...أما بخصوص الغنماية

لم يندهش جيراني عندما أخبرتهم أن كم أنا مشتاقة (لغنمايتهم) شوقا لا تحده بحور إذ أظنهم كانوا يعتقدون أنه من المفروض أن لا نشتاق لهذا الكائن الذي وجوده الدائم في الشارع السوداني،، لم يعطنا الفرصة للتفكير فيه ككائن متفرد،، نشتاق له ونخاف من تأثيراته القوية على شجيراتنا الشوارعية
ودي ما سبة بالطبع،، حيث لا اظن أن الشارع (سبة) فقد قال الشاعر
( من ما قمنا وشفنا الشارع شفنا الشارع هو البعلم)
يعني (تربية شوارع) ليست لفظة بهذا القدر من السوء

لذا ،، وأنا في السودان،، وعدت نفسي بأن اظل اتحدث عن الغنم فترة لا بأس بها،، الغنم وام رقيقة، العلاقة شنو؟؟؟!!!
آآبعرفوا

وحاتحدث وين قايلين يعني؟؟؟ ياهو حوش بكري ده
وطبعا سأتهم بالإنصرافية وهدر الباندوث
!!!حسنا حسنا انا من الآن اعترف،، انا انصرافية،، وهدااارة جنس هدارة

وربما يسبني احدهم فيقول (امشي يا غنماية يا عنبلوق) وسلن اشتغل به الشغلة،، فانا احمل كما من الهم والبرطمة لا مجال لأن افشه إلا هنا،، خصوصا ان مدير السجم فرض عليا اليومين الأواخر شعار،، دعونا نعمل في صمت وللآن لا اعلم لماذا ضميري القلقان ده ما اتكوم شوية شان اكتب مدير السجم ده في الفكي يكتب ذنبو ان شاء الله

والذي يرغب في النقنقة الفاضية فأهلا به،، واني ادعو حملة مشاعل الفكر النضيف المستحمي ناس الكلام الكباااااااار داك،، أن لا يستاءوا من الكلام الفارغ الذي سأكبه هنا كبا دون تفكير،، وليعتبروه شئ مشتت هنا وهناك كأغنامنا الكثيرة،، نطالعها كثيرا ولا نفكر البتة لماذا هي تشاركنا حيواتنا بهذه القوة الجبارة

دقيقة بس

بستناك ... بس ما تتأخري

بت قضيم
اها جبناه

سلام عجبنى برنامج بين الرعية والراعى
دا
طبعا كونى من عطبرة
بالتأكيد لازم اكون بحب الغنم شديد
المهم عايزة احكى ليك
عن الغنم بين المدينة والقرية
يوم نبحنا فى امى عايزين غنم ذى خلق الله
وامى مش مابياهم فلهمة ولا كدا
لع والف لع
لكن اخوى عندو أزمة
المهم فى ناس راحلين
اشترينا منهم غنماية وسخلة
وبفرح شديد مشينا انا واختى
نجيب الغنماية وجناها
اها لما راجعين
عرفت لى جدى بيقول دائما
اصعب حاجة فى الدنيا
المشى مع المرة
وشيل البطيخة
وجر الغنماية
المهم
انا واختى دى اتنجضنا حين عديل كدا ولانها اختى صغيرة شالت هى السخيلة وانا بقيت
فى جر الغنماية المهم
بعد تعبنا شديد
قعدنا نبكى
انا واختى لانه الغنماية حرنت و بقت ذى كريت ابت المشى للبيت
اها فى قعدتنا ديك البتحنن الكافر
جا ولد جيرنا
وديل جايين من البلد جديدين لنج
سألنا مالكن قلنا ليهو الغنماية ابت تمشى
قال شوفو يا خوانى جنس البوامة دى العز شيلن جناهها وامشن قدامها
اها شيلنا السخلة ومشينا قدامها
بهداوة بارتنا
لما وصلنا البيت
القصة التانية
الغنماية
دايرة تموت لانها بالعة ليها كمية من الاكياس
وجاها نفاخ لصعوبة الاخراج
المهم الناس قاعدة وممحنة جاء واحد جاى دابو من البلد
وقال جيبن مبخر
فيه جمر وشطة وكيس نايلو
اها جابو المطلوبات طوالى
ربط الكيس فى راس الغنماية
وخلاه فاتح من تحت كدا زى حبوبة لما تكون عايزة تتبخر بخور الظهر
دخل ليك المبخر فى الكيس وختا
الشطة
الغنماية بقت تقح و تعطس
طوالى الكيس نزل
والغنماية فكت زنقتها
عشان كدا الغنوم ديل ما هينات طب
ويستاهلن الكلام عنهن
لى باكر
بلا باندوث بلا لمة

بيان يعني غيرتي رأيك ليه؟
ساكتة حلوة تتكلمي حلوة كلو قابلينو
دمتي

سلام بت قضيم
قاعدة اكتب واكتب واقص وارص
جات طلع فى غلطة اها جيت اصلحها
يا كلام الجن اتمسح
واها عرفة زهجتا شديد

معليش البوست الجاى
وشكرا للطف
راجعى بوستى الفيهو كايسة المشورة من ناس اختساس
الكمبيوتر

زيدون
اتخيل من ديك لي الآن ما لقيت فرصة اعبر عن غنيماتي؟؟
معليش ما بضيع استنيتك سدى
بجي

اهلااااااااااااااااااااااااااااااان
بت الذين
ياخي ذوقك لكن ما قرف عديل
موش لامن تغيبي تقولي انحنا حيين ، ميتين ،او حسب الحال
ولامن تهلي اقلاها ي تدينا خبر او تقولي انحنا جينا وبخير..
اطرينا ..ياما طريناك انحنا ياازمة انتي...
ما تسالني مننا سوالك انحنا ما سالين فيهو ..بس ادينا خبرك يا عولاق..
اقنب انا اسال فيك البعرفوك والما بعرفوك زي الاهبل حتى ضاعت هيبتي اون لاين ..
سالت عنك
المقيمين بصورة دائمة في البورد..
والناس التحت ..غير المقيمين .
والعارفات الظاهرات وقد حسبتهم يعلمون..
والثرثارات مستهلكات الباندوث ..والثرثارات غير المستهلكات
ثم الرؤساء في هذا المكان واشباه الزعامات.. الخابرين العالمين الدريبات الغميسة في هذا الحوش..
ثم اني سالت اولئك الذيم غابوا طويلا ثم ظهروا قبل ان تطلي باسابيع عدت بصبر ....
ابدا ماخبروني بشي..
فعلمت اما انهم لا يعلمون او ان رسائلي المعنونة بدقة لم تصلهم ..او ان في الامر سفه وان امورا مني قد ايقظت فيهم قلقا قديما فمنعتهم عن الرد ..

ولولا كثرة مشاغلي هنا وطول ليل الانتظار هناك
لخبرتك عن بلاد نفسي وبلاد نفسك ..

بت الذين
صحي ما بتستاهلي ..
غبتي هكذا وعدتي هكذا ببساطة وكان شيئا لم يكن ..
ثم تتحدثين عن الاغنام في وطني..
ماذا عن النعاج خارج الوطن..

النعاج خارج الوطن بألف خير وسلامة
مدوعلات يحمدن الله على ما منهن من النعمة
يشكرن اهتمام الخراف وسؤالهم الدائم عنهن
غير الشكر على سؤال الثيران
يا ثور
وهذه ليست سبة بالطبع فالأغنية تقول
المابقودوا زمام جاموس الخلا ..الخ الخ الخ
حتى ان (التور) افضل حالاً من الجاموس بكثير
يا دكين الفلكوبة
انت بدل ما تلف تسأل وتستفسر (وتطلع عليا إشاعات) ما تسألني انا مباشرة واللا يا تور اضانك بي وين؟؟؟
وما علينا،، برضو مسامحين
واكثر الله من فضلك وعامرين دايما

بسم الله الرحمن الرحيم

الغالية بت قضيم
سلااااااااااام وترحيب

أما بخصوص الغنماية ماقلتي لي أعمل ليها شنو؟؟؟
إتي وكت جبتي سيرة الغنم أقيفي لي أنا عندي غنماية في المزرعة دي ولدت شهر تسعة السنة الفاتت 2002 وهسع دا شهر تسعة 2003 وهي ولا يهمها

هييييييييييييييييييي يا بنوت الفي المخزن دا زول ولا غنماية؟؟؟
تك .. تك .. هي وحات الله قلبت الكسرة بي ريكتها
إنتي عارفاها دي غنماية بت الحاج
والله جننتنا في رقبتنا أضربيها يضربها النيني

عندنا قريبتنا لمن تغيب مننا كم يوم ما نسأل منها بتقول
ياولادي كان في ناس يتجيهن غنماية كل يوم وتاكل كسرتن اليوم المابتجي فيهو بسعلوا منها
لكي التحية بت قضيم

الغالي بدر الدين
بصراحة أنا ارمي باللوم عليك
في زول يربى غنماية؟؟؟
ما وجه الظرف في تربية الكائن الثقيل ده كان كبير كان صغير؟؟؟
لأنها لو كانت سخلة ايضاً السخلة كائن سئيل جدا
وأكثر ما يضايق فيه،، نزلته الدائمة، وصوته الرفيع،، ولو ان صوتها أفضل بكثير من أصوات كثير من فنانين (الكوم بي قرش) المنتشرين تحت كل طوبة مرمية في الشارع السوداني

أما الريكة فمعليش انا ما عارفاها لاني بتحنكش

انحكي ليك نكتة قديمة واعلم أن نكتي كلها كلها كلها قديمة جدا

قالوا الحنكوش كل يوم يصحى من النوم،، يستحمى،، يقشر الجينز،، يقعد في البلكونة يشرب شاي الصباح
أمه تجيب ليه صحن باسطة مدنكل مع الشاي
واحد شماسي مراقب الموضوع ده كل يوم من مده،، يوم اتلبد تحت البلكونة واول ما الأم ختت صحن الباسطة ومشت كف شال الصحن وجرى
الأم جات (يا هاني،، سجمي وين صحن الباسطة؟؟) الحنكوش قال ليها( والله يا ماما هديييك الغنماية ختفته وجججججرت)
لووووووول
يحتحتك كان ما ضحكت

بدرالدين

الولد ده ما تنتبه ليه...كده بقتل نفسو

بسم الله الرحمن الرحيم

سنتمنتال
سلااااااااااااااام

الشافع دا موسخ شلتو كيف ؟؟؟
عاد جلابتك دي إلا تملصا ولا جيبها النقرضها ليك في الماسورة دي

انتي مباشرة
يا سلام




وين مباشرة دي يا كنتوشة؟؟

تخيلي ما في زول قال لي انك مباشرة ..
لو اعرف انك مباشرة البنعرفا كلنا ديك ما كان لفيت وبهدلتا نفسي وخلق الله اللي هنا

بعدين اشاعات شنو البلطلعا فيك
انتي قايلاني فاضي ليك

قفة ولا اضان قفة
لامن اجي امرق فيك اشاعات...

