بـشـرى ســارة !!

الجميع الأفاضل، زملاء وقراء

ســلام يغشاكم وين ما كنتم..

لاحظت كما لاحظ الكثيرون أن أقرب شتيمة لواحدة مثلنا (Single) أو (غير متزوجة) أو (عانس) هي الدعاء بأن نحصل على ذلك العريس.
بحديث مباشر أو (مبطًن). وكأننا سجًلنا في سودانيز أون لاين منذ 7 سنوات وكتبنا ما كتبنا بغرض الحصول على (عريس لقطة) حسب الفهم الخارق لبعضهم/ ن..

كانت البداية عندما تم إنتقادنا و(نبيشتنا) على وضع صورنا الشخصية..
ويا سبحان الخالق، مشى الزمن وجاء من إنتقدنا ليضع صورته (النساء منهن)..
تطور الأمر بهكر إيميلات بعضنا (وأنا منهن) وإنشاء منتديات (حدادي مدادي) بإسمائنا في محاولة لتشويه سمعتنا (من رجال شياطين ونساء متحالفات معهم)..
وكان الله موجودا ليعدل الميزان، فيجازى (تجازى) كل منهم/ ن بنفس الجزاء. و(آدينا قاعدين نتفرج).
وتطور أكثر بـ (القعدة) في نص المنبر ومحاولة إخراسنا بأننا عورات وبنات (قليلات أدب) أو (مسترجلات) أو أي من الأمراض التي يحملها قائل الشتيمة..
والفهم: بما أننا ارتضينا أن نكتب في منبر عام فهذا (معناهو) أننا خرجنا ووقفنا في (الشارع العام) زينا زي نوعية (النساء) الإتعودوا يتعاملو معاهم.
وهنا أحس بالشفقة على هذه النوعية. فربنا سبحانه وتعالى أتاح له فرصة للتعامل مع نوع محترم من (النسوان). ولكنه لم يستفد من الباسوورد الذي يملكه في تطوير مداركه و(نظافة) أفقه.

نبهتني مرة الصديقة (سمارت أنا 2001) على أنه للأسف الناس عليها بالظاهر وبتمسك في الشتيمة والإشاعة وتأخذها كحقيقة مجردة.
وألمح أحد الأعضاء في أحد الموضوعات بأن السبب المباشر من عدم زواجنا هي السمعة السيئة التي ألصقها البعض بنا (وطبعا هو وباقي العرسان اللقطة صدقوها)!!!!

المهم: أعلن هنا وعلى الملأ بأنني و(بكامل قواي العقلية) لا نية لدي في أن أختار عريسا من المنبر أو من قرائه (إطمئنوا خلاس)!
وأكاد أجزم أن هناك من الصديقات (السنقل) لهن نفس الفهم.. هذا ليس تقليلا من تلك العلاقات التي شهدها المنبر وأنتجت زواجا باركناهو هنا وباركنا وليداتهم كمان..

كما أزف للمرضى والمعتوهين أننا لا نشتكي من أية أمراض فسيولوجية أو سيكولوجية تجعلنا نقاطع الزواج كمبدأ وفكرة وحلم..
وأننا نعرف نحب ونختار ونتزوج بمزاجنا.
وأن أمثالنا (ممن لا تهبن من سيف تشويه السمعة للإسكات). بهن من الثقة والإيمان بأنهن لسن بحاجة لأن يصبحن (.Mrs) فلان حتى تنال الإحترام والتقدير في أي مكان يشرًفنه..

وبالمناسبة هذا الفهم لا جنس له (رجال ونساء) هنا معانا بيفكرو كده..

في النهاية ما عندي غير إنه أي واحد /ة حاول يسيئ لسمعة واحد /ة هنا. عنده مشكلة في بيته/ م.. أمه، أخواته، أبوهو، أخوانه
وجانا هنا بكل المصايب العنده..

* وكلها 10 أو 15 سنة وأسعد الأعداء بخبر زواجي كان الله مد في العمر.. وما عندي اي مشكلة في العمر.. أو رزق الأبناء.. فكله مسطًر فــ (Back off)..


