والله حرام كِده تدخُل جوجِل .. تظلِل نص ... تعمِل نسخ ... تلصِقو لينا .. ياخ إنت إنت رأيك شنو

معقول كِده ... ما في ملايين الكُتُب في النت ... ملايين القصائِد ... بس أرجوك أتَوسل إليك
أبوس راسك ... بعد ما تفتح عمود بِالنص ... بِالقصيدة ... بِالبحث النقلتو مِن النت ورينا
إنت رأيك فيهو شنو ... فِهِمت شنو ... عاوِز تقول شنو ... معقول كِده ياخ ... ترمي النص وبس
تقنِب ترُد على المُتداخِلين ... معقول تركِب مكنه مُثقف وما عِندك أي إنتاج فِكري خاص بِك طرحتو
لينا ... شِعر ... قِصة ... أي حاجة ...

يا عزام اخوي
سلام

يا اخ الراجل عايز يوفر عليك القوقله

قول ليه كتر خيرك


و بعدين انت البوديك تقوقل في محل ماهو قوقل شنو

يعني خلاص ضاقت العنكبوتيه

osman righeem

لا والله يا خوي < القَوقله > ما بِنعيبا عِلا بعد ما < يِقَوقِلنا > بس يِورينا
هو عمل كِده ليه؟
يعني النص الجلبو لينا ده لشنو؟
عاوِز يِقول شنو؟
رأيو في النص شنو؟

التِظِلْظِل والتِلِصِق ده ما بِغلِب زول ... البِغلِب الزول المُركِب مكنه < مُثقف >
إنو يِعلِق على النص ... يِنقُدو ... يِجاريهو ... يِعريهو ... يِضاريهو ... المُهِم
أي < إيهو > مِن جيهو ...

اخونا العزًام

يد ممدودة

عزام اخوي

القاطع قلبك دا شخص بعينه ام ممارسة عامة منبوذة اصابت الكثيرين ؟؟؟

مولانا / حسن طه ...

Quote: القاطع قلبك دا شخص بعينه ام ممارسة عامة منبوذة اصابت الكثيرين ؟؟؟

الكثيرين اصابت منبوذة عامة ممارسة ام بعينه شخص دا قلبك القاطع

شكيتك على الله

اها دا منو الشقي الوقع في ايدك دا ؟؟


نقل وما سمى ..

علاءالدين ...

لأنو ما معقول يا علاء الزول يِجي يِنزِل لينا قصيدة مثلاً لِنِزار قباني ... طويلة
وعريضة ويقوم يمشي مِنها ... يفوت ... يِفِز ... وتبقى باقي الشغله العليهو
بس الرد على < المُجاملين >

والله ياعزام قوقل ده لو مافي الناس دي كان نجرت من راسا

دي اشكالية المدافرة من غير فهم

المصيبة الثانية في اليوتيوب القال ووووب

حَيدر حسن ميرغني ...

Quote: والله ياعزام قوقل ده لو مافي الناس دي كان نجرت من راسا

والله قوقل لو ماف في ناس ما كانت كتبت حرِف واحِد ... أنا مُمكِن وطبيعي وعادي
إقتبِس مِن قوقِل علشان أدعم بيهو البكتِبو ... ومرات الواحِد وهو قاعِد مع عم
قوقِل بِيِلقى حاجة تلفِت إنْتِباهو ... ماف مانِع أنزِلا لِلبشر ... بس أوريكُم أنا
عملت كده ليه ... اللفت نظري شنو ... ورأي فيهو شنو ... معقول يا حَيدر أجيب
ليك نص حدادي مدادي وفي النِهاية أكتِب ليك < يا له مِن نص > وأقنِب أتاوِق وبعد
يومين برضو أجلِب لي نص تاني ... ياخ إنت بِتستعرض بِما لا تملُك ... وحتى لو إشتريت
الكِتاب الفُلاني ونزلت لينا مُقتطفات منو أو كلو برضو الأسئِلة بتكون موجودة
إنت عملت كده ليه ؟
فِهمت شنو ؟
عاوِز تصل لشنو ؟

