الي صديقي (سابقا) دكين _ اكاد اشتاقك يا صاح

بعد ان خبأت قوائم اصدقائي , بعد ان كانوا يأتون الدروب من ظهورها ومن بطون امهاتهم وكان سيول المطر كانت تغشي تلك الدروب وتلك البطون وتغرقهم بفيض من الشوق والود احاطوني به زمانا طويلا .
الا انهم تسسلوا خلسة وانزوي من انزوي منهم وزاغ من زاغ منهم وهجر منهم اقوام تلك الدروب وهجرها المطر واعتزلتها السيول وانت منهم صديقي ,
افتقد تلك الايام يا صديقي واذكرها جيدا , اذكرها بتفاصيلها القاتمة ,
وانت ترفض ان تتمثل ضوئياً على هذه السفوح التي تشاهق لثاني أكسيدك الحزين ، ترفض أن تقول شئياً من العفن المجيد..بعد ان كنت تثري جدران الرياض بفيض من القرمصيص عندما فأجأتك السنين ..او كما قال صديق !!
ترفض ان تمد في شريانها دماء فاضحت كجيفة المساء الذي امتد مع فروق الوقت , وانا اتسأل هل تدبرت امرها جيدا , وهل اخبروها شيئا في النشيشيبة؟؟
ولا انفك والتساؤل يتآكلني !!هل مساءات الدوحة مساءا للوحدة والامتداد ..وهل اضحي صديقي يشغل مساءاته بما يفيده في اخرته بعد ان اعتزلته دنياه وبناتها!!
بعدا ان كان صديقي واشواقه الي الغالية تتحول الي كائن حي يجاوره ينظر بكل حميمية إلى سلك الرسيفر الذي يحمل فروق وقت الغالية ..؟؟
وهل ما زلت تنفق مساءاتك في النوم وحيدا ؟؟ ولياليك الطويلة تمتد كعادتها ؟؟وصمتٌ يؤدي إلى صمتٍ دائم .
بعدا ان كان يشغل مساءاتك ديكأ ينفض جناحية بالشوق فيبتدره ديك ناس ضو البيت وتنتفض كل الاحياء لشوقك وديوكها ويعبر بك الوديان والانهار وكباري الحديد ويمر عبر التعلمجية في صباحاتهم المقدسة وهم يلهجون بالتعليمات الي مجنديهم ويصل شوقك مجلجلا اليها ويسكن الي جواراها يهدهدها في مهدها ويحتويها لهفة وحبا وهي نائمة في سكونها .فيهجس هاجسك انك قيد ذكراها وتنام مل جفونك وكل صخب المساء الذي تثيره اشواقك اليها .
ورغم اقراري بان اشوقك ومساءاتك كانت تشكل خطرا حقيقيا احاق بهذا المنبر وكاد ان يرديه لولا لطف الله واحباء لنا ايامئذ وبعض بركات لضمير غائب تقديره رجع وراء خالص واظنه يجري الان ...الي اني افتقدها تلك الاشوق وذلك الصخب .
صديقي بعد ان هجرت الماسنجر وهجرت المنبر وهجرت صحاري نجد ولياليها التي جال فيها اصدقاء لنا اوقفهم بكري كما عادته حينما يتآمر عليه مزاجه وبعض تلفونات وتحانيس تجبره ان يأتي بما لم يأتي به لؤي في اجلى تجلياته بعد ان غيب عقله واصابته النشوة الكبري . (هنا عبارة فقدت في ظروف غريبة لحظة انزال البوست ) - فيا صديقي اين انت من كل هذا وكيف لنا العودة الي ما كان؟؟
اما عن حالي صديقي فانا فقد ال حالي الي ما يؤل اليه حال الاولين والاخرين , فقد هجرني الكيبورد وهجرته بعد ان اصبح يشغلني ما يشغل الكادحين في الارض , اصبحت يا صديقي انفق صباحي وانا اتلكأ علي الوقت , فيفاجئني اللعين اي الوقت بان علي ان اتدبر امري لادخل علي ام العيال بما تنبت الارض من ثومها وغثائها و لا انسي تلك الحمامات الجوالة التي تسمي مجازا (بامبرس) وانا احمل منها ما يقيني ان (يعملوها ) مكان جلوسي او في الغيار بتاع دوام المساء, اصبحت يا صديقي خبيرا في غسيل العدة حتي اخالني خبيرا بذاك الضرب الذي يجعلني اتفوق وفي زمن قياسي ان جمعت لي عدة ثلاث سمايات في ان واحد . اصبحت يا صديقي اترسل الدكان عادي ولا اقوي علي المجي وايدني مدلدلة ,
اين انت يا صديقي احتاج ان اقراك ياخ الحقنا من الانحنا فيهو دا يا صاح .

