لذاذات ابوى ...أو عشق الانسان الكونى

قررت ان احكى لكم عن ظرفه ولذاذاته الكاسرة خاطرنا فى غيابو.. القاطعه قلبنا

بعد ان شاركتمونا الحزن وكفكتم عنا الدمع..

من حقكم ان تبتسموا معنا فى طيفه الضاحك اللطيف
ابوى كان لذيذ
يجيد النكتة ولا يفتعلها
الله يرحمه ويغفر ليه ويحسن اليه
يعرف انها الطريق الى القلوب وانها جسر سهل من جسورالمحبة والقبول
كان يجيد اضحاكنا واضحاك كل من دخل بيتنا مؤمنا او غير مؤمن.
شاحكى لكم ما تيسرمن طرافاته الكثيرة..

فى مرة كنت امشى معه فى اسواق الخرطوم فى يوم بهى ..سمعت واياه شخصا من خلفنا يصيح: مضطفى
يا مصطفى..فالتفت الى سائلا فى جدية: انا اسمى مصطفى؟ قلت: لا طبعا فرد بسرعه: طيب ده بكورك لى ليه؟؟

ومرة جاء تبارك يحمل "جك" ماء فى يده..فقال هو: تيارك الذى بيده الجك..
كان يخلط اسماء ابنائه " الاولاد بس" ..واخيرا قرر ان "يتحل" من هذه الورطة فصار يصيح لمن يعبر" جعفر! يا جعفر..فيلتفت الواحد ويقول: معاى انا؟
يرد ابى: اى انت مش ولدى؟ اولادى كلهم بقى اسمهم جعفر..
كان يدلل بناته..ويكثر من اطرائهن وعندما تدخل الواحده منا غرفته يسألها انتى حبيبة منو؟؟ نقول حبيبتك يرد الحمدلله
"اظن انا الاكتر" فعندما نختلى ببعضنا البعض يقول لى" حبايبى كتير بحبونى لكن انت اللى شاغلنى..واظنها اغنية لام كلثوم..ويهمس لى: ما تكلمى زول...ونضحك

ويقول لى انتى عارفه انا ولدت كتير كده ليه؟ اقول ليه ليه؟ يقول لى كل مرة الد اكون قاصدك انتى ..يطلع زول تانى..هاهاوكنت ازنقو اقول ليه: طيب الباقيين ديل لزومهم شنو؟؟ يقول لى قلت امكن يشبهوك..
اقول ليه: بالله يابا خلى المكنات بتاعتك دى ..ويضحك..مكنات دى شنو؟ وكان بحب كلمات الشماسة دى لما يسمع بواحده يستعملها كتيرفى مواضع مختلفة..مرة يقول لعمى محمد الطيب..ابو مريم .. تعال نتكلم معاهم بلغتهم: بالله اعملوا لينا ليمون "مدنكل" لينا انا ومريم..ويموتوا بالضحك..ونحن نموت بضحك تانى لانه مدنكل زاتها ما لغتنا
طبعا هو متزوج من ابنة خالو"امى فاطنة" الاول ثم من امى "علوية" الثانية..وقد شهد اصدقاء الاسرة ..هذا الود الكبير الذى جمع بين المرأتين ..حتى صار مضرب مثل..
وكثيرا ما يجلس معهما فى ضل الضحى "بعد المعاش طبعا" للقهوة..فيبدأ بالشكية لجارة: انتى عارفه الجماعة ديل اليومين دى ما عندهم بن ..وتصرخ المراتان: كيفن ما عندنا بن ..الى اخر الموال فتكشف كل واحده عن قهوة ما..وتجىء القهوة والشرغرغ والقلايات تتطاقش وهو فرح مبتسم ..يغمز لنا بالنصر
وتجىء جارة.اخرى .وودع ويحلو الحديث..ويصر ابى ان تخبرة الوداعية متى سيتزوج فى الودع.؟؟.وتطنطن امهاتنا ويهرجن..ويتحول المشهد الى "اسكتش" رائع ونحن حولهم نضحك ونزيد النار حطب..فيقول لهن مش اخدتكن بقروشى؟ فيهرجن: قروشك الكملت زماااان دى؟؟ حسه كان جابوها ما بتسير كملتها زماااان وحسة بقينا طالبنك

ويلتفت للوداعية: خلاص شوفينى ما بجيب لى ولد ولا بت؟؟ "اخ انا الكبرت وما جب جنا" يعنى ما جبت جنا..ويهرجن زيادة: هى يايمة حليل ابوى..بعد الواطة المليتها دى؟ "لا حظوا نحن تسعطاشر"
وكثيرا ما كان يعمل لنا ورطة مع الضيف فيقول له: الجماعه ديل بدسوا السكر ما بعملو للضيوف شربات ..ونحتج نحن لا والله بنعمل فيه والضيف يقاطع لا والله انا شارب حسه فيغمز له ابوى ويقول: اسكت خليهم يعملوه عشان يدونى معاك..اصلهم ما بدونى شربات الا يجينا ضيف. ههههاها ويصير الجو كله مرح ومريح

