رباطية البورد

ظهيرتكم بنكهة قشر البرتقال

ماعارف اقول شنو ، لكن ، يكفي اني اقول كنت اتجول في ارشيف البورد الذي اتاحه لنا
مشكورا بكري ، وجدت ان البورد رغم المنغصات التي
تطاله من حين لاخر . الا ان نكهة قشر البرتقال لم تفارقه . وقدرت اثناء بحثي ان
اعثر على اكثر عشرة شكالين في البورد
ربما يزعلون مني وهذا جائز محتمل لكن هو راي انا غايتو قلتو ورزقي ورقكم على
الله ومحل الرهيفة التنقد
انتم غايتو لو زارتكم مثل هذه الشجاعة التي بلعت حبتها في ذات لحظة دبرسة يمكنكم
ايضا ان تسجلوا هنا ، (اكثر عشرة كتاب شكالين في البورد
واشد ضراوة واعتذر اليهم سلفا ، انني رغم هذا التصنيف اقرأ لهم باستمرار والا لما
اكتشفت انهم شكالين وح اظل اقرأ ليهم حتى يبطلوا شكل او ابطل انا قراية في البورد
اساسي : مشاكس عنيد مصادم ، ، عنيف متقاطع مع حسن النية كلية ومثيرا للجدل على
طول الخط ، يعرف تماما متى ينقض على الجمل والكلام ويمارس عليها (البولصة) وارهاب
الاعترافات ودكشمانات ناس المباحث حتى يلوي عنقها ، فتعترف لها انها هي الغلطانه
، فيمسك هذا الاعتراف ذريعة ، ولا يرفع يده منها حتى يجهز عليها تماما . ثم حتى
اذا ما فرغ من مشكلة او فكوه منها تجده ناطي ليك في مشكلة تاني ، هذا الرجل حير
حتى اجاويد ابليس ذاتو . يذكرني بصباع امير ما ان يلزق عليك . يحلك الحلا بله منه
تاني . محترف لدرجة انه يجدول مشاكله ويضعها في اجندة كل يوم بيومه .
رغم انني اكتب هذا الكلام ، لكن حتى لو شاكلني لن اشاكله . ما يحيرني فيه . كما
يجيد فنون الاقتتال بكل ضروبها ، يجيد فنون الرومانتيك ، والحنك السنين . ا
سينتمينتال : لديح من الدرجة الاولي وكااااوي وبتاع شبك ، يعرف تماما متى يغيظك
حتى تطلع من طورك ، ويبدأ هو في تحطيم اعصابك حبة حبة حتى تزهج وتترك له الحلة
كلها .
فتحي البحيري : متماهي حد الاندياح في ازقة المشاكل ، يملك حاسة قوية كقرني
الاستشعار تدلانه لامكنة المشاكل ، رباطي من الطراز العنيد

