لقاء اليوم 14/5/2003 مع الاخت الجندريه

الاخوه والاخوات الاعزاء
السلام عليكم جميعاً
لكي تسود الموده والتعارف بين شخصيات المنبر احببت ان اطرح هذا الموضوع
الا وهو لقاء اليوم
حيث اقوم باستضافة احدا شخصيات البورد ونطرح عليه بعض الاسئله على ان يقوم الضيف مشكوراً بالرد عليها
بحيث ان لا تكون هناك تجاريح ولا اسئله استفزازيه والهدف منها فقط التعرف لكي يسود روح الاخوه والصداقه بين رواد هذا المنبر

وضيفتنا اليوم الاخت الجندرية

الاسم ؟
الحالة الاجتماعية ؟
مكان الاقامة الحالى ؟
مكان الاقامة فى السودان ؟
القبيلة ؟
اللون السياسى ؟
سياسي سوداني اعجبك ؟ ولماذا ؟
فنان سوداني اعجبك ؟ ولماذا ؟
شاعر سوداني اعجبك ؟ ولماذا ؟
بيت شعر اعجبك ؟
رايك فى اعضاء البورد ؟

ونترك الساحه ليكم يا شباب

نحن مفروض نتكلم عنها ولا شنو ما فاهمة - انا فاهمة انه هي البترد ولا كيف يا شباب

الاخت الكريمه ام سهى
انتي تسأليها والاخت الجندرية تجاوب عليك
انشاء الله الصوره تكون وضحت
اخوك ابوفاطمه

الأخ ابو فاطمة
الاخت ام سهى
مساكم خير

والله يا ابو فاطمة من الصباح اجي اتاوق والقى اسمي مكتوب والمفاوضات شغالة بينك وبين موصلي وانا زي الاطرش في زفة
هو الحاصل شنو ؟
يعني المفروض اجاوب علي الاسئلة دي ولا شنو بالضبط؟

جاوبى يا جندرية جاوبى

شايفك يالجندرية...زايغة....لييه...
shereef

فكرة طيبة

بس اضيف

لونك المفضل؟ولماذا
ماذا يعني عندك الاتي:
البحر؟
النيل؟
المحيط؟
الارض ؟
الغروب؟
محطات في الذاكرة

خور طقت الثانوية؟
الكوة؟
سكك حديد عطبرة؟
عمر الجزلي؟

رايك في الاتي

بورداب نيروبي؟
بورداب ابخازيا؟
نظرية الافتراض البديهي؟

كلمينا عن الغربة والليل والمطر

الاخت الجندريه
السلام عليكم ورحمه الله
ايوه المفروض تجاوبي على الاسأله الانتي بتري انها مناسبه
ومافي اي مانع انك تمتنعي عن الرد على اي سؤال انتي تشوفيهو محرج بالنسبه ليك
والمقصود من اللقاء ده انو نتقرب منك ونعرفك اكثر وذلك لاسهاماتك في هذا المنبر الشامخ
وبخصوص المناوشات مع الاخ الموصلي
هو كان نبهني الا بعض الاخطاء وانا اتقبلت النقد ده وطلبت من الاخ بكري انو يحذف الموضوع عشان اقدر انزل الموضوع بصوره جديده خاليه من الاخطاء
ولكي مني سلامي
اخوك ابوفاطمه

الأخ أبو فاطمة
شكراً لك ، وأدام الله الود بين أعضاء وعضوات المنتدى
يبدو لي أن كثير من هذه الأسئلة ستجد إجاباتها في البروفايل
بس ما في مانع نعيد ونقول
الاسم : أماني عبد الجليل ( الجندرية )
الحالة الاجتماعية : متزوجة وأم لثلاثة ( ولدين وبنت )
مكان الإقامة الحالي : صنعاء ـ اليمن
مكان الإقامة في السودان : قبل الزواج رفاعة ، وبعد الزواج صارت مقسومة بين أهلي الأوائل في رفاعة وأهلي الجدد ( أهل زوجي ) في أمدرمان.
القبيلة : هسي ؟ لو قلت ليك انو أنا زي سودانيين كتار ما عندي قبلية ، يعني جدودي استرقهم نخاسة من الشمال وتم تحريرهم بعد قانون سنة 1920 وما عارفة جنسنا شنو حيكون رأيك شنو ؟ أنا ضُبيانه ودي طبعاً قبيلة مجهولة لناس كتار من الذين يستقون معلوماتهم عن تاريخ السودان من الكتب المدرسية ولان كتاب التاريخ للصف الثالث ثانوي علي أيامنا ـ هسي ما عارفة الحاصل شنو ـ كان به خطأ مطبعي في كتابة اسم القبيلة التي خاضت معارك ضد الخليفة عبد الله التعايشي بقيادة عوض الكريم ود زايد ومحمود ود زايد وكتبت الصبانية ففقد جيل كامل من السودانيين / ات فرصتهم في معرفتها وهي قبيلة عربية تسكن بشكل اساسي منطقة البطانة ما بين النيل الازرق ونهر عطبرة ولهم جيوب هنا وهناك كحال القبائل السودانية ، لكن دعني اقول باني بقدر ما افخر بانتسابي للضباينة بشجاعتهم وكرمهم المنقطع النظير ( سمعت بي قدح ود زايد شحم البل الدرر؟ ) الا انني عندما افكر في تلك الشريحة التي حاولت ان انتسب لها في البداية احس بالعار وبضرورة تكفيري عن فعلة إجدادي البشعة . رغم انه في ذلك الزمن كان مبرراً ما فعلوه ، لكني والله خجلى ولا اعرف سبيلاً للتكفير عن ذلك سوى إدانتي للرق والاسترقاق وما افرزه من واقع معقد ومنظومة قيم غير عادلة وغير إنسانية .