يا استاذة الاشاعة شي مقيم
انتي قايلة اي من هب ودب عندو حق انو يطلعو فيهو اشاعة



الظريف /الظريفة الجاب ليك قوالة انو
التور دكين طلع فيك اشاعة كان اولى يقول لينا انك بخير ولا اتنيلتي في ستين داهية


نهايتو يا بت قضيم

انتي قاعدة تكتبي في البوردبالصورة المعهودة ويبدو عليك كويسة وما عندك عوجة

ورايقةوتذدادين بياخة


يعني اقدر اقول انك ما عندك عوجة وكل شي اندر كنترول؟؟

بت قضيم القطيمة شوية بس
هاهاهههاها
كيف حالك في الزريبة دي
شايفكم عملتو مراح بي جاي
انا شفت التور دا هايج بي جاي قلت
اعلفوا وامشي اخليهو يهدا
هاهاهاهاههههها
يا دكين يا تور يا سمين
اهجد في الواطة دي
يا دكين انا من زمان قايلك
عجل ساي لكن اهو طلعت تور ليهو
جاعورة هاههههاهاهاها
يا بت قضيم عافي منك عديل
ريحتيني الليلة عديل كدا
بالبوست دا وخاصة كلامك لي دكين
هذا البوست برعاية سلخانة ام درمان
بالنسبة للغنماية
الوالد الله يرحمه كنا عايشين في امان الله اها مشينا بي ناس خالنا لقي عنده غنم اها خالي حلف عليهو يشيل اتنين اها ومن ديك انا ما عارف ديل غنم ولا مواتر حوامات حوامة والوالد ما عنده فكرة في تربية الغنم غير قوم يا اساسي جيب يا اساسي هاهاهههههها اظرف حاجة بعتهم لواحد بتاع لبن وللان مفتكرين انهم اتسرقن
هههههها قال غنم واظرف حاجة قالوا لبنهم صحي والله العظيم مافي كيس نايلون ما اكلنه ههاهاهاههاهاها اتزكرت مرة كدا عملنا رحلة في الحلة اها الجماعة قالوا نضبح اها لمينا القروش انا ومعاي واحد فردتي كدا قلنا ليهم اتقدموا بنشتري عتود ونحصلكم اها مشينا الكوشة طبقنا لينا عتود ومشينا ليهم هههاهاها اها طبعا اكلناه ما عارف الحكاية دي كيف عندها كفارة اسع ولا نستغفر ونعمل نايمين
الراعي الرسمي للبوست بالاشتراك مع سوق الناقة
يا دكين مباشرة كدا هاهاهاهاها
موووووووووووا

واتاري يا اساسي انا من زمان شاكة انك مبدل،، اتاريك ماكل ليك شيطان في شكل غنماية
مش كان تستنضف طيب وتجيب غنماية من كوشة في العمارات يمكن كان يطلع شيطان ود ناس مش ذي شيطانك بتاع العشش ده

وتأكلون مال الكوش اكلاً،، أهو دخل عليك دخلة شينة شديد

عني غايتو ما عندي هواية اكل غنم الكوشة،، لكني بتكيف جدا احلب لبن غنم الشارع،، وقايلني بشربه؟؟ ابدا والله بس غتاتة كده مش بياكلوا شجرنا؟؟ يبقى ده لبنا صح؟؟؟

عاين انا كتبت ليك رد في بوستك ولو كتبت ليك اكتر حتصدق ان الكتوف اتساوت
انسى يا شين

دكين
أنا بخير والحمد لله،، وموضوع العملية ما ظبط،، احسن برضو
شفت لو سألتني شخصيا برد عليك كيف؟؟
وعموما سلمت للسؤال،، واعتذر عن حدة ردي لكن والله ما اكذب عليك،، اول ما اقرا اسمك بتجيني حمى نفاس
واللهم لا تلمني فيما اكتب
بعدين كوني كما تفضلت أنت ووصفتني ب(نعجة) يبقى عادي اني اكتب بصيغة نعجية شوية
ولو سمحت البوست ده ماشي المحطة الوسطى بص الديوم بعرفوا ليك اساسي

تصدق بكتب ليك وخايفة منك عديل كده؟؟
يجعل كلامنا خفيف عليكم ويهد شيطانك ده إن شاء الله
يا مشوطن

اساسي بدايتك الكلام عني كتور ليهو جاعورة سرني

تعودت ان اعوج رقبة البوستات
يكون البوست ماشي البطانة امرقو في الابيض


قمتا انتا تاني جطها لامن رجعتا تتكلم عن البهائم الدنيا(الغنم والعتان)

لطالما اسعدني اني بلفلف بوستات بت قضيم واعوج رقبتا
وسيسعدني كثيرا
ان ارى سرورك الدائم وراحتك في نعتي كتور

عليك الله ما اخير ليك
تور في حوش بكري واضح وجيد الصنع ولا نعجة تجي ناطة فجاة بعد غياب وجايبة ليها قوالات وذوق ما عندها بي هللة

اوما سمعت مثلا يقول

تور ليهو جاعورة ولا الرفيق الفسل

بت قضيم
اما بخصوص الغنماية فانا باقترح لبكرى يعمل لينا حوش بورا نخت فيهو البوست دة وبوست هوبليس بتاع الجمل وبوست ود شاموق عن الحمير

اما بخصوص غنم بلادى فناس الهيلاهوب اكتشفوا انه هنالك ثقافة الغنماية والغنماية المثقفة هى البتاكل الجرايد وعملوا ليها غنية ..عليكم الله العنده ينزلها لينا فى البوست دة

بت قضيم
برة الموضوع
ما بترد على مالك لا ماسنجر لا ايميلات


دكين
بركة بالطلة
كنت مغرودة ليك فى الايامات الفاتت لكن ما ظهرت..اها غردى انقضى خلاص

هالة الحبيبة
رديت في المسنجر البريد لسه
كنت مشغولة شوية لكن الليلة قلت يا انا يا المدير،، هو طبعا المدير لكن على مين؟؟
مش سودانية والمفروض اكتب الخمسة سطور في عشرين يوم كما يفترون علينا؟؟؟
اهو بوريه
ومعليش انتظريني شوية

في بوست نسيتي تضيفيه في اللستة بتاع الراعي شنتير،، ويسعدني ان اقول انه البوست الذي الهمني للكتابة عن أغنام بلادي
عاشت
عاشت
عاشت

شفت اسكتش الهيلاهوبا والغنماية المثقفة
أما انا فانا عندي اقتراح اعظم
تعيين الغنم موظفين بلدية
رسمي
ولأهمية الموضوع وخصوصيته وسريته،، دعينا نفصل له بوستا منفصلا يقومن الغنم يتزاعلن مع الكلاب بعدين ، أصلو الموضوع لا يخلو من مشاكل قبلية تعود لازمان سحيقة
والله سبحان الله
حتى غنمنا وكلابنا عاملين مشاكل قبلية
والله نحن نشبهنا شبه

هالة انا رديت ليك؟؟؟
والله انا صديت بالجد

شاكرين تبريكاتك يا هالة
وغردك الانقضى انشالله ما هو الفي بالي ده؟؟


وياريت اقدر اخدمك في شي وتكوني مديونية لي بها..
اصلا انا طالب ناس كتار هنا ديون وعرفان
انتي ما منهم


ليه ما تكوني منهم

يا اخوانا ما تنسو بوست سينتى عن الحمير واسمو حماريات سينتمنتال. علا لكن بكرى رابطو بى حبل فى بطن الارشيف

بدرالدين
شافع الرماد ده انا اكان قايلو موسخ قاليك كان بقلو من واطاطو دى

والله يا سنتي كنت متابعة البوست ده لكني لم اشأ الدخول فيه فحميرك قد يتطاقشن مع غنماتي
كلم بكري يفك ليك الحبل ولندع الجميع يسرح في مرح وحبور
ونعمل ليهم نشيد
أيعني أنهم بهايم ان لا اهتمامات ولا فائدة لهم
؟؟؟
انصرافي ده

عارف يا سنتمنتال الوقت كله قايلاك ثقيل لكن طلعت ظريف جدا
وبك بعض من القطامة كأنك اخوي ياخي
شبهينا واتلاقينا

هناك سؤال دائما ما يتقافز في ذهني كلما شاهدت غنماية حايمة في الحلة
لماذا غنم السودان قليلات أدب وذوات شخصية وشكيمة كان تكيتها ما بتك إلا روحك تطلع وتتك انت قبلها؟؟
انا شكيت أنها لا تفهم كلمة (تك) هذه فأنا لا اعلم من أي قاموس حيواني اشتق السوداني لغات البهائم والحيوانات،،،ككلمة (تك) التي الصقها في قاموس الغنم وأصبحت الغنماية تطرد (بتك) ، أو(جر) الخاصة بالكلب حيث ينهر ب(جر)
لن يفوتني بمناسبة هذه المناسبة أن افرد مساحة محترمة لكلاب السودان

يوم في البلد المكندشة دي شفت كلب،، ومن النادر أن يقابلك كلباً في الشارع كده عادي كما يحدث في السودان حيث يقدل الكلب في نص الشوارع كله ثقة لا يلتفت لبوري لا تهز شخصيته حافلة،، بالعكس فهو في العصريات يمارس رياضته المحببة لذاته فيجري وراء العربيات يطاردها وهو يعلم أن العربيات لو لفت وداسته لانهرس اكتر من هرسة البوسنة والهرسك،، ومع ذلك يمارس هوايته بمنتهى الاطمئنان والاستمتاع والثقة العالية في النفس ، مؤكداً لنفسه أنه لن يمس بسوء

المهم أن الكلب الذي شاهدته في هذه البلد لم يكن (يقدل) كما الكلب السوداني،،، بل بدت عليه سيماء الخوف والرعب من السيارة التي كان يقودها أخي رغم أنها حقيقي سيارة (عواليق) كما معظم سيارات السودانين في الغربة،، سيارة كريسيدا،، مربط دركسونها كالمجنون بدلاقين الدنيا والعالمين،، ميتين أهل فرشها طالع حتى تظن أنه شارك في عملية فدائية ضد اليهود،، لا عمرها غسلتها موية،، لا يوم شمت صابونة لوكس،، لا جربت معجون السيجنال يا قول غينة البنات.

جرى الكلب المغترب ،، ولكي ما ندخل في حق الله،، فانا اعترف انني للآن لا اعلم هل هو مغترب واللا مسعود،، المهم أنه جرى بعيدا عن السيارة واتخذ ركنا بجانب برميل القمامة يشم الأرض ويلعق شيئاً،،، وهذا أيضا فرق بين ، بين كلب حلتنا وهذا الكلب المغترب،، فكلب حلتنا لا يشتم ولا يتذوق،،، بلهط طوالي إن شاء الله كان لستك عربية.