ودي للناس المحترمة دوما

رجا

Quote: المهم: أعلن هنا وعلى الملأ بأنني و(بكامل قواي العقلية) لا نية لدي في أن أختار عريسا من المنبر

كسرتي قلب شجاع وجسور
وباسووردي حارميه في التنور



___
سلام يا رجاء

في شنو يارجوية ؟

عبدالمنعم ســـلامات..

يعني هسع الزول فينا لو كان صحي زي ما ظانين فيهو. كان تلاقي ليك بوست بعنوان: يا بكري فلان ولد رجا عايز باسوورد.. لوووووول





بهاء يا عزيز..
لي أكتر من اسبوع وانا بأجًل الكتابة في الموضوع ده.
لقيت حكاية إنه زول يقول لزميلة أمشي إن شاء الله يعرس ليك وتتهدًي. أو يعايرها بمواقفها ويشتمها بشئ يظن أنه يسيئ لسمعتها...الخ.
حاجة زي السلامو عليكو

.. للأسف مرت كل السنين دي والفهم ياهو الفهم.
متين الناس دي تتعلم إنه عدم العرس ما عاد شتيمة.
وأن الفقير والغني، والواعي والأهبل، والمتذبذب والثابت، وسيئ السمعة وكريم الأصل والشين والسمح كلهم قاعدين يعرًسوا.
يعني مافي مسطرة للناس تقيس بيها ليه ده عرُس وليه ده لسة باير..

تحاياي

Quote: لا نية لدي في أن أختار عريسا من المنبر أو من قرائه (إطمئنوا خلاس)!

و الحال كذلك على القارئ ادعاء عدم القراءة.

يا ستي والله احترام الكثير منا لك موفورو غير مشروط
اقول هذا مخلصا و يشاركنا فيه الكثيرون
اما الزواج , و إن كنا من داخل قلوبنا نتمناه لك, لكن هذا امر له مواقيت و لا ينبغي ان يكون عدمه مدعاة للشتيمة و الاحتقار
يؤسفنا ان يكون بيننا من يرى ان عدم الزواج يعني حياة غير جديرة بالإحتفاء
Keep on sister!! and keep up the good work and the success, I just felt I must say this specially after the snake has shown up

رجوية .. من غير رتوش ومحسنات بديعية وكلام عرريب .. رجال السودان والمناطق المجاورة والتي تليها الخ من نسل فكر وثقافة ذكورية وممعنة فيها حتي ولو حاول البعض تصويير غير ذلك اما قناعة في التغيير وارجاع حق مسلوب (مسروق) لصاحباته او غتاتة وخبث .. ما زالت مجامعينا تخاطب الزوجة "بالجماعة والاولاد " والحرمة ...والان انا في جدال مع جماعة من مغتربي الخايج يحرم نظام نادي جاليتهم ان تتقدم المراة بعضوية للنادي والدار ليس في جمعيته امراة رغم ان في تلك الجالية نساء في قدر عال من العلم والمهنية ... نحن (الرجالة) في سبيل ان نكون صادقيين عادليين وما حرامية يجب ان نعييد الحق لصاحباته ولا نطلب منهن ان يناضلن لارجاع حقهن ؟؟ فنحن الذين استلبناه- كلمة شوية خفيفة عن سرقناه - ونحن الذين يجب ان نناضل ضد شيطاننا ونعيد الحق لصاحباته .... انت رجاء العباسي ومن لا يراك الا في شخصك وفكر وعقلك لا يستحق التعامل معه .. لا انكر وانا كهل بانني احث صديقاتي وبناتي الغير متزوجات بان يجدن شريكا لهن لما وجدت في الزواج من محاسن شتي يعني اتمني لهن ان ينالن من تلك المحاسن كما نلت انا فالزواج يزداد عتقا وبهاء كلما نكبر ونري في شركاؤنا محاسن طيلة العشرة والمودة ....بنتي لا اسالهن عن الزواج فلهن برنامجهن في الحياة ولمني اتمني لو وجدن من يشاركهن الحياة دون تحديد لجنس ولا جهة ومهمتي انني زلرعت فيهن قيما وجدتها صالحة والباقي عليهن فلهن عقل مثلي وفكر ونظرة لحاضر ومستقبل يتوفققن به علي لانه حاضرهن ومستقبلهت .... انت رجاء وفقط ...وما يخصك شخصيا يبقي شخصيا وليس لا حد ان يحشر انفه فيه ....

