ما هو شعورك عند عدم الرد على موضوعك؟

تحية ود

لاشك أن أحدنا عندما يطرح موضوعاً ويجد مشاركة الأعضاء
وتجاوبهم معه بالرد عليه، فإن ذلك يسعده ويدفعه إلى المزيد
ألا توافقوني على ذلك ؟؟؟
سؤالي إذا طرحت موضوعاً او مشاركة 000
ولم تجد من يرد عليها فماهو شعورك ؟
وإذا كان هذا الأمر حالة عامة وظاهرة في منتدى ما فما رأيك فيه ؟؟
اما رأيي أنا فأقول :
بالنسبة لعدم وجود رد على موضوعي ربما يكون لأسباب عديده ومهما كانت تلك الأسباب فيجب علي الا أيأس من ذلك بل يحتم علي هذا الأمر ان اعاود الكرة مرات ومرات 0
لذا لا يجب علي ان أسارع واتهم البورد وأهله بالتقصير وأغادر البورد فالبورد لا يقوم الا بمشاركات الأعضاء فلو قام كل واحد منا بالمغادره من البورد حال عدم الرد على موضوعه لأقفل المنبر

اقول فلربما يكون التقصير مني انا كاتب الموضوع ربما لم اتمكن من إيصال ما أريده إلى القراء بطريقة صحيحة أو لربما أطلت بالموضوع ونحن كما تعرفون شعب لا نحب القراءة أو أو أو 00000 المهم ان لا يكون حكمي على البورد بصورة عصبية ومتسرعة وذلك لعدم قراءتهم للموضوع فالشخص لابد ان يكون منصفا سواء له ام عليه 0

وأقول لكاتب الموضوع في المنبر ( لا تيأس وحاول مرة أخرى واقبل النصيحة من الآخرين وستنجح حتما ستنجح )

تحياتي للجميع

انا اتعودتى والله

أخي إيمو
كتيير والله بكتب ومافي زول بيرد علي.. وعمري ما فكرت في المغادرة.. بل بالعكس انا متابعة جيدة - زي ما بيقولو- لكل ما يكتب في البورد وبتعجبني كتير من المداخلات وبحاول اساهم فيها.. لذلك الموضوع ابدا لما موضوعاتي لا يرد عيها انو في مشكلة.. لكن بقول في نفسي المشكلة ممكن تكون انو الناس ما عايزة تدخل في شئ تخافه او تخاف الكتابة فيهو.. وسأظل اكتب ما استطعت ولن يجبرني شئ على المغادرة

يا كرملا
كتير بتين يادوب دا الاطناشر يعني قبل دا كان عندك حداشر بوست فيهم واحد حق الترجيب وستة ولا سبعة رودود علي المرحبين يعني فاضل ثلاثة كانت مشاركات في بوستات تانية
بس اقنعيني بكتير دي
لوووووووووووووووووووووول

معليش يا ايمو
انا عندي نكتة محرقاني سمعتها الليلة من صديق البورد كراكة
واحد رباطابي شايل ديك وداهو السوق يبيعوا لقاهو واحد قال ليهو الديك دا للبيع قال ليهو لا عاوز اغير نغماتو

معليش للخروج عن النص
بالنسبة لعدم الرد علي الموضوع والله الانسان يشعر بالمرارة والغبن وتحت تحت بالحسد لناس مواضيعهم غير مهمة وجادة ووامورها ماشة تمام والانسان بيعتقد انه نزل موضوع مهم في نظره ولكن مصيره التجاهل شخصيا الحمد لله شكلاتي امورها ماشة ما بطال يعني مافي اي احاسيس وشعور

أساسي الأساسي
ياسيدي النكتة حلوة
وأهلنا قالوا: الدين بكفوه بمدو
سمعت عن الود الرسلو أبوه عشان يشتري
خروف الضحية
الود جاب الخروف . ابوه عاين ليهو
الولد بسرعة قال : أنا قلت لو ما كويس نرجعو
أبوه قال ليه : هو أنا عاوز إقريهو طب؟

