هرجة بالانجليزى؟؟

عندما تكون هنالك عائلة ومناسبة ...تكون هناك "هرجة".. داخلية ..اغلبها من جانب الام.. واحيانا الاب ..وبعض الاحيان الاخ او الاخت الكبرى


هذا لا ينطبق على ثقافتنا السودانية فقط ..انها حالة عولمتها طبيعة الانسان وتشابه الانسانية فى حالاتها التى نسميها فى مجالنا بالدراما...

ودائما الام هى اكثر الهارجين لانها تريد لهذه المناسبة ان تأتى على اكمل النتائج والاطفال، هؤلاء المخلوقات القصيرة القامات، لا يلتزمون بقوانين الامهات لانهم ...ببساطة صغار..


واذا كان فى هذه المناسبة رحلة فأن الهرجة تكون "ذات حدين" فنصفها يأتى من الام ، او الشخص المنوط بالهرجة، والنصف الثانى يأتى من "السواق"

فالمخلوقات قصيرة القامات تلك تبحث عن راحتها التى تتعارض بالضرورة مع مصالح السواق فى حصد الطريق وطى الارض واستنفاد المسافة...
وعندما تكون الام هى السواق، ....فـــــــــــ "الكلام ده تقولو عليه شنو؟"

لكن فى العائلات السودانية وبارثها التاريخى الطويل مع العنف اللفظى ...

فمسألة الهرجة لها قوالب وقوانين متعارف عليها...

زح ليهو سكاكاتك ديل شوية يسكك الكلب خليهو يرقد .جنبك ..ترقد فيك الحيطة

قلت ليك غير الفنيلة دى التقول فنيلة طيانى ...

ما تمشوا بعيد بتروحوا ...

اصحو خلاص التخريج بفوتنا يفوت

اكلو قوام خلونا نمشى تمشى فيكم المكنة

ما بنشترى اكل من الشارع هدى الزوادة ...من امبارح واقفة احمر يحمر عيونكم


كنت انا الام السواق ومسافرين سفرة عائلية لمناسبة تخريج سارية خمسة ساعات الى روشستر قرب الحدود الكندية من الشرق ...ومعى كل المخلوقات الصغيرة ذوات السكاكات والدغالات والمصالح الشخصية التى لا تتفق وعنت المسافة ...والخوف على انفلات قانون البروتوكول..

كان معنا مخلوقات صغيرة من ذوات السكاكات ...والمرح الصاخب من عائلة الاصدقاء محمد القاضى ونجيب القاضى والعزيزة جدتهم صديقتى تيتة...امراة من زمن قادم...تجاوزت السبعين وتذهب كل يم فى الصباح الى مدرسة تعليم اللغة الانجليزية للاجانب...وتضحك مع الصغير والكبير..تنشر الفرح اينما حلت..تمجد التعليم والفنون والحياة..

وكانت حافلتنا "اللبنية" مكتظة بشنط الباك باك ورائحة الطعمية وباسل "ود عشة اختى"...الطفل الذى يعشق العربات ويخلط العربية بالانجليزية فى لسان من هو فى الثالثة من عمره.. محمد لا يجيد من اللغة العربية الا فهمها ويسرى التى تحاول التعمق فى التعبيرات ولا تزيدنا الا مادة للضحك والتندر سيرين وناهد ونهلة الذين يطنون انهم يعرفون كل شىء لانهم "فى كولج" ويحفظن كل اغانى محطات ال اف ام فى راديو امريكا...ويجيدون النوم والزوغان من المسئولية ...تتبعنا عربة عشة واسماعيل وابنهم الاصغر ايسر ابن السنة الواحده...ونلتقى مؤخرا بتبارك وابنه امجاد النابغه ذو السبعة سنوات فى روستستر...

كل الاشياء مضت بجمال لا يتصور....

الاحتفال الضخم وسارية يستلم البكالوريوس والماجستير فى نفس اليوم...شاب يفوق طوله كل الحضور ويفوق تعليقه الساخربرنارد شو ويفوق فخرى به جبال الالب..

واصدقاؤه السودانيين فى روشستر احتفوا بوصولنا واغضبهم اننا ننزل فى فندق و"هم يفتحون لنا بيوتهم وقلوبهم ...والباربيكيو...بينى وبينكم ندمنا اننا لم ننزل عندهم ...لان قلوبهم كانت ارحب بكثير من غرف الفنادق..

المهم كل هذا وكانت معضلتى هى ان اجد التعبير المناسب بالانجليزى ...عندما يجىء وقت الهرجة...فقد تمتمت بكلمات غير مفهومة مرات كثيرة وانا ابحث عن كلمات مثل:

ساوى راسك المقودس ده

مسايف لى فى نص الشارع كده انا امشى ليك بى وين

حسة الدلمة ده يقولو ليهنو شنو؟


هههههههههههه

انا لا اميل للعنف اللفظى مع اولادى ولكنها خاطرة حلوة تبادلتها مع سيرين فى رحلتنا الاخيرة ...وددت مشاركتكم فيها

ولاشكر اهالى روشتستر من خلالها على ودهم الضخم الذى لا نستطيع رده لهم ..الا بالشكر

ولاهنىء سارية على تخطيه مرحلة الجامعه بعذا النجاح الكبير

ولاعتذر لكم عن غياب غير مقصود..

عدنا لنواصل عرض رسومات اطفال دارفور وهو نجاح اخر للانسانية تتضافر فى كل بقاع الارض مع المظاليم فى روح مسالمة ومعطاءة

ساحدثتكم عنه عندما "نخلص منه"...




وعندما تكون هنالك رحلة عائلية.. اخرى

اين انتم يا اصدقائى ؟؟

اقتباس من ايمان احمد

العزيزة تماضر...

كثيراً ما ينتابني الإحساس بالحوجة الملحة لهرجة من النوع المُقفٌى و المَقعٌد ...من شاكلة يضربك الضريب..شقاق العناقريب...لكن تخذلني ( فلهمتي ) و ( قرضمتي ) و ( فلسفتي )..و ألقى نفسي بهرج بكلمات جوفاء ..ركيكة...من نوع ( منتهى السخف) ( منتهى البياخة ) ( منتهى عدم المسئولية )..او ( حرام عليكم أنا.. منهكة...مجهدة...مرهقة ) ( إنتي إنسانة سمجة ) ( إنت إنسان لزج ) و وصلت مرحلة من الخبرة بقيت أختصر المفردات......
سمج + لزج = سلج
مُنهكة + مُرهقة + مُجهدة = مُرهدة
بقوا أول ما تشتد الإشتباكات و يحتاج الأمر لفض نزاع....أصرخ بأعلى صوتي ( ياااااااااا سلج )...فيرن صمت مخيف...معلناً أن الكل فهم الرسالة و عرف إني ( مُرهدة )....



سارية

ماك طيب؟؟؟
يطيب عملك يا بوي و ما يطيب ليك عدو...يباركوا ليك الخير...و تتعدٌل عليك شقيش تقٌبل...
فرحانين بيك شديد...إنشالله نفرح بيك فرح القعونج في البحر...
(( للترجمة...الرجاء الإستعانة بصديق ))

بنت الشيخ
الله يديكم العافية ويديم الافراح
طبعا لا تغيب عنى امي في الهرجة
حتى اصبح لا تستوى اسماءنا والا هي
مقلوبه علي الحاله النفسية للماما
فعثمان عندها قشران
ووليد حتما يصبح قشير احيانا سجيم
ومحمد مقشر ومرمد وكم خطر لي فكرة الكتابه
عنها ولكن كان دائما كبر درجتها عندى
هو الذى يمنعى
واحيانا انا واحد اخوانى نتقمس دورها
في مثل هذه الحالات خصوصا عندغيابها
فلك ولها كل العافية والى هرجة اخرى

Quote: الاحتفال الضخم وسارية يستلم البكالوريوس والماجستير فى نفس اليوم...شاب يفوق طوله كل الحضور ويفوق تعليقه الساخربرنارد شو ويفوق فخرى به جبال الالب..

لا غرو فمن كنت له أما فهو جدير بالنجاح والتفوق
الف مبروك
جني

مبرووووووك أم ساريه لكن خبرك السمح دا جاء زمن المسلسل هسع الناس يأتوك ياست الأنناس.......الف مبروك وأخصائية حكى أوبرا شنو..........



منصور

انا هسي في الشغل التشغلو بي قده....لامن امشي البيت
واعلق ليك علي الكلام الزي ريحة الدعاش دا...وقبال ما
اصل بيتنا....انحناءة كبيره لسارية وقفة تبريكات..ما
يدفق منها مبروكاية واحده....علقوها في الشقة...
اتلقي امريكا ما فيها قفاف

الخنساء......

ياسلالآلآلآلآلآم يا تماضر و الله فرحت لي ساريه فرحة امات و خالات...
تعرفي قلبي كان ماكلني لما غييتي الكم يوم ديل..... لكن لو كنا عارفين كنا جيناكم طالما كنتو قراب مننا
لكن بنجي في الدكتوراه .....و تخريج سيرين ان شاء الله....
والهرجه بالانجليزي دي بس خليها ساكت بعد ماتهرجي تضحكي في سرك علي روحك من جنس
الكلام الغريييب و الترجمه علي الشريط ......

لك ولسياريه ايام قادمه طيبه...

