يحلو أكل السمك ...........مع حرف الراء

أعزائى محبى اكل السمك


هل تعلمون ان افضل الشهور التى يحلو فيها اكل السمك
هى الشهور التى يكون حرف الراء ضمن حروفها

دورنقاس

نحن هسع في شهر

يوريو

صاح؟؟؟

قرجه الظريف

صاااااااح بس فى زمننا نحنا كانت بحرف الياء
بسى فى الزمن الزفر دا بقت بكل الحروف
حتى الحروف المعلولة والمجنونة
احذر يونيو

يازول هوى

السمك ده حلو السنة كلها
وفى الوجبات كلها

ما تقول لى شهر ولا غيره

بس المهم يكون السمك موجود

ٍسلام مربع

والله عايزه اقول كلام في السمك

لكن خايفه منك ياقرشو
عشان كده
ساكتفي
بالقول
السمك اذا (اكل صيرا حلو شديد
واذا احضر منه الهامور او الناجل
وشويناه على الجمر
حاجة ماتخلص
لكن لا تقنعوني
ان الجمبري يصلح للاكل الادمي
لا شويا
ولا حتى محمرا
لاني قرات ان الجمبري بالذات
دونا عن اسماك البحر
يتغذي على روث
مثل مثل الخنزير
والعايز يغالط يمشي يسال جمعية الخضر
والشواطئ

سلام واحترام أهل الدار
شمينه ريحه السمك جينا جارين

وزي ما قال حبيبنا قرشو السمك يصلح في كل الاوقات والازمان

وطبعاً الوالد برضو مدمن سمك بصوره خياليه وعشان يضمن السمك كل يوم في البيت اشتري مركب لصيد الأسماك .. لجماعة من الصيادين علي أن يمدونا بحصتنا اليوميه من السمك
فاصبح من المستحيل ان يخلو البيت من السمك .. ويا سلام علي السمك وروعتو

وياشيري يا بنت ام شيري
الليله انتي قاصداني عدييييييل كدا

يعني ما قريتي البروفايل تبعي وشفتي انو اهم وجبه عندي الجمبري .. والله مدمن جمبري عديييل ومابرضي فيهو زي ملاح الباميه الشنفتيهو لينا بهناك داك

لكم الود جميعا

قرشـــو


انا يادوب عرفت اسمك جا من وين
وكل الشهور عندك قرش
بس اوعاك تقرب من السمك فى يونيو يوليو اغسطس
العطش فظيييييع مع الكهرباء القاطعه دى
اهو انا وريتك وانت اقرش ذى ماعايز
محل ما يسرى يمرى

دورنقاس

اها وكتين جبت سيرة السمك اقعد لي النكلمك
انا والسمك ده حكايتنا عجيبه تتخيل كان عايم
في المويه ياغزلني ليك وطبعاً انا بموت فيه
تعرف مرة مشيت ليك بلة في ابروف بالله عيني وقعت
ليك في البلطي والعجل محمر تقول قايم من حفرة
دخان عزلت بلطاية كاربة وعجلاي لزوم الحبس لفيتهم
في الجريدة وغشيت ليك بتاع الخضار شلت منو ليمون وشطة
خضراء ام قرون وشطه حمراء وجيت البيت ضربتهم مع فصين
توم بالخلاط وجبت ليك صنية واتحكرت قدام المكيف
حرم لمن صحيت من النوم لاعارفو مغرب ولا فجر لكن
لقيت ليك الهيكل العظمي للسمكتين تقول من زمن
الجاهلية الاولي مغسلات بي أومو رايك شنو

ود الشيخ

يا جماعه سوال بدون تحيز
ايهما افضل اسماك البحار ام اسماك الانهار

غايتو شايف بكري بحمر لينا

بدون تحيز لكن سمك البحار اطعم
وخاصه الهامور والناجل والشعور...الخ

العزيزة شيرى


قبل اى كلام قومى لمى ناس البيت كلهم واركبوا عربيتكم الماخمج وبعد العشاء اركبوا الخط السريع بطريق المدينة واول استراحة سمك بعد المطار وقفوا واقعدوا القعدة البتشرح النفس حوليكم الزهور والمناظر الخلابة واطلبى جمبرى .. جمبرى سيوبر .. بعدين تعالى قولى لى بياكل شنو..
انا خايفك تتخصصى جمبرى ثانى وتفكرى فى الكمونية كمان


العزيز دور نقاس

ياخوى السمك ده لامن نلقاه بننسى الصيف والناس وننسى ما يأتى وراءه من متاعب لانه الواحد بينى وبينك برخم وهااااااااك يا نومة ..

حبيبنا هوب ليس

والله الواحد لو عارف بيتكم يجاوركم عدييييل كده

ود الشيخ

حرام عليك ياخى والله ضحكتنى ضحك اصلو ما معقول

بصراحة انت زول حريف سمك لكن زى الشايفك نسيت البصل الما لعب والمقطع مثلثات وليس حلقات زى ما بتعمل شيرى لما تلقى الحلقة الاخيرة حرقت..

هنيئا لكل محبى السمك المحمر والمشوى على الجمر (مش جمر الشوق) والمعمول صينية بالفرن وحتى الروسين المعمولة شوربة .. آه منك يا قرقور..

