Post: #1
Title: صــــدفـة !!.... أجــمل وأغـرب وأصعـب صــــدفـة
Author: salma subhi
Date: 07-29-2007, 10:47 AM
Parent: #0
صـــــدفــــة
صدفة وأجمل صدفة انا يوم لاقيتا
أسعد يوم يومي الحييتا
نور عينية ياما حبيتا
في حياة كل أنسان صدفه!
هسي وانتوا بتقروا في البوست ده مريتوا عليه خلينا نقول صــدفــة .
ُرب صدفة خير من ألف ميعاد....صدفة تخليك تقول للمستحيل لا وألف لا !! المستحيل ممكن يتحقق ...مثلاً تلاقي شخص تحبه شديدأو عزيز عليك في مكان بالصدفة أو تلقى عروسك بالصدفة أو ممكن وظيفة..و في البورد مثلاً لاقينا ناس كتير بالصدفة ورب أخ في البورد لم تلده أمك... ونقول عليها ياسلام أجمل صدفة  والصدف الجميلة كتيرة.
وقد يبتسم القدر ساخرا ويلقي في وجهنا صدفة غريبة نستغرب من حدوثها و في توقيت كمان أغرب وممكن تمشي سريع قدامنا ولا نزال نقول ونردد سبحان الله و دي أغرب صدفة 
وممكن نقع في موقف لا نحسد عليه مثلاً واحد يمشي حفلة عرس يلقى العروس هي الكان داير يعرسها  ... أو يكونواحد متفادي يلاقي زول ويا لطيف بالصدفة يلاقيه قدامو....
أو يرسل واحد مسج لي تلفون بالغلط وتكون ....أصعب صدفة
والصــدف كتيييرة
طيب من واقع الحياة ومن المواقف الحولكم وخلينا نقول ممكن تكون مرت بيكم؟ تفتكروا ما هــــــي
أجمل..
أو أغرب...
أو أصعب صدفة............
|
Post: #2
Title: Re: صــــدفـة !!.... أجــمل وأغـرب وأصعـب صــــدفـة
Author: عاصم ابوبكر حامد
Date: 07-29-2007, 10:52 AM
Parent: #1
الاخت سلمى
لكى التحية
| Quote: وممكن نقع في موقف لا نحسد عليه مثلاً واحد يمشي حفلة عرس يلقى العروس هي الكان داير يعرسها |
فى الحالة دى طوالى تعمل فيها فرحان
وتمشئ تبارك ...
تسلمى
|
Post: #3
Title: Re: صــــدفـة !!.... أجــمل وأغـرب وأصعـب صــــدفـة
Author: salma subhi
Date: 07-29-2007, 10:59 AM
Parent: #2
الأخ عاصم أبوبكر
Quote: وممكن نقع في موقف لا نحسد عليه مثلاً واحد يمشي حفلة عرس يلقى العروس هي الكان داير يعرسها
فى الحالة دى طوالى تعمل فيها فرحان
وتمشئ تبارك ...
|
والله ضحكتني  لكن ده هم يضحك وهم يبكي....بس عليك الله في زول بيقدر يعمل دي !...أنا بعرف زول كان مغترب وواعد البت بالزواج ....القصة طولت ، جا اجازة لقى عرس البت الدايرهابعد اسبوع داخ ودوه المستشفى ..( بالمناسبة العريس صحبه )
كل التقدير
|
Post: #4
Title: Re: صــــدفـة !!.... أجــمل وأغـرب وأصعـب صــــدفـة
Author: الطاهر عثمان
Date: 07-29-2007, 11:11 AM
Parent: #1
الأخت/ سلمى تحياتي
في صدفة نادرة الحدوث قابلت صديق وأخ عزيز بعد إنقطاع دام لسنين طويلة في الحرم وفي الطواف وكانت صدفة غريبة لانه في العادة لاتقابل اثناء الطواف حتي من حضر معك للعمرة فما بالك بشخص لم تجمعك به سنين طويلة...
