الأنثى العورة والرجالة السودانية..يوجد سوط عنج

تغيظني فكرة (الأنثى العورة) التي يدمن التعامل معها والاقتناع بها جل إن لم يكن كل الشباب السودانيين، وده موضوع تاني.

أنا حابة اتكلم عن فكرة الأدب عند (بعض) الرجال السودانين (وأنا بقول البعض مضطرة إذ أن البعض لا يشير للأكثرية التي أقصدها واعنيها)

فهو (الراجل)، من حقه أن يكتب أي كلام، يقول أي تعليق، لا مشاكل طالما هو (راجل)، لا مشاكل طالما أن (المرة) لا تقرأ.
فكرة ال(أدب) من أجل ال(أدب) فكرة ، لا فكرة له عنها.

اقرأ الكثير من البوستات هنا الخارجة عن حدود الأدب، ذات تعليقات سخيفة لا معنى لها سوى استعراض الأعضاء الذكرية.

أنا (راجل) فمن حقي، وعادي خالص، أن اقول ما اريد واجول بكلمات ساقطات مع شلة ما في مكان إسفيري ما، وما المانع.؟؟؟ مش راجل؟؟!!!

الكل يشارك ويضحك ويسخر ويضيف من التعليقات ما يشاء ثم في الآخر يستيقظ أحدهم ليتذكر أن (أخته) او (امه) أو (زوجته) أو أي من محارمه لا يجوز لها أن تقرأ مثل هذه الكلمات الخارجات عن حدود الأدب، فيقف ليصر وجهه ويصرخ بنبرته العالية ال(رجولية) أن (عيب) يا بت، ده مكان رجال، مع أن مكان ال(رجال) اولى بأن يكون (رجولي)، ناضج وكله احترام.

يا سيدي ال(رجال) الفاضل
الأدب لا يذكر ولا يؤنث، لو كان الأدب مجرد (إحساس) تجاه المحارم، مجرد كلمات خالية من الفعل تظهر وتطبق فقط عند وجود أنثى ما في الجوار،،، فعلى شبابنا السلام.

الأدب (فعل) و (قناعة) قبل أن يكون منظرة وكلام. والشعور والأحاسيس الجميلة إن لم تترجم على أرض الواقع تبقى مجرد (أحاسيس) لا يعول عليها.

من أعطاك الحق يا (راجل) أنك ممكن (عادي خالص) تشارك بتعليق أو ب(كأس) ، باعتبار (رجالتك) فقط

أن تفتح بيدك (كوشة) ما وتكفل حق الولوج لذكر لا يتذكر معنى الأدب إلا مرتبطاً بمحارمه، ثم إن علقت أنثى ما فهي ولا شك (قليلة أدب) وأنثى غير محترمة، ولك حق أن تتحدث عنها في المجالس والدواوين، لك كل الحق أن تلمها فهي من حضرت إلى زبالتك الفمية التي فتحت، وليس اللوم على الزبالة نفسها طالما أن من وضعها هو (راجل)

الرجولة يا سيدي الفاضل لا تعني (ابداً) حقك في حك عضوك علانية في مكان ما في سوق ما ، ثم تتأفأف بقرف وتردد (إرضاع الجنين في المواصلات العامة صورة لا حضارية يجب القضاء عليها)!!!
والأحلى
أن تتسيد بوستات (القضاء على الختان) باعتبار أنك صاحب حق،وأنك (عادل) والاهم أنك (مع حقوق النساء).

الرجولة يا سيدي تبدأ من احترام نفسك أولاً،
احترم نفسك في البداية وتوقف عن الكلام المسئ الذي لا طائل من ورائه سوى بعض الضحكات والتضاحكات المسيخة، ف(الفيك مشهودة)

ويا أيها الرجال الذين (عارفاكم المكارم)
قديتونا

بت قضيم

موضوعك داير ليهو رواقة بجيك تاني

الأخت الفاضلة / بت قضيم
تحياتي وتقديري،

Quote: الرجولة يا سيدي تبدأ من احترام نفسك أولاً، احترم نفسك في البداية وتوقف عن الكلام المسئ الذي لا طائل من ورائه سوى بعض الضحكات والتضاحكات المسيخة، ف(الفيك مشهودة) ويا أيها الرجال الذين (عارفاكم المكارم) قديتونا

أشكرك كثيراً على تلك الحروف التي
سطرتيها عن بني جلدتنا نحن الرجال ،
وأتفق معك في جلِّ ما ذكرتيه إن لم يكن
كله ، عن النظرة الدونية أو الاستعلائية
من بعض ولا أقول( معظم أو كل) الرجال ،
ممن لا يرون في المرأة إلا ذلك الكائن
المشبع للغريزة ، والذي في مجمله عورة
يجب التعامل معها على هذا الأساس ، وليس
كائن مكمل للرجال وهم في الأساس النصف
الآخر لهم ، والذي بدونه لا تستقيم الحياة .

بس كمان سوط عنجك ألهب ظهورنا خاصةً في
آخر (معطة) منه وهي (( قديتونا )) .

مودتي لك ،



( ليمو )

دي بت قضيم البنعرفها

بعد مرات الناس بتشطح شوية وتتونس ونسة محلها التلفون او الحلة او اي حته بعيدة عن اعين العامة

نشكرك يابت قضيم يجب ان نهذب انفسنا وان نتريث فيما نكتب بس خليك قريبة عشان الواحد لو نسى يجد من يصححه

تحياتي العطرة

زاتووووو

100 100

تحياتي

كلام عقل.

ينصر دينك يا بت قضيم. عجبتيني تب و الله

شبكة الحبيبة انتظرك بس ما تزوغي
انا لسة ما خلصت الكلام، الكلام كتير بس ده مدخل
وتسلمي
----------
شكراً يا حسين على المرور والتشجيع
وشكراً أولاً لاستيعاب الفكرة
سلمت

سلمتي يا أماني للمشاركة والمساندة
كفيتي ووفيتي

نحن نعاني من خلل تربوي واضح وصريح
وليست المشكلة أن لا احد يهتم، أصلاً لا احد يفكر في الموضوع
مشغولين لسه بأشياء غير
هموم سياسية وتطلعات مادية ومنظرة
نحن مجتمع مظهرجي، يحب المظاهر وكل حاجة عندنا نفعلها في الأغلب إرضاء لفكرة ال(المنظرة) وال(فشخرة)
وعليه
تربيتنا لأبناءنا تحيطها فكرة ال(خوف من كلام الناس) لذلك نربى أولادنا غلط
والنتيجة كما نشاهد هنا، مثل حي، تشويه تربوي بين

الفكرة أن مفهوم (الأدب) نفسه عند السودانيين مشوش وغير واضح والدليل هذا المكان الذي من المفترض أنه يحوي عدد لا بأس به متنوع من مثقفي السودان
مثلاً
تخيلي أن أكثرية هنا ما زالت تعتقد أن مشاركة ال(البنت) في النت، وعمل علاقات مع زملائها من النتيين لو صح التعبير، هو منتهى قلة الأدب منها؟
وأن الكثير (لو مش الكل) ما زال يظن أن وضع صورة الفتاة في المنتديات هو عين العيب والخطأ
المشكلة قدامك بيقولوا كلام، ومن جواه، وإن لم يفصح بيقول كلام تاني
يعني ممكن يكون عرفها عن طريق صورتها نفسها المنشورة في النت، ولما يخطبها، يطالبها برفع الصورة
ليس غيرة على فكرة
هو خلل تربوي، يمكن زاده الاغتراب ومشاكل دول الخليج والعرب وحساسيتهم ضد الإناث عموماً..

شوفي مثلاً تجمعات السودانيين البورديين في بعض الدول، والصور التي ينزلوها لمشاركة بقية المنتديين هنا، كلها رجال، ولا صورة لأمرأة، رغم أن نفس هؤلاء النساء شاركن في الاحتفال أو التجمع مع الرجال وأكيد بشكلهن وملبسهن المحترم ولا أظن أن نشر صورهن في النت مدعاة للخجل والعيب أبداً
يعني هو مش غلط عدم النشر احتفاظاً بالخصوصية طبعاً، المشكلة أنهم لا ينشروها بسبب فكرة ال(عيب)
اتمنى ونفسي بجد أننا نحن السيدات نربى أولادنا وننشئهم بفكرة أن الخطأ خطأ، بغض النظر عن فكرة العيب
مثلاً يعني، الواحد عادي من الشباب بالذات ممكن يسكر مع أصحابه، هذا بالنسبة له مش خطأ، طالما أن عمه أو ابيه أو جده لا يراه ولا يعلم.
نحن لا نربي أولادنا على فكرة أن الله موجود يراك، وأن لا تفعل الخطأ لأنه خطأ وليس لأنه عيب في نظر الناس أو (فضيحة) او كل تلك الأفكار التي نغرسها في عقول الشباب منذ الصغر خصوصاً طبعاً الرجال

البورد هنا أكبر دليل على الخلل التربوي الذي نعانيه بسبب فكرة ال(عيب)

البنات مثلاً، كل واحدة ممكن كما يقولوا (تعمل السبعة وذمتها)، بس ما تحمل، لأن الحمل (فضيحة) لانه ظاهر، ويمكن لو كان الحمل بدون الكرش إياها، كان نصف فتياتنا حملوا وولدوا بدون التقيد بفكرة العيب التي ندمنها ونزرعها في عروقنا وعروق أولادنا فننمو بها
الأدب الذي اتحدث عنه هو اتباع ال(صاح) في سوق ليبيا أو في الصحراء الكبرى
حيث يرانا الله في كل مكان
فكرة الغش في الامتحان طالما المراقب لا يشاهد
فكرة الضحك على الذقون في الماسنجرات طالما يصعب الوصول للمصادر
فكرة الكلام المسئ في البودرات طالما الاخوات والأمهات والزوجات لن يشاهد
كله نفس نفس المنبع ونفس المصب
والله يعين

اختنا بت قضيم :
تحياتي ..
في منبر سودانيز اون لاين في ادب مختلف ..ادب قاطعنوا الناس من كنكوجا ما عندو معايير وثوابت اي زول بيعاين لي الادب من زاويتو هو ..
اي زول بيشوف التانيين ما مؤدبين اذا وذا فقط تجاوزوا سقفه اللي واضعو لي روحو |..
في نقطة مهمة كمان يا بت قضيم وهي في صالح الرجال نوعا ما في سودانيز اون لاين هنا ..
يعني ممكن عادي جداً تقول لي راجل انت ما مؤدب وتمر مرور الكرام وماف زول يقول فيها حاجة ..لكن كدي جربي وقولي البت دي ما مؤدبة !!!!
اوووووووووووووووو المنبر عجاجته تقوم وانها بنت اشراف وانها بت اصول وانها واياك ولماذا ..
عندنا ثقافة ثبتناها لمن نقول البت دي ما مؤدبة طوالي بيتباد للذهن انو البت دي بتطلع من البيت فوووووو بتركب عربية مع واحد وفووو تمشي معاهو شقة فاضية وتقعد معاهو يا مولاي كما خلقتني ..
عدم ادب البت عندنا مربوط بي الرزيلة وبس واي بت تقول ليها انتي ما مؤدبة معناها ماشة على حلي شعرها ..
مع انو الراجل لو قلت ليهو ما مؤدب بتتقبل فيها حاجات كتييرة الفاظه جوطتو في الاكبر منو تعليقاته و و و ..
بالمناسبة اختيار الالفاظ ومرادفاتها هل بيدخل في باب الكثير الادب والقليلو ؟؟
يعني البيكتب ختان مؤدب والبيكتب طهور ما مؤدب ؟؟ وقيسوا على كده باقي المرادفات وما تلخبطو ا لينا الادب بي الذوق العام ..
اتحداك يا بت قضيم لو تجرأ واااحد بس وقال المنبر فيهو بنات ما مؤدبات !!!! مع انو عااادي في فعلا كتابات لي بنات هنا (استخدم كلمة بنات حتى للنسوان من ال45 فما فوق في المنبر) فعلا تنم عن قلة ادب.
مداخلات كان ما جابوا فيها سيرة الجنس ما بيرتاحوا..
ومشاركة في مواضيع بيكون واااضح انها مواضيع بتسوق لي قلة الادب وبيكونن مستمتعاااات ويضحكن ويقرقرن وواقع ليييهن بس من الواحدة منهن تتهبش في اللحم الحي والحتة الما بدورا تجقلب وا معتصماااه وا معتصمااااه ..
في سودانيز اون لاين ماف اييي عورة للاسف والمنبر بالضبط بالضبط عامل زي حيط المراحيض تشيل فحمتك وتكتب ما تشء لمن تشاء ان رضيت فيمكن ان توقع على اسمك وان ابيت فيمكن ان تقيده ضد مجهول ..

اختنا بت قضيم :

Quote: وشكراً أولاً لاستيعاب الفكرة

اسة ده شكر ولا نبز :D:D:D:D:D:D
لكن بيني وبينك ملاسي ده يهجم الما بيتهجم وصفقة من ملاسي تعادل الف سطر من قصيدة مدح للخواض:)

بت قضيم

تحياتي،،

في تقديري ، ان ما نواجهه هنحن النساء هو نتاج طبيعي لثقافة مجتمع المرأة فيه عورة وفتنة ولاتتعدى حد المتعة والمتعة الوقتية كمان،كثيرا ما استنبط طريقة تفكير الرجل من سلوكه،اذا هي مشكلة مجتمع وليست مشكلة سودانيز اونلاين ، فالرجال الذين يكتبون في هذا المنبر هم شريحة داخل هذا المجتمع ولن يتحرر الرجل السوداني عن هذه الفكرة مهما بلغ من الاستنارة مبلغ (راي شخصي) ،، فالمرأة هي المرأة،، في رايهم


احيانا اشعر ان كلمة مرأة هي في حد ذاتها مصدر فتنة وهي عورة وهي مفردة مثيرة بالنسبة للرجل

أما عما يدور في هذا المنبر وفي الفترة الاخيرة بالذات ، يمثل انموذج ثر للدراسة ، دعينا ناخذ الموضوع كقضية اكبر من سودانيز اونلاين


اماني الامين

تحياتي،،

Quote: واننا بنكتب هنا مامعناهو اننا بنقبل تجاوز الخطوط الحمراء

نعم نشعر كثيرا بان هناك عدد من الاعضاء يعتبرون زميلاتهن ،،مارقات للربا والتلاف،، //

يعجبك العجب إن شاء الله يا فتحي
سلمت

حقيييقي البوست خلاص اتبشتن واتعولق ..
وبعد شويتين حايستلموهو الجماعة ويمرقونا بيهو في بلدا طيرا عجم ..
ياخ انا اووووول مرة في حياتي المنبرية اقرر اقرا لي دفوعات عن المرأة مكتوبة بي صورة رايقة ولطيفة تجبرك على قراية الجغلومية السطر البتخطها بت قضيم وانت متلهف تقرا السطر التحت قبل الفوق ..
بس يا فرحة ما تمتش!!!!!!

القمر بوبا
تسلم ويخليك

الرجولة يا سيدي تبدأ من احترام نفسك أولاً،
احترم نفسك في البداية وتوقف عن الكلام المسئ الذي لا طائل من ورائه سوى بعض الضحكات والتضاحكات المسيخة، ف(الفيك مشهودة)

كتر خيرك يا بنت قضيم ... في بوست مجاور حايم حاول احد
اخوان الحراير انو يسكتني و يذكرني باني (حرمة) ولي حرمة
و قرب يقول لي يا بت خشي جوه ...

و الرقابة الذاتية دي مربط الفرس يا بنت قضيم
لانو مجتمعاتنا الشرق اوسطية و خصوصا السودانية
ليها مليون إله و مليون رقيب و العيب درجات على
وزن العافية بالدرجات ... مهذب في العلن
شفت و حريف مع اصحابه ... فاهم وذكي مع بنات الليل
خلل العيب المطاط و توسيع جلابية لكل مقام مقال دي
الجابت البلا ... في بوست قريب آخر عن خبر مفاده انو
مسافر يقال انو سوداني احتضن امرأة من الخلف زول جا قال
عيب مافي إلا من رحم ربي ... طوالي بقو شرلوك هولمز وقالو اكيد
سكران، سكران دي ما تبع الحرام ولا العيب لانو السكران رجل
و السكر للرجال، حسي هم في التحلهم من التهمة بأنهم بيقابضو
وما بيحتمو الآخر ... لما بقى الكلام انو انتو لازم يكون ليكم محرم
و ابتدرت الفكرة د. نجاة، و هي نفس فكرة الوصاية علينا و الفلترة
المفروضة .... هبو ومن غير ما يحسو قلبو الونسة رجالية بحتة علشان
النساء يطلعو من المكان و يبقة الحوار حوةار رجال في بعضهم ...

المنبر ده ما بيفرق عن أي تجمع للرجال آخر ... نفس القوانين
نفس الفكرة ... النساء و الفتيات ديل حاجز صوت وكرت جوكر

قلة قليلة جدا يطابق داخلها مظهرها و بتقدم بيان بالعمل
الباقين، رسالة ماسنجر ولا بوست رجالي بتكشفهم ليك ...

بجيك كان الله مد في الآجال و شكرا تاني على الكلام في المسكوت عنه

بت قضيم تحياتى اراه بوستا دسما قلت اخش وبعد الاذن منك طبعا ( ادب او اداب الدخول)

الان تدركين ان هناك ازمة رجالة

بعيدا عن سلوكيات بعض رجال المنبر الغير محببة او منظبطة كما تقولين الا وان الامر شائك اذا تحدثتى عن التربية والاخلاق والمجتمع السودانى ومن يؤثر فى من.

دور المجتمع هنا كبير يا اختى وينبغى للجميع وبرغبة شديدة المشاركة فى التغيير وطبعا المرأة لها دور كبير فى هذا التغيير اذ يمكن للام ان تهمس فى اذن ابنائها( اريدك رجلا بمعنى الكلمة)

فاذا اتفقنا ان المجتمع السودانى فى اغلبه يحكمه منطق ذكورى فلنجعله ذكورى سوى بعيد عن العقد النفسية والخلل الاخلاقى ولكننا فى نفس الوقت لا ننسى تاثير البيت , المدرسة , الابوين وسيطرة المادة فى تكوين هذا المجتمع ايا كان نوعه وحتى نظرة المرأة للرجل قد اختل توازنهاولا داعى هنا لضرب الامثال.

اختى بت قضيم هناك فرق واضح بين الرجل والذكر حيث ان الذكر او الذكورة ليست شرفا مالم يتصف صاحبها بالرجولة وصدق الشاعر :


ولو كان النساء كمن فقدنا.............لفضلت النساء على الرجال
وما التانيث لاسم الشمس عيبا............ولا التذكير فخر للهلال

وقيل ان الشاعر كان رجلا بمعنى الكلمة.

امانى الامين اثر سخونة الاجواء فى السودان يطغى على كتاباتك تخيلى نفسك فى الصين احيانا ( وش ضاحك)
عزاز ما حاقول ليك كافرة وكدة المرة دى بس يوم حتعورى ليك زول بطريقتك دى ( واحد من انديكم وربنا يستر)

تحياتى

الاخت بت قضيم


تحية طيبه


سعيد جدا بالطرح الذي تقوليه ونحن هنا المجتمع الذكوري تربينا علي اذلال المراة


واضطهادها وانها ضلع اعوج الممارسات من تقاليد ودين وغيره



لا يمكن ان تستعدل الامور الا باستعدال الفكر

مثلا اذا مارست المراة الهوي وهذا الحال ليس في السودان وانما سائر اوطان العرب

واذا مررت بدراسات حقوق الانسان تري العجب العجاب

تتم قضايا الشرف في المراة فقط

ويراد لها ان تلتزم البيت

وحتي الدعاره يراد الصاقها بالمراة فقط مع ان المتعه لها طرفها الاخر الرجل

لكن لسيادة العقل الذكوري تتهم المراة فقط

واذلال المراة يشرع له بقوانين الاحوال الشخصية في ان المراة تساوي ربع راجل في التعدد


ونص راجل في الشهادة والميراث


لا يستقيم العود ما لم تستقيم الفكره


اذا ركبت المراة في بوكس شرق الجزيرة توضع طوبه معها لو كانت لوحدها لان المراة حسب الفكر الهناك هي عارض


ولذا لحفظ حياة المسافرين يجب ان تضع معها طوبه



وضع الصور في المنتديات والاماكن الاخري يترصده بعض الرجال واذلال المراة به ومساومتها ونشر اخبار كاذبه او صادقه لضغطها

وتجد كثير من النساء في المناسبات العامة يخافن من الصور بحجة تسويقها او التشهير بها


المراة والرجل ان لم يتساويا في الحقوق والواجبات لن تنتصر الفكرة

اشكرك كثيرا



لي وجهة نظر لتطوير مفهوم قراءة النصوص الدينية وفقا لمتطلبات العصر

عزاز شامي ....

Quote: و الرقابة الذاتية دي مربط الفرس يا بنت قضيم لانو مجتمعاتنا الشرق اوسطية و خصوصا السودانية ليها مليون إله و مليون رقيب و العيب درجات على وزن العافية بالدرجات ... مهذب في العلن شفت و حريف مع اصحابه ... فاهم وذكي مع بنات الليل خلل العيب المطاط و توسيع جلابية لكل مقام مقال دي الجابت البلا ...

والله التقول كنتي ولد يوم من الأيام ...
تعجبني كتاباتك ..
يعجبني إبدائك لرأيك بكل تلك الشجاعة وكل هذا الوضوح ...

والرجاله أبان شنبات مبرمه
البقولوا ليك
طلعنا أنا (والأولاد) لا مؤاخذه
ده حكمه شنو ؟؟

في البداية
اعتذر عن عدم إمكانيتي للرد بالمساء وذلك لدورات تدريبية أحضرها أرجع بعدها المنزل بالضبط (فطيس)

أخي عبد الحليم
طبعاً مش عن كل الرجال نحن نتحدث لكن أظن الأغلبية أصبحت كذلك
موضوع المرأة النصف المكمل للمجتمع جاياه تحت، لو ليك غرض فيه خليك معانا وشاركنا رأيك
واعتذر عن لهيب السوط ماذا نفعل طيب؟؟
بالجد فاض الكيل، والسبب بوستات كثيرة بس أخيراً بوست دخلته وفي اعتقادي انه حيناقش موضوع علمي طبي نفسي مهم (وانا جني تحليل نفسيات)، فأصابني الغثيان لما قرأت من تعليقات الشباب وكثيراً منهم أنا على دراية بأنهم ناس كويسة (حسب ما اقرأ لها يعني) واندهشت وفكرت وتوصلت لنتيجة أن المشكلة مش هم، المشكلة مجتمع كامل واسلوب تربية خاطئ ولذلك جاء السوط ملتهب
كنت بالجد زعلانة
سلمت يا ليمو
----------
الزول زاتو
دهشة كبيرة
وسعادة
سعيدة أنا (جداً) بكلماتك

(الاعتراف بالحق فضيلة)
وأنا والله لما اقرأ كثير جداً ما اعرف مين كتب ماذا، يعني أنا ما عارفة انت شطحت واللا لا مثلاً، بس اجزم باعتدالك طالما أنك كتبت كلماتك دي
غريبة
بالجد غريبة أن أجد واحد من (أخوات مهيرة) يقول كده؟؟
شكراً يا زاتو أخوي
شكراً كثير
يخليك

أخي حامد
إذنك معاك حبابك عشرة
سلمت للإضافة

Quote: دور المجتمع هنا كبير يا اختى وينبغى للجميع وبرغبة شديدة المشاركة فى التغيير وطبعا المرأة لها دور كبير فى هذا التغيير اذ يمكن للام ان تهمس فى اذن ابنائها( اريدك رجلا بمعنى الكلمة)

المشكلة، هل تعي المرأه نفسها هذا الدور؟؟؟
هل المرأة نفسها تدرك الفرق بين (رجل) و(ذكر)؟؟؟
سؤال وجيه يستحق وقفة
وسيب بنات البيت ده في حالهم
بديك بوكس (وش ضاحك مستفز)
-----------------------
يا صبري
داير تجيب لي الهواء مالك؟؟؟

Quote: لي وجهة نظر لتطوير مفهوم قراءة النصوص الدينية وفقا لمتطلبات العصر

وأنا لي وجهة نظر في وجهة نظرك
أديني فرقة جاياك
-------------

معتصم
يجوز شرعاً
والله أعلم

عمر
كلامك صحيح
الرجل لا يتجرأ أن يتهم المرأة بأنها (قليلة أدب)، فقط أضيف (علناً)، لا يتهمها علناً لكن لا مانع لديه مع شلة الشباب أن (ينتف ريشها)، ولا تحكم على نفسك فقط فالأمثلة كثيرة
ويمكن هذا أحد الأسباب التي تجعل أحدهم عادي خالص مع بنات الناس ومتحفظ لو كان الموضوع يخص ناس بيته لأنه فاهم أن نفس الرجل المتشدق ب(حقوق المرأة) ومساواتها مع الرجل الخ الخ الخ، هو نفس الرجل اللي ممكن مع شلة الشباب يعلق على صدرها أو خلفيتها أو طول ديسها (الديس ده الشعر يا هناي)
قلت

Quote: عدم ادب البت عندنا مربوط بي الرزيلة وبس واي بت تقول ليها انتي ما مؤدبة معناها ماشة على حلي شعرها .. مع انو الراجل لو قلت ليهو ما مؤدب بتتقبل فيها حاجات كتييرة الفاظه جوطتو في الاكبر منو تعليقاته و و و ..

ونعم ،، ما اختلفنا كتير، نفس الفكرة تعيدها بصيغة أخرى،فلأنه رجل فما مهم، ولأنها امرأة، فمصيبة أن تكون قليلة أدب.
في السعودية هنا عندهم في الشهادة علامتي (السلوك) و (المواظبة)، في قرار رسمي أن علامة السلوك لازم تكون مية من مية، لأن أي نقص في درجة السلوك يفهم على رأيك أخلاقياً ولا علاقة له بالشقاوة في الفصل أو التزام الهدوء في الدرس.
فهم عجيب لكنه موجود

Quote: في سودانيز اون لاين ماف اييي عورة للاسف والمنبر بالضبط بالضبط عامل زي حيط المراحيض تشيل فحمتك وتكتب ما تشء لمن تشاء ان رضيت فيمكن ان توقع على اسمك وان ابيت فيمكن ان تقيده ضد مجهول ..

هذا الجزء بصراحة ضحكني بغض النظر عن اختلافي معه أو اتفاقي
يا عمر أنا لا اتحدث عن البورد هنا فقط، أنا بتحدث بصورة عامة والبورد مثل
وبعدين على فكرة، مين قال أن ال(حريم) لما يجتمعوا يتحدثن فقط عن نظرية الذرة؟؟
على فكرة،، كثيرة هي النكت السفيهة والتجارب الجنسية مع الأزواج وقصص الغراميات الفنية وغيره من المواضيع الحمراء تطرح في المجتمعات النسائية وبكثرة كمان، بس النساء لا يتجرأن لفتح هذه السير أمام رجال، أو حتى أمام الكبار من السيدات (الأم مثلاً او النسيبة )، فقط مع الصديقات المقربات جداً، والمعنى هنا أن الموضوع ليس مقارنة النساء بالرجال، الفكرة إلقاء الضوء على مشكلة يعاني منها المجتمع جاء وضع البورد كمثل حي لطرحها
النسوان بنرجع ليهم وقت تاني يا عمر روق

Quote: اسة ده شكر ولا نبز :D:D:D:D:D:D لكن بيني وبينك ملاسي ده يهجم الما بيتهجم وصفقة من ملاسي تعادل الف سطر من قصيدة مدح للخواض:)

ظاهره شكر باطنه تحذير
والله أعلم
سلمت للمشاركة
---------------

أماني
اسمحي لي اني مش حاعقب على كلامك كتير، فيبدو أن البيت بيتك ويرضى عليك، خليك معانا بالله
-------
يا شمائل
بس اصحح لك المصطلح وهو ليس امرأة، هو في الحقيقة (مرة)، ولما يتحدث مع أصحابه عن زوجته تصبح (الجماعة) أو (الأولاد)، في عرفه عيب أن يتحدث باسم زوجته أمام الناس، مع أن كرت دعوة الفرح فيها اسمها بالطبع، بس هي فترة قبل الزواج، أو قبل أن يملكها ثم بعدها،، خلاص،، يتغير حتى مسماها
وعموماً
من يعتبر أن زميلته (مارقة للربا والتلاف)، فانا في نظري أن التالف هو عقله، وعليه، هو في عرف المجنون والمجنون في عرف القانون لا يلام، فلا تلومي رجلاً ذو عقل تالف يا شمائل، بل أدعي له بالهداية ،، الله يهديهم جميعاً.
خليك معانا
---------
بعض أنواع الرجال يا عزاز، لما تعجز عن مجاراة الحجة بالحجة ، تبدأ مباشرة في استخدام قواه الأخرى (الصوت العالي، اليد الطرشة)
نظام تهويش يعني
خشي جوة يا بت، أو
اسكتي بكسر ليك خشمك ده
عندما تصلي لهذه المرحلة ، رجاء، اصمتي واعلمي أنك غلبتيه...
يا عزاز
لا تعقيب على كلامك سوى رجاء أن تكوني هنا
البيت بيتك
-----------------
يا (حريم) خليكم بالله
هسه بجيب القهوة
وشووووووووووش ضاحكة

أن نظرة الرجل للمرأة، عايزها ملاك،
عايزها أم رؤوم
وأخت عطوف
وابنة مطيعة، عايزها كل حاجة كويسة ، كل حاجة وهو ... لا شئ يفعله تجاه هذا
هو مثلاً لا يربى الأبناء، فهذه مهمة الزوجة
ومن مهامه العظيمة يصرف، ويزعق، ويحلف بالطلاق نعم ويضرب
يضرب الأبنة وهذه نقول عليها ابنة ماشي
يضرب الأخت، يضربها لو رآها واقفة مع ابن الجيران حتى لو كانت تستفسر منه في مسألة رياضيات
لا يسأل ولا يتحرى الدقة
يضرب بس
يمكن أن يمرمطها ويجرها من شعرها ويهينها أمام أمها وأبيها لأنها كانت فقط واقفة مع ود الجيران
والادهى أن الأم تبيح والأب يبيح، وفي الليل بعد الهدوء، يمطمط الأب شفتيه جزلاً ب(رجالة ) ابنه
راجل والله
ونفس (الراجل والله)، له أن يسهر خارج المنزل، يلعب قمار، يسكر، يزني، إن شاء الله يجروه من كشة، مش مهم
راجل

الرجل الذي كفلت له رجولته الحق الكامل في ضرب زوجته
والأمر والبغيظ فعلاً
أن هذه الزوجة، لو صمتت وتحملت، حملت لقب (بت أصول) بت ناس والله، ولو صرخت ودافعت عن حقها، فهي (مرة غبيانة بتاعت فضايح)

وما أعرفه أنا، أن بنت الأصول أميرة
والأميرة يجب أن تعامل كأميرة

الرجل السوداني يا جماعة بحاجة إلى إعادة تأهيل وصياغة
ولا
لا لضرب الرجل للمرأة، سوى بالحذاء أو باللسان
---------

وبما أن الكلام جاب الكلام فعايزة اقول

يضع الرجل موضوع (الختان) مثلاً مقياس للتحضر ووقوفه الجدي مع المرأة، فينادي ويصرخ (لا للختان)
حسناً
انتهينا من موضوع الختان
ماذا عن موضوع (التجميل بعد الولادة) الذي يقمن به 50 في المية من نساء السودان بعد الزواج والولادة إرضاء لرغبات الرجل ومنعه من التفكير في الزوجة الثانية البكر
؟؟؟
أم أن هذا يندرج ضمن المواضيع المسكوت عنها والحديث عنها علانية (قلة أدب) وتطاول على المسلمات
؟؟؟؟
كم رجل (بالله) جعل من موضوع (الختان) أيام الجامعة شغله الشاغل، ورفع الأعلام وألف الهتافات المناهضة لهذه العملية الدموية في حق النساء، ثم بعد زواجه بأعوام ضرب بعلمه وشهادته عرض الحائط وطلب بصورة رسمية وواضحة من زوجته وأمها شوية (تظبيطات) إشباعاً لغرائزه الجنسية؟؟
عارفين بالضبط ما هي هذه العملية؟؟
هي تشويه
بتر أعضاء رسمي،، بتر لكل أعضاء الانثى الخارجية والإبقاء على فتحة فقط تسمح بمرور الدورة الدموية والبول، وتعظم إحساس الرجل برجولته ضارباً بعرض الحائط فكرة أنها يمكن بعدها أن لا تلد ولادة طبيعية أبداً، المهم حيوانيته هو
نعم
هذه ليست قلة أدب مني الحديث حول هذا الموضوع، اعتبروني طبيبة تشرح، واتمنى - حقاً- أن تتخيلوا مدى العذاب الذي يمكن أن تتعرض له أنثى بسبب غرور وتفاهة زوج ومجتمع

كم واحدة اجبرت على القيام بهذه العملية البشعة متغاضية عن (الحرمانية) وال(التعذيب الجسدي) والأهم (النفسي) فقط خوفاً من تلميحات السيد الغضنفر بإمكانية زواجه من (ورور صغنتوتة) تنفيذاً لحق كفله له الشرع والدين؟؟؟
وعلى فكرة
يجب أن تعلمي أن مسألة تعدد الزواج وضعت وفقاً لشروط وأسباب معينة مش طفاسة بس، ومن شروطهاأن تتم بعد موافقتك أنت، الم تشترط السيدة خديجة رضي الله عنها على الرسول (ص) أن تكون هي وبس؟؟
وده موضوع تاني

هذا الرجل ال(هتافي) خارج المنزل ال(هايف) داخله، بجد يحتاج إلى وقفة وإعادة صياغة
والاهم
أن تتحرر هي،، أن تشعر بالحرية في اتخاذ قرار لا يتحكم فيه زوج أو عم او أب أو - الأمر والأدهى- حبوبة،، حبوبة انثى خاضعة خادمة لرجل
هذه هي حقوقك، وسيبك بالله من كلام الجرايد
وجاية

ثم ماذا!!!
ما زالت مصرة أن تتحدثي عن حقوقك المسلوبة
ولا ادري عن أي حقوق تتحدثين، حقوقك خارج المنزل؟؟
هل تعرف المرأة حقوقها داخل المنزل قبلاً؟؟
أو هل يعرف الرجل قبل المرأة، ما هو حقها عندما يتزوجها؟؟
هل يعلم أنه ليس عليها في الدين أن (تطبخ وتكنس وتغسل وتستقبل ضيوف وتتنازلو و و و و)

ليس من ضمن حقوق الرجل أن تخدمه المرأة، بل أن الدين يقول إن سمحت إمكانية الرجل توفير خادمة فيجب عليه ذلك

يعني لما يجي سي السيد، يصرخ وينطر أن (قميصه) مش مكوي وهو ماشي الشغل ويتهمك بالكسل وال(خيابة)
يملأ البيت صريخاً لان أكله مش جاهز بعد
أو أن يوقظك من نومك الذي نمتيه بالعافية بعد تنظيف المنزل والطبخ والغسل والكوي فقط لكي (تعملي ليه كباية شاي)
كل هذا ليس من الدين، هذا ليس الزواج الديني هذا زواج الأعراف، فالعرف لدينا أن تخدم المرأة زوجها، طالما أن الزوج يعمل ويوفر الحياة المريحة لزوجته
العرف ،، مش الدين
يعني زمان،،
ده كان زمان، حيث كانت المرأة (مستتة) في بيتها تنتظر رجلها محملاً باغراض المنزل، فمن الذوق وال(العرف) أن تقوم هي بخدمته لتريحه
وإن لم تفعل فلا لوم عليها ولا حساب
هذا أحد حقوقك المسلوبة
فدافعي عنها

هذا الدين الذي أخذ نصفه (حتلعنك الملايكة للصباح لو يوم رقد راجلك زعلان منك) وترك الباقي
هل يعلم السيد الرجل- مثلاً - أن الانفاق على الزوجة أولى من الأنفاق على الأم؟؟

يعني لو كان عنده مية دولار مثلاً تحتاجها زوجته وأمه، هل تعلمي أن الدين يقول أن الزوجة أحق من الأم؟؟؟ من أمه؟؟
أو أنك كنت تعتقد أن الله سيسمح لك بأن تسجد لك المدام كده لله فالله
ثم وتحدثي مرة أخرى عن المساواة
أي مساواة
مساواة الجرايداللي رئيس تحريرها رجل يلعن زوجته لو قميصه مش مكوي؟؟ ؟؟

الاخت / بت قضيم

لك كل الود

عندما نتحدث عن الأنثي نكون قد حصرنا الفكرة العامة عن المرأة داخل قالب واحد من قوالب المرأة المتعددة داخل المجتمع ، بمعني ان الرجل لايقبل في فكره كون امه أنثي تمارس حق انوثتها مع ابيه فزاوية الامومة عنده اكبر من زاوية الانوثة التي ينظر بها ابيه الي امه .

فالام
و
الاخت
و
الابنة

ينظر اليهن الرجل بغير نظرته للزوجة ولذا تري التعامل يختلف والمفاهيم التي تطبق عليهن تختلف ايضاً . فاذا مر رجل ووجدامه بالطريق مع رجل آخر لن يتبادر الي ذهنه سوء ؟ بعكس اذا مر ووجد اخته مع نفس الرجل ؟ او ابنته مثلا ؟ اما ان كانت زوجته فيتضاعف الحس عنده بحس رديف هو الغيرة .
لعل كلامات مثل ( يابت خشي جوه ) وللا ( ده كلام رجال ) لايكون المقصود منها في المقام الاول التحقير والذلة ، وانما تحتمل ايضاً تجنيب هذه المرأة لمواقف حماية لها باعتبار الصلة بينهما سواء كانت اخت او ام او حتي بنت الجيران .
والرجل السوداني له مواقف في هذه الامور قد تبدو غريبة للوهلة الاولي ولكن منبعها هو الحرص علي حماية انثاه اي كان قالب تواجدها . واليك مثال في دنيا الصعلقة وقلة الادب اذا اسميناها مجازا هكذا هناك قوانين لا تنتهك مثل الابتعاد عن بعض الاناث كمفهوم رجالة في الصعلقة وهن ( اخت صحبك ) و (بت الحلة ) فعندما تمر البنت امام مجموعة شباب ويحاول بعضهم معاكستها يقف واحد منهم ليقول ( لا دي اخت فلان !) او ( لا ياخي دي بت حلتنا؟ ) .
انا لا انكر بعض تصرفات الرجل من منطلق مفهوم ( سي السيد ) في المجتمع السوداني ولكن تعد حالات من حالات المجتمع لا سمة متصلة فيه . ومحاولات لصق البعض المفهوم الخاطئ عن المرأة بالدين هي الاخري فكرة ذكورية للسيطرة علي المرأة وهضم حقوقها التي منحها لها الله ، فقد جاء في الحديث ( النساء شقائق الرجال ) بل تحدث القرآن عن ان اصلهمامن نفس واحدة ( ياايها الناس اتقوا ربكم الذي خلقكم من نفس واحدة وخلق منها زوجها وبث منهما رجالا كثيرا ونساء ) اما تفاسير بعض علماء السلطان لبعض الآيات والاحاديث لتسخير النساء في (الحرملك) لملوكهم فهو كلام رجال وليس الدين الحقيقي ، واذا غربلت الآثار من هذه الاراء الشاذة لعادت الي المرأة مكانتها الطبيعية كدرة في هذه العالم وجوهرة تضئ حياة الرجل .
لك الود
لها الود
لهن الود
ولاامي كل الود والرحمه في قبرها

وليد التلب

صبري الشريف
أنا بقى عندي عادة عجيبة جداً، وهي البحث والتقصي في المحرمات
كل ما يقولوا (هذا محرم) لازم ابحت وانكت لكي اقتنع، ولا أخفيك أن هذه العادة كثيراً ما اوقعتني في الحيرة والشكك، لكني مع الوقت تعلمت أن اللي أفهمه ماشي، واللي ما افهمه ما افتي فيه حتى افهم

والسبب أنني مقتنعة بالدين الإسلامي جداً، واعتبر اني اقنعت نفسي بنفسي، فالمناهج الدينية – واعتذر- كانت في عهدي – ما عارفة هسه كيف- مملة – استغفر الله- حصص الدين كانت في الغالب الحصص الأخيرة ، اعترف ان الملل كان بسبب النعس في كثير من الأحوال، فأنا نشأت، واعتقد الكثيرين غيري بفكرة أن الدين، أو مواضيع الدين، مملة، بالإضافة لسمة يمتلكها معظم معلمي الدين – إن لم يكن الكل-
في حتة كده بعد أن تكثر التساؤل، يتزنقوا، يتهموك يا بالكفر، يا بالشطط (خلاص، ربنا قال كده وما تحكيها انتي عايزة تتكلمي في مسلمات؟؟؟!!!)

