أيــْــن الخيــــــمة

أيــْــن الخيــــــمة


08-23-2003, 12:36 PM


  » http://sudaneseonline.com/cgi-bin/sdb/2bb.cgi?seq=msg&board=2&msg=1061638610&rn=90


Post: #1
Title: أيــْــن الخيــــــمة
Author: Shinteer
Date: 08-23-2003, 12:36 PM
Parent: #0


أين خيمة الحاردلو أيها المسئولون عن البورد؟ بحثت عنها في كل الصفحات فلم أعثر حتى على أثر لأطنابها .. اين هي؟
أحس برغبة عارمة لغفوة في تلك الخيمة .. حتى أعود إلى نفسي التي أعرف وتعرف انها نفسي


Post: #2
Title: Re: أيــْــن الخيــــــمة
Author: saifkeli
Date: 08-23-2003, 12:53 PM
Parent: #1

الأخ .. شانتير .. سلام مربع

تحياتي لك ولكل رواد خيمة الحردلو .. والتي أظن أنها اختفت مع مشكلة السيرفر قبل شهرين تقريباً .. نرفع للريس بكري اعادتها الى موقها في ظل العمارات

تحياتي لك ولأخوان الأفاضل
سيف كلي

Post: #3
Title: Re: أيــْــن الخيــــــمة
Author: Shinteer
Date: 08-23-2003, 12:57 PM
Parent: #1


شكراً ليك يا اخي سيف ود كلي. لكن لو ما رفعوها .. أنا غايتو بفرش قبلي هنا وبونس نفسي وانوم واشد قهوتي واهز روبي واسرح بنياقي واتراوح هنا

وقهوْتي اللبن القارص


Post: #4
Title: Re: أيــْــن الخيــــــمة
Author: Ahlalawad
Date: 08-23-2003, 01:06 PM
Parent: #1

هناك مؤامرة يحيكها السنجاوي لفتح خيمة جديدة

أها بي جمعتكم دي حقوا تفتحو واحدة جديدة

على فكرة القديمة موجودة لكن أصابتها عاديات الزمن وهي تهتريء الآن

Post: #5
Title: Re: أيــْــن الخيــــــمة
Author: sentimental
Date: 08-23-2003, 01:12 PM
Parent: #1

شنتير

لا ودر الله لك خيمة ولا ضهب لك نيوق في هذى المفازة.

انت تعلم انه حتى البوست دوبيت ومسادير لا يمكن الوصول اليه نسبة لرميه فى سلة المهملات المسمأة جزافا الارشيف.

هز سعنك ودوبى فى خلاك يا النجم..
شد قهوتك واشرب بكريك وناولنا التنى...

Post: #6
Title: Re: أيــْــن الخيــــــمة
Author: Shinteer
Date: 08-23-2003, 01:16 PM
Parent: #1


أهل العوض
قتْ كدي آضراعي؟ عاديات الدهر دي شني السايبة؟ أكلتها السوسة؟
خلي سنجاوي يفتح خيمة ما مشكلة .. نحن دايرين لينا دار. بس أنا متبورك هنا في فراشي ده

إيه رايك نفرش هنا ونستقبل المعزيين؟ أها ناس تعالوا ادونا الفاتحة في خيمتنا الشالها البارد. والله يا أهل العوض البارد دي يا تكون نسيتها تب يا إما ما بتعرفها .. وواقع علي حلف من السماء تعرفها لي علا اديك لبن مرباع ينضف ليك مصارينك ديل تب ويرجعك لزمن طفلانيتك

سنتي ابن منتي .. نعل طيب
أياني القاعد هنا .. وشوية شوية بديها مرقة أشوف الساحة كان يبقى جابت لها كراع غريبة .. عشان نبرتها من المخروقة


Post: #7
Title: Re: أيــْــن الخيــــــمة
Author: Ahlalawad
Date: 08-23-2003, 01:23 PM
Parent: #1

شيخي الفي الأصول قدامي مو وراني
ناصح دربي اتوطابو فوق مصراني


الله بلا حليفة بيكتل لاكين وحات سيدك الحسن لا سمعت لا أريت
وود المرباع إت بتديهو بي أمو بلا كروة

Post: #8
Title: Re: أيــْــن الخيــــــمة
Author: Ahlalawad
Date: 08-23-2003, 01:33 PM
Parent: #1

بكري شال الخيمة وخلا في بكانا الورقة دي

Permission Denied
Sorry, you have no permisson to access this page or function
Please go back and try again or contact the webmaster if you believe this is a server error.

Post: #9
Title: Re: أيــْــن الخيــــــمة
Author: Ahlalawad
Date: 08-23-2003, 01:38 PM
Parent: #1


تحريضا لشيخي وجملة الزمّال

هجرنو الصعيد واتقصدنو شمالهن
ودوارهن خبر قشا بطشش مالهن
مالي أنا الولهان مباري شمالهن
غابن وانطوى قلبي الولوف في شمالهن


Post: #10
Title: Re: أيــْــن الخيــــــمة
Author: Shinteer
Date: 08-23-2003, 01:38 PM
Parent: #1


خلاس .. قنعنا من خيمتنا القديمة .. نقعد قبلنا .. ونسوْ غنانا

بريد ألبِل بريد ننزل قبنّا
بريد التعّلن ليهن زقنّة

أو كما قال أهلي اللحويين

والله الليلة يا أهل العوض متقمصني شيطان عمي أبّكٌر ود شنتير. الله يستر


Post: #11
Title: Re: أيــْــن الخيــــــمة
Author: Ahlalawad
Date: 08-23-2003, 01:43 PM
Parent: #1

الله ينفعنا بي جاهو
قصدي عمك أبكر ود شنتير

طيب أها ، خلينا ننوخ ، جمل سيف كلي دا بطول ليه بعيد هناك ، بينو وبين جمل ابن منتال تلاتة جدوع

Post: #12
Title: Re: أيــْــن الخيــــــمة
Author: Shinteer
Date: 08-23-2003, 01:53 PM
Parent: #1


عمي أبكر ود شنتير .. عليه الرحمة. توفى العام الماضي بعد عمرٍ طويـــــل انفقه كله في خدمة جقلة وتعبداً في محرابها .. يتغزل في جمالها أحايين كثيرة .. ويهجو غير اصحابها في كل الأحايين. وفي أشعاره يقتفي آثار اللحويين في نظمهم الغريب الذي يختلف عن النظم المألوف في تلك الديار. وفي إحدى غزلياته في جقلة .. شبهها بفاتية مدني .. وأجزم بأنه لم ير مدني في حياته

فاتية مدني الرقصت
فوق مردود ما حقصت
وكت اللبالة ادّقست
حالها خريف ما نقصت

ثم يشبهها بإحدى نساء الكبابيش .. المنتمين الى فرع هاجر أهله الى ديار البطانة في عهد ليس بقريب .. وتكنّى تلك المرأة بـ بت رحّال .. وكانت تحفة من الجمال وكمال الأنوثة. يقول أبّكُر ود شنتير

الدبْساء الراسها خلال
شايلابي الليل لا الشُّهْلال
تَتّرّز مابية المقْبال
بتسوْ قدَلة بت رحّال

رحم الله أبكر ود شنتير بقدر ما أوفى وأخلص للناقة .. ذلك الحيوان المسلم. عايز شرح؟ نشرح طوالي ما فيش ايتها مشلكة


Post: #13
Title: Re: أيــْــن الخيــــــمة
Author: Ahlalawad
Date: 08-23-2003, 02:01 PM
Parent: #1

رحم الله متعبد بت رحال وجقلة
طيب دام الحصة مطالعة
أرجو أن تمشهد لينا هذا المربع - أ جراري هو أو شيتن تاني

هبت الرشايم .. واتملن الخيران
يا الوزين العايم
الليلة وين امسيت
يالتمير فطور الصايم

Post: #14
Title: Re: أيــْــن الخيــــــمة
Author: Shinteer
Date: 08-23-2003, 02:04 PM
Parent: #1


ده كردفاني أصلي .. جراري

أرمي يا زول


Post: #15
Title: Re: أيــْــن الخيــــــمة
Author: sentimental
Date: 08-23-2003, 02:42 PM
Parent: #1

هو يا همباته ترانى نقلت خيمتى وجيتكم تب ومانى مارق من عندكم. معاى عربى نجيييض هو عزت الماهرى. اها ده من الماهرية بتاعين دارفور. عرب بادية اقحاح وهمباتى نمرة واحد.

اها فجوا لينا النقعد وده درب نفاجنا



الناقة أم قلادةً زينة....طول الليل تزقّل في النجم لا يمينا

Post: #16
Title: Re: أيــْــن الخيــــــمة
Author: ابنوس
Date: 08-23-2003, 03:01 PM
Parent: #15

يا اخوانا ما تبقوها خيمة البورد بدل خيمة الحاردلوا ؟؟
رايكم شنو .. انا ما من البطانة ، لكن بجر معاكم النم .. وكمان بجادعكم يكم نمات من نضم ما اظنكم بتعرفوا ، اها نحن الليلة لو بدينا المسدار في خيمكتك لا زم يكمل في خيمة تاينة الحردلو ما غشاها ..
....................................................................
قوز ساسيلقوا المقاموا هبيل
وقلت اشقوا بي وسم الشنابلة عديل
.. 2
ادقّ ، واسّرب للدامرات عديد النيل
....................................................
الليلة الصعيد طلق الهبايب غادي
وخلاص طرّاني لنيالا وجناين الوادي
انا الجنني البرتكان جناين الوادي
وانا الجنتني ام رشوم اخت حمّادي
ام ديسا تحت الفنيد متسادي
من الوردان طالب جرايد الوادي !!!!

