي برواقة آخر مرة قابلته سنة أربعة وتسعين وسجّلت تفاصيلها منه في مسجل سغيرون هو ما كان جايب ليه خبر، وقصص أخرى أقرب للخيال؛ متعة غاية. وهو ليس جد الشناتير .. نعم هو ود شنتير .. لكن شنتير الجد الكبير لسع لا غادي بعيد.
الواحد خلاس بقى ياباني .. تقوموا تااااااني ترجِّعوه للبايتور وود جودات وأم كنيش وكسمور وما أدراك ما كسمور؟. أمّا أمركم عجيب.
مّسارِيَّاً على كَسَمور بِجَن قـُطّاع
مَراديف كلهن، من الصَّعب لا الطاع
مَرقولهِن جَنيناً للطَّلَق بُتـّاع
بِكافوبْهن سَوَالْف العقربـِن لَطَّاع
أها عليك الله تاني ما تقلِّبي الحجار. خلينا نكون أشباح أحسن.
يا ود المحرب انتو قرضتوا أرنوبنا ولازم تدفعوا تعويضات ولاّ تاني حرمت عليكم أرانب اللبايتور.
|
Post: #52
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-14-2007, 03:44 PM
Parent: #50
Quote: يا أحمد ات الليلة أبوبكر دا مايكون عندك فيهو أمل
الناس مشغولين بالفالنتين وناس ود شيقوق شغالين لينا
بالمطر والطين ( الفالنطين)
الليلة أبوبكر مع ناس البندر والورود الحمرا
بمناسبة ناس البندر:ـ
زولا لينا عندو بقرة عاجباهو بالحيل بعدين البقرة أن نفخت منها وليها
وأتحدرت تب للموت وهو حابسا الليل كلو
مع الصباح جا فوفو واحد من أولادنا ماش على الجامعة لابس بنطلونو
وقف يقنع فى سيد البقرة: ياعم البقرة دى تعبانة ياعم أحسن تحللا
تستفيد منها وياعم ياعم وعمك يقبل منو جاى وجاى موو داير يسمعع
انو بقرتو ما بتقوم ،وكت غلب معاهو حيلة قبل عليهو وقال ليهو:
انا بقرتى دى ذااتا مابتريد الزول اللابس البنطلون دحين أبعد من
وشها وامش على قرايتك كان عندك فهم |
اول حاجة ابو بكر ده زولا نفسو طويييييييييييل وباله واسع اصلا بيزعل من حد بس مشغول بالعيد
سمية والله زولك الحمد لله ما طعنه ذاتو بالغتي عديييييييييييل
|
Post: #53
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-14-2007, 04:01 PM
Parent: #52
يا اخوانا زمان كان العروس برقصوها باغنية جوبا مالك عليا ......... كفاكم ( ارجعوا للفاروق ود حامد يتم ليكم الناقصة وبيعرف القليب واصل ومشتقات الفعل وكل لوازم التصريف اللغوي .
واعتقد تعني جري السيل - الغناي قال
الخبر الاكيد ود المقدم جابو
قال الصورني سال واتقلبن تبابو
لا صاحب قرش لا زولا بنسلابو
نحن معانا ناس ود المحرب بدوروا خرابو
ودعتكم الله
|
Post: #54
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: عفاف أبو حريرة
Date: 02-14-2007, 04:08 PM
Parent: #52
كل ما أقـــول باقــي الكــلام تميـــتو
يهــف لي من جـــديد زى التقــول ناديــتو
زى هبــة نســيم تفتح دريب ســـديتـــو
يجــفاني الغميــد ليــل الســهر خاويــتو
زى جاهــــلي الصحى يــومي النســيت غتيــتو
أســـافر لي بعيــد أزور الحبيب في بيـــتو
والقانـــي قاعــدة هنــاك كأني ما غبيــتو
والعجــب العجيب زعلي كان ما لفيــتو
زى طفـــلاً بيبكــي ويضحــك أكــان رضيـــتو
ســـري الــداني زى حبوبتــي كم حجيتــو
حليل بيـــتي الكبيــر توب الغـُتــا الفريــتو
يا ريحه الهــدم جديـــد وما فشـــيتو
يا الشــوف والسـمع زى النعاس لوليتــو
يا غيــمي العميم ريحــة الدِعاش شـميتو
في أهــلي العقاب حارســيـن وما خليتـــو
أمــي العزيــزة ليــك منـي الســلام اهــديتو
حقك علي كان الجــواب ما مامضيتــو
حقــك علي إن فاتني شيــتاً سيــتو
حقــك علي كان في الصبــاح ما طريــتو
وكان بالليـــل نٍعســــتٌ قــبُـــل ما أقول أمســـيتو
وكـــان طولــت الغيــاب ودينــي ما حليــتو
ونسيــت الحســـاب والعنـــدي ما عدَيــتو
وحيـــات النبــي مغبـــــــونة من خليـــــــتو
الله يجـــازي للســفر البعيــــــــــد مارضيــتو
أريتـــِك كـان حِــــضرتًي يـــوم قلت لا ولاويتـــــــو
واريتني كان ختيــــــت مُشـــرعي العــديتو
أتلفــت وراي زى القليــــــبي نســــــــــــيتو
كمـــلت اليقيــــن فتشـــــــــتو مانـي لقيتــو
لحنـــت الحنيـــــــــــن في شـــعري كم غنيتــــو
ساهرت الليــــــالي ونــوم العيون جافيـــــــــــتو
والطاعـــــــــم مِســـــخ والمٌــــــــر براكٍ حســـيتو
مشــــتهياك يمه وشوقي ليـــــــك مديتـــــــــو
وجايــــــــأك بُكــــــــرة أحكيلـــــك القاســــــــيتو
أتونــس حِـــــــداك قولاً كتيــــــــر ما حكيتـــو
وأتنفس هــــــواك يا داب النفــــــــس ختيـــــــتو
الطيب وسيه كلامكم ده انا مابعرف اقول معاكم فيه لكن بورد عودي معاكم
دوبيت صلحه ده زي ماقال الاخ الطيب الشيخ كارب وانا عجبني
ليكم الاتنين [email protected]
|
Post: #56
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: Shinteer
Date: 02-14-2007, 04:47 PM
Parent: #54
يا شيقوق، تعتقد أن القَليب تعني جري السيل؟ ياخي انت طلعت أي كلام. وتقول برضو فاروق زول بندر؟. حقك راح بعد ده.
