Post: #1
Title: دفرة يا سيزيف..(أو ذلك الشرغرغ)
Author: Tumadir
Date: 10-24-2006, 07:51 PM
Parent: #0
دائما ما تخطر ببالى وانا أكابد هذه الحياة "أكبد" شخص فى الاساطير ألا وهو سيزيف
وقد كتب عليه أن يحمل صخرة و"يدفرها" كل يوم الى أعلى جبل
وفى نهاية اليوم"تتدردق" الصخرة الى قاعه فيبدأ من جديد ..
كنت غريرة عندما اعتقدت ان سيزيف هذا هو "اكبد" الناس
وسبحان الله منزل القرآن القائل: لقد خلقنا الانسان فى كبد"..
عندما درسنا الآية فى صغرنا وشرحوا لنا معانيها، كانت دائما تقفز الى ذهنى لحظات تعاستى وأنا طفلة
وتتمثل فى ثلاثة أشياء لشدة ما كنت أبغضها كنت أظن أنها ما عنيت به كلمة "كبد" ..
ما تزال صورتى تتراءى لى وانا أمر بتجربتى "الكبدية" فى الطفولة ودموعى تخر
وكذلك خياشيمى وانا أتنكد من كثرة البكاء ..
كبد ما بعده كبد..
الثلاثة مواقف هى:
مجرى المشط فى شعرى الكثيف بعد الغسل
وقرصة الورك
وغسيل الشرغرغ .....
عوع وثم عوع من هذه الثلاثة أشياء
المشط وهو يبرز أنيابه "السواسية" كلها ويدخل فى غابة شعرى المبتل وأمى "تزعط" وتسىء ألى شر اساءة عندما تلاحظ اقتضاب حبينى "وأبيانى" التام للمبدأ من أصلو..
وأنهار الدموع..
(البنات يتدهنن كل يوم وانتى جارية بى تفتك متل الشيطان مع الولاد..)
على وزن ما قالته لى صديقتى خالدة أن أمها كانت "تنكد" عليهم لعبهم ومرحهم بكلام مماثل
(بنات محاسن القدرك بيسون الطعمية)..
..والى آخر الموال الذى يخرج الموضوع من أساسه ومعناه ..ويقعد للزول فى "كبدته" سنين عددا
ويكرهك فى "البنات" الأحسن منك فى نظر أمك ديل... "بس كدى ألاقيهن..شوف أسوى ليهن شنو؟"
أليس المقصود بالتسريحة هو الجمال؟ ولكن بعد المخاخيت الشافتا عينى دى ..ما بفضل للجمال فضلة
أما ثانية "الاثافى" فهى قرصة الورك ..أخخخخخخخخخ حارة وتافهة وبتمسح بالزول الارض ..
بكون سببها الشرغرغ ...
وهذا هو صخرة سيزيفى الكبرى
الشرغرغ ...
اناء مكعوج وسغيل يستخدم لصنع القهوة ..قال .."كوفى ميكر"
الناس كلها متكيفة تتجغم فى القهوة الا غاسل الشرغرغ ..
تدخلو فى الطشت مع العدة التانية ..وقعت
يلطخ العدة كلها بالتفل ..وما التفل؟ التفل هو مصماص البن بعد تصفيته فى الجبنه
ولما تدخل يدك فى موية العدة ..يهبشك التفل فى يدك واصابعك ..ملمس حشرات صغيرة كتيرة تحوم فى جسمك ..
عوع ..
اذا تحاشيته ودسيته تحت عنقريب العدة..ستكتشفه أمك لا محالة ..وحتاخد "قرصة فى الورك" مهما كان
رقم حلمتك التى تحلمها فى الليل ..
ياخى دى سيزيف ما جربها..
سيزيف..
أتخيله ..متربصا بالصخرة، يحاول أن يجمع قوته ..فيكرضم كفيه..ويحندب ظهره ,يثنى ركبتيه
ويقنت قنتة عظيمه يستجمع قوى خرافية ..ويروح دافرا الصخرة الى أعلى ..
ولكنها كعادتها الصخرة البايخة وهو عائد من أعلى الجبل، تسبقه الى الآرض ، وكج تغتس فى حفرة ما، .
تماما .كما تلتصق حبات التفل بأيدى غاسل الشرغرغ ...
وعندما تمر الآيام تعرف أن سيزيف لم يكن حقيقة ..ولكن الشرغرغ هو أزفت الحقائق جميعها ..
لكنى أعتبر أن الانسان وهو يكابد الحياة، هو مثل سيزيف يجب أن يحندب ظهره ويكرضم يداه المعنويات ويقنت قنتة عظيمة لكى يدفر الحياة مثلما دفرسيزيف صخرته ..
واذا لم يعرف لى حياته مخرجا، يطلب من سيزيف دفرة ..
وفى مقاربتى لصخرة سيزيف بالشرغرغ ..وحيث أن سيزيف هو الخيال والشرغرغ هو الواقع
أعتبر أن كل من تغلبه مرته يمشى يؤدب حماته، أقصد كل من يغلبه شرغرغه يطلب من سيزيف دفرة
وكلنا
أعمى يقود شاحنة فى مدينة من ورق.
تحول الشرغرغ الآن الى قضايا مصيرية وقضايا كبرى
ووطن .."قرصة فى الورك"
والمعيشة نار
والتربية زى كد الحجر
وكلنا ذلك الشرغرغ ..
وكل عام وأنتم بخير 
اها دا شرغرغنا ..انتو شرغركم كيف؟
|
Post: #2
Title: Re: دفرة يا سيزيف..(أو ذلك الشرغرغ)
Author: tmbis
Date: 10-24-2006, 08:16 PM
Parent: #1
Quote: وقد كتب عليه أن يحمل صخرة و"يدفرها" كل يوم الى أعلى جبل
وفى نهاية اليوم"تتدردق" الصخرة الى قاعه فيبدأ من جديد .. |
سيزيفكم دهـ مفترض يضبــح
محظوظ ود الذين .. ما كان بيرسلو يجيب علبة صلصة للفسيخ يوم الجمعة لمــا ركن الأطفال يبتدي .. ( يقدمــه عمــــــــــــــكم مختـــــــار ) ..
ولا كان بيحموهــو في البرد .. مرتين في اليــوم.. ( وصابون الفنيك يدخل ليهو في عوينو )
ولا كان عندهم مدرسة يوم السبت
محظوظ يا سيزيفكم ..
( تفتكري الحاجات الصعبة دي هســع يخليوهو لي سيزيف يديها دفره ، والا يتحاسب عليها الزمن حساب عادي زيها وزي اي فشل بتاع طفولة .. يعني مثلا لما تكون عايز ليك مسدس موية يا نضارة لونه مووف وعدساته سوداء .. لكن قاموا جابو ليك مسدس موية وطلع ما بيشتغل )
الحاجات الصعبة دي ( التراكمات )المكتوبة فوق دي انا ما جبت حاجة من عندي
كل سنة وأنت طيبة يا تماضر ،، كتابة البيت ده حاجة حلــوة جدا ..
|
Post: #3
Title: Re: دفرة يا سيزيف..(أو ذلك الشرغرغ)
Author: Tumadir
Date: 10-24-2006, 08:29 PM
Parent: #2
| Quote: محظوظ ود الذين .. ما كان بيرسلو يجيب علبة صلصة للفسيخ يوم الجمعة لمــا ركن الأطفال يبتدي |
بالله ده كلو حصل عليك يا تمبس وانت صغير؟
واظنك تمشى دكان البرقاوى يقول ليك امشى دكان اليمانى ..تمشى اليمانى تلقاه قفل ..تجى راجع تلقاهم وصلوا "طريق النور" وبعد داك تنتقل الكاميرا الى الجامع الكبير
ياخى سيزيف متواضع والله ..شنو يعنى ما صخرة و بس، بتعمل ليه شنو ؟
;كل سنه وانت طيب يا تمبس ..الحمدلله حسة كبرت وممكن تعمل ليك برنامج اطفال براك ...
"كلمتك قلت ليك عمر منصور ضرب؟ "
أها ضرب
|
Post: #4
Title: Re: دفرة يا سيزيف..(أو ذلك الشرغرغ)
Author: Tumadir
Date: 10-24-2006, 08:36 PM
Parent: #3
اها أقول ليك النصيحة
الخلانى اتذكر الحاجات دى هو مشاهدة البرنامج ده ..
