تأثير سلبي للغربة على شخصيتي..ماهو الحل أحبتي؟

أحبتي بالبورد
أحببت أن أشرككم في شأن نفسيتي و شخصيتي التي تغيرت في الغربة و التي لم أفطن لها الا بفضل تنبيه والدتي حفظها الله فقد تغيرت شخصيتي و طباعي بشكل كبير جدا اذ أصبحت عصبي المزاج و سريع الغضب و بصورة حادة تكاد تصل الى مرحلة الخطورة
هل تتصورون اني قبل أن اتغرب كنت أحلم من الحليم و أكاد اكون أقرب الى البرود من الحلم اذ لا اغضب الا نادراً و اتحاشا المشاكل تماما و لا اقربها الا ان تأتي الياو استطيع ان اجلس مع اشرس شرس وكنت هاديء الطبع و قد تكون هذه الصفات قد حببت الناس فيني كبيرهم و صغيرهم و بهذه الصفات ايضاً قد أكون كسبت عدد كبير من الاصدقاء و الاحباب
الا أنني بعد ان تغربت اصبحت افقتد تلك الصفات واحدة تلو الاخرى حتى أنني استطيع ان ادخل في مشكلة بعد ثلاثة كلمات مع أي أحد و لا أتقبل أي شيء لا ارضاه و لا اجامل و لا استطيع ان اتحامل على نفسي لدرجة أن أي تصرف صغير من اى احد تجاهي يكون قد مسني اغضب لدرجة فقدان الاعصاب و عدم السيطرة على نفسي و قد يمتد الى مرحلة رجفة بالجسم و لا أهدأ الا بعد مرور زمن طويل و قبل فترة أغاظني شلة من الشباب في الشارع فطاردتهم بسيارتي حتى كدت ان اقتل اثنين منهم و اوسعتهم ضربا الى ان ارتحت و لم اشعر بنفسي حتى رجعت البيت و خلدت الى السرير و راجعت نفسي و سالتها ماذا لو وقع احدهم تحت اطار السيارة و قتلته اين سيكون مصيري و ماهو دفاعي عن نفسي للمحكمة
والله لم اكن كذلك و لم اكن شرس الطباع الى ان اخذتني هذه الغربة اللعينة قبل اربعة سنوات
هل أنني لم اتحمل هذه الغربة؟
هل تشير الى نفسي بضرورة الرجوع؟
أم ماذا يا اخوة البورد أرجو ان تعينوني
حتى لا أصل الى مراحل متأخرة

الزومة
تحياتي
بلا شك الغربة لها تأثير سلبي مهما كانت البلد الذي انت فيه ، و خاصة الإغتراب بعد سن العشرين. و القصص تطول في هذا السياق ، و لكن كل ما أنصحك به أن تتعوذ من إبليس كلما عرفت أنك ستثور أو تغضب أو يستفزك أحد ، فهذه الوسيلة جربتها كثيرا و الحمد لله على نعمة الإسلام.
تسلم اخي الزومة

العزيز أبو جهينة
تعرف الشيء المحيرني هو مثلاً اذا غضبت الصباح ساتابع غضبي حتى المساء و حتى ان انام و قد يكون السبب ابسط من البساطه
و لكن باذن الله ساعمل بنصيحتك و استعيذ بالله من الشيطان الرجيم و اصدقك القول بانني عندما اغضب لا استعيذ بل ازيد من الغضب حتى احس بان دمي اضافو ليهو موية نار
و لك كل شكري

الزومة ازيك..... الغربة خشم بيوت يا اخوي....غايتو ان كنت في البلد الفيها انا.....انت بتمر بمرحلة اسمها المرحلة الاسدية.......وبعدها مباشرة حتدخل في المرحلة الحميلية.....تبقى حَميل........واذا دخلت في المرحلة دي تب ما عليك خوف........انا لي في المرحلة دي بفضل الله تعالى عشرة سنوات....وابدا لا بهش ولا بنش......وكدايس الحلة كلهن عارفات مواعيد عشاي......... يا عشاي

