Post: #1
Title: من الداخل ...........ثقافة .......سياسة ...واشياء اخرى
Author: dreams
Date: 07-16-2003, 11:27 PM
من داخل الخرطوم ..وباحساس غالبية ساكنيها ..احكى ..اتساءل ..اتعجب ..واحزن
السلام ...الاتفاقية ..المفاوضات
كلمات صارت القاسم المشترك لكل وسائل الاعلام لدينا ..بين مؤيد ومعارض ..وحتى رئيسنا لم يكتفى بها فى جلسات وزرائه ومستشاريه بل اقحمها فى لقاءته الجماهيرية الانفعالية
لكن
الشعب ..هل حقا يستوعب هذه الكلمات ؟ ..ما مدى انفعاله بها؟..لماذا احس فى كل الوجوه عدم الاستيعاب لما يدور..والادهى والامر عدم الاكتراث!
******
يا اعلاميين ..ويا صحافيين تحديدا
هل انتم راضون عن نفسكم ووضعكم؟
يكتب سعد الدين ابراهيم ويرد هاشم صديق فتقوم القيامة وتصبح معركة
يكتب صحفى نقد فى احد الفنانين الشباب(واظنكم تعرفون من اقصد) فيغضب الشاب ويجمع (اصحابه) ويذهبوا لمبانى الجريدة ويكسروها (حتة حتة) ويضربوا كل من فيها ..ويصبح الصباح فيطلب التسوية ..فتتفاوض الجريدة معه
اذا قلنا الشاب كان (مبسوط شوية) وفكت منه ..يا ناس الصحافة انتو مالكم؟
ليه السكوت و(التسوية)؟
*******
هذى الايام كلما استلقيت فى (حوشنا) وغلبنى النوم بسبب ازيز تلك الانثى ترحمت على اديبنا على المك عندما قال
فى بلادى تموت السلاحف فى ليال سبع ..والباعوض يحيا دهورا!!؟
*****
فاز التجمع فى انتخابات الجامعة........الف مبروك
لكن نفسى اعرف سر الهدوء الذى لازم انتخابات هذه المرة
لا مظاهرات ولا غيرو ..اقصى حاجة كانت امر (يا بنات الليلة ما تبيتو فى الداخلية)ثم يصبح الصبح وتقوم الانتخابات فى ميقاتها وتسير هادئة ويعلن الفوز ....انشاء الله دايما!
**********
حميد
الحلنقى
السنى دفع الله
محمد محمد خير
هؤلاء اخر العائدين للوطن ....هل من مزيد!؟
لى عودة
|
Post: #2
Title: Re: من الداخل ...........ثقافة .......سياسة ...واشياء اخرى
Author: almulaomar
Date: 07-17-2003, 12:01 PM
Parent: #1
في إنتظار عودتك المشوقة
|
Post: #3
Title: Re: من الداخل ...........ثقافة .......سياسة ...واشياء اخرى
Author: dreams
Date: 07-21-2003, 07:56 AM
Parent: #2
الملا عمر
صباحك خير بتوقيت الخرطوم
تسلم
|
Post: #4
Title: Re: من الداخل ...........ثقافة .......سياسة ...واشياء اخرى
Author: dreams
Date: 07-21-2003, 08:05 AM
Parent: #3
اذا عرف السبب ...بطل العجب
هكذا رددت لنفسى عندما علمت ان عمر اتحاد جامعة الخرطوم المنتخب لن يكون سوى اكثر
من 3 اشهر تجرى بعدها انتخابات مرة اخرى بعد
بدء (البرلامة) عامهم الاول
اذا فهى ليست سوى نقطة سجلها النظام لصالحه لتسجل فى تاريخه ..فوز التحالف فى عهده بالاتحاد...والا ما منعهم عن تغيير نتيجة الانتخابات كما اعتادوا دوما!!!!؟
تسلمو
|
Post: #5
Title: Re: من الداخل ...........ثقافة .......سياسة ...واشياء اخرى
Author: rummana
Date: 07-21-2003, 09:31 AM
Parent: #4
دريمز
كل ما تأتي به من أخبار من الداخل نشتاق لمعرفته حتى ولو كان حالة من اللامبالاة او التشوش..
