لحظة ان اهدى هشام يازول اساسي باقة ورد واهديتهما ايسكريم

طبعا في شمار ياشباب
عارف ان معظمك ح يفرح بيهو
.....
...

Quote: لأن الحب هو الغفران والاشتياق والوفاء…هو اللهفة والجنون والعصيان…هو التجلّد والإلهام والطموح والاحترام…هو الصباح والندى والحرير…والضياء والصبا والخرير لأن الإنسان فلسفة للحب …ومقبرة للعشق…فؤادي ذاب علي كلماتك…وبكى حتى جُنّ على راحتيك…وانتحب حتى انتحبت له الكلمات …و ها هو الآن يدفن في الثرى…فأتني وأشعلي الشموع فوق اسمي …وأهدي التعزية إلى قلبي …في هذه اللحظات أنشر دعوة لحضور مراسيم جنازتي

صديقي الجميل حد التورد اساسي كان قد فاجاني اعتذاره المكتوب بماء الزهر وحديث الروح الوجدي ، ابان خصامهما الراقي هو وعصفورة البورد الرقيقة شيري . وقلت كما الجميع ان الرجل يؤسس فعلا لادب االاختلاف ونوع اخر من العلائق الانسانية ذات المنحي الجمالي الراقي.. لاعرف بعدها كم هو رائع ومتدفق حتى وهو يضع على وجهه كثير من القطامه .
ثم فاجأني مرة اخرى وهو يتخاصم ويازول يازول . واحزنني جدا ان ارى اثنين من اجمل اصدقائنا واحبابنا ومن الاعمدة الاساسيةة في رابطة بودراب جدة ان يكيلا الاعتراك الى بعضهما البعض ونحن نتفرج .
يازول يازول هو ايضا صديقي ، كثير من الوقت هاتفته وهاتفني لنعرف اخبار بعض ، هذا الرائع على الدوام تجده مهموما باصدقائه والسؤال عنه ، هو العمدة الحقيقي لنا في جدة طبعا بعد الكفيل . وكما مرة اجتمعنا على دعوة منه ومبادرة تمسك بها هو والاخ الرائع صلاح درار حتى اتاحت لنا الالتقاء يومها .
صدقوني ان هذا العضو المشاغب الذي سمي نفسه باساسي هو كتاب مفتوح بالنسبة للذين يعرفونه عن قرب
وهو وجه اخر لطيب المعشر ودماثة الخلق ، وحلاوة الكلام والنكته . سريع البديعة ، كريما ما ان يسمع بك جيت زائرا لجدة القده حتى يبادر الى الاتصال بك . ثم يصر ومعاها (طلاق كمان ) على ان ينال شرف تشريفك في منزله العامر .
غايتو انا مرة لمن رقوه في الشغل عزمني على سندويتش بيض بالجبنة . شفتو كيف الزول دا جميل.
لذلك لم اتفاجئ ليلة الامس وانا اتلقي اتصالا منه بان اتيه على عجل ، لان حبيبنا يازول يازول الجميل يتواضع وهو بكامل القه وجمال هندامه وترتيبه ناوي الزيارة .
كان لابد ان افكر في شيء يعلن عن هذه البهجة التي غمرتني وهذه الخطوة الرائعة التي قاما بها في اتجاه بعض لنبذ وجه الاختلاف المتغضن .
هشام يازول . في يده باقة ورد واساسي يحمل كثير من الابتسامات المرحبة وعلى يده ايسكريم باسكن روبنز ، ليقدمه الى الرجل .
انا اعرف ان الرجل يموت في الايسكريم ، اتخيلوا في جلسة ونسه لنا ، طقت في راسه الفكره انه يشتهي ايسكريم ، فكان ان احضر اكثر من 12 علبة ايسكرين كبيرة وجلسنا نقزقز فيها وعندما خلصت حلف بالطلاق ان يجيب غيرها .
كان لابد ان احضر انا الجاتوه والتورتات الجميلات بطعم كل الفواكه والنكهات .
وعلى انغام الحب ونكهات الترحيب الجميلة من اساسي ، تم التصافي وتم دلق كثير من عسل الكلام .
ليكتشف الرجلان بعدها انهما اصلا لم يكونا متخاصمين وحتى وهما في غمرة ذلك الاعتراك .
هنــوا معي الرائعين
اساسي وهو يستقبل في منزله هشام يازول
لتكون بالفعل من اجمل ليالي الانس وسهرة اعتقد انها فاتت على اهل البورد . لذلك اردت ان انقل لكم وقائعها .
لان اساسي من تواضعه وجماله لن يتحدث عنها وهشام يازول من اناقته وادبه ايضا سوف يظل يذكر لحظاتها الحلوة كل عمره .
وانا ايضا ساظل طوال عمري اتذكر ، كيف يكون الحب وكيف يكون التصالح

