Post: #1 Title: ما بين هالة دهب وشروق ابو الناس البساطة والتكلف .. Author: عمر الفاروق Date: 04-01-2009, 11:07 AM Parent: #0
اغنية عزاز علينا وإن كان تصنيفها ومن حيث لا ادري اقحم في باب اغاني البنات إلا أنني اجد هذه الاغنية واحدة من اجمل الاغاني التي سمعت في الفترة الاخيرة كلمة ولحناً .. بساطة في الكلمة تلخص معاني كبيرة واناقة في اللحن تجبرك على الانجذاب .. طيب يا عمر اسة عليك الله حاشر لينا شروق ابو الناس هنا مالك ؟؟ وانت قصتك شنو مع شروق ؟؟ شكلك اتحولت لشخصنة الامور ومحاربة شروق ومن وجهة نظر شخصية !!! ولا تكون عجبتك حكاية عمر الفاروق ينتقد شروق وقلت تكسب شهرة !!! الفوق ده كتبتو ليكم عشان اوفر لي بعض الناس بعض المداخلات المكررة ..
نرجع لي موضوعنا .. من فترة وانا استمع لي العمل المقدم من خلال قناة هارموني " عزاز علينا" بي صوت بت اول مرة اسمعها بتغني وما بكضب عليكم ما سمعتها بتغني غير الاغنية دي ولااا اصلا سمعت بيها الا من خلال قناة هارموني وعزاز علينا دي.. البت اسمها هالة دهب .. من الوهلة الاولى البت دي بتدخل القلب بساااطة ما عادية اناقة رايقة ابتسامة غير متكلفة وكليب مقدم بصورة اقرب للعفوية بعيد عن التقليدية وكأنو ما كليب وزي اللي تم تصويره بي واسطة اهلها وهي في طريقها للجامعة في السودان بعد ما قرت الثانوي في الامارات !! وإن كان للمؤثرات لاصوتية دور كبير في اخراج الصوت بي الطريقة دي وبما أنو الحكم صعب عليها من عمل واحد تم عن طريق مؤثرات صوتية إلا إنو صرااااحة كده البت غنت الاغنية بي اسلوب جميييل يشجع الواحد إنو مفروض يقوم يتبناها ده اذا ما اصلا البت بتغني وواسعة الشهرة وانا ما جايب خبر.. اسرة دهب قدمت عمل جميل راقي ومعاها الزول الاسمو زرياب دهب ده وهو بيتداخل بي اسلوب وان كان اقرب للنكهة الحبشية إلا إنو عمل شغل حلو .. وانا مستمتع بي العمل ده ويادوبك بقول يا هادي إلا وتوووشك هارموني تجيب لينا زولة كرتونية بتنطط كما الارجوز وووووييينك يا ملاك عاجباني عيونك يا ملااااااااك .. وتظهر شروق ابو الناس مع البت البتنطط ولابسة سيم سيم صديق البت الكرتونية .. شروق لمن تجي تقول "شذاك" كانت بتطلع لسانها متر لي قدام في إشارة لي إنو يا جماعة انا بغني الاغنية بي مخارجها الصحيحة السين في محل السين والثاء في محل الثاء والذال في الذال .. اداء كان قمممممة في التكلف بدءاً بي الميك اب " وهو امر شخصي " مروراً بي اللبس وختماً بي الاداء.. طوالي جا على بالي المقارنة بين البتين هالة دهب وشروق ابو الناس من منطلق غنو اول شي الاتنين شكلهم تربية الامارات وكان الملتفين حول شروق قد نبهوا على دعم فنانة قادمة من الخليج فما عارف هل الجماعة ديل ما سمعو البت هالة دي ؟؟ قطعا لو سمعوها كان مفروض يكونوا غيرو رايهم في تبني شروق وتقديم فنانة من الخليج لتقتحم ساحة الفن في السودان .. اكتب الكلام ده وانا الحظ عودة نغمة شروق ابو الناس للسطح مرة تانية بعد ما الفورة حصلت وفشلت الحملة المصطنعة لاجبارنا كمستمعين لي الالتفات وبي القوووة على الصوت النسائي القادم شروق ابو الناس..
البت هالة دهب صراحة دخلت قلبي من جوووة بت لطيفة في الاداء بسيطة في التعابير مرحة وفوق ك ده صوت جميل جميل جميل اتمنى ان اسمع ليها اكتر من عمل وبدون مؤثرات صوتية للحكم عليها اكتر..
تخريمة : بالله يا جماعة العندو شغل للبت هالة دي يلحقني بيهو بي الايميل بي الجبنة بي اي شي :)
Post: #2 Title: Re: ما بين هالة دهب وشروق ابو الناس البساطة والتكلف .. Author: محمد عبد الماجد الصايم Date: 04-01-2009, 11:10 AM Parent: #1
تعرف يا عمكـ شروق دي أنا مكجنا لله في لله كــدا! والكليب أبو كرتون دا كمّل الحكاية تب!
بي مناسبة شروق دي ما تجيب لينا بوست البيضنة داكـ ياخ!
Post: #3 Title: Re: ما بين هالة دهب وشروق ابو الناس البساطة والتكلف .. Author: BitAlhana Date: 04-01-2009, 11:31 AM Parent: #2
لكن يا البورداب لما تكونوا عايزين تنتهوا ليكم من زول ما بتتلفتوا ..... ختريييييييييييييييين
برضو ضحكت لكن
Post: #4 Title: Re: ما بين هالة دهب وشروق ابو الناس البساطة والتكلف .. Author: النورس الحزين Date: 04-01-2009, 11:55 AM Parent: #3
و الله يا عمر بالجد إنت زول سميع ياخ ما تتصور قدر شنو عجبني الشغل بتاع عزاز علينا و قدرت ما سألت نفسي عن الارتياح دا جاء من وين ما عارف هل للكلمات ولا اللحن ولا اداء البت دى ولا شنو ما عارف لكن فى النهاية حصلت لى حالة كده زى حالتك
تخريمة : شهادتي دى ذكرتني واحد زمان فى حلتنا جنو بيجو يلقى أى زول راكب بيجو يقول ليك و الله الزول دا فاهم ياخ احترمتو تصدق
:) حسي انت عجبتني عشان هالة دهب دى
Post: #5 Title: Re: ما بين هالة دهب وشروق ابو الناس البساطة والتكلف .. Author: محمد الطيب حسن Date: 04-01-2009, 12:02 PM Parent: #3
Quote: طوالي جا على بالي المقارنة بين البتين هالة دهب وشروق ابو الناس
خلاااااااااااص يالموصلي
يعني يا عمر الفاروق انت عايز تقارن وقارنت وقلت ماعايز واحد يجي يردد وراك الكلام المتوقعو يجي يقولوه ليك شخصنة الامور وانت عايز تشتهر وووووووو....الخ (الكلام الكتبتو في اول مداخله ) طيب فاتح بوست ليه مادام ماعايزنا نجي نغرد ليك هنا كان تفتح ملف ويرد وتكتب كلامك وتحتفظ بيه عندك في جهازك
اها اسي انا عكسك بحب شروق ومابالع صوت هاله هل ده معناها انا مابعرف اسمع ولا اضاني فتحته صغيره ؟؟؟
قناطير من الود
Post: #6 Title: Re: ما بين هالة دهب وشروق ابو الناس البساطة والتكلف .. Author: عبدالله كع Date: 04-01-2009, 12:24 PM Parent: #5
مقارنه ماااااااااااااااااااااااااافي يا عمر
هاله دهب .
بساطه في كل شي .. وحيكون اسم علي مسمي
Post: #7 Title: Re: ما بين هالة دهب وشروق ابو الناس البساطة والتكلف .. Author: فيصل نوبي Date: 04-01-2009, 12:27 PM Parent: #2
Post: #9 Title: Re: ما بين هالة دهب وشروق ابو الناس البساطة والتكلف .. Author: Rawia Date: 04-01-2009, 12:39 PM Parent: #7
Quote: بالله يا جماعة العندو شغل للبت هالة دي يلحقني بيهو بي الايميل بي الجبنة بي اي شي
عندها تاني أغنية بالانجليزي حلوة ودمها زي العسل مابقدر أجيبها ليك لكن بوصيك تعمل زيي تمشي في الفيس بوك وتتصاحب على (Zee) زرياب أخوها وتقوم تلقاهم كلهم في الفيديو بتاعه هالة حلوة وطبيعية ورقيقة
Post: #11 Title: Re: ما بين هالة دهب وشروق ابو الناس البساطة والتكلف .. Author: khaleel Date: 04-01-2009, 12:48 PM Parent: #9
شروق ابو الناس
تفوق هالة بمائة سنة ضؤئية
هالة شنو
بعدين عزاز علينا دي اغنية عتالة وعنقالة وتربالة ساكت
Post: #10 Title: Re: ما بين هالة دهب وشروق ابو الناس البساطة والتكلف .. Author: صلاح أبودية Date: 04-01-2009, 12:46 PM Parent: #7
بدون سيرة شروق أبو الناس .. لأنو سيرتها بتعمل لى حسكنة فى الجاقومة ! اولاد دهب !! إبداع .. إبداع .. إبداع .. والفيديوكليب .. نقول : والله الزولة دى سافرت عديل ! وربنا يكتب سلامتها !
Post: #12 Title: Re: ما بين هالة دهب وشروق ابو الناس البساطة والتكلف .. Author: Hawari Nimir Date: 04-01-2009, 12:51 PM Parent: #10
وده الفيديو.. لكم كل الود هواري
Post: #13 Title: Re: ما بين هالة دهب وشروق ابو الناس البساطة والتكلف .. Author: أيمن جبارة الله الخضر Date: 04-01-2009, 12:53 PM Parent: #7
يا عمر.. ياخ إنت خطر والله وعندك ذوق..
(عزاز علينا) دي أغنية عملوها هالة وأخوانها وما كان عندهم إنتاج عالي وحتى أعتقد الفيديو عملوهو على جهاز كمبيوتر عادي.. لكن هم ناس موهوبييييييييييييين وبيستاهلوا الدعم.. وفي كتار زي زرياب وهالة ديل بس أديهم ستوديو صوت كويس وأجهزة راماتها RAM كمية وشوف بيطلعوا ليك شنو..
لو إنت من ناس كتاب الوشوش (الفيسبوك) هاك سلم على زرياب هنا..
وعندهم كذا فيديو تاني ممكن تشوفهم في القروب بتاعهم.. وعندهم أغاني كمان بتلقاها في الصفحة دي..
Post: #14 Title: Re: ما بين هالة دهب وشروق ابو الناس البساطة والتكلف .. Author: Hawari Nimir Date: 04-01-2009, 12:59 PM Parent: #13
وده بالانجلبزي...
Post: #15 Title: Re: ما بين هالة دهب وشروق ابو الناس البساطة والتكلف .. Author: علاء الدين يوسف علي محمد Date: 04-01-2009, 01:07 PM Parent: #14
عمر الفاروغ راجع مسنجرك بالله
Post: #17 Title: Re: ما بين هالة دهب وشروق ابو الناس البساطة والتكلف .. Author: Amany Elamin Date: 04-01-2009, 01:25 PM Parent: #15
عمر الفاروق ازيك: الجيتار في أغنية هاله دهب خطيييير.. أنا بحب صوت الجيتار جدا عشان كده استمتعت بيها.. وصوتها جميل وحنين.. بس نوّمت الغنيه شويه.. الهدوء الشديد ده مرّات بزّهج..
أما شروق فما تجيب سيرتها الله يرضي عليك.. مابقدر أبلع أنتي هستامين, بنومني وأنا عندي شغل كتير.. :)
Post: #18 Title: Re: ما بين هالة دهب وشروق ابو الناس البساطة والتكلف .. Author: طلحة عبدالله Date: 04-01-2009, 01:26 PM Parent: #15
مازال عمر القليص يرغي وينظر وانا بكره وانا بحب وانا قارنت وانا قررت وح تجوا تقروا كلامي وتقولوا لي وانا انا انا انا و.. ومازال ودو كماين يدخل عليهو عشان يخمو بي كلمتين ويقول ليهو كلامك صاح . ياخي دا مسلسل امسخ من ترمس الخلا قوموا لفوا كدا واللا كدا .
Post: #16 Title: Re: ما بين هالة دهب وشروق ابو الناس البساطة والتكلف .. Author: Osama Mohammed Date: 04-01-2009, 01:18 PM Parent: #14
حرام( يقدو) الناس في التلفزيون السوداني بي ناس (قيقم ) وتاكل عيش وانصاف المواهب وزي الأسرة الفنية الجميلة دي ما جايبين خبرها ... والله فعلا ياهو ده السودان
الأخ عمر الفاروق .. دي الحاجة التالتة نكون زي بعض فيها بعد حب فريق الهلال الوطني والصلعة أقصد الجلحات الكبيرة ..
اسامة
Post: #19 Title: Re: ما بين هالة دهب وشروق ابو الناس البساطة والتكلف .. Author: Siham Elmugammar Date: 04-01-2009, 01:39 PM Parent: #16
( تعرف يا عمكـ شروق دي أنا مكجنا لله في لله كــدا! والكليب أبو كرتون دا كمّل الحكاية تب!)
ود الصايم اذيك والله انا بلا شوفة كليب الحكاية عندى كملانه اهاااااااا ده مع احترامنا لمستمعى شروخ
Post: #20 Title: Re: ما بين هالة دهب وشروق ابو الناس البساطة والتكلف .. Author: baha eassa Date: 04-01-2009, 01:45 PM Parent: #16
Quote: البت هالة دهب صراحة دخلت قلبي من جوووة
وشروق دخلت قلبي جوووووووووة ياعمر الفاروق
Post: #22 Title: Re: ما بين هالة دهب وشروق ابو الناس البساطة والتكلف .. Author: بابكر عثمان مكي Date: 04-01-2009, 02:11 PM Parent: #20
عزاز علينا ..
اغنية تحملك الي الوطن
وتعبث بذكرياتك عبث المطر بأوراق الشجر ..
اهنيء الاخت هالة دهب والاخ ذرياب علي هذا الابداع السوداني العفوي .
اعتقد ان الأعنية موجودة اصلا في ذاكرة المتلقي بتقافة الوداع السوداني المتجذر كنسيج كلاسيكي حنين يسكن جذور كل سوداني ويقبع في ثنايا القلب حيث فترة الصبا فترة تنحت في جدار الاحاسيس الخفية ومن هنا فان اللحن بعقويته حرك هذا الاحساس لدي كثير منا وكان السبب الأساسي في ذلك صوت الجيتار لانه كان يمثل صوت الحداثة في عمق الماضي الجميل خصوصا وان اللقطات كانت تنم عن الرحيل بين صالات الجمارك وهو واقع اغلبية .
شخصيا .. تتشابيك ايادينا امام التلفاذ ونغني مع هالة وذرياب بكل احاسيسنا ..فقد دخلت هذه الاغنية احاسيسنا بلطف ممزوج بدمع وكسرت حيز الرتابة وفتحت شهيتنا للوطن كوننا غرباء عنه قسرا ومغروسين في غير تربتنا .
بابكر
Post: #21 Title: Re: ما بين هالة دهب وشروق ابو الناس البساطة والتكلف .. Author: محمد فرح Date: 04-01-2009, 02:11 PM Parent: #16
هاله دهب yes شروق ابوالناس big no
Post: #23 Title: Re: ما بين هالة دهب وشروق ابو الناس البساطة والتكلف .. Author: Hadeer Alzain Date: 04-01-2009, 03:56 PM Parent: #21
Quote: اغنية عزاز علينا وإن كان تصنيفها ومن حيث لا ادري اقحم في باب اغاني البنات إلا أنني اجد هذه الاغنية واحدة من اجمل الاغاني التي سمعت في الفترة الاخيرة كلمة ولحناً .. بساطة في الكلمة تلخص معاني كبيرة واناقة في اللحن تجبرك على الانجذاب .. طيب يا عمر اسة عليك الله حاشر لينا شروق ابو الناس هنا مالك ؟؟ وانت قصتك شنو مع شروق ؟؟
يا ناقد البورد الفني إزيك بنحترم جدآ وجهة نظرك السالبة في بنياتنا الحلوات.. القصدهم إدخال البهجة في نفوسكم ليس إلا وكان وجهة نظرك السالبة دي كمان إحتفظت بيها لنفسك بكون أحسن.
Post: #24 Title: Re: ما بين هالة دهب وشروق ابو الناس البساطة والتكلف .. Author: Hawari Nimir Date: 04-01-2009, 09:58 PM Parent: #23
وبعد الاستئذان من صاحب البوست شروق ابو الناس..في اغنيه ام اليتامي ولكم\ن كل الامنيات بالمشاهده و الاستماع شروق ابوالناس....هاله دهب..سودانيات يعملت بكل اجتهاد من اجل تقديم اغنيات بشكل مختلف ..عن بعضهن.. لكل واحده استايل..ولونيه و ....جمهـــــــــور وفي الاخر... حب الناس مذاهب.. اتمني لهن كل التوفيق
Post: #25 Title: Re: ما بين هالة دهب وشروق ابو الناس البساطة والتكلف .. Author: دينا خالد Date: 04-01-2009, 10:50 PM Parent: #24
عمر الفاروق !! انت كنت تعنون البوست بى ما بين عمر الفاروق وشروق ابو الناس ! وخلى عنك ياخ .. والله ما فضل ليك الا تقول ليها ابوك اسمو ادم (ابو الناس) دى حرفنه منك ساى ..