......................................................................................
والنم الذي لا اعتقد انه موجود
في وسط السودان كالاتي :

الليلة وينك يا شرمة المن زراف الخلا ابو نواني
وانا بلا وجيعا لشرمة منو الرقدت هبّاني
وانا بلا وحجيعا لشرمة ما في فغير قرّاني
عربي فصيح
بالحيل مطلقون اساني
وبلا طريّق السلوم باقي كمان دكاني
وبقيدوا طبيق كلباش
فوق السجن دساني وطريقها ما بخليه لمن اغدى فاني
......................................................................
الليلة يارفيق ساروا اهل مرّاحة
وقطعوا وادي الزرق نزلوا صباحه
وسلبوا جمال الشيل
ورّدوا الملاحة
وجابوا حجر عطرون مو تراب سبّاخة
وقلبا يريد الناقة شغله فلاحة
والناقة شرك بدراي قيد
ام جازم البجّاحة
وسوقا ما بجيبا الناقة ما بدور ارباحة
وزرعا ما بقوم الناقة
ما بدور نجاحة
وقسمة فوق الصف .. دوت مو فلاحة
...................................................
هذه النغمة الاخيرة هي خاصة بفنان ومطرب لقبيلة المحاميد من العرب الرحل بالصحرا الكبرى اسمه تيبي .. قتل قبل فترة في الاحداث الاخيرة في دارفور ... ولدية اغنيات كثيرة منها ..
الليلة يا رفيق
ساروا اهل مرّحة فريقهم رحل
وشدوا تقيل الخمام فوق الفحل
وذنبه عصاة كتال ، حسه حلف تنبل
وهايج بياكل النيب طيرا فقع زرزر .
ولكم عبير النم ، وللخيمة ان تكن تراثا يضيف الى الوطن الجميل وان لا تكن تعلية لثقافة ما ...ش

Post: #17
Title: Re: أيــْــن الخيــــــمة
Author: Shinteer
Date: 08-23-2003, 03:11 PM
Parent: #1


يازول!!! جبت لينا زول من المَهَرِيّة (هكذا سمعتها من الهمباتة)؟
يا ألف مرحب بكل زول نجيض .. ومرحب يا عزت والف مرحب .. وخلينا نوديك معانا "السادّة" نزورك الخليفة ونشرب لنا معاهو بن .. ونسلم على العازة بت قلبوس .. ونبقى سادرين

ديـــــك السادّة غشّينا الخليفة نزورو
نشرب بن ونتبرّك تمـــــام بنورو
فريق العازة ردينا السلام لحورو
من السنّة عبقن فوق كفوفنا عطورو

أها أبقى داخل


Post: #18
Title: Re: أيــْــن الخيــــــمة
Author: saifkeli
Date: 08-23-2003, 04:51 PM
Parent: #17


الأخوان .. رفقاء النميم والمسادير
والله ليكم وحشة وشانتير نتديك الفاتجة .. أول وآخر وان شاء ربنا يعوضكم أخير وأبرك بس تنصبوها لينا في بكان واضح ودايما تكون فوق العلالي عشان رياح البورد دي تاني ما تقلعها

يا ستار على أبل الجنين القفوا
يلقو الغدرة في ابل البدان يتشفوا
يا عنز أم ريش الهبوب بترفوا
يصبح سيدا يخمش في التراب ويسفو

وعندي شريط يا أخوانا بورداب السعودية عاوزكم تشاركوني سماعه .. وإن شاء يعجبكم

أخوي أهل العوض الشريط إن شاء الله يصلك قريب

مودتي للجميع .. سيف كلي


Post: #19
Title: Re: أيــْــن الخيــــــمة
Author: Shinteer
Date: 08-23-2003, 05:32 PM
Parent: #1


العزيز فوق العادة .. ود كلي ... الله يديك العافية واللقمة الدافية
تعرف أنا في مشيتي للسودان قبل كم يوم .. واحد من أصدقائي المقربين حرّّق روحي بتكرار انتماء كمال شانتير المحامي للشناتير .. و أصدقك القول بأنني لا علم لي بذلك .. ولا ابغض كمال شانتير المحامي .. كبغضي لتسميتي باسمه هنا. وقد قلت لصديقي الذي طلّع روحي بأني أنا ود شنتير .. و كمال المحامي ود شانتير .. رغم العلاقة القبلية التي حاول تأكيدها صديقي

المهم .. أنا شنتير .. وود شنتير .. ومن الشناتير .. وكمال شنانتير ود شانتير .. بس من الشناتير .. إن صدق صديقي. ولا علاقة لي بشانتير .. إن كان من الشناتير أو من الوطاويط

أنا بقول في شنو؟ والله ما عارف الخلاني اقول الكلام ده شنو. أها نسّيتك البلا .. اتظكرت يا سيف ود كلي .. فرقك علينا صعيب .. زي عمدة كلي. اتظكرت انا بقول في شنو. اسمي ده لو بقى شانتير انا بكلم بكري يغيرو طوالي .. والمحيرني انو كيف اسم مكتوب شنتيـــــــــر بالانجليزية الفصحى يقوم الناس بقدرة قادر يقروه شانتير؟ والله راسي مليان لحدو .. وناس كتيرين في البورد ده بيقروه شانتير!!!ه ده موضوع آخر

أها سيف ود كلي .. كلامي الفارغ انتهى .. ونجي للكلام المليان البنعرفو

من سروال عجيب قام شرْفَهن متزارد
السلّيت رقابهن .. والحشا المتمارد
ستّات المناقِد والخُلال الشارد
جــين في أب دم ضحى وعرقن سمير أم بارد

من أقوال شيخي ومولاي يوسف ود عب شبيش .. عليه الرحمة

سيف .. عليك الله كلامي الفوووووق داك ما تعتبرو عتاب ولا حاجة. أنا بهترش معاك لا أكثر ولا أقل. وأبقى معانا


Post: #20
Title: Re: أيــْــن الخيــــــمة
Author: singawi
Date: 08-23-2003, 06:24 PM
Parent: #1


الحبان سلام
خيمتنا لسة منورة
تجدونها في ارشيف المنبر الحر رقم 1
أو في اللنك الرابط أدناهـ
خيــيمة الحــردلو - العمارات
من شهر وزيادة وأنا في رجا عودة أهل العوض من الإجازة لإعادة افتتاح الخيمة حفاظاً على حقه الأدبي في خيمة العمارات . واليوم اتصلت به هاتفياً لأحثه على ذلك فكلفني ببعثها نيابة عنه- قال مؤامرة قال - .. وأنا بمال الأكرمين أجود فأرجو من الأخ شنتير إعادة إحياء الخيمة مرة أخرى بنفس الإسم الذي حملته منذ سنوات - خيمة الحاردلو - فهكذا عرفناها وهكذا عشقناها وعشناها على أن يبدأها بلنك يربطنا بخيمتنا السابقة ليسهل التوثيق ومعرفة ما قيل تجنباً للتكرار وتشوقاً للالمام بالتليد
والجديد المفيد

تحياتي

Post: #21
Title: Re: أيــْــن الخيــــــمة
Author: Shinteer
Date: 08-24-2003, 01:06 AM
Parent: #1


عمتم مساءً أيها الرهط الكريم
أهل العوض وسيف كلي وسنتي منتي وسنجاوي .. وبقية العقد النضيد. لماذا نضرب خيمة جديدة؟ دعونا ههنا .. فهنا دار الخيمة القديمة ودار الندامى الذين عطلوها وأدلجوا أو أدلجت هي وتركتهم في صقيعة الله والرسول


Post: #22
Title: Re: أيــْــن الخيــــــمة
Author: ابنوس
Date: 08-24-2003, 04:37 AM
Parent: #21

العزيز شنتيير
سلام
والله يا اهل العوض انا من اهل ابراهيم الكوني ، صحراوي رسمت الرياح على وجهي كل تفاصيل الفصول ، ومبلول بشوق للنمة الحنينة
وبهمي سارب على فلاة جديبة ، لقيتكم بتجروا النم ومقايسين الكلام ، وقلت اقعد معاكم شوية اجم الحشا المحروق ، وادوبي معاكم ....

...........................................
نحن طولنا خلاص من الجلسة السيادها بنموا
نحن خطرنا والقاعدين ورانا بهموا
قاعدين في الدكة القدر العلينا ما عارفنوا
حلوة وعافية وفايدة
بعد الفراق بنلموا
...................................................................
وقال واحد من اهلك المهرية ، همباتي ابن ستين حبل :

يوم قمنا مغربين شاقين بلود دار تاما
وما بنسوق جميل القيد يمكن سيادوا اتاما
........2
بنسوقهن بالكنتورة وبنفرح الحكامة

..................................................................