القربة المقطوعة البننفخ فيها ليها سنين
watch this video
|
Post: #5
Title: Re: دفرة يا سيزيف..(أو ذلك الشرغرغ)
Author: Sabah Hussein
Date: 10-24-2006, 08:40 PM
Parent: #1
قرصة الورك دى عيديتك لينا ياتماضر. الله يسامحك
كل سنه وانتى ووليداتك طيبين. وانشاءالله مايكونوا ضاقوا قرصة الورك ولأ رصعة
الضهر الغير متوقعه ديك .غايتوا انا بتـى ماقرصتها لكن رصعتها.
|
Post: #6
Title: Re: دفرة يا سيزيف..(أو ذلك الشرغرغ)
Author: شهاب الفاتح عثمان
Date: 10-24-2006, 08:44 PM
Parent: #1
اختارك
تسريح الشعر المتلبد: ملل و قسوة النظام.
القرصة: الالم.
الشرغرغ: حدث كل يوم سخف كل ساعة.
وكل عام وذاكرتك بالف خير يا غالية.
وعيد سعيد.
|
Post: #8
Title: Re: دفرة يا سيزيف..(أو ذلك الشرغرغ)
Author: NASERELDIN SALAH
Date: 10-25-2006, 00:22 AM
Parent: #7
تماضر يا رايقه
سيزيف ما عندوا شغله وااحده دفار لا راح و لا جاء
هو اصلوا لو كان بيصحوا الساعه اربعه صباحا عشان يمشي يجيب رغيف
من الفرن قبال اذان الصبح و عمره 11 سنه كان عرف الدفر ده هين قدر شنوا
ياااخ ما ممكن اربعه صباحا دي تخليك تعرف انوا اكل العيش صعب كيف و يطلعوا ليك
الاكل من مزاجك و بعد ماتجي راجع تمشي كمان مدرسه ( مدرسه شنو بعد ده )
انا لو كان الفارات شغاله الوكت داك كان بقيت دفار و ارتحت من المراسيل
كل سنه و اولادك بخير و صحه
--------------------
انا بغسل العده بس ما بمشي اجيب الرغيف
نصرالدين
|
Post: #9
Title: Re: دفرة يا سيزيف..(أو ذلك الشرغرغ)
Author: Hussein Mallasi
Date: 10-25-2006, 05:23 AM
Parent: #8
ليست مشكلة سيزيف رفع الصخرة:
مشكلتو لامن تجيهو تارة:
|
Post: #10
Title: Re: دفرة يا سيزيف..(أو ذلك الشرغرغ)
Author: Tumadir
Date: 10-25-2006, 05:30 AM
Parent: #8
كلها حكايات مأساوية يا تمبس والزول ما برضاها لى زولو
لكن لما السبب يكون "دواس الأفيال" الزول بيكون زعلان
ولما يكون ما فى ليها حل ..أو الحل معصلج زى الوضع الوصفو الدكتور ده ...الزول بيقنع من خيرا فى بلدو
المهم بهذا البوست اتأكد لى انه حكايتى مع سودانيز اون لاين زاتها المفروض الزول يقنع منها
ياخى انا كنت بترجم كل يوم قصة بشق الانفس مع الصيام والشغل والجرى والاولاد والمسئولية لاتقل عن "الشرغرغ" فى بعض الايام
رمضانيات
الناس قراية ما بقروها ..اصحابى ماشافوها ..
اها مش أخير الزول يمشى يجيب ليه رغيف زى نصر الدين صلاح ده ويتخمد يسكت
صباح حسين بترصعيها؟ مافيها حاجة الرصعة حلال ..خصوصا لما الواحدة تلامضك ، لكن خليها الرسول فى يدك منها ، تانى ما بتنساها ليك
كل عام وانت بخير يا شهاب الفاتح ،
ووداعا طويلا ...
والشكر لكل من "اتغابى فينى العرفة" من الاصدقاء ...
|
Post: #11
Title: Re: دفرة يا سيزيف..(أو ذلك الشرغرغ)
Author: Hussein Mallasi
Date: 10-25-2006, 05:43 AM
Parent: #10
| Quote: الناس قراية ما بقروها ..اصحابى ماشافوها .. |
كيف الكلام دا يا تماضر!!
انا كنت موجود؛
خدر كان موجود؛
الجريفاوي كان موجود؛
السني كان موجود؛
كابو كان موجود؛
عصام عبد الحفيظ كان موجود ..
....
....
....
| Quote: والشكر لكل من "اتغابى فينى العرفة" من الاصدقاء ... |
ما اظن في زول قاصد يتغابى العرفة؛
بس العنوان كان مضلل شوية!
|
Post: #12
Title: Re: دفرة يا سيزيف..(أو ذلك الشرغرغ)
Author: أبو ساندرا
Date: 10-25-2006, 05:57 AM
Parent: #1
شرغرغاتنا الكرهتنا الحياة ونحن مازلنا في بواكيرها
حيث يفترض ان تكون الحياة متعة ولعب وهيصة
وحلاوة ج سكينة وبسكويت كوكو ، ومراجيح في الأعياد
وجنينة عبود التي تحولت إلى حديقة القرشي
كانت :
1- الخلوة و الفلقة:
----------------------
ودي كانت مكابدات رهيبة ، تبدأ من سكة الوصول ليها حيث يتربص لك في الطريق
اولاد حنوت زي اولاد ابوجوكو وقرزن ، مان تتخارج منهم بالتغول على السندوتش بتاعك
ويضيفوه للبليلة الشايلنها ، حتى يهجمك أولاد الفلاتة ، وديل ممكن تحلك منهم كرعينك
لكن تعمل شنو مع رياح الخماسين التي يطلقونها هناك وديسكو { فاسيلي } والله تحس إنو
الديسكو فاكنو ليك في حلقك
وثالثة الأثافي { بعد اولاد ابجوكو ، وعطورات الفلاتة } الفلقة
وما أدراك ماالفلقة دي أسوأ إكتشاف تمخض عنه العقل الإجرامي وفنون التعذيب
2- سير المفحضة :
---------------
ده ودعم { قرصة الورك } وعشان نحن ماكان عندنا أوراك زيهن يقرصونا فيها
كانو بيمحطونا بسير المفحضة ، مفحضة حمراء زي المركوب الفاشري ، بتطلع بسرعة البرق
لحظة الغيظ والعقاب بيجروها من تحت برغم عوائق الجلابية ،
انا كنت محظوظ شوية عشان أمي كانت بتعيقها بعض العوائق لمن تكون عايزة تطلع المفحضة
لكن خالتي ماكانت عندها عوائق ، عوائقها كانت ورا ، وعشان كنت بشاغلها بسبب
التحركات المريبة التي كانت تتبعها
كانت بتطلع محفضة وتجدعها لأسماء وتبدأ حفلة المحط والعويل لغاية ما إكتشف
شقيقي الذي يكبرني بعامين { عليه رحمة الله } إمكانية إختطاف المفحضة وهي طايرة في الجو
في طريقها بين أمي وخالتي ، ينط منعم يلتقطها ثم بخفة يطلع منها { فريني } ويعيدها لها
في الوقت ده انا بكون قاعد في رأس البيت أو طلعت الشجرة
3- مخلصين :
--------------
كلب لعين لصديقنا الراحل غالب التهامي مدني وده كان متخصص يهجمك ويعضيك في الصلب
وانا ماعارف ليه كان بيختار الحتة دي ، يكون عشان كلب ديامي ؟
4- الكناني :
--------------
ممرض ، ثم حكيمباشي ، ترقى بسبب تفننه في عذابنا ، كان في مركز صحي المايقوما
لو أداك حقنة بيجهجهك يخليك تولول ، ولو كان عايز يغير ليك لي جرح بيخليك تسكلب
والقروحات
كانت في بلاوي كتيرة
ومكابدات شتى
|
Post: #13
Title: Re: دفرة يا سيزيف..(أو ذلك الشرغرغ)
Author: lana mahdi
Date: 10-25-2006, 05:57 AM
Parent: #1
Quote: المهم بهذا البوست اتأكد لى انه حكايتى مع سودانيز اون لاين زاتها المفروض الزول يقنع منها
ياخى انا كنت بترجم كل يوم قصة بشق الانفس مع الصيام والشغل والجرى والاولاد والمسئولية لاتقل عن "الشرغرغ" فى بعض الايام
رمضانيات
الناس قراية ما بقروها ..اصحابى ماشافوها ..
اها مش أخير الزول يمشى يجيب ليه رغيف زى نصر الدين صلاح ده ويتخمد يسكت |
الحبيبة تماضر
قرايتك دي ما صحيحة مية في المية
لاحظي لي شي: نزلي بوست و شوفي أول 5 دقائق قراءه كم؟
نرجع لمرجوع الشرغرغ :
المهم كياشة السغرة خلتك ما تعرفي تحلي مشكلة الشرغرغ:
شوية صابون بدرة و موية و تخليهم يغلو جوة الشرغرغ
أمانة التفل ما بيبقى شي عجيب و اللون داك يروح
بمناسبة التسريح صديقة أمي كانت بتسرحنا زمان بطريقة عجيبة
تهوي المشط بزاوية قائمة على أم الرأس ولمن المشط (يتغزا) بهذه الطريقة في الرأس تدور أعيننا في محاجرها!
