Post: #1
Title: الخميس بابوظبي... يوم مفتوح وحفل غنائي ساهر
Author: zola123
Date: 06-10-2003, 11:40 PM
Parent: #0
الاعزاء البورداب
تقيم جمعية المرأة السودانية بأبوظبي
دولة الامارات العربية المتحدة
يوم الخميس الموافق 12 يونيو2003
يوم اسري مفتوح
يبدأ في الساعة الخامسة ببرنامج للأطفال
مسابقات, اسئلة ثقافية وجوائز
الحفل الغنائي الساهر يدأ في الساعة 9 مساء
مع نخبة من نجوم الغناء ومفاجآت أخرى
ذالك بمقر النادي الاجتماعي السوداني
يسعدنا ويشرفنا حضوركم وأسركم
|
Post: #2
Title: Re: الخميس بابوظبي... يوم مفتوح وحفل غنائي ساهر
Author: HOPELESS
Date: 06-10-2003, 11:44 PM
Parent: #1
دكتوره زولا سلام
ياريت تتحفينا بالصور والوصف الدقيق لليوم الجميل دا وربنا ينجح مقاصدكم
-
|
Post: #3
Title: Re: الخميس بابوظبي... يوم مفتوح وحفل غنائي ساهر
Author: Elmosley
Date: 06-10-2003, 11:45 PM
Parent: #1
يازولا نركب الطياره نجي عليكم
تمنياتنا لكم بيوم جميل
|
Post: #4
Title: Re: الخميس بابوظبي... يوم مفتوح وحفل غنائي ساهر
Author: zola123
Date: 06-11-2003, 00:06 AM
Parent: #1
هوبليس
شكرا على المشاركة والدعوات الجميلة
واوعدكم بالصور
عمنا الموصلي
يا سلااااام
انتا بس تجينا ويبقى لقائك حفلنا
تحياتي
زولة123
|
Post: #5
Title: Re: الخميس بابوظبي... يوم مفتوح وحفل غنائي ساهر
Author: Sakotaweya
Date: 06-11-2003, 03:04 AM
Parent: #1
سلام يا زوله123 .. و الله مع انو أنا من المقيمين في أبوظبي و من المتابعين لأخبار النادي السوداني .. لكن الفتره الماضيه انقطعت لظرف الأمتحانات .. لكن و الله ده أجمل خبر حيث نحن من زمان نفسنا أنو الجمعيه تقوم بي حاجه فعاله زي دي .. و خاصه في جانب الطفوله .. و أكيد حيكون ليهو أثر في أحياء الروح الأجتماعيه .. و نحن أول ناس انشاالله حنشارك
بالمناسبه دي أول بوست لي .. اتمنى أن تقبلوني عضوه جديده بينكم .. و أحب أقول ليكم دمتم ذخرا للوطن .. مجهودكم في بناء الوطن الصغير متسع الأتجاهات حاجه ما هينه .. و بأذن الله حيكون ليهو تأثير فعال في بناء مجتمع راقي يعتمد على أسس التحاور المنحضر و الأيجابي .. ربنا يقدرني أساهم ولو بحاجه ضئيله لكي أرد ما على عنفي من جميل هذا الوطن .. ما حأطول عليكم عشان ما تقولوا عضوه بـــــرايه  ..
اللـــــــــه يديكم العافيه
|
Post: #6
Title: Re: الخميس بابوظبي... يوم مفتوح وحفل غنائي ساهر
Author: بدرالدين شنا
Date: 06-11-2003, 06:41 AM
Parent: #1
بسم الله الرحمن الرحيم
المحترمة زولا123
سلام وإكرام
من الصعب جداً بالنسبة لي أنا حضور الحفل لأني بعيد ولكن قلت على الأقل أسجل حضور في بوستك وصدقيني من زمان كايس لي فرصة زي دي .. أتمنى ليكم حفل رائع روعة ناس الأمارات
|
Post: #7
Title: Re: الخميس بابوظبي... يوم مفتوح وحفل غنائي ساهر
Author: سودانوبس
Date: 06-11-2003, 10:18 AM
Parent: #1
يا زولا...هل في واحد من الفنانين الكبار سوف يشارك فيهو.... والله يا هن البرينسات ديل...