|
Post: #57
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-14-2007, 06:44 PM
Parent: #56
Quote: كل ما أقـــول باقــي الكــلام تميـــتو
يهــف لي من جـــديد زى التقــول ناديــتو
زى هبــة نســيم تفتح دريب ســـديتـــو
يجــفاني الغميــد ليــل الســهر خاويــتو
زى جاهــــلي الصحى يــومي النســيت غتيــتو
أســـافر لي بعيــد أزور الحبيب في بيـــتو
والقانـــي قاعــدة هنــاك كأني ما غبيــتو
والعجــب العجيب زعلي كان ما لفيــتو
زى طفـــلاً بيبكــي ويضحــك أكــان رضيـــتو
ســـري الــداني زى حبوبتــي كم حجيتــو
حليل بيـــتي الكبيــر توب الغـُتــا الفريــتو
يا ريحه الهــدم جديـــد وما فشـــيتو
يا الشــوف والسـمع زى النعاس لوليتــو
يا غيــمي العميم ريحــة الدِعاش شـميتو
في أهــلي العقاب حارســيـن وما خليتـــو
أمــي العزيــزة ليــك منـي الســلام اهــديتو
حقك علي كان الجــواب ما مامضيتــو
حقــك علي إن فاتني شيــتاً سيــتو
حقــك علي كان في الصبــاح ما طريــتو
وكان بالليـــل نٍعســــتٌ قــبُـــل ما أقول أمســـيتو
وكـــان طولــت الغيــاب ودينــي ما حليــتو
ونسيــت الحســـاب والعنـــدي ما عدَيــتو
وحيـــات النبــي مغبـــــــونة من خليـــــــتو
الله يجـــازي للســفر البعيــــــــــد مارضيــتو |
هلا هلا ام احمد حرم الليلة اتبينت عديييييييييييل الكلام الببكي جبتيهو من وين - حالف ارفع السماعة هسع اقراهو كلو للسمحة ام ولدي في السودان .
|
Post: #58
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-14-2007, 08:39 PM
Parent: #57
شنتير العسل شنتير السكر افو تمتحنى انا بالقوليب انا ذاتي القليب فاهمنى يابا
القليب جياب خبر المطر يا ني انا القدامك
يديك العافية والسرحة الدافية ؟؟؟؟؟؟؟؟؟؟ الفاروق اخوي متابع ؟
|
Post: #59
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: Ahmed Yousif Abu Harira
Date: 02-15-2007, 07:45 AM
Parent: #58
أستاذنا الطيب ،،
الأجابة (الأخيرة) صحيحة من حيث الوظيفة (جياب خبر المطر) والجائزة علي ما قال المسخوت (عمر الفاروق) كرتونة شعيرية وصفيحة طحنية وتستلم من استقبال التلفزيون بعد ابراز الأوراق الثبوتية
طبعا دا ما كان امتحان لأستاذنا شيقوق ولا شك هنالك إختلاف بسيط في الألفاظ والمصطلحات بين ناس (الصعيد) وناس (السافل) ، لكن عجبني قصّ ودشيقوق لأتر المطر ودِقتَه في معرفة بكان خفو (المطر) وتقلو ومحل ميع وين وسيل وين... وتذكرت أنك كنت تقوم بمهمة (القليب) وإن لم تكن (قليباً)..بالمعنى الدقيق للكلمة..
والقليب إذا تحرينا الدِقة أكثر معناتو بالظبط الناس الراحلين زمن الخريف من مقرهم الدائم إلى الديار المؤقتة حيث الماء والكلأ ..نزلو شيلهم في مكان وعائدين (قالبين) مرة أخرى للديار عشان يشيلوا باقي العدة والأغراض ...وقد يكونوا أكثر من شخص واحد...يعني مجموعة ناس على جمال وزوامل أفرغت حمولتها في مكان بعيد وعائدة لتحمل باقي الشيل....وفي مسيرتهم دي بيكونو مروا على مساحة واسعة من الأرض وبالتالي بيكون عندهم خبر المطر اليقين...
وعلى ذكرة وظيفة جياب خبر المطر ... والناس البيقعدو كويمات كويمات صبحية المطرة منتظرين الأخبار زي ماقال استاذنا ودشيقوق... عمنا الماحي ود الدابي رحيمو الله كان رجل داهية وذكي وسريع البديهة وردو حاضر...وكان عندو لوري ينقل به الناس والبهائم والبضائع بين أبي دليق والمدينة (الخرطوم بحري) ...وخلال موسم الخريف بيكون مصدر أساسي في نقل اخبار المطر... ولأنو زول واحد مطالب بالرد على نفس السؤال مئات المرات ....وطبعا دي حكاية مزعجة جدا فابتكر وسيلة مناسبة تجيب خبر المطر وتريحو في نفس الوقت من الرد على كل زول براهو .. فاحتفظ بي كراسة في لوريهو ظل يكتب فيها مشاهداته عن الأمطار من أبودليق إلى ان يصل بحري: فتجده يكتب مثلا المطره في منطقة عَقّاب (خفيفة) ...في إيد عامرية (لصفت) وحدا ام كبروس (ميعت) ، وفي إيد النص (سر الوادي جاء) و ووو الخ..
ودمتم
|
Post: #60
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-15-2007, 08:31 AM
Parent: #59
Quote: وعلى ذكرة وظيفة جياب خبر المطر ... والناس البيقعدو كويمات كويمات صبحية المطرة منتظرين الأخبار زي ماقال استاذنا ودشيقوق... عمنا الماحي ود الدابي رحيمو الله كان رجل داهية وذكي وسريع البديهة وردو حاضر...وكان عندو لوري ينقل به الناس والبهائم والبضائع بين أبي دليق والمدينة (الخرطوم بحري) ...وخلال موسم الخريف بيكون مصدر أساسي في نقل اخبار المطر... ولأنو زول واحد مطالب بالرد على نفس السؤال مئات المرات ....وطبعا دي حكاية مزعجة جدا فابتكر وسيلة مناسبة تجيب خبر المطر وتريحو في نفس الوقت من الرد على كل زول براهو .. فاحتفظ بي كراسة في لوريهو ظل يكتب فيها مشاهداته عن الأمطار من أبودليق إلى ان يصل بحري: فتجده يكتب مثلا المطره في منطقة عَقّاب (خفيفة) ...في إيد عامرية (لصفت) وحدا ام كبروس (ميعت) ، وفي إيد النص (سر الوادي جاء) و ووو الخ..[/
QUOTE]
على ذكر سرعة البديهة يا ابا حريرة اذكر عمانا طه ود شيقوق رجل ذكي وسريع البديهة واى مسئول يجى في مناسبة عزاء لازم ينادوا ليهو عمك طه ده .