ثم تميله بزاوية حادة و من ثم تمرره على الشعر!
كل عام و أنت بيننا
|
Post: #16
Title: Re: دفرة يا سيزيف..(أو ذلك الشرغرغ)
Author: Emad Abdulla
Date: 10-25-2006, 07:40 AM
Parent: #13
| Quote: ياخى انا كنت بترجم كل يوم قصة بشق الانفس مع الصيام والشغل والجرى والاولاد والمسئولية لاتقل عن "الشرغرغ" فى بعض الايام |
تحياتي يا تماضر .. و عيدك مبارك .
و القابلة على أمانيك ..
المهم ..
أنا من الناس الما دخلو البوست داك إلا في نهايات رمضان ..
بسبب عنوانه الـ( شرغرغ ) ..
شرغرغ كان زمان برنامج إذاعي إسمو ( رمضانيات ) ..
و كان بيقدمو الراحل الأستاذ الفاضل سعيد
ليه كنت بكره البرنامج داك . ما عارف .
يمكن أغنية المقدمة بتاعتو كان فيها عوارة :
رمضانيات سودانية ماهي مستوردة .. مية مية رمضانيات .
صوت بايخ .. و موسيقى أبيخ .. و بيجي البرنامج قبل شراب الموية بشوية .. و الجوطة و الربكة بتاعت : يا ولد رشيت الفسحة ؟ أجري فرش البرش .. كسر الفول .. ألحق دكان عبدالله جيب شاي , الإبريق وين ؟ أمشي ناس سكينة جيب الصاج .. دخل الغنم قبل المغرب .. البلاعة لغاية هسه ما اتغرفت ليه ؟؟
ده كلو و الشرغرغ ( المقدمة البايخة بتاعت البرنامج ) شغالة و مملة و غياظة .
أقراهو ليك كيف بوستك أبو عنوان شرغرغ ده !!
يديك العافية يا تماضر ..
و ما محتاجة إنتي للناس يدخلو بوستاتك ..
أتحدى لو أي بوست نزلتيهو كان ( مجرد بوست ) .
ما مجاملة .. دي حقيقة بيعرفها حتى الناس البتناقرك .
نحنا المحتاجين تدخلي في مشاركاتنا.. مش العكس ..
لأنك دايما إضافة .. و مكسب .
كل سنة و إنتي و أسرتك بألف خير .
|
Post: #14
Title: Re: دفرة يا سيزيف..(أو ذلك الشرغرغ)
Author: Salwa
Date: 10-25-2006, 07:19 AM
Parent: #1
العزيزة تماضر
دامت ايامك أعياد وسعادة تنسيك ذاك الشرغرغ اللعين.
سيزيف لم يوقظ يوميا الرابعة فجرا للصلاة حتى في الأيام التي ترفع فيها عنه الصلاة بحركاتها المعهوده، ويقتله الحياء وهو ابن احدى عشر ربيعا أن يصرخ يا عالم الله منحني رخصة فأرحموني،
سيزيف لم يصلي في شتاء قارس وهو يدري أنه لا يجب أن يصلي،
** أول يوم دخلت فيه شقيقتي الصغرى المدرسة ، عادت الي البيت حوالي الحادية عشر صباحا، أخذت سجادة الصلاة وصلت ركعات كثيرة ثم رمت "بطرحتها" علي الكرسي قائلة "حي أستريحت منه" قلت لها أستريحت مَن من؟ قالت من ْX ده وذكرت اسم من كان يوقطها للصلاة.
ثم قالت: " خليك شاهده صليتهم ليه لحدي العشاء من "هسع" بعدين ما يجي يصحيني يقول لي قومي صلي العشاْوالله ما أصلي ليه تاني"
ومن يومها وأنا أشهد لها بانها صلت العشاء عند الحادية عشر صباحا وانها لم تك تدري وقتها لمن تصلي !
** يا تماضر سيزيف ما جرب نوع من الحيرة في ال sisters school اللي جوار كلية الهندسة جامعة الخرطوم: كل يوم في وقت معين تأخذني أحدي السسترات دون خلق الله جميعا الي مكان بعيد جوار السور لاجلس جوار البواب وتتركني ابكي بكاءا يقيم عزاءت لكل أهل الأرض ثم تعود بعد فترة معينه لتأخذني من عند البواب وتعيدني للصف وانا أتواري خجلا لأني عوقبت!
كان فيها إيه ياتماضر لو ببساطة تكرم أحدى الطرفين وشرح مسألة حصة التربية المسيحية
كان لازم النكد في أجمل أيام العمر والأحساس بأنك طفل تُعاقب كل يوم لجرم لا تعرفه؟
بجيك صاده ياتماضر، لكن سؤال: من أين أتينا بكلمة شرغرغ أو شرقرق؟
|
Post: #15
Title: Re: دفرة يا سيزيف..(أو ذلك الشرغرغ)
Author: Bakhaf
Date: 10-25-2006, 07:38 AM
Parent: #14
كل هذا لا يساوي شيئا امام 17 سنة ( سجن ) في كنف الانقاذ
شفت صخرة الشعب السوداني ماكنه كيف وقمة جبله منحدره كيف ..
|
Post: #17
Title: Re: دفرة يا سيزيف..(أو ذلك الشرغرغ)
Author: Hussein Mallasi
Date: 10-25-2006, 08:09 AM
Parent: #15
| Quote: أنا من الناس الما دخلو البوست داك إلا في نهايات رمضان .. |
| Quote: أقراهو ليك كيف بوستك أبو عنوان شرغرغ ده !! |
الم اقل لك ان عنوان البوست كان مضللاً!!
|
Post: #20
Title: Re: دفرة يا سيزيف..(أو ذلك الشرغرغ)
Author: عصام عبد الحفيظ
Date: 10-25-2006, 08:37 AM
Parent: #17
Quote: أما ثانية "الاثافى" فهى قرصة الورك ..أخخخخخخخخخ حارة وتافهة وبتمسح بالزول الارض ..
بكون سببها الشرغرغ ...
وهذا هو صخرة سيزيفى الكبرى
الشرغرغ ...
اناء مكعوج وسغيل يستخدم لصنع القهوة ..قال .."كوفى ميكر"
الناس كلها متكيفة تتجغم فى القهوة الا غاسل الشرغرغ ..
تدخلو فى الطشت مع العدة التانية ..وقعت
يلطخ العدة كلها بالتفل ..وما التفل؟ التفل هو مصماص البن بعد تصفيته فى الجبنه
ولما تدخل يدك فى موية العدة ..يهبشك التفل فى يدك واصابعك ..ملمس حشرات صغيرة كتيرة تحوم فى جسمك ..
عوع ..
|
دى قصة الشرغرغ
وخايف اكون كتبتها غلط
لكنى متاكد من انى
حا اصور الشرغرغ
الشرغرغ
وهسة الاسم ده ذاتو جا من وين
واوع يطلع تركى
|
Post: #18
Title: Re: دفرة يا سيزيف..(أو ذلك الشرغرغ)
Author: esam gabralla
Date: 10-25-2006, 08:22 AM
Parent: #1
تماضر شرقرق و علاء صلصة
واحد صاحبنا هنا قرا كلامكم ده وقال لى : مجرى المشط وقرصة الورك وغسيل الشرغرغ و ركن الأطفال !!!! انحنا زمان (يعنى في احدى اصقاع الحار جاف مترامى الاطراف) لما نكون عاوزين نرفه بنمشي نسك المرفعين.
حمد العربي صديق و زميل سكن في الجامعة,من بطون الكبابيش, مرة انحنا مجموعة من اولاد البندر مجدعين المراتب بالليل في سطوح الداخلية والونسة جرت لاحلام و ذكريات الطفولة,حمد صامت,والشباب يحكى الكان عاوز يبقي دكتور والحكى عن اول عجلة و معرض الخرطوم الدولى.. فجاة حمد قعد يضحك، مالك يا زول؟ قال و هو طفل كل امنيتو لما يصحي الصباح انو الابل الساعى بيهو الليلة ما يكون فيهو واحد هايج ....
الشرقرق كلمة عاجبانى بعيدا عن تعذيبها لتماضر، فيها حركة كده , قسموها بي رواقة: شررررق (صنة) ررق...موش بالله؟
كل صخرة و انتم و سيزيف بخير
|
Post: #19
Title: سيزيفيات.
