Post: #1 Title: مهرجان الزهور ! ... مشاهدات من مؤتمر الحزب Author: طلال عفيفي Date: 01-30-2009, 05:25 AM Parent: #0
الزميلات بالمنبر والزملاء الأعزاء والقراء ... هذه بعض المشاهدات من المؤتمر العام الخامس للحزب الشيوعي السوداني ، أعطفها على مساهمات سبقت لأعزاء هنا . أحاول أن أعكس خلالها بعض ما عرفت إلتقاطه ، متمنياً أن أساهم بالقدر اليسير والممكن في التوثيق لملامح ولحظات عبرت صباح ومساء ذلك اليوم المنتظر من زوايا شخصية جداً وليست شاملة على الإطلاق .
قد يكون هناك الكثير لدي - مثل آخرين - حول ما دار بالمؤتمر وما سبقه من تحضير ، لكني لا أملك ، والحال كذلك - إلا أن أعبر عن عميق محبتي وإمتناني وإنتمائي لهذا الحزب . أأمل كذلك أن يكون هذا المؤتمر بداية أخرى للم شمل أهلي الشيوعيين السودانيين وإنطلاقهم للكدح الذهني الذي سبقه كدحهم النضالي والصبر على المكاره .
وأود لو تسمحوا لي بتقديم تحية خاصة ومحبتي العامرة إلى الإنسان الصلب والرقيق عمي التجاني الطيب ، الذي لا أعرف كيف أصف مكانته العالية في قلبي الصغير . فقد أحب هذا الرجل أهل السودان بأبوة حانية ، فقدم عمره على بابهم ، وبذل كل حياته لما رأى أنه حق .
Post: #2 Title: Re: مهرجان الزهور ! ... مشاهدات من مؤتمر الحزب Author: Haydar Badawi Sadig Date: 01-30-2009, 05:31 AM Parent: #1
شكراً، يا طلال!
نضر الله وجه الأستاذ التجاني الطيب، وكل من أسهم في تعميق محبتنا لسوداننا الجريح، ولشعبنا العملاق الذي يتقدمه الأقزام!
Post: #3 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 01-30-2009, 05:32 AM Parent: #1
بدأ المؤتمر العام الخامس للحزب جلسته الإفتتاحية العلنية نهار السبت الرابع والعشرين من يناير 2008 بمباني قاعة الصداقة بالخرطوم .
حضر الجلسة مناديب الحزب عن فروعه المختلفة بالعاصمة والأقاليم ، ومجاميع من الأصدقاء .
"المؤتمر الخامس ، نعم .. المؤتمر الخامس !" بهذه الجملة إبتدر الدكتور الشفيع خضر (رئيس اللجنة التحضيرية) خطاب المؤتمر الإفتتاحي .
قدم الأستاذ محمد إبراهيم نقد السكرتير السياسي خطاب الحزب
كان من ضمن حضور الجلسة العلنية للمؤتمر مجموعة من الضيوف
حضر وفد عزيز من الحركة الشعبية لتحرير السودان من بينهم الرفاق مالك آقار و ياسر عرمان .
على منصة المؤتمر ، جلس الزملاء : الشفيع خضر سعيد ، جوزيف ماديستو ، سعاد إبراهيم أحمد صالح محمود ، سليمان حامد ، التيجاني الطيب ويوسف حسين . وقد وصلت الأستاذة سعاد إبراهيم أحمد إلى المنصة محمولة على الأعناق في مشهد جميل ومؤثر لم أستطع إلتقاطه .
في هذه الجلسة ، تقدم الشاعر محمد الحسن سالم (حميد) والأستاذ محجوب شريف ورددا علينا الأشعار التي رددناها في أيامنا الصعبة والجميلة :
في لحظة ، إعتلى الشاعران المنصة في عناق بهيج
من ضمن الحضور ، كانت الأم الثكلى ، والدة الزميل بدوي الذي إستشهد جراء التعذيب في زنازين الإنقاذ :
والأستاذ فاروق محمد إبراهيم الذي تقدم برسالته المشهورة للعالم حول التعذيب الذي تعرض له في بيوت الأشباح
حوت أروقة المؤتمر على معارض للفنون والصور التي تضم مجموعة من شهداء شعبنا
وكان هناك رفاق وزملاء أعزاء كمال الجزولي
أم الحسن
تاج السر عثمان (السر بابو)
يوسف حسين
فيصل الباقر
آمال جبرالله
نعمات خضر ، بخاري الأمين ومعز عبد الوهاب
مجدي الجزولي
علويه تابر
وآخرين ...
ومن مشاهد هذا اليوم : الأستاذة نعمات مالك والأستاذة سعاد إبراهيم
الزميل عبداللطيف عبد الغني يهندم برفق أحد أعضاء كورال الحزب
مناديب الجنوب
الزميل عاصم نقد والأستاذ زكريا جوزيف قرنق
زكريا جوزيف
رفيقة درب فقيدنا عابدين
هنادي فضل
بخاري ومعز ، إرهاق وحيره !
محمد صباحي مراسل سودانيز اون لاين ، تقدم مشكوراً بـ"سلايت شو" عُرض أثناء الفقرات .
محمد المهدي عبدالوهاب وطارق الأمين
الفراش الحائر !
فراش حائر تاني !
أصدقاء ..
عزه وحسام ..
من الله وإيمان
البراق النذير الوراق (على قول حسن موسى ، الأسامي دي بتجيبوها من وين؟!)
Post: #13 Title: Re: مهرجان الزهور ! ... مشاهدات من مؤتمر الحزب Author: elsharief Date: 01-30-2009, 07:08 AM Parent: #12
Quote: وأود لو تسمحوا لي بتقديم تحية خاصة ومحبتي العامرة إلى الإنسان الصلب والرقيق عمي التجاني الطيب ، الذي لا أعرف كيف أصف مكانته العالية في قلبي الصغير . فقد أحب هذا الرجل أهل السودان بأبوة حانية ، فقدم عمره على بابهم ، وبذل كل حياته لما رأى أنه حق .
يا سلام يا طلال , عمي التجاني يستحق اكثر من ذلك
Post: #16 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 01-30-2009, 07:22 AM Parent: #13
شكراً يالشريف ... وتقبل محبتي
Post: #14 Title: Re: مهرجان الزهور ! ... مشاهدات من مؤتمر الحزب Author: Rawia Date: 01-30-2009, 07:11 AM Parent: #12
Quote: راويه !! الحكايه شنو ؟؟ إنتي عايزه تكوشي على الحزب كلو ولا شنو ؟
ياخ اسوي ليك شنو صورك دي اثارت فيني شجون وشوق لناسي وعزوتي.... أمال أيه?! البيني وبينهم شي جميل لابتحكي لا بتوصف والحالة أنا خجلت وماقلت ليك عم تجاني واحشني ولا جبت ليك سيرة ونستي وفضفضة همومي مع الشفيع خضر ولا قلت ليك معزة أمال قدر شنو ولا إتكلمت ليك عن محمد سليمان أخونا وحبيبنا
____________ سلام لعم فاروق محمد ابراهيم
Post: #17 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 01-30-2009, 07:26 AM Parent: #14
خلاص يا راويه ، فضفضي .. أخدي راحتك ...
Post: #15 Title: Re: مهرجان الزهور ! ... مشاهدات من مؤتمر الحزب Author: Aymen Tabir Date: 01-30-2009, 07:13 AM Parent: #7
هو فعلا مهرجان الزهور يا طلال يديك يارب كل مناك شكرا لي عدستك البلت عطش الشوق .. فرحان يا طلال .. وبكيت .. زي طفل صغير .. ريحة الناس الحلوين .. لمة ناس سمحين .. ضميت كل واحد فيهم .. عم تجاني اتمنيت اني كنته اقالدهو واحيهو ه في اليوم ده والشفيع .. وعلويه تابر يا طلال امي .. شهد التاريخ انها كانت حاضره الخامس .. ناس كتار يا طلال كل واحد منهم هز جواي جبل فرحه .. عاصم نقد .. بخاري .. نجلاء .. مهيد .. و .. و.. شباب نضرين كما تاريخهم عارف يا طلال قدر شنو علويه تابر منتظره الخامس اكثر من اربعين سنه ما هانت ولا لانت ولا وقفت بين بين .. الحزب عندها ياهو الحزب .. عظيم ومهيب .. تقطع ليهو الغنا .. محبوبه ودنيته .. شلوخه كل واحد فيهم تجربه وتاريخ طويل .. رقصت وفرحت زي ما كانت بتحكي لي وهي قابضه انفاسه منتظره اليوم ده .. شهور التحضير دي كلها .. انتصار الحزب انتصاره وانتصارهم .. ياسلام .. شكرا ليك شكرا للحظه الاديتنا ليها هنا .. وعاش نضال الحزب الشيوعي السوداني
Post: #18 Title: Re: مهرجان الزهور ! ... مشاهدات من مؤتمر الحزب Author: awad hassan Date: 01-30-2009, 07:26 AM Parent: #15
الرائع طلال عفيفي
التحية لك علي هذا العمل العظيم
التحية للحزب الشيوعي
Post: #19 Title: Re: مهرجان الزهور ! ... مشاهدات من مؤتمر الحزب Author: mahdy alamin Date: 01-30-2009, 08:25 AM Parent: #18
الزميل الجميل : معز عبدالوهاب
التحيه له وللجميع
Post: #20 Title: Re: مهرجان الزهور ! ... مشاهدات من مؤتمر الحزب Author: فيصل محمد خليل Date: 01-30-2009, 08:32 AM Parent: #19
قريبي طلال
باللهي صورة لعبدرحمن دريسه
و حسن عثمان العب
مكان الفرد تتقدم قيادتنا الجماعيه
Post: #21 Title: Re: مهرجان الزهور ! ... مشاهدات من مؤتمر الحزب Author: خالد العبيد Date: 01-30-2009, 09:14 AM Parent: #20
تعرف ياطلال صورك وبوستك ده انا منتظرو لي زمن شكرا ياحبيب
Post: #42 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 01-30-2009, 01:52 PM Parent: #21
خالد العبيد ، انا كمان بشكرك على إهتمامك بالتوثيق ... يا ريت تاخد الحاجة دي على عاتقك وتخليها موضوعك ، الجمع والأرشفه والتصنيف ...