عندما زارنا فى امريكا: كان يتغزل فى جمال الطبيعة..ويبدى اندهاشه الواضح باعتبارات الجمال..والحب والود بين الناس ويقول: كرم الله الانسان فى امريكا
وفى يوم كنت واياه نجلس وكان فى التلفزيون فنان من الروك الثقيل يصرخ ويقع على الارض..وكانت امى معنا..فصار يقول لى: غايتو لما اعرس المرة الجاية..الفنان دة بالذات ما تجيبوه لى. وامى هناك تتلمظ غيظا وتكتم ضحكة: يعرسوا ليك شنو؟

كان يتذوق الفن ولكن مسألة اختيارنا لطريق الفن لم تجىء سهلة كشربة ماء له...فقد قاومها فى البداية/ "...مع انه كان يستخدم المسرح فى تعليمه لطلابه و مصاحبة الغناء ..ويشجع الرسم وتذوق الشعر ويحب الرياضة وطلوع الجبال والمشى لمسافات بعيدة ...لكن اظنه كان يخاف علينا من الاحباط وتعرضنا للالسنه وعدم رحمة المجتمع للفنان

لكن لحبه للفن وعندما راى جدية اختيارنا صار اكبر مشجع حتى صار فى النهاية فخورا بنا ولا يتورع من ان يقول لاكثر اصدقائه "تزمتا" انه فخور بنا "انا ابو فلان" "انا ابو فلانهواذكر اننا كنا نتعلم الالات الموسيقية والغناء الجماعى فى الخفاء منه فى البيت..وكان ان "لفقت" الاغنية مرة ونحن فى احد الغرف وقد احكمنا اغلاق ابوابها..وعندما صدحنا بصوت واحد..فتح ابى الباب..وسكتنا لتونا وبعد فترة الصمت المهيب..قال كلمة صارمة ومضى: اولاد الكلب..
..فوسوس محمد ودخالى عبد القادر:نسميها فرقة اولاد الكلب للغناء والطرب..

فسمع ابى الحكاية وصار يضحك حتى تدمع عيناه...وصار يحكيها لاصدقائه .بعد ذلك صار يطلبنا ويقول: بالله نادوا فرقة اولاد الكلب يجوا يغنوا لينا حاجة..

كان يحفظ معظم اغانى الحقيبة ويعرف معظم شعراءها..حتى ان عوض بابكر نصب كمراته وميكرفونه فى دارنا عدة مرات يريد ان يحثه على الحديث ولكنه اصر على عدم الاضواء..ياخسارة
كان يحب اصدقاءنا الممثلين والموسيقيين والفنانين التشكيليين ويقدر اعمالهم وخفة دمهم ويطلب منهم ان يعيدوا له الحكاوى او الالحان او يطلعوه على رسمهم..ويؤكد دائما ان الفن جسارة عقلية وحسية بالغة لا يقدر عليها الا متامل فى ابداع الخالق الاكبر ويعتبرها قمة الايمان والخشوع..كان يستانس الفنان محمد الامين والفنان ابو عركى ويستانسونه ومحمد ادم المنصورى وهاشم صديق وفتح الرحمن عبد العزيز واصدقائى فرقة الاصدقاء ويتبادل معهم "السربعات" وتضحك خالده من تعليقاته حتى يسيل دمعها ويدلع عشه مبارك معانا ويسمى الهام بابكر صديقتى المختصرة فقد كانت قصيرة القامة ويسمى عمى الطيب الختام "الرجل الابيض" فشعر راسه ابيض ولونو فاتح ..ويقول لكل واحده من بناتو "حبيييييبتى" وينادى اولادو واولادهم بالسجع من هشام ولدى التمام وقصى حبيبا لى ومريوم الخاتية اللوم وتماضر ام قلبا حاضر ...الخ

المدهش فيه انه بعد كل هذا الهزار والمرح يقودك من حيث لا تدرى الى مسالة علمية او فقهية ويهرع الى رفوف الكتب ويصير الجو الفكه هذا نقاشا طويلا ولا يخلص النقاش حتى يضطر الزائر للعودة ثانية وهكذا يربطك رباطا وثيقا لاى وجدانه الرحب وعقله الجميل..كان ديمقراطيا بمعنى الكلمة يتعلم من الطفل ويعلمه ومن الكبير والبعيد والقريب..

يعتبر كل قبائل السودان اهله: تعالى سلمى على قلان ده من "اهلنا" المنصير.."البقارة" " الجوامعه" " الدينكا" "الهدندوه" ما حصل ما سمعتو ما اضاف كلمة اهلنا لاى قبيلة سودانية..

وعندما ياتى اصدقاؤنا الخواجات..يجمل لهم صورة السودان حتى "لا نعرفه" ويستمتع كل الاجناس بحلو حديثه. وكان يؤمن بالانسانية ويمارس ديمقراطية الزوار...لا طبقات كل زواره مجلسهم واحد وحفاوتهم واحده مهما اختلفت تصنفات المجتمع لهم...والله على ما اقول شهيد

مرة وفى زعلتو من الحكومة شاف لافته كبيرة جنب الكبرى بتقول "شركاء..لا اجراء"
فيقول كلامهم صاح انتو قريتوها كيف؟؟ اقروها: شركاء؟؟ لا، اجراء... مشكلة ترقيم بس وتكون صاح
برضو زعلتو قصة الجامع بمكرفون واصوات قبيحة تبدأ من الرابعه صباحا وقراءات مغلوطة " وكا بنضرس من غلط اللغه وشناة الصوت العالى" فيقول والله الجامع بتاعنا ده حقو يودوه المنطقة الصناعية ...وعندما "ينفخ" المؤذن على الميكرفون بصوت تهتز له اركان الحلة: كان ابوى يقول ليه: الضهر مش؟؟ خلاص حنصليه مافى داعى تتمها..

