الخدود الشاربة من لون الشفق عند المغارب

ها هي تفئ بوعدها .. والشمس تلوح بيدها مودعة .. فتنكسر صورتـها على بسـاطٍ أزرق يتبختر .. ورمـلٍ ( يتبرك ) بلمسةٍ تلو لمسة يكاد يتشبث بكل خطوة ترتسم عليه فتحيل بريقه ولمعانه الي توهج .. تتهاجن الألوان .. فيرتوي خدها بخمر الشفق المذاب .. عند المغارب

يتمدد الشاطئ بزرقته الحالمة .. تتعانق الأمواج بلهفة المحب الملتاع .. تخرج النغمات أنيناً موجّعا .. تلفظ نغمة رشيقة أنفاسها .. لمتنح الحياة لنغمة أخرى .. كلما ذاب موجُ في حضن موج .. تنهمر دمعه تنسرب إلى حواف الشاطئ .. تروي ظمأ الرمال العطشى .. فيزداد اشتياقها لوقع أقدام تفوق الحرير ملمس ..

( الرمال الناعمة .. تشتاق لمشيك )

… لا أستمع لهذه الأغنية إلا وبدأت أمامي مشاهد حية كفلم على شاشة السينما .. رغم بساطة الكلمات إلا انها تتميز على كثير من أغنياتنا بالصورة الحية المتحركة أمامك .. ها هو الشاطئ بموجه .. ورماله .. وتلك الكاعب الحسناء وهي ( تتبختر ) بينما الغروب بأشعته السحرية يهيمن على المكان .. أليس ذلك مشروعا لفديو كليب

.. كذلك أغنية ( الجريدة ) للأستاذ محمد الأمين تحمل مضامين قصة متكاملة في مخيلتي

.. قصدت بهذا الموضوع فتح باب النقاش حول الإنطباعات التي تتركها أغانٍ معينة أو مشاهد تظل عالقة بأذهاننا كلما استمعنا لها .. وبالتالي هل فكرة ( الفديو كليب ) تجور أحيانا لتشيه ما يختزنه كل مستمع في مخيلته .. وما هي الأغاني التي يمكن أن يضيف لها ( الفديو كليب ) بعداً اضافيا.. لتكتمل الصورة في أعيننا

طـال علينا فراقكـم ..والله يا غايبين
قدر ما ننسى العلينا .. برضو مشتاقين


رحمابي

تعرف يا رحمابي
التكنيك السينمائي دا
في الكتابة
مدهش
وحميم
الأيام دي بقرأ في رواية الخريف ياتي مع صفاء
رواية احمد الملك
حاجة مدهشة جداً
لا تملك سوى متابعة الشريط إلى اخره
عند الانتهاء منها ساعود لها في بوست منفصل

لوووووووووووووول على الكاعب الحسناء
اشمعنى كاعب
بالمناسبة
بطلة ينسرب العشق
برضها بت خمستاشر سنة
( كاعب اخري(
بغتسن حجرك الكواعب ديل
خليها للجنة
مش كلنا قالوا هناك بنبقى كواعب

تحياتي
الجندرية

الرحمابي

حلاااات كتابتك وانت راااايق

وانا مرات زي الحرامي بمشي افتش البوستات القديمة واستمتع بقراءتها...وتجدني اقف ساعات في ابوقطاطي الشفيف المتفرد ...واجدك تلفت انتباهنا للروائع ...وهذه موهبة ان تحس بالعمل الجميل قبل ان ينتبه له الناس

اكتر شي بقيف عندو في اغانينا الغنا المسرحي

فسيد خليفة عندما يقول انا قلبي بدق تكاد تسمع نبضه...ويلهب احساسك عندما يقول

يا جميل ما ليك حق والله

ما ليك حق والله


وابو الامين في عايز اقوووول

اقووووول

اقوووووول

وبلطف شديد

بحبك

يا يا يا

حالة من الانتشا العجيب

وما عارف الايام دي طوااالي بردد غنية ابو عبيدة حسن

يمكن نسى

ويمكن قسى

ويمكن ظروف المدرسة

ودائما ما يحتج من يسمعني ارددها على رداءتها


تسلم

عزيزي الرحمابي : تحياتي.
موضوع جميل و فنان.
الحقيقة و بدون إنحياز ، غالبية الأغاني السودانية هي في مجملها فيديو كليب دون تصوير سينمائي ، لأن كلماتنا مليئة بزخم ( لامتناهي) من المعاني.
لو كانت هناك إمكانيات ، لإستمع الناس لأغانينيا في العالم قاطبة و لحصدنا جوائز نحسد عليها.
كما أنه و بدون أي مغالاة ، فإنني إلى الآن لم أستمتع بفيديو كليب ، لا عربي ولا أفرنجي ، لأن الأغنية شيء و المناظر شيء آخر ، خاصة و بعد أن إمتلأت الساحة بكمية من ( الصارقيلات الآدمية تتلوى في ألم و مغص كلوي منفر. ).
عندما غنى عثمان حسين و الكاشف و سيد خليفة و أبوداود ، أغاني بخلفية من مناظر الخرطوم ، الإنطباع كان أجمل مما نراه الآن بكثير.
في إعتقادي أن الأغنية تفقد الكثير من مغزاها اللغوي و الموسيقي لأن العين و القل ينصرفان نحو هذه الأجساد المعروضة و الحركات اللولبية و الحلزونية. و كما أعتقد بأن الإكتفاء بخلفيات من بيئة الأغنية هي الأجدى و الأنفع ، و في النهاية ، إن الموسيقى نوع من تغذية المشاعر البشرية بنوع من الدفء و الرجوع للماضي و إجترار الماضي و إستقراء للحاضر و المستقبل ، لذا فإن الإستماع للغناء بطريقة هادئة تكون أسرع في توصيلها لمنابع الإحساس و التذوق.
تسلم.

جندرية .. سلام

أول حاجة حكاية ( الكاعب الحسناء ) البتغتس حجري ، قطعت مصاريني .. الظاهر عليك دافناها لي .. انتي قايلة الكلام دا جد .. والله ( كرضم كرضوم ساكت ) يعميني فيها ..