يا سيدي أنت دائما سوقك ماشي
لكن البقت في الصحاف مو هينا
سيد الشاشة اليوم أصبح سيد المخبأ

شعور محبط جدا والادهى والامر انك تقوم تنزل موضوع ومنتظر الناس يجوا ياخدوا ويدو معاك تجي تلقاه في الصفحة العاشرة وما قروهو الا 15 او 20 واحد بس في احسن الظروف، يعني تنزل ليك بوست الا تربطه بي حبل عشان مايزوق منك

لكن احسن حل تتخن جلدك وتمسح وشك بي موية حلو مر وتواصل مسيرتك

وزي ماقال الشاعر في السيد الصادق: طال ما الزول ده بشوت اكيد واحدة بتلبس

إنسانة
لأنك إنسانة وكفى

كراميلاّ
دائماً إسمك بذكرني
بنكهة الصبر الممزوجة بالفرح
عزيزتي والله نحن هنا أحياناً
بنكتب عشان ننشط ذاكرتنا فقط
وأحيانا بندور على لمة الأحباب
لأننا يومياً نعاني ونعاني من المشاكل
والمواقف والتصرفات ونحن في الغربة
ما لاقيين من يرفع عنا
إلا عند لجوأنا لهذه الدار العامرة بكم

ياسر حنا
أحيانا تربط بوستك بحبل وما يوقف
لكن حبل المهلة بربط وبفضل
سمح الصبر

سلام

قبل الشعور باي شيء تجاه الاخرين ... هل انا مقتنع بالطرح ... اذا كان الرد بالايجاد وحتما اذن ليس بالضرورة الردود انما القراء .... لانني اريد ان اوصل فكرة او رسالة ما ... لذا يكفيني اي عدد من الزوار

ودمت

اخى العزيز ايمو

المشكله ليست في الردود لانو انت بتكتب الموضوع كمشاركة منك في هذا المنتدى الكبير

لكن اخي المشكلة بتكمن اذا لم تجد احد من البورداب زار هذا البوست او عدد الزيارات
لايتجاوز اصابع اليد الواحدة فهذه هى المشكلة الكبيرة فلازم تراجع نفسك وتشوف مشاركاتك

فى هذا البورد هل كانت اجابية ام لا ؟

وهل الموضوع يستحق المطالعة اولا للمعرفة ثم للرد علية اذا امكن

وانا ارى انه اذا كتبته موضوع وكانت عدد الزيارات ليه كثيرة فهذا بمثابة نجاح لى


بغض النظر اذا فى حد رد على الموضوع ولا لا


مع تحياتي

العزيز بوش
كنت قد سألت كثيراً عن بوش
هل أنت تعمل الآن بالعليا في مركز حاسوب
يتبع لعبد الرحمن الرويشد؟
هل تعرف حامد محمد حامد الذي يعمل بجامعة
الملك سعود؟
وعن الموضوع إذا كان عدد الزوار لا يتجاوز نسبة 20% يعني
الموضوع غير مؤهل ديمقراطياً للبقاء في القمة

ودالعباسية
لو كان العنوان جزاب زي الخرطوم التي لا ينقصها إلاّ البارات
لتوجهة الأنظار نحوها كما هو رد البشير على الصادق المهدي
حبيبي هنا في البورد من لا يزور الاّ المواضيع العاطفية
وهناك محبي المواضيع الجادة
يعني كل الألوان لها من يعشقها
ولكن اللون الأصفر في الغالب جزاب