وعلى ذكر الاصوات ..ياسر اخوى صوتو اجش ولما يزعل يزيد جشاشة فيسمعه ابوى ويقول: ولدى ده لما يزعل صوتو ببقى زى "كرد الحوض" ..ههه فى التشبيهات دى كان ابوى رباطابى مع انو دنقلاوى لما يشبه حاجة بحاجة تانية خلاص بكون قرضها...

اخخخخخخخخ ياحليلو..

مرة تبارك فى التلفون سالو: ابوى كيفك كيف صحتك

الحمدلله كيفكم انتو

وسالو تبارك تانى : كيف النظر؟

رد ابوى: لا النظر ده بقى another thing

وكان يضحك من عجزو ولما ما يقدر ياكل حاجه معينه يقول: دى بطن قدييييمة صرفوها لى من ما ولدونى لى حسه معاى

وكان يسخر من كونو لا يفقه اى شىء فى المطبخ ..ويقول لى عرفتوها كيف دى؟ لما يختو ده مع ده بطلع كده دى عرفتوها كيف؟؟ مرة كان فى بكا فى البيت والدنيا رمضان والناس كلها نايمه مرهقه على وش الصبح..انا صحيت بيه..لكن ما قمت..شفتو بتحاوم مابين الحوش..والمطبخ فى الاخر رجع اوضته..مشيت ليه قلت ليه داير حاجه قال لى كوز موية ..جبتو ليه: بدا يضحك فينى: انتو الموية دى بتجيبوها كيف"؟؟ الليلة قمت اتفولح اسقى روحى براى..مشيت التلاجات لقيتها مكنكشة تلج ادخل الكوز اسمع كع..مشيت الماسوره لقيتها قاطعه تقول حححححححححححح..رجعت التلاجة لقيت جردل فرحت دخلت فيه الكوز طلع "رجلة محشوشة" وسخت كوزى واحرجت نفسى ورجعت اوضتى...هاهاهاها

اجمل من يكتب رسالة ..ابوى

كان برسل لى جوابات بقروها فى الطابور



ويرتل القران ترتيلا..

بواصل

واصلى

ياسلام على طرافت والدك وسرعة بديهتة.
جعلتينى اضحك بشدة فى هذاالنهارالرمضانى الحار.

تماضر ام قلبا حاضر

ان شاء الله البركه فيكم يا رب وربنا يجعله من اصحاب اليمين الطيبين

حقيقي المني الخبر جداا ..وشلت هم احساسك

قريت البوست ده ونزل مني الهم تصدقي

تعرفي يا تماضر لما الوالد يكون صديق زي ما قلتي وزي ما عشت

يومو اليتقدم لينا في شارع الرحمه الواسعه بكون خلا لينا البنعيش بيهو

لامن نحصلو .. بكون ورانا السكه الصاح ..والمعني الصاح
والضحكه الصاح .. والبكره الصاح

وخلي لينا كم من الحكي نتحاكي بيهو لامن نتلاقي

عشنا مع اب جميل وحنين وحبوب وصاحب نكته

اصلو ما كشر فيهم ولا كورك فينا

الاب الذي ده بخلي معني الابوه جواك جميل خلاص وبكون دايما حاضر

حاضر فيك
وفي وليداتك
وفي افعالك ذاتها
وفي اللقب الجميل طبعا

وفي ضحكه طويله

وفي بكيه ليليه موحشه وتلومو علي الغياب

وبتموت ولا حتي تودع ساااااي


وكتبت اختي الحنينه البتعرفيها في فصل ما من كتاب ما اتمني ان يصدر يوما ما

وظل ابي حبيبي وصديقي ..هناك ..ينام في تلك الغفوه اللا نهائيه
بحيث كلما نقترب تهرب روحه منا ..وان احتضر والدي لعده ايام في المنزل
نحن لا نعرف الاحتضار ..لم يمت في بيتنا قبل ابي احد ..وبعده ..
اندراجيه ابي تحت اسم المرحوم شئ لا يخطر علي بالي او علي بال اخوتي الصغار ..
مات ابي بهدوء كانه لا يريد من احد شئ .. ولا يحب ان يزعج الاخرين ..
كان رجل فائق الهدوء وجميل من الداخل والخارج ..مكتمل الخضره ..طويل القامه
بشوش الوجه ..واضح السريره .. لطيف المعشر ..حسن النيه .. لا يغتاب احد ..
يمشي باقدامه .. ويكتب الشعر ومدهش القصص ..تزوج امي عن حب ..
يقدس ابي المراه ..ويعرف التعامل مع البنت والمراهقه والكتابه ..بلا شريك
ادين لابي بجميع كتاباتي ..(وداعا ابي الجميل ) هو عنوان هذا الملف بلا شريك
لابي في قلبي كاهم رجل في حياتي وحتي اموت .