Quote: لا نية لدي في أن أختار عريسا من المنبر أو من قرائه

أخخخخخخخخخخخ ... ليه كده بس ...

_____
شوية جدّية:
حسب معرفتي برجاء العبّاسي من خلال كتاباتها، هي شخصية قوية لا يهزها مثل هذا التفكير المريض. ولكن أسمحي لي بالقول أن هذا البوست فيه الكثير من التأثر بهذه الأفكار وإن كان يقول عكس ذلك.

كوني كما أنتي، وما الزواج إلاّ إحدى أحداث الحياة التي لا تتوقف.

إحترامي

الرائعة رجاء العباسي
تحياتي
كنت من الطامحين ولكن قرارك جائر عليك دارسة كل الملفات المقدمة لسعادتكم والنظر بعين الرحمة والمودة وكل أنسانية متجرد من الحالة العامة بالمنبر وكل الظروف المحيط بنا
لك ودي

رجاء سلام
عليه اعتبرى البيناتنا خوة ورجعى لى صورى وجواباتى...
وش مشوكش جدا لما محنوف،،،

الموج يا ملك..

جواباتك والصور زائدا عدد 183 رسالة في المسينجر (75 منها قبل غزوة الهكر الأخرانية)، كل ده حأعمل بيهو بيزنيس خطير

تحاياي يا غالي

الفاضل الكريم زهير..

ســـلامات ومحبة..

تعرف الرد المباشر لكلامك ده: It's my loss

المنبر يضم بجانب (العيًنة) المخصص لها البوست، يضم ناس يعادلوا الدنيا بحالها.. ولا أظن بوست أو إتنين أو حتى مكتبة يمكن أن توفيهم حقهم..

دمت دايما

الفاضل العزيز محمد أبو العزائم..

ســـلامات ومحبة..

لاااا. إطمئن ما في أي تأثر ولا يحزنون. يا صديق إحنا في الموًال ده لينا 7 سنين. يعي أخدنا مناعة.
لكن زي ما قلت لأبي بكر إنه رسالة عزاز الأمبارح كانت هي (القشة).

يا ابو الريش الواحدة فينا لو تابعت التلميحات والكلام الفارغ الـ (للأسف) معظمه من نساء هنا. كان زماااان غادر وجاتو عقدة نفساوية..
لكن واضح إنهم ما فهموا لغاية الآن إنه (الرقم غلط)..


---
نجي لحتة هزار:
طول عمري بحلم بطفل صيني عيونه واحدة أفقي والتانية رأسية وشعره زي شعر الشيطان..
وبكري للأسف ما سجًل ولا زول صيني ولا ياباني حتى... لوووووووول

صديقي الغالي أبوبكر..

ســـلام وتقدير ومحبة..

تعرف في الشارع المصري لما تمشي (الست) لوحدها تجد من النظرات والتعابير الجارحة وكأنها بتعمل في شئ (بطًال). لكن لو مشت (ست) تانية وسايقة في أيدها (عيًل) عمره سنة إن شا الله ما في زول يقدر يقول ليها (تلت التلاتة كام؟).
المعنى: إنه التعامل معانا دايما يتم وفق مفهوم إننا ناقصات ولازم (نتم)..

وفي الأردن أول شئ سواق التاكسي يسألك: هل إنتي متزوجة؟ وطبعا أكاد اجزم أن كل سائقي التاكسي في الأردن ومصر كان أول حبهم واحدة سودانية (شفتا الصدف دي كيف..؟). نصحتني صديقتي الأردنية أن يكون دائما ردي: نعم. متزوجة من أردني. وبالفعل وجدتها إجابة شافية حيث يتوقف السائق من الحديث معك فورا. (لأنهم بيخافو من بعض الظاهر)..