أتمنى نشوفك يا زمل
Post: #22 Title: Re: مهرجان الزهور ! ... مشاهدات من مؤتمر الحزب Author: محمد سنى دفع الله Date: 01-30-2009, 09:17 AM Parent: #20
لنوثق لغد افضل شكرا طلال شكرا جميلا
Post: #23 Title: Re: مهرجان الزهور ! ... مشاهدات من مؤتمر الحزب Author: نادية عثمان Date: 01-30-2009, 09:53 AM Parent: #22
اليوم داك ياطلال كان عندي تحضير لتصوير للقناة تاني يوم من الخامس
أها قمت مشيت حتة في بحري للـ ( النخلة) ضيفتي للتصوير تاني يوم وخلصت معاها كلامي وجيت جري على القاعة قلت الحق (حبة) حفلة والأقي عم التيجاني وماما سعاد ود. الشفيع وهنادي وحبة ناس عزيزين بعرفهم من زمان ..شيوعيين جميلين كنت عايزة أبارك ليهم فرحتهم .. لكن لقيت القاعة من برة هُسسسسسسس ومافي أعلام حمراء ترفرف خفاقة ولموا الكراسي .. قام زول كده ماشي جنب القاعة قال لي الناس ديل شطبوا خلاص .. ورجعت بحري وكلي غيظ عشان مالحقتكم ياخ .. ولكن كلي فرحة من أجل فرحة الأصدقاء الشيوعيين الطيبين والجميلين وإنت أولهم ياطلال وكنت عارفة إنو حاتنقل لي الحفلة الفاتتني دي هنا فشكرا يا صديق .. شكرًا ومبروك
Post: #24 Title: Re: مهرجان الزهور ! ... مشاهدات من مؤتمر الحزب Author: Sabri Elshareef Date: 01-30-2009, 10:29 AM Parent: #23
التحية لجميع الزملاء والزميلات بالحزب الشيوعي لعقد المؤتمر العام وبركه ربنا التماهو علي خير
اصدقاء وصديقات اراهم في الصور الدكتور الصديق الشفيع خضر سعيد الرائدة في الكفاح والنضال استاذه سعاد ابراهيم
الصديقة امال جبر الله لها الحب والتجله ووالدتها الشاعره الرائعه ام الحسن وصديقي فيصل الباقر
واختي الرائعه هنادي فضل والبروف فاروق محمد ابراهيم ومحي الدين الجلاد اخو اصحابي اولاد الجلاد وصديق اصدقائي
صور جميلة
التحية لكل الصحاب والرفاق
Post: #25 Title: Re: مهرجان الزهور ! ... مشاهدات من مؤتمر الحزب Author: خضر حسين خليل Date: 01-30-2009, 10:56 AM Parent: #24
شكراً ياطلال
انا منتظرك من يوم السبت انا منتظرك من زمان ياخ
بجيك بس نزل لسانا ماروينا
Post: #26 Title: Re: مهرجان الزهور ! ... مشاهدات من مؤتمر الحزب Author: خضر حسين خليل Date: 01-30-2009, 10:56 AM Parent: #24
شكراً ياطلال
انا منتظرك من يوم السبت انا منتظرك من زمان ياخ
بجيك بس نزل لسانا ماروينا
Post: #27 Title: Re: مهرجان الزهور ! ... مشاهدات من مؤتمر الحزب Author: Hussein Mallasi Date: 01-30-2009, 11:18 AM Parent: #26
آخر حاجة كنت أتوقعها انو أشوف صورة لشيوعي صابغ شعرو !
Post: #28 Title: Re: مهرجان الزهور ! ... مشاهدات من مؤتمر الحزب Author: حمور زيادة Date: 01-30-2009, 11:25 AM Parent: #27
صور جميلة يا طلال يديك العافيه يا صاحب*
ــــــــــــــــ * كنت عاوز اقول يا زميل خفت الناس يفهموني غلط يا ود فصلي
Post: #29 Title: Re: مهرجان الزهور ! ... مشاهدات من مؤتمر الحزب Author: Hussein Mallasi Date: 01-30-2009, 11:34 AM Parent: #28
هموم طبقة عاملة و كادحين - و نحو ذلك - و يقيف قدام المراية يصبع شعرو !!
.
Post: #40 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 01-30-2009, 01:31 PM Parent: #29
Quote: هموم طبقة عاملة و كادحين - و نحو ذلك - و يقيف قدام المراية يصبع شعرو !!
مافيها حاجه يا حسين ، مش ورد عن سيدنا النبي إنو حبب إليه من الدنيا الطيب والنساء ، وإنو كان بيحنن شعرو ودقنو ؟ مافيها حاجه صدقني ... Take it easy وبعدين إنت قايل الصبغة الزمن ده بقت تاخد وكت ؟
Post: #30 Title: Re: مهرجان الزهور ! ... مشاهدات من مؤتمر الحزب Author: Elham abdelkhalig Date: 01-30-2009, 11:39 AM Parent: #28
طلال العزيز كنت منتظرة جيتك وصورك ..شكرا لك صور جميلة .....واجملها صورة خالتي ام الحسن وبتها احبهم ككتير .
ضمن مايطلبه المشاهدون عليك الله ماصورت محمد عبدالله القطي العطبراوي والشيوعي الاصيل .... افتقده.
لك كم من الود والتقدير
Post: #52 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 01-30-2009, 03:12 PM Parent: #24
Quote: التحية لكل الصحاب والرفاق
وليك إنت كمان يا صبري ...
Post: #44 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 01-30-2009, 02:10 PM Parent: #23
يا ناديه ده كلام شنو ، مشيتي بحري وجيتي جري ؟؟ الناس مبيتين من اليوم القبلها ! لكن المريب يا صديقتي إنو الفعاليات إستمرت لوقت متاخر من الليل ، إنتي أصلك جيتي الساعه كم؟؟؟
فاتك يوم عالي وبهيج ... كنتي هتغسلي قلبك بسحن ووجوه وارواح من النوع البريمو ..
وإحنا كمان فاتتنا طلتك البهية ... بس زي ما بقولوا في الشعر العربي القديم ، مصير الحي يتلاقى ...
Post: #57 Title: Re: مهرجان الزهور ! ... مشاهدات من مؤتمر الحزب Author: نادية عثمان Date: 01-30-2009, 04:55 PM Parent: #44
طلال ياصديقي
جيت زي تسعة كده كنتوا شطبتوا ؟
يازول يكون بتاع الأمجاد غشاني وماوداني القاعة ولا شنو ؟ ( وجه عارفو براك كيشة كيف ومابعرف مكان القاعة من فندق القصر ) !!
Post: #99 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 02-01-2009, 00:28 AM Parent: #57
Quote: جيت زي تسعة كده كنتوا شطبتوا ؟
تسعه يا ناديه ؟؟ كنا في عز البهرجة ، وقلوبنا قايده نار !! لكن ، لا باس ... بس المره الجايه إتأكدي من العنوان ...
محبتي يا صديقتي العجيبة
Post: #43 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 01-30-2009, 01:59 PM Parent: #22
سلامات يا ود السني يا أخي ... كان يوم مميز من نواحي كتير ، يا ريتك حضرتو كنت هتستخلص منو مشاعر نادره ومتنوعه ...
Post: #37 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 01-30-2009, 01:08 PM Parent: #20
فيصل ، ببتهج بطلتك ... ليه؟ الله أعلم! خليني أنزل باقي الصور وبرجع ليك .
طيب ؟
Post: #36 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 01-30-2009, 12:57 PM Parent: #19
العزيز مهدي ، بركه في الشوفه يا أخي ... معز ده بالله صحبك ؟؟!! أمسك فيهو قوي .