لا نقاش، عندهم سمة قفل النقاش في وقت حساس تفادياً للشطط في الدين
غير طريقة الكلام والتخويف والترهيب (حتخشوا النارالنار من سخونتها بقت سودة لما بعد السواد بقت بيضة)
وهي قد تكون معلومات صحيحة، لكن أنا في ابتدائي، كل الانطباع اللي حاخدوه، ملل + خوف + ابتعاد عن فهم الدين تفادياً للكفر
وبعدين يجوك كده في حتات ضيقة
يعني يضيعوا ساعات يتناقشوا (في الوضوء، هل يجوز المسح على الجزمة واللا لازم تخلع الجزمة وتمسح على الشراب)
ممكن يكون موضوع مهم ومهم جدا ًبالنسبة لشريحة كبيرة من الناس، أنا فقط اسأل ما علاقته بالإيمان؟؟
أو في برامج الفتاوي الإسلامية
واحد يتصل ليسأل (لما عملت عمرة السنة الفاتت، توضأت بنية العمرة ولكني لم احرم، ثم عمرت ولم افصح عن نية الإحرام)
!!!!!!
بصراحة
في فترة من الفترات ارتبط الدين عندي بالنعس والملل وكل ما افكر في فكرة ما يتوقف عقلي تلقائياً (أووو، استغفر الله، حرام،، استغفر الله الله يلعنك يا ابليس)، خلاص، تمت برمجتي على كده

أنا واحدة من الناس تخرجت من الثانوية العامة أحفظ بعض سور قرآنية لا افهمها، ما كنت عارفة مثلاً ماذا يعني (الصمد)، ولم انتبه إلا بعد أن سألوني ماذا يعني (الصمد)
تعلمت كيف أصلي، ولا اعلم لماذا أصلي، نعم عارفة حكمة مشروعية الصلاة، بس مش فاهماها هذا إن تذكرتها أصلاً
الزكاة ارتبطت عندي بالثروات الحيوانية، لأن في مرحلة ما علمونا اسماء الأبل من ساعة ما كانت نطفة في بطون أمهاتها وحتى تموت، في شهر اسمها مش عارف ايه في شهرين اسمها بكون، في ثلاثة شهور،، الخ الخ الخ
ده كان درس زكاة
نعم ، والجنة بعيدة المنال صعبة الإدراك، وبعقل مراهقة كنت افسر هذا ب(خلاص، عيشي الدنيا ما دام داخلة النار داخلة النار)
وانا على فكرة متزنة، يعني كنت فتاة هدية ورضية، قس بقى لما تكون واحدة عقلها طاشي ماذا يمكن أن تفعل؟؟

لما تحرر فكري من الخوف الكفري الديني (ومش حاقولك كيف تحررت منه علشان ما تزعل) بدأت افكر
لماذا هذا؟؟ ولماذا ده؟؟ ووصلت لقراءات حول الإعجاز القرآني، واقتنعت، اقتنعت بالعلم، كل شئ في الدين له تحليل علمي عملي منطقي مقنع، يا اما نتوصل له ونفهمه، أو ننتظر قليلاً حتى تتكشف الحقائق
هذا الكلام عن قناعة
يعني اعتبر نفسي مسلمة بالاقتناع وليس بالانتماء كما يحدث كثيراً
في أشياء ظاهرة مثلاً
وانا صغيرة عرفت أن لحم الخنزير محرم، قريباً – وانا كبيرة وعويرة - اقتنعت لماذا محرم، بالعلم طبعاً
الخمر حرام، لماذا؟؟
البنقو حرام، لماذا؟؟
في أشياء طبعاً سهلة، لا تحتاج لتفسير أو تدقيق، ذي الكذب والسرقة والنفاق وغيره
نأتي للأشياء الدقيقة مثل (النامصة والمتنمصة، الواصلة والموصلة.. الخ) هذه بفتي فيها، بصراحة

يعني، لا اعرف الحكمة من مشروعيتها، يعني ما فاهمة لماذا النمص حرام، وتشقير الحواجب حلال، مقتنعة أن ممكن يكون في سبب علمي، لكني ما اعرفه
ومسألة (ضعيف) هذه، حديث ضعيف وحديث قوي برضو بفتي فيها، يعني مثلاً حديث ك (بارك الله في الرجل المشعر) استغرب، هو خلق شعره براه؟؟؟ والما عندو شعر حلقو بي موس؟؟؟
وهكذا
لما وصلت لمسألة (المرأة مخلوقة من ضلع أعوج) قلت اكيد الموضوع فيه إنة ما
ومثلها
شهادة المرأة تعادل نصف شهادة
ميراث المرأة يعادل نصف ميراث الرجل
قضايا الشرف التي أشرت لها اعتقد انك لا تقصد الأحكام الشرعية فالحكم الشرعي يدين الأثنان معاً حسب علمي
الخلاصة أنت اختصرتها في جملة رائعة

Quote: لا يمكن ان تستعدل الامور الا باستعدال الفكر

والفكر يستعدل بالعلم حسب رأي المتواضع، أنا استعدلت مثلاً بالعلم
لو علمنا ما لنا وما علينا، خلاص المشكلة انتهت
طيب
المشكلة كيف نعلم ومدارسنا كما أشرت لها، والجامعة تنقسم لقسمين، يا إسلامي متشدد، أو شيوعي منفصم
وما بينهما خليط من أثنان، وأهل العلم – المفروض اهل العلم- في غيهم يمرحون، يا حلال يا حرام، لا وسطية
مين حيربي يا صبري ويفهم ويدرس مظبوط؟؟؟
الأم؟؟
الأم لا تعرف أبسط حقوقها، وهي نفسها مش مربية صح تعاني من حالة انفصام في الشخصية
الشارع؟؟
الشارع المادي؟؟؟
المجتمع؟؟
المجتمع الضايع؟؟
تفتكر كيف حيكون نتاجنا؟؟؟
احنا دايرين في حلقة مفرغة يا صبري
الله بس يعين
أما بالنسبة ل

Quote: لي وجهة نظر لتطوير مفهوم قراءة النصوص الدينية وفقا لمتطلبات العصر

أنت بس قول وانا اقول وراك على طول، بس ما تجيب لينا هدر دم وكده يعني
و
سلمت خالص

رحم الله جميع أمهات المسلمين
آمين
أخي وليد

في البداية اسمح لي أن أشير إلى أسلوبك المتميز
هدوء وجدية وسماحة (السماحة دي بشعر بيها من سياق الكلام)
وجهة نظر يجب أن لا تهمل
بجيك صادة

سلامات يا بناتي

موضوع مهم جدا

خدش الحياء من الاسلحة التي يستخدمها الرجل الذكوري ضد المراة لحسم اي نقاش منهزم فيه
بمثابة الضربة القاضيةاو الضرية تحت الحزام
الحاجة الواحدة العرفتها وتأكدت منها
ان الرجل الذكوري لا تفزعه الا المرأة الطويلة اللسان غير بنت الاصول كما يقولون.

ولذلك يتشطر على اي امرأة اخرى ويمكن يصفها باي اوصاف..
لكن ست الاوصاف الحقيقة لايقربها
لانه جواه طفل جبان مزعزع رعديد..وخواااااااااااف

ويقامر ويغامر الرجال الذكوري في البورد على ان الكل يقرأه ولذلك لن تتجرأ اي
امرأة هنا في مجاراة صفاقة وانحطاط
البعض...
وحرفهم للكلام وتلميحاتهم السفيهة..

بنت قضيم ..
سلامات وتشكرات على الاستضافة ..
وتشكرات يا حامد فهمت العبارة المرة دي (وش حريف قراءات) :)
في منحى تاني شاغلني ليهو مدة، وهو الاحتفاء بالمرأة السالبة و تكريس صورتها
وهي المراة الخنوعة الما بترد ولا تحاجج و مسكيييينة و الغنماية تاكل عشاها و تشجيعها
على حساب أي امراة اخرى مصادمة و ممكن تقول رأيها بصراحة في حدود الاحترام
الاحترام طبعا المفروض على المراة ده معناهو ضمنا انو تقول رأيها على استحياء
و ما تجي توووش و تقولو بشكل يجرح (رجولة) الرجل ...
والصراحة و الوضوح في الطرح مترادفات للرجالة و الشجاعة الذكورية، على الضفة الثانية
التلميح و الـ beating around the bushes للمرأة (المثال) في مجال تفاكري يجمع امرأة ورجل
يعني مشاركتنا تكرم و تعطف منهم لا جهد فردي منا ولازم يمر عبر بوابات مباركتهم
ممكن تقولي نفس الكلام اللي قالو راجل وبنفس الوضوح وتلاقي انو انت كلامك قلة ادب و استرجال
وفصاحة وكلامو هو رجالة و هيييييييييييييع هلا هلا انا اخوك يا فاطنة ...
وده اللي بيرجعنا لحكاية الجلابية الفضفاضة للقيم والصح و الخطأ و ليه شرب السجاير للراجل رجالة
والمرأة لو شربت سيجارة بتبقى ما محترمة ... ليه الراجل ممكن يفعل الكبائر و تبقى في ميزان رجالتو
ولو المراة عملت نفس الاثم تبقى ساقطة؟

احنا طالبين المساواة في الحق و المحاسبة على الخطأ ما اكتر ...

بت قضيم



تحية طيبه

في موضوع المراة انا كنت ولا زلت علماني الرؤي


وجدت مدرسة فكرية اسلامية متقدمه جدا في المراة وقضايا التفكير انهل من معينها وانتظر قسمة الفهم


هي المدرسة الجمهورية للاستاذ محمود محمد طه متقدم بل ان رؤية المراة في الفكر الجمهوري هي افضل ما رايت في التعامل والاكرام


اعلاه رؤية للمدرسة الاسلامية الفكرية



اما العلمانية وهي ما انتهج فكرها اري ان السق الحقوقي هو مواثيق الامم المتحده للمساواة

ومواثيق حقوق الانسان



المدرسة السلفية الاخري للاسلام رايها في المراة لا يمكن ان يتماشي مع متطلبات العصر الحالي


مثلا الزواج في ذهن الرجل التعدد وهو امر ديني يحثه عليه القران

الاصل لا تعدد لكن هنا ترجع هذه المفهومية للفكرة الجمهورية التي تقول التعدد ليس اصلا في الاسلام




اما ملك اليمين يتيح للرجل مضاجعة سلك سلك من النساء ويلد منهن وتسمي المراة بولدها في الاسلام يسمين امهات ولد



وسوف ارجع اكمل لان هذه فرقه صغيره للتعليق

Quote: قديتونا

آسفين .. يا أختي بت قضيم
أمسحولها لينا في وشنا ..
تاني ما بنعمل كدة ..

خالص تحياتي

متابعة

Quote: الاصل لا تعدد لكن هنا ترجع هذه المفهومية للفكرة الجمهورية التي تقول التعدد ليس اصلا في الاسلام

الاخ / Sabri Elshareef

لك كل الود

الاصل لاتعدد في في الاسلام نفسه ، والفكر الجمهوري محاولة للعودة الي روح النصوص الدينية وتنقيتها من اراء الرجال وفقهاء السلطان . اما النصوص الدينية التي تتحدث عن ملك اليمين والجواري والسبي فهي نصوص متقدمة حاولت معالجة الواقع المعاش في فترة ظهور الاسلام الاول . بمعني ان العتق وتحرير العبيد لم يكن يرسخ فكرة عبودية الانسان بقدر ما كان يفكك هذه الفكرة وجعل كفارة الذنوب التخلي عن مثل هذه العادات لهو منهج صحيح في محاربة هذه الفكرة. اما تكريم المرأة الموجود في الاسلام كدين صافي لا تجده حتي في مواثيق الامم المتحدة والفكر العلماني ؟ فهي تساوي بين الرجل والمرأة في كل شئ دون مراعاة للوضع النفسي والجسدي واختلاف الادوار للطرفين في الحياة . في الفكر العلماني المرأة تعمل عمل الرجل وبنفس ساعات العمل وتصرف علي البيت وتعمل به وكلما تقدمت في العمر قلت الرغبة في وجودها علي عكس الفكر الاسلامي فهي غير مجبرة علي العمل خارج او داخل البيت ، وازيدك من الشعر بيتاً المرأة في الاسلام غير ملزمة بارضاع ابنها وانما هو واجب الرجل في توفير اللبن للمولود ، وانما تقوم به حنيةً منها فقط . ومثله اعداد الطعام ونظافة المسكن والملبس الواجب الوحيد لها تجاه الرجل ( لاحظ ) هو تمكينها له لاخذ حقوقه بموافقتها السابقة للارتباط به ؟ .وكلما تقدمت المرأة في العمر زادت غلاوتها كام ومصدر لترابط الاسرة . ففي الغرب وفكره نشأت اسرة الـ ( singlemothre ) وهي الاسر التي تخلي عنها الاب لان وجوده كان في الاساس مصاحبة لتلك المرأة ومشاركة مادية بحتة ، وترك لها الابناء لعدم وجود رابط يجعله مجبرا علي البقاء .


وليد التلب

سأروي لك قصة بسيطة "فأخي مهندس، متزوج من مهندسة يعيشان في سوريا، وسرقت منهما مؤخرا لوحة سيارة، وحتى يجدد لوحة سيارته عليه الإتيان بشهادة من مخفر الشرطة تثبت أن سيارته سرقت، ولظرف ما انشغل أخي، وذهبت زوجته إلى مركز الشرطة مع قريبة لها تعمل طبيبة؛ لأنهما يعلمان أن الشرطة لا تقبل شهادة امرأة واحدة، فقال لهما الشرطي إنه لن يقبل شهادتهما، لأنهما امرأتان، وعليهما أن يحضرا شاهدا آخر، ويفضل أن يكون رجلا أو امرأتين أخريين، فاتصلوا هاتفيا بأخي، فأرسل لهما أجيرا أميا، لا يعرف القراءة والكتابة، مهمته أن يحمل البضائع، وذهب إلى المخفر ليضيف شهادته إلى شهادة المرأتين؛ ولأنه لا يقرأ ولا يكتب اكتفى الرجل بالبصمة... "أفلا تحتاج هذه الحالة إلى العلمنة؟.. أنا بالنسبة لي كافية هذه النقطة فقط حتى تعلمن الدولة، أي الإرث والشهادة هذا فضلا عن قضايا أخرى كعصمة الرجل في الطلاق، وفي قضية الحضانة.




الراي اعلاه للمفكر السوري جورج طرابشي



الاخ وليد اخترم وجهة نظرك برغم اختلافي التام معاها واتمني الا

اغرق البوست برؤية ما تقدمه الشريعه من عدم مساواة بين المراة والرجل

وان ما ذكرته في التحرير وسعادة الانسان يوجد في القران المكي 13 سنة ونسخ بقران المدينة لظروف دولة المدينة انذاك وهو الذي جعل الجزية تؤخذ من يد النصاري ويدهم السفلي ويد المسلم هي العليا


والجهاد وان تملك المراة سبيا او شراء بمال او دونه وتعتقها في الكفارات القتل او الفطر عمدا في رمضان

واذا ليس لك كفارة ولم تريد اطلاقها تظل محبوسه العمر كلو

والرق في الاسلام ماضي ليوم الدين

وانظر لتباكي الميرغني والمهدي علي تحرير الرقيق في بوست حايم قبل اسابيع لعماد الطيب


اتمني ان نرجع للقران المكي وهو ما تدعو له الفكرة الجمهورية

غير ذلك انا افهم ان المراة ناقصة عقل ودين من الشريعه

وانها تساوي ربع الرجل في التعدد

ونصفه في الميراث والشهادة


اعلاه ما حدث بسوريا الان

اما السعودية فحدث ولا تتوقف ابدا

Quote: سأروي لك قصة بسيطة "فأخي مهندس، متزوج من مهندسة يعيشان في سوريا، وسرقت منهما مؤخرا لوحة سيارة، وحتى يجدد لوحة سيارته عليه الإتيان بشهادة من مخفر الشرطة تثبت أن سيارته سرقت، ولظرف ما انشغل أخي، وذهبت زوجته إلى مركز الشرطة مع قريبة لها تعمل طبيبة؛ لأنهما يعلمان أن الشرطة لا تقبل شهادة امرأة واحدة، فقال لهما الشرطي إنه لن يقبل شهادتهما، لأنهما امرأتان، وعليهما أن يحضرا شاهدا آخر، ويفضل أن يكون رجلا أو امرأتين أخريين، فاتصلوا هاتفيا بأخي، فأرسل لهما أجيرا أميا، لا يعرف القراءة والكتابة، مهمته أن يحمل البضائع، وذهب إلى المخفر ليضيف شهادته إلى شهادة المرأتين؛ ولأنه لا يقرأ ولا يكتب اكتفى الرجل بالبصمة... "أفلا تحتاج هذه الحالة إلى العلمنة؟.. أنا بالنسبة لي كافية هذه النقطة فقط حتى تعلمن الدولة، أي الإرث والشهادة هذا فضلا عن قضايا أخرى كعصمة الرجل في الطلاق، وفي قضية الحضانة.

سلامات يا صيري عامل كيف؟

القصة دي ما صاح ويروجها اعداء الدين متاجرين بقضية المرأة معتمدين على جهل الناس بدينهم

لا تقبل شهادة المرأة الا في العقود الماليةولهذا الامر سبب وحكمة
وتقبل في كل المحاكم الجنائية..الشهادة هذه موضوع دائما بتطرق اليه اعداء الدين

وهذه القصة المفبركة تدل على عدم معرفة كاتبها لا بالدين ولا اجراءات البلاغ
..
السبارة سرقت يكون فتح بلاغ ولا يحتاج لشهود ولا ذكورة
وعادة يفتح البلاغ الشخص ذاته او محامي بتوكيل او من ينوب عنه بتوكيل
لا يمكن ان يذهب زوجي لفتح بلاغ اذا سرقت سيارتي
لاحظ في القصة الساذجة طبيبة ومهندسة ثم ارسال اجير امي لايكتب ولا يقرأ
حيث الشهادة في الاسلام لا تقوم على التعليم بل على ان يكن الشاهد مشهود له بالامانة الصدق
فكاتب القصة الساذج يريدان يسوق لماينتقده المستشرقين واعداء الاسلام

نظام الوراثة و الزواج والعصمة للرجل في الطلاق وهذه ايضا تنم على الجهل
بقوانين الزواج وفقهه.
اعرف دينك ايها المسلم بعدين الف القصص..


المرأة السودانية ستكون بخير اذا ما اصبح الرجل السوداني محترم...

والمضحك حدث هذا في سوريا بلد علماني كان يحيلها يكتب السعودية وكدا


صبري وعد الله الحق الا يذهب نور الاسلام..

الدكتورة نجاة



تحية طيبة
انا اعرف ان شهادة الرجل في المحجاكم السودانية وفقا للشريعة تساوي شهادة امراتين


وان الميراث لا يساوي بين المراة والرجل
وان الرجل يتزوج اربعه وفقا للشريعة الاسلامية
ما عدا الاخوان الجمهورييين الذين يقولون ان الاصل واحده وهو منهج الرسالة الثانية من الاسلام
واهل الشريعه لا يقبلون قول الاستاذ محمود الذي يقوال




ان الجهاد ليس اصلا في الاسلام
وان التعدد ليس اصلا في الاسلام
وان المجتمع المنعزل رجاله عن نسائه ليس اصلا في الاسلام



اما القرضاوي يدعو لتحكيم اية ضرب المراة لكن ضربا خفيفا

وكيف يكون الاحترام وانا تمتد يدي لانسان اخر امراة

لكي تتادب

والتي تفعل الفاحشه تحبس الي ان يتوفاها الله


والرجل الذي ياتي الفاحشه ياتوا اليه بالدخن والعصائد والمدائد

لانه فحل؟؟


كيف يستقيم التعامل وانا يحكمني منهج ديني افهم منه

ان لا فلاح لولاية المراة


والان منذ 1990 ترفض حكومة الاسلام في السودان تعييين المراة في السلك القضائي بعد ان تولت المراة منصب قاضي محكمة عليا


المراة لا تسافر الي الحج او العمرة الا بعد ان تنط سن الخمسين ؟؟؟ليه


المراة لا يجوز لها التعدد الرجل نعم ؟؟؟


المراة لا يجوز لها السفر خارج الوطن الا بموافقة ولي امرها
ابوها زوجها اخوها

يعني لو وجدت امراة لا عم ولا خال لها يعني هي وامها وتريد السفر لقضاء العطلة بالقاهرة ماذا تفعل

اتعلن لاهل القرابة

وهل الحكومة تقبل هذه القرابة مع ان القرابة البعيدة ليست برفقة مؤمنه ؟؟؟؟



المراة ضحية لمنهاج العقل الذكوري ودبل اذا كان اسلاموي

المادة الأولى من الإعلان العالمي على العنف ضد المرأة عام 1993 والذي أكد على أن العنف هو «أي فعل عنيف قائم على أساس الجنس ينجم عنه أو يحتمل أن ينجم عنه أذى أو معاناة جسمية أو نفسية للمرأة، بما في ذلك التهديد باقتراف هذا العمل، أو الإكراه، أو الحرمان التعسفي من الحرية، سواء دفع ذلك في الحياة العامة أو الخاصة».

Quote: والان منذ 1990 ترفض حكومة الاسلام في السودان تعييين المراة في السلك القضائي بعد ان تولت المراة منصب قاضي محكمة عليا

الكلام دا ما صاح

اصلا سياسات حكومة الانقاذ اي كوزة موش اي امرأة
التفرقةعندهم قائمة على المعانا او ما معانا

Quote: وان الميراث لا يساوي بين المراة والرجل

في بعض الحالات تأخذ المرأة اكثر من الرجل والكلام دا ماصاح على اطلاقه
في حالةالاخت يرث الاخ اكثر وملزم بالقانون بكفالة اخته..

Quote: وان الرجل يتزوج اربعه وفقا للشريعة الاسلامية

ايوا وفي بعض العادات يمكن ان يكون له عشرات العشيقات
كما في الغرب مثلا. المشكلة ما في الورقة المشكلةفي الرغبة الدائمة للتعدد
عندالرجال..على الاقل المرأة الاخرى في الاسلام لديها حقوق مثلها مثل اي زوجةاخرى..

Quote: اما القرضاوي يدعو لتحكيم اية ضرب المراة لكن ضربا خفيفا وكيف يكون الاحترام وانا تمتد يدي لانسان اخر امراة لكي تتادب

الضرب هذا موجود في كل لعالم ضدالنساء يعني ما الاسلام فقط
البتضرب فيه المرأة ويتحسب دومستك ديسبيوت

ما اهانهن الا لئيم..

Quote: والتي تفعل الفاحشه تحبس الي ان يتوفاها الله والرجل الذي ياتي الفاحشه ياتوا اليه بالدخن والعصائد والمدائد لانه فحل؟؟

الرجل والمرأة عقاب واحد في حالة الزنا اصلو ما سمعنا بقصة المديدة دي
الا اذا بتقصد العادات السودانية تجاه المرأة او الرجل
كل الايات تخاطب الزاني والزانية..عقابهم واحد

Quote: كيف يستقيم التعامل وانا يحكمني منهج ديني افهم منه ان لا فلاح لولاية المراة

اكبر دول اسلامية حكمنها نساء والى الان في امريكا ما عايزين يولو امرهم لامرأة


فما تمشي تجيب حاجات ساكت.. كم دولة في الغرب حكمتها امرأة؟

Quote: المراة لا يجوز لها التعدد الرجل نعم ؟؟؟

وريني جنة المرأة فيها تعدد عشان نقول ايوا والله الاسلام حرمنامن التعدد

المرأة تستطيع التعدد لكن بعدالطلاق من الاول وهكذا دواليك ممكن تعرس 100

المشكلةانتو بترضو بالمرأة " العزبة"

المرأة محتاجة لانصاف من المجتمع البنظر ليه كغشاء بكارة
اكثر من الشهادة والميراث لانه ممكن الذكر والانثى لما يموتو ما يشهدو والحبة ما تجيهم

برضو ممكن الانثى يموت ابوهاولا زوجها ومايخلو الحبة ويقوم عليها اخوها
يربيها ويعلمها ويزوجها من حر ماله و عمل يمنو و عرق جبينو واذا مات عنهازوجها
ايضا يقوم عليها اخوها يربي معهااولادها مرات كثيرة لا يتزوج هو حتى ينجز المهام دي
الورثة دي ما حاجة حاصلة طوالي وبكثرة
عايزين الانصاف في ان نكون محترمات مقدرات في مجتمعنا اذ هذا ما تطلبه كل النساء
الوارثات وغير الوارثات الشاهدات وغير الشاهدات,و
يعني ليس في امر عارض بل امر اساسي نعيشه يوميا,و

Quote: المراة لا يجوز لها السفر خارج الوطن الا بموافقة ولي امرها ابوها زوجها اخوها يعني لو وجدت امراة لا عم ولا خال لها يعني هي وامها وتريد السفر لقضاء العطلة بالقاهرة ماذا تفعل اتعلن لاهل القرابة وهل الحكومة تقبل هذه القرابة مع ان القرابة البعيدة ليست برفقة مؤمنه ؟؟؟؟

الكلام دا لا دخل للدين به واسع حكومة الانقاذ ماصتو وشربت ميتو

كم من الاخوات بيجو هنا بدون مشاكل.

Quote: المراة ضحية لمنهاج العقل الذكوري ودبل اذا كان اسلاموي

المرأة ضحية العقل الذكوري العامل مستنير اكثر من الاسلاموي
المستنير الممكن يقول ليها الورقة اهميتها شنو وربنا

دخلو شنو بحبنا وحين تصدق حديثه وتمارس مع الجنس بدون ورقة

يمشي يعرس بت خالتو ويقول انها امرأة سهلة لكل من يعرفهم ويتركها حزينة مهشمةفي مجتمعمهتم فقط بعفة البنت من غير الرجال..
المستنير لما يتغاظ من واحدة بيطلع فبها اشاعةمستخدما ايحاءات تقبل التأويل
(كما فعل العضو سوداني وهو مستنير جدا كما يتظاهر وذ ما انت عارفو)
المستنير الممكن يخدش الحياء مستخدما عبارات تكتب بطمثها
او احذروا نساء المينبوس في حوارات فكرية...

المستنير البجي يميع البوستات الجادة باستخدام لغة خادشة للحياء
الرجل الذي يروج للمرأة توسكا لمسة حنان. المرأة المغيبة الوعي الجاهلة

ولذك صارت التجارة بحقوق المرأة الان غير مجدية في رمي اي امرأة في الشباك
كلما تحدث الرجل كثيرا عن حقوق المرأة
اعلم ان زوجته تجلس في الركن وان بناته مخفوضات..وان اخته لا ترج من البيت الا برفقة قوالة
وان المرأة التي يود تحريرها ليس فكريا بل اخلاقيا لا تمت اليه بصلة قرابة
ولذلك سيجرها بالشوك



ومن ثم

الخطورة تنبع في انفصام الرجل السوداني الا من رحم ربي..وما في الاسلام

الاسلاموي دا اذا بالجداسلاموي بيكون زول دغري جدا ومعروف فكرو شنو والمتوقع منه شنو
اسلامي واضح ولا مستنير مجهجه هذا شعار المرحلة

قال السيد عمر الفاروق هداه الله وطير الجن الفي راسه
-------------------------------------------------------------------
حقيييقي البوست خلاص اتبشتن واتعولق ..
وبعد شويتين حايستلموهو الجماعة ويمرقونا بيهو في بلدا طيرا عجم ..
ياخ انا اووووول مرة في حياتي المنبرية اقرر اقرا لي دفوعات عن المرأة مكتوبة بي صورة رايقة ولطيفة تجبرك على قراية الجغلومية السطر البتخطها بت قضيم وانت متلهف تقرا السطر التحت قبل الفوق ..
بس يا فرحة ما تمتش!!!!!!
--------------------------------------------------------------------


ومطنقر الرد فوق كده مالك يا عمر
أم الطششان

صباح الخير للجميع
وتحية خاصة للاخ صبري والأخت نجاة
شكرا ًللطرح الراقي،
ولي وجهات نظر حول المواضيع التي طرحتموهاهنا
ولكني اقترح إفراد مساحة خاصة في بوست منفصل بعنوان (تطوير مفهوم قراءة النصوص الدينية وفقا لمتطلبات العصر ) لأهمية الموضوع اولاً وفرزا ًللكيمان ثانياً وعساه يكون بوست راقي في الحوار بعيداً عن تحجر الآراء يخلو من النظر بدونية للرأي الآخر المخالف

جاية

أخي وليد
ولك من الود الكثير
معليش انا عكليتة حافصل كلامك تفصيل، فكلامك جاني في جرح لأنه هو نفس الكلام العايزه اقوله بس من زاوية مختلفة
قلت

Quote: ينظر اليهن الرجل بغير نظرته للزوجة ولذا تري التعامل يختلف والمفاهيم التي تطبق عليهن تختلف ايضاً . فاذا مر رجل ووجدامه بالطريق مع رجل آخر لن يتبادر الي ذهنه سوء ؟ بعكس اذا مر ووجد اخته مع نفس الرجل ؟ او ابنته مثلا ؟ اما ان كانت زوجته فيتضاعف الحس عنده بحس رديف هو الغيرة

أولاً هناك فرق بين الغيرة والشك، يعني ممكن يغير لو أن الواقف معاها كان مثلاً خطيبها فيما سبق أو حبيبها أيام الجامعة أو أي سبب يدعوه أصلاً للتفكير أن ممكن هذا الشخص ممكن يكون فتح معاها مواضيع قديمة، لكن تتقد نار الغيرة ويولع دون سبب ظاهر لمجرد أن محرمته هذه واقفة مع واحد فهذا في رأي شك وليس غيره

ثانياً: هذه ليست قاعدة رجالية عند كل الجنسيات الأخرى، مثلاً الرجل اللبناني لو وجد حرمته واقفة مع شخص لا يغار!!
وقبل أن تفكر اضيف أنني حددت اللبناني عن قصد، لأني ممكن أجزم أن معظم من قرأ الجملة السابقة لا شعورياً ردد في نفسه –ما لبناني خرع-
قالب آخر يعيشه الشخص السوداني (عموماً)

هذه القولبة التي تتحدث عنها ليست إيجابية في كل الأحوال.

الرجل السوداني مقولب نفسه على أنه (أرجل راجل في الدنيا)

أنظر مثلاً للأغاني السودانية التي تعظم قدر الرجل و- تنفخه-
كلها تشبيهات حيوانية (تور، أسد، جاموس خلا) جاموس خلا، لأن جاموس الحقل أليف
لا اتوقع أن اسمع يوماً شعراً سوداني يشبه الرجل بال(عصفور) مثلاً، فاتجاه الفكر مباشرة سيتجه إلى أن العصفور كائن رقيق صغير لا خشونة فيه
رغم أن العصفور حنون، جاد، عصامي، حماسي وعنده عزيمة وإصرار، تابع كيف ببني عشه، غير هذا وذاك يعتمد على نفسه في إطعام صغاره،،،ليست النعومة في هذه الحالة بسبة أبداً، فقل لي بالله، ماذا في الجاموس غير أنه (جاموس) فعلاً؟؟؟!!!
الا يتبادر لذهنك عند التفكير أن الموضوع لا يخلو من تلميحات (جنسية)؟؟!!
المعنى في قلب الشاعر والله اعلم

لا أدري، لكن في خاطري فقط أغاني تمجيد الرجولة والذكورة، يعني لا اتذكر أغاني تمجد الأخلاق الحميدة، الرجولة طبعاً محمدة لكنها جزء من الأخلاق ،،
حتى صور الحب التي يقدمها شعرنا وأغانينا صور (دشنة) و (جلفة) تحسب كلمة (الحب) نفسها فجل فجل

لن أحسب لك كم بوست هنا وكم تعليق وكم مشاركة تمجد شخصية الرجل السوداني، وخليني أمسك مثل عزاز في بوست (واحد حضن مضيفة)،
أنا بصراحة اندهشت من (الدهشة) التي أحاطت الموضوع والأهمية التي اعطيت للموضوع، فهذا السلوك معروف في كل مكان في السودان، في الاستادات، وفي الحفلات العامة ، وفي سعد قشرة ، وفي سوق ليبيا، وفي المواصلات، وهنا في محلات مهجة وشبرا لناس جدة، وكلهم سودانيين، ورجال كبار كمان،، وما سكرانين واعيييييييييين، وليسو ناقصي عقل

السوداني انسان، ثم تعالوا هنا
نشتكي من عنصرة الناس تجاهنا (طوالي قالوا سوداني) (قالوا السوداني عربي)
نحن أكثر عنصرية من مليون شعب عربي
الشخص السوداني (رجل وامرأة) أكثر عنصرية من كلمة العنصرية نفسها، عنصري قبائل، وعنصري لون، وعنصري لهجة ورطانة، وعنصري رجولة وجنس

فقالب الرجل السوداني الفحل أخو مهيرة مستحيل يسكر ويحضن مضيفة،
لكن المصري انتهازي ومادي ومنافق،
والهندي اناني وثعلب في العمل،
والنبغالي وسخ وحرامي، واللبناني خرع وناعم
، والسعودي ابن ---- جنوا حريم في الحرام،
والكويتي مفتري وغبي لا يفهم،،
وهلم أوصاف وهلم قوالب وهلم شتائم...

وعلشان عمر قال كلامي (جغلومية) سطر، فحاوصل في مشاركة تانية
دقيقة

شكرا / الاخت بت قضيم
لهذا البوست القيم والمفيد

Quote: أنظر مثلاً للأغاني السودانية التي تعظم قدر الرجل و- تنفخه- كلها تشبيهات حيوانية (تور، أسد، جاموس خلا) جاموس خلا، لأن جاموس الحقل أليف

بت قضيم
لك كل الود

التشبيه في الاغاني والشعر هو انتزاع من البيئة المحيطة بكل مجتمع ، وهو ليس نفخ في ذات الرجل وانما تحريض علي التمسك بقيم جميل تكفل له دوره الريادي في المجتمع الانساني المكون منه ومن المرأة كطرف ثاني ، وقلما تجدي اغنية حماسية لاتذكر الرجل بعماته واخواته واماته وانه عشاء لهن وغطي وضل ومقصد ضيف وصاحب قدح للمساكين ، بل عندما يفتخر الرجل السوداني يقول انو اخو فلانة تعظيماً لها ، او يقول انا ابوفاطنة. والتشبيه بالاسد وتور العنز وصقر المفازة وتمساح الدميرة وجمل الشيل مقصده الاشتراك مع ماتحمله هذه الحيونات من صفات كالشجاعة والقوة والصبر وحماية الصغار وعش الزوجية الذي تنشئه .

مثال للانتزاع من البيئة قول الشاعر : انت كالكلب في الوفاء وكالتيس في قراع الخطوب

وشهد شاهد من اهلها

فكرة (الدفاع عن المرأة) و (المرأة كائن ضعيف) و (الخوف على الحريم) ومثل هذا الكلام ،
لا يقنعني
لو كانت هذه المرأة التي تدافع عنها دفاعك المستميت عمرها 9 سنوات او 12 سنة أقول ليك أوكي، دافع عنها فهي طفلة، وفي هذا يتساوى الجنسين، كونه طفل أو طفلة،، لا فرق فهي طفولة ومراهقة

لكن أن تقول لواحدة – كبيرة وعويرة – خشي جوة يا بت ده كلام رجال، فهذا عين التحقير والمغالطة

الفتاة يا وليد ويا كل الشباب، التي استطاعت أن تثبت نفسها في تعليم وجامعة وعمل، تعمل مع عشرات الرجال، تقرأ وتتثقف، تتزوج، يعني فاهمة الدنيا وما فيها، تستطيع بكل بساطة أن تدافع عن نفسها، إلا لو كنت تقصد الموضوع عضلات يعني فهذا شئ تاني
وبرضو فيه نظر، فالله لما سن الحياة وجعل المرأة هي الشخص المسؤول عن الحبل والولادة والرضاعة، فليس عن فراغ يا وليد،ما ساي كده ،، الموضوع مدروس سبحان الله
المرأة – على فكرة – جسدياً تستطيع التحمل أكثر من الرجل، ايش رأيك بقى؟؟
ربنا قال كده،، اعترض بقا (وش ضاحك)
نعم،، جسد المرأة – علمياً- لهو اكثر قدرة على التحمل من جسد الرجل، والا كان الرجل بما انه رجل و –جاموس – كان يحمل هو
عاطفياً المرأة تتحمل أكثر (ويا صبري هذا معنى أن المرأة مخلوقة من ضلع أعوج على فكرة) ليس لإعوجاج فيها بل المقصود عاطفتها، فالمرأة التي ترضع، وتسهر الليل بطوله لأجل الولد العندو حمى، ثم تستيقظ صباحاً – كأن ما حاجة حاصلة – لتجهيز الفطور وعمل الشاي وتجهيز الأطفال للمدارس، ثم تنظف المنزل وتجهز طعام الغداء، ثم تغسل وتكوي ملابس الاطفال على الأقل يومياً لأجل المدرسة، ثم تذاكر للعيال، وفوق هذا وذاك تستقبل الضيوف، غير المجاملات، والجيران و و و
ده لو ما كانت امرأة عاملة
ثم مطالبة هي – على كل ده- الاهتمام بنفسها، دخان وحنة وحلاوة الخ الخ الخ

جربوا واحد يرجع من دوامه – وفي البلاد المكندشة المريحة دي كمان – بسيارته، جربوا أن تطلبوا منه مشوار لمستشفى مثلاً، يااااااه على التشكي والتعب وال(النقنقة)
ثم
هل في مغالطة أن جسد المرأة يتحمل أكثر من جسد الرجل؟؟
نفسياً ،، تستطيع المرأة أن تتحمل رجلاً وزوجة ثانية، مثلاً، مجبرة لا مقتنعة بالطبع، لكن برضو نفسياً عندها المقدرة، هل الرجل – نفسياً- عنده مقدرة أن يكون لزوجته صديق؟؟؟ ساي كده لله فالله صديق
ممكن؟؟؟!!!
تتحدث معه ساعات طويلة في هاتف، تشتكي له من الحياة ومشاكلها، صديق عادي يعني
ممكن؟؟؟!!
من حدد وقال يا وليد أن الرجل هو (حامي الديار الأوحد)
؟؟؟ انت فقط أو كل الشخوص السودانيين
وبعدين ولو فرضنا أن المسألة مش عضلات ودفاع كلامات ساكت، فالمرأة أعقل من الرجل، حكيمة وتستطيع تدبير حالها بحالها
اسألوهن، او اسألني أنا
لو واحد في سوق عاكسني، مستحيل اشتكي ل(محرمي) وبالذات المحرم السوداني
يصرخ ويزعق ويعرق ويرجف و(يتحامق) ويحلف بالطلاق وقد يصل الموضوع لضرب، فضايح يعني، ويا ما سامع اسمع،
هذا أحد حلول الرجل السوداني السريعة، الحماقة
أنا ال(مرة)،، نظرة واحدة مني كفيلة بردع أكبر معاكس في الدنيا
شفت كيف يا وليد
!!!
الحكمة والتروي والعقل،، هذه سمة بعيدة عن الرجل السوداني - عموماً- كل البعد
وده في عرف السوداني (قلبو حار وما برضى الحقارة)
مع أنه هو كما جاء في حديثكم

Quote: والرجل السوداني له مواقف في هذه الامور قد تبدو غريبة للوهلة الاولي ولكن منبعها هو الحرص علي حماية انثاه اي كان قالب تواجدها . واليك مثال في دنيا الصعلقة وقلة الادب اذا اسميناها مجازا هكذا هناك قوانين لا تنتهك مثل الابتعاد عن بعض الاناث كمفهوم رجالة في الصعلقة وهن ( اخت صحبك ) و (بت الحلة ) فعندما تمر البنت امام مجموعة شباب ويحاول بعضهم معاكستها يقف واحد منهم ليقول ( لا دي اخت فلان !) او ( لا ياخي دي بت حلتنا؟ ) .

