Post: #1
Title: لكنّ حمّام الشتااااااااء جريمةٌ ..عذراً حبيبي..
Author: عمر الفاروق
Date: 01-09-2007, 06:23 PM
Parent: #0
ما ان دخل الشتاء من الأبواب إلا وخرجت النظافة من شبّاك الحمّام ..
مقولة تتطابق ووقائع الحال هذا الأيام في السودان ..
اهلنا في السودان معروفين بي بساطتهم في بناء الحمّامات حاجة كده متر في متر وفوق فيها شبّاك صغير كده الغرض منو وضع الصابونة والليفة ونستفيد منّو في وضع بقجة الهدوم الوسخانة اثناء الإستحمام ..
مع وجود باب في الغالب بيكون من الشوالات في الاقاليم وفي العاصمة احسن باب تلقاهو مقفول بي مسمار مع وجود فتحات في الباب تخليك مهتم بي التلفت اكتر من الحمّام خوفاً من إنو يكون في زول شايفك ..
ده كلّو كوم وعدة المطبخ البيكون نصها موجود في الحمّام كوم تاني ..
جردل ...طاسة ...كورية ..كبّاية ...معلقة ...والغريبة ما بتلقى الصابونة والليفة !!!!
والأغرب من ده كلّو الدش والماسورة وهم اللي من أجلهم تم بناء هذا الحمّام بيكونوا ما شغالين طول السنة وحتى لحظة خروجي من السودان ما كنت عارف الحاجات دي شنو ووظيفتها شنو بالضبط !!!!
كلّ هذه المشاهد مجتمعة جعلت الحمّام في السودان عبارة عن (جِزاء) زي ما بيقولوا في العسكرية وأي شافع عايز تخوفوا وتخليهو ينوم قول ليهو أرح الحمّام يا ولد ..
وتعال شوف الكواريك والبكا وخلااااااااااص يا أمي والله بمشي ليك الدكان وروروووووووووك يا أمي تاني ما بلعب كورة ..
الكبار فصاحتهم في النضافة في الصيف الواحد تلقاهو يستحم ليك في اليوم خمسة مرات ومن المفارقات العجيبة الشكل في الفترة الصباحية على الحمّام وكوكوكو يا فلان اطلع لي وكرو رو رو يا علّان كملت الصابونة ..
والصابونة دي حكايتها حكاية فما ان تدخل الحمّام تبدأ بالتفتيش يمنة ويسرى (على خطى الشهيد) وتقوم تلقى ليك فتات وبواقي صوابين ما بين الأحمر والأخضر والأصفر وتقوم تجمعهم مع بعض كده ابتغاء الرغوة وخروج رائحة تفي بالغرض وتقنعنك بأنك إستحميت ..
والأعجب من ده كلّو وجود صابونة الغسيل عاااااااااااااادي جوة الحمّام بعد ما تمّ حك حلّة ملا الخدرة بيها ومسح صحن اللحمة وبواقي العضام بي نفس الصابونة ..
المهم ما علينا ..
الجماعة يتشاكلوا في الحمّام شكل السنين وأجمل شكلة تلك التي تنشب بعد الحمّام ....!!!
يا زول انت ما غرفت موية البلاعة لييييييييييييييييي؟؟؟؟؟؟
لالالالالا انا غرفتها قبل ما استحمّ لأنو لقيتا مليانة ...
يا زولة انتي اخر زول استحمّ شيلي الباقة ديك وامشي اغرفي البلاعة ...
يا زول خلاص انا بغرف نصها وانت اغرف الباقي...
وما أروع تلك البالوعة التي تكون على الشارع تريحك من الغرفي وتمتد المياه (وفااااااااااح ملا الجيران )..
وفجأة !!!!!
قووووووووووووووووووووووووووووم يا الشتا تعال ...
الايام دي البرد في السودان حاجة تانية ومن نوع تاني ..
انقلبت الاية ...
احييييييييييينا ما بتتقلب ؟؟؟ ما قلتو نوبة !!!!
هجر الناس هذا المتر في متر وصار موحشاً واصبح مرتع لمسكن الجن والشياطين اعوذ بالله ..
ياخ والله تجي ماشي جمب الحمّام لمن شعرة جلدك تقوم وترجف زي االطاقاك بردة ..
البلّاعة بقت ناشفة نشافة السنين لدرجة إنك ممكن تملّح فيها كسرة بي ويكة وتأكل..
وجكست الصابونة(سالي) حبيبها (الفنيك)دون ان يكدر صوفهم احد ..
وتونست صابونة (رشا) مع (اللابف بوي) أحلى ونسة ..