شرير والبرتقالة
كل التحايا الجميلة

اما قبل

يازول انت مقل في الكتابة للبورد خالص كده ليه
تانيًا الواحد بحسدكم على الايسكريم والجاتوة والترطيبة
تالتًا الاخ العزيز اساسي والاخ العزيز هاشم من أجمل من تعرفت عليهم في هذا المنبر وقد هاتفت الاخ أساسي وتعرفت على شخص جميل ومشاكس وان خصمت الثانية من الاولى !!!
الأخ يا زول منتظر منو مكالمة حسب وعده واي محاوله للثناء عليه هنا ستكون شهادة مجروحة فهو أخ كريم ابن اب كريم

خاض المنبر الحر عدد من المعارك الجانبية والانصرافية والملاسنات وتشخصنت بعض الخلافات وما كنا نريد لها ذلك ولكن من كل تلك التجارب بقضها وقضيضها ( وعلى فكرة لا اعرف معنى قض وقضيض دي ) افتكر انو كل الشباب بدءأو بالخروج باتفاقات اساسية ( ما عندها علاقة باساسي ) وهي التطبيق العملي لمقولة اختلاف الاراء لا يفسد للود قضية ومن هذه الزاوية نعلن ترحيبنا الدائم باساسي وبالأخ يازول
والله لا جاب زعل بس كل ما نرجوه انو مافي واحد يهدد بترك المنبر فالاخوان في البيت بتشاكلو لكن مافي واحد بيمرق بيخلي بيتهم

لك الود والسلام والتحية ودمت

ما قلنا ليكم شكل جداد

مرة تانى يا تتشاكلوا زى الناس يا مافى داعي

لووووووول

صباحاتكم بنكهة
الفوكه الطبيعيه

bunbun
الله يعافيك يا بنوبوني
للسؤال الجميل
بس والله انا مشغول كتير جدا
ايه رايك انا اليوم عازمك ايسكريم
بس انت كيف تجينا وتشرفنا
اشكرك من كل قلبي
ياطيب
فعلا الاثنين من اجمل
الناس في البورد الواسع وجميل دا

سينتمال
يازول انت وين الحي بيك
؟؟؟
شفت يازول يازول امبارح
كان من المتوقع نشوفك
برضو في جلسة الصلح دي
غايتو فاتك الايسكريم والجاتوووووه

والله شكل الاسكريمات دا زاتو قبل كدا ما سمعنا بيهو
دي حنكشه جديده كمان ولا شنو

--
شرير والبرتقاله كيفنك يا اخوي نعلك طيب
ان شاء الله تكون استمتعته بالطيبات
--
توم اند جيري
فلقتونا وما عزمتونا
دي بحق .. علي قول اهلنا البدو
يعني حضرو التيوس
--
سنت منتال
لهطه العسكريم بررررررررررررراك يا خائن طيب بكره تندم يا جميل
قالو وسخته هدومك بيهو
الحنكشه علي الكبر شينه شينه شينه


حناكيش سايبريييييييين

شرير
والله دا خبر برتقالة بس
عقبال بقية الديوك والجداد
لوووووووووووول يا سنتمتنال

شرير والبرتقالة ..شكرا للشمار اللطيف ده .. مع أنو أنا ضد أعلان الهدنة بهدي اللحن للريس السابق يا زول يا زول لأنو الكبير .. وأساسي الحقار ليهو الياسمين بس.. واضم لولي لي لووووووووول الجندرية ..

