Post: #1
Title: وحالة أن يكون المرء أخت تبارك....
Author: Tumadir
Date: 01-08-2007, 02:21 PM
Parent: #0
اعزائى الافاضل
تحياتى واحترامى
انقطعت عن المنبر زمنا لانشغالى بأمور الدنيا الماعندها آخر
وقد ترامى الى سمعى بأن تبارك "اخوى" قد أفرد لسانه السليط فى الناس بلا استثناء
كما ترامى الى نفس السمع ان الكثيرين يعفون عن تبادل الاساءة معه "عشان خاطر أولاد شيخ الدين" او "عشان خاطر تماضر وهشام" ..الخ
تبارك ذات مستقلة ولا يمكن أن ادعى بأننى امتلك سلطة الوصاية عليه أو على آرائه
ولكنه كتب اسم والدنا "شيخ الدين جبريل" كاملا ليذيل به اسمه ..
واضطر الناس لمحاحاته باسمنا
وأعلم جيدا انه ذات رقية ومحلل ذكى وساخر طريف
الا أنه يجب على أن أسوى الامر مع أعضاء هذا المنبر الذى احتضن كتاباتى لزمن يكاد من كثافته يساوى كل تاريخ حياتى
ولم يحدث ذلك الا لأننا نقدم "الخير" على "الشر" والا لأننا بالاجماع نبحث عن دروب المودة التى بها لا يفسد اختلاف الرأى ..
اتقدم باعتذارى لكل الاشخاص الذين تضرروا من مداخلات تبارك
وأخص بالذكر الاستاذ الموصلى ..مع انى بعد الاطلاع على الموضوع وجدته وقد أبلى بلاءا حسنا فى موضوع النقد الموسيقى
وجانبته الحكمة فى التخاطب مع هذا الرجل الذى تحترمه كثيرا
وللأخت لنا المهدى ..اميرة البورد وأميرة عصرها صديقة الأسافير
وللأخ عبد الله العجيل الذى استضافنى وابنائى فى منزله العامر فى سان فرانسسكو ولنا مع زوجته واصهاره اواصر لاتموت من المودة والاحترام
وللاخ عمر على ..احسن من قرأت له فى هذا المكان ..
ولتراجى الثائرة مهما كان اختلاف الناس معها فهى جديرة بالاحترام
وللآخرين الذين لم يخبرنى بهم أحد
لهم المعذرة وليمسحوها لى فى وشى ده ..
فوالدنا رحمه الله كان أجمل من "تداخل" مع الجيران والاصهار والاهل وطلبته وأصدقائه وما زالت أم درمان وبربر وكردفان وجوبا تذكر حسن خصاله
وقد أورثنا حب واحترام الآخر وجبلنا عليه
فلكم منى أحسن الود وأجمله
بقى أن أهمس فى أذن هذا الفتى العريس ..ان يهجر "شراميته" التى يزهو بها ..وينضبط فى خط الاحترام العام..وانا ما زلت فخورة بطريقته
فى تكوين افكاره ووعمق تحليله حتى يثمادى فى قول ما لايحب الآخرين سماعه ....
أرجز أن أنتهز هذه السانحة لتعزية الاخ البرنس والهام على رحيل والد البرنس فقد سمعت بهذا الخبر بعد الارشفة
وكذلك أحر التعازى موصولة للأخ انتهازى على رحيل والده ..
رحمهما الله رحمة واسعة وألهما أهليهما الصبر والسلوان
وأرجو أن يجد لى العذر من لم أجامله فى وفاة راحل عزيز ..
لاننى لم أقرأ الخبر فى غيابى
وأدام الله المعروف والمودة بين الناس ...
ولكم ألأف التحايا ......
|
Post: #2
Title: Re: وحالة أن يكون المرء أخت تبارك....