ود يمى العرور الحارة ما بحملها
وبعرف جلسة السكرة الكبير جردلها
جقلا ام ميلا جيابة الدّرك لوزرها
لا بدنيها لا بسأل بقول في خبرها

.................................................................

الليلة الصعيد اصبح بفر في سنونوا
وفرعهن دودل شبك شدرا كتير ليّونوا
دورك بينا يا الاصهب نلاقي عيونوا
والليلة المبيت عند البتضوي سنونوا
...................................................
ويالله يا شباب نسمع نمكم ، وانا اصلي بحاول اشجعكم شويا عشان اسمعكم ، لكن ما لي باع طويل في الدوبيت ، ويا ريت لو بقدر اجيب شرايط كاسيت من معنيين هذا الفن في غرب السودان ... بادية الكبابيش والماهرية ، والعطوية وبوادي المحاميد ، وبادية الشطية ..
هنالك مغنين لهم تصاوير غريبة ... والقولة الوحيدة للغذافي التي اصدقها ، هي ( ان الشعوب لا تنسجم الا مع فنونها وتراثها ) كل الاغاني تطربني ، لكن لما اسمع الدوبيت تنتابني حالة لا يمكن تصويرها .. هي حالة الانسجام لانة يخاطب مكمن البداوة فينا ..

Post: #23
Title: Re: أيــْــن الخيــــــمة
Author: Shinteer
Date: 08-24-2003, 05:04 AM
Parent: #1

Quote: لكن لما اسمع الدوبيت تنتابني حالة لا يمكن تصويرها .. هي حالة الانسجام لانة يخاطب مكمن البداوة فينا


ده يا أبنوس أخوي أياهو الباقي علينا كلنا. أنا غايتو بتجيني رعشة .. ولمن أطوّل منه وأسمعه بدمّع في الحال

ذكرتني الاشرطة. أهدى لي أحد أصدقائي شريط لواحد كباشي قاصع قصعة خارقة العادة .. اسمو النور ود شيخ إدريس .. بالله الشريط نسيتو قبلو. أما العطوية فهم الوحيدون الذين وجدت في بعض أشعارهم تأكيداً مكرراً لقناعتهم بأن الناقة قد خلقت لهم .. وبغيرهم لا حياة لها ولا دليل .. أو كما قال العطوي

فتّانة الخلوق .. الناقة
غير عطوية وين تلقي التبات والفاقة
قومك هاجّة .. عربك سوّوا عجّال لاقى
فتنوا الشوكة في النار .. والسبيدر قاقا

ربما أخطأت في بعض مفردات الغنوة .. لكن بطريقتي الخاصة سبكتها وبنفس معناها الأصلي

نرحب بيك يا أبنوس .. وخلينا قبلنا هنا أحسن .. تحت هذا العنوان المبهم الذي لا ينتمي الى أي منطقة بعينها .. رغم انعقاد لواء الدوبيت/الدوباي للحاردلو عليه الرحمة. كل همنا أن نروح عن أنفسنا ونتأمل في ما نسجه هؤلاء البدو. أنا غايتو معترف ليهم تب بالبرنجية في شفافية حسهم الشعري وسلامة حسهم العام


Post: #24
Title: Re: أيــْــن الخيــــــمة
Author: Shinteer
Date: 08-24-2003, 06:23 AM
Parent: #1


مَسَارِيّاً على كَسَمور بجن قُطّاع
مراديف كلهن من الصعب لا الطاع
قامولهن جنيناً في الطلَق بُتّاع
بكافوبهن سوالْف العقربِن لطّاع

واحدة كباشية للأخ أبنوس

أمك ناقة أبوي ماها الهميلي وداعة
بترضع .. ود سهيت .. متغذي ملْح القاعة
أسرع يا قطر كوستي المشيك بالساعة
والكور خلّو طير عكّة وعشوشو جماعة

البيت الأخير ده فيهو تصوير بديع .. يخلي الزول يترعش


Post: #25
Title: Re: أيــْــن الخيــــــمة
Author: Ahlalawad
Date: 08-24-2003, 07:52 AM
Parent: #1


أبنوس ... حبابك ، طبعاً أخدنا لينا صنة ، صانفين لأنو كبيرنا بيتكلم ... ونحن زماااان قالوا لينا لمن الكبار يتكلموا ، أسكتوا ساي . دحين عليك بي شيخنا ومشهادنا شنتير ... عليك الله كلامو دا بتجوز فوقو الزيادة؟ وحيث أنك زول عيّان بالإبل (شفانا الله وإياك) نقدم ليك هذا القليل .

الليل أمسى والنعسان جرايدو يدحّن
كبس الهم علي السلط ، قلوبهن وحّن
كضم الجرة سحار الغروب واتمحن
نعود سلمانة ياعمر ، الظروف إن صحن

وما تسعلني تاني .


Post: #26
Title: Re: أيــْــن الخيــــــمة
Author: sentimental
Date: 08-24-2003, 08:15 AM
Parent: #1

وده درب نفاج قديم مربوط فى قعر البورد. ناس ما بتخاف الخالقها

Re: دوبيت ومسادير

. اها ده من نضم جدكم ود ابو سن.

برد يا المنيع ديك الاراكة وخورا
الدرج ما قسم مقدرتك المدخورة
سلاح ست البنات البى دلالا فخورة
انت ميبسك وانا كبدى بى منحورة

يا هجام لباس العساجد كم
أبرى بى المدردم فى الدرب بنلم
بى فرق الجدى المنو الجمال بتهم
دنيت الديسو لا حزمو القصيرة بعم


وارموا النمـــة يا جنيات

Post: #27
Title: Re: أيــْــن الخيــــــمة
Author: saifkeli
Date: 08-24-2003, 08:41 AM
Parent: #26



الأحباب الأفاضل .. تحياتي ومودتي

الشيخ شنتير آآ زول انت البزعل منك منو.. وجنس النميم البتقول فيهو ده .. ما ظنيتو بجاورو هم ولا غم وإن شاءالله نلقاك في ساعة خير .. وهاك من الهمباتة النمات ديل

الدنيا جاتك تارة
أسيادك نقاقير للمرادف ودارة
إن حرّن صناديدن نقابل الحارة
شـن بردن نكافيبن سوالف السارة

أيام الدهاريب والسماء الهراج
حقب قربينو فوق أب عطبرة اللجاج
يا جد القراري الـ (للبحر) فجاج
سريع النهمة ما يهبرن شروك القاج


وتقعدوا عافية

Post: #28
Title: Re: أيــْــن الخيــــــمة
Author: sentimental
Date: 08-24-2003, 08:51 AM
Parent: #1

سيف كلى عوافى


الهمباتى ده المرة الجاية بعيقك. قولو شنتير مى شانتير.


العنز البجازن ديمة فوق فى خلاهن
بالغات النصاب انصارى ما زكاهن


وجيب مسدارك

Post: #29
Title: Re: أيــْــن الخيــــــمة
Author: saifkeli
Date: 08-24-2003, 09:49 AM
Parent: #28



العزيز السنتي منتال

تحياتي ومودتي
كيفك .. ماك طيبة

شنتير الهمباتي ما اظن يسويها .. لزوم الخوة
وأكيد بستعزى بى قول كبيرهم ود ضحوية

أنا التوب العشاري الباهي زيقو
وأنا فرج الرجال وكتين يضيقوا
أنا الدابي إن لبد للزول بعيقو
وأنا المأمون على بنوت فريقو

وأكيد هو فرج الرجال وكتين يضيقوا

وأرجو أن تجهزوا النفير من هسع للخيمة الجديدة
ولك مودتي


Post: #30
Title: Re: أيــْــن الخيــــــمة
Author: nazar hussien
Date: 08-24-2003, 10:30 AM
Parent: #29



والكور خلو طير عكة وعشوشو جماعة


ها زول ده فرزيع نصاح

قايم بي اربعاته
لامن الكور كاكا سيكام سيكام سيكام سيكام ايقاع تلاتة علي اربعة
حرم شوف عين


وكورك سالو مزيقا ورطانة وعوا
الخلاني من نار ام لهيب بتكوي
النوم شفتو يا قرد القلوع شن سوي

Post: #31
Title: Re: أيــْــن الخيــــــمة
Author: sentimental
Date: 08-24-2003, 11:08 AM
Parent: #1

Quote: والكور خلّو طير عكّة وعشوشو جماعة



يا شنتير ويا نزار ود الحسين

والله فهمت الفكرة لكن دايركم توصلولى الصورة بالشرح .

