قصص عن بيوت مسكونة

قصص عن بيوت مسكونة

ابدأها بطرفة حكاها صديقي قبل فترة:

في الثورة الحارة 12 بيت مسكون أتى أهله (بفكي) لإخراج ماسكن من الجان!

طلب منهم الفكي أن يحضروا له مصلاه وماء فقط ويغلقوا عليه المنزل طيلة الليل وفي الصبح(إن شاء الله )يسلمهم البيت خالي من الجان!!

كلام جميل.

جلس صاحبنا يسبح(سبحان الله سبحان الله سبحان الله)

ظهر كديس وبدأ في الرقص و(الفكي) لازال يعمل بكفاءة(سبحان الله سبحان الله سبحان الله)

بعدها ظهر كلب التهم الكديس في ثواني وبدأ في الرقص و(الفكي) لازال يعمل بكفاءة(سبحان الله سبحان الله سبحان الله)

ظهر أسد ليلتهم الكلب في ثوان وبدا في الرقص و(الفكي) لازال يعمل بكفاءة(سبحان الله سبحان الله سبحان الله)

بعدها ظهر حمار والتهم الاسد وبدأ في الرقص و(الفكي) لازال يعمل بكفاءة(سبحان الله سبحان الله سبحان الله)

ما حير الفكي وطير عقلة هو ظهور (فار صغير) ليلتهم الحمار وقبل أن يرقص فر صاحبنا وهو يصيح (ما معقولة ما معقولة ما معقولة)

هههههههههههههها

حلوه

اسي انا قايلاك جايي تحكي لينا قصص جد جد

اصلو االايامات دي اهلنا الخواجات ديل قايمين ليهم علي برامج زي دي في انجلترا
و كمان شنو، بجوك بالاشعه الفوق السينيه ولا شنو ديك عشان يكشفوا عليهم بالليل التقول ما بشوفوا بالليل زينا السكان ديل

Quote: اسي انا قايلاك جايي تحكي لينا قصص جد جد

لا جد دي قصة فاتحة شهية يرويها صاحبها بكل جدية..ولكن سوف أقص عليك قصص بعضها عشته في الهند!!


اصبري يا رحاب.

حاضر

و اااااااادي البنبر و جريناهو

في بيتنا الكبير في قلب امدرمان بالقرب من شارع كرري هناك قصص تروى عن البيوت المسكونة والبيوت التي شارك الجن ساكنيها.

سأبدأ ببيت (ناس ربيعة) بيت ناس (خُدُر)
مجاور لمنزلنا تماماً وبين البيتين (نفاج)

لا اذكر أن هناك من سكن هذا البيت بصورة مستديمة إلا مجموعة من (خدم المنازل وقتها) يستخدموه في فترات النهار في غسل الملابس وكيها وممارسة الصراع يفرون منه عند حلول الظلام ولا يقضون فيه الليل ابداً.

وسكنته أسرة صغيرة مكونة من ضابط جيش طاشم 24 ساعة وزوجته وطفليه(لم يقضوا فيه وقت طويل)

أما نحن أطفال الحي كنا نغامر بقضاء الإجازات في ظل نيمته الظليلة والرعب يملانا منذ الدخول حتى نفرغ من اللعب وعيوننا تدور في محاجرها في توجس ورفرفة طائر صغير من غصن إلى آخر في شجرة النيم كفيل بان نفك( البيرق) نجري يعني.

كنت امتحن شجاعة زملائي في المدرسة بإحضارهم وتصوير الأمر بشكل مخيف لهم قبل رؤية المكان!!

وفعلاً المكان مخيف بردهاته القديمة وغرفة الكثيرة المتهدم بعضها وبقايا الأوراق المتناثرة والعظام التي كانت تأتي بها القطط والكلاب ليلاً للمكان(ينفع لتصوير أكثر الأفلام رعباً) وكان المساكين يفرون و(الحمى) قد أشعلت الجسم.

لم اعرف إلى ألان قصة أهل ذلك البيت(سوى أنهم هاجروا منذ زمن بعيد) ولم أرى فيه شي يوحي بأنه مسكون بدليل انه قد تم بيعه أخيرا لأسر من (النقاده) وهم يقيمون فيه في امن وأمان إلى اليوم.

