شهادة غير مطلوبة من جهة غير مهمة - شكرا أيام لها إيقاع

أنا أنا أنا أنا أنا أنا أنا أنا أنا أنا أنا أنا في الحتة دي زي داير أقول إني من متابعي سهرة أيام لها إيقاع التي تقدم ليلة الإثنين من كل اسبوع ويقدمها حسين خوجلي . تابعت حلقت هذا الأسبوع والأسبوع الماضي اللتين كان موضوعهما أسرة البنا . لا شك أن أسرة البنا موضوع مهم لما لهذه الأسرة نفسها من الأهمية في التراث السوداني ، إضافة إلى أن ضيوف الحلقة وكلهم من هذه الأسرة الكريمة لا يحوجون مقدم البرنامج لكثير عناء لتقديم الجيد الممتع لمشاهديه غير الجهد المطلوب في تنسيق وإخراج هذا الجيد وتقديمه والقدرة على نبش كل جميل ، طارف وتليد لدى الضيوف .

كان يكفيني أن أشاهد واحداُ فقط من أولئك الضيوف الضخام وليكن عصام أو اللمين أو يوسف أو الشيخ إدريس ، حتى أكون أسعد الناس بتينك الحلقتين . إن قلت يوسف فالكلام انتهى . ففي الدقائق المعدودة التي منحت له خلال الحلقتين قال من الشعر وجيد الكلام ما يكفي مؤونة سنة . تكلم نثرا وشعرا عن البطانة ، شعرائها ، الشعر الذي قيل فيها . عدّد الشعراء وتصانيفهم وتخصصاتهم وكان على استعداد لتقديم الأمثلة . أطرف ما استفدته من شعر يوسف بعد المسدارين الكبيرين عن السودان والبطانة ، مسداره عن أب قدم ، ومنه فهمت ما كان يقصد بـ أب قدم في مسدار جقلة في المربع التالي

جقلة عزيزة في معناها
الفتنة البتاخد سيدا كم جايباها
انا شفت اب قدم ما برحم اللاقاها
لي ضيفانو بيضبح وديمة دافعو جناها

على كل ، شكراً لحسين خوجلي الذي تخلى تماما في هاتين الحلقتين عن ما كان يؤخذ عليه من نرجسية ، وكان متميزا في التقاط نقاط القوة والضعف في الحلقة والإمساك الجيد بخيوطها وهو ما ظهر جليا في نهاية الحلقة الأخيرة حينما سرح الشيخ إدريس أو كاد ، في الحديث عن شكسبير والترجمة . تحية لـ أيام لها إيقاع وعشرة على عشرة .

الأخ أهل العوض
تحيات طيبات
للأسف وكالمعتاد لم اشاهد أي سهرات تلفزيونية
أظن حسين خوجلي حيكون سعيد جدا والمشاهدين محظوظين باستضافته ليك كشخص غير مهم في برنامجه المذكور..اكيد حتطرب المشاهدين بمعلوماتك عن التراث وشعر البطانة..بالذات بالذات لو عملت بعض الترجمة على الشريط.. حتكون الحكاية ما تخلص. غايتو لو حصل واستضافوك..اديني واحد برقية عشان احضر السهرة..ما تنسى تشترط عليه استضافة سنجاوي معاك
مع تحيات أخوك رمانة

يا أخ رمانة
أولا سعادتي اكتملت بمجرد ظهورك مرة تانية ولو كنا عارفين كدا كان عملناها زماان . بعدين ما اعتذرنا خلاص .. أقبلوا اعتذارنا بقى
سنجاوي عمار الخيمة خطيرين . نحن كفانا عشا الفنانين بس
نقول خلاص؟ اتصافينا؟

اعتذرت عن السهرة؟
ليه كدا بس خسارة
حالتي كنت حأرسل فاكس ولا ايميل قبل التسجيل وامدح فيها شخصكم الكريم وامدح حسين خوجلي على براعة الاختيار وبالتحديد أقول في الحتة دي زي دايرة اقول
فوت علي الفرصة
تحياتي واشوفكم الاسبوع الجاي

حبيبنا اهل العوض

لك التحية
والتحية للاخت رمانة التى وحشتنا كثير والله وقد ازداد البورد بهاء بقدومها فاهلا بيها ..