سيف كلى

الهباتى النجيض ... شان الخوة كلو يهون ويا شانتير امسك الزمام . شفت شاتير دى كيف

Post: #32
Title: Re: أيــْــن الخيــــــمة
Author: nazar hussien
Date: 08-24-2003, 06:01 PM
Parent: #31




الاخ العزيز سنتمينتال


والله فتشت الانترنت لا حدو عشان الاقي صورة عنافي بي مخلوفتو
او حوية بي أشميقا او عاشميقا

وفق اختلاف النطق بمناطف مختلفة في السودان

عشان تكون الصورة واضحة

فالكور تصبح عشوشو جماعة
من كترة فلاحة هذا العنافي في سرعتو

وهي عملية انبريقية تهز الكور هزا وتسمعو يسكسك الي ان تتخلخل بطانة الكور وتتشتت زي باقي معيط شعر البنيات في المشط ولكن بكميات تصلح ان تكون اعشاشا
والكور اصلا يشبه الطير براسه ومؤخرته وجناحيه
ومع ذلك تختلف التسميات من منطقة الي اخري

والشرح في بطن القايل

Post: #34
Title: Re: أيــْــن الخيــــــمة
Author: ابنوس
Date: 08-24-2003, 07:27 PM
Parent: #32

يا ناس الخيمة سلام ، وسمحة القعدة معاكم في ضل الخيمة ، وشربة الشاي ( السليقة ) اصلوا انا مقريف ، والسكر معدوم ، وحب الشاي ذاتوا غاليهو كم مرة ، ( تفل ) .. والرأس تتقاطع فيهو الاحاديث زي زي بعير اتبادلتوا كل القبايل وختت وسمها على جلدوا ، الرأس الواحد بقى يشيل ( جرّين ) ، وبشيل كتير من الحكايات ..
وعشان كدة بدور ارتاح شويا وقدامي فرقة بدور امشيها ، اصلوا انا خاطر ، ومن زمن طويل هجيت من فريقي وباديتي .. وماني مودر لا بكرة لا مفرود ، بس الدنيا ام قدود فتحت جواي طريق سفر والزاملة فيه طيارة ، ودروبوا في السماء لا بتتوصف بشدرة لا خور ... ولقيتكم في خيمة مصنوعة من زجاج ، ومربعة وما فيها قربة معلقة ، ولا باصور ، ولا كورا مدهون بزيت نعام ، ومافي عنافي بارك قدامها ... لكن خلوني اجر النم شويا :
...............
الدونكي البحلق طيروا
اتحلجن مواسيروا ، ولا انقرش من سيروا ؟؟
البل عطيش ، وتاني مافيش غيروا
والسرف البعيد واردنوا بكرة نغيروا
....................................................

الليلة الصعيد كبت مطيرتوا ونور
وخضر الابنوس ، ولونو اتغير
جقلا ام فلج نوت الرحيل تتزور
ومافي مقيل ، ارحّك ، للنشوق نتحول
( هذه الاغنية نجرتها براي )

.................................................




Post: #33
Title: Re: أيــْــن الخيــــــمة
Author: singawi
Date: 08-24-2003, 07:15 PM
Parent: #1

حباني يا أهليييييييي
يامن تعزونيييييييي
أنا يوم يحيييين أجليييي
ما تبكو هنونننيييييي

شقي الحال يلقى العضم في الفشفاش

Post: #35
Title: Re: أيــْــن الخيــــــمة
Author: Shinteer
Date: 08-24-2003, 07:33 PM
Parent: #1


يا سلام عليكم أيها الرجال القماعريت الكزاعِر

يا فارط جمال الميس بعد تتعارَك
سُرْعك صيحة الكرْسة ووهيـــط تتوارَك
يا عفريت سليمان الضرب صفّارَك
على سيدة بنات آدم مغيت ترّارَك

عافي منكم .. أها سووا سووا


Post: #36
Title: Re: أيــْــن الخيــــــمة
Author: nazar hussien
Date: 08-25-2003, 08:50 AM
Parent: #35



اللكة البتل ايدو ومكضم سيفو
واسق انياقو في ترعة وسدر بي قيفو
في تقطع مجالس هملن من صيفو
يوم بعنالو بالساحر ببعزل كيفو

وسامحوني علي عدم وجود تنوين لهذا النص

يا الصدييييييييييييق

كلامنا ده في ناس بكونو شايفنو زي الكلمات المتقاطعة

Post: #37
Title: Re: أيــْــن الخيــــــمة
Author: Ahlalawad
Date: 08-25-2003, 08:58 AM
Parent: #1


برام قرنو درن عقلو واتوصاهن
لا ساهن كرت لاطولن نصاهن
نظم التسعه فوق دالت الوجه رصاهن
لحظتي ليهو ريشات قلبي كع قصاهن

يا أبا يارا - الشرح لا .. الشرح أختوهو


Post: #38
Title: Re: أيــْــن الخيــــــمة
Author: Shinteer
Date: 08-25-2003, 09:06 AM
Parent: #1


ويــــــنك يا ود حسين .. نعل عافية
كلمات متقاطعة وبس؟ ده كلام كُتُر

أها وكت ما عندك تشكيل في كمبيوترك أنا بشكلها تب .. بعد ما أصلح القايل روحي بعرفو

اللِّكَّة البِتِلْ إيدُو ومِكَضِّمْ سيفُو
واسْقَى نِيَاقُو في تُرْعَة وسَدَرْ بي قيفُو
في تقِطِّعْ مَجَالِسْ هَمَّلِنْ مِنْ صيفُو
يوم بَعَنَالُو بالسّاحِرْ بَبَعْزِقْ كيفُو

والله أعلم


Post: #39
Title: Re: أيــْــن الخيــــــمة
Author: Shinteer
Date: 08-25-2003, 09:22 AM
Parent: #1


كيفنك يا أهل العوض .. إت بيجاي آزول وأنا ماني شايفك؟ الشرح مرات بكون كَوَيّس للزول الرايح عليه المعنى .. لكن أن بقيتن بقى بحالو كدي ببقى أحسن .. بس مرات لا بد من الفرفرة

طريفي أمّات حقيبة الـ بالضهور لفّاف
رقيقاً غَرْدو جايل مو بدين نفّاف
على أم ظَرْفاً بياخد الكبدة والرفّاف
خويرات السِليم جاهن كفوفو خفــــــاف


Post: #40
Title: Re: أيــْــن الخيــــــمة
Author: Ahlalawad
Date: 08-25-2003, 09:38 AM
Parent: #1


وي سلووووم شيخي ، موجود يابا لاكين أظني اتقاصرت شوية بقيت ما بنشاف

أها على نفس القعدد ، ومن نفس المغترف

عقيدات بينن من كتير النص
جاهن كفو زى مكن الخياتة يرص
علي المرناع بريريب الارايل الحص
عجلك ترو عينك في الشقيق لا تبص


Post: #41
Title: Re: أيــْــن الخيــــــمة
Author: saifkeli
Date: 08-25-2003, 10:35 AM
Parent: #40




الأحباب الأعــزاء

تحياتي لكم .. وطالما ركزتوا الخيمة في بكانا ده .. نسولكم الرميات دي .. همباتة .. ـ

بحر أبيض وصلناهو وقطعنا جزايرو
داك شدر الوزازيق واليهودي بضايرو
غير أب كسرة والقربين وزر ما دايرو
تعبك يوت على الشالن حجولو وزايرو


دجيجك غلَّـب الفـوردي وعواتي الخيل
غتاس جورجي نابح فوق قلايبك سيل
الزول البضوي رشيمو دُجن الليل
عليهو الضد بيرمي الخطوة مقدار ميل


ما هبشك قماش والله منا وليك
تقول سكران كبنقا مدبل الدامشيك
أب قنفة الموالي الوادي منه فريك
يا سيدة الدرب سوالو حزم الشيك


Post: #42
Title: Re: أيــْــن الخيــــــمة
Author: sentimental
Date: 08-25-2003, 10:51 AM
Parent: #1

غاب نجمـــــــــ النطع والحر علينا أشتد
ضيقنا وقصر ليلو ونهارو إمتد
نظرة المنو للقانون بقيت إتحدى
فتحت عندى منطقة الغناء الانسد

Post: #43
Title: Re: أيــْــن الخيــــــمة
Author: sentimental
Date: 08-25-2003, 10:54 AM
Parent: #1


Post: #44
Title: Re: أيــْــن الخيــــــمة
Author: sentimental
Date: 08-25-2003, 11:09 AM
Parent: #1








هى النجيض ..اكرب مخلوفتك

Post: #45
Title: Re: أيــْــن الخيــــــمة
Author: Shinteer
Date: 08-25-2003, 11:22 AM
Parent: #1


سيف كلي .. يا سيف كلي .. على الطلاق من الليلة دي نديك الشياخة. هازول إت بالع لك همباتي؟

يا اب عرْج .. القبايل كلهن زهْدنّك
وما بياخك بشر في المولى كبّر ظنك
الخب سيهو بـنَقَع البطانة مفنّك
ابقى الليلة نايرات الخدود طرينّك

سنتي منتي .. يا سلام على التصاوير

أبْ سَعَنة انظكر نزلن ضهاري ملنّو
عَدَلن حالو قشو اللنشهب جلّنّو
الحُمْ قِنْعَن السافل خلاس خلّنّو
مُدْهاجاَ مِوَتِّر يا صعيد عدَلَنّو

عاجبنّي العرب عان نزلتُن ما احلاها
فوق شرْب الما والقش السمح تالاها
بشوف أم بوح مهيّتة مصّعت بخلاها
والْبِل خلْفَتِن قش الحدب جلاها


Post: #46
Title: Re: أيــْــن الخيــــــمة
Author: saifkeli
Date: 08-25-2003, 06:52 PM
Parent: #45






الشيخ شنتير .. بالعوافي

ها زول كيف العين تعلى على الحاجب .. ونحن حيران من قمنا وكت نلقى شيوخنا ديل بنذاكر معاهم ساكت .. يديك ألف ومليون عاقية