فشكراً للمثل الذي كان غائباً عليا
نعم
هذا هو الخلل التربوي باين وواضح وجلي
بت الجيران أو اخت صاحبك (هذه حرمة لها حرمتها)
أي واحدة أي كلام (ممكن يزني معاها)

اختك عاكسوها في السوق تقلب السوق
انت تعاكس واحدة في السوق، تستاهل، كاشفة وشها ليه
!!!!
فكرة الأدب ك(أدب) مشوهة

لو أن كل واحد تحكم في غرائزه ، تأدب بأخلاق حميدة، توقف عن الزنا، تعامل مع كل الإناث على أنهن (محارم)، كان أصلاً ما في بيوت دعارة
لماذا نلوم خمر ويوجد من يشتريه؟؟
لماذا نلوم بضاعة فاسدة ويوجد من يبحث عنها باستماتة؟؟
أم هي (داعرة) بت (----) وهو
راجل والله
؟؟؟!!!

Quote: فكرة (الدفاع عن المرأة) و (المرأة كائن ضعيف) و (الخوف على الحريم) ومثل هذا الكلام ، لا يقنعني

بت قضيم

لك الود مرة تانية

بس انتي اخدتي نصف شهادتي في الموضوع ، فقصدي من حمايتها ليس بالضرورة يعني هي ضعيفة ولكن انظري للعبارة ( يابت خشي جوه ) ده بيعني انه الحوار خارج الاسوار وحرمة البيوت في الشارع بالعربي، والشارع ليس له ضوابط كالبيت فادخاله لها كي لا تسمع مثلا عبارات شوارعية تصك اذنها مثلا او تشاهد منظرا غير كريم . هل سمعتي يوما رجلا يقول لابنته ( يابت اطلعي برة ) .

Quote: المراة لا يجوز لها التعدد الرجل نعم ؟؟؟

قال تعالى:
إِنْ خِفْتُمْ أَلَّا تُقْسِطُوا فِي الْيَتَامَى فَانْكِحُوا مَا طَابَ لَكُمْ مِنَ النِّسَاءِ مَثْنَى وَثُلَاثَ وَرُبَاعَ فَإِنْ خِفْتُمْ أَلَّا تَعْدِلُوا فَوَاحِدَةً أَوْ مَا مَلَكَتْ أَيْمَانُكُمْ ذَلِكَ أَدْنَى أَلَّا تَعُولُوا".


جاءت آية تعدد الزوجات مستجيبة للعادة التي كان عليها العرب، فقد كانوا يعددون لحاجات كثيرة، واغلبها مشينة وكانت المرأة مستباحة عندهم بمعني كلمة مستباحة، فجاء الشرع الحنيف متدرجاً معهم فحدد أربع زوجات على الصحيح، مع ربط التعدد بعامل العدل ، مع الحوجة لهذا التعدد كطلب الذرية مثلا ، ولم يقصره علي الرجل فاللمرأة طلب الطلاق من الرجل الذي لا ينجب والزواج بآخر غيره أما قضية التعدد أم الواحدة، فإن أحدهم يبدأ بواحدة فيمكن أن يقال هذا الأصل، ولكن أقول أن الأصل يكون من حيث المقصد وهو العدل، فمن لا يعدل مع زوجة واحدة فالزواج في حقه حرام.
الرسول الاعظم لم يتزوج علي زوجته خديجة بنت خويلد عليها السلام حتي توفيت كناية عن الاصل
وانما جاء التعدد في حقه لمعالجة اوضاع كتأليف بعض القبائل وترغيبهم في الدخول للدين ولتعطيل حكم جاهلي كما في قصة زينب بنت عمته وزيد ربيبه .
والامام علي عليه السلام لم يتزوج علي السيدة فاطمة عليها السلام الا بعد وفاتها ايضاً وفيه دليل علي ان الاصل واحدة .

..
.
متابعة

________

التعقيب بعد حين

دكتورة نجاة

Quote: خدش الحياء من الاسلحة التي يستخدمها الرجل الذكوري ضد المراة لحسم اي نقاش منهزم فيه بمثابة الضربة القاضيةاو الضرية تحت الحزام الحاجة الواحدة العرفتها وتأكدت منها ان الرجل الذكوري لا تفزعه الا المرأة الطويلة اللسان غير بنت الاصول كما يقولون. ولذلك يتشطر على اي امرأة اخرى ويمكن يصفها باي اوصاف.. لكن ست الاوصاف الحقيقة لايقربها لانه جواه طفل جبان مزعزع رعديد..وخواااااااااااف

كلام دقيق وحاصل، والحقيقة لفتي نظري لنقطة ما فكرت فيها كثير، فعلاً، يتشطر على أي امرأة وعلى واحدة أي كلام ما يرد عليها
بس اختلف معك ان مش السبب ضعف وجبن، يمكن خوف من الفضايح فهذه المفروض لا تهمها فضيحة ولا يستطيع استخدام سلاح التشهير معها، لكني اظن السبب أنها مش بتهمه، لا تهمه في شئ، يلعب بها فترة وبعدين يسيبها ، وذي ما بقولوا (جلدا ًما جلدك جر فيه الشوك)
والله اعلم
شكراً كتير للإضافة
----------------
أيوه يا عزاز
يشار لها بصفة (بنت الأصول)، الأنثى الخاضعة المؤدبة
أما الأخرى فحدث ولا حرج
أعتقد ان السبب شخصية الرجل نفسها – الرجل ككل أعني وليس السوداني فقط – يحب أن يشعر بأنه سيد الموقف، أي موقف، حديث، فعل، قرار
والأنثى الذكية هي التي (تمثل) الخضوع وهناك فرق بين (تمثيل) و (تنازل)
يعني لا تقبل الضرب مثلاً فهذا تنازل وليس تمثيل، لكن تمثل أنها (ضعيفة) فهذا ذكاء، وكما قال الدين (كيد النساء غلب كيد الشيطان)
ومرة أخرى
تعالي نفتح بوست نصائح نسائية نودي الشباب ديل الخلا
ايش قولك؟؟
واصلي بالله
تحياتي
---------
شكراً يا أنور على المتابعة
خليك معانا تجد ما يضايقك مننا (لوووووووووووول)
-------------
وشكراً لك يا عمر فضل المولى
إن شاء الله بس نستفيد فعلاً ما يكون كلام ويطير في حق الشيطان الرجيم
سلمت للتشجيع
-------------
تبلدينا
والله انا قلت الزول ده مسافر واللا يكون دخل في ركشة تاني واللا مالو
كنت مستغربة انك ما تشارك في الموضوع ده بالذات
بركة الطلة
ننتظرك

بت قضيم والنسوون والرججل :
النقاش في الموضوع حقكم ده زي نكتة الراجل العندو رجفة وبياكل في جلي المسطول قال ليهو انت ترجف والجلي يرجف جهجهتو المعلقة !!
اقرا كلام بت قضيم اقول صاااااااح اقرا كلام الرجال اقووول صااااحين ارجع اقرا رد بت قضيم اقول تلاااتة صاحات!!!
مبدئيا اقنعت نفسي انو ما راسي خفيف وبقبل اييي كلام وقلت خادعا نفسي إنو معناها الإتنين ديل بيتكلموا صاح يبقا فقط وفقط تكمن المشكلة في كيفية وجود الية مشتركة ومنطقة اوسطى يتلاقو فيها الطرفين بدون ما يتعاكسو ويعوسو الابري بي احلو مر!!
يعني ما ممكن بت قضيم تكووورك وتجوط وتقول خلونا في حالنا ولااا كمان الرجال يقولوا ليهن لالالالالا مااا على كيفكم انتو تحت امرتنا!!
انا شخصيا والنصييييحة كده بتفق مع كلام بت قضيم في وصفها للمرا من حيث الفهم وقوة التحمل وفي بالي امثلة بسيييطة وصغمبروتييية لكن كانت بتعني لي الكتير..
في العقل ده كنت دايما بحاول اعمل تجربة وبجيب ولد وبت من نفس العمر وبحكي ليهم مشكلة معينة وباخد رايهم فيها وكيفية طريقة تفكيرهم ..!! في معظم التجارب دي لاحظت إنو البت بتديني اراء حقت ولد اكبر منها بي سنتين تلاتة يعني لو سالت بت عمرها 16 سنة بتديك راي ولد عمرو 19 سنة ..
والله في قوة التحمل دي امي الله يديها العافيةكل ما اتزكر مشهدها وهي قاعدة قصاد الكانون وبتعوس في الكسرة وعااادي تتونس وتضحك أو كل ما تجي تنزل الكافتيرا حقت لاشاي وتنزلا عااااااديوبدون وحوحة اتزكر ليك كيف انا واخواني بعد ننزل الكافتيرا نديها ليك طقطقة اصابعين كده ومعاها اوووفففف او احححح ..
المرا دي في البيت بتشيل اتقل حاجة في البيت تحول ليك الدولاب من هنا لي هنا زي الما حصل شي ..تكشح ليك موية الطشت حقت غسيل العدة زي السلام عليكم ..
كلام اشتر مش؟ لكن والله الحاجات البسيييطة دي كنت قاعد اقيف عندها كتييييير..
بعدين يا بت قضيم وان كنتي صاح في حاجات بس برضو مرة مرة كده بتظهر عندك بودار جندرة وانفعالات تحيز وان كنتي بتحاولي تتملصي منها بي تكبيرك لي اللفة او تجي ماشة فيها بي سرعة 220 من شاكلة اي النسوان بيتكلموا كلام كعب وبينكتو تنكيت كعب وو و و و و ..
المرا نفسها في حاجات كده مااا بترضا يساوها بيها بي الراجل وبراااها بتقوم تهيج وتقول ليك اخجججل يا راجل ..
الله قال بي قولك لو شاكلتها في المواصلات وهي الكانت غلطانة عليك وفجأة كده تلقاها تستخدم السلاح المستفذ :
اخججججل يا راجل انا بت ..رجلاتك دي امشي اعملا مع الرجال الزييك ..
ليتدخل كلل من في المواصلات ويقول ليك عيييب عيييب ياخ دي زي اختك دي زي امك دي زي (حبوبتك) :)
لحدي وقت قرييب كدي كان راجل ما تقيف لي المرا في المواصلات ولو ما وقفت المرا عااادي بقول ليك يا ود انت قليل ادب؟؟ ما شايف خلاتك واقفة ؟؟
بعدين يا بت قضيم انتي اغفلتي حتة مهمة جدا جدا جدا جدا وهي تعامل المرا مع المرا ..
اكككككتر زول بيقعد في البيت مع اولادو منو ؟؟ مش الام ؟؟ اللي هي المرا ؟؟؟
اها الام دي هي القاعدة تكبر الحاجات دي وتزرعا في بناتا وفي اولادا !!
البت عمرها 18 سنة امها ممكن عااادي جدا تنادي ليها اخوها العمرو 12 سنة عشان يأدبا لأنها فهمتو انت راجل البيييت ..وانتي بت !!
الأم وحدها التزن لي بتها وتجرها من يدها وتسوقا الطهارة ..
الأم وحدها البتقول لي بتها اوووعك ترفعي صوتك على اخوك (الصغير) ده راااجل ..
الأبو ده يا بت قضيم اليوم كلللو برة البيت لو استغلت الام تمرير اجندتها في تربية اولادها سواسيا لارتاح المجتمع ..
اصلحو حالكم وطريقة تفكيركم ينصلح حال الرجل ..
ابدو بي بني جنسكم يا بت قضيم واقنعوهن بي كيفية تعاملهن مع بناتهن واخواتهن ينصلح الحال ..

تخريمة :
غشيتك عشان تكتبي حببة وتدينا فرصة معاك ياخ :)

Quote: لو أن كل واحد تحكم في غرائزه ، تأدب بأخلاق حميدة، توقف عن الزنا، تعامل مع كل الإناث على أنهن (محارم)، كان أصلاً ما في بيوت دعارة لماذا نلوم خمر ويوجد من يشتريه؟؟

انتي يابت قضيم مسؤولة من الخير بيوت الدعارة دي قاعدين فيها رجال ؟

ماتقولي بسم الله هنا ، الزنا تتحمل المرأة فيهو نسبة اعلي من الرجل ! وحالة الإغتصاب هي الوحيدة الماعندها فيها يد . فعلا لماذا نلوم الرجل الزاني وهناك امرأة يزني بها تبيع الهوي عيني عينك بالتبرج واظهار الرقم ؟؟ يعني لو هي تأدبت وتوقفت عن عرض مفاتنها امام الرجال وضعاف النفوس ماكان انعدمت فكرة الدعارة من اصلو.

نرجع لقصة تقدير المواقف ووزن الامور بالعقل القلتي فيها المرة اخير من الراجل ؟ انا مختلف معاك تماما هنا . المرأة تشتهر باستعمال العواطف اكثر و زي مابقول الشباب ( كلمتين وتاكل راسها ) في زولة عندها راس تمشي مع واحد وتسلمه نفسها طائعة لمجرد الحب ؟؟.

Quote: كم رجل (بالله) جعل من موضوع (الختان) أيام الجامعة شغله الشاغل، ورفع الأعلام وألف الهتافات المناهضة لهذه العملية الدموية في حق النساء، ثم بعد زواجه بأعوام ضرب بعلمه وشهادته عرض الحائط وطلب بصورة رسمية وواضحة من زوجته وأمها شوية (تظبيطات) إشباعاً لغرائزه الجنسية؟؟ عارفين بالضبط ما هي هذه العملية؟؟ هي تشويه بتر أعضاء رسمي،، بتر لكل أعضاء الانثى الخارجية والإبقاء على فتحة فقط تسمح بمرور الدورة الدموية والبول، وتعظم إحساس الرجل برجولته ضارباً بعرض الحائط فكرة أنها يمكن بعدها أن لا تلد ولادة طبيعية أبداً، المهم حيوانيته هو

بت قضيم
لك الود فعلا عكليتة

هنا في خلط بين عمليتي الختان والعدل بكسر الدال
فلن يصلح العدل ماافسده الختان ، الرجل الذي يناهض الختان من واجبه ايضا مناهضة العدل ، وللعلم العدل ليس به بتر ولا قطع لعضو ما وهو تظبيطات زي ماقلتي ، ولكن ليست بالضرورة من طلب الراجل فلربما تقوم بها المرة لمحاولات الكسب المادي من زوجها المغترب ؟ يعني بيدها وشديدها والغريب امها معاها كمان .

أخشى يا عمر أن احبط نواياك واعترف ان السبب في تقسيم الكلام هو المدير (أكثر الله من جضومه)
جنس كلاماتك دي ما بتجيب مع القطامة الأصلية نفع
بجيك

يا وليد
أنا ما اختلفت معاك على فكرة في موضوع الشارع وسماع الأنثى كلمات تجرح حياءها، ولو أن مسألة الحياء دي المفروض تكون عند الجنسين، الجرأة هي المفروض تكون عند الرجل أكثر
وعموماً
ما اقوله أنا، لماذا أصلاً الرجل لا يحترم حرمة الشارع؟؟
فهمتني؟؟؟
يعني هو بداخل منزله مستحيل يقول كلام جارح، في الشارع ممكن، ونقطتي التي اتحدث عنها هي
لماذا لا يتأدب الرجل في كل الأحوال؟؟؟ في البيت والشارع!!!
على فكرة (الشارع) نفسه له حرمات
اقول ليك مثل وما تستغرب مني كتير!!
ده مثلاً ذي واحد يسمح لنفسه التبول في حائط في الشارع وفي بيتهم لا يستخدم سوي المرحاض

يا جماعة البيت والشارع لا يختلفا كثيراً، لو أصلاً كل واحد اتأدب داخل وخارج المنزل ما كان هناك خوفاً من أن ال(حرمة) تسمع كلام يخدش الحياء، ده لو اعتبرنا الحياء هذه خاصية نسائية فقط

وفيما ذكرت من الصفات المذكورة في الأغاني انا فاهمة الفكرة كويس، لكني اتساءل عن ربط الخشونة بالرجولة وفكرة الإباحية المسموح بها للرجل دون النساء

أما عن ما جئت بذكره من التعدد فأنا لا اختلف معك إطلاقاً بس حابة أن يكون الموضوع منفصل
وقبل فترة جاني مقال رائع حول تعدد زوجات الرسول (ص)، لو عندك رغبة ادرجه ليك مع ان ده خارج الموضوع الحالي، بس حابة الفائدة تعم


بالنسبة لبيوت الدعارة يا وليد
وأنا عارفة اني اللي حاقوله قد يجيب لي كلام كتير
وشبه مقتنعة اني ممكن اتفهم غلط ، ومع ذلك إحقاقاً لحق النقاش ده اقول..
نعم بيوت الدعارة كلها نسوان، لكن المرأة لما تبيع نفسها غالباً لسبب ما، عمري ما سمعت عن واحدة تمارس الرزيلة (تسلية وإشباع غريزة)
قد تكون واحدة مش محتاجة ماديا ًتمارس الدعارة، لكن برضو بكون عندها أسبابها المادية (تطلعات يعني) وفي النهاية كله بيعني خلل نفسي فيها، المهم في سبب غير سبب (المتعة)
لا اعتقد أن واحدة بكامل قواها العقلية وكامل قواها النفسية تقدم نفسها طواعية لرجل يستبيح جسدها لأجل بضع قروش، ممكن أن تستمع
أسأل واحدة،أي واحدة تعرضت لمثل ما تعرضت له مضيفة الطيران، اسألها عن إحساسها المقزز المقرف الذي يمكن أن يستمر معها فترة من الزمن بتصرف رجل يمكن لم يدم سوى بضع ثواني، خليك بقى من أن يمارس معها دعارة وبمعرفتها أنه لا يحترمها وبمعرفتها أنه مجرد رجل باحث عن متعة وبمعرفتها أنها في تلك اللحظة تتساوى وكلبة في شارع ما
تفتكر ماذا يجبر أي واحدة لهذه المهنة وهذه الأحاسيس سوى الحاجة ؟؟؟
أنا لا اعطي اعذار - ابداً-
لكن
اعطني انت عذراًُ لرجل يزني لسبب غير المتعة؟؟
عمري ما سمعت أن رجلاً يدخل بيت دعارة ويمارس الجنس (مجبراً) يا وليد

في عهد سيدنا عمر رضي الله عنه- على ما اعتقد عمر - ولما جاع الناس وفاضت الحاجة بالناس، سرق سارق، فعفا عنه عمر ولم يقطع يده كما هو معلوم في الشريعة، لأن السارق كان محتاج وكان جائع
أعيد وأؤكد
انا لا اعطي المرأة -ابداً- أعذاراً لممارسة الدعارة، لكني افهمها
ما لا استطيع فهمه، لماذا الرجل يعمل كده؟؟
السبب الوحيد المبرر عندي (سوء التربية)
والله اعلم
اتمنى اني اتفهم صح
وجاية

وليد وعمر أنا حاعملها 2 × 1 ذي الشامبو
ردي واحد عليكم الاتنين في الجزئية دي
أولاً يا عمر
التحية لكل من تشوشت بنار الكانون والعواسة
زاتو ذوقنا في الأكل ممل ومتعب وبرضو خشن

بعدين

Quote: بعدين يا بت قضيم انتي اغفلتي حتة مهمة جدا جدا جدا جدا وهي تعامل المرا مع المرا .. اكككككتر زول بيقعد في البيت مع اولادو منو ؟؟ مش الام ؟؟ اللي هي المرا ؟؟؟ اها الام دي هي القاعدة تكبر الحاجات دي وتزرعا في بناتا وفي اولادا !! البت عمرها 18 سنة امها ممكن عااادي جدا تنادي ليها اخوها العمرو 12 سنة عشان يأدبا لأنها فهمتو انت راجل البيييت ..وانتي بت !! الأم وحدها التزن لي بتها وتجرها من يدها وتسوقا الطهارة .. الأم وحدها البتقول لي بتها اوووعك ترفعي صوتك على اخوك (الصغير) ده راااجل .. الأبو ده يا بت قضيم اليوم كلللو برة البيت لو استغلت الام تمرير اجندتها في تربية اولادها سواسيا لارتاح المجتمع .. اصلحو حالكم وطريقة تفكيركم ينصلح حال الرجل .. ابدو بي بني جنسكم يا بت قضيم واقنعوهن بي كيفية تعاملهن مع بناتهن واخواتهن ينصلح الحال ..

تمام
عين العقل وكلام مظبوط مية في المية
لكن يبدو لي عندك حوصة شوية واللافي راسك ده شيتن تاني ما كلامنا، لاني قلت الكلام ده في بداية البوست

Quote: اتمنى ونفسي بجد أننا نحن السيدات نربى أولادنا وننشئهم بفكرة أن الخطأ خطأ، بغض النظر عن فكرة العيب مثلاً يعني، الواحد عادي من الشباب بالذات ممكن يسكر مع أصحابه، هذا بالنسبة له مش خطأ، طالما أن عمه أو ابيه أو جده لا يراه ولا يعلم. نحن لا نربي أولادنا على فكرة أن الله موجود يراك، وأن لا تفعل الخطأ لأنه خطأ وليس لأنه عيب في نظر الناس أو (فضيحة) او كل تلك الأفكار التي نغرسها في عقول الشباب منذ الصغر خصوصاً طبعاً الرجال البورد هنا أكبر دليل على الخلل التربوي الذي نعانيه بسبب فكرة ال(عيب) البنات مثلاً، كل واحدة ممكن كما يقولوا (تعمل السبعة وذمتها)، بس ما تحمل، لأن الحمل (فضيحة) لانه ظاهر، ويمكن لو كان الحمل بدون الكرش إياها، كان نصف فتياتنا حملوا وولدوا بدون التقيد بفكرة العيب التي ندمنها ونزرعها في عروقنا وعروق أولادنا فننمو بها الأدب الذي اتحدث عنه هو اتباع ال(صاح) في سوق ليبيا أو في الصحراء الكبرى حيث يرانا الله في كل مكان

وأضفت حماني الله وخلاني

Quote: وبعدين على فكرة، مين قال أن ال(حريم) لما يجتمعوا يتحدثن فقط عن نظرية الذرة؟؟ على فكرة،، كثيرة هي النكت السفيهة والتجارب الجنسية مع الأزواج وقصص الغراميات الفنية وغيره من المواضيع الحمراء تطرح في المجتمعات النسائية وبكثرة كمان، بس النساء لا يتجرأن لفتح هذه السير أمام رجال،

وزدت بإصرار

Quote: أن تتحرر هي،، أن تشعر بالحرية في اتخاذ قرار لا يتحكم فيه زوج أو عم او أب أو - الأمر والأدهى- حبوبة،، حبوبة انثى خاضعة خادمة لرجل هذه هي حقوقك، وسيبك بالله من كلام الجرايد

Quote: يمكن أن يمرمطها ويجرها من شعرها ويهينها أمام أمها وأبيها لأنها كانت فقط واقفة مع ود الجيران والادهى أن الأم تبيح والأب يبيح، وفي الليل بعد الهدوء، يمطمط الأب شفتيه جزلاً ب(رجالة ) ابنه

ثم عكلت

Quote: ثم وتحدثي مرة أخرى عن المساواة أي مساواة مساواة الجرايداللي رئيس تحريرها رجل يلعن زوجته لو قميصه مش مكوي؟؟ ؟؟

والمعني يا عمر، أنا لست مع أو ضد
الموضوع ليس من له الأفضلية ومن أحسن من من ومقارنة، أنا فقط اتحدث عن الرجال - دور النسوان نجيه بعدين -
حتى موضوع مساواة المرأة مع الرجل، والله اعترف ان مثل هذه المواضيع تجيب لي حمى نفاس
أصلاً المرأة مستحيل تتساوى مع الرجل، الطبيعة والتكوين والهيئة والوظيفة التي خلق بها الله الاثنين مختلفة
واحذرك والسادة القراء ،، انا حاتفلسف
نظام الكون كله حيختل لو تساوت المرأة مع الرجل بالطريقة التي يطالب بها مثقفاتية العالم، لانه لو تساوت المرأة مع الرجل، فعليه يجب أن يتساوى كل الأضطداد، ولا أعني الأضطاد الضد، يعني محكمة وكده، ولكني اعني نظام الكون الرديكتيالي، ووحاة امي ما اعرف اكتبها تاني واللا اقولها،
العدل والظلم، الحلال والحرام، الصح والخطأ، ابليس والملايكة، العلم والجهل، الداء والدواء
هذا نظام كوني
يعني ليتساوى الرجل والمرأة ، لا بد أن يتساوى قطبي المغنطيس السالب والموجب
ويتساوى البعوض والقونجة
ويتساوى اليمين واليسار
والكلب والكديسة،، واللا الفار والكديسة؟؟؟؟!! ما عارفة
ده نظام كوني ان الله خلق مع كل شي شئ مكمل له وضده في الطبيعة،
مساواة الرجل والمرأة - مع احترامي للجميع- بالنسبة لي ترهات مثقافتية وجهل بين بطبيعةالكون
حقوق المرأة بالنسبة لي، التي اتحدث عنها، لا علاقة لها أبداً بكلام المثقفين
وصلي على رسول الله
حلاتي ...جننت سقراط في تربتو
ببساطة
فكوني من مسألة (الراجل والمرأة) من منظار المقارنة والمساواة

أنا عايزة اصل بنتيجة أن بدل الكلام الكتييييييييير في السياسة، والمغالطات الدينية، والتطلعات العربية، لماذا نهمل مسألة التربية؟؟
لماذا ليس همنا وشغلنا الشاغل في هذه المرحلة التربية؟؟

ويا وليد
لصقة امريكية بعيد عنك إلا تقول الرووووب (لوووووووووول)
عاين
لا
مش العدل
أنا بتكلم عن عملية ترميمية (خلينا من تجميلية لأنها كلمة غلط) تقوم بها النساء إرضاءً لرغبات الرجل
عملية بتر أعضاء، وشوف، زمان قبل فترة فتحنا موضوع الختان هنا،لو في ارشيف ممكن نرجع ليه،
إن شاء الله مانضطر نودي البوست لمنحى جديد مختلف، لكن حتى الختان ففيه فرعوني وفيه سني، يعني مش كله حرام وغلط وسيبك عزيزي من كلام المثقفاتية وما عايزة ادخل معاهم في جدل افلاطوني
ما اتحدث عنه شئ لا علاقة له بالختان، حتى اللي مش مختونة تعمله، ووالله مش عارفة إذا كان مقصود بها فلوسه، لكني اعرف أن المقصود بها عدم التفكير في الإناث البكر، يعني التعدد، اللي فاهمنه الرجال خطأ
ومرة تانية
نعم هي وأمها وخالتها ونسيبتها وكل الحريم حوالينها ما في واحدة لا تشجع
برضو لأن تربيتهم فيها خلل ما
التربية الذكورية التي نعيشها

ولو رفدوني
بجي بجوطها ليكم في رسينكم دي
ام الفلسفة زاتها ياخ

أخي بشير
والله لا كعوبية ولا سواد نية
لكن ما انتبهت لكلامك باقي البوست بقى ذي كراسات الإنشاء (اكتب ما لا يقل عن نص صفحة)
السطور البسيطة وقليلة تبقى لينا ذي نقطة وعلامة استفهام، نشوفها طشاش طشاش
و
يسلم وشك يا أخي
وكفى كلماتك الطيبات

يخليك

بت قضيم في عبوتها اليونانية الإغريقية :) :
ياخ تعرفي ممكن بعد كده حمور زيادة عااادي يجيب اسمك مع ناس قالوا عن المرأة ..
ما حا ارجع معاك حركة ورا وخلينا نمشي في اتجاه البوست وما ادراك ما التربية !!
طيب تعالي نتفق على شكل التربية المفروض يكون عامل كيف ويبدا من وين ؟
يعني من المدارس ولا من البيت ؟
وانتي ست العارفين انو التربية دي حاجة كده زي البصمة (احرق ابو البصمة الايام دي معذاااني عذاب في الرياض هنا ولحددي اسة ما بصمت ياخ بتعرفي ليك زول شغال في الجوازات ؟) ..التربية دي ما حاجة استنادرد ولااا بتقدري تفصليها على الناس لازم يكون في الزول الاتربا على العقد والزول البيحترم المرأة والزول القليل ادب والزول الكتير ادب ..
مهما نتكتب ونقدم من دراسة نموذجية لاسلوب التعايش بين الجنسين يظل العمل في ارض الواقع غير (كما جدة) تحكمه الظروف المحيطة والوضع اللحظي..
طيب يا بت قضيم انتي في معظم الاحيان شغالة تشخيص في المرض وفي كتير من الاحيان بتزوغي من الوصفة الطبية وشكلك كده عاملة ليك مستوصف زي حق ناذر الخليفة بتاع الكلاكلة داك !!!:)
مع اني بقيت اخاف اقول ليك بتزوغي دي لانو خاااايف من الكوتات الحا تجيبيها لي واطلع ما شوفتها دي..

سلام بت قضيم ..

مداخلة بالإيميل وصلتني من الأخ خالد غالي :

Quote: بت قضيم سلامات ... انا ماقادر اعرف لييه انتو متحاملين علي الرجل في ممارسات يمارسها المجتمع كلو وحتي المراة تمارسها يعني مثلا مسالة تسلط الرجل علي المراة دي حتي المراة موافقة عليها وبتساعد عليها لكن مع ذلك لما تجو في المنبر تتكلمو كانو الرجل مستعبد المراة وفارض عليها الوصاية .. يعني مثلا انت نفسك والكلام ليكم برضو يادكتورة نجاة وياعزاز لو الواحدة ولدها اتاخر لغاية الساعة 11 بالليل بيكون عادي مع اصحابو لكن الله يقدر الواحدة بتها اذان المغرب ياذن عليها برة البيت ودي حاجة موجودة في كل بيوتنا اسي يادكتورة نجاة لو بتك لغاية الساعة 8 بالليل ماجات مابتقومي الدنيا وتقعديها ؟؟ ومثل تاني الواحدة بتكون شغالة وزوجها برضو شغال وبيطلعو في نفس الزمن وبيجو في نفس الزمن لكن هي من تجي علي المطبخ عشان تسوي الغدا وهو بيكون استحمي ورقد في ضل العصر وخلف كراعو ودردم سفتو وانت تجيبي الغدا وقهوة العصر وتجي تتونسي معاهو .. لكن من تمشي المنبر تبدي تتكلمي عن الحقوقو والمفروض والمساواة .. السؤال هل المساواة دي حاجة تتقال في النت بس ولا المفروض تتنفز في الحياة وهل انتو مثتثنيين منها .. يعني لييه مابتطالبو بيها في بيوتكم لكن تشاكلو عشانها في النت .. طبعا الكلام ده بافتراض انو حاصل عندكم وانا ماعارف لكن معظم البيوت كده .. انا بفتكر الخلل في المجتمع كلو وفي نوع التربية القمنا عليها كلنا حريم ورجال يعني الرجال متسلطين حبة والحريم بيساعدوهم علي تسلطهم ... انا شخصيا رغم اني متفهم للمسالة شديد لكن مبسوط بي خدمة المراة لي عن كسل وليس عن اقتناع بي انو ده المفروض عليها ما حا اطالب ليها بي حقها لكن ما حا اقيف ضد مطالبتها بي حقها ابدا ختاما وماعايز اقول كلام قد يكون شخصي يابت قضيم .. لكن انا من المتابعين ليك شديد وكتير جدا سمعتك تتكلمي عن انو السبب الاساسي في انو مافي زول بيعرف بت قضيم دي ولد ولا مرة ولا شيطان وانو مافي زول شافها انو ده نزولا علي رغبة زوجك الحبيب ..فهل ده مابيعتبر نوع من وصاية في امر شخصي جدا ولا لاقت الوصاية دي هوي في نفسك واشبعت رغبة جواك ولا صدف انو دي برضو رغبتك ... ولا ده حاجة من ضمن ممتلكاتو وعلي كيفو فيها ولا دخل لك في الموضوع ( ده سؤال اختياري طبعا ) ختاما تحياتي ليكم وطبعا معجبين جدا بي كتاباتكم ومتابعنكم دايما خالد غالي

حمور قال شنو؟؟؟!!! (وش استفساري)
اشمر يعني واللا الموضوع ما يستحق
لووووووووول

ياعمر جميل جداً ما تقول
جداً
أحسن حاجة ،، اكتر حاجة تعجبني في النقاشات انها تنتهي
اعني يعني تنتهي على خير
ليس بالضرروة تقنعني، وليس بالضرروة اقنعك، وما شرط يوصل الموضوع لحساسة ، وما شرط نكون ضد
بنفس التفكير (الضدي) ده نقدر نتعايش
(لكم دينكم ولي دين)
وهذه من القواعد الدينية العظيمة اللي برضو مفهومة غلط
المهم
لو وصلنا لموضوع التربية فكده نص المشوار
يعني لما المريض يعرف انه مريض، بيكون نص العلاج، والنص التاني في نظري ليس الادوية أكثر من رغبة العلاج نفسها
تربيتنا الحالية كمرض سرطاني، ما بيوجع، ما بنعرف انه موجود، لكن عدم إحساسنا به لا ينفي وجوده ابداً
وكلامك مظبوط عن أن ما في شي استاندرد في التربية، لكن في شي اسمه (العلم) والتعلم وقبلها النية الصافية
يعني ما نفلط اولاد وننتظر لسن الأربعتاشر سنة، ونعتقد أن بالإمكانية تعديل السلوكيات بعد داك
يعني لما نجي نولد، نخطط، مش بس حياكلوا سيريلاك واللا كورن فليكس، نخطط حنقدر نربيهم واللا توشك حيدخلونا النار عدل بإهمالنانتعلم على الأقل ابسط الأمور
اشمعنى كوووووووولنا عايزين نبني بيوت في السودان وما بنفكر لحظة نبني بني آدم؟؟؟

وحاجيك في رد براه ياعمر وصدقني ممكن يجيك وجع راس وتستاء (من كلامي الكتير أولاً) لكن والله ما خسارة في ولد واللا بنت جبتهم انت في الحياة والله يسألك عنهم (كلكم راع وكلكم مسؤول عن رعيته)
ما عارفة ليه اتذكرت برنامج (خمسة لاسرتك فجأة)
ثم
داير تقنعني ان عندك إقامة وكده؟؟
سمح الكشات سوها لمنو؟؟؟
الوش ابو سنون داك

Quote: الضرب هذا موجود في كل لعالم ضدالنساء يعني ما الاسلام فقط البتضرب فيه المرأة ويتحسب دومستك ديسبيوت

شكرا جزيلا دكتورة نجاة
هذا ما اريد اثباته ان القران يقول اضربو
ناس تضرب بتشفي واخرون ضرب غير مبرح

انا لا هذا ولا ذاك لا اضرب المراة ولا الرجل



الضرب بتاع الاخرين انا ما عايز اتناوله هنا
لان الحديث حول ديننا فيه وصية بضرب المراة اذا في دين بهناك فيه ضرب للمراة


برضو يا ريت اعرف


اتوقف احتراما لصاحبة البوست واتابع


انا اري مفهوم الرجل لاستحقار المراة فيه درجة كبيرة من الوصايا والرؤية للمراة انها غير مكتمله العقل وهي ماعون تقضي فيه وطرك وتروح
لذا اري ان الحديث لا يخرج من الدين اطلاقا



اتابع واشوف واتمني ان نفتح بوست مثلما قالت بت قضيم
ويا ريت يا بت قضيم ل قدام تفتحي البوست ونجي نشارك او تفتحه دكتورة نجاة وبرضو نشارك


تحية طيبه للجميع

Quote: هذا ما اريد اثباته ان القران يقول اضربو ناس تضرب بتشفي واخرون ضرب غير مبرح انا لا هذا ولا ذاك لا اضرب المراة ولا الرجل

الاخ / Sabri Elshareef

لك كل الود

قوله تعالى‏:‏‏{‏وَاللاَّتِي تَخَافُونَ نُشُوزَهُنَّ فَعِظُوهُنَّ وَاهْجُرُوهُنَّ فِي الْمَضَاجِعِ وَاضْرِبُوهُنَّ‏}‏

في التفسير لهذه الآية التي ذكرت الضرب كحل اخير بعد الوعظ والهجر ينظر للسبب الاساسي الذي جلب الوعظ والهجر والضرب ، وهو النشوز من جانب المرأة ، هذا النشوز الذي يؤدي الي تفكيك الاسرة كاملة . وكلمة اضربوهن هنا رمزية ولا تعني ماذهب اليه فقهاء الحيض والنفاس من الايذاء الجسدي ، وقد ورد في القرآن الكريم كالتالي :

قال الله تعالى: (وَإِذْ قَتَلْتُمْ نَفْسًا فَادَّارَأْتُمْ فِيهَا وَاللهُ مُخْرِجٌ مَّا كُنْتُمْ تَكْتُمُونَ. فَقُلْنَا اضْرِبُوهُ بِبَعْضِهَا كَذَلِكَ يُحْيِي اللهُ الْمَوْتَى وَيُرِيكُمْ آيَاتِهِ لَعَلَّكُمْ تَعْقِلُونَ) (البقرة: 72-73)
المقصود لم الناس كلهم في حتة الحادث ، شان مافي زول يزوغ ، ويكون مضروب عليهم طوق كامل

والضرب في الارض بمعني السفر
وضرب موعد اي جعل موعد
ومضارب القبيلة اي حماها وحواها

ولكي تكون الصورة اوضح نأتي بكامل الآية :
(الرِّجَالُ قَوَّامُونَ عَلَى النِّسَاءِ بِمَا فَضَّلَ اللهُ بَعْضَهُمْ عَلَى بَعْضٍ وَبِمَا أَنْفَقُوا مِنْ أَمْوَالِهِمْ فَالصَّالِحَاتُ قَانِتَاتٌ حَافِظَاتٌ لِّلْغَيْبِ بِمَا حَفِظَ اللهُ وَاللاَّتِي تَخَافُونَ نُشُوزَهُنَّ فَعِظُوهُنَّ وَاهْجُرُوهُنَّ فِي الْمَضَاجِعِ وَاضْرِبُوهُنَّ فَإِنْ أَطَعْنَكُمْ فَلاَ تَبْغُوا عَلَيْهِنَّ سَبِيلاً إِنَّ اللهَ كَانَ عَلِيًّا كَبِيرًا) (النساء: 34).

فالصالحات الحافظات للغيب ديل مية مية ، لكن النسوان البجي منهن النشوز ديل كلموهن واوعظوهن واهجروهن في السراير لعلهن يرجعن وان لم يرجعن اضربوهن وكان سلكن بعد داك ماتعتدوا عليهن وماعندكم طريقة للاعتداء عليهن لنهن رجعن . يعني الوعظ والارشاد والهجر هو ضرب طوق من الاعذار حول هذه المرأة وانو نحن عملنا معاك كل الممكن .

بعد ده الاحاديث
( لايكرمهن الا كريم ولا يهينهن الا لئيم )
( ولايضرب احدكم امراته ثم يجامعها آخر النهار )
(سباب المؤمن فسوق وقتاله كفر )
( والمسلم من سلم المسلمون من لسانه ويده )
وآيات عدم الاعتداء كثيرة
بعدين القدوة الاعظم عليه السلام لم يضرب امراة في حياته ولا امير المؤمنين علي بن ابي طالب ؟
وفعل النبي الاعظم سنة يجب اتباعها .