Post: #35 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 01-30-2009, 12:48 PM Parent: #18
أستاذ عوض ، سلامات ... شكراً على المداخلة ... ولك التحية
Post: #31 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 01-30-2009, 11:41 AM Parent: #15
غلبتني يا أيمن ... ما عارف أقول ليك شنو .
الوالدة علوية كانت من أجمل وأكثر الناس إبتهاجاً في ذلك اليوم ، هذه السيدة اللطيفة التي تضيء مدينة بحري بتماسكها وصدقها وطيبة قلبها .
أما أصدقائك ، فناس تمام : عاصم نقد ، الكادر الجماهير الحي والحكاء خفيف الظل حمل اليوم على سحابة من الحماس بتقديمه للمؤتمر بصوته المحبوب وبطريقته في الألقاء والكلام .. بخاري الإنسان الهميم وكأنه شايل المؤتمر على ضهرو ، نجلاء وصورة معبرة فعلاً عن الإلتزام والفناعة الراسخة ومهيد ذلك الذهن المتوقد المرتب الذي يقدم بقوة وهدوء وإيمان . الله يديهم العافية ويديم عليك الرفقة والمحبة ويغطيكم بوطن محترم .
Post: #32 Title: Re: مهرجان الزهور ! ... مشاهدات من مؤتمر الحزب Author: Osama Mohammed Date: 01-30-2009, 11:55 AM Parent: #31
شكراً طلال على العدسة الحميمة ...
نفس الضحكة ونفس الصوت ... ونفس حدود اللامعقول ونفس النفس الطالع حار مع عمالنا والثوار ... التحية عبركم للعزيز عاصم نقد
والعزيز أبو لارا ومبروك نجاح المؤتمر
اسامة الباز
Post: #34 Title: Re: مهرجان الزهور ! ... مشاهدات من مؤتمر الحزب Author: خدر Date: 01-30-2009, 12:11 PM Parent: #32
نتائج انتخاب القيادة الجديدة واضحة في تعابير الاوجه
Post: #100 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 02-01-2009, 00:57 AM Parent: #34
Quote: نتائج انتخاب القيادة الجديدة واضحة في تعابير الاوجه
خدر يا خوي ، شكلو الغربه طالت ... من متين الصرصره كانت عند أهلنا تعابير ؟ ده ستايل !
_____________ تحياتي للقاء
Post: #80 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 01-31-2009, 04:23 AM Parent: #32
شكراً يا أسامة وسلامات .. وتحية من هنا للعزيز عاصم نقد ، الشيوعي الملهم ، بطريقتو اللطيفة والمحببة في كل الأمور .. شاب عقلو راجح وقلبو مليان حماس ... أما بخاري فكما قال الشاعر فنسأل الله يوم شكرو ما يجي ، هميم وياكل النار ...
التحية لكل الزملاء الشاركوا وساعدوا في إخراج اليوم ده ..
Post: #89 Title: Re: مهرجان الزهور ! ... مشاهدات من مؤتمر الحزب Author: بخاري عثمان الامين Date: 01-31-2009, 10:06 AM Parent: #32
تسلم يا باز ولارا بقت كبيرة
بتلقي صورته فوق مع اختها يارا
ومبروك لك انعقاد المؤتمر وخطوة
نحو بناء فاعل لحزب جماهيري عريض
Post: #33 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 01-30-2009, 12:06 PM Parent: #31
سلامات يا إلهام ... الحقيقة إنو عمنا القطي راجل نادر على طريقته .. له التحية والمحبة ...
Post: #38 Title: Re: مهرجان الزهور ! ... مشاهدات من مؤتمر الحزب Author: معتصم ود الجمام Date: 01-30-2009, 01:15 PM Parent: #33
العزيز طلال هذا البوست الجميل ذاد مودتي ليك وذاد عشقي لحزبي ( جد البوست ده حضرني الخامس يا طلال )
Post: #39 Title: Re: مهرجان الزهور ! ... مشاهدات من مؤتمر الحزب Author: Hussein Mallasi Date: 01-30-2009, 01:15 PM Parent: #33
Quote: نتائج انتخاب القيادة الجديدة واضحة في تعابير الاوجه
Post: #41 Title: Re: مهرجان الزهور ! ... مشاهدات من مؤتمر الحزب Author: حذيفه ابراهيم الكباشي Date: 01-30-2009, 01:46 PM Parent: #33
بنلقي الخرطوم اليوم داك بقت خالية من الكراسي الحمراء
Post: #45 Title: Re: مهرجان الزهور ! ... مشاهدات من مؤتمر الحزب Author: Mohamed Idris Date: 01-30-2009, 02:16 PM Parent: #41
عزيزي طلال ود عفيفي ولله بوستك وصورك خلانا جوه المؤتمر بس عاوز اسأل منو الفي الصورة مع مجدي الجزولي وانت معلق عليهم (انتلجنسيا الزمن لضائع ) تحياتي ومبروك لانعقاد المؤتمر الخامس والى الامام
. . .
Post: #48 Title: Re: مهرجان الزهور ! ... مشاهدات من مؤتمر الحزب Author: محمد صباحى Date: 01-30-2009, 02:43 PM Parent: #45
تشكرا طلال علي مهرجان الزهور من عندنابعض من الزهور
ودموع الخامس
أنثى ولا دستة رجال د. سعاد أبراهيم أحمد
Post: #49 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 01-30-2009, 02:52 PM Parent: #48
أخي صباحي ، شكراً جزيلاً على مساهمتك المعبرة ... عجبتني صورة الزميلة والتلويحة بالطرحة الحمرا صورة لطيفة ومعبرة .
الدموع كانت ماليه العيون ، دموع فرح بلقاء ناس فرقت بينم الدنيا والسنين ، ودموع على حبايب غابوا في السكة الممدودة ، حبايب كانت عيونم بتومض في المخيلة ومن على صورم المعلقة و المحفوظة في القلب ...
شكراً يا محمد تاني
Post: #50 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 01-30-2009, 03:03 PM Parent: #45
شكراً يا محمد ... والله كلامك بيسعدني
Quote: بس عاوز اسأل منو الفي الصورة مع مجدي الجزولي وانت معلق عليهم (انتلجنسيا الزمن لضائع )
شنو يا خوي ، إنت يعني باقي المعلمين الفي الصور ديل كلهم عرفتهم ؟؟؟
عالعموم ده أخوك صالح ميرغني ..
_____________ يا ربي البوست ده ضرب التأمين ؟؟!!
Post: #46 Title: Re: مهرجان الزهور ! ... مشاهدات من مؤتمر الحزب Author: مصطفي سري Date: 01-30-2009, 02:40 PM Parent: #41
شكراً طلال على الصور الزهور اصدقاء وخالات خاصة علوية تابر - ايمن شفت خالتي علوية لسعة شباب كيف - واستاذ تجاني الطيب والدكتور الصديق الشفيع خضر سعيد ، وشقيقته نعمات - اهل حينا في الامتداد ومحي الدين الجلاد وعاصم نقد -ولدنا - والعزيز زكريا جوزيف ، غايتو يا طلال حزيكم لسعة شباب وفيه الناس الترس والصديق عبدالله القطي ... يا سلام على رجل اتبرا دة فات ايوب في الصبر والشكيمة الاستاذة النوبية سعاد ابراهيم رينا يديها العافية ، والاستاذة نعمات مالك
تعرف يا طلال مؤتمركم دة تقول كان منتظرنا نطلع بي (جاي) ويعملوا .. مرة قلت لاستاذ تجاني كنا في اسمرا يا استاذ انتو مؤتمر حزبكم ما تعملوا في الجنوب في المناطق المحررة ، رد علي ( والناس تجي هنا كيف ) اها ناس الجنوب جووكم ... ومبروك انعقاد المؤتمر في سكة التحول الديموقراطي وترسيخ السلام ، ووحدة على اسس جديدة فيها العدالة والكرامة والحرية ...
Post: #101 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 02-01-2009, 01:36 AM Parent: #46
شكراً يا مصطفى على المساهمة الطيبة ، كنت بتمنى تكون معانا زي ناس كتير فقدتهم يومتا ...
Post: #67 Title: Re: مهرجان الزهور ! ... مشاهدات من مؤتمر الحزب Author: Salwa Seyam Date: 01-30-2009, 08:10 PM Parent: #7
عزه التجانى الطيب وبناتا
Post: #102 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 02-01-2009, 02:53 AM Parent: #67
شكراً سلوى وتحياتنا لعزه ونعمات خضر وساره ..
Post: #47 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 01-30-2009, 02:42 PM Parent: #4
دكتوره نعمات ... لها التحية والتقدير ... نحلة لم تهدأ في خلايا المؤتمر وأروقته ..