تراءى لخاطرى كلمة (جر) الخاصة بلغتنا الجميلة، فوسوسني شيطاني على التأكد من هذه الكلمة وهل هي خاصة بفصيلة الكلاب ككل أم أنها لهجة خاصة بالكلب السوداني كما كل اللهجات والفصائل العربية منها والأجنبية
فنزلت من السيارة وقربت رأسي من الكلب جاعلة برميل القمامة حاجزا يقي جسدي السمين من عضة كلب محترمة،، لانه لو حصل وعضني كلب (مرة تانية) فأنا اكيدة أن انيابه ستنغرز هذه المرة في أكوام من اللحم ولن تجد لها مخرجاً،، عكس المرة الأولى التي عضني فيها الكلب فتكسرت اسنانه عندما اصدمت بعظامي حيث كنت ما زلت (اوت أوف سيرفيس) أعني خارج خدمة الاغتراب.
قلت للكلب بصوت واضح السمة،،سليم المخارج،، (جججججررررررر)
وركزت على الجيم فشددتها حتى كدت اقطم وسطها،، فربما أنه كلب حنكوش يعطش الجيم كحناكيش بلادي المغتربة التي تعطش الجيم حتى تصاب بالجفاف الحاد والإسهال (ججججججججرررررررررر)
رفع الكلب رأسه ببطء،، ولم يحرك ساكناً ،،، نظر لي وانا اكاد المح في عينيه نظرة تقول( ينعل عوارتك) ثم واصل يعمل بجد في الشمشمة ولعق بقايا (البيك) التي كانت مرمية هنا هناك. يا حليلكم يا اولاد شماستنا الما لقيتوا بيك كلاب السعودية.
إذن ف(جر) هذه سودانية مية المية لا يعرفها كلاب العالم البراني فهي كما كلمة (كراع) ،، وبما أن للكراع مقابل لغوي سليم يسمى (القدم) ،، فكرت بجد في البحث عن مرادف كلمة (جر) السودانية بلهجة عربية مختلفة .
مر ولد صغير وانا في هذه الحالة من التفكير العميق،، يبدو من سيمائه أنه سوداني مبدل،، حيث تبدلت ملامحه إلى ملامح ناعمة ممسحة لا غبشة فيها ولا انبراشة انف،، مما يدل على أنه قد عاش طويلاً طويلاً في هذه البلاد ولم ينعم بمعرفة (الكوشة) التي هي بمثابة العامل الأساسي لازدياد انبراشة (نخرة) السودانيين، فاستغللت الفرصة وسألته،، يا ود الكلب ده انهره كيف؟؟ فتقافزت عيناه ذعراً وقال،، ( كلب؟؟؟وين؟؟؟ ياتو؟؟؟
(وخري )منه أحسن ليك) ،، فكررت سؤالي بتؤدة علها تعطه إحساس بالاطمئنان،، (بتقولوا ليه شنو شان تطردوه) قال لي ( والله يا خالتو ما بعرف،، ججججججرررررربي قولي ليه هيشششششششششش)
لحظة حرجة،، نسيت الكلب وما يفعل ولم اتذكر إلا أن اقول (خلال الشوك ان شاء الله يهششششش بطنك يا الغبيان أنا خالتك يخلخل ضروسك بركة من صلى وقال ياالله)

loOoOoOOOOOOOOOOOOOOOOOoOoOoOoOoOoOoOoOoOLZ
كيفني الشافع والله كما كيفني هذا البوست الظريف
يديك العافيه
يا خالتو بت قضيم

ايهاب يعني دايرني اقول ليك زي ما قلت للشافع وانت عريس تقوم عروسك تشوف ضروسك مخلخلات مخلعات تجيها غمة؟؟؟

يعافيك يا هوبة
سلمت

الأخت بت قضيم
سلامي وتحياتي

الإخوة رواد البوست
ســــــــــلامات

صدقتي والله يا بت قضيم، والغنماية شخصية إعتبارية في الحياة السودانية، ودلالة على إستريافنا للمدينة، ما كده وبسن اشهر غنم في السودان هن غنم يعشن في أجمل وأميز مكان في العالم كله، مقرن النيلين، غنم المقرن البقن مضرب المثل، وهن مشهورات بأنهن يعرفن كيف يعبرن الشارع أفضل من البشر،
عادة ما يمشن في مجموعات لا تتجاوز العشرة غنمايات، وعند عبور الشوارع، يتلفتن شمال ثم يمين ويعبرن الشارع بتوءدة واحدة تلو الأخرى
وصار كل من يقود عربة ويواجه واحد يتلفت شمال يمين ولا واحدة بتقدل وهي تعبر الشارع، ومع البوري والفرملة يصيح والله غنم المقرن بيعرفن يقطعوا الشارع أحسن منكم، قال طلبة جامعة قال.

وتحت تحت كده سمعنا إنو تجمع غنم المقرن وبإسم غنم السودان رفعوا مذكرة للوسطاء بخصوص السلام في السودان، ووضحوا رأيهم في مسألة علمانية العاصمية وقوميتها، خايفات من الصالح العام والتطهير العرقي والدعوى بمحاربة المشروع الحضاري... الله يكون في عونكم يا غنم المقرن ويا غنم السودان

غنماية قالوا ليها أفضل أيام الإسبوع بالنسبة ليك شنو؟؟؟
قالت: تيوس دي
وتسلمي

لووووووووووووول يا الرايق
انت رايق فعلاً
اول مرة اسمع نكتة الغنماية دي
لوووووووووول بالجد

الغنماية يا سيدي مرتبطة بوجدان الشعب السوداني كان رضينا كان ابينا
انا استغرب ياخي احدهم يطير عروقه يصرخ المشروع الحضاري ،، المثقفين السياسة المش عارف ايه،، وغنمنا صايعات في الشارع لا حياء لا خشا
والحقيقة انا عندي مشاكل كبيرة مع الغنم،، ولما وجدت أن غيظي من الغنم وانفقاعة مرارتي لن تسمني ولن تغنيني عن جوع،، وحلولي في التخلص من الغنم تبوء دائما بالفشل،، فاثنان لا يمكن ازالتهما حيث استفحل امرهما وتفشى كمرض عضال،، غنم الشوارع وفنانين مراكز الشباب،، المهم اني رأيت أن افكر في الموضوع من ناحية إيجابية لذا طرحت الفكرة علانية لاثبت اني لن اخجل من غنم حلتنا مرة أخرى
وسأدعو في المائدة القادمة،، أن ننشئ رابطة نسمها (من أجل حياة صحية لغنم حلتنا) سأندد فيها بكل من وكل شئ
وما يفوتك اني عندي خبرة في الموضوع حيث قبل كده في البورد ده زاتو سويت رابطة الشينات
انقر كان فيها منو معاي؟؟؟

سلمت

أما بخصوص العنوان..

دا براهو كوم بتاع كوميديا

والله يا بت قضيم أكان ما بريدك
كنت قلت ليك انتى مهبوشة

قايتو اليومين ديل المرحات حيمات سااااكت

تسلموا

الرحمابي

انا بريده يا رحمابي
وبي شناته دي

لكن مهبوشه هبشت السنين ..وما براها .. الغنماية دي كان ممكن نمشيها ليها ..لكن الكلب ده بالغت فيهو عديل كده

ياربي شيري بترضي ؟؟

يا شيري ي ي ي ي ي
دقيقة بس عليك الله ..

شفتي يا بت قضيم براك بتجيبي لي نفسك الهوا

طبعا شيري ما حترضي يقولوا على صاحبتها مهبوشة
والا راس السوط بضربها

بعدين المهبوش مين؟؟
انا واللا صاحبك السكران داك؟؟؟
ارفع ليك بوستك يعني؟؟

رحمابي الصديق
خد راحتك جدا
امي بتريدني وبتقول نفس الكلام
مهبوشة أخير من راكبة الفيل

سلمت طلتك

يا جماعة
هبشة شنو
بت قضيم دي اصلها في البورد بي برجيت باردو ولا اسمها منو ديك
الخواجية بتاعت الرفق بالحيوان
انتو نسيتو بوستها حق الكديسة
وحتى ابو مهيار لمن كتب بوسته عن الغنم عنونه ليها
وهاك الدليل
يابت قضيم ... يا ناس ألحقوا ... الغنم

جندرية ياخي قبل كده قالوا عليا دكين
وكان عظيم دكين على الأقل زول ولو كان مبدل

الناس ديل بي كلامك ده بقولوا بت قضيم دي اصلها جدادة
ما تهزري في ناس هنا ما بلعبوا ابدا

ابو مهيار كتب بوست عن الغنم البقى وكيلهم الوليد بن طلال اريتوا حالي اريتني غنماية ،، وعنونه باسمي لاني كتبت في نفس الموضوع قبله بعنوان غنمنا فلذات أكبادنا
يعني انا ما لي علاقة وطيدة بالغنم الموضوع نسب من بعيد

أما الكديسة فهي بخير تبلغك السلام،، مازالت تمارس هوايتها في الولادة تحت شباكي
اول مرة اشوف لي كديسة هوايتها تولد تحت شباك

جندرية اختي ان شاء الله عافية
ما رديتي لي وصلت الرسالة واللا لا؟؟

لووووووووووووووووول

عيني باردة والله
قرضو علي كده يا جماعه هوي
الليلة البورد ده بسحروهو كان ما يجي اساسي يفرتق الحاجات دي

بت قضيم
اب حراز
الجندرية

تلاتة بالونات كبيرات


يا جندرية ..برجيب منو قلتي لي ؟؟؟؟الليلة كان في زول عندو قرحه بيموت ليكم هنا

شفتي يعني ما قطعتوا من راسي
انت تبع الخواجية ديك ( مالك يا تمبس عايز تفضحني انا ثقافتي روسية ) وعاملة الفرع بتاع حقوق الحيوان في البورد دا
من كدايس لي كلاب بتركيز خاص علي الغنم

بعدين رسالة شنو ؟
يعميني
اوعي تكوني اتهبشت زي ما قالوا الجماعة ورسلتيها في بريد زول / ة تاني
باقي اجارك النبي عندي اصاحب كتار عندهم العينة دي من الهبشة

بت قضيم..طبعا كترت ما قريت غنم وغنمايه وتغنمون لامن كتبت ليك بت غنيم علا والله مسحتها خفت من السحاسيه للموقف لعدم سابق عرفه وكدي..اهاالمعني هسع ازيك وبركه الجيتي بالسلامه انتي وغنيماتك ديل معاك اختك توما من ام دقرسي وبالامريكي نيو جيرسي.. اها ما الخمك من غنيماتك ديل علا قلت اتعرف الظاهر في اهتمامات غنميه مشتركه..وحقيقي مناصرتك
ليهم اساسيه ما اخت اساسي..
واحي الحضور من وحي غنمي تام وضهبي بتعرفي الضهب اها ده صفه
غنميه بحته لما يقول ليك ماتتضهب بينفو منك الصفه وكانها قبيحه عموماالضهب لمن لايتضهب هو مباراه الغنم للضلله وحكتم مع الحيطه
تتذكري لامن كبسور الجنو شكاوي ساق الغنمايه
من اضانها ووداها القسم والتهمه حك في الحيطه
لا كده انا اتضهبت كفايه بقوم انسحب انسحاب
تك تك تيكي...وبهدي للحضور اغنيه يا المسكينه يا المظلومه يا الغنمايه
واهديها للسخله ..والعتوت..والعنبلوق..
وجيرانا التيران
دكين ازيك ساي بدون طوب
توما