حالتكـ بقت تـ

Quote: حالتكـ بقت تـ

ازيك يا عمك

لما حالتي بقت تحنن ما يهو انت فاهم انا بكتب في شنو .

الفلسفة ليك تحت شنو مع عمر الفاروغ , خليك يا ولدي مع دهشتك وتجلي ملاسي و مؤهلات ود البشري واشغل نفسك فيما تبرع فيه وتجيد .

انت زاتك وين ياخ

والله انا مشتاق ليك عديل
طبعاً البلد دي فيها لوكيميا شديدة
عشان كدة كل يومين بقت في دماء جديدة وكدة

أما دكين فبلغنا انه يمطتي البرادوا وما ظنيت يرجع لي اخوتك المقطعة دي

مشتاقين يا اساسي

والله نِحنا عاوزين نِشتاق ليهو برضو ... إنتو عملتو شنو؟

Quote: عزام حسن فرح والله نِحنا عاوزين نِشتاق ليهو برضو ... إنتو عملتو شنو؟

لا تصدق كل ما يكتب وما تقرأ يا عزام ,

اساسى
دة كلامك بعد الغياب؟
نحن متوقعين منك تفك بوست كارب يحكى ال Journey حقت امتلاك البرادو
من ماشرطت الورق الين ( up to ) ما عملت الكرامة
لكن تقول شنو جيت كبيت ليك حنك لايودى لابجيب
بعدين الزول دة اصبح فى بلد كلو مريخاب وشيوعين
ومؤلفة قلوبهم زى ناس كيكى ومسحلبين زى خليل
بخيت وسعيد عليهم فانا بشوف تركز بهنا مع ناس طال
عمرك وكدة

حبيبنا احمد التجاني

طبعا البرادو بقت لي زي مشروع الحلم الفسيح بتاع اخوانا الشيوعيين , في الاخر عملوا ليهم مؤتمر زي البلنتي ,
الواحد من قابل جماعتكم ديل بتاع المتحدة حلمه اتقوقع الي درجة اليأس وفي رواية ( اليارس) علي احسن الفروض
بعدين الواحد قافل علي واسطتك وخايف في النهاية يركب رالي دبل

خضر حسين خليل

لسؤ حظي اصبحت مثار اشواقك يا خضر شفت الدنيا دي بت لزينا كيف
وانا ايضا ولسؤ حظي ايضا اشتاقكم
معا من اجل منبر خالي من الاشواق التي ليس لها اي فائدة

اساسي!!!

بالله ده تلجك مع المجاهدين و من عاهدوا الله؟

اساسي اللي قبل الكراسي
ياخي ليك وحشة شديدة

يا عبدو روووق

وين الحي بيك ياخي , اكيد مشتاقين جدجد

إسئس، يا غائب عن العين..
من الملاحظ -جداً-،
منذ أن حطت دابة دكين بأرض آل ثاني الخيرا-كما يصفها أهلها-،
قلَّت شكاويه من جور الحبية والزمان،
كان يمتعنا بفقره حتى قلنا: يا ليته لم يجد حق الفطور،
وكان يمتعنا بمحبوبة تبدّت له وإستعصمت بالفقر عنه،
وكان حينما يضيق بأمره من كثرة الإبتلاءات،
يأتينا بلغة، له وحده، تقرأها وتتعوّذ بالله من كثرة شياطينها..
فيا إسئس، المادة قتلت الإبداع في نفس صاحبنا،
فتمنى له بالقليل منها،إن كنت تتوق لذاك الدكين..
دكين اليوم، لا يحكي،
ولكن يُحكى عنه:
يذهب للعمل كل يوم ببدلة جديدة،
وربطة عنق أجدَّ،
لو توفرت له بأرض الرياض حينئذن لقتلته شنقاً..
وأيضاً يقولون:
يجوب شوارع الدوحة ودوراناتها ببرادو موديل العام،
تطوي الأرض تحتها، فلا تجد لها أثر..
وتصاوير اهل الدوحة التى يرسلونها جلسة بعد جلسة،
تأكد ذلك..
ليهو العوض ومنو العوض يا إسئس،
ربنا يعوضنا بدكينٍ آخر،
أفقر منه،
وأتعس حظٍ منه..
____
دكين لا يحلو إلا فقيراً مهجوراً..