Post: #51 Title: Re: مهرجان الزهور ! ... مشاهدات من مؤتمر الحزب Author: Amin Mahmoud Zorba Date: 01-30-2009, 03:05 PM Parent: #47
العزيز طلال التحية عبرك لكل هذا الصبر الذي انتج الحدائق التحية عبرك للشاوشية الذين تحملوا قسوة السنين المنصرمة تحملوا كل ذلك بصبر لا بتباع لابشترى طوال اربعين عاماً كان الحزب ينموا في المفاصل والقلوب طوال تلك السنيين تطلع الشمس وتغيب في 24 يناير تراكمت الشموس واضاءت كل هذا العنفوان التحية للعم تجاني وكل رفاقه للعم صديق يوسف للصبور يوسف حسين وللسر بابو لـ د الشفيع خضر لكل الذين افنو حياتهم من اجل هذا الحزب الجميل ونحن مخلال تصاوركم نحضر هذا الفرح برغم الغياب ونعدكم في القادم نحن امامكم عاش نضال الحزب الشيوعي وعاش نضال الشعب السوداني
Post: #54 Title: Re: مهرجان الزهور ! ... مشاهدات من مؤتمر الحزب Author: Gazaloat Date: 01-30-2009, 04:00 PM Parent: #51
ياطلال احيانا تخرس الكلمات عن التعبير وتترك مكانها للدموع.. والآهات.. وانفجار النبض هذه هدية خجولة لكم ولكـُنَّ جميعا يامن جعلتم وجعلتُنَّ هذا واقعاً
منعم الجزولى
مهرجان الكتابة
من بيوت انسدَّ بابَا لى معارك مُـستجابة شدَّ بالزندية جَابَا الشهى المعسول شرابَأ لا خراب الشوف مَـعابَة لا النظر جوة الخرابَة من سرابَة ولى سرابَة شَدُّوا داخلين الحرابة الرُّجال سَاعْةٍ ضِرَابَا الوليدات والصبابة والبِنَيَّات المَهَابة زغردن تَمـَّن نِصابَا خمسة اوتار الربابة غنوا للناس الغلابة من ضمير وديان هشابة ولى بنادق جوة غابة ومن رمال جُرحاً تـَشَابى ولى جبال فى الدم شرابَا انهتك سِتر المهابة وتمت اعراس الكتابة لا الحَـوَصْ فى يوم اصابَا لا الرمد عكر عـُبابَا من نساها ومن شبابَا ومن رَتـَايِنـَا أُم لِهـَابَة ياما نـَازلةَ العز حُبابـَا بالاغانى وانطرابَا كان جسارة وكان صلابة انكسر جبل الرتابة واحنا فى قَطَرَات عذابَا الشهيد الماتغابى وبالشهادة وانكرابَا من جذور الارض جابَا بذرة وانتصبت نقابة لا المشانق فى رقابَا لا المطاردة لا الرقابة لا السجون فاغراهو بابَا لا المحاكم لا النيابة لا المعيشة السالَّـة نابَا لاها تحذيرات مُهابة لاها اغراءات مُجابة لادفق مويتو ف رهابَا لا دخل عمـَّر خرابَا الكواسر وانكبابَا والزناديق العصابة لابتغرق فى عـُبابَا لا بـِتَغريك بى عِنـَابَا لاكَ خايف من إصَابة بى نضال المـُرَّة يابا انت يالعندك اجابة للسؤالات الصَعـَابَة انت يالحزب المَهابة جوَّة بحر الدم تَشَابَا لاشكيت يوم من صِعابَا ولاَّ دربك فى شِـعابَا فارق احلام التعابى
Post: #106 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 02-01-2009, 09:11 AM Parent: #54
سلامات يا منعم
حالك كيف ؟ مشتاق والله للكلام معاك ... حكاويك العجيبه الما بتنتهي ، حقو تقعد ترصها في كتاب ، ولا شنو ؟
Post: #105 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 02-01-2009, 08:51 AM Parent: #51
شكرا يا أمين .... وتحاياك توصل ...
وأتمنى المؤتمر الجاي نكون كلنا تحت سقف واحد
ونشوفك بخير
_________________ *الأستاذ عبداللطيف عبدالغني مساء 24 يناير .
Post: #53 Title: Re: مهرجان الزهور ! ... مشاهدات من مؤتمر الحزب Author: محمد صباحى Date: 01-30-2009, 03:28 PM Parent: #47
Post: #71 Title: Re: مهرجان الزهور ! ... مشاهدات من مؤتمر الحزب Author: Gazaloat Date: 01-30-2009, 09:02 PM Parent: #68
لمزيد من المغصة يا وليد
Post: #126 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 02-03-2009, 04:18 AM Parent: #71
صورة جميلة يا منعم بكل معاني الروح الغاليةالبتطل من العيون
Post: #63 Title: Re: مهرجان الزهور ! ... مشاهدات من مؤتمر الحزب Author: خضر حسين خليل Date: 01-30-2009, 06:41 PM
عيوشة عيوشة يا نقد عيوشة عيوشة أبو الزيك
عيوشة عيوشة ياخوانا!!
Post: #65 Title: Re: مهرجان الزهور ! ... مشاهدات من مؤتمر الحزب Author: عثمان فضل الله Date: 01-30-2009, 06:50 PM Parent: #63
طلال تحياتنا.... انت ما جبتة cd... وعملتة نايم شنو ياخ الصور كلها عايزنها بى ضبانتها
Post: #136 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 02-05-2009, 00:59 AM Parent: #65
عثمان فضل الله يا زميلنا في السفر والترحال والايام الجميلة ومدخن السجاير العظيم ، أشواق كتيره يا أخي والله ...
Post: #64 Title: Re: مهرجان الزهور ! ... مشاهدات من مؤتمر الحزب Author: عزالدين طه Date: 01-30-2009, 06:47 PM
شكرا طلال الصورة أعلاه لعمنا الرائع و الزميل الجميل كمال النور سوار الدهب ( من موسسى الحزب) أى قدامى المحاربين و هو والد الأخ ثروت سوار الدهب عضو البورد
Post: #66 Title: Re: مهرجان الزهور ! ... مشاهدات من مؤتمر الحزب Author: Abuobaida Elmahi Date: 01-30-2009, 08:07 PM Parent: #64
طارق أو ( خدر ) والله حيرتونا - والجمع هنا مو صدفة - مش حيرتونا نحن وبس بل قد حيرتو حناننا!! فلم تجد لتقرأ في الصورة محل تعليقك إلا الإبانة والإفصاح البليغ عن روح غير ديمقراطي ما فيهو ذرة إحترام لإرادة الحزب وأختيار عضويته !! يا زول إنت ما ديمقراطي ول شنو? وأنا أشك في ذلك بل أشك في لا ديمقراطية آل جدد تجديد مجدد كلهم من المرحوم الخاتم الذي نفض يده والناس تتدابر أمرها إلي آخر زول يطالب في الشيوعيين بإلحاح الملح في المسألة ليرموا عدتهم النظرية كلها ويشتغلوا رزق اليوم باليوم ويتنكروا كجاحدي النعمة للقوي الإجتماعية التي تربوا في أحضانها ويغيروا إسمهم بلا أي إعتبار لتاريخيته .. يرموا ويتنكروا ويغيروا حتي يصير الحزب كله بلا فرق بينه وبين أي وكيل أو محامي لمصالح الرأسمال المجرم في بلادنا!! مجرد ملطف لأجواء الصراع الإجتماعي وخادم ذليل لمصالح أعداء الطبقة العاملة والكادحين!
Quote: نتائج انتخاب القيادة الجديدة واضحة في تعابير الاوجه
أنت ما ديمقراطي زيك وزي الخاتم الكان عايز من الحزب إتبني رأيه أو الطوفان !! إتخيل يا خدر ( أو ) دي? وأعطني يا صديقي موقعها من الإعراب الديمقراطي ? ... ... ... أقول ليك حاجة يا زميل ? الزملاء في الصورة ديل لو صح تأوييلك المغرض - وكل تأوييل في الحياة مغرض - أقول لو صح تأوييلك المغرض ل (صرصرتهم) فهم ذاتم زيك : لا ديمقراطيين ودايسين بالنعال علي إرادة حزبهم وخياره الديمقراطي?
Quote: نتائج انتخاب القيادة الجديدة واضحة في تعابير الاوجه
مالا النتائج ? غير إنو أنتصرت لغير المخلوعين من أثر إنيهار المعسكر الشرقي والإتحاد السوفيتي! أنتصرت عديل كده للذين لا يروا في تجربة الفشل فشلا للماركسية! العارفين لأزمتها لكن برضوا عارفين إنو تجديدها ما مسئوليتهم براهم ولا تجدبدها بتم بالإستعانه عليها بمنهج غير منهجها المادي ?
وعديل كده الما عاجباهو نتائج المؤتمر الخامس إشرب من البحر أو أختار الطوفان زي القبالو لكن الحزب أختار الإعتصام بجبل الشعب والماركسية وقواه الإجتماعية!!
