Post: #1
Title: انا ورانيا وعمرو
Author: مريم بنت الحسين
Date: 05-25-2003, 08:29 PM
ترررررررررررن
ترررررررررن
ترن
تررررررررررن
ألو...
ألو... مريم..
أيوه مريم... مين معاي؟
معك كايد...
أهلين أستاذ.. خير؟
مريم.. إنت مدعوة للإفتتاح يوم الثلاثاء القادم..
وإيش المناسبة؟
والله بس لأنك طالبة عندنا.. وسودانية
بس يا أستاذ والله مشغولة.. وإلا أستأذن من المدير بتاعي
لازم تجي.. مافيش فرصة.. جاي عمرو موسى والملكة رانيا العبدالله
يا زول انا بعد الكلام ده انطرشت.. قال شنو.. بت الحسين تقيف وتتلفح بي توبها المدبّس كله من فوق لي تحت.. وتتكلم وترحب بعمرو موسى والملكة رانيا في افتتاح مباني الأكاديمية العربية للعلوم المالية والمصرفية التابعة لجامعة الدول العربية.. وعمك عمرو سايب شغله والعراق وفلسطين وجاي يسمع بت الحسين.. غدّااااااااااار يا زمن... كله كوم والتوب كوم... إلا ألصقه بالصمغ غايته.. المهم.. قلنا عمرو مخمخم من القاهرة عشان يسمع بت الحسين.. حتقيف ليك كده وتتنحنح.. وتتجددددددددددددددددع.. وتتكلم وتلوك الكلام.. وتتفلسف وتتكلم عن مسيرة الأكاديمية التعليمية ودورها الرائد في التعليم العالي في الوطن العربي.. يعني بت الحسين تخم العفش.. وتتلفح بالتوب.. وتلبس البوت.. وتكسح بالعربية من تصبح.... أول مرة ألقى ميزة عشان انا سودانية.. الأكاديمية مؤسسها سوداني.. ده من قبيل الاعتراف بالجميل... يعني الجماعة ما قصّروا.. كاسوا رقم الموبايل حقي .. نكتوا من وين ما تعرف.. وضربهو.. واتكلموا.. وبت الحسين تتعزز.. عندها شغل.. ما فاضية ليك يا رانيا.. خليهم يأجلوا الاحتفال.. بعد ما اقتنعت ليهم .. قال إلا بالتوب قال.. يا جماعة والله بحب التوب شديد.. لكن كان لبسته من الأوضه ما بطلع.. المهم.. قلنا نشيله في كيس.. ونخلي الحاجة تدينا عدّة اللصيق عشان نلصقه هناك.. عمك عمرو يقعد.. وعيونو مورمات من قرّيص ناس الكويت.. وهرشات الأمريكان.. ويبتسم التقول سامع بت الحسين بتقول في شنو.. وبعد ما بت الحسين تبرطم وتتكلم طرق رق رق رق رق يصفقوا.. وزوووووووووووول سمع بتقول في شنو مافي.. الدكاتره قاعدين.. داااااااااك د.علا يتونس مع د.عز .. د.عاصم بشجع السودانيين زيّه.. يبتسم ويسمع باهتمام.. د.الطروانه شامااااااااااه لما نفسي أشكيهو لي أنكل عمرو.. عليكم الله أحكموا براكم.. يعني انا زوله شاطره وقراية وعندي امتياز في مواد السوفتوير انجنيرينق وسيستم انالاسيس والداتا بيز والنتوركس.. يشيّلني مادة أساليب بحث علمي.. ده في ياتو قاموس ده... في حياتي ما شلته مادة .. أجي أشيل دي.. اها .. رانوش بتكون قاعدة ليك كده زي الليدي ديانا.. بت الحسين يا كبكبه.. والتوب كمان بكون عامل فيني عمايل.. غايته الواحد يمشي يجوط ليهم الحفلة ويجي.. وبطلع لي بي شي.. بلصق ليك في الملكة دي.. يمكن تهد فينا شويه.. ولا نهد فيها إحنا.. كله تمام معاي...
اها ما قولتو لي.. توصو بي حاجة لعمرو؟ انا غايته بكلفت ليهو الكلمة سريع خليهو اليمشي يقضّي شغلته سريع سريع..