Quote: شروق لمن تجي تقول "شذاك" كانت بتطلع لسانها متر لي قدام في إشارة لي إنو يا جماعة انا بغني الاغنية بي مخارجها الصحيحة السين في محل السين والثاء في محل الثاء والذال في الذال ..
لا ابدا دا سوء ظن ساى .. انت عارف انو البت تربيتها خليجية والناس ديل كلهم عندهم مدت اللسان دى بغض النظر عن انو المخارج صحيحة ولا لا .. ما سمعت احلام بتمرق لسانها كيف لما تقول واللى ما يطول العنب حااامظا عنه يقول ؟؟ اها مرقة اللسان دى فى ثقافة العرب ديل لا عندها علاقة بالمخارج الصحيحة لا عندها علاقة بى محل السين ولا محل الثاء وشايفهم انت كيف بنطقو الضاد ظاءا ...
كل قصتك انو لما هاله دهب غنت الكيف عندك لحظتها كان عالى بس !!
Quote: يشجع الواحد إنو مفروض يقوم يتبناها
ووووووووووووووووووووو خد ،، داير يضيع البت ! لا تلم فى الغناء لا تلم فى اهلها ..
كدى لما نشوف العندك دا الببقى عليهو شنو بعدين يدوك غيرو ..
ــــــــــــــ والله انا لا شفت شروق لا دهب .. لكن بس عمر دا حقاااار داير يتعلم التليح مع انو ما كان عندو الحركة دى ..
Post: #84 Title: Re: ما بين هالة دهب وشروق ابو الناس البساطة والتكلف .. Author: عمر الفاروق Date: 04-05-2009, 08:12 AM Parent: #7
استاذنا الموصلي: اولاً مشكور شديد على الاجتهاد والتعامل بجدية في توصيل الافكار مدمغة بي الادلة والبراهين وده بيدي إحساس زول فنان يقدر مهنيته وعمله .. بالنسبة لي انا طبعاً الاسهل اني استمع للعملين وهم معزوفات على اساس النوتة بتاعتك لانو طبعا نوتتكم دي زي البقرا في حروف صينية ما فاهم اي شي لكن من التلوين بتاعك ده اديتني احساس انو ده مش تطابق ده ده تناحر عدييل كده الشي كللللو لبني ياخ :) ما عايز اقول ليك ما حا اقتنع يا استاذ لكن لسة انا مرجعيتي في الحتة دي السمااااع وده ما معناها انكار للعلمية .. شغلي وشغلك الهنا ده زي المقارنة بين المقاول والمهندس المقاول زول عنقالي ساي يعتمد على الخبرة والحاجات الما علمية في البناء والمهندس بيحبا ليك بي جا وجتا وظا وانا زول عندي اضاني دي وانت زول مع الاضان قاريها .. لو قعدت اغالطك بعد ده بكون زول عايز يغالط والسلام لكن بفضل لو في زول بيدعم موقفي ده ويجي عشان يناقشك في حتة النوتة دي لانو انا حدي معاك اغني ليك عزاز علينا واغني ليك يا مسافر واوريك انهم ما واحد سمعيا.. عندنا في الكورة في لاعب لمن يجيبوهو ويجلط والجمهور يجووط المدرب بيقول اصبرو عليهو لكن الجمهور لماااح بيفهم منو الممكن تصبر عليهو ويجي منو ومنو الظاااهر ما عندو لمسة للكورة وان كان المدرب مصر عليهو .. ممكن علميا يكون كلامك صاح وانك شايف في شروق حاجات انت قريتا لكن صدقني الجمهور صعب عليهو يفهم الكلام ده ويصبر عليها لانو شروق من لمستها ظاهر ضعف امكانيتها الصوتية .. والله يا موصلي ما كلام مكابرة لكن بالجد قاعد احتار لمن تقول ولشروق جمهورها ومحبيها وانا ما عارف تعريف الجمهور عندك كيف هل اي عدد لم يتجاوز المية او الخمسين ممكن يكون جمهور ؟؟ جمهور عندها ناسها ممكن لكن جمهور العوام شروق فشلت في انها توصل ليهو صوتها .. شروق بتقدم فن محترم لا جدال ولا غلاط .. شروق بتتعامل مع ملحنيين وشعراء وفنانين كبار لا غباااار.. لكن ده ما كافي لي انها تكون فنانة .. تحياتي..
Post: #26 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-01-2009, 11:32 PM Parent: #1
Quote: وانت قصتك شنو مع شروق ؟؟ شكلك اتحولت لشخصنة الامور ومحاربة شروق ومن وجهة نظر شخصية !!! ولا تكون عجبتك حكاية عمر الفاروق ينتقد شروق وقلت تكسب شهرة !!!
لافُض فوك
Quote: ياعمر الفاروق
عليك الله كلم لينا عمر الفاروق ده طبعا مافي ابتسامات للاسف ============= براحه على هاله وخلوها تبذل جهودها ومحاولاتها وسـتأتي أؤكلها باذن الله
Post: #27 Title: Re: ما بين هالة دهب وشروق ابو الناس البساطة والتكلف .. Author: حبيب نورة Date: 04-02-2009, 00:01 AM Parent: #26
جوباك شديد
Post: #28 Title: Re: ما بين هالة دهب وشروق ابو الناس البساطة والتكلف .. Author: Bakhaf Date: 04-02-2009, 04:51 AM Parent: #27
عمر الفاروق
صراحة كده انتا زودتها شديد مع البنية دي , واصبح انطباعي كانك انتا الان بتنتقدها لحاجه شخصية
مع علمي انه مافي حاجه زي دي , انا واحد من الناس برضو ما بحب اسمع شرووق دي ولا حاجه لكن اكيدددد
في ناس تاني بتحب تستمع ليها , فاصابعك يامان ما واحد , فكل زوول وزوقه , فانا كنت مكجن وبكره حاجه اسمها
مصطفي سيد احمد شوفت كيف لكن مع مرور الايام وايام الجامعه بالزات بدات اسمع له فغيرت راي فيه تماما
فياخي البت مجتهدة انها تعجب المستمع السوداني والعافية درجات فمن المفروض اننا يا اما نشجعها او نلتزم الصمت
وصدقني ازا فشلت فستختفي من تلقاء نفسها , اكيد انه البت دي فيها حاجه ولو ما كده ما كان الموصلي واقف معاها
ارجو ان تتفهم وجهة نظري وما تحرقها اكتر من كده
مجال الغناء ده من المجالات القليله المادايرة ليها واسطه ياحبيب فالموهوب هو من سيظل في الساحة .
Post: #29 Title: Re: ما بين هالة دهب وشروق ابو الناس البساطة والتكلف .. Author: Ammir Mohamed Date: 04-02-2009, 05:27 AM Parent: #1
Quote: وهي في طريقها للجامعة في السودان بعد ما قرت الثانوي في الامارات !!
والله كان الإمارات ما عارف!!! هالة دهب من مسقط وحقيقة هي بالنسبة لي أفضل من غنى أغنية (عزاز علينا).. هالة تنتمي لأسرة فنية سبقهم إليها الأخ الأكبر المبدع أشرف دهب الذي يتقن العزف على العديد من الآلات الموسيقية وكان أحد أعضاء مجموعة ساورا الموسيقية سابقا ...
تحياتي
أمير
Post: #30 Title: Re: ما بين هالة دهب وشروق ابو الناس البساطة والتكلف .. Author: Mushal Allam Date: 04-02-2009, 11:15 AM Parent: #29
طبعا هاله بت قبايل وعندها فايل (عشان مازول يفهمني غلط بت قبايل موسيقيه واهلا معروفيين بي الفن) وفي فرق كبير في كميه مساحيق الوش المستعمله ....
Post: #31 Title: Re: ما بين هالة دهب وشروق ابو الناس البساطة والتكلف .. Author: ضحيه ابراهيم Date: 04-02-2009, 11:33 AM Parent: #30
الفن لايمكن ان يصنع والفنان فنان بدون اى اضافات او مكياج ولبس وفرض على الناس استماعه ومازلت عندى راى فى ان هؤلاء
نانسى عجاج (يمكن ترقى اداءها وتصبح فنانه)
شروق ابو الناس (ليست لها علاقه بالفن )
ليزا شاكر (لايمكن ان تؤدى قصيده فى روضة اطفال)
Post: #32 Title: Re: ما بين هالة دهب وشروق ابو الناس البساطة والتكلف .. Author: محمد المرتضى حامد Date: 04-02-2009, 12:30 PM Parent: #31
Quote: شروق ابو الناس
تفوق هالة بمائة سنة ضؤئية
هالة شنو
بعدين عزاز علينا دي اغنية عتالة وعنقالة وتربالة ساكت
شوف يا خليل، المعيار في الحتات دي ذاتي مافي خلاف لكن والله والله كلامك دا يستحق المضاربه.
Quote: وهي في طريقها للجامعة في السودان بعد ما قرت الثانوي في الامارات
مسقط تدرِّس والشكر للإمارات
Post: #33 Title: Re: ما بين هالة دهب وشروق ابو الناس البساطة والتكلف .. Author: ajaj Date: 04-02-2009, 01:31 PM Parent: #32
ديل عندهم عرق العجاجاب ليه ما يكون مبدعين
كانو بيبدعو في برلمان كافي يوم الخميس لكن اظنهم في السلطنة الان اشرف درس موزيك في القصر طيبونا وهلولة هواية زرياب ....الاتنين هواية و دراسة
Post: #34 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-02-2009, 02:48 PM Parent: #1
اها نجيكم من الاخر الاغنية لذيذه ووناسه وزرياب عحبني والله بس مع احترامنا لمن عمل الاغنيه فلحنها ماخوذ بنسبة 97% من اغنيه قديمه بتقول (يامسافر فراقك لي صعيب) والعندو راي غير ده يجيب التسجيل القديم والله بنكتب النوت وبرغم كل حاجة فقد اعجبتني جدا وهاله احساسها جميل الله يحفظها اما شروق فبعد سماعي لها في بين العمل والبيت لشاعرنا الكبير محجوب شريف ولحن االفنان المجددحمزه سليمان فهي تسير في ؛ريق الاحترافية والاتقان ومع احترامي لراي الصديق عمر فانني اخالفه الراي تماما اما الذين يستخدمون االغمز والللمز تجاه فنانه لم تفعل الا الاجتهاد ومحاولة التجويد فيا ليالي الاسف
Post: #35 Title: Re: ما بين هالة دهب وشروق ابو الناس البساطة والتكلف .. Author: عبد الرحمن حمد النيل Date: 04-02-2009, 04:07 PM Parent: #34
Quote: بس مع احترامنا لمن عمل الاغنيه فلحنها ماخوذ بنسبة 97% من اغنيه قديمه بتقول (يامسافر فراقك لي صعيب)
احترامي استاذ الموصلي عزاز عليناكمصنف مسجل باسم بشاير فرح لحنا وكلمة هناك الكثير مثل هذه الحالات لم يعد هناك جديد ولم تعد هناك رقابة.
Post: #36 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-02-2009, 05:05 PM Parent: #35
Quote: [احترامي استاذ الموصلي عزاز عليناكمصنف مسجل باسم بشاير فرح لحنا وكلمة هناك الكثير مثل هذه الحالات لم يعد هناك جديد ولم تعد هناك رقابة.
أخي عبد الرحمن هذا شئ مؤسف الا يكون للجنة الرقابة ثفافة سماعية وتراثية كافية لاكتشاف مثل هذا الامر الذي هو غاية في السهولة ولكن على اية حال فالشعر ليس هو ولكن اللحن مأخوذ من ذاك حتي لو كان عن طريق توارد الخواطر مع التفدير لبشاير فرح لك خالص الود
Post: #37 Title: Re: ما بين هالة دهب وشروق ابو الناس البساطة والتكلف .. Author: عمر الفاروق Date: 04-02-2009, 05:16 PM Parent: #36
Quote: من اغنيه قديمه بتقول (يامسافر فراقك لي صعيب)
لو قاصد الاغنية التتمتها على ما اظن : يامسافر فراقك لي صعيب في بعدك حياتي كيف تطيب..!!! فيا موصلي ومن غير نوتة موسيقية فاكيد ده ما نفس اللحن .. إذا قاصد اغنية تانية فممكن يكون كلامك صاح .. عموما ممكن يكون شغلكم بتاع النوتة بيجيب الحاجات زي بعض لكن لو نفس الاغنية المعنية فيا استاذ ماف اييي علاقة .. احترامي..
Post: #38 Title: Re: ما بين هالة دهب وشروق ابو الناس البساطة والتكلف .. Author: عمر الفاروق Date: 04-02-2009, 05:24 PM Parent: #37
ود الصايم: ياخ خلي كجينك بي اسباب منطقية عشان ما تدخل في زمرة الحاقدين :)
***
بت الهنا وفي رواية ممكن تكوني بيت الهنا : الما بتدوروهو في الضلمة تحدروا ليهو ..
******* نورسنا الحزين :
Quote: و الله يا عمر بالجد إنت زول سميع
ياخ سميع دي نبزة كانوا بيقولوها لي الزول البيجيبوا ليهو الكلام ويصدقو :) تسلم ياخ ..
Post: #39 Title: Re: ما بين هالة دهب وشروق ابو الناس البساطة والتكلف .. Author: عمر الفاروق Date: 04-02-2009, 05:30 PM Parent: #38
محمد طيب:
Quote: خلاااااااااااص يالموصلي
استاذنا الموصلي فايتني بي هديل بس :) .. غير كده الكتوف متلاااحقة ..هييييييييييع ابوك يا محمد:) تخريمة : يا اخوي انت تحت فنيلة الكورة دي لابس شنو عشان صراااحة كده بدا يتلخبت علي الاختساس :).. اسة عليك الله مش اخير الصلعة ؟:)
Post: #41 Title: Re: ما بين هالة دهب وشروق ابو الناس البساطة والتكلف .. Author: Dr. Moiz Bakhiet Date: 04-02-2009, 06:49 PM Parent: #40
Post: #42 Title: Re: ما بين هالة دهب وشروق ابو الناس البساطة والتكلف .. Author: خدر Date: 04-02-2009, 07:13 PM Parent: #41
عييييييييييكـ القصة جاطت يا بروف مالكـ داخل اسه انا من الصباح مستمتع بالبوست و بي ونسة موصلي و عمر و قلبي في ايدي قلت معز ما يخش يهيج لينا الزول ده اها جيت اسه و هيجتو لينا. صدقني عمر ده لو خليتوهو هو و شروق براهم , و الله باكر تلقوهو عامل بوست ترويجي لي اغاني شروق شروق بت فنانة جدا و عمر ده عندو الحسادة اصلو , انا غايتو مبسوط لانو تأثير سودانيزاونلاين ما بشمل قطاع عريض من السودانيين بس عشان بوستات عمر دي تكون مساحتها محدودة. شروق , انا متأكد انو انت كل ما عمر بعمل بوست عنكـ بتكوني مبسوطة , النخل المثمر يا ستنا دائما مستهدف من الاوغاد و عمر كل نقتو دي حايمة في دائرة (التذوق) و التذوق ده امزجة (الاتو بتاعكـ يا عمر و حرقتو ليكـ , تاني في شنو ؟)
Post: #43 Title: Re: ما بين هالة دهب وشروق ابو الناس البساطة والتكلف .. Author: خدر Date: 04-02-2009, 07:41 PM Parent: #42
اعتذر بشدة فاتني ان اشيد بالشابة هالة دهب و القروب المصاحب شغل جرئ و جدير بالاستماع صوت هالة حلو و تلقائيتها احلي
Post: #50 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-03-2009, 04:14 PM Parent: #42
خدر كيف حالك ياخي (عمر ده) مجننا في كل حته واللبيب بالاشارة يفهم وانت سيد العارفين ================= على الاقل السعودابي ده صديق لطيف
Post: #44 Title: Re: ما بين هالة دهب وشروق ابو الناس البساطة والتكلف .. Author: مريم بنت الحسين Date: 04-02-2009, 08:01 PM Parent: #41
الفاروق تحية.. زمن ما علقت ليك على موضوع.. بالنسبة لهالة.. اعتقد الاغنية الانجليزية بيّنت صوتها أكتر.. يا ريت لو تكتب رأيك فيه بناءاً على الاغنيه دي...أما بالنسبة لأغنيه عُزاز علينا، فهي فعلا جميله بأداءها.. وبقى فيها الكتير من الرقي والاحساس.. ندى القلعة بتديها صبغة بتاعت اغاني بنات كده.. والزوله دي فعلا في عُمان.. لقطته نمرة السيارة، مكتوب فيها عُمان :D..
اما شروق ابوالناس.. فالواحد ما عايز يكسب ذنوب..
*ملحوظة.. والله السعودية دي خلت الزول يبقى متخلف.. انا بتفرج في الكيب، ومستمتعه بيه.. بعد شويه لما جا مشهد المطار.. قلت الناس ديل خالينهم يصوروا كيف في المطار...
