Post: #1
Title: توفي هذا الصباح (الفقيد شقيق كل من .......)
Author: Amany Elamin
Date: 05-26-2009, 06:35 AM
كنت مازلت علي فراشي أحاول ألّا أستجيب لأزعاج الصباح اليومي
في منزلنا عندما يهم كل في المنزل بالخروج للعمل في نشاط
وأنا مازلت في اجازه أنتزعها عنوة للاسترخاء من عناء السفر
وكمرحله انتقاليه قبل استئناف حياتي وعملي في الخرطوم ..
أقول كنت مازلت أحاول التركيز في الاستغراق في النوم
الا أن أمي كعادتها أمي ترفع صوت المذياع الي أقصاه
لتستمع الي أخبار الوفيات في نشرة أخبار السادسه والنصف صباحا ..
|
Post: #2
Title: Re: توفي هذا الصباح (الفقيد شقيق كل من .......)
Author: osman righeem
Date: 05-26-2009, 06:39 AM
Parent: #1
اللهم أرحم موتانا و موتي المسلمين عامة
|
Post: #3
Title: Re: توفي هذا الصباح (الفقيد شقيق كل من .......)
Author: haroon diyab
Date: 05-26-2009, 06:40 AM
Parent: #1
استاذة اماني
سلام
Quote: الا أن أمي كعادتها أمي ترفع صوت المذياع الي أقصاه
لتستمع الي أخبار الوفيات في نشرة أخبار السادسه والنصف صباحا .. |
تذكرت هذا الموقف الذي تكرر لسنوات عده
في منزلنا....
وتخيلتها هل كانت تتوقع ان تسمع نعيها
في نفس الراديو ومن نفس الاذاعة وفي نفس الوقت
والذي نقل اليها رحيل اخوتها واخواتها واحبائها....؟
لها الرحمة والمغفرة امي الحبيبة .
ولوالدتك الصحة والعافية والعمر الطويل باذن الله
|
Post: #4
Title: Re: توفي هذا الصباح (الفقيد شقيق كل من .......)
Author: حمزاوي
Date: 05-26-2009, 06:42 AM
Parent: #3
وش مليان دموع
أصبحنا وأصبح الملك لله
|
Post: #13
Title: Re: توفي هذا الصباح (الفقيد شقيق كل من .......)
Author: ريهان الريح الشاذلي
Date: 05-26-2009, 07:35 AM
Parent: #3
سلامات اماني و خالص الاحترام...
عارفة بسمع حكاية (توفي ) دي بالصدف لكن كل ما اسمع بكون مركزة تركيز شديد مع الاسامي وقلبي بكون مقبوض لمن ينتهي المذيع بتخيل اني حسمع اسم بعرفه .. الله يطول عمر احبابنا ..
|
Post: #5
Title: Re: توفي هذا الصباح (الفقيد شقيق كل من .......)
Author: Amany Elamin
Date: 05-26-2009, 06:43 AM
Parent: #1
جاءني صوت المذيع بتأني وخشوع (وبعض الجرجره)..
1- توفي الي رحمة مولاه .... الفقيد والد فلان بالمؤسسه الفلانيه, وفلان بالشركه الفلانيه, وشقيق فلان بالبنك الفلاني,
ويشيع الجثمان الي مقابر أحمد شرفي في تمام الساعه ... ويقام المأتم بمنزلهم بالمنطقه ...
2- توفي ب.... فلان الفلاني..
الفقيد شقيق كل من .... وخال ... وعم ... ويقام المأتم ب ...
3- توفيت الحاجه .... أرملة المرحوم ... والدة كل من .... وشقيقة ... ويقام المأتم ب .....
وقفزت الي ذهني المتثاءب بكسل تساؤلات عديده ..!!
تري من هنّ بنات الراحلين هؤلاء؟
ومن هنّ شقيقاتهم ؟
أليس لهن الحق في ذكرهن حين وفاة أقاربهن ونعيهم ..؟
|
Post: #6
Title: Re: توفي هذا الصباح (الفقيد شقيق كل من .......)
Author: Amany Elamin
Date: 05-26-2009, 06:50 AM
Parent: #5
في زمان أصبحت فيه المرأه مديرة بنك, ومديرة مستشفي,
ورئيسة قسم, وبرفيسور في الجامعه,!!
