Post: #1
Title: يا جماعة إنتو اول الشهادة السودانية هلالابي ولا مريخابي؟
Author: عمر الفاروق
Date: 06-16-2009, 09:53 AM
بعد كل امتحان شهادة سودانية درجت الصحف الرياضية وبي المانشيت العريض وفي الصفحة الولى تكتب:
اووول الشهادة السودانية هلالابي بالميلاد ويعشق هيثم مصطفى وتطربه زاد لاشجون !!
وبعد يومين يتم تكريم اول الشهادة السودانية في دار النادي ..
بعد بكرة جريدة تانية تبدا تبحححت وتنكككت وتطلع ليك تاني الشهادة السودانية مريخابي يعشق موسى الزومة ويستمتع بي ملاح الويكة ..
وتوووشك تكريم في دار النادي بي العرضة جنوب وجوائز وظروف ومغلفات ..
وتبدا معركة الحسابات اوائل الشهادة فيهم كم هلالابي وفيهم كم مريخابي..
غايتو انا لو كنت شاطر كان يوم الاحد بقيت هلالابي ويوم السبت مريخابي وفي جريدة قون هلالابي وفي جريدة الصدأ مريخابي وكل يوم تكريم وكل يوم ظرف قروش وهدايا ..
لكن الشفت شديد الايام دي يشجع مجموعة الدال ويقول احب اسامة داؤود منذ نعومة اظافري والكوكاكولا مشروبي المفضل وأجد نفسي في دقيق سيجا وزبادي كابو يريح معدتي بينما كتر بيلر هي الاقرب لقلبي..
تخريمة :
اسة يا ربي اول الشهادة الإنجليزية بيكون بيشجع مانشستر؟؟
|
Post: #2
Title: Re: يا جماعة إنتو اول الشهادة السودانية هلالابي ولا مريخابي؟
Author: عمران حسن صالح
Date: 06-16-2009, 08:29 PM
Parent: #1
يا ود الفارووووووووووووق ...
أمس جانا شريط عرس من السودان ...
العريس لإثبات تطرفه وفهمه للمسألة بصورة مقلوبة
رابط على صدره نجمة ذهبية بدل الهلال المُعتاد (كطقس زواج سوداني خالص وفقاً للعادات ) ..
وغير كده الأهبل كان يأشر للنجمة على صدره وهو (يبشِر ) فوق الضيوف ... ويفعل ذلك بتكرار ممل وكأن مريخيته الصارخة في ذلكـ اليوم تمثل أهمية وفرح أكثر من فرحه بالزواج ...
أها يا عمر ناس الصحف الرياضية في غالب الأحوال ( ما عندهم موضوع ) .. فمريخية أول الشهادة أو حتى تشجيعه لإسرائيل على حساب الهلال أو المريخ لن يزيد الأمور إلا تطرفاً ينم عن الجهل أكثر وأكثر ...
.
.
.
|
Post: #3
Title: Re: يا جماعة إنتو اول الشهادة السودانية هلالابي ولا مريخابي؟
Author: ALGARADABI
Date: 06-16-2009, 09:20 PM
Parent: #2
مية مرة قلنا ليك الصدى..الصدى
كده بتزعل مزمز
ياخي دي الجريدة الوحيدة الجابت اسمك قبل الوفاة
والبركة في عمك سمعة
أما بخصوص أول الشهادة فدا ما سؤال اتسئل
نحنا أصلو مافي توسط بيننا
لنا الصدر دون المريخاب ولهم القبر
ديل الضل الوقف ما زاد
(والعهدة على الصحافة اليوغندية)
أقرأ تحت:
Quote: أول السودان يعشق الهلال والبرنس الفنان ...
نشرت: 16/06/2009 - 03:47 عدد رقم 6388
• نعم الاله علي العباد كثيرة واجلهن نجابة الابناء..
النابغة محمد الفاتح البشير صاحب المرتبة الاولي في امتحانات الشهادة السودانية زارته قوون في منزله وتحدثت معه في حوار ودردشة ومع والده ووالدته فخرجنا منهم بحصيلة وافرة.
