نفــاج .. و.. ضــو

وكتين أدِسِـك مني فيـكــ
وأحلف كمان ما أشتهيكـ
القي العيون سهرانة بيكـ
حــد الوجع تقراني ليكــ

*** *** ***
واقعد افتش فيك عليّ
أشبهلي جرفاًً فاتو ري
يشبهني جرحاً فوقو كي
يندهني حرفاً حُزنو ني
وامــرق عليكـــــ
من خوف وشيكـ

*** *** ***
خايف يطش مني الدرب
والسكة تغرق في الوقوف
شايف الحنين دار يتخرب
من حقو ينقح جوفو خوف
يفتح ضفاف النيل عليكـ

*** *** ***
والقاكِ في كل القِبَل
أرضاً سما بحراً وجو
تامة النواقص بالامل
ما بتعرفي ياريت ولو
لوّمت لون الليل حمل
من كل زوج نفاج وضو
ليه يشدهكـــــ
يومو البجيكـ ؟

*** *** ***
يابت سماحِك بُن حبش
راميني حد القريفة
هبش العصب للشوق نبش
فتح المزاجات كيَّفه
مشت النهارات للمطر
جدعت زماناً صيَّفة
نيلينك اترسمن سماح
قسمن هواك مناصفة
وقسمني ليكــ

*** *** ***
فاتحني فيك باب المسام
قافلني حد الهلوســة
عينيك ابليس الغــــرام
مالي الضلوع بالوسوسة
قلباً بيفرح بيك تمام
رايات يفوتك نكّسه
يقراك ياكل الغمام
قاصد كمان ماينتهيكـ

*** *** ***
كلمت ليك النيل دُغش
يبرا البويتات من طرف
يديك بشارات ما بتغُش
رغم إتساع زمنا قرف
انتي الصباح الجاي مُش؟
انتي البتدينا العـرَف؟
مش لينا حق لمن نخُش
ضُفـر الرجــوع الإنحرف
نسكن عيونِكـ أو نرُش
باقي المسافات بالفرح
قبل العمر يمشي الخرف
قبل البعاد يفجعنا فيكـ

*** *** ***
وكتين ادِسِك مني فيكـــ
واحلف كمان ما اشتهيكـ
تلقيني بيكـ مُترع أمان
كايس المداخل شان اجيكـ
والقاكي ماليالي المكان
نفس الحنين الفيني فيكـ

خايف يطش مني الدرب
والسكة تغرق في الوقوف
شايف الحنين دار يتخرب
من حقو ينقح جوفو خوف
يفتح ضفاف النيل عليكـ

Quote: خايف يطش مني الدرب والسكة تغرق في الوقوف شايف الحنين دار يتخرب من حقو ينقح جوفو خوف يفتح ضفاف النيل عليكـ

حبيبه...

طشاش الدروب الحبيبه البعيده
دعاش القلوب الرحيبه ونشيده
يخدِّر
ديارا..
حنين التلاقي العوافي التصافي
سنين التجافي الحوافي الخوافي
تفارق
مسارا..
تقيِّل في حلفا..
تصيف ..
تشتِّي..
وشوقه البِِغـتِّي
يخرِّف في بارا..


حبيب نورا:

الشوق أكيد نيلين وقاش
يا ود ياطاعم
يا هباش
للعصب الطاش

(*)