اللون السياسى : تعرف يا ود امي نحن السياسة دي اخترنا لوننا بدري وهسي من كترت الغسيل خلاص بقينا بلا لون .. لكن ان كان ولابد يعني خليني اقول ديمقراطية

سياسي سوداني اعجبك ؟ ولماذا ؟ اعجبني كيف دي ؟ في ناس تعجبك مواقفهم وما تفق مع افكارهم وناس تعجبك افكارهم ما تتفق مع مواقفهم .
فنان سوداني اعجبك ؟ ولماذا ؟
شاعر سوداني اعجبك ؟ ولماذا ؟
بيت شعر اعجبك ؟
الفنان / ة والشاعر / ة وبيت الشعر ، ديل كتار جداً وغالباً الاعجاب ده تتحكم فيهو حاجات كتيرة ومتغيرة يعني عمرك وزمنك الداخلي وانت بتسمع ولا بتقرأ و .... و ... الخ ؛ عشان كدا مافي حاجة محددة .
رايك فى اعضاء البورد ؟
والله بحبهم كلهم حتى الجماعة اللمن تشوف اسمهم تتحسبن وتتحوقل وتقرأ ( وجعلنا من بين ايديهم سدا .. )

المناكف امدرماني
زايغة من جنس لسانكم دا

الاخ دكين
تحياتي طبعاً انت من العينة اللي الواحد لازم يقرأ ويتحسبن من ما يشوف اسمها
لوووووووووول

ابو يسرا
عاد نشن أقول الغربة ما انت غرقان في مطر ليلها
تاااااااني عايز سيرتها ؟

الاخت الجندرية تحياتي

بس حبيت اسالك من معني التوقيع حقك ده صراحة قراية ما قادر اقراهو ؟؟

ولكي كل الود والاحترام

[erd]

صديقتي الغالية أماني بت عبدالجليل

تحياتي

أماني وتراث ثنائي أسهما في إنارة فوانيس ورتاين الإبداع الأدبي والثقافي بالفرع أيام كانت حنينة وسكرة مع كوكبة خيرة من أبناء وبنات الوطن الذين حظيوا بموهبة الكتابة ونهم القراءة، وسؤالي أو في الحقيقة طلبي أن تصفي لناتلك الفترة ووأولئك المبدعين والمبدعات وأين هم الآن.ه

مع تحيات نادوس
============

الجندريه..تذكرينى بكثير من الصديقات القابضات على جمر الجندر ..و هو حراق للغايه خاصه فى بلاد زى السودان لا فرق فيها بين الجندر و الجردل والحرجل, اسئله ارجو الاجابه عليها بكل الصراحه الممكنه:
من محيطى الضيق رايت كثير من الشبان والشابات متلئين بالرغبه والحماس لنوع حياه /علاقه/شراكه مختلف.. ولا تنقصهم المعرفه والزاد النظري...بمجرد دخول مرحلة القرار والتنفيذ تتساقط كل الاطر النظريه ويطلع من جوه الحبوبه والجد القاعد من سنوات, امثله: الشابه تقبل او تختار الثري غض النظر عن المعايير الاخري.. و تتحول الى ربة منزل و فقاسه مزوده بعض كلمات الانجليزي التى تحشرها هنا و هناك..او الشاب المتفتح ...بعد الزواج والمرحله الاولى تعدى يتحول اى باشا حقيقي يآمر و ينهى و تصل فى الغالب الاعم الى مرحلة العنف البدنى تجاه الزوجه بالطبع اذا حاولت هذه" المقاومه"..اين تكمن المشكله...بالطبع لدي بعض التفسيرات, لكن افضل سماع وجهة نظرك و النساء الاخريات من واقع الحولهم..
و...اتجندرى وعين الله ترعاك...صفرجت

الأخ الساحر
توقيعي مأخوذ من انشاد عرفاني كانت تؤديه الراحلة اخلاص همت
وكنت احس بتلك الانورا الباهرة تغمرني حين اسمعه في ظلامات وحدتي وغربتي
الف نور ورحمة تنزل عليها
لكنني اخترته وانا اعني به البورد الذي جمعنا في جمعة مباركة فتفرقت احزاننا
وهذا هو النص كاملاً