Post: #45 Title: Re: ما بين هالة دهب وشروق ابو الناس البساطة والتكلف .. Author: Rawia Date: 04-02-2009, 09:10 PM Parent: #44
Quote: بس مع احترامنا لمن عمل الاغنيه فلحنها ماخوذ بنسبة 97% من اغنيه قديمه بتقول (يامسافر فراقك لي صعيب) والعندو راي غير ده يجيب التسجيل القديم
ماعارفة يا أستاذ موصلي بذكرك للمعلومة دي عاوز تسجل نقطة ضد أولاد دهب(سلبية) ولا شنو على حسب علمنا كلنا الاغنية بتاعة ندى القلعة وكلنا سمعناها منها
Post: #46 Title: Re: ما بين هالة دهب وشروق ابو الناس البساطة والتكلف .. Author: عبد الغفور حسين Date: 04-02-2009, 10:13 PM Parent: #45
ايوة كدا خلى المعلمين واهل الإختصاص يتكلمو الموصلى وطارق بعدين المقارنة فى شنو يعنى ما ممكن نقول ود الامين احسن من وردى شروق وهالة دهب بت حلتنا زمان ( مستقبل واعد ما فى كلام ) تعطيل لى تجربة واعدة بس قدم نقد مؤسس ؟ صفوت صلاح
Post: #47 Title: Re: ما بين هالة دهب وشروق ابو الناس البساطة والتكلف .. Author: ايهاب Date: 04-02-2009, 10:57 PM Parent: #46
بي صراحة الاغنية مبالغه
التحيه لي هاله وزرياب
وبرضو لي شروق
ولي كل من يبدع او يحاول يعمل شي جميل
Post: #48 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-02-2009, 11:16 PM Parent: #45
Quote: ماعارفة يا أستاذ موصلي بذكرك للمعلومة دي عاوز تسجل نقطة ضد أولاد دهب(سلبية) ولا شنو على حسب علمنا كلنا الاغنية بتاعة ندى القلعة وكلنا سمعناها منها
راويه كيف حالك لا ابدا والله لانهم ما الناس اللحنوها ولا هالة ست الاغنية اصل الاغنية اشتهرت بصوت ندي القلعة المسالة بقت نقد وتقييم وتحليل أظن ده ياهو قرايتي للموسيقى من سنة تلاته وسبعين حتى هذه اللحظة لكن ياراويه انتي ليه ماشفتي كلامي الايجابي عنهم؟؟؟؟؟
Post: #49 Title: Re: ما بين هالة دهب وشروق ابو الناس البساطة والتكلف .. Author: حيدر امين Date: 04-03-2009, 01:01 AM Parent: #48
كتب الاخ صلاح ابوديه :
Quote: بدون سيرة شروق أبو الناس .. لأنو سيرتها بتعمل لى حسكنة فى الجاقومة ! اولاد دهب !! إبداع .. إبداع .. إبداع .. والفيديوكليب .. نقول : والله الزولة دى سافرت عديل ! وربنا يكتب سلامتها !
والله انت راجل فنان واحساسك 100% ...اللقطه كانت للحظات وداع حقيقيه هاله بعد قضاء الاجازه مع اهلها فى مسقط والتسجبل فى طريق العوده الى السودان ومن مطار مسقط ( السيب سابقا) فهى طالبه باحدى الجامعات فى الخرطوم وكما قال لى اخى العزيز اشرف دهب (شقيقها الاكبر) حتى اللقطه التى ظهرت فيها لحظات الوداع لم يكن احد يعلم بأن التصوير مستمر وقتها.
وكتب عمر الفاروق :
Quote: البت اسمها هالة دهب .. من الوهلة الاولى البت دي بتدخل القلب بساااطة ما عادية اناقة رايقة ابتسامة غير متكلفة وكليب مقدم بصورة اقرب للعفوية بعيد عن التقليدية وكأنو ما كليب وزي اللي تم تصويره بي واسطة اهلها وهي في طريقها للجامعة في السودان بعد ما قرت الثانوي في الامارات !![/QUOTE]
يعنى عايزين تاكلونا اوانطه؟؟؟ الاستاذ محمد المرتضى قام بالواجب
مسقط تدرِّس والشكر للإمارات
وعلى لسان اشرف دهب هاله لمن جات مسقط كانت بت شهرين بس زرياب دهب لم يشارك فقط بل قام بكل هذا العمل فهو رجل فنان وترقبوه فى قناة هارمونى قريبا
أما شقيقهم الاكبر اشرف والذى كان يتمنى أن يقوم بالرد على كل المداخلات , كلفنى باداء المهمه الى أن يمتلك المفتاح السحرى من الباشمهندس بكرى, فهو رجل فنان واحد المشرفين على الفرقة الفنيه بالنادى السودانى فى مسقط
اللفطة : زرياب دهب على الاورغ فى احدى احتفالات النادى السودانى بمسقط 13/3/2009
اشرف دهب وفى احدى فعاليات النادى السودانى بمسقط
ده كلو عشان نثبت حقنا ,,, لا حولا
Post: #51 Title: Re: ما بين هالة دهب وشروق ابو الناس البساطة والتكلف .. Author: عمر الفاروق Date: 04-03-2009, 07:05 PM Parent: #49
معليش يا جماعة بالرغم من اني بديت ارد بي تسلسل لكن خلوني ارجع للاستاذ الموصلي في حتة النوتة دي .. استاذنا الموصلي :
Quote: داير النوته بنجيبها ليك
بما انك اكدت إنو دي الأغنية نفسها يبقا انا قبلان التحدي .. بس خلينا نتفق على حاجة مهمة في التحدي ده بالرغم من اني متاكد القصة ما تحدي بي المفهوم اياه بقدر ما هي استفادة وإفادة .. اولاً وبعيداً عن موضوع النوتة والشغل العلمي خلينا نجرب الحس والذوق الفني زي ما قال اخونا خدر.. ننزل الاغنية بتاعت يا مسافر فراقك لي صعيب ونطابقها بي عزاز علينا ونخلي الجمهور العااام يحكم عليها قبل ما تنزل لينا النوتة .. لو الناس قالت فعلاً اللحن مطابق يبقا انت في السليم يا استاذنا .. النوتة ممكن يكون كلامك فيها صاح وانا صراااحة ما بفهم في النوتة نوتي ياها انيني الكبار ديل وقبل كده كتبت موضوع عن طارق اللمين في بلدا هيلي انا وكيف انها "مسروقة" من يا مولاي ومقطوعة لي ياني وان كان الناس هاجت في استخدامي لي كلمة " مسروقة " وقتها لكن انا متاكد الجميع كان متفق معاي وفي النهاية طارق اللمين جاب لينا نوتة بالنسبة لي كانت كلام الطير في الباقير .. حتى لو تاكد من خلال النوتة انو الاغنية مطابقة فصدقني يا استاذ فهو قضاء وقدر وغير متعمد لانو الشغل ده ظاااهر عليهو ملحن بي احساس دون التفكير في اغنية مشابهة او لحن مسمكر اغنية اتلحنت بي طبيعتها وبس. رددت اغنية يا مسافر وانا بكتب في كلامي ده ولحددددي اسة ما لقيت تشابه (في الاحساس بي اللحن) وانا مصر على الاضان دي يا استاذ لاني متاكد لو نوتة الكورة حا تكون 9-صفر ليك لكن لو اضنين وشغل بعامات فالكورة 12-صفر لي انا ولو دعمت تيمك بي هديل :) ومع اني ما عايز اخش في الشغل العلمي واعمل فيها بعرف موسيقى واورط نفسي وادقس دقست عمري معاك لكن عندي احساس انو اغنية يا مسافر فراقك لي صعيب فيها شي من ايقاع السيرة وانا بغني فيها حسيت اني بعرض عرضة صقرية وممكن اطلع جلابيتي واتجلد سوطين .. في حين وانا بردد في اغنية عزاز علينا حسيت بيها اقرب لي ايقاع التمتم وبديت اجبجب واقول وانا برقص هااا ..هااا..هااا وانا اهز بي كتفي اليمين واطقطق بي اصابعيني الوسطى والابهام وان كان البت هالة دهب تقلت الايقاع شوية .. عموما يا استاذ الموصلي جيب النوتين واتكلم لينا ومنها نستفيد علميا لكن يبقا الاستفتاء في النهاية استفتاء سمعي بعيدا عن العلمية وما تزعل من كلامي ده ما عشان اقول ليك العلم ضربن ابيهو عرض الحيطة لكن عشان اثبت قصة العفوية ان حدث تطابق ..
تخريمة : ما عارف لكن عندي احساس هدييل المرة دي دقست معاك :)
Post: #52 Title: Re: ما بين هالة دهب وشروق ابو الناس البساطة والتكلف .. Author: عمر الفاروق Date: 04-03-2009, 07:21 PM Parent: #51
Quote: *ملحوظة.. والله السعودية دي خلت الزول يبقى متخلف.. انا بتفرج في الكيب، ومستمتعه بيه.. بعد شويه لما جا مشهد المطار.. قلت الناس ديل خالينهم يصوروا كيف في المطار..
حولاااااااااااااااااااااا يا مريم بت الحسين .. :D:D:D:D:D:D:D:D:D:D:D: ردك بجيهو بعدين لكن والله في الحتة دي باااااالغتي عدييييل كده .. والله ووالله ووالله نففففففففففففففففس الكلام الكنت بقول فيهو لي روحي.. ياخ نحن السعودية دي خلتنا بقينا ناس بيييييض.. والواحد مننا بقا يفكر جااادي يمشي مزارع فقيه ..
Post: #53 Title: Re: ما بين هالة دهب وشروق ابو الناس البساطة والتكلف .. Author: عمر الفاروق Date: 04-03-2009, 07:31 PM Parent: #52
رايوة :
Quote: هالة حلوة وطبيعية ورقيقة
ودي اووول بوابة حا تخش بيها البت هالة لي قلوب الناس .. القبووووووووووول ده .. وده اللي فشلت فيهو شروق ابو الناس وظهرت بي طريقة خلتها تكون منفرة اكتر من انها مقبولة .. الشباب ديل جو في هدوء تااام وبدون شوشرة .. انا براهن عليهم انهم حا يصلو في يوم ما اذا فعلا هم عايزين يمشو في القصة دي وما ماخدنها بس تقضية وقت وهواية من اجل المتعة ..
هواري : ياخ شكرا على الشغل ده ..
Post: #54 Title: Re: ما بين هالة دهب وشروق ابو الناس البساطة والتكلف .. Author: علاء الدين يوسف علي محمد Date: 04-03-2009, 07:42 PM Parent: #53
Quote: الشباب ديل جو في هدوء تااام وبدون شوشرة ..
أقسم بالله يا عمر كان عندنا فنان إسمو محمد بِستِم تخيل من الإسم دة شاكِلة الفن ممكن تكون شنو الزول دة ممكن أهضِمو لكن شروخ دي لأ لأ لأ
Post: #59 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-03-2009, 11:04 PM Parent: #54
Quote: لكن شروخ دي لأ لأ لأ
علاء حيجي يوم تحاول تمسح الكلام ده قبل الارشفة القادمة وفي الحالة دي انا بنقذك وفي حالة الارشفة الا بكري غايتو هسع انا زعلان ليك
Post: #55 Title: Re: ما بين هالة دهب وشروق ابو الناس البساطة والتكلف .. Author: عمر الفاروق Date: 04-03-2009, 07:42 PM Parent: #53
يا جماعة هوووي يا ناس عمان الفي المنبر: غايتو كان بتعرفو الشباب الحلوين ديل قولوا ليهم عمر الفاروق قال عايز يصاحبكم ويتسلبط فيكم .. لقيت لي واسطة قوية تلميني فيهم لكن انا عايزا تجي منهم :) وقولوا ليهم عمر الفاروق قرر يتبناكم اسفيريا:) وهيييييييع ابوك يا محمد وكييييييية في هديل..
Post: #56 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-03-2009, 08:32 PM Parent: #51
Quote: معاك لكن عندي احساس انو اغنية يا مسافر فراقك لي صعيب فيها شي من ايقاع السيرة وانا بغني فيها حسيت اني بعرض عرضة صقرية وممكن اطلع جلابيتي واتجلد سوطين .. في حين وانا بردد في اغنية عزاز علينا حسيت بيها اقرب لي ايقاع التمتم وبديت اجبجب واقول وانا برقص هااا ..هااا..هااا وانا اهز بي كتفي اليمين واطقطق بي اصابعيني الوسطى والابهام وان كان البت هالة دهب تقلت الايقاع شوية
كلامك هنا صاح ميه الميه لو صبرت كنت قلتو ليك الاختلاف في الضرب الايقاعي اما متن اللحن فمازلت عند رايي وبجيب ليك النوت بعد اكتبها عموما عايزك مقدما تعرف انو ايقاع الدلوكة أو العرضة هو تزاوج بين الميزان الرباعي والثلاثي بينما ايقاع التمتم ثلاثي قح اذا فبينهما مشترك الجانب الثلاثي ايقاعيا =============================== بالنسبة للملحن لاغنية عزاز ليس عندي شك مطلقا في حسن النية لديه وتوارد الخواطر ======================= بس حبيت انبهكم بالا يعميكم الفرح عن الحقيقة ======================= بالمناسبة الاغنية السودانية التقليدية مشربكة شربكة الدنيا والعالمين ودي شرحها داير ليهو جيه للرياض تحياتي
Post: #58 Title: Re: ما بين هالة دهب وشروق ابو الناس البساطة والتكلف .. Author: حبيب نورة Date: 04-03-2009, 08:40 PM Parent: #56
البوست سخن بصراحة كدة
لي فووووووق
Post: #57 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-03-2009, 08:39 PM Parent: #44
Quote: ما شروق ابوالناس.. فالواحد ما عايز يكسب ذنوب..
ده كلام مابشبهك يامريم أخير كان تفولي كلامك
Post: #60 Title: Re: ما بين هالة دهب وشروق ابو الناس البساطة والتكلف .. Author: rosemen osman Date: 04-03-2009, 11:20 PM Parent: #57
hala is a mazing, i like her
good luck to both of them, hala and shorog
regards
رجعنا بالعربى شروق فنانة مجتهدة ولها جمهورها ..استمعت لها فى أغنية خليجية أداءها فيه أفضل بكثير من السودانى , وهذا رأى مستمع عادى هالة تدخل الى القلب ..وان كانت الأغنية المرفقة ليست حكم..الصوت فيه شغل و الغناء بطبقة صوتية ووتيرة واحدة من غير تغيير
أتمنى التوفيق لكلاهما
التوقيع.. مستمع عادى
Post: #61 Title: Re: ما بين هالة دهب وشروق ابو الناس البساطة والتكلف .. Author: هشام كمال Date: 04-04-2009, 06:23 AM Parent: #60
Quote: يا جماعة هوووي يا ناس عمان الفي المنبر: غايتو كان بتعرفو الشباب الحلوين ديل قولوا ليهم عمر الفاروق قال عايز يصاحبكم ويتسلبط فيكم .. لقيت لي واسطة قوية تلميني فيهم لكن انا عايزا تجي منهم :) وقولوا ليهم عمر الفاروق قرر يتناكم اسفيريا:)
تدفع كم؟
Post: #62 Title: Re: ما بين هالة دهب وشروق ابو الناس البساطة والتكلف .. Author: Yassir Tayfour Date: 04-04-2009, 06:52 AM Parent: #61
ود الفاروق.. إنت حقار يا قريبي.. تكلفة فيديو هالة أقلّ من تكلفة make-up شروق.. ___ next، حتى الآن لا شروق ولا هالة ما سمعت ليهن عمل أقنعني؛ يا نوبي الأمارات مافيها حاجة تانيَّة؟؟
Post: #63 Title: Re: ما بين هالة دهب وشروق ابو الناس البساطة والتكلف .. Author: علاء الدين يوسف علي محمد Date: 04-04-2009, 10:45 AM Parent: #62
Quote: علاء حيجي يوم تحاول تمسح الكلام ده قبل الارشفة القادمة وفي الحالة دي انا بنقذك وفي حالة الارشفة الا بكري غايتو هسع انا زعلان ليك
أستاذنا الكبير يوسف الموصلي تحيات و تقديرات ياخي أنا مُحتار أكضِب إضنيني ولا أصدِّق يوسف الموصلي أنا مُقتنِع إنو الموصلي رجل قامة في مقامات الموسيقى و عِلمها لكن إضنيني ديل ثقتي فيهن عمياء ما حصل عجبن فنان لقيت الناس قالوا الفنان دة كعب ما حصل إتكيفن ليهن لي لحن لقيت الناس قالوا اللحن دة بطّال تعرِف يا موصلي معلومة جديدة يمكن أول مرة تسمعة مني أو عني أنا ما درست موسيقى لكن بالفطرة بعزف الآلات دي الفلوت و دة البديت بيهو العود و دة الإستمريت فيهو كتير الأورغن و الماندولين و الجيتار و الطمبور يعني أذني موسيقية بحتة تميز الخبيث من الطيِّب و بصراحة بصراحة فن شروخ دي ما لقيت في أي طِيِب فن مُتكلِّف من موديل إعلانات أو عرض أزياء الرأي دة شخصي جداً ولا أظن إنو ممكن أندم عليهو يوم من الأيام مع خالص الود و التقدير ليك
Post: #64 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-04-2009, 03:16 PM Parent: #63
الحبيب علاء الدين اولا بسطتني جدا بكشكولية هوايتك تسلم ولكن قطعا لن اطالبك بتغير ذوقك تجاهها ولكني اعتبرت تعبيرك لعدم اقتناعك بها فيه نوع من القسوة التي لاتتناسب مع يد تعزف تلك الالات الجميلة حب الناس مذاهب انا في بيتي بختلف مع اولادي وزوجتي حول فنان ما او حول اغنياتي ومرات القاهم بسمعو في فنان انا مكجنو بس مابصرح بذلك احتراما لذوقهم وبما انك رجل علاقتك بالكومبيوتر وفنياته وثيقة وبالمعازف لصيقة
بس اطالب ان تعطي (حق الاجتهاد) مايستحق وان لم يبلغ الوصول لاذنكم المعتبرة انا بحب شروق لصوتها الذي يطربني ولا يهمني ماذا تلبس او بماذا تتمكيج كما ان احترام شروق للناس وتادبها معهم دون فرز يجعلني اقف لها احتراما رافعا قبعتي تحياتي
Post: #65 Title: Re: ما بين هالة دهب وشروق ابو الناس البساطة والتكلف .. Author: Raja Date: 04-04-2009, 03:45 PM Parent: #64
عمر وضيوفه أجمعين.. ســــــــلام
Quote: ما بين هالة دهب وشروق ابو الناس البساطة والتكلف
بصراحة الخطير أخو هالة القاعد يشيل في الأغنية بتاعت عزاز علينا.. لوووووووول
Post: #66 Title: Re: ما بين هالة دهب وشروق ابو الناس البساطة والتكلف .. Author: وليد محمد المبارك Date: 04-04-2009, 04:23 PM Parent: #65
كلامك صاح يا رجاء
اخطر زول في الكوم ده كله زرياب دهم
بالمناسبة زرياب عمل كل شي في اغنية عزاز علينا اخراج ومونتاج وتوزيع الخ الخ
حتى الغنية القاتو عليها انقليزي ديك سواها لي الهندية الشغالة معاهم لانها اهدتو الجتار الاشتغل بيه عزاز علينا
هالة ما ساهلة لكن برضو هي الحلقة الاضعف في الكلب بتاع عزاز علينا
شروق ابو الناس الناس المتخصصين قالو كويسة لكن المستمع السوداني ما قدر يقبلها احتمال عشان ثقافتها اغلبها خليجية عان كده بتكون مرتاحة في اللون الخليجي وما قدرت تهبش مناطق الراحة في زوق المستمع السوداني والمستمع السودان زو سخيف وسميع جيد وغير مجامل
كل الود
Post: #67 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-04-2009, 04:46 PM Parent: #1
الي الصديق عمر والمشاركين المحترمين انتهيت من كتابة النوتتين وتسجيل الادويو الخاص بهما ولانني لا املك اسكانر ساذهب الي احد المحلات وستفتح متآخرة لاطبعها لانني حولتها الي PDF حبيب نوره لك التحية والكلام دخل الحوش والتحية منقولة وبكل الاحترام للاخت راوية تحياتي
Post: #68 Title: Re: ما بين هالة دهب وشروق ابو الناس البساطة والتكلف .. Author: مريم بنت الحسين Date: 04-04-2009, 06:32 PM Parent: #67
عمو موصلي تحية... حقيقة انا ما عندي اي اجندة ولا عداء شخصي مع شروق.. هي طارحه نفسها وفنها للناس.. واحنا من حقنا نعجب بيها او لأ... انا بحب ود الامين جدا.. لكن ممكن اديك كم اغنيه كده ما بطيقهم... ما اعتقد اني اجرمته في حقها.. وهي مفروض تتوقع النقد.. على الرغم من اني اتغاضيت عن اني ابدي رأيي بالتفصيل...