بنت الحسين
|
Post: #2
Title: Re: انا ورانيا وعمرو
Author: HOPELESS
Date: 05-25-2003, 10:20 PM
Parent: #1
بت الحسين .. ام توبا زين
قولي لعمو عمرو يعم خلاص نوم ارتاح دي الجمعيه اتفركشت عشان طلعت مديونه .. ودخلها اقل من دخل اصغر طابونه
بس كلمة ستي رانيه
النبي فوقك كان ما خليتيني اقوله بدلك
خليها التهد فوقي وتهدني
رنويه يارنويه
ياملكه جمال اشراف بريطانيا
اخخخخخ با قي الكلام وين يا بت الحسين الحقينا بالورقه
ماننفضح قدام العرب والعجم ديل
|
Post: #3
Title: Re: انا ورانيا وعمرو
Author: مريم بنت الحسين
Date: 05-25-2003, 10:28 PM
Parent: #1
Hopefull
بتكيف من ناس البورد لما يسموك كده.. لكن رانية ما عارفتها.. ما عندها سكري.. كر علي ما تستاهل لكن.. غايته انا مكسري الانجليزي.. هي وراجلها عليهم انجليزي.. لما غلط زاتو.. عند أهله ما سمح كدي..
بعدين ما تفضحنا.. خلي الكبكبه.. انا براي بي توبي تعبانه.. عمك موسى ده ما مقتنع إنهم فضّوها.. لكن تقول شنو.. خليهو.. يقص الشريط.. ويتبري ببت الحسين.. يفوت أهله
بنت الحسين
|
Post: #4
Title: Re: انا ورانيا وعمرو
Author: sympatico
Date: 05-26-2003, 00:45 AM
Parent: #3
looooooooool@بلصق ليك في الملكة دي.. يمكن تهد فينا شويه.. ولا نهد فيها إحنا.. ...
لكن يا مريم مبالغة
ينادوك لي رانوش بجلال قدرها وما( تهرولي) ؟
مصطلح هرولة دا بعرفو عمرو كويس
غايتو الاحتمال الاول دا بعيد : تهد فينا
لكن الاحتمال التاني انتي ومقدراتك والوان توبك
بس مؤكد حا تكوني محط الانظار من الجميع
سودانية بثوب سوداني وببلاغة كلامية عالية - وخلفية اكاديمية رفيعة-
فلتقفي واثقة وللتحدثي بصوت عال واجيلي البصر في سامعيك من اقصاهم الى ادناهم ومن اكبرهم لأصغرهم
وستري كيف سيكون التصفيق وستري كيف يكون الاعجاب
وستري كيف ان هذا الطراونة سيعطيك الامتياز
وفوق ذاك ستضع رانوش وشاحها على كتفك تقديرا
وسيهتف عمرو يا ابنة النيل ما اروعك
ومريم فعلا ما اروعك
|
Post: #5
Title: Re: انا ورانيا وعمرو
Author: Hozy
Date: 05-26-2003, 01:29 AM
Parent: #1
وينك يامريم بت الهوزين
كيفك ؟
ليك وحشة والله؟
اسمعي ده سبب الاختفاء
تمارين في التوب ولا شنو؟
ولا تمارين من نوع تاني
استعدادات وكده؟
بالتوفيق بالله وارفعي راسنا
وبالمناسبة خليك من التوب عشان تكوني طبيعية
ولا اجباري
يازولة كله تمام
تحياتي
|
Post: #6
Title: Re: انا ورانيا وعمرو
Author: zola123
Date: 05-26-2003, 01:10 PM
Parent: #1
يا مريم انا دايرة صور كلام ما بينفع
رانيا دي خليها
سلمي على عموري شديد
وقولي ليه انت لسة قاعد يا راجل؟
تحياتي
زولة123
|
Post: #7
Title: Re: انا ورانيا وعمرو
Author: قرشـــو
Date: 05-26-2003, 02:59 PM
Parent: #6
العزيزة مريم
لك التحية
اثرتى شجونى على ذكر الاكاديمية التى كان لنا فيها صولات وجولات يعنى دورات على حساب الشركة شىء فى القاهرة وشىء فى عمان وتتكرر ونحن نتلكع بان الدورات متواصلة لنسعد بايام وبرامج جميلة رائعة وبتيم اكثر من رائع والله ولست ادرى اين احتفالكم هذا هل هو فى الاردن ام فى بيروت ؟؟
عموما انها فرصة العمر لتظهرى بالتوب الما خمج واكان الحكاية فيها زمن نرسل ليك توب اخر موديل ولا حاتلبسى توب ابيض ؟؟ ياخى اصلك عاوزة تعملى عمره ؟؟ خليه توب فى السلك عشان يخطف الاضواء وامانة فى زمتك اكان ما نزلتى لينا صورة هنا وانتى بتخطبى باياديك واوراقك خطبة عصماء لم يقلها الصحاف فى زمانه وطبعا ناس الاكاديمية جنهن صور فى الهينة والقاسية ..