المهم.. القشة التي قسمت ظهر البعير امبارح زي ما بيقولو: كانت الرسالة الجابتها الحبيبة عزاز في أحد البوستات. وفيها نفس فكرة البوست. وطبعا متابعة ما تتعرض له بعض الزميلات هنا. وخاصة عزاز. وكأنها حملة منظمة. ولكنهم للأسف يتعاملون بأسلوب عفا (عفى) عليه الزمن..


ودي الوافر

الفاضل عمر..

ســـلامات ومحبة

شــاكرة للغاية مداخلتك الكريمة.

وربي يديم الإحترام والود

يعني يا رجاء شفنا عنوان البوست فرحنا قلنا لقيتي نصفك الثاني (وش مبتسم)

Quote: كما أزف للمرضى والمعتوهين أننا لا نشتكي من أية أمراض فسيولوجية أو سيكولوجية تجعلنا نقاطع الزواج كمبدأ وفكرة وحلم.. وأننا نعرف نحب ونختار ونتزوج بمزاجنا.

بمزاجنا دي هي مربط الفرس يا رجاء لأن الموضوع دا لا يمكن ان يكون من غير المزاج
والذي يعادل هنا (الإختيار السليم) (سيروا وعين الله ترعاكم) (ودي طبعا شاملانا كلنا) ههههههههههههه
غايتو البوست دا ممكن تتفرع منو بوستات كتيرة عشان تغطي مدلولات كتيرة موجودة في حنايا البوست

سلام وود

الحبيبة إنعام..

ســـلامات وشوق وسؤال عن الأحوال..

الواقع الحاصل إنه الرجل هو البيتقدم لزواج أي إمرأة. لكن تعرفي التكتيك الناس الما عارفاهو؟ إنه المرأة هي التي (تقود) الرجل للتقدم لها من عدمه.
حتى عند الزواج المرتًب (زواج الصالونات) زي ما بيقولو: يكون العريس غير واثقا من قبول طلبه حتى تقول العروس موافقة.

بالمناسبة لو إتفتحت بوستات تانية عن المفاهيم والتكتيكات الجديدة في الزواج. حأكتب بمزااج عن نماذج قابلتها خلال الـ 5 سنوات المضت..


تحاياي يا غالية

Quote: وكلها 10 أو 15 سنة وأسعد الأعداء بخبر زواجي كان الله مد في العمر.. وما عندي اي مشكلة في العمر.. أو رزق الأبناء.. فكله مسطًر فــ (Back off)..

جاء في مجلة سيدتي العدد 5678912 للعام 2037 ميلادي في شهر تموز:
وفاة المطربة اللبنانية صباح الشحرورة متأثرة بحمى النفاس ..

رجا بت العباسي ..كيفنك ..قلنا نسلم

Quote: ودي للناس المحترمة دوما

ونحن نبادلك الإحترام بمثله يا بت العباسي
وما عاش اللي يزعل إي واحدة من أخواتي البنات
وما تاخدي في بالك أصلو قالوا الفهم ( قِسم )

ليك وحشة يا رجا .

Quote: ونحن نبادلك الإحترام بمثله يا بت العباسي وما عاش اللي يزعل إي واحدة من أخواتي البنات وما تاخدي في بالك أصلو قالوا الفهم ( قِسم )

انا راى نفس الراى دا يا رجا
تسلمى وهونى على نفسك
مودتى يا بتنا
ست البنات

شاكوكش مغتغت!

Quote: وبكري للأسف ما سجًل ولا زول صيني ولا ياباني حتى

إنت يا يُمّة الياباك تاباهو السعادة

عزاز شامي تتبررربر بالبرووورة ..

Quote: شاكوكش مغتغت!

إن شاء الله يغطوك بلوح تلج !! ( وش مستهبل جداً )
عامل عيونك الصغار ديل بالله بتشوف بيهم كيف ؟؟؟
انت ما تكتب كلامك ده في البوست إياه . وبرضو مشتاق ليك يا شين .

معليش يا رجا ود الصائم طلعني من جو البوست بتاعك
تقبلي إعتذاري .

رجوية ..

نهارك سعيد ..

الزواج لن يضيف لأمثالك شيئا..

وعدمه لن ينقص منك شيئا..

كوني شامخة كما عهدناك ...

ولا نامت أعين البلهاء ..