ومديرة شركه خاصه ورئيسة اتحاد, وأمين عام نقابه أو مؤسسه ..
وكابتن طيران, ورئيسة حسابات, !!
في زمان أصبحت فيه المرأه تعول الأسر ووتنفق علي الأبناء وتعليمهم,
وعلاج الوالدين وسفرهم الي الخارج لاكمال العلاج ..!!
في زمان فيه المرأه تسافر الي الخارج في وفد رئاسي,
وتشارك في المؤتمرات وتقدم الأوراق العلميه,
وتكتب مقالاتها في الصحف, وترأس تحريرها !!
|
Post: #7
Title: Re: توفي هذا الصباح (الفقيد شقيق كل من .......)
Author: Amany Elamin
Date: 05-26-2009, 06:57 AM
Parent: #6
في زمان تنشط فيه المرأه اجتماعيا وسياسيا واقتصاديا ..
في زمان ينسب اليها أبناؤها حين ظهور نتائج مرحلة الأساس ..
وتعمل معلمه فتخرج النشء ..
وتربي الأبناء فيتخرج منهم الطبيب والمهندس والوزير والقاضي !!
في زمان تلازم المرأه مريضها ليل نهار وتططببه حتي يوافيه الأجل المحتوم في حين فجيعه ..
في زمان تلتزم في المرأه بتكاليف اقامة العزاء ومراسم الدفن !!
في زمان يأتي موظفو المؤسسه رجالا ونساء الي منزل الفقيد لتعزية الزميله ومؤازرتها !!
في زمان المرأه فيه نصف المجتمع ان لم نقل كلّه ..
مازال راديو أمدرمان وتقاليدنا الباليه,
تبخل علي المرأه بذكر اسمها حين فقد عزيز !!
وتنكر وجودها حين تشييع غالي الي مثواه الأخير !!
|
Post: #8
Title: Re: توفي هذا الصباح (الفقيد شقيق كل من .......)
Author: Amany Elamin
Date: 05-26-2009, 07:03 AM
Parent: #7
الساده معدّو نشرة أخبار الوفيات باذاعة أمدرمان ..
الساده أسر المفقودين وأولي الأمر منهم ..
الساده المستمعين ..
عذرا ..
فللراحلين بنات تيتمن وشقيقات فقدن الغالي وأمهّات تثكلن !!
عذرا..
فاسم المرأه ليس بعوره ..
ووظيفة المرأه ليست بعوره ..
عذرا ..
فلايضير الراحل ذكر بناته وشقيقاته ..
حتي وان كنّ ربّات بيوت بلا عمل ..
|
Post: #9
Title: Re: توفي هذا الصباح (الفقيد شقيق كل من .......)
Author: Amany Elamin
Date: 05-26-2009, 07:11 AM
Parent: #8
عذرا فالمرأه ماعادت تلازم الخدور ..
خرجت فدرست ونجحت .. عملت فتفوقت ..
ومازلتم لاتنسبون اليها فقداءها!! وهي الأحق بالنسب !!
مازالت فقيدة اليوم أم لذكور وشقيقه لذكور .. فقط ..
ومازال الفقيد صهر لهؤلاء وقريب ال هؤلاء .. فقط ..
ومازالت المرأه نكره لاتعرّف الا بالاضافه للذكور !!
زوجة ذكر وشقيقة ذكر..
وقريبة ذكور كثر ليس بينهم امرأه ..
وكأن وجود المرأه عوره ..!!
|
Post: #10
Title: Re: توفي هذا الصباح (الفقيد شقيق كل من .......)
Author: المسافر
Date: 05-26-2009, 07:21 AM
Parent: #9
دي غارة دي
عديل كده
يلا .. شاي الصباح .. وما انشرب
كدي اسكتي النسمع النشرة دي..
|
Post: #11
Title: Re: توفي هذا الصباح (الفقيد شقيق كل من .......)
Author: Amany Elamin
Date: 05-26-2009, 07:25 AM
Parent: #9
الأعزاء هارون دياب وعثمان رغيم وحمزاوي
وكل المرور الكريم ..
لا أراكم الله مكروها في عزيز لديكم ..
ولكن ..
للمرأه حق أدبي ومكانه اجتماعيه تنزع منها عنوه أمام المجتمع ..