مع كل الحب

مها بشير

مهوية كسيرة الموية....


الله يديك العافية "كول ما الدجاجة حافية"

طبعا الهرجة مهمة فى المحكات الصعبة لكن نحن موضوعنا اتعقد زيادة

بعد ما هرجت فى سواق العربية القدامى المسايف لى ..وقلت ليه يا دلمة..قلت لى سيرين حسة الدلمة دى يترجموها ليهو كيف قالت لى قولى dilemma

هههههههه

شكرا مهوية على الفرحة بسارية ونفرح معاك بى جديد وليداتك...

وما يفقدوك بى شينة

don't miss you for ugly

هههههه

الشغل يا نزار يشتغل الدفرة...اصلو بلا الشغل ده انا المقدد كلاى شنو؟؟

هههههههه

رفعت التبريكة جنب التبروكة...ومستنياك تمشى البيت وتكتب لى..

سلم على شبابك ...

تشب فيهم الفرحة يتلقفهم النجاح ويناولهم للسعادة

منصور

المسلسل يسلسل قلبو

واوبرا شنو كمان يبربر كيها..

هههههه

شكرا منصور على تطييب الخواطر

لانى بغيب كتير قايلة اصحابى نسونى ..

الا واضح انو المخلصين ما بنسوا ..عقبالك

وبالله يا جنى بعد جنك ده عندك بت حلوة كده؟؟ الله يحفظ ويبارك ...تحياتى وشكرا

لاغرو دى شنو المقنطرها لى متل شوكة الحوت لا تبلع لا تفوت ، يغرغر كبدتها ...مكجناها...

ههههههه

المهندس

تحياتى

امهاتنا فى السودان يمررن بضغوط كبيرة...سرها خلط الاوراق بين حالة كون المرأة ام و امراة وطباخة ومديرة منزل ومسئول مالى ...الخ كل ذلك وكثرة الانجاب يزيد طين المسئولية بللا ..والمجاملات الاجتماعية الاخرى تزيدها طينا..وبعد داك فى زى نظام فقر وكفاف فى المعيشة ...يقدن حياتهن بكل تماسك وصبر ولكن للانسان حدود..برضو


الصبر يصبصب مصارينو"
امى كانت تنادى كل اسماء اولادها قبل ان تجد الاسم المقصود بالنداء..الله يديها الرحمة والجنات الفسيحات...

شكرا على المرور والمشاركة وعقبال اولادك...

الف مبروك تماضر ، بس انا كمان ما مدمن باربكيو

اما قصة الهرجة دى حنشوف مصطلح برانا نسميها Yeller

ولى قدام

ترهاقا

مش نسميها

yelling

احسن؟؟

ههههههه...كيف صلعتك ...

وتحياتى للاسرتك الجميلة وعقبالكم..

تهانينا لك ولسارية

ولماذا لا يشارك معنا سارية طالما يمتلك كل هذه المواهب (السخرية)

أو لما لا تقومين أنت بذلك (أقصد أن تهدينا قفشاته..في شكل بوست على طريقتك ) لوكان هناك ما يمنعه هو من ذلك

ليه؟

عثمان محمد صالح..

مافهمت السؤال..

ليه الهرجة ولا ليه الانجليزى ولا ليه البوست؟؟

تحياتى والاحترام

بدون تعليق
وداعا

Thank you for sharing with us your Beautiful moments
and Alf mabroook to Sarya and all of you.This is what
a good mother like you expect from his kids
Please accept my applogy for writing in English
and diving in without invitation

Quote: and diving in without invitation

what are you talking about, dear?
you're more than welcome, here, any time.

Thanks for your contribution and your nice words

اما عن الانجليزى فما تعتذرى عنه لانو موضوع البوست..وكلنا بنضطر لاستخدامو

قبل ان تقول وداعا اهديك كلماتك.الثمينة هذه ...

Quote: الأخت تماضر شيخ الدين تحيّة طيّبة دافعتُ عـنك في هذا الموقع وشددتُ من أزرك وقـلتها آنذاك بصريح العبارة ـ و الله و الأرشيف يشهدان ـ أنك ستكـتبين في هـذا المنبر أسوةً بالآخرين تقـول جَدتي إفعل الخير وأرمه في البحر جدتي موقـنة بأن الخير لا يغرق سيدور حول العالم زمناً طويلاً تطعمه أصداف وأعـشاب و بقايا معلبّات في خزائن سفائن هالكة، ترعاه ملائكـة وسَـمّان مهاجر و دلافـين وشباك سمّاكة في أعالي البحار ثم يعود إلى موضعه الأصلي ملتـفـاً بذات القـماط البريء جدتي كما كل الجدّات تعرف ماذا تقـول فـيها قـبسٌ من حكمة أرباب وإبتسامتها مشرقة وأيم الحق مشرقة ورؤوم وتشفـق على العالم من نفـسه أقـدس جدتي وأشكر للخالق مرضاته عـني لأنه قـرّر إنحداري من نسلها لو ترين بسمة جدتي لو ترين جدتي فاطمه فـي إمتزاج شايها بلبن ماعـز البيت الرحيم وجمر مغيب قـريتي آخذ في الإنطفاء شعرٌ لم يكتب لا أحمل تجاهـك ِ إلاّ كل خير أتمنى لك ِ التوفيق و السداد عثمان محمد صالح

Quote: عثمان محمد صالح.. مافهمت السؤال.. ليه الهرجة ولا ليه الانجليزى ولا ليه البوست؟؟ تحياتى والاحترام

يكون قاصد ليه مكجنة لا غرو!!
اصلو ما نتفلفس في البورد دا!
البفرتق الاحتفال دة الله قال بي قولو
جني

Quote: البفرتق الاحتفال دة الله قال بي قولو

هو يانزار الله بقول بى قول الزول كيف؟؟

انت بالطريقة دى حتخلينى اتذكر الدعا كلو..

واترجمو بالانجليزى السودانى كمان



ابدا ليك؟؟

النعامة التزوزيك

austrich may swing you around

يقلع عينك

may pull your eye

يقدد كلاك

may make holes in your kiddneis


,وبالطريقة دى ممكن اديك home work

اهرج الجمل الآتية:

يهلهل دلاقينك

يقص ضهرك

يلوى حنكك

لمن تخلص من ديل برجع ليك بى قائمة تانية ....
يهلهل دلاقينك

Ustaza Tamadur
You have to learn from Sijaiman

Quote: الفنان الخالــدي.... ينطحــو تـور قرنـو مــاكن

الفنان الخالــدي.... ينطحــو تـور قرنـو مــاكن

Quote: قلت ليك غير الفنيلة دى التقول فنيلة طيانى ...

زح كراعك دي تكرع في الترعه....والترعه بس بخمج منها طيانيك الفوق دا الطين
وبعجن منها الزباله لزوم الجلط وكدي...

والله اعجبني جدا تخرج الولد ساريه...قف...!!!

الناس عدوا ليهم زمن يكتبوا برقيات وبعدها قف...كدي كدي كدي
ما عارف الوقفة دي لزومها شنو امكن تكون الفتره البرفع فيها
الخواجه طربوشو...بدلوها بي قف...


دحين انا وآل بيتي كلهم يارا وآية وامهم سنقف...تحية اكبار لهذا
الولد النجيب...الشامخ كجبال الالب ما شاء الله والعين بارده...

فبلغيه عنا فخرنا واعزازنا واكبارنا...وكونقراتيوليشنا...الاخيره
دي اخير ليه من كلامنا دا كلو...


ها ولد انت هايج كدي مالك...تهج بالسهله.....

ما تهرج فوقنا يرجك الرصاص

فالهرجه عندنا كتييييره بعضها باسلوب لزوم ما يلزم وبعضها سجع
وبعضها باسلوب الذم بما يشبه المدح وعكسو

انا هسي ماشي اتسوق وبجيك صادي

حاتم الحسن

سجيمان...ما بجاريهو فى دعوته للخالدى لانو الخالدى صاحبى وبفتكر انه غناى

سجيمان يسجم راسو المقودس ده....

Quote: اين انتم يا اصدقائى ؟؟ اقتباس من ايمان احمد

العزيزة تماضر
ألف ألف مبروك
خالص التهنئة لك ولسارية وكل العائلة
ربنا يوفقه دائما، ويحفظكم لبعض
أتمني له طريق ملئ بالنجاح والحب والسعادة

(خالتو... إيمان)

خالتو عديل كده يا ايمان؟؟

كان كده بختو...

لكن انت عارفة الزول السميتى روحك خالتو ده طولو كم؟؟؟ ههههههههه "قولى ماشاء الله"


وشكرا ليك يا اصيلة وشكرا على تفضلك بالسماح لنا باستلاف تعابيرك الجميلة

الاخت تماضر تحية طيبة وبعد.
مبروك تخرج سارية. وعقبال باقى الابناء والبنات.
أعجبتنى كتابتك ففيها طرافة وذكاء، وقدرة على رواية القصص. ولا غرو! ومساهمة منى فى حل بعض اشكالات الانتقال من العربية الى الانقليزية، وصعوبة هذا الانتقال المشحون بالخصوصية الثقافية لكل لغة، فقد ترجمت الجزء الاول من كتاباتك.
__________________

when there is a family and a pending celebration, there would be "harja" from within. mostly by the mother or the father. sometimes by the elder brother or sister.
and this is not exclusive to our sudanese culture. this is a global, universal situation, because of the human nature, and the similarity between people, which is, in our field, called drama. usually the mother is the grand shouter, and ranter, because she wants the occasion to be perfect, while the children, those short creatures, do not abide by the mother's rules, for the simple reason that they are children!


and if this occasion involves a trip, then the "harja" would be double. half of it would issue from the mother, and the other half from the driver. because the short creatures seek their comfort and convenience, which is contrary to the interests of the driver, in terms of concentration and dedication to the main objective: arriving to the destination in the minimum of time.
but when the mother is the driver at the same time, what unfortunate situation is this? luckily, in our sudanese families, and their historic tradition of verbal violence, the "harja" has long-established laws and methods.


