بأى غصن تكتب يا عماد عبد الله

بأى غصن تكتب يا عماد عبد الله


02-15-2006, 05:39 AM


  » http://sudaneseonline.com/cgi-bin/sdb/2bb.cgi?seq=msg&board=20&msg=1189101995&rn=68


Post: #1
Title: بأى غصن تكتب يا عماد عبد الله
Author: Tumadir
Date: 02-15-2006, 05:39 AM
Parent: #0

تعرف يا عماد عبد الله..

فى كل مرة ارى مساهمة لك..

وأحتفظ ببقية انفاس فى رئتى ..من محسوب الدهشة..

اقول مرات صدفة وما بيقدر "يجيب غيرها" وتخذلنى ..وتستنفذ أنفاسى المخزونة ...


قلت يجب أن اخبر اصحابك عنك...


أتفرجو فى عماد:



لعصام عبد الحفيظ فى ابق قليلا



و .. لن أرمي بورق لعبي


( لاس فيغاسك ) هذي لن تهزمني ..
( ورقي ) ما يسقطه إلا خريفٌ يسمى :
غياب الأصدقاء ..

________________________


لخدر فى ضد القبح


و .. حين تمر باللبخة الأم قبالة توتي - مدلاة الأثداء كغولة - ( يقينا أن هناك لبخة و نيل في كل مكان في الدنيا .. وإلا كيف يكون - مكاناً - إذاً ؟؟؟ ) ..إبحث عن ذاك في بلاد الفرنجة يا مولانا .. بحثت عنه أنا ههنا ، قيل لي : معتقلان - النيل و عشيقته العجوز تلك - بتهمة الدجل و الشعوذة ( المادة الأخيرة في قانون العقوقات )
المهم .. قل لها - اللبخة -:
يغمز النيل - الصعلوك هذا - سؤتك ثلاثة أقمار حسوما كل عام .. وتظلين تؤدين دور الباليرينا .. ترسمين بخفيك خارطة لزجة تنهك فحولة الطمي .. ( بحيرة البجع ؟؟ )
( و .. ينكرها - النيل الصعلوك - ثلاثا قبل صياح الـ .. الجدب ) .. اللبخة العجوز الطيبة العذراء .. أمي
ثم .. قبلها عني طويلا .. و عانق
........
يا نيل .. يا تويل .. ياااااااااا

______________________________


لعبد الحميد البرنس فى بوست الشىء





الشيء .. لا تكاد تكتنهه لكنه هناك , كما ( ذبابة العين ) يصفها أطباء العيون , موشوم بها الحدق لكنه لا ( يبصرها ) ..
يجثم ثقيلا - أحيانا - حتى ليكاد يبكيك رزح صدرك تحت دواليبه , وكثير الأحيان يكون لطيفا كصديق مؤنس ..
يتخذ له ماشاء : ظل متعامد على الناصية الكسلى .. كيس فول ( الحاجات ) .. حذاء الكمساري و هو يحاسب الواقف قبالتك .. السائل المخاطي في أنف ( عوض سيد الخدار ) .. عواْء الكلاب البعيد آخر الليل .. سقف الزنك ( الحزين ) في دكان عبدالله .. تسبيح جدي فجرا .. رائحة ( توب الجيران ) تتوسده أمي .. شكل ( الهبوب ) تزداد حركتها ارتفاعا في سماء الخرطوم .. أبخرة قدرة الفول .. الحشرات وهوام الليل حول ( لمبة عمود النور ) في ليل خريفي .. كوب الشاي البارد على افريز نافذة ( الناظر ) .. شلوخ ( كرار ) ينعكس عليها ضوْ لمبة الحوش .. و .. و ..
ذاك الشيء ..
بارد .. وحميم
و.. كذاك أحبه

( ممتليء بالشيء ..
وباللاشيء ..
كمقهى الصيف )
-------

هو ذاك يا برنس .. أعتقد



_________________

يعجبنى غصنك هذا المغموس على حبر الروح ويكتب..

لكن من أين تجىء به؟؟

اعذرنى لا اقصد شىء ..

قلت فقط احكى عن اعجابى بك ....للناس

Post: #2
Title: Re: بأى غصن تكتب يا عماد عبد الله
Author: Tumadir
Date: 02-15-2006, 06:03 AM
Parent: #1

فوق لغاية ما يشوفوك ..اصحابك يا عماد

Post: #3
Title: Re: بأى غصن تكتب يا عماد عبد الله
Author: يازولyazoalيازول
Date: 02-15-2006, 06:07 AM
Parent: #2

تماضر مثل النحلة لا توجد إلا فى اكوام العسل

شفتى كيف أخوك بقى أديب (بس القرص ما فينا)


Post: #4
Title: Re: بأى غصن تكتب يا عماد عبد الله
Author: Tumadir
Date: 02-15-2006, 06:18 AM
Parent: #3

Quote: شفتى كيف أخوك بقى أديب


اخوى اصلو اديب.. ود الاديب ..اديب.

وانا اخوى كان ما اديب

شعرى الليلة بزيناااااااا

وبعقر ما بجيب جناااااااا


هههههه

محبتى

Post: #5
Title: Re: بأى غصن تكتب يا عماد عبد الله
Author: الفاتح وديدي
Date: 02-15-2006, 06:49 AM
Parent: #1

Quote: قلت فقط احكى عن اعجابى بك ....للناس

أنا برضو:
إعجابي بيك شديد
أو بالأحرى:
بيكم

Post: #6
Title: Re: بأى غصن تكتب يا عماد عبد الله
Author: خدر
Date: 02-15-2006, 06:59 AM
Parent: #5

شفتيهو مبالغة كيف يا تمادر !!
عينكـ نجيييييضة لكن
ما اسحركـ



وياعماد
لقط الورق المجدعو في الدولاب ( كتاباتكـ القديمة )
ونزلها لينا هنا
خلينا نشوفكـ اكتر



لاحولااااااااااااااا
رحم بورد ولاد جنس ولاده

Post: #7
Title: Re: بأى غصن تكتب يا عماد عبد الله
Author: Tumadir
Date: 02-15-2006, 07:13 AM
Parent: #6

الفاتح وديدى

وخدورى

وهذا ايضا .. يدل على ان ذائقنى النقدية ...على ما يرام

مرحبا بكما ...ترفعان من شأن غصن الكتابة عند عماد

Post: #20
Title: Re: بأى غصن تكتب يا عماد عبد الله
Author: Emad Abdulla
Date: 02-16-2006, 03:07 AM
Parent: #6

خدر الأخدر ..
هو فضل فيها كتابات قديمة ؟

.. وبعدين انت و عصام خليتوني أتجرس ..
وجرسة العجايز شييييييييييينه .
في داعي للفضايح قدام الله وخلقو ؟؟

شكرا كتير يا طارق
يا صديقي الحلو

Post: #8
Title: Re: بأى غصن تكتب يا عماد عبد الله
Author: Emad Abdulla
Date: 02-15-2006, 07:18 AM
Parent: #1

يا نخلة ..
( أقول شنو ؟؟؟؟؟ )
........
هي الروح ( تِنسَلْ ) ..
خيطاً أرتق به ( دلاقين ) الذاكرة ..
لعل القلب يدفأ ..
و .. يكف الحنين عن احتطاب دمي ..
لعل ..