وتجرّد منها قسرا حين فقد حبيب ..
المرأه كائن مشرّف لا يخجل ذكره علي الملأ ..
ولايعقل أن يستحي أحد من الاشاره اليها ..
للمرأه كيان مادي في الأسره من غير المبرر محوه وعدم التعرّض له ..
للمرأه صلة رحم وقرابة دم بفقداء كل صباح ومساء ..
للمرأه اسم وصفه لايليق نزعهما منها ..
للمرأه وجود غير مبرر اخفاءه ..
|
Post: #12
Title: Re: توفي هذا الصباح (الفقيد شقيق كل من .......)
Author: ALZOLZATOO
Date: 05-26-2009, 07:29 AM
Parent: #9
العزيزة اماني
عودا حميدا وحمدالله على السلامة
شنو الحساده دي من اول الصباح ،
لا عندك حق في الحته دي لانو المراة برضو ليها معارفها واحبائها وعند وفاة عزيز لديها بمجرد ذكر اسمها سوف يعرف الكثيرون الخبر ويسارعون بواجب العزاء .
بس المشكلة انو الوقت بتاع اذاعة الخبر في الاذاعة مش مفروض يكون مختصر عشان زمن الاذاعة وكده والناس عندها دعايات وبرامج والحي اولى من الميت بعدين يمكن الاكتفاء بي اسم المتوفي واسمين او تلاته وفي التلاته ديل الذكر اولى من الانثى لكن لو فتحو الشغلانة كده زي كلامك الشغلانه ح تجوط وتصبح الاذاعة في اعداد الاموات .
في النهاية الشغلانة مربوطة بالشخص الذي ذهب بالخبر الى الاذاعة هو من يكتب ويحدد من يريد ذكره من الاسماء .
ارقدي عافية وربنا يديكم طولة العمر
تحياتي
زاتووووو
|
Post: #14
Title: Re: توفي هذا الصباح (الفقيد شقيق كل من .......)
Author: حامد محمد حامد
Date: 05-26-2009, 07:44 AM
Parent: #12
امانى لك التحايا وطيب المقام فى السودان
الله يدى الوالدة الصحة والعمر
انتى المصحيكى ستة ونص شنولو دايرة ترتاحى من عناء السفر
كونى بخير
|
Post: #21
Title: Re: توفي هذا الصباح (الفقيد شقيق كل من .......)
Author: Amany Elamin
Date: 05-26-2009, 05:56 PM
Parent: #14
الأعزاء ريهان وحامد :
شكرا علي المرور ولا أراكم الله مكروه في عزيز لديكم ..
|
Post: #15
Title: Re: توفي هذا الصباح (الفقيد شقيق كل من .......)
Author: omer osman
Date: 05-26-2009, 07:46 AM
Parent: #12
القانون السوداني لم ينص على منع المرأة من ان تكون ضامن لاي متهم في اى قضية لكن الممارسة القانونية السودانية
تمنع ضمانة المرأة والمفارقة ان قرار اطلاق سراح المتهم بالضمانة قد يكون صادر من امرأة وكيل نيابة او قاضي
ربما هذا من خصوصية الاعراف والتقاليد السودانية والتى حتما ستتغير ذات يوم بمرور الزمن.
بس ما تقولوا كمان دايرين تمشو المقابر ........
|
Post: #16
Title: Re: توفي هذا الصباح (الفقيد شقيق كل من .......)
Author: Hussein Mallasi
Date: 05-26-2009, 08:22 AM
Parent: #15
الغرض الأساسي من إذاعة الوفيات حضور التشييع؛ و حيث أن التشييع وقفاً على الذكور
لذا تتم إذاعة أقارب المتوفى و المتوفاة ليتمكن معارفهم من الحضور لأداء واجب التشييع.
_____
في الوقت متسع لمعارف القريبات
من الحضور للتعزية في المنزل.
|
Post: #24
Title: Re: توفي هذا الصباح (الفقيد شقيق كل من .......)
Author: Amany Elamin
Date: 05-26-2009, 07:24 PM
Parent: #16
ملاسي:
شكرا علي التوضيح الوافي..