توما
باين عليك جني كبير
لووووووول عى بت غنيم

بالنسبة للغنماية المظلومة فهي والله مظلومة شديد
واقترح لإعادة الاعتبار للغنماية
أن تعين رسميا في الدولة بمسمى (غنم نظافة) وتلبس زي رسمي عبارة عن قميص دمور وطاقية تقيها من الحر
تاكل وتنظف الشارع
وأهي اسمها (خشوم عاملة) مجانية على وزن أيد عاملة
بعدين الغنماية كائن ذكي،، يعرف كيف يقطع الشارع إحسن من سيد ركشة،، وبتصحى بدري ابدر من عمال عربية القمامة،،، وبتداوم حتى مغيب الشمس
وما عندها فسحة فطور تدوم حتى مواعيد السحور
وبتنتج لبن
ولا تحتاج لبدل مواصلات
ولا بدل علاج،،، لأنها طوالي عندها نزلة
وربما على الدولة تقديراً لمكانتها وخدمتها المجانية للبلد،، أن توفر لها (حيط حك) تقديرا لجهودها
ولتسمها حوائط غنمية
وانا اكيدة أن الغنم سيحافظن على نظافتها أكثر من محافظة البشر على نظافة الحمامات العامة في العاصمة المثلثة
بالله دي ما افكار بناءة؟؟

سلام بت قضيم
افتكر انو الزول لمن يكون بعيد من البلد
ولانوبكون حانى شديد للمشهد كلو
بيبده يفكك فى تفاصيل المشهد،وبشعر انو متعلق بكل الجزئيات
الناس،الشجر،الغنمايه،وحتى اللساتك المزروعه فى طرف الشارع
كل التفاصيل بتكمل بعضها فى المشهد
ليك الود


عبد الغفار سعيد

أخي عبد الله جعفر
المشكلة الواحد لا يحس بقيمة هذه البسيطة جدا ، وقد لا يلتفت لها يوماً، إلا إذا فارقها فعلا،، وعاد لها بعد زمن،، فيتذكرها بوضوح كأنها ما بارحت الذاكرة ابدا
انا بالجد اعز هذه الكائنات وليس تريقة ولو بدا الموضوع كذلك
سلمت للطلة

بسم الله الرحمن الرحيم

توما
سلاااااااام

عجبتني نيو جرسي دي
لو الموضوع عن الكلاب ممكن تقولي جر (سي) ومادام الموضوع عن الغنم نخليها تك سي رايك شنو؟؟؟
إنت عارفة (أم) دقرسي و(أبو) عشر بيناتن (ود) الماجدي؟؟؟
نرجع للغنم
عجبني قبل كدا تعليق للأخت تماضر قالت
غنمي طرعى

في راجل في حلة جنبنا كان جاك في بيتك وما ضبحت ليهو عتود بشيل حالك وبشر غسيلك
أها مره جاء زائر ليهو واحد وفي أثناء الونسة بتاعتن جاء عتود حليو كدا أخد ليهو نطة نططين وفات
الراجل الضيف قال للعتود
إنت العليك سويتو الباقي على سيدك

مراح هنا .. ومراح هناك
حاجه ترد الروح
والله بوست الواحد يدخل
يشم ريحه الــــ
يا سلااااام والله الريحه دي بريده شديييييد
ترد الروح
اها
الغنماية التريانه دي
بتدورلها اخوات
عشان كدا يا بنت قضيم
هاتي البقية
حتى يكتمل المراح
لارعاهو لك
يعني هذا البوست برعايه
هوب فل
وبكدا يصبح بوست مواكب
وداخل في زمرة الرعويه
الضاربه البورد الأيام دي



وسلاااام يا جميل

لوووووووووووول يا هوبفول
هذا البوست برعاية الغنماية
وبذا نكون اول مرة ابتدعنا فكرة أن الغنم يرعوا بس المهم الرعاة نوديهم وين؟؟؟

لوووووووووووووووووووول يا بدر الدين
جر سي
تك سي
والله انت ما براك
نكتتك شديدة
الأتنين شديدات

دقيقة بجيك بي واحدة طايرة

بت قضيم ســــلامات تاني
هنا عندنا الدنيا أخر ليل، قلت أتفقد غنم بت قضيم قبل ما أمشي أنوم، علا أتفأجا بكلامك تخلص من الغنم؟؟؟؟ هوي يا بت يا بت قضيم
أولا الغنماية دي زي ما إتفقنا شخصية ليها وزنها في الحياة السودانية، ما كده وبس.. حتى في المقرر يا بت قضيم المقرر الأكاديمي الغنماية دخلت فوقه، وبامارة كلام بدر الدين شنا عن قول تماضر للنشيد، والنشيد دا أظنه ملحن بلحن واحد في كل السودان وطوال فترة تدريس المقرر المذكور. إنتي هسه كان الحال إتغير ممكن يرجع نشيد غنمي ترعي دا تاني للمقرر؟؟؟

طبعا الفوق ديك كانت أولا وتانيا إنتي ما سمعتي بالحبيب بورقيبة رئيس تونس القالوا ليك طفش الغنم وطردهم شر طردة، أها الحصل شنو؟؟ قوم إنت يا زين العابدين بن علي، ودا قالوا ليك كان نايبو، قوم إنقلب علي الراجل، وقالوا دي لعنة الغنم. حقنا دا طرد الغنم ولا شنو شايف نايبو بيفرفر؟؟؟ وأريتو كان طرد الغنم، دا طرد الناس وخلى الغنم مبشتنات..
غايتو الليلة جنس هضربة إيييك سرحته

كدي نرجع ليكلامك قلتي شنو؟؟ رابطة الشينات، أناغايتو ما نقار
لكن منو الكان معاك في الرابطة الشينات ؟؟؟

تصبحي علي خير
والغنم ديل ما تنسوا الصباح تعلفوهن قبل ما يمرقن أكل الكوش دا مع الصباح ما كويس

بسم الله الرحمن الرحيم

بت جضيم
كيف حالش

عندنا في حلتنا راجل عندو غنماية ولدو وداها للراعي وجاء راجع بيها قام سألو
الغنماية رجعت ليه؟؟؟
الولد قال ليهو
الراعي قال حق السرحة الشهر بي 30 الف
قال ليهو 30 الف؟؟؟ ليه بديها محاضرات؟؟؟

غنم المقرن غنمات مثقفات كما قال ناس الهيلاهوبا،، وأكد السيد الرايق،، بتاكل الجرايد الما لاقين الناس يقروها
فالجريدة غالية جدا في السودان مقارنة مع دخل الفرد،، ومخرج الفرد برضو،، يعني كان دخل كان خرج تبقى الجريدة فوق مستوى السوداني العادي،، وطبعا معظم السودانيين عاديين ، بالتالي لن يستطيعوا ان يوفروا حق العيش والمواصلات ويفتحوا نفسهم كمان بجريدة.
الغنم بقدروا فهن أي نعم يأكلن جرايد قديمة شوية ومجانية، لكنها تبقى في النهاية جرايد.
المشكلة أنني يوما فكرت في كارثة قد تحيق بغنمنا قريباً،، وهي أنني يوما قرأت أن نوعية الأكل تؤثر على الكائن الحي مع طول مدة الاستخدام
يعني بالعربي كده الواحد ياكل لحم بقر،، بعد كمن سنة يبقى هو زاتو لحمه ذي البقر، أو يبقى هو زاتو بقرة.
لو فرضنا صحة هذه النظرية،، فلنتخيل بقى الكارثة المحيقة،، غنماية ثقيلة وكل الغنم ثقيلات،، إما قليلة أدب ما بتسمع الكلام أو يجوز غنم السودان طرش،،، أو ربما عدم توافق اللغات،، وكمان تأكل جرايد سودانية لمدد طويلة،،والجرايد كلها كلام فارغ،،فتصاب بالفراغ النفسي والعقلي هذا إن لم تصب بالزهايمر الحاد.

والغنماية كائن ذواقة،، لأني لاحظت أن غنماية الجيران ما بتاكل إلا نوع معين من الصحف التي يأخذها موظف البلدية من برميل القمامة ليرمها في الشارع،، عشان بكرة يجي يلقى شي يعمله،، المهم اني لاحظت أن الغنماية دي ما بتاكل أي جرايد كده والسلام بل هي كائن انتقائي،، والصحف انواع،، ذات اللون البرتقالي،، واخرى باللون الأخضر،، وتلك التي لا لون ولا ريحة ولا طعم لها،، انواع كما أصناف المفروك في صينية سماية،
غنماية الجيران مغرمة بإحدى الصحف التي ما أن تفتح صفحتها الأولى وحتى الأخيرة يطالعك عناوين من نوع فلان ابن فلان ينعي علان بن زعفران،، وان شركة عبد المتعال تهني شركة عبد الفتاح على الإنجاز والنصر العظيم في اكتشاف وإنتاج عصير الدوم. وأن الشيخ أبو الدرداق قرر أن يقيم حفل خيري يعود دخله لصالح فريق الهلال السوداني البرازيلي،، وسيغني في الحفل الفنانة المخضرمة الكايداهم الفي السماحة فايتاهم ، العظيمة المبدعة عنايات جاعورة. وفي آخر صفحة صور للمسائيل (والمسائيل دي جمع مسؤول وليس جمع سئيل) صور للمسائيل وهم يقطعون روحهم ويبددون حياتهم تعبا وجهدا في المؤتمر المدعو (السلامات ازي الحال الله يسلمك يبارك فيك يهريك بنود) ثمناً لسلامة هذا الشعب المغوار، في الحتة البايخة الكلها حر في جزر الهاواي
هذا غير أكل وجوه (المسائيل) بالفول وزيت الطعمية وام فتفت،، اعني الجريدة اللافين بيها العينة المسمية اصطلاحا سندوتش