جماعتك الكانوا بتشاكلوا في الحمّام بقا اي واحد بيحاول يقوم اخر زول عشان الناس ما تشوفوا وتووووشك من السرير يخش ليك في أحلى بنطلون وقميص وجري على المكتب..
تقوم من الصباح يا قريبك وأحلى جلسرين معاهو فازلين تجلبطهم بي موية ومسحك مسحك مسحك وجلطك جلطك جلطك أحلى زول ولااااااااا التقول مستحمي في الهيلتون ..
الواحد تلقاهو ممسح زي التقول مودنو الدلالة ...
تلقى اليدين لحدي الكوعين نضاف ومن الكوع ولي فوق وساخة سنينك ..
تلقى الكرعين لحدّي عضم الشيطان اخر تلميع ومن فوق العضم وانت طالع غباشة السنين ولا الفول المدمس..
أما مقتدي(الصدر) و(البطن) فأنسى يا مان ده شيتاً أصلو ما شفناه لا في الناس ولا في الريل..
اجمل ما في الموضوع هو رواج تجارة مزيلات العرق هذه الأيام ..
بتاع الصيدلية قال لي صحبي تتصور الأيام دي المزيلات بتتباع أكتر من الأدوية ..
وكسدت تجارة الصابون لا زيست ولا فا ولا لوكس ولا يحزنون ..
وبعد شوية تلقى الواحد جضومو مشققة والحمّام يبقى في المناسبات السعيدة جداً جداً (وليست السعيدة فقط) ..
وحمّام المناسبات السعيدة زااااااااااتو تعالوا شوفوهو كيف ..
حمام حيييييي وووووووووووووووووب..
الواحد يشيل الجردل ويختو في الشمس من دغش الرحمن في نص الحوش ..
تجي تلقى الجرادل مرصوصة في الحوش زي الزول العايزيشوت فاول قريب من خط 18 !!!!
ده جردلي وده جردلك ولالالالا جردلك بارد وجردلي بقا حار...
وجوة الحمّام ده كمان شي تاني..
تديها كورية موية ولا لو الدش شغال تخش بي القطاعي وتتراقص كما لم تتراقص الراقصة دينا أو فيفي عبده ..
والحمذأم يكون بي القطاعي أول الكرعين ..لالالالا كدي النشوف اليدين ..لالالالا ياخ أحسن الراس ..
طبعاَ البطن والضهر ديل بيكونوا خارج المقرر وبتشيلهم بديل..
|
Post: #2
Title: Re: لكنّ حمّام الشتااااااااء جريمةٌ ..عذراً حبيبي..
Author: نادية عثمان
Date: 01-09-2007, 10:03 PM
Parent: #1
عمر الفاروق سلااااااااااااام
وعيد سعيد يارب وسنتك الجديدة كمان والقابلة على امانيك انت ومن تحبهم اجمعيييييين
انت ياعمر المناخ فى السودان ده اتغير ولا شنو زمان البرد ماكان بكون شدددددددددديد كده ياخ لامن يحمى الناس الحمام والوضؤ زاتو !!
|
Post: #3
Title: Re: لكنّ حمّام الشتااااااااء جريمةٌ ..عذراً حبيبي..
Author: Elmosley
Date: 01-09-2007, 10:12 PM
Parent: #2
انتي يابت عمتي كنتي (حنكوشه ونحن ماعارفين)
عمر ماتسمع الكلام ده
علي اليمين نحن كرعينا وايدينا شققن الشتا عشرات المرات
لامن كبن الدم
|
Post: #5
Title: Re: لكنّ حمّام الشتااااااااء جريمةٌ ..عذراً حبيبي..
Author: نادية عثمان
Date: 01-09-2007, 11:01 PM
Parent: #3
Quote: انتي يابت عمتي كنتي (حنكوشه ونحن ماعارفين)
عمر ماتسمع الكلام ده
علي اليمين نحن كرعينا وايدينا شققن الشتا عشرات المرات
لامن كبن الدم |
انت ياود الخال من زمن الشقيق بالله ؟!!
لا يااخوى انا زمنك ده بعييييد شديد ماحضرتو .. نحنا جيل التسعينات ديل مابنعرف شقيق دى زاتها شنو   
|
Post: #4
Title: Re: لكنّ حمّام الشتااااااااء جريمةٌ ..عذراً حبيبي..
Author: DKEEN
Date: 01-09-2007, 10:41 PM
Parent: #1
كل عام وانتا طيب ياعمر ..
اخر شي بهمتمو بيهواهلنا البسطاء في السودان هو شكل الحمام وتفاصيلو..
انا نفسي اعرف ليه الناس في السودان(الصحافات - الثورات- الحلفايا- جبره - العشرة- العزوزاب - الشجرة- الكلاكلات- اركويت- ناصر- بري -الدروشاب- الكدرو- ابوسعد- العرضة- امبدة)
ليه في المناطق دي بخلوالحمام جنب باب الشارع..