ولك التحية
|
Post: #5
Title: Re: صــــدفـة !!.... أجــمل وأغـرب وأصعـب صــــدفـة
Author: salma subhi
Date: 07-29-2007, 11:19 AM
Parent: #4
| Quote: في صدفة نادرة الحدوث قابلت صديق وأخ عزيز بعد إنقطاع دام لسنين طويلة في الحرم وفي الطواف وكانت صدفة غريبة لانه في العادة لاتقابل اثناء الطواف حتي من حضر معك للعمرة فما بالك بشخص لم تجمعك به سنين طويلة... |
نقول ليك دي أجمل صدفة وتنمنى يا أستاذ الطاهر لو تلاقينا الأيام بأصدقاءنا تاني.....الا نمشي عمرة
كل التقدير
|
Post: #6
Title: Re: صــــدفـة !!.... أجــمل وأغـرب وأصعـب صــــدفـة
Author: عاصم ابوبكر حامد
Date: 07-29-2007, 11:27 AM
Parent: #1
الاخت سلمى
لكى التحية مجددا
| Quote: ..( بالمناسبة العريس صحبه ) |
دى زاتها الدقسة ...
انا لو كنت فى مكانه بعمل فيها رايح
وببارك وبطلع طوالى ...
وعلى شان ما اقع فى شئ زى دا بحاول ما امشئ الاعراس اطلاقا من الليلة ...
|
Post: #7
Title: Re: صــــدفـة !!.... أجــمل وأغـرب وأصعـب صــــدفـة
Author: salma subhi
Date: 07-29-2007, 11:29 AM
Parent: #6
الأخ عاصم
Quote: دى زاتها الدقسة ...
انا لو كنت فى مكانه بعمل فيها رايح
وببارك وبطلع طوالى ...
|
يا أخ عاصم المبارك ليها شنو ...ما تمشي تقابل العريس ذاتو! ولو خلاص نفسك تشوفه ممكن تعاين بي بره يعني من وراء الكواليس وتمشي تتحسر للصباح
|
Post: #8
Title: Re: صــــدفـة !!.... أجــمل وأغـرب وأصعـب صــــدفـة
Author: الطيب شيقوق
Date: 07-29-2007, 11:53 AM
Parent: #7
سلومة بت العز كيفك
| Quote: ..و في البورد مثلاً لاقينا ناس كتير بالصدفة ورب أخ في البورد لم تلده أمك |
صدقت في دى يا استاذتي
لنا عودة
|
Post: #9
Title: Re: صــــدفـة !!.... أجــمل وأغـرب وأصعـب صــــدفـة
Author: خالد علي محجوب المنسي
Date: 07-29-2007, 11:59 AM
Parent: #8
Quote: والصــدف كتيييرة
ما هــــــي
أجمل..
أو أغرب...
أو أصعب صدفة............مرت بيكم؟ |
سلمى سلام
أجمل صدفة إنا ألتقينا فيك في هذا المنبر
خالد
|
Post: #14
Title: Re: صــــدفـة !!.... أجــمل وأغـرب وأصعـب صــــدفـة
Author: salma subhi
Date: 07-30-2007, 05:06 AM
Parent: #9
الأستاذ خالد المنسي
أينما كنت سلامي اليك والى من تطيب النفس لرؤياه ابنك الجميل حفظه الله..ولقد اختفيت فترة من البورد لعل المانع خير؟
فعلاً من الصدف الجميلة والعزيزة على نفسي أن التقيك أنا أيضاً في المنبر ...
لك مني كل الود والاحترام والتقدير
|
Post: #13
Title: Re: صــــدفـة !!.... أجــمل وأغـرب وأصعـب صــــدفـة
Author: salma subhi
Date: 07-30-2007, 05:03 AM
Parent: #8
الأستاذ الفاضل الطيب شيقوق
Quote: Quote: ..و في البورد مثلاً لاقينا ناس كتير بالصدفة ورب أخ في البورد لم تلده أمك
صدقت في دى يا استاذتي
|
مش دي صاح بالله يا أستاذ الطيب ...الله يجمع بين الناس بالخير والمحبة دائماً.
