Post: #1
Title: صك ببرائـــــة أبليس!!
Author: حبيب نورة
Date: 04-16-2009, 11:40 PM
كلامك كان خاطــر غنية مجروحة بتنزف بي نغم القصـــايد ديك ,هــموم الســفرة
للمجهــول وحس الناس بتنده في اللي طال غايب , وشال منك خريطــة الـــشارع
الجاييك , صلاة شوقك بصليها خمسة اوقات , لا خمــسة شوية انا بلغي التخـفيـض
وبرجع تاني لي سدرة المنتهي ولو اتحرقت , واقول ليهم رجعوها خمســـين تاني
عشان اقدر أوريك حــــجم ايماني بيك كقضية .
ايوة صاح نحن بنغلط ونسب الدين لي ابليس حيطتنا القصيرة ,أبليس دة مسكين شديد
, اتحمل كل أخطاء التاريخ , لو نامت قمحة علي الابـيض تتشرد زيو وزاد الابيـض في غـو ومدد
رجلو اليسري , والكسرة جات منكسرة في طبق حاجـــــة زكــــية وما حـــاقت في
خشـوم الامل الغـش , برضـو أبليس هو المسؤول , ولو عثرت بغلة في الــعراق
وما وجدت معتصماه ولا أسلاماه , أبليس هو الســبب , لو أصــطدم نيزك متهــور
بالصحراء الكبري , وكسر رجل النخلة الشافعة العمرها يادوب تلاتة سبيطات
برضو هو المسؤول هو المسؤول , وأعتقد جازما كما يقولون هو صـــاحب اليد
الطولي في تدهور الحالة النفسية لطائر البطريق في الدائرة القطبــية
الشمالية , التي حدثت نتيجة لظاهـــرة الانحباس الحراري وذوبان الجليد
بسبب التغيير الكبير في المناخ , وكذلك تشير أصابع الاتهام لابليس في
حالة العقم الذي أصاب دجاجة حاجة زكية وانقطــعت عنها البيضة الشهرية
ووصلت الي مرحلة يأس لا تجدي معها نفعا كل محاولات الاطباء البيطرين ولا
دهاقنة مزارع الدواجن , ولم تعد تغني في عمق المســـاءات , في الليلة
ديك لا هان علي أرضي وأسامحك ولا هان علي أعتب عليك.
اتعودنا اننا نتمسك بي سلبيتنا ونرجع ورا , ولسة ماسكين في أمبارح
أمل كضاب , بننحني في وجه العاصفة وندفن الرؤوس في رمال الانهزامية
مع توفر أمكانية ألانطلاق بسرعة الصاروخ لي عالم بي رؤية متفائلة ,
لكن نعامل شنو لي كلب الحلة البنبح في شفع حلتنا , وخلي حرامي الليل
يسرح واسرق كيس العيش , واولاد المدرسة بكرة يمشوا حفايا لابسين الشوك
وتشرق شمس الصباح متسخة كالعادة , ملطخة عتمة و ما فيها صــوت الحقيقة
الكانت مبدأ , وعبادة ناس لي فكرة انو يقولوا الحق ولو كان السيف فيهم
واقع واقع , وما علينا ,,, بس يا ريت نشيل الحمل الثقيل من أبلــيس , ونخلي
القول الشال خطــواتنا رمانا بعيد من درب الغيمة , ونجمة شــبق الليل لي
عالم خالي الطرف من شكل اللون الاسود ,و مفهـــوم ادم انو اتغــشي بي كلمةزيف .
|
Post: #2
Title: Re: صك ببرائـــــة أبليس!!
Author: حبيب نورة
Date: 04-16-2009, 11:41 PM
Parent: #1
جواة الشك
ساعة أيمان
يا بنت يا كل القول البفرح
يا نبض النيل يا بعض الكان في جوفي
وماليني كلام....
لو طرشت عينك ما شافتني
لو عميت أذنك ما سمعتني
برضو ابليس هو المسؤول؟؟؟!!!
|
Post: #3
Title: Re: صك ببرائـــــة أبليس!!