.......
تماضر يا أعلى

يجبر خاطرك .. و ..
إلهي إدّو باريكيري

Post: #9
Title: Re: بأى غصن تكتب يا عماد عبد الله
Author: Tumadir
Date: 02-15-2006, 07:35 AM
Parent: #8

Quote: هي الروح ( تِنسَلْ ) ..
خيطاً أرتق به ( دلاقين ) الذاكرة ..
لعل القلب يدفأ ..
و .. يكف الحنين عن احتطاب دمي ..
لعل ..




الشهادة يا محمد!!!


تعال يا عماد للبوست ده...


وسيل...

بتلملم اطرافك صحبة اصحابك....ولبخة على النيل.


وانا اتفرج

خاطرك مجبور .....

Post: #10
Title: Re: بأى غصن تكتب يا عماد عبد الله
Author: عصام عبد الحفيظ
Date: 02-15-2006, 07:36 AM
Parent: #8



تماضر ...... سلام لمن غلط



حمدا له
فقد دخلتى ورطتى
واهلا بك فى احلى توريطة



نفسها طويل
وبتشهق
كلما قابلت اخاديدعماد
فى الكتابة ونسيجها الحر


وعماد زمنه براه
والله يدينا زمن
معاه



اللوحة اعلاه للاستاذ التشكيلى
حسان على احمد
مقيم بالقاهرة


لكى حبى
وسلام


Post: #11
Title: Re: بأى غصن تكتب يا عماد عبد الله
Author: Tumadir
Date: 02-15-2006, 07:48 AM
Parent: #10

شكرا كتير يا عصام...

ومافى "غلط" ..كل السلام "صاح" ما غلط الا الغلط....

وشكرا لك فى محبة اخاديد عماد ودروبه الشاقاقة ....

وعلى لوحة قاطن القاهرة حسان على احمد


له السلام

Post: #21
Title: Re: بأى غصن تكتب يا عماد عبد الله
Author: Emad Abdulla
Date: 02-16-2006, 03:39 AM
Parent: #10

عصام ..
وردي قال :

( هام ذاك النهر يستلهم حسنا
فإذا عبر بلادي ما تمنى
طرب النيل لديها .. فتثنى )

أطرب عندك يا صديقي ..
أفلا أحاكي النيل عندك .. فأتثني ؟؟

يا ملوَّن الحضور ..
يا غياظ

Post: #12
Title: Re: بأى غصن تكتب يا عماد عبد الله
Author: Adil Osman
Date: 02-15-2006, 02:02 PM
Parent: #1



عماد يكتب بغصن من هذه الشجرة ينمو بين حنينه وحنينه

Post: #14
Title: Re: بأى غصن تكتب يا عماد عبد الله
Author: nadus2000
Date: 02-15-2006, 02:56 PM
Parent: #12

أختي الكبيرة (وليس السنين بمعيار بمقدار أخوتي)

أخاف عليك من شهقة لو رأيتي آثام ريشته على بياض الورق
أخاف عليك من رؤية قصيدته وحبرها الألوان
أخاف عليك لو قرأتي لوحاته بتفعيل الحنين
** ** ** **
تخيلي اليوم ظهرا وقعنا "بيان لقاء" -ولخدر تحياتي
ودستور محبة....
كم هو حنين هذا العماد
تحياتي لكي ولهشام وكل أولاد/بنات شيخ الدين

مع كل حبي

Post: #27
Title: Re: بأى غصن تكتب يا عماد عبد الله
Author: Emad Abdulla
Date: 02-16-2006, 04:23 AM
Parent: #14

عبد الجليل ..

أول ما أذكر حين ( حبوت ) إلى الدوحة .. هو أنت
مغمورا بيك .. خرجت من مكتبك
قلت لنجدي : الزول ده حلو

لا أملك إلا أن أقول :
كتر خيرك كتير
و ... شهادتك فيَّ مجروحة ..
لأنني أحبك

Post: #24
Title: Re: بأى غصن تكتب يا عماد عبد الله
Author: Emad Abdulla
Date: 02-16-2006, 03:55 AM
Parent: #12

يا عادل ..

( حتى كلمات الشكر .. ولّت )

من أين لك مخزون اللغة و الـ .. ( تصاوير ) الحميمة تلك ؟




أغبطك على الجمال فيك تعمله ذات اليمين واليسار .. بعدل

مودتي لك والإحترام

Post: #13
Title: Re: بأى غصن تكتب يا عماد عبد الله
Author: معتصم الطاهر
Date: 02-15-2006, 02:44 PM
Parent: #1

تماضر

يكتب بغصن من معرفة

مداده ريق حلو من مرور الكلام العذب عليه

مشذب بالحب ..

ألوانه من حب الناس والشيء

وأنت ..

Post: #15
Title: Re: بأى غصن تكتب يا عماد عبد الله
Author: عشة بت فاطنة
Date: 02-15-2006, 03:29 PM
Parent: #13

عشان كدا بنحب تماضر .. لأنها بتشوف ولما تشوف بتعرف والعرفة دي براهابتحرش عليها خلق الله ، يعجبني في تماضر حين ترى الجمال تبرزه ، حين يغمطه الاخرون .. وطيب ما اياه دا الجمال ذاتو ..وبأي غصن تكتبين أنت يا تماضر ؟ انه غصن المحبة والسلام ...
أما غصن الكوميدا دا !! فلامنافس

Quote: وانا اخوى كان ما اديب

شعرى الليلة بزيناااااااا

وبعقر ما بجيب جناااااااا


بتغزل في صاحبتي فيها حاجة يعني
احلا من اي زول

بت فاطنة

Post: #37
Title: Re: بأى غصن تكتب يا عماد عبد الله
Author: Emad Abdulla
Date: 02-17-2006, 01:51 AM
Parent: #13

معتصم ..
سلام وسلام ..

و لا معرفة هناك .. ولا يحزنون
هل رأيت ( عنقالي ) يعرف ؟؟؟؟
فقط هي رقة في تماضر تحمل الأشياء فوق حملها
وتورطنا في حبها أكثر ..

كتر خيرك يا ( أنيق العبارة ) ..

مودتي و كل الإحترام

Post: #16
Title: Re: بأى غصن تكتب يا عماد عبد الله
Author: تيسير عووضة
Date: 02-15-2006, 03:36 PM
Parent: #1

يكتب بغصن جمال
أخضر ..
طازج ..
حوله قطرات ندى شفافة
مثل روحه ..




إزيك يا عماد ..

Post: #17
Title: Re: بأى غصن تكتب يا عماد عبد الله
Author: عبد الحميد البرنس
Date: 02-15-2006, 06:42 PM
Parent: #16

(عماد) يكتب (ياتماضر) ب:














"جنون الشعر وكيمياء الحنين"!.

Post: #39
Title: Re: بأى غصن تكتب يا عماد عبد الله
Author: Emad Abdulla
Date: 02-17-2006, 02:06 AM
Parent: #17

البرنس ..
يا كبير ..

( نعلاتي ) تحت إبطي .. حاسر الرأس و أنا ( تقرأني ) كلماتك السوامق ..
جنون الشعر ... لك
وكيمياء الحنين .. لك ولها ( إلهامك )
أهدي ..



سعدت بك ولك
و ... يجبر خاطرك يا حميد

Post: #38
Title: Re: بأى غصن تكتب يا عماد عبد الله
Author: Emad Abdulla
Date: 02-17-2006, 02:01 AM
Parent: #16

إزيك يا تيسير ..

دائما تستصحبين ( ندى ) حرفك ..
وصورك المترعة في الجمال ..
كأني بك لا تكتفين بدسامة الجرعة ..