ويقول محمد الفاتح والفرح يملا عينيه كانت لحظة اعلان حصوله علي المرتبة الاولي لحظات مذهلة للغاية وتم كل هذا بفضل الله ونعمته علينا ..
وقال لم اكن اتوقع احراز المرتبة الاولي او اي مركز ضمن المائة الاوائل لكن عزيمتي كانت قوية لاشرف اسرتي ومدرستي وكان التحدي الاكبر حصول شقيقتي علي المرتبة الثالثة علي مستوي السودان في امتحانات الشهادة وكنت اكد واجتهد من اجل احراز نتيجة طيبة.
ويقول اهدي هذا التفوق لاسرتي الصغيرة ولمدرستي وكل المعلمين واخص منهم الاستاذ الراحل محمد نور الدائم ثم عاد ليقول محتار بين دراسة الطب الذي هو امنية والهندسة التي شغلت بالي كثيرا في الاونة الاخيرة ساستخير اولا وبعد ذلك ساحدد وجهتي.
وقدم محمد وصايا غالية للطلاب وقال لا ياتي التفوق الا بالمحافظة علي الصلوات وعدم الاعتماد علي الدراسة في شكل مجموعات فالكتاب المدرسي وشرح المعلم هما مفتاح التفوق والنجاح مع التركيز العالي.
واكد محمد انه كان يتلقي دروسا خصوصية بالمدرسة ثم شرع بعد ذلك في المذاكرة مابين ساعة وثلاث ساعات ارتفعت في نهاية العام الي ثماني ساعات.
وقال محمد انه صاحب ميول رياضية وهلالابي بالفطرة وان اسرته كلها تعشق الهلال واكد ان نجمه المفضل هو البرنس هيثم مصطفي ثم قال لا ينافسني في حب الهلال الا الحاسوب.
وتحدث لقوون والده اللواء طبيب الفاتح بشير وقال انه يشكر عبر قوون كل الوفود التي زارتهم مهنئة لتفوق محمد ووجه شكره الي الاساتذة الذين لعبوا الدور الكبير في هذا التفوق .
وسالته قوون هل كان يتوقع هذه النتيجة ؟
اولا محمد ولد بانجلترا في مدينة مانشيستر اغسطس 1992ثم انتقلنا لظروف العمل الي السعودية وتلقي تعليمه الاساسي في المملكة وقال استاذ فلسطيني كان يدرسه في الصف الاول ذكر لي ان محمد سيكون له شان كبير لانه يتمتع بذكاء حاد فقد كان يحرز دائما المرتبة الاولي ونادرا جدا ما ياتي في المرتبة الثانية.
وقال لم اتفاجا باحرازه للمرتبة الاولي فابرز سماته القدرة الفائقة علي الحفظ والتركيز واعتقد انهما السبب الاساسي في تفوقه ولا يفوتني ان اذكر انه احرز المرتبة الاولي في الامتحان التجريبي لذا كنت علي ثقة من تفوقه.
وتحدثت لقوون الاستاذة عواطف امام والدة محمد النابغة وقالت كانت لحظات سعيدة بعد اعلان النتيجة واشكر الله علي ذلك فهي نعمة عظيمة ولا اخفي انني تمنيت ان ينتقل الاحساس الجميل الذي راودني الي كل الآباء والامهات في السودان واكدت انها هيأت الاجواء لابنها حتي حقق هذه النتيجة الباهرة.
ثم قالت انها تتمني ان يدخل الطب ويتحول الي استشاري كبير يشار اليه بالبنان.
|
|
Post: #4
Title: Re: يا جماعة إنتو اول الشهادة السودانية هلالابي ولا مريخابي؟
Author: Mohammed Ibrahim Othman
Date: 06-17-2009, 06:41 AM
Parent: #3
مريخابي اكيد ..
اعمل قراءة لتاريخ التفوق وشوف :)
|
|