دكتورنا الطاعم سجيمان
قلت لى المرحلة الأسدية لكن دي ها تنتهي بتين ياخي دي السنه الخامسه و مازلت دمي يغلي لو واحد دخل قدامي بعربيتو من غير ما يأشر أتمنى أدخل المرحله الحميليه دي عشان قلبي ده يوم خايف القاهو واقع قدامي
لكن يا سجيمان اخوى باقي لى انا علاجي الا في السودان متمني امشى الدكتور يقول لى كده

ياشقي انت كنت في ياتو بلد؟؟؟؟
انا كنت 18 سنة فى ليبيا وراجع بعد اسبوع وبعدها ساعرف هل تغيرت ام لا

ابو يسرى
اخوك متنيل في السعوديه و غلبتني القعده عديل و بقيت اتفشه في خلق الله اي زول يلاقيني الله قال بقولو و يا كافي البلا زمان رجل الشرطه ده الا الاقيهو في صواني الحركه اسه صاحبك يحاجج اكبر دورية شرطه و مره مره امد ليهو اصبعي
لكن اخوك لما نزل السودان من المطار اتبهدلت لكن ببحلق بعيوني و مبسوط بسط ياخ هناك الحال غير هناالناس ذاتها تعاين ليها بالك يرتاح

...
العزيز الزومة ..لك التحية
تطرقت الي موضوع مهم جدا وحالات يراها البعض عادية وهي مطلقا غير عادية..واعتقد انها تحتاج الي دراسة وتحتاج الي علاج..
عموما يا سيدي قد تتفاوت هذه الحاله بين فرد واخر ..ويعتمد هذا ايضا علي البلد التي تعيش فيها او متغرب فيها ..اعتقد ان نصيحة ابو جهينة هي عين الصواب..
تعرف قد تكون حالتي عكس حالتك تماما.. لقد كنت قبل خروجي من السودان عصبي جدا..ودائم الزهج والتزمر..وبعد سنوات من الغربة في البلاد العربية تحديدا.. لا ادري متي حدث التغيير ..ولكن كل من قابلني بعد سنوات لاحظ انني تغيرت تمام واصبحت بارد جدا..انا الان اعاني من مشكلة البرود..حتي ان اصدقائي يسمونني احيانا مستر "عادي" لان كل شئ عندي اعتبره عادي جدا..قد تكون حالتك العصبية المفرطه ..وحالتي البرود المفرط..
انت + انا / 2 = حاجة معقوله ...لووول ولا رايك شنو ؟

ولك الود وطول البال..وبرضو عادي

تنقو

الحبيب تنقو
كلامك في محلو المسألة تحتاج الى علاج و دراسة لانو اخاف اذا استمر الحال كده بان اجيب لنفسي مشاكل انا في غنى عنها
يعني الغربه دي يا تكلتني يا ما حا تخليني
و يا ريت لو عملو بينا خلطه كان نكون ميه بالميه
بس المشكلة اخوك لو رجع السودان حا نبقي طين
و يا ريت لو ارجع عادي يا رائع