Quote: حيث أن التشييع وقفاً على الذكور
لذا تتم إذاعة أقارب المتوفى و المتوفاة ليتمكن معارفهم من الحضور لأداء واجب التشييع. |
وان كنت أختلف معك في حصر التشييع كما ذكرت ..
ياملاسي اذا كان للفقيد ابنه عضوة برلمان .. (أطال الله عمر أقرباءهن)
أو قاضيه بمحكمه شرعيه .. أو وزيرة دوله .. أو .. أو .. (حفظ الله الجميع)
أليس من المنطق ذكر اسمها ليتوجه معارفها لحضور مراسم التشييع ؟
السؤال لماذا تذكر اسماء هؤلاء في نشرات الأخبار والمؤتمرات والصحف,
ولاتذكرن حين اذاعة خبر وفاة أقرباءهن؟
|
Post: #17
Title: Re: توفي هذا الصباح (الفقيد شقيق كل من .......)
Author: فادية اليمني
Date: 05-26-2009, 11:39 AM
Parent: #15
صحى انت المصحيك بدري شنو يابت ما تنومى نومك
حمدلله على السلامة
ونورتى السودان حبيبة
وماما دوما شوقتنى انى القياك واشوفك
من كثرة ما بتحكى لي عنك...
محبتى
|
Post: #22
Title: Re: توفي هذا الصباح (الفقيد شقيق كل من .......)
Author: Amany Elamin
Date: 05-26-2009, 06:00 PM
Parent: #15
جنابو عمر عثمان:
Quote: ربما هذا من خصوصية الاعراف والتقاليد السودانية والتى حتما ستتغير ذات يوم بمرور الزمن.
بس ما تقولوا كمان دايرين تمشو المقابر ........ |
شكرا يا جنابو لأنك وريتنا الموضوع قانونيا ..
ولخصّت انه محض عادات وتقاليد لاتمت لقانون بصله ..
بس هي عادات مجحفه في حق النساء ..
موضوع تشييع الجثمان الي المقابر,
معروف انه دينيا النساء لايتبعن الجنائز ..
يبقي سبب الحظر منطقي ومفهوم ..
لكن موضوع النعي ليس له أصل أو مفهوم واضح فقهي أو حتي قانوني ..
|
Post: #18
Title: Re: توفي هذا الصباح (الفقيد شقيق كل من .......)
Author: عصام علي أحمد
Date: 05-26-2009, 12:35 PM
Parent: #1
صراحة يا اماني النسوان بعملوا حاجات غريبة في بيت البكا
بكا من غير دموع لزوم مجاملة
والواحدة تبدا تصرخ من بداية الشارع برضو لزوم انا جيت
وده غير الونسة والضحك والقطيعة
وماتنسي حنة البكاودهب البكا وتوب البكا
يتحول المأتم الي صالة عرض ازياء
|
Post: #19
Title: Re: توفي هذا الصباح (الفقيد شقيق كل من .......)
Author: دينا خالد
Date: 05-26-2009, 02:52 PM
Parent: #18
الاخت امانى سلامات ..
| Quote: الغرض الأساسي من إذاعة الوفيات حضور التشييع؛ |
ابدا دا كلام ما صحيح .
الخبر بالاعلان لما يمشى الاذاعة
مرات بكون المرحوم اتدفن !
كتير بكون الجثمان خارج البلاد ..
وفى هذه الحالة بيذاع خبر التشييع مرة اخرى ..
مرات بكون البكا (خبر) .. ااااااى .
الغرض الاساسى من اذاعة الخبر بكون اعلان الوفاة
للنساء قبل الرجال لانو ايام الماتم بتكون محدودة .
والنساء ياهن هن البعصرن الفراش .. ومعنيات بوصول
الخبر ليهن اكتر من الرجال .. والشاهد على دا انو
المولعات بسماع اخبار الوفاة هن النساء .. الرجال
كان فاتح فى اضانهم دى ما بسمعوا !
لكن ياهو حال اعلامنا ومناهجنا ...
التكريس للثقافة التى تجاوزها الواقع ..
والقصة دى ما صدفة ولا عفوية مقصصصصودة !!
كلنا شفنا كتبنا وكتب الدول ( الشقيقة)
بدر كتب .... امــــــل ماااااااا كتبت
بدر قرا .... وامــــــل امااااام المراة ..
وفلان يدرس ... وفلانة تساعد امها فى الطبخ !!!!!!