وسلام كتير من قبل ومن بعد.. لأن إختلاف الرأي لا يجب أن يفسد للود قضية
أبوعبيدة الماحي
Post: #69 Title: Re: مهرجان الزهور ! ... مشاهدات من مؤتمر الحزب Author: khatab Date: 01-30-2009, 08:38 PM Parent: #66
التحيه للحزب الذى الشيوعى بانعقاد مؤتمره الخامس
.
ولك يا صديقى الفنان .. احسب انك احتقبت كاميرتك
بعد ان تزينت بحسن الزوايا والنوايا .. الكاميرا ..
واختارت موقعا ً اقرب للقلب , عدستها,
منه للعين
فباحت
بهما..
معا
العين
و
القلب
..
لذا وجبت الاشاده
..
نعم للحراك اليمقراطى المرسوم بعنايه
. شكرا ً طلال .. لقد كنا هناك
بفضل حساسيتك
.
Post: #70 Title: Re: مهرجان الزهور ! ... مشاهدات من مؤتمر الحزب Author: Inaam Saad Date: 01-30-2009, 08:56 PM Parent: #69
ألف شكر يا طلال علي هذه المشاهدات القيمة جملة وتفصيلا
Post: #72 Title: Re: مهرجان الزهور ! ... مشاهدات من مؤتمر الحزب Author: Adil Osman Date: 01-30-2009, 09:44 PM Parent: #70
يا سلام يا طلال كنت متأكد أنك ستنقل لنا بعين الانسان والروائى والشاعر ملامح انسانية ولحظات عميقة وبسيطة من مشهد ( المناحة السودانية)
للأخت د. ندى مصطفى ، زميلتنا فى المنبر العام جملة باللغة البرتغالية او الاسبانية لست أدرى تقول فى معناها باللغة العربية النضال مستمر
la luta continua
قليل من البكاء والدموع
كثير من النضال
والوعى أنه فى مواجهة الفاشية والظلامية لا بد من سقوط ضحايا
والمواجهة ليست بالشعارات والكلام الكبار كبار المواجهة بالثقة فى الشعب والعمل معه وتنظيمه ونشر الوعى فى صفوفه والتعلم منه
معليش مهما قلت وكتبت ملايين الحروف، صورة واحدة من عينك الجميلة تكفى
Post: #73 Title: Re: مهرجان الزهور ! ... مشاهدات من مؤتمر الحزب Author: jini Date: 01-30-2009, 10:45 PM Parent: #72
يا سلام ! تعظيم سلام لهؤلاء الأماجد الذين لم أشك يوما فى صدق وطنيتهم وتعففهم عن اموال الشعب وتفانيهم فى خدمته فعلا نادوس بلد الغلابة! كل شى فيهو بالقلبة! المال عند بخيله والسيف عند جبانه! جنى
Post: #74 Title: Re: مهرجان الزهور ! ... مشاهدات من مؤتمر الحزب Author: تيسير عووضة Date: 01-31-2009, 01:06 AM Parent: #73
رغم جلال وهيبة البوست لم أستطع منع نفسي من الضحك بعلو صوت لما يلي:
Quote: مافيها حاجه يا حسين ، مش ورد عن سيدنا النبي إنو حبب إليه من الدنيا الطيب والنساء ، وإنو كان بيحنن شعرو ودقنو ؟ مافيها حاجه صدقني ... Take it easy وبعدين إنت قايل الصبغة الزمن ده بقت تاخد وكت ؟
بعدين ياخ خالتو أم عصام دي تصلح وبجدارة كوجه فلكلوري سوداني ملامحها فيها كمية من الأصالة تحير !
عيني باردة
صورة محمد عبدالله القطي بهديها للحاضر الغايب عادل عبدالعاطي "لعلمي بمحبته لهذا الشخص"
والبوست كلو كده على بعضو بهديهو "للزميل" عثمان عووضة
بعد إذنك طبعاً يا طلال
Post: #76 Title: Re: مهرجان الزهور ! ... مشاهدات من مؤتمر الحزب Author: محمد مكى محمد Date: 01-31-2009, 02:11 AM Parent: #74
شكرا طلال..شكرا طلال وإن كانت لاتكفى...
Post: #78 Title: Re: مهرجان الزهور ! ... مشاهدات من مؤتمر الحزب Author: Egbal Elmardi Date: 01-31-2009, 03:28 AM Parent: #74
طلال إذي الحال,وحالك أريته حالي... صورك خففت علي الحمي والشحتفه الماسكاني. ومستنيه رجعة الغايبين بي فارق الصبر عشان يدوني التفاصيل بي ضبانتها... وما تقول في إتنين منهم ذاكرتهم كاميرا....(عيني بارده يا أخوي) أررسول كان عندك زياده نزلها ...قالو البحر ما بيابه الزياده
شكرا ليك يا أخوي
Post: #75 Title: Re: مهرجان الزهور ! ... مشاهدات من مؤتمر الحزب Author: NASIR ALI Date: 01-31-2009, 02:06 AM Parent: #73
طلال عفيفي لك الودكله ابو عبيده مشتاقين ياعربي
Post: #77 Title: Re: مهرجان الزهور ! ... مشاهدات من مؤتمر الحزب Author: هاشم الحسن Date: 01-31-2009, 02:35 AM Parent: #75
شكراً يا طلال على إعادة تقديم هذه التظاهرة الديمقراطية بطريقة تشبه حالة كونك راجل فنان. الشاب أبوسجارة دا، و قطع شك، سيكون أحد أهم صنّاع الاحتمالات لمستقبل الفكر الإشتراكي السوداني. و مبرووووك... للجميع «ديمقراطية راسخة- تنمية متوازنة- وطن واحد- سلم وطيد»
Post: #79 Title: Re: مهرجان الزهور ! ... مشاهدات من مؤتمر الحزب Author: عمر ادريس محمد Date: 01-31-2009, 03:37 AM Parent: #77
شكرا على الزهور الجمال ياطلال ابهجتنا ياخ ..ويعيش الوطن
Post: #81 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 01-31-2009, 04:44 AM Parent: #79
Post: #82 Title: Re: مهرجان الزهور ! ... مشاهدات من مؤتمر الحزب Author: عثمان الشيخ Date: 01-31-2009, 07:14 AM Parent: #81
العزيز \ طلال شكرا للتوثيق وقبل كل ذلك شكرا للشهداء الذين جعلوا هذاممكنا والذين صمدوا تحت التعذيب
الفرحة في عينو الكل شباب وشيوخ وكما قال محجوب شريف
الكتوف اتلاحقت في السكة يابا
Post: #83 Title: Re: مهرجان الزهور ! ... مشاهدات من مؤتمر الحزب Author: ibrahim alnimma Date: 01-31-2009, 08:44 AM Parent: #82
Quote: مافيها حاجه يا حسين ، مش ورد عن سيدنا النبي إنو حبب إليه من الدنيا الطيب والنساء ، وإنو كان بيحنن شعرو ودقنو ؟ مافيها حاجه صدقني ... Take it easy وبعدين إنت قايل الصبغة الزمن ده بقت تاخد وكت ؟
عجبني هذا الرد ..وبصراحة ياحسين انا من الذين يلزمهم تصبيغ الشعر وكنت رافضاً لذلك الفعل لانه يستوجب المثابرة ..مما حال دون ممارستي لعادة التصبيغ ولكن اول مرة اعرف ان عدم تصبيغي لشعري يجعلني في عرف ملاسي في خانة المنتمين للطبقة العاملة عن وعي ... اما الزميل طلال فقد سفهت الخطة بطريقة مذهلة تناسب تماماً اسلوب ملاسي الذي يحاول دائماً النيل والسخرية من تاريخ الشيوعين السودانين .ولكن هيهات ..
Post: #84 Title: وين صور جدي "سليمان حامد"؟؟ Author: lana mahdi Date: 01-31-2009, 09:11 AM Parent: #83
يا اخواننا احتجاج لأبو الطل دة..وينها صور جدي سليمان حامد يا جماعة؟(:(:(: وبعدين:
حسام و عزة ديل ما جابو تالة المؤتمر؟ولا خلوها مع بطوطة يا طلال؟؟(: محبة و تقدير لنا
Post: #85 Title: Re: مهرجان الزهور ! ... مشاهدات من مؤتمر الحزب Author: خدر Date: 01-31-2009, 09:24 AM Parent: #66
ابوعبيدة سلامات كدي في الاول , انت ابوعبيدة الماحي الشاب المربوع شقيق الزميل ابراهيم الماحي ؟ اها كان طلعت انت وووب و كان ما طلعت انت صدقني حا اتفهم حدتكـ دي .