تحياتي وهنيئا باللقب الما هين ولا لين
وربنا يرحمه ويعفو عنه وعنا جميعا بركه الشهر السمح ده

معليش شالتني هوشه الحزن ونسيت اقول ليك انو ابوك لذيذ لذاذه و حقيقي صاحب نكته جميله
واستمتعت بالحكاوي جدااا
شكرا يا تماضر لقرارك الجميل بالحكي

تماضر ..
لم يكن هناك حل آخر ..
لم يكن إلا ليكون كذلك : جميلا , أنيسا وارف الظل ..
....
سمعت عن أبيك الكثير , سوى أن السيره كانت دائما ما تغفل
لذاذاته وتنحو لعظمته ..
وكنت اشعر بانه لم يكن الا ليكون كذلك : جميلا أنيسا وارف الظل
وفيه لذاذه .

...
طلال

الأخت العزيزة تماضر
ياله من أب لطيف ، سابق لعصره ..
عليه سلام من الله ورحمة لا تبارح روضته الطاهرة ..
واصلي ..
عمر

تماضر

إنتثر دمعى حارّاً يبكى أبانا شيخ الدين جعله الله من أصحاب النعيم ، وهاهو نفس الدمع يتساقط هنا مزيجاً من أحاسيس لاأجد لها ترجمةً .. اللهم أجعل قبره روضةً من رياض الجنّة .


تحياتى للأخت عشّة ولكل الأسرة



ـــــــــــــــــــــــــــــــــــــ
[email protected]

الزولة بحق

تماضر

ألمني الخبر

واسفة لاجلكم ...

حاولت الاتصال بعشة تلفونها مابرد

وتحصلت علي رغم تلفون من ايهاب الطيب لمهاتفتك ايضا لم انجح في

الوصول ليك...

تعازي الحارة لشخصك وعشة وتبارك ورشا واميمة والصادق وعفاف وبقية الاسرة

زما في الايد غير حبال الصبر تتمدّ

مع ودئ

تماضر :

انا أسف .,

هذا الرجل وسيم وبقامه عطره - هكذا يحي ناس امدرمان- وانتي طبعاً تعلمين حُبي الشديد لجنابك وما يحيط بك ولأمك وابيك وقلبك وما عليه , ليس لدي ما اكتبه سوي اني أعلم طعم كهذا , لذا أسف جداً

...
...

هذي الكتابة عن الراجل الدُنيا ده جعلت من حُبي لكم شيئاً يمشي , وصبت علي حُزني الشديد شيئاً يشبه الأنفة والكبرياء

,

أنا قرمبوز ياتماضر مازلت احبك رغمأً عن ان تصاريف الزمان ؛
,

ضحكت من اخر مكان بداخلي ثمُ ...

,

تعاذي الساخنة للبنات والاولاد علي جدهم العظيم (فعلاً) وسلام حار

,

اللذيذة تماضر

Quote: كان يستانس الفنان محمد الامين والفنان ابو عركى ويستانسونه ومحمد ادم المنصورى وهاشم صديق وفتح الرحمن عبد العزيز واصدقائى فرقة الاصدقاء ويتبادل معهم "السربعات"

عاد يا أخوانا شوف عيني وما شئ قالوهو لي ما حصل شفت عم شيخ الدين الله يرحمه قاعد ولا راقد ولا واقف إلاّ ولذاذتو جنبو
فعشقناه جميعنا وأحببناه وكنا نرتاح في بيت ناس تماضر وحقيقة في هذا البيت يصعب التعرف على دا ود فاطنة ولا ود علوية .. دي بت فاطنة ولا بت علوية فهذا الأديب الأريب الفنان المبدع المرحوم شيخ الدين جبريل أحمد بجانب فنه وعبقريته أهدى السودان (لذاذات) أكباده
تماضر الصادق هشام عفاف الوافر تبارك المقداد أميمة رشا ووووو
اللهم ربي تقبله قبولاً حسناً

Quote: اللذيذة تماضر Quote: كان يستانس الفنان محمد الامين والفنان ابو عركى ويستانسونه ومحمد ادم المنصورى وهاشم صديق وفتح الرحمن عبد العزيز واصدقائى فرقة الاصدقاء ويتبادل معهم "السربعات" عاد يا أخوانا شوف عيني وما شئ قالوهو لي ما حصل شفت عم شيخ الدين الله يرحمه قاعد ولا راقد ولا واقف إلاّ ولذاذتو جنبو فعشقناه جميعنا وأحببناه وكنا نرتاح في بيت ناس تماضر وحقيقة في هذا البيت يصعب التعرف على دا ود فاطنة ولا ود علوية .. دي بت فاطنة ولا بت علوية فهذا الأديب الأريب الفنان المبدع المرحوم شيخ الدين جبريل أحمد بجانب فنه وعبقريته أهدى السودان (لذاذات) أكباده تماضر الصادق هشام عفاف الوافر تبارك المقداد أميمة رشا ووووو اللهم ربي تقبله قبولاً حسناً

