باب مشكلـــــــــــتك

عزيزتى امل

انا كائن هلامى

انتمى الى بلد غريب



ألسنة الناس فيه من سكاكين صدئة

العين فيه تعلو على الحاجب

الموية فيه لا تكضب الغطاس

والنار فيه لا تولد من شرار


احلامه تموت فى وضح النهار



حاولت ان انفضه فلم استطع

قولى لى بربك ماذا افعل

المعذبة

سين واو دال نون

العزيزه تماضر

كدا الدنيا اتشغلبت عندك خالص


مزيدا من التفاؤل مزيدا من الابداع فانتي رائعه ......لك كل المنا بتقديم المزيد من اجل وطن سعيد









جمال عبدالرحمن
--------------
وارموا لقداااام

ألذ حاجة يا هوبليس

انى بكتب لعزيزتى امل

ويرد على زول فاقد لكل الامل


شكرا يا جمال

الدنيا دى انا بعرف اعافرها

بس مرات بتهزمنى

وبحزن

الاخت تماضر


يبدو انك مسكونة بالاحلام

لا توجد في ساحات بلادك آمال

أمل) المسكينة قد ذبحت)
وصفحة مشكلتك لا يقرأها الكيزان

وطنك مثل السكران
يصحو من غفوته
ليعاود ما كان

وطنك سيدتي
باع دماغه
طرد رجاله
واجاع النسوان

زول واحد

امل دى حتى لو ماتت
اسمها فى

تعال نسند بعض ،ونحيا ليها

تماضر
أرجو أن تسمحوا لي بالتغريد خارج النص كعهدي ، فبمناسبة موضوع العين ما بتعلا على الحاجب أرجو أن أوضح حقيقة مفادها أن أولاد الإشلاق حفظهم الله قد أثبتوا عكس ذلك عندما يقلبوا الهوبة في أى حيطه وبي كده العين تعلا على الحاجب والجبهة والرأس زاتو.
وما تقولي ما عندي مشاكل فهذا الباب معاي في السلك وبشكي ليكم بس خلوني أفكر أبدأ من وين.

زمان ود عمى كان صغير وهلالابى

بعدين كان فى مباراة حامية جدا بين الهلال والمريخ ، المريخ غلب الهلال


بس هو قاعد يبكى ويبكى ويعزى والدموع والمخاخيت واللواقة ، الا يقلبوهو مريخابى

بس ابوه لمن زهج منو ، شالو رقدو فى السرير وقلبو هوبة

وقاليهو خلاص انت بقيت مريخابى

فرحااااان بقى مريخابى ، حسه معرس وبى بتو ، فرحان ومريخابى

دى بمناسبة اولاد الاشلاق البقلبوا الهوبة يا ملة عمر


وانت مساهماتك ظريفة كدة ليه؟؟؟؟

بسم الله الرحمن الرحيم

أنا المواطن م.ع

أنا المحيرني دائماً المواطن بكون م.ع

زي السجل التجاري للشركات القابضة مع إني ما عارفها قابضة شنو؟ .. تكون قابضة السوق ياربي؟

أعاني من فراق زوجتي وأولادي بعامل الفلس وضعف السيرفر والحرب على العراق وإزدحام السيارات في خارطة الطريق .. فأرجو من ذوي القلوب الرحيمة المساعدة ..

تماضر
سين ...دال دى منو
أكيد ما انتى

خبرناك ,,,تنتمى لوطن ..تعلمنا كيف نحبه منك وامثالك
وطن ,,رسمتى ملامحه واخذ منك والرائعين الشرفاء اسباب جماله
انت فنانة ,,,وللفنان مسؤلية كبيرة تجاه الوطن وقضاياه
ماذا يفعل الاخرين ؟؟؟ ان علم لك الاحباط طريق .......وباب كباب مشكلتك هذا
ابدعى فينا و ما اخرصك اى حصحاص

الملا عمر
بعد التحية طبعا ...انا عرفت اولاد الاشلاق ....والجبهة والراس ..والعين والحاجب ديل اصلى عارفهم
والهوبة فعلا ...اكتشافك
لكن الحيطة دى منو ما عرفتها
وللكم محبتى
إيمـــا

ايما انتى خجلتينى

من احباطى
والله

وشكرا على كلماتك البترفع الحنك والراس

وبتخلى الزول يستقيل من الهزيمة وينتعش


شكرا يا حبيبة القسا

عزيزى ع.أ.


تلمست من معاناتك انك تنتمى الى بلد معشكب ، واهلو مجدعين ، ومبشتنين ، ومشتتين

لى سؤال واحد ، هل تستعملوا كلمة شتات كتير فى بلدكم دى؟؟؟

اذا الاجابة نعم فلقد استشرت دكتور مظاهر اسماعيل الانتفاضى

واداك النصيحة التالية

مظاهرة تلاتة مرات يوميا

بمبان بين الوجبات

ومنشور كل صباح قبل ما تفك الريق

اذا استعملت معاها البخرات ، من جمعية حقوق الانسان

فحيتلم شملكم قريب دة

والحبة ما بتجيك


وانت دحين ما من الكاملين؟؟؟؟

المواطن ي .ز
مصاب بانفلونزا الوجع السائل
امو تتوحم على طين البحر
قبال تقابل والدو صدفة على الطريق...
مجغمص ومعكلت منتوح بالغبار
معكز ملكز وخاطرو احتمال...
يعانى من فقد الاضلع الاربعة من الاتجاهات المعروفة
مشروق ومشنوق
ولسه بعاف

المواطن زاى

انت بقيت مواطن ازاى؟؟؟


انت تاكل الباذنجان الفلسفى ، مع تحول الغابات الى بحار

وتشرب من نبع الحنان


وتبقى عشرة على المبادى

ساح باح

تلانفلونزا تروح

وتانى ما تتحاوم بالليل بعد حظر التجول

سلامات يا تماضر
إعتكفت الصمت منذ فترة لكن لقيت بابك دا و جيت داخل و كان لحقتا جبت معاي مشكلتي والله إلا تفتحوا الضلفتين و تكسروا المسطبة و في إحتمال كبير جدآ تحتاجي تكلمي ناس الإدارة إجوا إزحوا العامود دا من هنا
شوفتي كيف حالتي صعبة لكن متوسم فيك الخير