أول مرة أعرف انه عمر الاتحاد تلاتة شهور فقط
طيب خسارة الورق والحبر لزومها شنو؟ وماذا يستفيد الاتحاد من فترة دوام قصيرة زي دي؟ وهل يخطط الاتحاد الجديد لتمديد عمره بخلق توترات واضطرابات حتى تغلق الجامعة ابوابها قبل عمل انتخابات جديدة؟
ويا دريمز مرة أنا في اجازة في السودان.. كان هناك اطلاق نار في احد الكليات وعدد غير عادي من رجال الاحتياطي أو ما عارفة هسه بسموه شنو مالين الشوارع وقادتهم كانوا في حالة من التوتر والغضب والمنظر كله على بعضه كان مخيف وينبيء بانه في قيامة حتقوم..بس الناس كانت ماشة عاااادي في الشارع كأنه مافي شي حاصل ولا في نار تنطلق في المكان ولا عيال معرضين للخطر..كل زول في هم روحه..القلب مات أو اتهلك بالهم
|
Post: #6
Title: Re: من الداخل ...........ثقافة .......سياسة ...واشياء اخرى
Author: dreams
Date: 07-21-2003, 09:55 PM
Parent: #5
رمانة الغالية
مساك الله بالخير ..لك كل رحيق الخرطوم
ده اللى افادنى به احد خريجى جامعة الخرطوم الضليعين فى السياسة واللى لازال عبر تنظيمه يرتاده ويعتبر كادر خطابى
بالمناسبة ده سؤال بطرح نفسه ....خلال فترة الانتخابات المضت ليه اغلب الكوادر الخطابية فى اركان النقاش كانت من الخريجين؟ وحتى فى الخريجين فهم من دفعات 98 و 99 ...اين جيل اليوم ؟ ام نجح النظام فى عمله داخل ادمغتهم خلال دروات عزة السودان؟
تعرفى يارمانة نتيجة الاستفتاء اللى تم فى كلية الطب عن اسباب نجاح انصار السنة كان شنو؟ اغلبية الاصوات كانت من البنات ولما سالوهم ليه اديتو صوتكم لانصار السنة قالوا ...لانه طرحهم موضوعى؟
اظن ان اسئلة كتيرة ممكن تتفرع من كل هذا جديرة بالنقاش واهم من الاكتفاء بالفرح بالفوز اللى اول ثماره كانت خلاف حاد فى اول اجتماع لهم نتج عنه تنحى الاتحاديين واكتفاءهم بالتمثيل فى المجلس الاربعينى وهم اللى كانوا مرشحين لمنصب الرئاسة؟
اما الجماعة اللى اتكلمتى عنهم ديل فهم ليهم اكتر من اسم
لو لقيتيهم قدام جامعة اسمهم بكون ...قوات مكافحة الشغب!؟
واذا فى نص السوق العربى يبقى اسمهم ..شرطة امن المجتمع!؟
اما اذا فى شارع القصر وقدام البنوك فهم ...شرطة حماية المنشاءت!؟
وفى اى مكان تانى طبعا ...شرطة بسط الامن الشامل!؟
شفتى كيف
تسلمى
|
Post: #7
Title: Re: من الداخل ...........ثقافة .......سياسة ...واشياء اخرى
Author: bamseka
Date: 07-21-2003, 10:12 PM
Parent: #6
دريمز
سلامات
دايرين لينا لمه مع بورداب الداخل
واحيك على طرح الموضوع الشيق
تحياتى
|
Post: #8
Title: Re: من الداخل ...........ثقافة .......سياسة ...واشياء اخرى
Author: dreams
Date: 07-21-2003, 10:30 PM
Parent: #7
بامسيكا
كدى نلم فيك انت اول شئ
وينك مختفى؟
ايدى على كتفك
تسلم
|
Post: #9
Title: Re: من الداخل ...........ثقافة .......سياسة ...واشياء اخرى
Author: rummana
Date: 07-21-2003, 10:51 PM
Parent: #8
والله منك نتثقف يا دريمز الجميلة
خلاص ديلك بكونوا ناس مكافحة الشغب ..الغريب حتى في مصر القريبة دي ناس مكافحة الشغب ما بدخلوا جامعات ولا بضربوا نار..وبيكتفوا باستعمال خراطيم المياه عند الضرورة .. لكن نحن الظاهر جيناتنا مختلفة
وتعليقا على ملاحظتك على طغيان الكوادر الخطابية من الخريجين..أنا اعتقد اختصار عام كامل من مراحل التعليم دون الجامعي ..بالاضافة انه في عدد كبير من الطلبة ممكن يدخل في سن صغيرة المدرسة ..( كل اولاد الحلة اللي جنبهم مدرسة دخلوا مستمعين لأنهم ما بلغوا سن المدرسة وبعدين عدوا على طول لسنة تانية.)..ده بخلي الطالب يدخل الجامعة صغير السن قليل التجربة وغير مكتمل النضح .. وما عندي فكرة اذا في أي نشاط طلابي في المدارس له علاقة بعمل روابط وانتخابات ..الخ..فلو ده برضو غير موجود يبقى من المتوقع أن يكون في اعتماد على ناس أكبر سنا واكثر تجربة
سلام
|
Post: #10
Title: Re: من الداخل ...........ثقافة .......سياسة ...واشياء اخرى
Author: hero
Date: 07-22-2003, 08:49 AM
Parent: #9
...
..
.
أحلام الأنثى الأخرى
لك مطلق الأحزان إن كانت تفّضى الى مداخل
الفرح ..
ولا فرح لك إن كان يفضى الى مدخل حزن ولو كان نبيلا ..
تلك اذا نتائج إنتخابات جامعة الخرطوم
فرح مؤقت يفضى الى حزن عتيد وشىء من حبكة درامية شديدة الذكاء
طبّل لها الكثيرون وفتنوا بجمالها .. وروعتها
وهم لازالوا تحت تأثير الغيبوبة التى لاتغادر
الداخل أعلم .. وأكثر دراية ..