" move your running feet a little, i wish that you be chased by a rabid dog! let him lie beside you, may a wall fall upon you."

" i told you to change your vest. it is as dirty as a bricklayer!"

"don't go far. you will go astray."

"eat quickly, we need to move. a heavy machine may flatten you!"

"no. i am not buying any food on the way, here is the food basket. all day yesterday i have been frying things, may your eyes turn red!"

تعالوا يا نزار وعادل عثمان نضبط الموضوع ده...

نزار تخصصو دعا

وعادل تخصصو ترجمة ...

وانا بهبب ليكم من الحر..مش بوستى؟؟""


هههههههه

لكن حقيقة يا عادل عثمان اهنئك على امكانياتك الهائلة فى الترجمة الفورية .. لمن خليت الاولاد يجوا يقروا معاى القطعة بالانجليزى ...وقد تذوقوها تماما باعجاب كبير ...شكرا لك

واهنئك نزار على حفظك للتراث السودانى "للعنف الفظى" بهذه الكثافة ...ونواصل

"الصلعه المقابلة الحر" ههههههههه

تماضر
أنا هرجة بالعربي زاتو ما باعرفها
لاكن حبيت أسلم عليكي وألف مبروك لسارية
وأكيد الاسم ده ما جه من فراغ
انشاء الله دايما رافع راسك

تماضر يا تماضر يا...

عليك الله موش مشتاقين ...

بهرج...

وسارية يستلم البكالوريوس والماجستير فى نفس اليوم...
شاب يفوق طوله كل الحضور ويفوق تعليقه الساخربرنارد شو
ويفوق فخرى به جبال الالب..

وأعجابي بيك شديد ...

تماضر يا تماضر يا...

عليك الله موش مشتاقين ...

بهرج...

وسارية يستلم البكالوريوس والماجستير فى نفس اليوم...
شاب يفوق طوله كل الحضور ويفوق تعليقه الساخربرنارد شو
ويفوق فخرى به جبال الالب..

وأعجابي بيك شديد
واحب سيرين ذاتو...

تماضر إزيك وعلَّك والوليدات طيبين
وألف مبروك لسارية ومزيد من النجاحات يا إله
البوست لذيذ وبديع وإضافات الفنان عادل عثمان كبيرة
سلامى للجميع خصوصاً أهل قبيلتى أصحاب السكاكات

العزيزة تماضر
لك تحيات الورد
ولسارية مليون مثلها
ده بوست ما بتلحق خطيييييييييير
شكرا ليك انت دايما بتذكرينا البلد
وياريت لو كانت الهرجة بالخشم وبس
بعد يا قاشر يا جاتك المفراكة طايرة
يا سير المفحضة في ضهرك وكرعيك

ممكن تترجمي لينا
مرقنبو يقرنبو !
ولك الود
تحياتي
اتصلت في البيت مرتين ولم نجد احد!

Quote:

انا لا اميل للعنف اللفظى مع اولادى ولكنها خاطرة حلوة تبادلتها مع سيرين فى رحلتنا الاخيرة ...وددت مشاركتكم فيها"

Congratulations Ya tamador...The Egyptian proverb says: Ikfi Algidra 3la bugaha Tatla3 albit li Omaha " put the pot on its opening side, the girl becomes like her mother"
!!!
of course, use the alwalid instead of albit to make the proverb speaks to the current situatThis ion...
Do you undersatnd any thing of these Khattrafat?
I mean the congrats go to you first before Sarya... after all he just follow the path of his mother...

When I started reading your message I I said tamador jannat (got crazy)... I did not get it imediately and thought your non-stop activism, especially around the tragedy of Darfur impacted your pen!

This هرجة is a very unique expression and it's being in use in most of human culture...
in Egypt, mothers use lot of this 'verbal violence' especially during family social gathering (wedding or so) ...they claim. mothers, their dose of this swearing increase to protect their loved kids from the evil eye which roames around in these events!
Someone needs to bring the concept ofهرجة
to the DSS people or whatever this Children protection Dept is called in your community... it's not an abuse.. it's part bof our weird cultural expressions of joy !!!!


Mohamed Elgadi

تماضر العزيزة اخاف ان تاخذنى الهرجة وانا لم اهنى سارية الجبل

وبالاحرى اهنيك...الف مبروك شديد جدا..وعقبال الفتوات.طبعا ممكن تكون بكسر الفاء وفتحها

ثانيا قبل اهرج او اهرجل..انا كان عندى خالى ما سمعتو بقول اسمى الا بعد جيت السعودية

ولا اسم اى زول من اخوانى او اولاد خالاتى.

كان اسمنا يا سجم ..ياصرم..يابجم..يا غنم.. والغريبة كنا بنجى كلنا

لانو يوم نادى واحد باسمه ولم يكن الشخص موجود وجاء لقانا نحن الباقين

قاعدين نلعب..وقال لينا ما قاعد اكورك لى ساعة؟؟قلنا ليهو انت كنت

بتنادى فى عثمان وعثمان مافى قام قال :انا من هنا ورايح اقول اسم اى

وسخ فيكم الفى يجى فاهمين؟؟ ومن يومها لم نسمع اسماؤنا.

ارجع اهرجل:

كنت برة.... يبربر كيك..لكن ما تسالينى عن معناها؟؟

تجيك الكشة..بكسر الكاف لو سمحتم...سمعتها كده

القر الينفخك..والقر بضم القاف كما ينطقونها هى القر بكسره ومعناها شدة البرد

تعال تجيك ام كلعلع

اشرب تشرب الحمت رمت

استحما ريحتك ترمى الصقر

يشمط عصبك

بعدين مصارينك وكلاك وفشفاشك وشحمك ولحمك ديل بهروهن جنس هرى

وبعدين كان عندنا جارتنا رباطابية والله يا تماضر هرجيها داير ليهو بوست براهو

اول شى لبلاغتو ولغلظتو..مرة انا وولدها لعبنا فى تراب مكبوب بره وجينا

مكتحين..قالت جاينى غبش كدى بلا الفول المدمس كتو وين؟؟

ولدها قال ليها كنابنلعب بره قالت لينا البير اللامن عفنتكم تطق ما تصلوا قعرها

اوعى تبارى ود عشة ده تانى يعشعش قملكم.

ما تمشوا قوام تتكلو كدى يتكلوكن بالشعب

حتما سوف اعود،،،،

صديق الموج والله إنت مجنون لاهسع ودقاسم جننتو كمان أم ساريه ما مخليها الله إخليك يا الصديق نحن قررنا نـكلم لـك الشيخ شنو رايك.......





منصور

الأخت العزيزة نماضر

قضيتي عمرك المديد باذن الله وإنت تنثرين الدهشة والفرح والسعادة وقد جاء دورك لحصد السعادة والأفراح وإنت تستحقين أكثر من السعادة والفرح..سعيد أنا وجذل لسعادتك وسعادة سارية بنجاحه المتوقع ممن كانت أمه تماضـــر....لك تهاني المدام والأولاد

الف مبروك يا تماضر
تخرج سارية وعقبال الشهادة الاكبر من الكبيرة
كنا دايرين نفتح حنفية النفس اللاوامة
لكن غيابك كان بعذر مقبول فلترتاح النفس اللاوامة الي حين(حين غرة)
انت ما شفتي الهرجلة بالرطانة
نحنا في البيت 6 اولاد و4 بنات بالاضافة لكمية من الشفع ابناء الاقارب
كانوا بيتواجدو معنا باستمرار
امي اللي هي يو بالرطانة كانت مفروض تكفل كل شرذمتنا الاكل واللبس والنظافة
كانت بتقوم بكل المهام بكل جهد لكن وسط سلسلة من
اللعنات والدعوات بالنوبية
اقل واحدة فيهم لو صدقت تعيق الزول مرة واحدة
مشتاق لصوت امي وسط الهرجلة
ومنتظر اعمل تجمع من الشفع مقطوعين الطاري اولاد شقيقاتي واشقائي
ووسطهم الوالدة الحبيبة عل ذلك يعيد ذكري ايام الصبا الجميلة

تماضر يا غالية
أولا استلفي زي ما تحبي، نحن لاقينك وين في الزمن القاسي ده؟
وبعدين البوست شكلو ماشي كده يبقي "موسوعة" في ال..........
Don't know what to call it
Should I say the way Sudanese express their "love" to their kids? God knows
يا زولة ما شاء الله علي سارية. أنا متعودة علي الأولاد
who outgrow their Khaltu, with my nephews
يبقي خالتو ونص (ولو بالمقاس يمكن إلا نص )
ربنا يحفظه ويغطيه وينجحه هو وأخواته.