يا مرحبا يا مرحبا يا مرحبا * هذا الحبيب أتى وكان مغيبا

فتبينت أنواره في ذاتنا * لما فنينا فيه وانكشف الخبا

صبغت إرادته الخلائق كلهم * بوجوده لما تجلى في القبا

يا طالما قد كان عنا غائبا * فينا ولم نشعر به فأتى النبا

هذا المليح وهذه أوصافه * كم أطلعت منه لقلبي كوكبا

وسرى نسيم الروح في أحشائنا * فأمالنا طربنا كأغصان الربا

وبه انجمعنا يوم جمعة وصله * وتفرقت أحزاننا أيدي سبا

وهو الذي عنا أزال غياهبا * منها وبالنور المبين لنا بدا

لا نستطيع نراه وهو الشمس في * إشراقه وجميعنا فيه الهبا

وتبارك الله الذي هو واحد * أحد إليه كل ذي قلب صبا

بجلاله فتن العقول وفاتن * بجماله كل الحواس تحببا

سؤالين
لماذا لا تجلبي لنا ايما عبد الغفور؟
ولماذا لا تعيدين الينا ابو مهيار؟

جندربة ، با أماني يا تراثيه


لك الحب بقدر ما يجعل (عثمان) يحك رأسه و يغني


أردد سؤال (شيري) .. هلا حكيت لنا عن ذكريات أيام (الفرع) توثيقاً للتجربه ، إنعاشاً لنمل النوستالجيا في هذا الزمان (الصحافي) الحارق ؟


منوت المنتظر

ابنوسة
وسفرجت
ساعود لكما بالتفصيل
يا موصلي
ايمان انا زاتي ما لامه فيها خلي المها فيك
انت امكن تكون بتلاقيها في الماسنجر اكتر مني
اما ابو مهيار فهو في هذه اللحظة اون لاين

منوت العزيز جداً
ساعود للحكي عن تلك الايام ولو ان ليالي الغربة اورثتني الزهايمر مبكراً

اختنا \ جندريه

لقد صدق توقعى باجاباتك الذكيه على بعض الاسئله , وما تسألينى عن السبب .. لقد استمتعت جدا على العموم بهذا اللقاء , فقد اضاف لى حديثك الراقى اضاءة جديده حولك

تحياتى واحترامى الكتير
اخوك\حسن

د. حسن
ان كان ثمة ما يسعدني في هذا اللقاء هو انه جلب لك بعض المتعة
وما دام قلت ما اسأل عن الاسباب خلاص خليناها
مشكووووووور يا سيدي

الاخ ابوفاطمة
موضوعك شيق وجميل واول مرة انتبه صراحة

وعندي اسئلة للاخت الجندرية
كيفك اول شي؟
جاهزة
!! لووول
اتخرجتي من اي جامعة ؟
متى اخر مرة زرتي فيها السودان؟
ما اكثر شي بتفتقديه في السودان؟
ما أصعب ما تقاسيه في اليمن الغربة؟

عندي اسئلة كتيييييرة
اصله باقي انا سئاااااالة لمن غلط
والغلط ده قاعد شفته قبل كده

يلا جاوبي
تحياتي

اختي هوزي
يا صاحبة الدمعة الحزينه
اشكركي على مرورك بحلتنا واشكرك على الاسأله الاخت الجندرية
ولمعلوماتك مدام انك ماشفتي الموضوع ده
فقد سبق وان عملنا لقاء مع الاخ الموصلي, ودشاموق, جدو, بكري ابوبكر, دكتور ابكر ادم اسماعيل, خالد عويس, كين وضيفت اليوم
وانشاء الله الدور جاييك ما تستعجلي
اخوكي ابوفاطمه

Salllaaaaaamaaaaatttttt Ya Amani(Khalti Amani lool)

I can not believe my eyes seeing your lovely child in here as we couldn't see you live for ages.

Thanx abu fatma for doing what you are doing, because you have made me to meet my unti which I haven't seen or heard from her for years and years.

I will send you an email ya Amani and have a long wanasa fei al net insha allah.

Ibn Lutfi...wad Maryem bit Ahmed wad Abdul-Gafar
Manchester UK

jandarya............. still waiting, hope you would find time to write
salam
safrajat

لزمني اعتذار لكل الجميلين / ات
الذين شاركوا / ن في هذا البوست الحميم
لم استطع العودة للرد على بعض الاسئلة لشغال ما
ولو ما خايفة من الاتهام بالنرجسية
مع الناس النفسها سخن في نهاية رمضان دي
كان رديت عليكم فرداً فرداً
اعتذاري ومحتبي
وبالمناسبة يا أبو فاطمة مالك خليت البوست الظريف دا .. كنا هسي عرفنا ناس كتااااااار
خواتم مباركة للجميع

العزيزه الجنادريه
والله ما تركته ولكن انشغلت بامور الحياه التي لا تنتهي
ولكن اسأل الله العلي القدير ان يمكنني بان اعود اليكم لالتقي بكم من جديد
ولكي خالص احترامي
ورمضان كريم
تصومي وتفطري على خير
ابوفاطمه