صباحكم مختلف إن شاء الله
-------------------
شكراً يا ناذر لنقل الموضوع
أخي خالد
والله ليس تحامل، هي رؤى وآراء (ينفع عنوان برنامج لعمر الجزلي)
وأنا أدين كثيراً من تصرفات المرأة، لكني بفصل الكيمان، يعني هنا كما قلت بتكلم عن الرجل مشيرة للإناث بعض الشئ، بس لسة ما قصدتها هي بالذات
وطبعاً الأنثى تلعب دور كبير جداً جدا ًفي هذا الوضع
ولو قريت مشاركتي الأخيرة أمس أو قبل الأخيرة، تحدثت فيها عن رأي صريح ومباشر حول موضوع (المساواة) ولما تقراه حتعرف اني مش تبع الناس اللي بينادوا بمساواة وغيرها، أنا أنادي بالتربية والاخلاق الحميدة، لرجال أو نساء

ودكتورة نجاة وانا وغيرنا طبعاً حنزعل لو واحدة من البنات تأخرت بالليل، لأنه غلط،ولأنه المجتمع كده، ما هو ما ينفع نغير عاداتنا بدون تغيير المجتمع كله، أو نصبح نشاز وده برضو غلط

المفروض أن القاعدة نفسها تطبق على الولد، لازم يحدد وقت رجوع للمنزل –غلط تتأخر ، زيك زي أي نفر في البيت
وبما ان السيرة جات، فذكرتني برضو بتصرف رجالي غريب جداً أنه الزوج من حقه يتأخر في الحضور ويمشي أي مكان أي مكان ويا ويل المرأة وثبورها لو سألت (أنت كنت وين؟ أو ماشي وين؟)
السؤال ده بجيب الأرتكارية للرجل، لكن في المقابل، طبيعي جدا ًوعادي خالص لازم يعرف هي ماشة وين ومع مين كمان
لما تسأله هي، يعتبر تدخل منها في خصوصياته وتصرف أهوج تحكمة الغيرة والشك
لما يسأل هو، فهذا يعتبر رجولة وحماشة ويا قول عزاز هييييييع، حار وقلبو نار
و
هي النار ولعت بي قلبي بطفيها
لوووول
ليس بالضرروة أن أي حاجة تعملها المرأة هي خنوع واستسلام، المرأة نفسها مبرمجة على كده، تمت برمجتها على الحياةالذكورية والمجتمع الذكوري ده
وأنا قلت سابقاً

Quote: المشكلة كيف نعلم ومدارسنا كما أشرت لها، والجامعة تنقسم لقسمين، يا إسلامي متشدد، أو شيوعي منفصم وما بينهما خليط من أثنان، وأهل العلم – المفروض اهل العلم- في غيهم يمرحون، يا حلال يا حرام، لا وسطية مين حيربي يا صبري ويفهم ويدرس مظبوط؟؟؟ الأم؟؟ الأم لا تعرف أبسط حقوقها، وهي نفسها مش مربية صح تعاني من حالة انفصام في الشخصية

هسه تقولوا علي عكليتة بس أنا عايزة ااكد اني مقتنعة بكلامك أن المرأة نفسها جزء لا يتجزأ من المشكلة
وفعلاً، كواريكها نهاراً في العمل وفي الشارع عن المساواة، وعدم تطبيق هذه النظريات في المنزل، فأنا افسره أنه انفصام في الشخصية بعض الأحيان، وأحيان اخرى سوء ادراك تربوي (خلينا ما نقول سوء أدب) وأحيان أكثر تواكل،

مهامها الكثيرة ومسؤلياتها الكبيرة قد تجعلها ما ناقصة تفكر كمان في خروج الأبن وصعلكته طول الليل، خلاص، ما دام المجتمع يجيز فما المشكلة؟؟؟
وهي دي مشكلتي، ان الممنوعات عندنا يحددها كلام الناس ومدى قبول أو رفض المجتمع لها

Quote: انا بفتكر الخلل في المجتمع كلو وفي نوع التربية القمنا عليها كلنا حريم ورجال يعني الرجال متسلطين حبة والحريم بيساعدوهم علي تسلطهم ...

تماماً، الخطأ مشترك

Quote: ختاما وماعايز اقول كلام قد يكون شخصي يابت قضيم .. لكن انا من المتابعين ليك شديد وكتير جدا سمعتك تتكلمي عن انو السبب الاساسي في انو مافي زول بيعرف بت قضيم دي ولد ولا مرة ولا شيطان وانو مافي زول شافها انو ده نزولا علي رغبة زوجك الحبيب ..فهل ده مابيعتبر نوع من وصاية في امر شخصي جدا ولا لاقت الوصاية دي هوي في نفسك واشبعت رغبة جواك ولا صدف انو دي برضو رغبتك ... ولا ده حاجة من ضمن ممتلكاتو وعلي كيفو فيها ولا دخل لك في الموضوع ( ده سؤال اختياري طبعا

هي مرة أنا قلتها، مرة واااااحدة، ما تبالغ
وقلت أن من الأسباب إني ما اكتب باسمي الحقيقي احتراماً لرغبة محرمي، ما قلت زوجي، يا قول أساسي أنت مبرمج نفسك على فكرة الزوج دي، ما ممكن يكون أخوي!!!

والحقيقة لو عايز الحقيقة، أنا خايفة من الشهرة (لووووول) لا بجد، أنا متحفظة تجاه الموضوع ومحتفظة بخصوصيتي، يعني لما اجي مثلا ًانتقد تصرف واحدة في بيت بكاء مثلاً يعني، وتكون مشاركة معاي هنا حتزعل وممكن تقاطعني، لكن لو قرتني وهي ما عارفة انها هي المقصودة، فممكن أكون ساعدتها ولفت نظرها لحاجة كانت تايهة عنها وتحت تحت تعمل حسابها
اتحرر في الكلام يعني (في حدود المقبول بالطبع)
انا عايزة لما يقراني أحد (لو قراني أساساً) يلفتوا كلامي لا اسمي وصورتي يقوم يشرق ساي (لوووووووووول)
يعني قناعة وممكن تتغير مين عارف
ثم ان الغموض جميل (وش بغمز)
أنا بقى عايزة اسألك انت برضو سؤال (سخصي)، ليه ما تشارك في البورد؟؟
متاعب شهرة برضو؟؟؟
سلمت يا عادل وشكراً للمتابعة

استاذ صبري واستاذ وليد
لن افتي في الموضوع الشائك اللي بتتناقشوا فيه، لأني والحق لله ما متفقه فيه جداً ومن قال لا اعرف فقد افتى
هي فقط ملاحظة وسؤال
الملاحظة لأخي صبري
ليه مستغرب خالص في موضوع الضرب والضرب نفسه مشرع في أكثر من موضوع في الدين الإسلامي
كجلد السكران مثلاً
؟؟؟
وبدون تفقه في الدين، فالمنطق يقول أن ضرب النساء مش في الطالع والنازل كده مسموح، هذا للمرأة النشاز
يعني - بلاش امثال- بس نشاز
زي الرجل النشاز، برضو في بعض الأحكام يضرب
ما اعني اني لا اعتقد ان الموضوع يجب تناولة بسطحية، يعني الله قال اضربوهن قوم يا الراجل شيل صوتك وأقع فيها كع
هي مراحل طويلة لكي يصل لموضوع الضرب
ثم في ملاحظة تانية
مين يضرب؟؟
أي زوج؟؟ يعني زوج صايع سكران حيران (بهدلته رسمي) هل هذا رجل نقول عليه ممكن يضرب حرمته يأدبها؟؟
مش القاضي لكي ينال منصب القاضي عندو شروط معينة؟؟
أو إمام الجامع ليؤم الناس ويمارس الإمامة عندو شروط معينة اهمها أن يخلو من الشبهات؟؟
لا اعتقد أن تناول الموضوع يجب أن يتم بسطحية دون دراسة وتفكر
هذا شئ
الشئ الآآخر سؤل للأخ وليد
لا ادري ولكني من سياق حديثك احسست أنك صاحب دراسات دينية
وبدون ما (تبشتن) لي بوستي يا قول عمر الفاروق يبقى زي لحم الراس
الآية تقول
(الرِّجَالُ قَوَّامُونَ عَلَى النِّسَاءِ بِمَا فَضَّلَ اللهُ بَعْضَهُمْ عَلَى بَعْضٍ وَبِمَا أَنْفَقُوا مِنْ أَمْوَالِهِمْ)
قوامون بما انفقوا من اموالهم ، وانا بسأل بجد دون تهكم أو يعني سؤال شرك انا فعلاً عايزة افهم
هل يعني أن القوامة تنتهي بانتهاء انفاقه من أمواله عليها؟؟
سلمتم

Quote: (الرِّجَالُ قَوَّامُونَ عَلَى النِّسَاءِ بِمَا فَضَّلَ اللهُ بَعْضَهُمْ عَلَى بَعْضٍ وَبِمَا أَنْفَقُوا مِنْ أَمْوَالِهِمْ) قوامون بما انفقوا من اموالهم ، وانا بسأل بجد دون تهكم أو يعني سؤال شرك انا فعلاً عايزة افهم هل يعني أن القوامة تنتهي بانتهاء انفاقه من أمواله عليها؟؟

بت قضيم
لك كل الود
لكن دي بقيتي فيها بت (جضيم) عديل

الرجال قوامون على النساء كلمه حافظها كل راجل زى اسمو يقولها لما يتزنق فى الكلام مع الحريم ويعملها مراقة.
ولكن معظم الرجاله فاهمنها غلط على ان الرجل افضل من المرأه؟ ودينياً وتكليفيا هما متساويين
القوامه هنا معناها ان الرجل افضل من المرأه بالمسؤوليه اى انه مسؤول مسؤوليه اكبر من المرأه
وليس الافضليه فى الخلق او الاهميه .
الله تعالى قال فى سورة البقره "وقلنا يا أدم اسكن انت وزوجك الجنه وكلا منها رغدا حيث شئتما " نلاحظ ان الكلام بصيغه المثنى اى لادم وحواء وليس بصيغة المفرد اى لادم فقط
ولما جاء الكلام عن التحذيروالتكليف بالمسئوليه جاء الكلام بالمثنى ايضا فى قوله تعالى
"ولا تقربا هذه الشجره فتكونا من الظالمين"هنا الكلام ايضا بالمثنى
اما عن العقاب جاء الكلام بالمفردفى قوله تعالى "فتشقى " اى تشقى انت يا ادم وحدك ومن هنا كتب الشقاء على الرجل وتحمل مسئوليه واصبحت المرأه نفسها من ضمن مسئوليات الرجل
والجزء البتعلق بالانفاق ده سبقه جزء تاني محوره التفضيل ( فَضَّلَ اللهُ بَعْضَهُمْ عَلَى بَعْضٍ وَبِمَا ) ولعله التكوين الجسدي المعد لتحمل ماهو خارج اسوار البيت .واذا انفقت المراة ماديا بتبقي عليها الجزية بتاعة التفضيل في المسؤوليات .

لا اعتماد على مدرسة في مسألة التربية

ورغم أن الوزارة الخاصة بالتعليم قدمت مسمى التربية على التعليم (وزارة التربية والتعليم)،إلا أن التربية نفسها كمنهج تعليمي ليست ناقصة أو معوجة هي أصلا مش موجودة ،، معدومة.
لا يوجد منهج تربوي في المدارس
أنا في نيتي (من ضمن الأماني المستحيلة التي اعيشها)، أن ادير مدرسة، أبني مدرسة، أشرف على مدرسة، أي صيغة تكفل لي حق التحكم في مدرسة (ولا يفوتكم تطلعات الثروة وكده:):):)
ولكي اكون عملية، حافصل بين فكرين
المنهج التعليمي
ونظام التعليم

ضمن تغيراتي في نظام التعليم مثلاً، حاغير موعد الحضور صباحاًً
يعني قبل خغجمية عام، لما عملوا مدارس، وشرعوا أن المدرسة يبدأ دوامها الساعة السابعة صباحاً، وما زالت المدرسة دوامها الساعة السابعة صباحاً، لم يتفكر أي واحد في سلك التعليم حالياً، أن النظام لما وضع، لم يكن هناك تلفزيون به البرامج الحالية، لم يكن هناك دش وقنوات تلفزيونية بثها لا يتوقف على مدار الأربعة وعشرين ساعة، ما كان في أتاري، ولا إنترنت، ولا كل وسائل الميديا والملتي ميديا الموجودة حالياً.
نظام الحياة اختلف فلماذا نظام المدارس لا يجاري نظام الحياة ويختلف معها
؟؟!!
الحصتين الأوائل ديل كل الطلبة نايمين، بل المدرسين نفسهم نايمين، هم صاحين ما نبالغ، لكن كم الإدراك المخي العقلي اللي ممكن يستوعبه الطالب في الفصل تقريباً صفر، عقله أساسا ًمجهد من الاتاري والتلفزيون، ضوضاء الأثنان معاً بيعمل عمايله بالليل الله ما يورينا
طيب لو جربنا مثلا ًحرمان الطفل من الأتاري، سيعاني الأب من إحساس طفله بال(دونية) والاختلاف عن زملائه وأقاربه في العيلة (أنتوا ما عندكم اتاري يبقى انتوا متخلفين أو مستواكم المادي متدني)
يعني حتأثر في الولد اجتماعياً
المهم لازم تدبر حالك تجيب الأتاري :):)
المهم أن إحساسه المرهق المتوتر لا يمكن أن يجعله ذو عقل صحي سليم لاستيعاب أي درس، أي درس
صح، يجب على الأطفال أن يناموا باكراً، هذا علمياً سليم، لكن تطبيقه وفقاً لظروف الحياة الحالية (والمسلسلات التركية) يكاد يكون مستحيل
يبقى نظام الدوامات في المدارس لازم يتغير

نظام الدرس والتزام مقعد محدد والتقيد بالصمت المطلق، نظام عتيد، عقلياً لا يستطيع عقل الطفل استيعابه لأن نسبة الضوضاء التي يعيشها في الشارع مع صمت مطلق في الفصل تحدث نوع من الارتباك (دي نظرية قطعتها من راسي براي هسه دي::))
فعلاً
الجلسة نفسها وشكل الفصل وطريقة آداء المعلم لا بد أن تتحول وتتغير وفقاً لمتطلبات العصر

في تجربة رائدة في بعض الدول العربية تجربة (التعلم التفاعلي)، تطبق في مراحل الاختصاص، نظام الحلقات الدراسية ومثلاً، ليتعلم الطفل الجمع والطرح، فاربط له عملية الجمع والطرح بعمليةحياتية يعيشها
ببساطة علمه كيف يتعامل مع سيد الدكان والنقود
ببساطة بدون تعقيد حيتعلم الجمع والطرح أفضل من الطريقة الروتينية التي يتبعها المعلمون حالياً
وهكذا قس
كل أسلوب ونظام التعليم يجب أن يتغير وفقاً لمتطلبات العصر ووفقاً للمفاهيم الجديدة التي يدركها الطفل حالياً

نجي للمناهج

العزيزة قضيم ..
استمتعت بالقراءة لك واظنها للمرة الاولى ..
اتشرفنا ياخ ازيك .. ( رغم تاريخ اشتراكك القديم ) .

ما حاسه وانا بقرا ليك برغبة فى التداخل
ما حوجتينى .. لكن خلينى اعمل مراجعات مع بعض
المداخلات ..
العزيزة امانى

Quote: هل تعتبرون أن مشاركة نساء البورد معكم في النقاش في أمور المنبر أسقطت عنّهن الحياء؟أو غيرت معايير الأدب المعروفه؟

يعنى انتى ما مع تغيير هذه المعايير المعروفة ..؟
معايير الادب المعروفة هى خلاصة ما توصل اليه المجتمع المتخلف
والذهنية الذكورية السايدة .. الحياء بمواصفاتو المعروفه برضو
وهمة كبيرة ... اذ كيف يمكننا الاحتفاظ بالكيكة واكلها معا ؟؟؟
عايزين نجيب مفاهيم جديدة فى نفس الاواعى القديمة ؟؟؟
ندعو للتجديد ومحتفظين بالاطر القديمة المكركبه؟؟؟

التجديد - اذا ارتضيناهو - يهدم الاسس القديمة كاملة
وينبنى على اسس جديدة تستوعب كل ما طرا على كافة الاصعدة

لا يستقيم ان تنادى النساء بحقهن غير المشروط فى العمل
فى القانون ... ويولولن اذا ما اسقطت مواد الانفاق عليهن!
التى يلزم بها الذكور من اقاربهن فى سلسلة ما يسمى .. بولاية
الاقربون ...
حق العمل ترررررررررم مقابل اسقاط واجب الانفاق !!

فلنفرز بين المساواة فى الحقوق والواجبات وبين المساواة
فى الجسد والقدرات .. عشان ما تطبظوا
وبرضو الكلام عن اقرار مبدا الحق نفسه ... مختلف عن الكلام فى تطبيقاتو ..
القدرة الجسدية دى حاجة تانية .... خالص
.. فى رجال كتار ما بقدرو يشيلو الطش .. وفى رجال
ما بقدرو على العمل فى المناجم عشان امراض الضغط والسكر والقلب
وهو يا قول نوال :: السكرى دا خلى لى راجل ؟؟؟
لو فى زول عنكب فى كلامى الفووق داك بجيهو ..

Quote: ما اعني اني لا اعتقد ان الموضوع يجب تناولة بسطحية، يعني الله قال اضربوهن قوم يا الراجل شيل صوتك وأقع فيها كع هي مراحل طويلة لكي يصل لموضوع الضرب

بت قضيم ووليد

الاجابة لكما الاثنان




انا ضد الضرب مطلقا للمراة ولا اقبله للرجل

بل اعتبره عقوبة مهينة جدا

مثلما انني ضد قتل الكافر لارغامه علي الايمان ولا افعل ذلك

ووقفت ضدها في تاليب الجبهة لقتال مشركي الجنوب او النصاري

ولا اقاتل اليهود


وهنا ابطال ضرب المراة مهم لان تقدير حالة النشوز من عدمها ليس مسئؤلية تعطي الضرب

من تقبل او يقبل بالضرب دي حالة متاخره


انا لو رايت رجلا يضرب امراة وهو ضربها بعد ان هجرها في المضاجع او نشزت او غيره ان كان في دولة محترمه ابلغ عنه البوليس فورا


من لم يستطع العيش مع امراة ناشز فاليفارقها باحسان
ويذهب لاخري غير ناشز

ايه لزومو الضرب والتاديب


التزمت بعدم الكتابة احتراما لبوست بت قضيم
لاني اعرف ان تاثير الدين في مفاهيم احترام المراة لا يمكن ان نتحدث بخلاف ان نتعرض له



ايات واحاديث وتراث يساهم في وضع العقل الذكوري في هذا المنحني



تحية طيبه

يا صبري اخد راحتك انا ما قصدت حاجة البوست بوستيك
كل ما اقصده التركيز حول النقاط التي طرحتهافي بوست منفصل لاهميتها وليس لاني عايزة أحدد البوست بمواضيع معينة

بصراحة بصراحة
تعليقك التالي

Quote: من لم يستطع العيش مع امراة ناشز فاليفارقها باحسان ويذهب لاخري غير ناشز ايه لزومو الضرب والتاديب

لف لي راسي، واصلاً هو راس ملفوف مقودس خلقة
يجازي محنك يا ده
يا دوب استعدلنا الدرب خاتي لينا الحجار مالك

لا تعليق

الشرف لنا يا دينا
سلمتي

انا قديمة في البورد على رأيهم (الروادالآوائل)
بس ما عجوزة يا هناية
شكراً للمساهمة القيمة
ولا اخفيك بجد وأمانة أنا ماكلة الصباح فول، وفعلاً أنا متنحة
الحقيقة كلامك يحتاج تفكير ووقفة
هل نهد ما سبق لنبني، أم نلغي ما طرأ على ما سبق وناخد من القيم القديمة أحسنها وأفضلها ونواصل؟؟

يعني ألا تعتقدي أن التغييرات الإجتماعية الحاصلة مؤخراً، والقيم المادية التي طغت على المجتمع وأصبحت هي مقاييسه، الا تعتقدي أنها غيرت في أخلاقيات الناس فعلاً وأن الناس زمان ما كانت كده؟؟
ما عارفة كلامك محتاج تفكير فعلاً
وجاء في كلامك

Quote: فلنفرز بين المساواة فى الحقوق والواجبات وبين المساواة فى الجسد والقدرات ..

ما فهمت الجزء ده والحق يقال
لو فضيتي لينا وضحي شوية إن أمكن
على فكرة
لافت نظري اليومين ديل تمكن نساء البورد الداخلات حديثا ًمن ناصية الكلام
سماحة وفهم وكلام واعي وعميق والأحلى أنه مكتوب بطريقة متحضرة وراقية
ما شاء الله
وده ما موضوعنا بس الكلام جاب الكلام

الف شكر يا دينا ويخليك يا رب

كنت عايزة اخرمج في موضوع خاص بالمناهج وغيرها علشان أصل لنتيجة أني لازم اعمل مدرسة براي
ولانه ما حيقبلوا خريجيها في الجامعات يبقى لازم اعمل جامعة كمان
ولأن ما حيكون في حد حيطمئن يجيب أولاده بالساهل كده يدرسوا عندي فحاكون مضطرة اني اشوف لي طلبة
الموضوع طلع مخستك وما هين

عمر معليش انا ما انتهيت من موضوع التربية
ما زوغة
بجيك صادة

بت قضيم:
اول شي ماخلتي دي لو اتحشرت بين البوستات فهو لخلل في جهاز الكمبيوتر ..
تاني شي ادناه ما كتبتيه كجزء من تعليق للاخت دينا خالد

Quote: لافت نظري اليومين ديل تمكن نساء البورد الداخلات حديثا ًمن ناصية الكلام سماحة وفهم وكلام واعي وعميق والأحلى أنه مكتوب بطريقة متحضرة وراقية ما شاء الله

غايتو انا شخصيا معااااك في فهمها ووعيها كواحدة شملتيها مع بنات البورد ..الا يا اختي اللي تحتو خط النصييييحة ما قدرت ابلعو ومااا ظنيتو ينطبق عليها ..
عليه يا اخت دينا لا اتوقع ان بوست اساسي يشملك ومقولة بت قضيم لا تشملك ..
ركزي في موضوع الكلام الواعي وعميق ده وامسكي فيهو قوووي..
:)

تخريمة :
الصراااااحة يا بت قضيم انا الماكل فطائر غلبني افهمو خليك انتي الماكلا فول..

بت قضيم :
امبارح والله اتزكرتك ..بس اوووعك تضحكي فيني سمح ؟
امبارح وانا مشغل ال إف أم FM إذاعة القران الكريم (ياخ مش قلت ليك ما تضحكي فيني؟) ااااي والله القران الكريم ..اي نعم مرة مرة كده بديها ليك كوز نانسي عجرم من البانوراما وبسييييتة كده من اريام في إذاعة هواها خليجي فمات تضغطي علي شديد سمح ؟
اها جابو ليك الدكتور محمد العريفي بيتكلم عن اصول التربية ..يا سلاااااااااااااااااااااااااااااااااام شوفتي نففففففس كلامك الاسة ده وسبحان الله استدل بي الاتاري والبلايستيشن .
ياخ ده مش زول شيخ وزول دين إيه رايك قال كلام غريب جدا ..قال ليهم ولدك ممكن يجيك ويقول ليك الليلة شاهدت لي فيلم اباحي !! قال الاب طوااالي يقوم يهيج في ولدو ويقول ليهو الليلة موووتك سجمك بكتتتتتتتلك (طبعا بي السعودي وكده) فقال لالالالالا ده غلط اوووعك تسوي كده لأنو تاني ولدك ده مستحييل يكلمك بي حاجة حا يمشي يحضر ويقول ياخ الشايب ده انا كلمتو الكرة الفاتت عمل لي ديسكو وهيلمانة وكوراك وبكتلك وتاني ما بديك مصروف المدرسة وانت وانت وانت ..فانقطع حبل التواصل بينك وبين ولدك فلا هو بطل حضور الافلام ولا انت بقيت قادر تتواصل معاهو ..
والله يا بت قضيم اتمنيييت تكوني سمعتي اللقاء ده لانو كان حاجة لطييفة وبيتكلم زييي كلامك ده ياخ انا اسة لمممن جاني احساس انو ممكن عااادي تكوني واحدة من نسوان قناة إقرأ والرسالة ديلك ونحن ما عارفينك :)

Quote: في تجربة رائدة في بعض الدول العربية تجربة (التعلم التفاعلي)، تطبق في مراحل الاختصاص، نظام الحلقات الدراسية ومثلاً، ليتعلم الطفل الجمع والطرح، فاربط له عملية الجمع والطرح بعمليةحياتية يعيشها ببساطة علمه كيف يتعامل مع سيد الدكان والنقود ببساطة بدون تعقيد حيتعلم الجمع والطرح أفضل من الطريقة الروتينية التي يتبعها المعلمون حالياً

قالوا البت ابوها تاااجر قام الأستاذ سألا قال ليها يا 10 في 10 بي كم ؟؟ قالت ليهو بي عشرييين يا استاذ!!!
الاستاذ جاااط فيها وقال ليها انتي بتلعبي مش؟؟ امممشي نادي لي ولي امرك ..
البت مشت وحكت لي ابوها قام ابوها جاااط فيها وقال ليها يا بليدة بي ميييية مييية امممشي قولي ليهو عشرة في عشرة بي مييية !!!
قالت ليهو : هيي لكن يا ابوي هو انا قلت ليهو بي عشرين ما رضا معقول يرضا بي مية ؟؟؟؟
:)

اها شوفتي دي ثقافة استخدام النقود وربط الفهم بي حاجات يعيشا وعايشا :)
تخريمة :
مداخلة فقط لتلطيف الاجواء البوستية لا تحسب في باب الجدييية سمح؟ وبجيك ان شاء الله

العزيزة بت قضيم،
تحياتي وشكري على جهدك المبذول هنا...
حول موضوع المدرسة والتربية والتعليم، حسيت أنك لازم تحضري الفيديو ده
Ken Robinson says schools kill creativity
http://www.ted.com/talks/ken_robinson_says_schools_kill_creativity.html

تحياتي
أنور

أماني معليش، ما راح شي هسه واصلي
وحاخليك انت ودينا كملوا نقاش ما اقطعكم
التعليق بعد الفاصل
خلصوا وانا معاكم اعلق بعدين

لسة في كلام تربية كتييييييييير حاقوله
الله يعينكم بس

مساء الخير
والله ياعمر أنا مزنوقة زنقة عدوك
قاعدة تماماُ كما كيس الجوافة،،، وربما كيس الجوافة احسن مني فيه فيتامين،قول رجل ترابيزة كده
جغجمية بوم، طالعين الدورة ماشين الدورة شيلي الكتب خت الكتب
الله يسألني مافاهمة من الكلام الهنا غير الأسم الرباعي
قلت نضيع وقت شكلها خربانة خربانة
وبعدين( الطيش الطيش عندالله بعيش) ده مش تمجيد للبلادة بالله
المهم يا عمر
بركةالما قلت اني الدكتور زاتو
وبعدين يعني ما عندي مانع اكون مذيعة ،، الجزيرة مااااا بطالة معاي، ناس اقرأ ديل مراحل دينية صعبة علينا كده
واطل على الجمهور كده،، ووووشت الف يمين الشعر يطير هناك
يا سلااااام
أحسن من كيس الجوافة بمراحل وأفضل من رجل الترابيزة كثيرون
و يا عمر قالوا شيطان ندل عزم أصحابه الشياطين وقفلهم في أوضة وشغل ليهم سورة البقرة
قرررررقررررقرررر
لا تعليق على سماعكم القناة هداكم الله وأصلح بالكم
المهم
أيوه دي من الحاجات اللي دايماً بقولها، ما تحرم نفسك فرصة سماع ولدك وما تجبره أنك كمان انه يكذب عليك
يعني تكون عارف ولدك غلط في حاجة تجيبه تنهرزه (اللعب في الريموت ده منو؟؟)
غالباالولد حيكذب
انت قول ليه ببساطة (ماتلعب بالريموت تاني علشان كده وكده وكده)
احترم انسانيته وأشرح ليه
يعني ربنا ما بلوم انسان ما عارف الصح من الغلط وده سبب نزول الأحكام ووجود الأنبياء
الطفل لو فهم لماذا (لأ) أو لماذا (الخطأ) خطأ تقدر بعدها تلومه لو عمله تاني، وعاقبه طوالي ما دام مقتنع انه عمل الغلط ده، لزومه شنو الاستجواب الإرهابي
شوف انا ما حافكك لكن في ولية قاعدة تبرطم جنبي هنا مضايقاني جدا ما قادرة اركز غير الفول بعيد عنك قلب معاي جوع

دائماً ما افكر في المناهج الغريبةالتي وضعوها ذي أحكام منزلة وما عايزين يغيروها أبداً
في مدرستي (في سقط لقط) حالغي معظم ما جاء في المناهج وحابتدع مناهج جديدة
حاقنن مادة الرياضيات مثلاً، يعني أعلم الطفل ما يحتاجه في حياته للتعامل فقط
يعني ما في أي داعي لحساب المثلثات إطلاقاًلأنه ماحيفيده في اي حاجة
مهارة الرسم بالمثلثات والحاجات دي ممكن يتعلمها في أي مادة فنية أخرى
مثلاً
حاقص نص مادة العلوم، حادخل بدلها مادة اسمها صحةالبدن والبيئة
مادة العلوم لازم تكون نظرية عملية، يعني بدل ما اقول ليهم (غسل اليدين قبل الاكل وبعده) ،اضع علامات على غسل اليدين قبل فسحة الفطور وعلامات لغسل اليدين بعد الفطور
قص الاظافر لن أضعه ضمن المواظبة كما يحدث الآن ، بل حافرضه عليهم في مادة صحة البدن والبيئة
مقولات مثل قص الأظافر واجب لأن الأظافر مسكن الشياطين، مقولات مثل هذه يجب أن تمنع، ليس لأنها صحيحة أو خطأ، بل لأن الطفل المولود في ثقافة الأتاري والإنترنت، صعب يتخيل شيطان يسكن في المكان الضيق ده وهو ممكن يسكن في قصور مثلاً

اما العربي وما أدراك ما العربي
والدين وما ادراك ما الدين، فتقريبا ًتقريبا ًحاقص المناهج قص
في حاجات ذي (الاستنجاء والاستجمار) دي تدخل في منهجي ضمن منهج مبتدع اسمه (التاريخ الديني)، لأن طفل التواليت والسايفون والبامبرز والله اعلم في المستقبل حيكون شنو، صعب يفهم موصوع الحجارة ده

نعم هي معلومات صحيحة لكنها لا توافق الفهم العصري الحالي،لا نمنعها ولا ننساها بس كمان نضعها في إطار عصري شوية

نفسي يكون في منهج يعلم (الإيمان) نفسه كمعنى وحس، القصص الإيماني العميق، حب الله،
طبعاً لازم يتعلموا الصلاة، بس بالمنطق لازم يعرفوا ليه يصلوا؟؟
(حكمة المشروعية) الموجودة حالياً في المناهج غير مفهومة للجيل الحالي ، (ولا الجيل السابق)
واقول ليك ببساطة أن اغلب الجيل يتعامل مع موضوع الصلاة بالذات انه (هم على القلب وعقاب من الوالدين)
حادخل منهج (الإعجاز القرآني والسني) واربطه بصورة ما بالصلاة والوضوء والزكاة وغيره
ما حيكون عندي اسلوب ترهيبي أبداً
ونعم
حادخل منهج اسمه (علم الطاقة) ، علشان لما تجي واحدة رعديدة مثلي تسأل المعلمة (لماذا يعني في الغسل اغسل اليمين قبل الشمال وما الفرق بين الحمام والغسل والوضوء، وما معنى اغتسل بالصابون اكون نضييييفة وبرضو اتوضأ، تقدر تجاوب عليا بمنهج علمي تسكت جني الفي راسي ده ولا تتهمني في اتجاهاتي اليسارية اللي هي نفسها لفتت نظري ليها وخلتني اقعد ابحت وراها)

طبعاالمناهج دي حتكون مقسمة بصورة مدروسة على المراحل التعليمية أو المراحل السنية ًمش كده اي كلام
لكني بركز على الابتدائي لان الابتدائي أساس البناء جميعه ولازم ندقق فيه

مادة التاريخ حالغي كل التواريخ
يعني مذذا يهم طفل بالله تاريخ موت المهدي المفروض يعرف انه مات نعم لكن متين صعب، خصوصا ًأنه التاريخ الحالي دخل في الألفينات فصعب استيعاب تاريخ الألف وثمانمائة دي

حادخل مادة (معرفةالطرق والوصول إليها)، علشان ما اتوه
حالغي مادة الجغرافيا إذ ليس من المفهوم بالنسبة لي علاقتي بين اقليم السافانا وكونه حار جاف صيفاً دافئ ممطر شتاء
انا مالي؟؟ ثم واشمعنى السافانا لماذا ليس القطب الجنوبي مثلاً؟؟؟
حاخلي الأساسيات البسيطة فقط

حادخل مادة جديدة اسمها (الثقافةالجنسية) و(النظافة الجنسية) ودي حاتكلم عنها باستفاضة لاحقاً
حادخل مادة اسمها (التأهيل النفسي والجسدي للزواج) يعني الاسم قاطعاه من راسي لكن المدلول هو المهم
حاعلم الطالبة مثلاً كيف يجب أن تتعامل مع ال(نسيبة)
لن اتركها لتجارب أمها وخالاتها الناقصة المقصورة المبنية على تجارب ذاتية مكررة مقولبة في قالب (النسب كله زفت)
أو التجارب الجنيسة اللي ما زالت تفهم البنت أن (التزمت الجنسي) مع الزوج مدعاة للفخر ورمزا للعفة والطهارة
ويقولوا الرجال عينهم زايغة مالها

حاعمل ورش صيانة للشباب واختياري للشابات (سباكة، نجارة، بوهية، بناء... الخ) مش تخصص لكن على الأقل لما تضرب ماسورة في البيت الولد يعرف يظبطها براه، ما يحتاج عامل إلا في الشدة والضرورة القصوى
المواد الاخيرة دي في الثانوية

وبقية التخصصات اختياري
واحد بميل للرياضيات ، اديه مناهج رياضيات
واحد رياضي، اديه مواد سبورت
واحد بحب الفنون يمشي يدرس فنون
واحد عنده موهبة لغات اعلمه إن شاء الله ياباني (اول لغة في العالم حالياً)
واحد بحب الدين واتجاهه ديني احفظه قران واهيئه لدراسات إسلامية
يعني كل واحد يتهيأ للقسم والتخصص اللي من المفترض يدرسه في الجامعة

ثلاثة ارباع المواد التي ندرسها حالياً لا علاقة لها بالتعليم الجامعي لا من قريب ولا من بعيد
ببساطة حآخذ من النظام الامريكي (لانه فعال فعلاً) وشوية من البريطاني (في الربط والزبط) وشوية من العربي (في اللت والعجن) لووووول
والباقي اقطعه من راسي

واني لاعترف بدون ضغط
انا نعسانة وزهجانة شديد وفي هذه الحالة يجب اعتباري (غبيانة ما واعية) والغبيان في ذمة الما غبيان يا جماعة
سامحونا على اللت
بجي

شكراً يا انور
حاراجع الرابط واعلق بعدها
يخليك يا رب

وبعدين السماحة حاصلة
غايتو الناس الشينة حاقدة حقد

بت قضيم :
ياخ والله غالبني اكتب ليك حنك الفاضلة والعزيزة واختنا الطقم ده مااا لايق عليك صدقي؟ :)
افترض يا بت قضيم إنك عايزة تبني المدينة الفاضلة في أسس التربية وعايزة الحياة تمشي بي نموذجية منقطعة النظير !!! وده زاااتو مشكلة مش؟
يعني الحياة دي ما اظن بتكون حياة لو مشت بي الصورة الانتي راسماها دي !!!
يعني لو طبقتي منهجك ده فكلللللل الناس حا تكون سواسيا ودي حاجة مستحيلة ..
نحن لييي دايما بنفترض إنو الناس مفروض تكون كاملة؟؟ ما تغلط ما تسرق ما تزني ما ما ما ما ..
ليي عايزين كللل الناس تكون زي بعض وبي الحاجة البنفترضها نحن ؟؟؟
حا اختلف معاك في حتة بسيطة شديد وحا اقول ليك إنو إنتي شاااايفة الفوق ده هو الانسب كأساس للتربية غيرك ممكن يكون عندو تصور منافي ومخالف تمااااااما لي مفهومك ده !!
طالما بقاالقانون او النظام ده وضعي تم وضعه بواسطة شخص او اشخاص ففي الغالب اذا ما اكيد بيكون التفكير في الاساس مبني على ما يريده الاشخاص ديل ..
في وضعك لي منهج التربية ده ساويتي بين كلللل الطلاب في المستوى العقلي والتفكيري (ما عدا في جانب الهوايات) لي كللل طلابك واتخيلتي انهم كلللهم حا يستوعبو الطقم التربوي بتاعك ده ..
بالمناسبة اعتقد والله اعلم إنك في مداخلتك الاخيرة دي ركزتي على جانب التعليم وليس التربية بافتراض إنك خصصتي معظم المادخلة لتفصيل المناهج العلمية والمواد ومحتوياتها ..
عايز اقول ليك حاجة يا بت قضيم وجاااادي فيها شديد والله شديييييييييييييييد وعايزك تردي فيها بي كل صراحة هل حا تطبقي منهج التربوي التعليمي ده على ولدك بي حذافيره؟؟؟
ما بكضب عليك جني وجن الاسئلة بتاعت خت نفسك محلي !!ولو انت الحصل ليك الحاجة دي بتقدر ؟ لكن فعلا فعلا اعتقد نو عشان تقنعي الناس بي منهجك ده فانتي محتاجة لي بيان بي العمل للناس ..
صعب جداً إنك تقدم الناس التانيين فئران تجارب لي سيستم متكامل في التربية وتقول كدي النشوف الاوت بوت حا يكون شنو ..
الأخطر إنو الأوت بوت حقك ده نتيجتو بتطلع اقل شي بعد 18 سنة لتأكيد نجاحو ..
يلا هل بت قضيم على استعداد إنها ما تودي ولدا المدرسة التقليدية دي وتقعدو في بطن البيت ده وتقريهو منهجها اللي هي مقتنعة بيهو ده ؟؟؟
مع إنو انسسسسسسب حتة ممكن تقنعي بيها الناس بي نظريتك دي هو بيتك لكن حا تلقي انو صعععب صعععب تغردي خارج اسرب وتجازفي بي ولدك في الحاجة اللي زي دي فاكيد حا تخوضي مع الخايضين ..
المحور الأهم واللي اتوقع إنو أجلتيهو اكتر من مرة لانو بتكوني حاسة إنو عندك فيهو كلام كتيييير هو الثقافة الجنسية اللي فعلا بتأرق كثييير من اولياء الامور وفعلا فعلا فعلا تفتقر فيها مناهجنا للتطوير وشغالين فيها بي نظام الغتغتة والمواراة فمنذ ان وعينا في الدنيا فمادة الاحياء الباب الثالث إسمو التكاثر يرسمو فيهو الجهاز التناسلي للمرأة على شاكلة الغوريللا ليأتيك في الإمتحان سمي الاشكال المرقمة في الرسم 1- 2- 3- 4- 5- لينتقل لعلامات البلوغ ومنها تخن الصوت عند الرجل ونعومته عند الأنثى مع نمو شعر الإبطين ..(ياخ الزول السماهم إبطين ده اتوفق في الاسم إسم لطيف) ومع ذلك وكالعادة عولقوهو السودانيين وسموهو الأباااط ..
منهج يرسم ليك المرا زييها زي الجدادة تبييض وتلد وزي ما ثال المسطور لمن سألوهو الثعلب بيلد ولا بيبييض قال ليهم والله الثعلب ده مكار تتوقع منو أي شي !! فكذلك المرا يبدو انها مكارة تبييض وتلد ..
الاغرب إنو في مناهجنا دي بيهتمو بي تكاثر الأزهار والتكاثر الخضري اكتر من تكاثر البني ادمين الزهرة دي ما يخلو ليك في ها ميسم ولا حبة لقاح لا تاج ..
حصة العلوم يتكهرب فيها الجو تمااااما والعجب لو كنتو طلاب تالتة ثانوي وبتقروا مختلطين في معهد !!! الأستاذ عرقان البنات سرحانات طلاب كنبة ورا يدعون الشفتنة وقلة الادب وهمهمات وضحكات لمجرد سماع كلمة او وصف في الجهاز التناسلي ..