سلام مربع

مفروض الواحد يكون مقتنع بحاجة واحدة
انو مامفروض انك تعمل كل بوست ويعجب كل الناس
لانو حتى الكتاب والمؤلفين
اللي بالحجم العائلي على قولة ام مازن
موش كل حاجة بكتبوهو بتعجب نفس العدد الذي اعجب
بالنص السابق
كل الكتابات زي ما الانسان بتخضع للامزجة والمود
اللحظي
وجاجات كتيرة يطول شرحها هنا
يعني كتير جدا بكون الواحده بتنزل بوست وما متوقعه انو يلقى اي صدى
وفجأة تلقى المشاكرات تفوق كل توقعاتك ومرات كثيرة جدا
بتكون متاكده انو موضوعك كويس وبعد دا
بتلقى مافيش حد علق عليهو
عموما الخطأ دائما في الكاتب نفسه
لانه في النهاية انسان زي ماقلت والانسان
بتاثر سلبا وايجابا بكل
اللحظات التي تمر عليه
سواء ان كانت لحظات توتر او انسداد شرياني
او حتى فرح تنفتح له كل السدود
لذلك مامفروض الواحد يزعل عشان برضو الناس بتدخل وهي بامزجة متخلفة
ممكن يعجبها موضوعك اليوم وممكن بكره لو دخل ب (مود) مختلف
لن يبص حتى في خلقتك اقصد موضوعك
مرات بكون الوقت له تاثير كبير في الاقبال
ومرات كثيرة العنوان
ومرات الكتيرة مقدمه كلامك لها اثر ايضا
مرات برضو طريقة عرضك
واعتقد ان غالبية الاعضاء هنا ما بدخلوا عشان الاسم فقط
انما العنوان بكون له اثر كبير جدا
وبعد ان دخل الناس لقراءة موضوع ما
بكون المحك هنا .. طريقة سردك
او طريقة عرض الموضوع
والمفردة
وحاجات كتيرة

شلكي كده قلبتها ليكم هترشه..وصدعت بيكم
اعفوا لي ياشباب

الأخ إيمو : لك التحايا و كل التقدير

موضوع مهم للغاية.
أنا أوافق الأخت شيري في رأيها.
و أضيف. هناك كتاب و أدباء عالميون ، لم يفطن القراء لإبداعهم إلا بعد أن تقاعدوا عن الكتابة أو بعضهم توفاه الله. فالإبداع شيء كالبناء الشامخ ، ربما تراه الآن جميلا ، و يراه البعض قبيحا ، و لكن بعد أن يصير في ذمة التاريخ ، يأتي من ينبشه ، و يزيل صدأ نسيانه ، فإذا به ذهب حقيقي و معدن جميل.

لك كل المودة.

الشعور بالاحباط أكيد
ويمكن أن يتوقف أو يقلل مشاركاته
خاصة المشاركين الجدد
المشارك القديم بكون اتعود على قول انسانة
لكن برضو الاحساس بيختلف حسب موضوع البوست
أحيانا البوست يكون الغرض منه نقل معلومة وليس طرح موضوع للنقاش
عدم المشاركة في بوست من هذا النوع لا يجلب احساسا بالاحباط
وعلى فكرة في نقطة مهمة تتعلق بعدم التعليق على بعض البوستات
بعض الناس تتهيب الرد على المشارك لأسباب مختلفة ، امكن المشارك يكون ميال للشجار والاختلاف وامكن لأنه النوع (اللي بفحم) يعني الواحد يحس مافي كلام يتقال تاني معاه من حسن تقديمه للموضوع
النوعين أنا (بمارس عدم الرد عليهم) ويمكن الموضوع نفسه قال كل المطلوب سواء كان منقول أو غير منقول
وفي النهاية بتفق معاك انه الانسان يجب أن يواصل ما يطرح طالما هو مؤمن بما يفعل
تحياتي لمن شارك في هذا البوست

شيري
ابوجهينة
والخالة رمانة
لكم تحياتي وودي
قطعاً نحن هنا نبحث عن الكلام اللذيذ
والموضوعات الممتعة
لأن الهدف من قراءة الموضوع هو أن تتحقق
المتعة والبهجة لدينا وهذه المتعة هي التي
تجعلنا لا نتوقف عن الرد أو القراءة
ومنا من يأتي بموضوع للإفادة
ومنا من يأتي بموضوع لأخذ الرأي
ومنا من يكتب هوايةً
وفي كل الأحوال لو حطّ جواركم جار جديد
يجب إكرامه بزيارة
وعليه وجب علينا حق الجيرة

هربا من مثل هذا الشعور فانني افضَل ان لا اكتب موضوعا الا في مستوي عال من الاهمية او افضَل المشاركة في البوستات الاخري