مودتي لك موصولة

أخوي نزار ود الحسين .. شفت الخيمة دي جمعتها كيفن سمحة

يديك العافية وهاك في الكــور الجدعة دي

الليل بوبا والكــور حـركــنو مشيـهـن
عقـبـن مايــو والجبـل أب قـِـرود في قفيهـن
حــرت جالستن ود يُـمّـة ما باريهــن
لا بــلاص ولا عـُـقُـب الجعيــدي بجيهــن

Post: #47
Title: Re: أيــْــن الخيــــــمة
Author: ابنوس
Date: 08-25-2003, 09:02 PM
Parent: #46

يا شباب والله رجعتونا للدريب الجابر ، والواحد حساي زي كأنوا معاهوا جماعة راكبين جمال صهب ، وخابين علي زفّة :

الليـــــــــــــــــل بوبا والنجم الكبار اتمرّق
صباح الريد فوق النوم بقت تتغرّق
خلت قلبي كيف عود الهبوب العلّق
وانا منتظر للسّة الابت تتطلّق

..........................................................................
السلم الطوال فوقوا قبيل قيلنا
ويوم بقى في العصير داك الفزع قابلنا
فشقنا السيبة فيهن اتناترنا
ما عاد بيهن اظنوا مات في اترنا
......................................................................
ليلك بوبا ، ودوماتك سالن
وايدياتك علي بلد المحاربين حامن
حرك خبّك نلحق النياق القامن
وبكرة مبيتك عند العيونوا ما نامن

Post: #48
Title: Re: أيــْــن الخيــــــمة
Author: Shinteer
Date: 08-26-2003, 07:47 AM
Parent: #1


ها ناس كيف اصبحتوا؟ وان شاء الله مخرفين وبت أم ساق مدرّجة حوارها

سنة الجفاف الله لا جابها تاني .. فعلت في أم زور فعلاً شين وخلت حنينها يقطع قلب العدو قبل الصاحب. في تلك السنة الجرباء .. قال الرجل

نَطّارْة البِروق بحَنِينْها بَكّت
عقيد مَرْعَاها طَبْلَة راسو فَكّت
أم دَرّا قبيل للباكى سكّت
تَرازى وِكِتْ تَهِم للقومة عكّت


Post: #49
Title: Re: أيــْــن الخيــــــمة
Author: saifkeli
Date: 08-26-2003, 09:49 AM
Parent: #48





سلام .. مربع


الليـل بـوبـا بالبطـانة .. ولّعن نيرانِـن
الهـسكـي النضيـف حقبنـوا فـوق كـيـرانـن
إدلـن مرايـا وزلّقـن حــيـرانــن
بـى ليلـة نكــد رقـد البِـدُقـن زيـرانِـن


لكن شوفوا سرعة البعير حق الهمباتي لمان يقول:ـ

ود المُـرة والشـرَّاد .. تِـربـة الفـايق
حـق راحـة التِـبِـل الكـرامات التلاتة وسأيـق
على بـلد أم خدود رزينـة حظها رايق
عشريـن ميل تكيلِـن في تمانية دقـايـق


باقيلكم الطيارة بتسوي جنس ده

تقعدوا عافية

Post: #50
Title: Re: أيــْــن الخيــــــمة
Author: Ahlalawad
Date: 08-26-2003, 10:10 AM
Parent: #1


سيف كلي - والله دا الطيارة زاتا

أبيض ما انتر مسك الدرب واتناحى
تقول مكتوب لو آيات النجيع في الراحة
يجدع باع ويسرق نفسو بي بالراحة
مخلفوفتو بتجض مثل الكمنجة صياحا


Post: #51
Title: Re: أيــْــن الخيــــــمة
Author: nazar hussien
Date: 08-26-2003, 10:40 AM
Parent: #50



شيخنا ودشنتير
احمد
ودكلي

نعلكم عافية يا الربع

النايم مغي وخدمن جرايد اب راس
والزوم غير تلوب عتمورو ما بنقاس
ام حمد المجرب دينها يا عباس
نوي عليها ساحر برنو ضيب الناس

Post: #52
Title: Re: أيــْــن الخيــــــمة
Author: gessan
Date: 08-26-2003, 01:55 PM
Parent: #1

سلام جاكم..وإن شاء الله ديمة ملمومين كدي..
انا غايتو اسم الخيمة مو مشكلة كبيرة عندي ..
محل ما ألقى طريقة نم ..بنم ..
دحين السلام ليكم كلكم..

يا أخواني المعاي شِق ألبل الوراني
بِدور ولداً كتل توبو وإندرج مشّاني
يختم السلفن ويعقِب علي الوراني
وصوتو قلية فوق ضهر الردف أم تاني
****
واحدين ديما حارسين البيوت ما إتعدوا
واحدين ساقو بالحدب المفاسِح ومدوا
لفحوا السرج علي ضهر المفونق وشدوا
وصرفوا اب ماركة للبهم المزّوق خدو
----------------
الماهري:

رخيت الرسن وجبدتا نخرتو
إتلملم كرب جلدو وبرم عنقرتو
هجّام المِتل حطب البنادق خرتو
مالاً مدّ فيك والله مااا ودّرتو
*****
عزت الماهري ..مرحبتين حبابك ..والجابك يجيب عقابك ..ناسك ناس البادية الغربية..
وقريباً سأهديك "كالندر ود الزمزمي " من أهلك الكبابيش..نماً سمح بالحيل..الغناي يباري فيهو منازل السنة ..:
صب النيل نزل مطر العِوا الهرّاج
طراني الفي الضهور ما إتغبرن بي عجاج
البضوي ضلام الداجي وجهو سراج
ريدو يهبل الزار المدينة وحاج

إن الله أدى العافية ..قطِّع شك بنتلاقى ..
وتقعدوا عافية

قيسان

Post: #54
Title: Re: أيــْــن الخيــــــمة
Author: saifkeli
Date: 08-27-2003, 08:46 AM
Parent: #52



سلام .. مربع

شيوخنا الكبار
والأحباب قيسان بركة الشوفة .. وعزت الماهري يا زول ما شاء الله .. يديكم ألف عافية

نشوف معاكم درس الجغرافيا ده مع الهمباتي ده

قـالــوا لـــي ليــش مــربــوط
ده لـى ناقـة العليـقـي الفي الصعيد مبسوط
أكـسـر الهـربـة ووديهـــن على الثبــوت
ندليـهـن بكـانــات الشمـس ما تمـــوت

قصدوا ماخدن من البطانة الى بوادي الغروب

وكــت الـدنيـا زاهيـة وأنا عندي فيها بصارة
ما بتدبـى لى عنــز الفطيــم والجـــارة
عـقــار شـعفــة البعيــد مـســــدارة
ندلــيهـا بيطاليــا وحبــش نقـــارة

قصدوا في ظني أرتريـا

ويأ أهل العوض دة مو شرح ولا تزعل علينا
بنسويهــا مقاربـــة ساكــت

وتقعدوا عافية

Post: #53
Title: Re: أيــْــن الخيــــــمة
Author: sentimental
Date: 08-27-2003, 08:42 AM
Parent: #1

قبيل السينتمنتال جاب فى الشنتير

ياك اللسد قايد البوردية
يومك فى القتال صبحك مساك وعشية
ايدك يا الصقر حرم بتختف مية
وان جات الالوف بتصدهم زندية


Post: #55
Title: Re: أيــْــن الخيــــــمة
Author: Shinteer
Date: 08-27-2003, 09:44 AM
Parent: #1


الأحباب الأعزاء بدون فرز .. إن شاء الله ربنا يديم مجالسكم ويزيد من امثالكم. شوقي ليكم ازداد أطنان وقريفتي لكلامكم خلتني ما أشوف غير خيمتكم دي واحة اسند فيها كوعي ده وأطلق زفرة حـــــــــــــــارة انفث فيها كل غبايني. تسلموا

بِريق يا مجْمع العشاق سحابك هجعة
لعلع وانتحب صبّح بلابلك سجْعى
جسوماً لدنة كانت في رباك مضطجعة
إبقى مقيمة وللا حدوجها نجعت نجعة
=========
أب قنفة اللفج كوعو وسمح تضريعو
عسراتو اللّكَب حي الشقوق بتريعو
كلْ عامراً مراجي السوق نفِك تقريعو
نحن قراننا زي ما يتفق بنبيعو


Post: #56
Title: Re: أيــْــن الخيــــــمة
Author: الزومـــــــه
Date: 08-27-2003, 03:24 PM
Parent: #55

السادة عمار المجالس الأصيله
لكم جميل التحايا و صادق الود
لدى اقتراح متعب الا انه يزيد في الامتاع
الا وهو عرض نماذج تسجيليه بالصوت لكبار الشعراء او حتى نم من احد الاعضاء لانه كما تعلمون مدى المتعه التى يتلقاها المستمع

و دمتم و دامت مجالسكم العامرة

Post: #57
Title: Re: أيــْــن الخيــــــمة
Author: nazar hussien
Date: 08-27-2003, 03:51 PM
Parent: #56

اعرض يا الزومة اعرض

هو نحن لاقين نسمع

عليكم الله الما سمع غنية عمك تنقو المنزلها في بوست هذا هو صوت اسرار بابكر يمشي يسمعو من ضو