في قصة خدر و طارق و ديمقراطي دي يا ابوعبيدة انا اسمي طارق ابوعبيدة (و كفاكـ من الدستة ملعقة)
بعدين يا(زميل) هل موقفي من إختيار القيادة الجديدة بعني اني غير ديمقراطي؟ (راجع ترشيحات المؤتمر البننضم فيهو ده) باقي كلامي لو قلتو ليكـ هنا بكون اتكلمت عن ما يجب ان يقال في غير مكانو (المنبر) تلفوني في البروفايل لو حبيت بطرش ليكـ كلامي كامل هناكـ
بعدين يا ابوعبيدة في ذمتكـ زول لئيم و لسانو طويل زيي , بالي بيهو ناس حق مالكـ ياخي؟ انا لم اكن في (حق) يوما ما ولا ينبغي لي ياخي اها راجيكـ بي هناكـ في التلفون ولا افتح بوست منفصل ولا بجي اردمكـ هنا رداَ علي التصريحات المجانية الصرفتها لي دي
Quote: أقول لو صح تأوييلك المغرض ل (صرصرتهم) فهم ذاتم زيك : لا ديمقراطيين ودايسين بالنعال علي إرادة حزبهم وخياره الديمقراطي?
مالا النتائج ? غير إنو أنتصرت لغير المخلوعين من أثر إنيهار المعسكر الشرقي والإتحاد السوفيتي! أنتصرت عديل كده للذين لا يروا في تجربة الفشل فشلا للماركسية! العارفين لأزمتها لكن برضوا عارفين إنو تجديدها ما مسئوليتهم براهم ولا تجدبدها بتم بالإستعانه عليها بمنهج غير منهجها المادي ?
وعديل كده الما عاجباهو نتائج المؤتمر الخامس إشرب من البحر أو أختار الطوفان زي القبالو لكن الحزب أختار الإعتصام بجبل الشعب والماركسية وقواه الإجتماعية!!
وسلام كتير من قبل ومن بعد.. لأن إختلاف الرأي لا يجب أن يفسد للود قضية
أبوعبيدة الماحي
__ انا لسه متمسكـ بي تعليقي علي الصورة (رغم انف الجنود)
Post: #86 Title: Re: مهرجان الزهور ! ... مشاهدات من مؤتمر الحزب Author: Hussein Mallasi Date: 01-31-2009, 09:41 AM Parent: #85
Quote: وبصراحة ياحسين انا من الذين يلزمهم تصبيغ الشعر وكنت رافضاً لذلك الفعل لانه يستوجب المثابرة
لحنتها يعني!!
Post: #87 Title: Re: مهرجان الزهور ! ... مشاهدات من مؤتمر الحزب Author: عثمان الشيخ Date: 01-31-2009, 09:52 AM Parent: #86
الاعزاء ناصر علي ابوعبيدة الماحي ( العربي ) مشتاقين اجباركم مقطوعة ومبروك الخامس
Post: #88 Title: Re: مهرجان الزهور ! ... مشاهدات من مؤتمر الحزب Author: Hussein Mallasi Date: 01-31-2009, 10:06 AM Parent: #87
- شنو يا أستاذ صبغتك الليلة تقول يا ليل! - كييييييف .. انت نسيت إنو بكرة الخامس و للا شنو!!
Post: #93 Title: Re: مهرجان الزهور ! ... مشاهدات من مؤتمر الحزب Author: الليندي Date: 01-31-2009, 02:03 PM Parent: #88
الزميل طلال عفيفي لكل خالص التحايا والشكر والفيديو المدرج ده اقل ما يمكن أن اقدمه لك كاهداء بانعقاد المؤتمر الخامس لحزبنا الشامخ
Press Play to listen
Post: #94 Title: Re: مهرجان الزهور ! ... مشاهدات من مؤتمر الحزب Author: وليد محمد المبارك Date: 01-31-2009, 02:07 PM Parent: #93
في الانترنت اكسبلورر امشي 1) Tools 2) Internet Options 3) ٍSecurity
خت السيورتي ليفل ليهم كلهم في الهالي كده الرسالة حقت الشاة السودا ما حا تجيك لحدي ما بكري يشوف غله
اهم حاجة في اعلى صفحة الاكسبلورر حا يظهر شريط مفادة انه الاكتف اكس ما شغاله ما تضغط على الريط وتشغل الاكتف اكس
Post: #95 Title: Re: مهرجان الزهور ! ... مشاهدات من مؤتمر الحزب Author: Amjed Date: 01-31-2009, 02:16 PM Parent: #93
في جائزة ولا حاجة
الصورة جميلة بالفيها يا طلال
شكراً لكميرتك
Post: #96 Title: Re: مهرجان الزهور ! ... مشاهدات من مؤتمر الحزب Author: wadalzain Date: 01-31-2009, 02:41 PM Parent: #95
كلهم تبدو فى وجوههم الوسامة وفى عيونهم النجابة وفى قلوبهم الفرح
Post: #121 Title: Re: مهرجان الزهور ! ... مشاهدات من مؤتمر الحزب Author: Waly Eldin Elfakey Date: 02-02-2009, 09:58 AM Parent: #96
شكرا يا طلال للتوثيق واللمسة الفنية الرائعة ........... ............ بس عندي احتجاج. .... لارا ويارا بخاري وعبد الوهاب معز عبد الوهاب وبافي الشباب العسولين ديل ما تخموهم ساي من هسع وتملوا راسهم بالكلام الكبار داك لك خالص الود والتحية وعجل الله بحل مشاكل الوطن
Post: #123 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 02-02-2009, 12:16 PM Parent: #121
شكراً يا دكتور والي الدين .. وليك شوقه يا أخي .
بالنسبة للشباب الأعزاء ، يارا ولارا وعبدالوهاب ومن لف لفهم من أطفال الزميلات والزملا ، فما أعتقد - حد علمي - إنو أهلهم بيملوا راسم بكلام كبار ، لكن مشاركتم وحضورهم مع ذوييهم في حاجات زي دي جزء من تهرفهم على البيئة التي تحيط بهم ، انا لو كان عندي طفله أو طفل كنت هآخدم للإفتتاح ده زي ما كنت هآخدم لأي معرض أو جاليري أو زيارة عائلية كنوع من المساعدة ليهم على تلمس ما يحيط بهم بالإضافة لأني كنت في نفس الوقت هساعد على إنهم يفكروا تفكير حر ومنفتح بحيث إنو الحاجات دي كلها تتحول لمكون وجداني يقدروا هم يتعاملوا معاه بأفق مفتوح ويقرروا الإنتماء ليها او لا ..
بس برضو أعتقد أنك اثرت نقطة حساسة يا ريت يشاركونا فيها نجلاء وبخاري وعابدة ومعز ويورونا رأيهم حولها ..
مودتي العامرة يا صديق
Post: #129 Title: Re: مهرجان الزهور ! ... مشاهدات من مؤتمر الحزب Author: بخاري عثمان الامين Date: 02-03-2009, 04:52 PM Parent: #123
طلال ما عندي اي اضافة علي ردك للدكتور والي الدين
اوافق عليه جملة وتفصيلاً ......
وبالمناسبة انا ابوي بالاضافة الي انه ما شيوعي
اختلف عنه تماما فكل الاماكن التي كنا نزورها معه
ونحن صغار لم يهفو اليها قلبي وانا كبير ...
تشكر دكتور والي الدين ونحن ضد ال child abuse
Post: #124 Title: Re: مهرجان الزهور ! ... مشاهدات من مؤتمر الحزب Author: ايهاب Date: 02-02-2009, 12:16 PM Parent: #96
كل الجمال
انتظرنا البوست دا اسبوع
شكرا طلال
شكرا برضو صباحي
Post: #127 Title: Re: مهرجان الزهور ! ... مشاهدات من مؤتمر الحزب Author: خالد العبيد Date: 02-03-2009, 04:46 AM Parent: #95
سلام يا طلال تحياتي
Quote: خالد العبيد ، انا كمان بشكرك على إهتمامك بالتوثيق ... يا ريت تاخد الحاجة دي على عاتقك وتخليها موضوعك ، الجمع والأرشفه والتصنيف ...
أتمنى نشوفك يا زمل
حاضر ابوالزمل حاضر ابوي انا على استعداد ومجال التوثيق والارشفة والوثائق النادرة انا بديها كل وقتي قبل سنتين لمن مشيت السودان ناس الميدان مافارقتهم سلمتهم اعداد نادرة من الجريدة ام كانت عندهم بجانب وثائق اخرى وبكرة اجمل يا طلال وصدقني سيكون في جريدة الميدان اكبر واندر ارشيف مع كامل مودتي واحترامي
Post: #120 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 02-02-2009, 04:36 AM
من أجمل الحاجات في الخرطوم إنك في نص الظهيرة تدخل على ماما سعاد الأم والأستاذة والزميلة وتغرق في فيوض من المحبة ، دايماً تطلع من عندها عمران وفاهم حاجه جديدة ولاقط زاوية للنظر في الأمور ..
شكراً يا وليد يا أخي ، وعليك الله جرب المسألة دي يوم .