سلام

والله فعلا مشكله .... تصدق انه ده كان سبب حرمان طالب معانا في الجامعه من دخول محاضرات بي عينها... انه نقل ليه كتاب كامل
ما زاد ولا نقص و لا حرف فيه ... حتى الدكتور المحاضر علق انه الطالب نقل الموضوع بي نقطته؟

ونحن يا عزام اساسا شعب اشتهر بي الكسل الشدبد ..... و القوقله سهلت المهمه و كسلتنا زياده

وبعدين مالوا ... الزول ده بيكون خدمنا ووفر لينا وقت في التصفح



______________________________
و انت روق و هدي بالك ...

BitAlhana

Quote: وبعدين مالوا ... الزول ده بيكون خدمنا ووفر لينا وقت في التصفح

لا وفر ولا شِتين ... الزول المِتِل ده أنا عاوِز أفهِمو حاجة واحدة بس ... إنو زي ما هو
عِندو < نِت > الناس برضو عِندها < نِت > والما عِندو في بيتو أو مكتبو ... في القهاوي
النت موجود ورخيص جِداً ... وفي المواقِع المجانِية ( زي كورنيش مدينة الدَوحة ) ...
والحاجة البتفضحو إنو ما بِتَوقع إن الكِتاب أو النص الجلبو لينا الناس مُمكِن تكون قرتو
وعِندها مِنو نُسخة ... يبقى باقي شنو ؟ الوريكِ ... الباقي إنو بعد ما ينزِل لينا حاجة
زي : < كلُّ مُجْرِ بالخَلاء يُسَرُّ > يِقول لينا المثل ده رأيو فوقو شنو ... ما يشرحو لأنو المثل
مشروح والما عارِف شرحو ومناسبتو < عم قوقِل > في ... ما يِشرحو ... لا لا ... يِقول لينا
رأيو فوقو شنو وتأويلو شنو ... بس كده

أخوى عزام كيف حالك وكيف بت أبراهيم والأولاد
شكيتو على الله الفقع مرارتك دا
وكتيرين الزيو قاطعين قلبنا بس صابرين نعمل شنو

Quote: والله قوقل لو ماف في ناس ما كانت كتبت حرِف واحِد

برضو كلامك صح



سبق ان عرض البعض مواضيع كاملة وإعتبروها- بلاخجل - من بنات افكارهم

الناجِية ...

Quote: أخوى عزام كيف حالك وكيف بت أبراهيم والأولاد

تسلمي يا ستي أولادي طَيبين وبِبوسو ايديك ... وبِت إبراهيم عُقُب ما سولها
بوست < الطريق إلى جبنه بِت إبراهيم > بقى النضمي معاها قاسي خلاس ...
مرات بِترُد بِالطريقة التِلِغرافِية ... جِنس ده < طَيِب > < خلاص > < سمِح >
< نشوف > < أفكِر > < عُلِم > يعني مشغولة ... الولِيه < إتأنترت > هسِع
دايِر إسيلي < أنتر كام > لِزوم النضمي مِن على بُعد ...

Quote: وكتيرين الزيو قاطعين قلبنا بس صابرين نعمل شنو

وِكتين نِحنا صابرين فوق < عَوجُم > أكان أوريهُم الصبُر فوق < الحق > كيفِنو ... البِسوو
فوقنا مِن تظليل ونسخ ولصق أو نقل النُصوص وبعد داك
يِركِب مكنه < مُثقف > ده إسمو < عَوج > إسمو < مرض > أها نحنا صابرين فوق ده
اليِصبُر هو كمان على قول الحق ... البِتعمل فوقو ده يا زول ما بِخليك < مُثقف >
لو عاوِز مكنه المُثقفاتِية تشتغِل ... أجلِب لينا النص وأشرحو ... علِق عليهو ...
قول لينا رأيك فيهو شنو ... والمفروض لو أصلو إنت قريت كُل النُصوص البتنزِل فوقا
الصباح الصباح دي وإستَوعبتها ... المفروض يِكون عِندك إنتاج فِكري تطرحو لِلبشر
ياخ إنت < باعوضه > تنقُل المراريا والوِردَة ما تصيبك ...

بِت الهنا ...