هوبليس سابقا ، هوبفول حاليا
يحترف القعاد على نواصي الشوارع وهو في كامل تسمحه بالزيت ، رابطا لكل من تسول
نفسه المرور قصاده ان انت مريت به ينهض متابطا شره ، كتحتني يا زول ، ويشتبك معك
، اما ان تجاوزته متقيا شره ، فيجري مهرولا ماسكا في خانقتك ، شنو يا زول ، زاحي
من جنبي كده مالي مجذم ولا عندي الجدري ،
يازول يازول : شاكال من الطراز القديم ، لكن نفسه اصبح قصيرا . ربما تكون راحت
عليه او انه ليست لديه المقدرات القتالية الضارية التي يتمتع بها اساسي وفتحي
وسينتنتال ثم هوبليس . دائما ما يبدا هو الشكلة ، اي انه هو الخاطي لكنه لا يصبر
ابدا على نهايتها فيسعي هو جاهدا لوضع حدا لها معتذرا ومنحازا الى كفي الله
المؤمنين شر القتال . وهذه هي الحسنة التي تخفف قليلا من انه راجل موضوع عندي ضمن
قائمة ربابيط البورد الخطرين جدا
روبينسون :رباط من الدرجة الاولي ، وعبيط يفكك الله منه ان اشتبك فيك . غالبا لا
يبدأ المشاكل ، لكنه لا يتواني في كثير من اللحظات عن اشعالها . لم اجد على
امتداد هذا البورد شخصا يملك قرنا استشعار خاصة فقط بالمشاكل . ليست مرة اولى ولا
ثانية ولا ثالثة . انما طوال معرفتي به يملك هذه الحاسة السادسة القوية ، واعتقد
ان كل حواسه تقلصت في هذه الحاسة ، حاسة انه يملك الملك المقدرة على معرفة اي
البوستات سيكون بعد شوية عجاجه لاوي . كل العجاجات التي تنبأ بهبوبها ، هبت حتى
عمت عيون الناس ابتداء من بوست ليلة في سنتياجو ومرورا ببوست شكلة فتحي
وسيينتمنال ثم اساسي ويازول يازول . يحب المشاكل اكثر من عيونه واليوم الذي لا
يجد في البورد شكلة يقضي كل يومه يدعو الله ان يشعلها شكلة ليها ضل ومن زارته بعد كلامي هذا شجاعة بعد ان بلع حبة كلماتي فليضيف عليهم والا ساواصل؟ .

هاهاهاهههاقلت الحق لكن نسيت رجاء العباسي .......

شرير
والله ضحكتنى شديد
فى تحليلك
واصل وخليك حريص

د/بيان
راوية العباسي

ربنا يستر
ما تجينا عكاكيــز
بس ماتخافوا علي
اخوكم
لديه درق واقي

يا راوية
بالله موش كلامي دا في محلو

راوده
او
روضه
او

شفتو !! حتى ان مجرد تهجئة اسمها فيه مشكلة
مستفزه ، عدائية ، راكبة راسها كان غلط كان صاح
لازم تفقع مرارة كل الناس على قول شيري
لم تعني ذلك بدرجة كبيرة ولا تفترض حسن النيه حتى في (الديانات) المقدسه نفسها ،
شجاعة بدرجة كبيرة وعلى شكل اشتر من الفظاظة فهي لا تحترم اي مقدسات ولا تخاف اي لوم ربما يكون
عالم النيت السايبيري هو الذي اكسبها هذه الشجاعة
اتوقع منها الكثير من الاستفذاذات
وكثير من المشاكل
وستظل تعمل على اجترار المشاكل
فهي رباطية لا يشق لها غبار
ليست المسالة عندي مرتبطة عندها بالافكار
او النظرة الفسلفيه للحياة
بقدرما هي براكين تفتح فوهاتها
وتجريها على البورد عامة
هي تعرف ان هذه النيران التي فتحتها لا تبقي ولا تذر
ومع ذلك تفعل وتعني تماما ما تفعل
ربما هو حقد دفين من تربية ما او تجارب قاسية عاشتها
ولم تشأ ان تغفرها
ولذلك حملت المجتمع تبعات هذه المعاني التي قاستها
تملك ادوات مدمرة
لا تتواني ابدا في استخدامها
ضد المسالم في البورد
او حتى العدو
لانها متاهبة للقتال
وتتوقع دائما ان كل البشرية ضدها

أنا رباط وانت الشرير
بس قول لىّ منو فينا أخير
حراق الروح فى الغربة خطير
وده الخلانا نشاكل الطير
نلاوى نصارع فى قعاد صنقير
ومرات بنحاجز فى شر أو خير
ادونا شهادة حسن السير
موقعا بكرى بمهر وزير
تعال للمسكى وسيب نافخ الكير
بحرق توبك ولو كنت وزير
حلات البونية فى السايبير
كان درت الموية هداك الزير
او فى الحمام تلقى البشكير
ولو موضوعك ما فيه الخير
يجيك السنتى الأصلو عوير
ويجيب الفاظ حيوان وحمير
وقيامتك قامت يا قاصد الخير