حبي لك ولسارية
تاني خالتو ايمان

تماضر
مبروك التخرج لسارية

رغم زعلنا ( الشديد .. شدة الحرامى ) ..( يشدوك بلا علوق) ..
( ما تزعل ان شاء الله تنفقع )
( ازعل زعل ام العروس .. )
وتجاهلك المستمر لأشياء نراها ضرورية .. ( الضراء الما يغطى ناقوسَك)..
( الضر التضوقو من الفلاتة ) .. ما يجينى واحد ويوقل عنصرية ( تنعصر على الشوك)..
المهم الحمد الله شفناك ( يشوفك الصقر) ..
وكل الأدعية والهرجى تبرى منو انت ..

كانت أمى تهرج بغير ما تهرج به النساء ..
فكانت تقول ( ما شايف ؟؟ تشوف النبى ...)

الله يجازيكم يا جماعه

غايتو ناس لذيذين لذاذة

انا حأرد على معظمكم بالهرجة بس الزعل مرفوع نحن فى النهاية اصحاب صاح؟؟


زولا: عليك الله هرجة بالعربى ما بتعرفى؟ وحتلدى كيف؟

هههه الله يديك العافية وينسر بالك..

"مابقول ليك يصرك فى بعرة " عشان انتى مسكينة ساى


الجريفاوى

انا الاعجب..

والشوق مطر..مع انى زعلانه منك ما رسلت لى الامانة ولا التزمت بالوصية..بتاعة السودان ...يوصوص راسك


منعمشوف يسكك الحرامى ههههه بالله انتو قبيلة؟؟ يقابلوك بى براطيش الجامع وشكرا على اعجابك بالبوست بالنيابة عن المشاركين

خالد العبيد

بالغت فى دى

وياريت لو كانت الهرجة بالخشم وبس
بعد يا قاشر يا جاتك المفراكة طايرة
يا سير المفحضة في ضهرك وكرعيك

مرقن بو قرنبو دى مشكلة حسة ؟؟

they get out with it, to study (in it).


الواحد ما يفنك بالباسوورد دى....يقرقر مخك...ههههه

عاود الاتصال وسنحل الاشكال وتحياتى لاسرتك الظريفة

محمد القاضى

وطالما عندك تبرير ماكن قدر ده ..بختنا

ندعى سااااااكت ونقول عشان نكف العين

وشكرا ليك ولاسرتك الجميلة التى شاركتنا الافراح ..ناهد مثلت "بيكم" خير تمثيل..

الذ من مشى على كرعين


الغريبة هى وسارية الشحمة والنار

صديق الموج

رباطابيتك ام

لبلاغتو ولغلظتو.

دى قطعت مصارينى بالضحك

انا دعاها ده اول مرة اسمعو مع انى من المتابعين...ههههههههههه

ما نشفتو بعد داك طوالى مالكم؟؟

باااااااااالغت..

مشاركة حلوة جد


نايل ون

ولك وللمدام تحياتى ومحبتى الوافرة

بالمناسبة محمد عمل لى شنو فى موضوع الويب سايت؟؟؟ انا لسه وراه

شكرا وفيرا يا باشمهندس

محمد سيد احمد

مشتاق لصوت امي وسط الهرجلة

ده اجمل تعبير اسمعو قريب ده فى ما يختص بامهاتنا الحبيبات

وبالله لما تورينا الدعا بالرطانة جيب لى معاك دكشنرى كورى برتغالى...سمح؟؟

تعرفى يا ايمان احمد اكتر زول اتمقلب فى حكاية الخالتو دى رشا شيخ الدين..بعد مرور تمنية سنين وشابكاهم حلاتى يا ناشى

بالتلفون قابلتهم وشافت الاهوال..ناس طواااال وعندهم شنب اسكيرتات ومافى اى علاقة بينهم وبين كلام الدلع داك ...قالت
قولو لى رشا بس ما دايرة خالتو...ههههههه

الله يخلى ليك العندك ويديك حقك ملك

معتصم الطاهر

كانت أمى تهرج بغير ما تهرج به النساء ..
فكانت تقول ( ما شايف ؟؟ تشوف النبى ...)


ياحليلها...الرزينة عندنا ناس برضو بقولو "الله يهديك" لكن الجماعة الزى ديل ما بنفعوا فى البوست ده..ديل نفتح ليهم بوست براهم


نواصل الردود من محمد السر لغاية عدلان عبد العزيز والشكر موفور لكل من سعد بسعادتى

اللهم أحفظ سارية وأخوانه لأُم سارية
اللهم أحفظ أُم سارية لسارية وأخوانه
اللهم أحفظ أُم سارية لينا أنحنا عشان تكتب لينا بوستات زي البوست دا
آآآآآآآآآآميييييييين
فتشت تليفونكم في البروفايل عشان اتصل بيكم ما لقيتو لكن لقيت كِسرة بي سخينة وشطة خدرا

زوله واحد اتنين تلاتة....اييييبرااااتي الخاياته....الهرجه معناها
النقه في صورة دعاء بلغة ناس الزمن دا وانت وبختك...ومعناها الكوراك
زي لما يقولو ليك يكوركن عفاريتك...ما تكوركي فوقنا....ومعناها...
النبذ...لاصلاح ذات البين...وذات الكرعين كان انمدن واحمن الناس يتخترو
لا قدام...ومعناها ...كتااار هن....الباقي اعرفي براك....

اصلو مافي زول قال ليك....انت ما بتسمعي؟ السم الهاري بركة النبي
ما عارف بركة النبي المدخلا مع السم شنو....علا تكون ِAnti -Bodies

وبعدين يا تماضر....عليك الله هسي متخصص انا والله صديق الموج

هاك شوفي جنس النضم دا

Quote: ولدها قال ليها كنابنلعب بره قالت لينا البير اللامن عفنتكم تطق ما تصلوا قعرها اوعى تبارى ود عشة ده تانى يعشعش قملكم. ما تمشوا قوام تتكلو كدى يتكلوكن بالشعب

والله كان عادل عثمان يترجم لينا دعوة البير دي يكون انعدل معاي خلاص
من دربي دا ماشي اقولها لي خواجة صاحبي جنو بيره...

Oh Ya It is the beer time I am not gonna Stay
دي طوالي الواحد يديه معاها بير صديق الموج

البيييييراااال....بلاي عليك الله يا عادل في الترجمه ...كلمة البير دي خلها
لي في حتتها بي عربيها دا....فاختلاف البير لا يفسد للهرج قضية

حبيبة الكل

تماضر

مبروووك لسارية ولك النجاح العظيم..وانشاء الله دايما نسمع عنك اخبار مفرحة

ومن الهرج المفرح

ات يا ولدي تتعلى ما تدلى

وتشيلك عافيتك

الله يخدّر ضراعك

الله يرضى عليك ويعلي مقامك

تزور النبي ات يا يابا

وياحاجة بنسلم عليك مالك ما بتردي؟

ماسمعتك يا ولدي

يسلموك للبوليص

العزيزة تماضر

تهاني حارة

حلوة حكاية الهرجة بالانجليزي دي
تعددت اللغات والهرجة واحدة
نحنا عندنا هرجة باللغة النوبية حاجة بديعة جدا

تماضر وسارية
فرحت ليكم شديد ، واتمنيت ليكم مزيد من التوفيق ،،،، أصلو الواحد من زمان عايز يكون خال لي ولد عندو دكتوراة ، وواضح إنّو المسألة بتتحقق ،،،

من أمس وأنا أباري بالمنبر وأشوف العنوان ، وأقول تماضر دي جابت حكاية الهرجة دي من وين ،،، ناس السعودية بيقولوا كلمة هرجة على الونسة العادية ،، وأنا نسيت إنّو الهرجة عندنا هي نوع من ( الشَّكّلْ ) ،،، وبعدين قلت تماضر دي مالا علينا ، كمان عايزة تعمل لينا ونسة بالإنجليزي ، مش بكري عمل منبر بالإنجليزي ،،، يا أخوانا العايز يكتب بالإنجليزي يمشي هناك ،،، وعشان الكلام ده كلّو أنا ما فتحت البوست ده إلا الليلة الصباح ،،، قمت لقيت الموضوع مختلف مما كنت بفكّر فيهو ،،،
غايتو يا تماضر ربنا يحفظك ويحفظ ليك وليداتك من عين ناس صديق الموج ،، شفتي الزول ده والله كان عاين في الجبل يهدّو ، بس قولي يا يوسف ، يا أب شراين كوم يا بحر العوم ،، اندهي جدك الشيخ حمد النيل ،،، اسمعي كلامي ده كويس ، وما تهمليهو ،،،
سلمي على سارية وقولي ليهو خالك ودقاسم عايز ليهو ود أخت يكون عندو دكتوراة ، وقولي ليهو لازم يحقق لي الأمنية دي ، قبل العمير يروّح ، أصلو وصل مُغرِبيتو .
وربي يحفظكم ،،،

الاخت العزيزة تماضر
تحيات زاكيات
كان الأجدر باصدقاء سارية أن يصيحوا فيه وقد شاهدوك قادمة لهم في روشستر مشيرين اليك ومنبهين له في آن
- يا سارية ... الجبل .
التحية له في نجاحه الكبير ذخراً للوطن.ولك في فرحتك الكبيرة بهذا النجاح.
دمت.