تعرفي .. كثيرا ما أتسأل عن الكتاب والشعراء المحترفين ديل .. وتلك الجرأة التي تمازج بين الخيال وبين الواقع ( المحسوس ) فكثيرا ما يسقط المتلقي ظلال ( قصة الحب ) على الشاعر/ الكاتب .. وهذا يكون بمثابة الرقيب الداخلي ( للهواة والنجارين ) أمثالنا خصوصا أننا نملك رقيب داخلي وخارجي – وهذا الأخطر؟؟

بخصوص رواية الخريف يأتي مع صفاء للقاص أحمد الملك سمعت عنها كثيراً هنا في المنبر .. لكن الظاهر حلم الجيعان عيش .. ما تفكي لي واحدة بي فوق الجبل الوراكن دا ؟؟


الظريف قرجه .. يا مرطب

عارف لو ما خوفي من الجندرية دي .. كنت حا أمشي معاك كثيرا في أغاني سيد خليفة .. أي سرب .. يتهااادي بين أسراب الحسان ، في أجمل من كده ..

عجبتني جداً .. أقووول .. أقووول .. بس تعرف يا قرجة الزول المتردد دا ليس (قوة ) قلب ( وشداعة ) يعني .. الزول جرسة ساكت .. وإن رأيتها أنت لطف شديد ..

هذا بالتحديد ما قامت عليه فكرة البوست .. وفعلا الغناء السوداني ملئ بهذه الصور الجميلة التي تزيين مخيلتنا .. ولكننا أحيانا نمر عليها دون توقف ..

.. أيه رأيك يا قرجة في أغنية وردي .. اسفاااي

يتاتوا .. يتاتوا .. زي قدلة جني الوزين .. يتاتوا

.. بألك أيه يا قرجة كفاية حد هنا .. الظاهر انتا مش حا جيبها البر أبداً

.. أخيراً .. بوست أبو قطاعي ذلك .. كم تحسرت عليه لأنو ( اتلحس ) رجاءً إذا توفر لديك أن تديهو دفره .. عشان طلبنا من الولد تنبس ينزل الأغنية ، ولا أكون .. براي سويتا في نفسي

وتسلموا

رحمابي

العزيز
عندما كنا نسجل اعمال وردي بكاليفورنيا والتي لم يحظي الناس
بنزولها الاسواق حتي الان
واثناء البروفات لاغنية عصافير الخريف
وانا اقود الاوركسترا
بكيت كالطفل فبكي الجميع بما فيهم الاوركسترا ووردي والاداريين
ونظر الامريكيين الينا في تعجب
وسالو
فقلنا لهم
ان هجرة عصافير الخريف في موسم الشوق الحلو
هيج رحيلها مع الغروب احساس غلبني اتحملو
هي وصف دقيق لحالنا كفنانين الان
فجعلو يواسوننا حتي يخففو حدة الالم

ناثر البسمة على الشفاه .. أبو جهينة سلام

أتفق معك كثيرا في ما ذكرت .. كثير من الإغاني – خصوصا العربية – بسبب الفديو كليب صارت مسخا .. ولا تجد رابطا بين معاني الكلمة وتلك ( اللولوه ) .. بعض الأغاني وهذا ما نقصده تجدها تحمل داخلها هذه الصورة واللوحات والمشاهد المعبرة .. فديو كليب ( متخيل ) بضم الميم .. فمثلا عندما تستمع للأطلال تبدو جميع المشاهد ماثلة أمامك .. فعدونا ( مثل طفلين ) فسبقنا ظلنا .. فلا يمكن أن تستمع لهذا المقطع دون أن تتخيل فرحة وسعادة وبراءة الأطفال قد انعكست على هذين المحبين ..

لكن تعرف يا أبا جهينة ، بعض الأغاني يفضل أن تسمعها على طقوس معينة .. وهاك الوصفة دي

مثلا أغنية كاظم الساهر ( الليلة إحساسي غريب ) ، هذه الأغنية فيها شجن رهييييب .. عجييب .. بس ، تكون لوحدك ، إضاءة خافتة .. والهدفون علي مسامعك .. وادعو لي.

رحمابي

Quote: ان هجرة عصافير الخريف في موسم الشوق الحلو هيج رحيلها مع الغروب احساس غلبني اتحملو

الله .. يا موصلي

والله العظيم بكيتني معاكم

وما قادر أواصل ..

ياريت لو الصديق دكتور منوكل قرا البوست ده كان امدنا بالصوره التي التقطت لهذه الحدث بطريقة ذكيه

رحمابي تحية
عنوان البوست كان جاذبآ فعلاقتي مع ألأغنية علاقة وطيدة ، أعود لها كلم تدلهم ليالي الغربة وتنؤء بكلكلها علي ، مرة سألت الموصلي عن رايه في ضمها إلى قائمة بشرى الفاضل ، الرصيد الغنائي ، وكذلك كانت سؤال إلى رقية الراقية وأديبة ، سألتها مستلهمآ ألأغنية ، كيف تفارق الضفة والنيل هان عليك؟

الجندريه
طال علينا تغييبكم ،، والله مشتاقين

عزيزي الموصلي

يا ريت تتم هذه الرغبة حتى نفرغ ما بمآقينا من دموع

ويا ريت يا موصلي لو عندك الأغنية تنزلها لينا هنا
عشان حا تسمع نحيب كتير كتير كتير هنا

تسلم



الأستاذ أبو ساندرا

يا زول ما وقفت قلبي

كيف تفارق الضفة .. والنيل هان عليك؟؟؟

الله .. الله

هذه الأغنية يا أبو ساندرا قاطعة فيني ( عرق ) عديل كده
واجدد طلبي لو أمكن يتكرم علينا واحد ظريف
وينزلها حتى تكتمل اللوحة

يا أبو ساندرا تلاحظ معاي .. هناك أغاني كثيرة كلماتها غاية في البساطة لكنها عميقة .. عميقة حد التجذر