سعدت بالامس بالحلقة المعنية وتوقعت والله ان تكون لك عليها ملاحظات ما ومن عجب فقد جاط راسى جدا وتهيأ لى اننى شاهدت هذه الحلقة قبلا ام لا ؟؟؟ خاصة عندما تحدث السيد ادريس -والذى لى عليه ملاحظات كثيرة - عن مقارنة شكسبير بما جاء فى اشعار سودانية ..

بصراحة هل تم بث هذه الحلقة قبلا ام لا ؟؟

طبعا كانت الروعة وانا اشاهدها اتخيل بتنا زوله كوف تفتح التلفزيون وتمط شفاهها وتقول " غايتو تلفزيون السودان عواليق .. بالله ده هسع بقول فى شنو؟؟" ثم تشوف الريموت لاخيها قائلة له : مش التلفزيون ده انا خليتو...

حقيقة فكرت هل ابناءنا وبناتنا من الجيل الحالى يستطيعون استيعاب ما قيل وفهمه وهضمه والاستمتاع به مثلنا؟؟؟ اشك كثيرا فى ذلك..

لعلنا اخى اهل العوض فئة تعيش على الزكريات ..

لك تحياتى واحترامى

الأخ قرشو
لك السلام والاحترام
البرامج التي تحكي عن الفلكلور والتراث دائما برامج شيقة جدا ولها رونق وجاذبية للمشاهد
أذكر زمان ونحن صغار كنت بسعد كتير بمشاهدة برنامج الطيب محمد الطيب (ارجو اني ما اكون اخطأت في اسمه) واظن اسمه صور شعبية. ولعل البصيري كان بقدم نفس البرنامج او شيء شبيه . كنت بشوفه برنامج دسم ومسلي وله تأثير كبير على ايقاظ (الحس الوطني) أو الانتمائية للسودان ان صح التعبير
بالجد نفسي اولادي يكون عندهم فرصة مشاهدة برامج زي البرامج ديك
الأشياء التراثية الموجودة حاليا في التلفزيون ، على قلة مشاهدتي لتلفزيون السودان ،بحس فيها قدر من التكلف والافتعال ما عارفة ليه

العمدة قرشو .. تحية لك . لا ، أعتقد أن الحلقة قطع أخدر . جديدة يعني . وبالنسبة للغة شعر يوسف البنا فقد قال عنها هو نفسه في الحلقة السابقة أنه من تلاميذ ود شوراني وأنه لا يستطيع أن يستعمل كلمات مثل إذا كان وكذلك ، وعلل ذلك بقوله : الدوبيت ما بدور الكشنة . فهي لغة معتقة مغموسة في الأصالة مية غمسة ، ولا يكون الدوبيت إلا كذلك .

عزيزنا اهل العوض


الحلقة حضرت آخرها وكنت منتظر ومتشوق اسمع يوسف البنا
اكتر من شوقي لسماع عاصم واللمين وادريس

لانو ناس المداين ديل كلامهم بتلقاه معلب
وجاهز ان فتشت ليه
بعكس يوسف البنا

ويبدو انو ما ادوه فرصة كافية
لانو شفتو منتكي علي قفاه
والتكية دي
بي معناها

نزار .. تمنيت أن تكون شاهدتها
يوسف قال شي طاعم خلاس .. شي خطير
مسدار عن البطانة
مسدار عن قبايل السودان
مسدار في رثاء الشيخ أب قدم
تكلم عن ود شوراني
عن الصادق ود آمنة
عن مجمل شعراء البطانة وتخصص كل واحد منهم
بعدين الخطيرة في يوسف قدرته الفائقة على الالقاء بنفس واحد
دون تردد أو خطأ لمدد طويلة
كذلك اللمين عملو كم دوبيتة ، كلهن في ذلك الشريط

قرشو..الحلقة جديدة..لكن الموضوع ده يتكلم عنه ادريس للمرة المليون بعد المائة في التلفزيون..والمشكلة في ناس التلفزيون اللي بيكرروا المواضيع وحلقات نسايم الليل اللي تكلم فيها ادريس...عموما لو كان شكسبير واهل الحقيبة عارفين الموضوع ده كان كتبوا مليون قصيدة متشابهة يشغلوا بيها الراجل دة وكان وفروا علينا مقعد عضو في مجلس راس الدولة