كلمة

آمـال وآلآم ... كلمة

كلمة مـنـك
كنت راجي سنين سماعـه
فاجأتـنـي
زلزلتـنـي
سرجت خيل المشاعـر
هيجت سيل المحاجـر
ياحلات روعة حروفه وياحلاتـك

كلمة في القاموس قديمة
قبلك الناس رددوهـا
ياما في الأشعار قريتها
وياما في الأسمار رويتها
إلا منـك يا أميـرة
الحروف حلوة ومثيـرة
كلما أردد صداها
تحتويني القشعريرة
من عشقتـك
السنين المرة مرت وكنت بحلم تنطقيها
إلا في دنيـا الحقيـقـة
للحروف غير المعاني
ليها منك وقع تانـي
فيها من قلبك محنة
فيها تحقيق الأماني
فيها من روحك موسيقى
فيها نيراني وجناني
إلا شوفي الكان مقدر
يوم لقيتك كنت قبلو خلاص بكيتك
وبيني بينك ألف غابة
غابة سيقانه الكآبـة
ماني خايف من عبورها
وبي سرور أعبر بحورها
إلا بـس خايـف عليكي
أصلو درب العـودة قـاسـي
والغصون النورت حولك زهـورها
غضة كيف أقطع جزورها
كيف أعكر لي صفاها
وكيف أكدر سلسبيله
والطريق السرت فيهو
ما بوصل لي عيونك
فيهو عشت سنين محنة
ما بعرضه للمظنـة
والخـلاصـة
كلمة منك كنت عارفه مستحيلة
أسعدتنـي
عـذبتنـي
حظي أنعم بالموسيقى
وغيري يتمتع حقيقـة
وبرضي راضي
أصلو يا غنية حياتي
حتى لو كان في منامي
أي كلمة حبيبة منك
أي همسة جميلة منك
والعجيب كلمة بحبك
ياحلات روعة حروفه وياحلاتك

اريتها كلمة السرور
ياسنجاوي علي قول حبوباتنا

ياحلات روعة كلماتك يا سنجاوي

سنجاوى اخوى
تحياتى
كلامك سمح

انت ياخوى من شلتناالراجية ليها كلمة حلوة
بس حاول بالتلفون.. ومرة بالبريد لو قدرت
طلعتها منها ابقى ورينا الطريقة

بسم الله الرحمن الرحيم

الشفيف الكثيف/ المرهف سنجاوي

ياخي كلامك دا حلو شديد إنت ما بتتكلم ليه؟

الموصلي الجميل

أخيراً سنارتي قبضت
تعجبك حياتك مع أم وليداتك على قول حبوبتي ست البنات بت سيد أحمد
تحياتي معجونة بتحيات كُحلي

جميل يا سنجاوى
لى قدام

إلى مقام حضرة مولاي الملا عمر

بي زيارتك بيتنا نور

.

العزيز أبو قوتة

لك ودي

ونصيحة لوجه الله
دكتور العيون دا غيرو
وغير النضارة
بعد داك أقرأ القصيدة تاني مرة
وعليك بسياسة النفس الطويل
وغني وراء الشاعر القائل

منى ان تكن حقاً تكن أحسن المنى *** وإلا فقد عشنا بها زمناً رغدا

تحياتي

المرهف سنجاوي

تسمح ليه ادندن بكلمتك..؟
بس دايرين باقي الكلام.. وفي الانتظار



ويلا سلام

العزيز بدر الدين حلاة

حبابك عشرة مليون

أنا بتكلم لكن انت ما بتجي
انت ما بتجيش ليه
ما تبقى تجي ياخي

وأهدي ليك بعض كلامي أدناه

شعـر ... آمــال وآلآم

.

سنجاوي

كيييييفك

كلامك موزون وممكن يتغنى

عايزين قريب نسمع ليك عمل مشترك مع الموصلي

كلمات سنجاوي

وساطة قرجة

الحان واداء الموصلي

حسن الجزولي

جمل الله أيامك
مشكور على حروف الإطراء
مفعولها ساحر

تحياتي

العزيز هوب لس

اتفضل طوالي دندن
بس أخفض صوتك أصلو الكلمة مخطوبة
وخطيبها غيور وبتاع مشاكل
مشكور على الطلة
تشرفنا ياعزيزي

تحياتي

أخي الحبيب سنجاوي

ايها الشاب الخلوق ، جميل المحيا ، معسول الكلام


لك مني اجمل تحية وشوق اشد من حر جدة هذه الأيام


دمت مبدعاً يا رائع

أخوك الجعلي

الحبيب قرجـة

لك الود كله

الشعر عندي هو الغناء المشعور إن صح النجر
فإن لم يصلح للغناء فهو نظم
وساطتك على العين والرأس
إلا البنية مخطوبة
بس أخواتها بايرات أقصد قاعدات

ما تقول لي ذكرتك بقول القائل

ليه يا أخوانا للبيناتنا ما بتراعو
البقول راسو موجعو بتربطولو كراعو

تحياتي

الحبيب الجعلي

الكترااابة
شوق أشد من حر جدة اليومين ديل .. عملت ليك شنو
دا ما حريق عدييييل كدا
الجعلي
لا عدمناك .. متعنا الله بظرفك وذوقك
شاكر وعاجز عن الرد يا ذوووق
بس رجاء صغيروووني
عايزين لمة على حسك
وكان على الجو .. البحر قريييب
ورغم اللهيب فيو همبريييب

تحباتي

عفريتة


ومن عجبي أنـي أحـن إليهمو
وأسأل عنهم من لقيت وهم معي
وتشتاقهم عيني وهم في سوادها
ويشتاقهم قلبي وهم بين أضلعي

..
.
دى ماكلمة بس

دى وونص كمان

تحياتى خالك معكتف مع الزهرات

سلام

الحبيب تبلدينا
شوفتك بقت غالية
مالحكمة في كونك بخيييل
وأهلك أرابيب الندى
تحياتي لك وللخال بناديها
أسبوع وتخلص الامتحانات
عندها نتمنى أن يمتعنا بظهوره

تحياتي

عفريتة ثانية

ماني الحاسد البطلب زوال النعمة من غيرو
إلا حسدت كل نسّام دخل صدرك .. زفرتيهو
وكل حرفاً طلع فرحان يطير انك .. نطقتيهو
وهسة الآن بغير من الألم جواي
عشان انت السبب فيهو

عفريته تالته

ماني الحاسد ..لكن دي كلمه بس ..وكده
لو كانت كلمات كتار كان سويت شنو؟
لك مني كل الود ..وانت في سكتك ..للديوان

..............تحيات بحجم الغياب
الطال ..جرح

شتات

صفي الروح شتات
شوقنا طال .. طااال .. طااااااال

بعض الكلام يحي ويميت ، يسعد ويشقي
وفي الحديث رب كلمة نلفظها ولا نلقي لها بالاً ترمي بصاحبها في النار سبعين خريفاً
بشوية إسقاط رب كلمة تسعد أو تشقي صاحبها العمر كله

تحياتي

رفرشة للحفظ قبل الأرشفة