تسلم

رحمابي

الرحمابي الجميل

اسعد الله لحظاتك زي ما دايما بتسعدنا بي بوستاتك دي
ومن ما قريت البوست ده بدور ليك علي الاغنية دي ..وما لامي فيها ..كانت عندي بي صوت عثمان مصطفي في شريط فيديو
يار
وانا منتظر معاك علشان اسمع ..لو عند الشباب ديل ..وكنت ناوي ازرع ليك واحده هنا للعاقب .لكن الجايات اكتر من الرايحات
وما وريتني طلبك شنو ؟؟
والبوست بتاع ابو قطاطي ده يا رحمابي ما مر علي لكن شايف عمو قرجه الجميل اتدردق ليك في البوست ده ..كدي حاولوا جيبو لينا خبرو ..او قول لي اسم الاغنية ياته الطلبتها علشان احاول اشوفه ليك ...
واصل ..واصل ..
محبتي
علاء

تمبوسة الجميل

بس لو اعرف البنات الحلوات ديل بتلقاهن وين ؟؟؟؟؟؟

وهاكم بوست ابو قطاطي نكتو من الارشيف

أبو قطاطي .. الشفيف المتفرّد

عمو قرجة الجميل

شكرا لي رابط ابوقطاطي

والبنية دي بالذات بتلقاها هنا ده http://www.zelalem.de/html/gigi.html اسمع صوته واديني رايك
وكان ..خشيت لي جوه بتلاقي حاجات تانية


تمبس

الرحمابي العزيز : تحياتي
بالفعل هناك أغاني تحتاج لطقوس معينة لتجلس لسماعها. و هناك أغاني تفعل بك فعلا مفاجئا كما ذكر الموصلي.
كنت في رحلة على يخت خاص من أسبانيا إلى المغرب ، و باليخت مسجل إستريو و سماعاته موزعة على جميع أنحاء اليخت ، و لم أكن أعلم ذلك ، فوضعت شريط وردي ( أغنية الحزن القديم ، توزيع أندريه رايدر ) ، فإذا بركاب اليخت ، يتركون كل شيء و يرخون أسماعهم ، و عندما إنتهت الأغنية ، وجدتهم بقربي و إفتضح أمري حيث كانت دمعات ( غليدة ) تستقر على خدودي.
تسلم الرحمابي. و لكل أغنية شجون.

يا شباب
يا جماعة
أرحمونا
والله ما فتحت هذا البوست إلا اليوم ، وأكملت كلام الرحمابي وسالت أدمعي
واستمر الحال إلى أن وصلت إلى حديث الفنان موصلي فرأيت أن أحتضنه وبكيت معه بصوت عال
لا كبكاء الرجال ولكن كبكاء طفلين تاها عن أبويهما في زحمة سوق لا يفهم لغتهما
الحاجات دي جميلة
ورائعة
لكنها تقلب مواجعنا
ويهيج أحزاننا
ونحن أصلا ما ناقصين
لكم جميعا تحياتي وودي
ويا رب ننجمع كلنا كده في بلادناونرقص على نغمات أغانينا مش فيديو كليب ولكن عيانا بيانا
ونبدأ بالرقص على ملحمة محمد الأمين

الرحمابي

أتفق معك ان الكلمة المتسمة بالباسطة تكون عميقة الدلالة وباهرة التأثير في الوجدان ، وهي رغم بساطتها فانها غير ساهلة ، السهل الممتنع ، واهديك هذا النموذج ،،
من نظرتي ألأولى
ملك فؤادي غرام
شفت الجمال صاحي
وإتحققت أحلام
باللاهي ليه يا زمان
ما تصفو لي أيام

الموصلي
الصهينه شينه يا ولدي

الحبيب ابو ساندرا لا والله لا صهينه ولا شيئ ولكن البوست ليهو رافع

تنبوسه الظريف

يا جميل بي نظرتك أوفي الميعاد
العيون الشافتك ما أسـعداها

تعرف الأغنية العايزه هي المرسال لبوست أبو قطاطي .. ولكن لما فقدت الأمل في البوست بعد البحث المضني .. كتمت ألمي .. لكن الحبيب قرجه ما قصر ( نكت ) البوست تاني .. وكان الموصلي نزل أغنية رائعة لأبي قطاطي ( دفق فيها ) كمية موسيقى يا تنمبس تسكّر عديل كده فالكشر موصول له أيضاً

بس يا تنمبس برضو ما بعفيك لازم تنزل حاجة على زوقك في البوست دا .. عشان ناس قرجة والذي منو يتعذبوا زيادة طبعا أنا لا .. أخوك صنديد؟؟ هههههه

قرجة الجميل

الله يديك العافية .. تعرف بوست او قطاطي دا لما نبيعوا عندك فيهو النص ما تخاف .. لكن صور تنمبس دي ما عندي بيها دخل .. أصلو الحيطاط لها ودان


صديقي أبو جهينة

ماذا أخبرت .. حاددت خطاك بلاد الأندلس .. أريت ذلك ( الهجين ) المستطاب .. وبرضو تقول لي ( الحزن القديم ) هذا لعمري جرح لا يندمل .. أنه يا صديقي الحزن المتجدد .. وذلك العمل الذي كتب له الكمال التوزيع .. الكلم الشجي ( يدوش الرأس ) ووردي وهو يسحب نفسه العميق ذاك .. فيتجدد الحزن .. أين المخرج .. وأين المفر يا جلال .. يا داود.

ود قاسم .. بدون كعب أخيل

كم فاضت أدمعنا .. حتى في خضرة أطفالنا .. فانتابتهم الحيرة وخشيهم التطفل .. هذا يا صديقنا لبنا سائغا رضعناه من أثداء المحبة والمحنة الرؤم .. بينما فطمنا منه فلذات أكبادنا حينما نثرناهم في كل خطوط الطول والعرض والمدارات .. آآآه … والذي بعثرنا في كل واد.

