إيميـلك اتأخـر خبـارو

ايميلك اتأخر خبارو
ما جا لسع شن خبارو
ولا الجهاز باظ من كبارو
وفايرس الجن جاب خبارو

هذه دعوة هادئة لإعادة كتابة الشعر وتجديد معينات ومفاهيم النظم . فالمحب لم يعد ذلك الولهان الذي يذهب من كمل نومك إلى أرقد فايق (مسافة يومين وضحوة سيرا على الأقدام أو أقل من ذلك بالتي هي أحسن) وذلك ليرى المحبوبة (حسب الوصف) التي سترقص في تلك الليلة ، وحين يظفر منها برؤية شعرها فقط ترتفع عقيرته بالشعر الموخمج :

شعرك الـ للماشطة قلق
كاسي كتفك كان مكلق
حتى لو أصبح مفلق
وأبقى جنب بيتكم مفلق
مالي بالخط المعلق

فالآن يكفيه فقط أن يرسل لها إيميل إن لم يستطع عقد جلسة شات معها أو يبيجها (يرسل لها بيجر) أو كلمة كلمتين على موبايلها الأخضر ، إن كانت تلبس فستانها الظهري أو موبايلها الظهري إن كانت تلبس فستانها اللونبسجي .

أعتقد أن المصطلحات والمفاهيم والأساليب لدى المحبين تتبدل بسرعة ، فأرجو أن نلحق قبل فوات الأوان .

أهل العوض
أول تبادي .. نعلك مشيت تلك (المسيرة ) من كمل نومك لحدي وين ما عارف .. أكان كدى كلام أحمد سليمان المحامي صاااح .. ( ومشيناها خطى ) .. عاد ما كتبت علينا ..

دا أول هام .. تاني هام ياخي غناك دا ما قديم خلاس

شعرك الـ للماشطة قلق
كاسي كتفك كان مكلق

نحن ناس ..

شعرك الليل الطويل
بحكي للأيام سهدي في غيابك

بعدين تعال هنا ..

خلاس اتبدلت المفاهيم وفات فينا الفوات .. يعني ما فينا رقشة .. ( بفتح الراء والقاف )

سلام
رحمابي

اخى اهل العوض

رحم الله شعراءنا اولئك الذين كانوا يتابعون مسيرة المحبوب من الاسكلا وحتى الرجاف..
لا حوله

بالله مش ناس كانوا فايقين ورايقين

ليتنا نجد بعضا مما وجدوه

ورحم الله شاعرنا ود الرضى الذى قال فى ما معناه ان الحبيبة شايلة استيكة كلما يحاول تناسى حبها تمحى ذلك النسيان..

ياخوى الان اصبحت رسائل الموبايل تقوم مقام كل ذلك وما اجمل رسائله وما احلى وقعها ..

ليتنى املك موبايلا بنفسجيا عزيزى

لك تحياتى وودى

الرحمابي ، التحيات لله .
أول هم : البكانة ديك ما مشيتا لأنو عهدي بها في هذا البوست بس .
تاني هم : الشعر دا خلو ساك الكلام فيه ببتور علي وجع الضرس
تالتا : الرقشة موجودة نحمد الله مانا كبار .. زملانا لسع لا ضاقو حنة ولا ضريرة .

العمدة قرشو :

ود الرضي قال : يعاينن توبتي في كامن ضميري ويمحن
الشاف روعتن ونور جمالن يمحن
قلوبن ما انكون بي نار حسارن قمحن
الله يكبرن الكبرني وسمحن

أها ، أنت واقف وين من البكان دا

سلام مربع


اهل العوض

بالله القصيدة دي بتاعة ود الرضي ؟

ياخي دي فكرتها كميات

كدي اكتبها هنا
كلها
لو سمحت
يعين

ظالمنى شوف من كم سنة
انا يا هوى بعدين معاك

ظالمنى شوف من كم سنة
انا يا هوى بعدين معاك

المسافة

سؤال وجيه
والحق معاك

شيري
سمدلة على الحلامة
والله انا كنت فاكر إنك قسمت الأرض قسمين بمناسبة ذلك البوست المشهور