Save @ PC

جمال

والله دى فاتتنى عديل. الغريبة هشام كلمنى لكن كنت مشغول . لو عارف انو الموضوع فيه ايسكريم كان الواحد لبس العمة ومشى معاه. لكن ولا يهمك تانى حيتشاكلوا ... ديل انا عارفهم. المرة الجاية باسكن روبنز اقل حاجة.

الجندرية

انا جدادة ولا ديك تقصدى ... لووووووول هسى كان دايرين تصالحونا مع فتحى ده تلقونا وين وتلقوه وين.


ودى لكم يا ناس

لكن الخرف ما عوجة
تصدق يا سنتمنتل
نسيت انك احد اطرف الشكلة المدورة مع البحيري
دي دايره ليها كم لوووووووووول هسي ؟

يازول يواصل احراجي امام نفسي والجميع
بكامل اناقته اتاني بيده وعدا والاخري وردا فاجاني في مكتبي يوم امس ليكون السباق الي الخير فهو الذي ابتدر بالسلام ساحبا مني كل الاجر وعلي هذا ما ذلت احسده هذا الحسد لم يمنعني او يمنعه حتي في التفكير ان الزيارة للمكتب حين الوعد كانت لقلب الطاولة علي وجهي ولكن اي طاولة تلك التي ترضي ان تحرم من تلك الابتسامة الوضاءة التي اضاءت جبينه ولم ادري بنفسي الا وانا ابادلها ضحكة خرجت من اعماقي محولة ابتسامته لمثلها ونحن (نتقالد) حتي بدون اي كلمة حتي الان
ذهبنا الي البيت بعدها وتحدثنا في كل شئ الا ما كان بيننا فتلك البادرة الطيبة من يازول وما تبعها من (مقالدة) ابتسامتها مقهقهة ما كانت بحاجة لكلمات اعتذار تجملها وهكذا دون اجندة تحدثنا في كل شي لم نترك المنبر وما يفعله بنا لم نترك فيكم احدا لم نحييه لم نترك كلمة منكم الا واعدناها فانتم زادنا
ما لفت نظري اني كنت ذلك المخرف الذي نعت فبالرغم من معرفتي ليازول ولكن امس فاجاني باناقة غير عادية اناقة تشع شبابا وحيوية وكان ان احرجي مرة اخرة في انه وجدني في كامل ( بهدلتي )فضحك وقلت له بالله لو اخذنا صورة ولصقناها في المنبر من فينا الذي يستحق الخرف عن جدارة
واخيرا اعتذر لكم وقبلها اعتذر ليازول عن كل الذي حدث ولكن اظن ان مقولة لا محبة الا بعد عداوة سنكون انا ويازول فرسا رهانها
وكما لا يفوتني الاعتذار الخاص لبورداب جدة والله لاني اخجل منكم فردا فردا خاصة فالكون ومهاجر وقرجة

شرير

انا اكتب اذا انا موجود يا صديقى. لم انسى الملحة من المطار القديم الى البيت...لوووووول طالبنى كم

اسمع والله انا داير افتح لى شكلة من هشام ده. بعدين بتجيب لينا شنو??? .