انا يا ستي بعاني من إنبعاج في الشعور
و ما عارف اصلآ بداية القصة شنو نفسي ضايعة مني و كل ما اقول افتش عليها بفشل احدد الإتجاهات ومرات مرات بلمحها بي وراي و كل ما اتلفت وراي انا بضيع اكتر و دا ببساطة لانه كل ما اتلفت الزمن بمر بسرعة و ـالسرعة ضارباني في الزمن ـ عشان كدا 0المسافة0 بيني و بين نفسي بتزيد زي ما تقولي كدا وصلتا مرحلة السهل الممتنع لانه سهل جدآ اتلفت لكن ممتنع او ممنوع من الوصول ؛ فكرتا اصيع بس عشان احدد لي إتجاه؛ ناس الخبرة قالوا لي ما بتنفع معانا قالوا انا مسييييك قبال توزيع الكشتينة زاتا وحا اخرب عليهم قوانين إتجاهاتم و حا أضيعم كلهم من صياعتم ورفضوني عشان كدا
الموضوع طويل قلتا إمكن اكون ضاربني داء سارس او قارص
لقيت إنه للأسف إتجاه حظي نمطي جدآ وما ممكن إكون الداء الجديد
اها باقي ليك بلقا لي حل عندك لمشكلة إنبعاجي الشعوري دا ؟


تحياتي
and waiting

ورووووورك


حولنا مشكلتكلاستاذ الفسيولوجى ، والمعمار

زحوا العمود ، وبكوا ، ونادوا وداعية ، وكوركت وروروووووك

برضو ما فهموا حاجة

المهم فى الآخر لقوا فكى قااااااصع

قال بس اسالوه لى السؤال دة وانا بحل ليه المشكلة


يابن العم ماهيتك كم؟؟؟؟

رسل لينا الاجابة وحنكون سعيدين نساعدك

بعدو؟؟

تمر الشمال
انتي بفنك بترسملينا الامل المشرق والتفائل الجميل ونشوف فى اعمالكم احلامنا ومستقبلنا وانتى تقولى كدة ؟؟
لاياتمر الشمال عمر العين ما تعلو على الحاجب
كل مافى الامر ياتماضر دىعين حاسدة وغريبة بكرة بترجع محل ماجات بس دايرليها دعوة من الاعماق وتسلمى يا تمر الشمال

Massoub:

اها دى الحاجات البتجننى

تمر الشمال

انا يسمونى الاسم الحلو دة كلو؟؟؟؟


الله عليك ياخ


وزعلة وبتروح ، الكلام الحزن ، البروحوا شنو؟؟

عز يزتى امل
انا مواطنة بكامل قواها العقلية سافرت من بلدها وهسي اتجرست
والغربة كتلتها وزهجااااااااانة
واعانى من الحنين
اها

قولكم شنو

المعذبة هالة قوتة

لو كنت بكامل قواك العقلية ...لما هاجرت

اعملى ألعاب قوى عقلية ... ورفع اثقال معاناة فى ميادين الشتات الجنبكم

بتتعافى

وبالله وافينى بآخر اخبارك

انا شفت ناس ظالمين كتير

إنه وطــــــــــــــــن جميــــــــل
رغـم التناقــــــض في أزقتــــــه
ولكــن كيــف يمكن أن أعــود
إلى الســــماء ؟!
فأنا غريـــب عن دمـــــــي
إنــــــــي غريــب


الصادق الرضي

الرائعة وست الكل تماضر
يبكي الوطن وهو يتكئ على دفاتر الأمل
فياترى إلى متى سنظل غرباء

استاذ عاطف عبد الله

وهل نحن حقا غرباء؟؟؟

الوطن يكبر فينا كل يوم

يمتطى العصب ويعشعش تحت المسام



نحن بعاد بس

شكرا على الصادق الرضى

الباب دا ..... 1

رائحة الامنيات
لحظات الانتقال
و صمت الذكريات

ما هكذا تقتلع الامسيات

ما هكذا تصنع افراح الغربة
و الانحنائات
بل هكذا .. ينبع الفرح النهائى
و تنداح الذكريات

من قلب آهات الامهات
.. من ابتسامات الاطفال الجياع
من شرود المقاتلين
ومن رحيق الاخـضـرار

من عشق الحياة يا تماضر
و ايضا من لقاءات المنافى
و حتى النخاع
اهديك ياسمينة
و وردة سمـراء

اسامة الخاتم يا عزيز

وصلنى الياسمين

وعليه اشكرك

وضعته فى فاظة القلب...ونثرت عليه التمنى والاناشيد المعبقة برائحة الطين والتضحيات

وصببت عليه الماء صبا

وينبوعا من الدمع


ولا افقد شىء سوى الوطن

ورؤيته الغالية

!!!!!!!!وانا

تماضــــــر
تحياتي وودي

Quote: عبثا ما أكتب سيدتي إحساسي أكبر من لغتي وشعوري نحوك يتخطى صوتي .. يتحطى حنجرتي عبثا ما أكتب .. ما دامت كلماتي .. أوسع من شفتي أكرهها كل كتاباتي مشكلتي أنكِ مشكلتي نزار قباني

دا كلام نزار...وعارف حتقولي لى....دا نزار وعارفنو.. بس إنت مشكلتك شنو؟؟؟؟؟؟؟عشان كدا قبل ما تسألي أقطع عليك الطريق وأوريك مشكلتي....مشكلتي
هي أنك مشكلتي....نشوف حتحلي نفسك كيف...حتبقي زي الهيئات والحكومات البتحل نفسها وللا حتبقي زي حكومة الجماعه ما يحلنا منها إلا الحل بله....الشلاقه حتدخلنا في السياسه..عشان كدا خلينا نغير الموضوع بي حاجه تانيه فيها فايده...عارفه أنا زي الغبش الطيبين البرددوا الهتاف وراء الجماعه وما عارفين معناهو شنو....هسع أنا قلت يحلنا الحل بله وما عارف بله دا حلوهو من شنو...وكدا يبقي عندي مشكلتين عاوزات الحل...مشكلتك الياها مشكلتي..ومشكلتي مع بله الما عارف مشكلته الإتحل منها كانت شنو..وبرضو في مشكلة تالته ودي كبيره خلاص...مشكلة العازه ومحمد أحمد....عندك ليها حل؟؟؟؟؟