وهي غنية يا طير يا ماشي لي اهلنا
بسراع او في سراع وصل رسائلنا
والشوق ما تنسي يا طائر لكل البسألك عنا

ما تفوتكم

Post: #58
Title: Re: أيــْــن الخيــــــمة
Author: sentimental
Date: 08-28-2003, 10:54 AM
Parent: #1

عمنا ود الزومة سلامات وجيتا جيت لخيمة البادية

ادخل وارمى مسدارك بعين السلام

Post: #59
Title: Re: أيــْــن الخيــــــمة
Author: HOPELESS
Date: 08-28-2003, 12:12 PM
Parent: #58

نجر أخضر من وحي شلوخ ام الجندرية
جن سادرات امات مطارق
فيهن نجم اريتو طارق
الرسمو فوق خدودو بارق
دق قلبي بقالو مارق
حضن هواهو فضل معانق
**
حتى النظر فضل يسارق
للوهج الفاق المحارق
شبت نارو غلبو يفارق
شوفة الرزينه ام شلخا شارق

Post: #60
Title: Re: أيــْــن الخيــــــمة
Author: gessan
Date: 08-28-2003, 01:46 PM
Parent: #1

أهل العوض..
ها زول كيف حالك ..وأريتك طيب ..قت لي " كسرن رويشات القلب كع؟؟؟"
تعرف "كع" دي ذكرتني بي نمة القدال ..محمد طه..
"كبس الهم علي والحال قبض يا السيد.....
وغبناً فيّ "كج"..
وأظنها بالجيم أم تلات نُقط
واللتنين بوصلن المعنى ..وبخلن الحالة تمرق وتمسك فيك ..
لك من الود اجمله ..

****************

1- نجم النطع:
نجم النطع طلّق علينا عجاجا
نيران الغرام في الجوف بقت سرّاجا
الفدغ الجميل زوقو بتِل العاجا
مجروح القلب من غيرو ما بتعاجا

2- البطين:
دخل نجم البطين جاب رعود ومطور
شرَفن شامَشن دُرجاً جمالهن حور
بُيضة شاش ماهو قماش ولا دمور
حكمة مولى يفعل فيها مهما يدور

3- التِريا :
دخل نجم التِريا داك سحابو القايم
بالليل رمضا حارة ونهارو سمايم
جنبت الشمش الحربا وجنودو صمايم
من سِمو المهلك إنجاربَن دايم

4- الدبران:
داك اب ريّا حار عصرو مطرتو فريدة
انحرق القلب والعين جفت غميدا
ست السابِل القطع القلب ريدا
مولاي تبرِّد حرها الفي جوفي نارو شديدة

5- الهكعة والهنعة " العِصي":
الهقعة والهنعة نجوماً في السما بينات
كبَّ نيلهن نزل أمطارو بالجيهات
الخّلا القلب نيرانو متعالبات
جنابت الشمش الحربي عنا الحفلات

6- الضُراع:
جاب نجم الضُراع وهطلن أمطارو
قامو المنتبهين لي زرعو ولزيز أثمارو
جنابت الشمش الحربي طلب نُظارو
غادي مسافة يا مولاي تقرِّب دارو

7- النترة:
نجم النترة طلّق زيفو وسحابو اللَّمه
العين ساهرة ديمة والكبد مِنسمه
سيد أم قجة من درب الوكر ما همُّ
خلف الساق علي ضهر المزاول نمُّ

8- الطرفة:
نجم الطرفة جاب زيفو طلق عجاتو
فرُّو أهل الحصاد والمعشوق بزيد حسراتو
وين أهل المعاني الشيُّل بدوهُن وفاتو
خلو العين تلِج والقلب طبق عبراتو

9- الجبهة:
نجم الجبهة جاب زيفو سحابو جبال
فرحو أهل المزارع وبدّرو الشُغال
مرضان أم رشوم معدوم دواهو محال
عِلا موزاً لزيز شفتيهو ..ريقو زُلال

10- الخيراسان:
نجم الخيراصان شلعن بروقو سواري
صبَّ النيل نزل جاب المتلِل جاري
يا مولاي تنوِّر لي جميع أبصاري
أنظر ديفة الصيد ..السكونو ضهاري

11- الصرفة:
نجم الصرفة جاب مطراً كتير وهبايب
طرَّاني الجميل زوقو كلامو عجايب
الفي جوفي نار عشقو ليها لهايب
ربدو يهبِّل الحجا للمدينة وتايب

12- العِوا:
صبّا النيل نزل مطر العِوا الهرّاج
طرّاني الفي الضهور ما إتغبرن بي عجاج
البضوي ضلام الداجة وجهو سراج
ربدو يهبِّل الزار المدينة وحاج

13- السِماك:
دخل نجم السِماك واتوقّف الأمطار
طِريت الوجهو بِضوي دارة الأقمار
ده الحرق العقول زاد القلوب نوسار
*****
إن الله أدى العافية ..عندنا رجعة تاني لباقي المنازل ..ونم الكبابيش..
**** سيف كلي التحايا ليك ..وياخوي شريطك ده ما تنساني منو..
وانا زاتي عندي ليك ..شريط حِميرة
مسجل من حفلة سنة تسعة وسبعين..
شتما يسوي يا غربتي ..
سلامين
و
تقعدوا عافية
قيسان

Post: #61
Title: Re: أيــْــن الخيــــــمة
Author: Ahlalawad
Date: 08-28-2003, 01:53 PM
Parent: #1


قيسان ، مكنة هينو ونيسان – آ زول الله يخضر ضراعك .. دا شيتن ما بنقدر البتسوي فيه دا .. أها الباقيلك سعد السعود وسعد الذابح وبي دربك ... الله يعدل عليك .. سمعت بأنه الصادق ود آمنة عندو مسدار في نفس الاتجاه ... لا أحفظ منه غير هذا البيت

الصيف انصرف جانا الرشاش بي هبايبو
براقو البلوح الحر طفاها لهايبو
رفّ وساق ورزمن فوق قصيرة سحايبو
صبْ ماياً كتير والفيل وطاها دبايبو


Post: #62
Title: Re: أيــْــن الخيــــــمة
Author: tmbis
Date: 08-30-2003, 08:21 AM
Parent: #61



Post: #63
Title: Re: أيــْــن الخيــــــمة
Author: saifkeli
Date: 08-30-2003, 08:24 AM
Parent: #61




قيســـــان .. يديك العافية ويخدر ضراعك
متل وابل الخريف الرشَّ

الشريط ان شاء الله يصلك قريب بس ورينا دربك بى وين
وشريط حميراء بتور الشعرة

أنا بندهلك الصُــــلاح
بارود النصارى الشمَّ الفتيلة وفاح
**
وأخيراً لك مني كل الود
**
أنا غنيت وقولي تام
للعاصي القرض اللجام
دخل المكتب وقال سلام
كل المدوبل قنت وقام
السار بوبا .. يا الفوتك مو دحين
تسلم أخوي قيسان

بعد سوق الردايف وعلى السدر حزامتي
دقيت المقد تروة ونقـل فوق هامتـي
دابي مسكت في الدرب البفـرح شـامتـي
عدم النقدي فرق المنو رابطة قيامتي

وتقعدوا عافية


Post: #64
Title: Re: أيــْــن الخيــــــمة
Author: Ahlalawad
Date: 08-30-2003, 08:45 AM
Parent: #1

تمبس
الله يديك العافية
يوسف عبد الله البنا مريض
وإنت يشهد الله مريض
الله يشفينا ويشفي يوسف ويشفيك

Post: #65
Title: Re: أيــْــن الخيــــــمة
Author: ابنوس
Date: 08-30-2003, 01:29 PM
Parent: #64

سلامات يا شباب

..... وعذرا للانقطاع .. براكم عارفين الظروف ... ولعن الله الفقر البجبرنا على العمل طول الليل !! وينومنا طول النهار
واحد زهجان من فقروا ....
قال :
الفقر سوّانا لو راكوبة
لا جمل قيد ، لا شايلة محلوبة

.... ونحن غايتوا هجينا من الرواكيب والخيام ....
وهاكم دي :

جبد السجار باللفّة وطق الحقة فوق الجيب
ما بزيحن اسف ، كلهن دناوة وعيب
ولدا ما خلف ساقوا فوق شوشة الجقليب
يتأسف بالنكد لامن يطق الشيب

Post: #66
Title: Re: أيــْــن الخيــــــمة
Author: HOPELESS
Date: 08-30-2003, 05:03 PM
Parent: #65

اهل الخيمه ابان قلوبنا حليب
الله نصركم ... وهاكم البشاره
فتحى البحيرى...إن لم تكن كوز أو دجال، فلماذا تكتب بإسمين?

Post: #67
Title: Re: أيــْــن الخيــــــمة
Author: saifkeli
Date: 08-31-2003, 08:31 AM
Parent: #66




أحبابنا .. تحياتي

أنا والعانة من بلد الكول والكمبـو
لولـح راسـو والسفــر قنـبــو
دوماتو سكَّـن ونعيدن إتنادنبــو
عـكَّ الفِجّـة وأصبـح نـارو تأكل الجنبو

بـاتع في الدحيح ياالغول متيلك وين
ما تستاهل العـورة وخسـار العيـن
كتيـر من فـارق النُـزهـة ورضـا الوالدين
البأقـي اللـه يـا هجــاج فريـق أم زيـن

وتقعدوا عافية

Post: #68
Title: Re: أيــْــن الخيــــــمة
Author: gessan
Date: 08-31-2003, 01:52 PM
Parent: #1


السلام جاكم..

