الهلال يستعين بخدمات فيجو والمريخ يشرك بيكامب في مبارة اليوم

اول الحكي
راكعة الغيمات عند بوابها
و تاركة النجمات عسطحا قبل
في لنا يا حب خيمة في لنا
و مزهرية و ورد أبيض عندنا
و وحدنا بهالجرد عحدود السما
نحنا و انت و باقة غناني هنا
يا حلوي اللي بيتك فوق
صوبك عم ياخدني الشوق
الكلام : زياد الرحباني .الغناء لفـيروز ـ

الهلال يدفع برونالدينو والمريخ يتوقع
ان يهزمه بثلاثي الرعب

ساعات قليلة جدا ، تفصلنا عن لقاء هلال مريخ ، لكني لا اعرف بالضبط كم هي الساعات ، لسببين اولهما ، ان الجمهور نفسه ولا اللاعبين يعرفون تمام كم من الوقت تقام هذه المباراة وثانيهما _اي السبب ـ لن اكون هناك او صراحة لن يكون عندي وقت لاتفرجها لذلك لا اعتقد ان اتحاد الكرة سوف يهتم باخباري بوقتها الحقيقي .
لا تنطلي عليكم هذه الخدعة ، انني بت تفتيحه اتابع مثل هذه المباريات ليس لانني اخاف ان تنعتوني بمحمد ولد ، فهذه لم تعتد تهمني كثيرا ، ساعة ان جيت بت وحيدة وسط غابة من الاولاد . انما كل مافي الامر . انني كنت الوذ بغرفتي واشغل عيوني بكومبيوتري وبعض الاشغال الخاصة واضاني تلتقط بين الفينة والاخرى صوت هاجر كباشي تطربني . فكل ما وجدتني هكذا شغلتها حتى استعين بها على سكوني . وانا على هذا الحال والموال اذ تناهي الى سمعي اصوات اقلقت قعدتي وخربطت علي انغام هاجر كباشي فخرجت لاشمشر عنها . واذ بوشي على طول اولاد بنات عمتي واخي الصغير منقسمون الى فريقين .
فريق ينادي بالاحمر شعارا له ويقولون انهم مريخاب ، والاخر يغنون على امجاد الازرق ويقولون انهم هلالاب .
اعترف انه لم يكن الشمار وحده من اخرجني انما هي صعوبة الشغل الذي كان تحت يدي ، واستمعت وهم لا يدرون عني شيئا
انت عوير ولا شنو ، والله الليلة زين الدين زيدان ، ينقط ليكم العسل كده ، تف تف تف
بالله يعني نحن ملعبين ليكم روبرتو كارلوس لي شنو موش عشان يكسر ليكم زين الدين بتاعكم دا
هاههاهاهااه، روبرتو كارلوس بتاعكم دا ، يقدر على منو ولا منو .. يقدر على رونالدو ولا فيجو ولا فيرون
هاهاهههها ، نحن عويرين ليكم يعني عايزيننا ، نخليكم تغلبونا كده براحه ، والله
نحن مجهزني ليكم رونالدينو