مبروك ,, الله يديك الصحة والعافية وتفرحي بي تخرج اولادهم

الغالية تماضر

التهنئة للإبن بهذا النجاح الباهر، وعقبال إخيانه وأخواته.
والتهنئة لك وله من الأبنوسة.

العزيز تماضر
لك تحيات الورد
مشيتي وين خليتي الناس تهرج فد هرجة

اسمعي الهرجة دي

تعال يا ولد تجيك الطاوية حباله
واقفل الباب وراك يقفل نيتك
اقعد هنا تقعد في نار جهنم
زرزر زرارتك يزرك الكلب
قوم من هنا تقوم قيامتك
نوم نوام الرقدو وما لقيناهم

ألف مبروك يا تماضر
إن شاء الله تفرحي بيه عريس كمان لأ وتبقي جدة يا رب

بالنسبة للهرجة السودانية فنحن نمتلك أغرب خاصيتين متناقضتين
دشانة الكلام الشديدة والحنية الزايدة عن الحد مرات


يعني مثلا أم تشوف ولدها الصغير ماشي على مكان خطير حفرة مثلا واللا بير واللا غيرها،، تخاف عليه لما تطق الكواريك ،، وفي نفس الوقت تدعيه
زح من هنا يزحزح مصارينك



وبعدين الملاحظ أن لكل فعل رد فعل عكسي،، فيزياء بس
اقصد يعني لكل فعل دعوة معتبرة او دعوات يتفنن النسوان عادة في ابتكارها وبدون قصد
وأتحدى أي واحد يجيب لي فعل ولا أجد له بالمقابل دعوة شعرية جميلة تناسب معناه وموقعه من الكلام

يا ود ما (تجيب) البتاع ده (تجيك) الطاوية حبالها إن شاء الله ،، أو تجيك أم كلعلع،، أو تجيك الكشة
أقعد يقعد إن شاء الله نصك
أرجع هنا رجعت الموية في زورك ،، أوأرجع هنا الحمى الراجعة إن شاء الله
أقيف يا يمة أنت تقيف قيامتك
اتقصى هنا يقص نصك
أو اتهد هنا يهد حيلك
امشي استحمى الحمو اليبرطك،، وفي رواية أخرى ،، امشي استحمى مشش في ركبك،،، أو يا ود امشي الحمام الحمى اليتبنوها بي عود
يا ود امشي نادي عمك إن شاء الله عمى الكباسة
أو ،، نادي خالك يخلخل يا يمة ضروسك ،، أو الخل اليخلعك(بضم الخاء)
أمشي من هنا تمشي بطنك
طير من هنا طيارة تاخدك
غور من وشي الغرغرينا إن شاء الله

وهناك أنواع من الكلام الشين المعتبر من أمثال
أنت يا يمة يوماً اسود الجابك

والقائمة تطول
وهناك المزيد بس خفت تقولوا عليا بت قضيم فعلاً
بجي يا تماضر

تماضر:

سألك عمر الماحي : { لماذا لا يشارك معنا سارية ....؟}
وعثمان محمد صالح كرر نفس السؤال وقال ليك { ليه؟}

والدليل إنو سؤالو بعد سؤال عمر مباشرة

مبروك وانشاء الله دايما وابدا ناجحين ومن نجاح الي نجاح

الاخت تماضر ..

الف مبروك نجاح الابن سارية وعقبال لكل الابناء

شكرا ً ابوساندرا

على الملاحظة رغم تجاهل اقصد (إنشغال) صاحبة البوست ...الله يصاحب راسا (إنشالله) ههههها

يا ملكة ملوك أون لاين .. يا جبل ســارية

أريتو ســارية بالنجاح الغير منقطع

ممكن أشارك ؟؟؟

و لأن هرجتك غير عربية أسمحى لى ترجمة بعض ما أوردته البنت المتقضمة

أرجع هنا رجعت الموية في زورك
Come here go back the water in your visit

أرجع هنا الحمى الراجعة إن شاء الله
Come here the protection returning composition God

أقيف يا يمة أنت تقيف قيامتك
Stop you my mother stop your standing

اتقصى هنا يقص نصك
Decrease here cut your half

اتهد هنا يهد حيلك
Destroy here destroy tricks

إن شاء الله عمى الكباسة
Construction God blind the Compressor

الحبيبة تماضر
التحية لك وأنت تحتفلين بتخريج سارية وهو تاج علي رؤوسنا جميعا
ويا تماضر أنا كل يوم بعاني من موضوع الهرجة ده لأنه اولادي ما بيفهمو
العربي الدارجي وبيضحكوا علي
ويا تماضر أنا والنصري كنا من سكان روشستر1995-1997 ولقد احببت هذي المدينة الحالمة ومازلت احتفظ بصداقتي لاهلها وبعضهم اصدقاء دراسة مرتضي ساتي واسرته وعلي السر محي الدين وكل الاخرين وبالمناسبة تبارك كان صديقنا بالكليات التكنولوجية ابن الفنون المشاكس وكذلك اسماعيل وابوبكر وصلاح وأتمني لقياكم جميعا في تخريج سيرين أو زواجها
وأخيرا أكرر التهنئة لسارية شاب يفوق طوله كل الحضور ويفوق تعليقه الساخربرنارد شو ويفوق فخرى به جبال الالب..
وقولي ليهو خالتو سهير بتشوف فيك أولادها أحمد وأمين وسارة في المستقبل
عشان الهرجة والتغرب يكون بي فايدةloooooooooooooooooooooooooooooool

الحبيبة تماضر
التحية لك وأنت تحتفلين بتخريج سارية وهو تاج علي رؤوسنا جميعا
ويا تماضر أنا كل يوم بعاني من موضوع الهرجة ده لأنه اولادي ما بيفهمو
العربي الدارجي وبيضحكوا علي
ويا تماضر أنا والنصري كنا من سكان روشستر1995-1997 ولقد احببت هذي المدينة الحالمة ومازلت احتفظ بصداقتي لاهلها وبعضهم اصدقاء دراسة مرتضي ساتي واسرته وعلي السر محي الدين وكل الاخرين وبالمناسبة تبارك كان صديقنا بالكليات التكنولوجية ابن الفنون المشاكس وكذلك اسماعيل وابوبكر وصلاح وأتمني لقياكم جميعا في تخريج سيرين أو زواجها
وأخيرا أكرر التهنئة لسارية شاب يفوق طوله كل الحضور ويفوق تعليقه الساخربرنارد شو ويفوق فخرى به جبال الالب..
وقولي ليهو خالتو سهير بتشوف فيك أولادها أحمد وأمين وسارة في المستقبل
عشان الهرجة والتغرب يكون بي فايدةloooooooooooooooooooooooooooooool

و إياك أعني يا سارية
و أم العريس ضاربه الطناش
*************
الف مبروك للإبن سارية....
و خروفنا بتاع الضحية ما تهبشوه...
شوفوا ليكم واحد تاني.

و إلى لقاء

العبث الذي تنشره يمنة ويسرة في هذا المنبر لا يدل على نضج في التجربة ولا في سنين العمر
أقولها لك وبالصوت العالي يا ايها المدعو كوستاوي

أمامك بحر شديد الملوحة

ألف مبروك يا سارية.
http://www.rit.edu/~670www/news/Highlight/Year_review/Vermonster/Team1.gif

أمر مغم أن تبدل جلدهااسماء كنا نستانس بمدادها الخيّر لتتفرغ لصناعة العبث

ده راكب من وين الناضج ده?

صانع عبث لا يليق براشد

لك ودي

و نواصل الإفراح و التهانئ مع الأخت المناضلة تماضر شيخ الدين بحصول إبنها الأستاذ سارية على درجتي الماجستير/بكلاريوس....

و أي تعليق لا يليق و خيوط هذا البوست يعتبر عبثا...
ليس له معني...

Quote: تعال يا ولد تجيك الطاوية حباله واقفل الباب وراك يقفل نيتك اقعد هنا تقعد في نار جهنم زرزر زرارتك يزرك الكلب قوم من هنا تقوم قيامتك نوم نوام الرقدو وما لقيناهم

كوستاوى خلعتنى يخلعك المدفع!

ساهرتو بينا تساهروا بي وحع الضرس!
جني

العزيزة تمــاضر، التحايا النواضر تغشاك والأسرة..

ألف مبروك لسارية ولك.. من حقك يابـت الشيخ أن تفاخرى به الجبال والشموس، كما نحن نفاخر بـك.. لن نغمط سـارية حقه وجهده، لكنـنا نقدر جهدك وتضحياتك، فكنتي الأم.. بل أكثر كثــيراً، هنـيئأً لك ثمراتك وهنيئاً لسارية التخرج.

عدلان والأسرة.

