Post: #1
Title: رحلة عذاب بمكتب جهاز المغتربين بالخرطوم
Author: فايزودالقاضي
Date: 06-10-2009, 03:03 PM
يوم من ايام شعوبنا المغتربة ... رحلة طويلة داخل مكاتب جهاز المغتربين بحكيها ليكم بكل تفاصيلها ...
دخلت وعدل بفتش علي شباك التأشيرة .. ما انا جاي جاااااهز ومسدد المساهمات وكمان زكاة المسلمين وزكاة السفارة ...
وفي احد الشبابيك ..
ودالقاضي .. السلام عليكم ..
احدهم : وعليكم السلامه ..
ودالقاضي : تأشيرة الخروج وين بالله ؟
احدهم : امشي الشبابيك الورانا دي ..الفيها مره لابسة ليها توب ابيض دييييييك.
ودالقاضي : لكن ده شباك المساهمة وانا الناس ديل ماعندهم معاي حاجة بس جاي آخد التأشيرة وامشي.. ماأنا مسدد من السعودية ..
احدهم : مسدد مامسدد ياكا جاييهم فالحق الصف قبل مايطول ..
ودالقاضي : طيب شكراً ..
وجري للشباك المقصود ..
ودالقاضي : معليش ياجماعة ممكن اسأل الاستاذة دي ؟!!
احدهم : اتفضل .
ودالقاضي : معليش يااستاذة عايز اعمل الخروج فأبدأ من وين ؟!!
الموظفة : اقيف في الصف ده ومنو لشباك الزكاة الجنبي ده ومنه لشباك الخدمات الوراك داك ..
ودالقاضي : ياساتر !!! اقيف في الصفوف دي كلها ؟!! أمال لو ما مسدد كان وقفت وين ؟!!!
وقفت في صف المساهمة لغاية ماجا دوري وبقيت قدام الزولة ..
ودالقاضي : معليش يااستاذة انا مخلص أي حاجة من السفارة عندنا وده خلو طرف من هناك.
الموظفة : اديني جوازك وبطاقة المغتربين ..
ودالقاضي : اهي ومختمة مساهمة وزكاة ما انا جاي جاهز.. ..
الموظفة : لكن هي منتهيه ..
ودالقاضي : دي شنو المنتهيه .؟!!
الموظفة : البطاقة دي منتهيه
ودالقاضي : بطاقة شنو المنتهيه ؟!!! ..والله اول مرة اعرف انو بطاقة المغتربين دي ليها تاريخ .!!
لكن لاهي جواز ولاهي بطاقة شخصية لزمة التاريخ شنو عليك الله ؟!! يعني البهمكم الواحد يسدد ولا يجدد ؟!!!..
الموظفة : والله لو دايرني اديك برنت المساهمة امش جدد البطاقة وتعال ..
ودالقاضي : ياخي عليك الله ماتعطليني بسبب حاجة ماليها لزمة وماعندها اهمية مادام انا مسدد ..
الموظفة : والله مابقدر اتجاوز الشغلة دي ..
ودالقاضي : لاحول ولا قوة الا بالله .. طيب اجددها وين دي كما ن؟!!
الموظفة : شباك 11
مشيت شباك 11 وكعادة اليوم وقفت في الصف لغاية جا دوري ..
ودالقاضي : لوسمحت عايز اجدد البطاقة ..
الموظف : خلاص امشي شباك 10 واملا الاورنيك وجيبوا لي راجع .
اها مشيت شباك 10 .
ودالقاضي : لو سمحت ممكن نموذج تجديد بطاقة مغتربين ..
الموظف : طيب هات صورتين شخصيتين ..
ودالقاضي : ياخي هو تجديد بس والشغلة بطاقة ومامحتاجة المرمطه وفتيش الاستديوهات ..
الموظف : ده النظام ياخوي .
ودالقاضي : الصور دي كمان بصوروها وين في النهار المافايت ده ؟!!
الموظف : هناك جنب البنك الجنب بوابة الدخول .
ودالقاضي : شكراً ..
اتصورت ورجعت لشباك 10 ومنو لشباك 11 وتم تجديد البطاقة..ومنو لشباك المساهمة والوقوف من جديد في آخر
الصف .. ولغاية ماوصلت الشباك ..
ودالقاضي : اها جددت وجيتك ..
الموظفة : كويس .. جوازك لو سمحت وبطاقة المغتربين
ودالقاضي : اتفضلي ..
الموظفة : كويس مسدد أي حاجة ..
ودالقاضي : مسدد وجاي جااااااهز عشان ارتاح من شبابيكم دي .
الموظفة : والله حتي لو مسدد برضوا الاجراءات واحدة والبرنت لابد منه وهو المعتمد لاكمال اجراءاتك التانية .
ودالقاضي : عليك الله .. لو البرنت ده مهم كده لزمة البطاقة وبرنت السفارة شنو ؟!! يعني ماعندهم معني عندكم ؟!! ولا مافي تنسيق وترتيب بينكم وبين السفارة ؟!!
لم ترد ..
تم استخراج برنت المساهمة وبنفس الطريقة الزكاة .. ومنها لي شبابيك التسديد .. وطبعاً الشبابيك مامكتوب فيها أي حاجة غير(ريال) وفوق منها عبارة(للنساء فقط )، وشباك آخر(ريال) والعجيب مكتوب فيه للرجال والافضلية للنساء (تخيلوا النسوان مالين الشبابيك بره وجوه ومعقبين يعني مراجعين وموظفين .. مالرجال كلهم مغتربين ومافي زول منهم في البلد !!) وبالمثل شبابيك بالدولار. وقفت في الشباك لغاية ماجا دوري ..