غنماية قليلة أدب أو طرشة أو ما عندها لغة ،،، تأكل مثل هذا الكلام يومياً لمدة قد تطول تطول تطول،،، مع نظرية تأثر الكائن الحي بما يأكل،، ستؤدي إلى إحتمالين،، إما تتوفى الغنماية بوجع مرارة،، أو في الأرجح تصاب بانتكاسة ثقافية،، فتتغير هيئتها مع بقاء محتوياتها الداخلية كما هي،، مما ينتج عنه كائن جديد جسمه زول وجواه غنماية ،، ذي قصص الف ليلة وليلة كده،، وليس ببعيد أن تتشرشح اعني تترشح الغنماية يوما في الانتخابات،، متخايلة بمظهرها المهيب وباطنها الغنمائي،، فتحكمنا يوماً غنماية لابسة زول. وهنا يأتي التساؤل براه ،، يا ربي التيران زمان كانت بتاكل جرايد؟؟
وبمناسبة الغنماية،، اتساءل،، هل للمئئئئئئئئئئئئئئئئئ الغنمائية،، علاقة بصفحات الوفيات التي تقرضها قرضاً فتهضمها صوتاً؟؟؟
يا ربي حبوبتي مدمنة تاكل صفحات وفيات ؟؟
يجوز والله

مكرر

بيان
لوووووووووووووووووووووول كميات

لم انتبه للمشاركة الراجعة إلا الآن
باااااالغتي
والله الضحك فاقعني

المهترشة بت قضيم

زمان وصوني أكبر أبقى راعي
أسوق غنمي على ضهر الحدب أقعد أراعي
شن سويت غير تبديل طباعي
بدل ما أرعى شوف كايس لي راعي
الكلمات لأحدهم

بالرجوع إلى قاموس الأمم في أصل الحمير والغنم نجد الآتي

الغنماية كائن حي يمشي على أربع ويشب على اثنتين يتغذى على ما تنبت الأرض وأحيانا على خيرات الكوش ونفاق وصور السياسين الباسمة على صفحات الصحف والمجلات . تتميز الأغنام بأنها كالدليب ظلها يرمي بعيد ولا تفيد بني جنسها إذ يستفيد الغرباء منها يذبحون أبناءها ويشربون ألبانها ويلبسون أصوافها ويمزمزون كوارعها ويسلطون بعضها على بعض في المناطحة الحرة . فقدت الأغنام بعض مكتسباتها التاريخية مثل حرية التعبير والتنقل والأمن المتمثل في الحماية من الوحوش وعلى رأسها الذئاب والضباع منذ أن افترس النمر محمود الكذاب وتولى الذئب رعايتها من بعده . للأغنام قرون كانت تستخدم للنطاح والدفاع عن النفس أيام فحولتها قبل خضوعها لقوانين الغنم المتحدة وتوقيعها على إتفاقية حظر انتشار أسلحة الدمار الشامل . ومن حينه وهي من الحيوانات الأليفة التي لا تحفل بسلخها بعد ذبحها بل تتفنن في تبجيل جزارها شكراً لتكرمه بتخديرها قبل ذبحها مما يجنبها الألم والعذاب
انتهى
لا تعليق

جميل أن آتي صباحا القط الغنم المتجاريات هنا وهناك

سنجاوي
هسه عليك الله المهترش منو؟؟؟

لفت نظري ما جاء في خطابكم عن كوارع الغنم
بالله الغنم بعملوا كدارينها الشينات ديل كوارع؟؟؟
اتخيلت طوالي اني آكل يوم لساتك عجلة أخوي،، لانه كنت افكر أن أرجل الغنماية شبيه بلساتك عربية ، ثم غيرت رأي بعد أن اشتري أحد أخواني عجلة فقررت أن العجلة بتشبه الغنماية أو لساتك العجلة بتشبه كرعين الغنماية
كلاهما لا يفتر
كلاهما شغال على الدوام
كلاهما الحر ما بتحرقهم
والاتنين تقول ليها يمين يمشوا شمال والعكس صحيح
تقول عليا الغنم وعجلة أخوي سكرانات
وقالوا دبيب سكر مشى عدل

لا ادري يا سنجاوي،، لكن لو صحت معلومة كوارع الغنماية،، يبقى فعلا السودانيين ديل سحاحير

سلمت للحضور المميز جدا

مشتاقين يابت قضيم ليك وحشة والله

باعتبارك متخصصة غنم

(لابيطرية ولا راعية)

لكن لاحظت انو عندك خلط جندري في صغار الأغنام

العنبلوق هو العتود وهو ذكر..أما

الأنثى الصغيرة فهي السخلة وفي صباها

.تسمي التقرة.. لذا لزم التنويه

.دمت ياصديقتنا التي افتقدناها طويلا

أبومهيار الصديق
بركات الغنم النزلت القمرة

بركة شوفتك انت

وبالنسبة للجندر الغنمي
انا عندي الغنم ياهم الغنم
ذكورا وإناثا
مساواة بتهزر

سلمت

أه يا بت قضيم
علاقة التيوس شنو ب....، يعني العامل المشترك شنو؟؟؟؟
التقر دي بيقولها للقرج
والقرج ديل هم غنم الجبال، أقصر قامة من الغنم الواحدات ديل
أكثر لحما وأقل لبنا أو هكذا يقال والله أعلم

الرايق
غنم تيوس عنابليق (جمع عنبلوق) عتاتيد ( دي بجمعوها كيف دي؟) سخلان
كله واحد
قلنا مساواة
والله كمان حتعينوا التيوس برواتب اعلى من الغنم لان الغنم حياخدوا إجازة وضع؟؟؟؟
سأتهمك وأبومهيار بالتفرقة الجندرية
وارفع الأمر للقاضي الجندرية

شكرا لمعلومة القرجة،، اول مرة اسمعها

الحضور والغنم سلامات
بت قضيم افكارك بنايه شديد مش بناءه ساي

بدر الدين بن شنا
سلاااااامات

حلوه تقسيمه العيله المنشرين في البلددي والعجب جر سي
لووووووووووول لووووووولين علي من النكته
لاكن الراجل بالغ ..اهاهاك دي سد نكته بره الغنم علا فيها باقي ضهب , واحد قال يمشى يزور قرايبو فى الكلاكلة منها يشوفم ومنها ياكل أو يشرب ليهو حاجة
اها صاحبك مشى وسلم على الجماعة وقاعد منتظر الحاجة الباردة ولا الغداء, والناس على قدر حالهم واليوم داك حتى الموية قاطعة وما لاقين يقدمو ليهو حاجة, اها صاحبك قعد قعدتو ولم المدة طالت قال ليهم يا جماعة أنا أستأذنكم ومع السلامة, أها الخالة من عزة فى نفسها قالت ليهو: باولدى ما تقعد تمشى بصمة خشمك
قام هو من الزعل قال ليها: تعالوا كسرو لي

توما

لوووووووووووووول يا التوما
بالجد انتي عسل

بت قضيم وغنيماتها
امسيتو طيبين

اول حاجة يا بت قضيم ماسنجرك اكلتو الغنماية

اها كان عندى صاحبة لى قالت زيك كدى معجبة بالحمار وتقول الحمار حيوان حساس وناكر لزاته وخدوم وده كله كوم وعيونه جميلة كوم تانى...اها قامت عملت رابطة اصدقاء الحمار وصارت فى الجامعة تلقب بندى الحمارة ولليوم....
دى قصة ساى يعنى ابدا ما مقدمة لبت قضيم الغنماية

توما
جاياك والله فى بوستك بتاع ياقلبى ما انت مليان وساكت لكن وكت لقيتك بجاى ..بعد اذن راعية البوست دايرة اقول ليك انت لزيزة جدا

لووووووول يا هالة
ذكرتيني زمان في الابتدائي،، وانا عندي عقدة من القواعد،، ما حليت الواجب
الاستاذة فقرية جداً،، اصلوا في مواد كده لازم الاستاذه أو الاستاذ يكون فقري
رياضيات
جغرافيا
قواعد
يا هم ثقيلين يا المشكلة بتكون فنية في رأسنا المقودس
المهم اتزنقت أعاين للسوط ويدي تحكني،،، قلت ليها انا حليت الواجب لكن ما جبت الكراس ، ما جبتيه ليه؟؟؟
بدون تفكير قلت ليها والله الغنماية اكلتوا؟؟؟
الاستاذة كتمت ضحكة لكن اخدت لي علقة محترمة
للواجب وللكذب
تفتكري يكون ده سبب حقدي على الغنماية عشان ما قدرت تقيف معاي موقف رجولي أثناء ضعفي الإنساني؟؟؟

المهم بشوف موضوع المسنجر ده انا بالجد ضاربة

بالنسبة للحمار،، فحقيقي والله والله انا بعز الكائن ده لكن خايفة اقول يمسكوني ناس تمبس والرحمابي بعد ده عديل ويودني بعشر
لكن بقول والحاي الله والكاتل الله

الحضور والغنم تاني
بت قضيم عن اذنك يختي دايره اسلم لهاله قوته دي ..هاله ازيك انشاءالله شديده..ونقول زي الجيتينا في بيتنا مع استثناء ريحه العتان ..
تصدقي يا هاله زي البعرفك من ايام متاوقتي
ومسمياك هاله الظريفه عشان طيبه وكلامك طاعم وما بتزعلي علي زول..وزي البينا صديق مشترك ده طبعا شمار من الاسم ساي علا باكد الحجز والشمار وبكلمك
اها وبنتلاقا يا الظريفه
ما تبقي ظريفه كدي اسع بت قضيم تسرحك بغنمها ديل ..بت قضيم معليش يختي سرحت في بوستك شكلو فيهو فيروس غنمي يصيبك بالضهب.. بري انا زغت
توما

سلااام يا بت قضيم
والله قصتك دي زكرتني أيام سمحة بالحيل
كنا نسكن بالعمارات...أيام العز يعني
علي شارع محمد نجيب في مواجهة حي الديم

أها في العصريات كانت تحدث هجمات غنمية علي حيينا
فهذه الغنمايات تخش المنازل من غير إحم ولا دستور
وتحمر ليك إذا حاولتي تقربي منها

هذا الهجوم الغنمي عادةتتبعه غارات تتارية من شفوت الديم لبث الرعب في القلوب

أها بعض حناكيش العمارات طبعآ بفكوا البيرك
وبعضهم بيركز

البيركز دة نصو بيخاف من الغنم...تصدقي؟؟

وطبعآ مخلفات المعركة عبارة عن بقاياأشجار قرضت قرضآ
بعض من فرد البراطيش لمن ولي هاربآ من الهجوم التتاري

أما الباقي من ممتلكات شباب الحلة فيذهب كغنائم حرب

زكرتينا والله...آآآه دنيا

سلمتي

حنينة

دعيني اخبرك عن هالة زيادة يا توما
طيبة ، مريحة، واضحة ذي لون الشمس
تبثك طمأنينة، وتتعامل معاك كأنها عرفتك منذ زمن
لها قدرة على العطاء،، خصوصا شعورالثقة والأمان
متواضعة جدا وتحب الخير للجميع
وقد تعتقدي أو يعتقد غيرك أني قلت ما قلت لانها رشحتني امس ، ويبقى القول النهائي أن ما بالقلب بالقلب، ولا يعلم النوايا إلا الله
والدنيا دي ما بتستاهل
وياهو حالها
انا زاتي لو عارفاه بشيل الغنم يهج بيهن كان ربطت غنمي في الزقاق واتوهطت اتوسدت توبي رقدت جنبهن
لكن معليش،، بجي الخريف والشكرة لي حماد