والله جد !!!!!
| Quote: في النهاية الشغلانة مربوطة بالشخص الذي ذهب بالخبر الى الاذاعة هو من يكتب ويحدد من يريد ذكره من الاسماء |
ابددددددددا انا سمعت قالوا دا قرار يعنى حتى
لو انت جبت بناتو ما بذيعوهم ليك... عشان كدا محتاجين
لزول متاكد يفيدنا ...
ــــــــــــ
امانى ارجو ان لا تركزى مع الردود الهادفة لتحويل مسار
البوست ... خلينا نشوف الاراء بتاعة عدم الاذاعه دى منطقها
شنو ؟؟
|
Post: #20
Title: Re: توفي هذا الصباح (الفقيد شقيق كل من .......)
Author: Amany Elamin
Date: 05-26-2009, 05:54 PM
Parent: #19
المسافر:
الموضوع فعلا مستفزني بشده ..
عذرا علي الغاره :) ...
وشكرا علي المرور ..
الزول زاتوو:
| Quote: بعدين يمكن الاكتفاء بي اسم المتوفي واسمين او تلاته وفي التلاته ديل الذكر اولى من الانثى |
صدقني ده السؤال اللي أنا قاصداه ..
يعني لو المرحوم عنده بنتين وما عنده ولد ..
يذاع باسم أخوانه بس؟
والخلي الذكر أول من الأنثي في موضوع زي ده شنو ؟
بالجد لو في أي فهم ديني في الموضوع ياريت لو زول يشرحوا لينا ..
تحياتي ..
|
Post: #23
Title: Re: توفي هذا الصباح (الفقيد شقيق كل من .......)
Author: سارة علي
Date: 05-26-2009, 06:42 PM
Parent: #20
اماني ..
ازيك؟
يعني اقعد اسكك في البوستات عشان اسلم عليك؟؟
ثم موضوعك دة ما هضمتو خالص..
عارفاني ما بحب سيرة يموت لي زول..
مع علمي التام بانك بترمي لحاجة تانية..
لكن جات مغلفة بي سيرة الموت
|
Post: #27
Title: Re: توفي هذا الصباح (الفقيد شقيق كل من .......)
Author: Hussein Mallasi
Date: 05-26-2009, 07:32 PM
Parent: #23
Quote: ياملاسي اذا كان للفقيد ابنه عضوة برلمان .. (أطال الله عمر أقرباءهن)
أو قاضيه بمحكمه شرعيه .. أو وزيرة دوله .. أو .. أو .. (حفظ الله الجميع)
أليس من المنطق ذكر اسمها ليتوجه معارفها لحضور مراسم التشييع ؟ |
إن كانت معرفتهم بإبنة الفقيدة فقط؛ فالراجح عدم ذهابهم للتشييع؛ مع الحرص على
الذهاب لبيت البكا ثم البحث زول يناديها ليهم من جوة عشان يشيلوا معاها الفاتحة.
|
Post: #29
Title: Re: توفي هذا الصباح (الفقيد شقيق كل من .......)
Author: Amany Elamin
Date: 05-26-2009, 07:40 PM
Parent: #23
سروره صحبتي:
ازيك ومشتاقين ..
أكيد فاهماني انه الموضوع اخفاء النساء واظهار الرجال فقط في مسألة النعي ..
كأن دور المرأه في حياة الأسره يتم وأده في لحظة فقد فرد لاقدر الله مع سبق الاصرار والترصد ..
المرأه عضو مشرّف في الأسره ومن المدهش تعمد اخفاءها في لحظه ..
-----
مش لاقيت حنين ..
هسي ألاقيك وين أحكي ليك ..
المهم مشتاقيييييين ..
|
Post: #26
Title: Re: توفي هذا الصباح (الفقيد شقيق كل من .......)
Author: Amany Elamin
Date: 05-26-2009, 07:29 PM
Parent: #19
الأخ عصام:
أهلا بيك والعادات السالبه للنساء في العزاء موضوع يستحق الوقوف عنده ..
لكن رايك شنو في تهميش النساء في ايراد خبر النعي ؟
تحياتي ..
|
Post: #28
Title: Re: توفي هذا الصباح (الفقيد شقيق كل من .......)