بالنسبة لقصيدة ود الرضي والله حسب ما أدونا في الروضة دا كل القصيدة هي عبارة عن مقطع دوبيت فقط

وعلى فكرة المقطع اللي أنا افتريت عليه في بداية البوست
شعرك الـ للماشطة قلق

هو جزء من أغنية طويلة إسمها يا حمام الأيك سجعة
لك تحية
والتحية لشاعرنا العظيم ود الرضي

اهل العوض
سلام مربع

سجمي ياود امي مالك زي البهتني كدا

ولا الذاكره يا اولاد اظنها خلاص خربت

ذكرني
..

لعن الله الكبر
الشوف والسمع بقوا طشاش طشاش

شيري - لا خلاص يبقى معلاهش
طالما ماك فاكرة يبقى ما فوقكا حاجة . وكفى الله المؤمنين القتال
وسلامة نضرك وسمعك ومن قال ومن سمع
عجبني احساسك بقدوم السلام ، بس ما قدرت أعبر ، الحبان ختفو الكلام من خشمي . أنا من المتفائلين جدا بقدوم السلام

بسم الله الرحمن الرحيم

أهل الجمال والذوق
أهل العوض ليك شوق
أهل البلاد الفوق


سلام مسلّح

قبل كم يوم خطرت لي فكرة أربط بين صياح الأطفال (الحريقة الحريقة) والتي إتخذها ذلك الشاعر حيلة ليحصل على رؤية محبوبته وصياح الموبايل الذي يفعل فعل السحر في كسر ذلك الجدار السميك والقفل الحديدي الذي ضربه رب البيت ليحمي عرضه بل ويستطيع هذا الموبايل اللعين أن يغير خط سير صاحبته بدلاً من المكتب ألبيت ليصبح المكتب حدائق 35 أيار

لك الود

الحبيب اهل العوض

لك السلام

والله يا سيدى اثبت لى انك مرجع لا يعلى عليه
تعرف انا البيت رايح على وشكله جواى طشاش طشاش
لكن بارك الله فيك يا سيدى وكدتو لى تب
بالله الناس ديل كانت احسايسهم كيف ؟؟

لك التحايا وزدنا من الروائع ارجوك

ابولمعة ،الخرطوم تلاتة ،الرميلة والحلة الجديدة واخيرا طابت

اهل العوض
السلام مليون

باق ليك اسع لو واحد قال لي واحدة
الرقيبة قزازة عصير
والله العيون متل الفناجيل
تقول شنو
عارف كان باريت شعر الشايقية تلقي فيهو اوصاف وكلام عجيب كان زول قالا لبنات الزمن دا مابعرف البحصلو شنو

لك السلام والتقدير

عبدالله جعفر

العزيز اهل العوض
لك الود

انا شايف الجماعة طلعوا من المقرر وما في واحد قال حاجة

سانقل لك عن أحد الاصدقاء قوله هذه الابيات من الدوبيت

الليييييل00 إيميلك وصل جاوب سؤالي وقر

والحاجة العجيبة الرد يجيك في فـــــرة

والسي دي المرق مد اللسان لي بــــــرة

والدســـك إنسرف فضــل يســوي الكـــرة

زنننننننننننننننننننن0

بدر الدين ، شفت كيف ! مش أحسن الواحد يخلي موبايلو في البيت ؟ بس التاريخ عندك . دي زي عشرة وتلاتين سنة .

ياسيكو ، الأغنية قطعت نص الطريق إلى طابت ثم عادت إلى الحلة الجديدة عشان تركب اللواري من الخرتوم تلاتة . شكراً يا أصيل .

