هل لكل جيل منطقه المختلف؟؟؟ حواريات كهل وشاب

الكهل : ياولدي ما تقوم لي خالتك تخليها تقعد ، أنتوا مالكم ولدة خسرانة كدا
الشاب : في شنو يا خال ،أنا عملت حاجة غلط؟؟
الكهل : غلط ، عينك لي المرة الكبيرة دي واقفة في الحافلة وانت جنبها قاعد وتقول لي ما عملتا حاجة غلط
الشاب: سوري يا أونكل ،لكن ما أفتكر أنه مفروض أقوم ليها لعدة أسباب
الكهل: ........ـ!؟
الشاب: أول حاجة أنا دافع تذكرة عشان أصل قاعد ومرتاح
ثانيا : أنا ما عبيط عشان أفضي مقعد في حافلة أنا تحصلت عليه بعد تعب ومجهود ومدافرة وحجز وكدة
ثالثا: الست دي ما كان مفروض أصلا تركب في حافلة مافيها مقعد فاضي
وطالما أنها غلطت مفروض تتحمل نتيجة غلطا
رابعا:....ـ
الكهل : خلاس خلاس تعالي يا اخت اقعدي هنا أنا نازل المحطة الجايةشباب آخر زمن

بشكل أو بآخر فان حقيقة الأمر والواقع الان في حافلات امدرمان وبحري والخرطوم والثورات وسوق ليبيا والصحافة ....الخ
هي هذا الحوار الطرشاني البليغ

*

سلام فتحى
تفتكر الحاله الذكرتها دى وزى ماقلته اصبحت عاديه
تفتكر انها سلبيه وله ايجابه
بمعنى تانى
هل هى مجرد اختلاف فى منطق الاجيل
وطبعا اختلاف منطق الاجيال مساله طبيعيه
وله ظاهره ليها اسبابها

عبدالغفار سعيد

شكرا عبد الغفار واغفر لي تأخر الرد

أيا كانت إجابتي على سؤالك فهي لا تعدو الانتماء لأحد المنطقين المتعارضين هنا
وما نريد أن نتأمله
هو إلى أي مدى يمكن إجلاس هذه الأجيال على أرضية مشتركة
بمعنى تاني
إذا قلت لك أنه محض اختلاف منطق فانا انتمى الى هذه الولدة الخسرانة
واذا قلت لك أنه أكثر من ذلك أو غير ذلك فانا استخدم منطق الكهل
وبالتأكيد أن هذا الاختلاف له أسباب
وواحدة من بديهيات هذه الاسباب هو التكون في بيئة مختلفة
والانسان دائما ابن بيئته
وتسلم