تسلموا جميعاً

رحمابي

رجع ليك يا رحمابي تاني





Save @ PC







بوستك ده ما ني فايتو

رحمابي

طبعاً متأكدة تماماً
انه الموضوع كرضرم كرضرم ساكت فقط امازحك على قولك شيري
لكن لمست اللحم الحي بحكاية الرقيب دي
طبعاً الرقيب دا ببقى اس ميه لمن يكون منتج النص كاتبة
ويرتفع لاس الف في منطقتنا
بس كويس انك اتهرشت عشان ام ضحى تخت في بطنها بطيخ صيفي

رواية احمد الملك سوف استأذنه في ارسال صورة لك
رسل لي ايملك في الماسنجر

شكراً على كل الدموع التي اسالها بوستك

الرحمابي ...

لا يخلو من الروعة .. والفتون
عقبال بالونة بكري


ــــــــ

أبو ساندرا

Quote: شفت الجمال صاحي وإتحققت أحلام

بالله عليك شفت الربط الخطير دا بين .. شفت الجمال ( صاحي ) واتحققت ( أحلام ) .. ربما كان كل ما يأمله أن يراه طيفاً في الأحلام ، لكن ( ربك رب الخير ) قد رأه عيانا بيانا ... وتحققت الأحلام .. حتى لو كانت أحلام يقظة .. يا زول الناس ديل خطيرين خلاس .. ونحن ما بنستحمل ؟؟

تمبس

أنت سامع حاجه .. ولا أنا

الجندرية

مرت كتبت حاجة كده قصة أو ما شابه .. وقبل ما أدفع بها لأحدى الصحف للنشر ( طبعا ) مررتها على الرقيب .. وأبدأ ملاحظات .. وطلب حذف بعض ( العبارات ) .. لكن أنقري ما نشرتها .. شفتي الرجالة دي .. لكن طبعا بعد تعديل ( طفيف )؟؟؟؟

aboalkonfod

مرحب بيك .. وتشكر على الذوق الجميل

لكن يا ود عمي .. نحن ناس جرسة في البوستات الداخلية دي بس .. البالون المعلق فوق دا ، لا يدخل ضمن حساباتنا .. خليك معانا يا جميل

تسلموا جميعاً

رحمابي

الرحمابى

صديق الجمال

معظم صفحات كتاب الغناء السودانى، لوحات منحوتة والله على وجدان الناس، وقدر ما تمسك ليك اغنية تلاقيها اجمل من اخواتها، خاصة اغانى عبقرينا الكاشف
خد مثلا اغنية المهرجان، لوحة عذبة ومتكاملة الابعاد وزاهية الألوان

وعندك تانى اغنية رحلة فى طيارة، واغنية يوم الزيارة، وصابحنى دائما مبتسم

الكاشف انسان غير عادى طبعا ومتفرد فى كل شى

فى اغنية من اجمل اغنيات الحقيبة وهى من كلمات المبدع مسعد حنفى، وهى

الناعسات عيونن نور جبينن هلا
ما بين تبرى صافى واخدرانى اللون

الأغنية كلها وصف لحفلة زواج قاسم صديق الشاعر، وياريت لو تسمع الاغنية دى وتشوف كمية وجمال اللوحات الفيها

الكلام كتير وشجى جدا، بس خايفين على مساحة اخونا الحبيب بكرى، وما عايزين "نهير" فيها، ونخلى الباقى للزملاء الأعزاء

بس بالله اسمع الطير المهاجر

اهلنا واحبابنا.. عساكم طيبين
اعتذر عن الدخول بلا استاذن لكن جد الموضوع ما بتفات.
انا يا اخوانا ما بعرف بقول جنس كلامكم السمح دا. لكن والله في اغاني كدة الواحد لمن يسمعه، لمن يحس بي دوشة وجسمه يخدر وكرعينو يبردن لحدي ما يقعد في اقرب كرسي واكان قاعد، ياخدلو مدة.

وبعدين يا اخوانا انا عندي التسجيل القديم لي
هجرة عصافير الخريف في موسم الشوق الحلو
هيج رحلا مع الغروب احساس غلبني اتحملو
بس لكن ما عارف برفعوها للبورد كيف، فياريت واحد منكم يوريني عشان كلنا نبكي سوا، فالقلوب السوية هي التي تهتز اوتارها حين يدقدقها النغم.
ودمتم.

المحترم صاحب القلم الرشيق.. اباجهينة. برسل ليك سلام لمن يزحك من مكانك.
انت يا اخوي اندرية را يتر وزع لي وردي الحزن القديم ولا الود... ولك مني كثيره.
سلام
زول سوداني

الاخ رحمابي
كل اغنية عندما نسمعها ترتبط لدينا بالمكان والناس الذين رايناهم عند استماعنا لكلمات الاغنية والحانها
فتجد انه حتى بعد مرور السنين لو اسمتعنا مرة اخرى لهذه الاغنية تجد ذلك الحنين والشجن يخرج من بين قلوبنا لنتذكر تفاصيل مضت وما زالت تعيش فينا
عندما استمع لاغنية زاد الشجون اتذكر على الفور الخرطوم بالليل ومنظر النيل المنساب بهدوء ليلا ووجوه اهل بلدي وهم يسيرون في شوارعها وتلك التفاصيل الصغير ة التي تجدها في الخرطوم العاصمة المثلثة وتجعلك تبكي شوقا لها
واغنية الود الرائعة التي تحس معها بكل نبض فيك وهو ينادي بتراب السودان الذي فارقناه السودان زمان
شكرا لك لتناولك هذا الموضوع الجميل
ودمت بكل خير

الرحمابي يديك 1000 عافية

كلامك لا يعلا عليه0000000000

رجعتنا لايام ولحظات أتمني أن

تعود0000

أيها المطر .. تحية بنكه زخاتك الرطيبة

تعرف يا صنوى .. هذه الأحرف السودانية التي طرّزت بها لوحة أغانينا نحتاج لمطالعتها كل يوم .. لتكتشف كم أضعنا من الجمال حينما لم نتأملها بعمق .. قبل سنة أو يزيد زيّن عمنا بادي محمد طيب سماء مسقط بدرر الحقيبة وبتطريب عجيب .. فشعرت بأننا على مسافة بعيدة من تلك الأجيال التي كانت ترمي الحرف بكل عفوية فتتماسك الأحرف في سلسلة مضيئة كأروع عقدٍ ينام بحميمة على جيد الحسان .

