الخريف.......

الخريف

الخريف اجمل فصول السنة

فيه ينمو الزرع ويمتلىء الضرع


واللوارى فيه بتقيف


والخيران بتكسر..وبيوت الطين بتتماص


المهم

محبتكم عصمتى



وسؤال الاصدقاء الدائم الدافىء عنى..دين فى عنقى صعب سداده


انا غائبة لاسباب فنية ولاسلكية

ساكتب فى الوقت المتاح

"وخليكم اعتياديين"

فحلايب سودانية





والانترنيت عندى بتقطع كل راس ساعة

تماضر

سعيد انا بلون حبرك الزاهى على صفحات هذه البقعة .

لكِ التقدير وكل الوُد

حلايب مصرية
و أنا شيوعي ذاتو

نحن اعتياديين... لكن وجودك مهم... يلا حلي المشاكل السلكيه واللاسلكيه سريع...

نحن في الإنتظار

Alkramba

لكن دا خريف نصاح
اريت البطانة تكون مطرانة الباقي كله هين

تمااااااااااضر !!!!!!

هلا الخريف هلا أهلاً به وسهلا.....

ِAutomn
Automne
Automnale
أوتمنال و عيال!

تماضر العزيزة
رايك شنو في خريف ندي بقلم صلحة الكارب
زمن الخريف احدى قصائد صلحة المحببة جدا لدي ...
دعيني اترك المجال للقصيدة تصف وتحكي ووو...
رباب



زمن الخريــــف



يافصول العام دروبنا الغاديــة أو الجاية

حساب المـدة بالأيام صحــف ورواية

شــبع وصيام يقين ونوايا

صــور ومرايــا

وبين البين نداري المايــل نقلبو وئام

والنــــاس غتــاية

وعيون الريــد، تضوي بديل لي قمر الليل

غتاهــو سحاب.. باراهو رباب

وصوت أولادنا وينو شليـــل

والأم حجايــة

والريحــة دعاش..... غمام وسقايــة

والمطرة الجايــة غنوها حكاية ..... ونحن صغار

والمــوية سداية واللبَنَـة عباية ،نســـيج مترار

وخـــــدار في تقاية

وبشارة رشاش تبل الريق

وموية إبريق والناس صلاّية

ماهو سراب بعيد غشـــــــــاش

وشمسنا طشــاش أكيــد ضواية،

إلا الحــرّة مجالهــا يضيــق

والدنيا خريف........ وبحرنا يشابي

يِســــــــــالم القيف

فــي مــّدهُ سقاية ، وجزرهُ جباية،

والهيــن سرِّيــف

وقفــانا زمان خلينا الزيف

وودعناك خلاص يا صيــف ... والفلاح، كريــم الراح

شــدّ الحيــل زرِع وســعاية

وخريفنا الباســل ، شبل الغابــة، الحارس بابها

مجاز وروايـــة .. والمغزى حكايــة

أصلو شبلنا الما مهزوم ... رايح فـي النوم ....

والام لولايــة

وبالورثة جســور ، ومويتهُ سيــول ...

وحركتهُ عطايا

واســدنا الزينــة ، هندس للعيـــنة.

.. بروق لالايـة

وفــي الواطة جسور وزوايا

وصحــي من نوموا شهــّل لـي لزوموا

وحـلّ الشاية

عظمة نافر ورحمة أليــف ، وبدا بالجبهــة بشاير الكيــف

وحرتنا بلادنا.. ريحة اجـــــــــــدادنا

وفي النجاضة زربنا صريــف

والعينة تقـــول أسدنا هصـور

ولازمـاُ يكْـتر المحصول وتجـي البابــور سيورها تتدور

وفــي بعض القول ، أخير سلوكة....

دي المبروكة لا بتطالب ولا بتقــول

والتيراب ، مِهــادو تراب بكــلِ سـرور

واصبح شــوكة، راس الحنطــة ... سبب الغبطــة

واضــان الفــار، النــوارة.. السمّيـعة للأخبــار!!!

الجيّــابة للأمطــار !! ومن أنبــاءها

إنــهُ أسدنا، مــدّ ضراعــو ... طــول باعــو

ومطــر الجبهة زادو عيـــار

والعيــنة التانية زي أخواتها ...... أيام محسوبة

عـــدَ السبحة ، في إيــد حبوبـة

وفوق المعصــم أحــلى سوار

وهاك ياضــراع، رعــد لعلاع، وسحابــو بعيـــد..