تخريمة :

Quote: انا نعسانة وزهجانة شديد وفي هذه الحالة يجب اعتباري (غبيانة ما واعية)

من غير زهج ونعاس ما محتاجة يا ختي..:)

بالرغم من مشاركتى فى بداية هذا البوست الا وان ما جاء ادناه وصلنى بالايميل وودت المشاركة بها هنا بعد اذن صاحبة البوست


لاحظوا بأن الجنة مؤنث
والجحيم مذكر

وأن الابتسامة والسعادة مؤنث
والحزن مذكر

الصحة مؤنث
والمرض مذكر

والحياة مؤنث
والموت مذكر



والمودة والرحمة مؤنث
والحقد والحسد والغضب مذكر

وأن الاجازة والراحة والمتعة مؤنث
وأن الدوام والعمل والقرف والتعب مذكر

فاعلم أن ((الأنــــــــــاث)) سر جمال هذا الكون



فهمتو يا نكــــــــــــد

حتى النكد مذكر

من خالد غالي :

Quote: بت قضيم حابدا ليك من اخر كلامك انا مابشارك في البورد لاني ببساطة ماعندي ( باس بورد ) باس ويرد قصدي وهنا اتفتق زهني عن فكرة المعية وهي ليييه مايكون في باس ويردات احتياطي كده خاتنهم عشان لما واحد من القراء كبدو تنهري من بوست معين يقومو يسلفوهو باس ويرد يتفشي بيهو شوية وبعدين يرجعو شاكرا حامدا ( لوووووووول) او ايه رايك تقاسميني في باس ويردك وانا اكتب حبة وانت تكتبي حبة .. ومردودة ليك في الافراح ان شاء الله .. والحقيقة انا فعلا كبدي مهرية من طريقة جندريات البورد ديل مثلا عزاز في بوست مجاور جابت منبرها الخاص ونصبتو في البوست وقعدت الرجال ( القرفصا ) وخطبيت فيهم .. يالفعلتو يالتركتو يالسويتو ... بعض الرجال في الخلف غاضبين يتزمرون بصوت منخفض علي استحياء واخرين في الوسط صامتين ولا ادري ماذا يدور بخلدهم .. لعلهم ليسو غاضبين ... لعلهم لايهتمون ... ورجال في المقدمة يرددون بصوت واحد آمييين آمييين ... وبعد ان يستنفز البوست اغراضه وتقول كل الفي بطنها تقول ليهم قومو الي قلة ادبكم يلعنكم الله ... ( الفكرة دي معنوية بحتة او هكذا تراءت لي للضمان يعني ) . وانا بكتب في الكلام ده خطرت بي بالي فكرة المعية ثانية وعايز رايك فيها ... من خلال متابعتك لي عزاز ( مثلا ) لو جبنا العصا السحرية وحولناها لي رجل .. ايه رايك هل حاتكون رجل متزن في رايو تجاه الجنس الاخر ؟؟ ام ستكون رجل متعصب لزكورتو ؟؟؟ ام ستكون رجل مدافع عن حقوقو النساء ؟؟؟ ... انا غايتو افتكر انها حاتكون اكثر الرجال تعصبا للزكورة اكتر من دكين زاتو .. وبالمناسبة هو وين غريبة يعني ماجا بوستيك ده وقال مقولته الشهيرة .. المرا من بنبرا ولي ورا ... عليك الله وريني رايك ياخ بيهمني بالجد .. العايز اقولو انو المتعصب متعصب لي جنسو ولو بدلنا جنسو حايتعصب لي جنسو الجديد . اظن حمور اورد من ضمن مقولاته المقولة البتقول ... المرأة لاتولد مرأة .. وانما تصير كذلك .. وانا بقرا العبارة دي اتفتق زهني عن فكرة المعية ثالثة ( لوووووول ) وهي لو عدلنا العبارة دي وجعلناها .. المضطهد لا يولد مضطهد .. وانما يصير كذلك ... مش بالله بتكون احلي واشمل واصدق ... يعني الاضطهاد غير مربوط بي جنس محدد او يمارسه جنس علي جنس اخر وياما في حريم راكبات فوق رجالهم ومدلدلات كرعينهم .. انا وزوجتي الاتنين شغالين وبنرجع في نفس الوقت .. هي طوالي علي المطبخ تسوي الغدا وبعدو الشاي وتغسل العدة ... انا ماحصل قلت ليها ياخ بما انك عملت الغدا خليني اغسل ليك العدة وعمري ما حا اقول طالما هي مبسوطة كده .. لكن لو من زمان جات قالت لي بما اننا شغالين الاتنين يلا نتقاسم شغل البيت كمان وقسمتو قسمة حلال وبلال اكيد كنت قبلت القسمة طائعا وقمت بالعلي من شغل البيت لانو ده العدل كده .. لكن طالما هي راضية بي وضعها ده انا كمان راضي بي كسلي ده ... والحقيقة مرات بحس انو خدمتها لي دي بتشبع فيها ناحية عاطفية كده وبتحس بي نشوة كده وهي بتخدمك والله اعلم ( كدي وريني فكرتكم شنو من منظوركم ) ماخلصت بالمناسبة تاني باقي لي حبة رغي كده بيصلك قريب ان شاء الله تحياتي وشكرا علي الاهتمام بالمداخلة السابقة خالد غالى

الأدب لا يذكر ولا يؤنث، لو كان الأدب مجرد (إحساس) تجاه المحارم، مجرد كلمات خالية من الفعل تظهر وتطبق فقط عند وجود أنثى ما في الجوار،،، فعلى شبابنا السلام.

وانا بضيف حاجه يابت قضيم عندنا مثل بقول اذا لم تستحى افعل ماتشاء00 الحياء هو بيت القصيد
والحياء ليس انكسار

Quote: اسي يادكتورة نجاة لو بتك لغاية الساعة 8 بالليل ماجات مابتقومي الدنيا وتقعديها ؟؟

سلامات يا اخي الكريم
انا شخشيابت ولد يتاخرو بقوم الدنيا وبقعدها..

ولدي يحلم هذه الايام بانه حيمشي يقعد داخلية ويبقى على كيفو..
وطبعا دا لا تتعدى انها من الاحلام حقتو الما حتتعمل اصلا..
نحنا ما ربينا ازواجناجونا من اهلهم المواضيع مقسمة
ليهم انه ينشطو بس في شارع الله من يدخل رجلو في البيت
ترفيه شديد..وفندقة تقيلة.. لا اذكر متزوجة 23 سنة
ان شارك زوجي في عمل طعام وهو لا يعرف حتى يفتح البوتجاز
ولا التلاجة ذاتو ما حصل شفتو فتحها..
مويتو تجيه في عنقريبو..المجهود الوحيد هو فتح المحفطة ومناولةالقروش
ودا الدور اللعبوابوه ومن قبلو جدو
لكن السلسلة دي حتنقطع في جيل الابناء..لوالامهات وعن لنقطة
قلع البطارية جنب الباب دي.. وقسمk الشغل بين كل الابناء بنات واولاد بالتساوي
وخلن غتاتة والله ولدي ما يخدم مرتو ابوه كان خدمني (زول مدردق)

لا يمكن تغير الرجل ابدا وغرس مفاهيم جديدة النعم انو التغير دا بمس المكتسبات الوقعت ليه ساااااااااااقطة حيحارب التغير دا باي طريقة.

ديل فات فيهم الفوات علينا باولادنا..



وتحياتي لك It Takes Two To Tango

العزيزة بت قضيم .
العزيزة امانى ..
وضيوفكن الاكارم ...
معليش اذا مداخلتى كان فيها غموض لانى فعلا كتبتها
وانا نعسانه .. الظاهر كلنا بنوم بى التصفح هنا بدل
الكتب .. ودا نتيجته واضحت فينا .. لوووول ..

اولا بت قضيم طلبتى منى توضيح لمقولة :::

Quote: فلنفرز بين المساواة فى الحقوق والواجبات وبين المساواة فى الجسد والقدرات .. عشان ما تطبظوا

يعنى ما ان يبدا الحديث عن حقوق المراة والمساوة
الشاملة حتى ترتفع اصوات اصحاب الذهنية الذكورية (من النساء والرجال )
بتذكيرنا انو الرجال ديل بياكلوا الظلط والرجال عضلات والرجال
بعملوا وبعملوا ،، والنساء ما بقدرن على دا فهن مخلوقات ضعيفة
لايمكن مساواتها ابدا بالرجال ...
اها اصحاب هذه الاصوات من الجنسين لانى مصره انو القصة
ما نسوان ضد رجال القصة ذهنية سائدة متلبسة النساء قبل
الرجال او هن فى الحقيقة ضحية لها ..
خلينا نقول انو المساواة المقصودة هى ليست فى الشوارب المبرمة
او لا العضلات المفتولة اواى من القدرات الجسدية ... ابدا الموضوع ابسط من كدا
المساواة هى مساواة فى الحقوق والواجبات .. نكفل ليهن الحق
بعدين كل زول حسب ظروفوا بطبقوا او يتنازل منو او ياخد ما يريد و
يعرض عن ما لايريد .. كيفو بعدين !!!!

العزيزة امانى
ملاحظتك حول التغيير والتجديد سليمة
لكن انا كنت بقصد تغيير
لانو بى بساطة هذه المفاهيم والسلوك السائد هو خلاصة
وزبده لى معطيات و قوانين مصممة بعناية من واقع ذكورى شديد
القبضة .. المنهج ال افرزها منهج قايم على هذه الفكره واحكم
باحترافية عالية ، للوصول لهذه النتائج ، ادخال اى تجديد او تعديل
عليه مستحيل .. والبناء عليه كالبناء على اساس متهالك لا يستطيع
حمل الطوابق الشاهقة ... وببساطة هذا ما حدث عندنا فى السودان
تحققت انجازات كبيره فى عهود سابقة لصالح المراة سرعان ما
انهارت امام قوانين 83 و89 لانو التغيير لم يطال الجزور التى
انبتتها .. التغيير كان سطحى وعلى اساس مهترى وضعيف لم يستطع
الصمود .. امام رياح التغيير العكسى او السلبى التى هبت علينا .

باختصار يا امانى نجى لكلامك دا :::

Quote: ليه نلغي الانفاق علي المرأه من الزوج طالما هو حقها .؟؟

طيب من وين جاء حق المراة فى الانفاق عليها ؟؟؟؟
جاء من واقع بكرس للفهم الذكورى .. الاسلام لما نزل وجد المجتمع
ملىء بالعادات الاجتماعية السالبة ورغم انو الاسلام فى معانيه السامية
ضدها لكنه اتعامل معاها باعتبارها واقع لابد الى زوال ..
ذى الرق .. الاسلام فيه الكتير من الايات ال قننت للرق واعترفت به
لكن جوهر الاسلام كان بيدعو للقضاء عليه .. وهذه الدعوه كانت
من اهم غاياتو .. لما الرق انتهى من العالم بالقوانين الوضعية تانى
مافى اىىىىىى زول تجرا على القول بانو الرق وتنظيمه والتعامل معاه
موجود فى القران !! صحيح ؟

بنفس القدر هذه الحقوق ال اتحدثتى عنها
مربوطة بواقع معين يا اما ارتضينا
هذا الواقع وبالتالى نقبل امتيازاتنا منو، او نرفضو .. وبالتالى
تسقط حقوقنا المستمده منه ... وهذا ما قصدته لما قلت ليك
لا يمكننا اكل الكيكة والاحتفاظ بها فى نفس الوقت ....
القوامة فى الاسلام مربوطة بالانفـــــــــــــاق ..
والرجـال قوامون على النساء بما انفقوا ..............الخ
حق المراة الاساسى هو انها انسان له كينونته وكرامته وشخصيته
المستقله .. عندها حقها المتساوى مع الرجل فى التعليم وفى الخروج
للعمل وفى الاجر المتساوى .. بعد كدا سيستم الدوله كله بنبنى
على هذا الواقع وببقى الشخص الما بقدر ينفق على نفسه تدابير
هذا الانفاق موجوده فى هذا السيستم وليس عند الرجل الذى بجوارها
اذا كان زوج او اب او عم او خال ... الخ فى سلسة الاقربون ..
ودى ما بتلغى طبعا شروط التكافل الاجتماعى والاعراف الجميلة عندنا
بس من غير ربطها براجل او امراة ........

ياااااااا امانى ذى ماقالوا ناس الانقاذ من لايملك قوته
لا يملك قراره ... من هسه نتفق .. مش نقول واجبهم ينفقوا علينا
نبقى على هذا الحق اولا ثم نكاوش على بقية الحقوق
تمسكنا بهذا الحق ينسف بقية الحقوق كلها ......
و والكلام عن واقع جميل للمراة .. بيبقى مجرد فانتازيا!!
فانتازيا دى ظبطت هنا ياعمر ؟؟؟ ولا ذى كلامك المرصوص ساى دا ؟













ــــــــــــــ
بت قضيم .. ورى عمر السماحة دى شنو عليك الله ؟

يا ناذر انت خالد الغالى دا اخو
عمر الفاروق ؟؟ اساميهم بتتشابه شبه ...
لوووووووول ..

Quote: انا وزوجتي الاتنين شغالين وبنرجع في نفس الوقت .. هي طوالي علي المطبخ تسوي الغدا وبعدو الشاي وتغسل العدة ... انا ماحصل قلت ليها ياخ بما انك عملت الغدا خليني اغسل ليك العدة وعمري ما حا اقول طالما هي مبسوطة كده .. لكن لو من زمان جات قالت لي بما اننا شغالين الاتنين يلا نتقاسم شغل البيت كمان وقسمتو قسمة حلال وبلال اكيد كنت قبلت القسمة طائعا وقمت بالعلي من شغل البيت لانو ده العدل كده .. لكن طالما هي راضية بي وضعها ده انا كمان راضي بي كسلي ده ... والحقيقة مرات بحس انو خدمتها لي دي بتشبع فيها ناحية عاطفية كده وبتحس بي نشوة كده وهي بتخدمك والله اعلم ( كدي وريني فكرتكم شنو من منظوركم )

عارف يا خالد ( وشوش كتارات ) **
من منظورى انا انو المسالة دى ما بتتحل حلول فردية
لازم الحل يكون من العقده نفسها .. ماهو البنات شغالات وما بقدروا
يتمردوا على كل قالب البنات مش دى بس .. صاح ؟؟؟

هى ما بتحس بى نشوه ولا حاجة هى عينها طالعه ..
حس يا ابو العريس .. حس شوية واتلحلح معانا
على الاقل اعمل حاجاتك انت .. وشوف لما الاعباء تمشى
منها شوية .. مش بتلاحظ تغيير ؟ فى زول اظنو لينين
قال انو الاعمال المنزلية الروتينية بتبلد احاسيس المراة !!!
السؤال انتو قروشكم دى بتودوها وين؟؟ ما تجيبوا ليكم شغاله ياخ .

البوست الشحمان ده كان مركون وين ..؟؟




.........
بجيهو بعد منتصف الليل باذن الله

بالاعلى ياسادتي

مجموعة من النساء المعقدات والرجال المجاملين ..

!!!

Quote: بجيهو بعد منتصف الليل باذن الله

نسأل الله السلامة بعد الوكت داك ..!!

يا عمر ليه يعني الحقارة؟؟
الحنك ما بشبهنا واللا ما لينا نفس؟؟
لوووووووووول
شوف
لا مدينة فاضلة ولا يحزنون، اصلا ًالمدينة الفاضلة متهيأ لي حتكون مملة
وش ضاحك مدهوش

وأنا ما تكلمت عن التربية أنا بديتها بالمناهج لأنه لما كتبت ما كتبت أعلاه كانت المناهج في راسي، وإياك يوماً أن تناقش اتجاهات عقلي، أما لو تحدثت عن التربية فألله قال بي قولك، تفتكر بحلك مني اللحل بلة قبل كده وأظنه اتحل من واحدة لايوقة زي؟؟.!!
ما أظنش
يا عمر
لماذا حسبتها مناهج فاضلة وافترضت أن لا شئ ناقص فيها؟؟

Quote: في وضعك لي منهج التربية ده ساويتي بين كلللل الطلاب في المستوى العقلي والتفكيري (ما عدا في جانب الهوايات) لي كللل طلابك واتخيلتي انهم كلللهم حا يستوعبو الطقم التربوي بتاعك ده ..

المناهج الحالية تساوي بين كل الطلاب في المستوى العقلي (يعني ما فرقت حاجة)
بعدين أنت نسيت شئ مهم جداً وهو اني بتكلم عن (معلومات الحياة الأساسية ) للعيش السليم، وطبعاً ما تطرقت لذوي الاحتياجات الخاصة وأصحاب صعوبات التعلم (ديل براهم)
وبعدين هي مش هوايات كما فهمت انت، هي مناهج اختيارية (elective)، كل واحد مثلاً يكون ملزم بعدد معين من الساعات او المناهج أياً كان حسابها، حسب ميوله
اللي عايز يدرس هندسة يدرس شئ يؤهله للهندسة
اللي مايل لمنهاج أدبي في الشعر والرواية وغيره يدرس مناهج تؤهله لهذا الشئ
وهكذا،
هي ليست هوايات وهي ليست اختيارية بمعنى يختار أو لو مش عايز على كيفه، هي اختيارية اجبارية
ما هو مش مفهوم أن الناس تتخرج وتتقسم على كليات مختلفة بنفس القدر من نفس المعلومات
؟؟!!

Quote: عايز اقول ليك حاجة يا بت قضيم وجاااادي فيها شديد والله شديييييييييييييييد وعايزك تردي فيها بي كل صراحة هل حا تطبقي منهج التربوي التعليمي ده على ولدك بي حذافيره؟؟؟

والله لو أضمن في جامعة تقبل ابني بهذا المنهاج، فما مشلكة، أدرسه لأن كده واللا كده هو مضطر يتعلم معظم الأشياء التي أوردتها
ثم أن ما يتعلمه الطفل حالياً في الأغلب حينساه
وبعدين
أهم نقطة
لو كان التعليم المذكور أعلاه (مجاني) طبعاً حادرسه المنهج ده (لووووووووووول)

Quote: صعب جداً إنك تقدم الناس التانيين فئران تجارب لي سيستم متكامل في التربية وتقول كدي النشوف الاوت بوت حا يكون شنو .. الأخطر إنو الأوت بوت حقك ده نتيجتو بتطلع اقل شي بعد 18 سنة لتأكيد نجاحو ..

بس في نفس الوقت لو ما في دايماً (بداية) أبداً ما حنعرف كيف حتكون النهايات !!!
أم الفلسفة زاتو ياخ
ذي لما تضطر تشغل انسان أول مرة بدون خبرة، لو كل الناس رفضت علشان ما في خبرة، يبقى كيف حيتعلموا الناس ؟؟
ما لازم فئران تجارب لوضع دواء جديد مثلاً، واللا كيف؟؟

Quote: يلا هل بت قضيم على استعداد إنها ما تودي ولدا المدرسة التقليدية دي وتقعدو في بطن البيت ده وتقريهو منهجها اللي هي مقتنعة بيهو ده ؟؟؟ مع إنو انسسسسسسب حتة ممكن تقنعي بيها الناس بي نظريتك دي هو بيتك لكن حا تلقي انو صعععب صعععب تغردي خارج اسرب وتجازفي بي ولدك في الحاجة اللي زي دي فاكيد حا تخوضي مع الخايضين

لأ، بسبب أن المدرسة مش مناهج فقط بل هي حياة، وأنا ضد التعليم المنزلي، لأن الولد أو البنت لازم يتفاعل مع الحياة ويجرب التعامل مع الناس، يصبح اجتماعي، أو يعني التعليم المبكر الذي يمارس حالياً فكرك هو تعليم (أ – ب-ت) فعلاً؟؟ أو الغرض الأساسي منه تدريب الطفل وتأهيله للاختلاط في المجتمعات
يعني أبداً ما حاحرم ابني من هذه الفكرة
أما المنهج فوالله مقتنعة به جداً، بس طبعاً يقنن ويدرس جيداً عن طريق ذوي الاختصاص والفهم

موضوع التغريد خارج السرب طبعاً صعبة جداً وأحياناً تكون مستحيله، لكن يا عمر ده كان حيكون في حالة أن المناهج الحالية تؤدي غرض وتشبع الطفل بمعارف يستفيد منها، لكن هو كده واللا كده حينساه ومش حتفيده يوم، يبقى ما المشكلة في التغيير؟؟!!

Quote: المحور الأهم واللي اتوقع إنو أجلتيهو اكتر من مرة لانو بتكوني حاسة إنو عندك فيهو كلام كتيييير هو الثقافة الجنسية اللي فعلا بتأرق كثييير من اولياء الامور وفعلا فعلا فعلا تفتقر فيها مناهجنا للتطوير وشغالين فيها بي نظام الغتغتة والمواراة فمنذ ان وعينا في الدنيا فمادة الاحياء الباب الثالث إسمو التكاثر يرسمو فيهو الجهاز التناسلي للمرأة على شاكلة الغوريللا ليأتيك في الإمتحان سمي الاشكال المرقمة في الرسم 1- 2- 3- 4- 5- لينتقل لعلامات البلوغ ومنها تخن الصوت عند الرجل ونعومته عند الأنثى مع نمو شعر الإبطين ..(ياخ الزول السماهم إبطين ده اتوفق في الاسم إسم لطيف) ومع ذلك وكالعادة عولقوهو السودانيين وسموهو الأباااط .. منهج يرسم ليك المرا زييها زي الجدادة تبييض وتلد وزي ما ثال المسطور لمن سألوهو الثعلب بيلد ولا بيبييض قال ليهم والله الثعلب ده مكار تتوقع منو أي شي !! فكذلك المرا يبدو انها مكارة تبييض وتلد .. الاغرب إنو في مناهجنا دي بيهتمو بي تكاثر الأزهار والتكاثر الخضري اكتر من تكاثر البني ادمين الزهرة دي ما يخلو ليك في ها ميسم ولا حبة لقاح لا تاج .. حصة العلوم يتكهرب فيها الجو تمااااما والعجب لو كنتو طلاب تالتة ثانوي وبتقروا مختلطين في معهد !!! الأستاذ عرقان البنات سرحانات طلاب كنبة ورا يدعون الشفتنة وقلة الادب وهمهمات وضحكات لمجرد سماع كلمة او وصف في الجهاز التناسلي ..

على فكرة الناس بتكون مرات فاطة سطر، انت شكلك فاطي الكراس كله
غايتو موضوع الأباط ده بالغت فيه
لووووووووووول عليك يا هناي

وبجد، كفيت ووفيت، وأنا ما أجلت الموضوع، جاياه مع التربية
مين قال كلامي خلص؟؟

Quote: تخريمة : Quote: انا نعسانة وزهجانة شديد وفي هذه الحالة يجب اعتباري (غبيانة ما واعية) من غير زهج ونعاس ما محتاجة يا ختي..:)

نشكر احساسكم الطيب تجاهنا، وصح، البباري الجداد بمشي الكوشة، نعم هي حكمة سليمة، ولكن السؤال الذي يطرح نفسه يا قول المثقفاتية، انت بتباري الجداد مالك؟ لو قلنا انا غبيان، الأخ واعي؟؟؟!! لوووووولين

الأخ حامد
سلامات
في المقابل جاءني على الإيميل برضو:

يقال أن اللغة العربية ظلمت المرأة في خمسة مواضع وهي
أولا: إذا كان الرجل لا يزال عل قيد الحياة فيقال عنه أنه حي
أما إذا كانت المرأة لا تزال على قيد الحياة فيقال عنها أنها !!...حية
أعاذنا الله من لدغتها ( الحية وليس المرأة )

ثانيا : إذا أصاب الرجل في قوله أو فعله فيقال عنه أنه ...مصيب
أما إذا أصابت المرأة في قولها أو فعلها فيقال عنها أنها مصيبة !

ثالثا: إذا تولى الرجل منصب القضاء فيقال عنه أنه قاضي
أما إذا تولت المرأة منصب القضاء فيقال عنها أنها قاضية ...!!
والقاضية هي المصيبة العظيمة التي تنزل بالمرء فتقضي عليه ... يا لطيف!!!!

رابعا: إذا أصبح الرجل عضوا في احد المجالس النيابية فيقال عنه أنه نائب
أما إذا أصبحت المرأة عضوا في أحدا لمجالس النيابية فيقال عنها أنها نائبة ...!!!
وكما تعلمون فان النائبة هي أخت المصيبة

خامسا : إذا كان للرجل هواية يتسلى بها ولا يحترفها فيقال عنه أنه هاوي
أما إذا كانت للمرأة هواية تتسلى بها ولا تحترفها فيقال عنها أنها هاوية !!....

والهاوية هي احدي أسماء جهنم والعياذ بالله

ايش رأيك؟؟
سلمت كثير للمشاركة

خالد غالي :

Quote: نازر سلامات ... عزبتك معاي ياخ ويا دكتورة تجاة لما ولدك يكون عايز يمشي الداخلية عشان يتحرر ما اظن ده شعور صحي .. وصدقيني لما تمنعيهو كده بدون مبررات مقنعة ليهو ما حايخلي الحاجات العايز يعملا دي حا ياجلها بس لغاية مايستغل بي حياتو واكيد حايستغل يوما ما ويبدا يعمل الحاجات المؤجلها دي بالتسلسل حقها ولما يكون عمرو 35 سنة حايكون بيعمل حاجات من عمر 15 سنة ولما يصل 40 سنة بيكون يادوب في العشرين ولما يوم تهيج عواطفو ويقبض المضيفة المثيرة تشيلو حالو في النت بدون ماتعرفو الخلل الاتعرض ليهو في مقتبل حياتو ... وانا مصر جدا انو اي سلوك غير طبيعي زي اغتصاب الاطفال او المقابضة في المواصلات هو ناتج من انسان غير طبيعي وتربية غير طبيعية وبيكون من الظلم اننا نعتبرو براهو المخطىء ... مالو لو ربينا الاولاد كويس وعلمناهم الصح من الغلط بطريقة صحيحة مش عقدناهم زي مابنعمل اسي وبعد داك ما اظن في زول ممكن يختار الغلط براهو كده وحتي لو غلط بيكون يستحق العقاب ولازم يتحمل نتايج افعالو واظن يومها العقاب حايجيب النتيجة المرجوة منو . رغم اني مقتنع انو الاتربي صاح بيسلك سلوك صاح . مافي زول بيولد عالم بفنون الطبيخ اسي لو قنعتي ليك من 3 سنة زواج في البداية كان بيكون عندك زوج عندو خبرة 20 سنة طبيخ ( لوووووول) انا لما جيت الغربة واضطريت لحياة العزوبية كنت مابعرف اسوي حتي الشاي السادة .. لكن اسي ماشاء الله علي بعرف اعمل حتي الكمونية وملاح ام رقيقة..فالرجل ممكن يتغير وممكن تغرسو فيهو مفاهيم جديدة بس بي حبة معرفة وحرفنة.. اسي يادينا وجه الشبه شنو بيني وبين عمر الفاروق ... انت عارفة يادينا ( وش واحد بس ) العقدة ماشة تتحلا والمجتمع ماشي يتطور بس انتو براكم مستعجلين وغالبكم الصبر وعايزنو يتغير بيدي لا بيد عمر ... زمان امي طلعوها من المدرسة عشان ماعندناش بنات تمشي المدرسة او تقعد داخلية ... واسي البنات بقو بيحاربو في الختان جهارا نهارا ومش كده وبس قبل فترة اتصلت علي اختي الصغيرة وقالت رسل لي بنطلون جنز بيجي ... وقيسي علي ذلك شوفي العقدة ماقربت تتحلا ؟؟ بت قضيم اجاباتك لاسئلتي ماااااا عجبتني وحا اتعكلت ليك فيها زي ما اتعكلتي في جملتك الكل شوية تقتبسيها دي تحياتي خالد غالي

خالد الغالي (اسمك ده شرك عديل)
شكراً أولاًً على الاهتمام والرد

ثانياً، أنا باسووردي (إنتاية) يا قول تجار البقر، ما بقدر اديه ليك بدون محرم وكده
قلت كيف؟؟
:(:(
شوف يا سيدي، والله انا كل القريته للأخت عزاز شامي، واعترف اني بديت اقرا ليها قريب لاني فترة طويلة ما تابعت البورد، كل ما قرأته لها كان في إطار المعقول والمتوازن
يعني ما حسيتها متعصبة لجنسها، بل الحق يقال أنا شايفاها معتدلة جداً

لكن مسألة التعصب هذه، وأشار لها الاخ عمر في واحد من ردوده، وانا طنشتها قاصدة، وجيت انت هسه تحكها، فطبيعي طبعاً الواحد يكون عنده حالة من التعصب لجنسه
ذي حالة التعصب للجنسية مثلاً، وحالة التعصب للقبلية، وحالة التعصب للتخصص
يعني الموضوع – في رأي أنا – عادي وطبيعي وكمان مطلوب، على أن لا يزيد عن الحد فيصبح (عنصرة)
اتعنصر لجنسيي والبقية لا
اتعنصرلنوعي وبقية الناس لا
لا يكون تعالي وافتراء وكبر
يعني ببساطة لا يكون زايد عن حده ولا يدخل في جانب الظلم
يعني واحد في الشاارع سوداني خبط عربية واحد بنغالي اقوم طوالي احاسب البغالي واقيف مع السوداني باعتبارتشابه الجنسية وكده
كده غلط وحرام
أما الميل الطبيعي فهذه حتى غريزة عادية، يعني طبيعي أميل لجنس الإناث لو ماشة لدكتور نساء وولادة مثلا، لكن لا يعني اني مش حامشي لدكتور رجل أبداً وامرض واتبهدل إن لو يكن هناك دكتورة

عزاز اكيد تميل لجنس النساء أكثر (الجملة دي براها غلط شديد الرجاء قراءتها في صياغ الحديث لو سمحتوا)
وأكيد لو بقت راجل أكيد حتدافع عن الرجل بصورة عادلة ومنطقية كما هي الآن
ونعم
الغبي لا يولد غبي، والمرأة لا تولد امرأة ، والمضطهد لا يولد مضطهد
والرجل كمان لا يولد رجل واللا كيف؟؟
وازيد
ما ضاع حق وراءه مطالب، ولو كانت النساء تطالب بحقها(في الراحة) ما كان قدر زول يحقرها
يا خالد
من جديد
انا لست مع أو ضد
ولا السألة تفاضل بين رجل امرأة
خلينا ننظر للموضوع كمجتمع، يعني حتى الأطفال دخلوههم في الموضوع، كده متهيأ لي حنقدر نفكر في حل مشاكلنا صح
وقالوا يا خالد في واحدة موظفة شغالة كل يوم تجي تقلع توبها وتنوم، ما ليها دعوة بأي حاجة، راجلها يخدم وأم راجلها تخدم وهي ولاااا هي هنا
يوم اتفقوا راجلها وأمه يحسسوسها وكده
أها رجعت من الشغل قلعت توبها ختت راسها في السرير ورقدت، قامت الأم شالت المقشاشة (أنقوم نقش الحوش ده)
الراجل يكشكر عينه في مرته (يا امي ياخي انت تعبانة خليك، أنا بقش) والأم ترد والكلام للمرة (يا ولدي لا انت تعبان )
يا امي يا ولدي
المرة رفعت راسها متضايقة (خلاص ياخي، ما تنقوا كتير، أنت قش يوم وهي يوم)
لووووووووول
برضو ما كلهم يعني حلاتهم من الأيد للخشم ذي ما بقولوا
كثير هي النساء المفترية

المهم
منتظرة باقي كلامك والحقيقة بصراحة يعني، مشاركاتك تعطيني الإحساس بالأهمية وكده، انه (أها بره البورد برضو في ناس بتشاركني) فما تحرمنا من الأهميات دي بالله
دوماً

Quote: وانا بضيف حاجه يابت قضيم عندنا مثل بقول اذا لم تستحى افعل ماتشاء00 الحياء هو بيت القصيد والحياء ليس انكسار

مية على مية يا خالد (المحرب) المرة دي
بس مفهوم الحياء بالنسبة لينا نحن السودانيين، عموم السودانيين وليس الكل طبعاً، نعم الحياء مطلب رئيسي للنساء، وللرجل يسمى (خخيبان ) وسوري للفظ بس والله ما قدرت أجيب غيره مهذب أكتر

شكرا ًيا خالد
اعتبر مشاركتك --رغم قلة حروفها- فعالة جدا
سلمت

دكتورة نجاة
وطبعاً حوارك مع الاخ خالد الغالي وشايفاهو رد عليك، ما عايزة اقطع الحوار، بس حابة أأكد على نقطة أشار لها الأخ خالد وهي أنه لو ابنك حاسس أنه عايز (يتفك) في الداخلية، لو بالفهم اللي أنا فهمته، ففعلاً في خلل ما حاصل
الكبت - في رأي - أسوأ بمراحل من ال-تسيب-
كدي وضحي لينا ونشوف

على فكرة المصريين عندهم مثلا ًمليون في المية صح (زوجك على ما تعلميه)
وفعلاً
لو كنتي علمتيه من البداية فكرة (التعاون) كان هسه بقى ولا أسامة السيد
وبدون هزار
بالنسبة لي أنا ليست الفكرة المشاركة فقط، يقوم يغسل ويكوي ومش عارف أيه،
مع انه المشاركة مهمة،لكن بالنسبة لي أنا أهم من المشاركة أنه يعي و(يحس) بالمهلوكة الشغالة طوالي دي
مجرد إحساس
في نوع - يا ساتر يا حفيظ - رغم أنه شايفها مثلاً قاعدة تغسل، وهو بتفرج ماتش كورة، يجي -بمنتهى السماجة وعدم الحس - يطلب شاي مثلاً
والحقيقة هي مش المشكلة الأساسية الكبيرة خدمة البيت دي لو ما كانت نتائجها تؤثر سلباً على التربية

يعني لو في تقدير من الزوج وكذلك الأبناء، خلاص ما مشكلة لو عملت الموضوع ده عن طيب خاطر وهم عارفين انها تؤديه لطافة منها وطلبا ًللاجر من الله (حيث يحسب لها في مقام الصدقة) فما مشكلة أبداً
لأنها لو وقفته يوم، فما حتحاسب عليه

ونخليكم لمتابعة الحوار المثمر

تحياتي

غايتو فتحتي جنس موضوع


مبالغة
الواحد ما بقدر يديك رأياً سمح
ألا يمشي ويجيك صاد

تسلمي يا بت قضيم

ما خليتى فرضا ناقص يا بت قضيم
جضمتى الموضوع جنس جضيم!!
كلام مجيه!
أخطأ عمر وأصابت امراة(شفتى الارث التأريخى دا)!!

وما يفوتك
الباب أبو تلاتة ضلف حق الرجال حتى لو فى البيت ما فى عربية والباب أبوضلفة حق النسوان حتى لو بقت قدر الفيل أبوزلومة!
الديوان حق الطوب حق الرجال واودة الجالوص حقة النسوان ولو البيت كله جالوص يقشروا حقت الرجال براااااها!
دا كوم والنسوان ياكلوا بعد الرجال وربما الباقى حقهم دا كوم تااااانى!
وبعدا دا تجيهم كونزالزا رايس تعظيم سلام!
عالم تخاف ما تختشيش!
دكتورة بيان مثالك فى الميراث استثناء وهو عليك وليس لك!
اها رايك شنو فى ميراث الخنثى مشكل والذى يقع فى النصف بين الرجل السوى والمراة السوية بمعنى ان ميراث الخنثى مشكل الذى يجمع اعضاء الانثى والذكر يساوى مجموع ميراث الذكر والانثى مقسوما على اثنين يعنى اكثر من ميراث الانثى!
اليس وضعا مستفزا ناهيك عن اجحافه!
جنى

بت قضيم سلام كبير
ومن الاخر كدا
المرة مرة والراجل راجل ..

زي ما قال : عكود خلوهن للشحن والتفريغ بس !!

حاشيه :

عكود ده جد ابوي

Quote: بالاعلى ياسادتي مجموعة من النساء المعقدات والرجال المجاملين ..

المداخلة سادتي من رجل معقد وإمرأة مجاملة ..
ما تستعجلوا المرأة المجاملة دي بتجي بتجي..

دينا العزيزة
قلتي

Quote: المساواة هى مساواة فى الحقوق والواجبات .. نكفل ليهن الحق بعدين كل زول حسب ظروفوا بطبقوا او يتنازل منو او ياخد ما يريد و يعرض عن ما لايريد .. كيفو بعدين !!!!

تمام
مية مية ولا تعليق

لكن كلامك للأخت أماني، حابة اكتب معلومة دينية تذكيراً وتعليقاً
وهي أن المرأة حتى لو كانت صاحبة عمل وصاحبة دخل رئيسي، وعندها ورث، ومش محتاجة، حتى لو، لا يسقط حقها في أن ينفق عليها الرجل
وأنا في رأي هذا أكبر دليل على نصرة الدين الإسلامي للمرأة
ما تنفقه هي بعد داك بمزاجها على زوجها أو المنزل أو الاولاد، فيعد بمثابة الصدقة، تؤجر عليه إن فعلت، ولا حساب عليها إن أوقفتها
هذا للتأكيد بس يا دينا
وواصلي مع أماني

الطاهر ساتي
تحياتي
نص الليل دي مشكلة الله يسترنا منها
غايتو أحلى ما في اختراعات الإنترنت، أنه لا يتقيد بشروط الوقت المفروضة
خارج عن الموضوع (خارج خالص)
استغرب من ناس تقول ليك (الساعة سبعة صباحا ًما ممكن ناكل لحمة) أو (الساعة اتنين صباحاً صعب ناكل كسرة وأم رقيقة)
غايتو انا في اي وقت بأي شكل باكل اييييييي حاجة تجي في مزاجي
هسه يا الطاهر، كلامي السابق ده ما في ليه اي معنى أو اي ارتباط بموضوع البوست
مشكلة يعني؟؟
(ابتن) والله
تعال نص الليل الصباح بدري بعد بكرة
مشكلة (اسلو) مافي
سلمت

دكين
تحياتي
وشكرا ًلرأيك ونحترم وجهات النظر المختلفة مهما كانت
سلمت

أماني العزيزة
روقي المنقة

Quote: وليه ياسيدي التعالي ده وجايينا من فوووووووق كده؟ تصدق انك مثل حي للتعالي الذكوري والترهيب اللفظي البنحكي عنه .. كويس انك جيت وضربته لينا مثل حي بالعقليه الذكوريه اللي ما بتقبل النقد .. وبتشوف كل البختلف معاها معقد والبوافقو مجامل !!!

عملتي للغبيان دكين أهميات والله
الزول ده ما كده بتاع عقليات ونفسيات وتعالي ذكوري وكده وكلام كبار
النت زاتو دخلو بقابض في عروس ما لاقيها وما بلقاها بشناته دي، والشناة خلقة ربنا ولا اعتراض
وكما قال الحكيم، الله يخلق والشياطين تعولق
وهو -والله- شخصية لطيفة طيبة تعشق الاستفزاز، ينبسط - اي والله - لما يستفز إنسان

نعتني قبل كده بأني (غنماية) ساكت، مع اني وقتها كنت لسة (عمبولق) ما وصلت لدرجة الغنمية دي
وبعدين مرة قال انه بت قضيم دي هو، يعني دكين هو بت قضيم
ومداخلته السابقة أعلاه (ولو اني ما كنت عايزة افشه واعلق عليها)، المقصود منها لفت النظروالاستفزاز
وحتى لو كان رأيه أن المشاركات أعلاه معقدات، ما تزعلي
عادي
العقدة ممكن تتفك
المشكلة يا أماني (الشناة)
الشناة بفكها شنو؟؟
روقي يا حبيبة

جاية

بت قضميم :

Quote: دينا العزيزة

Quote: هذا للتأكيد بس يا داليا

هو الجداااااد ده غيروهو ؟ :)
اصلو ما خاتين عليها لمن قالوا يجبوهن اتنين فإن نست ذكرتها :)
الفووول الفووول يا بت قضيم وقفي الفول وعلييك بي الكرياكي

عمر
يا ث(غ)يل
الفول برئ مني الله يعلم
القسمة بس يا عمر
المخ قسم يا هناي

اماني

مع احترامي الكبير لي وجهة نظرك ..
بس دي وجهة نظري..
قد لاستطيع الاسهاب في شرح اسبابها لذا جيتك بالخلاصة..
وربما اكون شايف انومسالة الشرح دي ما بيستاهلها الموضوع اصلا..
اصلا في زول عاقل بحاور مرة سودانية من جيلكم ده؟؟
على العموم رايك ده مابغير في حقيقة انو النساء ينطلقن في كتابتهن من عقد لاوجود ليها إلا في رؤسهن ..
تاكيد على المقولة الخالدة( المراة من بنبرا ولى ورا)





بت قضيم
اعتذر عن وصفي لك بالغنماية..
انتي مرة بطنك غريقة..الوصف ده ليهو هسي تقريبا سبعة سنوات..
لا اظن انو الغنم عندهم ذاكرة متربصة زي ذاكرتك دي..
انتي بالتاكيد اكر من وصفي لك بي كتير..