Author: أحمد الشايقي
Date: 01-08-2007, 02:25 PM
Parent: #1
تماضــر
Quote: الا أنه يجب على أن أسوى الامر مع أعضاء هذا المنبر الذى احتضن كتاباتى لزمن يكاد من كثافته
يساوى كل تاريخ حياتى
ولم يحدث ذلك الا لأننا نقدم "الخير" على "الشر" والا لأننا بالاجماع نبحث عن دروب المودة التى بها لا يفسد اختلاف الرأى ..
|
راقيـة وعظيمـة
أحمـد الشايقي
|
Post: #3
Title: Re: وحالة أن يكون المرء أخت تبارك....
Author: Hussein Mallasi
Date: 01-08-2007, 02:30 PM
Parent: #1
محنة تبارك
_____
كل سنة و انت طيبة يا تماضر.
|
Post: #4
Title: Re: وحالة أن يكون المرء أخت تبارك....
Author: waleed500
Date: 01-08-2007, 02:35 PM
Parent: #3
وحاة ربى اخوك تبارك ده مجموعة اخوة
ومفروض تتباهى بياهو اريتو اخوى انا
رجل واضح وصريح وعارف هو بقول فى شنو
لك التحية اينما كنت اخى تبارك ولك التحية
اخت تبارك وكل سنة وانتى ومن معك بالف خير
|
Post: #5
Title: Re: وحالة أن يكون المرء أخت تبارك....
Author: Hussein Mallasi
Date: 01-08-2007, 02:57 PM
Parent: #4
Quote: ولكنه كتب اسم والدنا "شيخ الدين جبريل" كاملا ليذيل به اسمه ..
واضطر الناس لمحاحاته باسمنا |
تفتكري يا تماضر لو كان كتب اسمو بس كان حيكون في فرق!
_____
هشام و الصادق و قصي
أسماء أولى ساكت ما كاتبنها!!
|
Post: #6
Title: Re: وحالة أن يكون المرء أخت تبارك....
Author: saif massad ali
Date: 01-08-2007, 03:00 PM
Parent: #5
حسين ملاسي
جيت داخل
ليش ما شفتك في بوست الجيلي
خايف من كلمة جدو
|
Post: #7
Title: Re: وحالة أن يكون المرء أخت تبارك....
Author: محمد عادل
Date: 01-08-2007, 03:03 PM
Parent: #4
Quote: وللآخرين الذين لم يخبرنى بهم أحد
لهم المعذرة وليمسحوها لى فى وشى ده ..
|
العفو ياستاذة سلامة وجهك طبعا
كل شاه معلقة من رقبتها
ولكن الحبيب تبارك اساء الى انا واساء الى الاميرة لنا والى الحبيب العجيل
وانا ادرى علاقته مع معتم الجبلابى لكن لاداعى ان يسى الى
ولكن مافى اى مشكلة ياستاذة تماضر
لانو مقامك انتى ومقام عمنا الحاج هشام غالى جدا عندنا
|
Post: #8
Title: Re: وحالة أن يكون المرء أخت تبارك....
Author: تبارك شيخ الدين جبريل
Date: 01-09-2007, 03:30 AM
Parent: #7
انا أخو البنات الما خمج!
|
Post: #9
Title: Re: وحالة أن يكون المرء أخت تبارك....
Author: قاسم المهداوى
Date: 01-09-2007, 04:17 AM
Parent: #1
تماضر
سلاااااااااااااام وتحايا من القلب
وحالة ان يكون تبارك شقيقك ( اخيك ) انه لشىء مفرح
بل ومبهج حد الفرح ( الخرافى )
تبارك كائن حى يمشى ويتنفس ويستطيل حد كل الانسانية
شاء الناس ام غير ذلك ....
ويا تماضر لك ان تفخرى بهذا الشقيق ( الشقى ) حد الادب ذاتو
يا عزيزى سر وعين الرب ترعاك ( رب العاليمن )
ولك منى مليون سلااااااااااام وتحية
قاسم المهداوى
|
Post: #10
Title: Re: وحالة أن يكون المرء أخت تبارك....
Author: Tragie Mustafa
Date: 01-09-2007, 07:32 AM
Parent: #9
تماضر لا تقلقي يا حبيبه
فالتنوع في الاسره الواحد يدل على رسوخ الديمقراطيه في بيتكم
تحيه للوالد المرحوم ما قصر تب.