Post: #119 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 02-02-2009, 03:46 AM Parent: #60
شكراً يا حامد محمد .. ويا سلام لو الدنيا تديم علينا الأيام البتدينا أحاسيس زي دي
Post: #139 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 02-07-2009, 03:32 AM Parent: #60
Quote: لك الشكر
بوست مليان ومشبع
شكراً يا حامد ، وبسأل الله والدنيا والناس وكل من في إيدو قدره إن السودان كمان يكون مشبع ومليان .
Post: #109 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 02-01-2009, 09:32 AM Parent: #58
Quote: ما في ولا صورة لزول من جيلنا
سلام يا د.نجاة ، وعساكي طيبه وبخير انا في الحقيقة ما عارف إنتي ياتو جيل ، لكن زي ما قلت في أول البوست والكلام فالتغطيه الفوتوغرافيه دي ما شامله البته ، ولا بتعكس كل الأجواء أو كل المشاهد ، دي نتف صغيرة من هنا وهناك أخدتها في اللحظات القدرت أمسك فيها الكاميرا ...
تحياتي
Post: #111 Title: Re: مهرجان الزهور ! ... مشاهدات من مؤتمر الحزب Author: Egbal Elmardi Date: 02-01-2009, 06:56 PM Parent: #109
إزي الحال تاني
نمره تلاته بعد عم تجاني ده حاتم قطان؟
سنين ودنين...
Post: #112 Title: Re: مهرجان الزهور ! ... مشاهدات من مؤتمر الحزب Author: محمد حامد جمعه Date: 02-01-2009, 07:09 PM Parent: #109
بامانة - وبعيد من حزبى وحزبك - انت ود فنان ومبدع
Post: #114 Title: Re: مهرجان الزهور ! ... مشاهدات من مؤتمر الحزب Author: مدثر محمد عمر Date: 02-01-2009, 09:05 PM Parent: #109
شكرا يا طلال علي المجهود المقدر ياخي واستمتعت بالصور جدا وبالملامح السودانيه الخالصه في وشوش كتيرين من الاعمام والخالات والشباب... ربنا يخدر ضراعك
Post: #115 Title: Re: مهرجان الزهور ! ... مشاهدات من مؤتمر الحزب Author: فيصل الباقر Date: 02-01-2009, 11:17 PM Parent: #109
شكراً طلال و شكراً لمساهمة الصديق الذى "من حقه أن يصور". و أكيد "إيدعلى إيد نبدع جديد". ننتظر مشاركات آخرين وأخريات كانت و ستبقى كمراتهم تسجل حضوراً أنيقاًوجميلاً. وأرجو أن يتواصل هذا البوست حتى نلاقى أفراح السادس و الذى نراه قريباً و يرونه بعيداً. و برضو " ماشين فى السكة نمد ****من سيرتك للجايين"
Post: #108 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 02-01-2009, 09:20 AM Parent: #55
العفو يا عبد المنعم سيداحمد ، وبركه الشاركتنا عبر العدسه المره الجايه على الهواء مباشرة ، قول آمين ...
Post: #97 Title: Re: مهرجان الزهور ! ... مشاهدات من مؤتمر الحزب Author: mustafa mudathir Date: 01-31-2009, 09:50 PM Parent: #1
يا سلام يا طلال! فرحتنا والله! تحية لحزبنا وتهاني. والله انا كنت راجيك! ياخي دا إسمو البوست الأقصى the ultimate post اقصى في الإبانة وفي التعبير وفي الإسعاد! لك الشكر مصطفى مدثر
Post: #98 Title: Re: مهرجان الزهور ! ... مشاهدات من مؤتمر الحزب Author: قيقراوي Date: 01-31-2009, 11:31 PM Parent: #97
التقى جيل البطولات بجيل التضحيات شكراً جميلاً على الفرح السكبتوه جوانا
شكراً طلال على الزهور . . . و اهو انت ذاتك وسط الزهور متصور الليندي يا فنان
اهو الواحد كدا خمّس لفافات الفرح معاكم زي الما حاصل شي
Post: #103 Title: Re: مهرجان الزهور ! ... مشاهدات من مؤتمر الحزب Author: احمد العربي Date: 02-01-2009, 03:40 AM Parent: #98
شبابك تشابك جميل يا حزب جميل يا طلال
Post: #104 Title: Re: مهرجان الزهور ! ... مشاهدات من مؤتمر الحزب Author: ihsan fagiri Date: 02-01-2009, 04:18 AM Parent: #1
جسد الحزب
Post: #107 Title: Re: مهرجان الزهور ! ... مشاهدات من مؤتمر الحزب Author: زهير الزناتي Date: 02-01-2009, 09:19 AM Parent: #104
Post: #110 Title: Re: مهرجان الزهور ! ... مشاهدات من مؤتمر الحزب Author: طه كروم Date: 02-01-2009, 05:57 PM Parent: #107
شكرا جميلا الزميل طلال
بهذا التدفق الإبداعى الوافر
جعلت مشاركتنا ونحن خارج السودان فرح الخامس لها طعم ولون
شكرا .. وعمر مديد لهذه القامات السوامق ,,
Post: #113 Title: Re: مهرجان الزهور ! ... مشاهدات من مؤتمر الحزب Author: عمر دفع الله Date: 02-01-2009, 08:04 PM Parent: #110
Post: #116 Title: Re: مهرجان الزهور ! ... مشاهدات من مؤتمر الحزب Author: عاطف مكاوى Date: 02-01-2009, 11:55 PM Parent: #113
طلال يا جميل
في شخصك رأيت روعة الحزب الشيوعي السوداني
قابلتك في هذا المنبر وعندها عرفت عظمة الحزب
ففيهم الرقيقين كامثالك... وفيهم الأدباء والفنانين
وفيهم الصعاليك والذين أتمني أن لا أكون منهم وان دعي
الداعي فمرحبا بالصعاليك
ولكن عندما التقيتك وجها لوجه قلت لنفسي يا فرحي ويا فرح
الحزب الشيوعي السوداني بعضو من شاكلة هذا الشخص الجميل.
شكرا لهذه التغطية
وان كنت علي علم بأن التغطية الرسمية ستجد طريقها الي العامة
خلال أيام !!!!!!!!!!! ولكني يمكن أن أبصم بأن جانب التصوير
قد لا يفوقك فيه أحد ...احتمال الملك وعبدالمنعم الجزولي والرضي .
Post: #117 Title: Re: مهرجان الزهور ! ... مشاهدات من مؤتمر الحزب Author: esam gabralla Date: 02-02-2009, 00:47 AM Parent: #116
عارفك حتشوف و تشوت من زوايا تخصك وحدك زوايا اليفة و حساسة و انسانية .. زوايا عادية لم يطالها صدأ حتى اللحظة زوايا تعرف ان "الزعيم الفقرى التجانى الطيب " هو ايضا العم العادى الانسان التجانى وان للاختلاف معه مكان و انه يقبل و يحترم هذا الاختلاف عكس ما تحاول ترسيخه صورة "شيطنة" هؤلاء البشر سلام طلال .... الباقي بعدين
Post: #122 Title: Re: مهرجان الزهور ! ... مشاهدات من مؤتمر الحزب Author: Waly Eldin Elfakey Date: 02-02-2009, 10:02 AM Parent: #117
عذرا الكلام ده جا فوق
]
Quote: شكرا يا طلال للتوثيق واللمسة الفنية الرائعة ........... ............ بس عندي احتجاج. .... لارا ويارا بخاري وعبد الوهاب معز عبد الوهاب وبافي الشباب العسولين ديل ما تخموهم ساي من هسع وتملوا راسهم بالكلام الكبار داك لك خالص الود والتحية وعجل الله بحل مشاكل الوطن
Post: #125 Title: Re: مهرجان الزهور ! ... مشاهدات من مؤتمر الحزب Author: DEYAA MOHD Date: 02-02-2009, 02:56 PM Parent: #122
قدر ما اقول ما حاوفيك حقك طلال يا روعة شكرا على هذا الفرح المتدفق على هذه الوجوه السمحة التى طالما اشتقنا ليها شكرا على كل لحظة اديتنا ليها بكينا وفرحنا لشوفة هذه الوجوه السمحة المتسامحة رقم البعد قصرت المسافات عاش نضال الحزب الشيوعي السوداني ضياء كمبال
Post: #128 Title: Re: مهرجان الزهور ! ... مشاهدات من مؤتمر الحزب Author: خالد العبيد Date: 02-03-2009, 04:48 AM Parent: #125
سلام يا طلال تحياتي
Quote: خالد العبيد ، انا كمان بشكرك على إهتمامك بالتوثيق ... يا ريت تاخد الحاجة دي على عاتقك وتخليها موضوعك ، الجمع والأرشفه والتصنيف ...