Author: Amany Elamin
Date: 05-26-2009, 07:36 PM
Parent: #19
دندونه:
شكرا لأنك قلت كتير من الكلام الفي رأسي ..
ليه المرأه يمنع ذكرها في النعي في الاذاعه؟
كلامك صاح ثقافتنا بتروج لمفهوم أخت الرجال.. وبس ..
محتاجين برضو لرأي الدين ان وجد ..
تحياتي وخليك قريبه ..
|
Post: #25
Title: Re: توفي هذا الصباح (الفقيد شقيق كل من .......)
Author: Amany Elamin
Date: 05-26-2009, 07:27 PM
Parent: #18
فاديه العزيزه:
المصحيني النشره البصوت عالي بس والله ..
شكرا ياذوق علي مرورك الجميل ..
|
Post: #30
Title: Re: توفي هذا الصباح (الفقيد شقيق كل من .......)
Author: Marouf Sanad
Date: 05-26-2009, 07:45 PM
Parent: #25
| Quote: إن كانت معرفتهم بإبنة الفقيدة فقط؛ فالراجح عدم ذهابهم للتشييع؛ |
ليه!
|
Post: #31
Title: Re: توفي هذا الصباح (الفقيد شقيق كل من .......)
Author: احمد محمد بشير
Date: 05-26-2009, 07:45 PM
Parent: #25
اختي اماني الامين
هذة النشرة الحزينة
كانت تذداد حزننافي نفسي
عندما أسمعها بصوت اذاعي نسائي
ولا ادري ما السر في ذلك
هل المراءه حنونة اكثر من الرجل
حتي في قرائتها للاخبار.
تحياتي للبوست الرائع
وانشاء الله اجازة ممتعة
مع الاهل والاحباب دون فقد
عزيز لكم.
|
Post: #32
Title: Re: توفي هذا الصباح (الفقيد شقيق كل من .......)
Author: Amany Elamin
Date: 05-27-2009, 07:06 AM
Parent: #31
ملاسي صياح الخير:
| Quote: إن كانت معرفتهم بإبنة الفقيدة فقط؛ فالراجح عدم ذهابهم للتشييع؛ مع الحرص على الذهاب لبيت البكا ثم البحث زول يناديها ليهم من جوة عشان يشيلوا معاها الفاتحة. |
هل تقصد بالراجح الشائع أو الدارج ؟
|
Post: #33
Title: Re: توفي هذا الصباح (الفقيد شقيق كل من .......)
Author: Amany Elamin
Date: 05-27-2009, 07:08 AM
Parent: #31
الأخ أحمد محمد بشير:
سلامات وتحيه طيبه ..
شكرا علي المرور والأمنيات الطيبه,
وربنا يجعل أيامك كلها أفراح يارب ..
|
Post: #34
Title: Re: توفي هذا الصباح (الفقيد شقيق كل من .......)
Author: MOHAMMED ELSHEIKH
Date: 05-27-2009, 07:22 AM
Parent: #33
يا جماعة في حاجة فايتة عليكم
الموضوع دا اصبح في ذمة التاريخ بتاع الأذاعة دا بعد انتشار الموبايل
الواحد قبال ما روحو تطلع يكون ذاع و عم القرى و الحضر.
تلقيت خبر وفاة قريبي و اصابة اسرته في حادث قرب عطبرة وانا في ابها السعودية و نقل المصابون لمستشفى عطبرة.
تتصوروا نقلت الخبر لشقيقتي التي تعيش في عطبرة!!!!
اها النضم دا تاني معاهو رادي.
امنياتي بالعافية للجميع
|
Post: #35
Title: Re: توفي هذا الصباح (الفقيد شقيق كل من .......)
Author: Hussein Mallasi
Date: 05-27-2009, 07:47 AM
Parent: #34
Quote: | Quote: إن كانت معرفتهم بإبنة الفقيدة فقط؛ فالراجح عدم ذهابهم للتشييع؛ |
ليه! |
ليه شنو .. ما ياهو كدا.
|
Post: #36
Title: Re: توفي هذا الصباح (الفقيد شقيق كل من .......)
Author: سارة علي
Date: 05-27-2009, 07:48 AM
Parent: #35
| Quote: ليه شنو .. ما ياهو كدا. |
هههههههههههههههههههههههههه
اتخيلت شكلك وانتا بتكتبا..
|
Post: #37
Title: Re: توفي هذا الصباح (الفقيد شقيق كل من .......)