بدرالدين وتماضر
ما خليتو شي عشات يتقال
فجيعتكم بمساحة مليون مربع
جني

Quote: اللذيذة تماضر Quote: كان يستانس الفنان محمد الامين والفنان ابو عركى ويستانسونه ومحمد ادم المنصورى وهاشم صديق وفتح الرحمن عبد العزيز واصدقائى فرقة الاصدقاء ويتبادل معهم "السربعات" عاد يا أخوانا شوف عيني وما شئ قالوهو لي ما حصل شفت عم شيخ الدين الله يرحمه قاعد ولا راقد ولا واقف إلاّ ولذاذتو جنبو فعشقناه جميعنا وأحببناه وكنا نرتاح في بيت ناس تماضر وحقيقة في هذا البيت يصعب التعرف على دا ود فاطنة ولا ود علوية .. دي بت فاطنة ولا بت علوية فهذا الأديب الأريب الفنان المبدع المرحوم شيخ الدين جبريل أحمد بجانب فنه وعبقريته أهدى السودان (لذاذات) أكباده تماضر الصادق هشام عفاف الوافر تبارك المقداد أميمة رشا ووووو اللهم ربي تقبله قبولاً حسناً

بدرالدين وتماضر
ما خليتو شي عشات يتقال
فجيعتكم بمساحة مليون مربع
جني

What a beautiful people... Your father(May Alah's mercy enfolds him) and you. Many Thanks and prayers for him, you and the family

7ileely ana alma 3irifto 2ila hassa
Saad

Quote: كان ديمقراطيا بمعنى الكلمة يتعلم من الطفل ويعلمه ومن الكبير والبعيد والقريب..

وهكذا دائما شأن المربي الحق . طالب علم من المهد إلى اللحد . اللهم تقبل الاستاذ الجليل الشيخ / شيخ الدين القبول الحسن وأكرم نزله يا الله .

Quote: تماضر ام قلبا حاضر

سرد جميل للغاية واصلى حتى نتعلم كيفية التعامل مع الآخرين
من ابونا رحمته الله عليه شيخ الدين جبريل

حبى وتقديرى
السمؤل

ضحكتة يا تماضر لمن ضحكتي انقلبت بكية حقيقية ، واتذكرت كل ظرائف عم شيخ الدين هذا الرجل الشفيف ذو النكتة الحاضرة ، الذي ما ان يقع عليه بصرك حتى يطير قلبك من الفرح ، وليس من الخوف شأن معظم الاباء الذين عادة لا يرحبون باصدقاء ابنائهم وبناتهم لاعتبارات وسواسية لكن هذا الرجل كان ابو الكل ابونا كلنا ، فاذا ذهبت السابعة ولم يحالفك الحظ بلقاء هذا الانسان فاعلم ان زيارتك ناقصة وبلا طعم ولا بد ان تعيد الزيارة ، ومن عاداته ان يتعرف علىك ويخصص لك ركن في قلبه فتحس دائما انك خاص ومميز لديه ، ايام كنا في الداخلية في العمارات كنا نحرص ان نذهب اليهم كل خميس حيث يكون هناك وليمة جاهزة وحلة كبيرة من الرز باللبن بمناسة ختمه القران ، ولقد كان خلقه القران فهو يتعامل مع الدين كمصدر للسعادة للاخذ والعطاء في هذه الفانية ،لا يخنق به البشر ولا يتعالى عليهم ، هذا الرجل الحكيم الذي كان يتعايش مع اولاده في من يمة فاطنة ويمة علوية في هدؤ وسعادة وعدل ، وهو وسطهم دائمافي غرفته التى تقع وسط المنزل ، ولزواج عم شيخ الدين قصة فهو لم يتزوج من اجل متعة فانية بل الظروف والعادات هي التى اجبرته ، وانا بقول كدا عشان ما عينكم تطير يا ناس بدر الدين ، فقد تزوج بعد ان باءت محاولاته بالفشل لاقناع ام زوجته حتى تترك بنتها ترحل مع زوجها حيث كان يعمل ، وين دي اسألو منها تماضر ، افتكر القضارف ، فقد كان معلما ولذلك تزوج ام حبيبتي تماضر لانو زوجتو الاولى لم يستطيع ان ينقلهامعه وهو رجل متنقل ،وفي ذاك الزمن لا بد له من يشاركه الحياة خاصة انه رجل كريم مضياف ومربي فلابد ان يكون متزوج فالزواج نص الدين والمجتمع حتما لايرحم العزابة ليوم الليلة .
كان يحب بناتو واولادو جميعا بس لتماضر ام قلبا حاضر ، كان نصيب الاسد وحين يتناقش معها في شئ وتعاند ست الكل كان يزعل منها شوية واكيد زعلة مفتعلة لانو لا يستطيع ان يغضب منها ابدا فكان يقول ليها ( اعمل ليك شنو انتي ما بتتحبي با بت الكلب ) طبعا من فرقة اولاد الكلب ، وما زالت تماضر تعاني بسبب هذه الشامة ، اقصد شامة الريدة فلانها محبوبة تتعرض لمشاكل بسبب الغيرة والحسد ، وعم شيخ الدين ورث هذه الروح وحب الخلق لاولادو لكن بصفة خاصة لتماضر ام قلبا حاضر ، وورثها الكرم ، فانت اذا كنت مفلس تتدهب بزقاقات الحيشان وتتلفت عشان تلقى ليك دين فتكون محظوظ اذا التقتك الخنساء ، فهي حتما ما حدينك لكن حتعاين ليك في وشك وتضحك من غير ان تسألها : وتقول ليك عارفاك مفلسة واعلم ان نص ما قبضته من شباك الاذاعة تحول اليك ليس دينا بل هبة قلبية مصحوبة بالفرح ،( تماضر يوم شكرك ما يجي )،
،اذكر انه عندما كنا في الداخلية تما ضر الوحيدة العندها دفتر وحساب عند دكان اليماني ، اي واحده عندها الحق ان تاخذ الدفتر وتتدين على حساب تماضر ما في زول جيعان وتماضر جمبو سامعين ،رغم ان الجميع عندهم اعانات بس الاعانة بتخلص لكن تماضر موجوده ، فمن اي طينة انتم يا ال شيخ الدين غير هذا الرجل الصالح .
والمحظوظ من جاء ببنت او ولد وطلب من هذا الانسان ان يسمي له ولده او بنته فاكاد اقول بان كل اولا د شيخ الدين يتركون هذا العبء لهذا الرجل الذواقة ، فلكل اسم عنده معنى وايقاع ومناسبة وعندكم تماضر الخنساء واولادها ،( سارية وسيرين) ، وتبارك والوافر والمصباح والخ.. المنظومة . لله درك يا عم شيخ الدين فانك لم تمت بل تعيش في وجدان ابناءك وبناتك ومحبيك .