اتمنى انك تدي شروق فرصة عشان تكبر بنقد الناس ليها، بدل ما تكون over protective كده..ولا رأيك شنو؟
Post: #70 Title: Re: ما بين هالة دهب وشروق ابو الناس البساطة والتكلف .. Author: Kostawi Date: 04-04-2009, 07:34 PM Parent: #68
Quote: شروق ابوالناس....هاله دهب..سودانيات يعملت بكل اجتهاد من اجل تقديم اغنيات بشكل مختلف ..عن بعضهن.. لكل واحده استايل..ولونيه و ....جمهـــــــــور وفي الاخر... حب الناس مذاهب.. اتمني لهن كل التوفيق
Post: #74 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-04-2009, 10:12 PM Parent: #68
Quote: عمو موصلي تحية... حقيقة انا ما عندي اي اجندة ولا عداء شخصي مع شروق.. هي طارحه نفسها وفنها للناس.. واحنا من حقنا نعجب بيها او لأ... انا بحب ود الامين جدا.. لكن ممكن اديك كم اغنيه كده ما بطيقهم... ما اعتقد اني اجرمته في حقها.. وهي مفروض تتوقع النقد.. على الرغم من اني اتغاضيت عن اني ابدي رأيي بالتفصيل...
اتمنى انك تدي شروق فرصة عشان تكبر بنقد الناس ليها، بدل ما تكون over protective كده..ولا رأيك شنو؟
بت اخوي كلامك ده هو الكلام السمح والتوضيح ده مقنع ونص وخمسه لذا طالما ان نقدك يبني فلا غضاضة في ان تكتبيه اما نقد (ضربوا رماه) فهو يجرح الشعور وحاشام من ذلك النقد هو ليس الهدم وانما هو الذي يبني وذلك بتقفيل منافذ العيوب والتنبيه اليها ولكن ليس بالحفر فيها تمام يابتنا
Post: #69 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-04-2009, 07:15 PM Parent: #1
دي النوت ياعمر والازرق بيوضح التظابق والبمبي بوري التنوع النابع من التطابق
Post: #71 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-04-2009, 07:35 PM Parent: #69
شكرا للصديقين عمر سعد وفهمي فهما قد اخبراني ان هذه اللنكات لا تفتح وبطريقة ما تفتح ايميلي
ليت بكري يوضح لنا ما بالامر
Post: #72 Title: Re: ما بين هالة دهب وشروق ابو الناس البساطة والتكلف .. Author: Kostawi Date: 04-04-2009, 07:51 PM Parent: #69
up
Post: #73 Title: Re: ما بين هالة دهب وشروق ابو الناس البساطة والتكلف .. Author: علاء الدين يوسف علي محمد Date: 04-04-2009, 08:43 PM Parent: #69
Quote: بس اطالب ان تعطي (حق الاجتهاد) مايستحق وان لم يبلغ الوصول لاذنكم المعتبرة انا بحب شروق لصوتها الذي يطربني ولا يهمني ماذا تلبس او بماذا تتمكيج كما ان احترام شروق للناس وتادبها معهم دون فرز يجعلني اقف لها احتراما رافعا قبعتي تحياتي
أستاذنا الموصلي إحترامي أهة شفتة الفنان إحترامو لجمهورو بيبدأ من لبسه و مظهره و طريقة أداءه روبي ليه نجحت مع فئة معينة من شريحة الشباب لاحظ فئة من شريحة واحدة بس لو كان الجمهور لبناني كان قلنا معليش لكن الجمهور سوداني دة غير إنو حقيقة التطريب في صوتها منعدم تماماً مافيهو شيء بيجذب أو بيلفت يعني عندك محمود (حوتة) أنا ما بحب مظهرو و لا طريقة حياتو الشخصية اللي بتنعكس على حياتو الفنية طبعاً لكن ما بقدر أبخسو حقو إنو صوت جميل و مميز يعني لمن تسمعو بتعرف إنو دة محمود نفس الشيء الفنانين الكبار الواحد من وين و وين تسمعو بتعرِف دة منو أصوات ذات بصمة الزولة دي لا بصمة لا يحزنون صوت أقلّ من عادي لو سمعتو مليون مرة إلا تسأل دي منو ياخ؟ و بي عدم إرتياح كمان
Post: #75 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-04-2009, 10:24 PM Parent: #73
Quote: بس اطالب ان تعطي (حق الاجتهاد) مايستحق
مامشكلة ورايك الشخصي فوق روسينا وبلا تردد لكن الحتة الفوق دي ليها احترامي وشروق عندها معجبين كثر او قليلين يجب ان نعطيهم حقهم من الاحترام ارايهم ايضا وذلك بان يكون راينا معبر عنه بكلمات تنم علي احترام راي الغير مثلا بدل كلامك ده
Quote: دة غير إنو حقيقة التطريب في صوتها منعدم تماماً
كان ممكن يكون (شروق دي صوتها مابيطربني) آما بالطريقة اياه فاننا سنطالبك باثبات ـلك علميا ولا اعتقد ان جل الصارخين هنا يستطيعون ذلك ولان مقدراتك من هذه الزاوايه مثل مقدرات يوسف الموصلي في هندسة الكومبيوتر بتاعتكم التي انتم من نطاسييها وفي اليد الاخري انا استطيع علميا وتشريحيا ان اثبت عكس مقولتك تماما وهنا يآتي التقاطع ومفترق الطرق بين المزاج الشخصي والتحليل العلمي مع كل الاحترام لراييك والتقدير لشخصك
Post: #76 Title: Re: ما بين هالة دهب وشروق ابو الناس البساطة والتكلف .. Author: إبراهيم عبد الحليم Date: 04-04-2009, 11:09 PM Parent: #75
أخى عمر الفاروق تحية رغم عدم المعرفة بيننا أخى الموصلى تحية إسترعى إنتباهى هذا الحوار الدائر مما جعلنى أستمع بعمق للأغانى المطروحة وهنا أريد أن أبدى بعض الملاحظات التى أتمنى أن تثرى الحوار الدائر وليس قصدى إبداء رأى مع أو ضد فالحكم للجمهور وكذلك تحية للزميلتين هالة وشروق. تجربة عزاز علينا يبدو لى إنها تجربة تجديدية تستسيغها من البداية لحلاوة وطلاوة الجيتار حتى عندما يلعب الجيتار صولو عزاز علينا إلى آخره. المكساج بتاع الأغنية واضح إنها متقدمة وعلى نظام التراكات الجيتار بيلعب عدة تراكات بمعنى عدة مرات. الكورد والكورال مصمم بطريقة غربية بنكهة سودانية وبصراحة هذه المدرسة أنا شخصيا من أعضائها والمسوقين لها ممكن يكون السبب لأننى عايش فى المانيا . صوت هالة كذلك به مؤثرات صوتية كالريفيربReverb الواضح مع الديلاىDelay .صوت الفنانة مأخوذ مرتين وبيكرر مرتين ثلاث فى الأماكن التى بها ضعف مع تشتيت الصوت وهذا حتى لا يشعر المستمع بأى خلل فى الصوت. أداء هالة كان جميل وفى الأغنية التى بالأنجليزى كان أدائها أجمل. الأغنية فى وجهة نظرى تظل عبارة عن تجربة فقط لا غير لأن اللحن أساسا ناقص وكله عبارة عن لزمتين بمعنى جملتين موسيقيتين هما عزازعلينا شال نوم عينينا هذه الجملة الأولى فراقهم جبرى لالا ما بايدينا هذه هى الجملة الثانية الأغنية كلها مكونة من هذين الجملتين. كذلك أنا مفتقد الأيقاع فى هذه الأغنية وكنت منتظر طوال الوقت دخول الأيقاع والباص بلا جدوى وبالتالى تظل الأغنية فى نظرى مجرد فكرة أو مشروع أغنية. الفيديوكليب أكثر من رائع وحقيقى جميل. د. إبراهيم عبد الحليم
Post: #77 Title: Re: ما بين هالة دهب وشروق ابو الناس البساطة والتكلف .. Author: إبراهيم عبد الحليم Date: 04-04-2009, 11:53 PM Parent: #76
بالنسبة لأغنية الفنانة شروق تجد اللحن هنا مكتمل تماما وبه عدة جمل موسيقية ما عديتها والله لأن الأغنية طويلة حوالى10 دقائق ولكن بكل حال أكثر من 4 جمل. اللحن به نكهة شرقية حلوة راعت ميول الفنانة شروق. الأيقاع متنوع وبكل حال ليس إيقاع إلكترونى . اللحن واضح عقد جلادى ويتطلب هنا عدة أصوات وكذلك تنوع صوتى من الحاد إلى الغليظ. الشئ الثانى المكساج ما عجبنى ابدا وهذا سبب بعض الضعف فى الأغنية وكان مفروض يشيل صوت شروق فى بعض المناطق ويدعمه بصوت ثانى ولو من شروق نفسها. النقطة الثالثة الأغنية طويلة 10 دقائق وبدون تعدد صوتى سيكون من الصعوبة المحافظة على السلاسة. من الواضح كذلك إن الفنانة شروق تتمتع بحس ثقافى عالى جدا وأكيد هى ستكون أقرب شخص لتوصيل الأغنية السودانية للعالم العربى وفى نظرى هى لم تجد اللحن المناسب الذى يمكن أن يختبر أمكانياتها الصوتيةالمدفونة ويخرجها لحن كما بشير عباس. صوت كورال الأطفال لذيذ جدا مزيد من التقدم لشروق و هالة مزيد من المتعة من خلال الأغنية السودانية
إبراهيم
Post: #78 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-05-2009, 01:12 AM Parent: #77
عزيري ابراهيم شكرا لك وهذا هو النقد الممتاز اتضامن معك في تضامنك مع شروق وهالة وتمنياتي لهما دوما بالتقدم
Post: #79 Title: Re: ما بين هالة دهب وشروق ابو الناس البساطة والتكلف .. Author: علاء الدين حيموره Date: 04-05-2009, 02:51 AM Parent: #78
انا حا احاول اسمع لشروق مجاملة لصديقنا الموصلي واحتراما لزميل البورد الدكتور المعز عمر
عشان خاطر عين تكرم الف عين
Post: #82 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-05-2009, 04:23 AM Parent: #79
Quote: انا حا احاول اسمع لشروق مجاملة لصديقنا الموصلي واحتراما لزميل البورد الدكتور المعز عمر
عشان خاطر عين تكرم الف عين
والله ما قصرت ياود حلتنا بس عشان اخوك هو مدرس التذوق عارف انو في اضنين كده بتجي في اللفة وانت جاي جاي معاك والزمن طويل
Post: #80 Title: Re: ما بين هالة دهب وشروق ابو الناس البساطة والتكلف .. Author: دينا خالد Date: 04-05-2009, 04:02 AM Parent: #76
Quote: أنا ما درست موسيقى لكن بالفطرة بعزف الآلات دي الفلوت و دة البديت بيهو العود و دة الإستمريت فيهو كتير الأورغن و الماندولين و الجيتار و الطمبور
واووووووووع البغنى يكون عمر ؟؟ صاح بتعزف لكن بتعزف كيف ؟ دى الا نسمعك واستاذ الموصلى يقوليك ! اكيد دى ذى عرفتى للدرمز !
بالله يا ناس الفطرة ( عمر وعلاء ) نموذجا اقيفو بعييد.. نحن ما ناقصنكم .. يعنى انتو قايلين لسانكم دا ببقى ليكم عزف ؟ خرمتو اضنيننا .. الواحد لما يخاف لما يسمع بمواهبكم دى .. كامل تضامنى مع اهل بيتكم لو الالات دى كلها بتتعزف هناك !! بيظل الما درس ما درس سمح ؟؟؟
ـــــــــــــــ استاذ الموصلى ؟ لقيتك بالك طوييييييييل ! عمر ؟ ما تتلح البت دى كلمتك ! علاء ! ابقى على الطمبور ونزل لينا باقى الرووم بتاع مروى دا .. قال اورغن وجيتار قال !! ياخ ارحموا من فى الارض يرحمكم من فى السماء ..
Post: #81 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-05-2009, 04:18 AM Parent: #80
دينا كيفنك زمان قبل الزواج والدة زوجتي حاجه مدينه الله يرحمها قالت لزوجتي سكينه يوسف ده بحر ابقي عليهو عشره ================== اها لمن يغالطوني في حاجه متآكد منها ببقي محيط عديل او لايوق جدا بلغة اخري ضحكه ليك يادينا مع التحية والتقدير وتسلمي
Post: #83 Title: Re: ما بين هالة دهب وشروق ابو الناس البساطة والتكلف .. Author: mohamed elshiekh Date: 04-05-2009, 06:21 AM Parent: #81
يا حليل حنا ن النيل ..
عمر كيفك والاسرة ..
تحايا خاصة لدكتور ابراهيم ... كلامك جميل وشغل محترفين....
تحيه اخرى لدكتور الموصلى ..
وفعلا بالك سلبه..