ولكن حجم الأساطير التي نسجتها عنه يملأ مجلدات(عن المرأة العجوز منزوعة الراس) التي تشرب عن طريق عنقها.

وعن أطفال الجن (أصدقائي) وشركاء (اللعب) وعن وعن...هذا بخلاف قصص نسجها اهل الحي.

هذه قصة أشهر بيت عرفته المنطقة وروت عنة الحكايات.

لا أظنه مسكون.

أما الذي سأخبركم عنه فهو عن أسرة من الجن ساكنت أسرة من الإنس في نفس الحي.(ناس عباس)

ناس عباس.

جملة إذا أطلقتها في ذاك المكان من أمدرمان تعني (الجن شخصياً) متجسداً في شكل أسرة(يقال أنها مسالمة جداً سكنت مع تلك الأسرة العريقة جداً من سكان الحي!!)

أكثر الروايات شيوعاً هي أنهم يتقمصون أشكال أهل ذلك البيت فمثلاً يمر عليك أحدهم ويسلم عليك ويركب سيارته وتراه يبتعد وقبل أن تغيب عنك السيارة يخرج(من نفس المنزل) نفس الشخص ويسلم عيك!

ماذا تفعل؟؟

تفر من المكان!!

ستجده يتجاذب أطراف الحديث في منزلكم وأهلك مقتنعون تماماً بأنه ال(نسخة الأصلية)!!

ويبدوا أن أهلنا قد بدءوا يستمتعوا بهذه الأشياء أو تعودوا عليها وبمرور الزمن لم يعد يعنيهم أي النسخ هي التي تمثل أمامهم!!

يقال أنهم يعيشون في سلام كامل وحتى أن أطفالهم يرون وهم في حالة إنسجام تام طيلة النهار (يلاعبون أشياء غير مرئية)

في المناسبات يعينونهم في كل الأمور التي تحتاج يد العون إبتداءً من المال وحتى مشاركة نساؤهم غسيل الأطباق.

عن نفسي سلمت على كثيرين منهم أكثر من مرة يعني قابلت نسخ متكررة قبل ظهور الاستنساخ.!!

قصة بيت الهند المسكون!!

تم تحذيري بشدة وطلب مني كل من عرف ذلك المنزل الصغير آلا اسكن فيه مهما ضاق بى الأمر!!

لم يكن أمامي خيار سوى المحاولة فقد كنت أمر بأزمة مالية لا علاج لها سوى تخفيض كل المنصرفات بما فيها التخلي عن شقة جميلة شهدت أجمل أيام دراستي!

وتوكلت على الله وقابلت صاحب السكن (المسكون) وأخبرته برغبتي في استئجار الشقة!!

نظر إلي في خبث وقال لي هل أنت من ألطلبه الجدد (المسكين) لم يكن يدري باني قد أكون أقدم منه في المدينة...تظاهرت بالغباء واستلمت المفتاح وأحضرت العفش في نفس اليوم!!

وبت اول يوم لاشهد تلاعب أطفال الجن(الهندي) الكلكي بكل من يسكن ذلك البيت!!

ارتب كل الأشياء لأجدها بعد قليل قد تغيرت أماكنها(العن الشيطان) وأعيد ترتيبها!! فيحدث نفس الشي!!

سبحان الله.

كدي نصلي لي ركعتين واقرأ لي شوية قرأن ونشوف (لا جديد) نفس الشي..الحمد لله ما جاني فار أكل حمار المهم فكرت بأن استسلم للنوم وفعلاً أغمضت عيني من الساعة 11 تقريباً وأنا (أتناوم) فيتخيل لي بان ضوء احمر يلمع داخل عيني وبعدها يسود وكأنما هناك من يطفئ النور ويشعله مرة أخرى...يا سامي بلاش خوف كمان ألعرفهم بالتكنولوجيا شنو(ما قالوا لا يقووا على تحريك الأشياء) وفعلاً بعد تفكير(تخيلوا قرار أن افتح عيني اتخذته بعد تفكير..وحين فعلت نظرت لمفتاح)اللمبة مباشرة وأنا مستلقي على السرير فإذا به يصعد ليطفئ النور من تلقاء نفسه ويعود ليفتح مرة أخرى!!