بالاعلي يا ساداتي نساء غير معقدات ورجال غير مجاملون
يلا افرحو

والله بعد ما قررت ارجع جااادي لكن والله دي غلبتني ومااا بفوتها ان شاء الله بت قضيم تطردني ..

Quote: يادينا القوامه (وانت ست العارفين) لاتعني أفضليه أو رئاسه,

كئ كئ كئ كئ كئ كئ كئ كئ
ككككككككأأأأأأأأكأأأأأأأ
او كما يضحكو ناس ميكي جيب ...:)
والله يا اماني دينا دي ما عارفة اييي شي ولو ما خايف البوست يتقلب جينة حيوانات وجداد وكوشة لقت دينا دي تور الله في برسيمو ..
دينا دي شن دراها بي القوامة ؟؟؟
إنتي يا أماني قاصدة القوامة ولا القوالة ؟؟:)

Quote: تخيلي أن أكثرية هنا ما زالت تعتقد ن مشاركة ال(البنت) في النت، وعمل علاقات مع زملائها من النتيين لو صح التعبير، هو منتهى قلة الأدب منها؟ وأن الكثير (لو مش الكل) ما زال يظن أن وضع صورة الفتاة في المنتديات هو عين العيب والخطأ

انتي من اوائل البنات في سودانيز اون لاين دي لو ما اول زولة تخاف من وضع اسمها الحقيقي

ورفع صورتك ..

كان انتي وعاملة مستنيرة وبتكتبي عن العقد حقتكم دي ودور الرجال في المظالم وماعارف هلجرا خرافات وخزعبلات وعقد وجندريات فما بال غيرك من النساء؟؟
فياخي ما تهللي بي شي انتي نفسك غالبك تسويهو..بالرغم من انو كتير جدا من النساء في البورد هنا رافيعن صورهم وخاتين اساميهم وماداسنها..



كتير من النساء تجاوزن هذه المسالة واصحبت مسالة انها تتعامل بي نيك نيم مسالة بتاعة تقليد لا اكثر ولا اقل
بس انتي وبعض المعقدات لاتزال هذه حياتهن ..غموض ودسوسية وخوف من المجتمع الذكوري المتوهم..





خليكم كده لي يوم الارحمات
عسى ان يجعل ربي لكم مخرجا..

بت قضيم

تحية طيبه



انشغلت بالدفاع عن الانسان بهناك اصلو القيامه قامت وناس عماد موسي محمد الوهابي الارهابي

ومعاه الاخ الجبهة اسلامية فرانكلي بيوزعوا في الناس في الجنان والنيران


الان يقررون ان والدة باقان اموم ماتت علي سوء الخاتمه لانها نصرانية او لها ديانه افريقية



لذا لا يجوز الترحم عليها اما الدكتورة نجاة فتقول تمشي الفراش لكن لا تسال الله لها المغفرة



اعتذر ده مكانو بهناك لكن ده السبب في عدم المتابعه




اقول في موضوع المراة ان الدين هو الذي يشكل مفهوم كبير جدا في فهمنا لما يصدر من اذهان غالبيتها تري



المراة لا تساوي الرجل


الميراث حتي لو البيت اشترتو بنت لا تتساوي مع اخيها


الشهادة المراة شهادتها ناقصة

لا اهلية للمراة ان تتولي امر المسلمين

المرا لو فاس ما بتشق الراس


لم يفلح قوم ولوا امرهم امراة


ملك اليمين ان تملا البيت بالنسوان وتتضاجع من تستطيع وبعد ان تلد المراة تسمي بولدها


خدم وحشم


جلد المراة بعد ان تستنفذ كل حطوات التاديب دي مدرسة الرجل ؟؟


اهانة وسوقها لبيتها بالبوليس لكي ترقد في فراش الزوجية




ضربها باختها ان تتزوج اخري فيها


التعدد لمتهة الرجل للمراة لا الصوم احتمال انه لها افضل؟؟؟؟؟؟؟؟؟؟؟؟


المفاهيم الدينية والعرف هي اس الفهم الذي يجعلنا ندور في محراكة اذلال المراة

لا غيره لا غيره



نريد تطوير المنهاج في النصوص الدينية

نريد وضع قانون احوال شخصية مدني في محتواه
لان الشريعه لا يقدر علي تغييرها لذا الحكم الوضعي هو الاسلم



اي انسان يلف علي هذه المسلمات يقول قولا اخر


توجد معالجه فريده ووحيده في التاريخ الاسلامي

اتمني ان يساهم بها الاخوان الجمهوريين فهي تقدم حلا من داخل الاسلام



لك التحية

Quote: والله يا اماني دينا دي ما عارفة اييي شي ولو ما خايف البوست يتقلب جينة حيوانات وجداد وكوشة لقت دينا دي تور الله في برسيمو .. دينا دي شن دراها بي القوامة ؟؟؟

ياخ الحممممدلله ال ما برسيمك انت !!
فى ناس لاتدرى وتدرى انها تدرى ..
وفى واحدين لايدروا ويعرفوا انهم لا يدروا ؟؟
الله يا عمر تقوم قيامتك .. قول امين

عــــــــــفوا سيداتى ســــــادتى
ما ورد من الزملاء اعلاه كان فاصل فكاهى يللا واصلوا يا بنات !!









ـــــــــــ
قتى لى يابت قضيم العقد بتفك ؟؟؟؟؟
لووووووووووووووووول ..

Quote: "مع حفظ صلاحيتها لأغراض أخري" ..

تصوري ده ذاتو السودانية من جيلكم ده ما نافعة فيهو..




اماني
بالمناسبة انا اديتك اكتر من كذا مداخلة ودي مسالة حقو تقدريها وتقيفي عندها وثم تحمدي عليها الله وتثني عليه..
لذا ياخي حاولي احترمي وجهة نظري دي لانها صاح ..
صاح لاني قتها موش صاح لانها منطقية..
انا في حواري معاكم ما بفتش لي المنطق لانو ماعندو معنى ..والمتحدث بالمنطق في ونستو مع النسوان كما الوعل في رهيد البردي..

Quote: ودعني بتجلياتي هذه أسألك سؤال بسيط المفروض كان سألتك هو من زمان أنت مالك؟؟!!

والله يا بت قضيم من شدة ما ضحكت لمممممممممن ما ضحكت زاتو ..
زكرتيني بي صاحبي جننننننننننو وجن السؤال ده ..
الله قال بي قولك لو بس بس بس سألتو وقلت ليهو :
إنت مالك ؟؟؟

اووووووووووووووووووووووووووووووووووووووووووو ياخ رجعتينا لي ايام الجامعة وما ادراك ما الجامعة :)

تخريمة :
اهجري البوست ده وعليك بي بوست تاني لانو ده خلااااص بقا زي (البنات القليلات ادب) وما ظنيتو يرجع لي وضعو بدري:)

بت قضيم صاحبة البوست :
كيفنك خيتي..
ويا ريت ردي يجي في الصفحة التانية وما يغطس زي الفات ..
حا اقول ليك كلام مشاتر دكين زاتو ممكن يتسغرب فيو ..
لكن النصييييحة دكين ما غلط غلطت اماني دي!!!
وبكل صراحة بكل صراااحة اوول مرة اقرا لي مداخلة لي زولة بتدافع عن حقوق مرأة بي الشتارة دي..
معظم المتداخلات من البنات في البوستات دي بصراحة كنت بحسدهم على درايتهم ومنطقيتهم وعلمه في الطرح ..
اماني مداخلتها لو تمسح لي اقل ما توصف بيهو انها نشاااز..
مداخلة شترا مستفزة ..
ابدا ابدا ابد دكين ما فكر بي الفهم القالتو عنو اماني ده بس اماني جات منفوشة حبتين وشكلها ماخدة فكرة عن دكين وفكرت في لحظة انها تكتب كتابة تصدي..
عن نفسي بكتب لي دكين ممازح وضاحك ومن باب المشاغلات وشركك قبض وشركت لي فلانة وبختك حا تجيك بي الايميل والذي منو من ما بتسموهو باب العنف اللفظي ضد المراة البوردابية بس بصرااااحة اماني بالغت شدييييد وكتبت كلام مستهلك مع احترامي ليها ما عندو اي معنى فكان رد دكين مناسب لي مداخلة اماني..
عاتبوا اماني علي المداخلة الشترا بتاعتا وبعد داك تعالوا لي دكين ..
تخريمة :
بالمناسبة يا بت قضيمما عارف لكن خالد الزاحمنا بيهو ناذر ده قطع شك بوردابي معانا هنا وبي باسويردو فما عارفك انتي بتتعاملي بي حسن النية معاهو ولا نظام الفورة مليون :)
ما بعيد يكون دكين زاااتو او ناذر :)

البوست بي قدرة قادر اتقلب لي مباراة تنافسية بين دكين وعمر ضد مجموعة نساء والسبب مداخلات اخيييرة فجبت ما قبلها (ياخ الايام دي انا متجدع بي مصطلحات مبااالغة).
المستغرب ليهو انا هل اختنا اماني سحبت مداخلاتها بناء على مداخلتي الاخيرة ام بناء على ما كتب دكين مع العلم إنو اماني عقبت على دكين وعليه يبدو إنو اماني حذفت المداخلات بناء على مداخلتي الاخيرة .
وإن كان كذلك فده معناها إنو اماني ابد ابدا ما زعلت من كلام دكين بقدر ما انها حست من مداخلتي نوع من الاساءة الشخصية ليها بافتراض عبارات وردت مثل نشااز وشترا ووو
يبقا الناس اللي جات هاجمت دكين مبدئيا ما ليهم حق ما لم تكون دي ردودهم حقتهم هم لي دكين عشان ما تتشخصن الحاجات وتقا دكين واماني..
ويا بت قضيم خيتي صدقيني بالنسبة لي القصة الاخيرة دي فياخ اماني والله بي طريقة غير مباشرة غلطت على دكين وكتبت كلام الزول ده ابددددددددا ما قالوا ولاااا جاب سيرتو بافتراض انها حاجات تم مناقشتها هنا زمااااااااااااان ..
اماني يبدو انها جديدة في المنبر او ما مواكبة لي قضايا اتحسمت سواء بالسلب او الايجاب لكن ردت على دكين من منطلق انفعالي فيهو نوع من الشفتنة المبطنة وفي بالها الزووول ده انا حا اوقفو ليكم عند حدو ..
ما بلوم الزولة دي على سحب مداخلاتها عن نفسي عملتها قبل كده في بوست لي حليمة وكنت في سجال مع عزاز بيسبب دبرسة وفهم غلط وصل لي ناس ..
اي زول حر في مداخلاتو والقصة عشان ما تكبروها ساي لا انكسار ولا ضعف من اماني البت رأت إنو الانسب تشيل مداخلاتها وين المشكلة ؟؟
بكري مرات بيشوف من الانسب يوقف عضو عدييل وين المشكلة ..
العنف اللفظي البيتكلموا عنو بعض النساء هنا والله في منو كتيير كتبنو النساء ديل زاااتن تعابير مخلة بي الاداب اقل ما توصف بيهو انها تافهة وبي مفهوم معادلات راجل مرا حقتكم دي فمروض لو الراجل كتب للمرأة الخجول التي يخدش حياءها بعض التعابير فمفروض لمن المرا تجي تقول تعابير ساقطة فكمان الراجل يدخدش وبي الضعف كمان !!!
لكن طبعا لمن المرا تكتب تعبير خادش فبيكون اما هظار او والله هي ما قاصدة او لالالالا ياخ بس هي جات توريكم انها شفتة ومقدداها وانها ضاربة السما جير فما تتصعلقوا علي يا رجال..
الارشيف ملاااان من ساقط قول نساء المنبر مش كتابة بس لالالالالا صووووت وصوووورة اخير الرجال تراهم بيكتبو سااااي!!!
ما ننجرف بعيد ومعليش بت قضيم ارجعي لي موضوع التربية وما قصدت اي شي والله لا نبز لا شكل لا تكسير مجاديف ويا اماني ياخ لو سبب حذف مداخلاتك شعورك بي اننا بنستهتر بيك فده ماا حاصل ..
تخريمة :
كالعادة ستتشنقل المداخلة فوووق لي عطل في الكمبيوتر فبالله جيبوها لي تحت عشان البوست يمشي كويس..

استعدال التخريمة :
سناء خالد دحين انتي مش بتاعت القصة حقت الدخلة والعرس ديك ؟؟؟

بت قضيم خيتي:
صباحات الله بي خيرا..
الرد تاني حا يتشعلق فوق وجيبي ايصالاتك ساي خيتي واقطعي لي الايصال ..
والسبب بكل بساطة انا عشان ارد عليك تصدقي بمشي اضغط على (رد) اللي بعد ماداخلة تبلدينا في الصفحة الأولى دي الوحيدة البتديني مساحة اضافة رد والباقيات كللهم مقفلات بافتراض حاجات تكنيكل انا عارفا تتعلق بي ظروف العمل..
ما عايز ازحمكم بي تبريرات الردود دي بس صدقيني معظم مداخلاتي في كتير من البوستات وعدم حتى متابعتي لي بوستات فتحتها انا تكمن بسبب المشكلة دي ..
اها لسة مصرة على الايصال ولا ممكن اسوق من غير رخصة عادي؟

طيب ياخ نجي لي كلام اختنا سناء خالد القلتي زعلت منو وإن كنت ما عارفا زعلت من شنو لكن ما بيناتنا خلونا نتسلبط زيي سلبطتكم دي ..
ومع اني ما كنت قاصد حاجة بتزعل لكن أهو طلعنا بي فايدة وقدرنا نزعل سناء خالد لكن انا حا ابقا شفت واتعذر ليكم بي حاجات تقبلوها مني كردة فعل وما تغالطوني فيها اسة اسة حسيتا وعايز اتسلبط فيها واعملا عذر منطقي جدا لي ردي البايخ(كما احسن سناء) ..

Quote: و وصلت لإنسانة في أدب و علم و فكر ..أماني... أنك لا ترى منها سوى ذيل فستان و لا تسمع سوى طرقعة كعب عالي..

والله ده كلام شين شين شين وفيهو اتهام لي في اخلاقياتي وطريقة تفكيري وطالما اي زول بيفهم الحاجة الاتكبت زي ما اتلقاها هو ف اكيد ما بيهمني ماذا عنى صاحب المداخلة !!!
مش اسة هي حاسبتني اني قلت ليها (بتاعت) وفسرتها بي كيفها؟؟
اها انا كلاما الفوق ده بالجد حسيت فيهو امتهان لي بي صورة ما طبيعية وطلعتي اخرتا بتاع ازيال وكعوب !!
بالمناسبة يا سناء في مجتمع الشارع تعبير (ذيل فستان ) ده حاجة ما جميلة خااالص خااالص ..
وبعدين ادب دي بتقصدي بيها ادب حقت الادب العربي والقافة ولا ادب حقت البيوت ؟؟؟
لانو لو قصدي الادب حق البيوت تكوني باااالغتي والله فلا انا هبشتها في ادبها ولا في اخلاقها ولااا من حقي زاتو ولا انتي من حقك زاتو تتكلمي عن الحتة دي ..دي حاجة بتعرفا هي براااها وحقتا هي برااها..

دي كده واحد خلتني اكتب (حقت)

Quote: عمر الفاروغ جدا جدا

دي كده اتنين ..
حا تقولوا لي بتهظر مش؟
والله انا زااتي بهظر ياخ ..ما تشوفوني كده بحب الهظار زيييكم والهظار ما حكر على الناسء بس مش؟
بالمناسبة ابدا ابدا ابدا ما قريت يا بت قضيم موضوع البت سماح القلتيهو ده ولا متزكرو والله حتى لو ممكن اكون كتبت بس ماا اظن ومستحيل فانا بي طووولة لساني دي عندي حتت كده ما بخشها ولااا بشوفا..
بس القصدتو انا رواية اتوقع انها كانت في موقع اخونا فيصل نوبي وبرضو اتوقع كانت مشعلقة هنا وانا ما عارف اسمها لكن اتشابه علي البقر وفكرت انو كتبتا سناء خالد ولحدي اسة البقر متشابه فلو طلعت ما هي التقول لي ..
قصة كده كانت بتحكي عن تفاصيل دقيقة لي بت من قبل العر والتفاصيل اياها لحدي يوم العرس ومشينا الفندق وشنو وشنو وشنو ..
ما بكضب عليك جني وجن التفتيش في الارشيف مع انو قاااعد لكن ما بحب ارجع للوراء والا كنت جبت ليك ارشيف ناس بتتفاصح اسة وتتمشدق(الكلمة دي جاية هنا؟)
يلا يا جماعة واحد يكسب فيني اجر المناولة ويجيب لي ردي ده تحت بدل شعلقتو الفوق دي..

تخريمة :
سمحتي لي نفسك تقولي لي فاروغ اسمح لي نفسي اقول ليك بتاعت ..
حلو الكلام؟

Quote: عمر الفاروغ هو الاسم السميت بيهو نفسك في بوست تيسير المحذوف يبقى ما تلوم أي انسان يناديك بيهو

!
سميت بيهو نفسي لييي روحي دي ما قلت نادوني بيهو ..
بنفس مفهومك التعبان ده سمحتي لي نفسك وجيتي بي كرعيك انا ماسالتك استحملي ..
اقول البقولوا طالما انتي ياخ اي كلام بقولوا بتسمعيهو وتصدقيهو فياخ ما كان في داعي تزعلي من بتاعت دي!!
يعني حا تشتغلي على كيفك؟؟
اذا كانت الاجابة نعم على كيفك فانا كمان على كيفي او كما يقول الاستاذ عادل مسلم :
علي كيفك تفوت علي كيفك تعال وفي رواية تجي..

Quote: أفتكر جاوبتك بخصوص القصة أو الرواية فصحح نظرك و ما تحاول تشبه تاني!

بشبه والله ..ويخلق من الاسماء اربعين طلعتي ما انتي خلاص ما انتي طلعتي انتي خلاص انتي ..

Quote: أما باقي الهراء الذي عمرت به مداخلتك فهو أسلوبك الذي يشبهك تماما

طالما شبهتي اسلوبي بي فوالله ووالله ما تشوفيني كده بالجد جد انا وجيه عدييل وروحي عاجباني وعليه شكرا لتشبيهك لي اسلوبي بي مما يدل على جمال اسلوبي ..

Quote: أعتذر لنفسي أن وضعتها في مكان يسمح لك أن تخاطبني به!

اها ياااااااااا سناء جميل !!!!
طواااالي تشيلي نعلاتك وتطقطقيها في وشنا ده (ما نعلات كعب عالي معليش) وتقولي لينا هووي ده طرفي من مكانكم ده تاني ما جاياهو ويا ريت وانتي طالعة تشيلي مداخلاتك معاك او تنتظري حتى تتم العشرة وتشيليها عشان ما تجي ناطة كل شوية !!
بالمناسبة انتي بتقري مجلة ميكي كتييير وتأثرتي بي روايات ادهم صبري خوووولص خوووولص ..قولي لي كيف؟

Quote: الهراء

ثم غاااص في بطن الاول وركل معدة الثاني ودس سيجارة بين شفتيه وتناول القداحة في جزء من الثانية لكنه فجأة سمع صوت سونيا جراهام وهي تقول :
هراء ..

تخريمة :
اوصيك المرة الجاية تستخدمي كلمة تراهات الايام دي طالعة في الكفر اجمل من هراء دي لانها بتديني احساس كديسة كديسة

ولاتزال المخالفات المرورية والايصالات تتقطع والرد يتشنقل فوق ولو دومة بارتني شكلها حا تدخل الجنة من اجر المناولة ده .

اها يا بت قضيم طبعا بطلت احكمك في المقارنات لانو فعلا اي شاة معلقة من عرقوبها (طبعا شاة دي مقصودة زي بقر بالمناسبة عشان تاني ما اتعب سناء في التفكير) والشاة هي الغنماية برضو عشان ما اتعب سناء في التمحيص مع انو سناء دي احسن زول بيقرا الجوة النفوس براااها تقرر وبراااها تفسر وبراااها تقصدك وبراااها تقوولك ويا قول جمال عبد الرحمن في مسرحية المهرج :
تطلع براااك ..تفتح باب السجن براااك ..تجي راجع براااك ...وتجيب معاك الغنماية ده برااااك ...
قايلا هممممممممممللللللللة ساااااااااااااااااااااكت!!!!
هييييه ما علينا ..
وعليك الله يا بت قضيم بس السماااح عشان عولقنا ليك البوست ..

Quote: و المقصد الدنيء ليس خاف لا عليك و لا على أي شخص يقرأ عبارة عمر (و ليس استفساره فعمر لا يستفسر)

أهو اسة بي الرجااالة كده عايزة بت قضيم تقول ليك ما خافي؟؟؟ انا هيين دواخلي بتتقري سريع اصلا بعيد عنك شفاااف وشوفتي شفا وزعلي بيشفق بعترف ..لكن بت قضيم دي عايزة تغالطيها فييييييي بتم ام رويحة دي؟؟؟
بعدين انتي مالك يا زولة ملافظك سعد دنئ وقمئ و شفيييئ .. وشفييئ دي تم فيها تحويل القاف لي ييئ للثقل والمصرنة وشفيييييييئ يااااااا رااااااااااااااجل ..
تعرفي تلقيك انتي النوع الاسة بيناضم نفسو ونظام يااا اماني لا عليك الاولاد العاملين ليك فيها صعاليق ديل انا بطيير ليهم صعلقتهم دي في راسهم وطارحة نفسك مطرح القوة والعراك في غير معترك ونافشة رويشاتك (لازلت اواصل مسلسل جنينة الحيوانات دون ان اضطراك للدخول لاعماقي لمعرفة مقاصدي..)

Quote: و لا أعتقد أن إشارات سقيمة

يا بت انتي بتقري كتب تفسير كتير؟؟
بس ذكرتيني سؤال متى كذب سيدنا ابراهيم عليه السلام ؟؟ فقيل أنه اضطر للكذب عندما ادعى انه سقيم يوم ان كسر الاصنام ووضع الفأس في رأس كبيرهم ..غير ان هذا التفسير جاء في إبن كثير بينما يقول البيهقي السقم هو المرض وهذا ما خالفه كتاب الكلام الاخلاق في سيرة العشاق للكاتبة سناء ..
ياخ الله يرضى اطلعي من دور التصدي الخاشاهو ده فلا انا فاضي ليك ولا انتي فاضية لي مش؟

عايني عايزة تصلي لي شنو من الاخر كده ياسناء اكتبيهو لي هنا وانا ببصم وبقر ليك عليهو واصادق ليكك بيهو عشان ترتاحي ..

تخريمة :
قدر ما حاولت اجيب اغنية خواطر فيل هنا غلبني عشان اتم طقم الجنينة ده .

والله يا بت قضيم زعلان من روحي عشااان في اول مشاركة لي معاك بشتنت ليك البوست بعد ما كنت ماشي كويس لكن يا ستي ارفعي يدك من البوست ده اصلا كده كده ماشي الارشيف ابدي ليك واحد جديد خيتي وهناك ما بجييك خليني النتم البشتنة للمبشتنين او كما قال..

Quote: أها يا ود يا عمر

ياخ والله شخصيتك طلعت مكشوووفة واكدتي لي ما كنت اتوقعه عن انو مخك حا يكوون ااااااااااااادي كده هو ..(اترك ليك خيار الحاجة الممكن اكون اشرت ليها عشان اوصف ليك عقلك ..)
تصدقي عرفتك جدا انو اكككككككتر شي حا يحرقك من المداخلات دي كللللها تعبير يا بت !!!!!
حولاااااااااا وجيتي توووشك تتسدي بي الود عمر لأ ونظام في خاتمة المطاف ..لالالالا لكن ختتتتتتري يا طه حسين !!

Quote: طبعا نفسك و منى عينك تخلص مني و بأي طريقة و أي أسلوب

مش قلت ليك انتي ببتأثري بي القصص البوليسية ؟ يا بت انتي تختخ بيبقا ليك شنو ؟(يا بت دي والله عفوية ما زي الاولى ديك سمح؟)
البيقرا كلامك ده حا يتخيل إنو حا اعزمك في الريفيرا واكلم النادل( اووو احب MBC2 ياخ) والنادل هو الجرسون للناس الما بيحضروا ام بي سي تو واقوم اديهو كيس صغير واقول ليهو كب من السم ده شوية في كباية العصير حقت البت سناء خالد(لسة بت بتجي بي عفوية) وتقووومي كده تشربيهو وتقووومي كده ججججججججخ تقعي في الكرسي ورقبتك متنية ولسانك طالع برة وقد فارقتي الحياة !!!
حولااااااااااااااااا لكن من خيالك يا لوزة !!!
اتخلص منك شنو يا بت الناس واسلوب ايه وطريقة منو والله يا سناء راسي ده فيهو حاجات كتييييرة مهمة شديد سبب واحد يخليني ازحم راسي بيك ماف ..
ياخ زول عندو محمد عمر الفاروق ده تاني بيزحم راسو بي حاجة ؟؟؟ حولاااااا لكن ..

Quote: أنا فضيت ليك روحي مخصوص يا عمر

لالالالالا كده بزعل منك بالجد ..
ما تعمليني سبب لي فراغك وفضيانك الله يرضى عليك ..
ونصيحتي ليك خليني في هامش حياتك ما تديني اكتر من وضعي ..
ويااا قول عادل إمام في مسرحية الزعيم :
حجمييييني .. حطيني في وضعي ..

Quote: ما من الأول..! من لحظة ما قريت دي Quote: سناء خالد دحين انتي مش بتاعت القصة حقت الدخلة والعرس ديك

كضبا كاااضب ..وكضاااب كضااب يا البعيو يمين كضاب ..انا ما كضاب انا ما كضاب..
ياخ انتي فضيتي لي روحك من ما جيتي ودخلتي ورديتي على مداخلاتي بي سطور طويلة عريضة وقبل ما اعرف اسمك زاتو وقبل ما اسالك السؤال ده ..وكدي لاحظي ترتيب المداخلات شوفي منو فينا اللي جا هبش التاني اول سمح ؟
هو الفضيان ده غيروهو ؟؟؟ (الفضيييان ما الفيضان يا ناس عشان ما تقولوا كتبتها غلط)

Quote: أصلو أنا روحي دي بريدها و خاتاها في حتة عالية و بتعلى أكتر كل ما الزول القدامي بيهبط

ياخ علييك الله ما تشفي وعايني في ورقتك ..
يعني بس عشان انا قلت ليك روحي عاجباني ووجيهوني تقومي تتسلبطي وتقنعي روحك انك عاجباك ..
اصصصلو ما عاجباك والله روحك زاتا بتكون مضايقة منك ..واااضح جدا انك عدو نفسو والنوع الممكن عااادي جدا تقيفي قدام المراية تديري حوار مع نفسك الكارهاك دي لمااااااان تتكيفي في كنكوجك (الكنكوج هو المنطقة اسفل الكعب العالي )..

Quote: ) كنت بصدد توجيه نقد -بنَاء ..هدَام ما مهم- للقصة 2) كنت بصدد تسجيل اعجابك بيها 3) و الا كنت عايزني أمضى ليك أوتوغراف؟

هممممم ..اممممم ..امممم وبدا يفكر كما في مجلة ماجد ضاربا باصبعه على اسنانه وبرجله على الارض وفوق الراس طالعة دورانيات كده..

الحل في الحلقة القادمة ..

الاعزاء .. اسف ان فاتني هذا المقال منذ ان نشر .... امر مرادف وربما هو الذي يتحكم فيما بينته الاخت/الابنة " الادب" وهو "الحياء" .. كلاهما لا يفترقان وكلاهما ليس لهما "جنس" معين ...الالفاظ النابية هي التي تتجاوز هذين المعنيين وتنطلق خارجة دون رقيب ...لست منزها ولا من غير شاكلة ذكور بلادنا ولكن لم اتناول هذه المسميات خلال عمري لانها لم تتردد عشوائيا اصلا في مجتمعي الصغير الاسرةوالتجمعات التي اخترتها لانتمي اليها ولان ترديدها ليس معيارا لتاكيد ذكوريتي وانوثية غيري فلا انا محتاج لترديدها لاثبت ذكوريتي ولا الانثي التي اعرفها وهن كثر من افراد اسرة الي زميلات عمل وصديقات يحتاجن الي تذكيرهن بها .. فالاعضاء التناسلية لها وظيفتها واهميتها الكبري في حياة البشر مما يجعل لها قيمة وخصوصية تتجاوز العبث بها ولذا تبقي مصانة من العبث اللفظي والمادي ولنا في قواميس اللغات المتعددة التي نعلرفها مخزون من الفاظ وتعابير غيرها لتناولها ان اردنا وفق الحالة ووفق المترادفتيين الحياء والادب .....

ارتبطت بالنشر والكتابة الاليكترونية منذ عقود ثلاث وصرت ناشطا في منابر اليكترونية خاصة وعامة منذ منتصف الثمانينات وقبل تحرير الشبكة الاليكترونية بعقد من الزمان وبالتالي لا اجد انها الا ادواة عصر متقدمة للعمل والمخاطبة والاتصال(وسائط اتصال) والعمل .. وعملي من اوله الي اخره وفي مجمله يتطلب ان يكون اليكترونيا فبالتالي كتاباتي اليومية وادارة المشاريع وتدبير احوالي المهنيةى والوظيفية والشرائية تتم اليكترونيا وبالتالي فانني اهتم كثيرا بكل كلمة او حرفا ادخله مستعملا الكيبورد .... المنابر واجهات مهمة ولا تلغي الاتصال الحسي وانما تساعد في تسرييع الاتصال ...الحاجز النفسي والافتراضي الذي يعشعش في مخيلة من يستعمل الواجهة الاليكترونية بحيث يظن ان الاخر غير موجودامامه وان ما يمكتبه او يتلفظ به اليكترونيا يحميه من ان يكون قد تجاوز حد الادب والحياء فهو واهم وجاهل لحقيقة الواجهات الاليكترونية التي نستعنلها في زماننا هذا يوميا...انا اكتب الان وفي خاطري اناث وذكور وعقول واحاسيس ولذا فانا لست وحدي ولا اخاطب نفسي انني اخاطب جمعا عظيما وبالتالي ما اكتبه اتحري فيه الدقة حتي ولو كان مزاحا او مناكفة تماما مثلما افعل وانا او اجه الاخر حسا وجها لوجه ....
الواجهات الاليكترونية اليوم هي بنوك ومصادر اخبار وادوات اتصال وعمل سياسية واجتماعية ودراسة وعلم وشهادات واقتصادية ونضالية ( وانا لا اشارك من يري في نشر الراي الاخر هو نضالا للكيبورد(اي هامشيا) وحملات الانتخابات وتعينات سياسية وتحركات عسكرية وغيرها تتم من خلال هذه الواجهات وبواسطتها ولرؤساء كثير من الدول واجهات اليكترونية يخاطبون من خلالها شعوبهم وجماهيرهم..الخ )... الان للكتابة الاليكتروتية قوانين واحكام وملكية فكرية تحميها ومن يستغلها لا غراض شائنة او عدوانية ينال عقابه مثلما يحدث خارج الشيكات الاليكترونية .....

ليس من حق الرجل او المراة ان تتجاوز حدود الحياء والادب اليكترونيا بحجة ان ذلك يحميه او يحميها وعموما الاصرار علي تقليل شان شريك اساسي في الحياه ذو قيمة حياتية واجتماعية ابرز كالمراه فهو نوع من جلد الذات فانا 1ذكر ومن بعض ارث ذكوري ابغضه لا اري قيمة كاملة لي بغير امراة في حياتي ام وزوجة واخت وابنة وصديقة وزميلة عمل ....

مودتي واحترامي
ابوبكر سيداحمد

سلام للجميع
واعتذرعن تأخر الرد المشغوليات كتيرة
-----
حبيب نوره
حبابك
وفي الانتظار
بس ما تزوغ
------------
أماني ودينا

واصلو،، رأي بكتبه بعد شوية بمزااااااج
عمر الفاروق
بتتعوق، اخير ليك
-------------

تك
بووووز (موضوع البوست)

دكين العزيز

الحق لله، جلست أفكرر كثيراً في رد يضايقك ويحبط أملك في محاولاتك الاستفزازية
للحق يعني فكرت اطنشك، رغبة مني في عدم فتح حوار ممطوط قلناه كثير قبل الآن
فكرت اغيظك ولكن
اني في لحظة نادرة من التجلي، لذا
اعترف امام الملأ، بأن لك قدرة عجيبة في إثارة إحساس غريب كده ما قادرة اسميه أشبه بالغيظ وبعيد عن السخط
اتكيف لردك مع اختلافي معه
انبسط لوجودك في أي بوست اكتبه واتمنى في نفس الوقت انك ما تتداخل فيه.
يعني أطبق المثل السوداني القائل (لا بريدك لا بحمل براك)

واني والحق يقال، بريدك، لله فالله كده، ربما لعشرة ماسنجرية كانت، وربما للطف ردودك وجمال استفزازك، وربما لطيبة فيك أدركها وأعيها
ودعني بتجلياتي هذه أسألك سؤال بسيط المفروض كان سألتك هو من زمان
أنت مالك؟؟!!
ما هي الأسباب والدوافع الخفية التي تجعلك انسان مشاكس درجة أولى، مزعج بطريقة طفولية تضايق ولكنها تضحك في نفس الوقت،، موودي، زهيج ،، مكابر،، مغالط،، مفتري مرات مرات؟؟؟
معليش
أنا بسأل باعتبار أنك بتاع (تحليل شخصيات) و (فاهم الدنيا ومقددها) وأنك تعطي الحق لنفسك في كتابة سطور من حياتي التي تظن انك عارفها جداً،
تظن أنك فاهمني صح؟؟
حللتني في أكثر من موقع، وبصمت بالعشرة أنك عارفني بل تماديت وألمحت أن سبب توقفي عن البورد الفترة الأخيرة كان بسبب زواجي وولادتي أو شئ من هذا القبيل
بل أنك قلت أنك (شفتني) قبل كده
والآن تؤكد بمنزلاتك حيث أنت أكيد أنك (لا تنطق عن الهوى)، أنني ضعيفة وبتاعت كلامات ونظريات وأنني خايفة ومرعوبة من وضع صورتي في البورد
تعتقد جازماً أنني سأرد وأنفي وأحارب لرفض هذه الصورة، دفاعاً عن صورة المرأة المناضلة التي رسمتها لنفسي
وببساطة حارد اني مش ملزمة بتفسير يرضيك،،وببساطة اتساءل (ما دخلك؟؟)
يعني ايه؟؟
يعني ايه لو كنت معقدة؟؟
هل ستفرق معك يا دكين لو أن بت قضيم بصورة أو بدون صورة؟؟
هل الشكل يمثل هذا الفارق الكبير بالنسبة لك؟؟
هل الصور تعني عندك (الحرية)؟؟ واللا الحرية عندك (صور)؟؟؟

عايزة أقول (ومش ملزمة أقول) أن الصورة يا عزيزي، وضع صورتي في أي إطار نتي كان أو صحيفة أو غيره، لا يعني بالضرورة تحضر واستقلالية...
كما أن عدم وضع صورة ليس بالضرورة عقد أو خلل ما..
الاستقلال – يا كابتن- يأتي من القلب وليس من القالب
يا متخلف
ربما يوم الم شعري في تسريحة الثلاثينيات، هل يعني ذلك انني انتمي لجيل الثلاثنيات يا دكين؟؟
رجاء
تجاوز ما فوق رأسي وصورة وجهي فما داخل رأسي وخلف وجهي هو أنا، وليس العكس،
ليس صورتي التي خلقني الله بها دون تدخل مني، يمكنها أن تحدد استقلاليتي وعلمي وفهمي بين الناس
رجاء
تجاوز (صورتي ) و( حياتي) وحاول أن تتعامل مع انسانيتي وحروفي

وبالمناسبة،
ما رأيك ؟؟
نقلب الادوار شوية؟؟
تحب أعطي لنفسي الحق في تحليلك يا دكين بدون أن تستاء مني وبدون أن تحس اني بفرض رأي عليك؟؟
حسناً
يا دكين
من يتعامل بقانون (الهجوم خير وسيلة للدفاع) انسان ضعيف
أنت حنين غصباً عنك، كعادة معظم الرجال، تعتقد أن (الحنية ) نقطة ضعف، تخازل وجبن فتنفيها ببضع تصرفات صبيانية تحاول بها أن تلفت النظر لرجولتك التي تظن أن (الحنية) ستهزها وتهزمها في مقتل
لكنك انسان كويس
فكرة (المرة من بنبرا ولي ورا) ولو اني والله مش فاهماها كويس خالص، واعرف أن معناها أن النساء لا تنفع سوى لإرضاء غرائز الرجل والتي برضو نفيت أن جيلنا حتى دي لا يتمتع بها، مع انك مش عارف مثلاً من أي جيل أنا، لكن بمنزلاتك افترضت أنني من ذاك الجيل القايم ليك في رأسك أنت

بمنتهى (التغابي) مرة أخرى، تفرض الصور التي يرسها لك عقلك ، فتظن أنها هي الواقع المعاش
تأبى أن (تطلع شووووية) من صورك الخاصة، لتتمتع بصور الناس الأخرى المحيطة بك
يا دكين
عندي سؤال تاني وبمنع نفسي اسألك لأنه سؤال شخصي أولا وثانياً لأنه ما كان بهمني كثير
لماذا تعيش حياة محورها البحث عن (شريكة) تعيش حياتها معك؟؟
ما أي (مرة من بنبرا) تنفع
لماذا تجاوز الأمر حياتك ومجتمعك والاسفير الذي تعيش فيه، بحثاً عن إمرأة ؟؟
لماذا لا تختار (أي مرة من بنبرا لي ورا)
ما هذا التناقض الغريب
ماذا ستفرق معك أن تعرفها أو أنها متعلمة أو تجيد الحديث؟؟
أليس قناعتك أن (الحوار المنطقي) لن يفلح مع ال(مرة)؟؟؟
لماذا إذن تبحث عن شئ وفي نفس الوقت تؤكد للعالمين أنه شئ غير موجود وشئ مستحيل؟؟
غتاتة يا ده واللا (تشوش فكري) ساي؟؟

هل أنت (طال عمرك) بداخلك تعلم تماماً وجودها وتخاف الاعتراف بها، خوفاً من ضعفك وحنيتك المشار إليها أعلاه؟؟
دعني أقول (وكان ممكن أجيبها من الآخر كده بدون ما أفسر لأني نعسانة اليوم وما قادرة افسر واحترم رأي آخر بقرأ معي) دعني أقول...
الضعف والتناقض ليسا مشكلة كبيرة إذ هي مشاكل قابلة للحل،
والجهل في حد ذاته مش مصيبة كبيرة إذ برضو قابل للحل بالعلم
المشكلة مثلا لو أن الظالم ما عارف انه ظالم
ومصيبة (الزعزعة) و (عدم الثقة في النفس) أن لا تدرك نفسها، أن يظن صاحبها العكس تماماً، وأن لا يدرك مدى التهالك الذي هو فيه
وفي النهاية
ببساطة خالص
تاعب روحك مالك وانت اصلاً ما قادر أو (ما عندك مزاج) تفسر

سيب الناس العقد دي، مع الرجال المجاملين ديل في حالهم
خليك مع الناس ال(فري) والرجال ال(دغرية) واستمر
واقف في المحطة دي مالك وانت قرفان من شارعها؟؟؟
و
ششششش
تك
بلاي (نرجع للبوست)

Quote: معليش أنا الظاهر ضيعته زمني معاك زي ماقالت بت قضيم

الاخت اماني
انتي ماضيعيت زمنك..انتي زمنك اصلا ضايع طبيعي..




وتصدقي انو الزمن الراح في ردك عليّ ده هو الزمن الحقيقي العشتيهو لحدي هسي في طول عرض حياتك

ودي برضو وجه نظر يعني ما مجبورة تصدقي الحتة دي..

اماني شكر الله سعيكم..