الزاكي

نايل ون

مشكلتك انا؟؟؟

وانا ما رسلت ليك مساهمات الشهور الفاتوا كلهم

بس عشان حسة مضيوفة وما قادرة احك راسى؟؟

يا جماعة انتو ما عندكم عشرة كدة ليه؟؟؟ انا بكلم ليك البعرفوا ليك... وحمدو فى بطنو

اما بلة دة

فهوراجل اخونا بحق

ومرة بى مشاكل هجرة والكفيل رفض يجدد ليهو الاقامة وهددوا بالسجن وجة صلاح ادريس عمل ليه عقد عمل فى شركه تانية واتحل

بس...مشكلة عادية وحلها اتهون

مش زى مشاكلكم انتو،

مع تحيات بلة

ميادة..

انتى مالك؟؟
ما عنك مشكلة

مالك
ما سمحة ورزينة

ابعدى من المشاكل وبتطيبى

لك باقة حب

العزيزة تماضر
سلاما و احتراما

حلم

حلمكَ أن تبنى بيتاً
من لبِنٍ
و تعيشُ سلاماً
و وئامْ
ضدك يستأجرُ أضغاثاً
تهدمُ تلك الأحلامْ
نَمْ
فى نومك
و احلم
ما أقسى أن تشتجر الأحلام

الطيب برير ود جيراننا المبدع

كل ما اقرا ليك شعر اتاكد انك مبدع

قريت كلماتك للحولى من فرط الانفراط

لك القلب والدهشة

ياتماضر يا حلالة المشاكل كدي حلي لي المشكلة دي المشكلة في مشكيلة والقدية في كوكه وكده تكوني حليتي مشكلة المشاكل كان في واحد صحبي نعمل في مكتب ترجمة كلما يجي داخل المكتب يسلم ويقول والله مشكلة استفسر منو اقوليهو المشكلة شنو عشان نحاول نحلها يقولي مافي مشكلة طيب مالك داوشنه كل يوم مشكلة مشكلة ياراجل نحنا ناقصين مشاكل شفتي كيف المشكلة دي مشكلة ازاي

عزيزتي امل
ابكي لامن تتفشي ..
والله البكا دة لذيذ لذاذة
و اهديك طارق ابوعبيدة البكاااااااااااااي عشان يحرر البكا

ابكي .. البكا دة معناهو نحن ناس بنحب و بنحس و بنبكي كمان
اها شنو ليك

الفاتح يس

ذكرتنى شادية مغازى

قالت اخوها فى فريق كورة فى تندلتى كل يوم يغلبوهم...الكوتش يلمهم بعد الغلب ويقول ليهم

بشكلة بافى

عندو جيوب انفية لمشكلة مافى بقول بشكلة بافى

لمن يوم دقوه...حتى فازوا


فبشكلة بافى يالفانح

بشكلة بااااافى

تماضرات
أعجبني ردك على بدر الدين السمح
انتفاضات ومظاهرات وبمبان...
فتذكرت الشاعر والقاص الجميل بشرى الفاضل ، والذين يعرفونه يعلمون حجم القصص القصيرة والروايات والاشعار التي يهدرها بشرى في الحكي ...ولا يكتبها
ذات خريف بلبل كل الخرطوم واغرقها بالماء والطين والذباب جلسنا في نادي الاساتذة نهش الذباب ونتناول الغداء ، فقدم بشرى الفاضل اقتراحا بتسقيف كل الخرطوم "يعملوا ليها سقف" وتنظيفها من الذباب والحشرات الضارة، وقدم وصف تفصيلي مبدع لهذه الخرطوم المسقوفة شمل حلا لكل مشاكلها ، بما فيها كيفية هبوط الطائرات في هذا المطار المسقوف و...و...و
ثم قبل ان يقاطعه احد قال بصوت مرتفع :" لا لكن كدة ما بينفع ...في المظاهرات البمبان حيخنقنا ويكتلنا" فقال له هاشم محمد صالح: يا بشرى إذا عندك عاصمة زي دي ..حا تعمل مظاهرات ليه؟
فاجابه محتجا : شوف ياخي المظاهرات دي فولكلور سوداني مهم جدا ..أصله ما حنتخلى عنه
أما صيقي وجارك خالدكودي فذات كتاحة اخرى في الخرطوم قال ايضا إنه سيسقف الخرطوم ويعمل ليها سبلوقات تكب في تشاد !!حقارة ولعب كدارة
بتعرفي الكدارة يا تماضر؟ والله عندي احساس انك كنت محمد ولد وبتعرفيها
أهاأسة كلامي ده اخليه هنا في صفحة مشكلتك والله اوديهو صفحة رسائل
القراء
غايتو

تماضر
حلالة العقد والمشاكل

هل يمكنك حل مشاكل حب الفضاء السيبيري؟؟

احدهم يعاني الوله واللهفة والشوق والحنين

ولكن معشوقه لا يراه ولا يعرفه

مختبئ في الفضاء السيبيري الواسع ولا مجال لشوفة تبل الريق

وينتظر حلك بفارغ الصبر--انقذيه

حنينة

المعذبة حنينة

مشكلتك حلها بسيط

المحبوب دة بكون ساكن فى جزيرة سيبيريا

يديك العنوان تقطعى تذكرة

وتسبرى اغوار المسافة

وتفكى السبر

وتكسرى حاجز السايبر

موفقة باذن الله

اى مشاكل اضافية

اسبرى سبر ايوب

فيصل صالح

خالد كودى حقار وضفار

سباليق تفتح فى تشاد؟؟؟

لووووووووول يا زول

دة والله اقتراح يقوم حرب تشادية سودانية ...ونسميها الحرب النووية

خاصة لو قعدناشفع السودان فى السقف وخليناه يشتروا القوى المعادية التشادية بنوى التمر