|
Post: #8
Title: Re: الخميس بابوظبي... يوم مفتوح وحفل غنائي ساهر
Author: محمد الواثق
Date: 06-11-2003, 05:28 PM
Parent: #1
يا زولا
سلام وربنا يتمم كل المقاصد
الحفل ده طبعاً في اطار تحويل الناد السوداني الى نادي اسري عائلي
والله نحن مع جمعية المرأة واضعين استراتيجية وبرنامج عمل متكامل لتحقيق ذلك الهدف
وربنا يحقق المقصود
وبعدين يا سودانبس الحكاية ما حكاية فنان كبير المسألة مسألة تلاقي وخلق لحظات رائعة والموضوع عندو غرض يعني ما صفقة ورقيص
ودايرين حضوركم ومشاركتكم الفاعلة
الى اللقاء
|
Post: #9
Title: Re: الخميس بابوظبي... يوم مفتوح وحفل غنائي ساهر
Author: zola123
Date: 06-11-2003, 05:37 PM
Parent: #1
Sakotaweya
شكرا ليكي عزيزتي على تشجيعك
ويشرفني يكون اول بوستاتك ردا علي
منتظرنك عضوة فاعلة معنا في الجمعية باذن الله
بدر الدين شنا
شكرا ليك وابوظبي تنور
انت بس قول جاي
سودان وبس
كنت دايرة اسألك برينسات يعني شنو لاكن اظن فهمتها من رد الاخ محمد الواثق
منتظرنك معاناومع المراة السودانية
محمد الواثق
كتر خيرك وجهود النادي السوداني محل تقدير منا دائما
تحياتي
زولة123
|
Post: #10
Title: Re: الخميس بابوظبي... يوم مفتوح وحفل غنائي ساهر
Author: lana mahdi
Date: 06-11-2003, 06:24 PM
Parent: #1
والله نحنا اتغظنا ......عاملنو لى ناس ابو ظبى بس ؟؟؟برضو جاييييييين
|
Post: #11
Title: Re: الخميس بابوظبي... يوم مفتوح وحفل غنائي ساهر
Author: بنت الاحفاد 2001
Date: 06-11-2003, 06:41 PM
Parent: #1
اهلين يا زولة
اخبارك شنو
سلامي لي كل ناس البورد
وبرنامج موفق انشاء الله
|
Post: #12
Title: Re: الخميس بابوظبي... يوم مفتوح وحفل غنائي ساهر
Author: sari_alail
Date: 06-11-2003, 06:45 PM
Parent: #1
يا ريت لو نكون معاكم
بس انا هنا في العين يعني قريب
بس اذا الوقت سمح حاجي واكتل الحفلة
|
Post: #13
Title: Re: الخميس بابوظبي... يوم مفتوح وحفل غنائي ساهر
Author: KOSTA
Date: 06-11-2003, 07:36 PM
Parent: #1
زولا123
مبروك الحفلة مقدمآ
انقلوها لينا على الهواء مباشرة
بعدين يا دكتوره ما بتعرفى البرينسات ؟؟؟؟
و يا ما فى الحبس من " برينسات " ؟؟؟؟
|
Post: #14
Title: Re: الخميس بابوظبي... يوم مفتوح وحفل غنائي ساهر
Author: كبسيبة
Date: 06-11-2003, 07:37 PM
Parent: #1
لو فى جكس حااااااار
بنركب الطيارة ونجى
بس مايكون الفنان زى طيارة الصباح
يقدنا ساكت
|
Post: #15
Title: Re: الخميس بابوظبي... يوم مفتوح وحفل غنائي ساهر
Author: zola123
Date: 06-11-2003, 09:10 PM
Parent: #1
لانا ازيك
انتي وين بالتحديد؟
وبعدين منو القال لناس ابوظبي بس, الدعوة مفتوحة ومرحب بيكي
بنت الاحفااااااااااد الحبيبة
ويييينك انتي؟ طولنا ما شفناكي في البورد
طبعا في بت احفاد تانية جات واكيد الناس ملخبطين
دي فردتنا بت الاحفاد حقت الشارقة مش يو كي
شكرا ليكي
ساري الليل تعال طوالي وجيب موديك
كوستا شكرا ليك
لاكن برضو ما شرحتها لي
مشتقة من شنو يعني؟
كبسيبة
يا زول قلتا ليك منظمنها اها اكتر كمن كدة شنو؟
بعدين اطمنك جمعيتنا ما نسوان بس فيها فتيات نشيطات لهم كل التحية على مجهوداتهم
|
Post: #16
Title: Re: الخميس بابوظبي... يوم مفتوح وحفل غنائي ساهر
Author: KOSTA
Date: 06-11-2003, 09:56 PM
Parent: #1
زولا 123
يا بتى البرنسة كلمة من العامية السودانية
و تعنى " البوكس " او البك آب
و هو مصطلح اطلقه الفنان المرحوم عبدالعزيز محمد داؤد على المطربين الشباب الذين امتلات بهم الساحة فى تلك الايام الزواهى
و كانت " البرينسات " تستعمل كوسيلة مواصلات بالعاصمة .. و كانت تنساب بسرعة و هى تنقل حمولتها من البشر مثل الرقشات الآن و لذلك جاء تشبيه المرحوم ابو داؤد للمطربين الشباب بالبرينسات لملئهم الساحة و لسرعة ادائهم للاغنيات و لمزاحمتهم للمطربين الكبار مثلما تزاحم البرينسات البصات الكبيرة فى الشوارع
بس ما تقولى لى ابو داؤد ده هو منو ؟؟؟
|
Post: #17
Title: Re: الخميس بابوظبي... يوم مفتوح وحفل غنائي ساهر
Author: Mayada
Date: 06-11-2003, 10:15 PM
Parent: #1
والله انتو يا ناس الامارت غيازيييييين خلاص...كل مرة حفل ساهر حفل ساهر ماتراعو ظروفنا شوية يعني الحقارة ليكم شنو
|
Post: #18
Title: Re: الخميس بابوظبي... يوم مفتوح وحفل غنائي ساهر
Author: zola123
Date: 06-12-2003, 12:34 PM
Parent: #1
كوستا
الله يفتح علييك
عارفة ابو داوود
لاكن منو القال مافي فنانين كبار حيحضروا؟
ميادة
سلامتك من الغيظ
والمرة الجاية عندكم
|
Post: #19
Title: Re: الخميس بابوظبي... يوم مفتوح وحفل غنائي ساهر
Author: سودانوبس
Date: 06-12-2003, 02:07 PM
Parent: #1
صاح صاح.آىي حا أجي واشارك وأغني...