معليش يا التوما
الموضوع طلع من يدي اظني صحي مهبوشة يا دي

بسم الله الرحمن الرحيم

ياشباب سلااااااام

والله سؤال جادي وعايز ليهو إجابة

الغنم بيولدن كل كم شهر؟؟؟
يعني فترة الحمل لأنو زي ماقلت ليكم غنمايتي ليها هسع سنة من آخر ولادة وشكلها وعيونها وبطنها وضرعها بقول إنها حامل ولكن المدة طالت
ياربي اغنِّم فيها؟؟؟
خاصة أنني أعرف غنماية تانية وسيمة حد الإنبهار

لوووووووووول يا بدر الدين
وحاة الله انت ما نصيح

غايتو لما كنت داية غنم،، كانوا الغنم بيولدن في ثلاثة شهور
غنمايتك دي إلا تكون حامل في ديناصور
غنم عليها طوالي ولا يهمك
بعدين غنمايةوسيمة كيف؟؟؟
كانت بتستعمل لشعرها صانسيلك فبقى شعر الجبال حبال حبال يعني؟؟؟
واللا مفسوخة بديانا؟؟؟
واللا بلعت ميساجور؟؟؟
أفيدونا احنا أصحاب غنم ومسائيل منهم

بت قطيم سلام والباقيين
سؤال جادي بت قطيم زي سؤال بدر الدين شنا
علاقة الغنم بي عجين الكسرة الفتريتة شنو ؟
ماحصل زمان حرسوني البيت إلا تجي غنماية الجيران ناطة ماشية في الحيطة زي الماتريكس ديلك وتدخل المطبخ وتاكل العجين والكسرة وتقعد تكورك تقول راجياني امد ليها ملاحة




أبنوسي

لوووووووول يا تبلدي
الفيتريتة دي شنو؟؟؟
بتحنكش معليش

قالوا الغنماية يا تبلدي بتحب المشك، فلما تجد المشك تنسى روحها تماما كما فعلت كريت الأبت تمشي البيت لما وجدت المرعى فتناست خشيتها من الذئب حتى جاء فانقض عليها ولحقها امات طه.

والمشك هو – على ما اعتقد- بواقي العيش المتبقية من عمل المريسة،، والمريسة نفسها سائل مسكر تشربه بعض القبائل السودانية ، وتسقه للسيدات خصوصا المقبلات على الزواج، فينتفشن وينتفخن ويصبحن مبغبغات فتنطبق عليهن الأغنية التي تقول ( السادة لونه خمري قلبي حباه) والحقيقة انا لا اعلم ما العلاقة بين الأغنية وما اوردت، لكن الأغنية تأبى أن تفارق خيالي،، خصوصا اني نفسي اعرف (سادة) كيف يعني،، هو في زول لونو كاروهات؟؟؟
المهم أن الغنماية بتحب المشك ده ذي عيونها،، فلو وجدته،، تناست الدنيا وما فيها وغاصت فيه حتى الثمالة،، والثمالة دي انا ما قاصدة سكرانة،، قاصدة للركب،، يعني يغمى عليها وهي بتاكل،، وحين يأتي المساء ياقول عمر الجزلي،، تأتي الغنماية تمشي الهوينة الوجي الوحل،، تتكا وتتلما زيها زي أي رجل مر على زواجه عام فأكثر فكره ام اليوم العرفوا بالجرتق.
استغل السودانين القصة،، وعملوها حكمة والله وحكاية ،، فاصبح يقال لكل من يذهب مكان ويتأخر،، أها يا غنماية المشك.

كل هذا التنظير لأجل اوصل فكرة أن المشك ده اساسا هو عيش الفيتريتة،، ولنا أن نرجع للراعي شنتير ، أو نستعين بالصديق أهل العوض، لتأكيد هذه المعلومة، لاني لست أكيدة منها

تسلم يا تبلدي

بت قطيم (والمسعولية على اساسى)

غايتو انا بتزكر قصة عجيبة خلاااس. مرة واحد من الناس عندو غنماية حلووووب وقيافة بالحيييل. اها يوم صحى الصباح ما لقها وسط الغنم .مشى يفتش لقى غنمايتو ممدة تحت حيطة وكاضمة تب لا بتجر كراع ولا يد. ..اها شيلك شيلك ودها البيت وجابو البيطرى (سجيمان) قاليهم والله الغنماية دى ما عندها اى حاجة وبتتصنع ساااكت. اها شفع الحلة اتلموا واحد قال : والله انا الغنماية دى كل يوم بشوفها بتاكل ليها حاجة جنب حيطة ناس رغية. مشوا على الحيطة لقوا بواقى بن وطبعا رغية كانت مسافرة. اتاريها الغنماية رامياها قهوة. لوووووول يا بت قطيم فتحتى باب الغنم الا ربنا يسدو

لوووووووول
لوووووووووول
لوووووووووول
سنتمنتال
متأكد كان بن؟؟؟؟

بت قطيم

وحيات عيونى ديل. ده الكلام السمعتو من ود الجيران. لكن ممكن يكون الشئ التانى داك. ما بستبعد

سنتمنتال
يمكن قاصدين (بن) لادن

وعَنْزةٌ مُصَابةٌ
بِرعْشَةٍ مُصَابةُ

بالَتْ نَفْسَها بَالتْ

في وَسَطِ القاعَةِ بَالتْ

فأُعجبَ الحُضور...

ونَفَخُوا بالزُّمُور...

َصفََََََََّقُوا وحَلَّقُوا

وحَلَّقُوا وَصفََََََََّقُوا

بَالَتْ ثَانِيَة ً بَالَتْ

واّسْتَعَرَ الهُتافْ

حدَّقُوا وحَلََََّلوا

وأَجَّلُوا وَمَحَّصُوا

وَمَصْمَصُوا

وشَخَََّتِ الذ ٌمَمْ.

قِمَمْ قِمَمْ قِمَمْ

مِعْزَى على غَنَم

بت قطيم

لوووووووووووووووووووووووول

السى اى ايه بتقبضك وغنمايتك بفسحوهم فى غوانتينامو

تانى ما تقولى كده

حنينة الحنينة
لوووووووووول على الحناكيش البخافوا من الغنماية
دي زي واحدة تقول ليك وااااي بخاف من الضبانة
زاتها كلمة (ضبانة) ما لايقة على الحنكشة
هسه البخوف من الغنم شنو؟؟؟
صدق من قال
بنات الديم بقدموا اولاد العمارات ،، في الحفلات يوصلوهم لبيوتهم ويجوا راجعين

المهم انك قد لاحظتي كيف أن غنماية السودان قوية عين،، ولا ادري كيف استقوا المثل (الغنماية تاكل عشاه)،، والله دي لو ادوها فرصة تاكلوا هو زاتو
هو منو ده البتاكل الغنماية عشاه؟؟؟
معليش سلكي ضرب تاني

سلمتي انت يا الطيبة

بت قضيم
النبي أسلاكنا كلها الم بخليها تضرب شنو؟
قلت لي بنات الديم بقدموا منو؟؟
غايتوا نستني العكاكيز... البورد ملآن من الجماعة ديل

وبعدين ياتو غنماية دي البترضي تاكل عشاء بياكلوا بني آدمين الزمن دة
والله كان الغنم جاتهم سوء تغذية

وبعدين الغنم عندهم أنفة و ما بيرضو بي كدة وحتي لو باتوا القوي

ممكن انضم لجمعية حماية الغنم؟؟

حنينة

Quote: وبعدين ياتو غنماية دي البترضي تاكل عشاء بياكلوا بني آدمين الزمن دة والله كان الغنم جاتهم سوء تغذية

لووووووووول يا الحنينة
سوء تغذية وشلل أطفال كمان

قبلت عضويتك في الجمعية،، بس جيبي لينا خطاب توصية من غنماية ماكنة عشان امورك تسلك
ولو قدرتي تجيبي الخطاب من تيس تكوني قبلت كمان عضوية بلا ضريبة
لووووول عليك

بالمناسبة الحنكوشية دي
قالوا واحد حنكش دخل الدفاع الشعبي
العسكري في التدريب ينهر فيهم
صفا
يقوم هو براحة يقول،، أها صفينا
انتباه
يرد، أها انتبهنا
التعلمجي اتضايق جدا ناداه
تعال هنا يا ولد
اسمك منو
قال ليه اسمي توتو
التعلمجي طاخ ضربه في كتفه،، قال ليه امشي اخشوشن شوية يا ود وبعدين اتكلم معاي

تاني يوم نفس القصة
صفا صفينا
انتباه انتبهنا
التعلمجي تاني ناداه
يا ود قلت لي اسمك منو؟؟؟
قال ليه اسمي توتو الوحش

لوووووووووول

يا اخوانا الحكاية شنو الليلة؟؟
الرد بمشي بالكربون ولا شنو؟
ارسله مرة يظهر اتنين

يا بكري .. زدت لينا الباندوث ولا شنو؟؟
عشان نضبح والذي منو

المحتارة حنينة

لووول يا بت قضيم
قلتي التيس توصيته تدخلني بدون ضريبة؟؟
والله دة تمييز جندري في قبيلة الغنم
حتي أنت يا بروتس؟؟

ما تسمعك الجندرية بس
بتلحقنا امات طه

وبعدين الزمن دة في أكتر من التيوس والغنم
بجيك بالتوصية

وسلامي لتوتو الوحش الخطير

لووووووووووول يا الحنينة
والله بلا التيوس الله ما كتر إلا التيران

بت قضيم
عندنا ناقة رايحة
دحين ماوقعت في عينك؟
بتكون مرت عليك في مساسقتك دي
أوصافا أسألي منها شنتير
باقي هو شيخ الرواعية في الحلة دي

بت قضيم

عندي كديسة اقصد قطة عشان الحناكيش

المهم لما ارجع العصر تاتي وتاخد ليها جغمة جغمتين من حليب بودرة انا ذاتي امس خليتوا ليها

وجات وكانت تغيانة شوية اليوم دا قمت لقيت علبة الحليب هطعت لتحت هطعت دي عرفتيها المهم نقصت ونزلت لتحت وانا كل يوم اديها
قلت الليلة اديها الحليب علي الريحة كدا
المهم تذوقت الحليب وتركته

قمت قلت ليها خفيف الوزنة الليلة المهم ادتني نظرة قوية قلت ليها خلاص نزيد ليك العيار شوية