الله يرحمه
والله الجابكم ده ما زول هين

الأستاذه الفاضله تماضر شيخ الدين

والدك بحر من اللطف والجمال رحمه الله وصبرك على هذا الفقد

ومن لذاذات ابوى شيخ الدين ..ذات مرة ابوعبيدة شيخ الدين طول ما مشى السودان وكان قد انجب ابنه الاول الجراح( وهذا الاسم من اختراعات
ابوى شيخ الدين) وابوعبيدة اتصل بالسودان ليبشر ابوى شيخ الدين
بان اولاده سوف يحضرون للسودان بعد هذه الغيبة وفرح ابوى شيخ الدين
وقال ليه جميل يا ابوعبيدة وعشان نشوف الجراح ..فرد ابوعبيدة وهو
يريد ان يطلق المفاجأة...ومعهم ابوهم..فرد ابوى شيخ الدين ..ابيهم يا ابوعبيدة...مع دى تجرك انت وجدة بتاعتك...فانهى ابوعبيدة المكالمة وبسخريته المعتادة قال: ابوى ده بى العربى الكتير ده ولا بخليك تشتهيه.......... رحم الله ابوى شيخ الدين فقد كان انسانا لماحا
وجميلا وعظيما..والبركة فيكم اخوانى اولاد الشيخ،،،

حبيب قلبي صديق الموج
سلام ورمضان كريم
أنا من زمان بريدك وبعد شفتك في التلفزيون ريدتي زادت وشوق دفق وبالله عليك ما تغيب

ومرة جاء تبارك يحمل "جك" ماء فى يده..فقال هو: تيارك الذى بيده الجك..
كان يخلط اسماء ابنائه " الاولاد بس" ..واخيرا قرر ان "يتحل" من هذه الورطة فصار يصيح لمن يعبر" جعفر! يا جعفر..فيلتفت الواحد ويقول: معاى انا؟
يرد ابى: اى انت مش ولدى؟ اولادى كلهم بقى اسمهم جعفر
العزيزه تماضر
البركه فيكم مرة أخرى، وكم هوجميل وممتع ماكتبتى عن والدك .. عجبنى سردك لطرائفه وبغرت حقيقى من ذلك الجوء الاسرى الجميل الذى عشتوه مع والدكم ، رحمه الله
اخترت الجزء اعلاه من سردك لانه ذكرنى بالوالد اطال الله فى عمره فقد كان لايفرق بينى وبين اختى الاصغر منى ، لمن يشوف واحده فينى يقول ليها انتى ياتى ..
حقيقى ابائنا السودانيين متشابهيين فى الكثير من الصفات والطباع.
الرحمه والمغفره لوالدك الجليل الذى ربى وعلم وقام بدوره كامل
تحياتى

قلبي معكم يا تماضر ..

Quote: حبيب قلبي صديق الموج سلام ورمضان كريم أنا من زمان بريدك وبعد شفتك في التلفزيون ريدتي زادت وشوق دفق وبالله عليك ما تغيب

تماضر عن اذنك سحبه فى بوستك ده اصلوا بدر السمح انا بريدو وما بفوتو اينما (حله)

انت يا السمح يحبك الله ورمضان كريم( وكغزال)....وكتر خيرك الشفتنى فى التلفزيون
وانت اول بوردابى يطمنى..بالله شفتنى وانا متلفز وعلى راى عادل امام اقنن وانا متلفز
تسلم يا زول يا سمح،،،

يا سلام يا تماضر

بالله عليك ما تحرمينا من باقي إضاءات هذا الرجل الجميل ..وجميل حياكتك ...