ودالقاضي : السلام عليكم .. لوسمحتي عايز اسدد رسوم التاشيرة ..
الموظفة : طيب وين برنتات المساهمة والزكاة والخدمات ..
ودالقاضي : المساهمة والزكاة معاي لكن الخدمات دي شنو ؟!!
الموظفة : خدمات القناة الفضائية وحاجات تانية ..
ودالقاضي : ولو ماقاعد اتفرج القناة الفضائية.. برضو ادفع؟!!
الموظفة : دي تعتبر خدمة وطنية لقناتنا القومية وماليها علاقة بالفرجه.
ودالقاضي : طيب هي كم ونسددها وين ؟!!
الموظفة : اول شي اسحب برنت خدمات وبعدين تعالي عندي للتسديد..
المهم مشيت وطلعت البرنت وجيت راجع للتسديد .. وكالعادة وقفت الصف من جديد ..
ودالقاضي : اها جبت ليك برنت الخدمات .. اظن كده ماعندي أي مشكلة تانيه ..
الموظفة : تمام والله طيب اديني 95 ريال سعودي ..
ودالقاضي : قولي 95 الف جنيه سوداني ..
الموظفة : ابداً 95 ريال سعودي ..
ودالقاضي : انا لله وانا اليه راجعون ... يعني الريال ده بقي عملة سودانية ولا شنو ؟
الموظفة : والله ده النظام .. لو ماعندك عملة سعوديه امشي البنك داك حول منو وتعال..
ودالقاضي : طيب انتو ماتاخدو البعادل 95 ريال وتختصرو لينا الشغلة وبدلوها براحتكم ؟!!!
المهم طلعت تاني من الصف وعلي البنك لتغيير العملة وفعلاً غيرت وجيت وسددت عندها الخدمات.
الموظفة : اها عايز تعمل خروج ؟!!
ودالقاضي : طبعاً ..
الموظفة : طيب التسديد عندي بس امشي جيب اورنيك التأشيرة ..
ودالقاضي : من وين ؟!!
الموظفة : هناك عند بوابة الخروج ..
ودالقاضي : يعني لازم اهاجر عشان الاورنيك ده !!!
مشيت للاورنيك ولاحظو هي عبارة عن ورقة تكتب فيها اسمك وعنوانك وتوقيعك..
ودالقاضي : لو سمحتي يااخت ممكن اورنيكين تأشيرة (واحد لي والتاني لولدي)
الموظفة : هات 36 الف جنيه ..18 لكل اورنيك ..
ودالقاضي : خدي ..
استلمت الاورنيك وهو اقرب الي الورقة الفاضيه المليئة بالدمغ ..
جيت راجع لشباك التأشيرة .. ووقفت تالت مره في الصف ..
ودالقاضي : اها ياستاذة ده الاورنيك ..
الموظفة : جيب 26 الف جنيه ليك و26 لولدك
ودالقاضي : انا دفعت حق التأشيرة 18 الف ما26 الف ..
الموظفة : لأ الـ18 الف ديك حق اورنيك التأشيرة ودي حق التاشيرة..
(تخيلوا اورنيك التأشيرة حقوا براهو والتاشيرة حقها براها !!!..شي عجيب !!!)..
ودالقاضي : .. خدي ... الله يخارجنا ..
سددت واستلمت الايصال وعلي ناس الخدمة عدل والحمدلله اتسهلوا معاي
واستلمت البطاقة وجيت راجع للتاشيرة . ..
عند شباك التأشيرة .. وطبعاً الكلام ده بعد الساعة واحدة ضهر ..
ودالقاضي : اها دي اوراقي كااااملة ... مساهمة ،زكاة، خدمات . الزامية ..
الضابط (وبرضو هي مره ) : تمام .. بس قوم صور لي ايصالات التاشيرة..
ودالقاضي : اصلاً معاكم تلاته صور غير المعاي ..
الضابط : برضوا امشي صورها وتعالي ..
وجري لمكاين التصوير .مكان واحد زي جحر الضب ومكينة اثريه..لوما اكذب زي الشفتها في سفارة جده ...
وكالعادة صف طويل.. وتم التصوير.. والعودة مرة اخري الي صف التاشيرة ..
ودالقاضي : اها دي صور الايصالات ..
الضابط : جيب الورق كلوا والجوازات واقعد لغاية ماننده عليك ..
وبعد فترة .. ينده الضابط وقلت الحمدلله جا الفرج ..
الضابط : انت ولدك ده كان مضاف معاك ومافصلتوا من جوازك وفي نفس الوقت عامل ليهو جواز براهو ؟!! ..
ودالقاضي : انا كنت في السعودية ورسلت ليهم صورة الجواز وتم الفصل علي اساسه ..
الضابط : طيب امشي افصلوا ..
ودالقاضي : افصلوا وين ؟!!..
الضابط : من محل ماطلعت ليهو الجواز ... يعني من جبرة ..
ودالقاضي : جبره ؟!! طيب ماتفصلوه هينا مش الجوزات دي ادارة واحدة واجراء واحد ؟!!
الضابط : الفصل من محل اصدار الجواز البديل ..
ودالقاضي : ياخي عليك الله شوف لي حل انا كده تعبت من الصباح..
الضابط : ابداً مافي طريقة ..
المهم تمت بعض الاتصالات ولقيت الواسطة التي كنت اتفادي الحوجة اليه لانه نسيب ..المهم قرروا يعملوها لي من جهاز المغتربين وحولوني
لشباك الجوازات .. بورقة وصية النسيب ..
ودالقاضي : لوسمحت عايز افصل ولدي من جوازي.. ورقة الوصية مدبسة ..