براحة يا تيسير ..
فـ ( فينا شناة الطبع )
ولن نكتفي نهلاً من فيض كرمك الجمال

يديك العافية
ويدي تماضر القدرة ..
( أم سعفاً متنّى )

Post: #18
Title: رد
Author: mohmmed said ahmed
Date: 02-16-2006, 00:28 AM
Parent: #1

الهى ادى باركا
اها شفتى يا تماضر
عماد طلع من اندنا
يكتب بسعف نخلة تثمر عجوة السكوت

Post: #40
Title: Re: رد
Author: Emad Abdulla
Date: 02-17-2006, 02:15 AM
Parent: #18

محمد يا جميل

إلهي إكي سلميري ..
كل شي من ( أندنا ) ..

.. الله يرحم أبوي ..
لو كان عرف أنو ولدو ح يكتب ( أربي ) كان قال : فايده دامو ، الولد هلاس تنن
و .. ما زالت ( العجمة ) اللذيذة تتاورني
( عجوة ) في الروح ..
وسعفة دنقلاوية ..
و جذر في الديم

( what a mess )

يديك العافية يا قريبي

Post: #19
Title: Re: بأى غصن تكتب يا عماد عبد الله
Author: Emad Abdulla
Date: 02-16-2006, 02:36 AM
Parent: #1

أيُّ ورطة .. يا نخلة ..
أراوح منذ البارحة نفس السطر في محاولات معاقة للحاق ببعض نشيدك ( الغار ) ..
( هذا إكليل يتقازم دونه عري رأسي ) ..
عُري؟؟؟ ..
نيكولاس كازانتزاكس قال يوما : ( غيمات تلقي بظلالها مد الأفق .. تغطي عُري اليونان الأبدي ) .. الحق يقال أن لعصام عبدالحفيظ والبرنس أن يعشقا الرجل .. تفعل كلماته فعل السحر .
ما علينا ..
( كُلو منك يا تماضر ) ..
وليتني أجرؤ على حتى كلمات العرفان لكل من عبر هنا .. وقال ( والله الزول ده بيكتب كويس ) .
وأنتِ .. هل أقول أكثر مما قيل عنكِ وفيك ؟؟؟
هي فقط :
اللله لا جاب يوم شكرك يا .. نخيل
و شكرا هذا الفضاء يعج بنا ..
سودانيو القلب واللسان و ... الهوية .
و ... ياحينما لفظنا القبح في القصر على النيل الأزرق قبالة توتي .. و الدبابات في مداخل ( الكباري ) ..
والعشب يخفض تويجاته لتدوسه أحذية الجند ..
واللكنات الغريبة فوق اللحى القديمة مخضوبة بدم الغائبين و دمع الحضور .
يا حينما فعل ..
من حيث لم يحتسب الغول في القصر .. تناسجنا ..
قماشة تكبر و تسمك و تستقيم .. عشقا
و .. ( للبخون صفاك عزى نحنا النبال ) ..
فأبشروا ..
نبلنا ترمي الحدق .. يا ساكني السماك القصر
...........
غريب ..
يقفز إلي الذاكرة نتؤٌ قديمٌ .. حميم .. : عباس كرور
( عباس كرور ) هذا نُسجت حوله الأساطير .. صامت كأبي الهول تجوب دراجته ( الرالي ) القديمة شرايين الأزقة و ( الفسحات ) الغبشاء في السجانة و الديم ، تلتقط عيناه الصغيرتان قطع الحديد الخردة أينما كان .. لا تخطؤها ، يلقي بها في الصندوق الحديدي الصديء خلف ( سرج عجلته ) و يعود لتطوافه المقدس ذاك حتى مغيب الشمس . بالكاد تجد موطيء لقدمك داخلاً ذاك الـ ( JUNK YARD ) ذو حُجَر ( الجالوص ) منخفضة السقف .. قطعٌ و قطعٌ و قطعْ من الحديد الخردة .. أحجام تتفاوت سماكة و شكلا .. أكوام من البراغي / الصواميل / التروس / القضبان / الأنابيب .. و .. و .. و تآنس وحشة الرجل ، والغريب أنه لم يكن يبيع أي من هذه ( الكنوز ) .. ينغمس وسط تلك الأكوام الصدئة متقرفصاً .. فاحصا لها قطعة قطعة .. في ولهٍ غريب . محرابٌ من الحديد أقامه بتؤدة و أناة لأعوام وأعوام في وسط حي السجانة ، نُسِجت حوله الأساطير ، فمن قائل أنه جاء من الشمال البعيد .. ( رطّاني ) .. طفل وحيد .. قُطف من حديقة الشمال و زرع في أصيص المدينة البورسلين اللامع فـ .. ذبُل ، مَن قائل أنه يأوي إليه جنيّة من حواريات النبي داوود .. فأمرته بالصمت و .. ( ألنّا له الحديد ) .. من قال أنه ( النبي الخدر ) .. قالت أمي أنه رجل بركة ( على الرغم من أنه يدخن ) .. لكنه : ( روحٌ طيبة في جسدٍ فاسد ) أو كما قال عراب الجبهة الإسلامية واصفاً أحد أتباعه الـ ...........
لا أعرف ماذا هو فاعل الآن ( عباس كررور ) .
أنا ألتقط ( كروري ) حيثما عنّ لي ..
كروري هذا يمنحني القدرة على تسلق تل الروح الزّلِق هذا .. و ماتزال قمته فراسخ أماماً ..
( كلما أنبت الزمان قناة ....... )
تربك قلقي هذه الـ ( كلما ) .. و لا أسلم من الأصدقاء يركِّبون السِنان تلو السنان فوق قناة مثلومة ..
ولا يكفون عن إغوائي بالولوغ في صحو ( خرير ) أصواتهم العاليات في القلب .
نوع من الحُمّى هم الصحاب ..
لا حمى المتنبي التي ( ليس تزور إلا في الظلام ) ..
لكنها حمى متربصة بكُوىَ الروح ، ما أن يجدوا شقاً يتوارب حتى تحتشد طبولهم و الرايات ..
يقيمون طقوس النشيج الجميل .. ما شاء لهم .
يخرجون ( البلد ) مني طازجة و ندية ( كأنها خارجة للتو من كف الرب ) .
فتزغرد ( عشه أم النقير ) ويرقص بشرى العوير .. ويغرس ( عوض جِنِّي ) السيجارة في فمي : أبشر ياااااا .. ويعزمني ( محمد مكاوي ) : كاسك يا أصلي .. ويغني ( عبد المنعم أب راس ) وهو يغمض عينيه .. مُدنقِر : حاولت أنساك وقلبي زاد في جروحو .. وريني كيف الحي يودع روحو .....

فأشرق في الدمع يا تماضر

Post: #22
Title: Re: بأى غصن تكتب يا عماد عبد الله
Author: عصام عبد الحفيظ
Date: 02-16-2006, 03:45 AM
Parent: #19




( هــــــــــــاء الســكــت )

Post: #23
Title: Re: بأى غصن تكتب يا عماد عبد الله
Author: عصام عبد الحفيظ
Date: 02-16-2006, 03:45 AM
Parent: #19




( هــــــــــــاء الســكــت )

Post: #25
Title: Re: بأى غصن تكتب يا عماد عبد الله
Author: خدر
Date: 02-16-2006, 04:00 AM
Parent: #23

دقيقه بس
اجيب ليكم غنوة واجي


زجاجة في زجاجة !!








اسسسسسسسسسسه بجي

Post: #41
Title: Re: بأى غصن تكتب يا عماد عبد الله
Author: Emad Abdulla
Date: 02-17-2006, 02:24 AM
Parent: #25

خدر ..
قلنا بررررررراحة ..