أستاذنا عبد الله جعفر ، المشكلة في أهل الغزل بتاع الايام دي ما يقدر يستنجد بالشعر المعروف بتاعنا دا . يعني بدخلو هو وبت الناس في ورطات وضرورة لاستخدام القواميس في وقت هم في أشد الحاجة للبعد عن الكتابة والقراية .

عبد الرحمن سوركتي أو كاتب الحجبات . شكرا على المربع الأنيق . وصدقني حاولت أنجر زيو غلبني .

لكن يبدو إني فات علي الاطلاع على بوست الشعر الحلمنتيشي في هذا البورد . فقد تضمن أشعارا رقيقة استخدمت فيها هذه المصطلحات . لكن برضو بتساءل : لو كنت عاشقا جديدا أي المصطلحات تستعمل مع المحبوبة التي لديها إيميل ومسنجر وموبايل ، يعني شعر الأغاني لا يجدي نفعا . والله عوجة كبيرة

ألم تشتاقوا للكلام السمح
قرجا .. هااك الضل دا
اتكي عليهو شوية

تسلموا

الرحمابي

الرحمابي !!! والله إنت راجل الواحد يحتار يختك وين؟
الله يديمك نسمة لطيفة

طيب نضيف .. الكلام على عواهنه

إيملك اتأخر دقايق
قلّ صبري وصرت ضايق
كنت من دون ميلو رايق
شن نسوي مع الخلايق

مكرر

لما شفتك ليلي ضو وبق نور
ارجح انه شاهد طبق طائر

بالطبع امزح
فقط اردت القول السلام عليكم وعليا السلام

وعليكم وعلينا السلام
وشك ولا الأمر
الطيور المهاجرة بدت تعود
سمدلة على الحلامة

هل الطيور تهاجر لبلادها ثم ترجع لتقييم في منافيها
اقصد شققها
!!!!!
سبحان من قلب الأحوال

الله يحمدلك

ازيك يا بت قضيم. نعلك عافية .. وحمد الله بسلامة العودة . مع اني والله ما عارفك مشيتي وين وعدتي لوين. أها ورينا خترتي وين؟ وعدتي كيف في الهجرة المقلوبة دي؟

الله يديك العافية
يا ولد حلتنا
بكانك هادي وجميل
سمعتها تغني
**
لا مس كول يجيني منك
لا ما ماسنجر يخليني جنبك
لا مسج تطميني عنك
وانت سائق فيني ظنك
غير انك
..
لووووووول
اقول لي مسيرة يوم وضحوة
تسلم يا غالي

شنتير العزيز
الله يسلمك
ابداً اجازتي السنوية،،، كالعادة،،المانيا اسبوع ،،ثم عدت بإدراجي إلى سويسرا فطرت بعدها إلى العراق ،، بسم الله اقصد جزر المالديف
شنتير
السودان بالطبع
ثم بلاد الملك ارخبيل
يطرح البركة فيك ويخليك على السؤال
دمت يا صديق

تحياتي للجميع

بت قضيم ... غريبة ، يعني أنا برضو مشيت الحتات القلتي عليها دي . إلا العراق ما مشيت . ما كان فضلن لي قروش ، ولا عمر ولا روح . طيب مفروض نكون اتلاقينا مش ؟

سلام مربع

ايميلي نويت ابعتلو من دغشا
عاينتلو من شباك الجن
لقيتو سابق عربات الترايب
قت اقلل ضيقو واشرب الشاي بالنعانع
وفتحت كمبيوتر الجن قت كان بيهو اعرف خباركن
الا لمه في كي بوردي مقطوع الخرايب
فيروسا ، شكيتو على الله شل اديني
وكسر اطراف المعالق ..
كيتا في المصايب ، قديت عين شيطان الفرايس
وبي قلم الرصاص بدلت كي بوردي لدقايق
انتظر ، ايميلي لا تضيق ،
هسع ودعتو وركب الدفاير
عاينلو في وشوش الناس ولا تتاوق
واوعك تقوللي ايميلك ميد مي وايد جناين