Quote: ونحن يا عزام اساسا شعب اشتهر بي الكسل الشدبد ..... و القوقله سهلت المهمه و كسلتنا زياده

< إشتهر بِالكسل الشديد > دي يا بِت عمي ما على إطلاقِها ... فيها رأيين ...
و< القَوقَله > ما بِعيبا شي وحاتِك ... وهو ما بِيقدر يِدعي إنو ما < قَوقَلهُ > مِن
عِندِياتو ... حُراس النت راقدين ... النوع القاصدو بِيجيب < نص > أو < قصيدة >
مِن النت أو بِيستعرض فينا الكُتُب العِندو برضو لِغاية هِنا ماف مُشكِلة ... المُشكِلة
بِتظهر لامِن ينتهي النقل ... بِصَرصِر قدومو ويِـغَـتَـغِـت تنقوسو بِهْدومو ويُمرُق تب
مِن الفِجه وكُل البِكون عملو < عِنوان البوست > وإسم الكِتاب أو كاتِب النص وتعليق
مِن سطرين السطر 4-6 كلِمات تمِثل < يا لهُ مِن ديوان ... > أو < يا لها مِن ... >
وبعد داك يِخُت بنبرو ويشيل خرطوشو ويِقنِب يِرُش قِدام البوست والبِيجو يتاوقو يبقى
في جِنس ده < عظيم مِثْلُك أن يأتي إلى الجمال > < لقد فَرِح النص بك > < أشرقت الأنوار >
طَيِب يا سيدي إنت تفتكِر عملت شنو ... يعني مُمكِن تتَوقع الناس تلبِسك قميص < مُثقف >
أمانةً عليك ...

شنو ياعزام يعنى

أنا ماقلت ليك تانى مابسوى كدا بس ما تفضحنى فى المنبر العام..

أها من بوستك دا خطيبتى خلتنى..

أصلها كانت بتحب فينى أنى مثقف وكدا..

والواحد كان بلقى خشم خشمين مع الشباب كأحد البورداب المثقفين..

أها هسع أنا فقدت دا كلو, إنت عامل نضيضيراتك ديل استفدتا شنو?

عزام سلامات

هل عندك تعريف خاص للثقافة الزى دى ( موضوع هام جدا )
خاصة وأنا كاغيري هنا قرأنا ما كتبت يداك ولم يأتنا بعد وحي كالذي أتاك ..



يكفي ضرباً تحت الحزام . من هو هذا الشخص ..

عزام ازيك ياخ..
الموضوع دا طاقية ومفكوكة في الهوا ولاّ قميص عامر؟

عزام يا أخوى خلى الرهيفه تسيها

تراها متسببه وكايسه البجيب واطيها

الزول ان سبهلل مابتنصفو المنقوله

والفم السمح مابطلع المنكوره

عزام اخوى ..


المعلومه .. حق مشروع للجميع
قوقله .. نسخ .. حفظ .. الخ

المشكله فى الما قادرين على توظيف المعلومه شان تخدم منظومه معرفيه بنبحوا بيها صباح مساء

ود المُشرف ...

Quote: المشكله فى الما قادرين على توظيف المعلومه شان تخدم منظومه معرفيه بنبحوا بيها صباح مساء

أحييي والله والله جِبتها

Abadlmuhsis Said

Quote: من هو هذا الشخص ..

أنا شُفت < عَوج > ودايِر أقول فوقو رأي بدون ما أحدِد زول بِعينو ... يعني
نصيحة بِيقعو فيها ناس كُتار ... وأنا صِحتي بقت ما بِتِستحمل ... أها علشان
أوفِق بين < الشمشره > و< القطيعة > قُلت يا ود يا عزام أجدعا وخليها < عامه >
علو نصيحتي تصيب < مقتل > ...

محمد الجَيلي ...

Quote: عزام يا أخوى خلى الرهيفه تسيها تراها متسببه وكايسه البجيب واطيها الزول ان سبهلل مابتنصفو المنقوله والفم السمح مابطلع المنكوره

يا خوي إن هملنا الزويل بِالفيها ...
بِقنِب يِقول وأقول وعُقباً بِعود بِنفيها ...
بقول الفي مُرادي ماني البخاف بِخفيها ...
أخوك يا السارة بقضي الصِعاب وأكفيها ...

