حنان سكليب !!!!!

وصلني هذا الإيميل اللطيف من أحد الأصدقاء فأحببت أن تشاركوني في قراءته مع الشكر الجزيل لكاتب الموضوع في الحقيقة أنا كنت فاكرة حنان لبط هي الوحيدة ست الإسم لكن لله في خلقه شئون!!

ملاح قرع وبامية مفروكة وكسرة وصحن سلطة و(ملاحة) ... ده كان الأكل فى بيوت البكا قبل أن يصبح (البكاء ذاتو) مظهر إجتماعى ونوع من أنواع (الفشخرة) بعد أن اجتاحت البلد أعداد مهولة من (المليارديرات الجدد) أصبحت تؤثر سلوكياً على بقية الطبقات الأخرى حتى صارت (الفاتحة) هى الفرق الوحيد بين الأتراح والأفراح!
عندما توفى رجل الأعمال (حسن يورو) قامت أسرته بفتح أبواب (الفيلا) الفاخرة لأفواج المعزين علاوة على (صيوان) ضخم نصب بطول الشارع العريض مزود بعدد مهول من مكيفات الهواء تغطى أرضيته (السجاد) لزوم (عدم الغبار وكده)!
عند موعد الغداء انتشر أفراد يرتدون زياً موحداً يحملون (صوانى الأكل) النيكل الناصعة التى ترتاح بداخلها أطباق المشويات والمحمرات والمقبلات وقطع الرغيف الفاخر بينما وضعت امام كل صينية عدد من زجاجات المياه المعدنية البااااردة!
فى صالون النساء جلست سوسو (فى الأصل ست البنات قبل أن يصبح حسن يورو رجل أعمال) جلست على سرير خشبى مستورد عليه ملاية قطيفة تتلقى التعازى من جاراتها وصويحباتها اللواتى جئن وهن فى كامل زينتهن (ناقشات) الحنة الما خمج يرتدين ثياب (الشيفون) المطرزة والشباشب ذات الكعب (البلية) تمتلئ أياديهن ورقابهن بآخر صيحات سوق الدهب فى (دبى) وبقية العواصم الخليجية!
- كلمتى (عوضية ردحى)؟
همست (سوسو) لجارتها وصديقتها (نوسة) والتى مالت قريبا منها وهى تجيبها:
- والله (عوضية ردحى) دى قالو عندها مناسبة بكاء فى (مدنى) سافرت مشت ليها، قمت مشيت لى (هاجر حى ووب) قالو ليا عندها إرتباط خارجى فى (دبى) فى واحد من ناس الجالية مات هناك أها فى الأخير مشيت كلمت ليكى (حنان سكليب) لقينا ما عندها ارتباط ووقعت العقد مع مدير أعمالا! وأديتو مليون عربون مقدم.
- وشالت منك البيانات!
- أديتا ليها كووولها.. المرحوم كان شغال شنو؟ وعندو كم عمارة؟ وقاعد يتبرع لى ياتو (نادى) وإشترى ليهم كم (لاعب)؟ وعربيتو الراكبا نوعا شنو؟ وموبايلو الشايلو موديلو كم؟
انتهت مجموعات النساء من تناول طعام الغداء الفندقى (الما خمج) ثم جئن لهن بالتحلية (باسطة وبسبوسة وكنافة وعين جمل وأم على) شئ باللوز وشئ بالجوز وشئ يالما بعرفو شنو داااك وبعد أن (ضربن) بدأن فى زحزحة الكراسى (البامبو) والجلوس كيمان كيمان (للشمارات) وهن يمسكن بثرامس الشاى (المذهبة) المتشابهة (الكبيرة حقت الشاى والصغيرة للجبنة) التى تفوح من (فناجينها) رائحة (المستكا)..
وفجأة دخلت إلى الصالون شابة (آخر شياكة) ذات مظهر يطابق كثيرا مظهر مغنيات هذا الزمان يمشى خلفها ستة (شابات آخريات) من نفس الشاكلة يرتدين زياً موحداً وهن يرفعن أياديهن عاليا فى حركات متتابعة ويصحن بصوت كالجرس يشق عنان السماء:
ووووب ووووب ووووووووووووووووووووووووووووووووووووووووووووووووووب..
ثم تبدأ (حنان سكليب) فى السكلى و(الوصف) وهن يرددن خلفها:
- ووووب عليا والله ليا يا حسن يوروو يا البتدى البتدورو والما بتدورو
ووووب عليا والله يا صغير وجاهل يا البتجيب القروش بالساهل
يا ود امي.. هيء يء يء يء ..
الكورس : وووب ... وووب ...ووووووووب
الليله يا حليلك يا زين الرجال ياملك الدولار يا البتستر الحال
الليله يا حليلك يا البتشيل من البنوك وتشتت قبال ما يلحقوك
يا ود امي.. هيء يء يء يء ..
الكورس: وووب ... وووب ...ووووووووب
الليلة وينك إنتا يا الإسبليت هبوبك والهمر ركوبك
الليله وينك إنتا يا البنيت المقصورة وركبت النافورة
الليله وينك إنتا يا أب جيوب منفخة وأب عربية مصفحة
يا ود امي.. هيء يء يء يء ..
الكورس: وووب ... وووب ...ووووووووب
يا حليلك الليله يا البتفك الصعيبة ويا البتسجل اللعيبة
يا حليلك الليله يا جوكى البنوك يا التهريبك بالسنبوك
يا ود امي.. هيء يء يء يء ..
الكورس: وووب ... وووب ...ووووووووب
ثم تعدل (حنان سكليب) توبا الشفون (الترانسبيرنت) الكان واقع وتنظر للكورس خلفها نظرة الفنان الذى يود أن (يختم) الأغنية فيبدأن فى (تحرير) البكاء ويرفعن أصواتهن ويضربن بأياديهن ليبدين زينتهن (دهب دبى وكده) ... ووووووووووووب وب وب وب ووووووووب ثم يتوقفن فى لحظة واحدة بإشارة من (حنان سكليب)! التى تجلس على أقرب كرسى وتتناول علبة مناديل الورق وتخرج منديلين تمسح بهما حبات العرق التى تساقطت بفعل المجهود رغم برودة التكييف ثم تلتفت إلى النسوة اللواتى كن فى الصالون يتابعون (فاصل السكليب) قائلة:
- قبلكن وحدكن.. جنس بخلن عليكن .. أول مرة أمشى ليا (بيت بكا) ما ينقطوا ليا فيهو!!