...........................
تعرفي يا زولتي زولة يبدو ثقافة عصرنا إنطوت شوية...
................................
واليكي النكتة بتاعة البرينسات التي أطلقها عبد العزيز محمد داود
طبعاً زمن ناس عبد العزيز محمد دواد وازدهاره فى أواسط السبعينات..
زمان فى العاصمة المواصلات..يا بص ابورجيلة الأصفر..أو تاكسي والتاكسي.زيا طلب يا طراحة...طرحة يعني..ما طرحة بت يا زولا..ركوب التاكسي مجموعة عندنا في السودان بسموهو طرحة... والتكاسة.. وليس الجكاسة بتشديد الكاف يا زولا.. كان بيهظروا مع بعض...زيقول لى زميلو.زانا ما طارح الليلة مشاوير ساي... وطارح هنا من الطرحة يا زولة..طرحة التكسي وليس طرحة البنت.. وطارح هنا ما معناها زي العربي الفصيح.زالذي يتبادر الي ذهنك.زبذلك المعني الذي لا نود ذكره هنا... طارح باللهجة السودانية معناهو ما ناوي يشيل ركاب نفرات وكدة............................
نرجع لى نكتتنا استاذتي زولة...
فى بداية اواسط السبعينات...عرب الجزيرة سابو لقيط القطن ..وكراتين فرش الأسنان والمقصات والهنابيب البي يبيعوها فى السوق الشعبي الخرطوم وهاجروا الي السعودية..... عربي هنا يا استاذتي زولة موش لمجرد عربي... وإنما هو أعرابي... أي زول أشو زول بادية... عنقالي...زول أغبش شديد..دي معني عربي المقصودة... يعني يقول ليك الزول دا عربي جعليين.أو عربي شايقية.. فهمتي يا زولتي....... المهم نرجع لى نكتتنا ونفهمك حكاية البرينسات الى قلتي ما فاهماها...
تعرفي الجماعة ديل كل واحد اغترب جاب برينسة...يعني عربية بوكس مكشوفة من وراء.... وراح السوق الشعبي بتاع أم درمان عمل ليها صندوق من وراء...كان الطرحة بيها من أحياء أم درمان المختلفة الي المحطة الوسطي أم درمان كان الطرحة بي شلن... ومن الوسطي أم درمان الي ميدان الأمم المتحدة الخرطوم كذلك بي شلن.... المهم ناس الجزيرة دي بقو يقلدوا بعضن أي واحد يغترب سنة أو سنتين فى السعودية ويجيب معاهو بوكس ويجي.. ودي فلانة جاب بوكس برينسة انا لازم اجيب وامتلآت العاصمة بالبرينسات فى اي ملف وسرقت البرينسات سوق الركاب على ناس التاكسي... لنو رخاص........نرجع لى نكتتنا يا زولتي....
الناس سمت البكاسي دي برينسات....... نرجع لى نكتتنا يازولتي.....كان عبد العزيز محمد داوود ظاهر ظهور شديد...فجأة الفنانيين الصغار الجديدين البي يقلدوا غناء المراحيم...ملو الساحة وإجارهم وعدادهم بسيط... وفى اي وقت واي لحظة موجودين وشغلتهم وعدة غناهم معاهم ما محتاجين يجو دار الفنانين.......نرجع لى نكتتنا يا زولتي...
