كـديـسـتـنـا ولـدت - العقبال عندكم

والله لا حنكوش لا حاجه

بس كديستنا ولدت قبل اسبوعين ، ويادوب الشفع فتحو عيونهم على الدنيا قبيل
والحمدلله بصحة جيده

سته كدايس ما شاء الله ، أصورهم وأجيب ليكم الصور مع الويكند

وبالمناسبه ، أمهم بتاكل خيار و طماطم ، حأصورها ليكم وهي بتاكلهم عشان تشوفو بعيونكم

تسلم عيونكم و باركو ليناالولاده ، وان شاء الله السمايه حتكون قريب في الشارقه عازم فيها ناس البورد

الله يلعن الملاريا..اوبي؟ماتشفق بت الناس عليك تقوم تقطع الاجازة عشان تجي تتطمن عليك . عموما مبروك و يتربو في عزكم

سلام

تخيل انا بحب القطط بطريقة عجيبة وفي طفولتي كانت بتشكل لي صديقة حميمة

واحلى شئ لما تكون القطط في العمر الصغير ويكونوا اخوات واستمتع باللعب معهم ومداعبتهم برسم خطوط في الارض وتتابع القطة بعيناها بنظرة ثاقبة وهي في الحقيقة تمارس فطرتها في الصيد سبحان الله

بالمناسبة الحيوانات في استراليا ليها حقوق اكثر من الانسان ودي ما مبالغة
اخوي الصغيرلشلاقتو جاب ليه كلب قايل نفسو في السودان وما تتخيلو البرنامج الطويل عريض الهو اسع واقع فيه .. لو مرض ياهو الما ارتاح لازم يوديه البيطري وطبعا الكلب لازم يكون مسجل زيو وزي العربية ويكون عندو اسم ويكون مطعم بالذات لو كان مولود جديد ولو مشيت بيه البيطري يدفعك الشئ الفلاني واكلو ليه شنة ورنة ودعايات في التلفزيون وطبعا دا شئ في بلدنا افريقيا ابن ادم ما لاقيه يعنى حاجة تحزن والله
وطبعا الكلام دا ما مقتصر على الكلاب وبس الكدايس والطيور وهلمجر

على كل مبروك عليك نص الدستا يا ود انجلتر واكيد فاهم كلامي الفوق دا

سماح

حمدالله على السلامة

بس ما وريتنا الكديسة دي ولدت في ياتو مستشفى و الاخصائي الشاطر القام بعملية الولادة دي منو و لا انت الولدتها

اها و بعدين السماية متين

مبـــروك ..
أشكالهم كيف الكدايس الصغار ؟

مــودك

Ahmed Khalil الأخ
الله يبارك فيك ياخوي ، وبالمناسبه والله ما فهمت البنيه تقطع الاجازه ليه ، وبعدين دي مشكله لو مرتك ما بتدور الكدايس وانتا بتدورا
ممكن الواحد يتنازل عن الكدايس عشان المرا ، بس هي تقوم تنونو للزول وتهوزز ضنبها بنفس الطريقه

الله يعزك ياخوي وان شاء الله أولادك يتربو أحسن من تربية كدايسي


Sama7-au الأخت
وعليكي السلام
والله لا أدري لماذا دائما القطط تتبع الحبل أو السلك لو سحبتيه أمامها ، ربما كما قلت هي غريزة الصيد ، ولكن لماذا الحبل وليس شيئا آخرا
بالمناسبه أنا ما ود انجلترا ولا أتشرف الحمد لله ود بحري والسودان وساكن الامارات
فقط كنت في بريطانيا ، وتركتها وتركت عزيزا لي هناك
والله يبارك فيك وربنا يرزقك دسته