العزيزة رجاء

اسع انا قلت في اوكازيون وكده تعرس واحده بوردابية تاخد تاخد قريبتها زيادة معاها

لكن في بيت شعر بيقول

من يهن يسهل الهوان عليه ومالجرح بميت ايلام

عشان كده اي واحد يكتب في حدود العادات والتقاليد واحترام قوانين المنبر مايمشي يهبش ليهو زول ساااكت يقوم من ينوبون عنه يعلن عليهم الحرب والجرسة تبدا

عشان كده يجب ان يسود الاحترام بين الجميع

اما عضوات المنبر فهن اخوات كريمات الا من ابت

تحياتي

زاتوووو

الناس الحلوة الهنا..

حأرجع ليكم في المسا كان الله مد في العمر..


لغاية بعدين Stay well & Enjoy ur day

------

حضرت للرد ووجدت خبر وفاة زميلنا الكريم د. عماد الأمين..

إنه حقا موسم أحزان المنبر. فلتنتظر البشريات السارات.

رجا

سلامات كتيرات للغاليه رجاء
اكتر حاجه عاجبانى ....انك اصلا ما شغاله بيهم و عايشه حياتك..
انا لما اكون زعلانه من زول و بهرى و بنكت..زوجى بيقول لى :
The best revenge is living well
فكرى فيها و ح تلقى انك ما مقصره....و عايشه حياتك...و مبسوطه

الاخت Raja
اظنك تعرف ان الرجال الذين يتحرشون بالنساء عادة ما تكون عندهم محن شخصية محزنة جدا و الغريب انهم لا يجروء على التحرش بالرجال و دى, اظن, هى المشكلة برمتها.
ودنا.

Quote: بـشـرى ســارة !!

رجاء

الحبيب دا مابرضى ينادوه باسم أمو( لو كانت سارة)

وإلا انتظرى ماناله الوليد فى أول زيارة لك للسودان..

Balla Musa,
This is a skillful use of pun.
Gee.

Quote: الحبيب دا مابرضى ينادوه باسم أمو( لو كانت سارة) وإلا انتظرى ماناله الوليد فى أول زيارة لك للسودان..

This is the best line of the year.

Quote: المهم: أعلن هنا وعلى الملأ بأنني و(بكامل قواي العقلية) لا نية لدي في أن أختار عريسا من المنبر أو من قرائه (إطمئنوا خلاس)!

يعني يا رجاء كسير التلج الكنت بعملو لي راوية عشان بعدين تبقي لي واسطة كلو راح شمار في مرقه ؟؟

صباحات الورد يا رجا ...

الرسالة الجاتني دي خلتني الف في صينية مشاعر
ما بين استغراب و ضحك و حبتين حزن...

يا رجا، امبارح القريبة دي قعدت افكك الرسالة
واكتشفت انو كل سطر براهو (فهم) ده حتى الحجاب و العبادة بيد راجل!

مرة من المراريت كنت في ندوة، و الناس قايمة و قاعدة تتكلم
وانا راجية دوري اقوم انق فقعدت جنب زميلة دراسة متزوجة و عندها اطفال
سألتني : بتعملي شنو حسي يا عزاز؟
قلت ليهاانو شغالة ..
واصلت: وشنو كمان؟
قلت ليها بأكمل الدراسة و بخطط اكمل دراسات عليا في ..,
قالت لي: و شنو كمان؟
قلت ليها عندي اهتمامات بالعمل العام
قالت لي: شنو كمان؟
فرحت قلت يا سلام في زول فعلا مهتم يعرفني دايرة شنو..
اندحت وقلت ليهادايرةاعمل و اعمل و حسي في كدا وكدا

قامت عاينت لغاويشها بتأمل نبيل و رفعت لي عين ملؤها الحزن
وقال لي:
(يعني قااااعدة لسه ما عرستي؟)

انتهى

*****


صبت مطرة تك ..تك
بطلة قام يرقص
بطل مافي يجي
نهي نهي

العزيزة رجاء
تحياتي
ولك كل الود يعني أطمئن طلبي تحت الدارسة ولن تأثر عليه تقلبات المزاج