(إمبل ُدب) بالدنقلاوية = مع السلامة

يتضح جليا انك شوية كده فهمك ما حبابو

Quote: هل ستفرق معك يا دكين لو أن بت قضيم بصورة أو بدون صورة؟؟ هل الشكل يمثل هذا الفارق الكبير بالنسبة لك؟؟

ياخي انا مابتفرق معاي ..انشالله تكوني مصنوعة من دخان ..
بس انا لامن قتا ليكي داسا صورتك وعاملة نيك نيم كنتا بوريكي التنقض في كلامك الفوق

Quote: تخيلي أن أكثرية هنا ما زالت تعتقد ن مشاركة ال(البنت) في النت، وعمل علاقات مع زملائها من النتيين لو صح التعبير، هو منتهى قلة الأدب منها؟ وأن الكثير (لو مش الكل) ما زال يظن أن وضع صورة الفتاة في المنتديات هو عين العيب والخطأ

يظن التحتا خط الفوق دي ماجات خبط لزق وانما جات نتاج شوف وبرهان
يعني شافو واحدة زيك مستنيرة وتدعي الافراح والبؤس احيانا داسا صورتا وخاشة بي نيك نيم..

ودي مادايرة اجتهاد وتحدي ولا هو استفزاز عشان اخليكي تنزلي صورة اوغيرو ..بس الحقيقة هي انك خايفة من وضع صورتك ..

تكابيرلا تنككري تبربري بي منطق او بدون منطق ده انتي في جواكي عارفة الكلام ده..
فياخي ما تحاكمي ظنون غيرك

دي كل المسالة فيما يتعلق بي موضوع صورتك..


باقي الموضوع بتاعك ده هو جزء من سلسلة مواضيع نسوية طغت على المنتديات والجرايد وونسات الصوالين
مواضيع نابتة من قرايات خاطئة لحقوق المرة في المجتمعات الافريقية والشرقية بشكل عام..
قرايات غير راشدة لي تجارب نسوية في الغرب..
اندهاش بتجارب عالمين ومحاولات لم تراعي الفارق في الربط بينها وبين تجارب النساء في مجتعاتنا..
فجاة النساوين يطقن الزيطة والزمريطة في كافة انحاء المعمورة
جندر وماعارف حقوق ومساواة ويوم المرة وعيد الشجرة ومحاولة ركوب اي تاء تانيث غير محتفى بها..

الذكورة وماعارف الاقصاء والاوبس والقاينا ومصطلحات تم ترجتمها من قواميس غربية لتتقافز في سوء ظنكم تجاه الرجال في دنيانا..

اعحبتكم تجربة نسوان رائدات في مجتمعات كانت المرة فيها فعلا من بنبرا ولى ورا..
فجاة كده كل النسوان ديل عايزين يبقو فاطمة احمد ابراهيم وسعاد آشا..


بعدين ياخي بحثى عن شريكة القتيهو ده والقتي فيهو لاازال (اعيش)
بلاهي شوفي مقدار الامد في اعيش دي قدر شنو ..
من سنين معرفتي الاولى بيكي- من حوالي سبعة اعوام- وانا لا زال اعيش..
تفتيش وبحث وكتابة وبلا متلاحق ولا ازال اعيش وابحث..
ده بلاهي موش دليل على ضآلة المعروض في سوق نساوينكم..
الذي استلمو من اخواني والاصحاب اهو عايشين ..الواحد تسالة اها العرس كيف يمط ليك خشمو ويقول ليك: إييييييييييييييه كورة العباسية وكوبر انتهت كم كم؟؟

صدق اخونا الخواض حين قال انهن لسن للسرير فقط
اصلا الافتراض بتاع اسامة انو انهن فشلن في السرير اصلا ، فقام يفتش ليكم في مهام اخرى..
محاولة لايجاد وظائف ليكم في هذا العالم ..
بس حتى في دي فهمتوهو غلط ..

صبري الشريف
سلامات أخي
بالله اسم البوست شنو؟؟
والله ما قريت الحاجة دي لكن اندهشت من كلام التكفير القلته ده وعدم جواز الرحمة والكلام الكبار ده
نشوف كدي

المهم
بالنسبة لما تورده هنا يا صبري، وأنا طبعا مش فقهية ولا استطيع أن أقول اني متعمقة في الموضوع
بس اعتقد أن هناك خلط في كلامك بين الأحكام الشرعية والأحكام الوضعية

وعلشان ما اقول كلام مش واثقة فيه، ولأني مشغولة شوية اليوم
فحاجي راجعة إن شاء الله لتفصيل كلامك حيث عايز قعدة فعلاً

خالص الشكر وبالله ورينا عنوان البوست البتتكلم عنه إن أمكن

كل الود

الأخ أبو بكر
أنا اللي آسفة أنك لم تشاركنا من الأول

ما جاء في كلامك اعتبره بيان (مش دكتورة بيان) بيان يجب التمعن فيه بدقة

و

Quote: ليس من حق الرجل او المراة ان تتجاوز حدود الحياء والادب اليكترونيا بحجة ان ذلك يحميه او يحميها وعموما الاصرار علي تقليل شان شريك اساسي في الحياه ذو قيمة حياتية واجتماعية ابرز كالمراه فهو نوع من جلد الذات فانا 1ذكر ومن بعض ارث ذكوري ابغضه لا اري قيمة كاملة لي بغير امراة في حياتي ام وزوجة واخت وابنة وصديقة وزميلة عمل ....

حياك يا هذا
ولكي لا أشوه ما ادرجته هنا من كلمات اعتبرها (مضيئة) يا قول المثقفاتية فاكتفي بالقول
كفيت ووفيت
فششششششششششششششكراً كثيراً لك
دام اتزانك يا رب
سلمت

Quote: حياك يا هذا

يابتي العربي الغلات دة ما بقدر عليهو -: )

____

لا اظن اننا في بلادنا سنتقدم خطوات مهمة الي الامام ونحن في وضعنا الاجتماعي الان مصريين علي تهميش والغاء المراة تاكيدا لفحولتنا وذكوريتنا وتاريخ الكنداكات ومن حكمن بلاد ليس فيه شيئ من مثل ذلك بغرض تاكيد انوثتهن .. في موضوع اخر في هذا المنبر اشرت الي غياب المراة في محفل لجالية كبيرة في الاغتراب من خلال صور نشروها وانا عليم بكنداكات ضمن تلك الجالية وعرفت فيما بعد ان اثنتين حاولتا الالتحاق بلجنة الدار من خلال انتخابات فلم تنالا ما يكفيها من اصوات (ياعيب الشوم)... مقولة لا اجد فيها كثير من مصداقية هي تلك التي يرددها كثير من ذكور بلادنا "فلتناضل المراة لنيل حقوقها " لماذا ؟؟ هل ناضلتم لنيل حقوقكم الذكورية واستوليتم باسمها علي حقوق المراة ظلما واستكبارا ؟؟؟ لماذا تناضل لنيل حقوقها ؟؟ لماذا وهي حقوقها ؟؟ وتنالها ممن ؟؟ الستم الذين استوليتم -سرقتم- حقوقها ؟؟؟؟
مواجهة صادقة لواقعنا هي المخرج ... انني احث بنتي ولقد كبرن علي ان قيمتهن فيهن وفي اداؤهن وفي عقلهن وحفظ كرامتهن وكرامة الانسان اينما كان وليس هنالك من له حق في ان يمتلك حقوقهن بحجة ذكورية ما "

Quote: يظن التحتا خط الفوق دي ماجات خبط لزق وانما جات نتاج شوف وبرهان يعني شافو واحدة زيك مستنيرة وتدعي الافراح والبؤس احيانا داسا صورتا وخاشة بي نيك نيم.. ودي مادايرة اجتهاد وتحدي ولا هو استفزاز عشان اخليكي تنزلي صورة اوغيرو ..بس الحقيقة هي انك خايفة من وضع صورتك .. تكابيرلا تنككري تبربري بي منطق او بدون منطق ده انتي في جواكي عارفة الكلام ده.. فياخي ما تحاكمي ظنون غيرك دي كل المسالة فيما يتعلق بي موضوع صورتك.. باقي الموضوع بتاعك ده هو جزء من سلسلة مواضيع نسوية طغت على المنتديات والجرايد وونسات الصوالين مواضيع نابتة من قرايات خاطئة لحقوق المرة في المجتمعات الافريقية والشرقية بشكل عام.. قرايات غير راشدة لي تجارب نسوية في الغرب.. اندهاش بتجارب عالمين ومحاولات لم تراعي الفارق في الربط بينها وبين تجارب النساء في مجتعاتنا.. فجاة النساوين يطقن الزيطة والزمريطة في كافة انحاء المعمورة جندر وماعارف حقوق ومساواة ويوم المرة وعيد الشجرة ومحاولة ركوب اي تاء تانيث غير محتفى بها.. الذكورة وماعارف الاقصاء والاوبس والقاينا ومصطلحات تم ترجتمها من قواميس غربية لتتقافز في سوء ظنكم تجاه الرجال في دنيانا.. اعحبتكم تجربة نسوان رائدات في مجتمعات كانت المرة فيها فعلا من بنبرا ولى ورا.. فجاة كده كل النسوان ديل عايزين يبقو فاطمة احمد ابراهيم وسعاد آشا.. بعدين ياخي بحثى عن شريكة القتيهو ده والقتي فيهو لاازال (اعيش) بلاهي شوفي مقدار الامد في اعيش دي قدر شنو .. من سنين معرفتي الاولى بيكي- من حوالي سبعة اعوام- وانا لا زال اعيش.. تفتيش وبحث وكتابة وبلا متلاحق ولا ازال اعيش وابحث.. ده بلاهي موش دليل على ضآلة المعروض في سوق نساوينكم.. الذي استلمو من اخواني والاصحاب اهو عايشين ..الواحد تسالة اها العرس كيف يمط ليك خشمو ويقول ليك: إييييييييييييييه كورة العباسية وكوبر انتهت كم كم؟؟ صدق اخونا الخواض حين قال انهن لسن للسرير فقط اصلا الافتراض بتاع اسامة انو انهن فشلن في السرير اصلا ، فقام يفتش ليكم في مهام اخرى.. محاولة لايجاد وظائف ليكم في هذا العالم .. بس حتى في دي فهمتوهو غلط ..

دكين!؟!
انت صارف عربي قدر ده فوق كم؟
براحة علشان ما يجيك ضغط ولا يطق ليك عرق
المراة البناقشها هنا دي ما لازماك ولا هي مرادك
شن طعمك جاي تنظر؟

شاقي بحمد و مارق بخوجلي و شخصنت الحوار و بقيت في رقبة بنت قضيم
ما ياهو نوع الحوارات المأزومة دي الجابتنا ورا و خلتنا نباري الجداد
انت نفسك محدساك انو انت لا يأتيك الباطل من بين يديك ولا شنو؟

يا زول ؟ خليك في المرة اللي من بنبرا ولورا دي
واختى النساء اللي ليهن رأي و بتفاكرو فيه ..

انت موش عنقالي؟






وتيب؟

أخي أبو بكر
عندك حق ، حياك هذه ذي (قبلاتي) الكان كتبها تمبس قبل كده
سلمت للفهم الراقي
ورحم الله والديك دنيا وآخرة يا رب على هذا النبت الصالح
سلمت

يا عزاز
لا تعليق

دكين
أوكي

تحياتي للجميع

قبل اعوام جاوزت الثلاث وعند فوز الكنداكة الافريقية الين جونسون رئيسة لليبريا ( ومن ذاك الوقت هدأت ليبريا والتي كانت ممزقة بحروب قاسية ) كتبت الي مجموعة من الاصدقاء المبعثريين شتاتا في هذه الدنيا العريضة مطالبا بعودة زمان حكم الكنداكات ونشرته في مدونتي الخاصة sidahmed.blogspot.com وتعظيما لكل نساء بلادي اللاتي لولاهن لما تخطينا مصاعب كثيرة ومازلن يكابدن لترقية اجيال سودانية صغيرة واملا في ان ياتي اليوم الذي تواصلن ما انقطع فتدرن امر بلاد ارهقتها الحروب وفكر ذكوري بائس اعيد نشر ما ذكر ته :

Quote: Sunday, January 29, 2005 ترحيبا بعودة الكنداكات الي كرسي الحكم في افريقيا لسبب او اخر - وليس فيه مما يجول دائما في خواطر العاربة والمستعربة واهل المؤودات الذين استبدلو ؤادهن روحا وجسدا بتهميشهن فيما بعد والترفع عنهن بذكورية جعلوها سببا لذلك غافليين عن انه لولا انوثتهن لما وجدوا احدا يعير ذكورتهم انتباها - انا من الذيين يصنفون في بعض من هذا العالم بال FEMINIST كذلك تعنصرا ذكوريا فليس هنالك مثلا MALEIST ..... فالذكور كل حقوقهم مصانة غصبا واغتصابا لحق المراة والماعاجبها مطلقة بالثلاث !!! ليه ياخلق الله !!! وليه بالثلاث ومين انت ياخي !! قبل ان يذهب بخيالكم بعض من موروثات العاربة والمستعربة ورغما ان لكل فولة كيال فانا الان ليس في من فائض فولة للكيل فانا اخر "السطة " والحمدلله اموت في حب امي و زوجتي وبناتي واخواتي وبنات اخواتي واخواني وكل مؤنث في اسرتي ... اطالب منذ زمن في المنتديات النوبية بعودة الكنداكات الي قيادتنا فالنوبة لم تري ازدهارا مثل الذي كان في زمان الكنداكة الام سيدة كنداكات افريقيا ومنذ رحيلها بعد ان قادت ابنائها الي طيبة لتنقذ عرش فراعنة مصر الذين قهرهم البيزنطة فاسس ابناؤها الاسرة الخامسةوالعشرين وصاروا الفراعنة السود ... وبرحيلها صارت الشعلة النوبية تخبوء شيئا فشيئا حتي اتي زمان من فرض عليهم استرقاق ثلاثمائة منهم مقابل نبيذ للكنيسة رغم ان الخمر حرام"مش كدة ياجماعة والا ايه ؟" وزمان السدود من اسوان الاولي الي الثانية التي ابتلعت الارض والمقابر والثالثة التي سميت مروي نكاية بكل الارث النوبي في ارض تمتد ثلاثمائة كلم في داخل النوبة لتبتلعها بما في باطنها من اثار لم تكتشف بعد ... انا منشرح الصدر بعودة زمان حكم الكنداكات بوصول السيدة الين جونسون الي سدة حكم ليبريا –بعد ان مزقت ليبريا حروب الذكوريين - وامس كانت اخر روعة وهي تؤدي القسم بكامل اناقتها و حولها كثير من ذكور افريقيا والعالم الرؤساء وهم لابسيين استرتشات محزقة كا اشار الاستاذ ادم ضمنا واكيد كانو يتصببون عرقا خوفا من الزلزال القادم حين تعيد افريقيا سيرة "يا اسنتيوا الاشانتية " و" امينة الزاريةالنيجرية " و "كاهينا البربرية " و "ناندي الزولية " و"نزينق الانجولية " و"نهندا الزمبابوية " و"ماكيدا السبوية " و "نفرتاري النوبية " و"نفرتيتي " و"حتشبسوت " و"اماني ريناس النوبية " و "تاي النوبية " ... واكثر انشراحا لانه ياتي قبل ما يعرف بمؤتمر الذكورية الافريقي ومقدمته من اجتماع السيدات الاوائل وهو نوع من الدعاية للرؤساء الذكور تقمن به زوجاتهن غصبا عنهن واحيانا رضاء بدور هامشي فرض عليهن فاجتماعهن لا يودي ولا يجيب في مجتمعات ارثها السلطوي الذكوري هو الغالب ... فيا ذكور افريقيا الرؤساء و معظمكم من جماعة ابي عاج وابو عصاية وابو كرش جاكم بلا 17.01.06 ...! 26/01/06

من خالد غالي :

Quote: وجاء دكين وقال كلاما تظن انه اشتر لكنه في صميم الموضوع ... فهب فيه من هب ... فجاء وسحبه بحردة لطيفة محببة .. ثم مالبث ان جاء وقال المرا من بنبرا ولي ورا ... وحقيقي انا فرحت ... ثم جاءت بت قضيم وقالت ثابت بوست .. وقالت كلام لدكين طولت ماقالتو ليهو تلك لعمري بت قضيم البنعرفها .. وفعلا حسيت انو دي بت قضيم وحسيت انو سودانيز لسة بخير .. ثم امرت بت قضيم بمواصلة البوست كانما لم يحدث شي .... والحقيقة يابت قضيم اما انك عجزتي او انك صدقتي كلام الناس البيقولو ليك ده بتاع الرواد الاوائل وما ادراك ما الرعيل الاول وشنو ماعارف لانك ليك فترة كده كلامك رصيييين كده ومافيهو السخرية اللازعة الخفية اللذيذة ديك ... وبرضو يعني معليش لكن بقيت شايفك تردي علي اي مجاخلة حتي لو كانت علي شاكلة شكرا وبارك الله فيك ودي ما عادتك .. لكن كلامك الاخير لدكين ده ياهو كلامك وياكي بت قضيم البنعرفها ... ربنا يحفظك ويبعد عنك شر الرعيل الاول وبرضو بما انك خففتي من اللهجة البديتي بيها البوست ياريت تنظمي الكلام وتاخدي في الاعتبار الحاجات الاتفقو عليها الناس عشان تتوضح نقاط المناقشة .. ولانو برضو العنوان بتاع يوجد رجالة وما ادراك ماسوط عنج بقي ما مناسب . واصلي مع دكين لاني شايفو رد ليك وامتعونا ياخ بنتفرج فيكم من بعيد ولو في حاجة حرقتنا البركة في ايميل نازر الله يديهو العافية تحياتي خالد غالي

من جيم باهي :

Quote: الآخ الكريم ناذر الخليفة لك مني التحايا أجملها ولك تحياتي على بوستك الجميل بتاع الموصلي و شغله الجميل وغيرها من مشاركاتك في المنبر العام والتي تنبئ عن ذوق عالي ومزاج رايق وفهم جميل .. . وبعد فأنا واحد من المتابعين لمنبر سودانيز أون لاين منذ فترة طويلة ترجع للعام 2003 وكحال الكثيرين المتابعين من المساطب الشعبية من أمثالي أجد نفسي كثيراً راغباً في المشاركة والتعليق في أحد الخيوط المنثورة على هذا البورد العظيم لكن يقف الباسوورد اللعين دون تحقيق تلك الرغبة وفي هذه الأيام وجدتني مشدوداً جدا للنافذة التي فتحتها الاخت بت قضيم وودت التعليق والمشاركة وراجو تكرمك بإنزال مشاركتي هذه إن وجدت فيها ما يفيد. وأبدأ فأقول أنا النقاش المطروح جميل من الجانبين .. وطبعاً بت قضيم ابتدرت هذا الخيط من وحي المساجلة التي جرت بين عزاز شامي من جانب وود الباوقة والسيدح من الجانب الآخر وما حدث في ذلك البوست من (عنف لفظي) ضد عزاز فحرك هذا الكوامن لدى بت قضيم حول ممارسة العنف ضد النساء وقمعن وإسكاتهن باستخدام العنف اللفظي بسبب عدم مقدرة الطرف الأخر (الرجل) على الرد .. لكني أرى غير ذلك من متابعتي لهذا البورد فمثل هذا التصرف ليس حكراً على الرجال وحدهم .. فحتى النساء هنا كثيرا ما يلجأن لهذه الطريقة في حال انعدام المنطق والحجة .. فقط يختلف الأسلوب .. فإذا كان الرجال يحولون البوست إلى (بيت عزابة) من خلال العبارات التي يتداولونها والتي لا تستطيع السيدات مجاراتهم فيها، فالنساء يستخدمن اسلوباً آخر أكثر دهاءاً ومكراً وهو وصم الشخص المختلف معه بالتخلف الذكوري وعدم الإيمان بمساواة المرأة وتحررها وممارسة التمميز ضدها .. والغريب واللافت للنظر هنا أن (المتهم) في هذه الحالة يجابه بهجوم لا هوادة فيه من قبل كل العضوات ـ في بعض الأحيان دون حتى دراية كافية بالسياق والخلفيات) (بس وقفة لله كدة مع أختهن) إضافة لهجوم الأعضاء الرجال الخائقين من وصمهم بنفس الاتهامات إن هم لم يشاركوا في إبداء رأيهم وتأديب ذلك العضو (المتخلف) . على العكس من ذلك نجد أن النساء في هذا المنبر يتمتعن بحرية كبيرة في في استخدام العنف (اللفطي) فالواحدة تستخدم عبارات مسئية بجراءة تحسد عليها ودون أن يرمش لها جفن ولا تجد من يستنكر لا من العضوات ولا الأعضاء وحتى من يستنكر يستنكر على استحياء حتى لا يغضب معسكر النساء ... آما فيما يخص الهيمنة الذكورية والتمميز والإقصاء وما إلى ذلك من عبارات مثقفات سودانيات فاستغرب والله وأتعجب أين هذه الأشياء من واقعنا المعاش لا أعتقد أن هذه الأشياء موجودة وإنما هي محض توهمات وتخيلات في أذهان من ينطقن بها ... وحين ما انظر لنفسي مثلا أو لآي واحد أعرفه من جيلي ، لا أجد أنني أمارس هذه الأمور ضد زوجتي أو أنني سبق وأن مارستها ضد زميلاتي في الجامعة أو في العمل مثلاً .. فمن أين تأتي هؤلاء النساء بهذه الألفاظ ؟ وأدعو بت قضيم وكل من تعتقد بوجود هذه الممارسات ضد النساء أن تنظر إلى حياتها الشخصية .. إلى زوجها هل يمارس ضدها أي نوع من التمييز أو العنف أياً كانت أشكاله .. وهل لو كان الأمر كذلك كنا سنراها تشارك في مثل منتديات الحوار هذه ؟ بالله عليكن ضعوا الكرة أرضاً وحاولن نسيان هذه التوهمات التاريخية التي لا أساس لها أبداً .. فما تدعونه من تعرض للتمييز يماثل في رأي ما تدعيه إسرائيل من تعرض لمحرقة النازية .. تباكي وإدعاء بالتعرض للظلم واستدرار للشفقة لتحقيق المزيد من المكاسب والدعم .. من أمريكا والمجتمع الغربي في حالة تباكي إسرائيل .. ومن الرجال في حالة تباكي النساء ولك شكري وخالص تقديري آخي ناذر .. ولو لقيت كلامي ده كويس ونشرته وقتها سأتشجع وأمدك بكلام كتير تاني عايز أقوله في (الحتة دي) بإذن الله

تجربة المرة السودانية في المساهمات العامة - العامة دي غير تربية النشء والتحريض- دي مسالة قديمة لاتحتاج
الى تكرار ممجوج ومستهلك وممل من بنات هذا الجيل اللواتي لايحسن سوى البربرة في المنتديات والصحف باشياء هي بقت من المسلمات..
اشياء زي التقول اكشتفنها فجاة في صفحة من كتاب فطفقن يحاولن اللحاق بشي في الخاطر..
يعني بدل مايبدو من حيث انتهو رائدات العمل النسوي جايين بادين من حيث ديك بدو..
حتى القرن العشرين تواترت انباء عن دور المرة السودانية المتالق في كافة العهود التي انصرمت..زارعة
او كنداكة اومعلمة في الخلاوي او حوارة اومحرضة في الحروب او في اعمال الغناء الشعبي والهدايات..
النادي النسوي ده زمان حبوبتي قات لي سويناهو في ود مدني في 1926 صحي قام بي مبادرة من زوجات بريطانيات بس ضم لفيف من زوجات كبار الموظفين والعاملين في الحكومة الاستعمارية انذاك..
اسلئكم وهرجلتكم دي لامن ظهرت بصورة واضحة لامن كونو جمعية للمرشدات في 1928 جو المتخلفين الزينا وقالو ليهم ده خروج عن العادات والتقاليد وقفو ليهم النشاط وبقو بس خواجات لحدي ما فتحو عضويتو لي السودانيات في 48 ..
وجات بعديها رابطة الفتيات الثقافية ودي كانت فيها حبوبتي عضوة..
حبوبة الزول البتمشي فيهو ده وعاملاهو مطرطش قرت مدارس مصرية وكانت عضوة في رابطة نسوية..
وكان ستهم خالدة زاهر الساداتي البقت ماعارف اول دكتورة او شي من هذا القبيل وفاطمة طالب سكرتيرة ..
فاطمة طالب المعلمة والتي ظلت معلمة حتى توفاها الله المابتخافوهو فينا ده..
الجميعة دي اشتغلت في السنوان محو امية من سنة 47 بس الظاهر اميتكم دي ما بمحاها قلم..
من الاربعينات دور المرة السودانية الواعي بقى واضح ومافي تورين بتناطحو فيهو..
خالاتي قالن لي كنا في الخمسينات بنطلع مظاهرات وفزنا في نقابة تابعة لوزارة الصحة ..
اها واحسبي عندك دور ناس نفيسة المليك بتاع اتحاد المعلمات وسجلتو ليهم الدولة بصورة رسمية ..

واحدة اسمها عزيزة ازرق كانت بتجي في بيت خالتنا روي عنها انها سعت وشكلت مع الرائدات من جيلها الاتحاد النسائي السوداني من 52
من52 النسوان االسودنيات قصة المتاجرة بي قضاياهن - لو اصلا في قضايا- للظهور والبربرة بقت موضوع مستحمي..

اهم شي مرقو بيه من 52 انو قعاد المرة في بنبرا ده اهم شي بالاضافة انها تكون عاملة في المجتمع...
ماسمعنا بيهم قالو الذكورة والفحولة والجندر ..كانن عاقلات جدا واول الطلعو بيهو تجويد دور المرة في المجتمع والاهتمام بالطفولة ووالامومة والقضاء على الفقر وماعارف التنميةالاجتماعية..
ادوار كده هي في لب العمل التوعوي المدروس موش البرطمة والقفز فوق مستويات الفهم العام لمجتمع ماشي يرجع متخلف بسبب جهالتكم وجهالات الراعي الرسمى
هسي بلاي كدي بي كل الصدق الفيكي امسكي اقرب تلاتة نسوان حتلاقيهم بعد ماتعملي شت داون للجهاز ده وفي الحتة الانتي فيها دي..
وشوفي اهم اهتماماتم كنساء وكآمهات وربات منزل ..
لو مالقيتي ونستها انو راجلا بني او قرب يبني او بفكر يبني او شايلين هم البنيان بتاع بيتم في السودان او جابت كم ملاية زي ملاية ناس هالة والتوب الموضة شنو واخر قيدومة ناس فلانة جابو فيها شنو..
قرقرابات فارغة او طين عفانات ساي على قول مولانا محمد حسبو

كلامكن ده ما بتقال هنا في منبر بتاع انترنت ..
ده كلام يتساق في حتتين :
يا في ونسة نساوين عسى يهتدين او
قدام مسجد بتاع سلفيين ..
المنبر ده الناس الفيهو لو مرقتو منهم ابان دقون ديل مافي واحد فيهم بغالطتكم تاني فيهو غيري..
البتقولو فيهو ده انتي واماني وعزاز وبقية الخائضات هي مجموعة مسلمات لم تعد تحتاج الى ايراد او توضيح عشان نطناطح فيهو هنا..
انا غايتو بالنسبة لي ونسة زي ماقالت اماني ..ونسة ممكن بيها شوية شوية اتعرف على اماني دي لا اكتر ولا اقل..
يعني مداخل لي هظار تقيل مدروس اتوسل بيهو لعرفة بت..

في الاربعينات قالو في واحدة من من بنات امدرمان دي اشتغلت في مصلحة الاقتصاد ..
اها قالو اخوها واهلها كانو بقدموها لحدي باب المكتب..
وبعد كم ساعة يجو تاني يرجعوها لامن تمرق عشان يوصلوها البيت..وبعد ده قالو كان ناس امدرمان بفلقوهم بالحجار باقي علب البيرة زي المجدلية..
وقالو في المكتب الكانت شغالة فيهو في ناس حلفو طلاق انهم مايقعدو معاها في مكتب واحد..

شوية شوية لامن بقو تسعة بنات والحجار والطوب قلو شوية شوية..
هسي الواحد فينا لو قالو ليهو حتشتغل مع بنات تجيهو ام فريحانة..

ياخي الجعليين العاملين فيها رب حوش الحريم ديل..
جبل ام علي ده قالو مسمى على واحدة اسمها بكرة بت مكابر قالو كانت من المحاربات الشرسات وكان عندها راي وراسا
ناشف وقدر مايجبو ليها الرجال للعرس تقول ده مابنفع معاي لحدي ما اتزوجت بي مزاجها وانجبت عليا وسمى الجبل باسمها جبل ام علي..

ده غير الشيخات الدرسن القران في الخلاوي فاطمة بت جابر في منطقة ترانج وعائة بت قدال في نواحي جبل اولياء
ونسوان المساليت والبرقو..
ياخي دي سلسلة طويلة من نساء سودانيات ملكن حقهن في مايصبون اليه..

احترام المرة والاحتفاظ بها في رفوف المخمل لايجعل منهن عورة ومسبة ..
الراجل العوقة منكور ..
والمرة الدلاهة منكورة..

والمرة البتسوي البتقولو بتكون مسموعة الكلمة في مجتمعنا..
وفي اي عيلة سودانية بتلقى انو فلانة ديك (مقدر) وبتقدر تستلم الشغلة واتيفر الشغلة كانت( عرس- سماية - تربية - بنى بيت او ادارة عمل)
َمقدر موش لانها خرجت عن العرف والتقليد ..
بس لانها قدرت تثبت انها ليست ضعيفة وانها ذات راي..
وفي نفس الوكت بتلقى راجل مابتشريهو بي بصلة لانو ما زول راي..
المحك ليس الانوثة والعورة واعضاء التناسل وانما الراي والمشورة والقدرة على فرض الانجاز..


انتو كده انسو فكرة انكم عورة دي في الاول وبعدين تعالو قولو لينا ننسى..

ههههههههههههيع دكين يا اخي انت ما زول ذكي ولعه وعجمي طوع لغه الاعراب مالك علي البنات ديل اسه هارشهن
انت للان ما لاقي عروس يا بن انيسه مش لان المعروض ما عجبك انت الما عهجبتهن بلا قرضمه معاك
دحين رسل لي التظكره النشوف الدوحه دي للزمان وتكون عربون مهر للمنقه

دومة

ياخي وحاة الخوة ونحنا البينا خوة قديمة تجيبي الفاتورة بتاعة التذكرة افرشا بين يديكي دراهم ..
انتي قايلة المنقة ديك هينة؟؟
انتي بس انقزي وتعالي..

من اين اتى هؤلاء النساء؟؟

دكين ياخ اصصصصصلو ما بتطور؟؟؟
قطر دي ما اضافت ليك اييي شي والله اللهم الا انها جعلتك اكثر شجاعة في مواجهة كاميرات التصوير الديجتالية ..
من اووووول مداخلة ليك وانا عرفت إنك تاني ما حا تقيف ..
وحا تجي وررررررررووووووووووررررررررررررررررر تكتب لي زي طفشطاشر سطر احسبها مكررة ومعادة للمتابعين ليك من زمان بينما ربما اوقول ربما تكون جديدة على (اماني) اذا ما كانت من المتصفحين الجيدين في السابق..
جيت شبكت الناس رجال مجاملين ونساء معقدات فانضممت مرحبا بك في زمرة الرجال المجاملين بينما تواصل النساء المعقدات معاك وما قصرن في الرد عليك ..
دكين والله حنكك بيش ياحبووووب جدد جدد يا قريبك ..
بالمناسبة عديت ليك مداخلاتك من بعد رجال مجاملين دي فوجدتها تقارب الجغلومية ونيف ..
يبدو انها حسادة منك سااااااااااااي عايز تطفشنا من البوست ده وتسفسف النبق براااك يا عمك لكن تلقاها عند الغافل
بوست وضع كللل البيض في سلة واحدة من الصعب مبارحته ولو استفزنا دكين (حكمة يونانية)..

Quote: سطر احسبها مكررة ومعادة للمتابعين ليك من زمان بينما ربما اوقول ربما تكون جديدة على (اماني) اذا ما كانت من المتصفحين الجيدين في السابق..

ياعمر يا وجع قلبي
انا في البوست ده مابهمني غير اماني..

ألأخ/الراقية..بت قضيم ..السلام عليكم..

الجابنى ليك فى البوست ده عمر الفاروق....كنا بناقش مع بعض فى موضوع.قريب لموضوعك ده.وقال لى إنت فاتحة بوست بمنتهى الجمال حول هذا الموضوع..

الحقيقة عمر نادر ما بشكر ليهو حاجة..ولما يشكرليهو حاجة بتبوظ..مع العلم بأن الزول ده عينو ما حاره..

موضوعك لقيتو زى ماقال لى لكن كمان لقيتو اتشعب وإتشخصن برضو...والناس ديل ما بخلو حاجة سمحة بتمشى لقدام عشان نستفيد كلنا بحوار هادى وجميل...

والله ألأنثى دى حاجة جميلة فى الحياة..خلاقة..رؤومة.رحيمة..مبدعة..متجدده...

أما البعض منهم واكرر .البعض منهم.مشوهات جماله وبهجته ..بالمقارعة بدون فهم ووعى...

الرجال بختلفوا فى فهمهم للمرأة ومدى تقديرها واحترامها..وفى نفس الوقت .لابد ان تكون الحياة قائمة على مبدآ ألأحترام والتقدير لبعض إن لم يكن هناك حب..ولو كان هناك حب تكون عجوة معطونة فى عسل الحياة. بألأضافة للأشياء المذكورة..

Quote: على فكرة المصريين عندهم مثلا ًمليون في المية صح (زوجك على ما تعلميه) وفعلاً لو كنتي علمتيه من البداية فكرة (التعاون) كان هسه بقى ولا أسامة السيد وبدون هزار

الحتة دى ما صحيحة ما إحترامى ليك..وطبيعة المصريين لاتوافق طبيعتنا..عندك فى أغلب ألأحيان الزوج المصرى بجى يسلم كل راتبه لزوجته ويقول ليها اتصرفى..قليل من السودايين البفعل ذلك...

فلنرجع الحتة دى للدين..الرسول صلى الله عليه وسلم كان يساعد زوجاته..وكان يداعبهن..ويمازحهن.. .وقال صلى الله عليه وسلم..ما اكرمهن إلا كريم وما أهانهن إلا لئيم...

ولكن بالمقابل ..المرأة لابد ان تكون مالية مركزها وهيبتها وان تناقش بأدب وبدون تطاول...

وبرضو الراجل كذلك..عشان ماتجوا تقولو لى والراجل ليه ما يملآ مركزو....

Quote: لكن كلامك للأخت أماني، حابة اكتب معلومة دينية تذكيراً وتعليقاً وهي أن المرأة حتى لو كانت صاحبة عمل وصاحبة دخل رئيسي، وعندها ورث، ومش محتاجة، حتى لو، لا يسقط حقها في أن ينفق عليها الرجل وأنا في رأي هذا أكبر دليل على نصرة الدين الإسلامي للمرأة

وده فعلآ الكلام الصح..ان تضبطبى البوست بتاعك بنفسك من ألأنحراف....
خالص أحترامى................إسماعيل محمد احمد عباس....

صباح الخير جميعاً
ولكلكم شكراً جزيلاً
بحاول ارد بس مشغولة شوية
ادوني فرقة بجي

سلام تاني
يا خالد الغالي شكراً للملاحظات الغريبة (يعني لفت نظري لحاجات أنا ما كنت منتبهة ليها)
أولاً من ناحية الكبر دخل فالكبر دخل ولا مغالطة
لكن الغريب ما تقوله عن اسلوبي الرزين وما عارفة كيف، بالله أنا قدر ده كنت مسيخة يا هناي؟؟
وكمان بطنش الناس ما برد عليهم واضطهدهم؟؟
لا ياخ قول غير كده
دكين زهجني وطير الكلمتين من راسي،ومسخ لي البوست، وما عايزة ارد عليه، حردت ليه البوست زاتو

وبعدين فكرة البوست الأساسية كانت (وما زالت) الحديث عن التربية والأدب في المجتمع السوداني،
الكلام اتقلب منافسة بين الرجل والمرآة وما عارفة كيف
أنا غايتو بنتظر الأرشيف، لو كمل الكلام هنا كان بها، لو ما كمل بفتح بوست جديد، وبررررررضو بقول كلامي
على فكرة
في أغنية تتردد في راسي غايظاني شديد، ثقيلة كده (صورتك الخايف عليها، وانت ما خايف علينا، فيها ايه انسان بعزك لما يحفظ ليك صورة) تررررررررن
صورتك ال(خمستاشر واحد بصفقوا)
تفتكر المناسبة شنو اتذكر الغنية دي الآن؟؟
المهم
بجي

يا أخوانا خالد غالي دا شوفوا ليهو باصويرد معاكم بدل الشحتفة الهو فيها دي ..!! :

Quote: ( لووووووووووووول) يابت قضيم انا انتبهت لي حاجاتك لاني شايفك من بعيد مش لما نقرب صورة لي عيونا شديد مابنشوفها بي وضوح ... او كما قالت يرحمها الله ماكنت ولاعشتي مسيخة لكن كنتي عملية ومابتجاملي .. اسي بقيتي بتجاملي وعملية .. وانت براك شوفي ايهما افضل واحكمي من علامات الكبر عندك انو دكين بقي يغلبك بسهولة بالكلام ويضطراك تحردي ليهو البوست وعلي فكرة دكين ده عندو مآرب اخري وكلامو ده ممكن نختو تحت قاعدة .. حنك داخل حنك زي تفاضل دالة الدالة ... لووووووول مش عليك الله وبرضو من علامات الكبر عندك بقيتي مابتقدري تسيطري علي بوستاتك من المقلبيين والمقلباات لما بوستاتك بقت تنقلب بدون ماتعرفي من اي منقلب ينقلبون .. الغنية دي بتكون من ضمن اسباب بوستيك القصير جدا الاسمو تشوف العمي انشاء الله متزكراهو ؟؟ خليتي مالك بالمناسبة ؟؟ انا برضو عندي اغاني في راسي غايظاني لكن نعمل شنو الله غالب بس المهم لو كان عندي باس ويرد والله كنت رسلت ليك مسنجر داخلي بخصوص الغنية دي رغم انو المسنجر الداخلي مافكرة حكيمة الايام دي وما اظن في زول قاعد يستخدمو في الفترة دي لكن كنت حا اتوكل واعملا واجري علي الله واصلي يابت قضيم ياخ الناس دي كلها منتظراك تحياتي خالد غالي

Quote: وبعدين هو الزي دكين ده العرّفوا شنو بمعاناة المرأه في المجتمع الذكوري؟

يعني الحاجات الجاية دي كلها من الذكور ..ومن ثم قالت..

Quote: شن عرّف دكين بالتحرشات اللي بتواجه المرأه المحترمه في الشارع والعمل ومقاعد الدرس؟ !!

انتي شن عرفك بي نوعية المرة (غير المحترمة) الحايمة في الشوارع والقاعدات في العمل وبي الحاصل في مدراس البنات؟؟
شن عرفك بي إظهار الرقم في الجامعات والشوارع وكبائن التلفون؟؟احكي ليك عن شكل المرة في الشارع السوداني والشغل والجامعة؟؟

Quote: شن عرّف دكين بالعنف المنزلي؟

شن عرفك انتي بي اهمال المرة لي بيتها وفشخرتا وقصص (عايزة ملايات زي ملاية ناس سعاد) شن عرفك بي الاهتمامات القشور حقت النساوين وونسات الضحى والقطيعة ؟؟
وبعدين ياخي العنف المنزلي البعملنو النساوين مالي مجلدات ومجلات ...وبعدين ياخي انتو خليتو راجل يقعد في بيتو اصلا عشان يمارس عنف؟؟

Quote: شن عرّف دكين بخيانة الأمانه والتحرش داخل المنزل؟

شن عرفك بي قصص النسوان المصاحبات عيال صغار ومبارين المسنجرات والفيس بوك وقصص النسوان الشغالات ؟؟

Quote: شن عرّف دكين بالاستغلال المادي للمرأه من قبل الزوج (والأب أحيانا) والاتكال علي عملها ودخلها؟

شن عرفك انتي بي فشخرة النساوين وطلباتن القصرت عمر الرجال وخلت الواحد يمرق صباحي مايرجع إلا ربع الليل الاخير ؟؟
وبعدين في ذمتك دي هسي قضيةذكورية؟؟

Quote: شن عرّف دكين بخفاض البنات واثاره النفسيه والطبيه؟

خفاض البنات مين يا مفقهية انتي..اهودي شغلة نساوين ماعندها دخل بالرجال ..نحنا كان عجبتنا بي شنبات بنشيلا..
راجعي تاريخ البنات الطهروهن في حلتكم مافي زول جاب ليها الطهار غير امها او خالتا او عمتا..