لذذذذذذذذذذيذ

سلام يا بعد عمري

جعل الله أيامك كلها لذذذذذذذذذذذذذذيذة !!

Quote: (حنان سكليب)! التى تجلس على أقرب كرسى وتتناول علبة مناديل الورق وتخرج منديلين تمسح بهما حبات العرق التى تساقطت بفعل المجهود

نحيا ونشوف

ولعواطف
صباح الخير

Quote: والله (عوضية ردحى) دى قالو عندها مناسبة بكاء فى (مدنى) سافرت مشت ليها، قمت مشيت لى (هاجر حى ووب) قالو ليا عندها إرتباط خارجى فى (دبى) فى واحد من ناس الجالية مات هناك أها فى الأخير مشيت كلمت ليكى (حنان سكليب) لقينا ما عندها ارتباط ووقعت العقد مع مدير أعمالا! وأديتو مليون عربون مقدم.

بوست مبالغة يا عواطف تحياتي
يتخيل لي بعد ده ظاهرة الحانوتي الكنا بنشوفو في السينما ونقرأ عنو في الكتب حتصبح واقع.
يعني عادي تلقى حانوتي يكتب ليك "حانوتي حديث" غسيل جنازة، تكفين ودفن باسرع الوسائل!
طبعا بيني وبينك بكون اخير من دفن الليل ابكراعا برة!

مودتي

الفاتح ...

صباح الورد ..

عارف السودان دة بقى بلد العجايب وليس الهند المظلومة دائما ..

شكرا على الطلة الحلوة ..

أبو السيوف ..

يسعد صباحك الجميل ...

الدنيا يا توري والدهر ياما يقري ...

شكرا على الحضور البهي...

عواطف
سلام اطنان واشواق كميات ومتعك الله بالصحه والعافيه والاسرة

حنان لبط انتى من ذمنها اتاريك طاعتى دياميه!!!!

تحياتى

هيثم الجلال

كااااااااااااااااك !!
كاااك دي عرفتيها؟
قيل في الأثر
أن حبيب نورة
كان في ضيافة الدجاجة الصغيرة الحمراء
معزوم صحن فول كارب
وبعد أن سمع كاكو
راجل الدجاجة الصغيرة الحمراء الخبر
أستعجب في أمره
وسكت عن ترديد أغنية
في الليلة ديك
لاهان علي أرضي و أسامحك
ولا يوم بفوت الفول عليك
قال لي ها زول ها
أنت جنيت واللا عاضيك كلب
قلت ليه في شنو يا كاكو
قال لي الولية دي الفول زرعتهُ وحدها
وحصدتهث وحدها
وستأكلهُ وحدها
انت ما الله ما ليك ؟
وضحك ضحكتوا التأريخية
كااااااااااااااك
وفعلا كيكي مقلبتني
علي اليمين بعد تحانيس أدتني ليك موية فول

هسة انا ما سمعت قصة حنان سكليب
أتذكرت صاحباتي
ناس عشة مشاكل
وحنان كوارع
وفاطنة دفار
وسعدية الصوط
ديل يا حليلن
منهن من قضي نحبه
ومنهن ممن ينتظر
وما سكلبوا سكليبا
اها يا توووووفففففففففي
بركة من صلي
وقال يا الله
ربنا يجازيك
قطعتي مصاريني
وخليتيني اكاكي من صباح الرحمن
كاااااااااااااااااااك

مساء الافراح والمعجزات والمفارقات

قبل قليل عرض فى قناة النيل الازرق برنامج سالت المذبعة مضيفتها

ان تشرح لها بتعملو اية فى مناسبة الزواج من حبث الاستعداد والشيلة والحفلة وكل مراسم الفرح

الاستاذة الضيفة تحدثت عن تقاليد الزواج فى قرية سرحان ريفى المناقل

فقال الشيلة مثلا اقل حاجة ثلاثة تياب وما شابة ذلك فى الاشياء الاخرى

والحفلة لا فنان وفرقة موسيقية ولا بهرجة والعاب نارية بل نساء وبنات القرية وفى جلسة مع

الدلوكة يتم الرقص وتتم الفرحة السعيدة.

انظرى هنا تقاليد الزواج وتكلفتة ومن المؤكد ايضا فى مناسبة الوفاء يكون بطريقة

مبسطة وحسب حالة سكان القرية ومستورة يارب


اها ناس حنان سكليب والعولمة والتجارة الحرة ووالنظام المالى العالمى , تجعلمهم يتمشون مع

ما يرونة مناسبا لطبقتهم المالية.


من المؤكد ان الشخص يلحظ اختلاف فى النموذجين (القريةوالمدينة).


سبحان اللة

الإيميل دا..بكون الكتبو "عمر فاروق"
مجرد ملاحظة..!












....