الضابط : خلاص امشي جيب ايصال فصل طفل من شباك التسديد
مشيت جري شباك التسديد ..
ودالقاضي : لوسمحتي .. عايز افصل ولدي وقالوا التسديد عندك.
الموظفة : طيب اوكي بس اعمل ليك ايصال بي كم ؟!! (تخيلوا هي تسالني من قيمة الايصال ؟!!)
ودالقاضي : انا العرفني شنو ؟!! انت ماعارفة ايصال الفصل بي كم ؟!
الموظفة : مابعرفوا والله .. اول مره يمر علي كلام زي ده ..
ودالقاضي : وانا ذاتي اول مره يمر علي عذاب زي ده ..
الموظفة : خلاص ارجع للضابط الرسلك هينا ..
وانا جري للضابط ..
ودالقاضي : لوسمحت .. بتاعة التسديد بتقوليك اقص ايصال فئة كم ؟!!
الضابط : انا مابعرف قيمته والله ..(والله ده الحصل )...
وينده علي واحد .. يافلان انت رسوم الفصل كم ؟!! والتاني : والله ماعارف.
وهكذا من واحد الي آخر ولم نتعرف علي قيمة الفصل.. في النهاية تم الاتصال علي آخر ومنه عرفوا قيمة الايصال والحمدلله تم السداد.. وتم فصل الطفل (عمار) وطيران لشباك التأشيرة والساعة دخلت الثانية والنصف ..
ودالقاضي : اها يااستاذة خلاص فصلت عمار ..
الضابط : تمام .. وين موافقة ام الطفل ..
ودالقاضي : ام منو ؟!
الضابط : ام عمار ..
ودالقاضي : ياخي الود ده انا قاعد امشي بيهو أي مكان مافي زول قال لي جيب موافقة امو علي العكس انا البدورو موافقتي ..
الضابط : والله ده النظام الجديد ..
ودالقاضي : ياخي قولي كلام غير ده .. الود ده امو اجنبيه وهسي في بلدها .. والوصول ليها صعب جداً .
الضابط : خد ورقك ومافي حل الا بالموافقة ..
بي قلبي ( الله ينعلكم وينعل اليوم الشفتكم فيهو )..
(طبعاً في الحته دي شرر متطاير وعفاريت تتنطط ..وموسيقي زي التجي قبل ارتكاب اي جريمة في فيلم ثأري) ..
رجعت للواسطة ابو النسب تاني وكلي خجل لاني ماكنت عايز اكلفه وهو مابقصر.... والحمدلله تم عمل التأشيرة ..
اظفر بالواسطة تربت يداك ...
ودالقاضي
|
Post: #2
Title: Re: رحلة عذاب بمكتب جهاز المغتربين بالخرطوم
Author: جلال محمد نور
Date: 06-10-2009, 03:42 PM
Parent: #1
| Quote: اظفر بالواسطة تربت يداك ... |
أنحنا قبيل شن قولن .
الرحلة دي هنا حصرياً ولا شنو .. هسي أقوم أشيل حالك ..
|
Post: #3
Title: Re: رحلة عذاب بمكتب جهاز المغتربين بالخرطوم
Author: ولياب
Date: 06-10-2009, 04:12 PM
Parent: #2
| Quote: اظفر بالواسطة تربت يداك ... |
لما لقيتك فطيت إجراءات ( التجنيد الألزامي )
عرفتك وقلت ده زول واسطة
|
Post: #14
Title: Re: رحلة عذاب بمكتب جهاز المغتربين بالخرطوم
Author: فايزودالقاضي
Date: 06-11-2009, 11:18 AM
Parent: #3
ولياب ... سلامات ..
Quote: لما لقيتك فطيت إجراءات ( التجنيد الألزامي )
عرفتك وقلت ده زول واسطة |
اجراءات التجنيد هي المحصلة النهائيه للمرمطة الاولي ومادايرة واسطة اذا كملت اركان العذابات الاولي ,,..
ودي واحترامي ولياب ..
ودالقاضي
|
Post: #13
Title: Re: رحلة عذاب بمكتب جهاز المغتربين بالخرطوم
Author: فايزودالقاضي
Date: 06-11-2009, 10:41 AM
Parent: #2
ابو آية ... سلامات ...
طبعاً الواسطة ده قريبك ياجلجل ...ماتتخيل انا محرج منو لغاية هسي رغم ان الشغلة من واجباتهم وكنت اتمني حالي يمشي كغيري .. لكن انا عملت العلي وماعندي إجازة بس يومين اشيل ولدي واجي راجع ...
الرحلة ليست حصريه ولو فتشت حاتلقاها يعني كتلنا الدش في ايدك ..
شكراً لمرور ياانيق ..
تحياتي لاسرتك الكريمة ..
ودالقاضي ..
|
Post: #4
Title: Re: رحلة عذاب بمكتب جهاز المغتربين بالخرطوم
Author: ismeil abbas
Date: 06-10-2009, 04:28 PM
Parent: #1
ألأخ/ود القاضى السلام عليكم..وألف حمدآ لله على السلامة و التأشيرة...
كلامك كسرد جميل وسلس..بس فى حاجات ممكن تكون لهذه ألأسباب....
أظن انك لاتسافر كثير للسودان...
| Quote: ودالقاضي : تأشيرة الخروج وين بالله ؟ |
والدليل إنك لاتعرف تاشيرة الخروج مكانه وين...