اللة يرحمة و يحسن الية
ويصبرك علا ما اصابك....
لكن....
الوالد اكد لي مسات قدق السربعات....
ياخ تبرك الزى بيدة الجك؟؟؟؟
واللة انا وقعت من الكرسي من الضحك....
اللة يرحمة
صحي يزهب الانسان و تبقي الزكري الطيبة

تماضر .....واصلى دون توقف ....

بس طالبك زيارة صور إفطار بورداب الخرطوم (1)

فى ناس بتسأل عنك ...هناك

تعيشى وتفتكرى

تماضضضضر
ناس امدرمان بيقولو
ونسى
عليك الله ونسى وقولى
فلك والد نحن ابناؤه لانه ورث حب الجمال فينا
فلا تحرمينا
من لذاذات ابونا
سلام

فوووووووووووووووووووق

Quote: ابوى كان لذيذ

انا مستمتع بالحكي
عليك الله واصلي
و كان غلبك بزكرك شويه من السمعتهم

my
keyboard
is
not
good
sorry

لأول مرة يا تماضر حنفرح بالرحيل
من حقنا نفخر بيه لو كان باللذاذة دي
من حقنا نكتشف طعومة الفراق ... ودهشة الموت
أحيي الزكرة الطازجة ويللا نغني
و ياريت نكون بحجم حزنك زي ما كنتي بحجم فرحنا

تماضر
هذا الذى انجبكم/ن لا بد و ان يكون كماسردت
له الرحمة و المغفرة

ارجو ان تواصلى

Quote: لذاذات ابوى ...أو عشق الانسان الكونى

غاليتنا تماضر
بأبيه تشبه عدي في الكرم......و من شابه اباه فما ظلم

عرفتك طيبةالقلب كريمة الاصل و عرفت والدك طيب الله ثراه من خلالك تحملين صورته وانا اقول من اين لك هذه اللوحه الفنيه, سيبكي علي والدك جيله ويبكيه جيلنا والجيل القادم بفقدان رمز من رموز التعليم في بلادي ,,,,,,,,, تماضر...قفي شامخه.. ولا تبكي..فما رحل أبوك إلا وهو رافع هامته.

كان راجل ما ساهل يا أختنا تماضر ربنا يرحمه ويغفر له..كلنا أصابنا الحزن العميم.. سلام على روحه الطاهرة في الطاهرين والخالدين..
صديق منصوري

Quote: my keyboard is not good sorry

ولاحدى ما يبقى قوود ..اها فوووووووووووووووووووووق

صحوت هذا الصباح وانا اتذكر صباحاته المنعشة

كان يصحو فى الصباح الباكر وقبل خروج الضوء الابيض من الاسود ..يحلق ذقنه ويتعطر بالكولونيا الشبراويشى ويلبس جلبابا نظيفا ويصلى الصبح ويبدأ فى مداعباتنا ... وكثيرا ما يكون فى ذهنه بيت شعر او اية قرانية او فكرة فلسفيه يؤنس بها من يحضر له شاى الصباح او يغير له ملاءات الغرفة او امهاتنا ...فقد كان يفلح فى شرح المستعصى.. وجو الغرفة المنعش وصوته الدافىء وكلماته الراقية المنتقاة جزيرة معزولة فى خضم بحر حياة اهل المنزل..فكلنا يشكو الا هو وادع مطمئن يدخل الى صباحاتنا كشعاع شمس الصباح دافئا ومبشرا بجمال الحياة..


عطره عطره ...

كان "شماما" بدرجة ملفته للنظر..يشتم رائحة كل شىء ويوصفه ..حتى نحتار..حتى الخلفية السيكولوجية لصانعه "يشمها"..
فاذا شم رائحة البن يقول قهوة مرة ميقنه..او شاى سيد مطعم فى السوق الشغبى ...او "كسرة حبوبات"
واذا شنف القهوة يقول "زى موية الحبال"

قال لى مرة: الجماعة ديل ما بشغلونى كلب بوليسى؟؟

ولما ضاع "نادر" وجاءت امه تولول نصحها بابلاغ البوليس فلم تستمع وانما "جرت" مع احدى نساء الحى الى "فكى" وهو مبهوط من الفكرة وعندما عادت كادت تصاب بالاغماء لان "الفكى" قال لها بعد ان فتح الكتاب، " نجمو افل" قال ليها "ده كلام فارغ" "انا بستغرب الفكى ده لمن يفتح الكتاب بفتح صفحة كم؟"...وعاد نادر وظلت "صفحة كم؟" سؤالا معلقا..بيننا حتى اليوم..

ياحليلو

كان يحضر المغرب الى الساحة الكبيرة حيث "يتلملم كل الناس..الجيران والضيوف وناس البيت ...وتوزع كبايات شتى المغرب..مع نسيم المغارب الجميل ..وكان هنالك برنامج تلفزيونى "قمىء" لا يحبه ابى " ولا اى زول اظن" وعندما يأتى هذا البرنامج كان يشعر "ابشقاق" قال لى انه كان سعيدا بكباية الشاى حتى "اكسد" البرنامج سعادته...وظل يردد: انا بيك سعادتى مؤكسدة..."الاغنية" وكان جميلا...