نصيحة لاهل جدة
احلى سمك فى بنى مالك فى مطعم الاخ عباس
هذه ليست دعاية تجارية

حبيبنا قرشو

هاك الوصفه دي جربه ودينا رأيك

جيب سمك بلطي واعمل كلو شوربه (سليقه) سمك .. وبعد ما تجهز صفي السمك في صحن والشوربه في آخر ورشها علي كسره وخلي صحن السمك بعيييييد واعصر عليهو ليمون وحضر الشطه الخضراء

والله حاجه مباااااالغه
جرب وادينا رأيك

الحبيب جمال

جوعتنى ياخى والله

تعرف انا فى جدة الشركة بتاعتنا عاملة مزرعة اسماك مرة اشتريت منهم بلطى وانا امنى النفس ببلطى يفوق بلطى السكى ولكن ما ان جاء مندوب المزرعة يحمل السمك حتى احبطت تماما فهو اسود اللون وحجمه زى الشلبى كمان المهم قلنا اللون ما مشكلة مشينا البيت لقيناه كله شوك .. ياخى ده بلطى شنو ده ..
للاسف هنا لا يوجد بلطى حقيقى زى بتاع النيل ..

بالمناسبة على ذكر الهامور والناجل فلا شك انك خبير ولكن صاحبنا بتاع السمك بقول انه الذ سمك بحرى هو الحريد


وصفتك يا رائع جوعتنى عديل والله واكان اتصورها امامى

تسلم لينا

ٍسلام مربع


العمده قرشو

اتخيل سويناها كتير جدا
اذ ان اخي المفعوص يحب جدا اكل السمك
انا احب الهامور مقلي
والشعور مشوي

لكن الجمبري دا
ابعدني منو
لن يحصل توافق بيناتنا

يا هوبليس
معليش يعني بس العملتو دا يعتبر عك غذائي
ما سمعتك ماما نور على تلفزيون الجديد
في برنامجها صحتك

انت وقرشو
جيعاااانين عديل كده
المسالة مامسالة سمك
لو جابو ليكم ملاح ام رقيقة برضو
ح تخشوا فيهو
صاااااح ؟؟

انا نفسي جيعانه بس نفسي اشرب فنجان قهوة مظبوطه تقيله
وبعدها نفسي في ملاح روووووب

اين امي
يا امي الحبيبه

عايزين ملاح رووب
صمت صمت

حبيبنا قرشو
انت عارف لو عاوز بلطي نيلي ويكون زي حقنا عليك بالتوجه لسوق السمك وتلاقي البنغالي جنب الحوض اول دخلتك

وياشيري المحطه القاله ليك العمده دي ما تفوتيها وخليها في بالك وجربي تمشي تاكلي السمك فيها واسمها علي ما اظن بن مهري

ويا حبزا لو جربتي فيها الجمبري او الاستاكوزه وادينا رأيك بعد ما تدشي في هترشه جمبريه كاااااربه

وماما نور أكان عندها خبر بالخلطه دي صدقيني كان طبختها في تلفزيون الجديد ورصت الهترشه دي ابعااااااد

اختنا شيرى

شكرى على المداخلة الطاعمه دى
بس الجمبرى لا يعلى عليه... جربيهو سوف تداومى


اخونا هوب ليس
ياخى ورينا قاعد تجى حلقة السمك متين
باين عليك حريف سمك


اخونا ودالشيخ
والله السويتو فى السمكتين بدخلك دوغرى نادى السوكى


اخونا ايهاب
السمك حلو من البحر إلى النهر
والعجب بتاع الترع

تحيه سمكمك للجيع



أختلف مع اهلنا فى شرق السودان فى قولهم فى سمك الحريد
البياكل الهريد بيصبح مريض

والله يا جماعة شيري حيرتني لا ملاح البامية
والاسود ولا اللوبستر والقمبري والكراب
ياشيري عقدتينا بتحبي شنو انت


ود الشيخ

سلام مربع

ياشباب والله جيت انصحكم عن الجمبري

ارجعوا اقروا عنه
وحات نظري كلام موثق
انو بعض القبائل المتحضرة التي تسكن حاضرة البحر
زي مابقولو
بتقول عنه خنزير البحر
لانه يقتات على روث البحر

عشان كده نصيحه ليكم
يعني البحر دا خلصت خيراته كلها
وبقت بس على الشيء الشين دا
البشبه ود ام بعلو
؟

يا ود الشيخ
انا بحب ملاح الخدرا
بالرز المصري المفلفل
وملاح القرع
بالكسره
ولا تسالني عن كل انواع الباميه
سواء ان كانت مفروكه
او مصقوعة
او مشلولة
او بايته
فهي على قائمة محظوراتي
وبحب الشاي باللبن خاصة لو كان مع سندويتش شاورما دجاج وليس احمر
جربت الاسكندر بالدجاج
ايه رايك فيها يا عمده قرشو
خاصة لو من شاورما شاكر
في شارع الستين

شيري

قرع يا شيري قرع؟ لاحول ولا قوة واوع يكون
كوسه وبامبي قالت قرع قال متأكده قرع يا شيري


التركين والقراصة كيف مع شطة حمراء


ود الشيخ

سلام مربع

ود الشيخ

مالو القرع ؟
عيبو لي ؟

موش احلى من باميتك دي
الخمجانه الغاطسه كلها
في الطين دي

شيري

العكس هو الصحيح الباميه بتمشى لفوق والقرع
والكوسة على سطح الارض والبامبي دخل الارض والله
اعزمك بامية مفروكه بي سمنه بلديه تقطعي صباعك
وراها الركه على الطباخ مش ملوخية بالرز مصريه
إنتي ولا فيك عرق مع احترامي انحنا فينا عرق اتراك


ود الشيخ

حبة فوق

يناير
فبراير
مارس
ابريل
ماير
يونيور
يوليور
اغرسطس
سبتمبر
اكتوبر
نوفمبر
ديسيمبر

كدا حلال اكلو فى السنة كلها
كل سنة ودور نقاس والصحبة الميمونة بالف خير

اختنا د .بيان

مشكورة على الرخصة الرائية
تسلمى من كل بلاء