Post: #1
Title: غيمة عيـــد ...
Author: فاروق أبوحوه
Date: 06-05-2009, 02:04 PM
كانت سمحه ..
سماحا يشفِّق
بس زي نيل
أو زي أمي
وأشياء أخري
وزي ما بقولوا:
قيامه عديل
...
يوم ..
لا قيت الغيمه
عند ضل شوقي
كانت خايفه بترجف
وواقع توبه من كتفيها
قُت:
يا غيمه أنستري
هداك الريح ماشي علينا
قُت في سِري:
الله يهديها ..
ويقطع طاري الجاي عليها
لو كان عصفو هو الطاريها
قلت:
ومالو عنها أسأل
- هوي يا غيمه هل شفتيها ؟
ما ردتلي.
في عينيها..
شفت كلامه
وشوق نسّامه ..
يناغم فيها
قالت :
بالك فالك
خُتُو قُبالك
ريد البت الحارق تيها
ياها إخيتي..
بتبقي وصيها؟
ما صدّقتها..
بس مشّيته
وكان في نيتي ..
أمشي وراها
مُش تيمان ؟
إمكن تصدِق يا إنسان
كت غبيان..!!
أي والله !!
وزي ما تقول كُت عشمان
إمكن تصدِق لما نجيها
بيني وبينك كانت سمحه
ضُلها ناعم وشارّي وراها
وشها طاعم وبرضو قفاها
وقُم باريته..
من باب بيته
لاعند مُشرع باب الروح
ما خلينا فريقاً ما غِشِيناهُ
كم راكوبةً ..
كان رقراق الشمس تكاها
رضيناهُ ورحّلناهُ
كان مشوار للنيل وكملناهُ
وآآخ لما حبيبك يترجاك
فارد شوقو وحِن ممشاهُ
حاجه تفرِّح ياااخ
لما نخيلك تفهم صِدق غناهُ
كُت مبسوطاً بسطاً إشفِّـق
مُش من حقي؟
ساكن غيمه وأحلي مناخ
كايس زولاً تومو معاي
أبقي معاه ..
ُكان في ليلاً
زيفو انكبّ
أو في نهاراً
يقلا الحبه
لو في نوماً
شدّ غُتاهُ
أو في حلماً
رفّ غُناهُ
إتونسنا عنها ذاته
وكان ترحاب
أخوان وصِحاب
كان القمرا شاهده علينا
وماها براها
كم نجمات يتصنّتو فينا
ماغتّاهم حلق الباب
وجات منسرقه..
غير برّاق منكب بي حُرقه.
وغير إرهاص بدمعه وفرقه..
جات بالضبط ..
دافره رحيقه
قُبالة الشط
لافحه الطقس ..
الدرت ..
العينه
ومطراً ن قّ ط ..
فوق الأرض الدايخه بتظبط
حس إيقاع الفرح الغاب ..
كان الدنيا قبايل دهشه ..
وكان العيد علي الأبواب .
كانت عيد.
وكان..
العيد.
...
|
Post: #2
Title: Re: غيمة عيـــد ...
Author: فاروق أبوحوه
Date: 06-07-2009, 10:52 AM
Parent: #1
إلي سقف الرزاز..
رسالة
وأرض
وبعض
شوق
|
Post: #3
Title: Re: غيمة عيـــد ...
Author: فاروق أبوحوه
Date: 06-14-2009, 07:06 PM
Parent: #2
وما أدراك..
إذا ما كان حفيف مغناك..
يهش سرب الغيوم تالاك..
يرتش لوحة الجايين..
مطاليقاً شرابهن نم
رقادن في الحدب بايتين
وما ضراك..
إذا اتكيف مزاج الكم
سماح وطناً ..
هجد جواك..
وما صحّاك..
هتاف من قِبلة الراجعين
علي كتف الخليج شوقك
تفتِش في ملح للشوف
تكوس أوتاد ..
تكون مرساك.
وما أشقاك.
إذا ما غالبك شوقك
وشلِّ الحِن
صبيب يمناك..
|
Post: #4
Title: Re: غيمة عيـــد ...
Author: Muna Khugali
Date: 06-14-2009, 07:11 PM
Parent: #3
مرحب بالعيد وغيمه السعيد..
|
Post: #5
Title: Re: غيمة عيـــد ...
Author: فاروق أبوحوه
Date: 06-15-2009, 11:50 PM
Parent: #4
| Quote: مرحب بالعيد وغيمه السعيد.. |
الملكة بت خوجلي..
سلام التلاقي الصحاب..
والشوق أكيد
في الباب.
أهلاً بالعيد
____________
هاشم في العيد
|
|