Quote: قامت عاينت لغاويشها بتأمل نبيل و رفعت لي عين ملؤها الحزن وقال لي: (يعني قااااعدة لسه ما عرستي؟) انتهى

لأ لأ انت غلطانه يا عزاز..
أسأتي الفهم!!
عارفه هي لما كانت بتعاين للغوايش في يدها..
وبعدين عاينت ليك بحزن..كانت بتفكر في زوجها الاشتري ليها الغوايش..
هي ابدا ما كانت حزنانه علي حالك..هي بس كانت خايفة وحزنانة علي نفسها..والحزن كان علي نفسها
لانه في نساء كده بيفتكروا اي واحده ما متزوجه ممكن تفكر في زوجها..وخايفة!


بلا خيبة!!
........
........

بعيد من الهذار..بس ما بعيد خالص..
الزواج حاجه كده قريبه في شكلها المحسوم فوق من الميلاد والموت..
يعني أمر مكتوب ومقدر..
يعني انت لو فكرتي يا رجويه انك ماعايزة تتزوجي اسه ورفضتي فرص بغض النظر عن نوعها شنو..فالظاهر هنا انك اخترتي..
لكن الحقيقة انه خيارك علي الرغم من انه خيار الا أنه في الأساس مكتوب..

الدنيا من ناحية تانية اتغيرت..والمرأه لا تقل عقلا ولا ممارسة للمسئولية من الرجل..فكما هناك نساء ضعيفات المسئوليه..
كذلك هناك رجال عديمي المسئولية..
يعني المرأة ماكله وشاربه ولابسه بقروشها..وكمان صارفه علي اسرتها بعرقها..يبقي كيف الناس تأسي علي حالهالأنها ما
اتزوجت لمجرد الزواج؟؟

أجمل مافي المثقفه انها تثق في خطواتها وما تفعل..وتقوي ارادتها في الحياة لأنها تتعلم منها..
فلا تتزوج الا من هو له كفاءة ويستحقها..

هي يعني زيادة عدد وخلاص؟؟
ولا هي الدنيا يعني ناقصة هم؟؟!

سلام واشواق..

ألأخت/رجاء..........

أولآ ليك من المودة اطنان..ومن التحايا أكوام....

هذه بشرى سارة لك وغير سارة لأخرين كثر....مندسين وما عندهم زى شجاعتك دى ويتقدموا لى زولة زيك خلوقة بت اصول ألف من يتمناك

أعتز جدآ بمثل هذا الصوت فى المنبر ليسكت تلك الخفافيش التى تعيش فى الخفاء..

الشخصية القويمة تقاس بمدى عطائها وأخلاقها وتفاعلها مع المجتمع لا بحالتها ألأجتماعية...الذين ينظرون لهذا الجانب عندهم نقص فى حياتهم ألأجتماعية كما زعمتى أو خلل من ناحية تربوية...

Quote: الجميع الأفاضل، زملاء وقراء ســلام يغشاكم وين ما كنتم.. لاحظت كما لاحظ الكثيرون أن أقرب شتيمة لواحدة مثلنا (Single) أو (غير متزوجة) أو (عانس) هي الدعاء بأن نحصل على ذلك العريس. بحديث مباشر أو (مبطًن). وكأننا سجًلنا في سودانيز أون لاين منذ 7 سنوات وكتبنا ما كتبنا بغرض الحصول على (عريس لقطة) حسب الفهم الخارق لبعضهم/ ن.. كانت البداية عندما تم إنتقادنا و(نبيشتنا) على وضع صورنا الشخصية..

حفظكن الله أخوات عزيزات بيننا...تلاقينا بود وتقدير وإحترام..وتعارفنا بفهم يليق بكن......لك منى تقدير خاص.....................إسماعيل محمد احمد عباس....

Quote: لأ لأ انت غلطانه يا عزاز.. أسأتي الفهم!! عارفه هي لما كانت بتعاين للغوايش في يدها.. وبعدين عاينت ليك بحزن..كانت بتفكر في زوجها الاشتري ليها الغوايش.. هي ابدا ما كانت حزنانه علي حالك..هي بس كانت خايفة وحزنانة علي نفسها..والحزن كان علي نفسها لانه في نساء كده بيفتكروا اي واحده ما متزوجه ممكن تفكر في زوجها..وخايفة!