الزومة
تحياتى
والله ياخوى دى امراض الناس كلهم
اولها لما تحس انك مضيع زمن فى الفاضى يعنى لما تحسب السنين وتجد
المحصلة صفر وانت شغال فى شركة وراتبك مش بطال
وقبل سنة مشيت عشان اقابل دكتور فى بخصوص اننى عندى حرارة فى البول
وفرحت قلت خلاص سادخل عالم الغنى من اوسع الابواب لانى عندى اعراض سكرى
والذى يصاب بالسكرى هو صاحب الفلوس على حسب فهمى وانا صغير
عموما بعد الكشف والكشف طلعت سليم وبس انا غير حليم
فالدكتور قالى لى انت شغال شنو فقلت له مهندس انترنت بتعامل مع اجهزة واحيانا ناس غلظين قال لى بس دا السبب ,المعاملة الغلظة دة بتسبب لى تعصب واضرابات صارت تاسر على المثانة بالتالى اقل كمية تريد اخراجها اها يادكتور اخلى الشغل دا قال لى لا انا ذاتى حالتك دى عندى لان المستشفى دى خاصة واحيانا مدير المستشفى عايزك تفرم المريض فرم ودا يتنافى مع حالتى ومهنتى الانسانية
فياخوى حاول غير شوية فى الويك اند
ولو كنت المملكة امشى عمرة كل شهرين لانها رخيصة جدا من ارياض البص رايح وجائى ب 70 ريال
ود حالات بتصيب العذابة او الذين ليس معهم اسر
انا بكتب لك هذه الرسالة وجائى من يومين ويك اند وكان عندىاجازة سنوية انتهت قبل اسبوع ولكن شاعر بانى محبط مفروض اغير الشغل واغير البيت واغير العذابة واغير ملابسى واغير خطيبتى وتانى ما برسل فلوس لاى زول ولكن عندما يتصل اخوى المستهبل او اختى الطالبة او امى الطيبة او ابوى رجل المستحيلات او نسيبى الذى كان مغترب وساهم فى دراستى والان حالته ساءت او اقاربى الذين يعشممون بان حلال المشالك او زملاء دراسة احن الى ماضى معهم او زملاء حى عشنا المر والحلو مع بعض...لما يتصلو ديل وعايزين مساعدة برمى سندوتش الفطور من خشمى وكباية الشاى من طاولتى وعلى طول على البنك العربى والتلى مانى

اها يالزومة اخوى فكرك نحن بنرجع بفلوس بعدين غير الناس والكلمة الطيبة...دى حالتى انا بس انت عليها قس...على الطلاق انت زى كدا
ولما تلقى ليك طبيب يعالج حالتك دى ابقى اتصل على ...لكن انس المشاكل كل شى بروح
وتسلم ياهميم

الزومة....اصبر.. قربت تتحملن...كلها كم سنة كدا......

ابوقوتة بالله الضغوط بي تبوّل.؟....وانا اقول يا ربي مالي الليل كلو اشولت علي الحمام......... بارك الله فيك والله....طمنتني تب

الاخ العزيز ابو قوته
تصور نكاد صورة طبق الأصل أما مسالة فحص السكري فقد ذهبت قبل سنة الى المعمل و اكدوا لي بأنني خالي من اى امراض خصوصا الضغط و السكري و هما وراثيان في اسرتناوقد شككت في نفسي لاني لما اغضب برجف و بروق بعد فترة طويلة
و فعلا مجمل الضغوط هي اللي قد تكون اتلفت الهاردسك النفسي فاصبحت تمارس هذا التمرد الخطير الله يهدي سرنا جميعا
و تقبل كل شكري

الاخ الزومة
احيانا بتمر على الواحد جملة ضغوط لكن بالتدريج يمكن السيطرة على الانفعالات ، لانه لن تسلم الجرة كل مرة ، فحاول ان تدرب نفسك كل مرة على ضبط انفعالاتك
زي ما قالوا اصلو العشرة سنين الاولى دي صعبة شوية

الاخت مايا
ماهو التدريب ده العايزين نعرفوا يعني مره قلت ابدأ افوت للناس مشيت اليل كلو اتقلب اسه الزول ده كان خبطتو كف موش كان ارتحت من الناريه دي و بقيت من داك اليوم ما بسكت ارجع البيت اتشوى
يعني الغربه دي حتى روح التسامح مسحتا من قاموسناو انا بالطريقه الله اعلم اكمل العشره الاولى سالم
و تسلمي من كل شر

الاخ الزومة
قصدت انه في اشياء ممكن الواحد يفوتها ، وبالعكس بيكون افضل عدم الرد
لانه لو كل شي الواحد وقف عنده في الاخر حيخسر كتير
ممكن مع ضغوط الغربة والتفكير في شتى الامور بيخلي الواحد يكون حساس لاقل حاجة ، فبقليل من التدريب على تحمل المواقف بدء من المواقف الصغيرة وانتهاء بالكبيرة ممكن تجاوز الاشياء