يازول شفت البوست لما عجاف البغاث كيف
هاهاهههاههاهااها


انا لا اكذب ولا اتجمل
انا سواتكم
معي لتروها

الشرير شرير.... شفت الكعوبية دي؟ ليك الأمان قول ما عندك.. انا راجية

ظهيرتكم
بشكل حلاوة سمسميه


يازول يازول

دع عنك لومي
فان الشكل خشم بيوت
واعزمني ايسكريم


اساسي
اعمل حسابك يا اساسي
انا عندي عكازه
والله بعدين
كل جرادل الايسكريم ما تفكني منك

رجاء العباسي

معقوله بس ، طيب نحن وناس اساسي نمشي وين
انت مع ملائكة وعصافير البورد

يا شرير

تم العشرة سريع
عشان نعرف ساسنا من راسنا
ونكب الزوغة لما نشوفهم

بعدين سؤال يا شرير

انت ما مع الرباطة ديل؟؟
ولا البرتقالة تجب ما قبلها؟؟

احترت انا والله

Quote: بعدين سؤال يا شرير انت ما مع الرباطة ديل؟؟ ولا البرتقالة تجب ما قبلها؟؟ احترت انا والله

يا حنينة كبي لينا من قزاز العسل ده


شرير

تحياتي

يا بتاع الايسكريم

فوق يا بوست الربابيط...

اللييييييييييييييييييييييييييييييييييييييييييلة

شرير
الليلة اساسى بفجغ برتقالتك

راوية
فى ربابيط اكتر من التيمان...لوووول يا هوبفل

امسياتكم بنكهة
الامنيات العذبه

الدكتوره بيان

مؤهلة جدا لان تكون ضمن العشره (الفوق)الذين يرتاح لهم البورداب
وترتاح كتاباتهم فوق قمم المنفعة العامة
ومع ذلك اختارت طائعة بقلمها ان تدخل من اوسع الابواب
مع الداخلين من اجل الربيط
اي هي شاكاله جدا
وحمقيه حتى الطيش
يحلك الحلا بله ان حاولت ان تتكلم من قريب او بعيد بطريقة تشير اليها
حتى وان كانت حسن النية تلازمك
فيما ذهبت اليه
لكن لخطأ مطبعي او حتى دقسه منك
فانك في هذه الحالة ستواجه خصما
لدودا لا يوقا
لا يعرف ابدا حسن النوايا

لها مقدرة عجيبة في استنفار معاجمها وحاسة ترصد بها كل شاردة وواردة وفلاتر تقعد ما بين حسن النوايا وسؤها ، ومع ذلك ابدا تميل الى الاولى وفي هذه الفلاتر تحيل كل مايقال ان كان من قريب او بعيد او حتى لم يشير اليها
في شيء
ان تحيله الى كلام يتربص بها ويعنيها هي دونا عن كل البورداب
ربطاية من الطراز الفريد
وشكالة لا يلين لها عزم ولا يقعد لها جانب

لوووووووووووووووووول
يا شرير وبرضو اسمى شرير
شوف اسمك
سكلت فيك البرتقالة
وثكلتك امك

طلعتنى معقدة لووووووووووول
استنا انت يا ما منصف
انبى يا شرير
انا قاعدة اخطا على زول
(شوف الحنين دا كيف)
اسوى شنو لو الرجال سبقونا على الابواب وبقو طعانين
عاد الليلة جيت انا مزاجى معتدل
والا كان عاد
ظعمتك وزفتنتك وقشرمتك
وكتحتك
للحول انت فى الصف
اى يوم اجى زهجانة افتح البورد
وازفتنك