ولا عارف تبدآ من وين؟؟؟
Quote: ودالقاضي : معليش يااستاذة عايز اعمل الخروج فأبدأ من وين ؟!!
|
Quote: المساهمة والزكاة معاي لكن الخدمات دي شنو ؟!!
|
الخدمات معقولة تكون ما عارفه؟؟؟دى ليها كم سنة....وسنوية ولو دخلت وإنت بيوم فى السنة الجديدة بشيلوها منك..
عمومآ..حهاز المغتربين فى السودان كل يوم تحس بأن هناك تطور جديد نحو خدمة ألمغترب...قبل كده كان المساهمة لوحده..والزكاة لوحدها .كلها دمجوها وبدوك برنتات من مكان واحد وبتمشى تدفع كان عليك دفع او تمشى للضابط يصدق ليك..
وبعدين اول ما بتدخل بتاخذ أرنيك التأشيرة أو التجديد من الصالة عند الباب....
Quote: اظفر بالواسطة تربت يداك ...
|
غايتو الواسطة دى الحمدالله فى المغتربين ما جربناها لكن بره موجودة..ولو فى المغتربين إلا يتجاوز ليك صف عشان الوقت أو يأجل ليك والعليك عليك....
اللهم اصلح الحال يارب..وخالص تقديرى وأحترامى..........إسماعيل محمد احمد عباس....
|
Post: #16
Title: Re: رحلة عذاب بمكتب جهاز المغتربين بالخرطوم
Author: فايزودالقاضي
Date: 06-11-2009, 11:51 AM
Parent: #4
استاذنا اسماعيل عباس ..سلامات ..
فعلاً انا سفري للسودان محدود واول سفره كانت بعد غياب عشرة سنوات والتانيه بعد تلاته سنوات ورغم ذلك انا ملتزم في دفع اي حاجة دون سؤال - حكم القوي على الضعيف -
انا واحد من الناس ماشايف اي اهمية لوجود هذا الجهاز وهو مفروض علينا التعامل معه رغم وجود قنوات رسميه كالداخليه في السودان والممثليات التي تقوم مقامها خارج السودان .. ويمكن لهذه الاجراءات ان تكون اسهل مما هي عليه ...
عليك الله يااسماعيل هسي لو الواحد مسدد اي حاجة وبطاقة المغتربين مختمه ومعاه برنت من السفارة تأكيد لهذا السداد تاني في حاجة للاجراءات العقيمة في جهاز المغتربين ؟!! مفروض فقط وفي شباك واحد انهاء كل الاجراءات بالاعتماد على هذه البطاقة وهذا البرنت ... ده طبعاً اذا سلمنا باهمية وجود هذا الجهاز ...
| Quote: عمومآ..حهاز المغتربين فى السودان كل يوم تحس بأن هناك تطور جديد نحو خدمة ألمغترب...قبل كده كان المساهمة لوحده..والزكاة لوحدها .كلها دمجوها وبدوك برنتات من مكان واحد وبتمشى تدفع كان عليك دفع او تمشى للضابط يصدق ليك.. |
التطور يكون في الغاء هذا الجهاز وليس في تطوير سبل الجبايه ..
جيش جرار من الموظفين ومرافق خدميه وسيارات وبنود ماليه وميزانية مرصوده ..كل ذلك ولا توجد استفادة مباشرة للمغترب ...
داير زول يقنعني باهمية هذا الجهاز !!!
ودي واحترامي ... ود القاضي
|
Post: #5
Title: Re: رحلة عذاب بمكتب جهاز المغتربين بالخرطوم
Author: Badr Edinn Abdul Rahman
Date: 06-10-2009, 05:40 PM
Parent: #1
ود القاضي سلامات عوافي، سردك جميل جداً وهذه العذابات هي عبارة عن ضريبة في حد ذاتها، الاسم المغلف للضريبة "المساهمة الوطنية" والزكاة والخدمات ما هو الناس مفروض يبقوا على حاجة واحدة هل هم ملتزمون بالشريعة الإسلامية ياخدة الزكاة وبشروطها الشريعية ومفاهيمها الإسلامية من اكتمال نصاب وأن يمر عليه الحول وكذا، واللا يبقوا علمانيين وياخدوا الضرايب وبلاش الاسم الثقيل دا المساهمة الوطنية لانو المساهمة الوطنية اصطلاحاً تأتي طوعاً وليس قسراً أما الخدمات دي والله كلنا متحيرين فيها عموماوطبعاً نحن عقدنا اتفاق مع العذاب في جهاز المغتربين وعشان الواحد يستمتع بالإجارة يمشوا يقرف نفسو في الأول وبعدين يخفف على نفسه بالاحتفاء مع الأهل والأصدقاء والرحلات، أنا منتظم جداً في الزكاة والضرائب والخدمات بدفع سنوياً في الخرطوم لا في السفارة ولا يحزنون عشان ما يغالطوني وجيب الايصال والذي منو وبعد دا بكون خايف منهم، ما مضمنونين ممكن عادي يقول ليك السيستم داون يعني بياناتك ما تظهر...
الله يصلح بلدنا يااااااااخوانا لكن بالجد ديوان المغتربين دا ممكن يعملوا الإجراءات دي كلها في إجراء واحد، خصوصاً نحن في عهد التقنية والقروش راقدة أغنى حكومة عربية حكومتنا دي بدل الشبابيك ديل يعلموا كاونترات وكل كاونتر فيهو موظف والموظف دا تدفع عندو كل الرسوم حتى التأشيرة ممكن يعملها ماهي ورقة صغمبروتة ما محتاجة إلى فلسفة لكن يعذوبوك كيف ياود القاضي...
|
Post: #6
Title: Re: رحلة عذاب بمكتب جهاز المغتربين بالخرطوم
Author: Nasr
Date: 06-10-2009, 06:19 PM
Parent: #5
المحيرني أنو الإسلاميين والعاملين فيها بخافوا الله وحريصين علي إتباع المنهج حتي آخر التفاصيل الدقيقة، ساكتين علي البهدلة الحصلت لركن أساسي في الإسلام إسمه الزكاة. الزكاة محددة بآيات في القران الكريم وإجتهد فيها العلماء حتي آخر التفاصيل. فمعروف للعامة والخاصة ممن تؤخذ ولمن تعطي، ومع ذلك يحدث لها ما يحدث لها تحت سمع وبصر كل المسلمين والإسلاميين والإسلامويين.
