هل المريخ في الطريق لتسجيل الليبي (طارق التائب) ؟؟

في كلام كتير كده عن محاولات إدارة المريخ لضم اللاعب الليبي (طارق التائب) لاعب نادي الهلال السعودي ...

http://www.alweeam.com/news/news-action-show-id-10763.htm

وأيضاً في منتديات نادي الهلال السعودي يدور نفس الحديث ...

ـــــــــــ

أول حاجة .. الجدوى شنو من جلب اللاعب طارق التائب في وجود ستيفان وارغو أحد أفضل وأمهر اللاعبين الأفارقة ..

تاني حاجة .. تجربة اللاعب العربي في السودان لا أعتقد أنه قد يكتب لها النجاح لاعتبارات متعددة ..

تالت حاجة .. اللاعب التائب وإن كان لاعب مهاري وعلى مستوى عالي لكن اعتقد إنو فترة التوقف الطويلة التي مر بها اللاعب طارق التائب عقب إيقافه من الفيفا بالإضافة لعامل السن (فوق الثلاثين) قد لا تمكن الفريق من الاستفادة القصوى منه في البطولة الافريقية..

المجموعة الموجودة الآن من اللاعبين في المريخ مجموعة ممتازة وليست في حاجة إلى المزيد من الاضافات إلا في حراسة المرمى (حافظ وأكرم ديل ما بنستروا لي قدام) وكذلك لاعب بديل في الخانة التي يلعب فيها موسى الزومة ..

بالجد كده ما اعتقد إنو هناك حوجة فعلية للاعب طارق التائب الآن في المريخ وتسجيله "ان تم" فحا يكون دعاية لمجلس إدارة المريخ ورئيسه الوالي ليس إلا ..

Quote: هل المريخ في الطريق لتسجيل الليبي (طارق التائب) ؟؟

ياريت
التائب مع وارغو
يكمل روعة الملعب

شكرا الهادي

Quote: أول حاجة .. الجدوى شنو من جلب اللاعب طارق التائب في وجود ستيفان وارغو أحد أفضل وأمهر اللاعبين الأفارقة ..

الاخ الهادى تحية وسلام
اللاعب طارق التائب ( البرنس )تبقى من مدة ايقافة حوالى 70 يوم تبتدى
من الموسم المقبل وذلك استكمالا" لمدة العقوبة التى قضاها
بداية الموسم المنصرم بعد ما نجح فريق الهلال السعودى بتأجيل
العقوبة الى الموسم القادم
يعنى اللاعب كان مواصل مع الهلال الى اخر الدورى السعودى ودورى
ابطال اسـيا قبل اقل من شهر وفى رايي انو اللاعب التائب من افضل
اللاعبين الاجانب فى الاندية السعودية خلال الخمس السنوات الماضية
وهو خسارة حقيقة لنادى الهلال السعودى ( الزعيم ) ومكسب كبير
لاى نادى يظفر باللاعب
ياخى ده بجندو ليهو الفريق كلو عشان يمسكوه
يا دوب ناس النصر السعودى بياخدو نفسهم شوية

شكراً يا هارون ...

وما عارف إذا كنت بتتفق معاي في إنو المقارنة بين "الجوهرة السوداء" استيفان وارغو و طارق التائب أصلاً غير واردة

فصغر السن والسرعة والمهارة الرفيعة "الإيجابية" كلها في مصلحة "وارغو" ..

بالإضافة كمان لموضوع التفاهم والتناغم بينه وبين مهاجمي المريخ الأساسيين (إيداهور وكلتشي)


ـــــــــــــــ
ستايل وارغو ده إلا عند "ليونيل ميسي" بس يا هارون

حمزاوي انتو ناوين تفرتقوا الهلال ولا شنو ؟؟

وارغو والتائب الاتنين مع بعض ! .. رفقاً بالهلالاب يا هؤلاء

وأنا ما عارف يا حمزاوي لكن أشعر أنو "التائب" في حال جلبه لن يضيف أي جديد لفرقة المريخ في وجود المواهب الحالية

استيفان وارغو كفاااااية بطلو الطمع

كدي أنتو لمو في وراغو زاتو الأول ؟؟ قالو دخل الغابة ... اللهم لا شماتة


و كلتشي قالو بقي من بورداب أمريكا !!!

الاخ الهادي

سلام

المعلومات غير مؤكده الان واشاركك وجهة النظر في عدم جدوي اللاعب للمريخ لكبر سنه وفترة الايقاف الطويله
ولكن تبقي الخبره الافريقيه الطويله للتائب هي النقطه الايجابيه اذا تم تسجيله فعلا .