كل التقدير
|
Post: #10
Title: Re: صــــدفـة !!.... أجــمل وأغـرب وأصعـب صــــدفـة
Author: مجدي عبدالرحيم فضل
Date: 07-29-2007, 12:01 PM
Parent: #7
أنـــ هنا صدفة!! ــــ وتعرفي علي الزملاء بالبورد أجمل الصدف ــا
وأغربها عندما أنئ بعيدا عن الأحباب تجد يساورني المسح الأسفيري لهم
في مخيلتي الغريبة المزاج وعندما نأتي هنا نجد بوست مثل هذا وسلمي
تسلمنا صدف وردية تسبح بنا في سماؤات من العشق لهذا الكيان الرائع.
،،،،أبوقصي،،،،
|
Post: #15
Title: Re: صــــدفـة !!.... أجــمل وأغـرب وأصعـب صــــدفـة
Author: salma subhi
Date: 07-30-2007, 05:11 AM
Parent: #10
Quote: أنـــ هنا صدفة!! ــــ وتعرفي علي الزملاء بالبورد أجمل الصدف ــا
|
الأخ الجليل مجدي ولا نقول أبو قصي ...
فعلاً وجود أكثرنا هنا صدفة وصدفة جميلة عرفنا عليك المنبر ...لك من كريم الخصال ما لمع نجمه في البوستات...أحييك من هنا وأكن لك كل احترام وود وتقدير
شكراً أبو قصي
|
Post: #11
Title: Re: صــــدفـة !!.... أجــمل وأغـرب وأصعـب صــــدفـة
Author: Haitham El Galal
Date: 07-29-2007, 12:02 PM
Parent: #1
سبحان من جمع بعد الفراق
حكى لى صديق قصه اغرب للخيال فحواها انه انقطع عنها اكثر من عشره سنوات هى لم تكن تعره زات الاهتمام و يذداد غبطه كلما سمع اخبارها و اراد لهما المولى اللقاء فهل لكى ان تتخيلى كيف كان حراره اللقيا من بعد الفراق
يا ربى مكوه فحم والا كهرباء اظنو فرن عيش عديييييييل كده
|
Post: #16
Title: Re: صــــدفـة !!.... أجــمل وأغـرب وأصعـب صــــدفـة
Author: salma subhi
Date: 07-30-2007, 05:16 AM
Parent: #11
هيثم الجلال
Quote: فهل لكى ان تتخيلى كيف كان حراره اللقيا من بعد الفراق
|
في دي تسأل صاحبك طوالي ...!
| Quote: يا ربى مكوه فحم والا كهرباء اظنو فرن عيش عديييييييل كده |
وانت مالك قاتلك الفضول؟ بعدين مكواة وفرن عيش عدييييييل !...هم حيين بعد الوليعة دي لي هسي ؟
كل التقدير
|
Post: #12
Title: Re: صــــدفـة !!.... أجــمل وأغـرب وأصعـب صــــدفـة
Author: Haitham El Galal
Date: 07-29-2007, 12:04 PM
Parent: #1
سبحان من جمع بعد الفراق
حكى لى صديق قصه اغرب للخيال فحواها انه انقطع عنها اكثر من عشره سنوات هى لم تكن تعره زات الاهتمام و يذداد غبطه كلما سمع اخبارها و اراد لهما المولى اللقاء فهل لكى ان تتخيلى كيف كان حراره اللقيا من بعد الفراق
يا ربى مكوه فحم والا كهرباء اظنو فرن عيش عديييييييل كده
تخريمه
سلمى
بتنكتى ليك حاجات عجيبه عليك الله لاقيتى منو
|
Post: #17
Title: Re: صــــدفـة !!.... أجــمل وأغـرب وأصعـب صــــدفـة
Author: الطيب شيقوق
Date: 07-30-2007, 05:22 AM
Parent: #12
| Quote: مش دي صاح بالله يا أستاذ الطيب ...الله يجمع بين الناس بالخير والمحبة دائماً. |
سلمى اوعاك تضحكي خليني افضفض ساى لانو البوست ده ذاتو عملتيهو صدفة .