وبيني وبينكم تاهت علي المسألة وضربت كل سلوك ذاكرتي ، ولثواني كثيرة ومسيخة جلست انحت في هذا المخ الخربان ، اين سمعت هذه الاسماء ياشيري .. على الارجح انها اسماء للاعبين عالميين وبمجرد ماذكروا اسم ديفيد بيكامب ، حتى دور هذا المخ ، واشتغل طوالي . انه اغلي لاعب في العالم ولم اكن مخطئ ان راتبه يساوي ميزانية جمهورية السودان وتشاد العظمي وليبا التي دون نهر وعايز رئيسها المجنون يصنع ليها نهر ، وبكشة من دول العالم الثالث .
طيب ، الله ، شن عرف هؤلاء الاولاد بهذه الاسماء ؟؟
وخمنت بذكائي الذي يحاكي الذكاء الاصطناعي بس حق عمال البلديه فانا دائما ما تنحصر اختراعاتي في كيفية الاستفادة من المقاشيش ، والمكانس الكهربائية في الفاقد السجادي . خمنت بل تاكدت انها فعلا اسماء للاعبين عالميين ، ياخدون الشي الفلاني .
وتساءلت طيب ، ماذا يجئ بهؤلاء اللاعبين الى السودان ، وانتهرتني قائلة ياشيري انت مجنونه ، مالك موش المسالة بقيت بيع وشراء
مابكون ناس الهلال ولا المريخ اشتروهم ، يعني كتيرة عليهم . ديل قال عندهم قروش يشتروا بيها اذاعة السي ان ان .
قال اللاعب من عندنا عايش ملك ، ولا رئيس الجمهورية .
واقتنعت فعلا ان السودان فعلا اشتري هؤلاء اللاعبين ، وانهم بالفعل موجودين عندنا في السودان . وفرحت انه ربما يمكنني ان اغير من البرنامج المنيل الذي زانقي نفسي فيه .
ولم استطيع ان اصبر اكثر من ذلك على هذه الطنون والتخمينات التي قدت مخي وفرطقته . فرحت احشر نفسي في ضجيجهم
ياشباب دقيقة خلوني افهم معاكم ، انا برضو هلالابيه زيكم .
الهلال ح يلعب اليوم مع ريال مدريد ولا مانشتسر سيتي .؟
فاجابوني باستغراب وهم ينظرون الى بعض ،
المريخ ح يعلب مع ريال مدريد ولا حلة حمد ؟
فضحكوا بصوت واحد وعالي .
وقليلا ومع ملادحتي اياهم واصراري على ان يفهموني الشغلانه كلها ، بدأت تتضح لي الحكاية ، اذ ان كل هذه الاسماء التي ذكروها باغية في انديتها العالمية ، انما الذي حدث ، ان جمهورنا يحب الكورة اكثر من كل شيء ، وحينما تاكد له انه من الاستحالة ان يرقي مستوي الكورة عندنا الى ما يحصل في بلاد العالميين التانيين ، وانه من الاستحالة التي تشبه دخول الجمل في سم الخياط ان يصير لنا لاعبين على مستوي عالمي او حتى مستوي افريقي مشرف . راحوا يطلقون هذه الاسماء على كل من يبسبطهم بلعبه .
عن نفسي رميت طوبة هذا اللقاء الذي سوف يتم مساء هذا اليوم ولولا بوست الاخ عباس ما عرفت شيئا عنه . ليس لانني ليست لدي ميول كروية ، انما لان الشغلانه من اساسه لن تجيب همها .
ان لم تقطع الكهرباء ، سوف يشتاكل ناس التلفزيون واتحاد الكورة كما فعلوا قبل كده واتنابزوا من احق الناس بقروش المباراة . واذا لم يتشاكل ناس الاتحاد والتلفزيون سوف يتعارك اللاعبين او تجد لاعبين مثل فاروق جره يغافل الحكمة ويضربه دبل كلك ، يلحقه امات طه واذا لم يتشاكل اللاعبين بعض . الجهور المغلوب سوف يجيب عاليها واطيها وتخرب الشغلانه ومحل الرهيفه التنقد .
ورغم هذا وذاك وكل هذه المعكننات في بلادنا ابتداء من العاصمة العلمانية واحباطات محادثات السلام . وفتنة الزول الشكال ولخباط مبارك الفاضل المهدي الذي ما ان يمشي محل الا وتسول له نفسه بسواطته وجواطته جواطه شديده . لكن اذا ما فاز الهلال وانتصر سوف انطط وافرح واغيظ ام مازن لانها تحب الكورة جدا ومع ذلك لا تعرف الا بمقدار ما تميز به فريق الارجنتين من الفريق الكوري ونيجيريا عن الدنمارك .
المهم اذا ما انتصر الهلال سوف انطط واغيظ كل مريخابي .
واذا ابتسم الحظ الى المريخ وهزمنا ، فانني اكيد ح اتغاظ لكني لن احرد العشاء ولن ابكي ولن ازعل . فقط سوف تكون انتم الخاسرون الوحيدون لانكم سوف تستقبلون مني اقصي درجات الهترشه .
وتحت تحت ارشح ان المريخ سيهزم الهلال . اكيد واحد صفر . بس عشان عندهم ديفيد بيكامب .


اخر الحكي
علي الذين احبطتهم فشل
محادثات السلام
ان يتمعنوا في وجوه زعماؤنا
اكيد اكيد لن تكون
مثل المطحونين والمنكوبين
والمشرديين في المنافي
فيحمدوا الله انهم رغم كل
شيء مازالوا احياء
شيري قبل ان تستمع الى اخبار التاسعة مساء

ويويويويويويويويويويوي


شيري طلعت هلالابيه ويويويويوييويويويوي

سلام مربع

عباس

براحه براحه يا ود امي
انا داسه الحكاية دي
انت ما عرفت انو سكان كوكب المريخ
حا يجوا مارين بجنب كوكبنا دا
يقوموا يدشدشوني
وانا ماناقصه خلقنه

سلمت ياسيدي
للطله

شيري وعين الله ترعاك

بوصل ليك سلام الوالدة
هلالابيةعلي السكين-ليه سموها علي السكين؟؟
لازم يسيح الدم عشان نثبت ولاءنا؟؟

علي العموم هي منتظرة المباراة
وعشان تغيظ أخوي لو الهلال فاز
مباراة سعيدة-من غير كاسوري

حنينة

سلام مربع

حنينه السكره

فعلا حكاية غريبة ،
ليه لو الدم ماسال
ما ح نثبت ولاؤنا
..؟؟
عشان كده كل ما انغلب فريق
نزل الى ارضية الملعب وهااااك
ياكاسووري
بالله هسع لو سألنا فاروق جره
الحكم دا سوي ليهو شنو
؟؟
ح يكون ردي شنو ؟؟
بلغي سلام الشديد
الى الوالده
وطمنينها انو اللهلال اكيد ح يفوز
لانو المريخاب شاكلوا ديفيد بيكامب
وشايفها المحطات الفضائية العالمية
بتنقل في المؤتمر الصحفي بتاعه
قال ان المريخ اتلوم معاهو
ما قدر يوفر ليهو ركشه اقصد عربية توصلوا
من محل سكنه بفندق انتركونتينتال بامبده شارع النص