لكن المغتربين بستاهلوا لأنهم بسكتوا
وزي ما قال مبتدر المساهمة ( خدي ... الله يخارجنا ) دايرين يتخارجوا وبس
والقانون السائد هناك: كلما ما تسكت يحقروا بيك زيادة
|
Post: #7
Title: Re: رحلة عذاب بمكتب جهاز المغتربين بالخرطوم
Author: Alshafea Ibrahim
Date: 06-10-2009, 06:59 PM
Parent: #6
شكرا ود القاضي
اظفر بالواسطة جوازك قدامك في المطار بدون شباك أو كاك ...... ظللنا ننادى وسنظل كذلك بأن يقوم دكتور التهامي بإجراءات لا تحتاج مجلس وزراء ولا وزير ببعض الإجراءات التصحيحة التي من شأنها تقليص شبابيك وأرانيك الخدمة... لكن يبدو أن الشغلانة أكبر بكثير من الدكتور (مافيا) متخصصة ومتمرسة وايدهم مليانة كمان في لعب هذه الأدوار القذرة بمبانى الجهاز ...
نحن وراهم
تحياتي
الشفيع إبراهيم
|
Post: #9
Title: Re: رحلة عذاب بمكتب جهاز المغتربين بالخرطوم
Author: ahmed haneen
Date: 06-11-2009, 06:33 AM
Parent: #7
الشفيع اخوي
سلامات
| Quote: ظللنا ننادى وسنظل كذلك بأن يقوم دكتور التهامي بإجراءات لا تحتاج مجلس وزراء ولا وزير ببعض الإجراءات التصحيحة التي من شأنها تقليص شبابيك وأرانيك الخدمة... لكن يبدو أن الشغلانة أكبر بكثير من الدكتور |
ما تعشم في الدكتور كتير...
دا زول اجتماعات ووجاهات ...ومؤتمرات
وهو حيجي يقرأ كلامي دا .. ويعمل نايم
وانا بديهو الفرصة .. يورينا انجازه شنو لحدي الأن ..
حا يقول ليك ..
مؤتمر اعلامين
ومؤتمر خبراء في المنظمات الدولية
وسفرية الي لبنان عشان المساجين ..
وسجون جدة والرياض مليانة بالألاف ...
.. وننتظر لنري
|
Post: #23
Title: Re: رحلة عذاب بمكتب جهاز المغتربين بالخرطوم
Author: فايزودالقاضي
Date: 06-11-2009, 01:45 PM
Parent: #9
اخونا احمد حنين ...سلامات .. وشكراً للاضافة القيمة ...
نسمع كثيراً عن قضايا السودانيين المساجين ومن يتم تسفيرهم قسراً عبر كفلاءهم وجهات اعمالهم دون وجه حق
ولم يجدوا انصافاً قانونياً ولا حتي انصافاً من قنصلياتهم او مايسمي بجهاز المغتربين ان كانت اصلاً هذه القضايا من اختصاصاتهم ...
حقيقة لفتَ انتباهي الى تساؤل مهم وهو هل جهاز المغتربين تقع مثل هذه القضايا ضمن اختصاصاته ام انه فقط اداة جبايه؟!! ...
ودي،،،
ودالقاضي
|
Post: #21
Title: Re: رحلة عذاب بمكتب جهاز المغتربين بالخرطوم
Author: فايزودالقاضي
Date: 06-11-2009, 01:27 PM
Parent: #7
Quote: شكرا ود القاضي
اظفر بالواسطة جوازك قدامك في المطار بدون شباك أو كاك ...... ظللنا ننادى وسنظل كذلك بأن يقوم دكتور التهامي بإجراءات لا تحتاج مجلس وزراء ولا وزير ببعض الإجراءات التصحيحة التي من شأنها تقليص شبابيك وأرانيك الخدمة... لكن يبدو أن الشغلانة أكبر بكثير من الدكتور (مافيا) متخصصة ومتمرسة وايدهم مليانة كمان في لعب هذه الأدوار القذرة بمبانى الجهاز ...
نحن وراهم
تحياتي
الشفيع إبراهيم |
الشفيع .. تحياتي ...
ومازلنا نسأل ماأهمية الجهاز من اساسه ؟!!!
ياالشفيع الجهاز معيش ناس على عذاب ناس تانين ...وماسك مصاريف اسر من مصاريف اسر تانين ...
ودي واحترامي ..
ودالقاضي ...
|
Post: #8
Title: Re: رحلة عذاب بمكتب جهاز المغتربين بالخرطوم
Author: خالد حاكم
Date: 06-10-2009, 07:01 PM
Parent: #6
| Quote: عمومآ..حهاز المغتربين فى السودان كل يوم تحس بأن هناك تطور جديد نحو خدمة ألمغترب |
الاخ اسماعيل عباس
سلامات
هو اصلا لزومه شنو جهاز المغتربين؟ !