لكـن بي كفهُ للخيــر جمّــاع

وعيشنا فــي زمنهُ ما طماع لــو صبـت مرة أو اتنيــن،

بالتأكيــد أملنا متيــن فــي حل الديــن... وراحــة البـال

ومرت فتـرة ، وجات النتـرة ..... بتملا العيـن

سحب طوافـة، سيول جـرافة وعيشنا اتشكّـل بصورة قيافــة

اتعدل وطال كبـّر للفـــال

والآمــال بقت مكيال

ويــوم بقى لبَنَــة، وتم الكيف بفنجــان جبنـــة

وفــي الأخبار، العيش لبّــن واتدلّـل يا شقيــان

ويا سغيــرونى.. اتعجّــن

وشــِد الحيــل يافـلاح نَجِّـض حشك .. بيّـض وشــك.. أملا الدار

حـرَّر دينـك ، سالمــة يمينــك ... إســتقلال

أصــلو العيش خلاص اختــار .... وفرهــد ساري طول اللـيل

ومهاوِد .... لشمسو نهــار

ومنـي بعيـــد، إنت السافل ... وحالــي صعيد

هتاف تأييـــد..... إيــد فـــي إيــد

والنجامــة ماضيــة حديــد

بدري تقــوم تحِش القــش، وكديب السِــعد والغش

وعشرة نبقى نـحن عليك ، يالأصــلي وما تقليــد

جنيهنا الحــر والدولار

صــك العملة ، عيشنا الحِمــلة ..... ما قطاعــي سايـم جُملة

شامخ راســو ... ثابت ساســو نوّر لونهُ ..... والكل دونو

حتــى الوالــي والمختار

واسـدنا هميم ، تــوم الديـــم كريم ترحيبــو

ورغــم الفرق الفــي اسلوبو، فهــو أصيــل ما بدّل توبو

وجاب المويـــة ... عيون بكايــة ،

وعيشــــــــنا شراية

رنــا بالطرفة الما ونايـــة

سحابها رحــول .. وصوت المويــة همــس القــــول

والمقياس يزيــد مقدار

وبِقــى قندول، وعــودهُ النادي ما مكســور

وأكــد إنــه ابن أُصــول زيدو الحسبة في المطمور

حلال كان أردب أو مكيــول ضمان فــي أجرهُ .... عنك رســول

والختمة وداع لنضال أيام... وعــود بالرجعة والإكرام

شبلنا حسام .. مغادر وسادر وما بننساك، إنت الحاضــر.....

جوه مراحنا الراتـــع وشايل

وغنيناك ، هلال لعريسنا الشويَم وساير

زراق فــي سمانا ، ونجمو الدايــر

قمــرنا الهــلّ... وضــوّ قبائل

ويا القمــرة أبــوك ما جــا

وتبدا حكايــة ، لفصل جديــد

واملنا وِليــد ....راجيـــك يا أِســيد

لأحلــى خريــف ، و أعلى رصــيد



<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<

سلامات
وعوافي
مرة طلع من باب الخير تمساح..
ومن هدرة نيل العزة جفاف ورياح..
قلنا الدنيا غريبة ..
يصعب فيها تعيش مرتاح..
طيب ماذا اعمل وانا الذي للنجاح مفتاح..
ااقصد ركن الصمت ثم اقترف الصراخ..
ام اصمد ليسمع صوتي الحبيب والبعيد الراح..
اذا اصمد ..وفي غدا تلتئم الجراح..
واعود اقوي من امسي الذي ماوجدت فيه براح..
............................

خالص التحايا كل الود لك تماضر
..........................
وامرر عبر هذا البوست التحايا للاستاذة صلحة الكارب واتمني عودتها

جاي بعد شويه جايبه لعُب وحاجات

Quote: "وخليكم اعتياديين

طيب

ولو تعب منك جناح
فى السرعة زيد

وده كلو طبعا فى زمن الخريف

والله يا تماضر أمبارح حلات مطرة فى السابعة ، بس فاقداك جو غيم وحاجة كده (رومانس) خالص خالص ، ومرات مرات تسمعى صوت النعجة (باع) والغنماية (ميغ) والكلاب تهوهيو والشفع ينططوا يا مطيرة صبى لينا فى عينينا وعمر البشير فرحان والصادق المهدى قاعد فى البرندة وأسامة ود الشايقية بشرب فى سيجارة فى الزقاق حق بيتهم وبتول الفلاتية جارية بالسفنجة فى نص المطرة ، وياسر اتزلق فى نص الحوش

صدقى ده كلو شفتو وأنا قاعد فى جدة ، بقيت بتاع (كشف) عديل كده

بالله أخوك مش خطير

اوعى تغيبى تانى

مطر الرشاش الرشه

ارض البطانة الهشه

مرحب بيك وليك وحشه

العزيزة تماضر

صباحاتك

ندي وازهار

سلامة الطلة والموال

مع حبي

فلتعودي إذن قريبا

يا مطيرة صبى لينا

ألأخت تماضر
لك التحيه والود
قضيت خريف العام الماضى بين مدينتى كسلا ومرتع صباى فى كردفان وعدت الى الوطن قبل اسبوع عشمان فى باقى خريف فوجدت < صبنه > حذرت منها أجهزة الارصاد وبدلا من الدعاش والشكشاكه..لفحنى الصهد والكتاحه ..
ولكنها تمنحنى سعاده واحساس بلانتماء بالرغم من لفح الهجير والهبباى
والغلاء الطاحن والجبهه وهواميرهاوهتيفتها والمنتفعين من اهل الثقة
بالرغم من كل ذلك...يكفينى بانى هذه الايام فى رحاب الوطن الحدادى مدادى والذى نحلم به وطن حر وديقراطى.