Quote: دكين لا يحلو إلا فقيراً مهجوراً

بلا يا ياسر
دكين لا يحلو الا راقصا ومنتشا
وهو ينشر البهجة والجمال في ربوع ال ثاني
هلا يا اساسي
ومشتاقين ياخي
وبركة الجيت والله...
ومن يوم ما لم فيك صاحبنا ابو صلعة ده
كراعك انقطت من المنبر ده...
ابو الصلعة الشششششششششششششششششين هو احمد تجاني الفيل او كما قال عصام جبرالله



.....
ياسر طيفور
راجع الانصر مشين في زول نضم معاها الليلة
وقال ليها (جااااااااو)

كيكي..
يا صاحبي المخضرم، خضرمة ليس من دواعي -حُمى تكسير التلج- التي أصابت البورد، وأصابتنا بـrunning nose، وsneezing عجيبان، بعيد عنك؛ غيرنا يكسر التلج ونمرض نحنا، أما دكين المنتشي خارج مداراتنا الإسفيريَّة دي، ما تشكروا لينا، لا ينفعكم لا تنفعوهو، ويا بركت النت والأسافير يتسلط عليكم غريبة آخر، دوحاوي، أزرط من غريبة الرياض، يكشف لنا ما بخلتم به علينا، آمين..
___
الـvoice mail حقي انا، يا قول الخواجات: come again، ما فهمتك، وبالمناسبة رسل لي تلفونك في الماسنجر..

بوست غير موفق..


شوفت يا عمك لمن تجي تكتب ليك كلام مسمكر بيطلع ملخبط ومكوووجن وبتعوس الابري مع الحلو مر ..
ياخ سيبك من كتابات المثقفاتية دي واكتب ساااااي ..
قول ليهو يا دكين ياخ وين الحي بيك والله فاقدنك وانا بقيت بغسل العدة وشفعي زهجوني بي البامبرس وقالوا انت من ما خليت الرايض ماشة معاك طحنية ..
والله انت لا ماشتاق لي دكين لا يحزنون ولااااك طتري سيرتو مشغول فيييييي رويحتك دي.
ودكين زاااتو قطع شك بيكون ما فاضي ليك وما طاريك .
سيبو حركات الجكس وكتابات السنة الناعمة دي ..

تخريمة :
احم دربك انت في نعمة غسيل العدة هييين الله لا وصلك مرحلة غسيل الحيطة

دكين الوغد
هذا النبيذ المعتق
آخر الأخبار قيل أنه يعمل كمساري في بصات دنقلا

كيفك يا اساسي
حسع كان في داعي تجيب سيرة ابن السبيل دكين

حبيبنا الزمان اساسي

كل ماسالت عليك صدوني حراسك ردوا الجواب قاسي مع اني من ناسك


عملت ليك بوست كامل لكن شكلك كده يامعلم بعد رحلة القاهرة بقيت من ناس البيزنس من

مبروك كل حاجة تمت من ورانا

تحياتي

زاتووووو

Quote: من ما خليت الرايض ماشة معاك طحنية ..

ياسر طيفور (اب تفة )

قلت واظن قولك الفصل فيما ال اليه حال دكين , واغرب مافي الامر ان كل الحكم والامثال لم تصدق في حال صديقنا , فامثال كـ(من صبر جبر ) لم تعد توتي اكلها فصديقنا لم يكن صبورا ولم يكن مستور حال بل كان دائم اللهج بالشكوي من مر الزمان وجور الحبيبات وبؤس المآل , ولكن ليس لنا الا ان نقول يضع سره في اوغد خلقه .

Quote: اساسي!!! بالله ده تلجك مع المجاهدين و من عاهدوا الله؟

عزاز شامي

طبعا الواحد زمان كان في (الحتة) دي وبكل ارتياح ممكن يقول ليك , صباحك طلة نرجس وما ادراك ما جيتي ومعاك طل الفرح ويا غيمه والكلام الفقد طعم الدهشة في غفلة الزمن الفلاني
وبما انه اصبحت الاشياء كما تبدو وباع الواحد فينا اي حاجة وبقي يشوف ليك اخوات نسيبة طشاش طشاش وزمته بقت اوسع من الاطلنطي فما عندي غير اقول ليك الزارعها الله في الظلط بتقوم

أساسى

هكذا أحبك .. وتعلم هذا ..
تخلو لنفسك بنفَسِك ، فتستنشق محبة و تزفرها مفردات حراء .. والحراية خشم بيوت ..

قلت لك قبلها - نادوس و ضعفى - قد قطعنا فيك أنك تخلو فتحلو ..
ليتك تكون كذا مرات .. و لاتنسى نصيبك من الشفتنة ..