007

يا صاحب النية الصافيه

أولا في البدء بشكرك على تصحيح المعلومة .. والأغنية هي ( الود ) ولعل أبو جهينة من نشوته تداخلت على الحروف ..

Quote: لكن والله في اغاني كدة الواحد لمن يسمعه، لمن يحس بي دوشة وجسمه يخدر وكرعينو يبردن

دا ما هو المجننا نحن زاتوووو


maia


فعلا هناك الكثير من الأغاني تتحكر في دواخلنا وعقولنا .. تتشبث بذكرى أو موقف .. يقفز إليك عند أول أنة وتر .. فتزداد الشجون .. لا زلت أشعر بوخز أغنية لزيدان ابراهيم سمعتها في ربيع مخضرٍ .. مع أن قصتها لا تشملني حينا ولكن كلما يقول ( أقول اصبر على الهجران .. أقول أنساك لابدا ) أها قلبي يفرني .. مع أنو ما كان في زول زاتو عشان يهجرني .. لكن القليب رهيف نعمل شنو ..

بس أغنية عثمان مصطفي موضوع البوست هذا .. وهذا ما أسعى لوضيحه هي نفسها تحمل مشاهدها .. كلماتها كلمات ( فوتغرافية ) كأنها أعدت أصلا لعمل مرئي .. أليس كذلك .

مخرجنا الرائع
Abd-Elrhman sorkati

ويمنحك مما تمنيته لي أضعاف مضاعة

ويا ريت لو تنثر قليلا من رؤياكم حتى تعم الفائدة

ويا ريت لو أمدنا أحد العارفين بشاعر هذه الأغنية والملحن حتى تكتمل الصورة .. يا موصلي ما تقول لينا منو؟

وتسلموا جميعا

تمبس
عفوا الأغنية مسموعة .. ويديك العافيه .. يا لهذا العاقب الرزين .. ربنا يرحمه رحمة واسعة

رحمابي

الاخ الرحمابي
عفوآ

لم استطع الوقوف بالباب طويلآ
فدخلت دون استئذان

لا أحتمل ان استمع لجميل الكلم والنغم( و أمسك خشمي علي-او بالاصح امسك اصابعي من النقر علي الكيبورد)و

البوست و البوست المصاحب
مليان...مليان...مليان

دموعنا كملن من يوم خشينا البورد وقراية متل كلامكم دة
وسماع اغنيات الوجع دى

سنموت يومآ بالسكتة القلبية ونحن نقرأ أو نستمع

.....ولكن

برضو واصلوا
فنحن نهوي تعذيب انفسنا

لكم الود

حنينة

باب الريده وانسد وقصر اشوق وانهد شعر التجاني حاج موسي

haneena

الأخت الحنينه / حنينـه

يا أنتِ .. وهل نملك غير الدموع الطهور .. فنتوضأ بها خمسـاً علها تتسرب لما طويناه في الحنايا .. فنبرأ من كل جريرة حزن وأسى .. ونكاد نعلنها عافية تعلق على أعمدتها ( بالونات ) الفرح والإنعتاق .. فيأتيك من خلف الذكرى صوت شجي .. ينتحب

إننا طيفـان في حلـمٍ سـماويٍ سـرينا
…
واعتصرنا نشوة الحب .. (ولكن ) ما أرتوينا
…
ثم ضاع الأمس منا؟؟ وانطوت في القلب حسره

والله يا حنينه يا أختي الظاهر علينا حا نعوم البورد دا بالدمع السخين .. فأعذرونا يا حبان؟


رحمابي

.
.

[qb]

رحمابي انا من اول يوم نزل البوست دا منتظر واحد ينزل الاغنية دي
الظاهر اني حانزل النسخة العندي حتي لو كانت غير واضحة تماما

يكفي ان الشريط اتمسح من كثرة الاستماع..لا اخفيك سرا لقد كان معي لمدة 13 سنة بالتمام
ولا اعتقد ان هناك تعليق يكفي لمثل هذه السنوات وتاثير الاغنية اعتقد الاستماع اليها يغني عن كل تعليق

ولكم الود

تنقو

عمك تنقو

لك عميق الشكر
ويكفينا انك كنت معنا منذ البداية
بمشاعرك .. ودموعك
تسلم

رحمابي

العزيز رحمابي وبقية الأعزاء

ليتكم وضعتم شارة تنبيه لصاحبات وأصحاب ا لقلوب من نوع كسرة الأمهات الرهيفة.
دا بوست مسيل للدموع ، المشكلة ان البمبان يسيل الدموع ولكن القلب يكون ثابتا ومتحديا اثناء المظاهرات ، أما مظاهرات شوقنا للضفة والنيل فنترك ل ( الجرسة ) فيها العنان. أها يا أبو ساندرا ، البسكت الناس ديل كلهم منو؟ شيل شيلتك.

العزيز رحمابي
نقول شنو الكلام الحنين واللحن الحنين ونحن كاتلنا الحنين ودي المرة العاشرة أمر علي البوست وعشان ما يغطس مني نديه رفعة وتحياتي لتمبس الزول الجميل

الموصلي .. يا هميم

لك صادق الود وعميق الشكر على المعلومات .. ولكن سؤالي قائم وهو عن شاعر وملحن هذه الأغنية موضوع البوست .. الخدود الشاربة من لون الشفق عند المغارب ( لكن هن خدود نصاح )؟؟؟؟؟


العزيزة الشاعر الرقيقة .. رقية

والله لا ابو ساندرا ولا غيره يملك سدود وحواجز أمام هذه الدفق الهطال .. فنحن دون شجاعة مفتعله ها قد اشرعنا نوافذ المقل لتتشكل كل الشلالات ومصاب المياه من دمع عصي على ( البنبان ) قريب من كلمة حب وحنان .. واشتياق .. ولو لا ذاكرتي الجريحة لقلت لك (ووب علينا ) أو كما قرأت هذه الجملة في أحد نصوصك التي أزهلتي .. لك صادق الود والنحيب لنا؟؟


aba

ولا نمر على مكان حميم عشرات المرات إلا لأنه يمثل على أقله ( اطلال ) ذكرى .. وأنا مثلك مررت على هذه الكلمات قبل أن أنزفها في خاطري عشرات المرات وأخيراً ( تشجعت ) ورميت بها .. عندما فاض بي .. فجعلتها على وعلى أحبائي .. فدعنا نجعله اليوم العالمي للدموع .. دموع المحبة والفرح والإشتياق .. وأي دمعة حزن لا .. لا .. لا