نحن تبارك ما بنزعل منه
الا قرصناه جامد بس عشان يخلي الطبيز.
محبتي وتقديري.
تراجي.
|
Post: #11
Title: Re: وحالة أن يكون المرء أخت تبارك....
Author: تبارك شيخ الدين جبريل
Date: 01-09-2007, 08:03 AM
Parent: #10
| Quote: الا قرصناه جامد بس عشان يخلي الطبيز. |
انتى القرص ما بجيب فيك نتيجة زاطو! (يا صاحبة الصهاينة)
ويا تماضر "ليس الفتى من قال كان أبى"
لاكين زى ما بيتسارع لى ذهنى دايماً فى ذكراه:
"غرّارة العبوس"
(والإسم الثلاثى هو ما فرضه علىّ بكرى أبوبكر فى معرض ممارسته للتمنبر)
|
Post: #13
Title: Re: وحالة أن يكون المرء أخت تبارك....
Author: يازولyazoalيازول
Date: 01-09-2007, 09:27 AM
Parent: #12
تبارك
أقعد ساى
|
Post: #14
Title: Re: وحالة أن يكون المرء أخت تبارك....
Author: معاذ حسن
Date: 01-09-2007, 09:32 AM
Parent: #13
الاستاذة تماضر
كل سنة وانتي بالف خير وعافية
لم يتسني لنا حتى الان اختبار حالة كون المرء اخ تبارك
ولكن اثق تماما ان حالة كون المرء اخ تماضر وهشام
فهذا امر يحسد عليه تبارك.
محبتي لكم جميعا.
|
Post: #16
Title: Re: وحالة أن يكون المرء أخت تبارك....
Author: humida
Date: 01-09-2007, 09:41 AM
Parent: #14
أجمل حاجة في المنبر دا ..
انه الموضوع بكون عبارة عن كمية من ( المتناقضات ) ..
تبارك ( ذات مستقلة ) ..
واعتذر ( انا ) للناس .. !! 
|
Post: #15
Title: Re: وحالة أن يكون المرء أخت تبارك....
Author: تبارك شيخ الدين جبريل
Date: 01-09-2007, 09:40 AM
Parent: #13
والله يا هشام داير اقعد ساى، لاكين اتكلم مع لؤى دة فى الأول
يا لؤى شكراً على الشعور الطيب، لاكين ....
انا لو عندى أىّ علاقة بى حقوق الطبع والنشر بتاعة الأعمال دى؛ كان تكونوا أعلنتوا إفلاسكم انت وبكرى أبوبكر لى هسة!
لاكين نقول شنو؟ قالوا لينا اقعدوا ساى!
|
Post: #17
Title: Re: وحالة أن يكون المرء أخت تبارك....
Author: humida
Date: 01-09-2007, 09:56 AM
Parent: #15
تبارك يا عزيزي ..
سياسة فرض الرأي .. ثقافة سودانية ..
ولمن الناس تكبر شوية الحكاية بتبقى ( أجاويد ) ..
وبعدها ممكن تتحول للاستعطاف وذي ما قال هشام بكل حميمية ..
( تبارك أقعد ساي )..
تماضر شيخ الدين .. واصحابها الكرام .. او جيلها ..
بعتبروا من الحرس القديم ( لو بتسمع اخبار يعني ) ..
لسع دايرين الناس تصفق ليهم .. وتقيف احترام في جلالة الكلمة البتطلع منهم ..
وظهور اي تيار تاني من ابناء شيخ الدين .. ينتهج نهج غير الفكرة الخاتينها هم ..
بخلي ست تماضر .. تقوم تجي لحدي الكمبيوطر بتاعها وتكتب لينا المقال الطويل والعندو ضنب دا ..
ليس دفاعا عن عن الرأي والرأي الآخر .. ولكن اعتذار للشلة العزيزة من قلة ادب الشافع الاسمو تبارك ..
ولو جاء الامر بصورة ( لف ودوران ) ..