انت عارف يا سلمى اختى نحن زمان لما جينا برالمة في الجامعة من الريف كنا بنخاف من بنات البندر ونقطع ليهن الطريق لو قابلننا في الاتجاه المعاكس خاصة لما يقولوا دى بت ابو العلاء او عباس صبحي وخاصة بنات كمبونى الصفر ديلاك ووووووووووووب ديل مش بنخاف منهن وبس ديل بنقول بنات المسئولين والخبراء وصناع القرار الممكن يفصلك من الجامعة ذاتها .
اها هسع شوفي الصدفة خلتنا نعرفكن ونتجاسر عليكن ونناصحكن كمان عاملين صناع قرار .
هييييييييييييع نعمة القراية ونعمة الصدفة .
برجع ليك
|
Post: #18
Title: Re: صــــدفـة !!.... أجــمل وأغـرب وأصعـب صــــدفـة
Author: salma subhi
Date: 07-30-2007, 05:33 AM
Parent: #17
Quote: انت عارف يا سلمى اختى نحن زمان لما جينا برالمة في الجامعة من الريف كنا بنخاف من بنات البندر ونقطع ليهن الطريق لو قابلننا في الاتجاه المعاكس خاصة لما يقولوا دى بت ابو العلاء او عباس صبحي وخاصة بنات كمبونى الصفر ديلاك ووووووووووووب ديل مش بنخاف منهن وبس ديل بنقول بنات المسئولين والخبراء وصناع القرار الممكن يفصلك من الجامعة ذاتها .
|
والله انت ظريف يا أستاذ الطيب....و طيب لو قلت ليك أنا من جماعة كمبوني الصفر ديلاك حتعمل شنو؟؟؟ ...بس ما للدرجة دي ..ديل بنات عسل وظريفات شديد شديد بس انتوا الزحيتوا براكم من الدرب.
والمهم ....
Quote: اها هسع شوفي الصدفة خلتنا نعرفكن ونتجاسر عليكن ونناصحكن كمان عاملين صناع قرار .
|
شفت كيف
كل الود والتقدير
|
Post: #19
Title: Re: صــــدفـة !!.... أجــمل وأغـرب وأصعـب صــــدفـة
Author: الطيب شيقوق
Date: 07-30-2007, 07:09 AM
Parent: #18
سلومة
| Quote: والله انت ظريف يا أستاذ الطيب....و طيب لو قلت ليك أنا من جماعة كمبوني الصفر ديلاك حتعمل شنو؟؟؟ ...بس ما للدرجة دي ..ديل بنات عسل وظريفات شديد شديد بس انتوا الزحيتوا براكم من الدرب. |
يديك العافية
| Quote: و طيب لو قلت ليك أنا من جماعة كمبوني الصفر ديلاك حتعمل شنو؟؟؟ |
هسع ولا زمااااااااااان؟؟؟؟؟؟؟
| Quote: ديل بنات عسل وظريفات شديد شديد بس انتوا الزحيتوا براكم من الدرب |
نحن الساس ونحن الراس يا سلومة بنحب نجدع يمين وشمال اصلا زول يقول ليك مشيت فين او جيت من فين ما بركب في راسنا والعسل ديل الواحدة تخت ليك يديها في خصرها وتحدر ليك بحمرة عين حتى لو طلعت من الحوش ساى .
والعسل ديل ناقشات ليك التكنولوجيا شدييييييد الواحدة تعمل ليك كود سرى لموبايلها ما تقدر تشوف الفيهو ( معليش في نوع زى ده) ولو انا عملت كود يعرفن يفكن الشفرات ويجيبن خبرك دقيقة مافي .