حرب نووووية

قول بس يافالق الحب والنوى

هاها ضحكتنى شديد يا فيصل

تماضر
الباب اتقفل ولا لســـة فاتح

ماكنت قايلاكم عندكم مشاكل قدر دة

وما شفتكم الا حسة وانا طالعة

بجيكم

والله اجيكم

تماضر محبطة؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
اذن من يضخ دماء الامل و التفاؤل فى شرايين زمرة المحبطين؟؟؟؟؟؟؟
عزيزتى امل
اتباع حزب المشاكل المعلقة {كثر} ،، كما هو واضح من طابور المنتظرين اعلاه
فهلا عدتى سريعا؟؟؟؟؟

ياتماضرشكل البورد بقى تماضر ابي بحت
والله عيني باردة علي مواضيعك تماضر ردود ومشاركات وعزومات
وشكل البورد بقى شلليات ونحن دعاة للحق العام ومن حقنا عليكم ان نقول ونعيد ونقول نفس البديناه قبيل
وتماضر زهجانة
وعيانة
وبتحب السودان
وبتلعب كورة
واحسن زولة بترقص رقبة
وشااااااااعرة
بعيدة مدني ولا جراية تماضر

شمهروش

ما تتضايق من وجودى
لو فى حاجة ما عاجباك..اهملها وتغاضى عنها... انا ما بأذيك بى بوست

وما بحقد عى زول


وحقيقة..انا لى اكتر من شهر ما قادرة اواكب البورد
لما افضى شوية حأساهم اكتر

وباب مشكلتك دة لو لاحظت قديييييم جدا رفعوه قريب دة

ومساهمات الناس فيه اجمل من مساهمتى الاولى لغاية ما بقى ملهم وبديع

اما حكاية البورد بقى تماضرابى..فو الله دة حظ وشرف انا ما بستحقو
لأنى حتى ما فاضية شديد

وبرضو
لأنى بستمتع بالقراية لى الناس البكتبوا المفيد والمبدع اكتر مما بحاول اكتب...

المهم دة مستوى الكتابة القسموا لى الله وتجربتى وثقافتى
بحاول اتحسن شوية عشان الناس الزعلانين زيك ديل يرضو عنى... وتطوير الذات ما عيب

اماكونى بحب السودان دى...فأنا ما بحبو ...السودان انا مفتونة بيه

وكل ما القى طريقة اعبر فيها عن حبى ليه وولهى عليه ...بنتهزها...بالمشيئة والظروف

ما اجرى الحصان ولا انا الاشعر...قدامك عمالقة ...اقرا ليهم يا شمهروش

اخيرا...وانت بتدافع عن الحق...عاين للتواريخ... وانصف غيرك

اما الكورة ورقيص الرقبة..ديل ما بعلق عليهم

بخصوص زهجى، ايوة انا معاك، فشيتو هنا لمن ضحكت عليه ..وفى ناس كتار لقوا فرصة اتفشوا معاى وضحكوا

ليك توفيق من هنا لى مدنى...

وبالمناسبة عملت لينا شنو فى موضوع العرس الدخلت بيه البورد؟؟؟


كويس انك كتبت كلامك دة فى باب مشكلتك...عشان نعرف مشكلتك

لنا المهدى

ما اجمل كلماتك

اهو عدت

والعيادة فاتحة

مشاكل معقدة وحلول سيريالية

بس برضو فاتحة


والدفع فى باب الباندوث

تسلمى

قايتو يا تماضر أنا سبب زهجي انتي
أنا حسه ما في شئ مزهجني و مشحتف روحي الا الكسرة بي سخينة و شطة خدرة الفي البروفايل حقك ده و بما اني ما ما لاقيه لي كسرة في البلد العجيبة دي فقايتو شدي حيلك عشان أنا قررت أداهمك يوم في البيت و أجي أكل عندك كسرة بسخينة و أسكت عصافير بطني ، ما عصافير الخريف، المشحتفة بسببك دي

يا ندا لمن مشيت السودان

جبرت اهلى ياكلوا كسرة بى سخينة وشطة خدرة فى فطور رمضان وفى يوم العيد

وفى كل سانحة وبارحة


اتفضلى عندى سخينة...وتشرفى وعصافير بطنك زاتها تاكل معانا

مش عصافير عادية كدة؟؟؟ ولا عصافير آكلة للحوم البشر؟؟

قوليهم قاليكم...السخينة جاهزة...كسرة بى تحت ورغيف بى فوق

والشطة ام نويويرة

عزيزتي أمل
انا فتاة في الخمسين من عمري، عشت هذه السنوات بين اناس ظننت انني خبرتهم، إذ بي لا أعرف شيئا عنهم البتة.. ليصبح محور حياتي سؤال: هل نتعامل مع الناس لأننا نحن ناس أم نتعامل معهم حتى يثبتوا انهم ناس؟
برضو أمل

في داعي ياتماضرانه الجماعة يعرفوا جابتني البورد عرسة دي اظنها واحدة من المشاكل التي تجتاحنا هذه الايام مع هبة النسمة والخريف صاحي يعني موسم مسرة الزول لو قام زرع هسع ودوني مشكلتي التى غطى عليها الغبارعلى درج مكتبك غايتو كان لحقتي اخوك هسع بشوف كان اخير

عزيزتى امل
مشكلتى كبيره
بتقدرى عليه
عشان اجى شايله
دى جزمة مشكلتى
عينة شفوفيها كان
بتقدرى عليها ملقيت
غير جذمتها لا مواخذة
دى اصغر حاجة فى مشكلتى
مع الاعتذار

المهندس

جزمة مشكلتك كبيرة

حأحاولك عيادة الاسنان

المعذبة رجاء

الناس ديل لغز

فى ناس بتعرفهم وما مفروض تعرفهم

فى ناس ما بتعرفهم ومفروض تمون بتعرفهم

فى ناس بتعرفهم وتتشرف تعرفهم

وفى ناس ما بتعرفهم وما ضرورى اصلا تعرفهم


نصيحتى قسمى ناسك ديل للاربعة كيمان ديل ومشى قوانينك

لو قابلتك اى مشكلة فى المستقبل

اتصلى بوكالة ناسا

مشكلتي كبيرة جدا
ورغم اني سوداني لسة بفتش في محطات الكونيكشن علي هوية تانية
رغم اني سوداني لسة بقول داير هوية
رغم اني سوداني رويان من النيل وموية الفول لسة بفتش علي الموية المعلبة والمشاعر المعلبة
رغم اني سوداني مفتون بي عزة لسة بفتش لي عزة ام عيونا خدر
رغم اني سوداني لسة بفتش لي سوداني برة المليون ميل ديك هناك في قلبي
رغم اني سوداني