والجباية بتسميها خدمة ؟ سوى بقت كلها فى ايصال واحد والا شباك واحد؟
وهل توجد مثل هذه الجبايات والعذاب لمغتربى الجنسيات الاخرى فى بلدانهم وفى سفاراتهم؟
واين تذهب كل هذه الاموال ؟ وماهى الخدمات التى تجدها المغترب فى وطنه نظير هذه الجبايات؟
وشكرا
|
Post: #10
Title: Re: رحلة عذاب بمكتب جهاز المغتربين بالخرطوم
Author: عواطف ادريس اسماعيل
Date: 06-11-2009, 07:14 AM
Parent: #8
أبو عمار ...
حمد لله السلامة ..
هذا كل ما أستطيع قوله ...
|
Post: #11
Title: Re: رحلة عذاب بمكتب جهاز المغتربين بالخرطوم
Author: ناصر النعمان البدوي
Date: 06-11-2009, 07:52 AM
Parent: #10
هذا الكائن المسخ المسمى جهاز المغتربين
سيظل شريكااستراتيجيا طفيليلا مدي الحياه لما نكتسبه
بعرق جبيننا.
واقفا شامخا يمد لسانه كيدا رغم كل الأصوات....
|
Post: #12
Title: Re: رحلة عذاب بمكتب جهاز المغتربين بالخرطوم
Author: على بدرى حاج
Date: 06-11-2009, 09:57 AM
Parent: #11
والله انا كنت بستعد عشان امشى اجازة مع العيال للخرطوم...لكن بعد كلامك ده قررت ان لا اذهب الا
مضطرا...
اللهم اذهب عنا هذا الاذى المسماة بجهاز المغتربين
|
Post: #15
Title: Re: رحلة عذاب بمكتب جهاز المغتربين بالخرطوم
Author: عبدالكريم أحمد الامين
Date: 06-11-2009, 11:39 AM
Parent: #12
ود القاضى
** مساءك خير
** استئذنك لنقل هذا السيناريو البديع لهذا الرابط واتمنى زيارتك له:-
أميـن جـهاز المغتربين الجديد ... والصمت الرهيب... هل يخ...م ...رأيكم مطلوب !!!
** والله ماذكرته يصلح بأن يكون مسرحيه وعنوانها :- (تأشيرة الخروج تجعلك لن تعود)..
** نحنا الشعب الوحيد فى العالم الذى تفرض عليه دولته تأشيرة خروج ومن بِلده !!!!!
** نحنا الشعب الوحيد فى العالم المدة صلاحية جواز سفره سنتين !!!!!
** نحنا الشعب الوحيد فى العالم الذى يدفع جبايات ورسوم وضرائب وزكاه (قبل أن يحول عليها الحول) (يعنى بندفع بفقه الضروره للعاملين عليها) ومقابل ماذا ندفع ؟؟ !!
** نحنا الشعب الوحيد فى العالم الذى يتعذب عند زيارة بلده للدرجه التى تجعلك تكره نفسك ...
(ودام الود بين الجميع حتى يستردوا حقوقهم)
(ابو محمد فؤاد -دبي)
|
Post: #17
Title: Re: رحلة عذاب بمكتب جهاز المغتربين بالخرطوم
Author: ismeil abbas
Date: 06-11-2009, 12:05 PM
Parent: #15
ألأخ/خالد حاكم ..السلام عليكم....
Quote:
Quote: عمومآ..حهاز المغتربين فى السودان كل يوم تحس بأن هناك تطور جديد نحو خدمة ألمغترب
الاخ اسماعيل عباس
سلامات
هو اصلا لزومه شنو جهاز المغتربين؟ !
والجباية بتسميها خدمة ؟ سوى بقت كلها فى ايصال واحد والا شباك واحد؟
وهل توجد مثل هذه الجبايات والعذاب لمغتربى الجنسيات الاخرى فى بلدانهم وفى سفاراتهم؟
واين تذهب كل هذه الاموال ؟ وماهى الخدمات التى تجدها المغترب فى وطنه نظير هذه الجبايات؟
|
نعم ليس له لزوم..
ولكن مادام فرضت علينا فيبقى حكم القوى على الضعيف...ويجب ان تكون بصورة ميسرة وسهلة..وهذا ما اشرت إليه بأن ألأن أسهل بكثير من ألأول..
أسألتك مشروعة....ويجب على جهات ألأختصاص ألأجابة عليها...
خالص تقديرى وأحترامى..........إسماعيل محمد احمد عباس....
|
Post: #18
Title: Re: رحلة عذاب بمكتب جهاز المغتربين بالخرطوم
Author: حامد محمد حامد
Date: 06-11-2009, 12:07 PM
Parent: #15
| Quote: هو اصلا لزومه شنو جهاز المغتربين؟ ! |
هذا هو السؤال الحقيقى يااخى لماذا هذا الجهاز
والله انى اكرهه كرهى للباذنجان الاسود, جهاز سى السمعة بالنسبة لى , حاولت طيلة اكثر من عشرون عاما ان احبه ولو لمرة واحدة ولكنى فشلت الفشل الذريع وفى السنوات الاخيرة اذهب فقط لعمل البطاقة الالزامية واترك الاجراءات لمكتب الخدمات بل مندوبات مكاتب الخدمات هن من يجملن تلك الصورة السيئة للجهاز فى نظرى , لهن منى كل التقدير على الاقل من تعاملت معهن.
هل ياترى ناقش مؤتمر ما سمى بالاعلاميين بالخارج جهاز المغتربين ما له وما عليه؟
|
Post: #32
Title: Re: رحلة عذاب بمكتب جهاز المغتربين بالخرطوم
Author: فايزودالقاضي
Date: 06-12-2009, 09:05 PM
Parent: #15
استاذنا عبدالكريم ..سلامات ..