Author: mamkouna
Date: 10-25-2006, 08:32 AM
Parent: #1
قرصة الورك..
الرصعة..
سرٌيح الشعر..
المراسيل..
غسيل العدة....إلخ..
كانت بمثابة (( سيزيفيات )) حياتي..
حتى رحلت والدتي عن دنيانا إلى دنيا تليق ب حنانها و جمالها..
فأصبحت تلك السيزيفيات هي أجمل أحلامي و أغلى ذكرياتي..
أدفع عمري و أتسيزف تاني!!!
كل سنة و إنتي طيبة يا تماضر..ينعاد عليك و على أولادك بكل الخير و العافية و السعادة.
ممكونة و كافة عموم الممكوناب.
|
Post: #21
Title: Re: دفرة يا سيزيف..(أو ذلك الشرغرغ)
Author: Adil Osman
Date: 10-25-2006, 03:20 PM
Parent: #1
الى حين العثور على شرقرق او صورة شرقرق.. كتابتك جميلة يا تماضر وفيها نصوص سيزيفية كثيرة. عيد سعيد.
|
Post: #22
Title: Re: دفرة يا سيزيف..(أو ذلك الشرغرغ)
Author: سيف النصر محي الدين محمد أحمد
Date: 10-25-2006, 05:01 PM
Parent: #21
يوميا في الغدو و الذهاب تراهن في شوارع جده..في أحياءها الراقية و الشعبية لا فرق..
بعضهن يحملن أطفالهن على ظهورهن مربوطين بقطعة قماش في وضع بعيد كل البعد عن
الراحة..النسوة الأفريقيات ينبشن القمامة بحثا عن علب البيبسي و أخواتها من
المشروبات ..يبداء هذا العذاب منذ الصباح الباكر و يستمر حتى آخر النهار...يسرن من
شارع إلى أخر و من حي إلى حي يمارسن هذا النبش العبثي بصبر تراه في ملامح وجوهن و هن
يحدقن بكل تركيز في محتويات صندوق القمامة حتى لا تفلت علبة من بين أيديهن.. شخصيا لا
أعتقد أن سيزيف كان سيصمد أمام هذه المأساة طويلا.
|
Post: #23
Title: Re: دفرة يا سيزيف..(أو ذلك الشرغرغ)
Author: saif massad ali
Date: 10-25-2006, 05:46 PM
Parent: #22
تماضر
ماشفتي سيف كيف تعب لما كان صغير وزنو لا يزيد علي 30 كيلو غرام
يمشي الطاحونة بالحمار كيلتين ونصف ويشق الزراعة وينط الحمار
ابو عشرين يقع ويقع الدقيق من فوق ليهو ودي مامشكلة العتالة ورفع الشوال تاني
يكون في الطريق مافي ولا زول
وكمان صحيت الساعة خمسة يمشي السوق يشتري الملاح قبل المدرسة
يجي راجع والازمة قئمة عليهو من الجري عشان يحصل المدرسة ما ياخد علقة
بالمسطر في الاسابع من وراء
|
Post: #24
Title: Re: دفرة يا سيزيف..(أو ذلك الشرغرغ)
Author: Tumadir
Date: 10-25-2006, 07:46 PM
Parent: #23
والله شهيتونا فى شرغرغنا والحردة يا جماعة
سيزيف طلع حنكوش ساى ....معاكم
كلكم كنتو فى حالة child abuse وساكتين يا أولاد اللزينا ..
المهم حسة انا جيت من شرغرغ الشغل ...وماشة أتم تربية الاولاد ...بجبكم مرة تانية
شكرا ليكم ..وفتوه سمح ... لمن أجى...
|
Post: #25
Title: Re: دفرة يا سيزيف..(أو ذلك الشرغرغ)
Author: Abomihyar
Date: 10-25-2006, 09:08 PM
Parent: #24
يانديدتي كلو سنة وانت طيبة..
والله أنااي شرغرغ مر علي لآحب الي من هذه الحياة الضنك
في هذه البلاد الكبد.
أنا بالمناسبة ماشي السودان بعد ستة أيام كان الله هون
ومستعد لأي شرغرغ كان ماعدا
تحياتي
|
Post: #26
Title: Re: دفرة يا سيزيف..(أو ذلك الشرغرغ)
Author: Marouf Sanad
Date: 10-25-2006, 10:03 PM
Parent: #25
يا تماضر
كل سنة وانتي طيبة
دفرة يا سيزيف حافي حالق
| Quote: وكلنا ذلك الشرغرغ .. |
الشرغرغ عندو اسم دلع انا كنت زمان مستغرب فيهو , يسمونه "الشغال"
وانتي شبهتي مكابدة الحياة والشغل بالشرغرغ
يعني تاني الزول يسأل الزول يقول ليهو انت شرغرغ شنو ؟ يقوم الزول يقول والله
انا شغال شرغرغ ووشر (washer )
|
Post: #27
Title: Re: دفرة يا سيزيف..(أو ذلك الشرغرغ)
Author: Amjed
Date: 10-26-2006, 00:40 AM
Parent: #1
تماضر
سيزيف والله حنكوش جنس حنكشة
ما اتولد مع معانا في البلد دي
و في الاخر جاو هرقل و نحنا منظريين جودو
كل سنة و انتي طيبة
|
Post: #28
Title: Re: دفرة يا سيزيف..(أو ذلك الشرغرغ)
Author: saif khalil
Date: 10-26-2006, 05:56 AM
Parent: #27
ايقونة البورد الاحلي
عيدية مباركة
عطرتينا بهذا البوست ..كما دابت ان تفعلين......
الشرغرغات..الله يجازي محنهن ..ما اكثرهن في حياتنا..فلكل مرحلة شرغرغها..حقة تمباك الجد في مرحلة..مرسال السوق في مرحلة تليها..دا غير شرغرغات المدرسة..المدونة،الحساب الاملائي،الاملاء،التسميع..وفي المتوسطة الاملاء الانجليزي..وللثانوي والجامعة شرغرغاتها..اما في الحياة الزوجية..ما اكثرهن من شرغرغات ’’بالالوان‘‘..
علا عندي ليك سؤال..هو دحين الشرغرغ دا ماهو بالقاف..يعني ’’شرقرق‘‘..طول زمني دا قايلو بالقاف..لامن جيتي كتبتيهو هنا..
وفي الختام ..الله يجازي محن شرغرغك دا..الجاب لينا ملاسي بتقلو وياريت يفتينا هل هو بالقاف ام بالغين..فهو بالتراثيات عليم!!!
مودتي
|
Post: #29
Title: Re: دفرة يا سيزيف..(أو ذلك الشرغرغ)
Author: Hussein Mallasi
Date: 10-26-2006, 06:09 AM
Parent: #28
الشرقرق صاح .. و الشرغرغ ما غلط!!
|
Post: #30
Title: Re: دفرة يا سيزيف..(أو ذلك الشرغرغ)
Author: saif khalil
Date: 10-26-2006, 08:48 AM
Parent: #29
يا سلام يا ابو الصحب
ابدا ما خيبت ظني
ودي ..المحرية فيك
نجدة غريق ومنارة للتايهين
تب تاني ما عندي كلام!!
الفتوي عند مالك
ومالك بالمدينة
ويا بختنا بيك يا سحس..مفتيا للديار
وكل عام وانت بخير
|
Post: #31
Title: Re: دفرة يا سيزيف..(أو ذلك الشرغرغ)
Author: عصام عبد الحفيظ
Date: 10-26-2006, 09:51 AM
Parent: #30
ــــــــــــــــــــــــــــــــــــــــــــــــــــــــــــــــ
فى مرحلة ما ............... قبل الشـــــــــــــرغـــــــــرغ
|
Post: #32
Title: Re: دفرة يا سيزيف..(أو ذلك الشرغرغ)
Author: نادر السوداني
Date: 10-26-2006, 01:18 PM
Parent: #31
كل ذوول بي حالو يدور
يلملم في الشقي المشرور
الوجع في الجيب مصرور
لابسد لابيبل الزور
...................................العزيزة طم طم كل سنة ونت طيبة والاسرة بخير وعافية
|
Post: #33
Title: Re: دفرة يا سيزيف..(أو ذلك الشرغرغ)
Author: khaleel
Date: 10-26-2006, 01:31 PM
Parent: #1
تمادر
هي شرغرغات وليست واحد
ضابط شرطة بدبورة واحدة تم احالته للصالح العام ماذا يفعل
جيوش من الخريجين عاطلين عن العمل
سفير متقاعد يبيع الفيديو ليكمل ابنه دراسته الجامعية
مريض بالفشل الكلوي ولا يملك ثمن الغسيل
نكد كلها الحياة
وكما قال احد الفلاسفة
الحياة هي المصيبة التي تسبق الموت
وفي شرغرغ قديم حار جدا
( دق الشلوفة والشلوخ عند حبوبابتنا)
|
Post: #34
Title: Re: دفرة يا سيزيف..(أو ذلك الشرغرغ)
Author: Asma Abdel Halim
Date: 10-26-2006, 06:10 PM
Parent: #33
تماضر
المحيرنى فى غسيل الشرغرغ ليه سواد البن ما بطلع من تحت الاضافر إلا بعد يومين؟
ده كله ما بلحق فرتيق اللمة للعب بى بت أم لعاب.
