Post: #1
Title: لاهاى 2 للشاعر: شمتان بن منتظر الفرج الديمقراطي
Author: Tumadir
Date: 05-23-2005, 04:29 AM
Parent: #0
وصلتنى هذه القصيدة من مجهول عبر الايميل.. قلت اشرككم فيها
لاهاي (2)
2nd Edition
ياسايق البوباي،
ووب علىّ وواي.
* * * *
بتعرفني؟
أنا المارشال سلاح كركون،
أنا الجاهل بأمر الكون،
وفاكر موسكو في ال Gabon،
وما بفرز حلب من Bonn،
ورغم كدا،
شتمت الدنيا من هافانا لي Rangoon
* * * *
تعرف ليه؟
من شهرين ونومي قفا،
حالتي صفا،
راجي ال Veto من شنغهاي،
أسوي العرضة والدوباي.
وطز في روما،
طز في Blair،
وطز في الطير
ضكر وانتاي.
* * * *
و آخر March،
يوم جلسوا الخمستاشر
وفتحوا ملفات طُره والفاشر،
جمعت قيادة الكادر،
الجياشي والتاجر،
وواحد أفندي في كل العهود شاعر،
وزولنا الثعلب الماكر،
وسمسار توم،
وترزي هدوم،
وراسبوتين نظامنا
اللي دقنوBroom ،
معانا كمان
حكيم أسنان،
بحضر في هجوم سافر
just in case.
ومن باب فقه الضرورة،
فتحنا قناة العدو المستكبر الكافر.
* * * *
وجا التصويت،
وعندنا seat
حنعلن Vetoمن China
يلا يا Wang،
إيدك فوق،
وكلك زوق،
بشارتك concession تنقيب
من الكرفاب لحي مرزوق،
هديتك ربع ثرواتنا التحت والفوق.
* * * *
وإنتهى التصويت،
Oh, my God!
Oh, my God!
No Veto?
نهيتوا الجلسة يا إستكبار
بدون Veto؟
جنيتوا؟
وتتبسم كمان يا Wang?
وتشرب في عصير ال Tang?
وما بتخجل؟
حداشر صوت
against four?
حتى الصين مع دارفور؟
* * * *
يخص عليكي يا China،
جاتك داهية يا خاينه،
نسيت العشرة يا آفو ،
خنت العيش،
خنت الخوة،
خنت الجاز .
* * * *
عندك فكرة يا Chirac (شيراك)
شن سويت بمارشالنا الجهامة
الفارس أب عضلات ؟
في ساعات،
أنا الرقاص،
أنا الحائز عن أمجادي في دارفور
وسام قناص،
أنا الحارسني شيخ كدباس،
ريقي نشف،
مرة أبول
ومرة أسف،
أخشى بي جاي،
أكورك واي،
وحلقي dry
* * * *
أسوي شنو؟
من إفريقيا،
من بوليفيا،
من كنساس،
ومن مدراس،
وصلني اللوم،
جفاني النوم،
ندهت الفقرا من سنار ولي السقاي،
ينجوني،
يغتوني،
ويلغوا السفرة لي لآهاي.
يا تو زعيم بيدور لاهاي؟
* * * *
والله العظيم، و الله العظيم، والله العظيم
وحّرم ما بزورا براى،
بدور خمسين يسافروا معاي،
فينا فلان،
plus علان
وموسى هناي،
نقول للصولجان باي باي،
نسيب السلطة وآ أسفاي.
* * * *
تسيب عرس الشهيد والعرضة يا مولاي
وتمشي عديل سجون لاهاي؟
ود أم زقده يا الحداث وما سواي،
ود أم زقده يا العند المحن جراي،
ود أم زقده يا مارشالنا
يا حاكمنا
يا تيس بانقا الخراي،
ود أم زقده ياكوزنا الكبير،
ولاع فتن،
لص الخزن،
حراق بنوك،
زوار صكوك،
معدوم الضمير و الرأي.
* * * *
واللهِ الليلة ود أم زقده:
كان يرقص ال Flamingo
كان يدمن شراب البنقو،
كان يطلب لجوء ال Congo
لابد من لاهاي.
* * * *
يا سايق البوباي،
قد دنا عذابة مولاي،
لا لفة جاي لاجاي
ودي الزعيم لاهاي.
* * * *
ملعون أبوك يا جنجويد!
ملعون أبوك يا جنجويد!
الشاعر: شمتان بن منتظر الفرج الديمقراطي
|
Post: #2
Title: Re: لاهاى 2 للشاعر: شمتان بن منتظر الفرج الديمقراطي
Author: توما
Date: 05-23-2005, 06:35 AM
Parent: #1
اها عدد بوست باير وبتزلق
علي قول شنا اخونا الزمان داك ما تسوي ليك بوست ربط بدل البتزلق ده
اوعك تزعلي نحنا اصحاب وبنهزرر ساي
|
Post: #3
Title: Re: لاهاى 2 للشاعر: شمتان بن منتظر الفرج الديمقراطي
Author: omar ali
Date: 05-23-2005, 08:30 AM
Parent: #1
Quote: وما بتخجل؟
حداشر صوت
against four?
حتى الصين مع دارفور؟ |
هذه القصيدة اللاهايية معبرة وطالعة من
صدر مشحون ومنتظر الفرج في ليل الانقاذ
البهيم
شكرا لتماضر لنشر هذه القصيدة
وشكرا للشاعر المجهول الذي اسمي نفسه
: | Quote: شمتان بن منتظر الفرج الديمقراطي |
بس ما يطلع الشاعر المجهول دا كمبيوترك الجديد
|
Post: #4
Title: Re: لاهاى 2 للشاعر: شمتان بن منتظر الفرج الديمقراطي
Author: Kostawi
Date: 05-23-2005, 04:21 PM
Parent: #3
By
ست البنات
الليلى سمعتلكون غونييى كيف سمحى يغنى فيها زول فى الرادى !
وحات شيخى ود حومد سغيير ، عادوها يبقى سبيع مرات من الصباح !
وانا قايلى البيغنى بلاص ! فيحال بتشبه غونيتو البيقول فيها
فاوضنى بلا زعل !
---------- :
حاكمنى بلا غدب
ياخى حاكمنى بلا غدب
---
ما تدخلنى انا فى مطب
ان بيقيت حكمى كان كعب
ياخى صددنى بعدلو تب
---
مالا محكمتى بقت غرب
مالا ان كانت فى صنب ?
---
ان خيتيت بس قولى السبب
وابدا بالاوال بالعتب
---
لا تقول لاهاى دا الكعب !
ببقى زولا عندو الأدب
وماب انققز ساعة الطرب
---
وبملص الكاكى الكان سبب
للبلاوى ووريك عجب
ياخى حاكمنى بلا غدب
-----
أها عليكون النبى مو سمحى ???
ست البنات .
|
Post: #5
Title: Re: لاهاى 2 للشاعر: شمتان بن منتظر الفرج الديمقراطي
Author: Kostawi
Date: 05-23-2005, 04:22 PM
Parent: #4
|
|