جرسه أكتر من كده ممكن تلحق الزول ( أُمّات طه )





( يا زول إنت طلعت لينا من وين آخر العمر ؟؟؟؟)
الله يهديهو عصام ..
نقاش و نقار .. وفقري
لكن ..
أنا شريكو المره دي .. فيك

( كن صديقي ) .. يا خدر
ولا كتر خيرك ..
يا وغد

Post: #26
Title: Re: بأى غصن تكتب يا عماد عبد الله
Author: ثابت محمد
Date: 02-16-2006, 04:20 AM
Parent: #1



تماضُــر
هكــذا يكتب عمــاد
أو ... هكــذا أظن بمحــدودية
المهم
برجع أفرتق ضفائر اللوحة دي بعد خدر يخت أغنيتو
بعد ما شـعر جسمي الواقف ده يرقد
وبعد ما يتقفل رحم الدهشة الفاتح كم صباع
أنا هسي فى نُص النشـوة .. نشوة لذيــذة
عمـاد ده كنت بسبح بيهو في سِـري
قمتي إنتي ياتماضر ولعتي النـور وخليتيني فى الصقيعــة
كده كويس منك ؟؟
.
.
( وش ما بختشي بتكلم عن عماد )

Post: #28
Title: Re: بأى غصن تكتب يا عماد عبد الله
Author: nadus2000
Date: 02-16-2006, 04:38 AM
Parent: #26

عماد
هؤلاء الأصدقاء يدعونك لمراودة الكلمة عن نفسها
وأنا أتطلبك بالنبي "كما تقول أمي"، بغواية اللون
وتنزل لينا لوحة هنا، ولتماضر والواقفين أقول
ضعاف القلوب والصحة المعتلة يمتنعون
بس مرهفي الحس.

عايزين لوحة...عايزين لوحة
تماضر أهديك ما لا أملك وهو لوحات هذا المبدع
التشكيلي عماد عبدالله

وتسلم البطن الجابتك يا عمدة

Post: #29
Title: Re: بأى غصن تكتب يا عماد عبد الله
Author: خدر
Date: 02-16-2006, 05:31 AM
Parent: #28




يا قلبي أنساها السيره
وألبت الخلف السور
محبوبتكـ ديكـ ماغيرها
مستنية قولة خير
في عيونها محطة صغيره
صحاها وصول بابور
دقت باب حزني ضفيره
زي إيد رمت الصنفور


شعر امين الصديق

Post: #30
Title: Re: بأى غصن تكتب يا عماد عبد الله
Author: محمد بهنس
Date: 02-16-2006, 06:14 AM
Parent: #29

تحيات تماضر وعماد واصدقائنا المتداخلين;ونسة حنين مع تلك المنطقة الغامضه للصور:الذاكره.كوتشينة العصرية بسوق المورده.تحيه

Post: #31
Title: Re: بأى غصن تكتب يا عماد عبد الله
Author: Tumadir
Date: 02-16-2006, 06:37 AM
Parent: #30

هل فيكم زول ..مشى زار فى عز سكون الكون

الغار؟؟

غار حراء؟

فى زول

شافو بيشبه كيف من جوه؟؟

التدويرة التجويف الداكن وبارد وما معروف وين ببدا السقف من الجدران وين تبدا الارضية ..من المدخل..؟؟

فى زول بس لقى فرصة يقيف ويشم من بابو ..ريحة امين الوحى.."شايل الوحى فى ايدو التانية" وبى يدو "الاولى" بيحاول يفصل خط الضو من الضلمة ويتاوق يشوف لو فى نبى بيرجف خوفا جوه ضلام الغار؟

فى زول فيكم حاول يفهم فى تلك اللحظة الفوق خرافية، شعور...البيضة الباضها حمام الغار ..وهى بتتأهل لأمجاد ابدية..بعد لحظات ؟

انا كنت هناك...

بفتح فى البوست..

وكل الوصفتو ...ده حصل.

انايلاه ..انايلاه

Post: #32
Title: Re: بأى غصن تكتب يا عماد عبد الله
Author: عصام عبد الحفيظ
Date: 02-16-2006, 09:10 AM
Parent: #31


Post: #50
Title: Re: بأى غصن تكتب يا عماد عبد الله
Author: Emad Abdulla
Date: 02-19-2006, 07:37 AM
Parent: #30

بهنس ..
لا أملك إلا الإبتسام حين تخطف مني ( تصويرتك ) تلك كلمات تراوح لساني ..

إزيك .. يا زول يا حلو ..

قلت : مجنون هو ( كشأن الرسامين ) ..
قلت : ولد مطموس .. ( على طريقة أمي الزلال )
قلت : سائح في بلالد الله الواسعات .. مضاربه هينة الحط و الترحال
قلت : أيكون ( فكي ) ؟؟؟؟
قلت : بل صوفي زنديق .. سرقته حوريات اللون فهام علي وجهه في فلوات الروح ..
قلت : wailer .. كان ( يشيل ) مع الإله الجاه في ( بابيلون ) ففاته اللحاق بالـ ( زيون ترين ) في مدن الضوء والظل ..
قلت : ولد عاق أفلت من ربقة أزمان القيد .. وفرمانات التلمود و أبخرة المدن الأسمنت .
قلت : ( بعشر ما شايف شغلو ) .. هذا ولد فيه : بسم الله الرحمن الرحيم ..

أبتسم أنا كلما عنّت ليَ صورة ( مشاترة )
و تعبسُ أنت ..
يا غيّاظ

........
قلت أنت : أنا بهنس .. و بس
فقفلت كتابي .. ثنيت الصفحة عندك .. و
حمدت الله
.......
يا بهنس ..
أحبك هكذا ..
فقط بهنس

Post: #43
Title: Re: بأى غصن تكتب يا عماد عبد الله
Author: Emad Abdulla
Date: 02-17-2006, 02:35 AM
Parent: #28

نادوس ..
يا سودان ..

أخجلتني ..
( كفاية ورطة النخلة تماضر )

بعدين .. عصام عبد الحفيظ هنا ..
فـ ( لا يفتى و مالك في المدينة )
و .. ( الماء يبطل التيمم )
و .. ( العين ما بتعلا على الحاجب )

و يا ريتني قدر كلامك يا صديقي ..
لكن .. أعدك بقطعة تلوين ..هدية متواضعة
و .. ح نتلاقى

تسلم يا زول يا رايع

Post: #42
Title: Re: بأى غصن تكتب يا عماد عبد الله
Author: Emad Abdulla
Date: 02-17-2006, 02:29 AM
Parent: #26

ثابت ..

( وش مختشي .. من كلامك )
....
( وشوش كتيره ما عارفه تقول شنو .. مقهِيه بس )



( وش أخير متخارج قبل ما يكورك فرح ... بيك )

تسلم يا ثابت .. تسلم

Post: #33
Title: Re: بأى غصن تكتب يا عماد عبد الله
Author: صديق الموج
Date: 02-16-2006, 12:21 PM
Parent: #1

تصدقى يا تماضر هذا الوغد كان صاحبى عشرون عاما حسوما..وحين تفرقنا ايدى سبا ظل ينفحنى بضع مهاتفات تشفى وان كانت لاتجدى.. وهو قد رضع مع تبارك من مزيرة واحدة وكما يقال اخو اخوك اخوك فهو اخاك..ذلك المشوطن المسكون ابداعا .. انا مندهش ليس لكتاباته لكن موضع السجدة والدهشة انت
فقط اجدد فى تبرير هشام ما يبدد دهشتى..حقا انت نحلة فحيث كانت هنا او هناك زهرة ذات رحيق شممتيهاوطرتى اليها لتوسعيها لثما.احسدك كثيرا على اكتشاف بؤر الجمال فى هذا المكان.
لك وللوغد عماد خالص مودتى ،،،،

Post: #34
Title: Re: بأى غصن تكتب يا عماد عبد الله
Author: خدر
Date: 02-16-2006, 12:34 PM
Parent: #33

تربك قلقي هذه الـ ( كلما ) .. و لا أسلم من الأصدقاء يركِّبون السِنان تلو السنان فوق قناة مثلومة ..
ولا يكفون عن إغوائي بالولوغ في صحو ( خرير ) أصواتهم العاليات في القلب .
نوع من الحُمّى هم الصحاب ..
لا حمى المتنبي التي ( ليس تزور إلا في الظلام ) ..
لكنها حمى متربصة بكُوىَ الروح ، ما أن يجدوا شقاً يتوارب حتى تحتشد طبولهم و الرايات ..