أتمنى نشوفك يا زمل
حاضر ابوالزمل حاضر ابوي انا على استعداد ومجال التوثيق والارشفة والوثائق النادرة انا بديها كل وقتي قبل سنتين لمن مشيت السودان ناس الميدان مافارقتهم سلمتهم اعداد نادرة من الجريدة ام كانت عندهم بجانب وثائق اخرى وبكرة اجمل يا طلال وصدقني سيكون في جريدة الميدان اكبر واندر ارشيف مع كامل مودتي واحترامي
Post: #142 Title: Re: مهرجان الزهور ! ... مشاهدات من مؤتمر الحزب Author: طلال عفيفي Date: 02-28-2009, 04:42 AM Parent: #107
شكراً يا زهير على الصوره الظريفه : الشيوعي السوداني !
طلال .. والله داير اسالكم سؤال جادي و من غير زعل ..
.. ..
هل يعني لازم عشان ابقى شيوعي .. أكون زول هامل ..؟!
Post: #135 Title: Re: CHE Author: طلال عفيفي Date: 02-05-2009, 00:32 AM Parent: #131
Quote: طلال .. والله داير اسالكم سؤال جادي و من غير زعل .. هل يعني لازم عشان ابقى شيوعي .. أكون زول هامل ..؟!
حميده ، الشيوعيه دي ما بيقبوها ، ما زي الهندسه والطب ، الواحد "بيكون شيوعي" ، دي بذره في القلب وحاجه في الروح غالباً ما الإنسان بيكون مجبول عليها . أما مسألة الإنضمام للحزب ، فدي بينظر فيها من قبل الفروع والهيئات ؛
Post: #141 Title: Re: CHE Author: امل احمد عمر Date: 02-11-2009, 04:44 PM Parent: #135
الواحد "بيكون شيوعي" ، دي بذره في القلب وحاجه في الروح غالباً ما الإنسان بيكون مجبول عليها .
أزيك يا طلال ..
عدم حضوري للخامس خلى الروح مشحتفة لحد الليلة
مع انو ابوي حاول يوصل لي المهرجان صوتاً وصورة ..
وانت كالعادة نقلتنا عبر زاويتك الحميمة لمهرجان الزهور ..
تحياتي وودي
Post: #132 Title: Re: CHE Author: rosemen osman Date: 02-03-2009, 05:46 PM Parent: #130
شكرا يا طلال .. فرحة الخامس لم توقظها الا من خلال صورك والوجوه.. غرباء يا صديق ...والغريب تموت فيه أشياء كثر ...خوفى عليك
Post: #133 Title: Re: CHE Author: محسن خالد Date: 02-03-2009, 05:51 PM Parent: #132
وجه عمنا التجاني يا طلال مُبَشِّر جداً جداً، وسلامٌ على سلام، في الصورة أم عِمَّة. رغم كل الأعباء واستاندباي الخدمة التي بلا منٍّ ولا أذى، وطويلة الأجل. أما نبي بصحيح. تحياتي لك يا أستاذ التجاني، ولكل المنتدين.
-------------- شكراً يا طلال على الفوتوغرافيا
Post: #134 Title: Re: CHE Author: Mohamed Elgadi Date: 02-04-2009, 04:12 AM Parent: #133
Tallal wrote:
Quote: زي ما قلت في أول البوست والكلام فالتغطيه الفوتوغرافيه دي ما شامله البته ، ولا بتعكس كل الأجواء أو كل المشاهد ، دي نتف صغيرة من هنا وهناك أخدتها في اللحظات القدرت أمسك فيهاالكاميرا ...
This is why I missed the photo of البنت الجميلة نور الصادق العوض بت نيالا
Million of thanks for this beautiful 'slide show'...
Quote: كلهم تبدو فى وجوههم الوسامة وفى عيونهم النجابة وفى قلوبهم الفرح
شكرا يا طلال
و مبروك للحزب الشيوعى قيام مؤتمره الخامس. ندى
Post: #138 Title: شكرا للحزب الشيوعي السوداني Author: Nuha Ahmed Date: 02-05-2009, 10:33 PM Parent: #1
Quote: شكر وعرفان
بقلم: أتيم قرنق دينق - نائب رئيس المجلس الوطني
بمناسبة المؤتمـر الخامـس للحزب الشيـوعي السـوداني الرفيقات والرفاق، المناضلون والمناضلات تحية ثورية خالدة · يسعدني أن أكون من بين المشاركين في افتتاح أعمال مؤتمركم العام هذا وبلادنا في حاجة إلى تضامننا أكثر من أي لحظة من حقب تاريخنا الوطني. ينعقد مؤتمركم ووطننا في مفترق الطرق بين أن يكون موحداً قوياً مزدهراً متقدماً معاصراً أو إن يتشظى ويتشتت ويصير منسياً مندثراً. · أيها الرفاق أنتم اليوم تعقدون مؤتمركم وأنتم تعلمون الدور النضالي الايجابي الذي قام به حزبكم كفصيل فعال من فصائل النضال الوطني في السودان. إن ما كانت تعرف بمراكز الشبيبة لحزبكم في منتصف القرن الماضي كانت هي الفضائية الأولى في السودان في نشر الوعي عن العمل النقابي وعن النضال الثوري وعن حقوق المواطنة في السودان وعن حقوق الشعوب المضطهدة في أرجاء العالم. فلولا مجهودات حزبكم، الحزب الشيوعي السوداني، فمن أين لنا في السودان في ذلك الزمان الذي لم يكن توجد فيه الأجهزة الكافية من راديوهات الترانستر ناهيك عن التلفزيون، نعم من أين كان لنا أن نعرف عن نضال الشعب الفلسطيني البطل وعن الثورة الجزائرية الفدائية وعن نضال الشعب الفيتنامي المقاوم وعن جهود الشعب الصيني العظيم في بناء أمة حديثة قوية. لقد قمتم بنشر الوعي الثوري عن حركات التحرر الأفريقي، عن عبد الناصر، نكروما، نياريري، مانديلا، سوكارنو، نهرو، جيفارا، بن بله، كاسترو، بن بركة، هوش منه وغيرهم من ثوار العالم. · إن دوركم في رفع الوعي النضالي في السودان هو دور ريادي وقيادي كما أنه لم يسبقكم في نصرة المرأة السودانية أي فصيل من فصائل العمل السياسي أو العمل الاجتماعي في السودان باستثناء الشيخ العظيم بابكر بدري الذي سبقكم في سبيل حق تعليم المرأة السودانية. · أيها المناضلون والمناضلات: لقد تعرض حزبكم من بين فصائل النضال الوطني في السودان لأكثر النكبات والاضطهاد السياسي في أزمنة الحكومات الديمقراطية والحكومات الشمولية، إنها مهزلة التاريخ. نكبتكم كانت أكثر من نكبة البرامكة. ولكن ها هو أنتم اليوم تجتمعون في نصف النهار في قلب الخرطوم والكل حضوراً وشهوداً. لقد تغيرت الكثير من المفاهيم في هذا الوطن بعضها ايجابي وبعضها سلبي. نعم ها هنا أنتم بعد أن عبرتم بحراً هائجاً من حقب التاريخ وها هم أنتم اليوم قد خرجتم من نفق مظلم من فصول التاريخ السياسي السوداني. وهنا مرة أخرى التقيتم بالنور وهنا في قلب الخرطوم التقى "جيل التضحيات بجيل البطولات". · نعم: ولكن إلى أين من هنا نحن ماضون وكيف نضمن وحدة وقوة ورفاهية هذا الوطن؟ لقد تولى عهد تصنيفنا لبعضنا البعض بأوصاف ونعوت عفى عنها الزمن بالضرورة (رجعي، تقدمي، عميل، كافر، ملحد، مجاهد، مؤمن الخ...) نحن اليوم (سودانيون بالمواطنة) نحن اليوم نبحث عن كيفية تقوية تنوعنا وتعدديتنا. إن السودان بحدوده الحالية هو من صنع الآخرين ولكن الاحتفاظ بالسودان بحدوده هذه هو من صميم إرادتنا القومية، ووحدته وديمومة الوحدة هي من واجباتنا الوطنية وعلى ضوء هذا أتمنى أن تكون خطواتكم القادمة هي تحقيق استقرار ووحدة الوطن من خلال التنوع السوداني. * التحية لشهدائكم، عبد الخالق محجوب، الشفيع أحمد الشيخ، جوزيف قرنق وغيرهم من أبناء وبنات وطن النجوم والنيل أتمنى النجاح لمؤتمركم والسلام عليكم،،،
أتيم قرنق دينق 24/1/2009م الخرطوم[/
شكرا للحزب الشيوعي السوداني ومبروك قيام المؤتمر الخامس
Post: #140 Title: Re: شكرا للحزب الشيوعي السوداني Author: Haydar Badawi Sadig Date: 02-08-2009, 05:02 AM Parent: #138
فوق، للمزيد من التمتع بعبق الحرية!
Post: #143 Title: Re: شكرا للحزب الشيوعي السوداني Author: أبو ساندرا Date: 02-28-2009, 09:27 AM Parent: #140
يا ولد يا فنان يا مدهش لقطاتك فيها روح ونطق
كنت متمني أشوف لقطات فردية لمجموعة الكورال ، كل واحد براهو