ودفرة يا سيزيف حافى حالق
|
Post: #35
Title: Re: دفرة يا سيزيف..(أو ذلك الشرغرغ)
Author: النذير حجازي
Date: 10-26-2006, 07:13 PM
Parent: #34
تماضر اللذيذة سلامات يا غالية وكل سنة وإنتي طيبة، وإن شاء الله السنة الجاية على أمانيك، بوستك دا عجبني جداً، وعايز أساهم فيهو، وعندي آلاف الحكاوي عن آلام وشقاوة الطفولة، بس عايز أجيهو مروق وبي مزاج فى "وييك اند"، ولك خالص معزتي وكل إعجابي، وحتى عودتي كان الله هون، لأنو والله أخوك حالتو زي سيزيف وكت للنت ماعندي، عليك الله فى حالة أصعب من كدا؟
|
Post: #36
Title: Re: دفرة يا سيزيف..(أو ذلك الشرغرغ)
Author: Tumadir
Date: 10-26-2006, 08:33 PM
Parent: #35
كل ما أدور "اصنقر" وأرد عليكم بمزاج الجبنة وليس "الشرقرق" (كمان ناس سيف كلى عملو ليه ادغام بغنة، يعنى على شناتو قامت ليه سن فى لهاتو)
المهم دايره اقول كلما ادور اصنقر ارد عليكم بمزاج "زيفة" سيزيفة تقوم ...
معليش حسى قايمة زيفة فيلادلفيا والعرض "البعد الضبح" ..
واصلوا فى ظرفكم وجمالكم ... وانا لابدن برجع ليكم للونسة
اسماء عبد الحليم فلتى لى دفرة ياسيزيف حافى حالق؟؟ هههههه حلوة !!!
ان شاء اللهو أجى ...
ولكم محبتى ومودتى ..دااااائما "ياخوانا مع البنات" او كماقال ..
|
Post: #37
Title: Re: دفرة يا سيزيف..(أو ذلك الشرغرغ)
Author: عبده عبدا لحميد جاد الله
Date: 10-26-2006, 08:52 PM
Parent: #1
العزيزة تماضر ... كل سنة وانت طيبة
| Quote: الشرغرغ ...تفتك ... التفل |
والله يا تماضر ماشاء الله كتبت مفردات ذكرتنا عصر ما قبل الكيانات يا سلام
على الزمن الجميل وناسه الرائعين .
|
Post: #38
Title: Re: دفرة يا سيزيف..(أو ذلك الشرغرغ)
Author: عصام عبد الحفيظ
Date: 10-27-2006, 01:27 AM
Parent: #37
ـــــــــــــــــــــــــــــــــــــــــــــــــــــــــــــــ
جبنة اثيوبية ام من دون شرغرغ ؟؟؟؟
|
Post: #39
Title: Re: دفرة يا سيزيف..(أو ذلك الشرغرغ)
Author: saif khalil
Date: 10-27-2006, 05:48 AM
Parent: #38
يا اخوانا
واخص بورداب السودان او الداخل..الداخل دي حلوة..
الحقونابصورة
منجوه الطاري..الشرقرق استنادا علي فتوي ملاسي
مودتي
|
Post: #40
Title: Re: دفرة يا سيزيف..(أو ذلك الشرغرغ)
Author: NASERELDIN SALAH
Date: 10-29-2006, 00:55 AM
Parent: #39
+شردوا
| Quote: كلكم كنتو فى حالة child abuse وساكتين يا أولاد اللزينا .. |
|
Post: #41
Title: Re: دفرة يا سيزيف..(أو ذلك الشرغرغ)
Author: ابو جهينة
Date: 10-30-2006, 02:10 AM
Parent: #40
الأستاذة تماضر
كل سنة و إنت و الأسرة بألف خير
| Quote: الناس كلها متكيفة تتجغم فى القهوة الا غاسل الشرغرغ |
غاسل الشرغرغ و المقروصة في الورك ( كهاتين ) .. و أشار بسبابته إلى كومتين في جبهته 
و لكنه لم يذكر تسريح الشعر بعد غسله حيث أن الكومة التالتة كانت قد بدأتْ في الفششان.
الكومة : ورم غير نازف نتيجة لضربة أو وقعة.
الفششان : هو حالة إنحسار الورم تدريجياً ..
***
تماضر .. صخورك التلاتة ، سيزيف ذاتو ما كان حيجي جنبها
لك الود
|
Post: #42
Title: Re: دفرة يا سيزيف..(أو ذلك الشرغرغ)
Author: Salma Daoud
Date: 10-30-2006, 02:31 AM
Parent: #41
الكلمة زاتا بايخة!!
وكما قال ود أخت أسماء عبد الحليم في طفولته عندما نهرته حبوبة نعمة بأن يناولها الشرغرغ
"يا حبوبة بيعضيني!!"
.
.
.
مشتاقين يا طمطم!
|
Post: #43
Title: Re: دفرة يا سيزيف..(أو ذلك الشرغرغ)
Author: صديق الموج
Date: 10-30-2006, 03:06 AM
Parent: #1
تماضر بختك ما حضرتى زمن نضافة ام فتفت...لكن يا تماضر الحنكشة فيك ما خايلة
غسلى شرغرك واندمسى...قالت غسيل الشرغرغ صعب،،،
|
Post: #44
Title: Re: دفرة يا سيزيف..(أو ذلك الشرغرغ)
Author: احمد العربي
Date: 10-30-2006, 03:12 AM
Parent: #43
صديقتي الجميله
اجمل ليفة اشميق
لك
وجبنات رايقات لا يتعكرن
كل سنه وانتي اجمل
وسماءاتك صافيات
مودتي
|
Post: #45
Title: Re: دفرة يا سيزيف..(أو ذلك الشرغرغ)
Author: محمد المرتضى حامد
Date: 10-30-2006, 04:03 AM
Parent: #44
تماضر العزيزه
كل سنه وانت طيبه
وفقا لتجربتك السيزيفيه أعلاه والأثافي الثلاث أقول لك ، مقارنة بما شاهدناه في أصقاع السودان من طفوله ، أنت (مرتاحه). طبعا ناس سيرين ديل لما تجيبي سيرة عبارات زي (الشرغرغ) و(قرصة) بيعتقدوا انو أمهم بتتكلم (لغات) المهم قولي ليها ..حرما.
لك الود
|
Post: #47
Title: Re: دفرة يا سيزيف..(أو ذلك الشرغرغ)
Author: Tumadir
Date: 10-30-2006, 06:27 AM
Parent: #45
اصدقاء الشرغرغ الاوفياء
اولا أحب ان أشكر هذه التداعيات التى جابتكم لحدى هنا ...فردا فردا
ثانيا: أشكر الدنيا على زرزرتها لى ومعدمانى الوكت "المناسب" باصرار واضح منها ان تزيد شرغرغى شرغرغا ..وسيزيفى زفتا ...
المهم يبدو أنكم من الاصدقاء الذين يتفهمون معنى "عصر الزرة" بما فيه من "عصر" "وزرة" على السواء
وستطولون بالكم الى حد السلبة ..حتى أعود ..
فأشكر لكم تفهمكم هذا "وتكبدكم" مشاق الانتظار الممل
فقد كنت أيام الويك اند الغراء فى رحلة طويييييييلة وجميييييييلة الى فيلادلفيا ..استجابة لدعوة منهم كريييييييييمة ..للمشاركة فى يوم السودان الأغر مع أهلى المكتسبين الذين "قاموا لى" فى فيلادلفيا ..بعد أن سحب منى الزمن فضل مشاهدة "اهلى البيولوجيين" ...