Post: #85 Title: Re: ما بين هالة دهب وشروق ابو الناس البساطة والتكلف .. Author: MOHAMMED ELSHEIKH Date: 04-05-2009, 08:16 AM Parent: #83
عندما كنت استمع للأبنه هالة ابنة الأستاذ القامة دهب خيري في النادي السوداني بمسقط ولأول مرة يظهر أداءها بصورة مبهرة كان في مناسبة اسبوع المرأة2005م عندما قادت الكورال في أغنية كابلي" أي صوت زار بالأمس خيالي" و بثقافتي الموسيقية المتواضعة تنبأت لها بمستقبل غنائي باهر وقلت كلامي دا للإخوان هناك (ناس طراوة الله يطراه بالخير) و فعلا لم تخيب ظنى وكان من ورائها شقيقها الفنان الأستاذ اشرف(الزول دا مالو شيب كدى؟) ومجوعة شباب النادي النشط .هالة مازالت في بداية حياتها الجامعية يعني الزمن داك كانت في الثانوي مما ينبيء لها بمستقبل باهر. كذلك لا يفوتني ان اشيد بأبناء الأستاذ شوقي الذين أيضا اثرو ا الحياة الفنية في تلك الفترة بالنادي حيث كانوا بالعزف وراء كل من ظهر من فناني النادي و زوار مسقط وكان لأكورديون أستاذ شوقي القدح المعلى في رفع راية النغم بالنادي وعلى ذكر هذا الأكورديون احى الباشمهندس ناجي ابوزيد. أتمنى أن أرى قلم الأخ اشرف دهب في هذا المنبر و يا محمد المرتضى وود القرشي و ود شيقوق شدو حيلكم
محمد الشيخ بالCAPITAL يحي محمد الشيخsmall
Post: #87 Title: Re: ما بين هالة دهب وشروق ابو الناس البساطة والتكلف .. Author: Hussein Mallasi Date: 04-05-2009, 08:27 AM Parent: #83
Quote: اما شروق فبعد سماعي لها في بين العمل والبيت لشاعرنا الكبير محجوب شريف ولحن االفنان المجدد حمزه سليمان فهي تسير في طريق الاحترافية والاتقان
Post: #92 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-05-2009, 02:28 PM Parent: #87
صديقي اللدود ملاسي لك الشكر الا تتفق معي بانه يجب علينا ان نتعامل مع الوافدين الجدد بروح جديدة ونفتح لهم المجال ونترك لجهودهم والزمن الحكم علي وجودهم من عدمه؟
Post: #86 Title: Re: ما بين هالة دهب وشروق ابو الناس البساطة والتكلف .. Author: علاء الدين يوسف علي محمد Date: 04-05-2009, 08:19 AM Parent: #80
أستاذنا الموصلي تحياتي و نأسف لتقاطع الطرق في هذه الما مُطرِبة عموماً رأيك العلمي لا يستهان به لكن برضو أضاني ما بقدر أخالِفة مع التحايا
--------------------------------
دينا خالد شابكانا طلبوني خطبوني قالوا باكين فيني هسي تلقاك إنتي من سكة و هيلاري كلينتون من سكة تانية الخوف والله ناس مروي ذاااااااااااتم يقول لععععععععععععععععععععععععععع دايرين نقرأ
Post: #88 Title: Re: ما بين هالة دهب وشروق ابو الناس البساطة والتكلف .. Author: إبراهيم عبد الحليم Date: 04-05-2009, 10:35 AM Parent: #86
الأخوان عمر والموصلى تحية حارة هناك كذلك نقطتان مهمتان أولا الحديث عن صوت كعب أو صوت فارق هذا هو المصطلح الأصح بمعنى أن تكون بجهة والموسيقى بجهة كما إصطلح عليه الناس. طيب هناك فنانون وفنانون كبار صوتهم فارق ما فى داعى لذكر الأسماء ولكنهم إستطاعوا أن يثبتوا أنفسهم فى الساحة وينالوا إعجاب الجماهير. لو إستمعت مثلا اليوم لزيدان أو محمد ميرغنى ستجد ما ذكرت من فرق صوت واضح فعامل الزمن لعب دور على شيخوخة الصوت أستمع لشريط الشفيع بصوت زيدان والخالدى لتتأكد من كلامى. بالرغم من ذلك غفر لهم الجمهور ذلك نسبة لماضيهم العريق وعطائهم الثر وشوف زيدان زمان وصوت العندليب الأسمر وقارنه اليوم. الفنان أكثر من صوت هو رسالة متواصلة وأداء الفنان وذكائه فى توصيل مادته فى نظرى هذا أهم شئ.
إبراهيم
Post: #89 Title: Re: ما بين هالة دهب وشروق ابو الناس البساطة والتكلف .. Author: إبراهيم عبد الحليم Date: 04-05-2009, 10:52 AM Parent: #88
النقطة الثانية إن الفنانة شروق فتحت لينا باب كثير ما كنا نتمناه ونافذة نطل بها على العالم العربى وشروق كذلك متحدثة لبقة ومثقفة جدا أحسن من كثيرون وبغض النظر عن كل شئ لابد من دعمها وتحسين صورتها التى هى فى النهاية صورتنا نحن وحتى لا نكرر تقصيرنا مرة آخرى كما فعلنا مع تجربة فنانا الكبير سيد خليفة سفير الأغنية بلا منازع. الفنان الحقيقى بيبداء صغير و يكبر مع الأيام. إبراهيم
Post: #90 Title: Re: ما بين هالة دهب وشروق ابو الناس البساطة والتكلف .. Author: fadlabi Date: 04-05-2009, 02:18 PM Parent: #89
أنا غايتو بشجع الدهب أولاد دهب عيني باردة عليهم و الإنجليزي جميل و دمهم خفيف و اللمسة الهندية دي نار بس و مضحكة شديد التحية للمجتهدين عموما و السمع مزاجات
Post: #91 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-05-2009, 02:22 PM Parent: #89
Quote: الفنان الحقيقى بيبداء صغير و يكبر مع الأيام.ÅEÑCåíã
ده الكلام الصاح فالفنان لايتم الحكم عليه من الوهلة الاولي الفان يقاس بما اعطي بعد مرور فترة معقولة تمنياتي لهالة بمستقبل باهر ولشروق بمواصلة الابداع والاستماع للنقد الباني باذن صاغية كما اعرفها وتترك الزبد للاهوية
Post: #93 Title: Re: ما بين هالة دهب وشروق ابو الناس البساطة والتكلف .. Author: عمر الفاروق Date: 04-05-2009, 02:43 PM Parent: #91
الاستاذ الموصلي : الرد ده جا فوق وهو محلو هنا ..:
استاذنا الموصلي: اولاً مشكور شديد على الاجتهاد والتعامل بجدية في توصيل الافكار مدمغة بي الادلة والبراهين وده بيدي إحساس زول فنان يقدر مهنيته وعمله .. بالنسبة لي انا طبعاً الاسهل اني استمع للعملين وهم معزوفات على اساس النوتة بتاعتك لانو طبعا نوتتكم دي زي البقرا في حروف صينية ما فاهم اي شي لكن من التلوين بتاعك ده اديتني احساس انو ده مش تطابق ده ده تناحر عدييل كده الشي كللللو لبني ياخ :) ما عايز اقول ليك ما حا اقتنع يا استاذ لكن لسة انا مرجعيتي في الحتة دي السمااااع وده ما معناها انكار للعلمية .. شغلي وشغلك الهنا ده زي المقارنة بين المقاول والمهندس المقاول زول عنقالي ساي يعتمد على الخبرة والحاجات الما علمية في البناء والمهندس بيحبا ليك بي جا وجتا وظا وانا زول عندي اضاني دي وانت زول مع الاضان قاريها .. لو قعدت اغالطك بعد ده بكون زول عايز يغالط والسلام لكن بفضل لو في زول بيدعم موقفي ده ويجي عشان يناقشك في حتة النوتة دي لانو انا حدي معاك اغني ليك عزاز علينا واغني ليك يا مسافر واوريك انهم ما واحد سمعيا.. عندنا في الكورة في لاعب لمن يجيبوهو ويجلط والجمهور يجووط المدرب بيقول اصبرو عليهو لكن الجمهور لماااح بيفهم منو الممكن تصبر عليهو ويجي منو ومنو الظاااهر ما عندو لمسة للكورة وان كان المدرب مصر عليهو .. ممكن علميا يكون كلامك صاح وانك شايف في شروق حاجات انت قريتا لكن صدقني الجمهور صعب عليهو يفهم الكلام ده ويصبر عليها لانو شروق من لمستها ظاهر ضعف امكانيتها الصوتية .. والله يا موصلي ما كلام مكابرة لكن بالجد قاعد احتار لمن تقول ولشروق جمهورها ومحبيها وانا ما عارف تعريف الجمهور عندك كيف هل اي عدد لم يتجاوز المية او الخمسين ممكن يكون جمهور ؟؟ جمهور عندها ناسها ممكن لكن جمهور العوام شروق فشلت في انها توصل ليهو صوتها .. شروق بتقدم فن محترم لا جدال ولا غلاط .. شروق بتتعامل مع ملحنيين وشعراء وفنانين كبار لا غباااار.. لكن ده ما كافي لي انها تكون فنانة .. تحياتي..
Post: #94 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-05-2009, 03:06 PM Parent: #93
Quote: ممكن علميا يكون كلامك صاح وانك شايف في شروق حاجات انت قريتا لكن صدقني الجمهور صعب عليهو يفهم الكلام ده ويصبر عليها لانو شروق من لمستها ظاهر ضعف امكانيتها الصوتية .. والله يا موصلي ما كلام مكابرة لكن بالجد قاعد احتار لمن تقول ولشروق جمهورها ومحبيها وانا ما عارف تعريف الجمهور عندك كيف هل اي عدد لم يتجاوز المية او الخمسين ممكن يكون جمهور ؟؟ جمهور عندها ناسها ممكن لكن جمهور العوام شروق فشلت في انها توصل ليهو صوتها .. شروق بتقدم فن محترم لا جدال ولا غلاط .. شروق بتتعامل مع ملحنيين وشعراء وفنانين كبار لا غباااار.. لكن ده ما كافي لي انها تكون فنانة .
ابو عمير طبعا موضوعي هنا ما مغالطة بس لاني حاسس انو حسك السماعي عالي فعاوز اختك في مناطق انت مالمستها وعاوز الناس الكرام المشاركين هنا وبنحترمهم كلهم حتي الناس الذين شطحوا بعيدا وبحماس منقطع النظير يفهموا المسآلة بطريقة علمية دون المساس باحساسهم ومزاجهم فلايجب التدخل في مزاج الناس وذوقهم اولا شروق لو عندها مستمع واحد فهذا جدير بالاحترام< في فنانين زمان الناس ما طايقه اعمالهم واتي وقت لاحق واصبحوا عباقرة زمنهم بينما انتحي مجايليهم جانبا وبقناعات الحداثة انت تعرفت علي الفرق الذي اعطاك انطباع الاختلاف بين اللحنين الا وهو (الضرب الايقاعي) بين الدلوكة آو العرضة - وبين التمتم والاختلاف في الضرب الايقاعي يحرك الانغام قليلا من اماكنها فيعطي احساس مختلف بعض الشي اما الاختلاف في بعض النغمات فهو اشبه بالاختلاف بين مطرب واخر في التغني فيعض المطربين يلتزمون بحرفيةاللحن والبعض الاخر ينوعه لزوم التطريب فيذهبون بنغمة الي الاعلي في حين انها كانت تتجه الي الاسفل والعكس مثال قسم بي محيك البدري بين وردي وكرومه او طريقة الحقيبة ما يهمني هنا هو اثارتك للنقاش حول عمل ما هو جدير بالاحترام والتقدير وشروق ستشرق قطعا اذا نظرت الي نقدها كما تعودناها بقلب مفتوح حتي ذلك النوع من النقد الذي يكسوه الشطط تحياتي ومحبتي الاخوية ملحوظة فكر فيما قلته لك وعد واستمع الي اللحنين
Post: #95 Title: Re: ما بين هالة دهب وشروق ابو الناس البساطة والتكلف .. Author: Elmuez Date: 04-05-2009, 03:41 PM Parent: #94
شغل جميل , شكرا لآل دهب الفكرة حلوة , الجيتار فاخر , و هالة إحساسها جميل
بالنسبة لي شروق فهي تبدو في الفيديو أعلاه أكثر احترافية من هالة و صوتها جميل شروق , و مغنية واعدة ,
بس تعرفي يا شروق أهلك السودانيين ديل ناس انطباعيين بقيموا الفنان بي جوانب و زوايا عديدة خلاصتو: المكياج الكثيف غير محبذ في السودان , أنا عامل لي "بشاورة" خاصة بي مكياج زوجتي بيجاي بستعملها في اللحظات الأخيرة لما نكون طالعين ! بعدين السودانيين بيقبلوك أكتر لما يحسوا إنك منهم في المظهر و المخبر "إستايل الغناء المتأثر باللونية الخليجية" عشان كده ندى القلعة لاقية قبول كبير لأنها رغم الخموم و الديكور الكتير لكنها متسودنة حد حبها لي بطان الجعليين !
ما كان يجب أن يتم "تسويقك" بي صورة صارخة كما حدث و إنما من خلال أعمال و فيدوهات فنية تقدم للجمهور السوداني ما أكتر .. وجود د. معز معك في كل الحلقات باستمرار بيدي انطباع بأنك مغنية "وصفة
صحية" أو فنانة عن وزارة الصحة .. يعني تسويقك ما كان يجب أن يتم عن طريق طبيب رغم أنه شاعر .. ده برضو انطباع زي ما قلت ليك قبيل ..
بعدين نحن السودانيين دائما بنقيم الأشياء عن طريق "المقارنة" و ده خطأ عظيم , مش عمر الفاروق براهو , إنما كلنا و في كل شئ !!
لكل مغني و مغنية فنه و فنها و إحساسه و إحساسها , حقو نسمع كل زول براه ولا شنو !
شكرا لعمر الفاروق ..
Post: #96 Title: Re: ما بين هالة دهب وشروق ابو الناس البساطة والتكلف .. Author: عمر الفاروق Date: 04-05-2009, 06:05 PM Parent: #95
الاخوة المتداخلين : تحياتي وشكراً لإثراء البوست بالراي والراي الاخر.. الاستاذ ابراهيم مشكور على الاراء وان اختلفت معك في بعضها .. وعشان اجيكم انت والاستاذ الموصلي معليش حا استخدم لغتنا بتاعت الكمبيوتر زي ما الاستاذ الموصلي استخدم لغة الموسيقى .. حا اقدكم بي نقة كده كتييييرة عسى الفكرة بعدها تقع .. عندنا في الكمبيوتر يا استاذ الموصلي في البرمجة حاجة اسمها ال IF .. Condition او شرط لو يا قول ناس العربي.. يوجد بعض الشروط عشان ما تتحقق ال IF لاوم يكون اكتر من شرط يتم معها استخدام AND "و" ولا OR"أو".. في حالة الشروط تكون مفصولة بي AND بيقولوا ليك لازم كللللللللللل الشروط البي and دي لازم تتحقق واي شرط منها غلط يبقا الشرط حقك طرشق وعشان ما تتعب كتير لو اووول شرط بس ما ظبط معاك ما تتعب تفتش الباقي لانو خلاص زي الانت ضارب في صفر.. اوووووووول شرط في الفنان عشان عشان نمشي نختبر باقي الشروط هو الصوت ولو ده فشلت فيهو يبقا في الباقي ماف داعي اختبر .. بي لغة البرمجة نكتب IF الصوت =جميلAND اللبس = انيق AND الوجه = جميل AND الحضور =ممتاز AND الشاعر = د.معز AND الملحن = الموصلي THEN شروق = فنانة اها يا موصلي شوفت الكلام ده لو اووول شرط فيهو ما اتحقق الباقي ما بيفدني في ايييي شي لانو في النهاية البروسسينق ما حا يدخل لي حتة شروق = فنانة دي وحا ينط لي حتة تانية تحت ..
والفنان اهم شرط فيهو صوتو .. كلامك ده ممكن يكون صاح لو بنستخدم OR وإنو ممكن نقول ده فنان مطرب إذا كان صوتو جميل أو انيق أو محترم أو يلحن له الموصلي أو يكتب له محجوب شريف وعليه نكتب كده: IF الصوت =جميلOR اللبس = انيق ORالوجه = جميل ORالحضور =ممتاز ORالشاعر = د.معز ORالملحن = الموصلي THEN شروق = فنانة في الحالة دي نقول والله لو صوتها ما جميل كدي نختبر اللبس لو جميل كان بها وماف داعي للباقي لو كمان فشل نشوف البعدو ووو هكذا الفن شغالين فيهو بي AND والصوت اول شرط يا استاذنا..
فهمتو شي عليكم الله ؟ :)
بري الف ما اظن تفهمو لي الا مريم بت الحسين ونوعا ما علاء الدين :) نقة فااارغة
Post: #97 Title: Re: ما بين هالة دهب وشروق ابو الناس البساطة والتكلف .. Author: عمر الفاروق Date: 04-05-2009, 06:42 PM Parent: #96
يا خدر:
Quote: انا متأكد انو انت كل ما عمر بعمل بوست عنكـ بتكوني مبسوطة , النخل المثمر يا ستنا دائما مستهدف من الاوغاد و عمر كل نقتو دي حايمة في دائرة (التذوق) و التذوق ده امزجة (الاتو بتاعكـ يا عمر و حرقتو ليكـ , تاني في شنو ؟)
والله يات خدر انا حاااااااااااااسي بيك زميلي في الويست دي لكن شكلك عايز تخسني عشان لاحق ليك مسلسل في التلفزيون ولا ضارب ليك عداد وقلت اقووم الكيشة ده معاي:) عارف يا طارق مرات لمن تكون بتناقش ناس في قامة الموصلي وعلم ومعرفة الموصلي لازم يكون عندك مراقات لانو اكيد اكيد بي العمر والخبرة والتخصص الموصلي غااالب غااالب عشان كده بنقوم نحشر ليك كلمات مطاطة كده زي التذوق ومستمع عادي وحسب سمعي وما ادراك ما اضنيني .. اسة الواحد لو كان بيناقش في ناس ود الصايم ديل كان شبكهم ليك وحسب خبرتي :)
علاء الدين اخوي: اشهد ليك بي إنك فنان وإن كنا اكتفينا ايام جلساتنا في الرياض فقط بي تلاتة قعدات ويا ريت ياخ تلحقني بي صوور القععدات دي وتوثق لي الحاقدة دينا دي مع إني عااارفا لئيييمة حا تقول ليك لمن تشوف الصور يا علاء الدين ياخ علي الصوت ما سااامعة ..