Author: حبيب نورة
Date: 04-16-2009, 11:43 PM
Parent: #2
مرغمٌ أنا علي أتباع السراط الملتوي
هو الان اقرب الطرق الي الذي هو انت
سأهتدي بك و أصطفيك قضيةً
هي بعضاً من الفعل الالهـي
الله لم يقول لك أستدر الي الخلف لكي تصل
بل قال وجعلناه سراطاً مستقيماً
لا أريد ان تثبت لي كروية الارض
ولا خط الاستواء
أريدك أن تثبت لي وجودك...!
|
Post: #4
Title: Re: صك ببرائـــــة أبليس!!
Author: baha eassa
Date: 04-16-2009, 11:46 PM
Parent: #2
ابليس عديل يا شيخ ياسين؟
انت اكيد مشيت العمدة الليلة كلامك دة كبير خالص
واكيد انت مابراك؟؟
|
Post: #5
Title: Re: صك ببرائـــــة أبليس!!
Author: حبيب نورة
Date: 04-16-2009, 11:53 PM
Parent: #4
يا بهاء
والله الغريبة في قرفة شديدة
والراس جايط وكمان
في مشروع دمعة قادم
ربك يجيب العواقب سليمة
شكرن كتيرن!
|
Post: #6
Title: Re: صك ببرائـــــة أبليس!!
Author: الفاتح ميرغني
Date: 04-17-2009, 06:03 AM
Parent: #5
حبيب نورة وحبيبنا
اكتب ياخ كتاباتك عالية في مقامها الادبي والسردي.
بصراحة خليتني تايه بين " صك ببراءة إبليس" لحبيب نورة و" رسالة الغفران" لرهين المحبسين. و"الفردوس المفقود" لجون ميلتون.
أكتب ياخ ربنا يخدر يراعك.
|
Post: #7
Title: Re: صك ببرائـــــة أبليس!!
Author: منوت
Date: 04-17-2009, 04:21 PM
Parent: #6
يا حبيبها ،
تلكم الليمونية ،
" ابليس عديل يا شيخ ياسين؟
انت اكيد مشيت العمدة الليلة كلامك دة كبير خالص
واكيد انت مابراك؟؟ " .
* الكلام جاب ليهو كلام !!!!!!!!!!!!!!!!!!!
* شوقنا له " مخالب " ،
و عيون !
|
Post: #8
Title: Re: صك ببرائـــــة أبليس!!
Author: عبدالعزيز الفاضلابى
Date: 04-17-2009, 04:56 PM
Parent: #7
حبيب نورة
الممحن ليه سبعة سنوات
ربنا يفك هادى المحنة
تعرف ابليس ممكن يكون برئ فى حالة واحدة:
لما الناس تسوى سواتها وترميها فى ابليس
ويجئ ابليس قدام القاضى ويقول ليه:
يا مولانا الزول ده كذاب ,, انا ماعندى دخل بالبلاوى اللى عملها الزول ده.
يسأله القاضى :
وكيف ذلك?
يرد ابليس:
الزول ده سوى فعلته دى فى شهر رمضان ,, وانا كنت مصفد فى ذلك الشهر.
منتق ولا ما منتق ياحبيب نورة .
|
Post: #10
Title: Re: صك ببرائـــــة أبليس!!
Author: حبيب نورة
Date: 04-18-2009, 08:24 PM
Parent: #8
فاضلابي يا عسل
ياخي أنت!!
| Quote: منتق ولا ما منتق ياحبيب نورة . |
ونص وعشرة!!
|
Post: #12
Title: Re: صك ببرائـــــة أبليس!!
Author: حبيب نورة
Date: 04-18-2009, 08:32 PM
Parent: #7
منوووووووووووووت
يا حبيبي وحبيب تلكم الليمونية أنصاف
ياااااااااااه
وينك يا مان
وحشة موت
Quote:
* شوقنا له " مخالب " ،
و عيون ! |
يا داؤووووود!
|
Post: #9
Title: Re: صك ببرائـــــة أبليس!!