الجندرية

منو دى ? انا دى? والله لا براه شاكلنى وكمان عضانى ...اها شوفى العضة!!! لوووول. موضوع بحيرى ده عايز ليه لووولات متعددة



اكلى البيض بيساعد على تفادى الخرف يا الجندرية ..برضو لوووول

يا السوادنة شكلكم اشتر وصلحكم اشتر

سلام مربع

اساسي
هشام
شرير والبرتقاله


لان قلوبكم من ذهب
ونبضها الماس
كان لابد ان يكون
اجتماعكم
بلون اشراقكم
وورودكم لها طعم
الحب
والله جد جد عجبنا ليكم
الحب دا
والكلام الراقي العملتوهو دا

سلمتم كلكم
يا تمبس
وياجندرية
وياسنتمال
وبنبوني
كلكلم
كلكم
دون فرز

هي انا ماشه ،
موش قالوا الباندوث دا انا من الناس المكملاهو

يا شيرى لو كان كلامك هو البيكمل الباندويدث
band width
كان ضبحنا ليك كل باندويدثات الدنيا
كرامة وسلامة على أحلى هترشة ومهترشة فى الدنيا أتتنا بمدرسة جديدة فى صفحة الأدب السودانى الرفيع

شيرى وعين الله ترعاكى
وخلى الباندويدث شبعان يقبل فاكى
ماكان اتملأ لولا الكلام لولاكى
انتى تعبى فيه ونحن يوت نلفاكى
نقرا ونشحد الله يجمعنا يوم نلقاكى
فى حوش بيت كبير فيه الجداد بيكاكى
او رقشة فى زلط سواقها لابس كاكى
او فى باب شريف وسط البنات بتحاكى
او حفلة عرس فنانا ضاحك باكى
وأساسى يكون معانا مقنطر التمباكى
روبنسون بيعرض فى الرقصة يتحداكى
والباندوث فضى لى شيرى بابو متاكى
هترشى فيه ساااااكت ونحن نستناكى


loooooooooooooooooooooooool

جده غير

انهم بورداب جده يحملونك على كفوف الكرم منذ ان تطأ قدماك جده

انهم بورداب جده وكفى حيث لم تاتنى الفرصه فى شكرهم من قبل

انهم بورداب جده اخوة اعزاء يخجلونك بحنيتهم .. ويغرقونك بفول بنى مالك .... والبيك اللذيذ


انهم بورداب جده ... من شريرهم وهو اساسى طبعا الى برتقالتهم سنتيمينتال .... ومابينهم الجعلى الاصيل سيد الاسم حق وحقيقه
واللذيذ شرير صاحب البرتقاله ... وقرجه والعمده قرشو والريس يازول مع اننى لم احظى بلقائهم .. الا انهم كانوا حضورا بيننا فى تلك الصقطيبه حينما استضافونى فى باحة المطار القديم


تسامرنا وقضينا ليلة من اروع الليالى بعروس البحر الاحمر مع اشراقات حبيبنا الطيب برير .. ومداخلات الرائع سنتى


قوم بكل هذه الاريحيه ... وكل هذا الكرم


لا غريب عليهم التصافى والتسامح


شطرا شرير شكرا الجعلى شكرا سنتيمينتال شكرا قرجه


شكرا اساسى والريس

( الهم لاتولى علينا من لايرحمنا )


لوووووول


ديكو

هكذا اذا
لم يخيب ظننا الاعزاء يازول و اساسي
شكر ايها الشرير صاحب البرتقالة
عندما تدخلنا في الامر
وضعنا اللوم علي يازول
بحكم الاقدمية ولا اريد ان اقول السن
يقوم يقبل علي
وعاتبناه عتابا شديدا
لم ندافع عن اساسي فهو قادر علي ذلك
لكن دافعنا عن ذلك الرابط
الذي تجاوز حدود الفرضية
لم نهدر الباندوث كما ادعي بعض الاعضاء الكرام
لكن ليعلم جميع الاعضاء
الذين تضرروا من تلك الهفوه
بين يازول و اساسي ان الذي جمعنا
في هذا البورد تجاوز الراي و الراي الاخر
يحز في نفس الواحد ان يفقد صديق في هذا الزمن الصعب وكما قال
اساسي ما محبه الا بعد عداوة
شكرا شكرا لكما اعزائي يازول و اساسي
و يااساسي اعتذارك ما بفيدك و انا ما باكل ايسكريم
لكن اولادي ممكن يقوموا باللازم