مرة تانية .. اقيف في الحتة دي ..
تبارك ( ذات مستقلة ) ..
و ( أنا ) اعتذر للناس ..
--------------------------------------------------------
* لماذا يعتقد الناس أن لدي ( قنبور ) ..
يكون عندي ( قنبور ) جد جد يا ربي .. !!
|
Post: #18
Title: Re: وحالة أن يكون المرء أخت تبارك....
Author: لؤى
Date: 01-09-2007, 11:30 AM
Parent: #15
أخي تبارك
تحاياي
لا شُكر على واجب ، فكلّ من يرفع إسم الوطن عالياً يستحقّ منّا الإشادة ..
أمّا بخصوص حقوق الطّبع والنّشر فأنا لم أقم بنقل الأعمال تلك من اسطوانات أو أشرطة ، وإنّما نقلتها من مواقع كتبت عن الوافر ورشا وقدّمت تلك الأعمال جميعها ..
كُل الوُد
وعُذراً تماضر
|
Post: #19
Title: Re: وحالة أن يكون المرء أخت تبارك....
Author: الملك
Date: 01-09-2007, 02:01 PM
Parent: #1
توماضر
..
..
"بعيداً عن كل شئ"
كل سنة وانتى طيبة
...
...
وتعود الأيام
|
Post: #20
Title: Re: وحالة أن يكون المرء أخت تبارك....
Author: عشة بت فاطنة
Date: 01-09-2007, 02:19 PM
Parent: #19
تماضر كل سنة وانتي طيبة
ومبروك العرس يا تبارك ومبروك وجودك وسط أهلك وناسك
وانا يا تبارك ما بوصيك -بعرفك ما بتقصر -البستاهل كلموا وقول العايز
تقولوا فيه بس بموضوعية وسعة صدر عشان تماضر ما تتدخل وزي ما قالوا
ليك كل شاة معلقة من عرقوبة يا تماضر ، وتسلموا يا ناس شيخ الدين عموم ..
|
Post: #21
Title: Re: وحالة أن يكون المرء أخت تبارك....
Author: malik_aljack
Date: 01-09-2007, 02:37 PM
Parent: #20
تبارك
إنت ياهو الزول الما قعدت معاهو كتير في الدنيا دي لكن لما كنت بتجي تزور ود خلتك (عثمان أبو عاقله) الذي أراه كثيرا في منامي و بصحبة الأشخاص (الذين) أود أن يجمعني بهم الزمن في مكان واحد
حكاوي كنا نتبادلها في غيابك مع العزيزه سهام عثمان
أين عوضيه عزالدين ينت خالتكم و عبالعظيم
لماذا لا تقوم بحملة إقناع هوءلاء العجائب بالإنضمام للبورد
و بانضمامهم ممكن الناس تتلاقى زي ما كانوا بيتلاقوا في كافتريا السوق الشعبي أو كافتريا قانون
عموما لا أنكر أن الكثير هنا لن يستطيع أن يفهمك و يتعامل معك بدون أن يفهم كلامك غلط بأنك تسيء له
|
Post: #22
Title: Re: وحالة أن يكون المرء أخت تبارك....
Author: Elmosley
Date: 01-09-2007, 05:22 PM
Parent: #1
تماضر اختي الحبيبه
ياخي ليه تعتذري
تبارك ده اخوي الصغمبوتي وانا لمن امشي فرجينيا
بنزل معاهو في البيت وبوريهو ليهو
==============
محاولاته في النقد الموسيقي غايه في الجوده واسلوبه في الكتابه رائع جدا
مشكلتو إنو بالو ماطويل ومابتحمل النقدالايجابي
يعني هسع لو انتي صححتيني في معلومه تخص الاخراج او التمثيل
أنا ما حأشكرك
==============
حرم البرش اسم (شيخ الدين باللبن نرشو بالدم)
وكان جانا (سهم طايش) من جهة اسمو نعتبرها كما الورود المنثورة
تسلموا ياآل شيخ الدين بما فيكم (تبارك)
وتقبلوا فائق محبتي واحترامي وتقديري
|
Post: #23
Title: Re: وحالة أن يكون المرء أخت تبارك....