هييييييييييييييع ما احلاك يا صدفة
|
Post: #20
Title: Re: صــــدفـة !!.... أجــمل وأغـرب وأصعـب صــــدفـة
Author: salma subhi
Date: 07-30-2007, 07:35 AM
Parent: #19
أستاذ الطيب شيقوق
Quote: نحن الساس ونحن الراس يا سلومة بنحب نجدع يمين وشمال اصلا زول يقول ليك مشيت فين او جيت من فين ما بركب في راسنا والعسل ديل الواحدة تخت ليك يديها في خصرها وتحدر ليك بحمرة عين حتى لو طلعت من الحوش ساى .
|
غايتوا البعملن كده احنا ما منهن يا أستاذ الطيب ...احنا بنات بلد ومن شندي كمان.
| Quote: هييييييييييييييع ما احلاك يا صدفة |
أيوه هو ده المهم ما أحلاك يا صدفة
وربنا يقابلك بكل الصدف الحلوة
|
Post: #21
Title: Re: صــــدفـة !!.... أجــمل وأغـرب وأصعـب صــــدفـة
Author: الطيب شيقوق
Date: 07-30-2007, 07:48 AM
Parent: #20
| Quote: ...احنا بنات بلد ومن شندي كمان |
والاسم الكبييييييييييييير ده شنو؟ (عبااااااااااااااااااااااس صبحي) ده هو ذاتو المجنن بن لادن .
|
Post: #22
Title: Re: صــــدفـة !!.... أجــمل وأغـرب وأصعـب صــــدفـة
Author: salma subhi
Date: 07-30-2007, 08:13 AM
Parent: #21
أستاذ الطيب
طيب لو قلت ليك علمنا الوالد أن ننحني اجلالاً واحتراماً لكل من درسّه أو تتلمذ على يديه أو كان له صديقاً...قريباً أو حتى مر عليه مسلماً.
وها نحن نكّ لك كل التقدير أستاذ الطيب
|
Post: #23
Title: Re: صــــدفـة !!.... أجــمل وأغـرب وأصعـب صــــدفـة
Author: mohmed khalail
Date: 07-30-2007, 08:33 AM
Parent: #22
الاستاذة سلمى
الصدف في حياة الانسان لا تنتهي لكن الغريبة ان معظم الصدف مفرحة وغالبا ما تكون لقاء حبيب ومعظمها يتعلق بشركاء الحياة ولكن ...هناك بعض الصدف اجارك الله ..وسأعود لاحقا بالتفصيل
شكرا على البوست المميز
محمد
|
Post: #24
Title: Re: صــــدفـة !!.... أجــمل وأغـرب وأصعـب صــــدفـة
Author: الطيب شيقوق
Date: 07-30-2007, 08:57 AM
Parent: #23
الله يديك العافية يا سلمى واكيد ظاهر من طريقة تعاملك وكتاباتك
|
Post: #25
Title: Re: صــــدفـة !!.... أجــمل وأغـرب وأصعـب صــــدفـة
Author: salma subhi
Date: 07-30-2007, 09:00 AM
Parent: #23
| Quote: بعض الصدف اجارك الله ..وسأعود لاحقا بالتفصيل |
سلام أخ محمد...دي البنخاف منها ذاتوا
منتظرين....
كل التقدير
|
Post: #26
Title: Re: صــــدفـة !!.... أجــمل وأغـرب وأصعـب صــــدفـة
Author: salma subhi
Date: 07-30-2007, 09:38 AM
Parent: #25
ومن الصدف...
|
Post: #28
Title: Re: صــــدفـة !!.... أجــمل وأغـرب وأصعـب صــــدفـة
Author: الطيب شيقوق
Date: 07-30-2007, 09:53 AM
Parent: #26
انت عارفة يا سلمى علاقة جميل وبثينة بدت بالصدفة .