هامــــش
دفاير : جمع دفار ، ومفردتها دفر وهي وسيلة اخبر عنها الاولين انها تجي في اخر الزمان لتلقطهم وتلمهم من بهدله الشوارع
الفرايس : جمع فيروس ، وهو مرض قيل انه يصيب اجهزة الحاسوب لا جراح ولا باطني يطببها .
ترايب : جمع تراب وهي عربية قيل ان ناس الخليج من نظافتهم حتى الشوارع لا يحبون ان يرونها مغبره فيستقلونها في ذلك

اهل العوض
ما طرحته ليس سهلا
اعتقد اختلاف الوسائل شكلت منهجيه تواصل
عصرى واصبح المحبين تدور ريح خواطرهم خفافا
وكم تبدو العولمه واهبه عندما يتحول الكى بورد الى احساس
مخملى تلامس به انامل من تكتب له
واذا راينا حالات العشق
لوجدنا المونليزا
لا تلت يمنى ولا مشت متاقله
ولا اسفل عالى مره واعلى الكان سفل
رسمت فى عدم وجودها
ولا كانت القصيده لرد فعل المحبوب
اعتقد عاد زمن الرومانسيه
بصدق العاطفه
فكيف يشغل تفكيرك شخص لم تراه
الى درجه الهذيان
فمن المحب فى نظرك الان؟

موضوعك بديع يا أهل العوض
وتاني يا قريبي مافي غزل مخرمج زي الكان داكَ .. وعلى قدر الإيميل والموبايل يكون قاموس الغزل دون الخروج عنه الى المرجرج كفلو .. وما بعرف .. والمزمزم زي خاتمو فاهو. ياخي داك كان غزل قاسي مرة واحدة. دحين طرّق لسانك وأبدا في استبدال المفردات القديمة بمصطلحات جديدة تتناسب مع الغزل السدوتشي

وأكلنا سندوشّي
ضحكت مني ومرّت كمرور المتسوبشّي
=====
الكي بورد دفرتو
ايميلك .. انتظرتو
نلقاكم ع الموبايل
الانترنت هجرتو

ويــن إيميلي .. إيميلي الهد حيلي ويــــن

انتو عاملين بروكسي
يا الطلعتوا إكسي
ليه ما قادر اشوفكم
ولا في ميلِ بوكسي

ويــــــــن يا جكسي .. الجكسي الفي الجلكسي ويــــــن

الله يثبت العقول

سلام بوست فى السلك كما يقول الشباب

يقول الشايقى

طويرات الجنة قالى لى
ليمسايرك تضفرى ومرات تحلى

الترجمة
طيور الجنة الصغار
قالوا مرة تفكى شعرك ومرة تضفريه
ودى كناية عن انها ما شغالة بيهو التكتح

فطيور الجنة فىالقديم كانت تلعب دور الاتصالات الحديثة
وبتلم الشمارات للمحبين المهجورين


امانة الاغانى السودانية دى مافيها مصايب

القليب الراسمو حنة
اطنو اكثر من قلبك محنة
هل الشاعر كتب هذه الكلمات لأمرأة متزوجة؟
أو لزوجته يستجدي حبها!!!ز
فكرو معى فى هذا السؤال
لانه على ايام ذلك الشاعر لم تظهر بعد حنة الفتوات
والا كانت هناك ثمة قطيعة ابستمولوجية