يعني الهواء ده يضربك لحدي ماتصل البرندة اواقرب اوضة..
وكمان لو جابت ليها مرة جاية من الشارع او ضيفة خاشة تكون كملت الناقصة..
سيرتك تكون بين مجالس حريم الحلة تاني يوم :
ود ناس هناية داك شوف عيني دي مارق من الحمام لباسو اصفاااااااااااااااااار ومقدد ..عرس شنو الداير يعرسو يايمة..
ــــــــــــــــــــــــــــــــــــــــــــــــــــــــــ
لامن كنا ساكنين في بيت الاشلاك زمان حمامنا ماكان فيهو سقف..
كان كاشف على سماوات الله هكذا دون حواجز
يعني لوالايام ديك كان في قوقل ايرث كان نكون هسي في البروفايل بتاع الحاقدين ميطي وشايلين بروة صابون غسيل..
الله لطف واخترعو الزنكي فيما بعد..
الزنكي هو ترياق القمر ..
سترة الفقراء بعد الله..
|
Post: #6
Title: Re: لكنّ حمّام الشتااااااااء جريمةٌ ..عذراً حبيبي..
Author: Elmosley
Date: 01-10-2007, 05:20 PM
Parent: #4
Quote: لامن كنا ساكنين في بيت الاشلاك زمان حمامنا ماكان فيهو سقف..
كان كاشف على سماوات الله هكذا دون حواجز |
انتو الدنقل ديل كلهم (قشلاقيون)
أها يادكين كنت في الغربي ولا الشمالي ولا الجنوبي ولا الشرقي
أها (الصقت) بشقق الكرعين والايدين ولا لا
بالله كلم بت عمتنا دي
|
Post: #7
Title: Re: لكنّ حمّام الشتااااااااء جريمةٌ ..عذراً حبيبي..
Author: عمر الفاروق
Date: 01-13-2007, 04:55 PM
Parent: #1
نادية بت عثمان
كل سنة وانتي طيبة وربنا يحقق كل امانيك ..
درسنا أحد الأساتذة في المرحلة الإبتدائية مادة العلوم ..
وكمدخل لدرس الجلد وطبقاته ابتدر بالسؤال التالي:
لماذا لا تبرد النساء في الشتاء بعكس الرجال ؟؟؟
كلنا أجمعنا على إجابة واحدة وبصوت واحد :
عشان سمااااااان يا استاااااااااااااااذ..
فما كان منه إلا وقال :
لالالالا ..السبب إنو النسوان بيتمسحوا بالكريمات وزيت الكركار وزيت الفهد وزيت الفول وربما زيت الفرامل مما يكوّن طبقة دهنية تحت الجلد تساعد في تدفئة النساء..
اها من اليوم داك يا نادية عرفت ليك نسوانا ديل لييي ما بيستحموا كتير !!!!
وبرضو تقولي لي حمّام التسعينات ؟؟؟
هاك الجلبطة دي ..
|
Post: #8
Title: Re: لكنّ حمّام الشتااااااااء جريمةٌ ..عذراً حبيبي..
Author: معاذ حسن
Date: 01-13-2007, 05:01 PM
عمر
كل سنة وانت طيب والعيد مبارك عليك
سألت عنك قبل يومين والحمد لله عدت بالسلامة.
أما حمام الشتاء في الرياض فهو جريمة كبرى.والحمد لله من اول يناير غير يوم الجمعة الا في حال انكسرت ماسورة.
|
Post: #9
Title: Re: لكنّ حمّام الشتااااااااء جريمةٌ ..عذراً حبيبي..
Author: عمر الفاروق
Date: 01-14-2007, 07:36 AM
Parent: #1
الموسيقار الموصلي :
والله انتو كمان زمن شقيقكم داك شي تاني ..
الواحد يكون شغال في الزراعة وماسك ليهو موية وحفيان ..الشق يدخل ليهو ضب عديييييل كده ..
تخريمة :
اسة يا الموصلي لو انت في السودان وفي عز الشتاء ده وعندك حفلة اوفر نايت بتستحمّ ليها ؟
والله انتو يا الفنانين مشكلتكم مشكلة الحمام ليكم فرض عين
|
Post: #10
Title: Re: لكنّ حمّام الشتااااااااء جريمةٌ ..عذراً حبيبي..
Author: محمد عبدالرحمن
Date: 01-14-2007, 07:38 AM
Parent: #9
[QUOTE]لالالالا ياخ أحسن الراس |
انت طبعا القصة دى معفى منها ..لانو اصلا مافى حاجة تحتاج
لغسيل ..تديها مسحه وتبقى مارق ..
|