انا ملاحظ هذا الانسان عيونو كلها تتحرك تحسبا من وجود شخص اخر قد تجرحه النكته ولاحظت فيهو ايضا لما يكون الضيف جديد برامي ليهو الحديث جاى وجاى بفتش المواقع البتضك الضيف اكان دين بشبعه فيهو ضحك وكان زول ....... خلاص بكتله بالضحك عديييييييييل .
اذكر انا زمان كنت محامي في السوكي والمتقاضون مرات بيجونى في الحلة بمخاليهم مليانة ككس بالذات عندما تكون قضية رقبة Murder case اها عمك ده يقوم باكرامهم ووقت يجى وقت الحديث عن معطيات القضية بينسحب بقول في اسرار ما بحضرها اها ووقت الناس يمشوا منى عمك بيعقبهم طوالى بيجيني اها يا الطيب ولدى انكت وطوالى تعود على انكت دى .
يا زول لانو اغلب القضايا حقاتي بتاعة عرب رحل سرقات وموت وتلف زراعة وغيرها فغالبا العمل بيكون في الخريف تعبان لان عربي بينشغوا البطانة .
اذكر يوم من الايام كنت قاعد في راكوبة الديوان قدام الحلة والعرب الراحلين البطانة بيجوا قدام الديوان بعطفهم وكشكوشهم . قام عمك قال لى الطيب يا ولدى انا الليلة مفلس اديني الساهلة - قلت ليهو ها عم طه شن اديك ات ما شايف عربي راحلين تاني القرش اجيبو من وين ؟ والله عمك نط قال لى اصلو هم ماشين في ظلت ما ما شين في زراعة الناس هسع بيجيبوهم ليك خاربين .
مودتى
|
Post: #61
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: خالد المحرب
Date: 02-15-2007, 08:56 AM
Parent: #60
اجابتك صاح ياشيقوق وشنتير طلع حمد لبد ساهى 0
|
Post: #62
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-15-2007, 09:12 AM
Parent: #61
| Quote: اجابتك صاح ياشيقوق وشنتير طلع حمد لبد ساهى 0 |
انا عارفك نصار لاخيك ولو كان ظالما يا ود المحرب .
|
Post: #63
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-15-2007, 12:05 PM
Parent: #62
| Quote: وقصص أخرى أقرب للخيال؛ |
شنتير ود الحسن
معرضاك القطاعة قطاعة بت حمد النبل كان ما حكيتا لينا
|
Post: #64
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: sudania2000
Date: 02-15-2007, 02:51 PM
Parent: #63
شنير سلام
الزول بعاتي قالوا من جبل الابايتور 
شوق .. وسلام ..عساك طيب ..
كم سنة كدا ما سمعنالك خبر ؟؟
|
Post: #65
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-16-2007, 08:45 AM
Parent: #64
(عدم المعروض جفا. مستمتع بمجادعاتكم وربقيكم من الخارج، ودخول الحلبة يفسد متعة المتابعة وأكل الباردة. ثم خامساً: انتي يا بت الحسن كيف حفظتي كلام أهلنا (أهلك) الخشن ده؟ ده كلام ناس شيقوق ذاتهم، وكل أفندية القويسي، يتعتعوا فيه).
معليش الكوتنج تعذر يا شنتير اخوي .
والله يا اخونا شنتير العرف القويسى ده مننا طاااااااااااااااااااااااااب . الزول ده معلوماتكم عنه ناقصة فتشوهو لينا وركزوهو كويس يا بت طلحة .
قولوا لابي بكر فتش قوقل ايرث تجد القويسي من اعرق مدن السودان . الان اسم القويسي شبه اتلاشى وصار الاسم السائد الان الدندر . وكلمة الدندر بتعني مدينة القويسى وكمان جميع بوادي وقرى الدندر .
احمد حماد ادريس موسوعة في هذا المجال ويا ريت لو جانا اقحم الرطانة بتاريخ القويسي .
|
Post: #66
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-16-2007, 11:13 AM
Parent: #65
| Quote: قولوا لابي بكر فتش قوقل ايرث تجد القويسي من اعرق مدن السودان . الان اسم القويسي شبه اتلاشى وصار الاسم السائد الان الدندر . وكلمة الدندر بتعني مدينة القويسى وكمان جميع بوادي وقرى الدندر |
ياود شيقوق
شعراء الدوبيت سجلوا لينا التاريخ فى صور محكمة النسق وماخلوا شاردة ولا واردة
الدور عليكم انتو فى جمع التراث حتى لايضيع كما ضاعت الأمجاد ورحلت مع أصحابها.
يوسف ود البنا تكلم عن جميع النظار والعمد والمشايخ فى دوبيت توثيقى جميل
وذكر فيما ذكر
منصور العجب
فى قويسيه سواى للعجب
ما بوصو للأمر الوجب
ومنصور العجب من النظار المعاصرين للناظر محمد صديق طلحة
وقد ذكرتهم فى بوست ( سليل المجد)
|
Post: #67
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-16-2007, 11:59 AM
Parent: #66
فى قويسيه سواى للعجب
ما بوصو للأمر الوجب
ومنصور العجب من النظار المعاصرين للناظر محمد صديق طلحة
كتر خيرك بت طلحة والله انتى ذاتك موسوعة ومرجع وديل رجال تاني ما بتكرروا للقيامة .
|
Post: #68
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: Yahia Abd El Kareem
Date: 02-16-2007, 02:05 PM
Parent: #67
ودشيقوق...شوقا شاقنا شال شخلوب مشيل جاك
اعمى عيونا عالنا علة تختاك
لن تسقط من ذاكرتى لحظات نواضر بينكم عشانا فى دار السلطان قابوس..أدام الله عليكم اللمة...
تحياتى لاميرة هذا البوست العميق الملكة بت الحسن...ولابناء البطانة المتداخلين فوق عديلهم..
|
Post: #69
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-16-2007, 05:52 PM
Parent: #68
Quote: ...شوقا شاقنا شال شخلوب مشيل جاك
اعمى عيونا عالنا علة تختاك |
رف البرق وهب دعاشو من تالاك
أعمى عيونا بى نورا متل بسماك
لك التحية أخى يحي عبد الكريم على هذه الطلة البارقة البهاء
شرفت البطانة وأهل البطانة الشايل برقا شخلوب
|
Post: #70
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-16-2007, 08:07 PM
Parent: #69
Quote: ودشيقوق...شوقا شاقنا شال شخلوب مشيل جاك
اعمى عيونا عالنا علة تختاك |
يا سلام يا استاذنا الضليع يحيي
مرحب بيك والله والله يا بت طلحة بوستيك جلب طالما اكرمنا بضيوف كرام في قامة العملاق يحيي .