شكر خاص

لكل الذين أبرقوا (بالماسنجرات ) - مهنيين ومعزيين - وقد فضلوا البكاء ( من منازلهم ) لأسباب تحول دون جرستهم على الملأ .. لكم صادق الود .. ونتفهم صمودكم


وتسلموا


رجمابي

الأخ الرحمابي

وكيف لا
حين يلتقي الشاعر المبدع الراحل اسماعيل
والفنان العظيم الموسيقار وردي
والفنان المبدع ذو الصوت الفريد عثمان مصطفى
في " مشتاقين"
كيف لا تسيل الدموع مع كل لحطة استدعاء لذكريات قديمة
من مناليست له مع هذه الأغنية بالذات ذكرى؟
شكرا لك
لكل من كتبوا في هذا البوست
ل عمك تنقو وهو يضع هذه الاغنية الرائعة
لطالما كنت ارددها في خلوتي وفي وحدتي
الخدود الشاربة من لون الشفق ~~ مع التحية للأخ الرحمابي

رحمابى والبقية

سلامات كتاااار

ما عارفة لكن انا اليومين ديل معلقة معاى

من يوم ما رايتك ضاق قلبى السعادة

فى محراب جمالك واليت العبادة


وبهديك يا جندرية منها

انا حبيت خدودك وحبيت الفصادة

وبرضو كمان بحبك لو خلوك سادة

احبك نور حياتى حب العين سوادها


عاجبانى جدا الاغنية دى وبسمعها كل يوم بصوت عباس تلودى


كنوز

تسلمو

sympatico


كم كنا ننتظر هذه المعلومة القيمة .. والآن يزدد تعلقنا وقناعتنا بهذا العمل ولماذا كتب له النجاح المبهر .. وكما ذكرت أنت .. كيف يجتمع هذا الثلاثي دون تعم السعادة كل هذا الحضور بل والغياب .. لك عميق الود وشكري موصل لك أيضا بفتح ذلك البوست والتحية الخاصة لي .. وإن كنت لم اسمع الأغنية بصوتك لدى مشكلة فنية .. أتمني أن اسمعها وحينها سأمر عليك في ديارك .. هناك ، تسلم


dreams

Quote: انا حبيت خدودك وحبيت الفصادة وبرضو كمان بحبك لو خلوك سادة

يعني يا دريمز .. سيك سيك مشلخة ولا ساده

رجاءً عبرك .. تحياتي لكل بورداب الخرطوم وكنا معكم بكل احاسيسنا .. وربنا يجمعنا معكم على خير .. وتسلمي للطله .. اليس هذه الجملة الأخيرة للأخت شيرى .. ليتها تعود ، وأهديها هذا البوست بأكمله ونقول لها
والله مشتاقين.


الرحمابي

فوق

بعد الجرسة

الى هاله قوته مع فائق الجرسة والإحترام

Quote: ان عالما يتم تحديثه لصالح النساء حتما سيكون جميلا للرجال

أن بورداً يتم تلطيفه لصالح شيري حتما سيكون اساسيا

تسلمي

الرحمابي

الرحمابى

رفقة الجمال العالى

مفتون أنا أيضا بصوت المتفرد الذى ذهب مبكرا، الجابرى، ولهذا الجابرى صوت من سلسبيل الطرب النادر، ذهب الجابرى وفى القلب منه حسرات وأمنيات، كنا نود أن يوفيها لنا، لكن دوما الطيبون يذهبون أولا

كنت فى حضرته مساء الأمس وهو يشدو بغناء عذب رقراق ويجسد كلمات كامل عبد الماجد لسيد الإسم

أنا فى العيون ببنيله دارين من مودة ومن منى
وبضمه فى قليبى انبساط ومحبة فياضه وهنا
لا ردت غيره ولا هو راد زولا سواى أبدا أنا
نظراته كيفن بوصفا دى الفى عيونى مدونه
همساته تحنان القمارى الراجعه للعش والجنا
بسماته لو شفتو البروق لحظة تشع تبرق سنا
وتضوى والليل انهزم
الدنيا يا ناس تنقسم
الفرحة تملاها وتعربد فيها والشوق يترسم

وتحايا ملونة ليك ولمبدعى بلادى

رحمابي والشلة الرائعة

لكم مني دفق الشوق والمودة والحنين

اثرتم فينا من كل لوحة شجن

وشربة آكتفيد


ورونا كيف ننزل الاغاني المطلوبة

وحا تكون معاكم علي الهواء في دقائق

طريقة بكري ما نفعت

Browse and up load
وستحصل علي عنوان الاغنية لتنقله في الصفحات الالكترونية
عندي كم اغنية جغمت في صفحات النت
ويكون هسي في خواجة بسمع فيها

من بينهن


اشتقت ليك ساعة المساء
فرد الجناح لملم مصابيح النهار

والشوق شرب لون الجراح
والعتمة نامت في الدروب
والليل لبس اجمل وشاح

في اللحظة ديك اشتقت ليك
شوق السحابة الراحلة
في جوف الشتاء عطشانة
تحلم بالخريف

وبقيت ضعيف مديت معابر شوقي ليك
وحنين حنيني الصافي ليك

واشتقت ليك


علموني كيف انزل ليكم الاغاني
حدي معاكم

حبي انا ليك كان زادي
وكان جوة الحنايا دفين
كنت بداري من الناس
وكنت

دي فيديو خطر لو قدرت اعرف انزلها يا رحمابي
دموعك بجدولن ايها الرجل الشفاف

مع اصدق تعابير حبي لكم

يا جماعة وين شييييييييييييري؟؟؟؟؟؟؟

Save @ PC


ياتو شفق .ده ذاتو ...وياتو مغارب ..والليلة يوم كم في الشهر ؟؟
عي العموم الله يسامحك تاني ..يا ابو النسب ..
وسمعت تحت ..تحت أنك داير .. تهدي البوست ده ؟؟ كان الكلام جد .. اديني نصي .. والجندرية نصها وأرمي الباقي البحر .. باقي ليك كم ؟؟؟ غايتو انا جايب معاي صيوان ..
يا عمك تنقو معقوله ..أغنية زي دي تمشيها ساكت ؟؟ والناس الدايره تبكي بالدس دي .. ما كان تنزل ليها اللنك ده ..