*


ينصر دينكـ .. دي من اجمل توصيفات الصحاب

ابشر يا وغد



نادوس - صديق الموج .. سلامات وليكم شوق كتار




____________________
* الصحاب .. يحي - شمت - حاتم العربي - حسين

Post: #46
Title: Re: بأى غصن تكتب يا عماد عبد الله
Author: Emad Abdulla
Date: 02-18-2006, 04:42 AM
Parent: #33

يا موج ..
يا صديقي الجميل ..

عشرون يا ( خالو ) ؟؟؟ ( ابتسم )
بل قل عمرا من يناع ..

( السلام لي توتي و رماله
الزمله يا نعم الزمالة )

أواطن ( ود الرضي ) هذه الأيام يا صديق .. و لا أغفر لك سنينا معك لم تدرسني فيها فقه ( الشيخ ) , كلما أوغل أظمأ .. كأني به ( يكحل ) الروح بدعج قصيده , واستدعيك كلما( مرواده ) دوزن ( ود عين ) القلب ..
فتعال ..

وقل لتماضر : ظلليلينا ياشمس الحضور

Post: #35
Title: Re: بأى غصن تكتب يا عماد عبد الله
Author: أبو ساندرا
Date: 02-16-2006, 04:28 PM
Parent: #1

عماد
بيكتب بغصن زيتون لونو أخضر
بيرمز للحب والسلام

عماد
غرس قلمو
و غمس ريشتو
في مداد إنساني
من حواري وأزقة الديم صعد
وإنداح
فنو
وجزالة حرفو
ونصاعة ووضح لونو
ووسامة رايو
وجنونو
وسار في البلاد طول وعرض
بلا أدنى شبهة رياء وغرض
هموا
وأملو
أن يصل الناس البسطاء
{ البتبني قصور القيصر وتتقاسم حوش الطين }
متبنيآ قضاياهم
وتطلعاتهم
معهم في الصفوف الأولى
منافحآ بأدوات الجمال التي يتقنها
معها وهو مؤقن أن
{ سرها يوم حا يبين }

نعم يأسرك بقلمو الرشيق
ويقنعك برسمو الأنيق

لكن أن جالسته
وسمعت
الحقيبة عنده
لاشك حاتخرج من عندو طربان
{ شاكي فاقد }

يا عماد
تعال هناك
فلك في الديم
مواقف
و
مشاهد
و
أصدقاء
و
رفاق طريق
و
أبناء سبيل
و
عطاشى

Post: #36
Title: Re: بأى غصن تكتب يا عماد عبد الله
Author: بدر الدين الأمير
Date: 02-16-2006, 05:08 PM
Parent: #35


عماد ضحكت لا همانى شى وبكيت ولاهمانى شى

عندك وقفت من الرسم وغرقت فى الالوان

المهم ياسيدى بأى ريشة ترسم هل هى غصن البنقوا

أم البنقوا كلماتك أيها الحر المزعج بتحرره من الانا


Post: #44
Title: Re: بأى غصن تكتب يا عماد عبد الله
Author: Tumadir
Date: 02-17-2006, 06:23 AM
Parent: #36

Quote: البنقوا



ده جمع مذكر سالم ده ولا شنو؟؟


ههههه

Post: #45
Title: Re: بأى غصن تكتب يا عماد عبد الله
Author: عصام عبد الحفيظ
Date: 02-17-2006, 09:30 AM
Parent: #44




يا بتتذكر المدرسة دى... يا عماد عبدالله ؟

Post: #51
Title: Re: بأى غصن تكتب يا عماد عبد الله
Author: Emad Abdulla
Date: 02-19-2006, 07:48 AM
Parent: #36

قاتلك الشيطان ..
بدر الدين يا صديقي ..

( بنقو) مره واحدة ؟؟؟؟
وكمان جمع مذكر سالم ؟؟؟ - على قول تماضر -

مردوده ليك ..

أعرف مداخلك السحرية ..
و كيف تجرتقك الكلمات .. فيبكم فيك الوجد ..
.. من أحرى ب( حريرة ) الحرية تلك مجدولة في حتى سكناته ؟؟؟؟
أأنا أم .. أنت ؟

أكثر إزعاجا منك هو فضاؤك هذا الأبدي .. المتحرر
ولا راحلة لي في هكذا مفازة ..
فاترك لي قليل زاد ..

و .. كن بخير
يا صديقي


Post: #47
Title: Re: بأى غصن تكتب يا عماد عبد الله
Author: Emad Abdulla
Date: 02-18-2006, 05:22 AM
Parent: #35

عبدالرحمن ..
يا أبا ساندرا
يا كبير

هو الديم .. ( كأن الريح تحتي ) يؤرق صباح مساء , لوثة عصية الترياق .. توجتنا بالجنون المقيم عافية .
أذكر حين ضج الصحاب : عادل حجر / نجاة عثمان / شمس الدين آدم بشارة / محمد الشيخ .. وكنا ثمالى بطنين البلد ليلتها .. و ليل الرياض لزج من حنيننا البكاء .
قالوا ( ثقافة الهامش و المركز / الوسط ) .. و أن : تقصي و تهيمن أمدرمان بفعل ثقل السلطة و رزح سطوة آلتها على كاهل الهامش .
قلنا دونكم الديم .
( حلة ) واحدة في الديم تتحدث لسانا واحد .. و تنبض على قلب رجل واحد وهي .. شتات قبلي .
( حبوبة كبرى ) أقرب الي من فاطمة ( خالتي ) .. أبو القاسم معني زجرني مربيا حين يسافر أبي .. ( كسرة سنارية ) أستطعمها دون ( قراصة ) فاطنه تكسي ( أختي ) .. أطرب لأبراهيم موسى أبا و ( شتيلة الخريف عاشه ) طربي لطنبور النعام و ال( BEE GEES ) ..
حبوبة كبرى ( أمنا التي لم تلدنا ) تعايشية ولا أروع ..
( حجة سنارية ) فونجية الأصل .. ملكيته .
أبو القاسم معني بقاري خالطه دم الأتراك .. فأخذ من خلاس الرحيق نبلا و ( حنية ) ..
هذا نسيج ملكي .. لو كنت نبيا ما طلبت الا أن استنبت هناك .

يتقدس ( ديمنا ) في مناخ الحرية .. رضعناه من حدود ( حوش فاروق ) حتى مضارب ( خور جانقي ) .. ومن ( قزازات اللبن ) عند مطعم السلام في أبو حمامه و حتى ( كوارع ) أم الناس في شارع الصحافة شرق و ضواحي العمارات ..
هوية سحنتها واحدة : السودان
من أين تبدأ ثقافة المركز و أين ينتهي عرس الهامش فيها ؟؟؟


هو الديم ..
و ...