الاخت الفاضله مايا
المشكلة أنا عندي الغربة ذات نفسها لغاية الآن ما دخلت دماغي و ما قادر انسجم معاها رغم وجود الاصدقاء الحلوين و رغم الوضع المادي العادي لهذا الايام
و دي يظهر هي مشكلتي و لاني كنت فاكر سنين بسيطة و ارجع لي اهلي الا باقي لي الموضوع اصبح مفتوح و ده البجيب الجن لى زول بلدي زي كده
لكن من يوم فتحت البوست ده و انا متحسن خالص يمكن انا كنت عايز زول يتطبطب على
و الحمد لله ما عدمتكم

أخي العزيز الزومة

تحية وسلاما

لك الشكر يا أخي على إشراكنا في هذه المشكلة.. وأبشرك أولا بأنك الآن في الخط الصحيح.. أقصد أنك قد أحسست بالمشكلة، وهذا في حد ذاته جزء كبير من حلها.. لا شك أن الغضب يقود إلى التوتر والتوتر يقود إلى التسرع والتسرع يقود إلى الخطأ.. ويصبح السؤال هو كيف يتخلص الإنسان من الغضب ومن سرعة الغضب.. وأنا لا أريد ان أكون واعظا هنا.. هناك وسائل بسيطة تعين على ذلك.. أولها محاسبة النفس، وقد رأيتك تحاسب نفسك وتعترف بأنها أخطأت.. وثاني هذه الوسائل الإعتذار عند الخطأ، ولو الاعتذار في سرك إن لم تجد من تعتذر له.. يمكن أن تلزم نفسك بأن تعمل أمرا بنية التكفير عن الذنب، بدون أن تخبر أحدا، كأن تعطي مسكينا مبلغا من المال.. فالحسنات يذهبن السيئات.. ويمكنك أن تقوم بعرض مشكلتك على شخص تثق فيه وتحبه وترى أنه شخص حليم، وأنا أظن انك في السعودية، فلماذا لا تقوم بزيارة المصطفى عليه السلام وتسلم عليه، وتحكي له مشكلتك، وتدعو الله في حضرته أن يخلصك مما ألم بك ..

"لقد جاءكم رسول من أنفسكم، عزيز عليه ما عنتم، حريص عليكم بالمؤمنين رؤوف رحيم"

ولك خالص مودتي

الدكتور ياسر الشريف
والله كلماتك نزلت على بردا و سلاما
و فعلا انا موجود في السعودية و اذهب كل فترة الي الاراضي المقدسة الا انني بمجرد ان افارقها ارجع للحاله المستأسده كما يقول دكتور عادل الصديق سجيمان
و الحمد لله كما قلت اني شعرت ان اسلوبي خطأو هذه محمده
و هذه خطوه في بداية الطريق الذي اتمنى ان لا يطول
شاكرا لك عزيزي اهتمامك لامري
و لك احترامي

العزيز الزومة

اول حاجة ما ذكرت إنت متنيل ويين فى الشتات لانو كل حتة دبرستها بتختلف وللوقت داك بقدر اقول ليك إنت محتاج لى إجازة ياحبيب

الاخ ترهاقا
اخوك متنيل في الرياض السعودية
يا زول انا علاجي بس في الرجوع و تعال لاقيني اديني كف في السودان كان مااديتك مية جنيه انا غلطان
تقول اجازة ياخ انا مشيت اجازة 20يوم متزهلل زهلله جنون لغاية ما لقيت نفسي في طيارة الرجوع

أخي الفاضل..
لك التحية وللجميع..
كثير ماتعترينا ..حالات نحس بأننا لسنا نحن من فرط التغير في طباعنا ومواجهتنا لمواقف بعينها ..فنعود لنواجه انفسنا ..ونأسي علي ما فات ..وعلي تسرعنا ونعض البنان..
لدي تجربة ..في هذا ، فقد كنت احس هذا الإحساس السالب ..في احايين كثيرة ولأمور احسب انها غير ذات أهمية بقدر الثورة والفوران ..واشعر حينها بتلاحق انفاسي ..فبت اسارع للإستعاذة بالله اولا ..ثم أخرج ..وأمشي ..وأمشي بخطي سريعة منتظمة..بلا هدى وفي مكان هادئ نوعا..حسب الظروف ..أملأ رئتي بالهواء ..واتنفس بعمق ..أكرر ذلك ..ولا ألبث ان اشعر بالإرتياح يتسلل لداخلي ..ويعود الهدوء تدريجيا لنفسي .. ارجو ان تجرب هذا..فهي وصف ساهله..