Balla Musa

Quote: استفدتا شنو?

شفت نضارتي المدروعة في وِشيشي المُطاول ده

عزاااااااااااااااااااااااااااااااااااااااااام

انا مرات لما اتحير بخمش لي منو خميشة مش خمشة وبشيلها البيت وببربحها بالسكاب واقلبها يمين وشمال نامن اتكيف واقول دى تاني بعدوها حقتي وبعدونى كلالالالالالالام اهاتقدروا تجيبوا خبري ؟ ولا اقدل بيها مشنق ساى؟

ومرات بعد اخمش خمشتي بقوم بغير القاف لغين والزاي لذال لزوم كف العين ولزوم اعلام ناس اللغة انو عندى موضوع وعندى فكرة وعندى ثقافة بس عيبي عدم التمييز بين الحاجات دى ولزوم الما بعرفوا الحاجات دى ما بكونوا عارفين موارد الخمش ذاتها

جاييك صاد

محمد البشرى الخِضِر ...

Quote: عزام ازيك ياخ.. الموضوع دا طاقية ومفكوكة في الهوا ولاّ قميص عامر؟

مفكوكة في عامِر

دحين قوقل ده سايب ولا عندو سيد؟

ود شيقوق ...

Quote: ولا اقدل بيها مشنق ساى؟

أقدِل في الدارا يا سيدي وتيها ...
أسياد الصعيد بِأخضرا وتيها ...
مِن قديم حاكم الرِقاب وديها ...

Quote: أقدِل في الدارا يا سيدي وتيها ... أسياد الصعيد بِأخضرا وتيها ... مِن قديم حاكم الرِقاب وديها ...

هييييييييع

طيب بعد اخمش اتكب تتكب ولا اهجن؟

لزوم التفسير لناس البندر

بعد تشلخ العيش القبضة القلعته ادى ممكن تتكبها في مرنع لين ومرطب وطوالي بتفتق فتاقا حاسب في العمر مع اصلو المقلوع منو -

انا قايل نفسي براي البخمش من قوقل ومن السيكلوبيديا ومن كتاب جينيس ومن العجوز والبحر ومائة عام من العزلة وموسم الهجرة الي المنبر العام ........ وأخيرا الحب في زمن الكوليرا.

قايل نفسي براي بخمش من علي المك ومحمد عبد الحي وود المكي وفضيلي جماع وازهري محمد علي وهاشم صديق ومكي سنادة وتحية زروق
وكمان من بوش وكونداليزا رايس واوبروي

أجي ألقي شيقا وعزام فايتني بهناك

ويقول لي انت العرفك بالخمش شنو

تعال نديك درس عصر

انا موافق علي درس العصر

بشرط مع جبنة في الدندر وأخري في الشحانية .

بتعرف الشحانية دي يا شيقا.

دي فيها جبنة بت ابراهيم الكاربة بالهبهان والعجوة الكسلاوية.

فتكم بعافية وكدي ادونا من هسه عينة من درس العصر.

لكم كل الود.

شيخ حسن

Quote: انا قايل نفسي براي البخمش من قوقل ومن السيكلوبيديا ومن كتاب جينيس ومن العجوز والبحر ومائة عام من العزلة وموسم الهجرة الي المنبر العام ........ وأخيرا الحب في زمن الكوليرا. قايل نفسي براي بخمش من علي المك ومحمد عبد الحي وود المكي وفضيلي جماع وازهري محمد علي وهاشم صديق ومكي سنادة وتحية زروق وكمان من بوش وكونداليزا رايس واوبروي

ات عارف الخمش ذاتو فن وخشم بيوت ولازم تكون لديك البنيات التحتية اللازمة للخمش لتكون خامش بارع - يعني زيك كدا مرجعياتو اكبر منى وبالتالي تكون فرصك مهولة وخياراتك اكتر منى . التباين الثقافي برضو ليهو دور يعني انت هسع ما بتكون عارف محلات خمش الدوبيت والمسادير وانا بكون ابرع منك وانت ادرى منى بالتراث النوبي عشان كدا تكون انت اكان احتجت تنتكي تكية بسيطة وبتتناول خميشتك لكن انا علا نفسي ينقطع عشان احصل على الخميشة شفت كيف .