حبيب نورة : كل ما اعاين لي قعدتك دي بحس إنو في كوورة طلس انت شلتها من الصورة دي .. اللقطة دي جوار الجامع الكبير مش؟ :) السخاااانة عندك لكن يا حبوب ..
روز مييييييييييييييييين يا عم :)؟ شكراً وانتي شكلك حا تنضمي لي جمعية المستمعين العاديين فرحبا بك امين لشؤون المرأة في الجنعية حقتنا دي..
Post: #100 Title: Re: ما بين هالة دهب وشروق ابو الناس البساطة والتكلف .. Author: علاء الدين يوسف علي محمد Date: 04-06-2009, 07:04 AM Parent: #97
Quote: علاء الدين اخوي: اشهد ليك بي إنك فنان وإن كنا اكتفينا ايام جلساتنا في الرياض فقط بي تلاتة قعدات ويا ريت ياخ تلحقني بي صوور القععدات دي وتوثق لي الحاقدة دينا دي مع إني عااارفا لئيييمة حا تقول ليك لمن تشوف الصور يا علاء الدين ياخ علي الصوت ما سااامعة ..
عمر الفاروق هسي دينا البايركس تجينا طايرة تقول ليك كييييييييييييف تقول فنّان أورِّيك يا دينا فنان كيف؟ باقي فنان من مروي تعني إنو يفِن الحجر من تحت التمرة تجاه السبيطة يجيب ليك التمُر كلُّو واطة لووووووووووووووول
خلاص إتكيفي
عُمر يا حليل قعداتنا ياخ الصور قاعدة برفعة ليك يوم
Post: #102 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-06-2009, 11:21 AM Parent: #95
Quote: لكل مغني و مغنية فنه و فنها و إحساسه و إحساسها , حقو نسمع كل زول براه ولا شنو !
شكرا لعمر الفاروق ..
يديك العافيه ياعازف الاوتار
Post: #98 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-06-2009, 01:04 AM Parent: #86
Quote: لكن برضو أضاني ما بقدر أخالِفة مع التحايا
اللهم اجعل اضان الصديق علاء الدين يوسف علي محمد بردا وسلاما علي شروق اللطيفة الشفيفة الظريفة يا ارحم الراحمين
Post: #99 Title: Re: ما بين هالة دهب وشروق ابو الناس البساطة والتكلف .. Author: علاء الدين يوسف علي محمد Date: 04-06-2009, 06:52 AM Parent: #98
Quote: اللهم اجعل اضان الصديق علاء الدين يوسف علي محمد بردا وسلاما علي شروق اللطيفة الشفيفة الظريفة يا ارحم الراحمين
يا موصلي دي مداخلة بدون وش ضاحِك زي حقتك الفوق دي
أوعِدك إنو أمشي مخصوص اليوم و أشتري لي شريط لي شروق التي لم تُطربني أبداً يمكن لمن يكون السمع بطريقة أسمعه ولا تراه يكون فيها شيء مختلِف و جاذِب و بجيك و بكتِب ليك رد نهائي و خاص بي انا عنها
Post: #101 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-06-2009, 11:17 AM Parent: #99
Quote: يا موصلي دي مداخلة بدون وش ضاحِك زي حقتك الفوق دي
أوعِدك إنو أمشي مخصوص اليوم و أشتري لي شريط لي شروق التي لم تُطربني أبداً يمكن لمن يكون السمع بطريقة أسمعه ولا تراه يكون فيها شيء مختلِف و جاذِب و بجيك و بكتِب ليك رد نهائي و خاص بي انا عنها
اللهم ساعد صديقي علاء الدين يوسف علي محمد في آن يفي بوعده عسي ولعل طيب اوصيك اشتري شريط عافية المطر واسمع لست اكتمك الخبر خمس مرات وتمعن في الكيفية التي تتلاعب معها بصوتها واسمع باقي الاغنيات ايصا خلي الشريط لمدة خمسه ايام في سيارتك آو السي دي لان سيارة المهندسين هي كذلك علي فوليم اباص اوالبيز وباذنه تعالي ستنضم لنا وسيكون هذا انتصار كبير وكسب ثمين كل المحبة ياصديقي
Post: #103 Title: Re: ما بين هالة دهب وشروق ابو الناس البساطة والتكلف .. Author: عمر الفاروق Date: 04-06-2009, 11:42 AM Parent: #101
علاء الدين :
Quote: طيب اوصيك اشتري شريط عافية المطر واسمع لست اكتمك الخبر خمس مرات
وبي المرة اسمع معاك جرررة النفس قبل ما تبدا تغني الكوبلي وبين كل حتة وحتة اسمع نفسها زي الزول الساكنو بي عكاز .. بالرغم من انو الموصلي وقتها برر الحركة ديلكن ده ان دل يدل على ضعف صوتها قبل توزيع نفسها .. بالمناسبة برضو شوفا بتتعب كيف لمن تقول تعبرني الييييييييييييك .. عافية المطر مثال شئ لي زول فنان زي علاء عشان يقتنع بي شروق .. يا زول اقول ليك حاجة : شغل وييييييين وطي بشذاك عاجباني عيونك يا ملاك واتخيل البت الكرتونية ونطط في كرسي العربية :)
Post: #104 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-06-2009, 03:30 PM Parent: #103
Quote: وبي المرة اسمع معاك جرررة النفس قبل ما تبدا تغني الكوبلي وبين كل حتة وحتة اسمع نفسها زي الزول الساكنو بي عكاز .. بالرغم من انو الموصلي وقتها برر الحركة ديلكن ده ان دل يدل على ضعف صوتها قبل توزيع نفسها .. بالمناسبة برضو شوفا بتتعب كيف لمن تقول تعبرني الييييييييييييك ..
كلامك فيهو حبة تسخينه كدي روق ياعمر ده كلام علمي ولا شك النفس جزء اساسي من الموسيقي واي مغني لا يتنفس فهو ليس مغني ولمزيد من المعلومات فان المؤلفين حينما يكتبون للالات اللي هي الات لاحظ الكلام ده برضو بعملو حساب النفس ليها عشان الدخول في الجمل الموسيقية يكون متوازن عشان كده ارجع لي اسبابك الاخرى تحياتي
Post: #105 Title: Re: ما بين هالة دهب وشروق ابو الناس البساطة والتكلف .. Author: وليد محمد المبارك Date: 04-06-2009, 03:35 PM Parent: #104
استاذنا الموصلي
شروق فيها كثير من الصناعة والصناعة لا تجلب التطريب
اكبر مثال ليها هو الاستاذ عثمان مصطفى
البعرف يغني بصورة علمية اكتر منو منو ؟ في سوق التطريب السوداني بساوي كم ؟
اخذين في معيتنا انه الغناء فعل ابداعي موجه للجمهور .. وليس للنقاد فقط
Post: #106 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-06-2009, 03:55 PM Parent: #105
Quote: ستاذنا الموصلي
شروق فيها كثير من الصناعة والصناعة لا تجلب التطريب
اكبر مثال ليها هو الاستاذ عثمان مصطفى
البعرف يغني بصورة علمية اكتر منو منو ؟ في سوق التطريب السوداني بساوي كم ؟
عثمان مصطفى ده ياوليد أخوه مافي في السودان من كرومه لي هسع ولو قلت كلامك ده لي وردي حيخالفك ولكن نحترم مزاجك أخير نتعارك في شروق مع التحية
Post: #107 Title: Re: ما بين هالة دهب وشروق ابو الناس البساطة والتكلف .. Author: وليد محمد المبارك Date: 04-06-2009, 04:02 PM Parent: #106
بالنسبة لعثمان مصطفى
اكاديميا نعم مثله مافي تطريبيا سوقه باير يا استاذ موصلي
شروق زي عثمان مصطفى مصنوعة صناعة في بلد لسع ما وصل مرحلة الصناعة دي
في دول تانية الصناع يجهزون السوق اولا ثم يصنعون المبدع
وده ما حصل هنا
عشان كده شروق قوبلت بعدم القبول ده
وكانت نتيجته تصريحاتها مره كده انها بطلت الغنى السوداني عديل
والمشكلة الاكبر مساندنها ما قادين يفهمو الحاجة دي تكون تيار مناهض لشروق منافحته تضر لا تنفع هدو اللعب تكسبوا
Post: #108 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-06-2009, 05:27 PM Parent: #107
انتو بتجيبو الاحكام دي من وين ياوليد ايه يعني تطريبيا سوقه باير السوق ده موضوع تاني بيتوقف على الظروف السياسية والاجتماعية والاقتصاديه وياما هنالك فن مبتذل ورخيص سوقه رائج ده موضوع طويل لكن عثمان ده ر سيد الطرب ذاتو ومعروف انو فنان الفنانين واخوه مافي وهو فريد مثل القليلين في تاريخنا الفني الموسيقي ومن كرومه لغاية هسع
Post: #109 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-07-2009, 01:06 PM Parent: #108
صديقي وليد ارجو الا يكون في ردي شطط اغضبك احترمك جدا واقدرك ولكني ظللت طوال الليل افكر هل تعبير رب الطرب صحيح ام لا وبدآت افكر في تعبير ربة منزل او ربة بيت في العربية او رب السعادة وغيره من التعبيرات في اغنياتنا ولكن حينما اتبعت قولي بمافي اتنين منو ربما ابعدت المعني عما ارمي اليه فارجو ان اكون قد اوضحت وللجميع احترامي وحامشي اصلح الكلام بطريقة تعبر عما اقصده بغير تعصب تحياتي لك ولعمر ولضيوفه الكرام واعتذر ان كان في تعبيري شطط
Post: #110 Title: Re: ما بين هالة دهب وشروق ابو الناس البساطة والتكلف .. Author: وليد محمد المبارك Date: 04-07-2009, 02:52 PM Parent: #109
استاذنا الكبير الموصلي
تحياتي
يا سيدي انت لا تحتاج ان تعتزر
في ناس نواياهم ظاهر وواضحة وديل ما بتحاسبوا بي المفرده
وانت منهم
اكتب ما شيئت فانت عندي انسان نظيف ابيض الضمير وانا بقدرك جدا
هذا مع اختلافي معاك في تطريب عثمان مصطفى
وما زلت عن رائي انه عثمان مصطفى اكاديمي اكتر منه فنان وشروق ما شه على دربه
خالص الود
Post: #111 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-07-2009, 03:39 PM Parent: #110
تسلم ياوليد وانا متأكد من شعورك ولكنني اجتهد معك والاخرين في تاسيس حوار نظيف بقدر الامكان شفتك طولت وماعدت للحوار كما عهدناك سريعا فعدت وقرات كلامي ولكن الحمد لله حيث انني لا أحتمل ان اخسر الخيرين كل المودة والشكر
Post: #112 Title: Re: ما بين هالة دهب وشروق ابو الناس البساطة والتكلف .. Author: وليد محمد المبارك Date: 04-07-2009, 03:49 PM Parent: #111
تسلم يا استاذنا
لكن برضو شروق مصنوعة صناعة لدرجة افقدتها التلقائية.. ولم يتقلبها الشارع السوداني برحابة حتى الان رغما عن الدعم غير المحدود من متخصصين كتار
سوال يا استاذ البحكم على نجاح فنان منو ؟ المتخصصين ولا الجمهور
Post: #113 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-07-2009, 05:11 PM Parent: #112
Quote: سوال يا استاذ البحكم على نجاح فنان منو ؟ المتخصصين ولا الجمهور
ده سؤال راقي جدا يحكم الجمهور احيانا على فنان بالاقبال عليه ثم يسقط الفنان بعد البداية بقليل فينساه الجمهور يحكم الجمهور على فنان بعدم الاقبال عليه اولا لغرابة ما في انتاجه و صوته و ادائه وبمرور الزمن يبدا التآلف فينجح الفنان مع الجمهور ============== يقول المتخصصون بان فلان ممتاز ولكن فلانا يسمع فيغتر ولا يساعد نفسه وعندئذ يفشل حكم المتخصصين ============ يقول المتخصصون بان فلانا لايملك الامكانات الكافية للفنان ولكن هذا الفنان لديه العزيمة على تطوير نفسه فيتبوأ القمة ========================================================= ليست هنالك حكم ثابت
القدرة على رسم لوحة جميلة ممكنة بقلم الرصاص أو بجميع الالوان وكل ذلك يتوقف على الفنان مع التحية
Post: #114 Title: Re: ما بين هالة دهب وشروق ابو الناس البساطة والتكلف .. Author: وليد محمد المبارك Date: 04-07-2009, 05:14 PM Parent: #113
Quote: ============== يقول المتخصصون بان فلان ممتاز ولكن فلانا يسمع فيغتر ولا يساعد نفسه وعندئذ يفشل حكم المتخصصين ============ يقول المتخصصون بان فلانا لايملك الامكانات الكافية للفنان ولكن هذا الفنان لديه العزيمة على تطوير نفسه فيتبوأ القمة
اقنعتني يا استاذ اقنتعتني تماما
شكرا كتير
Post: #115 Title: Re: ما بين هالة دهب وشروق ابو الناس البساطة والتكلف .. Author: وليد محمد المبارك Date: 04-07-2009, 05:16 PM Parent: #114
Quote: يحكم الجمهور على فنان بعدم الاقبال عليه اولا لغرابة ما في انتاجه و صوته و ادائه وبمرور الزمن يبدا التآلف فينجح الفنان مع الجمهور
مصطفى سيد احمد اصدق مثال للحالة دي
Post: #116 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-07-2009, 07:44 PM Parent: #115
ياوليد ده حصل للكاشف ومحمد الامين وعثمان حسين في جيل مابعد الحقيبة وحصل لسرور وكرومة بعد الطنبارة =============== سر أخير اي انسان في الدنيا دي عندو نفحة موهية ما فنية أو اكاديمية أو غيره سعي ذلك الشخص لتطوير ملكاته تلك أو هذه هي المحك =============== وبتعبير اخر كل الناس فنانين بس بتتفاوت درجاتهم بين الاستعداد الطبيعي الاعلى الى الاجتهاد الممتاز وتكون المسافة بين الارض والسماء محبتي يارجل
Post: #117 Title: Re: ما بين هالة دهب وشروق ابو الناس البساطة والتكلف .. Author: omer osman Date: 04-07-2009, 08:39 PM Parent: #116
الاخ الموصلي تحياتي
بالطبع لايمكن ان نقارعك الحجة ولابد لنا ان نقر بانك متخصص وتنظر الى الاشياء من منظور مختلف يجب الاخذ به اذا كنا مثلا بصدد اجازة
صوت الاخت شروق ، لكن اذا كنا بصدد ان نطرب ونستمتع ونحس بمعاني الكلمات وجماليات اللحن فيكون المعيار شخصي بحت يعنى كلو زول
براهو ..... في ناس كتار عندهم رأي فيي كابلي زاتو خليك من شروق وفي ناس عندها رأي في حمد الريح او صلاح بن البادية ...الخ
وفي زول بكون مبسوط جدا لمن قيقم يغني.
انا شخصيا لم اطرب ولم استسغ غناء الاخت شروق بعكس احساسي اتجاه غناء نانسي عجاج التى تحلق بي في عوالم اخري بعكس صديق لي لايطيق
الاستماع اليها.