Author: رأفت ميلاد
Date: 01-09-2007, 11:37 PM
Parent: #22
والله يمكن نظرى ضعيف
لكن يا تماضر بوسـتك ما عجبنى
خاصة وإنتى شـايفة ملاسى بمارس هوايتو
عن نفسـى إحتكيت بتبارك فترة غير قصيرة فى مكان آخر
هو سـاخر لكن جواهو جميل وفنان
وعمرى ما خلطو بإسـم هشـام
وأناأعتقد الموضوع وكت وما موضوع عوائل وإعتزارات
متأسف لكتابتى لكن البعض إسـتثمروا الموضوع ببياخة
مرحب بيك تبارك
وأسف مرة أخرى يا تماضر
|
Post: #24
Title: Re: وحالة أن يكون المرء أخت تبارك....
Author: Tumadir
Date: 01-10-2007, 01:22 AM
Parent: #23
وكل سنة وانت طيب يا ملاسى
وليد 500
والقال ليك منو انا أخوى ما فخورة بيه ..
اخوى زين الولاد ..لكن بعرفو "قطيييييم" يحمد سيدو
سيف مساعد ..تحياتى
محمد عادل
وأهو أنت ده واحد من الناس المقصود بيهم البوست ..
تطييبا لخواطركم ضحينا ليكم بأخونا الصغير ...:
تبارك ....وانا أختك انت!!! اكتر زول واقع ليه كلامى ؟ صاح؟
قاسم المهداوى ..
عارفة ياقاسم عارفة ..تبارك ما ساهل ابدا ..وشكرا لك على الكلام السمح عنه
ده كله ...ما غريب على ..لكن الما بعرفك بجهلك..وهو ما بعرف الناس سمح..وداير ليه لكزة ..ولكزتو
ولك آلاف التحيات
تراجى أهلا ...بعد ده امشوا اتداوسوا للصباح ان شا الله تصلوا سوق الحمير
تبارك الاسم انت شايلو وتستحقو لكن الناس استنجدوا بينا ..خت الاسم فى بالك فى اثناء الخصومة ..
لؤلؤ..
تسلم يا بديع شايفاك أدوك عكاز اسمو حقوق الطبع ..حضر عكازك..
يازول الحاج هشوم الهميم ..
قوليه: انقرع!! وهو بيفهم.. لك محبتى الصادقة..ومبروك الحجة ..
(ضربنالك)
معاذ حسن ..والله زى ما بنفخر بيه بفخر بينا
نشاكلو بي جايى ونفخر بيه بى جايى ..خليك مطمئن ..
حميدة ..حسة انت جايب ليك تمانين قوس عشان تكلم تباركنا ده عن "جيل" ومتناقضات وما ادراكا؟ يجلجل بقاقك
يا عملات جيل ناس البقيع الله يرحمها
كدى قول كوع وسلم على بنات بقيع ..خالاتك "جيلى" ان شا الله ما يكون فى استثاء فى التصفيق وكده..
يا حميدة اللئامة بأهلها ..وانا ما أهلها امشى اصطاد ليك فى ماء عكر بعيد ..تبارك ده قال انا أخو البنات الماخمج ..جايى تحللنى ليه؟
ناجى الملك معليش كنت شغالة أوفر نايت لما ضربت ..
وانت قايل الصورة دى انا مش؟؟ لا دى هادية طلسم ، شكرا على حسن الظن
ولك التحية.
عشوشة
بركة الجيتى حبيبة القسا
ونحن ماقلنا أى شى غير الموضوعية ورحابة الصدر دى
وواثقين منه ..