محمد السر

ههههههههههه والله برضو سبب تانى للنجاح...الف شكر

والنمرة بس ياها كسرة دى زاتا..طالع بالسخينة

لا لا جيب ايميلك نرسلها ليك

وكل التحايا

نزار حسين

وبعدين يا تماضر....عليك الله هسي متخصص انا والله صديق الموج

والله الاتنين ده يضربو بيه ده

يضربك الضريب هههههه

قلت لى يخلو ليك شنو؟؟ حسى دى ما مخالفة لقوانين المنبر عدييييل كده؟؟ انت زهجت مننا ولا شنو؟؟


لكن انا اكتر دعوة مضحكانى بتاعة القال لى اخوه

الصاقعه التخلى مكانك حفرة


قرجة

ماسمعتك يا ولدي

يسلموك للبوليص

ههههههههه بعد الظرافة دى كلها؟؟

شكرا ليك كتير وربنا يفرحك بالعندك

مايا

انتى تنضمى لمنظمة الدعا النوبية برئاسة محمد سيد احمد وتعملو لينا مؤتمر..وجيبو معاكم الدكشنرى المذكور اعلاه

ودقاسم

لالالا انت ظاهر عليك طولت فى البلد ديك ..احسن حاجة ترجع باسرع فرصة

لا لكن صديق الموج بالغ ..الله يكفينا شرو

وحاقول كلامك القلتو لى
بس قولي يا يوسف ، يا أب شراين كوم يا بحر العوم ،، اندهي جدك الشيخ حمد النيل ،،، اسمعي كلامي ده كويس ، وما تهمليهو ،،،


"انقر ما قلتو جدجد؟"


شكرا ووصلت لى سارية كلامك وقال ليك جدننننن


بشرى الفاضل

كان الأجدر باصدقاء سارية أن يصيحوا فيه وقد شاهدوك قادمة لهم في روشستر مشيرين اليك ومنبهين له في آن
- يا سارية ... الجبل .

هذا قول بليغ يا رجل

اشكرك عليه شديد وزى حابقى تغيانة شوية كده بى سببو هههه

عقبال العندك

نوبى

الله يبارك فيك ويفرحك باولادك

نادوس وابنوسة الغاليين

طبعا بعد الارشفة لمحت سيرة وليدكم الجديد..

اهى مناسبة اقدم فيها اعتذارى الشديد عن عدم المواكبة ..واهنيكم بمقدمه السعيد واحبكم فى نفس الوكت..تحياتى والجمال والامنيات السعيدة

خالد العبيد

مشيتي وين خليتي الناس تهرج فد هرجة

تهرج فيهم المكنة ....ههههه هم كانت ناقصاهم هرجة ولا شنو؟؟ما يصبرو لمن اجى تجيهم الطاوية حبالها

ههههههه

بت قضيم

ده ابداع ما بعدو ابداع

بس نسيتى حقة تاكل اللكلتو هجوة وتاكل اللكلتو كديسة الحرم وتضحك بلاهن ويعجبك خلاهن ..وتمشى الجاز

طبعا فى واحده مقرفة ""الصبة الضبانا يحنى الشدر" ان شا الله بس ما يفهموها الناس الصغار بقولو اهلنا ديل ارهابيين

الحمى اليعاينو ليها بالشبابيك

وناس ياب راسن متل القرعه ويابنخرتن متل الردا ويابعنقره ويابتلاليش ديل ما يدوك الدرب

السترة واجبة

ابو ساندرا

صاح انا بس ما فهمت السؤال ..والله اسألو واشوف ما ممكن ليه؟؟

وبرجع ليكم بالرد قريب

الغريبة انا عمر الماحى ده فطيتو ليه ما عارفة

اسفة يا سيد "تسف التراب" ههههه وزى ما بتدعينى ادعيك وخوتنا فى محلتها

هههه
لكن كويس بناءا على طلب الجماهير ان شا الله يكتب رد على البوست ده لو مافاضى ...لانى متوقعاه يقول لى ما فاضى

على الحلاوى

هههههههه عجبتنى حكاية الترجمة دى خالص واظن دى اكتر حاجة كان مركز عليها البوست..حنضيفك لمجلس علماء السودان للهرجة وطول اللسان

سهير الشيخ

مرتضي ساتي واسرته وعلي السر محي الدين وكل الاخرين وبالمناسبة تبارك كان صديقنا بالكليات التكنولوجية ابن الفنون المشاكس وكذلك اسماعيل وابوبكر وصلاح

طيب ما هم ديل الجماعة الفى روشستر زاتهم البنتكلم عنهم..ياخى ديل مجموعة ملايكة سودانية ختوها فى بلد امريكى..بختك بى معرفتهم ونحن الاسعد

شكرا على المشاركة والتهنئة

نصرالدين انت بتخطب لى ولدى ولا شنو؟؟

عاد كان خطب البت العسل دى ما غرتو لى صرتو

"طمن اهلها قول ليهم ام العريس ما بتدعى" ههههه

الف تحية ليها وليكم يا كوستاوى لكن خروف تانى ما فى ليكم

حاعمل ليكم حركة عمتى هدى لما جوها اهلها ضيوف ..جات جارة شوال العدس وتقول : باااااع بااااااااع

حاضبح ليكم بتزا

بس انتو كيف تجوا

عثمان محمد صالح اهلا بك فى البوست مرة اخرى


جنى

اها شووفو ابو العروس ....اللسان متل المنجل كيف؟ هههههههه

"مادايرين ندعيه نخرب الرصة"

عدلان احمد عبد العزيز

والاسرة الجميلة

شكرا وفيرا وحبا كبيرا

وعقبالكم

الاخت تماضر
الاف التهاني بتفوق سارية ,,
اذا كانت دي هرجتك وانت تطوين سهوب ماشسوتس ,,يا ربي هرجتك كانت كيف وانت بتقطعي فيافي وادي ام سدر على ظهور الابل ,,

الاستاذة المبدعة
تماضر
دائما واسرتك فى سعادة
ومن نجاح لى نجاح
فيا لجمال الابناء
وهم يشرفون اهلهم بنجاحهم وتفوقهم
لك ولهم ورورد الافراح

تماضريونا
وحبايبنا الصغار
مبروكة الفرحة بتخرج سارية
ومبروك لك والأماني تطول بطول العمر وهناء الحياة في صحبة سارية واخوته

والتحية لك
والونسة الدقاقة كيف بالأنجليزية

سلمى على محجوب

يباركوا ليك السمح يا لسمحة....


اما الونسة الدقاقة بالانجليزى فكلمتين

قدر ما ادقق السمع واعدهم القاهم اتنين

I love you

I will be there for you

فى ذمتك تانى سمعتى غيرهم ..وين العزول والشوق والطير المسافر داك ووين الجدى الناحل والجيدو قزازة عصير واليدو مجدولة ..وشنو داك

بعدين فتح الخشم ودق الريحة حتى الدخلة...

مع انه كلمتين بقضو

I do

هههههههه

كر علينا العمرنا ضاع فى الانشاء

الأخت تماضر
تحياتي

Quote: بالمناسبة محمد عمل لى شنو فى موضوع الويب سايت؟؟؟ انا لسه وراه

محمد طبعا كان شادي حيله في الأول وطبعا لما أنا قلت ليه أنه عمك أبو آمنه شغال بيعمل لخالتك تماضر في الويب سايت..شايفه زي إتراجع كدا وقال لي عمو أبو آمنه بيعمله أحسن مني...عموما أنا كلمته صباح اليوم وقال حيبدأ يشتغل في تصميم جديد ويجبيبه معاه طبعا هم حاليا في القاهره قضوا السنه الدراسية هناك وحيرجعوا هنا نهائي أول شهر سبعه....والشهر الماضي تلفزيون القناه التالته المصريه كان عامل معاه مقابله باعتباره من الموهوبين الصغار في التصميم..عموما رجع إتحمس لموضوع الويب سايت بتاعك تاني ولما يجي هنا حيكون جهزه...تحياتي للأسرة

تماضر ..
تهاني لسارية بهذا النجاح ...والتفوق ..والكفاح يجب ان يستمر على راي اخونا
معمر القذافي ...ومزيد من النجاحات يا سارية
بخصوص الهرجة

والله يا تماضر ما بتذكر الهرجات كويس ...عشان البكر ولا شنو ؟
انت عارفه البكر مدلع كيف ..ولما تولع فوق لرب السماء اكثر حاجة كانت الوالده
بتهرجه ...
ما ياكا البكر ... لا اعرف يا تماضر لماذا ارتبطت كل الهرجات تجاهي بالبكر ..

صحي البكر عوير ..؟


قلبك ميت ..ما بكر


اها يا تماضر ..ماقلت لي ساريه ..عنده العواره كمان ..ولا كله بس شطاره ؟

ولك تقديري ،،،

اها يا تماضر واحدة من دعوات يو مع الترجمة اللي هي خيانة للنص

دعا مسجل خصوصي لي من واقع ردود فعلي
انا صغير لمن ازعل ويمكن كبير كمان شفايفي بترجف
اها
يو تقول
(كت ارنب نكر اقكا قلجاكوفي تاني)
الترجمة
قوم قاعد لي تفتح وتقفل في خشمك زي الارنب

امشى يااااااااااا

Quote: (كت ارنب نكر اقكا قلجاكوفي تاني)

المنك تانى خشمو ما يفتحو

عجبنى ليك...