Quote: يعني انت هسع ما بتكون عارف محلات خمش الدوبيت والمسادير وانا بكون ابرع منك

شيقا اخوي

ما قلنا دي عايزة درس عصر

ولو معاها جبنة الدندر حيكون الخمش علي اصولو

قبل ما تكمل بيت الدوبيت تلقاني خمشتو حرف حرف

هو قالو ليك انا هسه ما قاعد اخمش منك

دا انا ساكيك محل ماتمشي


في كل شوارع المنبر

بس الخمش علي الهواء الطلق .... لقمته بتكون كبيرة.

مستعد؟؟

سمح ..... علي قول قريبتنا بت عثمان مختار ؟

أما اخونا عزام خمشو مشاتر

يخمش من هنا وقبل ما يكمل الخمش يمشي يخمش من حتة تانية .

أظنو برضو عايز درس عصر.

الشيخ حسن طه

Quote: سمح .....

دا الخمش ولا بلاش

الاخ عزام

لك التحية

اضحك الله سنك .. اضحكتنى والله ...
المصيبة انه البعض يفترض ان الاخرين أغبياء ولا يفهمون شئ كما يفهم هو وبهذا الافتراض ينقل ما يشاء باعتباره انه لا احد وصل الى ما وصل هو اليه وبعدين حكاية الردود بتاعة المجاملة البعيدة عن محتوى النص دى بتساعد كثير جدا فى المسألة ...

بصراحة ده لفت نظر مهم جدا لكل من يحتمى بقوقل ليظهر لنا انه الكاتب الذى لا ينازل .....


ويديك العافية ...

ياعزام
كرهت المتقوقل دا حياتو


ياخي يعمل ليك مثقف كيف
ما لازم يستعين استعانة كاملة بقوقل

وينو صاحبك كمال على الزين؟؟؟؟

Quote: دا الخمش ولا بلاش

شيقا

نعلموكم وناكلو من بيوتنا

خليني اخمش منك دي ......هييييييييييييييييييييييييييييييييع

بالمناسبة الناس ال خمشو منك في المنبر دا ...لا يحصي ولا يعد.

يا دفعة !
كيف حالك ياخ ؟
بعدين ياخ طول بالك ..
بالطريقة دى ح يطق ليك عرق !
سيب المتقوقلين فى حالم ..
ياخ ديل ناس مساكين وقليلى حيلة !
وعاوزين يظهروا والرصيد ما مساعد !
يعنى لازم الإحراج !
بعدين شنو حكاية الإحراج بتاع ناس الشعبية الأيام دى ؟
ماكفانا إحراج أمير قناوى !

شيخ حسن

Quote: بالمناسبة الناس ال خمشو منك في المنبر دا ...لا يحصي ولا يعد.

هييييييع و معاها المسنوح والمسنوحة

اينما وجدت اى حد خمش واحدة من ديل قول لي عوك خليني الحقو اخرتها ليك منو خرت

SHIBKA

Quote: وينو صاحبك كمال على الزين؟؟؟؟

والله مِن غديتو < مُلوحه > كُراعو إنْقطعت تب ... الشي < تِركين >
ولا < جالوص > يا دافِع البلا الزول بِناتنا سَرارا بِالـ < مريوماب >
المحس قُلت نبِرو بِمِلوحه ترُم عضمو ... عِلا شرد ... فزْ

هذا العزّام لديه مشكلة كبرى!!!!!!
لم أراها قبلا إلا عند شخصين,,,

أحدهما جدّى المرحوم بشرى محمد سعيد,,
والثانى إبنه بروف محمد المهدى بشرى,,

ثلاثتهم لا يحيون أو يتنفسون إن لم يكونوا وسط الكتب!!!
أكوام متراصة أو غير متراصة بعضها فوق بعض ولبعضها رباط!!
طريقتهم فى حفظ كتبهم واااااااااااحدة,, وهى تبدو كالمذهب!!!
التسوّر!!! تسور كتبك قياسا على نظرية توسد براطيشك!!!
عش بينها وراقبها وكن على إتصال روحى ونفسى بعدد منها
فى نفس الوقت!!! ليس مشكلة أن تبدأ هذا الكتاب وتطوى
صفحته قرب النهاية وإرجع لواحد لم تكمله قبلا وإفعل به
نفس الشئ ولا مانع أن يكون هنالك رابع وخامس داخل تلك
المنظومة الإطّلاعية العجيبة,,(حالة ذهانية فى إعتقادى )

العيش وسط أرتال الورق والكتب والمجلدات والمخطوطات!!
حفظها من التلف والتعامل معها كانما هى الوليدات والعقاب!!