الخّلاني برِد القاش معاك وأتغرّب
شايفلِك ضيوف زمن السنين تتكرّب
أبشري الصيفي وجهو عليك وخيِِرِك قرّب
لابد نزلة في الليد المقامة محرّب

---
ويا سيف كلي ..قطع شك بنتلاقى..
بس مشاغل النيا دي تديني جمة..
الجري حاصل..والله زي الماسك موية ومعاك شُتال البصل..

"وحات ابوي اصلو الكي كدي "
زي ما بتقول حميرة
لك الود..
******************
بقية كالندر ود الزمزمي يا أهل العوض مع التحايا ..:

14- نجم الغفر:
طلع نجم الغفر المسمى بالميزان
هبّ نسيمو جاب ريحة جناين اسوان
البسماتو تطرِب تفرِح الحزنان
ظرافة وزوق.. نهداً حاكى الرُمان

15- نجم الزبنان والإكليل:
الزبنان مع الإكليل
نجوماً فضلهن نضربو التمثيل
ديل الخلّن العاشق منامو قليل
محروق ديمة بي نار أم لهيب والويل

16- نجم قلب العقرب:
طلع نجم القلب والفوف كسا الجبّال
دور الحُم ظعنهن جدّد المُرحال
المعشوق دوام يتقلىَّ في الملاّل
خلُّن قلبي قدّاد حيكت الغربال

17- نجم الشولة:
نجم الشولة صبُّ نزيلو
والقلب فاقد الفدغ المزنّد تيلو
قمر السبعتين وجهك ضوّا فوق جيلو
يا مولاي بعد الحال أضوق عسيلو

18- نجم النعايم:
ديل النعايم وجّهن شاردات
الخيل من قفاهن بالسروج شادّات
كفل الصهل لي طبق العيطات
مسيكة الكتة بطن اللُّجة بالموجات

19- نجم البُلدة:
نجم البُلدة يا خِلايا ربط بي غمامو
الليل طال والمخلوق كتير النامو
مرضان أم رشوم العارفنو تب ما لامو
بي حسر القلب لامن يعدي أيامو

20- نجم سعد وذابح:
سعد وزابح جاب بردو ونسيمو الحار
العين لاجُّة والقلب إنحرق بالنار
عانس الدوّر القفرة ولقاها خدار
مغِّيب عاشقو ضلام الليل عليهو نهار

21- نجم سعد السعود:
سعد السعود طلُّق علينا نسيمو
طرّاني الفرقو نيران والجنان في ليمو
لمعان اليروق ماخود من تبسيمو
محروق أم رشوم يا ربي أفرج ضيمو

**********************

وتقعدوا عافية
قيسان

Post: #69
Title: Re: أيــْــن الخيــــــمة
Author: Ahlalawad
Date: 08-31-2003, 02:20 PM
Parent: #1


قيسان ،،، والله لكن كالندر مكرب زي دا أنا ما لاقني تب . حقو ترسل منو نسخة لوزير زراعتنا وصورة لوزير البوليس لزوم حفظ الأمن وكدي .


Post: #70
Title: Re: أيــْــن الخيــــــمة
Author: nile1
Date: 08-31-2003, 10:34 PM
Parent: #69

Quote:

ياك اللسد قايد البوردية
يومك فى القتال صبحك مساك وعشية
ايدك يا الصقر حرم بتختف مية
وان جات الالوف بتصدهم زندية


حبـــوب آ الاصم

الإخوان شنتير سنتمنتال أهل العوض سيف كلي وبقية فحول الهمباته
ســــلام
ظللت أتابع وأقرأ بشغف و أنهل من عيون شعر الهمباته ومن مسادير شعراء البادية علني أبتعد عن صفة طير الصعيد التي تلازمني بالرغم من أنني أصلا أغبش من أهل العوض..ولكن...تأكدت هذه الصفه في عدم معرفتي وفهمي لمعاني كثير من الكلمات ولكن إعجابي وطربي لما أفهمه حثني على العناد ومواصلة المتابعة والقراءة..بس بصراحة الراس سخن من قل الفهم وبقي مكوه عديييييل وبرضي ما قادار أخلي مجلسكم...حقو مره كدا تشرحوا لينا معني الأبيات البتحسو إنو الطير الزينا ما حيقهمها وكمان تدونا نبذه عن كل شاعر....سلمتم لنا
الزاكي

Post: #71
Title: Re: أيــْــن الخيــــــمة
Author: aba
Date: 09-01-2003, 00:50 AM
Parent: #70

الليلة النفس امســـــــت حزينة وعامــــــدة*

وما بتســـــــلى بي برقع* حميـــــدة وحامدة*

فارقنــــــا الرباعــــــة* أبّان* قلوبا جامــدة*

Post: #72
Title: Re: أيــْــن الخيــــــمة
Author: saifkeli
Date: 09-01-2003, 07:55 AM
Parent: #70




أخوي الزاكي .. حبابك ألف

فعلا الكلام يحتاج لشرح .. لكن منعاً لتضارب الفهم من شخص لآخر
أظن الأخوان فضلوا عدم الشرح
لكن نتمنى تواصلك معنا

الليلة القعود سوى السفـر في نيتـو
طِـرى نـاس أم نقينـق وزودت جِنيتـو
البهم البتيـتـل بى فريـق مكنيتـو
هو بيعمل جنايا وأنا مستعد لى ديتو

كـم شديتـا فوق أسـد الخلا التغيــان
وكـم قـرّن لُقـاح لاعنـد جبـال أســوان
مشيـت الوَحَـدة خيــرٌ مـن جنيـن الآن
نهِـرت أب زِرة يقــول معــايا فـــلان

مودتي للجميع .. سيف كلي


Post: #73
Title: Re: أيــْــن الخيــــــمة
Author: sentimental
Date: 09-01-2003, 08:16 AM
Parent: #1

الذاكى وباقى الزملان

انا نجعت محل نجع الشنتير. ومانى جاى مضاربكم علا يرجع

Post: #74
Title: Re: أيــْــن الخيــــــمة
Author: الزومـــــــه
Date: 09-01-2003, 02:20 PM
Parent: #73

هذا هو رابط خيمة الحاردلو الأصلية لمن يريد ان يستمتع
و قد صعب على رفعها
و ربنا يزيل غضب أخونا شنتير و يرجع لهذا الوطن الصغير فيكفينا غربة الوطن الكبير
و نحن في انتظار الشنتير لينعش روح هذا البورد
خيــيمة الحــردلو - العمارات

Post: #75
Title: Re: أيــْــن الخيــــــمة
Author: saifkeli
Date: 09-03-2003, 07:59 AM
Parent: #74



العزيز شيخنا شنتير .. تحية ومودة وبركة آ زول انعلت الشيطان وان شاء الله البورد عامر بيك وبالاخوان .. وهذه العودة أفرحتنا في زمن قلَّ فيه الفرح والخيمة ان شاء الله تعمر كمان وكمان

أرايق للبرايقني إن لقيت مُـراق
حنبـاق ما بعـذر الروحـو في الطقاق
عـرَّاق عــلا عــرقـاً يقعلو الخـلاَّق
أنـا متهـوم في جرايمـا أضعفـن سـرَّاق

جبـدنـا الحُقـق من التمـك سفينـا
يابسـين باسرر من اللحــم خفيــنا
سهـام أب عــدار لأم كفريب لفيـنـا
ما تسالمنـا يـا أم حمـد إن بقيت رفينا

الولـد المظهـر توبو للـ الأكضـاب
كـدي اسلنبو ساكـت في قفـا الغياب
ما شلـوح رِكِـب فـوق قُجـة الخبـاب
مـا قـرّن لُقـاح لمن مسـك ديــداب


Post: #76
Title: Re: أيــْــن الخيــــــمة
Author: sentimental
Date: 09-03-2003, 08:09 AM
Parent: #1

مرحب بعودة الشنتير... اللسد المربعن فى خلاه خطير
وهاك نمة خفيفة

سكر السكاكر
بتفكر المفاكر
بتفكر المفاكر...أهجم بالليل
وأصبح مربعن ماكر ... ياااااا

Post: #77
Title: Re: أيــْــن الخيــــــمة
Author: nazar hussien
Date: 09-03-2003, 08:18 AM
Parent: #76



اللييييييييييييييييييييييييييييييييييييييييل


ياب حلقة الرحيل عز العرب من يومو
ارح خترنا لي بلد الطرية جسومو
كعب ود الفراش كان يمشي في البتلومو
وعريان العرض ما بسترنو هدومو

Post: #78
Title: Re: أيــْــن الخيــــــمة
Author: Shinteer
Date: 09-03-2003, 08:44 AM
Parent: #1


كيفنك يا سيف ود كلي .. إن شاء الله عافية؟ الله يرحب بك

حباب عُمْدة كَلِي .. حوض العَشَامَى
حباب دَرْ الخَلِي .. العَشَّى اليتامَى
شنتير من فُراق .. خيرة النّدَامَى
نومو بقالو زي .. دَمْ الحُجَامة