يديك العافية يا صديقي
و لتماضر ( الزيتونة ) التي ( لا شرقية ولا غربية ) أنحناءات و .. مودة

Post: #48
Title: Re: بأى غصن تكتب يا عماد عبد الله
Author: عصام عبد الحفيظ
Date: 02-18-2006, 05:44 AM
Parent: #47




الحبيب عماد

عبد الوهاب بتاع الفول
شايف بقى عمارة من الذكريات !!!

Post: #49
Title: Re: بأى غصن تكتب يا عماد عبد الله
Author: ابو جهينة
Date: 02-19-2006, 02:59 AM
Parent: #48



الأخت تماضر

كما قال الأخ خدر ( ما شاء الله ) حاسة إستشعارك للكتابة الجميلة عالية النقاء.

فعماد أسلوبه هواء منساب لا يملك المرء معه إلا أن يقرؤه ثم يقرؤه ليعود ليقرؤه.

التحية لك يا عماد

Post: #52
Title: Re: بأى غصن تكتب يا عماد عبد الله
Author: tmbis
Date: 02-19-2006, 09:38 AM
Parent: #49

Quote: عشرون يا ( خالو ) ؟؟؟

خــالو ..؟؟
صديق المووج طلع خالووو ؟؟
..
والله كان ما صاحبي .. وكان ما الناس ديل مسكوني منك كان قلت ليك ( خالوو ) يا كبير ؟؟
..
.
أنتو يا صديق وتماضر

عماد دا ود ناس منو ؟؟

Post: #53
Title: Re: بأى غصن تكتب يا عماد عبد الله
Author: ALHALAWI
Date: 02-19-2006, 01:24 PM
Parent: #1

هناك حد أدنى يتفق الجميع على أنه إذا ما توفر في شئ .. وصفه الجميع - وأنا منهم- بأنه جميل ... ولكن عماد تجاوز حدود الإبداع .

لكم مودتي

الحلاوي

Post: #54
Title: Re: بأى غصن تكتب يا عماد عبد الله
Author: عامر تيتاوى
Date: 02-19-2006, 03:10 PM
Parent: #53

غصن من زيتون لونو اخضر

غصن يرمز للسلام والمحبة والاخوة والجمال والخير لكل الناس

شهادة لله .. وللتاريخ بحكم المعرفة والزمالة والملح والملاح فى ذلك البيت العامر

الاستاذة تماضر

حقيقة عندك بعد نظر.. والفنان يدرك مواضع الفن


Post: #55
Title: Re: بأى غصن تكتب يا عماد عبد الله
Author: khaleel
Date: 02-19-2006, 03:29 PM
Parent: #54

الفنانة تماضر

فعلا عماد انيق المفردة جميل المخبر

اقول له كما قال الحسين الحسين

كل هذه الحروف خطها بنانك المنمق المومسق

لا غرو انها تاتالق

وانها تموج بالعبير تعبق

اسطرها بحر اشتياق موجه يصطفق

في لجه اضيع راضيا واغرق

Post: #61
Title: Re: بأى غصن تكتب يا عماد عبد الله
Author: Emad Abdulla
Date: 02-26-2006, 04:16 PM
Parent: #55

أخي خليل

تحياتي ..
و لك جميل اعتذاري في تأخر شكري لك على أفضال كلماتك ..

و ليتني كنت كما تقول ..
لكنها النخلة تماضر .. تحيل ( الفسيخ ) شربات
سامحها الله ..
فهي تجمل قبحنا بتواضعها .. و ( خمتها ) فينا ..
وتفعل أنت كذلك بكلماتك الطيبات ..
أشكرك كثيرا..



لك كامل مودتي و احترامي
يا صاحبي

Post: #62
Title: Re: بأى غصن تكتب يا عماد عبد الله
Author: Emad Abdulla
Date: 02-26-2006, 04:34 PM
Parent: #54

يا عامر ..

تعبت أن أجد لك مدخلا ..
عامر صاحبي .. أم عامر الأديب ؟
عامر الذي رأيت دموعه يوما ما في عام أخضر .. سحت دموعه حين :
ليه فجأة دون أسباب
من غير عتاب أو لوم
اخترت غيري صحاب
و اصبحت قاسي ظلوم
هن ليك فراقي خلاص ؟
وانا برضي حولك احوم
قول لي ايه ضراك
لو كان صلاتنا تدوم
غاية المحبة سلام

وانسربت روحك أدمعا حين انسراب اللحن العظيم ..
أفقول أكثر ؟؟
أيها المخلوق من عصب الابداع ..
يا صديقي الجميل

خالص مودتي لك

Post: #64
Title: Re: بأى غصن تكتب يا عماد عبد الله
Author: Emad Abdulla
Date: 02-26-2006, 04:56 PM
Parent: #53

أيمن .. أيمن .. أيمن

يا الله .. كم سعدت بكلماتك
( لا تصدق تماضر ) ..


أنت تعرفني أشتر و عنيد .. سوقي العبارة
و بالكثير ( عرضحالجي ) على قول عبدالرحمن نجدي ..

لكن تأبى تماضر الا أن تلبسني ازارأ أوسع مني ..
فشكرا لكلماتك ( ورقة التوت ) تستر فقر لغتي حين يسقط ازار تماضر عني ..


قبل عني ( عيالك ) الحلوين ..
يا صاحبي الجميل

شكري و مودتي ..

Post: #56
Title: Re: بأى غصن تكتب يا عماد عبد الله
Author: صديق الموج
Date: 02-26-2006, 06:57 AM
Parent: #1

Quote: عشرون يا (
Quote: خالو ) ؟؟؟


خــالو ..؟؟
صديق المووج طلع خالووو ؟؟
..
والله كان ما صاحبي .. وكان ما الناس ديل مسكوني منك كان قلت ليك ( خالوو ) يا كبير ؟؟
..
.
أنتو يا صديق وتماضر
؟؟
عماد دا ود ناس منو



تمبس خالو ساكت ...الزمن مشى ياولد
وبعدين عماد ده ود ناس السماء الطاعمة..وود ناس المصارين الحنينة هو امدرمانى ابتلعه الديم
عزاؤنا رجع اخيرا وتزوج امدرمانية حبوبة جميلة وفنانة تشكيلية نحسده عليها كثيرا..التحية
لعماد وحليمة اين ما حلوا.
تصدق يا تمبس جلس عماد بالرياض عشرون عاما وذهب قبل عام الى الدوحة وهو تشكيلى نجيض وكان رجل الكاركتير الاول فى جريدة السودانى وزول مسكون ومشوطن..اندم لماذا لم نربط نفسنا اليه كما فعل السندباد بالرخ..لماذا تركناه ينسرب من بين ااصابعنا كما الماء من الغربال.
اهل الدوحة بختكم عضوا عليه بالنواجز وهو كسلان كبير‘‘‘

Post: #57
Title: Re: بأى غصن تكتب يا عماد عبد الله
Author: Emad Abdulla
Date: 02-26-2006, 08:13 AM
Parent: #56

يا صاحبي ..
يا موج ..
( يا خالووووووو )

.. ما جاءت قط في البال تذكرةٌ لشيء - أي كان هذا الشيء - إلا و كنت أنت هناك .. حاضراً بقولك وسمتك اللطيف و ثقافتك ( الضاجة ) يمنة و يسرى ، تكون حاضراً حين ندلف و الأصدقاء إلى ( جخانين ) السياسة .. و عطر الغناء .. و قهقهة الـ ( بلاوي ) الطريفة عندك .. و سمو الآداب .. و قامات الشعر .. و دروب السوداناوية .. و عبق أمدرمان .. و حكايا البلد من أطراف ثقافاتها الفسيفساء .. و الغزل الأعف .. و القيم ( السمحة ) و .. و .. و ..
ماذا يا رجل ؟؟
كيف تأتت لك نواصي ( الطلاوة ) في كل ذاك .. دفعة واحدة ؟؟

يا صديق .. أفتقدك كثيراً
في فلوات الغياب هنا ..