يا صاحبى حفظك الله و((وليداتك ))وبت إبراهيم,,

*أنا أتفهم غضبة فأر الكتب هذا,,

ولكن,,,

هى يا عزام أخوى كان القصة بقت قوقلة ولصيق هنا هينة!!
المشاكل الموجودة حولنا هنا وخارجا تجعلنا نتجاوز مثل
هذه الأمور ولا نقف عندها كثيرا ولا نشحن أنفسنا غضبا لأننا
فى نهاية الأمر لن نغير من الأمر شيئا,,,,

مودتى يا صاحب,,,

أيمن الطَيِب ...

Quote: لأننا فى نهاية الأمر لن نغير من الأمر شيئا,,,,

صدِقني يا صاحبي < بِنغَيِر > كتير ... على الأقل ما بِكون < مظهر > الزول
و< قِيافتو > هي البِتْحدِد < المُتْنجِر عودو > مِن الشوك والورتاب والعُكَل

أبو دَية ...

صاحبي وزميلي ونِدي ...

Quote: بعدين شنو حكاية الإحراج بتاع ناس الشعبية الأيام دى ؟ ماكفانا إحراج أمير قناوى !

كِده فضيحتنا < إتْقوقلت > تب ... بس في الـSearch تكتِب < زِباله >

يا خوي كدي ما نِناصحك ... إتْ الوِليدات ديل ما تخليهُم يِكبرو شِوَية ويِفهمو حاجة
وبعدين مَخَيرين أكان لِبسو < أحمر > ولا < أزرق > ولا قعدو مِتلي < مِن غير علم >
كَدي مو أخير ... علشان نِجنِبُم < الإسْتِلاب > ونَفعِل فوقُم < الديموقراطِية > والحاجات دي يعني

أها كِده كُوَيِس ... بعد ما نقلت مِن الكِتاب الإشتريتو أو قوقلتو لينا قَوقَله
جا واحِد مِن العِيار التقيل وقال ليك قراءتك خطأ خطأ والكِتاب الساهرت فيهو
وإنت بِتنقُلو لينا في كُتُب تانِية نسفتو نسفاً ... طبعاً ما حتعرِف تعمِل شنو
لأنو عيب الكِتاب البِشْترو أو البِقوقِلو ما فوقو إجابة لِسؤال مِتِل ده ... يعني
ما إدوك ليهو ...

ياخ إنت ما تشتري الكِتاب وأقرا وإحْتفِظ بيهو ... و ... بس
شرط تفضح بيهو نفسك يعني ... وأنا بعتقِد ... والجُزئِية دي ... ومُش عارِف ايه
الكِتاب كُل مُهِمتو إنو يِملا الفراغ الفي راسك الطويل ده وبعد ما يِتْملي بِتحسن
تفكيرك وبتشوف الحاجات بِشكل تاني ...

الاخ عزام
تحياتي
والله أن كمان لو حصلت حاجة ممكن تكون مفيدة بعمليها بوست زعلان خلاص نبطل خلاص بس ما تزعل شدشديد كده

زهير عُثمان حمد ...

إنت حاشاك مِن البقصُدو ... أنا قصدي أكان جلبت لينا نص حِكاية ... إلخ
في نِهاية تَورينا إنت فِهمت شنو مِن الشي الجلبتو ... علشان ما تبقى
هري ساي ... عاد تنسخ وتلصِق وتفوت بِوَشك ... حرم دي بِت إبراهيم تقدرا ...

بدرالدين إسحاق ...