ياحليلو

عندما يتوقف التلفزيون عن البث فجأة وتظهر صورة "منظر طبيعى" كان ابى يقول: فعلا منظر طبيعى ...التلفزيون يقطع وتجى صورة..

ولما كان اخوتى الشباب يأتون للجلوس فى العناقريب المفرشة ..يجىء ابى ويبدأ نقد تصرفاتهم ...صاروا يتسللون واحدا بعد الاخر.."زوغانا" من النقد العلنى ..لهم..

فصار ابى يجىء من غرفته وهو يصيح قبل ان يظهر: البف باف جاكم يللا اجروا..

فصاروا يضحكون ...ويضحك الجميع ... ولا يزوغون..


ياحليلو...

سأعود...

ايوه يا خدر ساعدنى..

ويا عشة مبارك يا حليلهم ويا حليلك..وياحليل الايام الطيبة..

القراء والمشاركين الافاضل...

لا تدرون معنى العزاء الذى اغدقتمونا به واثره العميق فى تخفيف مصابنا وفى مبلغ ايماننا بالقضاء و رضائنا بالقدر..

ستظل هذه الذكرى الحزينة لنا مرتبطة كل الارتباط بما فعلتم تجاهنا وكل مشاركاتكم لنا جاءت موضع تقدير واجلال..


ساواصل..

وعندما اجد الوقت الكافى ساخصكم بالرد المباشر..على مساهماتكم القيمة..

دعونى اواصل هذا التداعى الحزين...

كم احب هذا الرجل

الأستاذه العزيزه / تماضر ، رمضان كريم
وبعد ان عدت ليال حالكه ، أجد فى أبيك الكثير مما كان فى أبى وقد كان صديقى بحق وحقيقه.
ولا نبعد عنكم كثيرا فنحن فى الأولى وأنتم فى السابعه.
دخل مسجد انصار السنه مرة واحدة فى عام 1963 يوم جمعه فصادف الأمر ان كان امام المسجد (ابوزيد) -هداه الله- كان يصيح بصوت عال (أنت يا القاعد هناك وخالى بنتك تمشى الكوفير ... انت يامغفل ...يا ...).
فلم يدخل مسجده من حينها واصبح يشد الرحال الى مسجد (الختميه) أو مسجد الشيخ/ وراق (بالحارة الرابعه)، وكان يقول لى : كيف يصلى هؤلاء الناس مع رجل يشتمهم؟؟؟
وبعد انقلاب مايو ، وحينما يتحدث (النميرى) عن (العهد البائد)، كان يلتفت نحوى ويقول لى (العهد البائد ده نحنا) فقد كان ختميا واتحاديا.
وخلال حكم النميرى كذلك ، كان الناس يتحدثون عن سوء الحكومه فى كل جوانب الحياة ، مويه مقطوعه ، ورغيف معدوم وطوابير بنزين ... الخ
فى مرة كنا نجلس على برنده بداخل المنزل ، فجأة تعكر الجو وقامت (هبوب) عينه واصبح الجو ساخنا وتبعه انقطاع للكهرباء، فما كان من الوالد والجميع فى لحظة صمت وغضب ان قال (دى حكومه دى)؟؟؟
فضحكنا حتى سالت دموعنا.
أستاذتى تماضر هم أعزاء علينا لكنهم ليسوا بكثيرين على خالقهم، ولا اشك فى انهم احسن حالا مما كانوا هنا،( فى برذخهم ينعمون) بقدر ما اعطوا لأهلهم ومعارفهم ووطنهم.
وطالما كان شفيعهم محمد فلا خشية عليهم ولا هم يحزنون.

كان لما يفلس وتكتر ديونه بسمى روحو: شيك الدين "الاستدانة مش العقيدة"


مرة ضرب تلفون من السعودية بعد الحج واا رفعت السماعة..بعد السلام والكلام قالى: انا حسى ضارب ليك من تلفون عربية

قلت ليه انا برد ليك من تلفون طيارة ...قالى:

يا بت خلى الطيارة!


مرة كنت عيانة وعندى الم فى البطن شديد...ببكى ...وهو قاعد جنبى ...قلت ليه: انا بكون عندى سرطان...
ما علق..

الصباح لما صحيت من النوم اصبحت كويسة وهو جه صبح على: اها اصبحتى كيف من سرطان امبارح

Quote: انا بستغرب الفكى ده لمن يفتح الكتاب بفتح صفحة كم؟

صينية الكوميديا دي كان بمرق بيها على الجيران ولا بياكلها معاكم إنتو بس؟؟؟

ليست صدفة اذن أن بكم لذاذة ااات ..

تماضر:
قلنا نرفع البوست الرائع دا...

عشان اكون في الصفحات الامامية,,

لغاية ما تجي تماضر:

ايهاب ... هل أنت ايهاب ود معمار ج السودان؟



والبوست لعناية آخرين لم يتطلعوا عليه بعد ..






لكم الود

ما أروعه يا تماضر وأروعك

فلا غرو إذن
أن كل هذه الأشبال
من ذاك الأسد

رحمه الله رحمة واسعة وأحسن إليه

وبسم الله ما شاء الله ربنا يحفظكم جميعاً

فوووووووووووووووووووووووق