أما دكين ..
فكالرسايل العندى شيلها..
فلا ينقصـنا زيادة سكّر .. ولا سُكر ..
جميل خلق و خِلقة .. ونحن هنا نرى جمال الصبيان كما نلحظ صِبا الصبايا .. فيا لها من صبابة ..

و نحبكما جيدا ..
ووجدا جدا .. تجدنا ..


قبل الاششششششش

مشتاق ..

Quote: اساسى دة كلامك بعد الغياب؟ نحن متوقعين منك تفك بوست كارب يحكى ال Journey حقت امتلاك البرادو من ماشرطت الورق الين ( up to ) ما عملت الكرامة لكن تقول شنو جيت كبيت ليك حنك لايودى لابجيب بعدين الزول دة اصبح فى بلد كلو مريخاب وشيوعين ومؤلفة قلوبهم زى ناس كيكى ومسحلبين زى خليل بخيت وسعيد عليهم فانا بشوف تركز بهنا مع ناس طال عمرك وكدة

احمد التجانى,,بالله الاخ اصبح من اهل التايوتا وكمان برادو

يعنى بعد بوستى داك كسبت زبائن كتار,,,

ودا سبب غياب اساسى,,لو ماشى البقالة بمشى بالبرادو
لكن الباركنق كيف قاعد تجد مكان

تحياتى

ياخ عمر الفاروق دا مريح كيف!

هرشوك بقيت تخش اونلاين بالدس


ووكت تكتب تكتب للرجال

حي انا

( دكين اكاد اشتاقك )


بالله


حكومة 100%

ياخي الدنيا عيد عديل كدا .. شنو الغيبة دي يا أخينا.

وأخيراً ظهر هذا الذئب الشرس الذي أفتقده ...
هذا من كلام المثقفاتية الذي لا يعرفه عمر الفاروغ (ولن) يعرفه ... (وش خجلان لي عمر الفاروغ) ...!!!!
أما من كلام (الجربندية) أمثال الفاروق والله يا أساسي أفتقدتكـ في 70% من المواضيع (البيض) والعناوين (الشترة) والمُداخلات (الخبيثة)
..
تخريمة :
إنت يا ود الصايم تلج شنو البتكسروا لي عمر الفاروغ .. (للأسٍف ما في وشوش)

موش لاقيت دكين؟!!!

وشوفتو عديل كدا بعدالفلس راح خطبت ليه بتي بقينا نؤمن بالمادية الجدلية

بعداك مشيت حضرت بروفة عرس الزين
شوفتويمثل والله يقول لاتول شنو يا صاح..
الزول دا موهبة شاملة كاملة
المفروض كان يكون خريج المعهد


اداني كرتو ايوا عنده كرت عديل كدا.



وبركة الجيت..

خلاص يا جماعة
عمر الفاروق دا أبيض واحد هنا!

أساسي

تصدق انا فارقت البورد ده من 2005 .... و بقيت اقرأ بس
كنت رجعت السودان و ما ادراك ما السودان

اسي لي اسبوع كده مواظبه.... من ما رجعت بلد الجليد و الفراغ

لكن و الله لما شفت بوست بي اسمك فرحت ... حسيت بي الحنين لي اخواني الإسفيرين

و كمان مشتاقين لي دكين معاك


____________________________________________
السايق برادو منوأ؟؟؟؟؟؟؟؟؟ كلام يا عوض دكام

Quote: السايق برادو منوأ؟؟؟؟؟؟؟؟؟

أنا دا!

دكين سايق موديل 95
أساسي قاعد يحلم بيها لسع!

اساسي الاسد:d وينك يا راجل ؟

دكين بقى يصطاد سمك بعد ما فشل في اصطياد المرا
النداء الاخير بتاعو وجهه للسمك قال عسى و لعل تطلع ليه حورية من البحر

اساسي
سلامات
وبركة بالشوفة
ومكانك فااااااااضي
ومبروك انتصارات المريخ
وهاك دكين قبل ساعات

بالله دة ياهو دكين ؟؟؟

Quote: بالله دة ياهو دكين ؟؟؟

دا عبد العزيز

دكين بجي ملط!

..
.