لكم منا اطيب المنى
|
Post: #71
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: Yahia Abd El Kareem
Date: 02-17-2007, 07:00 PM
Parent: #70
الملكة بت الحسن
سيد شباب البطانة ودشيقوق
اسرنى هذا البوست الضخم وارجو ان يستمر فى زخمه وسوف نساهم ونعود اذا عاد اولاد البطاحين والشكرية
وهم يزينونه باصيل غنائهم ويصدحون بالنمة ونفرح مع دعاش الضحوية فى جلسة انس نملى النفس بجمال
المزن المزرقن ونملا خياشيمنا من دعاشها ونحيا لحظات نخرج بها من زخم العمل وطاحونة المدنية والتلوث..
أرح ,اسرع قودع ياود شيقوق قبل ما انخ قعودى فى تاية تانيه وعامرة..
|
Post: #72
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-17-2007, 09:27 PM
Parent: #71
| Quote: أرح ,اسرع قودع ياود شيقوق قبل ما انخ قعودى فى تاية تانيه وعامرة.. |
افو افو يا شيخ العرب حرم مننا ماك ماشى الا نفططك الدم ونجلسك ممهول في سرير وهييييييييييط في انتظار ود المحرب وود ابي حريرة وشنتير وبعد تتقهى من جبنة بت طلحة وام احمد تاااااااااااااني عندنا فيك الف راي .
الدار دارك يا اليحيي اقلع توبك وعمتك واتوسر لينا في نص القعدة واحكي لينا خلي الفاروق وابا بكر يسمعوا قول ود عبد الكريم .
|
Post: #73
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-17-2007, 11:04 PM
Parent: #72
| Quote: اسرنى هذا البوست الضخم وارجو ان يستمر فى زخمه وسوف نساهم ونعود اذا عاد اولاد البطاحين والشكرية |
ياأولاد البطانة استقبلواضيفانكم
يحي ماهو ضيف بنعد من أخوانكم
تعالوا انلموا جملة ونوخوا ركبانم
وبى دلو الكلام أغرفوا من جربانكم
|
Post: #74
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: AnwarKing
Date: 02-17-2007, 11:44 PM
Parent: #1
سلام للأخت سمية ولزوارها الكرام...
وسلام وشوق شديد للأخ العزيز شانتير...كل عام وانت بخير...
أنور
|
Post: #75
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: munswor almophtah
Date: 02-18-2007, 00:59 AM
Parent: #74
الما خاواكم ما خاوى والما جالسكم جرابو هبو أناس حكايتكم شنو صقعى ما هو صقعى والله متل الركبت وقصيت أتر المطره مع ودشيقوق ومتل الدردم كلابو قناص مع ود المحرب ومن مقلب حديث شانير أستفت طب يا عالم عينى بارده منكم أجمعين يا آل البطانه قولوا ونحن محكرين وبى البانجقلى واللبا وأم نارين اللبنها ضان ممشهدين الله إديكم العافيه
تحياتى وسلامى
منصور
|
Post: #76
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: b_bakkar
Date: 02-18-2007, 07:50 AM
Parent: #75
يا ود شنتير
كيفنك آعشا البايتات؟
إت مشغول بالعلم ولا شنو؟ ولا في حاجة مغلتة عليك؟
البوست دا كله مفتوح علي انجلاتك، والناس تدودر فيك لي الكلام، وإت كلمة وغتايتها. ذكرتني قصةََ لي جحا. مرة عزمو زول على أكلةَ سمحة. جحا عجبته الأكلة وحب يشغل الزول بالكلام. سأله قال ليهو:إت آفلان دحين أبوك لمن مات خلى ليك شنو؟ الزول بدا يقص لي جحا: أبوي خلي لي من المال الشي الفلاني وعملته فيهو الشي الفلاني، وخلى من الغنم الشي الفلاني، وعملت بيهن وحصل ليهن الشيء الفلاني ، وخلى من البقر والإبل الشيء الفلاني. والراجل يحكي وجحا ياكل وكل مرة يرميلو سؤال يشغلو بيهو.. لما خلاص جحا قطع شوط طويل في الأكل الراجل سألو قال ليهو: آها إت أبوك خلى ليك شنو؟؟ جحا قال ليهو: أبوي خلى لي حمار وزرق ومات.. وواصل أكله..
بعدين يا خو اللخوان مالك مصدف غادي من الناس البتسعل منك؟ ولا إمكن ما شفت مخاطبتي ليك مرتين وأديتك عنوان مخصوص وقلت ليك عايز اتعرف بيك وضروري أتكلم معاك.
باقي أنا الشناتير ديل من قمت بسمع بأنو عندهم كان حلة ولا نزلة عرب ساكت ما بعرف، صعيد أوشرق من صنقر. لكن في حياتي ما قابلني شنتراوي. وأنا عارفك زول فضلي وبالو واسع دحين ما تزعل من مساعلتي ليك.
إت الشناتير ديل شكرية، ولا بلموا في قبائل آخرة؟ ولا شناتير وبس؟
بعدين بسمع زمان بي مثل عن ناقة الشناتير لكن نسيتو.. ممكن تذكرني بالمثل دا؟
وسبحان الله!! نقلة واحدة فرد مرة من الشناتير لي اليابان؟؟ دي بالضبط زي نقلة سرا ليك من سَدر صنقر وتاتاي وود شمعون لي أمريكا!!
كتر خيرك، وبارك الله فيك ، ويكون السِماح يعني..
|
Post: #77
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-18-2007, 07:58 AM
Parent: #76
هلا هلا دى يا ها ذااااااااااااتها الموليته مع علوق الصباح جابت خبر حمار جحا يا B- baker
|
Post: #78
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: b_bakkar
Date: 02-18-2007, 08:32 AM
Parent: #76
[Q]
خونا b.babkr سلام عليك
دى دايره تساؤل مفروض تكون عرفت الحاصل
[Q/]
أخونا ود المحرب
معليش، يكون السماح. أنا غشياتي للمنبر دا متباعدة ومتقطعة وسريعة، ما ني متابع سمح
زي القريت شنتير بنسبك للحَمَدة، وحاولت أرجع أتوكد من الكلمة دي، لكن صعبت علي معرفة محلها. إذا صح هذا، هل الحمدة هم الأحامدة؟ أم مجموعة تانية مختلفة. وشايف ود شنتير بقول ليك كملتو أرنوبنا.. ويبدو أنك قريب من جبل اللبايتور، فلم يبق لي إلا افترض أنك من الأحامدة الوراء الترس أب حجر وقدم السيال.
على كل حال، دي طبعا طريقة أهلنا العرب، الزول ما بقدر إباسط الزول كان ما أصلو..