تم بحمد لله

أبنوسي أحلى

تبلدى

بعد ما تفحصت البروفايل بتاعك
اتضح لى انك سودانى ابن لادن

حيفتشوك فى المطارات

وحتقيف فى صف الدمغات
وحيقبضوك فى المظاهرات

وحيجلدوك فى الساحات
وحينبشوك فى النقابات
وحيشهروا بيك فى الاذاعات

ما عندك مخرج من كونك سودانى بن سودانى بن لادن


نصيحتى ...اكل لبان لادن

الله يجازيكن يا ندي وتماضر
قومتن علي الوحم
اها هسي انا اسوي شنو ؟

الجندرية

فيك شى؟؟؟

خدورى

انا ببكى من الليلة ولا من امبارح

تماضر الخنساء زاتها ادتها صنة بعد شافت جرستى

قالت ناس البيت غفروا والجيران كفروا؟؟؟ وضربت خمارها... وادت الخيم ضهرها ومشت المجمع التجارى


وطبعا طارق ابوعبيدة دة عندى ليه شريطين فاضيات

ممكن تملاهم لى؟؟؟

طروووووقى بكاااااى... وبعرف يضرب فى الاوتار الحساسة

زى تمبس

شكرا الغنوة بقت البوست ما عندو مشكله

تماضر عارفاكي ما بتقصري و ست الكرم ذاته و عصافير بطني وديعة و أنا مروضاها تمام ما تخافي منها ساي

الجندرية معليش باين عدوة سخينة تماضر انتقلت ليكي مني لكن و لا يهمك ليكي علي نرسل ليكي أنا و تماضر دعوة خاصة و نقدم الورق لمكتب الهجرة و نكتب سبب
الزيارة كسرة تماضر بالسخينة لكن قايتو تذكرة السفر على تماضر عشان هي سبب المشكلة دي كلها ... أها عاد قصرنا معاك ياالجندرية؟

و أنــــــا ...
آه مني و من مشاكلي الكتيره ..
اتجاوزت المحنة ديـــك ... و وقعت في محـــن أكبر ..
أصبري لي .. العشره كيف رخصت و هانت ؟؟ و قفلتي طاقتك بالطوب والاسمنت ..

مـــودك

عزيزتي / تماضر
لك التحية وانت تطرقي الآمنا الجحيمة من باب العفو
مشكلتي لست أدري ماهي ولكن اعلم جيداً انني انسان غير محظوظ في الدنيا فدائماَ أري ظهرها وحتي شريكة حياتي أصبحت لاتفهمني وبدأت أعتقدت انها مع الدنيا ، مع العلم انني اعيش خارج وطني مرغماً فهل سبيل لحل مشكلتي


(عفواً يابلسم جراحي )



في عينيك عشم باكر

كرماوي

المزوزو كرماوى

اها شفت مشاكل فيها شريكة حياة ..وعلاقة حب...وزواج دى ...طوالى بحولك لاخصائى العيون

لأنى افشل كائن ارضى فيما يختص بمشاكل الحب والغرام

كلم شريكة حياتك قوليها تماضر بتسلم عليك ودايراك تحلى ليها مشاكلها الشخصية


لوووووول


الغربة ياكرماوى الغربة

لو كانت رجلا ..لتزوجته

وطبعا حأطلقه

العزيز موديك

العشرة البيناتنا ما بتهون ...انا بعزك

ومشاكلك كلها عارفاها..دى ما مشاكل
دى تجارب حياة حلوة..
بدونها الحياة بتكون محايدة ورتيبة وما عندها طعم

انت جميل ومشاكلك بتعبر عن اقتحاماتك وتحدياتك للواقع

لك معزتى والياسمين..بشيل..من ياسمين اسامة الخاتم

واديك

جيت ناطى فوق الكنبة .....طااااخ الكنبة اتكسرت ...
الكلام دا في الفسحة
......... .....................
جانا الاستاذ وقال....الكسر الكنبة منو ؟؟
الفصل كلو صنة......
الاستاذ قال تانى ....احسن الكسرها يقول كسرتا ؟؟؟
قلت ياولد ياشريف....قوم كان الصدق ما نجاك عمر الكذب ما بنجيك .....وقمت
فقلت.... انا يااستاذ ورحت قايم.....كنت باحلم بعفو
......................
المهم.....شدونى ليك اربعة.......تلاتين سوط زى السم
.........................
اخوك عشرة يوم بتمسح وينوم علي بطنو ....تقول دبيب
..........................
ماعارف لكن....شكيتك علي الله يافرح ودتكتوك
..................................
i hope this will get you out of this black mode

عزيزتي تماضر

صديقتي تشكرك علي النصيحة الغالية

ولكن ارتد اليها عقلها بعد ان اكتشفت ان حب الفضاء السيبيري وهم وان الحبيب المزعوم كان يريد ان يغرر بها ولا مكان لها في قلبه بل كان يسومها العذاب الوان واصناف

و بالتالي فقد وفرت ثمن التزكرة الغالية الثمن لسيبيريا
وهي سابرة اكترمن سبر ايوب

سلمتي

نيلينك والابنوس
تبخري سحابا دافقا
يمتد منك
من هواك
يحمل التعبير عنك
لله
والشمس العظيمة
والبشر



والريد نيلين

زوربا

تتوهج فينا الصدفة

يستحم الغيب..فى نهر التمنى

اننى لا املك الدنيا ولكنى ادين بالحب اله

المعذب امدرمانى

الاربعة الشدوك يشدهم فى حلة البريستو

والاستاذ الدقاك يدق شلوفة بتو


اشكيهم لى رب العباد الاقوى منك ومنهم ...ولا سامحهم... والمسامح كريم

النعمنك انت كنت صغير وجاهل وشتارتك هى الكسرت الكنبة ..ما منك
بعد داك
ابلع حبة النسيان...ونوم فى الكنبة