عندها عرفت أن الأمر ليس بذلك السوء فمن المنطقي إذا أرادوا ضرري أن يفعلوا أقسى من ذلك!!

أو ربما أنهم من صغار(أطفال الجن)

تكرر الأمر طيلة شهرين قضيتهم في ذلك المكان ولم استحمل المكوث بعدها لا سيما وأن حالي (المالي قد تحسن)

أحب كثيراً القراءة عن الميتافيزيقا والباراسيكولوجي و عوالم الجن إلخ و سماع قصصهم ومشاهدة الأفلام عنهم
واصل يا حبيب
تقديري
لنا

الموضوع دة قريتو قبل فترة في جريدة الصحافة تطابق في أجزاء كثيرة مع حكاوي ناس بحري باعتباري بحراوية المنشأ

Quote: ونسة مع زول بتاع جن..!! أنور هاشم: اتعرفت على جنية وأنا طفل صغير وشفت ملك الجان جن بحري حارب مع المهدى وساعد فنانين بحري وأغنياءها تفاجأت بعلاقة انور هاشم المخرج السينمائى المعروف بهذا العالم المثير ... عالم الجن ... الكلام ده تأكد لى بعد مداخلة عملها انور هاشم فى مقهى الصحافيين بأروقة وكان اليوم عن العلاج الروحانى ... جلست اليه انا خليفة لتحديد مواعيد، فاذا بنا نخرج من ذات الجلسة بهذه الونسة «لعل من ساعدنا فيها جن بحرى كما يقول انور» غايتو كدى اقروا واحكموا * انور هاشم المخرج السينمائى المعروف علاقته شنو بعالم الجن؟هل لأنو الفنون جنون؟ * «يضحك» لا ما عشان الفنون جنون لكن لأنو نحنا اصلا الجن راكبنا... وناس بحرى كلهم فيهم جن * انت اصلا من بحرى؟ * أيوه من ناس بحرى الاصيلين.. انا يا خليفة اسمى انور عبد الكريم هاشم وجدنا اسمو كوكو. * ومنو كوكو ده؟ * ده فى الحسبة كده عندو قرابة شديدة بالشيخ حمد والشيخ خوجلى.. وطبعا انت عارف انو ديل والشيخ ادريس ود الأرباب اولاد خالات. * يعنى داير تقنعنى انك ود شيوخ؟ * «يضحك» لا لا .. حتى انا لو ود شيوخ هم حيتبروا منى «يضحك». * ما زلت ابحث عن علاقتك بالجن؟ * بحرى دى كلها جن وكلها شيوخ وكلها فنون. * متناقضات مش كده؟ * ايوه.. شوف كمية القبب الفى بحرى وشرق النيل كتيرة جدا .. بسيطين المشوا امدرمان عملوا قبب بهناك وديل ذاتهم مشوا من بحرى. * طبعا فى الفنون بحرى عامرة؟ * انا وقت جيت اعمل توثيق للسينما لقيت الناس العملوا سينما من اولاد بحرى. * زى منو ؟ * ابونا جاد الله جبارة وانا انور هاشم واخونا عبد الرحمن محمد عبد الرحمن ومصطفى ابراهيم.. ديل العملوا سينما سودانية، وتانى ما فى زول عمل فيلم غيرهم. * لكن فى الغنا امدرمان ما بتديكم فرصة.. بتتفق معاى؟ * لا ابو صلاح ده مش بقولو من هناك لا على فكرة هو من بحرى حلة حمد مشى امدرمان متأخر والجاغريو وود الرضى.. تعال للفنانين خضر بشير وابن البادية ونور الجيلانى والكابلى ومحمد اللمين عاش فى بحرى وبنا بيت فى بحرى وولد اولادو فى بحرى، اذن هو بحراوى وعماد احمد الطيب ومحمود عبد العزيز ودرماس وغيرهم كتار جدا.. ولو جيت للمحامين قمم زى ناس كمال شانتير والدكاترة مشاهير وشطار، ولو قلنا واحد بس بكفى عوض دكام. * طيب بتقدر تحصر الجن بتاع بحرى برضو؟ * ايوه انا فى كتابى «اولاد بحرى» عندى فصل عن الجن فى بحرى. * وين بنلقاهم ؟ * من حلة حمد وفندق قصر الصداقة والساحل الماشى بى حلة كوكو لغاية الجريف ده كلو جن بما فيها الكماين بتاعة الطوب. * بتحصل منهم مواقف؟ * مثلا زمان البشمرجية الشغالين فى الوابورات بعد يخلصوا دوامهم بتاع الشغل برجعوا بيوتهم الساعة اتنين ظهرا، تعرف المساء بحرى كلها تسمع دقات البشمرجية للصباح، ديل الجن بواصلوا الشغل بتاع الجماعة ديل. * يعنى شغالين الوردية التانية؟ * ايوه بالضبط كده. * وقت يجو الصباح بلقوا شغلهم تم .. ولو مشيت الساحل بتاع شمبات برضو فيه جن جنب مقابر شمبات الجزء على البحر برضو قصاد ابو روف فى جزيرة اسمها جزيرة الشيطان، دى لو سبحت فيها ما بتطلع منها برضو المعدية زمان بسموه المشرع. * متين بدأت علاقتك الشخصية مع الجن؟ * وانا صغير مشيت اعوم فى جزيرة الشيطان، وكان معاى زكى عكاشة ومصطفى عوض وغرقت وغطست تلاتة مرات، قام مسكنى الشيطان ذاتو وقال لى انا بطلعك المرة دى لكن تانى اوعك تجى هنا.. وفعلا. * شكلو كيف؟ * بشع ومخيف جدا لكن الغريبة انا ما خفت منه لأنو الموقف كان اصعب لانى كنت حأموت. * طيب وقفت علاقتك معاهم هنا؟ * لا انا بشوف الجن عديل كده * كيف يعنى؟ * زى ما بشوفك كده. * وين؟ * دايما بلاقيهم بكثافة فى ابو جنزير وفى الاسواق بشكل مكثف وفى سوق بحرى كتار. * ممكن توصف لينا علامات نقدر نعرفهم بها؟ * لو دققت النظر شديد فى عيونهم بتلقى عيونهم بالعرض ما زينا كده .. واحيانا بلبسو نضارات. * وديل كتار فى اى حتة بنلقى ناس لابسين نضارات؟ * شوف أمشى ابو جنزير وفتش لو لقيت زول ببيع فى جرجير او طماطم او غيرها تأكد انو من الجن. ولو داير تتأكد تاوق بى فتحة النضارة بتلقى عينو بالعرض، ده جن رأسو عدييييييييل. * أول مرة شفت الجن متين غير شيطان جزيرة الشيطان؟ * اول مرة كان عمرى سبعة تمانية سنين. * وين؟ * غرب الصبابى وانا كنت الوقت داك بزرع مع والدى بالسلوكة .. كان فى نوع من الطير طوالى بتابعنى وهو جميل جدا ولونو أحمر يظهر إنو حبانى جدا الطيرة دى كانت جنية. * عرفتها كيف؟ * بعد ما بقت تظهر لى. * شكلها كيف؟ * نصفها الفوق زول بنت جميلة جدا. * والنص التحت؟ * ده ما كان بظهر لى. * وبقت علاقة بيناتكم ... خاويتها يعنى؟ * لا ما خاويتها لكن كان طوالى بتظهر لى تتكلم معاى او تساعدنى وكده. * ابوك ما جايب خبر للحاصل ده؟ * انا ابيت اكلمو عشان ما يمنعنى اجى معاهو، لكن حكيت لى حبوبتى رضينا قامت ودتنى للخليفة محمد اللمين ابن الشيخ خوجلى عمل لى بخرات اختفت طوالى بعدها. * وانتهت العلاقة؟ * انتهت مع الجنية الطيرة ديك، لكن بعد ما كبرت شوية شفت ملك الجان. * والله حيرتنا يا أستاذ ... وده لاقيتو دون برتكولات؟ * والله بتكلم معاك جد يا خليفة اقسم بالله العظيم تلاته ده الحصل. * وين يا استاذ؟ * طيب وانت ماشى من بحرى لى امدرمان بكبرى شمبات على يدك الشمال فى شجرة حراز بمجرد ما تشوفها انت براك بتحس انها جن أهو ده قصر ملك الجن بتاع بحرى.. * طبعا لازم توصف لينا السيد ملك الجن؟ * ايوه ... اول ما شفتو كان فى شكل ثعبان ضخم ملتف حول الشجرة دى من تحت لغاية فوق زى الحبل التخين وقاعد يعاين لى زى الزول ورأسو نص فيه شعر والنص التانى أصلع وعندو دقن. * دقن دى ما فى ليها داعى!! * «يضحك» المهم شفتو فى البداية ومشيت ناديت أخوى عبد الباقى الله يرحمو... والله يا خليفة شجرة الحراز دى من يومها داك لى هسة لا نقصت ولا زادت. * وسكت على الموضوع ده؟ * لا.. مشيت كلمت حبوبتى رضينا وهى كمان مشت للخليفة محمد الامين، وهو القال ليها انو ده ملك الجان بتاع بحرى، وانو مبسوط منى - الملك - لانى ما ضربتو. وقال ليها ما تمنعوه اذا داير امشى ليهو لكن برضو عمل لى بخرات. * ومشيت؟ * والله من الوقت داك لى يوم الليلة الشجرة دى انا ما قربتها ... لكن انا على وعد مع نفسى انى لازم امشى للناس الاشترو الحتة ديك والشجرة فى نصها عشان احذرهم ما يقطعوها، لانها حتسبب ليهم مشاكل كتيرة. *.............؟ * بحرى مليانة.. مثلا أنا كنت بصور فى فيلم شروق فى مستشفى الحياة الكان فى بحرى معاى المصور رشدى زكى وقت نخت الكاميرا فى الطابق التانى ما تشتغل نقوم ننزلها تحت تشتغل، ما كنا عارفين إنو البيت دة مسكون، الكلام ده سنة 1974م من الفترة ديك عرفت انو مسكون وليومنا ده خرابة وكان اجمل بيت فى بحرى امشى شوفو فى الفيلم. * ممكن تصدق انو بشر يتزوج جن والعكس صحيح؟ * مش اصدق بس ...انا بعرف اسرة فى حلة خوجلى فى جن متزوج منهم ودى بت حلتنا.. وفى الديوم فى جن متزوج من نسوان بيت معروف هناك.. وفى واحدة من حلة الدناقلة كان متزوجها جان. * نوعه شنو جن بحرى؟ * تلاتة ارباع جن بحرى مسلم، والجن السفلى الخطير فى المنطقة الصناعية بحرى، اما الجن فى منطقة كافورى على البحر هو جن ممتع شوية. * كيف؟ * هو جن مسلم لكن بهظر.. يغنيك يديك ثروة بعد شوية كده يفلسك ويدق بيك الدلجة. * يعنى تقسيماتهم زى البشر، برضو بالمناطق الراقية وكده؟ * أيوه جن الوابورات ده جن فاهم ومثقف ..«اضحكك» الجن فى شمبات ناحية المقابر جن اقزام ودى حكاها لى صلاح ابن البادية قال احفادو حكوا ليهو انو الجن جاب ليهم حاجة باردة وشوكولاتة.. وقت سألهم عن وصفهم قالوا ليهو قصار يا جدو. * ليه ما استفدت منه فى السينما ليه، وهى بتعانى من مشاكل صعبة؟ * انا ما استفدت منهم، بل هم ضرونى لانى ضريتهم زمان. * كيف وانت هسة بتقول علاقتك بيهم حميمة؟ * زمان وانا صغير كنت بقتل الكدايس وديل كانوا جن عشان كده بنتقموا منى. * شكل الانتقام كيف؟ * رقدونى .. تقوم حبوبتى تمشى للخليفة محمد اللمين يفكنى بى بخرات.. ورغم ده عندى علاقة كويسة مع بعضهم. * زى منو؟ * خدام بتاعين شيخ صديقى وديل بقوا يحبونى لدرجة انهم برسلوا لى رسايل ودي واحدة منها «ابرز لى خطاباً فى نصف ورقة مكتوباً بلون احمر قلم عريض - الصورة مرفقة». * الرسالة دى جاتك كيف وبتقول شنو؟ * مثلا دى كنت قاعد فجأة وقعت لى الرسالة دى. * بتقول شنو؟ * بسم الله الرحمن الرحيم.. اخى انور هاشم انتو ما جاهزين انا ماشى الصين وجاى بعد تلاتة ساعات. * انتو ما جاهزين فى شنو؟ * الجن ده كان داير ليهو بخور وانحنا ما لقيناهو، فقام قال بسافر الصين وبجى فى تلاتة ساعات. * زى ما بطلبوا منك هل بقدموا ليك خدمات؟ * أيوه مثلا بورونى الناس وحقيقتهم.. مثلا يقول اعمل حسابك من فلان ده وكده.. ثانيا انا بعرف الانسان العينو حارة والحاسد. * بى علامات او بالاحساس ساكت؟ * بمجرد ما عاين لعيونو اشوف زى الطالعة منه ذبذبات .. والله يا خليفة فى واحدة عاينت لى بتى طوالى انا قلت لى امها بخريها.. مشيت الدكان وجيت لقيتها اتحرقت فى رجلها بالزيت. * الجن خدم بحرى؟ * ايوه اولاد بحرى فى اى مجال ساعدهم الجن. * بالله بالتفصيل؟ * مثلا أغلب الفنانين من بحرى.. وحتى الدكاترة تلقاهم فنانين واغنياء بحرى ساعدهم الجن واولياء الله الفى بحرى برضو عندهم خدام من الجن المسلم.. وبحرى على فكرة حارسها الجن. وبالمناسبة المنطقة الفيها هسة المستشفى الدولى دى كانت خلا ساكت، وكان فيها جن اسمو ابو فانوس.. وده ظريف جدا من الشمس تغيب يقوم يلعب معانا سك سك ... وجزء من جن بحرى حاربوا مع المهدى. * والله ده كلام خطير يا استاذ؟ * دي معلومات انا متأكد منها، لدرجة انو المهدى اداهم صك بمشاركتهم فى الحرب معه، ومنحهم قطعة ارض غرب النيل جنب الكبرى تكون حقتهم.. وللأسف فى بشر بنوا فيها هسة البيت ده مسكون.