شكرا ليك
[B/]
|
Post: #79
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: b_bakkar
Date: 02-18-2007, 09:06 AM
Parent: #78
يا أخوانا ليلة القدر النزلت علينا نصت نهار في بلدا طيرو عجمي دي نقول فيها شنو؟
أنا ما قلت ليكم من البدابة كًت شام فيكم ريحة أهل؟؟
سِّري ود شيقوق
ما تقول لي كمان حبوبتك الحلاوية بتلم في ود إمام (ود حبوبة)، تقوم تخلينا نتقالد في الهواء ونبكي!!
أبوي الله يمد في عمره ويديه العافية - عمره الآن حوالي 95 سنة. وهو دائما يؤرخ لعمره براوية عن أمه زينب بت عيِّس ود دفع الله، ود إمام ببقى ليها في الحساب خالها. قالت سنة كتلة ود حبوبة هي كانت تامة بالصديق وقايدة علي - أعمامي اللكبر من أبوي الله يرحمهم ويحسن ليهم ويرحم بت عيس ويحسن ليها. قالت ما شة لي الكاملين مع الناس من المدينة - حلة صغيرة جنب التكلة جبارة وأب سير. قالوا ليها إتي بي حالتك أصلك ما تمشي. قالت والله كان ولدتو فوق الدرب إلا أمشي. ومشت ورجعت بسلام.
أما الحديث عن المطر ورؤية المطر والتطلع إلى المطر ومتعة اليوم المطير.. هذه كانت متعة الحياة في أعمق مظاهرها. فالمطر "حديث عهد بربه" كما جاء في الأثر.
كان الله هون إمكن أرجع ليك تاني لحديث المطر والري وقياساته بي غز العصاة: ركبة ومخروقة. والزراعة والسرحة ، والتيجاه والسدرية، والنشوق والوِرِد، اليوت والغب والربع.. والحديث سيتشعب ، ولكنها طبيعة ونسة أهلنا زمان، الحديث بجيب الحديث.
|
Post: #80
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: Ahmed Yousif Abu Harira
Date: 02-18-2007, 09:36 AM
Parent: #79
b_Bakkar
أهلا بك وسهلا في مجال ونستنا دي ...ونحن ونستنا دي ونسه مخسوسه اخترناها دون الموجود بهذا المنبر وهو سوق كبير فيه الغالي والرخيص والصالح والطالح والبسر القلب والبيوجع القلب...وقد أخترنا هذه الزاوية اختيارا بمحض الإرادة وفيها بنلاقي الناس البعرفو ونستنا وبعرفو حديثنا ونعرف حديثهم...والناس هنا بتجي بي وكت الفراغ وشنتير غيابو ده ربما له ما يبرره..كان يكون مشغول مثلا أو غايب أو مسافر أو عندو عطل فني أو محجوز له في جزيرة بركانية من جزر اليابان والبنطون فاتو !!! لكنه حتما ولابد من يجي ويرد عليك...
أما ود المحرب فهو بطحاني وليس (حمدي) يعشق ضل الجبل اللبايتور وله فيه ومعه قصص ورحلات..
إنت شكري عفصي زي ما فهمت من أحد مداخلاتك ونحن نسابتكم ونعز اهلنا الشكريه ونهوى ونستهم ولدينا منهم أصدقاء كثر...
ملحوظة:
ياخي اسمك الانجليزي ده صعب علينا بالحيل وقدر ما دالجناهو ما عرفنالو دباره فهل انت أبوبكر ام بكار أم ماذا ؟؟؟
نرجو التوضيح وإلا ناديناك (بالشكري)
|
Post: #81
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: abuguta
Date: 02-18-2007, 10:02 AM
Parent: #80
بت الحسن طلحة
ود شيقوق..
شنتير
ابو حريرة..
ود المحرب..
ابوبكر..
نحن عرب فووووووووووق...يعنى عرب جزيرة ...مرات بنفهم ومرات عاوزين شرح..
دحين مستمتعين ببوستكم الجميل...بس شيخ العرب شنتير لازم يتحكر فى ككر البوست
ودى لكم..
|
Post: #82
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: b_bakkar
Date: 02-18-2007, 10:11 AM
Parent: #79
Quote:
حباب خالى
انا حبوبتى ام امى زينب بت حمد النيل ود امحمد اللمين
شكرية عفصية فارسابية ( فارساب و اتيماب ) وحبوبتا عركية
وحبوبتى من جهة أبواتى جعلية ( عالياب ) واكان ما اخاف الكضب حبوبتا رباطابية
لكننا بطاحين صاحباب جدنا
الشيخ عبد الباقى ابشام جبل الحديد( راجل ود ساقرتة الخاتى غلتة بضم الغين)
|
------------------------------
حباب بت أختي ، سمية بت أهل البنية
بت الشيخ عبد الباقي أبشام جبل الحديد. أهلي العفصة في الحلال القريبة من ود ساقرتة أو "البنية" كما يسمونها أيضا، منهم ناس كتيرين شايلين الطريق على الشيخ عبد الباقي وخلفاه الشيخ الهابر والشيخ الزبير..
والله مسألة عجيية بحليل!!
أنا لأني دخلاتي ومشاركاتي في المنبر قليلة ومتقطعة.. دا أول بوست أقراه ليك.. وكنت بشيل وأخت. يا ربي الفقيرة دي من جهة أبو دليق ولا ود ساقرتة؟؟
تعرفي، كان ممكن أتصور ألاقي رائدة فضاء من تميول، ولا أتصور ألاقي رائدة إنترنت من ودساقرتة وحبوبتها عفصية كمان؟؟
حبوبتك زينب بت حمد النيل ود محمد الأمين ذاتو؟؟ سبحان الله!! نحن والفارساب ديل ما بنرجع في النهاية لي جد واحد!!
يعني الزبير ود محمد الأمين ود حمد النيل ببقى ليك خالك. الزبير دا صديقي وزميلي في رفاعة الشرقية ذات الرأسين، قدامي بسنة. وأخته الله يرحمها كانت زوجة حاج بلة ود محمد ود خالد. آخر مرة لاقيت الزبير في أوائل السبعينات، كان في الجيش، أظن البحرية. وعرفت فيما بعد أنه تزوج من أهلا ليهو في المسعودية واستقر هناك.
ونتيلة بت أحمد ود حمد النيل، زوجة خالي علي ود أحمد ود بكار، بتبقى ليك أيضا خالتك. والله أنا متلوم في أهل نتيلة ديل بلحيل. زرتهم مرة واحدة إمكن قبل أكتر من عشرين سنة، مع اني كلما أجي بحوم أغلب حلال العفصة ديل بلاقي الناس . لا زم في زيارتي الجاية ألاقي الزبير وأزور الفارساب.