عبد الدائم سيد أحمد .. تحياتي

Quote: وفى رايي انو اللاعب التائب من افضل اللاعبين الاجانب فى الاندية السعودية خلال الخمس السنوات الماضية وهو خسارة حقيقة لنادى الهلال السعودى ( الزعيم ) ومكسب كبير لاى نادى يظفر باللاعب ياخى ده بجندو ليهو الفريق كلو عشان يمسكوه يا دوب ناس النصر السعودى بياخدو نفسهم شوية

التائب حريف ولعاب ما في كلام ...

بس هل المريخ في حوجة فعلية ليهو في الوكت الحالي ده ؟؟ ولا حا يكون تسجيله مجرد دعاية ونصر لمجلس المريخ ليس إلا ..

وهل المريخ عندو مشكلة في صناعة اللعب من وسط الملعب في وجود وارغو وعودة فيصل العجب .. بالإضافة كمان إنو ممكن يتم إشراك أو توظيف أياً من "الجواكر" راجي أو "الباشا" ليلعب أياً منهما إلى جوار استيفان وارغو وممكن يقدموا أداء كويس كما حصل في بعض المباريات
خيارات المريخ متعددة في وسط الملعب لذلك ما شاعر إنو في حوجة شديدة لجلب التائب في هذا الوقت ...

الكباشي البكري .. تحية واحترام

Quote: واشاركك وجهة النظر في عدم جدوي اللاعب للمريخ لكبر سنه وفترة الايقاف الطويله ولكن تبقي الخبره الافريقيه الطويله للتائب هي النقطه الايجابيه اذا تم تسجيله فعلا .

تمام يا كباشي وحتى المدرب "رادان" وهو الأدرى بشئون الفريق من الناحية الفنية قال ليهم ما عاوز لاعب إضافي لا إعارة ولا هم يحزنون ...

Quote: اكد المدير الفني لنادي المريخ الكرواتي رادان بوصفه عضو في لجنة التسجيلات التي كونها مجلس الادارة في اجتماعه الاخير بشان التعامل مع الفترة التكميلية بان فريقه لا يحتاج لاي لاعب جديد في الفترة المقبلة وطني او اجنبي مشيرا الى انه لا يرى سببا يدعو المريخ للتفكير في التعاقد مع لاعب جديد بالاعارة بالنسبة للاجانب او بالتسجيل للاعبين السودانيين .وقال رادان : ان المريخ يضم اليوم افضل اللاعبين في كل الخطوط ولا يعاني من نقص واي لاعب جديد يدخل الكشوفات سيجد صعوبة في ايجاد فرصة للمشاركة في التشكيلة موضحا ان المشكلة التي كان يعاني منها الفريق في الفترة الماضية تعود للنقص في الاعداد وبعض الاصابات وان كل هذا سيتم تجاوزه من خلال فترة الاعداد الحالية .. واضاف ان المريخ بنجومه الحاليين وبالاعداد القوي والجاد قادر على ان يكون قوة ضاربة تحقق كل الطموحات المرجوة

ـــــــــــــــــ
لكن بيني وبينك لو شطبوا نور الدين عنتر ده وجابوا بديل ليهو ما في زول بلومهم لأنو قاعد ساي

تحياتي يا خالد ..

أهم وصلوا يا خالد ...

لكن بيني وبينك أبو جريشة ده ما شكلو شغلو زي الناس ..

والمفروض إنو مجلس الإدارة يكون أكثر تشدد ويقوم بمعاقبة المحترفين الثلاثة (إيداهور ووارغو وكلتشي) لفرض الانضباط وسط الفريق

الهادي يا عمكـ
سلامات

Quote: والمفروض إنو مجلس الإدارة يكون أكثر تشدد ويقوم بمعاقبة المحترفين الثلاثة (إيداهور ووارغو وكلتشي) لفرض الانضباط وسط الفريق

لن يحدث و أراهن على ذلكـ ..
المشكلة نفسها كانت ستكون في الهلال لولا أن محترفيه طلعو أولاد ناس لكن لو فعلوها برضو مجلس الإدارة لم يكن ليعاقبهم و لوجد لهم ألف عذر ..
هل تعلم أن نادي ويجان ألغي تسجيل عمرو زكي لأنه تأخر يوم واحد عن موعد عودته من مباراة لعبها مع المنتخب المصري ؟؟
ثلاثة محترفين دفع فيهم النادي دم قلبو يذهبو في إجازة لأيام معدودة و بعد ذلك يقومو بقفل جوالاتهم و السفر لأمريكا و من ثم يعودو بمزاجهم بدون أدني عقاب ؟؟؟ في فوضي أكتر من كده ؟؟

مافي فوضى أكتر من كده يا خالد ..

وأنا برضو زيك أشعر أنه لن يتم معاقبتهم وحا يلقوا ليهم ألف عذر ...

ولو حصل إنو عوقبوا بخصومات مالية حا يرجع جمال الوالي يعفيهم أو يدفع ليهم الخصومات !