لكن ما الكلام كلامك تتكلمى قدام الملكة وقدام امين عام الجامعة وهو يعادل رئيس كل الرؤساء العرب فى عظمة اكتر من كده؟؟
لك تحياتى
|
Post: #8
Title: Re: انا ورانيا وعمرو
Author: alfatih
Date: 05-26-2003, 03:20 PM
Parent: #1
سلام
بت الحسين
رنيا كان سمعت ساي قالوا بت الحسين ...تتكبكب
و تضبب..إنتي ما عارفة إسمك ده كبير كيفن ؟
إسم ناس الملكة زاتا
الحسين الكبير
بعدين ألبسي نضارة دائرية مع التوب
و اتوكلي علي الله
اسألي مجرب
ابو القدح بعرف محل بعضي اخو
|
Post: #9
Title: Re: انا ورانيا وعمرو
Author: Yasir Elsharif
Date: 05-26-2003, 06:30 PM
Parent: #1
مريم بنت الحسين أم توبا زين
زي ما قال جمال
أها والحصل شنو؟؟
أستمتعنا بالبوست ، ومتنا من الضحك..
لكن ما تفوتي توب العمدة قرشو.. وقولي ليهو الجايات أكتر من الرايحات..
سلام كتير
|
Post: #10
Title: Re: انا ورانيا وعمرو
Author: سودانوبس
Date: 05-26-2003, 06:49 PM
Parent: #1
غايتو بت الحسين دي كتابة جنس كتابة.. وعندها جنس ملكة تشد الزول مما فيش..أنتو ولاد الجمهوريين ديل بي يولدوا علماء والله شنو...ربنا يزيد ويبارك....وعيني باردي
|
Post: #14
Title: Re: انا ورانيا وعمرو
Author: مريم بنت الحسين
Date: 05-27-2003, 11:11 PM
Parent: #10
سودانوبس.. لم أر كتابتك من قبل... قول ما شاء الله.. لا حوووووووووووووووووووووله.. بعدين أولاد الجمهوريين دي قصدك شنو بيها؟ أنا جمهورية زاتي...
|
Post: #11
Title: Re: انا ورانيا وعمرو
Author: مريم بنت الحسين
Date: 05-26-2003, 07:11 PM
Parent: #1
sympatico
صدّق الهرولة حاصله.. انا والله استغربت لما قالوا لي عمرو جاي.. يعني الأكاديمية مهمة.. لكن الوضع الحالي ده صعب شديد.. يعني وقت السفر .. وكلمة بت الحسين.. ده ما ضياع زمن ساااااااااااكت.. يعني بت الحسين ماشه تقول شنو يعني...ما (الأكاديمية فخرنا.. واحب أكاديميتي)... شكرا ليك.. والله رفعت معنوياتي فووووووق
هوزي اللزيزة
انا تماااااااااااام... والله تمارين شديدة.. الحاجة تشيل وتعمل في البروفات.. لكن تعرفي.. انا عرفت الخبر ده أمبارح بس... غايته يا أخيتي.. انا متعوووووده.. قبل ده عازمنا الأمير الحسن بن طلال.. قبل ما يشيلوهو من ولاية العهد.. وعندي صورة معاه.. أظنّي انا الطيرتوا من الإمارة...
زولة123
خلاص يا أستاذة.. ليك أحلى صورة.. بت الحسين.. والتوب.. هو انا لما يكون معاي التوب ما بشوف زول زاتي.. الخوف أكسف عمرو ورانيا.. وهم مخمخمين وجايين يسمعوني...
قرشو
المقر الرئيسي بتاع الأكاديمية في الأردن.. وده افتتاح للمباني الجديدة.. شفت المبنى الشين داك.. عملوا بدله مبني إبداااااااااااااع.. في أعلى تلّه شديدة الخضرا.. في منطقة خارج عمّان.. والمبني نفسه جميل جدا.. انا كتيييييير قاعده ألاقي الجماعة البجو دورات ديل.. حسي عندنا مجموعة أعمام وخالات من بعييييييييد لقطوني.. وهاك يا سلامات.. بكونوا دايشين في البداية.. لكن بعدها بعجبهم الجو.. قبل كم يوم عيني ليهم في الكافتيريا...التوب جميييييييييييييل..وانا عندي علاقة خاصة معاه ( من بعيد لي بعيد).. لكن نفسي كده بس أنتهي الماجستير أتصالح معاه.. وأحاول أتعلم كيف ألبسه.. الحجة هنا أدتني توب أبيض .. جميل جدا جداً... ووان شاء الله نرفع راسكم..