المهم عبد العزيز محمد داوود سألوه ليه يا ابو داوود ما ظاهر... فى الحفلات.....قال نظهر بي وين مع البرينسات..ديل............. فهمتي النكتة يا زولة وفهمتي معني البرينسات..... يبدو أن ثقافة عصرنا مضت والله شنو يا استاذة زولة..... اقول لك واحدة تانية شبيه بي دي...أنتي قلتي مافهمتي كلمة برينسات دي شنو.....
واحد صاحبنا بس اكبر مننا شوية... مرة جاط فى بنتو وقال ليها يا بت أنتي قافلة فنية ..والله شنو...فنية بضم الفاء.. وتسكين النون..وفتح الياء...... البت بت الجيل الجديد دا ما فهمت قافلة فونية يعني شنو... ودي زمان كانت نكتة يا زولة...تقول للزول قافل فونية..يعني مخو قفل.يعني تبلد حسو..يعني ما قدر يركز..يعني مخو اتشطب...يعني شوية مس وسلك عريان...والله برضو سلك عريان دي يمكن ما تفهميها يا زولتي... المهم يا زولة نرجع لأصل النكتة.... زمان في السودان اللواري لما ظهرت وبوابير الجاز...ماركة لستر كانت موضة..وكان عندهم شركة كبيرة..لستر وبيدفورد وهوستون..مقابل الجامع الكبير الخرطوم..فاتحة من الجهة التانية مقابل لى مكتبة الجامع الكبير الهسي دي... نرجع لى نكتتنا زولة ..زإنتي معاي..متابعاني والله أنا تعبان ساي....المهم طبعاً انتي ما مهندسة ولا ميكانيكية... طبعاً اللواري وبوابي لستر دي بي تشتغل بالجاز... والديزل مكنتو موش زى مكنة البنزين... وبالمناسبة يا زولة برضو بي مناسبة المكنة... برضو عندها ثقافة... يقول ليك الزول دا قادي مكنة... أو قادي كرتيل..ويقول ليك الزول دا بتاع مكنات.. بتاع مكنات يعني كذاب.. وقادي مكنة..يعني فكت منو.. يعني جن...عجيبة والله واللهجة السودانية غنية بي جنس مصطلحات يا زولة... المهم يا زولتي نرجع لى نكتتنا....أها بوابير الجاز ديل فى نهاية الرشح على بستن أو بستم المكنة هناك نهاية صغيرة ذات خرم صغير ترشح على البستم لتتم عملية الإشتعال ويخرج منها الجاز لتتم الدورة ويحصل ال‘حتراق والإشتعال مع كبس الهواء مع الجازولين...صولار..كيروسين.جازولين..ديزل... يا زولة باختصار الفونية دي كان قافلة مهما حاولت المكنة ما بتقوم معاك...
والله عاد انتو يا ناس الزمن دا....
مرة بت اخوي فى الغربة فتحت الباب.... واحد سأل من ابوها قال ليها ابوكي وين..زقالت ليهو بابا فى الشغل... قال ليها لما يجي سلمي عليهو... وقال لها... جزاك الله خير.... ردت عليهو قالت ليهو... الله يجازيك.....
الله يجازيك هنا معناها الله ينتقم منك... ما قلنا يا جماعة السودانيين ديل بحرم غريق ما بتصلوهو ولا بتخوجوهو..مرتهم على راجلهم..ثم يا زولة يبق نادينا فى ابوظبي مرفوع الرأس إن شاء الله...تسلموا كل الأحباب....تأكدوا تماماً أني عظيم الشوق لكم جميعاً ,اني سوداني وبس...
|
Post: #20
Title: Re: الخميس بابوظبي... يوم مفتوح وحفل غنائي ساهر
Author: brakat
Date: 06-12-2003, 06:47 PM
Parent: #1
انتا بس تجينا ويبقى لقائك حفلنا
عجبني الرد البليغ على الأستاذ الكبير الموصلي
ونتمنى لكم حفلاً بهيجاً
|
Post: #21
Title: Re: الخميس بابوظبي... يوم مفتوح وحفل غنائي ساهر
Author: zola123
Date: 06-13-2003, 02:38 PM
Parent: #1
الاخ سودان وبس
اشكرك للوقت الذي امضيته لكتابة هذا الرد
وما قصرت, لاكني فهمت المقصود بس حبيت اعرف تحديدا معني اللفظ
وشكرا مجددا على وقتك وخفة دمك
barakat
شكرا ليك
وبالفعل كان حفلا جميلا
اسعد الكثيرين وخصوصاحفل الاطفال
شارك في الحفل الساهر في المساء
الفنان معاوية حروتة
والوجه الجديد آسيا التي ادهشت الجميع
والشكر لجميع من شارك وساهم معنا في هذ الحفل
ولادارة النادي السوداني بأبوظبي لتعاونهم
قريبا انشاء الله الصور ولقطات من الحفل في موقعنا
تحياتي
زولة123
|
|