Author: Marouf Sanad
Date: 05-28-2009, 11:52 AM
Parent: #36
| Quote: ليه شنو .. ما ياهو كدا. |
ابدا ما كدا
هو الحكاية غلاط والسلام!
دا ما السبب
|
Post: #38
Title: Re: توفي هذا الصباح (الفقيد شقيق كل من .......)
Author: Egbal Elmardi
Date: 05-28-2009, 12:55 PM
Parent: #37
امانى والمتداخلين
ســـلامات
أمانى ...حقاره كده يا بت أمى..
حقاره وحمرة عين..نسميها شنو غير كده؟؟
زمان الراجل لما يجى يركز للبطان بقول أنا أخوك يا السره..أو أخوك يا فاطنه..
ولا أنا أبوك يا عشه...
وكم وكم راجل يهز ويرز عرفوهم بى امهاتهم..وتاريخنا شاهد..
يعنى مسألة ثقافتنا دى مكنه ساكت...
يا ها أسامى النسوان دى زاتها الحسى وفى الزمن ده جايين يرفضوها؟؟صحى نحنا راجعيين لى ورا..
والرده الثقافيه حقتنا دى باديه ليها زمن....
ويا قلبى لا تحزن...
فى الزمن ده... وبعد لفت النظر للموضوع ده..كنت بفتكر إنه أى زول ح يجى يأمن..
ويقول والله ما مفروض..النسوان ديل حسى بقت عندهم مكانه لا تخفى على أحد.. وكده!!
ويبحثوا معانا كيفية تغيير القانون لو كان فى قانون ..
بعد كل ده!! لسه فى ناس ما شايفنها غريبه!!
طبعناً دى ((فرى كنترى...هاهاها...))وكل زول عنده الحق فى وجهة نظرو..
وما قلنا حاجه!!
إقبال
|
Post: #39
Title: Re: توفي هذا الصباح (الفقيد شقيق كل من .......)
Author: Amany Elamin
Date: 05-28-2009, 06:10 PM
Parent: #38
الأخ محمد الشيخ:
مافي شك انه وسائل الاتصالات المتعدده سهلت أمر ايصال أي خبر,
سعيد أو حزين..
بس الملاحظه بتاعتي تعمد نعي المتوفي برجال العائله واخفاء النساء,
مهما بلغن من الشهره أو النجاح ..
السؤال هل للموضوع بعد ديني أو قانوني؟
أهل القانون أفتونا بعدم وجود مايمنع, ورجال الدين في البورد كالعاده يمتنعون عن التجاوب مع أسئلتنا,
مالذي يمنع أن تسمح اذاعة أمدرمان بذلك؟
أتمني أن أجد مجيب ..
شكرا علي المرور والمشاركه ..
|
Post: #40
Title: Re: توفي هذا الصباح (الفقيد شقيق كل من .......)
Author: Amany Elamin
Date: 05-28-2009, 06:22 PM
Parent: #39
العزيزه اقبال:
الظاهر للعيان يا أقبال انه المرأه في السودان أخدت حقوقها كامله وتنعم بكرامتها ومكانتها الاجتماعيه,
بس اللي نحن عارفينه كويس ثقافة اخفاء المرأه عن المجتمع, من فكرة الحوش الوراني بتاع النسوان,
لغاية المرحوم شقيق فلان وفلان ..
لايوجد فخر بالمرأه, يمكن قبول علي مضض, لكن ايمان بمكانتها ومشاركتها فمازلنا في غاية البعد عنه ..
لغاية ما يجينا من يشفي غليلنا ويجيب علي أسئلتنا خليني أشاركك حسرتك أدناه :
Quote: ويا قلبى لا تحزن...
فى الزمن ده... وبعد لفت النظر للموضوع ده..كنت بفتكر إنه أى زول ح يجى يأمن..
ويقول والله ما مفروض..النسوان ديل حسى بقت عندهم مكانه لا تخفى على أحد.. وكده!!
ويبحثوا معانا كيفية تغيير القانون لو كان فى قانون ..
بعد كل ده!! لسه فى ناس ما شايفنها غريبه!! |
تحياتي..
|
|