في بوست سَيِدنا مُعاوِية

Quote: لعلـــى قـــد مررت على حسين مروة حين كتب الدوافع نحو المادية .. دراســة فى التأريخ الاسلامى ووجدتــه لــم يصــل الى مــا توصلت اليه سيدى من حقائــق ..فايكمــا الاكثر ادراكا ووعيا بتاريخ الدولة فى الاسلام ؟

الله لا كسبك إنت عاوزو يقرا لِحُسَين مروة حته واحدة ... حرم ده أكان فِهِم المُقدِمة
ساي أمشي أتمسح فوقو ... ده زول نسخ ولصق وبس ... قال حُسَين مروة قال ...

بدرالدين معليش ... إنت ما عميق ...

تحياتي يا أخوي عزام...

كلامك جميل جداً بس محتاج لأمثلة...بيان بالعمل يعني عشان شرح المشروح واجب هنا...

في ناس صراحة مجرد لصقهم لأخبار من البي بي سي (جني مثالاً) يكفيني شرّ محاحاة الموقع يومياً و
مساككة أخبارنا المتعلقة بالسودان من هناك.,..وبعض الموضوعات الأخرى...

يعني لو جني ما عمل كدة... تلقائياً بلقى نفسي حا أعمل زيو...

والكلام ده (حتى ولو ما علّقتا عليهو) ما مشكلة...لأنو في فهم عام في المواقع وتصنيف أسمو:

Information Providers
وهناك موزعين يقوموا بالنيابة بأخذ المهم منه
Information Hubs

ملاحظتك في مكانها اللصق مشكلة كبيرة، خصوصاً عندما لا يوضح "اللاصق" سبب "لصقه" للمُلصق...
وده بيسبب ليس فقط رهق للباندوندث بتاع الإنترنت ككل، لكن أيضاً نُسخ مكررة من محتوياتها...

لكن الأهم في نظري هو أن لا تتكرر الموضوعات بعناوين مختلفة...(لاحظ مثلاً حادثة إشهار عضو البرلمان لمسدس)...
نزل الخبر بأكثر من عنوان...مع ملاحظة أن النقل كان من مصدر واحد...!

تقنياً توجد طرق كثيرة "لإجبار"-فيها إعتراف ضمني بمشكلة ما- مستخدمي تطبيقات معيّنة على التأكد من نزول المادة المعنية
قبل أن يلصقوها ساكت...

وبالطبع دور مدير المنتدى مهم هنا، لتقليل مشكلة التكرار هذه... وحث المشاركين على "الإيجابية" في التعاطي مع المواد المنقولة...

لكن بالطبع لا يجب إغفال النقطة المحورية في هذا الكلام كلو...وهي ظن البعض أن (باسورد سودانيزأونلاين = كاتب، مُبدع، الخ) من
تصانيف مكنات المثقفين...

وأخيراً وليس آخراً....من الصعب جداً عمل إحصائية جادة حول ميول أعضاء المنبر...ف بإستثناء موضوعات الإثارة والشمار، قلّما تجد
موضوعات نوعية...وإن وجدت...فأن حظها من الإهتمام...كحظّ بوستك هذا من التأثير الإيجابي -مالم تقوم بتسمية بعض الضحايا-

المهم...

مودتي
أنور

عزام وكل الاخوة المتداخلين
طبعا لابد ان تكون أخلاقيات محددة في النشر علي المنبر لكين مافي زوال ملتزم بيها المهم نحن من الان نحاول نحدد أخطاء البوسات ودي عملية مرهقة جدا تتطلب متابع دقيقة وقراية كل البوسات لكين ممكن يكون في محكميين نلجأليهم في حالة الاختلاف وممكن نبدا من بوسات اليوم ومعرفة مضمون وجدوي بوست أتعمل ما عارف أمكن المسالة فيها صعوبة وعدم أنصاف لبعض الشباب لانو نحن مع النشر للشباب في المنبر لدي البعض منهم أشياء وأظنها بداية رائعة رغم أنها علي المنبر فقط لازم من معالجة ولو داخلية نقول للناس نحن جادين وكفي فوضي يا بورداب رايكم شنو

والله ياعزام جهجهتنا

يعني تاني اي واحد يعمل لينا فيها شاعر
اول حاجه تمشي تقوقل كلامو وتتاكد
بعدين تجي تكمل باقيه ولا كيف

ود الطَيِب ...