حتبقى كويس

عزيزتي
امل
تفتكري بجي??
م.
الرد سريع..
المعذبه
ت

المعذبة ت

قال بجى؟؟

الرد سريع

لووووول يا تماضر علي فيك شي دي
اول شي
قربنا نبقى من القواعد
يعني بتقى شينة
تاني شي
ما شايفة شباب البورد كلهم شابكني خالتو خالتو
بعد دا الفنسة بتبقى كعبة شديد


ندى بت الكبدة والمصران
الكرم حقك والله
ما قصرت ما تقصر ايامك

عززتي تماضر(أمل) تحياتي

تخطيت الأربعين بشوية000000
متزوج لي ثلاثة أطفال00000
زوجتي حليونا وبت حلال00000
مشكلتي

نشوي 000؟ هذا هو إسمها000

تدخل المكتب وتقول صباح الخير تنتشي كل الغرفة..ها هي قد جاءت تحمل الفرح يسبقها عطر خفيف هو هو علي الدوام وكأنهاترتديه بمقدار يدقدق أنفي وتصترع باقي حواسي في الترحيب بها فلا أعد أدري وأنا أنظر إليها هل أراها بأنفي أم أسمعها بعينيا ويعجز لساني عن الشم .حالة كلبية تعتريني فأنكرش ويتملكني إحساس بالهوهوة.. فهل من ترياق ؟؟
ملحوظة : جربت حقن داء الكلب فلا تشيري علي به ..

أبا

الجندرية

ما بغرانة من الشحرورة؟؟

صباح عمرها تسعين سنة وشهر عسلها شهر عشرة

مالك ياختى سغيرة وجاهلة

المزلوع ابا

يتعرف تقبض قبور؟؟؟

انا يتخيل لى عينكطايرة...اقبضها
بقبضوها بنفس طريقة قبض القبور

تشوف نشوى داخلة المكتب...اقبض القبورة اقصد العين

ودخلها فى جيبك ...ولما ترجع البيت اديها لى زوجتك الحليووونة ام اولادك واتغدوا سوا



كلمنى بالنتيجة

عزيزتي امل
المشكله ما بقول
اها بجي??
م. الرد سريع شديد
المعذبه
ت

المعذبة ت

ما يقول مالو؟؟؟؟

الرد اسرع

عزيزتي امل
الغبن ساكنو وحاميهو القول
اها برضو بجي??
م.الرد بسراع

المعذبة توما

يعنى ما بنضم خالص؟؟

طيب بعرف ينضم ابرة؟؟؟

سرييييع

انا مشكلتى دايرة ارجع صغيييييييييرة

دايرة ابكى واصرخ بدون ماتكون حاجة غريبة

ودايرة الناس يجو يسكتونى ويطبطبو على

دايرة اى زول يدينى حاجة ومافى زول يشيل منى حاجة

دايرة يرقدونى فى محل هاااااااااااادى عشان مااصحى

ومافى زول يجى جنبى

الضبان دا مايلقى طريقة يصلنى

ما دايرة زول يزعل منى ولا ازعل من زول

زى ماقلت دايرة ارجع صغييييراااا

وكان فى طريقة رجعونى رحم امى

وشوفو اليطلع تانى

عزيزتى ملكة سبأ

ممكن
فى طريقة ترجعى رحم امك

لكن مملكة سبأ دى البقودها منو؟؟

فى طريقة نجيبها ليك هناك؟؟؟

كدى شوفى ناس مصلحة المساحة، لو وافقوا بنساعدك

اما حكاية الضبان دى فالناموسيات فى

وهى ليه ما سموها ضبانيةليه؟

المهم ارجعى لينا بلاجابة وحنساعدك

عزيزتي امل
ما بنضم ابره علا بعرف ابرا قلبو ..
اها بجي??

م.الرد بسرعه حبك
المعذبه
ت

المعذبة توما

بجى

عزيزتي امل
اها بجي متين??
م.الرد علي راحتك اتيقنت بالجيه انا
المستنيه
ت

عزيزتي أمل
شورتك ماها ياها
يا زولة قبورة في اليد ولا ألف طايرة
المرا كان وديت ليها قبوري بتخوزقن لي
وكان لميت قبوري علي .. باقي الطيور(حواسي الأربعة) اسوي فوقن شنو خاصة بت أبرك (أضاني) والأذن تعشق قبل العين أحيانا

المزلوع

أبا

عزيزتى أمل

ترددت كثيرا قبل عرض مشكلتى المستعصية عليك ولكن أملى فى الله كبير ثم فيكم يا سيدتى فأنا من المتابعين لباب مشكلتك وقد أعجبت بالحلول النيرة التى طرحتيها للكثيرين من المهمومين من أمثالى فأنا يا سيدتى أكبر أخوتى وقد فقدت أعز انسانة فى الوجود قبل ثلاثة أعوام هى أمى نبع الحنان وعين الرحمة الربانية وفيض البركات ورمز الجمال ثم هاجر جميع أخوتى من السودان وتشتتوا فى اصقاع الدنيا وانتشروا فى أوروروبا وأمريكا وتركونى هائما وحيدا أعانى من لوعة الأشواق لطلعاتهم البهية ووجوهم النيرة وبسماتهم الطفولية المتقدة ذكاء وحب ومصداقية منقطعة النظير

ومشكلتى يا سيدتى تكمن فى بحور الشوق وزخات الألم التى تعصرنى فى هذا الفراق الذى طال بى كثيرا وخيالهم وأرواحهم التى لم تفارقنى أبدا لحد الجنون

أفيدينى بالله عليك ماذا أفعل فى هذا الوضع المزرى وهذا الشوق الدافق والحب الكبير لثلة من أحبابى قل أن يجود الزمان بمثلهم