........

ولتمبس الجميل همسة :
يا كبير .

Post: #60
Title: Re: بأى غصن تكتب يا عماد عبد الله
Author: nadus2000
Date: 02-26-2006, 11:14 AM
Parent: #56

Quote: اهل الدوحة بختكم عضوا عليه بالنواجز وهو كسلان كبير‘‘‘


العزيز صديق الموج

تحياتي
وبقول ليك الواعي ما بوصو، فقد عقدنا بيعتنا عند الشجرة.

Post: #58
Title: Re: بأى غصن تكتب يا عماد عبد الله
Author: صديق الموج
Date: 02-26-2006, 08:27 AM
Parent: #1

عماد الجميل..لا اريد مدحك على طريفة هذه بتلك ولان الشىء بالشىء يذكر فقد ذكرتك بالامس عندما طلب منى احدهم ان احكى لهم قصة عمنا مع الحمارة والكلبة وعادة ما اقول الله يقطع شيطان عماد الذى اخرجها من الخاص للعام واخشى ان يطلب منى حكايتها فى احد الحفلات الجامعة...وقتها سوف اردد الله يلعن شيطان عماد..وشايفك الايام دى مزاكر ود الرضى كويس يعنى شوية وما نلقى معاك مداخلة ..يارعاك الله تامل
مالى ارى العالم ثمالة والبدور مزدهرة بكمالة والملائكة اليوم فرحة ماله يبقى بت السماء سدو ماله...شوف كبسولة الفرح التى ادغمنا غورها هذا الشيخ الجميل له الرحمة..ولك التحية

Post: #59
Title: Re: بأى غصن تكتب يا عماد عبد الله
Author: عزيز
Date: 02-26-2006, 10:56 AM
Parent: #58

البنت الحديقة أستاذة تماضر

يامنجمة فى مكامن الجمال والخلق والأبداع

لك التحية كنداوتك والسحر

أتابع كل ما يكتبه هذا المبدع عماد عبدالله بكثير إندهاش ومتعة

فهو مالك لروعة الحرف وجماله..


عبدالعزيز خطاب

Post: #63
Title: Re: بأى غصن تكتب يا عماد عبد الله
Author: معتصم الطاهر
Date: 02-26-2006, 04:39 PM
Parent: #1

Quote: و لا معرفة هناك .. ولا يحزنون
هل رأيت ( عنقالي ) يعرف ؟؟؟؟


نعم
العنقالى والزول العادى ..

Post: #65
Title: Re: بأى غصن تكتب يا عماد عبد الله
Author: عامر تيتاوى
Date: 02-27-2006, 03:15 AM
Parent: #63

غزل صريح

ننساك !! هو انت بتتنسى ؟؟؟؟؟؟؟؟؟؟

صديقى عماد عبد الله

صباح اليوم استمعت الى عامر الجوهرى يغرد

فى رونق الصبح البديع

تذكرت الايام التى ما بارحتنى وتلك الحكايات الحنينة .. وبص الكلاكلة .. والخزان ويارا

الجميلة .. والعالمية ..ووو

صاحب القلب الاخضر

عشرة الايام لن ننساها

Post: #66
Title: Re: بأى غصن تكتب يا عماد عبد الله
Author: صديق الموج
Date: 02-27-2006, 05:03 AM
Parent: #1

Quote: العزيز صديق الموج

تحياتي
وبقول ليك الواعي ما بوصو، فقد عقدنا بيعتنا عند الشجرة.


نادوس اللماح...اشكرك طويلا اتمنى ان لا تكون قد نسيت طلحة الخير والزبير وبهاء الدين والابنوسة عندما كنتم فى طريقكم للبيعة واتمنى ان تتعرفوا على حرمه المصون التشكيلية حليمة فتلك نخلة اخرى لكم التحايا،،،

Post: #67
Title: Re: بأى غصن تكتب يا عماد عبد الله
Author: نادية عثمان
Date: 03-01-2006, 07:41 PM
Parent: #66

تماضر

الف وردة بيضاء لك اينما كنتى فى هذه الساعة من المساء (بمواقيت هنا )


عماد

بس جيت اقول ليك

Quote: إلهي إدّو باريكيري

Post: #68
Title: Re: بأى غصن تكتب يا عماد عبد الله
Author: صلاح شعيب
Date: 03-02-2006, 01:07 AM
Parent: #67

تماضر

هذا وفاء يأتي ليبقي..
عماد بعض من ثمة فرح يدوم..
وتعسيلة حرف ونغم وخطوط, وأظن طارق أبوعبيدة جسد
حرف الصول,
صديق الموج قال أن عماداً كان صديقا ً له قبل عشرين عاما ً,
أنا قريب منه في مزاملة عماد , حين كان يكتب بريشة " البلد"
شيئا حاول به تبيئة رسومات صباح الخير وروزاليوسف, كان مكتب مجلة البلد
لايتجاوز الاربعة في اربعة, ومع ذلك كان عماد عبدالله ركنا ً ركينا ً من ذلك
"البلد" التي حررت فيها الرياضة مع عبدالمجيد عبدالرازق..منذ ذلك التاريخ "لم
أر ذات العماد" إلا هنا, يميل بغصنه نحو البوستات فيجملها بروحه الوسيمة, وسلاطة
مقاومته لذاك الافك, أتذكره آتيا ً من كلية الفنون بعد أت تعبأ بالفرح والحب والغناء
وهكذا كان يزاول نشوقه, ثم يهاجر إلي منتديات مصطفي سيد أحمد وشرحبيل أحمد والسمندل
ثم لاينسي أن ييمم بشطره نحو قاعة الشارقة ليستمع إلي علي المك أو محمد عمر بشير, ثم
هكذا يأتينا في الجريدة مسرعا ًبجراب من ألوان الثقافة والفن, فيصمم صفحاته لتخرج البلد في اليوم الذي يليه مزركشة بإستثنائيته وتمرده التصميمي الباذج, من أعلن النعي علي ذاك الزمان..؟
أما الاصدقاء عبدالرحيم يسن وحمدي عبدالرحمن ودرمة ومحمد الصادق الخطاط وعباس المصمم وربيع وطمبل وعطيات عبدالرحيم وعمك محمد السواق وعباس المطبعجي وحسين حسن حسين وبنات محجوب وعثمان نمر ونصرالدين منزول وإبتسام عثمان والراحل حسن عزالدين وصلاح عمر الشيخ وغيرهم من تيم السوداني كانوا أصحاب نكتته ومكملي فنه..بينما لحيته تلك كانت تميزه من هؤلاء الناس الجميلين.وتزيده تمرداً.

عناد عماد ياتماضر في إنه يكتب بغصن الناس الذين يمنحوه التأمل والضحك..ويرسم بألحان الفنانين الكبار.. ويصمم مادته بروح الدعابة ونقاء السريرة..أما تمرده فمن جهة أنه
يضرب اللون حتي يستجيب..ومع ذلك شوته شية من نار المجاذيب ــ بصوفيته الراقية في التعامل مع الناس.