عصبتو طايرة
مالك الجاك ..تحياتى وعوضية عزالدين دى منو ياخوى ؟؟
عبد العظيم محمد الطيب المخرج الاذاعى المعروف ده ودخالتنا وزوحته عوضية مكى الممثلة المعروفة قاصد ديل ولا شيتا تانى؟
طبعا أحزن فقرة انك ذكرت "عثمان بشير ابو عاقلة"ودخالتنا وصاحبو وحبيبو ..ونديدو ..كتلوه ناس الدفاع الشعبى ..وحنضل علينا ا ..كان بقول لى تبارك: "تبارك المعارض" بفتح الراء ، نكاية بفداحته الفكرية ..الله يرحمه ..
الموصلى:
انت استاذنا كلنا..البتجاسر عليك كان ود امنا بنقرصو ليك..
وشكرا على اريحيتك
رأفت ميلاد
ما تشفق..قيمة تبارك محفوظة ..وامكانياته معروفة ..ما بنقلل من شأنه
لكن قيمة الناس مابنرمى بيها عرض البحر ..وخوتنا صافية ..راضعين من أحن نساء الارض ..علوية بت التاية ..خوتنا ما بتجيها شى..
والداير يصطاد ..خليه الاصطاد
احترامى للكل ..
|
Post: #25
Title: Re: وحالة أن يكون المرء أخت تبارك....
Author: تبارك شيخ الدين جبريل
Date: 01-10-2007, 02:14 AM
Parent: #24
شايف كمية من المودة المحرجة زاتو!
ما كفاية تحامل تماضر على (وهو لو تعلمون عظيم)
بعدين يا ود الجاك داير تفتّح لينا مواجعنا مع الكيزان مالك؟
المهم ...
|
Post: #26
Title: Re: وحالة أن يكون المرء أخت تبارك....
Author: ابوهريرة زين العابدين
Date: 01-10-2007, 03:15 AM
Parent: #25
والله ما قصرتو يا ابناء شيخ الدين، فشكرا تماضر، وتبارك دا كفاهو فلقد وصلت الرسالة
مع شكري
أبوهريرة
|
Post: #27
Title: Re: وحالة أن يكون المرء أخت تبارك....
Author: malik_aljack
Date: 01-10-2007, 08:37 AM
Parent: #26
تماضر ... نعم أنا قاصد عوضيه مكي ... الزمن الكبر و ما شابه ذلك
تعرفي مره قعدت تقريبا نص ساعه أتذكر اسم أختي السميتها أنا؟
تبارك
النسى قديمو تاه حتى بمواجعو البنطردها من الذاكره
شوف طريقه الناس ديل يتلموا virtually
|
Post: #28
Title: Re: وحالة أن يكون المرء أخت تبارك....
Author: تبارك شيخ الدين جبريل
Date: 01-10-2007, 02:56 PM
Parent: #27
| Quote: طبعا أحزن فقرة انك ذكرت "عثمان بشير ابو عاقلة"ودخالتنا وصاحبو وحبيبو ..ونديدو ..كتلوه ناس الدفاع الشعبى ..وحنضل علينا ا ..كان بقول لى تبارك: "تبارك المعارض" بفتح الراء ، نكاية بفداحته الفكرية ..الله يرحمه .. |
Virtually وين يا ود الجاك:
لا تنكأ الجرح القديم فلم يكن ... يوماً لقلبى واقعاً مجهولا
_________________________________
تغيّر طعم كل الأحباب بعد اغتيال "عثمان بشير". هم هم نفس الناس ولكن، لم نعد كما كنّا! ألتقى Virtually بعمرو مامون زروق، ومنير هاشم ادريس، ابحث عنك وعن بروفيسير موفق وتحدثت مع حسن محمد الحسن مرّة أو اثنين بالسعودية، ولم تكتمل زيارتى للسودان إلاّ بزيارتى لسهام عثمان(وأذكر يومها أننى استنكرت لكمال شدّاد - وهو لا يعرفنى - وجوده فى الخرطوم! مدّعيا أنها امتلأت بكل من هبّ ودبّ، ثم تركته وقد اسقط فى يده) اتللص أخبار الحاج صالح "كِنّور" وكأنه نبى الله الخضر، علاقتى بصلاح المر كما هى لكن .....