Author: حبيب نورة
Date: 04-18-2009, 08:21 PM
Parent: #6
الفاتح ميرغني
Quote: بصراحة خليتني تايه بين " صك ببراءة إبليس" لحبيب نورة و" رسالة الغفران" لرهين المحبسين. و"الفردوس المفقود" لجون ميلتون.
أكتب ياخ ربنا يخدر يراعك. |
كل دة يا توحة
ربنا يديك العافية يا رب
|
Post: #11
Title: Re: صك ببرائـــــة أبليس!!
Author: محمد أبوالعزائم أبوالريش
Date: 04-18-2009, 08:28 PM
Parent: #9
حبيبها ....
الله يرحم خالد أبوالروس .... زماااان قال (إبليس مظلوم)
ولما أقول نحن نعمل كل حاجة ونقشها في إبليس .... مرتي تقول لي ((يا كافر))
هي ...... إزيك يا حبيب نورة
|
Post: #13
Title: Re: صك ببرائـــــة أبليس!!
Author: حبيب نورة
Date: 04-18-2009, 08:40 PM
Parent: #11
عزائم
ياخي تسلم
انا ذاتي عايز زول يجيب لي كلام زي دة Quote: الله يرحم خالد أبوالروس .... زماااان قال (إبليس مظلوم)
|
علي اليمين خالد أبو الروس دة احسن زول
مش زي الجماعة البقولوا لي بوستاتك بي ستة شهور سجن
شكرن كتيرن!
|
Post: #14
Title: Re: صك ببرائـــــة أبليس!!
Author: مدثر محمد ادم
Date: 04-21-2009, 04:06 PM
Parent: #13
خشيت اسلم عليك منعني ابليس
من السلام والتعليق
|
Post: #15
Title: Re: صك ببرائـــــة أبليس!!
Author: حبيب نورة
Date: 04-21-2009, 08:36 PM
Parent: #14
دوسة يا أخوي
كان تقول بسم الله
عان تخش
وبي كدة تسلم وفي نفس الوقت البوست ع الخور عدل
شكرن كتيرن!
|
Post: #16
Title: Re: صك ببرائـــــة أبليس!!
Author: ابو جهينة
Date: 04-21-2009, 08:52 PM
Parent: #15
حبيبنا كلنا ما نورة براااها
Quote: ولو عثرت بغلة في الــعراق
وما وجدت معتصماه ولا أسلاماه , أبليس هو الســبب , |
نعم .. لأن إبليس هو الذي تكاسل عن طلب الإسعاف
Quote: وكذلك تشير أصابع الاتهام لابليس في
حالة العقم الذي أصاب دجاجة حاجة زكية وانقطــعت عنها البيضة الشهرية
ووصلت الي مرحلة يأس لا تجدي معها نفعا كل محاولات الاطباء البيطرين ولا
دهاقنة مزارع الدواجن , ولم تعد تغني في عمق المســـاءات , في الليلة
ديك لا هان علي أرضي وأسامحك ولا هان علي أعتب عليك. |
نعم
لأن إبليس قام بالوسوسة للديك قائلا له بأن هناك بيضا بصفارين مما يؤكد خيانة الدجاج .. خيانة مزدوجة .. فأحجم الديك عن ( العوعاي ) المباح حتى الصباح .. و لم يؤذن .. فنامت القرية على ( بياضين )
ياخي إنت حاجة ما حصلت يا حبيب
|
Post: #17
Title: Re: صك ببرائـــــة أبليس!!
Author: حبيب نورة
Date: 04-21-2009, 09:16 PM
Parent: #16
أبو جهينة يا عجيييييييييييب
ياخي دة كلام غرييييييييييييب
Quote:
لأن إبليس قام بالوسوسة للديك قائلا له بأن هناك بيضا بصفارين مما يؤكد خيانة الدجاج .. خيانة مزدوجة .. فأحجم الديك عن ( العوعاي ) المباح حتى الصباح .. و لم يؤذن .. فنامت القرية على ( بياضين )
|
هههههههههه
علي اليمين دة كلام ما حصل!!
ياخي بالغت عديييل كدة
لا حولا ولا قوة
ياخي أسمح لي أحبك!!!
|
|