وبعد أن أعود من "الشغل الشاغل" الاسمو الوظيفة ..سأحكى لكم عنهم كثيرا....
|
Post: #46
Title: Re: دفرة يا سيزيف..(أو ذلك الشرغرغ)
Author: بدرالدين شنا
Date: 10-30-2006, 06:22 AM
Parent: #1
الغالية تماضر
سلامي وإحترامي وإشتياقي
شفتي (قابلني) البكتبها الأستاذ في الكراس دي مش شرغرغ دي الجمرة ذاتها
وبعدين الشرغرغ الصحي صحي أولاد من حلتنا كانوا حاقرين بي حقارة يعني أنا يومياً باخد لي كمين كف وضربة بي ضهر الأصبع بقولوا عليها (تمرة) والمصيبة ما عندي زول كبير احرشو عليهم
تحياتي
|
Post: #48
Title: Re: دفرة يا سيزيف..(أو ذلك الشرغرغ)
Author: nazar hussien
Date: 10-30-2006, 09:15 AM
Parent: #46
هسي الواحد في الزمن العلينا دا لو قال ليكم:
يحكي في زمان بعيد .. زمان ليس فيه مصفاة...أيام البن كان يأتي اليهن وأعني حبوباتنا حبا من الحبشة...ويقولن كدي يقعدن كيمان كيمان للجبنة وقليها في النار....ويدقنها...لأنو الفنادك...أقدم من الجبنة....والمصافي برضو ما كانت في....وكانن بشربن الجبنة بي تفلها...
الي ان اكتشف اليهن جدكم اسحق نيوتن نظرية الشر غرق...والتي وصلتنا نحن باسم نظرية الازاحة
ونيوتن زاتو كان يحمل اناء به ماء يرمي فيه كل ما يراه شرا...فأكتشف أن كل شر يغرق بقدر حجمه
ويزيح من الماء كذلك قدر حجمه....قام قال ايوا....الشر غرق....لكن الموية الغرق في محلها وينا؟
وبدأ ينظر...النظرية اللا يومن دا...
ومن وقتها...والداير ليه فنجان جبنه...يستعمل نظرية الشر غرق...وسموا الاناء باسم النظرية
والغريبة لقوا الشر ما بغرق كله...الشر البعرف يعوم ويطفح بمرق
قام جدكم نيوتن اكتشف ليفة لي الشر الما بغرق عشان تشرقو وتكتم نفسو في الحجرة
وسماها ليفة الشر غرق...
ما الدنيا دي كلها نظرية حتي محجان العليف جاء من نظرية
|
Post: #49
Title: Re: دفرة يا سيزيف..(أو ذلك الشرغرغ)
Author: القلب النابض
Date: 10-30-2006, 09:25 AM
Parent: #48
العزيزة تماضر
كل سنة وانت طيبة ...
واصدقاء الشرغرغ بخير ...
بوست معاني وذكريات ..
|
Post: #50
Title: Re: دفرة يا سيزيف..(أو ذلك الشرغرغ)
Author: Tragie Mustafa
Date: 10-30-2006, 09:35 AM
Parent: #48
العزيز تماضر
كل عام وانت بخير
وان شاء الله انتهى شغل فلادلفيا وترجعي لينا رايقه
وشكرا يا غاليه من ناس البلد الاشيله همه دائما
ان شاء الله يومكم كان ناجح وموفق.
ما عندي زكريات كثيره مع الشرقرق لانه امي كانت بتكره القهوة
وبتفتكرها كارثه لاهل الشرق.....ومعطلاهم من حجات كثيره
وحاتك ابوي الله يرحمه قهموه قهمه وعلموه يشرب القهوة بكبايه
وتغلي في كنكه وتتصفى بالمصفه وانتهينا..يعني كلها عمليه في
خمسه دقائق....يشرب القهوة البيشموا ريحتها الا يوم الجمعه في زيارة
اخونا..النسوانهم من الشرق.جنس قمع غايتو....لكنه
خالتك بتول الله يرحمها كانت حكومه والناس اهالي وهو كان راجل ملك
ومقدر ظروفها كأمراه عامله...الحمد لله ايامهم مشت جات ايامنا الله يعينا عليها.
تسريح الشعر كانت هاريانه بيه اختي تغريد...اظنها عشان ما
متمكنه من العمليه لصغرها فكانت بتظعمتنا ظعميط عجيب
وطاخخخخخخخخخخخ بالفرشه في راسك لو اتحركتي...تسريح
امي كان آخير...اظنها العقدة الخلتني كارهة الشعر
وبقيت تفه من دخلت الجامعه,وخلصنا من الموضوع.
قرصة الورك..خليها ساي منو الما ضاقها؟؟؟؟؟
لك الود وكل عام وانت بخير....وبلادنا العدمت الذكرى بخير.
تراجي.
|
Post: #51
Title: Re: دفرة يا سيزيف..(أو ذلك الشرغرغ)
Author: khaleel
Date: 10-30-2006, 11:57 AM
Parent: #50
شرغرغات
لدغة الثعبان والعقرب
المغص الكلوي
ختان الاناث والرجال
الولادة عند المراة
الفلس
الفشل العاطفي
العجز الجنسي
|
Post: #52
Title: Re: دفرة يا سيزيف..(أو ذلك الشرغرغ)
Author: منى أحمد
Date: 10-30-2006, 03:43 PM
Parent: #1
العزيزة تماضر
كل سنة و انت طيبة
و شكرا جزيلا على الامتاع
كتابة رائعة بحق
أتمنى أن تواصلي امتاعنا
|
Post: #53
Title: Re: دفرة يا سيزيف..(أو ذلك الشرغرغ)
Author: نهال كرار
Date: 10-30-2006, 05:54 PM
Parent: #1
سرد جدا جميل يا تماضر
في غنية لفيروز بتقول فيها
"يا سنيني اللي راح ترجعيلي ارجعيلي شي مرة ارجعيلي
وانسيني على باب الطفولة تأركض بشمس الطرقات "
كل ما أسمعها أرجع عشرين سنه ورا
بوستك دا هسي ذكرني بأيام الشعر المنكوش والوش المغبر والكرعين الحفيانه
ذكرياتي مع عجلتي الحنينة
لغاية اليوم بتمنى أرجع أركب لي عجلة ولو لدقيقة
|
Post: #54
Title: Re: دفرة يا سيزيف..(أو ذلك الشرغرغ)
Author: Adil Al Badawi
Date: 10-31-2006, 00:35 AM
Parent: #53
سلامات يا أستاذة تماضر، سلامات للمعذَّبين في أرض الطفولة
سِمِعْتو بالمثل البقول: "راحة بخيت"؟!
أصلو بخيت كان بِسْرَح بالعجول...أها، يوم قالوا ليهو: الليلة يا بخيت أديناك راحة ما تَسْرَح بالعجول، أسرح بالسخيلات.
أتاريكم كلَّكم كُنتو، يوماً ما، في راحة من زفت سي زفت...سارحين بالأزفت مِنُّو!
حَقُّو تطالبوا أهلكم بـ"عائدات تعويضية"..."بتوضيحاتها"
|
Post: #55
Title: Re: دفرة يا سيزيف..(أو ذلك الشرغرغ)
Author: عصام عبد الحفيظ
Date: 10-31-2006, 06:44 AM
Parent: #54
الشرغرغ شخصيا وصل
الشرعغرغ مع باقى العدة
الشرغرغ فى حالة صفاء ذهنى
|
Post: #56
Title: Re: دفرة يا سيزيف..(أو ذلك الشرغرغ)
Author: Tumadir
Date: 11-02-2006, 06:30 AM
Parent: #55
أعزائى
شكرا على صبركم الطويل.."ماديرة اجيب سيرة الآبرى لأنه ده شرغرغ ناس تانيين"
المهم مريت على كل ردرودكم وقلت اطلع منها بذبد الحديث فوجدت شرغرعاتكم "شططا"
اختزل بعضها هنا من الناس المارديت عليهم:
ابو ساندرا
الخلوة والفلقة
سير الفحضة
نصر الدين صلاح
بيصحوا الساعه اربعه صباحا عشان يمشي يجيب رغيف
من الفرن قبال اذان الصبح و عمره 11 سنه
لنا المهدى
صديقة أمي كانت بتسرحنا زمان بطريقة عجيبة
تهوي المشط بزاوية قائمة على أم الرأس ولمن المشط (يتغزا) بهذه الطريقة في الرأس تدور أعيننا في محاجرها!
ثم تميله بزاوية حادة و من ثم تمرره على الشعر!
عماد عبد الله
رمضانيات سودانية ماهي مستوردة .. مية مية رمضانيات .