انقل ماشئت الي حيث تشاء استاذي ..
| Quote: والله ماذكرته يصلح بأن يكون مسرحيه وعنوانها :- (تأشيرة الخروج تجعلك لن تعود).. |
لو المسرحيه مابدت لسه ياريت تخلي عنوانها ( تأشيرة الخروج النهائي )..
دي زي نكتت الزول الجا السعودية وفي الميناء قالوا ليه الاخ عمرة ولا زيارة ؟ قال ليهم علي الطلاق نهائي ...
تسلم ابو محمد ولك الود المقيم ..
ودالقاضي
|
Post: #31
Title: Re: رحلة عذاب بمكتب جهاز المغتربين بالخرطوم
Author: فايزودالقاضي
Date: 06-12-2009, 08:36 PM
Parent: #12
علي بدري .. سلامات ...
Quote: والله انا كنت بستعد عشان امشى اجازة مع العيال للخرطوم...لكن بعد كلامك ده قررت ان لا اذهب الا
مضطرا... |
يازول انت داير ليك حجة عشان ماتسافر وعايز تبقيني سبب لعدم سفرك .... امشي وجهز واسطتك من هسي وشوف ليك معقبة كاربة تظبط ليك الشغلة وانت قاعد في بيتكم ...
بعدين المشي للوطن في وجود الناس ديل ماياهو الاضطرار ذاتو ....
ودي واحترامي ..
ودالقاضي ..
|
Post: #26
Title: Re: رحلة عذاب بمكتب جهاز المغتربين بالخرطوم
Author: فايزودالقاضي
Date: 06-11-2009, 02:06 PM
Parent: #11
ناصر .. تحياتي ...
Quote: هذا الكائن المسخ المسمى جهاز المغتربين
سيظل شريكااستراتيجيا طفيليلا مدي الحياه لما نكتسبه
بعرق جبيننا.
واقفا شامخا يمد لسانه كيدا رغم كل الأصوات.... |
وهذا مايؤلم .. ان يُقتات من عرق جبينك ودون رضاك (غصباً عنك )..وبعد ده اريتهم لو يخدموك ...
ياجماعة مازلت اسال .. ماأهمية هذا الجهاز بالنسبة للمغترب ؟!! ووروني زول مغترب خدموه الناس ديل ؟!!
|
Post: #25
Title: Re: رحلة عذاب بمكتب جهاز المغتربين بالخرطوم
Author: فايزودالقاضي
Date: 06-11-2009, 02:00 PM
Parent: #10
اختنا عواطف ...عساك طيبة وبخير ...
Quote: أبو عمار ...
حمد لله السلامة ..
هذا كل ما أستطيع قوله ... |
ياهو العذاب من بعضه ...صراحة انت الغلطانة جيتي بلدك وجوازك باقي فيه خمسة شهور و29 يوم ..الجماعة يكونوا شافوا الدهب المرصوص وقالوا صيدة وبنلقي ليها سبب وياهو اليوم بقي ليك سبب ..
انا اقترح صلاحية الجواز تكون سنتين ويكبتوا جنب ختم اسرائيل ختم تاني يقول ( الخمسة شهور الاخيرة من صلاحية الجواز غير معتمدة )..
شكراً بت ادريس لنقل المغصة ...
ودي ...
|
Post: #24
Title: Re: رحلة عذاب بمكتب جهاز المغتربين بالخرطوم
Author: فايزودالقاضي
Date: 06-11-2009, 01:48 PM
Parent: #8
Quote: هو اصلا لزومه شنو جهاز المغتربين؟ !
والجباية بتسميها خدمة ؟ سوى بقت كلها فى ايصال واحد والا شباك واحد؟
وهل توجد مثل هذه الجبايات والعذاب لمغتربى الجنسيات الاخرى فى بلدانهم وفى سفاراتهم؟
واين تذهب كل هذه الاموال ؟ وماهى الخدمات التى تجدها المغترب فى وطنه نظير هذه الجبايات؟ |
الاستاذ خالد سلامات ...
عل قولك اتمني من الدكتور التهامي يورينا اهمية الجهاز بالنسبة للمغترب شنو .؟!!
اسئلة منطقية ومشروعة ..
ودي ،،
ودالقاضي ..
|
Post: #20
Title: Re: رحلة عذاب بمكتب جهاز المغتربين بالخرطوم
Author: فايزودالقاضي
Date: 06-11-2009, 01:10 PM
Parent: #6
استاذنا ناصر ..ٍسلامات ...
| Quote: المحيرني أنو الإسلاميين والعاملين فيها بخافوا الله وحريصين علي إتباع المنهج حتي آخر التفاصيل الدقيقة، ساكتين علي البهدلة الحصلت لركن أساسي في الإسلام إسمه الزكاة. الزكاة محددة بآيات في القران الكريم وإجتهد فيها العلماء حتي آخر التفاصيل. فمعروف للعامة والخاصة ممن تؤخذ ولمن تعطي، ومع ذلك يحدث لها ما يحدث لها تحت سمع وبصر كل المسلمين والإسلاميين والإسلامويين. |
الاسلامويون ديل ممكن يفتوا ليك بعدم جواز سفر الريس او اي حاجة ماعندها سند شرعي للفتوي وحاجة توقف منهم البز مابجيبوا سيرتها ...
تسلم اخوي ناصر ...
|
Post: #19
Title: Re: رحلة عذاب بمكتب جهاز المغتربين بالخرطوم
Author: فايزودالقاضي
Date: 06-11-2009, 12:18 PM
Parent: #5
اخونا بدر الدين ...كيفنك ...