Quote: شكر خاص لكل الذين أبرقوا (بالماسنجرات ) - مهنيين ومعزيين - وقد فضلوا البكاء ( من منازلهم ) لأسباب تحول دون جرستهم على الملأ .. لكم صادق الود .. ونتفهم صمودكم

لوووووووول
الناس كلها
ما براى يعنى

دعاشنا المنعش .. أيها المطر الحنين

ومن الذي لا ( يعشق ) الجابري
كم مرة ( جرعني كأس .. )من دلو

الجابري صاحب ألحان ماسية .. كم بللت وسادات حرقتها أنفاس العذارى
وحتى أصحاب الشوارب .. كثيراً ما قالوا آآآآه


nazar hussien

نزار ايها الغائب .. وماذا تركت للخيمة سوى الأوتاد

تعرف يا نزار لا زالت عالقة بذهني أغنية لمحمد ميرغني .. كان يشدو بها ولم يتبق على أول مغادرة لي للسودان لمصير مجهول سوى دقائق معدوده

شعرك الليل الطويل .. يحكي للأفلاك سهدي في غيابك


ومن يومها لا تزال تمتد بنا دروب الغربة .. ويمتد بنا السهاد

فيما يتعلق بتنزيل الأغاني أو زرعها كما يحلو للظريف تمبس .. عليك بتمبس


تمبس يا صديقي

ماذا تبقي لي إن أخذت نصيبك ومعه عطر الجندرية

انت لو ركزت شويه تلقي الإهداء في صالحك .. لأنك كابي الجرسة فاتح ليك بوست يصب في نفس المجرى .. ولا رايك شنو


هاله قوته

هي لكن جرسة ساكت .. لو ما خصموني بزمتي كنت حا اوريكم الفاضئح
لكن السترة واجبه

رحمابي

الرحمابي ... وصية اللهل الرمال الناعمة مشتاقة لـ مشيك ... أحييك لامن تستغيث .. أحيي كل هؤلاء الملوك الجلوس صدر هذا البوست المريح .. أسمح لي أن أشكر عمك تنقو الرقيق .. يعني أحسن من كدي يكون كيف يا عمك !! .

تحية للزول الظريف الذي وشى لي بمكان هذا العسل . كما قال الشاعر : كّزيم عكة النحل الفراقو جرحني .. وين ما اطراه أعمل واضحا يفضحني ..

عزيزي المطر .. أبا أحمد وآمنة :

الصيف انصرف جانا الرشاش بي هبايبو
براقو البلوح الحر- طفاها لهايبو
رفّ وساق ورزمن فوق قصيرة سحايبو
صبْ ماياً كتير والفيل وطاها دبايبو

تحية ومحبة لكم جميعاً

أشاركك نزار والرحمابي في روعة محمد ميرغني وأخص بالذكر - النازلة ماشة على البحر

أهل العوض -- أهلنا

والرحمابى وبواسق الناس

التحايا بحجم المحبة، لكم وللوطن

أهل العوض

ساعة الشمس يا دوب بتطلع، وحين يبدأ شجر السنط بإهداء البرم، تراه يبتسم وتتراقص الفروع وكأنها تلون لوحة الأرض بلون أصفر رقيق، ساعتها، يتوقف العمر للحظات هى العمر، ويطول

النازلة ماشه على البحر، ساعة الحلب، وكمان ساعة الملائكة تكون تداعب فى خصلات شعر النجيلة والسنابل الصبية، وعندما تبدأ الشمس إيتسامها اليومى، تأبى الغيمات إلا أن تشارك فى كرنفال العشق والإصباح، فتهب المطر، والشمس شاهدة والله شاهد ونحن شهود

الللللللللللللللللللللللله

مرفأ ندى والله يا رحمابى يتشكل هاهنا، والله أنى أكاد أشتم رائحة الطين والحشائش، وأرى زوجين من الفراش الملون بألوان مستحيلة، جيئة وذهابا وكأنهما يكتبان توقيع الخالق على لوحة اهدانا اياها

ونصلى فى هيكل العشق

والتحية تحملها المحبة، أهديكم

أب أحمد
شجر الطلح
رمى البرم
أصفر تحت أقداما مفروش قرمصيص

عليك الله شعرة جلدك ما كلبت؟

أهل العوض

صاح والله شجر الطلح الحقيقة هو، لكين كله واحد واللوحة ياها اللوحة، يا حليلنا والله يا ابو حميد

شعرة الجلد بقت فى تكلب دائم، إلا الله كريم

أغنية فلتة بالجد كده



والمحبة

العزيز .. أهل العوض
والله .. مشتاقين
لم تنتظر أشواقنا حتى تحط بك مظلات الغربة بديارها
ولكنها سبقتنا اليك حيث أنت هناك .. في ديارٍ ابتعدت عنا بتضاريسها وأميالها
وها أنت تعود .. ومعك كل هذا الدعاش المشبّع بطيبة أهلنا الحنان
السلام عليك .. والأمنيات المستديمات لك .. وللأسرة

أيها المطر .. سلام ومحبة

الرحمابي

سلام يا اهلنا

tmbis
alsura sm7a shadeeeeeed.............

الأخت هالة قوته

أهلا وسهلا
ولكل أهلنا الطيبين .. والله مشتاقين


راوية العباسي

مرحب بيك .. بي صور تمبس

رحمابي

.