وتعالي شوفي التهديف بعد داك

وعندها تاكدت ان الحيوانات لديها تعود وتفاهم مع اي شخص تتعود عليه

مهاجر
الحيوانات لديها القدرة على التعايش والتفاهم اكثر من البني آدمين
طبعا البني آدم كائن عاقل لا شك، وعنده مخ، لكني اظن احيانا انه لا يستخدمه بالشكل الذي من أجله خلق
عمرك شفت مثلاً حيوانات تتقاتل لأجل لا شئ سوي فرض العضلات والسلطة؟
أو تسرق قوت الغلابة وهي متخمة بالشبع؟

احيانا افكر أن من حكم الله الكثيرة في الأرض،، حكمة الحيوانات، ليس فقط لفائدة الإنسان المادية كما يكتبون في الكتب،، بل لاعتبارات نفسية أخرى،، فلو فكرت في كل حيوان بتروي وإمعان، لوجدت أنه يشبه الإنسان في صفة معينة، لكن بجانبها الإيجابي،، وكأنما الانسان، عبارة عن مجموعة حيوانات وضعت في قالب واحد وأعطيت بعض البصيرة والعقل

يقولون أن الحمار حمار
واحد في الشارع يصدم بالسيارة سيارة آخر ،، فيخرج الآخر شاتماً له ب (يا حمار) ولعمري،، لم أرى في حياتي حمار بيصدم حمار

وبمناسبة الكديسة
قالوا كلب اتزوج (أطة) ولدوا كلب (مأط أط) حولاااااااا من ثقالة النكتة
بالمناسبة انا لا احب الكدايس، العلاقة متوترة
لأنه شعرها انعم من حواجبي اتفاهم معاها كيف يعني؟

أهل العوض
ناقة ما عندنا
نحن تخصص بهائم من الفصيلة النوعية الأدنى
النوق والإبل ديل عالين علينا جدا وغالين
ونجوم
!!!مش بلعبوا سبق سبق

شنتير الراعي ما شايفاه حايم
يكون بطارد صيدة؟؟

سلام
والله زي ماقال اخد الاخوان من المفترض الاخ بكري يعمل ليهو حوش بقر زي حق امدرمان ولا سوق ناقة في البورد لووووووول
ادير اهترش شوية معاكم لاني قدر مافتشت على زول افكها فيهو مالقيت والشباب كلهم عاملين فيها مشغولين والمرة معاها اخزها في اجازة(معزورة لانها طولت منو)
المهم لما كنا في الهند اذكر معنا شباب والغريبة ماخناكيش واحد من بري والتاني من مدني والونسة جرت ودخلنا في الغلوطيات(الفوازير للحناكيش) سالنا واحد عن الفروة (التبروقة) قال بكل جدية انه سمع بيها قبل كده لكن وعلى ما يعتق انها حاجة كده بتخص النسوان
وسالنا التاني من ام سيسي قال ماعارف وسالناه برضو عن السخلة معارفها...نقبل وين نحن
جينا بلد الاختلاج زي ماقال الاستاذ بشرى الفاضل في احدى كتاباته وشفنا العجب الكديس بقت سنورة ووووو
لكن العيب مافي الولد القال ليك ياخلتو اذا واحد كبيــــــر يشيل الاسد فس صفحتو اول مايفتح الباب او يرد على التلفون تسمعيهو يقول لي امه ولا ابوه دا عمو فلان
والله يخلينا غنما والتسويهو كريت....وسلام

دخلت اسلم عليك يا بت قضيم
كيف الحال واريتك طيبه

الفاضل حمزة
يسلم عمرك ويعلي مراتبك يا اصيل
انا بخير الحمد لله
سلمت من كل شر

Quote: لكن العيب مافي الولد القال ليك ياخلتو اذا واحد كبيــــــر يشيل الاسد فس صفحتو اول مايفتح الباب او يرد على التلفون تسمعيهو يقول لي امه ولا ابوه دا عمو فلان

لووووووووووول يا أبو مهند
دي صدقت فيها جدا
لكن نقول البغم نطرد من الجنة

في ناس كتير جدا هنا ما عارفين المصطلحات الغريبة التي اوردت
تبروقة
أم سيسي
سخلة
بما فيهم المريسة والمشك التي اوردناها سابقا
والمشلكة ليست مشكلة حنكشة فقط، في ناس بتخجل انها تعرف معنى لهجاتنا المتعددة ، وتعتقد أنها لو عرفتها فهي بالضرورة دقة قديمة جدا
البغيظني ناس تقول ليهم تبروقة يقولوا ليك ( تبروكة تي شنوووو)

في ناس يلخبطوا في الكلام لاجل يطلع ناعم حلاته ممسح بالنيفيا
فتحسب أن اللسان مربوط بأنشوطة مستقرة في الحجاب الحاجز، حتى إذا ما تكلم احدهم، يطلع الكلام من جوف بير،، كله صدى ومكسر وتعبان من المشوار من المعدة وحتى الفم مروراً بالكبد والمصران
حاجة تحتاج دراسة فنية

بت قضيم صراحة انتي كنتي شغالة شنو ؟ ما بكلم ليك ناس النظام العام .
ما تقولي لي دي نوع من الثقافة , لأنو المشك ده في نايل كورس ما درسناهو .
تلحق غنماية الجيران تاكل الدامشيك القلتيهو ده الا تحلب روب بدل اللبن وتقعد تهوهو بدل المياعة , جمع ميع شنو ؟
اختي جات من الخليج معاها الشفع , بي باقي القروش وبعد ما كملوا علب الكاني والنيدو قرروا يشتروا غنماية وبعد تحديد المواصفات والمقاييس جات الغنماية في البيت وتعالي شوفي الدلع لي الغنماية اليوم داك , طبعا المفاجأة كانت لحظة ماأمي الله يخليها جات تحلب الغنماية , مؤتمر صحفي بس , تصوير وبكا وانا ماشفت وعليك الله احلبي لي في أيدي , هييي لبن , تقول حتحلب شاي , وانا دايرة احلب وانا بخاف ترفسني , يرفسك شيطان , جوطة جوطة ما حسمتا الا الضيفة العزيزة الغنماية بعد ما أبت تحلب ولا نقطة ومانفعت معاها التحانيس والتخصم , شممناها البرسيم , أكلناها ليهو خلطناهو في الخلاطة , ابت كلو كلو , أمي قامت شايلة البستلة , أصلو أختي أدوها هدية مع الغنماية بستلة لزوم الحليب وكأنو لو حلبنا اللبن في الكبابي طوالي الغنماية حترفض تحلب اللبن , أمي شالت البستلة الفاضية وحمرت فينا , والغنماية تعاين لينا واحد واحد ولسان حالا يقول اها الليلة نوموا من غير عشا وعصيدة الدخن دي الا تشربوها موصة , بتعرفي الموصة ؟

أبنوسي

لووووووووووول يا تبلدي
دي ثقافات أجنبية
يعني لو ما سكنا في الكرتون ما شقناه اصلو؟؟
كرتون سان جوزيف


اختك الحقيقة بالغت، غنماية من بعد النيدو؟
الحمد لله اولاد اختك ما فتشوا فيشة الكهرباء يوصلوها ليها عشان تحلب اللبن
والغنماية نفسها غتيتة، ذكرتني ضباط الجمارك، ما أن يلمحوا فيك بوادر التفاح ، حتى يصابوا بغتاتة أزلية فيقول لك الواحد فيهم، الشنطة دي فيها هدوم مكوية؟؟؟
طلعيها نكرفسها ليك
غنماية حاقدة

سلام للناس الحلوة
تانى نحكى ليكم عن غنم عطبرة
غنم عطبرة ديل متل ناسها بيبحو السياسة
والحوامة موت
اها قالو والله يكفينا شر قالو انه
مرة نميرى كان جاى يزور المدينة والنقابة منعت الناس من الخروج لمقابلته
اها بعدينتى
قام زول من الس النقابة
جاب شواويل فتريتة و كشحها على جانبى الطريق
من السوق لحدووووت
الكبرى قامو كدى ناس امبكول طلقوا الغنم مع جية المووكب اها شاافن الفتريتة ويلا نادن
بعض مييييع مييييييييع
مييييع نحنا غنم عطبرة ما متل الفى الخرتوم بيقولنا ماااااااع ماااااع
المهم جا موكب الرئيس وبس فى غنم على الجانبين
وكانت من الاسباب النميرى دمر المدينة
وايضا
ممكن الغنماية تلعب دور الحمام الزاجل
فى واحد فى عطبرة حبيبتو عليها حلب الغنم
فبيخت ليها الجوابات فى خرتاية الغنماية
الخرتاية هى عبارة عن كيس يغطى به ضرعى الغنماية الوالدة*

لووووووووووول
لوووووووووووول
لووووووووووووول
يا بيان
بالجد ذكرياتك عن الغنم ممتعة
غايتو الحمد لله انا ما مهبوشة براي
هاهاهاهاهاها
غنماية عطبرة بتقول مييييع والخرطوم مااااااع
لوووووووووول
الفيل ما بختاك غايتو
لذيذة ياخي انت بالجد لذيذة

تعرفي يا بت قضيم
عندنا نحنا اهل العوض كل اسرة تودي غنمها الي الرعي الصباح وهو يجمع فيهم لحدي 9 صباحا وبعد داك يشتت علي البحر
ومرات طبعا الراعي يمشي النيل او ينوم اها المراح كلوا يمشي يدخل الجناين وعلي صاحب الجنينة يوديهن الدخولية دي بتعرفيها
وتعالي شوفي الخبر لما يجي الحلة كلها تقوم

ولو قيمنا الغنم ما منهم فائدة

اما القطط صدقي حلوات بس البيضة او الملونات
وعندهن عشرة سمحة

في واحد في جدة رجل اعمال كبير الان
كان عندوا حوش كبير
وكلوا قطط
اها شفتي الراجل بجمع من المطاعم اكل ليهن
كل يوم
ويوم نائم في الحوش صحي لقا الكدسا شايلات كل واحدة قطعة دهب
ومنها بقي مغندل

دي كيف معاك

شكرا بت قضيم
قلنا نديها صنة
لكن شجعتينى

اخوى القاعد فى البورد دا
كان عندو غنماية رباها من هى صخلة
كان عندو هواية يربط ليها كيزان
الصلصة و يسوقها فى شارع
الظلط
تبقى كع كع كع كع كع
زى اللمرة الابسة كالب عالب