لنا

شكراً على الإضافة اما عن التالي:-

Quote: * من حلة حمد وفندق قصر الصداقة والساحل الماشى بى حلة كوكو لغاية الجريف ده كلو جن بما فيها الكماين بتاعة الطوب.

لنا تجارب فقد كنت أعمل في قصر الصداقة لفترة ليست قصيرة وشهدنا وقتها بعض الاشياء وسمعنا كثير من الحكايات..

لاحظتى المكان داك مجانينو كتار كيف؟؟

علق أحد الاخوان على نفس الموضوع على منتدى بيت السودان وذكرني بأن اشهر بيت نسجت حولة حكايات هو ذلك البيت الفخم عند مدخل كبري شمبات للقادم من امدرمان(يمين الكبري)

وذكر ان البيت يقطنة اصحاب له وفعلاً يبدوا أن البيت مسكون!!

واحدة من بنات معارفنا تعرضت لقصة طويلة مع جان أراد الزواج منها!

بدأت القصة بزيارة رسمية أتي الجان في شكل ادمي وطلب الزواج منها وتم رفضه من أسرتها المكونة من الأب الذي عمل طيلة حياته في السكة حديد!

بعدها بدأت الحوادث وكانت كلها في منطقة الثورة (اشتعال الحرائق من غير أي سبب منطقي(

مياه تسيل من أي مكان وتغرق المنزل ولا تتعداه للخارج.

واختتمت القصة بخطف الفتاة التي عادت لتروي اغرب قصة.