المختصر المفيد (حب الناس مذاهب)
Post: #118 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-08-2009, 01:02 AM Parent: #117
هوده
Quote: المختصر المفيد (حب الناس مذاهب)
كل على ليلاه
Post: #119 Title: Re: ما بين هالة دهب وشروق ابو الناس البساطة والتكلف .. Author: عمر الفاروق Date: 04-08-2009, 07:27 AM Parent: #118
استاذنا الموصلي: اختلف واتفق معاك في كلامك الببتقول فيهو حول كم من فنان وكم من فنان .. اقدر ليك انزعاجك لمن نجي نحن العوام ونقول ده ما فنان وده فنان لانو بي بساطة حاجة مزعجة فعلا لمن تكون انت زول دارس وعندك مقومات بتعرف بيها الفنان وبتكون متوفرة في الزول ده .. بي بساطة شديدة الفنان زي لاعب الكورة في لاعبين بيكونوا داخل الملعب الجمهور العادي بيكورك فيهم طووول الوقت وبعد تنتهي الكورة يطالبو بي شبطه لكن المدرب بيكون مبسوووط منو وبيقول ليهم ده كان احسن لاعب في المباراة وهو يقوم بكل المهام الموكلة إليه .. وبما إنو الفن والكورة فهمهم قريب بالاعتماد على الفطرة في المقام الاول ففي لاعبين ما بيختلفوا عليهم من لمستهم بتعرف إنهم بيعرفو كورة وفي لاعبين لو قعد مليون سنة ما ممكن يتعلم كورة ويظل هو كما هو .. يعني برشم هو برشم من يوم دخل الهلال لحددددددي ما طلع من الهلال وابوالليل كان هو ابو الليل وموسى الزومة ياهو موسى الزومة بينما هيثم مصطفى وهيثم السعودي ومن قبلهم سكسك وفايز نصر الدين من لمستهم بتعرف ديل شنو وبدوون ما تتم الكورة .. شروق ما بتملك المقوم الاساسي وهو الصوت وانت لسة مصر على جوانب اخرى هي مكمل للفنان وليس اساس مصطفى لمن حاربوهو ما عشان صوتو كعب بقدر ما عشان اللونية القدم بيها .. شروق محاربتها ما عشان نوع العمل فماتقوم بيهو شروق اكتر من عادي واراك تبالغ في وصفك لي شروق وتقديمها للاعمال وكانها خرقت المعتاد فعافية حسن تغنت للحلنقي اها وشنو ؟؟ حنان بلوبلو بتغني لي عوض جبريل ووالله ومع احترامي لي محجوب شريف لكن انا زول كتاب زي عو جبريل ده ماشوفت ..اها ويعني شنو ؟؟ شايف الناس بتثني على شروق في عملها الاخير مع محجوب شريف وهو في نظري عمل مصطنع شروق ما غنتو بي احساسها بقدر ما هو ضمن طقم من الطقوم المقدمة في صناعة شروق يا شروق غني للبسطاء وغني للقضية .. شروق ما عندا لونية واضحة في الغنا عشان تجو تقولوا لينا مجتهدة في تقديم اعمالها من قولة تييييت شالت ليها عشرومية اغنية من كبار الشعراء كتابات كانت مصطنعة ومفصلة .. البروف معز عمر بخيت لا يصلح شاعر غنائي فللشعر الغنائي مقومات ومع كده شروق غنت ليهو اغنيتين في تعاون واااضح إنو ينم عن مجاملة طغعت عليها العلاقات الشخصية .. حتى انت يا استاذ الموصلي كنت مجامل في تلحينك للاغنية مع إنو الكلمات جميلة واللحن اجمل لكن بالله عليك يا ستاذ وقف ايييييي زول في ايييييييي مكان واسألو عن مقطع وااااااااحد من ايييي اغنية حقت شروق ولو ردد ليك اللحن بس انا اكون غلطان .. في فنانين كتااااار ما معروفين لكن لمن طلعو شريط بيكون فيهو اغنية انطبعت للمستمع حتى لو كانت هابطة ولكن البصمة بتكون واضحة .. نقبل اعتراضك عن الاستاذ عثمان مصطفى لكن اختلف معاك في إنو فنان الفنانين لأنه المعروف والمشهور اكتر هو الراحل خليل اسماعيل كفنان الفنانين ونوعا ما الراحل الخالدي .. شروق مشروع زولة حا تقتحم الوسط ده بي الواسطة اكتر من الابداع وبي الدعم السخي من الكبار اكتر من الموهبة .. بالله عليك يا استاذ تفسيرك شنو لي عدد اللقاءات الصحفية والظهور في التلفزيون لي زولة عمرها في الوسط الفني ما تم سنتين ؟؟ اكتتتتر من عشرة لقاءات تلفزيونية في مختلف القنوات لي زولة ما قدمت اي بصمة لسة ولا اثارت ضجة ؟؟؟ لانو بي بساطة ومع احترامي للبروف الصديق معز لكن وانا متاككككككككككد مليون المية إنو كل اللقاءات كانت مدبرة وفيها وع علاقات شخصية ومعرفة .. والله يا موصلي وما اظن محتاج احلف انا ما بحارب شروق ولا بفجر في الخصومة لكن وزي ما قلت ليك زمان انو انا حا اكسب رهاني معاكم لمن قلتو لي اديها سنة بس وحا تشوف شروق حا تعمل شنو واهو مشششششششت وتااااااني حا تمشي عشرة زيها وتظل شروق في كل ظهور ليها حا تحاول تعمل المستحيل المصطنع للوصول ..
Post: #120 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-08-2009, 04:40 PM Parent: #119
Quote: بالله عليك يا استاذ تفسيرك شنو لي عدد اللقاءات الصحفية والظهور في التلفزيون لي زولة عمرها في الوسط الفني ما تم سنتين ؟؟ اكتتتتر من عشرة لقاءات تلفزيونية في مختلف القنوات لي زولة ما قدمت اي بصمة لسة ولا اثارت ضجة ؟؟؟ لانو بي بساطة ومع احترامي للبروف الصديق معز لكن وانا متاككككككككككد مليون المية إنو كل اللقاءات كانت مدبرة وفيها وع علاقات شخصية ومعرفة .. والله يا موصلي وما اظن محتاج احلف انا ما بحارب شروق ولا بفجر في الخصومة لكن وزي ما قلت ليك زمان انو انا حا اكسب رهاني معاكم لمن قلتو لي اديها سنة بس وحا تشوف شروق حا تعمل شنو واهو مشششششششت وتااااااني حا تمشي عشرة زيها وتظل شروق في كل ظهور ليها حا تحاول تعمل المستحيل المصطنع للوصول ..
ومن قال لك بانك قد كسبت الرهان ياعمر؟؟؟ اكبر دليل على نجاحها هو هذا الجدل الذي يشارك فيه الجميع حولهاواولهم انت ياعمر ليك سنتين بتحاول ان تثبت نظريتك عنها فلو كانت فاشلة اذا لماذا هذه المعافرة الطويلة؟؟؟ وليه الصحف بتكتب عنها هل كل هؤلاء الصحفيين مجاملين؟؟ اذا كان الكتيابي ومدني النخلي وغيرهم بالاضافة لمحجوب شريف اخيرا سمحوا لها بغناء اشعارهم واشاد بها ابو عركي وهاديه طلسم ولحن لها الكثيرون هل كل هولاء مجاملين عمر انني فد افهم عدم استلطافك لصوتها واعتباره لايطرب ولكن ان تصدر احكامك المعممة فهذا مالا افهمه
Quote: البروف معز عمر بخيت لا يصلح شاعر غنائي فللشعر الغنائي مقومات ومع كده شروق غنت ليهو اغنيتين في تعاون واااضح إنو ينم عن مجاملة طغعت عليها العلاقات الشخصية .. حتى انت يا استاذ الموصلي كنت مجامل في تلحينك للاغنية مع إنو الكلمات جميلة واللحن اجمل لكن بالله عليك يا ستاذ وقف ايييييي زول في ايييييييي مكان واسألو عن مقطع وااااااااحد من ايييي اغنية حقت شروق ولو ردد ليك اللحن بس انا اكون غلطان ..
اولا بالنسبة لمعز فكلامك غير معقول في نظري واسألك ماهو الشعر الغنائي في نظرك؟؟ وهل نزار قباني شاعر غنائي؟؟؟ كيف تكون الكلمات جميلة واكون مجامل في تلحينها؟؟؟؟؟ ليست بالضرورة ان يردد الناس مقاطع الاغنية والا لكانت راجل المرا لحماده بت أفضل من شال النوار لمحمد الامين!!!!!!! ياخوي شروق انسانة طيبه مهذبة بت ناس وحبوبة وفوق ذلك فان صوتها شجي وجادة وهذا احد اسرار نجاحها اما انا فعندما عرفتها فيادوبك البروف معز له خمس سنوات منذ تخرجه من الجامعة اذا فقناعاتي بها لم تكن بواسطة مع تحياتي ومحبتي لك لقناعاتي بك وبدون مجاملة (ضحكة)
Post: #121 Title: Re: ما بين هالة دهب وشروق ابو الناس البساطة والتكلف .. Author: محمد حيدر المشرف Date: 04-08-2009, 05:07 PM Parent: #120
دعوها تغنى بسلام .. لم تفعل يا عمر الفاروق اكثر من الغناء لتستحق هذا الاغتيال المعنوى .. ثم لم كل هذه المكابده والرهق فى ترصد امرأه اتخذت الفن مهنه .. وحازت على اجازه لامكاناتها الفنيه ممن هم ( اهل المغنى ) .. لا يعجبك غناءها ؟.. متصنعه ؟.. غير بسيطه ؟.. مصنوعه ؟. متكلفه ؟.. الخ ؟..
والله ما عارف اقول شنو ؟..
شخصيا تطربنى شروق .. وعافية المطر لا يغادر عربتى ( مجالى الوحيد للاستماع للغناء ) بجانب اشرطه لعركى ومصطفى وعقد الجلاد وعثمان حسين ونانسي
موقف غريب منك
تحياتى
Post: #122 Title: Re: ما بين هالة دهب وشروق ابو الناس البساطة والتكلف .. Author: عمر الفاروق Date: 04-08-2009, 06:58 PM Parent: #121
استاذنا الموصلي :
Quote: ياخوي شروق انسانة طيبه مهذبة بت ناس وحبوبة وفوق ذلك فان صوتها شجي وجادة
كل المواصفات اعلاه إلا ما تحته خطبقبل بيهو .. طيبةما بيلزم انها تكون فنانة لو طيبة ممكن تدخل منظمات العمل الطوعي ولها في دا ر المايقوما اسوة حسنة . مهذبة وما في ذلك شك وحاشاها من غير ذلك وانا اكثر تهذيب ورغما عن كده ما بصلح فنان .. حبوبة دي ما تضغط علي شديد خصوصا لو انا عملت ليك فيها عكليت ورايح واخدتها بي انك قاصد العمر :) خصوصا وانو بعرف لي حبوبة اسمها شاهندة .. مواصفاتها الفوق دي يا استاذ تنفع تماما لي انها ممكن تشتغل في اطباء بلا حدود في تسيير قوافل في تنظيم رحلات وتكوين جمعيات لكن مبدئيا كده في الفن ما محتاجين ليها شديد خليها تركز في الصوت ..
Quote: اكبر دليل على نجاحها هو هذا الجدل الذي يشارك فيه الجميع حولهاواولهم انت ياعمر ليك سنتين بتحاول ان تثبت نظريتك عنها فلو كانت فاشلة اذا لماذا هذه المعافرة الطويلة؟؟؟
اخر مرة كتبت فيها بوست عن شروق بتين يا استاذ ؟؟ من يوم ما كسبت الرهان وانا لابد الى ان بدا علي السطح من جديد هبوط الثلوج وتكسيرها وتلميع شروق بي بوستات ولقاءات تلفزيونية مصطنعة وانا ما حا اتنازل عن التصنع ده .. شروق ما كسبت جمهور جديد ابدا نفس الوجوه نفس الاسماء ..
Quote: وليه الصحف بتكتب عنها هل كل هؤلاء الصحفيين مجاملين؟؟
جييب لي اسماء الصحفيين وانا اثبت ليك انهم مجاملين .. ايوة مجاملين .. والله يا موصلي عندي خالي صحفي مرة نزل لقاء كااامل في الصفحة الاجتماعية مع اسرتنا قاطعو من راسو ما عرفناهو الا لمن جا شايل الجريدة سأل براهو وجاوب براهو ولصق صورنا براهو ... ولمن حكى لي كيف الصحف الاجتماعية والفنية بتطلع عرفت .. واداني اسماء انا بتكلم معاك عن درايةيا موصلي ما تهجم صدقني .. بس خليها كده بدون تفاصيل ..
Quote: الكتيابي ومدني النخلي وغيرهم بالاضافة لمحجوب شريف اخيرا
وممكن يسمحو لي كلتوم فرن بي ترديداشعارهم ولي نفيسة جاكات برضو.. اسسسة دي يا موصلي انا عندي زول بيعرف واحد من الشعراء الفوق ديل ما حا اقولوا بس بيعرفو معرفة شخصية وما عندو مانع يجيب لي قصيدة منو بي علاقتو بيهو إيه رايك .. انت قايلا كيف؟ مابس واحد بيعرف شروقوبيعرف الشاعر اكس ويقول ليهو ياخ بتنا دي شوف ليها حاجة كده تقيف بيها على رجولها البت غناية والله ..
Quote: اما انا فعندما عرفتها فيادوبك البروف معز له خمس سنوات منذ تخرجه من الجامعة
اهااااااااااااا شوفت ؟؟ ده البيأكد لي موضوع الحبوبة اعلاه :) ياخ معز اسة بقا بروف يعني انننننننننننني وانييييييييييييين صفر معاك التسعة حولاااااااااااااااا:) بس ما تقول لي لمن عرفتها كانت طفلة عمرها سنتين لانو دي كده ما بتشفع ليك تلحن ليها .. لسة بقول ليك يا استاذ المجاملة دي ما حاجة او كلمة كعبة ولها مدلولها السلبي الزول بيجامل الزول بي ضحكة بيجامل صاحبو البيعرفو لمن يسألو عليك الله صوتي كيف يقول ليه سمح .. البت بتجامل صاحبتا بتقول ليها انتي رهييييييييييييييييييبة الليلة.. وكلو بدون مقابل فقط حتى لا يصيبها الاحباط .. وده ما معناها الزول المجامل زول كعب ..
Quote: مع تحياتي ومحبتي لك لقناعاتي بك وبدون مجاملة (ضحكة)
كان تخليها بدون ضحكة :)
تحياتي..
Post: #128 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-08-2009, 08:18 PM Parent: #122
Quote: شروق ما كسبت جمهور جديد ابدا نفس الوجوه نفس الاسماء .. ..
وشروق ما كسبت ناقمين جدد ابدا نفس الوجوه نفس الاسماء ..
Quote: Quote: الكتيابي ومدني النخلي وغيرهم بالاضافة لمحجوب شريف اخيرا
وممكن يسمحو لي كلتوم فرن بي ترديداشعارهم ولي نفيسة جاكات برضو.. اسسسة دي يا موصلي انا عندي زول بيعرف واحد من الشعراء الفوق ديل ما حا اقولوا بس بيعرفو معرفة شخصية وما عندو مانع يجيب لي قصيدة منو بي علاقتو بيهو إيه رايك ..
أبصم بالعشره لا انت لازولك بتقدروا على الانت قلتو ده
ما حأخش معاك في حتة العمر ديه بس هي بتوضح انك (مابالع ملحتها) وواقفه ليك في الزور زورا وبهتانا لان دي ماليها دخل في الموضوع برغم انها بت صغمبوتة وحليوونه وغنايه وكاتله خلق الله (بعد اذن ياسرزوجها وصديقي)
Post: #123 Title: Re: ما بين هالة دهب وشروق ابو الناس البساطة والتكلف .. Author: عمر الفاروق Date: 04-08-2009, 07:06 PM Parent: #121
محمد حيدر:
Quote: دعوها تغنى بسلام .. لم تفعل يا عمر الفاروق اكثر من الغناء
الأسهل ان تترك هي الغناء بسلام .. والغناء ده ما حاجة ساهلة عشان كده ما بتقدر عليهو .. ما تفتكروا الغناء ده مايك وميك اب.. الشغلانة اصعب من كده بي كتيييييييييييييييير
Post: #124 Title: Re: ما بين هالة دهب وشروق ابو الناس البساطة والتكلف .. Author: محمد حيدر المشرف Date: 04-08-2009, 07:28 PM Parent: #123
عمر تحياتى واحترامى الشديدين
ولكن
من نصبك يا عمر قيما على ماذا يفعل هذا او تلك .. وعلى ما الذى يجب ان يشجينى او يطرب علان الادعى ان تتركها بسلام .. لا اعتقد انها اهدت البومها لك .. وما كنت محور اهتمامها انت شخصيا عندما غنت وستغنى .. سأبحث عن هاله دهب بناء على توصيتك عاليه .. اسمعها .. استمر فى سماعها او انصرف عنها لمهمهمات حياتى واستريح عند محطاتى الغنائيه كلما واتتنى الفرصه بالسماع لمن احب وبينهم شروق
فلست معنيا وبالتخصص فى مجال الغناء .. فقط يقودنى المزاج والمزاج سمه لا وصايه لك عليه .. يعنى ممكن مزاجى يكون التكلف فى الاشياء وعدم البساطه والخ
وقع ليك ..
ملاحظه ارجو ان تتقبلها بصدر رحب ولا اعنى الا لفت انتباهك لها .. فأن رفضتها فلك العتبي حتى ترضى
.. دعك من ملاحقه وترصد انثى تحترف الفن وحسب الاصول فان لم توفر لها كل الدعم اللازم .. فاتركها بسلام
Post: #125 Title: Re: ما بين هالة دهب وشروق ابو الناس البساطة والتكلف .. Author: إبراهيم عبد الحليم Date: 04-08-2009, 07:52 PM Parent: #123
تحيات شديدات يا عمر شكرى على ردك ولغة البرمجة أنا ما بعيد منها بحكم تخصصى الكيمياء وفقط لزيادة المودة والعرفة بيننا أدعوك شاكرا لزيارة صفحتى
الغنا يأخوى الأيام دى داير ليهو فكى كارب ههها متسيطرين عليه الأسماء الاتية بدون منازع حسين و أحمد الصادق... شكر الله عزالدين... الحفلات طه سليمان إلخ... الباقيين ديل كلهم بتلقاهم إما فى أم درمان جنب التلفزيون والأذاعة إما جنب هارمونى وبالمناسبة جنبها مطعم حبشى عندو غداء كارب وإما بجوار الأذاعات المختلفة. كلهم لو ماعندو لقاء منتظر حقوقه المالية التى عبارة عن شوية ملاليم وكان مرقت من ديل كلهم يحلك الله من هيثم كابو والصحافة الفنية أها مع هذا الواقع منو البيغنى بدون واسطة ؟ إبراهيم عبد الحليم
Post: #126 Title: Re: ما بين هالة دهب وشروق ابو الناس البساطة والتكلف .. Author: إبراهيم عبد الحليم Date: 04-08-2009, 07:56 PM Parent: #125
يا وليد محمد المبارك
يأخوى ما تدينا معاك كباية شاى
تحية لشخصك
إبراهيم
Post: #127 Title: Re: ما بين هالة دهب وشروق ابو الناس البساطة والتكلف .. Author: نادية عثمان Date: 04-08-2009, 08:13 PM Parent: #126
Quote: اهااااااااااااا شوفت ؟؟ ده البيأكد لي موضوع الحبوبة اعلاه :) ياخ معز اسة بقا بروف يعني انننننننننننني وانييييييييييييين صفر معاك التسعة حولاااااااااااااااا:) بس ما تقول لي لمن عرفتها كانت طفلة عمرها سنتين لانو دي كده ما بتشفع ليك تلحن ليها .. لسة بقول ليك يا استاذ المجاملة دي ما حاجة او كلمة كعبة ولها مدلولها السلبي الزول بيجامل الزول بي ضحكة بيجامل صاحبو البيعرفو لمن يسألو عليك الله صوتي كيف يقول ليه سمح .. البت بتجامل صاحبتا بتقول ليها انتي رهييييييييييييييييييبة الليلة.. وكلو بدون مقابل فقط حتى لا يصيبها الاحباط .. وده ما معناها الزول المجامل زول كعب ..