بت قضيم العزيزة
حبابك عشرة ياختى فاقدينك وفاقدين مواضيعك اللذيذة
اها ياختى حبوبتى الله يرحمها كان عندهامراح غنم كان 7 كان تمانية وساوة ليهن بيت جوة الحوش ينضفوه كل يوم الصباح بعد الغنم يمشن الراعى بعد يحلبوهن ونح نتجغم الشاى باللبن الماخمج-انا اصلى ترباية حبوبتها-وبعد ما يرجعن من الراعى العصير توووش يدخلن اوضتن ويسدوا عليهن الباب وسبحان الله يعرفن درب بيتهن عديل ما بغبنه،وعاد يوم تكون واحدة نفسة نحن بنتكيف عشان بنتعشى باللبا(بتعرفى اللبا لمن يغلوه ببقى زى الجبنه وبنطعمه بالسكر حاجة ما تخلص)اها يا اختى يوم جيت من المدرسة لقيت حبوبتى تهرج ،مالك يا امى؟قالت الليلة يا بتى واحد من تيوس الحلة عامل نفسه -سوبر ستار التيوس-قال كلامن كتر داير يحرش علينا الغنم ويخرب علينا
قال شنو يا حبوبة؟
قال للغنم تانى كل غنماية يكون عندها تيس واحد خاص بيها،نحن يا بتى الغنم ديل بنطلقن الراعى والراعى عنده تيس ولا تيسين بكفن المراح كله،دحين حسع يا بتى يعنى انا كل غنماية اشترى ليها تيس وابنى ليها بيت براها ولا اسوى شنو يعنى؟فى كلام السوبر ستار الطالع جديد دة؟
وبعدين يا حبوبة؟
شن البعدين يا بتى! كان التيس ما عنده عقل نحن بنباريه؟انتى ما سمعت المثل البقول:-(ريسوه وتيسوه) يعنى كان سويتوه ريس ما تسمعوا كلامه،هو فى تيس بسمعوا كلامه ان شاء الله كان اكل مكتبات الدنيا كلها خليك من اكل الجرايد
تحياتى

مهيرة الحبيبة
ده سوبر استار التيوس واللا امريكا تتدخل في مناهج التيسنة والغنمنة

ماله على الغنم دايرين يبورن فنجد بعد حين الغنماية بدل ما تمعمع مييييييييييع تقلبها لتقول يااب شرررررررررررررررا

يجازي محنو تيس جيرانكم

بعدين انا برضو فاقداك، ومدة ما قريت ليك جديد
واللا انا براي متلشة يا قول سنتمنتال؟؟

غايتو يا بيان أكيد لكم علاقة بالأفيال
هاهاهاهاهاهاها
اخوك مين بالضبط ما كنت عارفة عندك أخ هنا
تعني اخ شقيق؟؟
من هو؟؟
شفتي الشمار؟؟
بس الشمار الكتل الكديسة باعتبار أن الكديسة عندها أزمة

بت قضيم
اخوى اسمو عادل امين
تاج راسى
ودقاق دقاققينى لووووووووووول
عللى اسع بقى جمهورى وخلا الشكل

بيان
ما كنت حاتخيل أن الأخ عادل اخوك
هو جاد على الدوام، وانت مرحة في العادة وجادة عند اللزوم
سويتها ليك ذي دواء لوز
سلمتي وسلم اخوك والعيلة كلها
يخليكم

مهاجر قد اقيم عليك الحد بسبب الجناية العنصرية التي ارتكبت

الكديسة يا بيضة يا ملونة وما عدا ذلك شينات؟؟؟
يعني لو كانت منكشة كمان طوالي تحفر ليها حفرة وتنعي روحها
مهاجر الكلام ده بعوقك
بعدين لو موضوع الكديس البدي قروش ده صحي يبقى فعلا تعيس الحظ يلقى في الكدايس واحد فلسان
وقالوا مرة نمر امريكي شايل فريسة قابلته ليك كديسة سودانية مزعطة وضعيفة اتشابكت معاه ضربته ضرب شديد وشالت الفريسة
النمر استغرب قال ليها بس عندي سؤال، كيف انت كديسة قدرتي تغلبي نمر؟؟
قالت ليه يا ولدي انا ما كديسة انا كنت أسد إلا الجوع كافر
لوووووووووول يا مهاجر العنصري

مسابقة أجمل غنماية فى البورد (لووووووووووووووول والله ما قاصد)
المهم انا بقترح مسابقة يجمع لها غنم وغنمات البورد. تبدأ المشاحنة بترشيح الغنماية ذات العيون الاجمل والحواجب المقرونة والوجه الملائكى .

لوووووول أعمل ساتر يا سنتى

الساتر الله يا زول

ملحوظة

جنى وجن الغنماية لما تقول ليها تك ..تتلش فيك زى الما فاهمة حاجة

سنتمنتال للأسف غنمايتي ما تقدر تشترك في المسابقة دي
إذ بعد أن بوئها دكين مكانة رفيعة في عالم النعاج
كيف لها أن ترجع تتنغم تاني؟؟
لو سمحت خليها مسابقة أجمل نعجة أفضل

والله ستار حليم،، ومنتقم جبار ايضاً

بت قضيم

انا قصدي الكديسة السودا طبعا من الجماعة اياهم وبضيعنا ساي لكن التانية ديل حلوات وظريفات

انتي لسة منكشة كريم الباراشوت ما عمل حاجة معاك


في حاجة في الغنماية مزعلاني شديد
يعني تكون عندك شتلة جميلة ومعها اشجار تانية وتخافي انوا الغنماية تجي تاكلها وتسوريها وتحصنيها بكل الوسائل وبرضو الغنماية تلقي طريقة وتاكل الشتلة
انا في اللحظة دي ممكن اخسر ابوها لو لقيتها قدامي

يعني يا عسووولة ما ضحكت لامن قعدت في الواطة

والعجب في غنم الديم البيقدمو تيوس العمارات

صدقيني مشتاقين ليك كتير

قرجة أخوي
لوووووووووول على غنم الديم
يا زول انت بتاع شبك مالك؟؟؟

بعدين احنا (ساتو) مشتاقين
اينك انت والزمان ترللي؟

مهاجر اخوي
البارشوت ما زال يعمل جاهداً في تصليح ما قصفه الدهر
بس منكش الله ما بترفع


اتفقنا أن الغنماية ذات قوة إرادة وقادوس صارم
والغريب أنها تختار زرعاتها بعناية تماما كما كنت أفعل زمان عند اختياري لنوع الشامبو المناسب لشعري
بيد أني توقفت من زمن لإدراكي أن ولا شامبو منهم ينفع هذا الكائن المتمرد، عكس الغنوم (على وزن حروم) والتي للآن تبحث وتتقص وتتذوق وتتخير الأنواع التي تأكلها من الزروع

يعني عمرك شفت غنماية بتحب النيم؟؟؟
رغم وفرته وكثرته في الشوارع؟؟؟
واللا غنماية تاكل عشر بضم العين؟؟؟
غنماية ذواقة هاي كلاس بتهزر انت
النيم ده خلوه لينا بس

بعدين ياخي ما تخسرها هي زاتها ابوها دخلو شنو؟

..
.
والله العظيم باريناك من
زقاق لى حوش لسهله
لمن وصل ابوحمامه
بالله بالجد شفت غنم الحلة الجديدة ديل بعملوا شنو

يا بت انت ماكله مع الغنم ديل مشك؟؟
يا ربي بتعرفى المشك
والله كن عرفتيهو تكون مبالغة عددديل وما بجى صادى

الله يحفظك

وادفقى بس

تبلدينا
باريت منو بالضبط انا واللا الغنماية؟؟؟
لو كنت مباري الغنماية يبقى انت الماكل المشك ما انا

قالوا صرصار مباري عربية مجاري مبارة شديدة خلاص لما نفسه انقطع
في السكة قابل واحد صاحبه سأله،، مالك ياخي جاري ورا عربية المجاري دي
قال ليه ياخي تصور التافه ده شفط المدام
لووووووول
قلت النكتة دي في البورد قبل كده عشان ما تقول لي قديمة

بعدين تم ذكر المشك في الدرس السابق
انت بس اقلب الصفحة وخلي الكسل
وقالوا السوداني الكسلان ماشي في الشارع من بعيد لمح ليه قشرة موزة واقعة قال لنفسه
أه،، الله يعينا على الزلقة

ويحفظك انت ويعلي مراتبك
آآآآدر يا كريم

تبلدينا
باريت منو بالضبط انا واللا الغنماية؟؟؟
لو كنت مباري الغنماية يبقى انت الماكل المشك ما انا

قالوا صرصار مباري عربية مجاري مبارة شديدة خلاص لما نفسه انقطع
في السكة قابل واحد صاحبه سأله،، مالك ياخي جاري ورا عربية المجاري دي
قال ليه ياخي تصور التافه ده شفط المدام
لووووووول
قلت النكتة دي في البورد قبل كده عشان ما تقول لي قديمة

بعدين تم ذكر المشك في الدرس السابق
انت بس اقلب الصفحة وخلي الكسل
وقالوا السوداني الكسلان ماشي في الشارع من بعيد لمح ليه قشرة موزة واقعة قال لنفسه
أه،، الله يعينا على الزلقة

ويحفظك انت ويعلي مراتبك
آآآآدر يا كريم

بت قضيم

انتي عارفة ما اظن غنمنا عندهن انتاج بقولوا وناس البيطرة هجنوا الابقار ما ممكن كان يهجنوا الاغنام العجيبة دي

اما الشامبو نصيحة قوية جدا واياكي ان تتركيها
في بلد النشاف دي اياكي ان تغسلي شعرك بموية الملح دي

دائما غسلي الشعر بموية شراب

دي مجربة


في ناس كتيرة شعرها اصلح وبعدين في جانب نفسي وجانب اكل خضروات لنمو الشعر وانتي سيد العارفين بالجانب النفسي

حموووور ...مييييغ
بيووووض..ميييغ
زرووووق... ميييغ

الصوت صوت غنمى
كضاب يا عربى
لووووووووووووووووووووول
انا صقرا بختفه
وانا فارسا بحجزا

حمموووووور.. مييييغ

لكن ما خليتو للغنم صفحة يرقدن بيها

بت قضيم غنمايتك ما هينة ولا نعومة غنماية امي ولا حتى الطرشا، غنماية بت بياع وبت بياع دي درستنا في الابتدايى وعندها غنم طايرات ليها في راسها ومرة جا موسم العشار وما عندها تيس ولو غنم صفقن السنة وما ولدن اها ما شربت شاي بلبن ، فاستلفت من حبوبة تيس ، وبعد عشرن الغنم رجعتو ا ، اها ما لقت حبوبة قالت لي يا بت كان حبوبتك جات قولي ليها هدا التيس خلاس الغنم عشرن وما تنسي تقولي ليها -انشاالله عامرين -اها يا بت قضيم ودعتك الله وانشا الله عامرين

لووووووووووووووووووووووووووووووول يا عيشة بت فاطنة

دقيقة بس
هسه بجي

عشة لوووووووووووووول
وانت تعلمين الاجيال الجديدة
مفردات ما موجودة فى التلفزيون ولا الدش ولا العاب الالكترونية

بت قديم درورى تجى

لوووووووول ساي يا ساي يا سينتمتال وبيان ، وامال لو حكيت ليكم بغنم نا خالتي تقول شنو؟؟

يا قول سنتمنتال وبيان
لووووووووووووول كبيرة يا عشة بت فاطنة
ولا تعليق
غير الله قولي زيادة


بيان
المودوع تلع من يدي دخل في جضوم المدير