Post: #79
Title: Re: أيــْــن الخيــــــمة
Author: Shinteer
Date: 09-04-2003, 11:18 AM
Parent: #1


سلام مغربل .. وشوق دافق .. يأ أحباب .. وان شاء الله تكونوا في آخر بسط .. زيي كدي. شايفكم فترتوا وحسكم برد .. نعل عافية؟

عَقَب الغُرْ هَكَع فوق العَرَافي
تقول بابور شريطاً قام مِقافي
أرَحْ للخَدَّهِن قلّل وِصافي
جعلْت الروح فداهِن واعتكافي

برْق القبلة من النالَتيب .. وصباحو
سوّى فعايلو وانْقَدْ بالهبوب لَفّاحو
حسساً بدري فارقني ودَلَك جرّاحو
عادني .. وعاد لي كُدّير الحمام ونواحو


Post: #80
Title: Re: أيــْــن الخيــــــمة
Author: gessan
Date: 09-04-2003, 02:11 PM
Parent: #1


السلام جاكم


قاعدين في خلانا
متونسين برانا
فوقك تقيل يا مُطرق الخيدرانة
-(تُلاتية جابودي)
*************
الليلة هبوب أهلي ملت علي نفَسِي
ومن رطني الضناقلة واكتير هوسِي
فارقت الحوار الفي الشبك رفسِي
فارقت الخلفة المساري والجمل رادي
*********
الليلة علي السافل بشوفلي سحاب
ويا نوح من فريقاً ما فيهو شدة ام كراب
خشومن سود وعقب بسولن باب
يا دوب لي ام شديدة وشدة الخباب

-(من نم شغبة المرغومابية)

وتقعدوا عافية

قيسان

Post: #81
Title: Re: أيــْــن الخيــــــمة
Author: Shinteer
Date: 09-04-2003, 05:43 PM
Parent: #1


من سيتيت نويت عابيلي خترة
على ضهر البشاري الـ دومتو تترى
يسلفِق في الخبيب ما جابلو عترة
جلوس أم خد هنا كلْ ساعة بطرا

تسلْفِق في الخبيب الليلة مالك
تميّل لـ يمين وتجُر شمالك
بريريبةً عليها بشنّي حالك
رقاداً دونها قط لا يكون في بالك

والله كريم على المسكين وحيران بُصْرُو


Post: #82
Title: Re: أيــْــن الخيــــــمة
Author: abuguta
Date: 09-04-2003, 07:27 PM
Parent: #81

الليلة الصعيد جاب الهبوب برودِ

وطرانى القميرى والسادة ابو خدود

وكت الناس بقيت من خيمة الحاردلو شرود

مافى مانع لو سميناها خيمة البورد

الاخوان اهل العوض شنتير سيف كلى سمنتال وبقية الاخوة
والله نمكم سمح بلحيل

Post: #83
Title: Re: أيــْــن الخيــــــمة
Author: أحمد أمين
Date: 09-05-2003, 02:47 PM
Parent: #1

خيمتكم عامرة
يا شباب

Post: #84
Title: Re: أيــْــن الخيــــــمة
Author: Shinteer
Date: 09-06-2003, 08:23 PM
Parent: #1

الليلة الدنيا مالها باردة كدي؟ الدنيا كلها باردة من شرقها لا غربها .. الله يستر

يا ناس ود كلي والمجموعة .. عملتوا فيها افندية يعني؟

Post: #85
Title: Re: أيــْــن الخيــــــمة
Author: saifkeli
Date: 09-09-2003, 09:43 AM
Parent: #84



أكشف لي الخبر بين أتبرا وأسوان
وأحكي ليا بما شفت يا رشوان
قال لي شف منظر من جنان رضوان
أرحم يا الحويت المؤمنين أخوان

أخواني زوار الخيمة .. عهدنا معكم ألا نترك هذه الخيمة لعوامل الطبيعة الإلكترونية .. ومعانانكبر الخمية إن شاء الله

قبيل قلت ليك أبعد بعيد وأختاني
يــوم الاحتفـال ظاهر فـرِق شتاني
أديتك متـِـن جاوب عليهو أفتـانـي
نوريـن صادفـن واحد خمـد لى التـاني

والهمباتي قال:ـ
قـول لي طه سيبك من نعاج وعمارة
الناس في بسِـط والقِبلـة توقِـد نارا
شاحد الله الكريـم تطفي الحبش نُقـارة
من عـدو لى صليـح نبسـط بريريب جارة
وتقعدوا عافية


Post: #86
Title: Re: أيــْــن الخيــــــمة
Author: saifkeli
Date: 09-10-2003, 09:29 AM
Parent: #85



قاموا أهل الشعور الحية وإتوحـدتَّ
وأنـا خلوني في ليَّـون عَـقَـب وإنحـتَّ
يـا خلاي شوفوا العلي أظني فقـدتَّ
من يوم قفوا لا حظيـت ولا بـاصـرتَ


Post: #87
Title: Re: أيــْــن الخيــــــمة
Author: Ahlalawad
Date: 09-10-2003, 11:22 AM
Parent: #1


الليلة الجمل خت السفر في نيتو
هدفتلو ام نقينق وطيرت جنيتو
البهم البتيتب بي فريق مكنيتو
هو بيعمل غلت وأنا مستعد لجنيتو


Post: #88
Title: Re: أيــْــن الخيــــــمة
Author: saifkeli
Date: 09-13-2003, 08:24 AM
Parent: #87



ما بدوم السرور والنفس دايماً كافرة
ومابدوم الفسل لابـد تلومـو النافـرة
بقيـت في لِجـة زي النشـرولا مسـافرة
جـوفي مولعـن فـوقـو البشاتن وافـرة


Post: #89
Title: Re: أيــْــن الخيــــــمة
Author: Shinteer
Date: 09-13-2003, 05:50 PM
Parent: #1


نِحْنَ بَرَانَا لا بنَفْهَمْ وَلا بِنْحِسْ
نَدوعِلْ في السَوَسَّوْ وفي الفَطيسة نجِسْ
واقْعين وَقْعَة بين مِيّة وتَمَانين لِصْ
ياتْ مِنْ كان بيسْرقْ من رَفيقو ويدِْس

عثمان ود جماع .. عن المخلوقات الفضائية المسماة باللجان الشعبية الإنقاذية
عليك الرحمة يا عثمان


Post: #90
Title: Re: أيــْــن الخيــــــمة
Author: Shinteer
Date: 09-13-2003, 08:46 PM
Parent: #1


من إبداعات يوسف البنّا .. لمحبي جقلة

جَقْلة كُماجَا فُرّاسا الصُّمام دَرَّكُّن
في بحر الهلاك طايعين .. غَسِبْ غَرَّكُّنْ
ود شنتير كتير ناس كَفَّى فوكُّا دَرَكُّنْ
عَرَّب نار كَدوسو .. وفي الرَّضيمَة حَرَكُّنْ

جَقْلَة: الناقة .. ذلك الحيوان المسلم
الكماج: النِّزال
فُرّاسا: فرسانها
الصُّمام: الصميمون
دَرَّكُّن: دَرّكهم .. أي أدخلهم في الدرك .. الهلاك
غَرّكُّن: أغرقهم
ود شنتير: ود شنتير .. جدّي عليه الرحمة
كَفّى: كفأ .. رمى
فوكّا: فوقها .. وهنا تعني فوقهم
دَرَكُّن: درقهم .. والدرق جمع درقة .. وهي التُّرْس
عَرّب: أشعل .. أوقد
كدوسو: كدوسه .. البايِب يا فردة
الرضيمة: الركام مما يبس من الأشجار .. والشِّقِل
حَرَكُّنْ: حرقهم .. شلوطهم وخلى عطرابتهم في السما

تقول لي شنو وتقولي منو؟


Post: #91
Title: Re: أيــْــن الخيــــــمة
Author: Zaydoon
Date: 09-15-2003, 01:16 PM
Parent: #1

الخيمة دي لقيتها .. في نمرة 3

Post: #92
Title: Re: أيــْــن الخيــــــمة
Author: Shinteer
Date: 09-18-2003, 07:56 PM
Parent: #1


مــــــاك التنبل أب جسماً بِخُم الدوف
قطبيّاً نحـــــــيف عينك بعيد بتشوف
بتفِك البناتِل بام زوير مكتوف
وفضلياً تكافي السيّة بالمعروف


Post: #93
Title: Re: أيــْــن الخيــــــمة
Author: wedzayneb
Date: 12-15-2003, 08:11 AM
Parent: #92

.Up

Post: #94
Title: Re: أيــْــن الخيــــــمة
Author: nazar hussien
Date: 12-15-2003, 09:51 AM
Parent: #93




هييييييييييييييييييييييييييييييييييييييييييييييييي ايييييييا

قلبي طراها واذّكر عوايدو الاول
ويا حسن الغميد عيني جفاهن طوّل
بريبة العفا البسّري ما بتتقوّل
برا بريطماطها قبل الشرفة ما بتفول


الطيب ودضحوية

ودي لي كبـــــــــــــــــــــــــــــــــــــــر

قرّنهن سبعة وستة
هجّام دارفور داك اتّه
صرفهن شيك مو حته
المو ساعل في كسكته