المعذب
هـ ش ج

المعذب يازول

مالك على؟؟؟

المزلوع ابا

تعال لينا فى بوست مايا


الكلام دة دخل الحوش

عزيزتى امل

البحلنى من المعذبة ت شنو؟؟؟

امكن يجى مع ريحة عبير جديدة فى يوم ربيع

امكن يجى ...مع ساعى بريد جايب ليك جواب فرح

امكن يجى مع رشة مطر..فى يوم غيم

امكن يجى بالعصر...مع كبة الشاى

امكن يجى بالمغرب مع بداية المسلسل


غايتو بجى


سعفوا البيت

سسسسسسسسسسلام ليك يا ست الكل اها انا المعذب بالوراثةمن الاهمال المستمر والوعود الكاذبة والطعن في الظهر من اقرباالاقربين اشكى لى منو شكيتون علي اللة وعلي شيخ اومى اها شوفى لي علاج دحين انا ما ولديك

عزيزى الهامل:

الكلاكلة صنقعت
عندكم قريبكم فى البوليس؟؟؟

طلع جواز

واكسح

اهلك ما بحطرموك الا تكون عندك شوية قروش

ومن رسالتك دى واضح عليك فلس مهين

كلو بزول

فوق
فوق

دا زاتو الانا كنت بفتش ليهو
الله يبارك فيك يا الجندريه

جن السوااد والرماد ياتماضر


جندربة وراوية ...صباحكم بنكهة البرتقال..يا قول شرير والبرتقالة

رفعتن البوست دة نفل مافى عوجة؟؟؟

اناغايتو رفعته بمناسبة
موسم البوز واقتراب العيد والعكعك والعك
واقترابي من التحول حسب دارون الى فيل ولا حسب البكوميون ماعارفة
المهم احس صادقة انني بتجاه التحول لفيل
كل يوم بزيد كليو وقدومي بزيد شبرين
واحسنى ثقيلة الخطى والروح

اما انا عزيزتي امل
مشكلتي تتلخص في الوحده ثم الوحده ثم الوحده
اعاني من الوحده لي درجه بعيده

جندرية:

لما اولادك يابو الاكل البتختيه ليهم ..."بتقشى الصحن" بقصد عدم البزار؟؟؟

لما تخرتى الاكل عشان ترجعيه التلاجة..."بتحسنى" الماعون؟؟؟

لما تعملى ليك اكلة من نوف طبق اليوم...والناس ما ينفعلوا بيها...الاكلة دى مصيرها بكون شنو؟؟؟

لما اولادك ما يسمعوا كلامك وعثمان تراث يكون فى البورد اليوم كلو...بتمشى قدام التلاجة عشان ترفهى عن نفسك؟؟؟

اجوبتك بتساعدنى اساعدك...لانو ظاهر لى فى برجك انه علاقتك بالاكل علاقة ايدولوجية

راوية:

حولت مشكلتك لقسم الازدحام التربوى...ومؤسسة اسواق الشمس ومصلحة المواصلات يوم الاعياد...والكرنفالات متعددة الاجناس

انتى محتاجة زحمة بس...

ولا عيونى كعبات؟؟؟

لوووووووووووول يا تماضر
عرفتي علاقتي الايدولوجية بالاكل
غايتو البركة في المشى
ولا كان زمااااااااان بقيت فيل
لكن الحكاية دا انا مشهورة بيها من قبل مشاكل العيال وابوهم
تعرفي زمان الشلة كانوا بضحكوا فيني طوالي
ناس تراث والسر السيد ونادر
لمن نمشى ناكل في الاتحاد
واقول ليهم نطلب تاني طلبين كسرة
يقولوا ياخي انت متين بتتعلمي حركات الجكس
واحتك تراني لي هسي ما اتعلمتنها
جنس رضم هو
والعجب في رمضان

تماضر ...
بتصدقي انو انا لامن قريت مسأله بافي مشكله بكيت
موش مفروض ابتسم و انا بكيت
بكيت وبكيت
بعدين خجلت من روحي .... وكتبت ليك
( هو زاتو مامصدق انا ذاتي انو بكتب لي تماضر ).
حلم ولا في علم
عموما مشكلتي الحنين داكن

عزيزتي امل /
شوفي الحاصل علي-بالشدة-
عندي وجع روح اقصد شحتفت روح وخمت نفس من الغربة وعدم النضم اولادي في سن المراهقة واي واحد مشغول بتكوين شخصيتو بمرو بحالة تكوينية صراحة امر بحالة عجيبة تشبه الحشرجة ادخل البورد يا الله وحتى خفة دمك شايفاها رهاب رهاب وما قادرة اضحك -الحكاية دي طولت كل الاس اطلعو واجو وانا قاعدة غبني ازيد ووزني ازيد -ماذا افعل بربك عزيزتي امل ف يهذه الحالة الانبعاجية الت ي لا تبارحني حتى وانا نايمة تاريخ الحالة بعد رجوعي من السودان

المدعو .. فاقد الهوية ..
اعاني من عدم موضوع حاد ..
وتضخم في العنصرية والنرجسية ..
وطمام من البشرية ..
وألتهابات حادة في الجيوب الخلفية والامامية ..
يكون دا من شنو .. !!!

ابراهيم الجريفاوى؟؟؟

احيا ياود انت حننك الكوتش بتاع "بشكلة بافى" دة؟؟؟

خلاص حاحولك باب بشكلتك...عشان ما يكون فى جرسة.


طولت من السودان ولا تماضر شيخ الدين الطولت؟؟؟

على العموم ليك تحيات خالصة...وان شا الله نتلاقى فى ساعة حائط " دى طبعا خفة دم ناس زمان..ما بتكونوا حاضرنها انتو"

عشة بت فاطنة

لو شايفة خفة دمى رهاب رهاب معناها انتى قصتك...بايظه جدا جدا...ويا صديقتى العزيزة اتخيل لى انتى دايرة ليك خالدة وسوزوكى ومريم محمد الطيب و"نعمات هارون" فى اوضة صغيرة فى العمارات...اسمها البرج العاجى...

بخلى بدر الدين شناه يرجع ليك عجلة الزمن...وتكونى يادوبك فى سنة تانية ولابسة جينز ومخطوبة..وبيرق عندو موتر.وحاجات بالشكل دة...

انا خلينى...ديل كيف؟؟؟

حميدة: قول كوع

كوع ..