لم تعد الأشياء كما كانت بعد غياب "عثمان". أذكر أننى كنت لم أزل عن حالتى البكائية عندما أصدر "كمال ترباس" تسجيلاً جديداً يحوى الأغنية "الصبيان الجروا، سابوا عروضم همّلوا ... يا يمة، انا الضرب بتحمّلوا" وكنت كلما سمعت "حليلم اخوان البنات ... العلّموا الجبل الثبات" أعود فأجهش بالبكاء، ولا زلت لا أستطيع حتى الكتابة فى هذا الموضوع.
حياة عثمان غالية جداً ولن يكون ثمنها الإنتقام والتشفى من فرد أو تنظيم الجبهة بأكمله، بل ثمنها التغيير، والتغيير الجذرى لكلنا وبكيزاننا نحو وطن أفضل. حين مات "عثمان" فى اغتيال سياسى لم يكن فى ذهنى غير الإنتقام السياسى، وجلست أفكك وأحلل وأبدأ من الصفر كافراً بكل المسلّمات وضارباً عرض الحائط بكل أصنام المألوف، أسال نفسى: "ما الذى يساوى اغتيال شاب فى مقتبل العمر كعثمان؟ ماذا كانوا يريدون منّا؟ ماذا كنّا نريد منهم؟ من هم؟ من نحن؟ متى وأين يقف القتل؟" فكان السودان وهو آمن وحر هو الثمن الوحيد الذى يمكن أن أقبله فى دم "عثمان"، أو أموت دونه!
ود الجاك ارخى
|
Post: #29
Title: Re: وحالة أن يكون المرء أخت تبارك....
Author: معتصم مصطفي الجبلابي
Date: 01-10-2007, 11:04 PM
Parent: #28
وحالة أن يكون المرء أخت تبارك....
يقول الهم لااعتراض في حكمك
|
Post: #30
Title: Re: وحالة أن يكون المرء أخت تبارك....
Author: malik_aljack
Date: 01-11-2007, 06:39 AM
Parent: #29
تبارك
أنا عندي فكره أحسن من كده
أنا أحسن (أرخي)
|
Post: #31
Title: Re: وحالة أن يكون المرء أخت تبارك....
Author: Hussein Mallasi
Date: 01-11-2007, 11:59 PM
Parent: #30
Quote: لكن يا تماضر بوسـتك ما عجبنى
خاصة وإنتى شـايفة ملاسى بمارس هوايتو |
أحسن ليك أمارس هوايتي هنا يا رأفت
من أمشي أمارسها ليك في قرورة.
____
و دا تحذير نهائي و أخير.
|
Post: #32
Title: Re: وحالة أن يكون المرء أخت تبارك....
Author: omar ali
Date: 01-12-2007, 02:40 AM
Parent: #1
| Quote: وحالة أن يكون المرء أخت تبارك.... |
يزيـد الهـم ويحـزن حالـك
كونو اخوها دا شيل من بالك
انا ما مسئول من سوء يطالك
سل ضراعـك دا ان جالـك
كونو تماضر اخت تبارك
يغفر ذنبه لسابع جارك
شكرآ تماضر علي كلماتك
الطيبة..وكل سنة وانت
طيبة
|
Post: #33
Title: Re: وحالة أن يكون المرء أخت تبارك....
Author: yagoub albashir
Date: 01-12-2007, 03:46 AM
Parent: #1
| Quote: وللأخت لنا المهدى ..اميرة البورد وأميرة عصرها صديقة الأسافير |
نيابة عن الحبيبة لنا شكراً لك أختي تماضر شيخ الدين
الحبيبة لنا مهدي في السودان , و غادرت الخرطوم إلى مناطق خارج التغطية
لك شكري و احترامي مرة أخرى
|
Post: #34
Title: Re: وحالة أن يكون المرء أخت تبارك....
Author: الطاهر ساتي
Date: 01-12-2007, 07:54 PM
Parent: #1
تماضر ... كل اعيادك سعيدة
تبارك ده والله زول كويس ، بس انصحيهو - أو امنعيهو - ما يباري بشاشا دايما ..
|
|