Quote: شن عرّف دكين بالزواج المبكر في القري واثاره النفسيه؟

وشن عرفك بي الزواج غير المبكر؟؟
اها افرضي في حمرة الوز البت بعرسوها من 12 سنة ..فيها شنو؟؟
قولي عشرة سنة؟؟
الاشكال وين؟؟
ياخي دي قري متصالحة مع عاداتا ومافي بت بتكورك يوم دخلتا من جهالتا...
البكوركن ديل ناس التلاتين وانتا ماشي..
وبعدين دي قرى ودي تقاليد مرضية ..انتي مالك عايزة تفرضي فكرتك وعالمك وتصورك؟؟

Quote: أكمل وللا تكملي الباقي يابت قضيم؟

تكلمي شنو انتي صدقيني ملخبتة بالحيل...
امورك جايطة ساي ..ومافارزة عناوينك..

القتيهو فوق ده ليست امور جندر او ذكورة او كركدن..دي امور اجتماعية نسبية تساهم فيها المراة بمقدار يكاد يكون اكبر من مساهمة الرجل فيها..
وقد يختلف فيها الجنسان..وممكن عادي تلقى راي نسوان كتار مخالفات لي رايك ده وشايفات انو السبب في الموال بتاعك الفوق ده اساسا هو النساء..

وعلى العموم لو نظرتي ليها نظرة بتاعة زول واعي بتلقيها انها حمالة اوجه وزي الجمل الخبرية تحتمل عدة تاويلات..


لايمكن باي حال من الاحوال رميها في ملاعب الرجال وتحميل تبعاتها لهم..

Quote: وفاهم انه المرأه نالت حقوقها كامله في مجتمعنا لكن هي جاحده للجميل..

حقوق شنو يا ام حقوق انتي
بافتراض اني شاغلتا مرة في الشارع العام..هل بكون انتقصتا من حقها ..؟؟
ام انتقصتا من حقي؟؟

Quote: وتعاني من شوية فراغ بخليها تكرر في كلام بايخ بدون فهم

هو موش فراغ ..هو محاولة لايجاد موطء قدم في الفراغ حد نفسو..
انتو الفراغ زاتو كتير عليكم..

Quote: ويمكن يسمع عن القصص الخفيه اللي بتروي عن هيمنة الرجل واحتفاء المجتمع بيهو ومضايقته للمرأه

هيمنة الرجال دي الانا عايزا..
وريني ليها في ياتو حتة بالضبط..
مسالة المشاغلة في المدارس والشوارع والعنف المنزلي دي ماهيمنة دي عبارة عن ُجنح وجرايم تم وضع ُمحددات ليها..
من المؤسف انو ده يكون مستوى فهمك يا اماني لي مسائل الذكورة المعطينا بيها..
يعني هسي انتي شايفة انو العنف المنزلي ايشو ذكوري؟؟
وشايفة مشغالة البنات في الشوارع ايشو ذكوري؟؟
وشايفة الطهور ايشو ذكوري؟؟
ياخي انتي آفة على الفهم العام لي النسوان..
وجودك بهذه الصفة وبهذه الكتابات خصم كبير على الحركة النسوية ومجاهدات المرآة خلال السنوات التي خلت..
انتي جيتي لي النسوان ديل من وين؟؟
من 1946 والنسوان شغالات اجتهاد تجي انتي في 2009 وتمرقي بي هذه التحاليل الفطيرة؟؟

نكبة على الحركة النسوية انتي يارقيقة الحاشية..

Quote: ودكين ده ماتشتغلي بيهو, هو بس مافاهم نحن بنتكلم عن شنو ..

عن شنو؟؟

عاد يا دكين شكيتك علي انيسه امك
الود خشمو تقول فيه كلبه والد يهو هو متل الما نصيح
انت العرفك بمشاكل النساء شنو ؟؟؟
كنت امراه معاهن ونحن ما داريين ولا شنو ؟؟؟
كدي روق المنقه وخلي اللبهي البتسوي فيه دا
وما تاكل البنوت ديل حنك ساكت .
اكيد عندهن مشاكل هم حاسين بيها وانت ما حاسيها لانك راجل
يااخي اعطيهن الحق في انهن يعبرن عن احساسهن من منطلق انهن نساء وستات وجعه
ما من منطلقك انت الراجل المنتفع وعاضي بنواجذك وماسك باصابعك العشره
علي مكتسباتك الموروثه والمكفوله
بنصوص كثيره سواء ا عرفيه عملوها الرجال ولا شرعيه انزلت من السماء .
يا بنات اضربن بيد من حديد علي هذا الدكين ولا تاخذكن به رافه ابدا .
عندي حله قرع في النار ما تحرق وماشه السوق اشتري ملايات متل ملايات ناس سلوي اصلو جيت اسه من الجم والبودي كيير وبعدين بجي اتونس مع صاحبي الصغيروني في الفيس بوك .

صباح الخير يا جماعة
معليش لكن شدة ما حرقني كلام دكين، حارد عليه الأول

ويا خالد أنا- طبعاً- ما حردت البوست لدكين،آخر ما يتمنى الغبيان ده اني احرد ليه مكان، مع اني ما أخفيك، أني كثيرا ًما اتضايق من مجانية الإنترنت الخلت الأكتاف تتساوى
المشكلة في اتصال النت عندي، فيه مشكلة وتعجبك طبعاً الاتصالات السعودية،
وبجيك
يا دكين المحترم سيد الرجال أجمعين
مش من حقك انك تتهم أي شخص بانه عار على مكان ما،
رجاء تحترم أفكار الغير ولو أن هذه الأفكار ما راكبة مع راسك فلا يعني أنها مغلوطة أكثر مما قد يعني ان راسك فعلاً مقودس، فاسحب الجملة – الله يرضى عليك – خلينا في حدود الأدب الأنت ما قادر تفهمو وشكلك ما حتفهموا أبداً
أغرب ما لفت نظري في كلامك المنزل (رضي الله عنك)

Quote: وشن عرفك بي الزواج غير المبكر؟؟ اها افرضي في حمرة الوز البت بعرسوها من 12 سنة ..فيها شنو؟؟ قولي عشرة سنة؟؟ الاشكال وين؟؟ ياخي دي قري متصالحة مع عاداتا ومافي بت بتكورك يوم دخلتا من جهالتا... البكوركن ديل ناس التلاتين وانتا ماشي.. وبعدين دي قرى ودي تقاليد مرضية ..انتي مالك عايزة تفرضي فكرتك وعالمك وتصورك؟؟

البت البعرسوها في 10 سنوات أو 12 سنة، فمشكلتها مش الكواريك يا دكين، المشكلة ليست مشكلة جسدية فقط، في حاجة إسمها التأهيل النفسي، والاجتماعي، البت العمرها 12 سنة عرست وحتخلف عمرها 13 14 سنة، غير مؤهلةلا نفسياً ولا تربوياً على إدارة منزل

وإدارة المنزل – عكس ما تتصور- ليست دلكة ودخان وخدمة مطبخ وإرضاء زوج فقط، إدارة المنزل تربوية، يعني العمرها 13 سنة، ليست لديها القدرة على تربية نشئ، يا – وسوري إذ مضطرة اعيدها – متخلف
برضو يا دكين
العرس وما إلى ذلك، ليست واحدة جميلة لديها المقدرة على تحمل حفرة دخان
وليست شابة لطيفة تجذبك كلماتها الرنانة في الإنترنت والمنتديات العامة
العرس ليس شيلة ودهب ورقيص عروس
الأقاليم البتقول أنها (متصالحة مع عادتها)، ما زالت تعاني من الجهل والفقر والتخلف والتردي، علمي كان أو صحي أو حتى اجتماعي
لذلك نحن مش متقدمين، لأننا ما زال بداخلنا ناس (متعلمة)، (مثقفة) تدخل منتديات نتية عامة، تزرع سيفها في (ضراعها)و (مخها)، تدعي الحضارة والمسامحة مع النفس، لدرجة البحث عن عروس من خلال صورة وحرف، وتؤكد، أنه عااااااااااااادي خالص زواج طفلة بعمر 13 سنة ما دامت (ما حتكورك يوم الدخلة)
من جديد، حصر لعملية الزواج في سهولة وصعوبة فض غشاء البكارة للعروس

عجيب يا دكين
هذا هو موضوعنا على فكرة اللي حاولت تشوهه لمجرد أن هناك اسم انثوي في البوست اكتشفت انك لسة ما اشتغلت عليه شوية وما اكتشفته وهذا شأنك، بس لو سمحت، هذا البوست مش المحطة الوسطى، تتململ وتتدسدس وتتسحب وتنظر فقط علشان تتعرف على واحدة هنا

أمثال الطفلة التي توافق على أن تزوجها ما دامت تتحمل العملية الجنسية، هي التي في يوم حتمارس التفاهة التي استفرغتها اعلاه

Quote: تاريخ البنات الطهروهن في حلتكم مافي زول جاب ليها الطهار غير امها او خالتا او عمتا.. شن عرفك انتي بي اهمال المرة لي بيتها وفشخرتا وقصص (عايزة ملايات زي ملاية ناس سعاد) شن عرفك بي الاهتمامات القشور حقت النساوين وونسات الضحى والقطيعة ؟؟ وبعدين ياخي العنف المنزلي البعملنو النساوين مالي مجلدات ومجلات ...وبعدين ياخي انتو خليتو راجل يقعد في بيتو اصلا عشان يمارس عنف؟؟ انتي شن عرفك بي نوعية المرة (غير المحترمة) الحايمة في الشوارع والقاعدات في العمل وبي الحاصل في مدراس البنات؟؟ شن عرفك بي إظهار الرقم في الجامعات والشوارع وكبائن التلفون؟؟احكي ليك عن شكل المرة في الشارع السوداني والشغل والجامعة؟؟

الطفلة التي (ما اتربت صح) وحرموها من الطفولة ولعب الحجلة ، امسكوها طفلاً لترضع، دخلوها مجتمع نسوان غصباً عنها، منعوها الحياة الطبيعية، هي التي في يوم ما ستكتشف أنها في عمر الثلاثين، متزوجة من بغل في الغالب يفوقها أقل شي عشرين عاماً، لها احتياجات، نفسية قبل جسدية، حاجات اجتماعية، هذه الطفلة هي اللي ممكن تصيع في الشوارع، تصاحب، تتفشخر بالملايات، فرأسها يا عزيزي دكين، فاضي، لا علم، ولا دين، ولا حياة اجتماعية طبيعية ولا أي شئ خالص

الطفلة دي، في راسها ما في حاجة غير ال(طهور) يا دكين، حتجيب أفكارها من وين يعني غير حبوبتها ونسيبتها وعمتها وجارتها اللي عادي خالص اتزوجوا في 12 13 سنة؟؟

وكما قالت أماني، في الغالب أنت حاصر نفسك في زمن عقلي حفرته لنفسك ومش راضي تطلع منه أبداً
الكان زمان (وضع عادي) تغير الآن، حياتنا الإجتماعية تغيرت يا عزيزي وبالتالي مفاهميك المغلوطة دي اتغيرت واستغرب (جداً) ان انسان متعلم، المفروض فاهم يقول عادي بنت تتزوج في عمر 13 سنة ما دامت تتحمل (الكواريك) على رأيك
وخليني اقعدوا ليك يا دكين
العرس ما عملية جنسية بس، وإلا الخواجات المسموح لهم بأي حاجة قبل الزواج، كانوا ما عرسوا اساساً
العرس (سكن) و (مودة) و (رحمة)، الزواج عملية تكاملية (اجتماعية ونفسيه وبعديييين جسدية)

ثم
كونوا أن الناس الحوالينك، أو المجتمع الأنت عايش فيه، العرس فيه بالصورة العجيبة الأنت رسمتها بكلماتك أعلاه، فلا يعني ذلك (إطلاقاً) أنها صورة صحيحة سليمة

دكين أنا آسفة اني اكون (مش أول) من يعلمك بنفي ما جاء في كلامك

Quote: بعدين ياخي بحثى عن شريكة القتيهو ده والقتي فيهو لاازال (اعيش) بلاهي شوفي مقدار الامد في اعيش دي قدر شنو .. من سنين معرفتي الاولى بيكي- من حوالي سبعة اعوام- وانا لا زال اعيش.. تفتيش وبحث وكتابة وبلا متلاحق ولا ازال اعيش وابحث.. ده بلاهي موش دليل على ضآلة المعروض في سوق نساوينكم.. الذي استلمو من اخواني والاصحاب اهو عايشين ..الواحد تسالة اها العرس كيف يمط ليك خشمو ويقول ليك: إييييييييييييييه كورة العباسية وكوبر انتهت كم كم؟؟

يا رشدي أباظة
بحثك فاشل ليس بسبب ضآلة المعروض في السوق
بحثك فاشل بسبب ضآلة الموجود في عقلك (لو وجد عقل أساساً)

وواحد اختار أن يتزوج جسد (13 عام) بغض النظر عن عنده مخ أو لأ،أو تزوج صورة أرسلتها له بت خالته من البلد، لا يلومن إلا نفسه، ولما يمطمط شفايفه بكورة العباسية وكوبر، فليتذكر، أن لأجل (شفايفه) دي، مرته زهجت وتعبت ، ويأست، فخلقت لها مجتمع (ملايات) يسعدها على الأقل، يملأ فراغ (قدومه) المقفول أربعة وعشرين ساعة

أما ما جاء في حديثكم من شاكلة
مسالة المشاغلة في المدارس والشوارع والعنف المنزلي دي ماهيمنة دي عبارة عن ُجنح وجرايم تم وضع ُمحددات ليها..
فمن جديد، كله بسبب التربية، ومين حيربي ؟؟!!
أم بعمر 13 عام؟؟ أم رجل اشترى وعاء جميل صغير السن ليضعه ديكور جميل في منزله ذيها ذي أي مزهرية؟؟
وقول لي بالله يا ريتشارد جير، كم صورة لحدي هسه جاتك ورفضتها في سوقك الهامدة؟؟؟
ثم هل باب التسجيل مفتوح؟؟!!
وآخر عمر ممكن نسجل فيه كم؟؟
وكم الرسوم ؟؟
طيب حق دمغة؟؟
سمح في ختم؟؟؟
آزول،،، (:(:(:(:
يسعد صباحك إن شاء الله
ما خلصت منك لسة

لووووووووووووول دكو الككو شماته ماما دومه فيك
لووووول
تسلم موسك يا بت قضيم حلاقه السرور
غايتوا ما اخدتك فيه رافه تب
عفيت منك يا زوله

دومة الحبيبة
ياخي لو قايلين دكين بجيبك لينا كان زمان فرشنا ليه ورد أحمر وحنسناه يجي
شرفتينا والله
اخبارك كيف؟ العيال؟ الجماعة؟ إن شاء الله طيبين؟ الجيتي منهم؟؟ ناس الماسنجر؟؟ الفيس بوك ؟؟ تمام
!!!
(:(:(:

شكرا ًللمساندة والعضدد (حلوة العضدد دي مش)
وهسه ارد عليك يقول لي خالد الغالي بجامل ،
يا خالد ياخ انا ما بجامل انا برد وفقاً للبجي في راسي
يعني ما بقعد اقرر وكده
وبعدين مرات بكون عندي وقت ارد مرات ما بقدر على حسب يعني
وعايزة اكتب ليك الإيميل حقي علشان عذبنا معانا ناذر لكن خايفة من الدهماء والرعاع وكده (كلمة الرعاع دي تجيب لوز عديل كده)
وبصراحة والله ،الإيميل السجلت بيه هنا الله يعلم ما متذكراه اساسًاً شنو
اشوفه أو اغيره واقول ليك ما يبقى فينا (إيميلك الخايف عليه) (:(:(

يا دومة والله شرفتينا وعليك الله ما تشوفي لينا فدائية للزول دكين ده كان الله يهديه؟؟
انا غايتو اظن أنه راكباه جنية شينة زيه كده لذلك حالته صعبة شديد
يا الفكي هاني انجده ان شاء الله
لوووووووولش
سلمتي يا دومة

يابت قضيم يامحترمة يا ست النساوين

بداية: الشي المابخصك هنا خليهو لي الزول البخصو
موضوع اتعرف على اماني او اتوسل بي البوست بتاعك ده دي مسالة ماشغلتك..
صحي البوست ده فتحتيهو انتي ..بس الساعة النزل هنا ببقى ملكية عامة..لذا حاولي اكتفي بي طرح وجهة نظرك والدفاع عنها او ماتيسر..
وانا ماعندي مانع تواصلي هرجلتك دي وشتايمك المبطنة دي.. عادي عندي..
قلة عقل منك تجد عندي مكانتها من القبول ..
هسي انتي بحسن نية او بسوء نية ماعارف حتخربي لي مشروع عرفة اماني دي..
يافضول منك ياحسادة..
ومالو ياخي ما اتعرف عليها..الاشكال وين؟؟
قالو ليكي انا قاعد اسوي مسابح من سنون البنات ولا بسلخ جلدهن؟؟

Quote: وإدارة المنزل – عكس ما تتصور- ليست دلكة ودخان وخدمة مطبخ وإرضاء زوج فقط،

جزء من جهالتك انك وانتي بتكتبي ردودك المنفعلة دي بتقومي تآلفي عن الزول كلام ما قالو ولا حقو ..
انا قتا ليكي اجتهدي لي في تصوري؟؟
اديتك تفويض لما اتصوره وانا ماعارف؟؟
هل معرفتك بي بتسمح ليكي تتصوري نيابة عني؟؟
انا متين تصورتا زي ماتفضلتي بالاعلى وقتا انو انتو دلكة ودخان وارضاء زوج..

ياخي دي مهام اصلا المرة السودانية مانافعة فيهو..ودي قناعة راسخة وقتها في (المحطة الوسطى) بتاعتك دي في مداخلة فوق عشان كده لايمكن احصر فيهم هذه المهام..
الزواج من السودانية هو في غالب الامر ملايات وقطعة واضة وسيراميك وتوب ناس نجوى وتقصير عمر، وعايزة انزل اسلم على ناس امي..
الشغلة القتيها فوق دي يابت قضيم الراجل السوداني المسكين ما بلقاهاعند الغافلة..

Quote: الطفلة التي (ما اتربت صح) وحرموها من الطفولة ولعب الحجلة ، امسكوها طفلاً لترضع، دخلوها مجتمع نسوان غصباً عنها، منعوها الحياة الطبيعية، هي التي في يوم ما ستكتشف أنها في عمر الثلاثين، متزوجة من بغل في الغالب يفوقها أقل شي عشرين عاماً، لها احتياجات، نفسية قبل جسدية، حاجات اجتماعية،

انا ماعارف انتي فهمك كعب ولا قاصدة المسالة دي ..ولا بتقوم تفوت عليكي هذه الاشارات في خضم ردودك المتعجلة دي..

زي ماقتي براكي في الكلمات التالية:

حرموها
وامسكوها
ودخلوها
منعوها

الها بتاعة الجماعة دي راجعة لي صالون الرجال براهو؟؟
ليه ماعايزة تقتنعي انو القصص بتاعة الطهور وزواج البدري دي مسالة يكون للمرة فيها دور كبير لو ما كان اساسي..
وموش النسوان في القرى بس..
بل دي فكرة البنات اصلا ..والسائدة في يوم الناس هذا..
الذي يدور في مجتمعات النساء بين النساء ..والقوالات والبشتنة البتنساق ورا التي فاتا قطر الزواج او المطلقة او البيتا مبشتن هي اسباب رئيسية في تخلفكم ده..وتخبط البنات في الاختيارات ومن ثم الخروج بي مجتمع نسوي مآزوم..

هسي يعني رميتي فارغة النساوين وجهالتهن والكشكرة بتاعتم والعولاق البسوو فيهو اغلب النسوان في انها عرسوها بدري..
سجم رماد الفهم يا بت قضيم..
كده يعني حللتي لينا اسباب الطلاق وتقصير النسوان في تربية الابناء وقصة ملايات ناس سعاد ؟؟




مسالة تانية

Quote: مش من حقك انك تتهم أي شخص بانه عار على مكان ما،

مامتذكر اني قتا لي زول /زولة انو انتا عار على المكان ده

لو قتها انا بعتذر..
ولو مالقيتيها قولي لي برضو ..عار دي كلمة شينة بصراحة..
ممكن توريني مكانها عشان احذفها هسي؟؟..








ـــــــــــــــــــــــــــــــــــــــــــــــ

Quote: حتمارس التفاهة التي استفرغتها اعلاه

ا
اخيرا
حاولي شوية اضبطي ملافظك ..
لو الواحد رجع ليكي ملافظك دي حتقولي عشان انا بت انتو بتحاولوا تسكتونا..
تلطفي في استخدام النبذ..
انا يوم ما فكيتا فيك انتي بالذات بمثل هذا الدراب الفكيتيهو..

المهم انت ما تضيق
أنت تضايقت يا دكين؟؟!!!

وعليك السلام أخي إسماعيل
حبابك وشكراً كثير لعمر

عن شخصنة البوست فمعليش، الله يخلق والناس الشينة تعولق
عادي يعني

وأحب اطمئنك ان موضوعي الأساسي ما نسيته أنا بس خايفة من الأرشفة، أصرف عربي ويضيع ساي
فكرة توافق المصريين معانا طبعاً حياتنا غير وطباعنا غير، ما قصدته ليس استسلام الرجل التام للمرأة لأنه كده برضو غلط، لكن مثلاً لما تفتح داخلية جديدة (مثلاً يعني) وتضع قواعد معينة لا يجب تجاوزها، حتلقى كل المسجلين فيها يلتزموا بهذه القواعد
طبعاً في الحيشذوا عن القاعدة أكيد، لكن على الأقل حيكون مفهوم أنهم شاذين عن قاعدة
يعني معروف أنهم غلط
وجوزك على ما تعوديه، قصدت بها فكرة أن في البداية، بداية الحياة الزوجية، يجب وضع قوانين وتطبق، فيعتاد عليها الزوج (والزوجة كمان طبعا ًتخضع لنفس الفكرة)

ونعم، ليس هناك من شئ حفظ حقوق المرأة أكثر من الدين الإسلامي
المشكلة احنا فاهمين غلط
وطبعاً المرأة لا بد تكون مالية مركزها وهيبتها أكيد
ومرة أخرى، أنا لا اسعى لمقارنة بين رجل وأمرأة، أنا كنت قاصدة التربية في الأساس

دمت يا عزيزي وشكراً خالص للمشاركة

والله يا دكين هي لحظة ممتعة أن اشوفك مرة قبل أن توافيني المنية منفعل وزعلان ومتضايق وتخبط يمين وشمال
لكن حفاظاً على صحتك من أمراض الضغط والسكر،وأنت زول ما صغير يعني وكده،

حابة اوضح ليك (شان ما تزعل زعلك برضو بهمنا) نقطة مهمة جداً وهي
حتمارس التفاهة التي استفرغتها اعلاه
فهمتها غلط خالص فليس المقصود أنك انت تمارس تفاهة ، أنا بتكلم عن صورة الفتاة ، يعني اللي حتمارس التفاهة، هي الفتاة، أما الذي استفرغته فهو كلامك المقتبس أعلاه
طيب

وبعدين
كلمة (عار) أخدتها من صياغ الكلام يا باشا، أنت قلت حاجة ذي كده، عار آفة دودة، الفكرة يا سيد وليس المعنى الشين
وما تزعل خااااالص يعني، القلته أنت كتير ما جات على دي يعني، ومع ذلك نعتذر عن الخطأ المشين

غير ذلك فلا أسف

ثم
عايزني عااااادي كده اشوفك بترمي شباكك لواحدة (غير) وما ازعل ؟؟؟!!!
تحرمني التنفس ومستغرب ادافع عن وجودي في الحياة؟؟؟
!!!
آزول!!!
انت ضد فطرتي السليمة بأن أطرد ضرراتي!!!
آزول
(:(:(:(:

Quote: كلمة (عار) أخدتها من صياغ الكلام

اسمها قولتيني حاجة ماقتها..

انا اسحب اعتذاري اعلاه لان المدعوة بت قضيم لقت انها قولتني الكلام بتاع (عار) ده من صياغ الكلام..

بكرة بعد بكرة واحد يجي يقول لي يا ود الكلب..
ولامن يتنزق يقول لي اخدتها من صياغ النباح القالتو ليك دومة..


هسي انا ذنبي شنو من الفكرة الاخدتها اماني من اللفحي بتاعك ده والسميتيها بي كل براءة(صياغ الكلام)
اها قرت الخريف بتاعك ده وجات قات لي احترم نفسك لانك زول ما محترم..
مرقتيني من عرفة اماني..خلاص البت انحبطت فيني بي سبب تبريرك النسواني الفطير..




الغريبة لسع مصرة تآلفي وبتقولي

Quote: القلته أنت كتير ما جات على دي يعني،

ممكن بلاي شوية من بحر الكتير ده؟؟

Quote: اسمها قولتيني حاجة ماقتها.. انا اسحب اعتذاري اعلاه لان المدعوة بت قضيم لقت انها قولتني الكلام بتاع (عار) ده من صياغ الكلام.. بكرة بعد بكرة واحد يجي يقول لي يا ود الكلب.. ولامن يتنزق يقول لي اخدتها من صياغ النباح القالتو ليك دومة..

لووووول دكو محنبكا
يا اخي ما عهدتك كدا خلي روحك رياضيه وارجع لشغبك اللطيف
هل تضيق الدوحه اخلاق الرجال ؟؟؟
شكلك وانت زعلان ما حلو .
بعدين المقارنه اعلاها دي ما لافقه
عاديناك بالمنطق النسواني ولا شنو ؟؟
قول ممكن زول يوم يجي يقول لدومه انت قلت دكين كدا ( الشئ دا كان مؤنث لان الكلب ما بعرف اولاده لا بهوهو ) .
دكو انت استعملت صفات بالالماني Abwertend
وهي في حدود المقبول في نقاشات الانتجلسيا
يبقي لما ردوا ليك منها بالكوريق تقبلها
وتناقش عادي وتبلش حمبكه
نحن بنشجع اللعبه الحلوه .
يا اخي ارتقي لمستوي وروح دينا خالد
. بتضرب في التنك وبذكاء لا تخطئه عين
لا بتزعل لا بتولول .
اتضامن مع دكو في محنته

شكرا بترحيبك الحار بمامتك دومه وسؤالك عن الحال والاحوال
كبرت يا بت قضيم ووهن العظم مني واشتعل المقود س شيبا
نستعين بالنسيان والصبر علي جفوتكم وغربتنا
وعلي رجل في لبهي لسان دكو .

العزيزه بت قضيم:

أستميحك عذرا ..
لدي عشرة مداخلات في هذا البوست ..
قمت بسحبها جميعا ..
وأعلن انسحابي من البوست ..
الجو في البوست أصبح غير لطيف ..
ممكن جدا أكتب رد لعمر الفاروق ولدكين ..
لكن الموضوع حيكبر وحنغير مجري البوست ..
وكمان ما حابه أدخل في معترك شخصي مع أي عضو زميل ...

أرجو انه الموضوع يتوقف لغاية هنا ..

ورجاءا واصلي في موضوعك الأساسي عادي ..

شكرا واحترامي للجميع ..

اماني يا ستهم ليتك استمريتي لان
دكين وعمر الفاروق مقدور عليهم جدا
من غير استنفار الاحتياطي المركزي .
اماني ما تزعلي منهم صدقيني الموضوع ما بستحق زعلك ابدا
لان التعابير المستفزه من نوع من وين جيتن وماشات وين وانتن افه الفكر ويد البورد الواجعاه وكراعه المكسوره من نوع من الكلام السايب دا
الكوم بقرش والدقه بلاش متل قرع ود العباس
لو قعدنا ليه ابليسهم يستغرب .
الموضوع ما كان بيستدعي تمسحي مداخلاتك ولا تمرقي من البوست

وكان بستعدل

الأخت المحترمة بت قضيم

تحياتي ليك و لكل زوار بوستك

على راسهم العزيزة ماما دومة (مشتاقين)

دكين اللعين جدا

عمر الفاروغ جدا جدا

و العزيزة أماني ..



كتب عمر الفاروق في مداخلة اتشعلقت فوق شديد

Quote: بت قضيم صاحبة البوست : كيفنك خيتي.. ويا ريت ردي يجي في الصفحة التانية وما يغطس زي الفات .. حا اقول ليك كلام مشاتر دكين زاتو ممكن يتسغرب فيو .. لكن النصييييحة دكين ما غلط غلطت اماني دي!!! وبكل صراحة بكل صراااحة اوول مرة اقرا لي مداخلة لي زولة بتدافع عن حقوق مرأة بي الشتارة دي.. معظم المتداخلات من البنات في البوستات دي بصراحة كنت بحسدهم على درايتهم ومنطقيتهم وعلمه في الطرح .. اماني مداخلتها لو تمسح لي اقل ما توصف بيهو انها نشاااز.. مداخلة شترا مستفزة .. ابدا ابدا ابد دكين ما فكر بي الفهم القالتو عنو اماني ده بس اماني جات منفوشة حبتين وشكلها ماخدة فكرة عن دكين وفكرت في لحظة انها تكتب كتابة تصدي.. عن نفسي بكتب لي دكين ممازح وضاحك ومن باب المشاغلات وشركك قبض وشركت لي فلانة وبختك حا تجيك بي الايميل والذي منو من ما بتسموهو باب العنف اللفظي ضد المراة البوردابية بس بصرااااحة اماني بالغت شدييييد وكتبت كلام مستهلك مع احترامي ليها ما عندو اي معنى فكان رد دكين مناسب لي مداخلة اماني.. عاتبوا اماني علي المداخلة الشترا بتاعتا وبعد داك تعالوا لي دكين .. تخريمة : بالمناسبة يا بت قضيمما عارف لكن خالد الزاحمنا بيهو ناذر ده قطع شك بوردابي معانا هنا وبي باسويردو فما عارفك انتي بتتعاملي بي حسن النية معاهو ولا نظام الفورة مليون :) ما بعيد يكون دكين زاااتو او ناذر :)

فعلا بوست مهم و كان نفسي لو قريتو من بدري.. أو حتى بعد ما قريتو لو اتداخلت فيهو قبل ما أماني تمسح مداخلاتها (المهمة في رأيي)

و مع انو جيت متأخرة لكن جيت عشان أقول لأماني انها في البوست دا غلطت مرة وااااااااحدة بس

و هي انها مسحت مداخلاتها اللي ما كان فيها غلط أو ما يعيب

صحيح انها في النهاية بقى نفسها حار شوية

لكن دا رد فعل طبيعي لاستفزاز دكين ليها

أماني ما بتعرف دكين و لا مترصدة ليهو (زي ما أوحت مداخلة عمر الفاروق)

و أنا نفسي ما بادعي معرفة دكين ..لكن من قراءتي لمداخلاته خلال السنوات الماضية

أعرف أنه كثيرا ما يخلط الجد بالهزل .. يغلف أحدهما بالآخر حسب الموقف

و ربما تكون ماركة أو بصمة لكتاباته

عن نفسي أستمتع بالكثير مما يكتب .. و إن كانت بعض كتاباته تحرجني كامرأة (كما جاء في الموضوع الأصلي للبوست)!!

في البوست دا (و دي ما محاولة تحليل .. دا انطباعي و فهمي لما كتب.. عايزة أوصلو لأماني)

في البوست دا دكين ما دخل عشان يدافع عن موقف الرجال السودانيين و طريقتهم في احراج النساء في البورد أو خارجه..

لأنو حسب اعتقادي دكين ما بيهمو كتير تحسين صورة الرجل أو الدفاع عنها

و لو كان مهتم بتوصيل فكرة مفيدة كان ركز أكتر على انو بعض النساء يتحملن مسؤولية معاناة المرأة في مختلف الأزمان..

كما أن بعض الرجال كان له شرف رفع الظلم عن المرأة في أزمان مختلفة أيضا ..

فالمرأة أحيانا ضحية نفسها أو بنات جنسها و ليست دائما ضحية للرجل..

بل قد يكون الرجل (أحيانا).. ضحية للمرأة !


لكن دكين واحد من الناس ما بيهمو يخربش صورة الرجل و يقطعها كمان

مقابل انو يعيش متعة احراج احداهن أو استفزازها..حتى تغضب و تترك المكان.. أو ..تقذفه بحقيبة يدها

و دي أكيد بتبسطوا أكتر!

لأنو وقتها ممكن يمسك الشنطة دي و يطلع الفيها واحدة واحدة - دون مراعاة للخصوصية -

بس عشان يحس بالانتصار و هو بيطلع (أصبع روج أو مراية)

و يؤكد بضحكة خبيثة ..انو أها شفتو قلة عقل البنات و مباراتهم للمظاهر!!

دكين في محاولاته (نكش) أماني .. نسي أن ما يحاول التسلي به هو قناعاتها و ثوابتها

و حلمها بمستقبل انساني أفضل

و ليس أصبع الروج و قطعة المراية

و عمر الفاروق لما دخل في الحتة دي و قعد يباصي في الحاجات و عايز يكاوي و يهظر

ما انتبه لأنو أماني هنا ما بتتسلى و لا قادرة تجاري دكين في مكاواتو و هظارو

لأنو المنكوش هنا ما شنطة يدها

المنكوش دا قناعاتها و أفكارها البتحاول انها توصلها بكل جدية عسى و لعل انها تكون بتساهم في خلق بيئة أفضل لحوار انساني و ليس (جنساني!)!

حاجة طبيعية انو أماني تتضايق من مسار الحوار و حاجة طبيعية انو ما يعجبها اسلوب دكين لأنها بتعتبر دا استخفاف بعقلها لما يكون مجرد غرضو هو التعرف كما قال .. أو اثارة انفعالات شخص ما ..

حاجة طبيعية انها تثور لما تلقى نفسها منتزعة من سياق حوار جاد لتستعمل كأداة للتسلية أو لنفض الغبار عن ذاكرة طويت صفحاتها!!

.....

عمر الفاروق .. مع انو (مؤخرا بديت) أعجب بكتابتك و صراحتك الشتراء لدرجة بديت أخاف على روحي و بقيت حاسة انو في خلل حاصل!

و مع انك بديت مداخلاتك بطريقة إيجابية كان ممكن تسهم فعلا في الحوار موضوع البوست

لكن كونك تاني تقلبو هزار و تبدأ تباصي لدكين مشاغلات حول (البت الجديدة) فللأسف نسفت مضمون مداخلاتك الإيجابية ..

و وصلت لإنسانة في أدب و علم و فكر ..أماني... أنك لا ترى منها سوى ذيل فستان

و لا تسمع سوى طرقعة كعب عالي..

(أنثى) توجد في الجوار... صفارة عالية يفهمها الأصحاب.. و لعاب يسيل طمعا في (سفسفة النبق!!)




قف! تأمل! اليافطة على مدخل البوست!

سلام وانحناءه سناء خالد
يا بت انا مبسوطه منك شديد

Quote: دكين في محاولاته (نكش) أماني .. نسي أن ما يحاول التسلي به هو قناعاتها و ثوابتها و حلمها بمستقبل انساني أفضل

وبتمني عوده اماني للخيط دا حالا

سلامات يا اماني
اوكي شوفتي وقعت في مقص انك تكتبين باسمك الاصلي
ولا تريدين ان تتعاملي مع دكين حتى لا يظن من يعرفونك
انك نزلتي مستواك ولا البت السودانية المحترمة لا ترد على من يهاجمها من الرجال..
نفس فكرة المحطة الوسطي ممكن يتحرش بيك رجل وتسكتي لانه المرأة السودانية لازم تسكت
الان تحول السلوك دا للبورد للاسف
الموضوع يكون ماشي كويس نقاش صحي مفيد
تتغلب على واحد كدا عقليتو الذكورية ولا ساكت زول بتاع عنكبة يجي
يخلي الموضوع الاساسي و يمارس سياسة خدش الحياء
باستخدام الفاظ نابية ولاتلميحات بطالة
اها تجي الواحدة الخايفة على اسمها وسمعتها (السودانية)
تنسحب من الحوار كما حدث لابنتنا اماني..
سلاح خدش الحياء ومحاولة احراج البنات والنساء الكاتبات مع اسرهم
ومعارفهم دي الطريقة الوحيدة لابعاد النساء الاتي لديهن ما يقولونه
من البورد دا.
وحدث كثير حيث هناك عدد رفضت اسرهم تواجدهم في هذا البورد
لانه بيشوفهو شيل حال واشانة سمعة..وكذلك ازواج واخوان او اي من افراد الاسرة
مصيبة المرأة السودانية الكاتبة مصيبة يعزو فيها..
عندما قرات ثرثرات العواميد الاتي يكتبنها بنات سودانيات خاتت صور شرط
اتمحنت في روحي. لماذا لا يكتبن في الامور الجادة الهامة
لماذا جل الكتابات خواطر "عضيرة" لبنت مراهقة تكتبها في مفكرتي العزيزة
وتجد قبول كبير متموم بالصورة طبعا..
الكتابة منزوعة الشرور بالنسبة للمرأة هذه الخواطر العضيرة
ولكن الكتابة ذات الاشواك وهي الكتابة الفاهمة التي تريد تغير مفاهيم
وتطرح رؤى عامة مثل كتابة اماني تثير حنق الرجل
فينقسمون الى قسمين في رد الفعل الايجابي ان يحاول ان يدخل معها في حوار
ويفرغ الحوار من معناه ويحولو لكوميديا غير الهية اويتفق معها
لاغراض غير الحوار وهذه ذكرت في هذا البوست..

كان يمكن دكين ان يطرح ما طرحه بصورة خالية من السخرية والاستخفاف
وممكن يناقش اماني في ما براه طرح غير ناضج او يذكرها بانه الحركة النسوية بدأت
متين ويناقش موضوع مطالب نساءالاربعينات هي غير مطالب بنات الالفية الثانية

ولكن دكين بسخريته الدائمة حول الموضوع انه فقط
يود ان يتعرف باماني ولذلك دخل في هذا الحوار وكتب ما كتب عملية لفت نظر ما اكثر ليه
هوي انا دكين وفيري افيلبول..

ودا ذات ما كان يحدث لنا في اركان النقاشات في الثمانيات
حين يختصر احدهم الحوار بان يقول والله انتن بس عايزين ليكم رجال
يادبوكم ولا رجال تمام ينسوكم الكلام الفارغ دا
وينتهي الركن بقرقراب وضحك على النساء..
لا يمكن للرجل السوداني ان ياخذ موضوع المرأة بجدية
وهذا هو السلاح الذي يحارب به الرجل المرأة السخرية "والتقريق"

فتحول موضوع نقاش المرأة من الكوميديات الشهيرة
ولذلك لسنوات طويلة جدا جدا هجرت الكتابة في هذه المواضيع..
املا ان تأتي اجيال جديدة تاخذ هذا الموضوع بحدية
وراعني بعد ربع قرن الحال في حاله في جيل الابناء والبنات..

لو كان محمد عباس الله يطراه بالخير في بداية الثمانيات
يجلس خالفا رجل على رجل( رجل مشققة) يضحك ويستهزأ

بما نقوله عن المراة وحقوق المرأة وهو يدرس المسرح يعني فنان
واذكر مرة سالته كيف زول فنان يكون شايف المرأة بس صاج وعنقريب
قالي دا طبعا معاك هنا لكن لو عملوا معاي مقابلة بالتأكيد
حاقول المراة نصف المجتمع ولها حقوقها و الخ الخ ما يريدن النسا ء ان يسمعن

يظهرني كفنان مثقف محترم..
في تلك السنوات كان يصيبني الحنق علي محمد عباس وقضيت سنواتي
كلها في محاولة تصليحه دون جدوى ولكن الان بعد ربع قرن من الزمان
احترم جدا محمد عباس لانه رجل واضح وغير مخادع ولا يكذب ولا يتجمل..
مثل دكين الان فهو واضح فيما يراه لا يريد ان يظهر بمظهر غير مظهره
وت يو سي وت يو قيت..
ليس مثله مثل الادعياء من الاحزاب التقدمية الفي اقرب ملف يطلع
سلاح خدش الحياء واستخدام ورقة الشرف والعرض لتخويف


باختصار
اماني عودي لنقاش وحقك محفوظ واحترامك
دكبن شكرا لانك لا تكذب ولا تتجمل..