الزكاة مفروض تكون بحسب المذكور في الكتاب والسنة ودي مابالضرورة تكون مثبته باوراق وبرنتات وبطاقات ..ولو قلت لناس القنصلية انا زكيت للمساكين من اهلي فدي زكاة غير مقبولة عندهم ولازم ياخدو حقهم .. والغريبة هي مازي زكاة المسلمين المفروضة على فئات المستطيعين بل هي زكاة مفروضة على المغتربين مستطيعين وغير مستطيعين ..
والله نحن المسلمين الوحيدين في الدنيا البندفع الزكاة اكثر من مرة واكثر من قيمتها الحقيقيه ..
شكراً بدري لمرورك الجميل والاضافة ..
ودالقاضي ...
|
Post: #27
Title: Re: رحلة عذاب بمكتب جهاز المغتربين بالخرطوم
Author: Elsheikh Mohd Aboidris
Date: 06-11-2009, 03:34 PM
Parent: #22
دا جهاز تلتلة المغتربين
انا كتبت وصرخت وبح صوتي وجف قلمي في المناداة بالغاء هذا الجهاز التعسفي هذا اكبر مثال للذل وجرح الكرامة ويمكن تصنيف من اخطر الاجهزة انتهاكا لحقوق الانسان في العالم
هل يعلم الجميع اننا الدولة الوحيدة في العالم التى تطالب مواطنيها بتاشيرة خروج وطبعا المطالبة بتاشيرة دخول قريبا حنسمع بيها
هل يعقل اخد تاشيرة خروج من بلدى لماذا ؟؟؟
الجباية هي السبب الاساسي في ابقا هذا الجهاز
كان الله في عون المغترب ويا ويلة لو نسى ايصالات الجبايا ما اخدها معاة السودان او نسي الدفتر حيدفع تاني ويبدا من الاول لا حول ولا قوة الا بالله
|
Post: #28
Title: Re: رحلة عذاب بمكتب جهاز المغتربين بالخرطوم
Author: sourketti
Date: 06-11-2009, 04:11 PM
Parent: #27
اليافطة على بوابة هذا المكان كُتب عليها على ما أذكر قبل عدة سنوات فى زيارتى للسودان (جهاز تنظيم شئون السودانيين العاملين بالخارج)
السؤال : ماهى العلاقه بين هذه اللافته ومايحدث فعلاً فى هذا المرفق ...وأذا كان الغرض منه الجباية قسراً فما حكم من يستفيد من هذه الأموال التى لا تؤخذ طواعية من أصحابها وتحت مسميات لا تنطبق وواقع الحال ....وماهو دور لجان الافتاء الشرعى فيما يحدث ؟؟؟
|
Post: #29
Title: Re: رحلة عذاب بمكتب جهاز المغتربين بالخرطوم
Author: معتصم ود الجمام
Date: 06-11-2009, 05:32 PM
Parent: #28
انا داير اقول ليك كلام بس دسوا
انا مغترب لي 8 سنين وما عندي البطاقة الانتا قلتا تجديدا هو العطلك
ما عندي والله ما عندي انا بالمناسبة لمن جيت اغترب في الاجراءات في تزاكر
كده مطبوعة بمكينة رونيو ادعم الجريح ادعم الشهيد كنت بصر انو ما ادفعها عندك اورنيك
حكومي ومفروض علي انا بدفع ليك خلاف كده انا التزاكر ما بتاكل معاي عيش اعرف من وين انو الورقة
البيضاء دي انت مصور منها كم ما بديك قرش ... بقول ليك خلاص امش امش سريع عشان البعدك
ما يسمع الكلام ده
وجد انا ما عندي بطاقة مغترب وما حاديهم فرصة يشيلوا مني قروش وما يدوني مقابلها غير الصفوف
انا كدة ضيعتا نفسي صاااااااح
|
Post: #30
Title: Re: رحلة عذاب بمكتب جهاز المغتربين بالخرطوم
Author: Nasr
Date: 06-12-2009, 07:48 PM
Parent: #29
يا فايز
قلت
"والله نحن المسلمين الوحيدين في الدنيا البندفع الزكاة اكثر من مرة واكثر من قيمتها الحقيقيه .."
دي ما زكاة دي ضريبة دخل، مسمنها زكاة ليه ما عارف. زكاة المال تؤخذ من قدر معين من الأموال بعد أن يحول عليه حول (سنة)
وأنا ما عارف الناس الفاضيين عشان يبحثوا ويفتوا في حاجات زي من الحيوانات تدخل الجنة، وهل هناك عدة للرجال، وهو يجوز طلب الرحمة للمسيحين المتوفين، ما قادرين يحبثوا ويفتوا في ركن أساسي من خمسة أركان للإسلام؟؟؟؟
وأنا أقصد بالتحديد المتحالفين مع السلطة لأسباب دينية كما يزعمون، من أنصار سنة وأخوان مسلمين وصوفية. لماذا الصمت في ما يخص مصالح العباد لمجرد أن الطرف المعني (وجابي الزكاة) هو الحكومة؟؟؟ هل يصعب عليكم نقد الحكومة إلي هذا الحد؟؟؟؟؟
ثم لماذا تصمتون عن المعاملة المهينة التي يلقاها المغتربين في هذا الجهاز؟؟؟؟؟ إحترام البشر وحقوقهم ما جزء أصيل من مناهجكم ؟؟؟؟ كيف تقبلون بإهانة إبن آدم الذي كرمه الله؟؟؟؟ طبعا كلكم عارفين القصص عن عدل إبن الخطاب ... فمافي داعي للتكرار.
|
|