ذهب بها احد أقاربها للمستشفي واظنة (مستشفي البلك) واختفت من داخل غرفة الطبيب لتتصل عليهم بعد ساعات وتحكي لهم أشياء لتحدث في عالمنا تحتاج لأيام بل شهور.

اتصلت من سنار لتروي كيف انه ظهر لها في مكتب الطبيب وغطس بها لباطن الأرض لمكان معمور جداً (مدينة) بكامل هيئتها واراها أشياء عديدة أعدها لها لتتزوجه ووووو.

المهم في روايتها روت تفاصيل كثيرة والاهم أنها وجدت امرأة من البشر طلبت منها أن لا تتناول أي طعام يقدم لها حتى تستطيع إخراجها وفعلاً فعلت.

ويقال أن حتى حادثة الباخرة(النيلية) عشرة رمضان التي احترقت في طريقها من مصر للسودان عام 1981 على ما اذكر كانت بسبب مطاردة الجان المغرم لهذه الفتاة.(والله اعلم فقد كان معظم أقاربها فيها)

بعدها تم طرد الجان وتزوجت وهي أم فاضلة لأبناء كبار اليوم.

اليوم قصة بيت الالوبة الشهير.

قصة عن شجرة عادية (شجرة لالوب) لم يتحدث أحد قط بأنه شهدها وهي شتلة صغيرة أو شهد زراعتها أو يعرف من زرعها(يبدوا أنها منذ بداية الأشياء) أو منذ زمن طويل بحيث أن لا أحد من الأحياء يتذكر لها تاريخ معين.

يقال أن حتى المنزل الذي احتواها تم بناءه حولها بعد أن استعصى قلعها (على ما يبدو) والله اعلم.

تقطع منها فرع تقطع منك بقدر ما تؤذيها..تحاول أن تحرقها ترد لك بالمثل والاهم أنها لا تقبل بأن يستظل بظلها إلا شخص مجنون وحيد عرف في تلك الناحية وكل من عداه يكون مصيره (الطقيع) بحبات اللالوب التي لا تخلو منها تلك الشجرة على الإطلاق وفي كل المناسبات.

ألجميع يذكر قصة ذلك الرجل الكبير الذي حاول إحراقها فتحولت حياتها إلى نيران مستمرة يخمد إحداها ويتهيأ لما بعدها حتى رحل من الحي بعد أن باع البيت لتنتهي القصة بخروجه مباشرة.

حدثني محدثي بان أجمل تسلية كانت الاستمتاع بالجري تحتها لتنهال عليهم بحبات اللالوب التي قال أن أحدا لم يتذوقها إلا شخص واحد ووصف طعمها بأنه كريه(إخييييي) هكذا قال قبل أن يصرعه المرض.

سبحان الله من أي شي خلقت ولماذا هي حانقة بهذا الشكل على الناس وما لذي يجبرها على مجاورتهم.

روى الرجل الذي اشترى البيت بأنها تسير بالليل حتى تصل لحوض الماء وتعود ولا تخلف اثر يدل على حركتها. وحتى حين لم يصدقه الآخرين وحاولوا مراقبتها انهالت عليهم بقذائف اللالوب.

على العموم هي موجودة إلا يومنا هذا وتناسى الناس أمرها حتى الأطفال إنشغلوا عنها بما هو أمتع في الفضائيات.

عجيب أمرها.

سبحان الله.

قصص عن قصر الصداقة وما جاورة.

اولها يرويها صديقي عبده الذي كان وقتها حارس امن.

صديقي سامي...

بسسسسسسسسسسسسم الله الرحمن الرحيم...

يا النبي نوح من قال نوح نجاهو الله...

أها برااااااااحة متخارج آخوي لا ينط فوقي فار ولة كديس يوديني الآخرة!!

إستمتاع وحضور قداااااامي...

مع كميات مودتي...


أبو الحســــــين...

مُحضر الخير ود الحسين.

نفس مقولة

Quote: يا النبي نوح من قال نوح نجاهو الله...

تقال عند إحى النسوة

يالنبي نوخ من قالتا نوخ نجضتا الله.

سمع اضاني.

مزيد من ناس بسم الله