سلام للناس السمحة
البوست رد لينا الروح
شكرآ للونش...أقصد رافع البوست
بهزر يا هالة... لووول

كتروا لينا من زي دة بالله

حنينة

سلام ....... انا تاني جيت راجعة
يا اعز الناس.....
حبايبك نحنازيدناقليل حنان
داالعمر زادت غلاوتو معاك
و صالحني الزمان....
عليك
الله يارحمابي لوعندك تنزله

الحبيب الرحمابى
والاحباب المداخلين

كنت قبل ان اسجل بالمنبر
قد قرات هذا البوست
الجميل وقد لفتت نظرى
معلومة اعتقد انها خطا - حسب معلوماتى - وهى
تتعلق بملحن هذه الاغنية وهو عازف الكمان الشهير
عبد الله عربى وليس وردى كما ورد بالبوست وقد تغنى بها
وردى وعثمان مصطفى لالتباس يحصل كثيرا بين الفنانين
وطبعا كانت النفوس طيبة

ولكم المحبة

دا شنو دا ؟؟؟

دة نكتوهو من وين الليله ..دي حاله دي ..ما كنا كويسين

لكن بيني وبنكم الصفحة الاولي محتاجة لي حاجة زي دي

تسلمو علي العفرته
loooool


تنقو

الأخت حنينه

العفريته واحدة من رواد هذا الإشتياق
لذا نعذرها جميعا ونشكرها


الأخت راوية العباسي

أمسكي قوي في عمك تنقو ، وكذك تمبس هما وحدها
يملكان هذا الألق
أنا زول كلام ساااكت
تسلمي مرة أخرى


الأخ عبدالرحمن قوي

ننتظر حتى يتم تأكيد أو نفي هذه المعلومة
أنا شخصيا غير متأكد من صحتها
لك دفق من الود والشكر



عمك تنقو

يا صاحب هذا الفرح والإشتياق
نعمل شنو مع ناس هالة قوتة الحنينة دي

كلنا مشتاقين

تسلموا

رحمابي

رحمابي الحنين

تسلم ..والله كفي بهذا البوست ان يكون امام اعيننا..

Rawia

دايرة الاغنية تسجيل قديم ولا تسجيل جديد ؟؟؟
والليله تلقيها في بوست منفصل

ولكم الود

تنقو

gadeeeeeeeeeeeeeeeeeeeeeeeeeeeem

الرحمابي يا حنين
الله يديك العافيه
يا زوق

غاية في الروعه

تحياتي

حنينة
قلتى لى الونش؟؟
يا زولة انا فكرت بدل الونش اكون علاقة,(شدة على اللام) افضل معلقة البوست دة على الصفحة الاولى طوالى


الرحمابى
انها جرسة على الهواء

جمال عبدالرحمن

أرأيت؟؟
عندما تصفو النفوس
نتادصق مع الجمال
وتصبح المشاعر النبيلة هي .. المنهل الوحيد

لك الود والتقدير



هالة قوته

بيني بينك على المكشوفة كده احسن من
الغتفيت

ما شفت بوست - حشت التمر
ما قلت ليك

حنان النيل ما خلت دموعي يكبو شووووو

شكرا لكل الحضور

تسلموا

الدنيا ليل غربه ومطر

الله يا الرحمابي اسقيك نداك ، اصلو نحن عطشانين ، واصل يا رطب

الأخ .. أحمد

قولوا للنيل ضفة . ضفة
والعشيات لما تصفه

ربنا يهون الليل .. والغربة


عشة بت فاطنة

قنصت ليك ليلة البارحة في النادي السوداني
بس ما شفتك .. لقيت سوما حايمة

ليلة ابدع فيها الشاعر التجاني حاج موسى
بقراءات جميلة لمعظم كلماته التي تغني بها العديد من الفنانين

شكرا يا عشة

فوق
لزميل عشة فى الكوم

د. بيان

ما قلنا ( مستقلين ) وكده

أكاد قاصدة كوم سنة البيارة

حا أخيب ظنكم ، ( لآنكما ) حا تتفاجأوا

والله بي جد

نحن لسه صغار ؟؟؟؟؟

ههههه

شكرا

Quote: ( مستقلين )

لع والف لع
بنقصد كوم المستقلين

Thank you a lot Alrahmabi..
Indeed, this song is wonderful. God bless!

UP

up

إخوتي رواد الجمال .. والكلمات المدمخة بريحة الدعاش المشبع بي عبق النال العاول.

لمن شفت عنوان البوست .. بيني وبينكم جيت راخي أضاني عشان أسمع نغمة نغمتين من الأغنية وخاصة بصوت الفنان عثمان مصطفى.

من الواضح أن حنيني لهذه الكلمات هو حنيني لأزمنة محببة.. فهذه الأغنيات هي كبسولة الزمن التي امتطيها في الانتقال الافتراضي التوهمي فأعيش هناك لحظات جميلة قبل أن تقطعها رنة هاتف.

يا جماعة بالله واحد يمدني بريل بلير كان مثبت وضاع ..


تحياتي،،

أخوكم .. جاد

أحبتي

عبدالاله زمراوي

هالة قوته

عزيزي جاد

لكم جميعا الشوق .. وأمل اللقياء

و ... غائب السنين الليلة مالووو؟؟؟

شكرا

رحمابي

مالو ؟
مالو يا رحمابي
يعني ما عارف مالو ولا متغابي العرفة
مالك علينا ؟

الرحمابى

الاخوة والاخوات الاحباب

الحق يقال ان هذه الاغنية دفقة من حنين
اسمعها فتزوى راحة البال ويصيبنى البلبال

الرمال الناعمةتشتاق لى مشيك
الطيور الراحلة فى ضل المساء بتسال عليك
كيف تفارق الضفة والنيل هان عليك

تأملوا معى هذه المحنة وهذه الصورة العجيبة
وماذا لو علمتم اننى من سكان الضفاف وبيتنا على مرمى حجر
من الضفة الشرقية للنيل الاذرق بابى حراز.

شكرا للرائع الراحل اسماعيل حسن وللفنان عبد الله عربى
وللعملاقين وردى وعثمان مصطفى وهم جميعا ينثرون علينا هذا العبير

ولكم الود من قبل ومن بعد