هههههههه

اها يا تماضر نديك نموذج
مع الترجمة اللي هي خيانة للنص
الدعا دي مخصص لي
وقصتو وانا صغير ويمكن وانا كبير كمان عند الغضب ترتجف شفتاي
يو اول ما ابدا في الحركة دي تقول
(ان تون كت ارنب نكر شندى اقا قلجا كوفن تاني)
الترجمة
(قوم من هنا قاعد تفتح وتقفل في خشمك زي الارنب)

تماضر
لك الود
1000 مبروك ليك ولي سارية ..ربنا يخلهو ليك وتشوفيه في اعلى المناصب وماخد اعلى الشهادات
وعقبال الباقين كلهم ..
البوست طبعا رهيب جدا والارهب انو كل الناس متفاعلين معاهو ... لكن عارفه الالذة من ده وداك الفكرة ذاته ...!!!
يا ريت دايما نفتح ابواب دافية وحلوة زي دي ... حتى لو كانت عن الهرجي والمرجي ، بترع بيك لي حاجات حلوة ومحببة
غايتو قدر الاتذكرته :
* امشي استحمى .. الحمي التايفود
وحسب الهرجة وحجمها ممكن تتحول للحمى (اليهبشوها بالعود)
* ما سامع ..تسمع الطرش
أو برضو (تسمع الطرش اليفتق اضنيك)
* ما ترقد .. ترقد هناك (وهناك دي طبعا معروف وين )
* طير سوي كده .. تطير ما تجي
* كنته طاشي وين .. تطش ما ترجع
* تلعب شنو؟... تلعب كراعك شلل
* مقهي وين .. تقهي في الكنيسة (ليه الكنيسة برضو ما عندي فكرة)
وفي النهاية في واحدة حقتي براي بتذكرى من ماوى اختي
* سالي وشك زي اليوم الكتل جدي ( الظاهر انو يوم جدنا مات كان يوم اطول من عادي)
مع محبتي وتقديري
تماضر

سلام مربع

تماضر
نكهة الفواكه الاستوائية

انت تستحقين هذا التكريم
تستحقين اكثر من نكهات الحصاد
والثمار المنحازة الى مراعيها

انت تستحقين هذه الاحتفالات

مبروك لسارية .. ومبروك ليك
ومبروك لاخوانه
ومبروك لينا . . كوننا نحبكم

على فكرة طالباني رسالة
كانت على بالي من زمن
بــس قولي معاي .. الله ينعل كسلي

شيرى "بت الشيرى" يعنى بالشايقى كده معناها بت الشيريا



وشكرا على التهنئة الدافئة والتحيات الاستوائية الحارة...

ورسالتى وينها؟؟؟ دايراها حسسسسسسسسسسة دى ولا بعرف كسل ولا بعرف بصل....

هههه

يا بت يا ذوق انتى

طلعتينا من البوست وسقطو

تلعب كراعك مكسورة يا ايمن طابر انت بتلعب علينا ولا شنو؟؟ ده نبذ ده حسة؟؟

امشى لى رباطابية صديق الموج توريك النبذ الما بتعرفو


تعرف السرقة نصة نهار

ينهرك الكلب

ههههههه....وممكن الحكاية دى تكون كسر دائرى تلف لى بكرة والزول ما يتفشى


والف تحية للتهنئة والاعجاب بالبوست والمشاركة الحلوة....

Quote: امشى لى رباطابية صديق الموج توريك النبذ الما بتعرفو

اتخيلى يا تماضر نحن ماشين فى الهواء لما عفنتنا تجر ما نصل قعر

البير، يعنى طولها كم متر بير الجن دى..لانو عفنتنا بتطلع بعد تلاتة

ايام اقل شىء.

وبعدين يوم دخلن غنم فى بيت المرة قالت ليهن

تك يتكا بى جلدكن المداح..شوفى الغنم البقن طارات للمديح

يوم هى وامى اشترو فحم وبتاع الكارو نزل ليهم الفحم جنب البيبان

وقال ما بدخلوا جوه البيت.امى قالت ليه شيل الفحم لى جوه رفض

قامت قالت ليه يشيلك الصقر قامت هى قالت لى امى ياعاشة ياتو

الصقر البيرمى بعد شوية.اتخيلى شيلة الصقر شايفاها شوية.

وبعدين هى وصافة خلاص..مرة بيحكو عن زول وصاف قامت جارتنا قالت

فلان داك شدة مو وصاف كان وصفلك (الخرة) تقرب تشيل منو معلقة قامت هى قالت

والله عندى خالتى كان وصفتلك الموت تمسخ عليك حياة الدنيا.

تماضر راجع ليك بى بلاوى جارتنا...تسلمى والعيال،،،،،

انا هسي مقعد لي خواجه بي طولو عرضو قدامي وبترجم ليه في الهرجي
دا عايز اشوفهم بهرجو كيف؟ لا هسي هو يسوي لي يا يا يا ما عارفو
فاهم والله ما فاهم؟ ان قبضت منو شيْ ياني الهارجو ليكم هنا...

الهرجات الخطيرات قاعد يقول

O my GOSH

من قوشو دي شكلو زي خالة صاحبة ام صديق الموج...

بعد ما سمع كلامي كلو قال لي


This culure is specific in Arabic, We do not have that

نزار قعد الخواجة ده تانى وقول ليه قالت ليك تماضر بتعرف منابيذكم البتسموها trashing

واولها your momma is so fat,

iههههههههههههه


ما يعمل ليك فيها رقيق....

وسلم عليه "بالانجليزى"

Quote: والله عندى خالتى كان وصفتلك الموت تمسخ عليك حياة الدنيا.

المرة دى انا ما دايرة الاقيها...عندى اولاد وبنات بعاينو لى الله وبعاينو لى

وراجياك ترجع بباقى كلامها...."ترجع الموية فى زورها" الله يغفر لى من حقها.....

الاخت تماضر
ايه رأيك فى الهرجة دى مع عبد القادر سالم:
http://www.m-huether.de/ram/salim1.ram

متى ينضج عقلك ?!

عادل عثمان الاغنية جميلة جدا ...بس رقيقة وما فيها هرجة ....

عثمان محمد صالح اهلا بك مرة اخرى فى البوست...

العزيزه

تماضر



خالص التهنئة لك

ولسارية

ربنا يوفقه دائما

ويحفظكم لبعض

Mabrouk ya Saria
!!lakinma ma 3azmtona
khalo balalo

عمر ادريس ولك منى اجزل الشكر وتحياتى العامرة وتمنياتى لك بفرح نجاح الاولاد....موفقين دائما بأذن الله...


ابو مريم...طيب تعال زورنا فى فيينا آخر شهر تمانية 25 26 27 ونرجع يوم 28 ...رشا والوافر جايين....جايين انا والفرقة ورشا حتغنى لينا..

تدوني كم?

ما بتردي علي مداخلتي الفاتت مالك يا أم سارية؟؟؟؟؟؟؟

يردرد...شحمك و لحمك....

Quote: تدوني كم?

الصادق تطير عيشة الفلس اخوانك تشيل منهم عداد

كدى عاين فى صورتى دى سمح ..دحين الخليقة دى ما مرت عليك،،،

اه الخواجه طلع بعرف عربي...قال لي


You mean SARRAKH when you are upset from some one

قالها هكذا صرّاخ...قلت ليه ايوه...وطلع عندهم هرجي السنين
وغالبين جارة ام صديق الموج...وقلت اخير لي اختيكم هرجيهم
امانه مون كعبين كعابة...لكن عشان تعرفوني ختيتهم لي شنو,
ابسط حاجه قالها ... يو ليتيل كراب...وبعد داك الهرجي...

هسع في هرجي بعد كلامو دا تاني بنكتب...؟؟؟؟



امسكها كويس يمسك ايدك شلل....بلاي شوفو قساوة الكلام دا
زح جاي تزح مكسّر...

مالو سعرك دا غالي السعر اليقوملك ضنب...يعني يقلبك كلب دوت كوم

أنا أول من قرأ هذا البوست وأول من بارك ضميريا ولكن شغلني الشديد القوي من الصريح..والآن أعود متميزا بالمداخلة ال(100)..ألف مبروك ياتماضر. وربنا يجعل منهم كلهم ابناء الولايات المتحدة السودانية قريبابإذن الله.

الاخت المبدعة تماضر.
سلام.
هذا ارث سوداني خالص لا اعتقد انه من الممكن تقليده او نقله الى حضارة اخري.
بهذه المناسبة اتذكر ما كتبه البوني فى احدى المرات عن قساوة ناس الضرائب فى السودان وتعاملهم.قال انه عندما كان صغيرا كانت امه تدعيه كل ما يضرب واحد من اخوانه وتقول ليه يضربك الضريبي يا جنا.يقول انه لم يعرف معني الضريبي واكتشف ان امه ما كانت تقصد بهذا الضريبي سوي جابي الضريبة وكانت تستعير لسان اهلنا الشايقة الذين يقولون للضريبة الضريبي. ويقول انه يسال الله الا تصيبه دعوة امه ويضربه الضريبي.
لك الود
والف ياقة ورد

طبعآ الكبر دخل والخليقة اتغيرت شوية بس الغريبة إسمك ياهو زاتو!!!!

الفلس كاتلني ومامديني فرصة اراعي الخوة...
الاسباب كتيرة اهمها شراء بيت في بلجيكا مع زوجتي ..هاله

طبعا ياتماضر ح اكون معاكم واجيب معاي الالآت والاسبيرات كمان....
دي دايرة كلام..قلت لي كم?ههههههه

Quote: الفلس كاتلني ومامديني فرصة اراعي الخوة... الاسباب كتيرة اهمها شراء بيت في بلجيكا مع زوجتي ..هاله

اريتو فلسي...آ يابا....ماني حاسد علا بغران...

فلسا بوخد الزول بيت في بلجيكا دا كيفنو...