صوت بايخ .. و موسيقى أبيخ .. و بيجي البرنامج قبل شراب الموية بشوية .. و الجوطة و الربكة بتاعت : يا ولد رشيت الفسحة ؟ أجري فرش البرش .. كسر الفول .. ألحق دكان عبدالله جيب شاي , الإبريق وين ؟ أمشي ناس سكينة جيب الصاج .. دخل الغنم قبل المغرب .. البلاعة لغاية هسه ما اتغرفت ليه ؟؟
سلوى
سيزيف لم يوقظ يوميا الرابعة فجرا للصلاة حتى في الأيام التي ترفع فيها عنه الصلاة بحركاتها المعهوده، ويقتله الحياء وهو ابن احدى عشر ربيعا أن يصرخ يا عالم الله منحني رخصة فأرحموني،
سيزيف لم يصلي في شتاء قارس وهو يدري أنه لا يجب أن يصلي،
حمد صاحب عصام جبر الله
فجاة حمد قعد يضحك، مالك يا زول؟ قال و هو طفل كل امنيتو لما يصحي الصباح انو الابل الساعى بيهو الليلة ما يكون فيهو واحد هايج ....
لكن التانى ده بالغ: لما نكون عاوزين نرفه بنمشي نسك المرفعين.
بالله سلم عليه. "بس ما تخليه يسككك" هههههههههه
ممكونة
قرصة الورك..
الرصعة..
سرٌيح الشعر..
المراسيل..
غسيل العدة....إلخ..
كانت بمثابة (( سيزيفيات )) حياتي..
سيف النصرمحى الدين محمد أحمد "اسمك ده براهو داير ليه دفرة "
هذا النبش العبثي بصبر تراه في ملامح وجوهن و هن
يحدقن بكل تركيز في محتويات صندوق القمامة حتى لا تفلت علبة من بين أيديهن
سيف مساعد "اكتر زول حننى"
يمشي الطاحونة بالحمار كيلتين ونصف ويشق الزراعة وينط الحمار
ابو عشرين يقع ويقع الدقيق من فوق ليهو ودي مامشكلة العتالة ورفع الشوال تاني
يكون في الطريق مافي ولا زول
وكمان صحيت الساعة خمسة يمشي السوق يشتري الملاح قبل المدرسة
يجي راجع والازمة قئمة عليهو من الجري عشان يحصل المدرسة ما ياخد علقة
بالمسطر في الاسابع من وراء
نديدى ابو مهيار
: قسوة النظام
معروف سند
انا شغال شرغرغ ووشر (washer )
امجد
في الاخر جاو هرقل و نحنا منظريين جودو
سيف خليل
فلكل مرحلة شرغرغها..حقة تمباك الجد في مرحلة..مرسال السوق في مرحلة تليها..دا غير شرغرغات المدرسة..المدونة،الحساب الاملائي،الاملاء،التسميع..وفي المتوسطة الاملاء الانجليزي..وللثانوي والجامعة شرغرغاتها..اما في الحياة الزوجية..ما اكثرهن من شرغرغات ’’بالالوان
نادر السودانى
كل ذوول بي حالو يدور
يلملم في الشقي المشرور
الوجع في الجيب مصرور
لابسد لابيبل الزور
سيف خليل تانى جاب حكمة فيلسوف
الحياة هي المصيبة التي تسبق الموت
واسما عبد الحليم التى تشاركنى "الوجع" فى الشرغرغ قالت
المحيرنى فى غسيل الشرغرغ ليه سواد البن ما بطلع من تحت الاضافر إلا بعد يومين؟
ده كله ما بلحق فرتيق اللمة للعب بى بت أم لعاب.
وختمتها بمقولة ما زلت ادندنها فى سرى:
ودفرة يا سيزيف حافى حالق
أبو جهينة أديب نوبا اراب قال:
غاسل الشرغرغ و المقروصة في الورك ( كهاتين ) .. و أشار بسبابته إلى كومتين في جبهته
و لكنه لم يذكر تسريح الشعر بعد غسله حيث أن الكومة التالتة كانت قد بدأتْ في الفششان.
سلمى داوود .."يا حبوبة بيعضيني!!" ههههه
وصديق الموج الحاسد الراصد قال لى: غسلى شرغرك واندمسى
"وانفعت ضاحكة"
ومحمد المرتضى حامد قال قاصدا سيرين: قولي ليها ..حرما
المشكلة الناس ما حيفهموها الا تحكيها ليهم ...رايك شنو؟
وبدرالدين السمح قال "وليته لم يقل" شفتي (قابلني) البكتبها الأستاذ في الكراس دي مش شرغرغ دي الجمرة ذاتها
ونذار حسين اتبحر فى العلم حين قال:
ونيوتن زاتو كان يحمل اناء به ماء يرمي فيه كل ما يراه شرا...فأكتشف أن كل شر يغرق بقدر حجمه
ويزيح من الماء كذلك قدر حجمه....قام قال ايوا....الشر غرق....لكن الموية الغرق في محلها وينا؟
وبدأ ينظر...النظرية اللا يومن دا...
ومن وقتها...والداير ليه فنجان جبنه...يستعمل نظرية الشر غرق...وسموا الاناء باسم النظرية
وتراجى مصطفى "بعد لسانها ده كله" قالت: تسريح الشعر كانت هاريانه بيه اختي تغريد...اظنها عشان ما
متمكنه من العمليه لصغرها فكانت بتظعمتنا ظعميط عجيب
وطاخخخخخخخخخخخ بالفرشه في راسك لو اتحركتي...تسريح
امي كان آخير...اظنها العقدة الخلتني كارهة الشعر
وبقيت تفه من دخلت الجامعه,وخلصنا من الموضوع.
خليل جاب لستته وجا:
شرغرغات
لدغة الثعبان والعقرب
المغص الكلوي
ختان الاناث والرجال
الولادة عند المراة
الفلس
الفشل العاطفي
العجز الجنسي
وعادل بدوى جابها من آخرها ولجأ للقانون وأتى بنموذج بخيت:
سِمِعْتو بالمثل البقول: "راحة بخيت"؟!
أصلو بخيت كان بِسْرَح بالعجول...أها، يوم قالوا ليهو: الليلة يا بخيت أديناك راحة ما تَسْرَح بالعجول، أسرح بالسخيلات.
أتاريكم كلَّكم كُنتو، يوماً ما، في راحة من زفت سي زفت...سارحين بالأزفت مِنُّو!
حَقُّو تطالبوا أهلكم بـ"عائدات تعويضية"..."بتوضيحاتها"
ههههههههه
اما عصام عبد الحفيظ فجاب الشرغرغ زاتو تصور لما عاينت ليه حنننى ولقيت روحى ما زعلانه منه ..يعنى الصورة عملت لى ثيرابى وكثارزس
فى ناس رقيقين وما عندهم تاريخ جايلد ابيوز
مثلا:
شهاب الفاتح:
تسريح الشعر المتلبد: ملل و قسوة النظام.
القرصة: الالم.
الشرغرغ: حدث كل يوم سخف كل ساعة.
وكل عام وذاكرتك بالف خير يا غالية.
وعيد سعيد.
وعادل عثمان جاب صورة سمحة وقال:
لى حين العثور على شرقرق او صورة شرقرق.. كتابتك جميلة يا تماضر وفيها نصوص سيزيفية كثيرة. عيد سعيد.
وعبده عبد الحميد عبد الله "الاسم برضو شرغرغى جدا" ههههه
والله يا تماضر ماشاء الله كتبت مفردات ذكرتنا عصر ما قبل الكيانات يا سلام
على الزمن الجميل وناسه الرائعين .
نصر الدين صلاح عجبتو عبارتى بتاعة كلكم كنتو فى حالة جايلد ابيوز جابها بأبيوزها ختاها ومشى
واحمد العربى ابو الصحب:
صديقتي الجميله
اجمل ليفة اشميق
لك
وجبنات رايقات لا يتعكرن
كل سنه وانتي اجمل
وسماءاتك صافيات
مودتي
والقلب النابض "اظنها مبسوطة منى فى بوست السكر داك قالت
لعزيزة تماضر
كل سنة وانت طيبة ...
واصدقاء الشرغرغ بخير ...
بوست معاني وذكريات ..
منى أحمد ست الامتاع قالت لى:
لعزيزة تماضر
كل سنة و انت طيبة
و شكرا جزيلا على الامتاع
كتابة رائعة بحق
أتمنى أن تواصلي امتاعن
نهال كرار جابت للشرغرغ فيروز عديل كده..
مع انه شرغرغها كان لايخلو من الحنكشة:
بوستك دا هسي ذكرني بأيام الشعر المنكوش والوش المغبر والكرعين الحفيانه
ذكرياتي مع عجلتي الحنينة
لغاية اليوم بتمنى أرجع أركب لي عجلة ولو لدقيقة
اها ياعصام ماقلت لى النفرين المع الشرغرغ ديل منو؟
والله انتو ناس جميلين بحق ..