وخليفة ود الشيخ الزبير كان أيضا دفعتي في رفاعة الشرقية وكانت بيانتنا مودة خاصة.
يا سلام، يا لها من صدفة عجيبة!!
دا كله من خير البطانة!!
وأنا لمن قلت :
داير الليم ولو في تربة الأرض المقامها معلا
عارف الناس الداير الليم بيهم ديل تاني ما بلاقيهم إلا في الآخرة. لكن كان الله أدى العافية وتم المراد لازم أرجع لنفس الديار الكنا فيها وأبني فوق آثارها وأعيش فيها وأدفن في أرضها.
سلام عليك يا بنت الصالحين وبنتي.
[B/]
|
Post: #83
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: b_bakkar
Date: 02-18-2007, 10:27 AM
Parent: #82
معليش، الكوت أبى ينفصل لي من التعليق، بحاول اتعلم المسألة بصورة أحسن
أب حريرة شكرا على التوضيح
أما إسمي فهو كما كتبته بت الشيخ على الوجه الصحيح : "بكار" ممكن تقول "ود بكار"..
كدي خليني النشوف ليكم شوية صور قبل ما أتلم .. الساعة عندنا الآن أربعة إلا ربع صباحا
|
Post: #84
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-18-2007, 11:39 AM
Parent: #83
| Quote: هل الحمدة هم الأحامدة؟ |
اها يا سري ود بكار اقعد لي نوريك الحمدة ديل من هم .
الحمدة من قبيلة رفاعة ونظّار قبائل رفاعة الشرق والحمدة ابناء عمومة للقواسمة ( انا طبعا قاسمي) والحلاويين ( سرك لحمة ودم) والغلاتيين واللحويين والعركيين وغيرهم من اهلنا الطيبين.
توالت نظارة الحمدة على الدندر من الانجليز وكان ناظرهم الشيخ يوسف العجب وخلفه على النظارة منصور العجب ثم يوسف المنصور العجب ربنا يرحمهم والان الناظر احمد منصور العجب وكلهم حمدة صرررررررر . ينتمي البيت الحاكم كله لود ابي جن . علاقتهم بالشكرية علاقة نسب ومصاهرة وينتمى الكثير من افراد تلك الاسرة الى ناس ود ابي سن زعيم الشكرية . مقر زعامة الحمد مدينة القويسي بالدندر .
اما الاحامدة فمقرهم غرب كوستي وناظرهم الشيخ عقيد ومن سلالتهم مولانا مهدى محمد عقيد جبرائيل زروق عبد الله. وهم موجودون في وسط وشمال السودان ولكن معقلهم الاصلي جنوب غرب كوستي بحوالي 100 الف نسمة وتشمل نظارتهم 70 قرية وفيها حوالى 90 شيخ حكومة وتمتد اراضيهم من جنوب غرب كردفان الى اعالي النيل جنوبا وتبدا اراضيهم بعد مسافة 15 كيلو متر جنوب كوستي حتى اعالي النيل واهلها يربون الابقار والاغنام بنوعيها وبعضهم يعمل في الزراعة الالية في مشاريع المقينص وام عقارب -
الان الاحامدة موجودون في ريفي الخرطوم والجزيرة - وبين الشكرية والبطاحين توجد مسارات لقبيلة الاحامدة-
على مستوى كتب التاريخ كتب عنهم القدال في كتابه تاريخ السودان الحديث وكذلك مكى شبيكة -
وجاء في كتاب القدال ان الامام المهدى لما قرر التراجع من الانجليز كتب لجميع القبائل ليجد ممرا يتراجع عبره من الجيش الانجليزى وقد اتصل الامام المهدي بقبائل الشانخاب والجمع( بكسر الجيم) والاحامدة وسليم طالبا منهم السماح بمرور جيوشه عبرهم وقد جاء الرد من عساكر (ناظر الجمع) بالاعتراض على المرور خوفا من الفتنة مع الخواجات ورد عليه شيخ جبرائيل زعيم الاحامدة بان دار الاحامدة بجيشها واموالها رهن اشارته.
درج الناس على ان ينسب للاحامدة بالحمدي وكذلك ينسب للفرد من قبيلة الحمدة بالحمدي ولهذا اجد مبررا لاخي الذى طلب التمييز بين الاتنين .
من الناحية العربية السليمة ينسب للحمدة بالحمدي ( بفتح الحاء وتسكين الميم وكسر الدال) غير ان الناس درجوا على نطقها بالحمدي ( بفتح الحاء والميم )
الاخوة قراء المنبر العام نرجو المعذرة فلم يكن القصد من هذا الحديث اذكاء النزعة القبلية وانما تصحيح لبعض الاخطاء وتوثيق لبعض المعلومات للمهتمين بهذا الجانب من الانثربوليجيا السودانية .
لكم اطيب المنى
|
Post: #85
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: b_bakkar
Date: 02-18-2007, 01:19 PM
Parent: #84
عزيزي ود شيقوق
الله يعدلها عليك ، عدلتي راسي تب.
أنا في البداية أشرت إلى أني لا أرتاح للكلام عن القبائل في هذا المنبر وفي هذا الزمن المأفون، لولا أن المقام اقتضى ذلك. وكان مدخلي إلى ذلك صريحا ومن منظور واسع يركز على إيضاح التمازج والتآلف. وآسف إذا أطنبت في هذا الباب.
فرغم كل الحساسيات، بفتكر حوارنا في محله تماما وليس فيه ما يوجب إثارة النعرة القبلية، بل على العكس، أراه امتثالا لقوله تعالى:
وجعلناكم شعوبا وقبائل لتعارفوا إن أكرمكم عند الله أتقاكم. إن الكلام عن القبائل طلبا للمعرفة شيء والكلام من باب العنصرية والتفاخر شيء آخر. "كلكم لآدم وآدم من تراب".
والحمد لله الذي أبان لنا شراكة الدم بيني وبينك وكذلك بيني وبنت الشيخ الأديبة والأريبة.