الحبيبة المهترشة شيري
عاد الهلال كان اشرك فيجو مصيبته تبقي مصيبة.. ده الراجل اوت اوف شيب من الموسم الفات بتاع ريال مدريد.. عليك الله شفتيهو يوم داك مع فريق بلده قدام اسباني.. ده فضيحة..
على الجانب الأخر صاحبه بيكهام ما بعيد منو وبقى كل همو يجيب معاه الكوافير ولا مربية الوليدات؟!
ولأني (؟؟؟؟؟؟؟) على السكين فإني اتمنى ان يجيبو الولد الشقي روبرتو كارلوس.. يا خي ده انا بشرب ليهو البيبسي مخسوووووس

سلام مربع


رجويا حبيبة البي

معقولة بي خفة دمك دي كلها
وطلتك البهية دي
ماتكوني هلالابية
شفتيني كيفن لساني دا ما بمسكوا

بس لكن يجازي محنك يارجويا
مالك علي ديفيد
والله انا بموت فيهو
زمان كنت بريد فيكتوريا
من مما طارت بيهو
بقيت اشوفها عشره عشره
هاهاها
امزح يا شباب ما تقوموا تصدقوا
لكن جد جد
بريدو ديفيد دا
والريدة الاكبر رولاندو
كده كيف
صلحتها
؟

شيري كاتبة رياضية

منذ زمن طويل لم أقرأ لصحفي رياضي، فقد ظللت في حالة خصام معهم، وأعتبرهم جزء أصيل من أسباب لحاق كورتنا أمات طه، بالمناسبة يا شيري ورجاء أمات طه ديل منو، .
وهذه المرة الأولى منذ سنوات عددا أستمتع لناقد رياضي "علي كيفك علمونا أن الوظيفة لا تؤنث، وللجندرية العزاء
ولو لا العيال يقولوا جنت كنت حرقت الجرائد وصرخت قوووووووووووون

بالمناسبة يا شيري ليه الجمهور بيحرق الجرايد عند كل قووووون

I hope (Al HELAL) win this
also Here we go Al helal
Here we go Steelers.......................
and I will come back to Explain

الزولة جدا شيري

نيلنك والابنوس والشوق الجاري عليك
أنا سمعت خبر أكيد من المتحدث الرسمي لبكهام أنو بعد انتقالو للهلال قال أنها فرصة عظيمة لي زوجتوا المنفصلة حديثا عن سبايس غيرل للانضمام لي بنات الاحفاد واحتمال انها تعمل ديتو مع الصبية هاجر كباشي... أما كالرلوس أعلن انو بعد انتقالو للسوادن حا يعمل إعلاناتو الجاية لصالح مشرب الفرات بدلا عن البيبسي


والريد نيلين

فعلا
الحلو مايكملش
والكمال من المحال
بالله يا شيري هلالابيه ؟
حسبي الله ونعم الوكيل
حسبي الله ونعم الوكيل

حقيقي دنيا غدراة
لا حولا ولا قوة الا بالله
اللهم صبرني في فجيعتي
واشيراااااااااااااه
-----
تعالي النجمه احلي

انا تاني جيت راجعة....لكن بعد ما الفاس وقعت في الراس...ما قاصدة الهلال ....انا قصدي الاستيلرس,,,دا فريق البلد الانا قاعدة فيها هنادافريق كورة القدم الامريكية....كبار و سمان وبس خبتك خبتك يضاربوا ويتشاكلوا ومافيها اي حاجة حلوة والغريبة مغطين وشوشهم ما تعرفي ياتو السمح وياتو البشبه رونالدو حقكم دا ...لكن المشكلة بالنسبة لي انهابتاثر..على حياتنا اليومية ..لو الاستيلرس اتغلب العمدة حيزعل ويقلل ميزانية المواصلات وما نعرف تاني نمشي الشغل كيف وكمان حاكم الولاية نرفوزتو تطلع و يزيد لينا الكوبيمنت بتاع التامين الصحي ونتبهدل نحنا.. عشان كدا كنت محتاجه شديد دعواتكم معانا ...لكن خلاص الفاس وقعت في الراس والحصل حصل ,,,يومالجمعة الفاتت قلوا لينا تعالوا الشغل بي الهدم الدايرنها ومافي داعي للدرس كود بس لازم يكون اصفر واسود عشان تشجعوا الاستيلرس...وقام فريق سنسناتي هزمنا ليك شر هزيمه ...ونحنا دلوقتي في انتظار السيكونس.....النبي ما بتعرفوا ليكم فكي شاطر نرفع بيه فريقنا دا......................اما بالنسبه لي الهلال احسن حاجه يستعين بي تايغر وودس......