يحكى ان ابل جميل كانت ترعى في وادى اسمه وادى بغيض واتت بثينة هى الاخرى لترعى في هذا الوادى الجميل . غضب جميل عندما وجد ابل بثينة ترعى في نفس المكان التى ترعى فيه ابله . لم ير جميل بثينة وصار يصيح ويعصب ابعد ابلك ابعد ابلك ولم تتبين له ملامح بثينة في تلك اللحظة الى ان دنت منه وبدات بمحياها الجميل امامه . اعتذر جميل وبدا يتحدث معها عن الابل والخريف وراح حالب ليها لبن من نياقه وشربت وتحدثا معا وتكرر المشهد الى ان صارا على الحالة التى يحكى عنها . وقد ظهر هذا من شعر جميل عندما قال :
وأول ما ما قاد المودة بيننا بوادي بغيض يا بثين سباب
لذا نجد اكثر انواع الحب حميمية هو ذلك الذى يعقب المشاكل بين طرفيه .
لقيتيني كيف؟
|
Post: #30
Title: Re: صــــدفـة !!.... أجــمل وأغـرب وأصعـب صــــدفـة
Author: salma subhi
Date: 07-31-2007, 04:57 AM
Parent: #28
أستاذ الطيب شيقوق
Quote: لذا نجد اكثر انواع الحب حميمية هو ذلك الذى يعقب المشاكل بين طرفيه .
لقيتيني كيف؟ |
يا سلام ! كلام حكم !ما محبة الا من بعد عداوة...
يعني نقوم نشاكل ! وننتظر النتيجة ...
ذكرتني بمداخلتك في بوست لا للزواج نعم للعزوبية والعكس ، لما حكيت قصة الحب المأساوية وفعلاً ما قريتها قبل كده وما مرت علي وبعدين اتذكرت انوا القصة دي كانت بعيدة شديد سنة 1968 يعني أنا ذاتي ما مولودة لكن فتحت علينا آفاق من المعلومات نحييك عليها.
كل التقدير
|
Post: #27
Title: Re: صــــدفـة !!.... أجــمل وأغـرب وأصعـب صــــدفـة
Author: Elawad Eltayeb
Date: 07-30-2007, 09:53 AM
Parent: #25
العزيزو سلمى صبحي، هذه صدفة جميلة في بورد الصدف.
أنا عندي صدفة غريبة وتكررت كذا مرة..
مع صديقي وحبيبي وإبن خالي عثمان عبد الباسط (كحيل)، وهو مقيم بالسودان وأنا بالرياض
وهي أنه كلما (يحيب سيرتي) مع أحد أصحابه أو الأهل.. يرن هاتفه.. ويكون المتصل أنا.. فيصاب هو ومن معه بالدهشة. وفي الحقيقة أنا ما بكون مخطط أتصل به، لكن يغمرني إحساس قوي فأتناول الهاتف وأتصل به.
حدث هذا أكثر من مرة!
نفس الأمر يحدث مع أمي وأخواتي وبعض الأهل والأصدقاء.
فهل هذا نتيجة الغربة والتفكير الكثير.. ربما.
|
Post: #29
Title: Re: صــــدفـة !!.... أجــمل وأغـرب وأصعـب صــــدفـة
Author: خالد علي محجوب المنسي
Date: 07-30-2007, 01:59 PM
Parent: #27
| Quote: أينما كنت سلامي اليك والى من تطيب النفس لرؤياه ابنك الجميل حفظه الله..ولقد اختفيت فترة من البورد لعل المانع خير؟ |
ساقتني رجلاي ... زيارة خاطفة دون تخطيط لها لأرض الخير الامارات العربية قضيت فيها 20 يوما وكنت ناوي اسبوع وأغرب شئ لم تحالفني الصدف أن ألتقي بي بورداب الامارات فقط القردابي بحكم القرابة فهو ابن عمي لزم .. واتصال هاتفي من الحبيب شيخ العرب هجو الأقرع من قطر
ومن الصدف الغريبة كنت بدأت الدراسة في انقرا ( تركيا ) قبل ذهابي لدولة المجر ... كنت يوم اتمشى في وسط البلد ... لاحظت مرور سيارتين بداخلهم ضباط سودانيين يرتدون الزي العسكري السوداني ... فجاءة وقفت السيارات وترجل ضابط برتبة لواء وكان يهم لكي يقطع الشارع حتى يلتقيني ... في تلك اللحظة بدأت كل خلايا عقلي في العمل السريع وانا استرجع ذاكرتي ( يا ترى هذا الرجل أنا اين رأيته ) وعندما أخدني بالاحضان عادة لي الذاكرة وتذكرت انه خالي شقيق امي أحمد بادي الحسن عليه رحمة من الله تعالى
صدقيني كل ما حكيت قد حدث وأرجعت ذلك اني ما كنت اتوقع زيارة خالي وكذلك ان التقيه في تركيا
لك تحياتي سلمى
خالد
|
Post: #32
Title: Re: صــــدفـة !!.... أجــمل وأغـرب وأصعـب صــــدفـة
Author: salma subhi
Date: 07-31-2007, 05:10 AM
الأستاذ الفاضل خالد المنسي
لقيناك هنا صدفة....فنشكر الصدف التى عرفتنا بك ولمت ناس شندي.أُكن لك كل احترام وتقدير سيدي الفاضل والحمدلله انكم بخير كده اطمأنينا عليك وعلى الأهل .