وطيب وكت عاااااااااارف كده مالك ماجاملتني بكلمة حمد الله على السلامة
وأنتي تحلي ضيفة بين ظهرانينا في الرياض يانادية عثمان ؟!!
وماااااااااااااالك ماضربت لي تلفون اديتني أم محمد اسلم عليها واحمدل ليها السلامة ؟
وليييييييييه ماجيت حفلة بورداب الرياض وجاملتني لي الله والرسول ؟
ولييييييه وماااااااااااااالك وكييييييفن ؟؟
ظهرتها عااااااااملة يا أبو حمودي العسل
ورغم كده بتلقاني يوم في بيتكم وعازمة روحي شاي بلبن مقنن ولقيمات
Post: #129 Title: Re: ما بين هالة دهب وشروق ابو الناس البساطة والتكلف .. Author: عمر الفاروق Date: 04-08-2009, 08:50 PM Parent: #127
محمد حيدر: ما تزعل مني لكن مااا تغش روحك كلامك البتكتبو تحت ده مااااااااا كلام تحياتي واحترامي الشديدييين :)
Quote: من نصبك يا عمر قيما على ماذا يفعل هذا او تلك .. وعلى ما الذى يجب ان يشجينى او يطرب علان
هو الزول البيكره الزول حقكم النصبتوهو إنو يقول ليك شروق تطرب وتشجي .. مش برضو انت منصبين زول زي ده ؟؟
Quote: لا اعتقد انها اهدت البومها لك .. وما كنت محور اهتمامها انت شخصيا عندما غنت وستغنى ..
ولااا هي محمور اهتمامي الشخصي بكل تأكيد .. شايف الزول البي يمينك الفي الصورة دي؟؟؟ ده محور اهتمامي الشخصي الأول ومعاهو كم اهتمامات شخصية تانية +الكورة .. وهي زاااتا لو خلتني محور اهتمامها الشخصي والله تكون بااالغت .. انا ارجل عادي اقبل الهدايا وامشي في الاسواق لكن ما تشوفني كده ما مالي عيني ايييي زول وما بشوف في زول احسن مني.. يا قول منصور خالد لمن المقدم سألو امبارح وقال ليهو انت تحب التعلق بالنجوم ؟؟ قال ليهو انا زاااااااااااااااااااااتي نجم .. بالرغم من انو جملتك مستفزة وممكن الرد عليها يصيب شروق بي رزاز وما عندها ذنب فخليني ارخي الحتة دي.. بالمناسبة املك شريط من البروف معز شخصيا قبل ان ينزل الكاسيت للاسواق احتفظ به كذكرى من صديق عزيز واخ اكبر احترمه وسمعت الشريط وابديت اراء هي نفسها البكتبها هنا دي عشان ما تقول انا زول مداهن واثنيت على الكلمات والالحان لكن الاداء كان بيق بيق بيق زيييرو .. اها انا افتخر بي اهداء البروف اكتر من انو تهديني ليهو شروق ... كيف ليك ؟؟
Quote: سأبحث عن هاله دهب بناء على توصيتك عاليه ..
انا ما وصيت انا كتبت زي كلااامك العن شروق ده وقلت البت غناية .. لو انت جيت بكرة قلت دهب ما غناية بجووط معاك برضو واي زول بي رايو ..
Quote: دعك من ملاحقه وترصد انثى تحترف الفن وحسب الاصول
شوفتو ؟؟؟ اول حاجة كلامك ده كلام زول مشكلتو الاساسية بيفتكر اني بتطاول على انثى وختيت الشغلانة شغلانة عنقالية ودي بت وقارورة ورفقا بي القوارير وما تعمل فيها راجل لاحق الرجال لكن سيب البنات !!!! بعدين شنو حسب الأصول ؟؟؟ ما قهمتها دي ؟؟ يعني حنان بلو بلو ما حسب الاصول عشان بترقص؟؟؟ ياخ الفن حسب الاصول قالها ليكم فوووق حبيبنا محمد الشيخ لمممممن غلنبي ارد عليهو : قال الله يرحم الفن بعد حنان النيل !!!!! دي الاصول !!!!!! كلمة الاصول الاخترتها هنا دي مطاااطية يا عمك فيها المظهر وفيها الشكل وفيها التربية وفيها الشعراء وفيها الالحان وفيها وفيها وفيها عشان كده خليك دقيق في انتقاء الكلمات ... بعدين ما هو الاحتراف ؟؟؟ برضو ما فهمتها الشغلانة دي ؟؟ يعني شروق ما عندها شغلانة تانية غير الفن ؟؟؟ بتاكل عيش من الفن ؟؟ مصدر دخلها الفن ؟؟ كرست كللل جهودها للفن ؟؟ ده لو انا فهمت الاحتراف زي حق الكورة داك ..
Post: #130 Title: Re: ما بين هالة دهب وشروق ابو الناس البساطة والتكلف .. Author: عمر الفاروق Date: 04-08-2009, 09:00 PM Parent: #129
ابراهيم عبد الحليم : ياخ اسمك ده فيهو حلاة مسكة مايك وتقول: والااااااااااااااااان مع الفناااااااااااااااااااان : ابراااااااااااااهييييييييم عبد الحلييييييييييييييييييييم .. :)
اها يا ابراهيم اقول ليك حاجة ؟ الود حسين الصادق ده انا بقول عليهو فنان .. والله ود فناااان عديييل كده .. لانو صوتو جميل .. بعد داك مكن نختلف في نوع الاداء البيقدمو وترديد اغااني الناس و و و و و شوفت يعني حقق الشرط الاهم .. شروق لا .. شروق ما فنانة .. وده الفرق.. الحاصل في الساحة فعلا هو رزق اليوم بي اليوم تلاقيط والفنان بقت حالتو تحنن لانو القنوات متحكمين فيها غفرا البوابات بتاعتا .. بتخيل ليك انو مثلا فرفور طالع من هارموني الغفير بتاع النيل الازرق بشوفو بيجري جري لي المدير يقول ليهو فرفور طالع من هارموني .. المدير يقول ليهو اجججججججري جري جيبو لي .. وهكذا .. الواسطة في الفن بالكووووووم وناس الماحي سليمان مااا بعيدين لسسسسسسسسة قاعدين واولادو كل يوم واحد عامل فنان مع انو ولدو الصغيير ده صوتو بيعمل ارتكاريا في الضمير مع الاحترام لي نزار لانو داك بيجي منو .. تخريمة : ياخ في المانيا دي عندنا عمن لينا اسمو كامل محمد احمد بيلعب جيتار لو بتعرفو سلم عليهو ..وقول ليهو عمر قال ليك بندوووور المصاريف..
Post: #132 Title: Re: ما بين هالة دهب وشروق ابو الناس البساطة والتكلف .. Author: عمر الفاروق Date: 04-08-2009, 09:14 PM Parent: #130
استاذنا الموصلي:
Quote: أبصم بالعشره لا انت لازولك بتقدروا على الانت قلتو ده
ياخ ما تستعجل علييك الله ما تبصم .. انت لسة مغلوب 1-صفر وكده بتديني فرصة اجيب التاني والتعويض ببقا صعب.. شكلو طولك من السودان خلاك بعيييد عن الحاصل.. وما تضرب على وتر الرجال معادن وانا اعرف معادن من اتحدث عنهم و و و و و و و... صدقني يا موصلي كلامي ده ما كتبتو شغل كيدي ولا ردود بوستات والسلام لالالالالالالا مااااااااااالي يدي منو وحصل بس طبعا ما لي انا كعمر وكقصيدة لي انا بس زول تاني .. بالمناسبة الناس في السودان بقت تبيع اولادها خليك من قصائدها .. الحلنقي قال اغنية ما مشكلة بتاعت فرفور هي اجممممممممل ما كتب يعني لا بتتعلم لا جن احمر.. التجاني حاج موسى بقا فارش في سوق ستة ببيع بي مييية وكللل حاااااجة بي مييييية يشيل من ترباس يدي فرفور يشيل من محمد ميرغني يدي محمود ويجي يشبكك هي قصائدي وانا حر فيها اديها للعايزو والما عاجبو يشرب من البحر.. هاشم صديق جرجر ود اللمين في اول قضية ومنها جاب حقوقه لكن فتح نافذة وثقافة جدييييدة حقت بيع وشراء .. يا موصلي كدي ابصم بي الخمسة أجل العشرة دي شوية .. بالمناسبة موضوع العمر كان لهو برئ وهظار معاك وضحك للتلطيف وختيت ليك علامة :) كوش ضاحك لكن شكلك نفسك بقا ضيييق ومشيت بعييييد .. ما بيهمني شروق عمرها كم عمر الزهور عمر الدهور 20 30 مية الفين 7 سوووو وات ؟؟؟ بعدين بيني وبينك حكاية كاتلة خلق الله دي عندك فيها حق ... إنت قايل المغسة ما بتكتل ؟؟؟؟ والله بتكتل .. اسة شوف بت المجمر دي مش قربت تموت ؟؟؟ وود الصايم ده قال جاهو العصبي؟؟ ولا انت ما قاصد كده ؟؟؟ لانو غير كده مااا اظن بتكتل ليها زول .. صدقني شروق ما وصلت اطراف اصابعي عشان اقوم ادخلا لي زوري وما تنزل منو !!!! لا شخصنة للموضوع ولا بعرف شروق وماف ايييييييييييي شي بقفل البوست ده بمشي البيت بلعب مع حمودي بسمع ضحكتو الجمييييييييييييييييلة وابتسامتو البتنززززززززل لي من زوري عندو في اليوم مية بوسة لاااازم يتباسهم بعد اتمهم بنوم مرتااااااااااااااااااااااح ..
Quote: (بعد اذن ياسرزوجها وصديقي)
بالمناسبة تصدق زولك ده لقيتو كاتب عني اني زول عااااطل وابحث عن عمل و و و و.. الغريبة رسلت ليهو السي في يشوف لي شغل ان شاء الله عتالي للساون ما رد !! اتوسط لي يا موصلي طالما بتعرفو واهو عشان شروق زااااتا تاني تقول لي : احييييييييييينا ما اهو ده الموصلي اتوسط ليك في زول سألك :)
Post: #133 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-08-2009, 11:40 PM Parent: #132
Quote: دقني شروق ما وصلت اطراف اصابعي عشان اقوم ادخلا لي زوري وما تنزل منو !!!! لا شخصنة للموضوع ولا بعرف شروق وماف ايييييييييييي شي بقفل البوست ده بمشي البيت بلعب مع حمودي بسمع ضحكتو الجمييييييييييييييييلة وابتسامتو البتنززززززززل لي من زوري عندو في اليوم مية بوسة لاااازم يتباسهم بعد اتمهم بنوم مرتااااااااااااااااااااااح ..
فشر لاعاش من قال انا زعلت منك ياخي انا سعيد جدا بهذا الحوار ومرات بحب اكاويك لانك (كاواااااااااااااي) بس انت ماعارف بني (ظنقل ديل) كاوايييييييييين كيف
و حمودي بسمع ضحكتو الجمييييييييييييييييلة وابتسامتو البتنززززززززل لي من زورك اتفق معك على جمالها الاخاذ والذي لا يشبهه الا صوت شروق الساحر الذي ينساب كخرير للمياه العذبة المتدفقة في جدول الجمال اللانهائي حفظ الله حمودي وشروق اميييييييييييييييييييييييييين
Post: #131 Title: Re: ما بين هالة دهب وشروق ابو الناس البساطة والتكلف .. Author: عمر الفاروق Date: 04-08-2009, 09:00 PM Parent: #129
مكرر وكده ..
Post: #134 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-09-2009, 12:53 PM Parent: #131
عمر يا خوي كفاك ابتسامات تعال ياصديق
Post: #135 Title: Re: ما بين هالة دهب وشروق ابو الناس البساطة والتكلف .. Author: إبراهيم عبد الحليم Date: 04-09-2009, 02:11 PM Parent: #134
Quote: ياخ في المانيا دي عندنا عمن لينا اسمو كامل محمد احمد بيلعب جيتار لو بتعرفو سلم عليهو ..وقول ليهو عمر قال ليك بندوووور المصاريف..
أخى عمر الفاروق
يا أخوى كامل ده أخر مرة لاقيتو 1998 أشتغلنا حفلة مع بعض فى برلين.
إبراهيم
Post: #136 Title: Re: ما بين هالة دهب وشروق ابو الناس البساطة والتكلف .. Author: محمد حيدر المشرف Date: 04-09-2009, 05:16 PM Parent: #135
Quote: دعك من ملاحقه وترصد انثى تحترف الفن وحسب الاصول
Post: #137 Title: Re: ما بين هالة دهب وشروق ابو الناس البساطة والتكلف .. Author: دينا خالد Date: 04-15-2009, 05:33 PM Parent: #98
الموصلى الله يدينى طولة روحك .. يا اموووون ! الاولاد ديل يتشبك فيهم العدو المعادينى .. غايتو يا علاء انا بورتى دى بتفك (وش حلووو) ، انت .... دى بتفك متين ؟؟
Quote: الحاقدة دينا دي مع إني عااارفا لئيييمة حا تقول ليك لمن تشوف الصور يا علاء الدين ياخ علي الصوت ما سااامعة ..
الصور شوفناها ، وخلقة الله ما عندنا فيها كلام كنا ح نعول على الاخلاق لكن لم ينجح احد ..
اها ياعمر وافرض سامعه ؟؟ هسه فى زول بقيف لى علاء دا يعزف ليهو اورغن ؟؟ دى كيف دى ؟ حبوب ولا فى العضل ؟ لوووووووووول اضان الفن طرشا
Quote: أورِّيك يا دينا فنان كيف؟ باقي فنان من مروي تعني إنو يفِن الحجر من تحت التمرة تجاه السبيطة يجيب ليك التمُر كلُّو واطة لووووووووووووووول
هسه دى فنان دى ؟ يااااااااى نحن النخلة ال فى حوشنا بس اقيف بعيد واقول للسبيطة سزو سزو سزوذ ( عارف دى نغمة بوبى ديك لما تناديهو بالصوت ) التمر كلووو يجى منهمر !!! علاء .. اقرا اقرا ياخ مافى مشكلة طايرة انا؟
ـــــــــــ عارف واحد خطب واحده قالت ليهو عايز اقرا قال ليها بنتظرك.. قالت لى ما بعرف اقرا وزول منتظرنى !!! لوووووووول ... لكن انت بتعررررررف !
Post: #139 Title: Re: ما بين هالة دهب وشروق ابو الناس البساطة والتكلف .. Author: Elmosley Date: 04-16-2009, 04:09 PM Parent: #137
Quote: الموصلى الله يدينى طولة روحك .. يا اموووون ! الاولاد ديل يتشبك فيهم العدو المعادينى ..
ماتخافي علي اموووووون لانه رع ويراعي كل الظروف وانا غيران عشان عندي منافس في حب هيلاري وجه عابس جدا
Post: #138 Title: Re: ما بين هالة دهب وشروق ابو الناس البساطة والتكلف .. Author: دينا خالد Date: 04-15-2009, 05:34 PM Parent: #98
الموصلى الله يدينى طولة روحك .. يا اموووون ! الاولاد ديل يتشبك فيهم العدو المعادينى .. غايتو يا علاء انا بورتى دى بتفك (وش حلووو) ، انت .... دى بتفك متين ؟؟
Quote: الحاقدة دينا دي مع إني عااارفا لئيييمة حا تقول ليك لمن تشوف الصور يا علاء الدين ياخ علي الصوت ما سااامعة ..
الصور شوفناها ، وخلقة الله ما عندنا فيها كلام كنا ح نعول على الاخلاق لكن لم ينجح احد ..
اها ياعمر وافرض سامعه ؟؟ هسه فى زول بقيف لى علاء دا يعزف ليهو اورغن ؟؟ دى كيف دى ؟ حبوب ولا فى العضل ؟ لوووووووووول اضان الفن طرشا
Quote: أورِّيك يا دينا فنان كيف؟ باقي فنان من مروي تعني إنو يفِن الحجر من تحت التمرة تجاه السبيطة يجيب ليك التمُر كلُّو واطة لووووووووووووووول
هسه دى فنان دى ؟ يااااااااى نحن النخلة ال فى حوشنا بس اقيف بعيد واقول للسبيطة سزو سزو سزوذ ( عارف دى نغمة بوبى ديك لما تناديهو بالصوت ) التمر كلووو يجى منهمر !!! علاء .. اقرا اقرا ياخ مافى مشكلة طايرة انا؟
ـــــــــــ عارف واحد خطب واحده قالت ليهو عايز اقرا قال ليها بنتظرك.. قالت لى ما بعرف اقرا وزول منتظرنى !!! لوووووووول ... لكن انت بتعررررررف !