القصة لازالت فى بداياتها .. والقادم يحمل كثيرا من الدهشة
حين يكون عنصر المباغتة هو السائد ..
لكن ليس بالضرورة أن تكون الدهشة مصدرا للفرح ولو كان الأصل
حزنا ياصديقتى ...
|
Post: #13
Title: Re: من الداخل ...........ثقافة .......سياسة ...واشياء اخرى
Author: dreams
Date: 07-23-2003, 06:41 AM
Parent: #10
hero
حزن بيقين ...خير من فرح واهى
لطالما باغتتنا افراحنا فى غمرة الاحزان
ولكن دوما كان الحزن يملك صفة التسربل والاحتلال فى هدوء مميت
واظنه من هنا اكتسب ديمومته
نعم ...ما اقسى الفرح المؤقت
تسلم
|
Post: #12
Title: Re: من الداخل ...........ثقافة .......سياسة ...واشياء اخرى
Author: dreams
Date: 07-23-2003, 06:35 AM
Parent: #9
غاليتى رمانة
نعم الاكبر سنا هم الاكثر تجربة ..لكن الى متى ستكون لهم القيادة؟
ما دورهم فى تعليم هؤلاء الصغار ليكملوا المشوار ؟
لو لاحظتى الخريجين ما من دفعات 2000 او ما بعدها ..يعنى اقل شئ
فى 99يعنى4 سنوات لى ورا ..وده بعنى انه فى دفعة كاملة اكملت دراستها وخرجت ناجحة اكاديميا فقط...ودوما اررد انه الجامعة ليست اكاديميات فقط
نعم المنهج الجديد والسلم الدراسى الجديد ..وكل شئ جديد فى التعليم به من الثغرات ما يكفى لجعل اطفالنا يكبرون ..فى اتجاه واحد!!!؟
تسلمى
|
Post: #11
Title: Re: من الداخل ...........ثقافة .......سياسة ...واشياء اخرى
Author: Elmosley
Date: 07-22-2003, 11:23 AM
Parent: #1
احبار فيها المحزن وفيها المفرح واهم ما فيها
عودتك الينا محملة بالخبر اليقين
|
Post: #14
Title: Re: من الداخل ...........ثقافة .......سياسة ...واشياء اخرى
Author: dreams
Date: 07-23-2003, 06:59 AM
Parent: #11
ود عمى
سلامات كتااااااار
مشتاقين
لك كل الفرح فى احبارى
وجهدى لاوارى عنك الاحزان
تسلم
|
Post: #15
Title: Re: من الداخل ...........ثقافة .......سياسة ...واشياء اخرى
Author: dreams
Date: 08-09-2003, 10:33 PM
Parent: #14
من صحابك ومن قرايبك
يا حبيبى بغير عليك
وكل من قال يا حبيبى
افتكرته يشير اليك
واى عاشق لو تغنى
قلت لازم شاف عينيك
يا امير الحسن لو تسمح ظروفك
كل لحظة
كل ساعة
كل يوم
مشتاق اشوفك
صباح هذا اليوم حمل الينا الناعى نبأ وفاة الشاعر المبدع عثمان كجراى صاحب هذه الكلمات التى طالما اطربتنا بحنجرة وردى
رحمه الله واسكنه فسيح جناته
*********
دعوة للجميع
الاربعاء المقبل
كازينو النيل الازرق
عقد الجلاد بصحبة العائد الى الوطن
انـــــور ابــــو غيـــداء
*********
دعوة غير معلنة
الخميس المقبل
جامعة الخرطوم
الميدان الشرقى
وردى + ابو عركى
احتفالا بفوز التحالف بالاتحاد
تسلمو
|
Post: #16
Title: Re: من الداخل ...........ثقافة .......سياسة ...واشياء اخرى
Author: DEEK_ALJIN
Date: 08-10-2003, 09:40 AM
Parent: #15
احلامز ... تحياتى
كجراى فات ؟؟؟ له الرحمه والغفران بقدرما اسعدنا بشعره
عركى + وردىمره واحده ... دى ليلة القدر
هنيالكم
ديكو
|
Post: #17
Title: Re: من الداخل ...........ثقافة .......سياسة ...واشياء اخرى
Author: rummana
Date: 08-10-2003, 11:25 AM
Parent: #16
Quote: من صحابك ومن قرايبك
يا حبيبى بغير عليك
وكل من قال يا حبيبى
افتكرته يشير اليك
واى عاشق لو تغنى
قلت لازم شاف عينيك |
دريمز العزيزة
الواحد لما يسمع بكلمة غيرة بتجيه صورة قطة شرسة.. وخربشة..او أي شي فيه قدر ولو بسيط من القوة والعنف.. لكن بالله شوفي تصوير الغيرة هنا مضافا اليها اللحن..(كيف يعني غيرة رقيقة وحنونة كدا) .. الناس ديل بجيبوا الكلام الرقيق ده من وين.. ربنا يرحم كجراي ويغفر له ويسكنه فسيح الجنان
|
|