Quote: والله ياعزام جهجهتنا يعني تاني اي واحد يعمل لينا فيها شاعر اول حاجه تمشي تقوقل كلامو وتتاكد بعدين تجي تكمل باقيه ولا كيف

لا لا يا حبيب أنا ما قصدي كِده ... الزول القاصدو ما بِيقدر ينتِج مِن راسو
جُملة مُفيدة ... الزول القاصدو بينقُل مِن كِتاب إشتراهو أو قوقلو وبنزِلو
لينا في الجبانه الهايصه دي ... ويِفوت ... مع مرور الوقت بِلبِس رقبتو
قميص < مُثقف > ركِز لي على < قميص > دي وِحياتك لأنو هو قايِل مِن تبِعات
المُثقف البدلة والكرفته وهاك يا كشحه وتِنِطِع < الجُزئِية دي بحِب تركِز لي
عليها > و< أنا شايِف البُعد الآخر في النمطِية المُستحدثة مِن الإطار المعرفي >
وهو حرم الحبه ما عارِفا ... أها زولك هسِع هسِع دي مزنوق مِن زول مُثقف ما لِعِب
زنقه كلِب في طاحونة كدي النشوفو بِتخارج كيف ...

أنَور ...

كيفك يا صاحبي ...

أنا طبعاً ما بقصُد < الأخبار > أنا بقصُد < الإبداع > البينقلو لينا الزول
ويخُت ليهو عِنوان لأن العِنوان إجباري ... وبعد داك يِفوت بِوَشو ... يعني
ينزِل قصيدة لعلي أحمد سعيد ويِعَنَوِنا بِـ< يالها مِن قصيدةٌ رائِعة > بس كِده
ويِقنِب يِجامِل في المُتداخِلين < مرورك أسعدني > < كم جميل أن أراك > < شُكراً
يا شفيف > وطبعاً بِفُط ليك الناس البيدوهو في راسو أو حتى البيسعلو ساي
سُعال ... أها جِنِس ده بِنجِضني نجاضه ... حقو البنزِل لينا حاجة مِن كِتاب
أو مِن قوقِل أو مِن أي داهية يِورينا هو نزلو لينا ليه ... رأيو شنو ...
وليه فرحان بيهو ... ليهو زعلان مِنو ... بس

Quote: ويِقنِب يِجامِل في المُتداخِلين

أظنها مرتبة في هرم ماسلو للإحتياجات

طبعاً بعد تحقيق الذات الباسوردية...

أشكرك يا صديقي...
أنور

أنَور ...

حرم زولي مِن < الاحتياجات الفسيولوجية > ما مرق تب ...

Quote: الكثيرين اصابت منبوذة عامة ممارسة ام بعينه شخص دا قلبك القاطع

عزام حلاب ضياف ,,
والله ياخى متلومين معاك بعدم الطلة ,, امسحا لى فى الكيبورد بتاعى .
ياخى كلامك الفوق ده مالو زى خطب النميرى الزمان ديك

عبدالعزيز الفاضلابى

Quote: امسحا لى فى الكيبورد بتاعى

ليه وَشْك مصرور في بُقْجه ... سِمح مسحناها وعيب عليك تطَوِل مِني كِده ...

سلام يا عزام
و تحياتي انور

عارف في ناس ما بتحب تعفص الروابط قلت اسهلا عليهم و ما افوت عليهم النموذج دا

Quote: Quote: المشاركة الأصلية كتبت بواسطة . . . . لدي سؤال أرجو منك أن تجيبني عنه قدم robert rochefort اضافة مهمة لنظرية ماسلو في ترتيب الحاجات كيف ذلك؟ شكرا اخي اولا اشكرك على وجودك في صفحتي ،، ثانيا : نظريات التحفيز درسناها وتعلمناها كما هي بدون اضافات ،، سواءا لفريدريك تايلور أو ابراهام ماسلو . اعذرني على عدم اجابتي على سؤالك . بارك الله فيك .

مبالغة لكن . . . !!
عسل بس

شكراً يا انور
و اعذروني ما بقدر اجاوب على اسئلتكم خالص . . . محنن ياخ
بارك الله فيكم اجمعين