ما يجمع بيننا كلنا حب خاص لرقعة خاصة من أرض الوطن.، لطبيعتها وتراثها وإنسانها. وآمل ألا يكون حديثنا مجرد إجزاء فراغ، وإنما عملية تعارف تعين مستقبلا على التعاون الخلاق لخدمة إنسان تلك الأرض والإنسان السوداني والإنسانية عموما.
|
Post: #86
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: b_bakkar
Date: 02-18-2007, 01:33 PM
Parent: #85
|
Post: #87
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-18-2007, 07:31 PM
Parent: #86
| Quote: الله يعدلها عليك ، عدلتي راسي تب. |
يديك العافية يا قريبي
|
Post: #88
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-18-2007, 11:39 PM
Parent: #87
Quote: داير الليم ولو في تربة الأرض المقامها معلا
عارف الناس الداير الليم بيهم ديل تاني ما بلاقيهم إلا في الآخرة. لكن كان الله أدى العافية وتم المراد لازم أرجع لنفس الديار الكنا فيها وأبني فوق آثارها وأعيش فيها وأدفن في أرضها.
|
انشاء الله بعد عمر طويل
ودا منانا كلنا
نفض المزرة واصبح رد حفيرن سايل
عقب الليلة فوق ودالأغيبش شايل
أنا ياداري لايبقابي فرقاً طايل
أصلي بريدن والريد فوق جبينن خايل
أنا ياداري لايبقابي فرقاً طايل
|
Post: #89
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-18-2007, 11:48 PM
Parent: #88
Quote: ما يجمع بيننا كلنا حب خاص لرقعة خاصة من أرض الوطن.، لطبيعتها وتراثها وإنسانها. وآمل ألا يكون حديثنا مجرد إجزاء فراغ، وإنما عملية تعارف تعين مستقبلا على التعاون الخلاق لخدمة إنسان تلك الأرض والإنسان السوداني والإنسانية عموما.
|
خالى/ بـــكـــــــار
أهدى هذا الجمال الذى أودعته هذا البوست كلمة ومعنى ورسم وصورة لكل التداخلين ولكل أهل السودان
حتى يهنأ الوطن ويفخر بكم.
ــــــــــــــــــــــــــــــــــــــــــــــــــــــــــــــــــــــــــــــــــــــــــــــ
دى بنية منو؟ يلحقنا ويفزعنا ...والقطاطى ديل وين؟ ماتقول لى فى اميركا !!!مابسعلك من الجمال
والبكسى ديل خابرة بكانن .
|
Post: #90
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: صديق الموج
Date: 02-18-2007, 11:51 PM
Parent: #1
اخوان سمية وسمية فجولنا شوية باقى ده ياهو خيتنا،،،،،،
|
Post: #91
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: b_bakkar
Date: 02-19-2007, 03:55 AM
Parent: #90
صديق الموج
ألف مرحب بيك
أنا جايي هسع من بوستك عن الفرجوني في البطانة
تعرف والله أنا بغران منو شديد.. وخطتي أعمل زيو، بس الفكرة دي جاتني متأخرة
أفنينا زهرة عمرنا عايزين نغير السودان كله والعالم كمان.. يا ريت لو قدرنا بس حافظنا على عقابنا وعذرية البطانة
لكن الله كريم
عندنا أمل كبير ينصلح الحال، وإن شاء الله ربنا يدينا العمر، لغاية ما ننزل المعاش ونلحق بالفرجوني. الوقت داك إن شاء الله تكون البطانة قاعدها بحالها
لك ودي
|
Post: #92
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: b_bakkar
Date: 02-19-2007, 04:36 AM
Parent: #91
سمية بت الشيخ
تعرفي أنا مكتول بطانة عديل. والأيام دي الحاصل في أراضي بعض أهلنا العفصة وغيرهم هارد قلبي هرد..
ناس الغابات عايزين يحجزوا 103 ألف فدان (يعني 20 ألف جدعة) في أخصب الوديان، للغابات قالوا!! والمسألة دي إذا أصروا عليها لازم يوم بتجيب ليها دم. ربنا يسنر ويلطف بس.
أندهي لينا جدك الشيخ عبد الباقي وباقي جدودك يصرفوا الناس ديل كدي كدي
وأنا بنده الشيخ وداعة ، جد العفصة، من هنا، أكان عنده صلاح وإيدا لاحقا يكفينا شرهم
والله من ورائهم محيط . بل هو قران مجيد في لوح محفوظ
أنا كان ما لقيتك هنا يا بتي وسيرة البطانة ما كان عندي وقت والله للكتابة في المنبر دا..
لكن مشاركتكم الآن أصبحت مصدر عزائي وسعادتي، رغم الزمن الغالي.
أما الصور البتسألي منها دي، أنا بقوقولها قوقلة.. للأسف السودان مصادر صوره على النت قليلة. أحيانا بشوف المناطق المشابهة للبطانة واستعير منها بعض الصور
صورة البنية طبعا من السودان لكن الطريف المصور المسطح كاتب عليها التعليق التالي:
[L]
So is the occasional tomb. This one commemorated a man who had made the pilgrimage to Mecca. No big deal today: the flight from Khartoum to Jedda is an easy one, with Boeing 747's operating daily. It was not always so
شايفها تشبه قبة الشيخ حمد النيل، ولو أنه قبة الشيخ حمد النيل القباب الصغيرة فيها خضراء. ربما تكون من قبب العركيين في أب حراز، أو ربما تكون من السافل الأرض الحمرا ء وشجرات السلم أو السيال دي تشبه السافل كدي.
القطاطي من الشوك. هل لاحظتي العشر حول البيوت؟؟ ما أظن في قرية بعيدة من البحر في منطقتنا يوجد فيها عشر. الباقي بخليه لي تخمينك.
ملاحظة هامة:
أنا زرت موقعك على الشبكة وسجلت ، اكتشفت شاعرة أديبة وأريبة..
لكن عندما حاولت تصفح مواضيع المنتدى، وجدتها كلها إعلانات غريبة. وبعثت ليك رسالة في بريدك هناك. إن شاء المسألة تكون بس مسألة فنية بسبب البرنامج المستعملاه. لأنك بتقولي الموقع تحت التشييد. بس الحقي، وقفي الإعلانات دي بسرعة.
[/L]
|
Post: #93
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-19-2007, 02:43 PM
Parent: #91
| Quote: اخوان سمية وسمية فجولنا شوية باقى ده ياهو خيتنا،،،،،، |
مرحب صديق الموج عرفت بجيتك لكن اتعقبنا
الدار دارك
|
Post: #94
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-19-2007, 03:14 PM
Parent: #93
الخال /بكار
والله دى عوجة تعرف أنا عندى شريط قديم مسجلاه الوالدة الله يديها العافية
من شعراء أهلا الشكربة
الجماعة ديل نظرتن بعيدة خلاس تتصور أتنبأوا بالشى دا من بدرى واذكر فيما
قالوا عن البطانة:ـ الفجة القبيل كانت مراتع النوق
صدقوا فيهامركز وشفخانة وسوق
وكلام جميل بجيبو ليك...الله يكفيها شر خلقو .