مودتي وتقديري
|
Post: #31
Title: Re: صــــدفـة !!.... أجــمل وأغـرب وأصعـب صــــدفـة
Author: salma subhi
Date: 07-31-2007, 05:04 AM
Parent: #27
الأستاذ العوض الطيب
شكراً لمرورك سيدي الفاضل....
Quote: وهي أنه كلما (يحيب سيرتي) مع أحد أصحابه أو الأهل.. يرن هاتفه.. ويكون المتصل أنا.. فيصاب هو ومن معه بالدهشة. وفي الحقيقة أنا ما بكون مخطط أتصل به، لكن يغمرني إحساس قوي فأتناول الهاتف وأتصل به.
حدث هذا أكثر من مرة!
نفس الأمر يحدث مع أمي وأخواتي وبعض الأهل والأصدقاء.
فهل هذا نتيجة الغربة والتفكير الكثير.. ربما. |
عارف يا أستاذ العوض دي بنقول عليها مرات القلوب شواهد...وبيتقال للزول ابن حلال ...ربنا يزيد المحنة ويجمع الناس دايماً في ساعة الخير
كل التقدير
|
Post: #33
Title: Re: صــــدفـة !!.... أجــمل وأغـرب وأصعـب صــــدفـة
Author: الطيب شيقوق
Date: 07-31-2007, 05:18 AM
Parent: #31
الاخت الجميلة سلومة
يا سلام ! كلام حكم !ما محبة الا من بعد عداوة...
| Quote: يعني نقوم نشاكل ! وننتظر النتيجة ... |
معقول لسع يا ما بعد عمري ؟
| Quote: ذكرتني بمداخلتك في بوست لا للزواج نعم للعزوبية والعكس ، لما حكيت قصة الحب المأساوية وفعلاً ما قريتها قبل كده وما مرت علي وبعدين اتذكرت انوا القصة دي كانت بعيدة شديد سنة 1968 يعني أنا ذاتي ما مولودة لكن فتحت علينا آفاق من المعلومات نحييك عليها. |
يعجبني حضورك الدائم هل عندك backup? عيني عليك باردة يا بت صبحي .
الغرابة في تلك القضية يا سلمى تتمثل في مستوى الوعي الثقافي الذى يتمتع به حبيبان سودانيان اقليميان في عام 1968 .
لك منى اطيب الاماني
شيقوق
|
Post: #34
Title: Re: صــــدفـة !!.... أجــمل وأغـرب وأصعـب صــــدفـة
Author: salma subhi
Date: 07-31-2007, 06:44 AM
Parent: #33
الأستاذ الطيب
لا نخفيك لمداخلاتك سحنة من خفة الظل تزرع البسمة...أطال الله في عمرك واسعدك.