سلامات Muna Khugali
ليه سؤ الظن ده كلو ?
الزوله دى (و على حسب فهمها فى الدنيا) قررت ان عزاز الشامى تعيسه و حياتها ناقصه. لو كنت مكان عزاز كان زكرتها براحة انو كل زول اولوياته مختلفه. و انها (عزاز) سعيده فى حياتها باحلامها و طموحها
الزوله دى كما قالت عزاز زميلة دراسه .... و لو ما القصة دى (قصة رمزيه) حكتها عزاز فقط للعبره. اظن انه ممكن عادى الزوله دى تكون بتقرا فى البوست الان و مندهشة من كوم العداء فى الفقره اعلاه.

ألأحباب الفوق ســــلام..

عدنا.. خلوني أنتهي من مباراة مصر ومعاكم للصباح..

كتبت تعديل في آخر مداخلة اشرح فيها التأخير السابق.. وربي يرحم زملائنا الأبرار


رجا

Quote: بعيد من الهذار..بس ما بعيد خالص..

الأخت سمارت..
تحايا طيبه..
الاقتباس الفوق كان في كلامي ..يبدو انك ما قريتيه..وبنيتي رأيك علي عداء كامن في كلماتي!

وبعدين هي لو عايزه تزعل يبقي هاتزعل من رأي عزاز برضه مش كده؟؟

تحياتي..

Quote: المهم: أعلن هنا وعلى الملأ بأنني و(بكامل قواي العقلية) لا نية لدي في أن أختار عريسا من المنبر أو من قرائه (إطمئنوا خلاس)! وأكاد أجزم أن هناك من الصديقات (السنقل) لهن نفس الفهم.. هذا ليس تقليلا من تلك العلاقات التي شهدها المنبر وأنتجت زواجا باركناهو هنا وباركنا وليداتهم كمان..

رجاء الغالية
سلامات ومحبات
نتفق معك بلا تحفظ في مقدماتك
لكنني حتماً لا أتفق معك في النتيجة التي خلصت إليها
ذلك أنك أقفلت باباً أوجده الخالق العظيم واسعاً ، فما أقسى ( تضييق ) الذي خلقه الله واسعاً .
هذا البورد ( مهما كانت سيئاته ) ففيه جانب إيجابي لا نستطيع أن ننكره وهو أنه قد عرفنا ( لدرجة كبيرة ) على الجوانب الشخصية وطرق التفكير والمقدرة على التفاعل مع الآخر لعدد مقدر من الأعضاء . مما يجعل ( أى علاقة ) تنشأ بين الأعضاء يكون بنيانها قد أسس على معرفة حقيقية . تماماً كالعلاقات التي نراها في الجامعات أو في مقار العمل بين الزملاء .
أثق أنك تعرفي أن مقصدي ليس أن السعى لعضوية البورد يكون مرادفاً للبحث عن عروس أو البحث عن عريس ، لكن إن ذلك قد تم في سياق التعارف الإنساني وإحساس طرفين بأن كمية التناقض بينهما تؤول للصفر وشعرا بحاجتهما أن يواصلا تلك الرحلة في إطارها الشرعي والطبعي فمرحى بزواجهما . ونكون نحن يومها أول من يرقص ( ويعرض ) .
أقول بلا تردد بأن من عرفك وعرف راوية كما عرفتكن يوقن بعد التسليم لحكمة الخالق العظيم التي تجل دوماً عن إدراكنا أن هناك خاسرين لم تسعدهما الأيام بأن يحظيا بكما .

اولا نترحم فى روح الفقيدين الذين فقدناهم من هذا المنبر

نسال الله ان يسكنهم جنات الخلد مع الصديقين والشهداء


الزواج قسمة ونصيب


فيها سكنة وانسجام


ولكن اذا حاولت فتح اذنك لهولاء

لفقدتى مكانتك الاجتماعية

كثيرون منا من لايعرفون الاحترام

ومن بيوت خرجوا كانهم لايعرفون التربية