الفاتح
كتير بعلقوا على اسمي وعلاقته بالعائلة الحاكمة.. الملك الحسين كان عندي علاقة خاصة بيهو.. لأسباب كتيرة.. اولها شرفه وعلاقته بالنبي عليه الصلاة والسلام.. وطيبته.. عشان كده بحب اسم بنت الحسين ده جداً جداً.. تسلم على التشجيع
د.ياسر
سعيييييييييييييييدة بطلتك على البوست.. وبالتعليق.. والحصل كالآتي.. بكره الساعة عشرة ونص حأمشي عشان أستعد قبل الاحتفال.. الاحتفال الساعة اثناشر ونص.. وان شاء الله أديكم تقرير وااافي ومتكامل عن سير الموضوع.. استأذنت من الشغل.. واتكيفوا شديد في الشغل عشاني.. وان شاء الله نرفع راسكم.. بإذن الله...
التحية لكم.. ودعواتكم بالله..
بت الحسين
|
Post: #12
Title: Re: انا ورانيا وعمرو
Author: مريم بنت الحسين
Date: 05-27-2003, 12:49 PM
Parent: #1
جيييت حسسسسسسسسسسسسي.. ومقلب دولي معاي..
بجكيليكم بعدين
بنت الحسين
|
Post: #13
Title: Re: انا ورانيا وعمرو
Author: مريم بنت الحسين
Date: 05-27-2003, 06:44 PM
Parent: #1
لم يأتي عمرو... المصري ما عنده مواعيد...
اختصروا الحفل
لغوا الخطب والقصص كلها...
لكن يا هوبفل... الملكة عاد عزلتني من دون المعاي كلهم.. وسلمت علي باليد.. غايتو هديت فيها.. بختها.. هي لاقيه.. والله اتغظت غيظ.. وكنت دايرة أمرق.. لكن الجامعة محوّطه بالجيش.. الملكة جات داخله مختبرات الكومبيوتر... بنت الحسين من الزهج.. ملفحه بتوبها.. ومكرّها الحياة.. لكن بتلعب كوشتينه في الكومبيوتر.. الملكة دخلت.. سلمت على الناس من بعيد وبصوت قوي (يعطيكو العافية).. جات لبت الحسين الزهجانه.. ومدت لي يدها.. انا بي زهجتي ديك.. سلمت عليها.. ابتسمت.. وهي تسأل.. كيف الحال؟ يعطيك العافية.. وانا رابطه دايرة أطق.. زملائي دايرين يدقوني.. إنت ما شغاله بيها سلّمت عليك.. إحنا من بعيد تسلم علينا.. !!! لكن كان يوم لزيز.. الاحتفال كله سودانيين.. العمم تتطاقش.. جو سلّموا علينا انا وزميلي.. والله السودانيين ديل طيبين.. يعني الأردنيين الواحد يكون عنده منصب ما يعاين ليك في وشك.. إحنا دانا واحد من أمناء إتحاد المصارف العربية.. سلّم علينا.. هو شغال في بنك التضامن .. أظنه المدير ولا شي أقل شويه.. المهم.. جانا لحدي عندنا.. عرفنا بي نفسه.. وسأل عن أحوالنا.. ولو عندنا مشاكل ولا لأ.. ويضحكوا ويتونسوا.. المهم.. بت الحسين طلعت بي سلّيمه على رنوش.. وبس... والحاجة هنا قالت لي ده التوب.. كان لزيز والله.. صحي جنني مع حزام الأمان في السيارة.. وكرهني مع الهوا في الأكاديمية.. لكن كان لزيز.. من غيظي كنت أفكّر في كتابه شيء لكم.. كنت أريد أن أكتبه على الطريقة السجيمانية.. أردت أن أعلن تنصيب نفسي ملكة على مملكة السودان.. ناقصني شنو.. مرسوم ملكي واحد.. والاسم (مريم بنت الحسين الأولى).. ماله .. أشر الناس وأجيهم بعد ساعة.. والمصورين والكمرات حوليني.. وابتسامات.. وامشي.. لكن.. تاني خاطري هدأ.. وحسيت بحلاوة التجربة.. والتميّز بصورة أو بإخرى.. سواءاً بالزي الذي أعجب الكل.. أو بالسلام الخاص.. والتجارب المميزة التي أمر بها في حياتي بصورة عامة.. عمرو لكن شرانا.. بالغ.. لكن برضه أخير ليهو.. هو زول مشغول والفيهو مكفيهو... وقبل شويه.. جابو اللقطة دي سلام رنوش علي في التلفزيون.. عاد يا رنوش دخلتي التاريخ.. سلّمتي على أول ملكة سودانية...
|
Post: #15
Title: Re: انا ورانيا وعمرو
Author: قرشـــو
Date: 05-28-2003, 09:07 AM
Parent: #13
عزيزتى مريم
لك تحياتى
سيبك من الحلبى فالفيه مكفيه زى ما قلتى والراجل بقى فى توله والناس البدفعوا ليه مرتبوا غضبانين منه وعاوزين يسحبوا كفالتهم منو ويفكوهو عكس الهواء.. عالم مادى يامعانا يا ضدنا.... انها قسمة ضيزى ولا شك..