|
Post: #35
Title: Re: صــــدفـة !!.... أجــمل وأغـرب وأصعـب صــــدفـة
Author: الطيب شيقوق
Date: 07-31-2007, 08:32 AM
Parent: #34
استراحة
(الانثى كالورده تنحني للنسيم ولا تنكسر للعاصفه)
(الرجل كالطفل احتويه بحنانك )
دمتم
|
Post: #36
Title: Re: صــــدفـة !!.... أجــمل وأغـرب وأصعـب صــــدفـة
Author: salma subhi
Date: 07-31-2007, 10:27 AM
Parent: #35
الأستاذ الطيب شيقوق
Quote: استراحة
(الانثى كالورده تنحني للنسيم ولا تنكسر للعاصفه)
(الرجل كالطفل احتويه بحنانك )
|
شكلنا حنقلب البوست في الركن الجميل الهادي مرة تانية
تقديري
|
Post: #37
Title: Re: صــــدفـة !!.... أجــمل وأغـرب وأصعـب صــــدفـة
Author: hatim ibrahim
Date: 07-31-2007, 11:32 AM
Parent: #1
.
سلامات يا سلمى
انا غايتو الحصل لي مع ( محمود ) ما قادر اسميهو صدفة
بقول عليهو انو ( حاجة غريبة ) ..وطالما البوست موضوعو (الصدف )
خلينا نسميها على مضض ( صدفة أو صدف غريبة )
* في سنة 1993 بدت علاقتي بالمطاعم
طبعا مش كـ( زبون ) ولكن كيد عاملة ( خبيرة) في غسل الصحون
البداية كانت بنادي العروبة بمدينة حلب الشهباء
هناك التقيت بـ ( محمود ) .. شاب سوري ( كردي ) مهذب ولطيف جدا
6 أشهر قضيناها معا في مطعم العروبة ..هو بماكينة الشاورما وأنا في الكواليس
تغلبنا بالقفشات والتعليقات الساخرة على الصعوبات ولحظات الرتابة والملل
وبعدها تركت أنا العمل للتفرغ لامتحانات الجامعة
وما لبث هو أيضا ان ترك العمل بعد فترة قصيرة ..
وانقطعت الاتصالات بيننا ..
* في صيف 1994 ذهبت لقضاء العطلة في ( القاهرة )
وفي أحد مطاعم ( الكشري) - دخلته كزبون
التقيت ( محمود )..
عرفت بأنه يعمل في مطعم مجاور ...
وبقيت أزوره كلما سنحت لي الفرصة
حتى انقضت العطلة وعدت لحبيبتي دمشق ..
* في صيف سنة 1997 وبعد التخرج من الجامعة
وتحت ضغط الظروف
عدت للمطاعم بأبوابها الخلفية ...
واخترت منطقة اصطياف تعرف باسم ( بلودان )
وفي نفس المطعم .. التقيت ( محمود )
هو في ماكينة الشاورما . وأنا أغسل الصحون..
وبانتهاء فصل الصيف ..افترقنا ..
* " ودارت الأيام " كما تقول الست ام كلثوم
وفي عام 2002 اشتهيت ذات يوم وجبة شاروما
وأنا أتجول في شوارع كازابلانكا
دلني بعض الشباب المغاربة على مطعم سوري
دخلته وبي شوق لدمشق
فوجدت ( محمود ) بماكينة الشاورما
ولولا انه داهمني بالعناق
لاسلمت ساقي للريح ..
.
|
Post: #38
Title: Re: صــــدفـة !!.... أجــمل وأغـرب وأصعـب صــــدفـة
Author: salma subhi
Date: 08-02-2007, 03:52 PM
Parent: #37
الأخ حاتم ابراهيم
| Quote: في مطعم العروبة ..هو بماكينة الشاورما |
Quote: وفي نفس المطعم .. التقيت ( محمود )
هو في ماكينة الشاورما |
Quote: وبي شوق لدمشق
فوجدت ( محمود ) بماكينة الشاورما |
فعلاً أغرب صدف !
الحكاية يبقى في ماكينة الشاورما....
Quote: ولولا انه داهمني بالعناق
لاسلمت ساقي للريح ..
. |
أنا ذاتي بعد ما قريت كلامك ده قربت أقول ليك أجري...
كل التقدير أخ حاتم
|
|