عوداَ مستطاب
والتحايا النواضر

____________

طولت الغيبة

فى جملة حكيك نسيت أن تمر ببطون الكهوف القديمة التى ما فتئت تخبى الغالية!
أم تراك قد نسيت؟



أساسي إزيك ياخ

اساسي
انا ذاتي فقدتا نفسي.، لله الحمد لم اعد بحوجة الي السبعة الف التي طالما سالتك اياها
وطالما تجاهلتُ سؤالي وحاجتي لها..
حسبتني امازحك في عالمٌ يلوحُ للناظرِ اليه انه الحق ..حتى إذا جاءة لم يجده شيئاً..
لم اعد - ولله الحمد كثيرا على ماكان وما آل إليه الحال- لم اعُـد احتالُ على ملذاتِ الدنيا بالصبرِ الجميل..
الان انالُ منها ماتيسر واتقى الله فيما تيسر..والان احدثك بنعمة ربي مستوجب الحمد الجميل..
سبحان الله خلتها ايامُ رهقٍ لاتنتهي ..ورضيتُ بقسمتي محتسباً الابتلاء في موازينِ اعمالِ الاخرة..
استعِنا في ضيقِ الحال وشدته وذكرى السودان والحبيبات بالاشواقِ تلك الايام..
واذا ذادت من بأسها الدنيا وانكربت نوازلها علينا جزعنا من مس الشر وسعينا الى ذكر الله ومرقناها في بطون مكة، معتمرين ندعو الله ان يصلح اعمالنا ويزيح اسباب الغم والهم وماعلق بالنفوس من علل..
ويالمحبوب انا جيتك جاري..
تعرف لا افتقد من الايام الخوالي شيئاً سوى تلك التي غابت مرة واحدة ، اتت من لخيال ومضت الى خيال..
احلامٌ في احلام..
السعيد كل السعيد في دنياه من لم يضطره الزمان الى اختبار الاخوان..
كنتُ سعيدا بها لانها ما احوجتني الى اختبارها..
اغنتني بوصلها عن الظنون وببعدها عن خائنة الاعين ..
هيَّ فقط ماتسهلت ..وهذه على أي حال ذكرى ليس هذا مقامها..
اها النحدثك وسبحان مغير الحال من حالِ الى حال ..
لم اعد مهجساً إلا برفيقة والسلام..
تجي زي ماتجي من طرف او من النص او من وات إيفر محل بقت مابتفرق كتير..
وان ماجات برضو مافرقت..
فلقد سئمت شكوى من سبق..وحال الذي تعجل رايته فماخفي منه شيئاً..
ولايستعجلن احدكم امراً قد يكون فيه هلاكه..
والنحدثك تاني ولله الحمد على نعمة الحياة والعافية
يسر الله لي الرزق في بلادٍ اولها صخر واخرها بحر..
بلادٌ لايخلو فيها امثالنا الى انفسهم ابدا..
لمتين يا اساسي عايزني انازل تلك الاشواق التي ذكرتها.؟!!
دي ياخوي اشواق لانهاية لها ودايرة ليها عمر ماعندي ليهو مروة..
وبعدين ياخي منذ متى وضع الشوق سيفة عن اعناق الرجال؟
بلاي لو لاقتك مرة من اللواتي وصفتهن زمان سلم لي عليها..وقول ليها كنتي مرحلة في خيال دكين والايامُ دولٌ بين العباد والحيوان وسائر ماخلق الله..

Quote: بلاي لو لاقتك مرة من اللواتي وصفتهن زمان سلم لي عليها..وقول ليها كنتي مرحلة في خيال دكين والايامُ دولٌ بين العباد والحيوان وسائر ماخلق الله..

هاهاهاهاهاهاهاهاها
حنكـ (بيش ) إلى الحبيبة الجديدة ...
أو كسير تلج لها ..
وفي رواية أخرى ..
دكين إستسلم ..
ولكـ التحيات أيها الوغـــــد ..
فاقدنكـ يا جميل ..

الاحباب الغالين
عبدالكريم الامين احمد
عمر الفاروق
حمزاوي
ALZOLZATOO
عماد محمود علي
معتصم الطاهر
abuguta
وليد محمد المبارك
Hussein Mallasi
عمران حسن صالح
د.نجاة محمود
BitAlhana
حمد فتح الرحمن
haroon diyab
مزمل خيرى
Tabaldina
walid taha
DKEEN

ياخي والله بعتذر بشدة وبتأسف لتاخري الشديد في الرد علي مداخلاتكم في وقتها وذلك لاسباب ( فنية خارجة عن الارادة) بصراحة اسباب فنية دا حنك مخارجة ما اكتر لكن والله انشغلت جدا عن البورد وباذن الله ساوليكم بالرد علي المداخلات فرادي لان لي الكثيرمن التعليقات حول ما كتب في هذا البوست