الأخت تماضـر،
أنت من الذين إختصـهـم الله لحل مشـاكل الناس؟!
طيب أنا عنـدى ســؤال واحــد، وهــو أنا دائمـا لمن أمشى كتيـر رجلينى بيفتـروا.
دا من شنـــو؟

والواحــد بيأكل، بس أول ما يشبـع نفســو تابا اللكل.
دا برضــو من شنــو؟

مش كدا يا تماضر انا عارفة عندي وجع حامد اخوي وجع اسمو السودان وفعلا وضعت اصبعك في موضع الالموعجلة الزمن ارجاعها الا في الحلم
وحتى لو الواحد رجع البلد بدون اصدقاءك الانتي بتعرفيهم اشكالية واتخيل لو رجعوهم ليك هم ذاتهم حيكونو مختلفين بما فيهم نعمات هارون ودي ترجع مستحيل ...اوكي تماضر عايزة تقولي لي هوبليس كيس حالة ميؤس منها مام ما موافقة انا عايزة حل

ابو الريش:

زكرتنى زول مشى للدكتور قاليه كل ما اعمل يدى كدة، توجعنى

الدكتور قاليه : ما تعملها كدة

ما عندك موضوع

وفسر الماء بعد الجهد بالماءٍ ..

خالتو تماضر ..........

اذا بافي اي بشكله في القب... عموما انا خالاتي كلهم طيبات وعندهم تياب وبنات صغار حلوين وشنو شنو...
عايني امل ده قال شنو

الطيورُ مُشردةٌ في السَّموات,

ليسَ لها أن تحطَّ على الأرضِ,

ليسَ لها غيرَ أن تتقاذفَها فلواتُ الرّياح!

ربما تتنزلُ..

كي تَستريحَ دقائقَ..

فوق النخيلِ - النجيلِ - التماثيلِ -

أعمِدةِ الكهرباء -

حوافِ الشبابيكِ والمشربيَّاتِ

والأَسْطحِ الخرَسانية.

(اهدأ, ليلتقطَ القلبُ تنهيدةً,

والفمُ العذبُ تغريدةً

والقطِ الرزق..)

سُرعانَ ما تتفزّعُ..

من نقلةِ الرِّجْل,

من نبلةِ الطّفلِ,

من ميلةِ الظلُّ عبرَ الحوائط,

من حَصوات الصَّياح!)

***


الطيورُ معلّقةٌ في السموات

ما بين أنسجةِ العَنكبوتِ الفَضائيِّ: للريح

مرشوقةٌ في امتدادِ السِّهام المُضيئةِ

للشمس,

(رفرفْ..

فليسَ أمامَك -

والبشرُ المستبيحونَ والمستباحونَ: صاحون -

ليس أمامك غيرُ الفرارْ..

الفرارُ الذي يتجدّد. كُلَّ صباح!)

(2)


والطيورُ التي أقعدتْها مخالَطةُ الناس,

مرتْ طمأنينةُ العَيشِ فَوقَ مناسِرِها..

فانتخَتْ,

وبأعينِها.. فارتخَتْ,

وارتضتْ أن تُقأقَىَء حولَ الطَّعامِ المتاحْ

ما الذي يَتَبقي لهَا.. غيرُ سَكينةِ الذَّبح,

غيرُ انتظارِ النهايه.

إن اليدَ الآدميةَ.. واهبةَ القمح

تعرفُ كيفَ تَسنُّ السِّلاح!

(3)


الطيورُ.. الطيورْ

تحتوي الأرضُ جُثمانَها.. في السُّقوطِ الأخيرْ!

والطُّيُورُ التي لا تَطيرْ..

طوتِ الريشَ, واستَسلَمتْ

هل تُرى علِمتْ

أن عُمرَ الجنَاحِ قصيرٌ.. قصيرْ?!

الجناحُ حَياة

والجناحُ رَدى.

والجناحُ نجاة.

والجناحُ.. سُدى!


اسه الزول ده مالوا معانا ومع العواره ذاتو
عايني دايرك في حكي يا خلتو تماضر

الحكي انو انا لاحولاااااااااااااااااااااااااااااااااااا

ما عارف انا مالي يا تماضر الرسول قول لي

ابراهيم الجريفاوى:

صدقنى انت الوحيد المتماسك هنا...

امسك فى " امل" دة كويس....


حميدة: دى مشكلتك...انت مش فى باب مشكلتك؟؟

العزيزة امل
التحية العطرة
جيت داخل شفت الناس يحكو ليك مشاكلهم ولمن تديهم الحل يبكو اها انا كان حكيت ليك والله بتبكي علشان كده النمرق ساكت والله بيحلها.

الغريبة زمان كان الباب دا ..
عشان تحكي مشكلتك ..
يقوم المنظراتي بتاع المجلة ..
يديك احساس انه زول ما عندو اي مشكلة ..
بعدين المسعلة .. اتعقدت ..

يا تماااااااااااااااااضر ..
انا ما قلت مشكلتي ..
ومشكلة جيل كامل ..
ما تورينا الحل ..

والله لا قاعد احب .. عشان يكون عندي مشكلة عاطفية ..
ولا في زول ظلمني .. لانه نحن بنلعب بره الملعب ..
ولا في زول سرق مني حاجة .. لانه الكرور العندي .. مافي حرامي عنده زوق فني يقدره ..
ولا عضاني كلب .. لانه ما مغري للعض والشخيت والسك سك ..
وما قاعد اهش ولا انش ..
ولا عندنا مسرح مدرسي .. عشان لم يجيبونا في التلفزيون نقول يا حليل ايام المدرسة .. يعني ما بعاني من عقدة الحنين للماضي ..
وصحتي كويسة .. لانه الجسد دا بيختل بالاستهلاك .. ونحنا مكن مركون ..
ولا في رطوبة .. عشان نصدي ..
ولا الارضة .. بتأكل الميتين ..


بس ما عندنا موضوع .. !!
انتو لمن كنتو في سننا .. كنتو بتعملوا شنو ..

دي مشكلتي .. في باب مشكلتك ..

ومقدما .. كوع كووع .. كوووووووووووووع ..