aosman الأخ
الكديسه ولدت في أوضة البت الشغاله ، علي غير العاده
و والله كديستنا دي ما شاء الله ، ولللاده بطريقه ما عاديه ، بحكي ليك كيف جاتنا الكديسه الأم ،
عندناذكرين من سلاله بنهجنهامن سنوات ، وكنا بنفكر للاتنين ديل في انتايه أو اتنين ، أها يوم تجي البيت كديسه بيضا غريبه مع لمسات خطوط رماديه ، وبتحاول تخش البيت بالقوه !! لما والله الجماعه ناس البيت لاوزو ، نادوني فقمت صنقرت عاينت ليها سمح وأنا لي روحي ملاوز من تصرفها دا وقريت ليها آية الكرسي وآيات التحصين وخلافه ، وقامت الكديسه براحه جات داخله البيت ، خلليناها ومستغربين جدا ، خاصة أنو الوقت كان ليل
وبعدها طوالي بطنها شحنت من الضكور بتاعيننا
والكديسه دي وبسم الله الرحمن الرحيم تضرب الخضروات زي الترتيب ، الخدار في الأول وبعدين اللحمه
كدايسنا لما لقوها بتاكل الخدار قامو يعاينو ليها ساكت ومستغربين ، لما اتعودو ، بقينا نجيب ليها كيس خيار مخصوص أو بصراحه بتشاركنا كيسنا

كفايه لهنا وأواصل بعدينات

أما قصة أني ما أكون الولدتها ، فلا والله أحلف ليك وانت ما طالبني حليفه
مع أني بتمنى أعرف كيف أقوم بالتوليد ! يمكن الله يكرمني وأولد مرتي لوما بتخجل مني


السمايه ان شاء الله - مع أننا بنخللي كدايسنا بدون أسامي - حتكون اجتماع لبورداب الامارات من البورد دا وبوردي القديم الحبيب سودان نت
وان شاء الله في امارة الشارقه المره دي ، لأنو ناس أبوظبي ديل تعبونا بركوب الخط ورطوبة قهوتم

Modic العزيز
الله يبارك فيك وربنا يرزقك من الكدايس عشرا و يطلعو ليك حافظين وحافظات للقرآن كمان مين عارف
بس شد حيلك شويه
صورهم ان شاء الله في الويكند دا ، بس الفلم ما يتحرق ، عشان ما أقوم من الزعل أنونو في الشوارع
براي زعلان

معليش ياخواننا ، مشغولين ببطولة شطرنج دوليه هنا الأيام دي ، دعواتكم للاعبي منتخبنا السوداني بالتوفيق وباقي جولتين بس ، لاكين صور الكدايس جاهزه ، بس وررونا موقع نرفعها عليهو عشان أقدر أرفعها ليكم بدون ما يمسحوها زي ناس جيوسيتيس دوت كوم

تسلمو وتسلم كدايسكم

ابي
حمدالله علي السلامه, واقترح عليك فى يوم السمايه تستلف من الموصلى مقاطع العميرى :ة

تنتهى الدهشه )
وتموت الشفقه
فى عين الكديسه)

تحياتى

...يتربو فى عزك ... قال كديستنا ولدت قال
ياخى شيلتنى الهم أسع نص دستة كدايس ديل تقع بيهم وين .... كدى قول لى هم كدايس ول كديسات ... لو كدايس ووب لو كديسات ووبين .... لا لا لا أنا ما شفقانة عليك من حق السماية ... الكديس سمايتو بى خروفين ... قصدى فارين ... والكديسة سمايتها بى خروف ... قصدى فار .... وما تنسى حق لبن أمهم النفسا ... واها أبقى راجل كل يوم تشد حلة مديدة الحلبة وتنزل حلة مديدة التمر ودى بدلقو فيها قزازة سمنة بلدى عشان النفسا تتغذى كويس .... دا كلو انا ما قلقانة عليك منو ولا شفقانة عليك من الكديسة النفسا ... تعرف الكدايس لمن تنفس بتكون متحنفشة وشرانية كيف ... تقوم تقرم ليك يدك ول تخمش ليك وشك ... تقوم بت الاحفاد تاباك ... خوفى كلو عليك من غيير البامبرز وناو ونيو نص الليل ... يا راجل ما تقوم تحضر الرضعات ... أوو يا ولية ... قصدى يا كديسة ... سكتى اولادك ديل .... قال عقبالكم قال ... هو الدنيا دي لو ما قالو ليكم ضيقة وما شايلة البنى ادميين ... ياخى كديستكم دى مالها جاهلة كدة ما سمعت بى تنظيم الاسرة وتحديد النسل ..الدنيا دى بتطرشق ... قال كديستنا ولدت عقبالكم قال ... قبلك وحدك ياخ


اها أوع الكديسة تكون ولدت فى دولابك

يا زول مبروك وان شاء الله يتربوا في عزكم
أنا حارسل ليك حق اللبن عشان تختوا ليها تحت المخدة للكديسة