العزيز الزومـــة

وبما انك تقيم فى اردأ الدول من حيث الغربة وتحت إمرة كفيل مستبد لا يتورع من إقتسام مرتبك لمجرد طلبك منه خروج وعودة ،وشرطى مرور يطلعك غلطان مية مية مع إنوعربيتك كانت واقفة لمن جات عربية السعودى صدمت عربيتك وبعد ده كلو يقولو ليك تصلح ليهو عربيتو وإلا يسوقوك للتوقيف ، وتصحى تانى يوم تلقى جوازك داير تجديد ويالهوى من تجديد الجواز فى الزفارة اقصد السفارة السودانية ،تجى طالع من الزفارة اقصد السفارة عرقك صابى وقميصك ناقص تلاتة زراير،وتجى البيت ياعينى تلقى فاتورة التليفون وصدقنى إنت ما عندك ذنب إنو الفاتورة جات كتيرة كدة لكن ده كلو من الزول السخيف داك اللى كان نازل معاك فى البيت ما صدق لقى ليهو تليفون ورقد فيهو واخونا الزومة فى الشغل يكابد ومرة يجامل الكفيل بضحكة صفراء تخرج كطراش الكوفار بعد ليلة منيلة ،وكمان فى الشغل ما مريحنك بالله داك بس عشان لبنانى وكمان السورى اللى معاهو يصرفوا الشيء الفلانى مع إنو خبراتك تساوى عشرة منهم ،بالله ده كلام ده ؟ ده غير نظراتهم الدونية (ده زول ساكت)مع إبتسامات خبيثة للتقليل من شانك ، - ازيدك لسع

المهم ده كان قراءة طالع ساكت منى يعنى تخمينات وهى كفيلة بأن تجعل منك متوترا كحال كل الاخوة المغتربين ياخوى أديها صرمة لانو فى حاجات كتيرة إنت ما عايزها لكن بتضغط على نفسك شديد فى إنك تمشيها ،واللى هى بتترجم فى شكل نرفزة ونفاذ صبر
مع تحياتى لك

تحياتى ايها الزومة

هذه الغربة مدرسة نتعلم فيها كل يوم الجديد المثير

والذى ندفع فيها الكثير من حياتنا

يجب ان نتسلح بالايمان

المنقذ الوحيد لنا

فالانسان لايكون عزيز الا ببلاده

لذلك انصحك اخى

بان تنظر الى تلك المشاكل التى تواجهك من زوايا ومنطلقات متعددة

وتحاول ان تجد لها مبررات ولا تحمل نفسك الكثير

فهذه هى الدنيا تجد فيها مايعجبك وما يغضبك

وان لم تجد مبررات لبعض السلوك فيكفى ان البشر فيهم الجاهل

وهذا اكبر مبرر

اخوك شدو

الأخت بنت النيل/و هذا ايضا حل آخر ساجرب ايضا مسألة المخارجة من المكان و ربنا يسهل,و لو انو نوعنا ده لايمكن زراعته مرتين عشان كده بتحصل لينا تغيرات اكبر مننا سواء كانت فسيولوجية زي اخونا ابو قوته او نفسية زي حالتي دي لكن يا بنت النيل لو شفتيني في السودان تقولى الحلم ماشي على رجلين لكن سبحان مغير الاحوال

اكيد يالزومه للغربه تاثير سلبي علي معظم الناس
ولكن لها فوائدها وان شاء الله الجميع يعودون للوطن قريبا

الاستاذ الموصلي
لا ننكر للغربه انها عدلت بعض الشيء في الاوضاع الماديه لكن يا خوى عشان القروش دي قربت تاخد عمرنا ده معاها
اقول ليك انا قربت اكتل زول من الغضب و اخوك زمان كان سليت على سكين بفوت اخليك نسأل الله يردنا سالمين لبلدنا
الله يجازي الكان السبب