شريييييييييييرررر

كمل بجيك

ولبرتقالتك السكين الحرشا

انا ما بتوب و كمان فوق

صباحاتكم
بشكل الفراولة

رجاء العباسي
جاءت الى البورد يسبقها عطره المحبة . ملائكية الطله وحبوبية المحنه ، كانت تتوقع ان تجد الجميع في استقبالها ، مثلها مثل اي مبدع استطاع خارج عالم البورداب ان ينحت اسمه على الصخر ، لكن شكالين البورد لم يتركوها تنعم بهذا الاحساس ، فسبب اليها كثير من الاحباط وكثير من الدبرسه ، فرأت انه لامناس من دخول البورداب مثلما ولجت عالم الصحافة ودمغت بصمتها عليه . وكما ان لكل شيء ثمنه ، كان لابد ان تدفع تمن هذه (الفرفرات) والهبيش ، لكمات من هنا وهناك ، حتى زهجت وقالت في نفسها لابد من ركوب الصعب ، ودلالها حرصها على التواجد ان تخربش كل من يفاصحها او يقاطمها ، ذلك كان في البداية وحينما تدربت على هذه الاستراتيجيه ، اصبحت عدوانية ، شرسه . تحب المشاكل زي جوع بطنها .
وبدلا من ان نقرأ لها عن عالمها الذي دخلته واحترفته وهوعالم الصحافة ، اصبحنا كل يوم نفكها من شكله .


راوية العباسي
ما تستعجلي رزقك

شرير
حمدلة بالشوفة
عدت وعادت النكهة الفاتحة للشهية

اهل العوض

ظهيرتك بطعم
المانجو

الله يسلمك يا غالي

العزيز الذي يحمل اسما شريرا ولكنه بنكهة البرتقال.... تحية وسلام وانت تكشف شرانية البورداب، واعترف لك بأني ما "شرانية" لكن "حقانية" حقي ما بسيبو لو كان شنو.. واعرف برضو ان لكل شئ تمن، وعليه اتحمل اللكمات والخبطات "غير الصحفية بالمرة".. ودي بصراحة ليست طبيعتي في البورد فقط.. ففي الصحافة ايضا اقابل كثيرا من "الأشرار" الذين يرون انه مجرد خروجك لعمل عام فأنت "صيد سهل".. أخيرا، بالرغم من الشراسة الظاهرة في بعض البوستات إلا انني ادخل للبورد "لأرتاح" ويرتاح غيري.. فلكم العتبى واستحملوني، وأعدكم بأن البي نداءك بعمل بوستات صحفية التمس بها الغفران من الناس "الحلوة" لأنو بصراحة في ناس "شينة وشريرة" كده يقصدوك ويجروك لمستنقع الكعوبية.. برضو نهيت بوستي بشرانية؟!....

لوووووووووووووووووووووووول حالة سعبة يا التومات

د/بيان
رجاء

شرفتونا
والقومه ليكما يابنات بلدنا
العزاز




سينتي بن مينتال

اخرجججججي ايتها
الارواح الشــريييرة

هاهاههااه
عين ياعنيه

ســـلام يا أهل البورد

شايف الشباب عاملين حسابهم وخايفين من أخونا بتاع البرتقاله دا على أساس إنو شرير وطبعا معروف إنو الشرير زول فتوه وقلبو حجر بس يا جماعه الحقيقه غير كدا....والبنات طبعا معجبات بالزول الفارس أب قلبا صميم من حجر دا...وهو كمان صدق الحكايه ونفخ علينا جضومو وقال يا دنيا إتهدي...ياجماعه الحكاية ماها كدا الزول دا الغنمايه تاكل عشاه وفطوره كمان وإنتو فهمتوا الإسم غلط ثم الزول دا إسمه الشرير مش لأنه فتوه ورباطي...الشرير من الزول البشر الناس..وطبعا بتاع البرتقاله دا أحسن واحد يشر يعني حريف شر واللاعب البيكون حريف قاطع...بيقولوا لعيب...ودا شرير لأنه حريف شر....بيشر من غير حبل يعني يخليك في الهواء..فما تخافوا منه وتظلموه ساكت...الزول حبيبنا وأخونا ومننا

قرجة ياخوي

سلام.. والله زولك فطاني عديل في الرد
باين كلامي جا في السلك

قلت كم مرة كدي النشوف نهايتهاشنو

اها يا شرير
مستنية الرد..لياااقة

استر يا رب