نحن فلسنا قلنا فيه


فلسا جانا يا كافي البلا محتحتنا
عدّمنا القرش ما خلا حاجة تحتنا

بلا توب الصبر مالقينا شي يغتغتنا
كان طرفو انشرط ,تلقي الضحك شارطنا

طمطم.. وحات الله أسماء أولادك ديل حيروني.. قدر ما اجي اكتب ليك في موضوع عنهم أتلخبط.. زي الولاية الأمريكية ديك الاسمها بعرف أكتبه ولحدي حسي معصلجه معاي.. ألف ألف مبروك ... وعقبال تفرحي بيهم كمان وكمان... المرّه الوحيده السمعته فيها أمي بتزغرد يوم استلمت الشهادة بتاعتي... والفرحه ما سايعاها... مازن أخوي صفّر لما صوته راح... وبابا كان قاعد في الصف الأولاني وبأشر لمدير الجامعة البسلّم فيني الشهادة ...انه دي بتّي...


ودي هدية ضغيرونه..لما نتلاقى... وما بعرف وين ومتين، بس هي طلعت كده... منتظراك بي ملاحتي هناك...






بنت الحسين

دعواتنا بالتوفيق الدائم والنجاح الباهر لسارية في حياته المستقبلية

Quote: يضربك الضريب هههههه

من الغرائب وجود واحدة من النساء وصافة وفي دعاها .. أما عند الربكة والعجلة دائما تتحول كلمات التحريض للحركة إلى دعوة ( ما تمشي لي قدام بتردح يردحو فوق جنازتك) أو عند الإنزعاج الشديد لما أحد الأطفال يضرب أخته وبعد صراخها المزعج يسمع الدعوة ( ضاربها ليه يضربك الضريب .. كسار العناقريب) أو لما يخطف منها الحلوى ( شايلها ليه يشيلك ابنيف)

ولو في جدة كبيرة بتقول لبنتها : الرسول تبصقيها ..
الشئ الغير معروف الضريب كسار العناقريب .. وابنيف ده شنو
الضريبة وعرفناهاكسارة الكرعين

قصة حقيقية

من أصعب المواقف التي سمعت فيها هرجة واحد حرموا التاجر من كوتة التموين بحجة انو ماجاء في الكشف وما عندو تموين في الدكان ولازم يفتش تموينه وين

أولا الراجل وجهه تغير إلى أخضر ثم إلى أزرق ثم غلى أسود وبدأ يدعي بدعاء لا يمكن للغة أن تتحمله..

في نفس اللحظة قلت ليه يا راجل استغفر ربك.. انت قتلت الراجل ده
وبالفعل في ظرف اسبوع كان القدر أن توفى التاجر ..

كنت تمنيت لو في حاجة قالت ليه الرسول تبصقها..

المسافر زولك ده خوفنى عدييييل كده...

واظن القصة تقع تحت باب "دعوة المظلوم"


شكرا على المشاركة "العميقة" ....


ود نايل يا مراحب بمحمد وانا فى الانتظار

الموصلى ...اضرب "يضربك دابى حلفا" والله بكتب فيها ....وخجلانه لانك استاذنا مهما كانت ظروف البوست ما مفروض نتجاسر عليك ...لكن لكل مقام مقال...وده مقال هرجة ....عفوك ورضاك....

بد الدين شناة ...؟؟؟؟؟ بس كده؟؟؟ ما داير تنبذ ليك زول ولا تداعيه اصلو؟؟؟ ما اوحينا ليك بأى حاجة من الحلاوين؟؟؟ ياجماعه ده بوست شنو ده؟؟

شهر العسل بالخراب...


صديق الموج بس الله يخليك لى جنس الكعوبية دى انت هههههههه

Quote: ولو في جدة كبيرة بتقول لبنتها : الرسول تبصقيها .. الشئ الغير معروف الضريب كسار العناقريب .. وابنيف ده شنو الضريبة وعرفناهاكسارة الكرعين

ابنيف التحت القيف ده التمساح عرفت يا المسافر

Quote: كثيراً ما ينتابني الإحساس بالحوجة الملحة لهرجة من النوع المُقفٌى و المَقعٌد ...من شاكلة يضربك الضريب..شقاق العناقريب...لكن تخذلني ( فلهمتي ) و ( قرضمتي ) و ( فلسفتي )..و ألقى نفسي بهرج بكلمات جوفاء ..ركيكة...من نوع ( منتهى السخف) ( منتهى البياخة ) ( منتهى عدم المسئولية )..او ( حرام عليكم أنا.. منهكة...مجهدة...مرهقة ) ( إنتي إنسانة سمجة ) ( إنت إنسان لزج ) و وصلت مرحلة من الخبرة بقيت أختصر المفردات...... سمج + لزج = سلج مُنهكة + مُرهقة + مُجهدة = مُرهدة بقوا أول ما تشتد الإشتباكات و يحتاج الأمر لفض نزاع....أصرخ بأعلى صوتي ( ياااااااااا سلج )...فيرن صمت مخيف...معلناً أن الكل فهم الرسالة و عرف إني ( مُرهدة )....

الليلة الرد على ممكونة بسسسسسسسسسس

لانها مرهدة...

الما مرهد منو؟؟ يرهد كبدتك.... ههههههه

لا مداخلة حلوة وانا اتلومت ...بس يردرد شحمك ولحمك وجعتنى ........

لحمى معليش لكن شحمى؟؟ شحمى ده انتى قايلاه لاماه بالساهل؟؟

الكوكيز والشاى باللبن ...ديل هينات؟؟

كل ما تلقى الشيك ما لافق مع الفواتير ...طاخ شاى بلبن وكوكيز

كل ما الاولاد ما ينضفوا ليك اوضهم تراااااح شاى بلبن وكوكيز

كل ما البوص يديك كلمة زى العقرب .....شوووووووووو شاى بلبن


ده استثمار عديييييل كده تجى تردرديه لى فى زعلة؟؟؟

هههههههههههه

شكرا يا ممكونة وحقك على....

تماضر...تتمنضري في الجنٌة....قولي آمين...

مشكوووورة حبيبتي على الرد ( الإعتباري ) ...
قلت ما أجيك يدي فاضية...جبت ليك معاي النكتة دي....

Quote: يا ربي تعيشي في عذاب... و تحسي باكتئاب... و تسفي التراب..!! بموية بلاعة تتبلبلي ...و بالنار تتحرقي و تتغلي ....و يموتوا اهلك و تسكلي... وتجني و تفلقي ....و من راجلك تتطلقي ....و يضيع جناك ما يتلقي...! ( مسطول بداعي في نملة قرصتو ). .!!!

بت الشيخ

عولك التنهئة بنجاح سارية ويا لها من هرجة مقبولة ان كان ثمنها النجاح
تحياتى

العزيزة تماضر

والله فرحنا كتييير لنجاح سارية ونتمني لك و لأسرتك المزيد من النجاحات ..

و كمان استمتعت بالبوست " الفلتة" وروحه الخفيفة

مع تحياتي للجميع

صديقتي شدييييييييييييييييد تماضر
سلامي وفخري بساريا

Quote: وكانت معضلتى هى ان اجد التعبير المناسب بالانجليزى

وهي معضلتي أنا الآن في التعبير عن إعجابي وفرحتي بك وبساريا وبالتميز في الطرح والوصول للمرمى
لك (الود) كان طلح كان شاف

تماضر بت شيخ الدين

سارية مبروك عليهو و عندنا ليهو سارة

شفتي كيف سارة وسارية غاية في الهارموني

كدي أجيب ليك هرجات قوية حقت حبوباتى

لو قلت جعان يقولوا ليك " جوع الشوت رحطها أكلتو"
لو كروركتك لي آمك بصوت عالي : أمي يقول ليك " النمة"
لو قلت أنا عايز الحاجة دي تجيك "تحج فوق جمل أعور"

صعبين مش كده؟

بناديها

المعتمد


هشام المجمر


ان شا الله ياربى يداعوكم كده يوم نجاح اولادكم...


والداعى مدعى

دى زووووووول اتذكرها مافى....

يعنى خلاص السم القدر غداها...الواحد بعد يسمع الدعوة وتوجعو يقول الداعى مدعى ...."يا ولد"



او قل: "ياااااا بت"

والله الف كتر خيركم على الزيارة اللطيفة

والبوست يلفظ انفاسه الاخيرة اقول لكل المشاركين:


فى الافراح

وكفو العين...

"العين بحسين"

تماضر

سلام

هاك الشويه ديل:

يابت...تتبني حيطه
أمرقي يمرق جلدك بي إضنيك
زح إيدك أن شاء الله أيدك طبيقتا عكاز
أمشي تمشي بطنك تغلب الخمام
أقعد يقعد صقرك
الحمي اليتبنوها(يلمسوها) بي عكاز
تعال هنا تجيك الطاويه حباله
يضربك دابي الجزيره لاحنه ولا ضريره ..لاسيره ولا عديله
الجن التعزلو على إيدك
...
كفايه وللا أزيدك؟؟؟؟؟؟؟؟

http://www.sudanhosting.com/cgi-bin/bandwidth.pl?type=pic&name=217.jpg]

شقيقتي تماضر
ألف مبروك حصول سارية على البكالريوس والماجستير، وتمنياتي له ولكم جميعا بنجاحات أكبر بإذن الله.