وهل أزيد حتي يتذكرني هذا الزميل الذي أعرفه أكثر من صديقنا صديق الموج..؟

Post: #69
Title: Re: بأى غصن تكتب يا عماد عبد الله
Author: Emad Abdulla
Date: 03-03-2006, 03:42 AM

يا صلاح القريب ...
أتذكرك ؟.. تقول ؟ ..

ثم تفتح أنت باباً في ولوجِه وجعُ الحنين ؟ ..
وتسأل هل أتذكرك ؟؟
أفهل نسيتُ حتى أتذكر ؟؟

و .. ( ما أنا بقاريء ) ..
لن أعيد قراءة ما كتبته يا صلاح ..
فلا طاقة لي للعبور في ( عتمور ) شوقٍ لن أخرج منه إلا بحزن كبير .. و ابتسامة.

قرأت ما كتبته أنت على ( حليمة ) .. تذكرها ؟؟؟
صمتت .. ثم ذهبت تخبيء ( عبرتها ) في صور الأصدقاء القديمة .. و ذهبتُ و .. شوقي موارب .
كأنك أعملت عصىً سحرية في ذاكرتي ( المتآكلة أصلاً ) إلا من الأصوات الوليفة البعيدة .. تأتي كما الأصدقاء .. دافئة و لصيقة بالروح .. و تنبت كل التفاصيل الملونة .. ولا أينع .

يا صلاح ..
يا صديقي القريب ..
لن أعيد قراءة ما كتبته ..
ولا أغفر لك زعزعة طمأنينتي المستكينة لـ ( التعوُّد ) .. و بطء إيقاعي ( الآمن ) الآن .
ولن أغفر دخولك ( دِعتي الخاملة ) هذه بالطبل وألوان الشموس والأناشيد الفوّارة .

.. لكنني أغفر لك أن ( ذهب الظمأ ) .. و ( ابتلت العروق ) ..
عسى أن ( يثبت أجر ) كلماتك فيَّ ..
ويكف الحنين ..

Post: #70
Title: Re: بأى غصن تكتب يا عماد عبد الله
Author: محمد سنى دفع الله
Date: 03-03-2006, 05:47 AM
Parent: #69

تماضر تحياتي احترامي
في يوم من
الايام
لمن تقابلي عمادقبال ما تسلمي عليه أحكي ليه نكته من النوع الفاخر
وشوفي البشتنه والضحك القرقراب ودمع الفرح المابقيف بعدين بكون محتاج لي ساعة راحه من وجع الضحك (ما اي نكته )) نكته فيها كل مقومات الفن البديع ..
لمن تقابلي عماد قولي ليه وين رسمك واستعدي للشهقه وااااو((ده عشان انتي في امريكا )
لمن تقابلي عماد بتعرف ترسم كارتون ؟؟أسأليهو!!
اقوليك شنو الماعملو في فيلم أبو زنه الخنفوس الذي حلم بزواج القمر )))
الفيلم حاز على جائزة مهرجان القاهرة الاولى اخراج عبدالرحمن نجدي صوت ابوزنه السنى الرسومات عماد عبدالله والجائزة لدولة قطر منتجة الفيلم
اي واحد شاف الفيلم انبهر وقالوا ده استايل والت ديزني
قلت ليهم ده استايل والت الديامي
الديم سنما غرب والنيل الازرق
الكتب الجميلة والاغاني الرائعه من كل العالم
الندوات والمحاضرات والمظاهرات
والشكل بي سبب وبدون سبب..واطلع معاي الخلا
والكورة ولاد الحله
ونسة الحبوبات والاساطير
والبنات الجميلات ومصارعين الثيران المغاوير
ومجانين الفنون والشوارع والحلبة والرسموا علب صناديق الحلاوة
من جحا لي عيون كديس
والصعاليك والمؤدبين وابناء السبيل
وشفع الحواري وبياعين الجرائد
والفارشين الكتب والنايمين على الرصيف
والغبش والمتمرين ولابسين هدوم العيد
والحكايات الجديده والحداثة وفي الحته دي
والمثقفين والناس الحقيقين
نفس عماد
روح عماد
ومن النفس والر وح

Post: #71
Title: Re: بأى غصن تكتب يا عماد عبد الله
Author: محمد سنى دفع الله
Date: 03-03-2006, 05:48 AM
Parent: #69

تماضر تحياتي احترامي
في يوم من
الايام
لمن تقابلي عمادقبال ما تسلمي عليه أحكي ليه نكته من النوع الفاخر
وشوفي البشتنه والضحك القرقراب ودمع الفرح المابقيف بعدين بكون محتاج لي ساعة راحه من وجع الضحك (ما اي نكته )) نكته فيها كل مقومات الفن البديع ..
لمن تقابلي عماد قولي ليه وين رسمك واستعدي للشهقه وااااو((ده عشان انتي في امريكا )
لمن تقابلي عماد بتعرف ترسم كارتون ؟؟أسأليهو!!
اقوليك شنو الماعملو في فيلم أبو زنه الخنفوس الذي حل%E

Post: #72
Title: Re: بأى غصن تكتب يا عماد عبد الله
Author: Sabri Elshareef
Date: 03-03-2006, 08:00 AM
Parent: #1

ده بوست من سماحتو بجيب السكري من الفرح

تماضر شوافا وشفافا معاها عماد فاكهة واكسير حق والفنان الرائع

عصام عبد الحفيظ واتذكر معرض الركز الالماني وافتتاح معرضه

بواسطة دكتور موسي الخليفة وكان معرضا للسودان وحيوا فيه

شهداء يناير علي راسهم استاذ محمود وطه يوسف عبيد

بوست به بتنا واختنا عشه مبارك من خطواتها الصاح انا اقتفي

اثرها

عبد الجليل ود كوستي الوارف ضلو وفضلو وفضل اهلو كتير
اخص جانب خاله علي واحمد والقسمه تقطع من لحمها وتشوي

للحبان والضيفان

اه من اه لو لا الغلط والاكل الكعب لما كان السني بالدوحة

وتماضر بامريكا وعشه بالامارات

ولحبيبنا البرنس وردة وقرنفلة لا انسي الهام

المسافر اما ان التوقف عن الترحال اتمني وصولنا لمحطة

خيرا كتير وثمرها كتير

لو نسيت ضيف في مقام خدر فاكون قد قصرت في انسان

جلعني انتبه لسودانيز وبصمت امشي اتاوق لحاجاته

واصلوا///ن

Post: #73
Title: Re: بأى غصن تكتب يا عماد عبد الله
Author: Tumadir
Date: 03-04-2006, 00:11 AM
Parent: #72

اصدقائى "اصدقاء عماد" الاعزاء والمحترمين...

فى حاجة كده انتو ما عارفنها..

انا بتعرف على عماد لاول مرة ..فى البوست ده من اصحابو

وحاة "الله" وما طالبنى حليفة ..

أول مرة اعرف انه عماد تشكيلى ..

وانه من الجيل "الذى منو" ده..

وانه معروف بالكتابة اصلو

وانه صاحب "بالين" ..(يعنى صاحب السنى دفع الله)

وانه صاحب اصحابى كلهم..كمان

فى ناس قايلننا "شلة"

انت يا عماد كنت "شلة" وانا ما عارفة ولا شنو؟؟

المهم بركة الحدسى رسلنى ليك..

وما كسبانه الا أنا.. وكل البحبوك يا عماد ..شرفتنا ولميت لينا "خيار الناس" ....وما "تبش الشواطين" هههههههه