بين الماضى و الواقع فى ذلك الزمن
أو أن هذه الاغنية صالحة لكل زمان و مكان
وفيها استشرف الشاعر المستقبل وانه يوما ما ستكون الحنة علامة انوثة وليست حالة اجتماعية
ولذلك كتب هذه الاغنية
الموحية جدا
وهى مصنفة من اغانى المكسرين الذكور
الى ان يأتى يوم يرسم الرجل الحنة
فتصنف
من اغانى المكسرين جميعهم اناثهم و ذكروهم
وتكون هذه الاغنية كسرت حاجز الجندر
و انتقلت الى انها اغنية انسانية تحتفل
بالرجل و المرأة كشئ واحد فى حالة ضعف انسانى
نرجع مرة اخرى انها اغنية صالحة لكل زمان ومكان



هذا البوست كتبته منذ فترة طويلة
وفى حينها علق عليه الاخ قرشى
وهو يوضح خرمجات الاغانى السودانية
مع انكم تكتبون عن وسائل الاتصالات الحديثة
الا طبعا الناس العجائز والمسنين معروفين
بأنهم بيخشو شمال

الاستاذ حمزة ... تحياتي لك ، فعلاً المتأمل للعلاقات عبر أجهزة الاتصال وتحديداً الانترنت يذهل .. أقرب مثال على ذلك علاقات رواد هذا المنتدى ... شخصياً أحس بأن لي مكان هنا لا بد أن أزوره كل يوم وقد تعرفت عن قرب على بعض أعضاء هذا المنتدى وصار الود قوياً ... فما بالك ممن يعشق ويمتد التواصل إلى حديث يومي أو قل كل حين ... الموضوع لا يخلو من عجب .

الشاعرة الكبيرة شيري الحاصلة على زمالة خيمة الحردلو .. فعلاً قصيدك ذكرتني بأبيات شعر قديمة يقول فيها زميلكم الشاعر القديم

جلاد جلّ الإله جمّل خلقتك زانا
جيدك جيد جٍدًي لكن معاه رزانة
جلدن جمّلن جُمل الشعر واوزانا
جورهن جار ظلم جرّ المصيبة أذانا

شيخي ود شنتير

ياخوي ديلك ناس عيانين وماتو بي عياهن شفانا الله وإياك .. قال دمعي مالو فاض شابه البحر وما طفا العلي من لهيب وحر .. أو ذلك القال ... الناحر فؤادي ومولع جوفي حر .. أضرم نار وجدي نسّام السحر .. في زول بيضرم نارو نسام السحر ؟ ومال لو جاتو نص النهار تقرش كبدتو ولا شنو؟

الدكتورة بيان .. تحية لك وإنحناءة للسمندل الغلبنا نعبر عن دينه علينا .. وبعدين سؤالك صعب شوية . مافي خيارات ؟ أنا أرجح أنه كتبه في زوجته ليعبر لها عن الوله القارش مصارينو .

سلام مربع
اهل
العوض

يخربني ، قد دخل قرعتي دي حاجة من القلتها
جلاد جلّ الإله جمّل خلقتك زانا
جيدك جيد جٍدًي لكن معاه رزانة
جلدن جمّلن جُمل الشعر واوزانا
جورهن جار ظلم جرّ المصيبة أذانا

كان نبذتني ولا شكرتني
يعلمني الله من حبة الفهم
المره الجايه جيب لينا حاجة نفهمها بالله
ومع ذلك
سمح ، الله يبارك فيك
على الاطراء الجميل

نجــرك أخـدرا ناضـر .. سـمحا بلحيــل
أكـان جبتـو بالماسـنجر .. أو عبر ايميــل
بت قضيم جات تلكـــع تقول راكبة فور ويـل
وينك يا الملا عمر صبرنا ما كمــل عديـــل


الرحمابي

الرحمابي يا أمير
فوق السكر زايد كتير
تقطع أخدر يطلع عصير
فوق الملا الفراش الحصير

أين ذلك الملا .. لا أحسبه إلا مشى السودان وغتس بين اللخوان وقدامو الأدب الكيمان كيمان . تحية لذلك الغائب الكبير

أما بت قضيم فأحسب أنها في اللفة الأخيرة في مشاوير التحيات - لله