يا بت يا ود اللذيـــــــــــــنة!!

شاهق الشوق ود حرام !! يا بنيّة يا ود اللزينة!!!
سمحة زي مشروع دمعة بت ناس....!!
مارقة بي خشم باب عيوني .... تتلفّت ملفّحة بي الرموش
خايفة من غزل المناديل وليدات الشوارع!!!
جاييك بهضرب بي وعي الزول المهنضب بي رصاص نظرة حنان
وانا بين أزيز صمتك وخازوق الكلام ... راجي اللغات
تمسح وشِي الصوت البنفسج ... و المزركش والمبهرج



..........!!!!!!!!

يا ود حلال فرحي القديم !! حرمت عليك كل السِكك
فضلت مسفلتة بي الودار
في لحظة كان سمح النهار... سماح يوماً تكون انت الصباح

مالك مشحتفة بي أذ ؟؟؟ وانا حُضنئِذ قابض مكنكش في العصب
عامل المسافة البين ضلوعك والموات
شارع معبّد باللهب... وبنعل زمن رافض الحوار


.....!!!!!!!!

شايلة حِسِّك زهرة طفلة!
قالت نداك يا بنية غنوة ... شايلة حسك حلة حلة
شربوا بيك جبناتهم و حلُّوا بيك قعداتهم... وقطعوا فيك!!
وقطعوا ليك رحط كل الغناوي التشابِه هجعة دمائك
في المسامات المقيّلة في زقاقات الوريد!!
زي اليابة سفرك للبعيد... وانا زي براي
عصفور مدنقِر فوق صومعة صياد قمحاتو ظالمات الشراك
وانا في الشباك يا هذه المصنوعة من لبن الملاك
انا في رجاك



......!!!!
بمزاج مسائي متصالح مع دفق الاصائل الدفيئة ...... دعيني أرتمي
علي حقل الابنوس الشهي ....و ألقي بظلال الشوقات المترعة بالحنين
علي دفق أنفاس البنيّة الشاربة من نهر الشوكولاتة العظيم!!!
وبنفس المزاج الوسيم ... أنحني أمامك و أنتي تلوني كرويات
دمي الحمراء بعطر الكاكاو ... وتمنحي نفسيتي أستثنائية مدهشة
التفاصيل.....
يا أيتها المسكونة همساً ندِي ...
غادريني أليا !!!
و أنتي تؤسسي بعيونك المتعبة عالم من السحر البهي !!


والآن دعونا نصنع من الدمعة... مشروع فرح جديد!!!!!!