الصور جميلة وممتعة وخلابة سحرتنا ورجعتنا للبطاين والعساين
أشكرك لزيارتك الموقع وفى الحقيقة عملوه لى مهندسين من منطقة
صحار بسلطنة عمان مفاجأة حيث لبيت دعوة من كلية التربية بجامعة صحار
وكان من بين الحضور هؤلاء الأخوة الذين لاأعرفهم ولايعرفونى حيث طلبوا منى
أن أزودهم ببعض أعمالى ففعلت فما كان منهم الآ وان اتصلوا يخبرونى عن الموقع
وأنا الآن بصدد تغييره وتجديده وهنا على هذا المنبر فعل معى نفس الشىء الأخ المهندس
أبوبكر سيد أحمد حيث قام بعمل مدونة لى ونقل أعمالى من الموقع اليها ... والله إنى
بقدر سعادتى وفخرى بأبناء وطنى لخجلة من نفسى ماعارفة أنا مشغولة فى شنو ؟لآنى ما
قدر دا كلوا ما قادرة أبيض وشهم رغم الكم الهائل الذى أكتبه من الأعمال شعرا ونثرا
ولكنه حبيس الأدراج ....لك الشكر والسلام أرداف ولنا عودة لحكاية البطانة دى شطبت
راسي تب
|
Post: #95
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-19-2007, 03:34 PM
Parent: #94
الفجة القبيل كانت مراتع النوق
صدقوا فيهامركز وشفخانة وسوق
لله درك يا بت الصالحين والله بتجيبي نضم في غاية الروعة
الفجة يا ابا بكر تعني المحل الفيها تهوية ومساحة مهولة - اكيد سمعت الشكر في خال فاطنة - عشميق حبل الوجج انا اخويا مقلام الفجج .
شوف يا بكري حلاوة اللغة هنا عند هذا البدوي البسيط الذي تجاسر على قواعد اللغة و ثوابتها في الجمع إذ بدلا من جمع كلمة ناقة نياق اختار ان يكون الجمع ( النوق) لله درك ايها البدوي
فو الله زهير ابن ابي سلمى لم يسبقك على هذا الجمال .
ومراتع النوق محل رعي الابل .
|
Post: #96
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-19-2007, 11:40 PM
Parent: #95
Quote: شوف يا بكري حلاوة اللغة هنا عند هذا البدوي البسيط الذي تجاسر على قواعد اللغة و ثوابتها في الجمع إذ بدلا من جمع كلمة ناقة نياق اختار ان يكون الجمع ( النوق) لله درك ايها البدوي
فو الله زهير ابن ابي سلمى لم يسبقك على هذا الجمال .
ومراتع النوق محل رعي الابل . |
بارينا بالشرح دا عشان نغفر ليك تنكرك للهمبتة
وأنا أعكف حول بحث لأشرح لك معنى الهمبتة...جزاء وفاقا...
|
Post: #97
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-20-2007, 06:31 AM
Parent: #96
Quote: بارينا بالشرح دا عشان نغفر ليك تنكرك للهمبتة
وأنا أعكف حول بحث لأشرح لك معنى الهمبتة...جزاء وفاقا |
...
والله بس قدرنا اكان اتونستي ساى عايزة شرح هسع شوفي (بارينا) الفوق دى انت فاكرة الرطاني ده ناقشها
بارينا يا ابا بكر تعني تابعنا
والبراية هي شاطي النهر الجاف (المجننك ده) ودائما بيزرعوا فيها القرع والعدس والطماطم عندنا والمحريب والفول عندكم .
وبرئ عند النساء تعني حاشاى
والبراءة في اللغة تعني كون الشخص غير مدان
وبريان الجرح يعني ضمده وتعنى الخروج من المرض لبر العافية.
وانشاء الله انت الاعجمية (تبراك) محل ماش
|
Post: #98
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-20-2007, 06:08 PM
Parent: #97
| Quote: وانشاء الله انت الاعجمية (تبراك) محل ماش |
يبرأ منك انشاء الله تبراه كل لغات العالم
|
Post: #99
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-20-2007, 06:59 PM
Parent: #98
| Quote: يبرأ منك انشاء الله تبراه كل لغات العالم |
بت يا اختي الزول ده وين -
اكان طول برضه بعمل ليهو بوست بقول ابو بكر يشعر بالحت ويمشى يختار البعاد
|
Post: #100
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: b_bakkar
Date: 02-20-2007, 09:55 PM
Parent: #99
يا بت الشيوخ، البياباهم ممسوخ
بخصوص مواضيع المنتدى مرة أخرى
حاولت أرسل ليك إميل بالعنوان الموضح في الموقع، ولكن رسالتي ترجع إلي،وحاولت قبل قليل التلفون الموضح على الموقع وبيعمل مشغول طوالي.
زما ما قت ليك المنتدي الفي موقعك بعض الإعلانات والموضوعات المنشورة فيهو غريبة، غير مناسبة.
أرجو أن تكتبي لي بأسرع ما يكون على العنوان الإلكتروني المبين أعلاه عشان أشرح ليك. أو تستعيني بمن معك لتصفح تلك الإعلانات وحجب المشاتر فيها وإبقاء المناسب.
قوام، قوام، يا بت الأقوام
|
Post: #101
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: سمية الحسن طلحة
Date: 02-20-2007, 10:23 PM
Parent: #100
Quote: أشكرك لزيارتك الموقع وفى الحقيقة عملوه لى مهندسين من منطقة
صحار بسلطنة عمان مفاجأة حيث لبيت دعوة من كلية التربية بجامعة صحار
وكان من بين الحضور هؤلاء الأخوة الذين لاأعرفهم ولايعرفونى حيث طلبوا منى
أن أزودهم ببعض أعمالى ففعلت فما كان منهم الآ وان اتصلوا يخبرونى عن الموقع
وأنا الآن بصدد تغييره وتجديده |
الموقع لى حق تغييره وسوف أفعل انشاء الله
[email protected]
رقم الهاتف لم يتغير لكن بالفعل كان مشغول
لك منى عاطر التحاياِ
|
Post: #102
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: b_bakkar
Date: 02-21-2007, 05:32 AM
Parent: #101
|
Post: #103
Title: Re: من أراد أن يزوره شنتير...فليخطىء مثلى خطاءاً كبير ...( ياأهل الحقيبة وأبوصلاح أجمعوا النفبر
Author: الطيب شيقوق
Date: 02-21-2007, 06:21 PM
Parent: #102
ظني ان بعضا من هذه اللوحات الجميلة ذات علاقة بمحمية الدندر القومية
ولا شنو اخي بكار ؟
|
|
|