سيبك من داك
واهنئك بالملكة التى صافحتك واختارتك من دون خلق الله.. اها الصور كيف بس ان شاء الله انفردتى بصورة معها عشان تكبريها وتعلقيها فى الصالون وقبل كده تجيبيها لينا هنا فى الموقع.. تعرفى الملكة دى عندها شعبية كبيرة جدا فى اوروبا يعنى انتى صورتى حاتكون اتناقلتها صحف اوروبا كلها شفتى الشهرة بتجى كيف؟؟؟
جميل انك تمثلينا وهكذا يكون البورد مع الملوك مصافحا ومتسائلا .. والله الواحد فعلا مشتاق يشوف المبانى الجديدة للاكاديمية والنظام الجديد كيف ..
عموما يا ستى ما تنسى تبلغى تحياتنا للاخت ايمان الغزاوى تلك السيدة الفاضلة التى خدمتنا بكل ما تملك ولم تتأخر يوما عن تلبية اى طلب لنا فهى انسانة نموذجبة بحق قولى ليها كل السودانيين طلاب الاكاديمية من جدة بسلموا عليك بشدة وكذلك استاذنا الفاضل الدكتور حنا قاقيش ذلك الانسان النادر المثال وارجو ان يكون ما زال متعاقدا مع الاكاديمية فهو اول من علمنا الانترنيت فى العام 95 ولذا له علينا فضل كبير جدا..
لك تحياتى عزيزتى وتهانى الحارة وواصلى سرد بقية الزيارة الملكية والحمايات الامنية وما شاكل ذلك من اشياء لابد انها أتت مع قدوم الملكة ..
|
Post: #16
Title: Re: انا ورانيا وعمرو
Author: مريم بنت الحسين
Date: 05-28-2003, 03:56 PM
Parent: #1
قرشو.. ليك علي أديك تقرير مفصّل عن الأكاديمية.. بي أديني فرصة.. بجيك تاني
بنت الحسين
|
Post: #17
Title: Re: انا ورانيا وعمرو
Author: سودانوبس
Date: 05-28-2003, 09:29 PM
Parent: #1
مريم بت الحسين...سلامات. أنا عارف.. ما رديتي على ونطيتيني جاي وجاي.وصبرت..وقلتا ربنا يكتبا لي اجر عندو..وإنتي موضوع المعهد مشيتي فيهو شمال ويمين.. وعاجبك والعجب في السلوك تنقيص مقام ..وأنا ما قلتا حاجة.. قلتا احسن لي أكون مظلوم.بدل ظالم.واقوم اهاجم واقول ليكي ليه تنطيني وتردي على ناس بعد البعدي كمان وفوقي وتحتي... وارجو ان تضعي ذلك في ميزان المحاسبة عندك.أو الإستغفار..أو تسديد العمل يا بت الحسين مريم..وبرضو نشكرك على أنك فطنتي لنا في الآخر.. المهم السالك دايماً بيكون مسدد الخطي ولماح ودقيق...
ويبقى لك الود.. وبالله التوفيق أولاً وأخيراً
|
Post: #18
Title: Re: انا ورانيا وعمرو
Author: مريم بنت الحسين
Date: 05-28-2003, 10:39 PM
Parent: #1
سودانوبس...
أعدم النظر إذا شفتك المرّة الأولى.. انا ما من عادتي أبدا أفرز في تعاملي مع الناس.. فما تشيل السلم بالعرض.. وإذا انا أخطأت في حقك، لك مني الاعتذار.. والتقدير
بنت الحسين
|
Post: #19
Title: Re: انا ورانيا وعمرو
Author: سودانوبس
Date: 05-29-2003, 09:29 AM
Parent: #1
تبري تبري يا مريومة من عدمان النظر...
هي كثرة محبة في الله وبس
....
ما طبعاً .ما طبعاً إنتي ما شفتيها دي مفروغ منها
وإلا لو شفتيها وما رديتي كان بيكون الإستغفار مع الوضوء ..
وهسه كونوا ما شفتيها دي بيقع عليها عمل في تنقية الداخل
ليه ما شفتيها
المهم سلامي الحار
|
|