شكرا لكل مداخلاتكم التى اضحكتنى كثيرا وخففت على "ليفة الشرغرغ" التى تليفت على خاطرى باحكام ولن "تتفرتق" ابدا.
|
Post: #57
Title: Re: دفرة يا سيزيف..(أو ذلك الشرغرغ)
Author: محمد خضر الغامدى
Date: 11-02-2006, 07:25 AM
Parent: #1
تماضر
لن أقول عن كلمات لم أفهمها هذه المرة
لكن المصطلح شرغرغ
جعلني كثيرا أتامل وابتسم
ربما كان لي تجربة مع شرغرغ ما
لكن حظي ليس اوفر منك
لذا سأكتفي بتحية مكللة بروحك الجميلة
دمت ياصديقة
|
Post: #58
Title: Re: دفرة يا سيزيف..(أو ذلك الشرغرغ)
Author: Nadia Elsir
Date: 11-02-2006, 08:10 AM
Parent: #57
تماضر الجميلة ,
كل سنة و انت بالف هناء
احببت ما كتبت و كاتبك الاحباء
فكلنا تحدينا (سيزيفا) (بالشرغرغ)رمز الشقاء !
عارفة بدل دفرة سيزيف البديها قفاهو دى و تجيهو صادة كل زول فينا عاضى هدمو و هاك يا دفر اها تقولو لى سيزيف الما عندو (شرغرغ) داك !
يا ستى شاحدة الكريم ربى يخفف عنك و عننا كل امرا كان (شرغرغى ) و الا (سيزيفى) !
تخريمة : لطالما احببت كلمة الشرغرغ من قلبى و كان لها من الصدى ما كان!
و زاد من حبى لها و عمق فيا من معانيها ما كتبت يا تماضر !
و لك من الود الكثير ,
نادية السر
|
Post: #59
Title: Re: دفرة يا سيزيف..(أو ذلك الشرغرغ)
Author: Hussein Mallasi
Date: 11-02-2006, 08:21 AM
Parent: #58
| Quote: اختزل بعضها هنا من الناس المارديت عليهم: |
يا تماتصر .. شرقرقاتك الزمان و للا شرقرق الرد على جميع من فاتك الرد عليهم!
|
Post: #60
Title: Re: دفرة يا سيزيف..(أو ذلك الشرغرغ)
Author: wedzayneb
Date: 11-02-2006, 09:23 AM
Parent: #57
الاخ محمّد خضر الغامدي
الشرقرق إناء ذو أصل نوبي، لذا احتفظ السودانيون بمختلف أعراقهم بمسمّاه النوبي للدلالة عليه.
و الشرقرق يشبة لحد بعيد الدلّة السعوديّة، لكنّنا في السودان نستعملة لصناعة القهوة:
" Coffee Brewing ". و القهوة السودانية هي عينها القهوة التركيّة. و كما ورد في قطعة
أختنا تماضر الأدبيّة، فانّ تنظيف الشرقرق للتخلّص بشكل كامل مما يعلق به من تفل البن المترسّب في القاع ، في المنحني الأجوف الضيّق المتمثّل في المقبض ، و في ناحية الفم مسالة عسيرة و تستغرق زمنا طويلا.
و أرجو ألا تكون عبارة القرص في/علي الورك - عادة رزيلة في طرقها للزوال تمارسها بعض النساء في السودان لمعاقبة بناتهنّ الصغيرات إذا لمسن أو خلن منهنّ عقوقا- خافية عليك.
و الدفر هو الدفع " Pushing " بباطن الكفّين لدحرجة شيئ ما جهة الأمام.
و قاموس الدارجة العربيّة السودانيّة هو الأوسع علي نطاق العالم العربي. و أصول الكلمات الدارجة العربيّة السودانيّة هي لهجة قبيلة جهينة العربيّة. يرجي مراجعة كتاب الدكتور عون الشريف قاسم
" معجم الدارجة العربيّة السودانيّة " للتعرّف علي الأصول العربيّة للكلمات الدارجة في
العاميّة العربيّة السودانيّة.
وافر التقدير.
طارق الفزاري
ود زينب
|
Post: #61
Title: Re: دفرة يا سيزيف..(أو ذلك الشرغرغ)
Author: محمد خضر الغامدى
Date: 11-03-2006, 10:49 AM
Parent: #60
اهلا بالاخ طارق الفزاري
فهمت من حديث تماضر أن الشرقرق (غ) هو مايشبه الاناء ولتوضيحك جمال وثراء أشكرك عليه ,
كنت اسمع في صغري جارنا السوداني يقول : في الشرقرق غلوني وفي الجنة كبوني أو هكذا كان يقول
كان اسمه حبيب الله وزوجته كانت فنانه رائعة ومبدعة وهي السيدة هويدا , فرقتنا السنين مع هذه العائلة الطيبة , وبقيت تلك الذكرى الجميلة ,
شكرا اخي وشكرا للصديقة الجميلة تماضر
|
Post: #62
Title: Re: دفرة يا سيزيف..(أو ذلك الشرغرغ)
Author: Tumadir
Date: 11-03-2006, 06:17 PM
Parent: #61
طارق الفزارى ..
والله شكرا لك كثيرا فقد رحبت بضيفى الغالى ايما ترحاب وجاء شرحك وافيا وجميلا..
اهو كما ترى يا طارق محمد الغامدى هذا شاعر سعودى حداثى له اصدارات جميلة ودواوين "الحكومة" كما كنت أقول أمس لاحد الاصدقاء ان الشعب العربى يلتهمها التهاما ولا يرتوى ..سأفرد له خيطا لدويوانه الاخير "صندوق أقل من الضياع" الذى أرسله مشكورا الى بريدى ..وبريد الاصدقاء فى موقعه مدد.
أرجو أن يجد لنا راكوبة او عصام أحمد أو تمبس او عبد الله وداعة الامين ..او أحد المتخصصين أغنية "انا يا ناس الله لى الليلة" التى ذكرها غامدى وننعش ذاكرته.
"كده كويس ياغامدى ..انا أكتب باللغة العربية الفصحى ..عن الشرغرغ؟"
|
Post: #63
Title: Re: دفرة يا سيزيف..(أو ذلك الشرغرغ)
Author: Tumadir
Date: 11-03-2006, 06:19 PM
Parent: #62
نادية السر أهلا بيك هنا .."عسلتى العدة؟"
وحسين ملاسى ...
انت قلت العنوان مضلل...ومسكت فى المفهوم ده ..والعنوان طلع ما مضلل...اقول ليك شنو؟
نأسف للفط
|
Post: #64
Title: Re: دفرة يا سيزيف..(أو ذلك الشرغرغ)
Author: wedzayneb
Date: 11-04-2006, 07:10 PM
Parent: #63
Quote: اهلا بالاخ طارق الفزاري
فهمت من حديث تماضر أن الشرقرق (غ) هو مايشبه الاناء ولتوضيحك جمال وثراء أشكرك عليه ,
كنت اسمع في صغري جارنا السوداني يقول : في الشرقرق غلوني وفي الجنة كبوني أو هكذا كان يقول
كان اسمه حبيب الله وزوجته كانت فنانه رائعة ومبدعة وهي السيدة هويدا , فرقتنا السنين مع هذه العائلة الطيبة , وبقيت تلك الذكرى الجميلة ,
شكرا اخي وشكرا للصديقة الجميلة تماضر |
أختي تمادر، كما يحلو لها أن تخاطب تحبّبا، و أخي محمّد خضر الغامدي:
معليش أنا في عجلة من أمري- في طريقي للدوام. و لن أجد براحا معقولا من الوقت للرد عليكما
" برواقة " سوي يوم عطلتي الأسبوعيّة: أعني الإثنين القادم. لكنّّي اّثرت كتابة هذه الكليمات
القليلة لرفع البوست لحين عودتي المأمولة، بإذن الله .
سرّني أولا أنكما " معرفة .. شوف أنا " برص " ليك " في الدارجة السودانية العربيّة كيف. يا أخ الغامدي! تغرف، أخي الغامدي، أنا أعتبر السعوديّة وطني الثاني، فقد عشت فيها ثمانية سنوات من أخصب لحطات عمري.
بس إنت ضحّكتني " كثير " بما اقتطفته من كلمات الإغنية السودانية الشعبية في سياق مداخلتك الأخيرة.
لإثراء البوست أري أن يتكرّم بعض أعضاء المنبر الفضلاء بسرد مواقف مشابهة في موضوعها لماجادت القريحة الأدبيّةالمبدعة لأختنا الحبيبة: تماضر، ممّا لا يزال يشعش في تلافيف ذاكرته/ن/م عن سنوات عمره/ن/م المبكّرة.
طارق الفزاري
ود زينب
طارق
|
|
